2. திஸ்ஸமேத்தேய்யமாணவஸுத்தனித்³தே³ஸவண்ணனா

9. து³தியே திஸ்ஸமேத்தேய்யஸுத்தனித்³தே³ஸே – கோத⁴ ஸந்துஸிதோதி நிட்டி²தே பன அஜிதஸுத்தே ‘‘கத²ம் லோகம் அவேக்க²ந்தம், மச்சுராஜா ந பஸ்ஸதீ’’தி (ஸு. நி. 1124; சூளனி. மோக⁴ராஜமாணவபுச்சா² 143) ஏவம் மோக⁴ராஜா புச்சி²தும் ஆரபி⁴. ‘‘ந தாவஸ்ஸ இந்த்³ரியானி பரிபாகம் க³தானீ’’தி ஞத்வா ப⁴க³வா ‘‘திட்ட² த்வம், மோக⁴ராஜ, அஞ்ஞோ புச்ச²தூ’’தி படிக்கி²பி. ததோ திஸ்ஸமேத்தேய்யோ அத்தனோ ஸம்ஸயம் புச்ச²ந்தோ ‘‘கோதா⁴தி கா³த²மாஹ. தத்த² கோத⁴ ஸந்துஸிதோதி கோ இத⁴ ஸத்தோ துட்டோ². இஞ்ஜிதாதி தண்ஹாதி³ட்டி²விப்ப²ந்தி³தானி. உப⁴ந்தமபி⁴ஞ்ஞாயாதி உபோ⁴ அந்தே அபி⁴ஜானித்வா. மந்தா ந லிப்பதீதி பஞ்ஞாய ந லிப்பதி.

பரிபுண்ணஸங்கப்போதி நேக்க²ம்மாதி³விதக்கேஹி பரிபுண்ணஸங்கப்பத்தா பரிபுண்ணமனோரதோ².

தண்ஹிஞ்ஜிதந்தி தண்ஹாய சலிதம். தி³ட்டி²ஞ்ஜிதாதீ³ஸுபி ஏஸேவ நயோ. காமிஞ்ஜிதந்தி கிலேஸகாமேஹி இஞ்ஜிதம் ப²ந்தி³தம். ‘‘கம்மிஞ்ஜித’’ந்திபி பாடோ², தம் ந ஸுந்த³ரம்.

மஹந்தோ புரிஸோதி மஹாபுரிஸோ. உத்தமோ புரிஸோதி அக்³க³புரிஸோ. பதா⁴னோ புரிஸோதி ஸேட்ட²புரிஸோ. அலாமகோ புரிஸோதி விஸிட்ட²புரிஸோ. ஜேட்ட²கோ புரிஸோதி பாமோக்க²புரிஸோ. ந ஹேட்டி²மகோ புரிஸோதி உத்தமபுரிஸோ. புரிஸானம் கோடிப்பத்தோ புரிஸோதி பதா⁴னபுரிஸோ. ஸப்³பே³ஸம் இச்சி²தோ புரிஸோதி பவரபுரிஸோ.

ஸிப்³பி³னிமச்சகா³தி தண்ஹம் அதிஅகா³, அதிக்கமித்வா டி²தோ. உபச்சகா³தி பு⁴ஸம் அதிஅகா³.

10. தஸ்ஸேதமத்த²ம் ப⁴க³வா ப்³யாகரோந்தோ ‘‘காமேஸூ’’தி கா³தா²த்³வயமாஹ. தத்த² காமேஸு ப்³ரஹ்மசரியவாதி காமனிமித்தம் ப்³ரஹ்மசரியவா, காமேஸு ஆதீ³னவம் தி³ஸ்வா மக்³க³ப்³ரஹ்மசரியேன ஸமன்னாக³தோதி வுத்தம் ஹோதி. ஏத்தாவதா ஸந்துஸிததம் த³ஸ்ஸேதி. ‘‘வீததண்ஹோ’’திஆதீ³ஹி அனிஞ்ஜிததம். தத்த² ஸங்கா²ய நிப்³பு³தோதி அனிச்சாதி³வஸேன த⁴ம்மே வீமம்ஸித்வா ராகா³தி³னிப்³பா³னேன நிப்³பு³தோ.

அஸத்³த⁴ம்மஸமாபத்தியாதி நீசத⁴ம்மஸமாயோக³தோ. ஆரதீதி ஆரகா ரமனம். விரதீதி தாய வினா ரமனம். படிவிரதீதி படினிவத்தித்வா தாய வினா ரமனம். வேரமணீதி வேரவினாஸனம். அகிரியாதி கிரியாபச்சி²ந்த³னம். அகரணந்தி கரணபரிச்சி²ந்த³னம். அனஜ்ஜா²பத்தீதி அனாபஜ்ஜனதா. வேலாஅனதிக்கமோதி ஸீமாஅனதிக்கமோ. ஸேஸம் தத்த² தத்த² வுத்தனயத்தா பாகடமேவ.

ஏவம் ப⁴க³வா இத³ம்பி ஸுத்தம் அரஹத்தனிகூடேனேவ தே³ஸேஸி. தே³ஸனாபரியோஸானே அயம்பி ப்³ராஹ்மணோ அரஹத்தே பதிட்டா²ஸி ஸத்³தி⁴ம் அந்தேவாஸிகஸஹஸ்ஸேன, அஞ்ஞேஸஞ்ச அனேகஸஹஸ்ஸானம் த⁴ம்மசக்கு²ம் உத³பாதி³. ஸேஸம் புப்³ப³ஸதி³ஸமேவ.

ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய

திஸ்ஸமேத்தேய்யமாணவஸுத்தனித்³தே³ஸவண்ணனா நிட்டி²தா.