9. கூடவினிச்ச²யிகபேதவத்து²வண்ணனா

மாலீ கிரிடீ காயூரீதி இத³ம் ஸத்த²ரி வேளுவனே விஹரந்தே கூடவினிச்ச²யிகபேதம் ஆரப்³ப⁴ வுத்தம். ததா³ பி³ம்பி³ஸாரோ ராஜா மாஸஸ்ஸ ச²ஸு தி³வஸேஸு உபோஸத²ம் உபவஸதி, தம் அனுவத்தந்தா ப³ஹூ மனுஸ்ஸா உபோஸத²ம் உபவஸந்தி. ராஜா அத்தனோ ஸந்திகம் ஆக³தாக³தே மனுஸ்ஸே புச்ச²தி – ‘‘கிம் தும்ஹேஹி உபோஸதோ² உபவுத்தோ², உதா³ஹு ந உபவுத்தோ²’’தி? தத்ரேகோ அதி⁴கரணே நியுத்தகபுரிஸோ பிஸுணவாசோ நேகதிகோ லஞ்ஜகா³ஹகோ ‘‘ந உபவுத்தோ²ம்ஹீ’’தி வத்தும் அஸஹந்தோ ‘‘உபவுத்தோ²ம்ஹி, தே³வா’’தி ஆஹ. அத² நம் ராஜஸமீபதோ நிக்க²ந்தம் ஸஹாயோ ஆஹ – ‘‘கிம், ஸம்ம, அஜ்ஜ தயா உபவுத்தோ²’’தி? ‘‘ப⁴யேனாஹம், ஸம்ம, ரஞ்ஞோ ஸம்முகா² ஏவம் அவோசம், நாஹம் உபோஸதி²கோ’’தி.

அத² நம் ஸஹாயோ ஆஹ – ‘‘யதி³ ஏவம் உபட்³டு⁴போஸதோ²பி தாவ தே அஜ்ஜ ஹோது, உபோஸத²ங்கா³னி ஸமாதி³யாஹீ’’தி. ஸோ தஸ்ஸ வசனம் ‘‘ஸாதூ⁴’’தி ஸம்படிச்சி²த்வா கே³ஹம் க³ந்த்வா அபு⁴த்வாவ முக²ம் விக்கா²லேத்வா உபோஸத²ம் அதி⁴ட்டா²ய ரத்தியம் வாஸூபக³தோ ரித்தாஸயஸம்பூ⁴தேன ப³லவவாதஹேதுகேன ஸூலேன உபச்சி²ன்னாயுஸங்கா²ரோ சுதிஅனந்தரம் பப்³ப³தகுச்சி²யம் வேமானிகபேதோ ஹுத்வா நிப்³ப³த்தி. ஸோ ஹி ஏகரத்திம் உபோஸத²ரக்க²ணமத்தேன விமானம் படிலபி⁴ த³ஸகஞ்ஞாஸஹஸ்ஸபரிவாரம் மஹதிஞ்ச தி³ப்³ப³ஸம்பத்திம். கூடவினிச்ச²யிகதாய பன பேஸுணிகதாய ச அத்தனோ பிட்டி²மம்ஸானி ஸயமேவ ஓக்கந்தித்வா கா²த³தி. தம் ஆயஸ்மா நாரதோ³ கி³ஜ்ஜகூடதோ ஓதரந்தோ தி³ஸ்வா –

499. ‘‘மாலீ கிரிடீ காயூரீ, க³த்தா தே சந்த³னுஸ்ஸதா³;

பஸன்னமுக²வண்ணோஸி, ஸூரியவண்ணோவ ஸோப⁴ஸி.

500. ‘‘அமானுஸா பாரிஸஜ்ஜா, யே தேமே பரிசாரகா;

த³ஸ கஞ்ஞாஸஹஸ்ஸானி, யா தேமா பரிசாரிகா;

தா கம்பு³காயூரத⁴ரா, கஞ்சனாவேளபூ⁴ஸிதா.

501. ‘‘மஹானுபா⁴வோஸி துவம், லோமஹம்ஸனரூபவா;

பிட்டி²மம்ஸானி அத்தனோ, ஸாமம் உக்கச்ச கா²த³ஸி.

502. ‘‘கிம் நு காயேன வாசாய, மனஸா து³க்கடம் கதம்;

கிஸ்ஸகம்மவிபாகேன, பிட்டி²மம்ஸானி அத்தனோ;

ஸாமம் உக்கச்ச கா²த³ஸீதி.

503. ‘‘அத்தனோஹம் அனத்தா²ய, ஜீவலோகே அசாரிஸம்;

பேஸுஞ்ஞமுஸாவாதே³ன, நிகதிவஞ்சனாய ச.

504. ‘‘தத்தா²ஹம் பரிஸம் க³ந்த்வா, ஸச்சகாலே உபட்டி²தே;

அத்த²ம் த⁴ம்மம் நிராகத்வா, அத⁴ம்மமனுவத்திஸம்.

505. ‘‘ஏவம் ஸோ கா²த³தத்தானம், யோ ஹோதி பிட்டி²மம்ஸிகோ;

யதா²ஹம் அஜ்ஜ கா²தா³மி, பிட்டி²மம்ஸானி அத்தனோ.

506. ‘‘தயித³ம் தயா நாரத³ ஸாமம் தி³ட்ட²ம், அனுகம்பகா யே குஸலா வதே³ய்யும்;

மா பேஸுணம் மா ச முஸா அபா⁴ணி, மா கோ²ஸி பிட்டி²மம்ஸிகோ துவ’’ந்தி. –

தே²ரோ சதூஹி கா³தா²ஹி புச்சி², ஸோபி தஸ்ஸ சதூஹி கா³தா²ஹி ஏதமத்த²ம் விஸ்ஸஜ்ஜேஸி.

499. தத்த² மாலீதி மாலதா⁴ரீ, தி³ப்³ப³புப்பே²ஹி படிமண்டி³தோதி அதி⁴ப்பாயோ. கிரிடீதி வேடி²தஸீஸோ. காயூரீதி கேயூரவா, பா³ஹாலங்காரபடிமண்டி³தோதி அத்தோ². க³த்தாதி ஸரீராவயவா. சந்த³னுஸ்ஸதா³தி சந்த³னஸாரானுலித்தா. ஸூரியவண்ணோவ ஸோப⁴ஸீதி பா³லஸூரியஸதி³ஸவண்ணோ ஏவ ஹுத்வா விரோசஸி. ‘‘அரணவண்ணீ பபா⁴ஸஸீ’’திபி பாளி, அரணந்தி அரணியேஹி தே³வேஹி ஸதி³ஸவண்ணோ அரியாவகாஸோதி அத்தோ².

500. பாரிஸஜ்ஜாதி பரிஸபரியாபன்னா, உபட்டா²காதி அத்தோ². துவந்தி த்வம். லோமஹம்ஸனரூபவாதி பஸ்ஸந்தானம் லோமஹம்ஸஜனனரூபயுத்தோ. மஹானுபா⁴வதாஸமங்கி³தாய ஹேதம் வுத்தம். உக்கச்சாதி உக்கந்தித்வா, சி²ந்தி³த்வாதி அத்தோ².

503. அசாரிஸந்தி அசரிம் படிபஜ்ஜிம். பேஸுஞ்ஞமுஸாவாதே³னாதி பேஸுஞ்ஞேன சேவ முஸாவாதே³ன ச. நிகதிவஞ்சனாய சாதி நிகதியா வஞ்சனாய ச பதிரூபத³ஸ்ஸனேன பரேஸம் விகாரேன வஞ்சனாய ச.

504. ஸச்சகாலேதி ஸச்சம் வத்தும் யுத்தகாலே. அத்த²ந்தி தி³ட்ட²த⁴ம்மிகாதி³பே⁴த³ம் ஹிதம். த⁴ம்மந்தி காரணம் ஞாயம். நிராகத்வாதி ச²ட்³டே³த்வா பஹாய. ஸோதி யோ பேஸுஞ்ஞாதி³ம் ஆசரதி, ஸோ ஸத்தோ. ஸேஸம் ஸப்³ப³ம் ஹேட்டா² வுத்தனயமேவ.

கூடவினிச்ச²யிகபேதவத்து²வண்ணனா நிட்டி²தா.