6. ஸேரிணீபேதிவத்து²வண்ணனா

நக்³கா³ து³ப்³ப³ண்ணரூபாஸீதி இத³ம் ஸத்த²ரி ஜேதவனே விஹரந்தே ஸேரிணீபேதிம் ஆரப்³ப⁴ வுத்தம். குருரட்டே² கிர ஹத்தி²னிபுரே ஸேரிணீ நாம ஏகா ரூபூபஜீவினீ அஹோஸி. தத்த² ச உபோஸத²கரணத்தா²ய ததோ ததோ பி⁴க்கூ² ஸன்னிபதிம்ஸு. புன மஹாபி⁴க்கு²ஸன்னிபாதோ அஹோஸி. தம் தி³ஸ்வா மனுஸ்ஸா திலதண்டு³லாதி³ம் ஸப்பினவனீதமது⁴ஆதி³ஞ்ச ப³ஹும் தா³னூபகரணம் ஸஜ்ஜேத்வா மஹாதா³னம் பவத்தேஸும். தேன ச ஸமயேன ஸா க³ணிகா அஸ்ஸத்³தா⁴ அப்பஸன்னா மச்சே²ரமலபரியுட்டி²தசித்தா தேஹி மனுஸ்ஸேஹி ‘‘ஏஹி தாவ இத³ம் தா³னம் அனுமோதா³ஹீ’’தி உஸ்ஸாஹிதாபி ‘‘கிம் தேன முண்ட³கானம் ஸமணானம் தி³ன்னேனா’’தி அப்பஸாத³மேவ நேஸம் ஸம்பவேதே³ஸி, குதோ அப்பமத்தகஸ்ஸ பரிச்சாகோ³.

ஸா அபரேன ஸமயேன காலம் கத்வா அஞ்ஞதரஸ்ஸ பச்சந்தனக³ரஸ்ஸ பரிகா²பிட்டே² பேதீ ஹுத்வா நிப்³ப³த்தி. அத² ஹத்தி²னிபுரவாஸீ அஞ்ஞதரோ உபாஸகோ வணிஜ்ஜாய தம் நக³ரம் க³ந்த்வா ரத்தியா பச்சூஸஸமயே பரிகா²பிட்ட²ம் க³தோ தாதி³ஸேன பயோஜனேன. ஸா தத்த² தம் தி³ஸ்வா ஸஞ்ஜானித்வா நக்³கா³ அட்டி²த்தசமத்தாவஸேஸஸரீரா அதிவிய பீ³ப⁴ச்ச²த³ஸ்ஸனா அவிதூ³ரே ட²த்வா அத்தானம் த³ஸ்ஸேஸி. ஸோ தம் தி³ஸ்வா –

464. ‘‘நக்³கா³ து³ப்³ப³ண்ணரூபாஸி, கிஸா த⁴மனிஸந்த²தா;

உப்பா²ஸுலிகே கிஸிகே, கா நு த்வம் இத⁴ திட்ட²ஸீ’’தி. –

கா³தா²ய புச்சி². ஸாபிஸ்ஸ –

465. ‘‘அஹம் ப⁴த³ந்தே பேதீம்ஹி, து³க்³க³தா யமலோகிகா;

பாபகம்மம் கரித்வான, பேதலோகம் இதோ க³தா’’தி. –

கா³தா²ய அத்தானம் பகாஸேஸி. புன தேன –

466. ‘‘கிம் நு காயேன வாசாய, மனஸா து³க்கடம் கதம்;

கிஸ்ஸகம்மவிபாகேன, பேதலோகம் இதோ க³தா’’தி. –

கா³தா²ய கதகம்மம் புச்சி²தா –

467. ‘‘அனாவடேஸு தித்தே²ஸு, விசினிம் அட்³ட⁴மாஸகம்;

ஸந்தேஸு தே³ய்யத⁴ம்மேஸு, தீ³பம் நாகாஸிமத்தனோ.

468. ‘‘நதி³ம் உபேமி தஸிதா, ரித்தகா பரிவத்ததி;

சா²யம் உபேமி உண்ஹேஸு, ஆதபோ பரிவத்ததி.

469. ‘‘அக்³கி³வண்ணோ ச மே வாதோ, ட³ஹந்தோ உபவாயதி;

ஏதஞ்ச ப⁴ந்தே அரஹாமி, அஞ்ஞஞ்ச பாபகம் ததோ.

470. ‘‘க³ந்த்வான ஹத்தி²னிம் புரம், வஜ்ஜேஸி மய்ஹ மாதரம்;

‘தீ⁴தா ச தே மயா தி³ட்டா², து³க்³க³தா யமலோகிகா;

பாபகம்மம் கரித்வான, பேதலோகம் இதோ க³தா’.

471. ‘‘அத்தி² மே ஏத்த² நிக்கி²த்தம், அனக்கா²தஞ்ச தம் மயா;

சத்தாரி ஸதஸஹஸ்ஸானி, பல்லங்கஸ்ஸ ச ஹேட்ட²தோ.

472. ‘‘ததோ மே தா³னம் த³த³து, தஸ்ஸா ச ஹோது ஜீவிகா;

தா³னம் த³த்வா ச மே மாதா, த³க்கி²ணம் அனுதி³ச்ச²து;

ததா³ஹம் ஸுகி²தா ஹேஸ்ஸம், ஸப்³ப³காமஸமித்³தி⁴னீ’’தி. –

இமாஹி ச²ஹி கா³தா²ஹி அத்தனா கதகம்மஞ்சேவ புன தேன அத்தனோ காதப்³ப³ம் அத்த²ஞ்ச ஆசிக்கி².

467. தத்த² அனாவடேஸு தித்தே²ஸூதி கேனசி அனிவாரிதேஸு நதீ³தளாகாதீ³னம் தித்த²பதே³ஸேஸு, யத்த² மனுஸ்ஸா ந்ஹாயந்தி, உத³ககிச்சம் கரோந்தி, தாதி³ஸேஸு டா²னேஸு. விசினிம் அட்³ட⁴மாஸகந்தி ‘‘மனுஸ்ஸேஹி ட²பேத்வா விஸ்ஸரிதம் அபினாமேத்த² கிஞ்சி லபே⁴ய்ய’’ந்தி லோபா⁴பி⁴பூ⁴தா அட்³ட⁴மாஸகமத்தம்பி விசினிம் க³வேஸிம். அத² வா அனாவடேஸு தித்தே²ஸூதி உபஸங்கமனேன கேனசி அனிவாரிதேஸு ஸத்தானம் பயோகா³ஸயஸுத்³தி⁴யா காரணபா⁴வேன தித்த²பூ⁴தேஸு ஸமணப்³ராஹ்மணேஸு விஜ்ஜமானேஸு. விசினிம் அட்³ட⁴மாஸகந்தி மச்சே²ரமலபரியுட்டி²தசித்தா கஸ்ஸசி கிஞ்சி அதே³ந்தீ அட்³ட⁴மாஸகம்பி விஸேஸேன சினிம், ந ஸஞ்சினிம் புஞ்ஞம். தேனாஹ ‘‘ஸந்தேஸு தே³ய்யத⁴ம்மேஸு, தீ³பம் நாகாஸிமத்தனோ’’தி.

468. தஸிதாதி பிபாஸிதா. ரித்தகாதி காகபேய்யா ஸந்த³மானாபி நதீ³ மம பாபகம்மேன உத³கேன ரித்தா துச்சா² வாலிகமத்தா ஹுத்வா பரிவத்ததி. உண்ஹேஸூதி உண்ஹஸமயேஸு. ஆதபோ பரிவத்ததீதி சா²யாட்டா²னம் மயி உபக³தாய ஆதபோ ஸம்பஜ்ஜதி.

469-70. அக்³கி³வண்ணோதி ஸம்ப²ஸ்ஸேன அக்³கி³ஸதி³ஸோ. தேன வுத்தம் ‘‘ட³ஹந்தோ உபவாயதீ’’தி. ஏதஞ்ச, ப⁴ந்தே, அரஹாமீதி, ப⁴ந்தேதி தம் உபாஸகம் க³ருகாரேன வத³தி. ப⁴ந்தே, ஏதஞ்ச யதா²வுத்தம் பிபாஸாதி³து³க்க²ம், அஞ்ஞஞ்ச ததோ பாபகம் தா³ருணம் து³க்க²ம் அனுப⁴விதும் அரஹாமி தஜ்ஜஸ்ஸ பாபஸ்ஸ கதத்தாதி அதி⁴ப்பாயோ. வஜ்ஜேஸீதி வதே³ய்யாஸி.

471-72. ஏத்த² நிக்கி²த்தம், அனக்கா²தந்தி ‘‘ஏத்தகம் ஏத்த² நிக்கி²த்த’’ந்தி அனாசிக்கி²தம். இதா³னி தஸ்ஸ பரிமாணம் ட²பிதட்டா²னஞ்ச த³ஸ்ஸேந்தீ ‘‘சத்தாரி ஸதஸஹஸ்ஸானி, பல்லங்கஸ்ஸ ச ஹேட்ட²தோ’’தி ஆஹ. தத்த² பல்லங்கஸ்ஸாதி புப்³பே³ அத்தனோ ஸயனபல்லங்கஸ்ஸ. ததோதி நிஹிதத⁴னதோ ஏகதே³ஸம் க³ஹேத்வா மமம் உத்³தி³ஸ்ஸ தா³னம் தே³து. தஸ்ஸாதி மய்ஹம் மாதுயா.

ஏவம் தாய பேதியா வுத்தே ஸோ உபாஸகோ தஸ்ஸா வசனம் ஸம்படிச்சி²த்வா தத்த² அத்தனோ கரணீயம் தீரேத்வா ஹத்தி²னிபுரம் க³ந்த்வா தஸ்ஸா மாதுயா தமத்த²ம் ஆரோசேஸி. தமத்த²ம் த³ஸ்ஸேதும் –

473. ஸாதூ⁴தி ஸோ படிஸ்ஸுத்வா, க³ந்த்வான ஹத்தி²னிம் புரம்;

அவோச தஸ்ஸா மாதரம் –

‘‘தீ⁴தா ச தே மயா தி³ட்டா², து³க்³க³தா யமலோகிகா;

பாபகம்மம் கரித்வான, பேதலோகம் இதோ க³தா.

474. ‘‘ஸா மம் தத்த² ஸமாத³பேஸி, வஜ்ஜேஸி மய்ஹ மாதரம்;

‘தீ⁴தா ச தே மயா தி³ட்டா², து³க்³க³தா யமலோகிகா;

பாபகம்மம் கரித்வான, பேதலோகம் இதோ க³தா.

475. ‘‘‘அத்தி² ச மே ஏத்த² நிக்கி²த்தம், அனக்கா²தஞ்ச தம் மயா;

சத்தாரி ஸதஸஹஸ்ஸானி, பல்லங்கஸ்ஸ ச ஹேட்ட²தோ.

476. ‘‘‘ததோ மே தா³னம் த³த³து, தஸ்ஸா ச ஹோது ஜீவிகா;

தா³னம் த³த்வா ச மே மாதா, த³க்கி²ணம் அனுதி³ச்ச²து;

ததா³ஹம் ஸுகி²தா ஹேஸ்ஸம், ஸப்³ப³காமஸமித்³தி⁴னீ’.

477. ‘‘ததோ ஹி ஸா தா³னமதா³, தஸ்ஸா த³க்கி²ணமாதி³ஸீ;

பேதீ ச ஸுகி²தா ஆஸி, தஸ்ஸா சாஸி ஸுஜீவிகா’’தி. –

ஸங்கீ³திகாரா ஆஹம்ஸு. தா ஸுவிஞ்ஞேய்யாவ.

தம் ஸுத்வா தஸ்ஸா மாதா பி⁴க்கு²ஸங்க⁴ஸ்ஸ தா³னம் த³த்வா தஸ்ஸா ஆதி³ஸி. தேன ஸா படிலத்³தூ⁴பகரணஸம்பத்தியம் டி²தா மாது அத்தானம் த³ஸ்ஸேத்வா தம் காரணம் ஆசிக்கி², மாதா பி⁴க்கூ²னம் ஆரோசேஸி, பி⁴க்கூ² தம் பவத்திம் ப⁴க³வதோ ஆரோசேஸும். ப⁴க³வா தமத்த²ம் அட்டு²ப்பத்திம் கத்வா ஸம்பத்தபரிஸாய த⁴ம்மம் தே³ஸேஸி. ஸா தே³ஸனா மஹாஜனஸ்ஸ ஸாத்தி²கா அஹோஸீதி.

ஸேரிணீபேதிவத்து²வண்ணனா நிட்டி²தா.