4. கஸிபா⁴ரத்³வாஜஸுத்தவண்ணனா

ஏவம் மே ஸுதந்தி கஸிபா⁴ரத்³வாஜஸுத்தம். கா உப்பத்தி? ப⁴க³வா மக³தே⁴ஸு விஹரந்தோ த³க்கி²ணாகி³ரிஸ்மிம் ஏகனாலாயம் ப்³ராஹ்மணகா³மே புரேப⁴த்தகிச்சம் பச்சா²ப⁴த்தகிச்சந்தி இமேஸு த்³வீஸு பு³த்³த⁴கிச்சேஸு புரேப⁴த்தகிச்சம் நிட்டா²பேத்வா பச்சா²ப⁴த்தகிச்சாவஸானே பு³த்³த⁴சக்கு²னா லோகம் வோலோகேந்தோ கஸிபா⁴ரத்³வாஜம் ப்³ராஹ்மணம் அரஹத்தஸ்ஸ உபனிஸ்ஸயஸம்பன்னம் தி³ஸ்வா ‘‘தத்த² மயி க³தே யதா² பவத்திஸ்ஸதி, ததோ கதா²வஸானே த⁴ம்மதே³ஸனம் ஸுத்வா ஏஸ ப்³ராஹ்மணோ பப்³ப³ஜித்வா அரஹத்தம் பாபுணிஸ்ஸதீ’’தி ச ஞத்வா, தத்த² க³ந்த்வா, கத²ம் ஸமுட்டா²பேத்வா, இமம் ஸுத்தம் அபா⁴ஸி.

தத்த² ஸியா ‘‘கதமம் பு³த்³தா⁴னம் புரேப⁴த்தகிச்சம், கதமம் பச்சா²ப⁴த்தகிச்ச’’ந்தி? வுச்சதே – பு³த்³தோ⁴ ப⁴க³வா பாதோ ஏவ உட்டா²ய உபட்டா²கானுக்³க³ஹத்த²ம் ஸரீரபா²ஸுகத்த²ஞ்ச முக²தோ⁴வனாதி³ஸரீரபரிகம்மம் கத்வா யாவ பி⁴க்கா²சாரவேலா, தாவ விவித்தாஸனே வீதினாமேத்வா, பி⁴க்கா²சாரவேலாய நிவாஸேத்வா, காயப³ந்த⁴னம் ப³ந்தி⁴த்வா, சீவரம் பாருபித்வா, பத்தமாதா³ய கதா³சி ஏககோவ கதா³சி பி⁴க்கு²ஸங்க⁴பரிவுதோ கா³மம் வா நிக³மம் வா பிண்டா³ய பவிஸதி, கதா³சி பகதியா, கதா³சி அனேகேஹி பாடிஹாரியேஹி வத்தமானேஹி. ஸேய்யதி²த³ம் – பிண்டா³ய பவிஸதோ லோகனாத²ஸ்ஸ புரதோ புரதோ க³ந்த்வா முது³க³தியோ வாதா பத²விம் ஸோதே⁴ந்தி; வலாஹகா உத³கபு²ஸிதானி முஞ்சந்தா மக்³கே³ ரேணும் வூபஸமேத்வா உபரி விதானம் ஹுத்வா திட்ட²ந்தி. அபரே வாதா புப்பா²னி உபஸம்ஹரித்வா மக்³கே³ ஓகிரந்தி, உன்னதா பூ⁴மிப்பதே³ஸா ஓனமந்தி, ஓனதா உன்னமந்தி, பாத³னிக்கே²பஸமயே ஸமாவ பூ⁴மி ஹோதி, ஸுக²ஸம்ப²ஸ்ஸானி ரத²சக்கமத்தானி பது³மபுப்பா²னி வா பாதே³ ஸம்படிச்ச²ந்தி, இந்த³கீ²லஸ்ஸ அந்தோ ட²பிதமத்தே த³க்கி²ணபாதே³ ஸரீரா ச²ப்³ப³ண்ணரஸ்மியோ நிச்ச²ரித்வா ஸுவண்ணரஸபிஞ்ஜரானி விய சித்ரபடபரிக்கி²த்தானி விய ச பாஸாத³கூடாகா³ராதீ³னி கரோந்தியோ இதோ சிதோ ச விதா⁴வந்தி, ஹத்தி²அஸ்ஸவிஹங்கா³த³யோ ஸகஸகட்டா²னேஸு டி²தாயேவ மது⁴ரேனாகாரேன ஸத்³த³ம் கரோந்தி, ததா² பே⁴ரிவீணாதீ³னி தூரியானி மனுஸ்ஸானம் காயூபகா³னி ச ஆப⁴ரணானி, தேன ஸஞ்ஞாணேன மனுஸ்ஸா ஜானந்தி ‘‘அஜ்ஜ ப⁴க³வா இத⁴ பிண்டா³ய பவிட்டோ²’’தி. தே ஸுனிவத்தா² ஸுபாருதா க³ந்த⁴புப்பா²தீ³னி ஆதா³ய க⁴ரா நிக்க²மித்வா அந்தரவீதி²ம் படிபஜ்ஜித்வா ப⁴க³வந்தம் க³ந்த⁴புப்பா²தீ³ஹி ஸக்கச்சம் பூஜேத்வா வந்தி³த்வா – ‘‘அம்ஹாகம், ப⁴ந்தே, த³ஸ பி⁴க்கூ², அம்ஹாகம் வீஸதி, அம்ஹாகம் பி⁴க்கு²ஸதம் தே³தா²’’தி யாசித்வா ப⁴க³வதோபி பத்தம் க³ஹேத்வா, ஆஸனம் பஞ்ஞாபேத்வா ஸக்கச்சம் பிண்ட³பாதேன படிமானேந்தி.

ப⁴க³வா கதப⁴த்தகிச்சோ தேஸம் ஸந்தானானி ஓலோகேத்வா ததா² த⁴ம்மம் தே³ஸேதி, யதா² கேசி ஸரணக³மனே பதிட்ட²ஹந்தி, கேசி பஞ்சஸு ஸீலேஸு, கேசி ஸோதாபத்திஸகதா³கா³மிஅனாகா³மிப²லானம் அஞ்ஞதரஸ்மிம், கேசி பப்³ப³ஜித்வா அக்³க³ப²லே அரஹத்தேதி. ஏவம் ததா² ததா² ஜனம் அனுக்³க³ஹேத்வா உட்டா²யாஸனா விஹாரம் க³ச்ச²தி. தத்த² மண்ட³லமாளே பஞ்ஞத்தவரபு³த்³தா⁴ஸனே நிஸீத³தி பி⁴க்கூ²னம் ப⁴த்தகிச்சபரியோஸானம் ஆக³மயமானோ. ததோ பி⁴க்கூ²னம் ப⁴த்தகிச்சபரியோஸானே உபட்டா²கோ ப⁴க³வதோ நிவேதே³தி. அத² ப⁴க³வா க³ந்த⁴குடிம் பவிஸதி. இத³ம் தாவ புரேப⁴த்தகிச்சம். யஞ்சேத்த² ந வுத்தம், தம் ப்³ரஹ்மாயுஸுத்தே வுத்தனயேனேவ க³ஹேதப்³ப³ம்.

அத² ப⁴க³வா ஏவம் கதபுரேப⁴த்தகிச்சோ க³ந்த⁴குடியா உபட்டா²னே நிஸீதி³த்வா, பாதே³ பக்கா²லேத்வா, பாத³பீடே² ட²த்வா, பி⁴க்கு²ஸங்க⁴ம் ஓவத³தி – ‘‘பி⁴க்க²வே, அப்பமாதே³ன ஸம்பாதே³த², பு³த்³து⁴ப்பாதோ³ து³ல்லபோ⁴ லோகஸ்மிம், மனுஸ்ஸபடிலாபோ⁴ து³ல்லபோ⁴, ஸத்³தா⁴ஸம்பத்தி து³ல்லபா⁴, பப்³ப³ஜ்ஜா து³ல்லபா⁴, ஸத்³த⁴ம்மஸ்ஸவனம் து³ல்லப⁴ம் லோகஸ்மி’’ந்தி. ததோ பி⁴க்கூ² ப⁴க³வந்தம் வந்தி³த்வா கம்மட்டா²னம் புச்ச²ந்தி. அத² ப⁴க³வா பி⁴க்கூ²னம் சரியவஸேன கம்மட்டா²னம் தே³தி. தே கம்மட்டா²னம் உக்³க³ஹேத்வா, ப⁴க³வந்தம் அபி⁴வாதே³த்வா, அத்தனோ அத்தனோ வஸனட்டா²னம் க³ச்ச²ந்தி; கேசி அரஞ்ஞம், கேசி ருக்க²மூலம், கேசி பப்³ப³தாதீ³னம் அஞ்ஞதரம், கேசி சாதுமஹாராஜிகப⁴வனம்…பே… கேசி வஸவத்திப⁴வனந்தி. ததோ ப⁴க³வா க³ந்த⁴குடிம் பவிஸித்வா ஸசே ஆகங்க²தி, த³க்கி²ணேன பஸ்ஸேன ஸதோ ஸம்பஜானோ முஹுத்தம் ஸீஹஸேய்யம் கப்பேதி. அத² ஸமஸ்ஸாஸிதகாயோ உட்ட²ஹித்வா து³தியபா⁴கே³ லோகம் வோலோகேதி. ததியபா⁴கே³ யம் கா³மம் வா நிக³மம் வா உபனிஸ்ஸாய விஹரதி, தத்த² ஜனோ புரேப⁴த்தம் தா³னம் த³த்வா பச்சா²ப⁴த்தம் ஸுனிவத்தோ² ஸுபாருதோ க³ந்த⁴புப்பா²தீ³னி ஆதா³ய விஹாரே ஸன்னிபததி. ததோ ப⁴க³வா ஸம்பத்தபரிஸாய அனுரூபேன பாடிஹாரியேன க³ந்த்வா த⁴ம்மஸபா⁴யம் பஞ்ஞத்தவரபு³த்³தா⁴ஸனே நிஸஜ்ஜ த⁴ம்மம் தே³ஸேதி காலயுத்தம் பமாணயுத்தம். அத² காலம் விதி³த்வா பரிஸம் உய்யோஜேதி.

ததோ ஸசே க³த்தானி ஓஸிஞ்சிதுகாமோ ஹோதி. அத² பு³த்³தா⁴ஸனா உட்டா²ய உபட்டா²கேன உத³கபடியாதி³தோகாஸம் க³ந்த்வா, உபட்டா²கஹத்த²தோ உத³கஸாடிகம் க³ஹேத்வா, ந்ஹானகோட்ட²கம் பவிஸதி. உபட்டா²கோபி பு³த்³தா⁴ஸனம் ஆனேத்வா க³ந்த⁴குடிபரிவேணே பஞ்ஞாபேதி. ப⁴க³வா க³த்தானி ஓஸிஞ்சித்வா, ஸுரத்தது³பட்டம் நிவாஸேத்வா, காயப³ந்த⁴னம் ப³ந்தி⁴த்வா, உத்தராஸங்க³ம் கத்வா, தத்த² ஆக³ந்த்வா, நிஸீத³தி ஏககோவ முஹுத்தம் படிஸல்லீனோ. அத² பி⁴க்கூ² ததோ ததோ ஆக³ம்ம ப⁴க³வதோ உபட்டா²னம் க³ச்ச²ந்தி. தத்த² ஏகச்சே பஞ்ஹம் புச்ச²ந்தி, ஏகச்சே கம்மட்டா²னம், ஏகச்சே த⁴ம்மஸ்ஸவனம் யாசந்தி. ப⁴க³வா தேஸம் அதி⁴ப்பாயம் ஸம்பாதே³ந்தோ பட²மம் யாமம் வீதினாமேதி.

மஜ்ஜி²மயாமே ஸகலத³ஸஸஹஸ்ஸிலோகதா⁴துதே³வதாயோ ஓகாஸம் லப⁴மானா ப⁴க³வந்தம் உபஸங்கமித்வா பஞ்ஹம் புச்ச²ந்தி யதா²பி⁴ஸங்க²தம் அந்தமஸோ சதுரக்க²ரம்பி. ப⁴க³வா தாஸம் தே³வதானம் பஞ்ஹம் விஸ்ஸஜ்ஜேந்தோ மஜ்ஜி²மயாமம் வீதினாமேதி. ததோ பச்சி²மயாமம் சத்தாரோ பா⁴கே³ கத்வா ஏகம் பா⁴க³ம் சங்கமம் அதி⁴ட்டா²தி, து³தியபா⁴க³ம் க³ந்த⁴குடிம் பவிஸித்வா த³க்கி²ணேன பஸ்ஸேன ஸதோ ஸம்பஜானோ ஸீஹஸேய்யம் கப்பேதி, ததியபா⁴க³ம் ப²லஸமாபத்தியா வீதினாமேதி, சதுத்த²பா⁴க³ம் மஹாகருணாஸமாபத்திம் பவிஸித்வா பு³த்³த⁴சக்கு²னா லோகம் வோலோகேதி அப்பரஜக்க²மஹாரஜக்கா²தி³ஸத்தத³ஸ்ஸனத்த²ம். இத³ம் பச்சா²ப⁴த்தகிச்சம்.

ஏவமிமஸ்ஸ பச்சா²ப⁴த்தகிச்சஸ்ஸ லோகவோலோகனஸங்கா²தே சதுத்த²பா⁴கா³வஸானே பு³த்³த⁴த⁴ம்மஸங்கே⁴ஸு தா³னஸீலஉபோஸத²கம்மாதீ³ஸு ச அகதாதி⁴காரே கதாதி⁴காரே ச அனுபனிஸ்ஸயஸம்பன்னே உபனிஸ்ஸயஸம்பன்னே ச ஸத்தே பஸ்ஸிதும் பு³த்³த⁴சக்கு²னா லோகம் வோலோகேந்தோ கஸிபா⁴ரத்³வாஜம் ப்³ராஹ்மணம் அரஹத்தஸ்ஸ உபனிஸ்ஸயஸம்பன்னம் தி³ஸ்வா ‘‘தத்த² மயி க³தே கதா² பவத்திஸ்ஸதி, ததோ கதா²வஸானே த⁴ம்மதே³ஸனம் ஸுத்வா ஏஸ ப்³ராஹ்மணோ பப்³ப³ஜித்வா அரஹத்தம் பாபுணிஸ்ஸதீ’’தி ச ஞத்வா, தத்த² க³ந்த்வா, கத²ம் ஸமுட்டா²பேத்வா இமம் ஸுத்தமபா⁴ஸி.

தத்த² ஏவம் மே ஸுதந்திஆதி³ ஆயஸ்மதா ஆனந்தே³ன பட²மமஹாஸங்கீ³திகாலே த⁴ம்மஸங்கீ³திம் கரோந்தேன ஆயஸ்மதா மஹாகஸ்ஸபத்தே²ரேன புட்டே²ன பஞ்சன்னம் அரஹந்தஸதானம் வுத்தம், ‘‘அஹம், கோ², ஸமண கஸாமி ச வபாமி சா’’தி கஸிபா⁴ரத்³வாஜேன வுத்தம், ‘‘அஹம்பி கோ² ப்³ராஹ்மண கஸாமி ச வபாமி சா’’திஆதி³ ப⁴க³வதா வுத்தம். ததே³தம் ஸப்³ப³ம்பி ஸமோதா⁴னேத்வா ‘‘கஸிபா⁴ரத்³வாஜஸுத்த’’ந்தி வுச்சதி.

தத்த² ஏவந்தி அயம் ஆகாரனித³ஸ்ஸனாவதா⁴ரணத்தோ² ஏவம்-ஸத்³தோ³. ஆகாரத்தே²ன ஹி ஏதேன ஏதமத்த²ம் தீ³பேதி – நானானயனிபுணமனேகஜ்ஜா²ஸயஸமுட்டா²னம் அத்த²ப்³யஞ்ஜனஸம்பன்னம் விவித⁴பாடிஹாரியம் த⁴ம்மத்த²தே³ஸனாபடிவேத⁴க³ம்பீ⁴ரம் ஸப்³ப³ஸத்தேஹி ஸகஸகபா⁴ஸானுரூபமுபலக்க²ணியஸபா⁴வம் தஸ்ஸ ப⁴க³வதோ வசனம், தம் ஸப்³பா³காரேன கோ ஸமத்தோ² விஞ்ஞாதும்; அத², கோ², ‘‘ஏவம் மே ஸுதம், மயாபி ஏகேனாகாரேன ஸுத’’ந்தி. நித³ஸ்ஸனத்தே²ன ‘‘நாஹம் ஸயம்பூ⁴, ந மயா இத³ம் ஸச்சி²கத’’ந்தி அத்தானம் பரிமோசேந்தோ ‘‘ஏவம் மே ஸுதம், மயா ஏவம் ஸுத’’ந்தி இதா³னி வத்தப்³ப³ம் ஸகலஸுத்தம் நித³ஸ்ஸேதி. அவதா⁴ரணத்தே²ன ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் ப³ஹுஸ்ஸுதானம் யதி³த³ம் ஆனந்தோ³, க³திமந்தானம், ஸதிமந்தானம், தி⁴திமந்தானம், உபட்டா²கானம் யதி³த³ம் ஆனந்தோ³’’தி (அ. நி. 1.219-223) ஏவம் ப⁴க³வதா பஸத்த²பா⁴வானுரூபம் அத்தனோ தா⁴ரணப³லம் த³ஸ்ஸேந்தோ ஸத்தானம் ஸோதுகம்யதம் ஜனேதி ‘‘ஏவம் மே ஸுதம் தஞ்ச அத்த²தோ வா ப்³யஞ்ஜனதோ வா அனூனமனதி⁴கம், ஏவமேவ, ந அஞ்ஞதா² த³ட்ட²ப்³ப³’’ந்தி. மே ஸுதந்தி ஏத்த² மயாஸத்³த³த்தோ² மே-ஸத்³தோ³, ஸோதத்³வாரவிஞ்ஞாணத்தோ² ஸுதஸத்³தோ³. தஸ்மா ஏவம் மே ஸுதந்தி ஏவம் மயா ஸோதவிஞ்ஞாணபுப்³ப³ங்க³மாய விஞ்ஞாணவீதி²யா உபதா⁴ரிதந்தி வுத்தம் ஹோதி.

ஏகம் ஸமயந்தி ஏகம் காலம். ப⁴க³வாதி பா⁴க்³யவா, ப⁴க்³க³வா, ப⁴த்தவாதி வுத்தம் ஹோதி. மக³தே⁴ஸு விஹரதீதி மக³தா⁴ நாம ஜனபதி³னோ ராஜகுமாரா, தேஸம் நிவாஸோ ஏகோபி ஜனபதோ³ ருள்ஹீஸத்³தே³ன ‘‘மக³தா⁴’’தி வுச்சதி. தஸ்மிம் மக³தே⁴ஸு ஜனபதே³. கேசி பன ‘‘யஸ்மா சேதியராஜா முஸாவாத³ம் ப⁴ணித்வா பூ⁴மிம் பவிஸந்தோ ‘மா க³த⁴ம் பவிஸா’தி வுத்தோ, யஸ்மா வா தம் ராஜானம் மக்³க³ந்தா பூ⁴மிம் க²னந்தா புரிஸா ‘மா க³த⁴ம் கரோதா²’தி வுத்தா, தஸ்மா மக³தா⁴’’தி ஏவமாதீ³ஹி நயேஹி ப³ஹுதா⁴ பபஞ்சேந்தி. யம் ருச்சதி, தம் க³ஹேதப்³ப³ந்தி. விஹரதீதி ஏகம் இரியாபத²பா³த⁴னம் அபரேன இரியாபதே²ன விச்சி²ந்தி³த்வா அபரிபதந்தம் அத்தபா⁴வம் ஹரதி, பவத்தேதீதி வுத்தம் ஹோதி. தி³ப்³ப³ப்³ரஹ்மஅரியவிஹாரேஹி வா ஸத்தானம் விவித⁴ம் ஹிதம் ஹரதீதி விஹரதி. ஹரதீதி உபஸம்ஹரதி, உபனேதி, ஜனேதி, உப்பாதே³தீதி வுத்தம் ஹோதி. ததா² ஹி யதா³ ஸத்தா காமேஸு விப்படிபஜ்ஜந்தி, ததா³ கிர ப⁴க³வா தி³ப்³பே³ன விஹாரேன விஹரதி தேஸம் அலோப⁴குஸலமூலுப்பாத³னத்த²ம் – ‘‘அப்பேவ நாம இமம் படிபத்திம் தி³ஸ்வா ஏத்த² ருசிம் உப்பாதே³த்வா காமேஸு விரஜ்ஜேய்யு’’ந்தி. யதா³ பன இஸ்ஸரியத்த²ம் ஸத்தேஸு விப்படிபஜ்ஜந்தி, ததா³ ப்³ரஹ்மவிஹாரேன விஹரதி தேஸம் அதோ³ஸகுஸலமூலுப்பாத³னத்த²ம் – ‘‘அப்பேவ நாம இமம் படிபத்திம் தி³ஸ்வா ஏத்த² ருசிம் உப்பாதே³த்வா அதோ³ஸேன தோ³ஸம் வூபஸமேய்யு’’ந்தி. யதா³ பன பப்³ப³ஜிதா த⁴ம்மாதி⁴கரணம் விவத³ந்தி, ததா³ அரியவிஹாரேன விஹரதி தேஸம் அமோஹகுஸலமூலுப்பாத³னத்த²ம் – ‘‘அப்பேவ நாம இமம் படிபத்திம் தி³ஸ்வா ஏத்த² ருசிம் உப்பாதே³த்வா அமோஹேன மோஹம் வூபஸமேய்யு’’ந்தி. இரியாபத²விஹாரேன பன ந கதா³சி ந விஹரதி தம் வினா அத்தபா⁴வபரிஹரணாபா⁴வதோதி. அயமேத்த² ஸங்கே²போ, வித்தா²ரம் பன மங்க³லஸுத்தவண்ணனாயம் வக்கா²ம.

த³க்கி²ணாகி³ரிஸ்மிந்தி யோ ஸோ ராஜக³ஹம் பரிவாரேத்வா டி²தோ கி³ரி, தஸ்ஸ த³க்கி²ணபஸ்ஸே ஜனபதோ³ ‘‘த³க்கி²ணாகி³ரீ’’தி வுச்சதி, தஸ்மிம் ஜனபதே³தி வுத்தம் ஹோதி. தத்த² விஹாரஸ்ஸாபி ததே³வ நாமம். ஏகனாளாயம் ப்³ராஹ்மணகா³மேதி ஏகனாளாதி தஸ்ஸ கா³மஸ்ஸ நாமம். ப்³ராஹ்மணா சேத்த² ஸம்ப³ஹுலா படிவஸந்தி, ப்³ராஹ்மணபோ⁴கோ³ வா ஸோ, தஸ்மா ‘‘ப்³ராஹ்மணகா³மோ’’தி வுச்சதி.

தேன கோ² பன ஸமயேனாதி யம் ஸமயம் ப⁴க³வா அபராஜிதபல்லங்கம் ஆபு⁴ஜித்வா அனுத்தரம் ஸம்மாஸம்போ³தி⁴ம் அபி⁴ஸம்பு³ஜ்ஜி²த்வா பவத்திதவரத⁴ம்மசக்கோ மக³த⁴ரட்டே² ஏகனாளம் ப்³ராஹ்மணகா³மம் உபனிஸ்ஸாய த³க்கி²ணாகி³ரிமஹாவிஹாரே ப்³ராஹ்மணஸ்ஸ இந்த்³ரியபரிபாகம் ஆக³மயமானோ விஹரதி, தேன ஸமயேன கரணபூ⁴தேனாதி வுத்தம் ஹோதி. கோ² பனாதி இத³ம் பனேத்த² நிபாதத்³வயம் பத³பூரணமத்தம், அதி⁴காரந்தரத³ஸ்ஸனத்த²ம் வாதி த³ட்ட²ப்³ப³ம். கஸிபா⁴ரத்³வாஜஸ்ஸ ப்³ராஹ்மணஸ்ஸாதி ஸோ ப்³ராஹ்மணோ கஸியா ஜீவதி, பா⁴ரத்³வாஜோதி சஸ்ஸ கோ³த்தம், தஸ்மா ஏவம் வுச்சதி. பஞ்சமத்தானீதி யதா² – ‘‘போ⁴ஜனே மத்தஞ்ஞூ’’தி ஏத்த² மத்தஸத்³தோ³ பமாணே வத்ததி, ஏவமிதா⁴பி, தஸ்மா பஞ்சபமாணானி அனூனானி அனதி⁴கானி, பஞ்சனங்க³லஸதானீதி வுத்தம் ஹோதி. பயுத்தானீதி பயோஜிதானி, ப³லிப³த்³தா³னம் க²ந்தே⁴ஸு ட²பேத்வா யுகே³ யோத்தேஹி யோஜிதானி ஹோந்தீதி அத்தோ².

வப்பகாலேதி வபனகாலே, பீ³ஜனிக்கி²பகாலேதி வுத்தம் ஹோதி. தத்த² த்³வே வப்பானி கலலவப்பஞ்ச, பம்ஸுவப்பஞ்ச. பம்ஸுவப்பம் இத⁴ அதி⁴ப்பேதம். தஞ்ச கோ² பட²மதி³வஸே மங்க³லவப்பம். தத்தா²யம் உபகரணஸம்பதா³ – தீணி ப³லிப³த்³த³ஸஹஸ்ஸானி உபட்டா²பிதானி ஹோந்தி, ஸப்³பே³ஸம் ஸுவண்ணமயானி ஸிங்கா³னி படிமுக்கானி, ரஜதமயா கு²ரா, ஸப்³பே³ ஸேதமாலாஹி ஸப்³ப³க³ந்த⁴ஸுக³ந்தே⁴ஹி பஞ்சங்கு³லிகேஹி ச அலங்கதா பரிபுண்ணங்க³பச்சங்கா³ ஸப்³ப³லக்க²ணஸம்பன்னா, ஏகச்சே காளா அஞ்ஜனவண்ணாயேவ, ஏகச்சே ஸேதா ப²லிகவண்ணா, ஏகச்சே ரத்தா பவாளவண்ணா, ஏகச்சே கம்மாஸா மஸாரக³ல்லவண்ணா. பஞ்சஸதா கஸ்ஸகபுரிஸா ஸப்³பே³ அஹதஸேதவத்த²னிவத்தா² மாலாலங்கதா த³க்கி²ணஅம்ஸகூடேஸு ட²பிதபுப்ப²சும்ப³டகா ஹரிதாலமனோஸிலாலஞ்ச²னுஜ்ஜலிதக³த்தபா⁴கா³ த³ஸ த³ஸ நங்க³லா ஏகேககு³ம்பா³ ஹுத்வா க³ச்ச²ந்தி. நங்க³லானம் ஸீஸஞ்ச யுக³ஞ்ச பதோதா³ ச ஸுவண்ணவினத்³தா⁴. பட²மனங்க³லே அட்ட² ப³லிப³த்³தா³ யுத்தா, ஸேஸேஸு சத்தாரோ சத்தாரோ, அவஸேஸா கிலந்தபரிவத்தனத்த²ம் ஆனீதா. ஏகேககு³ம்பே³ ஏகமேகம் பீ³ஜஸகடம் ஏகேகோ கஸதி, ஏகேகோ வபதி.

ப்³ராஹ்மணோ பன பகே³வ மஸ்ஸுகம்மம் காராபேத்வா ந்ஹத்வா ஸுக³ந்த⁴க³ந்தே⁴ஹி விலித்தோ பஞ்சஸதக்³க⁴னகம் வத்த²ம் நிவாஸேத்வா ஸஹஸ்ஸக்³க⁴னகம் ஏகம்ஸம் கரித்வா ஏகமேகிஸ்ஸா அங்கு³லியா த்³வே த்³வே கத்வா வீஸதி அங்கு³லிமுத்³தி³காயோ, கண்ணேஸு ஸீஹகுண்ட³லானி, ஸீஸே ச ப்³ரஹ்மவேட²னம் படிமுஞ்சித்வா ஸுவண்ணமாலம் கண்டே² கத்வா ப்³ராஹ்மணக³ணபரிவுதோ கம்மந்தம் வோஸாஸதி. அத²ஸ்ஸ ப்³ராஹ்மணீ அனேகஸதபா⁴ஜனேஸு பாயாஸம் பசாபேத்வா மஹாஸகடேஸு ஆரோபேத்வா க³ந்தோ⁴த³கேன ந்ஹாயித்வா ஸப்³பா³லங்காரவிபூ⁴ஸிதா ப்³ராஹ்மணீக³ணபரிவுதா கம்மந்தம் அக³மாஸி. கே³ஹம்பிஸ்ஸ ஸப்³ப³த்த² க³ந்தே⁴ஹி ஸுவிலித்தம் புப்பே²ஹி ஸுகதப³லிகம்மம், கே²த்தஞ்ச தேஸு தேஸு டா²னேஸு ஸமுஸ்ஸிதபடாகம் அஹோஸி. பரிஜனகம்மகாரேஹி ஸஹ கம்மந்தம் ஓஸடபரிஸா அட்³ட⁴தேய்யஸஹஸ்ஸா அஹோஸி. ஸப்³பே³ அஹதவத்த²னிவத்தா², ஸப்³பே³ஸஞ்ச பாயாஸபோ⁴ஜனம் படியத்தம் அஹோஸி.

அத² ப்³ராஹ்மணோ யத்த² ஸாமம் பு⁴ஞ்ஜதி, தம் ஸுவண்ணபாதிம் தோ⁴வாபேத்வா பாயாஸஸ்ஸ பூரேத்வா ஸப்பிமது⁴பா²ணிதாதீ³னி அபி⁴ஸங்க²ரித்வா நங்க³லப³லிகம்மம் காராபேஸி. ப்³ராஹ்மணீ பஞ்ச கஸ்ஸகஸதானி ஸுவண்ணரஜதகம்ஸதம்ப³மயானி பா⁴ஜனானி க³ஹேத்வா நிஸின்னானி ஸுவண்ணகடச்சு²ம் க³ஹேத்வா பாயாஸேன பரிவிஸந்தீ க³ச்ச²தி. ப்³ராஹ்மணோ பன ப³லிகம்மம் காராபேத்வா ரத்தஸுவண்ணப³ந்தூ⁴பாஹனாயோ ஆரோஹித்வா ரத்தஸுவண்ணத³ண்ட³ம் க³ஹேத்வா ‘‘இத⁴ பாயாஸம் தே³த², இத⁴ ஸப்பிம், இத⁴ ஸக்க²ரம் தே³தா²’’தி வோஸாஸமானோ விசரதி. அத² ப⁴க³வா க³ந்த⁴குடியம் நிஸின்னோவ ப்³ராஹ்மணஸ்ஸ பரிவேஸனம் வத்தமானம் ஞத்வா ‘‘அயம் காலோ ப்³ராஹ்மணம் த³மேது’’ந்தி நிவாஸேத்வா, காயப³ந்த⁴னம் ப³ந்தி⁴த்வா, ஸங்கா⁴டிம் பாருபித்வா, பத்தம் க³ஹேத்வா, க³ந்த⁴குடிதோ நிக்க²மி யதா² தம் அனுத்தரோ புரிஸத³ம்மஸாரதி². தேனாஹ ஆயஸ்மா ஆனந்தோ³ ‘‘அத² கோ² ப⁴க³வா புப்³ப³ண்ஹஸமயம் நிவாஸேத்வா’’தி.

தத்த² அத² இதி நிபாதோ அஞ்ஞாதி⁴காரவசனாரம்பே⁴ கோ²தி பத³பூரணே. ப⁴க³வாதி வுத்தனயமேவ. புப்³ப³ண்ஹஸமயந்தி தி³வஸஸ்ஸ புப்³ப³பா⁴க³ஸமயம், புப்³ப³ண்ஹஸமயேதி அத்தோ², புப்³ப³ண்ஹே வா ஸமயம் புப்³ப³ண்ஹஸமயம், புப்³ப³ண்ஹே ஏகம் க²ணந்தி வுத்தம் ஹோதி. ஏவம் அச்சந்தஸம்யோகே³ உபயோக³வசனம் லப்³ப⁴தி. நிவாஸேத்வாதி பரித³ஹித்வா, விஹாரனிவாஸனபரிவத்தனவஸேனேதம் வேதி³தப்³ப³ம். ந ஹி ப⁴க³வா ததோ புப்³பே³ அனிவத்தோ² ஆஸி. பத்தசீவரமாதா³யாதி பத்தம் ஹத்தே²ஹி, சீவரம் காயேன ஆதி³யித்வா, ஸம்படிச்சி²த்வா தா⁴ரேத்வாதி அத்தோ². ப⁴க³வதோ கிர பிண்டா³ய பவிஸிதுகாமஸ்ஸ ப⁴மரோ விய விகஸிதபது³மத்³வயமஜ்ஜ²ம், இந்த³னீலமணிவண்ணம் ஸேலமயம் பத்தம் ஹத்த²த்³வயமஜ்ஜ²ம் ஆக³ச்ச²தி. தஸ்மா ஏவமாக³தம் பத்தம் ஹத்தே²ஹி ஸம்படிச்சி²த்வா சீவரஞ்ச பரிமண்ட³லம் பாருதம் காயேன தா⁴ரேத்வாதி ஏவமஸ்ஸ அத்தோ² வேதி³தப்³போ³. யேன வா தேன வா ஹி பகாரேன க³ண்ஹந்தோ ஆதா³ய இச்சேவ வுச்சதி யதா² ‘‘ஸமாதா³யேவ பக்கமதீ’’தி.

யேனாதி யேன மக்³கே³ன. கம்மந்தோதி கம்மகரணோகாஸோ. தேனாதி தேன மக்³கே³ன. உபஸங்கமீதி க³தோ, யேன மக்³கே³ன கஸிபா⁴ரத்³வாஜஸ்ஸ ப்³ராஹ்மணஸ்ஸ கம்மந்தோ க³ம்மதி, தேன மக்³கே³ன க³தோதி வுத்தம் ஹோதி. அத² கஸ்மா, பி⁴க்கூ², ப⁴க³வந்தம் நானுப³ந்தி⁴ம்ஸூதி? வுச்சதே – யதா³ ப⁴க³வா ஏககோவ கத்த²சி உபஸங்கமிதுகாமோ ஹோதி, பி⁴க்கா²சாரவேலாயம் த்³வாரம் பித³ஹித்வா அந்தோக³ந்த⁴குடிம் பவிஸதி. ததோ பி⁴க்கூ² தாய ஸஞ்ஞாய ஜானந்தி – ‘‘அஜ்ஜ ப⁴க³வா ஏககோவ கா³மம் பவிஸிதுகாமோ, அத்³தா⁴ கஞ்சி ஏவ வினேதப்³ப³புக்³க³லம் அத்³த³ஸா’’தி. தே அத்தனோ பத்தசீவரம் க³ஹேத்வா, க³ந்த⁴குடிம் பத³க்கி²ணம் கத்வா, பி⁴க்கா²சாரம் க³ச்ச²ந்தி. ததா³ ச ப⁴க³வா ஏவமகாஸி. தஸ்மா பி⁴க்கூ² ப⁴க³வந்தம் நானுப³ந்தி⁴ம்ஸூதி.

தேன கோ² பன ஸமயேனாதி யேன ஸமயேன ப⁴க³வா கம்மந்தம் உபஸங்கமி, தேன ஸமயேன தஸ்ஸ ப்³ராஹ்மணஸ்ஸ பரிவேஸனா வத்ததி, ப⁴த்தவிஸ்ஸக்³கோ³ வத்ததீதி அத்தோ². யம் புப்³பே³ அவோசும்ஹ – ‘‘ப்³ராஹ்மணீ பஞ்ச கஸ்ஸகஸதானி ஸுவண்ணரஜதகம்ஸதம்ப³மயானி பா⁴ஜனானி க³ஹேத்வா நிஸின்னானி ஸுவண்ணகடச்சு²ம் க³ஹேத்வா பாயாஸேன பரிவிஸந்தீ க³ச்ச²தீ’’தி. அத² கோ² ப⁴க³வா யேன பரிவேஸனா தேனுபஸங்கமி. கிம் காரணாதி? ப்³ராஹ்மணஸ்ஸ அனுக்³க³ஹகரணத்த²ம். ந ஹி ப⁴க³வா கபணபுரிஸோ விய போ⁴த்துகாமதாய பரிவேஸனம் உபஸங்கமதி. ப⁴க³வதோ ஹி த்³வே அஸீதிஸஹஸ்ஸஸங்க்²யா ஸக்யகோலியராஜானோ ஞாதயோ, தே அத்தனோ ஸம்பத்தியா நிப³த்³த⁴ப⁴த்தம் தா³தும் உஸ்ஸஹந்தி. ந பன ப⁴க³வா ப⁴த்தத்தா²ய பப்³ப³ஜிதோ, அபிச கோ² பன ‘‘அனேகானி அஸங்க்²யேய்யானி பஞ்ச மஹாபரிச்சாகே³ பரிச்சஜந்தோ பாரமியோ பூரேத்வா முத்தோ மோசேஸ்ஸாமி, த³ந்தோ த³மேஸ்ஸாமி; ஸந்தோ ஸமேஸ்ஸாமி, பரினிப்³பு³தோ பரினிப்³பா³பேஸ்ஸாமீ’’தி பப்³ப³ஜிதோ. தஸ்மா அத்தனோ முத்தத்தா…பே… பரினிப்³பு³தத்தா ச பரம் மோசேந்தோ…பே… பரினிப்³பா³பேந்தோ ச லோகே விசரந்தோ ப்³ராஹ்மணஸ்ஸ அனுக்³க³ஹகரணத்த²ம் யேன பரிவேஸனா தேனுபஸங்கமீதி வேதி³தப்³ப³ம்.

உபஸங்கமித்வா ஏகமந்தம் அட்டா²ஸீதி ஏவம் உபஸங்கமித்வா ச ஏகமந்தம் அட்டா²ஸி. ஏகமந்தந்தி பா⁴வனபும்ஸகனித்³தே³ஸோ, ஏகோகாஸம் ஏகபஸ்ஸந்தி வுத்தம் ஹோதி. பு⁴ம்மத்தே² வா உபயோக³வசனம், தஸ்ஸ த³ஸ்ஸனூபசாரே கதா²ஸவனட்டா²னே, யத்த² டி²தம் ப்³ராஹ்மணோ பஸ்ஸதி, தத்த² உச்சட்டா²னே அட்டா²ஸி. ட²த்வா ச ஸுவண்ணரஸபிஞ்ஜரம் ஸஹஸ்ஸசந்த³ஸூரியோபா⁴ஸாதிபா⁴ஸயமானம் ஸரீராப⁴ம் முஞ்சி ஸமந்ததோ அஸீதிஹத்த²பரிமாணம், யாய அஜ்ஜோ²த்த²ரிதத்தா ப்³ராஹ்மணஸ்ஸ கம்மந்தஸாலாபி⁴த்திருக்க²கஸிதமத்திகாபிண்டா³த³யோ ஸுவண்ணமயா விய அஹேஸும். அத² மனுஸ்ஸா பாயாஸம் பு⁴த்தா அஸீதிஅனுப்³யஞ்ஜனபரிவாரத்³வத்திம்ஸவரலக்க²ணபடிமண்டி³தஸரீரம் ப்³யாமப்பபா⁴பரிக்கே²பவிபூ⁴ஸிதபா³ஹுயுக³ளம் கேதுமாலாஸமுஜ்ஜலிதஸஸ்ஸிரிகத³ஸ்ஸனம் ஜங்க³மமிவ பது³மஸ்ஸரம், ரம்ஸிஜாலுஜ்ஜலிததாராக³ணமிவ க³க³னதலம், ஆதி³த்தமிவ ச கனககி³ரிஸிக²ரம் ஸிரியா ஜலமானம் ஸம்மாஸம்பு³த்³த⁴ம் ஏகமந்தம் டி²தம் தி³ஸ்வா ஹத்த²பாதே³ தோ⁴வித்வா அஞ்ஜலிம் பக்³க³ய்ஹ ஸம்பரிவாரேத்வா அட்ட²ம்ஸு. ஏவம் தேஹி ஸம்பரிவாரிதம் அத்³த³ஸ கோ² கஸிபா⁴ரத்³வாஜோ ப்³ராஹ்மணோ ப⁴க³வந்தம் பிண்டா³ய டி²தம். தி³ஸ்வான ப⁴க³வந்தம் ஏதத³வோச ‘‘அஹம் கோ², ஸமண, கஸாமி ச வபாமி சா’’தி.

கஸ்மா பனாயம் ஏவமாஹ? கிம் ஸமந்தபாஸாதி³கே பஸாத³னீயே உத்தமத³மத²ஸமத²மனுப்பத்தேபி ப⁴க³வதி அப்பஸாதே³ன, உதா³ஹு அட்³ட⁴தேய்யானம் ஜனஸஹஸ்ஸானம் பாயாஸம் படியாதே³த்வாபி கடச்சு²பி⁴க்கா²ய மச்சே²ரேனாதி? உப⁴யதா²பி நோ, அபிச க்²வாஸ்ஸ ப⁴க³வதோ த³ஸ்ஸனேன அதித்தம் நிக்கி²த்தகம்மந்தம் ஜனம் தி³ஸ்வா ‘‘கம்மப⁴ங்க³ம் மே காதும் ஆக³தோ’’தி அனத்தமனதா அஹோஸி. தஸ்மா ஏவமாஹ. ப⁴க³வதோ ச லக்க²ணஸம்பத்திம் தி³ஸ்வா ‘‘ஸசாயம் கம்மந்தே பயோஜயிஸ்ஸ, ஸகலஜம்பு³தீ³பே மனுஸ்ஸானம் ஸீஸே சூளாமணி விய அப⁴விஸ்ஸ, கோ நாமஸ்ஸ அத்தோ² ந ஸம்பஜ்ஜிஸ்ஸ, ஏவமேவம் அலஸதாய கம்மந்தே அப்பயோஜேத்வா வப்பமங்க³லாதீ³ஸு பிண்டா³ய சரித்வா பு⁴ஞ்ஜந்தோ காயத³ள்ஹீப³ஹுலோ விசரதீ’’திபிஸ்ஸ அஹோஸி. தேனாஹ – ‘‘அஹம் கோ², ஸமண, கஸாமி ச வபாமி ச, கஸித்வா ச வபித்வா ச பு⁴ஞ்ஜாமீ’’தி. ந மே கம்மந்தா ப்³யாபஜ்ஜந்தி, ந சம்ஹி யதா² த்வம் ஏவம் லக்க²ணஸம்பன்னோதி அதி⁴ப்பாயோ. த்வம்பி ஸமண…பே… பு⁴ஞ்ஜஸ்ஸு, கோ தே அத்தோ² ந ஸம்பஜ்ஜேய்ய ஏவம் லக்க²ணஸம்பன்னஸ்ஸாதி அதி⁴ப்பாயோ.

அபிசாயம் அஸ்ஸோஸி – ‘‘ஸக்யராஜகுலே கிர குமாரோ உப்பன்னோ, ஸோ சக்கவத்திரஜ்ஜம் பஹாய பப்³ப³ஜிதோ’’தி. தஸ்மா ‘‘இதா³னி அயம் ஸோ’’தி ஞத்வா ‘‘சக்கவத்திரஜ்ஜம் கிர பஹாய கிலந்தோஸீ’’தி உபாரம்ப⁴ம் கரோந்தோ ஆஹ ‘‘அஹம் கோ² ஸமணா’’தி. அபிசாயம் திக்க²பஞ்ஞோ ப்³ராஹ்மணோ, ந ப⁴க³வந்தம் அவக்கி²பந்தோ ப⁴ணதி, ப⁴க³வதோ பன ரூபஸம்பத்திம் தி³ஸ்வா பஞ்ஞாஸம்பத்திம் ஸம்பா⁴வயமானோ கதா²பவத்தனத்த²ம்பி ஏவமாஹ – ‘‘அஹம் கோ² ஸமணா’’தி. ததோ ப⁴க³வா வேனேய்யவஸேன ஸதே³வகே லோகே அக்³க³கஸ்ஸகவப்பகபா⁴வம் அத்தனோ த³ஸ்ஸேந்தோ ஆஹ ‘‘அஹம்பி கோ² ப்³ராஹ்மணா’’தி.

அத² ப்³ராஹ்மணஸ்ஸ சிந்தா உத³பாதி³ – ‘‘அயம் ஸமணோ ‘கஸாமி ச வபாமி சா’தி ஆஹ. ந சஸ்ஸ ஓளாரிகானி யுக³னங்க³லாதீ³னி கஸிப⁴ண்டா³னி பஸ்ஸாமி, ஸோ முஸா நு கோ² ப⁴ணதி, நோ’’தி ப⁴க³வந்தம் பாத³தலா பட்டா²ய யாவ உபரி கேஸந்தா ஸம்மாலோகயமானோ அங்க³விஜ்ஜாய கதாதி⁴காரத்தா த்³வத்திம்ஸவரலக்க²ணஸம்பத்திமஸ்ஸ ஞத்வா ‘‘அட்டா²னமேதம் அனவகாஸோ, யம் ஏவரூபோ முஸா ப⁴ணேய்யா’’தி தாவதே³வ ஸஞ்ஜாதப³ஹுமானோ ப⁴க³வதி ஸமணவாத³ம் பஹாய கோ³த்தேன ப⁴க³வந்தம் ஸமுதா³சரமானோ ஆஹ ‘‘ந கோ² பன மயம் பஸ்ஸாம போ⁴தோ கோ³தமஸ்ஸா’’தி.

ஏவஞ்ச பன வத்வா திக்க²பஞ்ஞோ ப்³ராஹ்மணோ ‘‘க³ம்பீ⁴ரத்த²ம் ஸந்தா⁴ய இமினா ஏதம் வுத்த’’ந்தி ஞத்வா புச்சி²த்வா தமத்த²ம் ஞாதுகாமோ ப⁴க³வந்தம் கா³தா²ய அஜ்ஜ²பா⁴ஸி. தேனாஹ ஆயஸ்மா ஆனந்தோ³ ‘‘அத² கோ² கஸிபா⁴ரத்³வாஜோ ப்³ராஹ்மணோ ப⁴க³வந்தம் கா³தா²ய அஜ்ஜ²பா⁴ஸீ’’தி. தத்த² கா³தா²யாதி அக்க²ரபத³னியமிதேன வசனேன. அஜ்ஜ²பா⁴ஸீதி அபா⁴ஸி.

76-77. தத்த² ப்³ராஹ்மணோ ‘‘கஸி’’ந்தி யுக³னங்க³லாதி³கஸிஸம்பா⁴ரஸமாயோக³ம் வத³தி. ப⁴க³வா பன யஸ்மா புப்³ப³த⁴ம்மஸபா⁴கே³ன ரோபேத்வா கத²னம் நாம பு³த்³தா⁴னம் ஆனுபா⁴வோ, தஸ்மா பு³த்³தா⁴னுபா⁴வம் தீ³பேந்தோ புப்³ப³த⁴ம்மஸபா⁴கே³ன ரோபேந்தோ ஆஹ – ‘‘ஸத்³தா⁴ பீ³ஜ’’ந்தி. கோ பனேத்த² புப்³ப³த⁴ம்மஸபா⁴கோ³, நனு ப்³ராஹ்மணேன ப⁴க³வா யுக³னங்க³லாதி³கஸிஸம்பா⁴ரஸமாயோக³ம் புச்சி²தோ அத² ச பன அபுச்சி²தஸ்ஸ பீ³ஜஸ்ஸ ஸபா⁴கே³ன ரோபேந்தோ ஆஹ – ‘‘ஸத்³தா⁴ பீ³ஜ’’ந்தி, ஏவஞ்ச ஸதி அனனுஸந்தி⁴காவ அயம் கதா² ஹோதீதி? வுச்சதே – ந பு³த்³தா⁴னம் அனனுஸந்தி⁴கா நாம கதா² அத்தி², நாபி பு³த்³தா⁴ புப்³ப³த⁴ம்மஸபா⁴க³ம் அனாரோபேத்வா கதே²ந்தி. ஏவஞ்சேத்த² அனுஸந்தி⁴ வேதி³தப்³பா³ – அனேன ஹி ப்³ராஹ்மணேன ப⁴க³வா யுக³னங்க³லாதி³கஸிஸம்பா⁴ரவஸேன கஸிம் புச்சி²தோ. ஸோ தஸ்ஸ அனுகம்பாய ‘‘இத³ம் அபுச்சி²த’’ந்தி அபரிஹாபேத்வா ஸமூலம் ஸஉபகாரம் ஸஸம்பா⁴ரம் ஸப²லம் கஸிம் ஞாபேதும் மூலதோ பட்டா²ய கஸிம் த³ஸ்ஸேந்தோ ஆஹ – ‘‘ஸத்³தா⁴ பீ³ஜ’’ந்தி. பீ³ஜஞ்ஹி கஸியா மூலம் தஸ்மிம் ஸதி கத்தப்³ப³தோ, அஸதி அகத்தப்³ப³தோ, தப்பமாணேன ச கத்தப்³ப³தோ. பீ³ஜே ஹி ஸதி கஸிம் கரோந்தி, அஸதி ந கரோந்தி. பீ³ஜப்பமாணேன ச குஸலா கஸ்ஸகா கே²த்தம் கஸந்தி, ந ஊனம் ‘‘மா நோ ஸஸ்ஸம் பரிஹாயீ’’தி, ந அதி⁴கம் ‘‘மா நோ மோகோ⁴ வாயாமோ அஹோஸீ’’தி. யஸ்மா ச பீ³ஜமேவ மூலம், தஸ்மா ப⁴க³வா மூலதோ பட்டா²ய கஸிம் த³ஸ்ஸேந்தோ தஸ்ஸ ப்³ராஹ்மணஸ்ஸ கஸியா புப்³ப³த⁴ம்மஸ்ஸ பீ³ஜஸ்ஸ ஸபா⁴கே³ன அத்தனோ கஸியா புப்³ப³த⁴ம்மம் ரோபேந்தோ ஆஹ – ‘‘ஸத்³தா⁴ பீ³ஜ’’ந்தி. ஏவமேத்த² புப்³ப³த⁴ம்மஸபா⁴கோ³ வேதி³தப்³போ³.

புச்சி²தம்யேவ வத்வா அபுச்சி²தம் பச்சா² கிம் ந வுத்தந்தி சே? தஸ்ஸ உபகாரபா⁴வதோ த⁴ம்மஸம்ப³ந்த⁴ஸமத்த²பா⁴வதோ ச. அயஞ்ஹி ப்³ராஹ்மணோ பஞ்ஞவா, மிச்சா²தி³ட்டி²குலே பன ஜாதத்தா ஸத்³தா⁴விரஹிதோ. ஸத்³தா⁴விரஹிதோ ச பஞ்ஞவா பரேஸம் ஸத்³தா⁴ய அத்தனோ விஸயே அபடிபஜ்ஜமானோ விஸேஸம் நாதி⁴க³ச்ச²தி, கிலேஸகாலுஸ்ஸியபா⁴வாபக³மப்பஸாத³மத்தலக்க²ணாபி சஸ்ஸ து³ப்³ப³லா ஸத்³தா⁴ ப³லவதியா பஞ்ஞாய ஸஹ வத்தமானா அத்த²ஸித்³தி⁴ம் ந கரோதி, ஹத்தி²னா ஸஹ ஏகது⁴ரே யுத்தகோ³ணோ விய. தஸ்மா தஸ்ஸ ஸத்³தா⁴ உபகாரிகா. ஏவம் தஸ்ஸ ப்³ராஹ்மணஸ்ஸ ஸஉபகாரபா⁴வதோ தம் ப்³ராஹ்மணம் ஸத்³தா⁴ய பதிட்டா²பேந்தேன பச்சா²பி வத்தப்³போ³ அயமத்தோ² புப்³பே³ வுத்தோ தே³ஸனாகுஸலதாய யதா² அஞ்ஞத்ராபி ‘‘ஸத்³தா⁴ ப³ந்த⁴தி பாதே²ய்ய’’ந்தி (ஸம். நி. 1.79) ச, ‘‘ஸத்³தா⁴ து³தியா புரிஸஸ்ஸ ஹோதீ’’தி (ஸம். நி. 1.59) ச, ‘‘ஸத்³தீ⁴த⁴ வித்தம் புரிஸஸ்ஸ ஸேட்ட²’’ந்தி (ஸம். நி. 1.73, 246; ஸு. நி. 184) ச, ‘‘ஸத்³தா⁴ய தரதி ஓக⁴’’ந்தி (ஸம். நி. 1.246) ச, ‘‘ஸத்³தா⁴ஹத்தோ² மஹானாகோ³’’தி (அ. நி. 6.43; தே²ரகா³. 694) ச, ‘‘ஸத்³தே⁴ஸிகோ கோ², பி⁴க்க²வே, அரியஸாவகோதி சா’’தி (அ. நி. 7.67). பீ³ஜஸ்ஸ ச உபகாரிகா வுட்டி², ஸா தத³னந்தரஞ்ஞேவ வுச்சமானா ஸமத்தா² ஹோதி. ஏவம் த⁴ம்மஸம்ப³ந்த⁴ஸமத்த²பா⁴வதோ பச்சா²பி வத்தப்³போ³ அயமத்தோ² புப்³பே³ வுத்தோ, அஞ்ஞோ ச ஏவம்விதோ⁴ ஈஸாயோத்தாதி³.

தத்த² ஸம்பஸாத³னலக்க²ணா ஸத்³தா⁴, ஓகப்பனலக்க²ணா வா, பக்க²ந்த³னரஸா, அதி⁴முத்திபச்சுபட்டா²னா, அகாலுஸ்ஸியபச்சுபட்டா²னா வா, ஸோதாபத்தியங்க³பத³ட்டா²னா, ஸத்³த³ஹிதப்³ப³த⁴ம்மபத³ட்டா²னா வா, ஆதா³ஸஜலதலாதீ³னம் பஸாதோ³ விய சேதஸோ பஸாத³பூ⁴தா, உத³கப்பஸாத³கமணி விய உத³கஸ்ஸ, ஸம்பயுத்தத⁴ம்மானம் பஸாதி³கா. பீ³ஜந்தி பஞ்சவித⁴ம் – மூலபீ³ஜம், க²ந்த⁴பீ³ஜம், ப²லுபீ³ஜம், அக்³க³பீ³ஜம், பீ³ஜபீ³ஜமேவ பஞ்சமந்தி. தம் ஸப்³ப³ம்பி விருஹனட்டே²ன பீ³ஜம்த்வேவ ஸங்க²ம் க³ச்ச²தி. யதா²ஹ – ‘‘பீ³ஜஞ்சேதம் விருஹனட்டே²னா’’தி.

தத்த² யதா² ப்³ராஹ்மணஸ்ஸ கஸியா மூலபூ⁴தம் பீ³ஜம் த்³வே கிச்சானி கரோதி, ஹேட்டா² மூலேன பதிட்டா²தி, உபரி அங்குரம் உட்டா²பேதி; ஏவம் ப⁴க³வதோ கஸியா மூலபூ⁴தா ஸத்³தா⁴ ஹேட்டா² ஸீலமூலேன பதிட்டா²தி, உபரி ஸமத²விபஸ்ஸனங்குரம் உட்டா²பேதி. யதா² ச தம் மூலேன பத²விரஸம் ஆபோரஸம் க³ஹேத்வா நாளேன த⁴ஞ்ஞபரிபாகக³ஹணத்த²ம் வட்³ட⁴தி; ஏவமயம் ஸீலமூலேன ஸமத²விபஸ்ஸனாரஸம் க³ஹேத்வா அரியமக்³க³னாளேன அரியப²லத⁴ஞ்ஞபரிபாகக³ஹணத்த²ம் வட்³ட⁴தி. யதா² ச தம் ஸுபூ⁴மியம் பதிட்ட²ஹித்வா மூலங்குரபண்ணனாளகண்ட³ப்பஸவேஹி வுட்³டி⁴ம் விரூள்ஹிம் வேபுல்லம் பத்வா, கீ²ரம் ஜனேத்வா, அனேகஸாலிப²லப⁴ரிதம் ஸாலிஸீஸம் நிப்பா²தே³தி; ஏவமயம் சித்தஸந்தானே பதிட்ட²ஹித்வா ஸீலசித்ததி³ட்டி²கங்கா²விதரணமக்³கா³மக்³க³ஞாணத³ஸ்ஸனபடிபதா³ஞாணத³ஸ்ஸனவிஸுத்³தீ⁴ஹி வுட்³டி⁴ம் விரூள்ஹிம் வேபுல்லம் பத்வா ஞாணத³ஸ்ஸனவிஸுத்³தி⁴கீ²ரம் ஜனேத்வா அனேகபடிஸம்பி⁴தா³பி⁴ஞ்ஞாப⁴ரிதம் அரஹத்தப²லம் நிப்பா²தே³தி. தேனாஹ ப⁴க³வா – ‘‘ஸத்³தா⁴ பீ³ஜ’’ந்தி.

தத்த² ஸியா ‘‘பரோபஞ்ஞாஸகுஸலத⁴ம்மேஸு ஏகதோ உப்பஜ்ஜமானேஸு கஸ்மா ஸத்³தா⁴வ பீ³ஜந்தி வுத்தா’’தி? வுச்சதே – பீ³ஜகிச்சகரணதோ. யதா² ஹி தேஸு விஞ்ஞாணம்யேவ விஜானனகிச்சம் கரோதி, ஏவம் ஸத்³தா⁴ பீ³ஜகிச்சம், ஸா ச ஸப்³ப³குஸலானம் மூலபூ⁴தா. யதா²ஹ –

‘‘ஸத்³தா⁴ஜாதோ உபஸங்கமதி, உபஸங்கமந்தோ பயிருபாஸதி, பயிருபாஸந்தோ ஸோதம் ஓத³ஹதி, ஓஹிதஸோதோ த⁴ம்மம் ஸுணாதி, ஸுத்வா த⁴ம்மம் தா⁴ரேதி, த⁴தானம் த⁴ம்மானம் அத்த²ம் உபபரிக்க²தி, அத்த²ம் உபபரிக்க²தோ த⁴ம்மா நிஜ்ஜா²னம் க²மந்தி, த⁴ம்மனிஜ்ஜா²னக்க²ந்தியா ஸதி ச²ந்தோ³ ஜாயதி, ச²ந்த³ஜாதோ உஸ்ஸஹதி, உஸ்ஸாஹேத்வா துலயதி, துலயித்வா பத³ஹதி, பஹிதத்தோ ஸமானோ காயேன சேவ பரமஸச்சம் ஸச்சி²கரோதி, பஞ்ஞாய ச நம் அதிவிஜ்ஜ²பஸ்ஸதீ’’தி (ம. நி. 2.183, 432).

தபதி அகுஸலே த⁴ம்மே காயஞ்சாதி தபோ; இந்த்³ரியஸம்வரவீரியது⁴தங்க³து³க்கரகாரிகானம் ஏதம் அதி⁴வசனம். இத⁴ பன இந்த்³ரியஸம்வரோ அதி⁴ப்பேதோ. வுட்டீ²தி வஸ்ஸவுட்டி²வாதவுட்டீ²திஆதி³னா அனேகவிதா⁴. இத⁴ வஸ்ஸவுட்டி² அதி⁴ப்பேதா. யதா² ஹி ப்³ராஹ்மணஸ்ஸ வஸ்ஸவுட்டி²ஸமனுக்³க³ஹிதம் பீ³ஜம் பீ³ஜமூலகஞ்ச ஸஸ்ஸம் விருஹதி ந மிலாயதி நிப்ப²த்திம் க³ச்ச²தி, ஏவம் ப⁴க³வதோ இந்த்³ரியஸம்வரஸமனுக்³க³ஹிதா ஸத்³தா⁴ ஸத்³தா⁴மூலா ச ஸீலாத³யோ த⁴ம்மா விருஹந்தி ந மிலாயந்தி நிப்ப²த்திம் க³ச்ச²ந்தி. தேனாஹ – ‘‘தபோ வுட்டீ²’’தி. ‘‘பஞ்ஞா மே’’தி ஏத்த² ச வுத்தோ மே-ஸத்³தோ³ இமேஸுபி பதே³ஸு யோஜேதப்³போ³ ‘‘ஸத்³தா⁴ மே பீ³ஜம், தபோ மே வுட்டீ²’’தி. தேன கிம் தீ³பேதி? யதா², ப்³ராஹ்மண, தயா வபிதே பீ³ஜே ஸசே வுட்டி² அத்தி², ஸாது⁴, நோ சே அத்தி², உத³கம்பி தா³தப்³ப³ம் ஹோதி, ததா² மயா ஹிரி-ஈஸே பஞ்ஞாயுக³னங்க³லே மனோயோத்தேன ஏகாப³த்³தே⁴ கதே வீரியப³லிப³த்³தே³ யோஜேத்வா ஸதிபாசனேன விஜ்ஜி²த்வா அத்தனோ சித்தஸந்தானகே²த்தே ஸத்³தா⁴பீ³ஜே வபிதே வுட்டி²-அபா⁴வோ நாம நத்தி². அயம் பன மே ஸததம் ஸமிதம் தபோ வுட்டீ²தி.

பஜானாதி ஏதாய புக்³க³லோ, ஸயம் வா பஜானாதீதி பஞ்ஞா, ஸா காமாவசராதி³பே⁴த³தோ அனேகவிதா⁴. இத⁴ பன ஸஹ விபஸ்ஸனாய மக்³க³பஞ்ஞா அதி⁴ப்பேதா. யுக³னங்க³லந்தி யுக³ஞ்ச நங்க³லஞ்ச. யதா² ஹி ப்³ராஹ்மணஸ்ஸ யுக³னங்க³லம், ஏவம் ப⁴க³வதோ து³விதா⁴பி பஞ்ஞா. தத்த² யதா² யுக³ம் ஈஸாய உபனிஸ்ஸயம் ஹோதி, புரதோ ஹோதி, ஈஸாப³த்³த⁴ம் ஹோதி, யோத்தானம் நிஸ்ஸயம் ஹோதி, ப³லிப³த்³தா³னம் ஏகதோ க³மனம் தா⁴ரேதி, ஏவம் பஞ்ஞா ஹிரிபமுகா²னம் த⁴ம்மானம் உபனிஸ்ஸயா ஹோதி. யதா²ஹ – ‘‘பஞ்ஞுத்தரா ஸப்³பே³ குஸலா த⁴ம்மா’’தி (அ. நி. 8.83) ச, ‘‘பஞ்ஞா ஹி ஸேட்டா² குஸலா வத³ந்தி, நக்க²த்தராஜாரிவ தாரகான’’ந்தி (ஜா. 2.17.81) ச. குஸலானம் த⁴ம்மானம் புப்³ப³ங்க³மட்டே²ன புரதோ ச ஹோதி. யதா²ஹ – ‘‘ஸீலம் ஹிரீ சாபி ஸதஞ்ச த⁴ம்மோ, அன்வாயிகா பஞ்ஞவதோ ப⁴வந்தீ’’தி. ஹிரிவிப்பயோகே³ன அனுப்பத்திதோ ஈஸாப³த்³தா⁴ ஹோதி, மனோஸங்கா²தஸ்ஸ ஸமாதி⁴யோத்தஸ்ஸ நிஸ்ஸயபச்சயதோ யோத்தானம் நிஸ்ஸயோ ஹோதி, அச்சாரத்³தா⁴திலீனபா⁴வபடிஸேத⁴னதோ வீரியப³லிப³த்³தா³னம் ஏகதோ க³மனம் தா⁴ரேதி. யதா² ச நங்க³லம் பா²லயுத்தம் கஸனகாலே பத²விக⁴னம் பி⁴ந்த³தி, மூலஸந்தானகானி பதா³லேதி, ஏவம் ஸதியுத்தா பஞ்ஞா விபஸ்ஸனாகாலே த⁴ம்மானம் ஸந்ததிஸமூஹகிச்சாரம்மணக⁴னம் பி⁴ந்த³தி, ஸப்³ப³கிலேஸமூலஸந்தானகானி பதா³லேதி. ஸா ச கோ² லோகுத்தராவ இதரா பன லோகியாபி ஸியா. தேனாஹ – ‘‘பஞ்ஞா மே யுக³னங்க³ல’’ந்தி.

ஹிரீயதி ஏதாய புக்³க³லோ, ஸயம் வா ஹிரீயதி அகுஸலப்பவத்திம் ஜிகு³ச்ச²தீதி ஹிரீ. தக்³க³ஹணேன ஸஹசரணபா⁴வதோ ஓத்தப்பம் க³ஹிதம்யேவ ஹோதி. ஈஸாதி யுக³னங்க³லஸந்தா⁴ரிகா தா³ருயட்டி². யதா² ஹி ப்³ராஹ்மணஸ்ஸ ஈஸா யுக³னங்க³லம் ஸந்தா⁴ரேதி, ஏவம் ப⁴க³வதோபி ஹிரீ லோகியலோகுத்தரபஞ்ஞாஸங்கா²தம் யுக³னங்க³லம் ஸந்தா⁴ரேதி ஹிரியா அஸதி பஞ்ஞாய அபா⁴வதோ. யதா² ச ஈஸாபடிப³த்³த⁴ம் யுக³னங்க³லம் கிச்சகரம் ஹோதி அசலம் அஸிதி²லம், ஏவம் ஹிரிபடிப³த்³தா⁴ ச பஞ்ஞா கிச்சகாரீ ஹோதி அசலா அஸிதி²லா அப்³போ³கிண்ணா அஹிரிகேன. தேனாஹ ‘‘ஹிரீ ஈஸா’’தி.

முனாதீதி மனோ, சித்தஸ்ஸேதம் அதி⁴வசனம். இத⁴ பன மனோஸீஸேன தம்ஸம்பயுத்தோ ஸமாதி⁴ அதி⁴ப்பேதோ. யோத்தந்தி ரஜ்ஜுப³ந்த⁴னம். தம் திவித⁴ம் ஈஸாய ஸஹ யுக³ஸ்ஸ ப³ந்த⁴னம், யுகே³ன ஸஹ ப³லிப³த்³தா³னம் ப³ந்த⁴னம், ஸாரதி²னா ஸஹ ப³லிப³த்³தா³னம் ப³ந்த⁴னந்தி. தத்த² யதா² ப்³ராஹ்மணஸ்ஸ யோத்தம் ஈஸாயுக³ப³லிப³த்³தே³ ஏகாப³த்³தே⁴ கத்வா ஸககிச்சே படிபாதே³தி, ஏவம் ப⁴க³வதோ ஸமாதி⁴ ஸப்³பே³வ தே ஹிரிபஞ்ஞாவீரியத⁴ம்மே ஏகாரம்மணே அவிக்கே²பபா⁴வேன ப³ந்தி⁴த்வா ஸககிச்சே படிபாதே³தி. தேனாஹ – ‘‘மனோ யோத்த’’ந்தி.

ஸரதி ஏதாய சிரகதாதி³மத்த²ம் புக்³க³லோ, ஸயம் வா ஸரதீதி ஸதி, ஸா அஸம்முஸ்ஸனலக்க²ணா. பா²லேதீதி பா²லோ. பாஜேதி ஏதேனாதி பாஜனம். தம் இத⁴ ‘‘பாசன’’ந்தி வுச்சதி, பதோத³ஸ்ஸேதம் அதி⁴வசனம். பா²லோ ச பாசனஞ்ச பா²லபாசனம். யதா² ஹி ப்³ராஹ்மணஸ்ஸ பா²லபாசனம், ஏவம் ப⁴க³வதோ விபஸ்ஸனாயுத்தா மக்³க³யுத்தா ச ஸதி. தத்த² யதா² பா²லோ நங்க³லமனுரக்க²தி, புரதோ சஸ்ஸ க³ச்ச²தி, ஏவம் ஸதி குஸலானம் த⁴ம்மானம் க³தியோ ஸமன்வேஸமானா ஆரம்மணே வா உபட்டா²பயமானா பஞ்ஞானங்க³லம் ரக்க²தி, ததா² ஹி ‘‘ஸதாரக்கே²ன சேதஸா விஹரதீ’’திஆதீ³ஸு (அ. நி. 10.20) ‘‘ஆரக்கா²’’தி வுத்தா. அஸம்முஸ்ஸனவஸேன சஸ்ஸ புரதோ ஹோதி. ஸதிபரிசிதே ஹி த⁴ம்மே பஞ்ஞா பஜானாதி, நோ ஸம்முட்டே². யதா² ச பாசனம் ப³லிப³த்³தா³னம் விஜ்ஜ²னப⁴யம் த³ஸ்ஸேந்தம் ஸம்ஸீத³னம் ந தே³தி, உப்பத²க³மனஞ்ச வாரேதி, ஏவம் ஸதி வீரியப³லிப³த்³தா³னம் அபாயப⁴யம் த³ஸ்ஸேந்தீ கோஸஜ்ஜஸம்ஸீத³னம் ந தே³தி, காமகு³ணஸங்கா²தே அகோ³சரே சாரம் நிவாரேத்வா கம்மட்டா²னே நியோஜேந்தீ உப்பத²க³மனஞ்ச வாரேதி. தேனாஹ – ‘‘ஸதி மே பா²லபாசன’’ந்தி.

78. காயகு³த்தோதி திவிதே⁴ன காயஸுசரிதேன கு³த்தோ. வசீகு³த்தோதி சதுப்³பி³தே⁴ன வசீஸுசரிதேன கு³த்தோ. ஏத்தாவதா பாதிமோக்க²ஸம்வரஸீலம் வுத்தம். ஆஹாரே உத³ரே யதோதி ஏத்த² ஆஹாரமுகே²ன ஸப்³ப³பச்சயானம் ஸங்க³ஹிதத்தா சதுப்³பி³தே⁴பி பச்சயே யதோ ஸம்யதோ நிருபக்கிலேஸோதி அத்தோ². இமினா ஆஜீவபாரிஸுத்³தி⁴ஸீலம் வுத்தம். உத³ரே யதோதி உத³ரே யதோ ஸம்யதோ மிதபோ⁴ஜீ, ஆஹாரே மத்தஞ்ஞூதி வுத்தம் ஹோதி. இமினா போ⁴ஜனே மத்தஞ்ஞுதாமுகே²ன பச்சயபடிஸேவனஸீலம் வுத்தம். தேன கிம் தீ³பேதி? யதா² த்வம், ப்³ராஹ்மண, பீ³ஜம் வபித்வா ஸஸ்ஸபரிபாலனத்த²ம் கண்டகவதிம் வா ருக்க²வதிம் வா பாகாரபரிக்கே²பம் வா கரோஸி, தேன தே கோ³மஹிம்ஸமிக³க³ணா பவேஸம் அலப⁴ந்தா ஸஸ்ஸம் ந விலும்பந்தி, ஏவமஹம்பி ஸத்³தா⁴பீ³ஜம் வபித்வா நானப்பகாரகுஸலஸஸ்ஸபரிபாலனத்த²ம் காயவசீஆஹாரகு³த்திமயம் திவித⁴பரிக்கே²பம் கரோமி. தேன மே ராகா³தி³அகுஸலத⁴ம்மகோ³மஹிம்ஸமிக³க³ணா பவேஸம் அலப⁴ந்தா நானப்பகாரகுஸலஸஸ்ஸம் ந விலும்பந்தீதி.

ஸச்சம் கரோமி நித்³தா³னந்தி ஏத்த² த்³வீஹி த்³வாரேஹி அவிஸம்வாத³னம் ஸச்சம். நித்³தா³னந்தி சே²த³னம் லுனனம் உப்பாடனம், கரணத்தே² சேதம் உபயோக³வசனம் வேதி³தப்³ப³ம். அயஞ்ஹி ஏத்த² அத்தோ² ‘‘ஸச்சேன கரோமி நித்³தா³ன’’ந்தி. கிம் வுத்தம் ஹோதி? யதா² த்வம் பா³ஹிரம் கஸிம் கஸித்வா ஸஸ்ஸதூ³ஸகானம் திணானம் ஹத்தே²ன வா அஸிதேன வா நித்³தா³னம் கரோஸி; ஏவமஹம்பி அஜ்ஜ²த்திகம் கஸிம் கஸித்வா குஸலஸஸ்ஸதூ³ஸகானம் விஸம்வாத³னதிணானம் ஸச்சேன நித்³தா³னம் கரோமி. ஞாணஸச்சம் வா ஏத்த² ஸச்சந்தி வேதி³தப்³ப³ம், யம் தம் யதா²பூ⁴தஞாணந்தி வுச்சதி. தேன அத்தஸஞ்ஞாதீ³னம் திணானம் நித்³தா³னம் கரோமீதி ஏவம் யோஜேதப்³ப³ம். அத² வா நித்³தா³னந்தி சே²த³கம் லாவகம், உப்பாடகந்தி அத்தோ². ஏவம் ஸந்தே யதா² த்வம் தா³ஸம் வா கம்மகரம் வா நித்³தா³னம் கரோஸி, ‘‘நித்³தே³ஹி திணானீ’’தி திணானம் சே²த³கம் லாவகம் உப்பாடகம் கரோஸி; ஏவமஹம் ஸச்சம் கரோமீதி உபயோக³வசனேனேவ வத்தும் யுஜ்ஜதி. அத² வா ஸச்சந்தி தி³ட்டி²ஸச்சம். தமஹம் நித்³தா³னம் கரோமி, சி²ந்தி³தப்³ப³ம் லுனிதப்³ப³ம் உப்பாடேதப்³ப³ம் கரோமீதி ஏவம்பி உபயோக³வசனேனேவ வத்தும் யுஜ்ஜதி.

ஸோரச்சம் மே பமோசனந்தி ஏத்த² யம் தம் ‘‘காயிகோ அவீதிக்கமோ, வாசஸிகோ அவீதிக்கமோ’’தி, ஏவம் ஸீலமேவ ‘‘ஸோரச்ச’’ந்தி வுத்தம், ந தம் இத⁴ அதி⁴ப்பேதம், வுத்தமேவ ஏதம் ‘‘காயகு³த்தோ’’திஆதி³னா நயேன, அரஹத்தப²லம் பன அதி⁴ப்பேதம். தம்பி ஹி ஸுந்த³ரே நிப்³பா³னே ரதபா⁴வதோ ‘‘ஸோரச்ச’’ந்தி வுச்சதி. பமோசனந்தி யோக்³க³விஸ்ஸஜ்ஜனம். கிம் வுத்தம் ஹோதி? யதா² தவ பமோசனம் புனபி ஸாயன்ஹே வா து³தியதி³வஸே வா அனாக³தஸம்வச்ச²ரே வா யோஜேதப்³ப³தோ அப்பமோசனமேவ ஹோதி, ந மம ஏவம். ந ஹி மம அந்தரா மோசனம் நாம அத்தி². அஹஞ்ஹி தீ³பங்கரத³ஸப³லகாலதோ பபு⁴தி பஞ்ஞானங்க³லே வீரியப³லிப³த்³தே³ யோஜேத்வா சத்தாரி அஸங்க்²யேய்யானி கப்பஸதஸஹஸ்ஸஞ்ச மஹாகஸிம் கஸந்தோ தாவ ந முஞ்சிம், யாவ ந ஸம்மாஸம்போ³தி⁴ம் அபி⁴ஸம்பு³ஜ்ஜி². யதா³ ச மே ஸப்³ப³ம் தம் காலம் கே²பேத்வா போ³தி⁴ருக்க²மூலே அபராஜிதபல்லங்கே நிஸின்னஸ்ஸ ஸப்³ப³கு³ணபரிவாரம் அரஹத்தப²லம் உத³பாதி³, ததா³ மயா தம் ஸப்³பு³ஸ்ஸுக்கபடிப்பஸ்ஸத்³தி⁴ப்பத்தியா பமுத்தம், ந தா³னி புன யோஜேதப்³ப³ம் ப⁴விஸ்ஸதீதி. ஏதமத்த²ம் ஸந்தா⁴யாஹ ப⁴க³வா – ‘‘ஸோரச்சம் மே பமோசன’’ந்தி.

79. வீரியம் மே து⁴ரதோ⁴ரய்ஹந்தி ஏத்த² வீரியந்தி ‘‘காயிகோ வா, சேதஸிகோ வா வீரியாரம்போ⁴’’திஆதி³னா நயேன வுத்தபதா⁴னம். து⁴ராயம் தோ⁴ரய்ஹம் து⁴ரதோ⁴ரய்ஹம், து⁴ரம் வஹதீதி அத்தோ². யதா² ஹி ப்³ராஹ்மணஸ்ஸ து⁴ராயம் தோ⁴ரய்ஹாகட்³டி⁴தம் நங்க³லம் பூ⁴மிக⁴னம் பி⁴ந்த³தி, மூலஸந்தானகானி ச பதா³லேதி, ஏவம் ப⁴க³வதோ வீரியாகட்³டி⁴தம் பஞ்ஞானங்க³லம் யதா²வுத்தம் க⁴னம் பி⁴ந்த³தி, கிலேஸஸந்தானகானி ச பதா³லேதி. தேனாஹ – ‘‘வீரியம் மே து⁴ரதோ⁴ரய்ஹ’’ந்தி. அத² வா புரிமது⁴ரம் வஹந்தா து⁴ரா, மூலது⁴ரம் வஹந்தா தோ⁴ரய்ஹா; து⁴ரா ச தோ⁴ரய்ஹா ச து⁴ரதோ⁴ரய்ஹா. தத்த² யதா² ப்³ராஹ்மணஸ்ஸ ஏகமேகஸ்மிம் நங்க³லே சதுப³லிப³த்³த³ப்பபே⁴த³ம் து⁴ரதோ⁴ரய்ஹம் வஹந்தம் உப்பன்னானுப்பன்னதிணமூலகா⁴தம் ஸஸ்ஸஸம்பத்திஞ்ச ஸாதே⁴தி, ஏவம் ப⁴க³வதோ சதுஸம்மப்பதா⁴னவீரியப்பபே⁴த³ம் து⁴ரதோ⁴ரய்ஹம் வஹந்தம் உப்பன்னானுப்பன்னாகுஸலமூலகா⁴தம் குஸலஸம்பத்திஞ்ச ஸாதே⁴தி. தேனாஹ – ‘‘வீரியம் மே து⁴ரதோ⁴ரய்ஹ’’ந்தி.

யோக³க்கே²மாதி⁴வாஹனந்தி ஏத்த² யோகே³ஹி கே²மத்தா ‘‘யோக³க்கே²ம’’ந்தி நிப்³பா³னம் வுச்சதி, தம் அதி⁴கத்வா வாஹீயதி, அபி⁴முக²ம் வா வாஹீயதீதி அதி⁴வாஹனம். யோக³க்கே²மஸ்ஸ அதி⁴வாஹனம் யோக³க்கே²மாதி⁴வாஹனம். தேன கிம் தீ³பேதி? யதா² தவ து⁴ரதோ⁴ரய்ஹம் புரத்தி²மம் தி³ஸம் பச்சி²மாதீ³ஸு வா அஞ்ஞதரம் அபி⁴முக²ம் வாஹீயதி, ததா² மம து⁴ரதோ⁴ரய்ஹம் நிப்³பா³னாபி⁴முக²ம் வாஹீயதி.

ஏவம் வாஹியமானஞ்ச க³ச்ச²தி அனிவத்தந்தம். யதா² தவ நங்க³லம் வஹந்தம் து⁴ரதோ⁴ரய்ஹம் கே²த்தகோடிம் பத்வா புன நிவத்ததி, ஏவம் அனிவத்தந்தம் தீ³பங்கரகாலதோ பபு⁴தி க³ச்ச²தேவ. யஸ்மா வா தேன தேன மக்³கே³ன பஹீனா கிலேஸா புனப்புனம் பஹாதப்³பா³ ந ஹோந்தி, யதா² தவ நங்க³லேன சி²ன்னானி திணானி புனபி அபரஸ்மிம் ஸமயே சி²ந்தி³தப்³பா³னி ஹோந்தி, தஸ்மாபி ஏதம் பட²மமக்³க³வஸேன தி³ட்டே²கட்டே² கிலேஸே, து³தியவஸேன ஓளாரிகே, ததியவஸேன அனுஸஹக³தே கிலேஸே, சதுத்த²வஸேன ஸப்³ப³கிலேஸே பஜஹந்தம் க³ச்ச²தி அனிவத்தந்தம். அத² வா க³ச்ச²தி அனிவத்தந்தி நிவத்தனரஹிதம் ஹுத்வா க³ச்ச²தீதி அத்தோ². ந்தி தம் து⁴ரதோ⁴ரய்ஹம். ஏவம்பேத்த² பத³ச்சே²தோ³ வேதி³தப்³போ³. ஏவம் க³ச்ச²ந்தஞ்ச யதா² தவ து⁴ரதோ⁴ரய்ஹம் ந தம் டா²னம் க³ச்ச²தி, யத்த² க³ந்த்வா கஸ்ஸகோ அஸோகோ நிஸ்ஸோகோ விரஜோ ஹுத்வா ந ஸோசதி, ஏதம் பன தம் டா²னம் க³ச்ச²தி, யத்த² க³ந்த்வா ந ஸோசதி. யத்த² ஸதிபாசனேன ஏதம் வீரியது⁴ரதோ⁴ரய்ஹம் சோதே³ந்தோ க³ந்த்வா மாதி³ஸோ கஸ்ஸகோ அஸோகோ நிஸ்ஸோகோ விரஜோ ஹுத்வா ந ஸோசதி, தம் ஸப்³ப³ஸோகஸல்லஸமுக்³கா⁴தபூ⁴தம் நிப்³பா³னாமதஸங்கா²தம் டா²னம் க³ச்ச²தீதி.

80. இதா³னி நிக³மனம் கரோந்தோ ப⁴க³வா இமம் கா³த²மாஹ –

‘‘ஏவமேஸா கஸீ கட்டா², ஸா ஹோதி அமதப்ப²லா;

ஏதம் கஸிம் கஸித்வான, ஸப்³ப³து³க்கா² பமுச்சதீ’’தி.

தஸ்ஸாயம் ஸங்கே²பத்தோ² – மயா ப்³ராஹ்மண ஏஸா ஸத்³தா⁴பீ³ஜா தபோவுட்டி²யா அனுக்³க³ஹிதா கஸி, பஞ்ஞாமயம் யுக³னங்க³லம், ஹிரிமயஞ்ச ஈஸம், மனோமயேன யோத்தேன, ஏகாப³த்³த⁴ம் கத்வா, பஞ்ஞானங்க³லே ஸதிபா²லம் ஆகோடேத்வா, ஸதிபாசனம் க³ஹேத்வா, காயவசீஆஹாரகு³த்தியா கோ³பேத்வா, ஸச்சம் நித்³தா³னம் கத்வா, ஸோரச்சம் பமோசனம் வீரியம் து⁴ரதோ⁴ரய்ஹம் யோக³க்கே²மாபி⁴முக²ம் அனிவத்தந்தம் வாஹேந்தேன கட்டா², கஸிகம்மபரியோஸானம் சதுப்³பி³த⁴ம் ஸாமஞ்ஞப²லம் பாபிதா, ஸா ஹோதி அமதப்ப²லா, ஸா ஏஸா கஸி அமதப்ப²லா ஹோதி. அமதம் வுச்சதி நிப்³பா³னம், நிப்³பா³னானிஸம்ஸா ஹோதீதி அத்தோ². ஸா கோ² பனேஸா கஸி ந மமேவேகஸ்ஸ அமதப்ப²லா ஹோதி, அபிச, கோ², பன யோ கோசி க²த்தியோ வா ப்³ராஹ்மணோ வா வேஸ்ஸோ வா ஸுத்³தோ³ வா க³ஹட்டோ² வா பப்³ப³ஜிதோ வா ஏதம் கஸிம் கஸதி, ஸோ ஸப்³போ³பி ஏதம் கஸிம் கஸித்வான, ஸப்³ப³து³க்கா² பமுச்சதி, ஸப்³ப³ஸ்மா வட்டது³க்க²து³க்க²து³க்க²ஸங்கா²ரது³க்க²விபரிணாமது³க்கா² பமுச்சதீதி. ஏவம் ப⁴க³வா ப்³ராஹ்மணஸ்ஸ அரஹத்தனிகூடேன நிப்³பா³னபரியோஸானம் கத்வா தே³ஸனம் நிட்டா²பேஸி.

ததோ ப்³ராஹ்மணோ க³ம்பீ⁴ரத்த²ம் தே³ஸனம் ஸுத்வா ‘‘மம கஸிப²லம் பு⁴ஞ்ஜித்வா அபரஜ்ஜு ஏவ சா²தோ ஹோதி, இமஸ்ஸ பன கஸி அமதப்ப²லா, தஸ்ஸா ப²லம் பு⁴ஞ்ஜித்வா ஸப்³ப³து³க்கா² பமுச்சதீ’’தி ச விதி³த்வா பஸன்னோ பஸன்னாகாரம் காதும் பாயாஸம் தா³துமாரத்³தோ⁴. தேனாஹ ‘‘அத² கோ² கஸிபா⁴ரத்³வாஜோ’’தி. தத்த² மஹதியாதி மஹதியந்தி அத்தோ². கம்ஸபாதியாதி ஸுவண்ணபாதியம், ஸதஸஹஸ்ஸக்³க⁴னகே அத்தனோ ஸுவண்ணதா²லே. வட்³டே⁴த்வாதி சு²பித்வா, ஆகிரித்வாதி வுத்தம் ஹோதி. ப⁴க³வதோ உபனாமேஸீதி ஸப்பிமது⁴பா²ணிதாதீ³ஹி விசித்ரம் கத்வா, து³கூலவிதானேன படிச்சா²தே³த்வா, உக்கி²பித்வா, ஸக்கச்சம் ததா²க³தஸ்ஸ அபி⁴ஹரி. கிந்தி? ‘‘பு⁴ஞ்ஜது ப⁴வம் கோ³தமோ பாயாஸம், கஸ்ஸகோ ப⁴வ’’ந்தி. ததோ கஸ்ஸகபா⁴வஸாத⁴கம் காரணமாஹ ‘‘யஞ்ஹி…பே… கஸதீ’’தி, யஸ்மா ப⁴வம்…பே… கஸதீதி வுத்தம் ஹோதி. அத² ப⁴க³வா ‘‘கா³தா²பி⁴கீ³தம் மே’’தி ஆஹ.

81. தத்த² கா³தா²பி⁴கீ³தந்தி கா³தா²ஹி அபி⁴கீ³தம், கா³தா²யோ பா⁴ஸித்வா லத்³த⁴ந்தி வுத்தம் ஹோதி. மேதி மயா. அபோ⁴ஜனேய்யந்தி பு⁴ஞ்ஜனாரஹம் ந ஹோதி. ஸம்பஸ்ஸதந்தி ஸம்மா ஆஜீவஸுத்³தி⁴ம் பஸ்ஸதம், ஸமந்தா வா பஸ்ஸதம் ஸம்பஸ்ஸதம், பு³த்³தா⁴னந்தி வுத்தம் ஹோதி. நேஸ த⁴ம்மோதி ‘‘கா³தா²பி⁴கீ³தம் பு⁴ஞ்ஜிதப்³ப³’’ந்தி ஏஸ த⁴ம்மோ ஏதம் சாரித்தம் ந ஹோதி, தஸ்மா கா³தா²பி⁴கீ³தம் பனுத³ந்தி பு³த்³தா⁴ படிக்கி²பந்தி ந பு⁴ஞ்ஜந்தீதி. கிம் பன ப⁴க³வதா பாயாஸத்த²ம் கா³தா² அபி⁴கீ³தா, யேன ஏவமாஹாதி? ந ஏதத³த்த²ம் அபி⁴கீ³தா, அபிச, கோ², பன பாதோ பட்டா²ய கே²த்தஸமீபே ட²த்வா கடச்சு²பி⁴க்க²ம்பி அலபி⁴த்வா புன ஸகலபு³த்³த⁴கு³ணே பகாஸேத்வா லத்³த⁴ம் ததே³தம் நடனச்சகாதீ³ஹி நச்சித்வா கா³யித்வா ச லத்³த⁴ஸதி³ஸம் ஹோதி, தேன ‘‘கா³தா²பி⁴கீ³த’’ந்தி வுத்தம். தாதி³ஸஞ்ச யஸ்மா பு³த்³தா⁴னம் ந கப்பதி, தஸ்மா ‘‘அபோ⁴ஜனேய்ய’’ந்தி வுத்தம். அப்பிச்ச²தானுரூபஞ்சேதம் ந ஹோதி, தஸ்மாபி பச்சி²மம் ஜனதம் அனுகம்பமானேன ச ஏவம் வுத்தம். யத்ர ச நாம பரப்பகாஸிதேனாபி அத்தனோ கு³ணேன உப்பன்னம் லாப⁴ம் படிக்கி²பந்தி ஸேய்யதா²பி அப்பிச்சோ² க⁴டிகாரோ கும்ப⁴காரோ, தத்ர கத²ம் கோடிப்பத்தாய அப்பிச்ச²தாய ஸமன்னாக³தோ ப⁴க³வா அத்தனாவ அத்தனோ கு³ணப்பகாஸனேன உப்பன்னம் லாப⁴ம் ஸாதி³யிஸ்ஸதி, யதோ யுத்தமேவ ஏதம் ப⁴க³வதோ வத்துந்தி.

ஏத்தாவதா ‘‘அப்பஸன்னம் அதா³துகாமம் ப்³ராஹ்மணம் கா³தா²கா³யனேன தா³துகாமம் கத்வா, ஸமணோ கோ³தமோ போ⁴ஜனம் படிக்³க³ஹேஸி, ஆமிஸகாரணா இமஸ்ஸ தே³ஸனா’’தி இமம்ஹா லோகாபவாதா³ அத்தானம் மோசேந்தோ தே³ஸனாபாரிஸுத்³தி⁴ம் தீ³பேத்வா, இதா³னி ஆஜீவபாரிஸுத்³தி⁴ம் தீ³பேந்தோ ஆஹ ‘‘த⁴ம்மே ஸதீ ப்³ராஹ்மண வுத்திரேஸா’’தி தஸ்ஸத்தோ² – ஆஜீவபாரிஸுத்³தி⁴த⁴ம்மே வா த³ஸவித⁴ஸுசரிதத⁴ம்மே வா பு³த்³தா⁴னம் சாரித்தத⁴ம்மே வா ஸதி ஸம்விஜ்ஜமானே அனுபஹதே வத்தமானே வுத்திரேஸா ஏகந்தவோதா³தா ஆகாஸே பாணிப்பஸாரணகப்பா ஏஸனா பரியேஸனா ஜீவிதவுத்தி பு³த்³தா⁴னம் ப்³ராஹ்மணாதி.

82. ஏவம் வுத்தே ப்³ராஹ்மணோ ‘‘பாயாஸம் மே படிக்கி²பதி, அகப்பியம் கிரேதம் போ⁴ஜனம், அத⁴ஞ்ஞோ வதஸ்மிம், தா³னம் தா³தும் ந லபா⁴மீ’’தி தோ³மனஸ்ஸம் உப்பாதே³த்வா ‘‘அப்பேவ நாம அஞ்ஞம் படிக்³க³ண்ஹேய்யா’’தி ச சிந்தேஸி. தம் ஞத்வா ப⁴க³வா ‘‘அஹம் பி⁴க்கா²சாரவேலம் பரிச்சி²ந்தி³த்வா ஆக³தோ – ‘ஏத்தகேன காலேன இமம் ப்³ராஹ்மணம் பஸாதே³ஸ்ஸாமீ’தி, ப்³ராஹ்மணோ ச தோ³மனஸ்ஸம் அகாஸி. இதா³னி தேன தோ³மனஸ்ஸேன மயி சித்தம் பகோபேத்வா அமதவரத⁴ம்மம் படிவிஜ்ஜி²தும் ந ஸக்கி²ஸ்ஸதீ’’தி ப்³ராஹ்மணஸ்ஸ பஸாத³ஜனனத்த²ம் தேன பத்தி²தமனோரத²ம் பூரேந்தோ ஆஹ ‘‘அஞ்ஞேன ச கேவலின’’ந்தி. தத்த² கேவலினந்தி ஸப்³ப³கு³ணபரிபுண்ணம், ஸப்³ப³யோக³விஸம்யுத்தம் வாதி அத்தோ². மஹந்தானம் ஸீலக்க²ந்தா⁴தீ³னம் கு³ணானம் ஏஸனதோ மஹேஸிம். பரிக்கீ²ணஸப்³பா³ஸவத்தா கீ²ணாஸவம். ஹத்த²பாத³குக்குச்சமாதி³ம் கத்வா வூபஸந்தஸப்³ப³குக்குச்சத்தா குக்குச்சவூபஸந்தம். உபட்ட²ஹஸ்ஸூதி பரிவிஸஸ்ஸு படிமானயஸ்ஸு. ஏவம் ப்³ராஹ்மணேன சித்தே உப்பாதி³தேபி பரியாயமேவ ப⁴ணதி, ந து ப⁴ணதி ‘‘தே³ஹி, ஆஹராஹீ’’தி. ஸேஸமேத்த² உத்தானமேவ.

அத² ப்³ராஹ்மணோ ‘‘அயம் பாயாஸோ ப⁴க³வதோ ஆனீதோ நாஹம் அரஹாமி தம் அத்தனோ ச²ந்தே³ன கஸ்ஸசி தா³து’’ந்தி சிந்தேத்வா ஆஹ ‘‘அத² கஸ்ஸ சாஹ’’ந்தி. ததோ ப⁴க³வா ‘‘தம் பாயாஸம் ட²பேத்வா ததா²க³தம் ததா²க³தஸாவகஞ்ச அஞ்ஞஸ்ஸ அஜீரணத⁴ம்மோ’’தி ஞத்வா ஆஹ – ‘‘ந க்²வாஹம் த’’ந்தி. தத்த² ஸதே³வகவசனேன பஞ்சகாமாவசரதே³வக்³க³ஹணம், ஸமாரகவசனேன ச²ட்ட²காமாவசரதே³வக்³க³ஹணம், ஸப்³ரஹ்மகவசனேன ரூபாவசரப்³ரஹ்மக்³க³ஹணம் அரூபாவசரா பன பு⁴ஞ்ஜேய்யுந்தி அஸம்பா⁴வனேய்யா. ஸஸ்ஸமணப்³ராஹ்மணிவசனேன ஸாஸனபச்சத்தி²கபச்சாமித்தஸமணப்³ராஹ்மணக்³க³ஹணம் ஸமிதபாபபா³ஹிதபாபஸமணப்³ராஹ்மணக்³க³ஹணஞ்ச. பஜாவசனேன ஸத்தலோகக்³க³ஹணம், ஸதே³வமனுஸ்ஸவசனேன ஸம்முதிதே³வஅவஸேஸமனுஸ்ஸக்³க³ஹணம். ஏவமேத்த² தீஹி வசனேஹி ஓகாஸலோகோ, த்³வீஹி பஜாவஸேன ஸத்தலோகோ க³ஹிதோதி வேதி³தப்³போ³. ஏஸ ஸங்கே²போ, வித்தா²ரம் பன ஆளவகஸுத்தே வண்ணயிஸ்ஸாம.

கஸ்மா பன ஸதே³வகாதீ³ஸு கஸ்ஸசி ந ஸம்மா பரிணாமம் க³ச்சே²ய்யாதி? ஓளாரிகே ஸுகு²மோஜாபக்கி²பனதோ. இமஸ்மிஞ்ஹி பாயாஸே ப⁴க³வந்தம் உத்³தி³ஸ்ஸ க³ஹிதமத்தேயேவ தே³வதாஹி ஓஜா பக்கி²த்தா யதா² ஸுஜாதாய பாயாஸே, சுந்த³ஸ்ஸ ச ஸூகரமத்³த³வே பச்சமானே, வேரஞ்ஜாயஞ்ச ப⁴க³வதா க³ஹிதக³ஹிதாலோபே, பே⁴ஸஜ்ஜக்க²ந்த⁴கே ச கச்சானஸ்ஸ கு³ள்ஹகும்ப⁴ஸ்மிம் அவஸிட்ட²கு³ள்ஹே. ஸோ ஓளாரிகே ஸுகு²மோஜாபக்கி²பனதோ தே³வானம் ந பரிணமதி. தே³வா ஹி ஸுகு²மஸரீரா, தேஸம் ஓளாரிகோ மனுஸ்ஸாஹாரோ ந ஸம்மா பரிணமதி. மனுஸ்ஸானம்பி ந பரிணமதி. மனுஸ்ஸா ஹி ஓளாரிகஸரீரா, தேஸம் ஸுகு²மா தி³ப்³போ³ஜா ந ஸம்மா பரிணமதி. ததா²க³தஸ்ஸ பன பகதிஅக்³கி³னாவ பரிணமதி, ஸம்மா ஜீரதி. காயப³லஞாணப³லப்பபா⁴வேனாதி ஏகே ததா²க³தஸாவகஸ்ஸ கீ²ணாஸவஸ்ஸேதம் ஸமாதி⁴ப³லேன மத்தஞ்ஞுதாய ச பரிணமதி, இதரேஸம் இத்³தி⁴மந்தானம்பி ந பரிணமதி. அசிந்தனீயம் வா ஏத்த² காரணம், பு³த்³த⁴விஸயோ ஏஸோதி.

தேன ஹி த்வந்தி யஸ்மா அஞ்ஞம் ந பஸ்ஸாமி, மம ந கப்பதி, மம அகப்பந்தம் ஸாவகஸ்ஸாபி மே ந கப்பதி, தஸ்மா த்வம் ப்³ராஹ்மணாதி வுத்தம் ஹோதி. அப்பஹரிதேதி பரித்தஹரிததிணே, அப்பருள்ஹரிததிணே வா பாஸாணபிட்டி²ஸதி³ஸே. அப்பாணகேதி நிப்பாணகே, பாயாஸஜ்ஜோ²த்த²ரணகாரணேன மரிதப்³ப³பாணரஹிதே வா மஹாஉத³கக்க²ந்தே⁴. ஸஹ திணனிஸ்ஸிதேஹி பாணேஹி திணானம் பாணகானஞ்ச அனுரக்க²ணத்தா²ய ஏதம் வுத்தம். சிச்சிடாயதி சிடிசிடாயதீதி ஏவம் ஸத்³த³ம் கரோதி. ஸம்தூ⁴பாயதீதி ஸமந்தா தூ⁴பாயதி. ஸம்பதூ⁴பாயதீதி ததே²வ அதி⁴மத்தம் தூ⁴பாயதி. கஸ்மா ஏவம் அஹோஸீதி? ப⁴க³வதோ ஆனுபா⁴வேன, ந உத³கஸ்ஸ, ந பாயாஸஸ்ஸ, ந ப்³ராஹ்மணஸ்ஸ, ந அஞ்ஞேஸம் தே³வயக்கா²தீ³னம். ப⁴க³வா ஹி ப்³ராஹ்மணஸ்ஸ த⁴ம்மஸம்வேக³த்த²ம் ததா² அதி⁴ட்டா²ஸி. ஸேய்யதா²பி நாமாதி ஓபம்மனித³ஸ்ஸனமத்தமேதம், யதா² பா²லோதி ஏத்தகமேவ வுத்தம் ஹோதி. ஸம்விக்³கோ³ சித்தேன, லோமஹட்ட²ஜாதோ ஸரீரேன. ஸரீரே கிரஸ்ஸ நவனவுதிலோமகூபஸஹஸ்ஸானி ஸுவண்ணபி⁴த்தியா ஆஹதமணினாக³த³ந்தா விய உத்³த⁴க்³கா³ அஹேஸும். ஸேஸம் பாகடமேவ.

பாதே³ஸு பன நிபதித்வா ப⁴க³வதோ த⁴ம்மதே³ஸனம் அப்³ப⁴னுமோத³மானோ ப⁴க³வந்தம் ஏதத³வோச ‘‘அபி⁴க்கந்தம், போ⁴ கோ³தம, அபி⁴க்கந்தம், போ⁴ கோ³தமா’’தி. அப்³ப⁴னுமோத³னே ஹி அயமித⁴ அபி⁴க்கந்த ஸத்³தோ³. வித்தா²ரதோ பனஸ்ஸ மங்க³லஸுத்தவண்ணனாயம் அத்த²வண்ணனா ஆவி ப⁴விஸ்ஸதி. யஸ்மா ச அப்³ப⁴னுமோத³னத்தே², தஸ்மா ஸாது⁴ ஸாது⁴ போ⁴ கோ³தமாதி வுத்தம் ஹோதீதி வேதி³தப்³ப³ம்.

‘‘ப⁴யே கோதே⁴ பஸம்ஸாயம், துரிதே கோதூஹலச்ச²ரே;

ஹாஸே ஸோகே பஸாதே³ ச, கரே ஆமேடி³தம் பு³தோ⁴’’தி. –

இமினா ச லக்க²ணேன இத⁴ பஸாத³வஸேன பஸம்ஸாவஸேன சாயம் த்³விக்க²த்தும் வுத்தோதி வேதி³தப்³போ³. அத² வா அபி⁴க்கந்தந்தி அபி⁴கந்தம் அதிஇட்ட²ம், அதிமனாபம், அதிஸுந்த³ரந்தி வுத்தம் ஹோதி.

தத்த² ஏகேன அபி⁴க்கந்தஸத்³தே³ன தே³ஸனம் தோ²மேதி, ஏகேன அத்தனோ பஸாத³ம். அயஞ்ஹி ஏத்த² அதி⁴ப்பாயோ – அபி⁴க்கந்தம், போ⁴ கோ³தம, யதி³த³ம் போ⁴தோ கோ³தமஸ்ஸ த⁴ம்மதே³ஸனா, அபி⁴க்கந்தம் யதி³த³ம் போ⁴தோ கோ³தமஸ்ஸ த⁴ம்மதே³ஸனம் ஆக³ம்ம மம பஸாதோ³தி. ப⁴க³வதோ ஏவ வா வசனம் த்³வே த்³வே அத்தே² ஸந்தா⁴ய தோ²மேதி – போ⁴தோ கோ³தமஸ்ஸ வசனம் அபி⁴க்கந்தம் தோ³ஸனாஸனதோ, அபி⁴க்கந்தம் கு³ணாதி⁴க³மனதோ, ததா² ஸத்³தா⁴ஜனனதோ, பஞ்ஞாஜனனதோ, ஸாத்த²தோ, ஸப்³யஞ்ஜனதோ, உத்தானபத³தோ, க³ம்பீ⁴ரத்த²தோ, கண்ணஸுக²தோ, ஹத³யங்க³மதோ, அனத்துக்கம்ஸனதோ, அபரவம்ப⁴னதோ, கருணாஸீதலதோ, பஞ்ஞாவதா³ததோ, ஆபாத²ரமணீயதோ, விமத்³த³க்க²மதோ, ஸுய்யமானஸுக²தோ, வீமம்ஸியமானஹிததோதி ஏவமாதீ³ஹி யோஜேதப்³ப³ம்.

ததோ பரம்பி சதூஹி உபமாஹி தே³ஸனம்யேவ தோ²மேதி. தத்த² நிக்குஜ்ஜிதந்தி அதோ⁴முக²ட்ட²பிதம், ஹேட்டா² முக²ஜாதம் வா. உக்குஜ்ஜேய்யாதி உபரிமுக²ம் கரேய்ய. படிச்ச²ன்னந்தி திணபண்ணாதி³ச்சா²தி³தம். விவரேய்யாதி உக்³கா⁴டேய்ய. மூள்ஹஸ்ஸாதி தி³ஸாமூள்ஹஸ்ஸ. மக்³க³ம் ஆசிக்கே²ய்யாதி ஹத்தே² க³ஹேத்வா ‘‘ஏஸ மக்³கோ³’’தி வதே³ய்ய. அந்த⁴காரேதி காளபக்க²சாதுத்³த³ஸீஅட்³ட⁴ரத்தக⁴னவனஸண்ட³மேக⁴படலேஹி சதுரங்கே³ தமஸி. அயம் தாவ பத³த்தோ².

அயம் பன அதி⁴ப்பாயயோஜனா – யதா² கோசி நிக்குஜ்ஜிதம் உக்குஜ்ஜேய்ய, ஏவம் ஸத்³த⁴ம்மவிமுக²ம் அஸத்³த⁴ம்மபதிதம் மம் அஸத்³த⁴ம்மா வுட்டா²பேந்தேன, யதா² படிச்ச²ன்னம் விவரேய்ய; ஏவம் கஸ்ஸபஸ்ஸ ப⁴க³வதோ ஸாஸனந்தரதா⁴னா பபு⁴தி மிச்சா²தி³ட்டி²க³ஹனபடிச்ச²ன்னம் ஸாஸனம் விவரந்தேன, யதா² மூள்ஹஸ்ஸ மக்³க³ம் ஆசிக்கே²ய்ய, ஏவம் கும்மக்³க³மிச்சா²மக்³க³படிபன்னஸ்ஸ மே ஸக்³க³மோக்க²மக்³க³ம் ஆசிக்க²ந்தேன, யதா² அந்த⁴காரே தேலபஜ்ஜோதம் தா⁴ரேய்ய, ஏவம் மோஹந்த⁴காரனிமுக்³க³ஸ்ஸ மே பு³த்³தா⁴தி³ரதனரூபானி அபஸ்ஸதோ தப்படிச்சா²த³கமோஹந்த⁴காரவித்³த⁴ம்ஸகதே³ஸனாபஜ்ஜோததா⁴ரணேன மய்ஹம் போ⁴தா கோ³தமேன ஏதேஹி பரியாயேஹி தே³ஸிதத்தா அனேகபரியாயேன த⁴ம்மோ பகாஸிதோ.

அத² வா ஏகச்சியேன மத்தேன யஸ்மா அயம் த⁴ம்மோ து³க்க²த³ஸ்ஸனேன அஸுபே⁴ ‘‘ஸுப⁴’’ந்தி விபல்லாஸப்பஹானேன ச நிக்குஜ்ஜிதுக்குஜ்ஜிதஸதி³ஸோ, ஸமுத³யத³ஸ்ஸனேன து³க்கே² ‘‘ஸுக²’’ந்தி விபல்லாஸப்பஹானேன ச படிச்ச²ன்னவிவரணஸதி³ஸோ, நிரோத⁴த³ஸ்ஸனேன அனிச்சே ‘‘நிச்ச’’ந்தி விபல்லாஸப்பஹானேன ச மூள்ஹஸ்ஸ மக்³கா³சிக்க²ணஸதி³ஸோ, மக்³க³த³ஸ்ஸனேன அனத்தனி ‘‘அத்தா’’தி விபல்லாஸப்பஹானேன ச அந்த⁴காரே பஜ்ஜோதஸதி³ஸோ, தஸ்மா ஸேய்யதா²பி நாம நிக்குஜ்ஜிதம் வா உக்குஜ்ஜேய்ய…பே… பஜ்ஜோதம் தா⁴ரேய்ய ‘‘சக்கு²மந்தோ ரூபானி த³க்க²ந்தீ’’தி, ஏவம் பகாஸிதோ ஹோதி.

யஸ்மா பனேத்த² ஸத்³தா⁴தபகாயகு³த்ததாதீ³ஹி ஸீலக்க²ந்தோ⁴ பகாஸிதோ ஹோதி, பஞ்ஞாய பஞ்ஞாக்க²ந்தோ⁴, ஹிரிமனாதீ³ஹி ஸமாதி⁴க்க²ந்தோ⁴, யோக³க்கே²மேன நிரோதோ⁴தி ஏவம் திக்க²ந்தோ⁴ அரியமக்³கோ³ நிரோதோ⁴ சாதி ஸரூபேனேவ த்³வே அரியஸச்சானி பகாஸிதானி. தத்த² மக்³கோ³ படிபக்கோ² ஸமுத³யஸ்ஸ, நிரோதோ⁴ து³க்க²ஸ்ஸாதி படிபக்கே²ன த்³வே. இதி இமினா பரியாயேன சத்தாரி ஸச்சானி பகாஸிதானி. தஸ்மா அனேகபரியாயேன பகாஸிதோ ஹோதீதி வேதி³தப்³போ³.

ஏஸாஹந்திஆதீ³ஸு ஏஸோ அஹந்தி ஏஸாஹம். ஸரணம் க³ச்சா²மீதி பாதே³ஸு நிபதித்வா பணிபாதேன ஸரணக³மனேன க³தோபி இதா³னி வாசாய ஸமாதி³யந்தோ ஆஹ. அத² வா பணிபாதேன பு³த்³த⁴ம்யேவ ஸரணம் க³தோதி இதா³னி தம் ஆதி³ம் கத்வா ஸேஸே த⁴ம்மஸங்கே⁴பி க³ந்தும் ஆஹ. அஜ்ஜதக்³கே³தி அஜ்ஜதம் ஆதி³ம் கத்வா, அஜ்ஜத³க்³கே³தி வா பாடோ², த³-காரோ பத³ஸந்தி⁴கரோ, அஜ்ஜ அக்³க³ம் கத்வாதி வுத்தம் ஹோதி. பாணேஹி உபேதம் பாணுபேதம், யாவ மே ஜீவிதம் பவத்ததி, தாவ உபேதம், அனஞ்ஞஸத்து²கம் தீஹி ஸரணக³மனேஹி ஸரணம் க³தம் மம் ப⁴வம் கோ³தமோ தா⁴ரேது ஜானாதூதி வுத்தம் ஹோதி. ஏத்தாவதா அனேன ஸுதானுரூபா படிபத்தி த³ஸ்ஸிதா ஹோதி. நிக்குஜ்ஜிதாதீ³ஹி வா ஸத்து²ஸம்பத்திம் த³ஸ்ஸேத்வா இமினா ‘‘ஏஸாஹ’’ந்திஆதி³னா ஸிஸ்ஸஸம்பத்தி த³ஸ்ஸிதா. தேன வா பஞ்ஞாபடிலாப⁴ம் த³ஸ்ஸேத்வா இமினா ஸத்³தா⁴படிலாபோ⁴ த³ஸ்ஸிதோ. இதா³னி ஏவம் படிலத்³த⁴ஸத்³தே⁴ன பஞ்ஞவதா யம் கத்தப்³ப³ம், தம் கத்துகாமோ ப⁴க³வந்தம் யாசதி ‘‘லபே⁴ய்யாஹ’’ந்தி. தத்த² ப⁴க³வதோ இத்³தி⁴யாதீ³ஹி அபி⁴ப்பஸாதி³தசித்தோ ‘‘ப⁴க³வாபி சக்கவத்திரஜ்ஜம் பஹாய பப்³ப³ஜிதோ, கிமங்க³ம் பனாஹ’’ந்தி ஸத்³தா⁴ய பப்³ப³ஜ்ஜம் யாசதி, தத்த² பரிபூரகாரிதம் பத்தே²ந்தோ பஞ்ஞாய உபஸம்பத³ம். ஸேஸம் பாகடமேவ.

ஏகோ வூபகட்டோ²திஆதீ³ஸு பன ஏகோ காயவிவேகேன, வூபகட்டோ² சித்தவிவேகேன, அப்பமத்தோ கம்மட்டா²னே ஸதிஅவிஜஹனேன, ஆதாபீ காயிகசேதஸிகவீரியஸங்கா²தேன ஆதாபேன, பஹிதத்தோ காயே ச ஜீவிதே ச அனபேக்க²தாய விஹரந்தோ அஞ்ஞதரஇரியாபத²விஹாரேன. ந சிரஸ்ஸேவாதி பப்³ப³ஜ்ஜம் உபாதா³ய வுச்சதி. குலபுத்தாதி து³விதா⁴ குலபுத்தா, ஜாதிகுலபுத்தா, ஆசாரகுலபுத்தா ச. அயம் பன உப⁴யதா²பி குலபுத்தோ. அகா³ரஸ்மாதி க⁴ரா. அகா³ரானம் ஹிதம் அகா³ரியம் கஸிகோ³ரக்கா²தி³குடும்ப³போஸனகம்மம் வுச்சதி. நத்தி² ஏத்த² அகா³ரியந்தி அனகா³ரியம், பப்³ப³ஜ்ஜாயேதம் அதி⁴வசனம் பப்³ப³ஜந்தீதி உபக³ச்ச²ந்தி உபஸங்கமந்தி. தத³னுத்தரந்தி தம் அனுத்தரம். ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானம், அரஹத்தப²லந்தி வுத்தம் ஹோதி. தஸ்ஸ ஹி அத்தா²ய குலபுத்தா பப்³ப³ஜந்தி. தி³ட்டே²வ த⁴ம்மேதி தஸ்மிம்யேவ அத்தபா⁴வே. ஸயம் அபி⁴ஞ்ஞா ஸச்சி²கத்வாதி அத்தனாயேவ பஞ்ஞாய பச்சக்க²ம் கத்வா, அபரப்பச்சயம் ஞத்வாதி அத்தோ². உபஸம்பஜ்ஜ விஹாஸீதி பாபுணித்வா ஸம்பாதே³த்வா வா விஹாஸி. ஏவம் விஹரந்தோ ச கீ²ணா ஜாதி…பே… அப்³ப⁴ஞ்ஞாஸி. ஏதேனஸ்ஸ பச்சவேக்க²ணபூ⁴மிம் த³ஸ்ஸேதி.

கதமா பனஸ்ஸ ஜாதி கீ²ணா, கத²ஞ்ச நம் அப்³ப⁴ஞ்ஞாஸீதி? வுச்சதே – ந தாவஸ்ஸ அதீதா ஜாதி கீ²ணா புப்³பே³வ கீ²ணத்தா, ந அனாக³தா அனாக³தே வாயாமாபா⁴வதோ, ந பச்சுப்பன்னா விஜ்ஜமானத்தா. யா பன மக்³க³ஸ்ஸ அபா⁴விதத்தா உப்பஜ்ஜேய்ய ஏகசதுபஞ்சவோகாரப⁴வேஸு ஏகசதுபஞ்சக்க²ந்த⁴ப்பபே⁴தா³ ஜாதி, ஸா மக்³க³ஸ்ஸ பா⁴விதத்தா அனுப்பாத³த⁴ம்மதம் ஆபஜ்ஜனேன கீ²ணா. தம் ஸோ மக்³க³பா⁴வனாய பஹீனகிலேஸே பச்சவேக்கி²த்வா கிலேஸாபா⁴வே விஜ்ஜமானம்பி கம்மம் ஆயதிம் அபடிஸந்தி⁴கம் ஹோதீதி ஜானந்தோ ஜானாதி.

வுஸிதந்தி வுத்த²ம் பரிவுத்த²ம், கதம் சரிதம் நிட்டா²பிதந்தி அத்தோ². ப்³ரஹ்மசரியந்தி மக்³க³ப்³ரஹ்மசரியம். கதம் கரணீயந்தி சதூஸு ஸச்சேஸு சதூஹி மக்³கே³ஹி பரிஞ்ஞாபஹானஸச்சி²கிரியபா⁴வனாவஸேன ஸோளஸவித⁴ம்பி கிச்சம் நிட்டா²பிதந்தி அத்தோ². நாபரம் இத்த²த்தாயாதி இதா³னி புன இத்த²பா⁴வாய ஏவம் ஸோளஸகிச்சபா⁴வாய கிலேஸக்க²யாய வா மக்³க³பா⁴வனா நத்தீ²தி. அத² வா இத்த²த்தாயாதி இத்த²பா⁴வதோ, இமஸ்மா ஏவம்பகாரா இதா³னி வத்தமானக்க²ந்த⁴ஸந்தானா அபரம் க²ந்த⁴ஸந்தானம் நத்தி². இமே பன பஞ்சக்க²ந்தா⁴ பரிஞ்ஞாதா திட்ட²ந்தி சி²ன்னமூலகோ ருக்கோ² வியாதி அப்³ப⁴ஞ்ஞாஸி. அஞ்ஞதரோதி ஏகோ. அரஹதந்தி அரஹந்தானம். மஹாஸாவகானம் அப்³ப⁴ந்தரோ ஆயஸ்மா பா⁴ரத்³வாஜோ அஹோஸீதி அயம் கிரேத்த² அதி⁴ப்பாயோதி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய கஸிபா⁴ரத்³வாஜஸுத்தவண்ணனா நிட்டி²தா.