11. விஜயஸுத்தவண்ணனா

சரம் வா யதி³ வா திட்ட²ந்தி நந்த³ஸுத்தம். ‘‘விஜயஸுத்தம் காயவிச்ச²ந்த³னிகஸுத்த’’ந்திபி வுச்சதி. கா உப்பத்தி? இத³ம் கிர ஸுத்தம் த்³வீஸு டா²னேஸு வுத்தம், தஸ்மா அஸ்ஸ து³விதா⁴ உப்பத்தி. தத்த² ப⁴க³வதா அனுபுப்³பே³ன கபிலவத்து²ம் அனுப்பத்வா, ஸாகியே வினேத்வா நந்தா³த³யோ பப்³பா³ஜேத்வா, அனுஞ்ஞாதாய மாதுகா³மஸ்ஸ பப்³ப³ஜ்ஜாய ஆனந்த³த்தே²ரஸ்ஸ ப⁴கி³னீ நந்தா³, கே²மகஸக்கரஞ்ஞோ தீ⁴தா அபி⁴ரூபனந்தா³, ஜனபத³கல்யாணீ நந்தா³தி திஸ்ஸோ நந்தா³யோ பப்³ப³ஜிம்ஸு. தேன ச ஸமயேன ப⁴க³வா ஸாவத்தி²யம் விஹரதி. அபி⁴ரூபனந்தா³ அபி⁴ரூபா ஏவ அஹோஸி த³ஸ்ஸனீயா பாஸாதி³கா, தேனேவஸ்ஸா அபி⁴ரூபனந்தா³தி நாமமகம்ஸு. ஜனபத³கல்யாணீ நந்தா³பி ரூபேன அத்தனா ஸதி³ஸம் ந பஸ்ஸதி. தா உபோ⁴பி ரூபமத³மத்தா ‘‘ப⁴க³வா ரூபம் விவண்ணேதி, க³ரஹதி, அனேகபரியாயேன ரூபே ஆதீ³னவம் த³ஸ்ஸேதீ’’தி ப⁴க³வதோ உபட்டா²னம் ந க³ச்ச²ந்தி, த³ட்டு²ம்பி ந இச்ச²ந்தி. ஏவம் அப்பஸன்னா கஸ்மா பப்³ப³ஜிதாதி சே? அக³தியா. அபி⁴ரூபனந்தா³ய ஹி வாரேய்யதி³வஸேயேவ ஸாமிகோ ஸக்யகுமாரோ காலமகாஸி. அத² நம் மாதாபிதரோ அகாமகம் பப்³பா³ஜேஸும். ஜனபத³கல்யாணீ நந்தா³பி ஆயஸ்மந்தே நந்தே³ அரஹத்தம் பத்தே நிராஸா ஹுத்வா ‘‘மய்ஹம் ஸாமிகோ ச மாதா ச மஹாபஜாபதி அஞ்ஞே ச ஞாதகா பப்³ப³ஜிதா, ஞாதீஹி வினா து³க்கோ² க⁴ராவாஸோ’’தி க⁴ராவாஸே அஸ்ஸாத³மலப⁴ந்தீ பப்³ப³ஜிதா, ந ஸத்³தா⁴ய.

அத² ப⁴க³வா தாஸம் ஞாணபரிபாகம் விதி³த்வா மஹாபஜாபதிம் ஆணாபேஸி ‘‘ஸப்³பா³பி பி⁴க்கு²னியோ படிபாடியா ஓவாத³ம் ஆக³ச்ச²ந்தூ’’தி. தா அத்தனோ வாரே ஸம்பத்தே அஞ்ஞம் பேஸேந்தி. ததோ ப⁴க³வா ‘‘ஸம்பத்தே வாரே அத்தனாவ ஆக³ந்தப்³ப³ம், ந அஞ்ஞா பேஸேதப்³பா³’’தி ஆஹ. அதே²கதி³வஸம் அபி⁴ரூபனந்தா³ அக³மாஸி. தம் ப⁴க³வா நிம்மிதரூபேன ஸம்வேஜேத்வா ‘‘அட்டீ²னம் நக³ரம் கத’’ந்தி இமாய த⁴ம்மபத³கா³தா²ய –

‘‘ஆதுரம் அஸுசிம் பூதிம், பஸ்ஸ நந்தே³ ஸமுஸ்ஸயம்;

உக்³க⁴ரந்தம் பக்³க⁴ரந்தம், பா³லானம் அபி⁴பத்தி²தம். (தே²ரீகா³. 19);

‘‘அனிமித்தஞ்ச பா⁴வேஹி, மானானுஸயமுஜ்ஜஹ;

ததோ மானாபி⁴ஸமயா, உபஸந்தா சரிஸ்ஸஸீ’’தி. (ஸு. நி. 344; தே²ரீகா³. 20) –

இமாஹி தே²ரீகா³தா²ஹி ச அனுபுப்³பே³ன அரஹத்தே பதிட்டா²பேஸி. அதே²கதி³வஸம் ஸாவத்தி²வாஸினோ புரேப⁴த்தம் தா³னம் த³த்வா ஸமாதி³ன்னுபோஸதா² ஸுனிவத்தா² ஸுபாருதா க³ந்த⁴புப்பா²தீ³னி ஆதா³ய த⁴ம்மஸ்ஸவனத்தா²ய ஜேதவனம் க³ந்த்வா த⁴ம்மஸ்ஸவனபரியோஸானே ப⁴க³வந்தம் வந்தி³த்வா நக³ரம் பவிஸந்தி. பி⁴க்கு²னிஸங்கோ⁴பி த⁴ம்மகத²ம் ஸுத்வா பி⁴க்கு²னிஉபஸ்ஸயம் க³ச்ச²தி. தத்த² மனுஸ்ஸா ச பி⁴க்கு²னியோ ச ப⁴க³வதோ வண்ணம் பா⁴ஸந்தி. சதுப்பமாணிகே ஹி லோகஸன்னிவாஸே ஸம்மாஸம்பு³த்³த⁴ம் தி³ஸ்வா அப்பஸீத³ந்தோ நாம நத்தி². ரூபப்பமாணிகா ஹி புக்³க³லா ப⁴க³வதோ லக்க²ணக²சிதமனுப்³யஞ்ஜனவிசித்ரம் ஸமுஜ்ஜலிதகேதுமாலாப்³யாமப்பபா⁴வினத்³த⁴மலங்காரத்த²மிவ லோகஸ்ஸ ஸமுப்பன்னம் ரூபம் தி³ஸ்வா பஸீத³ந்தி, கோ⁴ஸப்பமாணிகா அனேகஸதேஸு ஜாதகேஸு கித்திகோ⁴ஸம் அட்ட²ங்க³ஸமன்னாக³தம் கரவீகமது⁴ரனிக்³கோ⁴ஸம் ப்³ரஹ்மஸ்ஸரஞ்ச ஸுத்வா, லூக²ப்பமாணிகா பத்தசீவராதி³லூக²தம் து³க்கரகாரிகலூக²தம் வா தி³ஸ்வா, த⁴ம்மப்பமாணிகா ஸீலக்க²ந்தா⁴தீ³ஸு யம்கிஞ்சி த⁴ம்மக்க²ந்த⁴ம் உபபரிக்கி²த்வா. தஸ்மா ஸப்³ப³ட்டா²னேஸு ப⁴க³வதோ வண்ணம் பா⁴ஸந்தி. ஜனபத³கல்யாணீ நந்தா³ பி⁴க்கு²னிபஸ்ஸயம் பத்வாபி அனேகபரியாயேன ப⁴க³வதோ வண்ணம் பா⁴ஸந்தானம் தேஸம் ஸுத்வா ப⁴க³வந்தம் உபக³ந்துகாமா ஹுத்வா பி⁴க்கு²னீனம் ஆரோசேஸி. பி⁴க்கு²னியோ தம் க³ஹேத்வா ப⁴க³வந்தம் உபஸங்கமிம்ஸு.

ப⁴க³வா படிகச்சேவ தஸ்ஸாக³மனம் விதி³த்வா கண்டகேன கண்டகம், ஆணியா ச ஆணிம் நீஹரிதுகாமோ புரிஸோ விய ரூபேனேவ ரூபமத³ம் வினேதும் அத்தனோ இத்³தி⁴ப³லேன பன்னரஸஸோளஸவஸ்ஸுத்³தே³ஸிகம் அதித³ஸ்ஸனீயம் இத்தி²ம் பஸ்ஸே ட²த்வா பீ³ஜமானம் அபி⁴னிம்மினி. நந்தா³ பி⁴க்கு²னீஹி ஸத்³தி⁴ம் உபஸங்கமித்வா, ப⁴க³வந்தம் வந்தி³த்வா, பி⁴க்கு²னிஸங்க⁴ஸ்ஸ அந்தரே நிஸீதி³த்வா, பாத³தலா பபு⁴தி யாவ கேஸக்³கா³ ப⁴க³வதோ ரூபஸம்பத்திம் தி³ஸ்வா புன தம் ப⁴க³வதோ பஸ்ஸே டி²தம் நிம்மதரூபஞ்ச தி³ஸ்வா ‘‘அஹோ அயம் இத்தீ² ரூபவதீ’’தி அத்தனோ ரூபமத³ம் ஜஹித்வா தஸ்ஸா ரூபே அபி⁴ரத்தபா⁴வா அஹோஸி. ததோ ப⁴க³வா தம் இத்தி²ம் வீஸதிவஸ்ஸப்பமாணம் கத்வா த³ஸ்ஸேஸி. மாதுகா³மோ ஹி ஸோளஸவஸ்ஸுத்³தே³ஸிகோயேவ ஸோப⁴தி, ந ததோ உத்³த⁴ம். அத² தஸ்ஸா ரூபபரிஹானிம் தி³ஸ்வா நந்தா³ய தஸ்மிம் ரூபே ச²ந்த³ராகோ³ தனுகோ அஹோஸி. ததோ ப⁴க³வா அவிஜாதவண்ணம், ஸகிம்விஜாதவண்ணம், மஜ்ஜி²மித்தி²வண்ணம், மஹித்தி²வண்ணந்தி ஏவம் யாவ வஸ்ஸஸதிகம் ஓப⁴க்³க³ம் த³ண்ட³பராயணம் திலகாஹதக³த்தம் கத்வா, த³ஸ்ஸேத்வா பஸ்ஸமானாயேவ நந்தா³ய தஸ்ஸா மரணம் உத்³து⁴மாதகாதி³பே⁴த³ம் காகாதீ³ஹி ஸம்பரிவாரேத்வா க²ஜ்ஜமானம் து³க்³க³ந்த⁴ம் ஜேகு³ச்ச²படிகூலபா⁴வஞ்ச த³ஸ்ஸேஸி. நந்தா³ய தம் கமம் தி³ஸ்வா ‘‘ஏவமேவம் மமபி அஞ்ஞேஸம்பி ஸப்³ப³ஸாதா⁴ரணோ அயம் கமோ’’தி அனிச்சஸஞ்ஞா ஸண்டா²ஸி, தத³னுஸாரேன ச து³க்க²னத்தஸஞ்ஞாபி, தயோ ப⁴வா ஆதி³த்தமிவ அகா³ரம் அப்படிஸரணா ஹுத்வா உபட்ட²ஹிம்ஸு. அத² ப⁴க³வா ‘‘கம்மட்டா²னே பக்க²ந்தம் நந்தா³ய சித்த’’ந்தி ஞத்வா தஸ்ஸா ஸப்பாயவஸேன இமா கா³தா²யோ அபா⁴ஸி –

‘‘ஆதுரம் அஸுசிம் பூதிம், பஸ்ஸ நந்தே³ ஸமுஸ்ஸயம்;

உக்³க⁴ரந்தம் பக்³க⁴ரந்தம், பா³லானம் அபி⁴பத்தி²தம். (தே²ரீகா³. 19);

‘‘யதா² இத³ம் ததா² ஏதம், யதா² ஏதம் ததா² இத³ம்;

தா⁴துஸோ ஸுஞ்ஞதோ பஸ்ஸ, மா லோகம் புனராக³மி;

ப⁴வே ச²ந்த³ம் விராஜேத்வா, உபஸந்தா சரிஸ்ஸஸீ’’தி. (ஸு. நி. 205);

கா³தா²பரியோஸானே நந்தா³ ஸோதாபத்திப²லே பதிட்டா²ஸி. அத²ஸ்ஸா ப⁴க³வா உபரிமக்³கா³தி⁴க³மத்த²ம் ஸுஞ்ஞதபரிவாரம் விபஸ்ஸனாகம்மட்டா²னம் கதே²ந்தோ இமம் ஸுத்தமபா⁴ஸி. அயம் தாவஸ்ஸ ஏகா உப்பத்தி.

ப⁴க³வதி பன ராஜக³ஹே விஹரந்தே யா ஸா சீவரக்க²ந்த⁴கே (மஹாவ. 326) வித்தா²ரதோ வுத்தஸமுட்டா²னாய ஸாலவதியா க³ணிகாய தீ⁴தா ஜீவகஸ்ஸ கனிட்டா² ஸிரிமா நாம மாது அச்சயேன தம் டா²னம் லபி⁴த்வா ‘‘அக்கோதே⁴ன ஜினே கோத⁴’’ந்தி (த⁴. ப. 223; ஜா. 1.2.1) இமிஸ்ஸா கா³தா²ய வத்து²ம்ஹி புண்ணகஸேட்டி²தீ⁴தரம் அவமஞ்ஞித்வா, ப⁴க³வந்தம் க²மாபேந்தீ த⁴ம்மதே³ஸனம் ஸுத்வா, ஸோதாபன்னா ஹுத்வா அட்ட² நிச்சப⁴த்தானி பவத்தேஸி. தம் ஆரப்³ப⁴ அஞ்ஞதரோ நிச்சப⁴த்திகோ பி⁴க்கு² ராக³ம் உப்பாதே³ஸி. ஆஹாரகிச்சம்பி ச காதும் அஸக்கோந்தோ நிராஹாரோ நிபஜ்ஜீதி த⁴ம்மபத³கா³தா²வத்து²ம்ஹி வுத்தம். தஸ்மிம் ததா²னிபன்னேயேவ ஸிரிமா காலம் கத்வா யாமப⁴வனே ஸுயாமஸ்ஸ தே³வீ அஹோஸி. அத² தஸ்ஸா ஸரீரஸ்ஸ அக்³கி³கிச்சம் நிவாரேத்வா ஆமகஸுஸானே ரஞ்ஞா நிக்கி²பாபிதம் ஸரீரம் த³ஸ்ஸனாய ப⁴க³வா பி⁴க்கு²ஸங்க⁴பரிவுதோ அக³மாஸி, தம்பி பி⁴க்கு²ம் ஆதா³ய, ததா² நாக³ரா ச ராஜா ச. தத்த² மனுஸ்ஸா ப⁴ணந்தி ‘‘புப்³பே³ ஸிரிமாய அட்டு²த்தரஸஹஸ்ஸேனாபி த³ஸ்ஸனம் து³ல்லப⁴ம், தம் தா³னஜ்ஜ காகணிகாயாபி த³ட்டு²காமோ நத்தீ²’’தி. ஸிரிமாபி தே³வகஞ்ஞா பஞ்சஹி ரத²ஸதேஹி பரிவுதா தத்ராக³மாஸி. தத்ராபி ப⁴க³வா ஸன்னிபதிதானம் த⁴ம்மதே³ஸனத்த²ம் இமம் ஸுத்தம் தஸ்ஸ பி⁴க்கு²னோ ஓவாத³த்த²ம் ‘‘பஸ்ஸ சித்தகதம் பி³ம்ப³’’ந்தி (த⁴. ப. 147) இமஞ்ச த⁴ம்மபத³கா³த²ம் அபா⁴ஸி. அயமஸ்ஸ து³தியா உப்பத்தி.

195. தத்த² சரம் வாதி ஸகலரூபகாயஸ்ஸ க³ந்தப்³ப³தி³ஸாபி⁴முகே²னாபி⁴னீஹாரேன க³ச்ச²ந்தோ வா. யதி³ வா திட்ட²ந்தி தஸ்ஸேவ உஸ்ஸாபனபா⁴வேன திட்ட²ந்தோ வா. நிஸின்னோ உத³ வா ஸயந்தி தஸ்ஸேவ ஹேட்டி²மபா⁴க³ஸமிஞ்ஜனஉபரிமபா⁴க³ஸமுஸ்ஸாபனபா⁴வேன நிஸின்னோ வா, திரியம் பஸாரணபா⁴வேன ஸயந்தோ வா. ஸமிஞ்ஜேதி பஸாரேதீதி தானி தானி பப்³பா³னி ஸமிஞ்ஜேதி ச பஸாரேதி ச.

ஏஸா காயஸ்ஸ இஞ்ஜனாதி ஸப்³பா³பேஸா இமஸ்ஸேவ ஸவிஞ்ஞாணகஸ்ஸ காயஸ்ஸ இஞ்ஜனா சலனா ப²ந்த³னா, நத்தே²த்த² அஞ்ஞோ கோசி சரந்தோ வா பஸாரேந்தோ வா, அபிச கோ² பன ‘‘சராமீ’’தி சித்தே உப்பஜ்ஜந்தே தம்ஸமுட்டா²னா வாயோதா⁴து காயம் ப²ரதி, தேனஸ்ஸ க³ந்தப்³ப³தி³ஸாபி⁴முகோ² அபி⁴னீஹாரோ ஹோதி, தே³ஸந்தரே ரூபந்தரபாதுபா⁴வோதி அத்தோ². தேன ‘‘சர’’ந்தி வுச்சதி. ததா² ‘‘திட்டா²மீ’’தி சித்தே உப்பஜ்ஜந்தே தம்ஸமுட்டா²னா வாயோதா⁴து காயம் ப²ரதி, தேனஸ்ஸ ஸமுஸ்ஸாபனம் ஹோதி, உபரூபரிட்டா²னேன ரூபபாதுபா⁴வோதி அத்தோ². தேன ‘‘திட்ட²’’ந்தி வுச்சதி. ததா² ‘‘நிஸீதா³மீ’’தி சித்தே உப்பஜ்ஜந்தே தம்ஸமுட்டா²னா வாயோதா⁴து காயம் ப²ரதி, தேனஸ்ஸ ஹேட்டி²மபா⁴க³ஸமிஞ்ஜனஞ்ச உபரிமபா⁴க³ஸமுஸ்ஸாபனஞ்ச ஹோதி, ததா²பா⁴வேன ரூபபாதுபா⁴வோதி அத்தோ². தேன ‘‘நிஸின்னோ’’தி வுச்சதி. ததா² ‘‘ஸயாமீ’’தி சித்தே உப்பஜ்ஜந்தே தம்ஸமுட்டா²னா வாயோதா⁴து காயம் ப²ரதி, தேனஸ்ஸ திரியம் பஸாரணம் ஹோதி, ததா²பா⁴வேன ரூபபாதுபா⁴வோதி அத்தோ². தேன ‘‘ஸய’’ந்தி வுச்சதி.

ஏவம் சாயமாயஸ்மா யோ கோசி இத்த²ன்னாமோ சரம் வா யதி³ வா திட்ட²ம், நிஸின்னோ உத³ வா ஸயம் யமேதம் தத்த² தத்த² இரியாபதே² தேஸம் தேஸம் பப்³பா³னம் ஸமிஞ்ஜனப்பஸாரணவஸேன ஸமிஞ்ஜேதி பஸாரேதீதி வுச்சதி. தம்பி யஸ்மா ஸமிஞ்ஜனப்பஸாரணசித்தே உப்பஜ்ஜமானே யதா²வுத்தேனேவ நயேன ஹோதி, தஸ்மா ஏஸா காயஸ்ஸ இஞ்ஜனா, நத்தே²த்த² அஞ்ஞோ கோசி, ஸுஞ்ஞமித³ம் கேனசி சரந்தேன வா பஸாரேந்தேன வா ஸத்தேன வா புக்³க³லேன வா. கேவலம் பன –

‘‘சித்தனானத்தமாக³ம்ம, நானத்தம் ஹோதி வாயுனோ;

வாயுனானத்ததோ நானா, ஹோதி காயஸ்ஸ இஞ்ஜனா’’தி. –

அயமேத்த² பரமத்தோ².

ஏவமேதாய கா³தா²ய ப⁴க³வா யஸ்மா ஏகஸ்மிம் இரியாபதே² சிரவினியோகே³ன காயபீளனம் ஹோதி, தஸ்ஸ ச வினோத³னத்த²ம் இரியாபத²பரிவத்தனம் கரீயதி, தஸ்மா ‘‘சரம் வா’’திஆதீ³ஹி இரியாபத²படிச்ச²ன்னம் து³க்க²லக்க²ணம் தீ³பேதி, ததா² சரணகாலே டா²னாதீ³னமபா⁴வதோ ஸப்³ப³மேதம் சரணாதி³பே⁴த³ம் ‘‘ஏஸா காயஸ்ஸ இஞ்ஜனா’’தி ப⁴ணந்தோ ஸந்ததிபடிச்ச²ன்னம் அனிச்சலக்க²ணம். தாய தாய ஸாமக்³கி³யா பவத்தாய ‘‘ஏஸா காயஸ்ஸ இஞ்ஜனா’’தி ச அத்தபடிக்கே²பேன ப⁴ணந்தோ அத்தஸஞ்ஞாக⁴னபடிச்ச²ன்னம் அனத்தலக்க²ணம் தீ³பேதி.

196. ஏவம் லக்க²ணத்தயதீ³பனேன ஸுஞ்ஞதகம்மட்டா²னம் கதே²த்வா புன ஸவிஞ்ஞாணகாவிஞ்ஞாணகஅஸுப⁴த³ஸ்ஸனத்த²ம் ‘‘அட்டி²னஹாருஸம்யுத்தோ’’தி ஆரபி⁴. தஸ்ஸத்தோ² – யஸ்ஸ சேஸா காயஸ்ஸ இஞ்ஜனா, ஸ்வாயம் காயோ விஸுத்³தி⁴மக்³கே³ த்³வத்திம்ஸாகாரவண்ணனாயம் வண்ணஸண்டா²னதி³ஸோகாஸபரிச்சே²த³பே⁴தே³ன அப்³யாபாரனயேன ச பகாஸிதேஹி ஸட்டா²தி⁴கேஹி தீஹி அட்டி²ஸதேஹி நவஹி ந்ஹாருஸதேஹி ச ஸம்யுத்தத்தா அட்டி²னஹாருஸம்யுத்தோ. தத்தே²வ பகாஸிதேன அக்³க³பாத³ங்கு³லிதசாதி³னா தசேன ச நவபேஸிஸதப்பபே⁴தே³ன ச மம்ஸேன அவலித்தத்தா தசமம்ஸாவலேபனோ பரமது³க்³க³ந்த⁴ஜேகு³ச்ச²படிகூலோதி வேதி³தப்³போ³. கிஞ்சேத்த² வேதி³தப்³ப³ம் ஸியா, யதி³ ஏஸ யா ஸா மஜ்ஜி²மஸ்ஸ புரிஸஸ்ஸ ஸகலஸரீரதோ ஸம்கட்³டி⁴தா ப³த³ரட்டி²ப்பமாணா ப⁴வேய்ய, தாய மக்கி²காபத்தஸுகு²மச்ச²வியா நீலாதி³ரங்க³ஜாதேன கே³ஹபி⁴த்தி விய படிச்ச²ன்னோ ந ப⁴வேய்ய, அயம் பன ஏவம் ஸுகு²மாயபி ச²வியா காயோ படிச்ச²ன்னோ பஞ்ஞாசக்கு²விரஹிதேஹி பா³லபுது²ஜ்ஜனேஹி யதா²பூ⁴தம் ந தி³ஸ்ஸதி. ச²விராக³ரஞ்ஜிதோ ஹிஸ்ஸ பரமஜேகு³ச்ச²படிகூலத⁴ம்மஸங்கா²தோ தசோபி தசபலிவேடி²தம் யம் தம் பபே⁴த³தோ –

‘‘நவபேஸிஸதா மம்ஸா, அவலித்தா களேவரே;

நானாகிமிகுலாகிண்ணம், மிள்ஹட்டா²னம்வ பூதிகா’’தி. –

ஏவம் வுத்தம் நவமம்ஸஸதம்பி, மம்ஸாவலித்தா யே தே –

‘‘நவன்ஹாருஸதா ஹோந்தி, ப்³யாமமத்தே களேவரே;

ப³ந்த⁴ந்தி அட்டி²ஸங்கா⁴தம், அகா³ரமிவ வல்லியா’’தி. –

தேபி, ந்ஹாருஸமுட்டி²தானி படிபாடியா அவட்டி²தானி பூதீனி து³க்³க³ந்தா⁴னி தீணி ஸட்டா²தி⁴கானி அட்டி²ஸதானிபி யதா²பூ⁴தம் ந தி³ஸ்ஸந்தி யதோ அனாதி³யித்வா தம் மக்கி²காபத்தஸுகு²மச்ச²விம். யானி பனஸ்ஸ ச²விராக³ரத்தேன தசேன பலிவேடி²தத்தா ஸப்³ப³லோகஸ்ஸ அபாகடானி நானப்பகாரானி அப்³ப⁴ந்தரகுணபானி பரமாஸுசிது³க்³க³ந்த⁴ஜேகு³ச்ச²னீயபடிகூலானி, தானிபி பஞ்ஞாசக்கு²னா படிவிஜ்ஜி²த்வா ஏவம் பஸ்ஸிதப்³போ³ ‘‘அந்தபூரோ உத³ரபூரோ…பே… பித்தஸ்ஸ ச வஸாய சா’’தி.

197. தத்த² அந்தஸ்ஸ பூரோ அந்தபூரோ. உத³ரஸ்ஸ பூரோ உத³ரபூரோ. உத³ரந்தி ச உத³ரியஸ்ஸேதம் அதி⁴வசனம். தஞ்ஹி டா²னனாமேன ‘‘உத³ர’’ந்தி வுத்தம். யகனபேளஸ்ஸாதி யகனபிண்ட³ஸ்ஸ. வத்தி²னோதி முத்தஸ்ஸ. டா²னூபசாரேன பனேதம் ‘‘வத்தீ²’’தி வுத்தம். பூரோதி அதி⁴காரோ, தஸ்மா யகனபேளஸ்ஸ பூரோ வத்தி²னோ பூரோதி ஏவம் யோஜேதப்³ப³ம். ஏஸ நயோ ஹத³யஸ்ஸாதிஆதீ³ஸு. ஸப்³பா³னேவ சேதானி அந்தாதீ³னி வண்ணஸண்டா²னதி³ஸோகாஸபரிச்சே²த³பே⁴தே³ன அப்³யாபாரனயேன ச விஸுத்³தி⁴மக்³கே³ வுத்தனயவஸேனேவ வேதி³தப்³பா³னி.

199-200. ஏவம் ப⁴க³வா ‘‘ந கிஞ்சேத்த² ஏகம்பி க³ய்ஹூபக³ம் முத்தாமணிஸதி³ஸம் அத்தி², அஞ்ஞத³த்து² அஸுசிபரிபூரோவாயம் காயோ’’தி அப்³ப⁴ந்தரகுணபம் த³ஸ்ஸேத்வா இதா³னி தமேவ அப்³ப⁴ந்தரகுணபம் ப³ஹினிக்க²மனகுணபேன பாகடம் கத்வா த³ஸ்ஸேந்தோ புப்³பே³ வுத்தஞ்ச ஸங்க³ண்ஹித்வா ‘‘அத²ஸ்ஸ நவஹி ஸோதேஹீ’’தி கா³தா²த்³வயமாஹ.

தத்த² அதா²தி பரியாயந்தரனித³ஸ்ஸனம், அபரேனாபி பரியாயேன அஸுசிபா⁴வம் பஸ்ஸாதி வுத்தம் ஹோதி. அஸ்ஸாதி இமஸ்ஸ காயஸ்ஸ. நவஹி ஸோதேஹீதி உபோ⁴அக்கி²ச்சி²த்³த³கண்ணச்சி²த்³த³னாஸாசி²த்³த³முக²வச்சமக்³க³பஸ்ஸாவமக்³கே³ஹி. அஸுசி ஸவதீதி ஸப்³ப³லோகபாகடனானப்பகாரபரமது³க்³க³ந்த⁴ஜேகு³ச்ச²அஸுசியேவ ஸவதி, ஸந்த³தி, பக்³க⁴ரதி, ந அஞ்ஞம் கிஞ்சி அக³ருசந்த³னாதி³க³ந்த⁴ஜாதம் வா மணிமுத்தாதி³ரதனஜாதம் வா. ஸப்³ப³தா³தி தஞ்ச கோ² ஸப்³ப³தா³ ரத்திம்பி தி³வாபி புப்³ப³ண்ஹேபி ஸாயன்ஹேபி திட்ட²தோபி க³ச்ச²தோபீதி. கிம் தம் அஸுசீதி சே? ‘‘அக்கி²ம்ஹா அக்கி²கூ³த²கோ’’திஆதி³. ஏதஸ்ஸ ஹி த்³வீஹி அக்கி²ச்சி²த்³தே³ஹி அபனீததசமம்ஸஸதி³ஸோ அக்கி²கூ³த²கோ, கண்ணச்சி²த்³தே³ஹி ரஜோஜல்லஸதி³ஸோ கண்ணகூ³த²கோ, நாஸாசி²த்³தே³ஹி புப்³ப³ஸதி³ஸா ஸிங்கா⁴ணிகா ச ஸவதி, முகே²ன ச வமதி. கிம் வமதீதி சே? ஏகதா³ பித்தம், யதா³ அப³த்³த⁴பித்தம் குப்பிதம் ஹோதி, ததா³ தம் வமதீதி அதி⁴ப்பாயோ. ஸேம்ஹஞ்சாதி ந கேவலஞ்ச பித்தம், யம்பி உத³ரபடலே ஏகபத்த²பூரப்பமாணம் ஸேம்ஹம் திட்ட²தி, தம்பி ஏகதா³ வமதி. தம் பனேதம் வண்ணாதி³தோ விஸுத்³தி⁴மக்³கே³ (விஸுத்³தி⁴. 1.203-204, 210-211) வுத்தனயேனேவ வேதி³தப்³ப³ம். ‘‘ஸேம்ஹஞ்சா’’தி ச-ஸத்³தே³ன ஸேம்ஹஞ்ச அஞ்ஞஞ்ச ஏவரூபம் உத³ரியலோஹிதாதி³அஸுசிம் வமதீதி த³ஸ்ஸேதி. ஏவம் ஸத்தஹி த்³வாரேஹி அஸுசிவமனம் த³ஸ்ஸேத்வா காலஞ்ஞூ புக்³க³லஞ்ஞூ பரிஸஞ்ஞூ ச ப⁴க³வா தது³த்தரி த்³வே த்³வாரானி விஸேஸவசனேன அனாமஸித்வா அபரேன பரியாயேன ஸப்³ப³ஸ்மாபி காயா அஸுசிஸவனம் த³ஸ்ஸேந்தோ ஆஹ ‘‘காயம்ஹா ஸேத³ஜல்லிகா’’தி. தத்த² ஸேத³ஜல்லிகாதி ஸேதோ³ ச லோணபடலமலபே⁴தா³ ஜல்லிகா ச, தஸ்ஸ ‘‘ஸவதி ஸப்³ப³தா³’’தி இமினா ஸத்³தி⁴ம் ஸம்ப³ந்தோ⁴.

201. ஏவம் ப⁴க³வா யதா² நாம ப⁴த்தே பச்சமானே தண்டு³லமலஞ்ச உத³கமலஞ்ச பே²ணேன ஸத்³தி⁴ம் உட்ட²ஹித்வா உக்க²லிமுக²ம் மக்கே²த்வா ப³ஹி க³ளதி, ததா² அஸிதபீதாதி³பே⁴தே³ ஆஹாரே கம்மஜேன அக்³கி³னா பச்சமானே யம் அஸிதபீதாதி³மலம் உட்ட²ஹித்வா ‘‘அக்கி²ம்ஹா அக்கி²கூ³த²கோ’’திஆதி³னா பே⁴தே³ன நிக்க²மந்தம் அக்கி²ஆதீ³னி மக்கே²த்வா ப³ஹி க³ளதி, தஸ்ஸாபி வஸேன இமஸ்ஸ காயஸ்ஸ அஸுசிபா⁴வம் த³ஸ்ஸேத்வா இதா³னி யம் லோகே உத்தமங்க³ஸம்மதம் ஸீஸம் அதிவிஸிட்ட²பா⁴வதோ பச்சேந்தா வந்த³னேய்யானம்பி வந்த³னம் ந கரோந்தி, தஸ்ஸாபி நிஸ்ஸாரதாய அஸுசிதாய சஸ்ஸ அஸுசிபா⁴வம் த³ஸ்ஸேந்தோ ‘‘அத²ஸ்ஸ ஸுஸிரம் ஸீஸ’’ந்தி இமம் கா³த²மாஹ.

தத்த² ஸுஸிரந்தி சி²த்³த³ம். மத்த²லுங்க³ஸ்ஸ பூரிதந்தி த³தி⁴ப⁴ரிதஅலாபு³கம் விய மத்த²லுங்க³ப⁴ரிதம். தஞ்ச பனேதம் மத்த²லுங்க³ம் விஸுத்³தி⁴மக்³கே³ வுத்தனயேனேவ வேதி³தப்³ப³ம். ஸுப⁴தோ நம் மஞ்ஞதி பா³லோதி தமேனம் ஏவம் நானாவித⁴குணபப⁴ரிதம்பி காயம் து³ச்சிந்திதசிந்தீ பா³லோ ஸுப⁴தோ மஞ்ஞதி, ஸுப⁴ம் ஸுசிம் இட்ட²ம் கந்தம் மனாபந்தி தீஹிபி தண்ஹாதி³ட்டி²மானமஞ்ஞனாஹி மஞ்ஞதி. கஸ்மா? யஸ்மா அவிஜ்ஜாய புரக்க²தோ சதுஸச்சபடிச்சா²த³கேன மோஹேன புரக்க²தோ, சோதி³தோ, பவத்திதோ, ‘‘ஏவம் ஆதி³ய, ஏவம் அபி⁴னிவிஸ ஏவம் மஞ்ஞாஹீ’’தி கா³ஹிதோதி அதி⁴ப்பாயோ. பஸ்ஸ யாவ அனத்த²கரா சாயம் அவிஜ்ஜாதி.

202. ஏவம் ப⁴க³வா ஸவிஞ்ஞாணகவஸேன அஸுப⁴ம் த³ஸ்ஸேத்வா இதா³னி அவிஞ்ஞாணகவஸேன த³ஸ்ஸேதும், யஸ்மா வா சக்கவத்திரஞ்ஞோபி காயோ யதா²வுத்தகுணபப⁴ரிதோயேவ ஹோதி, தஸ்மா ஸப்³ப³ப்பகாரேனபி ஸம்பத்திப⁴வே அஸுப⁴ம் த³ஸ்ஸேத்வா இதா³னி விபத்திப⁴வே த³ஸ்ஸேதும் ‘‘யதா³ ச ஸோ மதோ ஸேதீ’’தி கா³த²மாஹ.

தஸ்ஸத்தோ² – ஸ்வாயமேவம்விதோ⁴ காயோ யதா³ ஆயுஉஸ்மாவிஞ்ஞாணாபக³மேன மதோ வாதப⁴ரிதப⁴ஸ்தா விய உத்³து⁴மாதகோ வண்ணபரிபே⁴தே³ன வினீலகோ ஸுஸானஸ்மிம் நிரத்த²ம்வ கலிங்க³ரம் ச²ட்³டி³தத்தா அபவித்³தோ⁴ ஸேதி, அத² ‘‘ந தா³னிஸ்ஸ புன உட்டா²னம் ப⁴விஸ்ஸதீ’’தி ஏகம்ஸதோயேவ அனபேக்கா² ஹோந்தி ஞாதயோ. தத்த² மதோதி அனிச்சதம் த³ஸ்ஸேதி, ஸேதீதி நிரீஹகத்தம். தது³ப⁴யேன ச ஜீவிதப³லமத³ப்பஹானே நியோஜேதி. உத்³து⁴மாதோதி ஸண்டா²னவிபத்திம் த³ஸ்ஸேதி, வினீலகோதி ச²விராக³விபத்திம். தது³ப⁴யேன ச ரூபமத³ப்பஹானே வண்ணபோக்க²ரதம் படிச்ச மானப்பஹானே ச நியோஜேதி. அபவித்³தோ⁴தி க³ஹேதப்³பா³பா⁴வம் த³ஸ்ஸேதி, ஸுஸானஸ்மிந்தி அந்தோ அதி⁴வாஸேதுமனரஹம் ஜிகு³ச்ச²னீயபா⁴வம். தது³ப⁴யேனபி ‘‘மம’’ந்தி கா³ஹஸ்ஸ ஸுப⁴ஸஞ்ஞாய ச பஹானே நியோஜேதி. அனபேக்கா² ஹோந்தி ஞாதயோதி படிகிரியாபா⁴வம் த³ஸ்ஸேதி, தேன ச பரிவாரமத³ப்பஹானே நியோஜேதி.

203. ஏவமிமாய கா³தா²ய அபரிபி⁴ன்னாவிஞ்ஞாணகவஸேன அஸுப⁴ம் த³ஸ்ஸேத்வா இதா³னி பரிபி⁴ன்னவஸேனாபி த³ஸ்ஸேதும் ‘‘கா²த³ந்தி ந’’ந்தி கா³த²மாஹ. தத்த² யே சஞ்ஞேதி யே ச அஞ்ஞேபி காககுலலாத³யோ குணபப⁴க்கா² பாணினோ ஸந்தி, தேபி நம் கா²த³ந்தீதி அத்தோ². ஸேஸம் உத்தானமேவ.

204. ஏவம் ‘‘சரம் வா’’திஆதி³னா நயேன ஸுஞ்ஞதகம்மட்டா²னவஸேன, ‘‘அட்டி²னஹாருஸம்யுத்தோ’’திஆதி³னா ஸவிஞ்ஞாணகாஸுப⁴வஸேன ‘‘யதா³ ச ஸோ மதோ ஸேதீ’’திஆதி³னா அவிஞ்ஞாணகாஸுப⁴வஸேன காயம் த³ஸ்ஸேத்வா ஏவம் நிச்சஸுக²த்தபா⁴வஸுஞ்ஞே ஏகந்தஅஸுபே⁴ சாபி காயஸ்மிம் ‘‘ஸுப⁴தோ நம் மஞ்ஞதி பா³லோ, அவிஜ்ஜாய புரக்க²தோ’’தி இமினா பா³லஸ்ஸ வுத்திம் பகாஸேத்வா அவிஜ்ஜாமுகே²ன ச வட்டம் த³ஸ்ஸேத்வா இதா³னி தத்த² பண்டி³தஸ்ஸ வுத்திம் பரிஞ்ஞாமுகே²ன ச விவட்டம் த³ஸ்ஸேதும் ‘‘ஸுத்வான பு³த்³த⁴வசன’’ந்தி ஆரபி⁴.

தத்த² ஸுத்வானாதி யோனிஸோ நிஸாமேத்வா. பு³த்³த⁴வசனந்தி காயவிச்ச²ந்த³னகரம் பு³த்³த⁴வசனம். பி⁴க்கூ²தி ஸேக்கோ² வா புது²ஜ்ஜனோ வா. பஞ்ஞாணவாதி பஞ்ஞாணம் வுச்சதி விபஸ்ஸனா அனிச்சாதி³ப்பகாரேஸு பவத்தத்தா, தாய ஸமன்னாக³தோதி அத்தோ². இதா⁴தி ஸாஸனே. ஸோ கோ² நம் பரிஜானாதீதி ஸோ இமம் காயம் தீஹி பரிஞ்ஞாஹி பரிஜானாதி. கத²ம்? யதா² நாம குஸலோ வாணிஜோ இத³ஞ்சித³ஞ்சாதி ப⁴ண்ட³ம் ஓலோகேத்வா ‘‘ஏத்தகேன க³ஹிதே ஏத்தகோ நாம உத³யோ ப⁴விஸ்ஸதீ’’தி துலயித்வா ததா² கத்வா புன ஸஉத³யம் மூலம் க³ண்ஹந்தோ தம் ப⁴ண்ட³ம் ச²ட்³டே³தி, ஏவமேவம் ‘‘அட்டி²ன்ஹாருஆத³யோ இமே கேஸலோமாத³யோ சா’’தி ஞாணசக்கு²னா ஓலோகேந்தோ ஞாதபரிஞ்ஞாய பரிஜானாதி, ‘‘அனிச்சா ஏதே த⁴ம்மா து³க்கா² அனத்தா’’தி துலயந்தோ தீரணபரிஞ்ஞாய பரிஜானாதி, ஏவம் தீரயித்வா அரியமக்³க³ம் பாபுணந்தோ தத்த² ச²ந்த³ராக³ப்பஹானேன பஹானபரிஞ்ஞாய பரிஜானாதி. ஸவிஞ்ஞாணகாவிஞ்ஞாணகஅஸுப⁴வஸேன வா பஸ்ஸந்தோ ஞாதபரிஞ்ஞாய பரிஜானாதி, அனிச்சாதி³வஸேன பஸ்ஸந்தோ தீரணபரிஞ்ஞாய, அரஹத்தமக்³கே³ன ததோ ச²ந்த³ராக³ம் அபகட்³டி⁴த்வா தம் பஜஹந்தோ பஹானபரிஞ்ஞாய பரிஜானாதி.

கஸ்மா ஸோ ஏவம் பரிஜானாதீதி சே? யதா²பூ⁴தஞ்ஹி பஸ்ஸதி, யஸ்மா யதா²பூ⁴தம் பஸ்ஸதீதி அத்தோ². ‘‘பஞ்ஞாணவா’’திஆதி³னா ஏவ ச ஏதஸ்மிம் அத்தே² ஸித்³தே⁴ யஸ்மா பு³த்³த⁴வசனம் ஸுத்வா தஸ்ஸ பஞ்ஞாணவத்தம் ஹோதி, யஸ்மா ச ஸப்³ப³ஜனஸ்ஸ பாகடோபாயம் காயோ அஸுத்வா பு³த்³த⁴வசனம் ந ஸக்கா பரிஜானிதும், தஸ்மா தஸ்ஸ ஞாணஹேதும் இதோ பா³ஹிரானம் ஏவம் த³ட்டு²ம் அஸமத்த²தஞ்ச த³ஸ்ஸேதும் ‘‘ஸுத்வான பு³த்³த⁴வசன’’ந்தி ஆஹ. நந்தா³பி⁴க்கு²னிம் தஞ்ச விபல்லத்த²சித்தம் பி⁴க்கு²ம் ஆரப்³ப⁴ தே³ஸனாபவத்திதோ அக்³க³பரிஸதோ தப்படிபத்திப்பத்தானம் பி⁴க்கு²பா⁴வத³ஸ்ஸனதோ ச ‘‘பி⁴க்கூ²’’தி ஆஹ.

205. இதா³னி ‘‘யதா²பூ⁴தஞ்ஹி பஸ்ஸதீ’’தி ஏத்த² யதா² பஸ்ஸந்தோ யதா²பூ⁴தம் பஸ்ஸதி, தம் த³ஸ்ஸேதும் ஆஹ ‘‘யதா² இத³ம் ததா² ஏதம், யதா² ஏதம் ததா² இத³’’ந்தி. தஸ்ஸத்தோ² – யதா² இத³ம் ஸவிஞ்ஞாணகாஸுப⁴ம் ஆயுஉஸ்மாவிஞ்ஞாணானம் அனபக³மா சரதி, திட்ட²தி, நிஸீத³தி, ஸயதி; ததா² ஏதம் ஏதரஹி ஸுஸானே ஸயிதம் அவிஞ்ஞாணகம்பி புப்³பே³ தேஸம் த⁴ம்மானம் அனபக³மா அஹோஸி. யதா² ச ஏதம் ஏதரஹி மதஸரீரம் தேஸம் த⁴ம்மானம் அபக³மா ந சரதி, ந திட்ட²தி, ந நிஸீத³தி, ந ஸேய்யம் கப்பேதி, ததா² இத³ம் ஸவிஞ்ஞாணகம்பி தேஸம் த⁴ம்மானம் அபக³மா ப⁴விஸ்ஸதி. யதா² ச இத³ம் ஸவிஞ்ஞாணகம் ஏதரஹி ந ஸுஸானே மதம் ஸேதி, ந உத்³து⁴மாதகாதி³பா⁴வமுபக³தம், ததா² ஏதம் ஏதரஹி மதஸரீரம்பி புப்³பே³ அஹோஸி. யதா² பனேதம் ஏதரஹி அவிஞ்ஞாணகாஸுப⁴ம் மதம் ஸுஸானே ஸேதி, உத்³து⁴மாதகாதி³பா⁴வஞ்ச உபக³தம், ததா² இத³ம் ஸவிஞ்ஞாணகம்பி ப⁴விஸ்ஸதீதி.

தத்த² யதா² இத³ம் ததா² ஏதந்தி அத்தனா மதஸ்ஸ ஸரீரஸ்ஸ ஸமானபா⁴வம் கரோந்தோ பா³ஹிரே தோ³ஸம் பஜஹதி. யதா² ஏதம் ததா² இத³ந்தி மதஸரீரேன அத்தனோ ஸமானபா⁴வம் கரோந்தோ அஜ்ஜ²த்திகே ராக³ம் பஜஹதி. யேனாகாரேன உப⁴யம் ஸப⁴ம் கரோதி, தம் பஜானந்தோ உப⁴யத்த² மோஹம் பஜஹதி. ஏவம் யதா²பூ⁴தத³ஸ்ஸனேன புப்³ப³பா⁴கே³யேவ அகுஸலமூலப்பஹானம் ஸாதே⁴த்வா, யஸ்மா ஏவம் படிபன்னோ பி⁴க்கு² அனுபுப்³பே³ன அரஹத்தமக்³க³ம் பத்வா ஸப்³ப³ம் ச²ந்த³ராக³ம் விராஜேதும் ஸமத்தோ² ஹோதி, தஸ்மா ஆஹ ‘‘அஜ்ஜ²த்தஞ்ச ப³ஹித்³தா⁴ ச, காயே ச²ந்த³ம் விராஜயே’’தி. ஏவம் படிபன்னோ பி⁴க்கு² அனுபுப்³பே³னாதி பாட²ஸேஸோ.

206. ஏவம் ஸேக்க²பூ⁴மிம் த³ஸ்ஸேத்வா இதா³னி அஸேக்க²பூ⁴மிம் த³ஸ்ஸேந்தோ ஆஹ ‘‘ச²ந்த³ராக³விரத்தோ ஸோ’’தி. தஸ்ஸத்தோ² – ஸோ பி⁴க்கு² அரஹத்தமக்³க³ஞாணேன பஞ்ஞாணவா மக்³கா³னந்தரம் ப²லம் பாபுணாதி, அத² ஸப்³ப³ஸோ ச²ந்த³ராக³ஸ்ஸ பஹீனத்தா ‘‘ச²ந்த³ராக³விரத்தோ’’தி ச, மரணாபா⁴வேன பணீதட்டே²ன வா அமதம் ஸப்³ப³ஸங்கா²ரவூபஸமனதோ ஸந்திம் தண்ஹாஸங்கா²தவானாபா⁴வதோ நிப்³பா³னம், சவனாபா⁴வதோ அச்சுதந்தி ஸம்வண்ணிதம் பத³மஜ்ஜ²கா³தி ச வுச்சதி. அத² வா ஸோ பி⁴க்கு² அரஹத்தமக்³க³ஞாணேன பஞ்ஞாணவா மக்³கா³னந்தரப²லே டி²தோ ச²ந்த³ராக³விரத்தோ நாம ஹோதி, வுத்தப்பகாரஞ்ச பத³மஜ்ஜ²கா³தி வேதி³தப்³போ³. தேன ‘‘இத³மஸ்ஸ பஹீனம், இத³ஞ்சானேன லத்³த⁴’’ந்தி தீ³பேதி.

207-208. ஏவம் ஸவிஞ்ஞாணகாவிஞ்ஞாணகவஸேன அஸுப⁴கம்மட்டா²னம் ஸஹ நிப்ப²த்தியா கதே²த்வா புன ஸங்கே²பதே³ஸனாய ஏவம் மஹதோ ஆனிஸம்ஸஸ்ஸ அந்தராயகரம் பமாத³விஹாரம் க³ரஹந்தோ ‘‘த்³விபாத³கோய’’ந்தி கா³தா²த்³வயமாஹ. தத்த² கிஞ்சாபி அபாத³காத³யோபி காயா அஸுசீயேவ, இதா⁴தி⁴காரவஸேன பன உக்கட்ட²பரிச்சே²த³வஸேன வா, யஸ்மா வா அஞ்ஞே அஸுசிபூ⁴தாபி காயா லோணம்பி³லாதீ³ஹி அபி⁴ஸங்க²ரித்வா மனுஸ்ஸானம் போ⁴ஜனேபி உபனீயந்தி, ந த்வேவ மனுஸ்ஸகாயோ, தஸ்மா அஸுசிதரபா⁴வமஸ்ஸ த³ஸ்ஸேந்தோபி ‘‘த்³விபாத³கோ’’தி ஆஹ.

அயந்தி மனுஸ்ஸகாயம் த³ஸ்ஸேதி. து³க்³க³ந்தோ⁴ பரிஹீரதீதி து³க்³க³ந்தோ⁴ ஸமானோ புப்ப²க³ந்தா⁴தீ³ஹி அபி⁴ஸங்க²ரித்வா பரிஹீரதி. நானாகுணபபரிபூரோதி கேஸாதி³அனேகப்பகாரகுணபப⁴ரிதோ. விஸ்ஸவந்தோ ததோ ததோதி புப்ப²க³ந்தா⁴தீ³ஹி படிச்சா²தே³தும் க⁴டேந்தானம்பி தம் வாயாமம் நிப்ப²லம் கத்வா நவஹி த்³வாரேஹி கே²ளஸிங்கா⁴ணிகாதீ³னி, லோமகூபேஹி ச ஸேத³ஜல்லிகம் விஸ்ஸவந்தோயேவ. தத்த² தா³னி பஸ்ஸத² – ஏதாதி³ஸேன காயேன யோ புரிஸோ வா இத்தீ² வா கோசி பா³லோ மஞ்ஞே உண்ணமேதவே தண்ஹாதி³ட்டி²மானமஞ்ஞனாஹி ‘‘அஹ’’ந்தி வா ‘‘மம’’ந்தி வா ‘‘நிச்சோ’’தி வாதிஆதி³னா நயேன யோ உண்ணமிதும் மஞ்ஞேய்ய, பரம் வா ஜாதிஆதீ³ஹி அவஜானேய்ய அத்தானம் உச்சே டா²னே ட²பேந்தோ, கிமஞ்ஞத்ர அத³ஸ்ஸனா ட²பேத்வா அரியமக்³கே³ன அரியஸச்சத³ஸ்ஸனாபா⁴வம் கிமஞ்ஞம் தஸ்ஸ ஏவம் உண்ணமாவஜானனகாரணம் ஸியாதி.

தே³ஸனாபரியோஸானே நந்தா³ பி⁴க்கு²னீ ஸம்வேக³மாபாதி³ – ‘‘அஹோ வத ரே, அஹம் பா³லா, யா மம்யேவ ஆரப்³ப⁴ ஏவம் விவித⁴த⁴ம்மதே³ஸனாபவத்தகஸ்ஸ ப⁴க³வதோ உபட்டா²னம் நாக³மாஸி’’ந்தி. ஏவம் ஸம்விக்³கா³ ச தமேவ த⁴ம்மதே³ஸனம் ஸமன்னாஹரித்வா தேனேவ கம்மட்டா²னேன கதிபயதி³வஸப்³ப⁴ந்தரே அரஹத்தம் ஸச்சா²காஸி. து³தியட்டா²னேபி கிர தே³ஸனாபரியோஸானே சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸி, ஸிரிமா தே³வகஞ்ஞா அனாகா³மிப²லம் பத்தா, ஸோ ச பி⁴க்கு² ஸோதாபத்திப²லே பதிட்ட²ஹீதி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய விஜயஸுத்தவண்ணனா நிட்டி²தா.