18. பாராயனானுகீ³திகா³தா²னித்³தே³ஸவண்ணனா

102. பாராயனமனுகா³யிஸ்ஸந்தி அஸ்ஸ அயம் ஸம்ப³ந்தோ⁴ – ப⁴க³வதா ஹி பாராயனே தே³ஸிதே ஸோளஸஸஹஸ்ஸஜடிலா அரஹத்தம் பாபுணிம்ஸு, அவஸேஸானஞ்ச சுத்³த³ஸகோடிஸங்கா²னம் தே³வமனுஸ்ஸானம் த⁴ம்மாபி⁴ஸமயோ அஹோஸி. வுத்தஞ்ஹேதம் போராணேஹி –

‘‘ததோ பாஸாணகே ரம்மே, பாராயனஸமாக³மே;

அமதம் பாபயீ பு³த்³தோ⁴, சுத்³த³ஸ பாணகோடியோ’’தி. (ஸு. நி. அட்ட². 2.1138);

நிட்டி²தாய பன த⁴ம்மதே³ஸனாய ததோ ததோ ஆக³தா மனுஸ்ஸா ப⁴க³வதோ ஆனுபா⁴வேன அத்தனோ அத்தனோ கா³மனிக³மாதீ³ஸ்வேவ பாதுரஹேஸும். ப⁴க³வாபி ஸாவத்தி²மேவ அக³மாஸி பரிசாரகஸோளஸாதீ³ஹி அனேகேஹி பி⁴க்கு²ஸஹஸ்ஸேஹி பரிவுதோ. தத்த² பிங்கி³யோ ப⁴க³வந்தம் வந்தி³த்வா ஆஹ – ‘‘க³ச்சா²மஹம், ப⁴ந்தே, பா³வரிஸ்ஸ பு³த்³து⁴ப்பாத³ம் ஆரோசேதும், படிஸ்ஸுதஞ்ஹி தஸ்ஸேவ மயா’’தி. அத² ப⁴க³வதா அனுஞ்ஞாதோ ஞாணக³மனேனேவ கோ³தா⁴வரீதீரம் க³ந்த்வா பாத³க³மனேன அஸ்ஸமாபி⁴முகோ² அக³மாஸி. தமேனம் பா³வரீ ப்³ராஹ்மணோ மக்³க³ம் ஓலோகேந்தோ நிஸின்னோ தூ³ரதோவ தம் கா²ரிஜடாதி³விரஹிதம் பி⁴க்கு²வேஸேனாக³ச்ச²ந்தம் தி³ஸ்வா ‘‘பு³த்³தோ⁴ லோகே உப்பன்னோ’’தி நிட்ட²மக³மாஸி. ஸம்பத்தஞ்சாபி நம் புச்சி² – ‘‘கிம், பிங்கி³ய, பு³த்³தோ⁴ லோகே உப்பன்னோ’’தி? ‘‘ஆம, ப்³ராஹ்மண, உப்பன்னோ, பாஸாணகே சேதியே நிஸின்னோ அம்ஹாகம் த⁴ம்மம் தே³ஸேஸி, தமஹம் துய்ஹம் தே³ஸேஸ்ஸாமீ’’தி. ததோ பா³வரீ மஹதா ஸக்காரேன ஸபரிஸோ தம் பூஜேத்வா ஆஸனம் பஞ்ஞாபேஸி. தத்த² நிஸீதி³த்வா பிங்கி³யோ ‘‘பாராயனமனுகா³யிஸ்ஸ’’ந்திஆதி³மாஹ.

தத்த² அனுகா³யிஸ்ஸந்தி ப⁴க³வதோ கீ³தம் அனுகா³யிஸ்ஸம். யதா²த்³த³க்கீ²தி யதா² ஸாமம் ஸச்சாபி⁴ஸம்போ³தே⁴ன அஸாதா⁴ரணஞாணேன ச அத்³த³க்கி². நிக்காமோதி பஹீனகாமோ. ‘‘நிக்கமோ’’திபி பாடோ², வீரியவாதி அத்தோ². நிக்க²ந்தோ வா அகுஸலபக்கா². நிப்³ப³னோதி கிலேஸவனவிரஹிதோ, தண்ஹாவிரஹிதோ ஏவ வா. கிஸ்ஸ ஹேது முஸா ப⁴ணேதி யேஹி கிலேஸேஹி முஸா ப⁴ணேய்ய, ஏதே தஸ்ஸ பஹீனாதி த³ஸ்ஸேதி. ஏதேன ப்³ராஹ்மணஸ்ஸ ஸவனே உஸ்ஸாஹம் ஜனேதி (ஸு. நி. அட்ட². 2.1138).

அமலோதி கிலேஸமலவிரஹிதோ. விமலோதி விக³தகிலேஸமலோ. நிம்மலோதி கிலேஸமலஸுத்³தோ⁴. மலாபக³தோதி கிலேஸமலா தூ³ரீபூ⁴தோ ஹுத்வா சரதி. மலவிப்பஹீனோதி கிலேஸமலப்பஹீனோ. மலவிமுத்தோதி கிலேஸேஹி விமுத்தோ. ஸப்³ப³மலவீதிவத்தோதி வாஸனாதி³ஸப்³ப³கிலேஸமலம் அதிக்கந்தோ. தே வனாதி ஏதே வுத்தப்பகாரா கிலேஸா.

103. வண்ணூபஸம்ஹிதந்தி கு³ணூபஸம்ஹிதம்.

104. ஸச்சவ்ஹயோதி பு³த்³தோ⁴ ஹி ஸச்சேனேவ அவ்ஹானேன நாமேன யுத்தோ. ப்³ரஹ்மேதி தம் ப்³ராஹ்மணம் ஆலபதி.

தத்த² லோகோதி லுஜ்ஜனட்டே²ன லோகோ. ஏகோ லோகோ ப⁴வலோகோதி தேபூ⁴மகவிபாகோ. ஸோ ஹி ப⁴வதீதி ப⁴வோ, ப⁴வோ ஏவ லோகோ ப⁴வலோகோ. ப⁴வலோகோ ச ஸம்ப⁴வலோகோ சாதி ஏத்த² ஏகேகோ த்³வே த்³வே ஹோதி. ப⁴வலோகோ ஹி ஸம்பத்திப⁴வவிபத்திப⁴வவஸேன து³விதோ⁴. ஸம்ப⁴வலோகோபி ஸம்பத்திஸம்ப⁴வவிபத்திஸம்ப⁴வவஸேன து³விதோ⁴. தத்த² ஸம்பத்திப⁴வலோகோதி ஸுக³திலோகோ. ஸோ ஹி இட்ட²ப²லத்தா ஸுந்த³ரோ லோகோதி ஸம்பத்தி, ப⁴வதீதி ப⁴வோ, ஸம்பத்தி ஏவ ப⁴வோ ஸம்பத்திப⁴வோ, ஸோ ஏவ லோகோ ஸம்பத்திப⁴வலோகோ. ஸம்பத்திஸம்ப⁴வலோகோதி ஸுக³தூபக³ம் கம்மம். தஞ்ஹி ஸம்ப⁴வதி ஏதஸ்மா ப²லந்தி ஸம்ப⁴வோ, ஸம்பத்தியா ஸம்ப⁴வோ ஸம்பத்திஸம்ப⁴வோ, ஸம்பத்திஸம்ப⁴வோ ஏவ லோகோ ஸம்பத்திஸம்ப⁴வலோகோதி.

விபத்திப⁴வலோகோதி அபாயலோகோ. ஸோ ஹி அனிட்ட²ப²லத்தா விரூபோ லோகோதி விபத்தி, ப⁴வதீதி ப⁴வோ, விபத்தி ஏவ ப⁴வோ விபத்திப⁴வோ, விபத்திப⁴வோ ஏவ லோகோ விபத்திப⁴வலோகோ. விபத்திஸம்ப⁴வலோகோதி அபாயூபக³ம் கம்மம். தஞ்ஹி ஸம்ப⁴வதி ஏதஸ்மா ப²லந்தி ஸம்ப⁴வோ, விபத்தியா ஸம்ப⁴வோ விபத்திஸம்ப⁴வோ, விபத்திஸம்ப⁴வோ ஏவ லோகோ விபத்திஸம்ப⁴வலோகோதி. திஸ்ஸோ வேத³னாதி ஸுகா² வேத³னா, து³க்கா² வேத³னா, அது³க்க²மஸுகா² வேத³னா லோகியா ஏவ. ஆஹாராதி பச்சயா. பச்சயா ஹி அத்தனோ ப²லம் ஆஹரந்தீதி ஆஹாரா. கப³ளீகாராஹாரோ ப²ஸ்ஸாஹாரோ மனோஸஞ்சேதனாஹாரோ விஞ்ஞாணாஹாரோதி சத்தாரோ. வத்து²வஸேன கப³ளீகத்தப்³ப³த்தா கப³ளீகாரோ, அஜ்ஜோ²ஹரிதப்³ப³த்தா ஆஹாரோ, ஓத³னகும்மாஸாதி³வத்து²காய ஓஜாயேதம் நாமம். ஸா ஹி ஓஜட்ட²மகரூபானி ஆஹரதீதி ஆஹாரோ. சக்கு²ஸம்ப²ஸ்ஸாதி³கோ ச²ப்³பி³தோ⁴ ப²ஸ்ஸோ திஸ்ஸோ வேத³னா ஆஹரதீதி ஆஹாரோ. மனஸோ ஸஞ்சேதனா ந ஸத்தஸ்ஸாதி மனோஸஞ்சேதனா யதா² சித்தேகக்³க³தா, மனஸா வா ஸம்பயுத்தா ஸஞ்சேதனா மனோஸஞ்சேதனா யதா² ஆஜஞ்ஞரதோ², தேபூ⁴மககுஸலாகுஸலசேதனா. ஸா ஹி தயோ ப⁴வே ஆஹரதீதி ஆஹாரோ. விஞ்ஞாணந்தி ஏகூனவீஸதிபே⁴த³ம் படிஸந்தி⁴விஞ்ஞாணம். தஞ்ஹி படிஸந்தி⁴னாமரூபம் ஆஹரதீதி ஆஹாரோ.

உபாதா³னக்க²ந்தா⁴தி உபாதா³னகோ³சரா க²ந்தா⁴ உபாதா³னக்க²ந்தா⁴, மஜ்ஜே² பத³லோபோ த³ட்ட²ப்³போ³. உபாதா³னஸம்பூ⁴தா வா க²ந்தா⁴ உபாதா³னக்க²ந்தா⁴ யதா² திணக்³கி³, து²ஸக்³கி³. உபாதா³னவிதே⁴ய்யா வா க²ந்தா⁴ உபாதா³னக்க²ந்தா⁴ யதா² ராஜபுரிஸோ. உபாதா³னப்பப⁴வா வா க²ந்தா⁴ உபாதா³னக்க²ந்தா⁴ யதா² புப்ப²ருக்கோ², ப²லருக்கோ². உபாதா³னானி பன காமுபாதா³னம் தி³ட்டு²பாதா³னம் ஸீலப்³ப³துபாதா³னம் அத்தவாது³பாதா³னந்தி சத்தாரி. அத்த²தோ பன பு⁴ஸம் ஆதா³னந்தி உபாதா³னம். ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴தி பஞ்ச. ச² அஜ்ஜ²த்திகானி ஆயதனானீதி சக்கா²யதனம், ஸோதாயதனம், கா⁴னாயதனம், ஜிவ்ஹாயதனம், காயாயதனம், மனாயதனம். ஸத்த விஞ்ஞாணட்டி²தியோ வுத்தனயா ஏவ. ததா² அட்ட² லோகத⁴ம்மா. அபி ச – லாபோ⁴, அலாபோ⁴, யஸோ, அயஸோ, நிந்தா³, பஸம்ஸா, ஸுக²ம், து³க்க²ந்தி இமே அட்ட² லோகப்பவத்தியா ஸதி அனுபரிவத்தனத⁴ம்மகத்தா லோகஸ்ஸ த⁴ம்மாதி லோகத⁴ம்மா. ஏதேஹி முத்தோ ஸத்தோ நாம நத்தி², பு³த்³தா⁴னம்பி ஹோந்தியேவ. யதா²ஹ –

‘‘அட்டி²மே, பி⁴க்க²வே, லோகத⁴ம்மா லோகம் அனுபரிவத்தந்தி, லோகோ ச அட்ட² லோகத⁴ம்மே அனுபரிவத்ததி. கதமே அட்ட²? லாபோ⁴ ச அலாபோ⁴ ச…பே… ஸுக²ஞ்ச து³க்க²ஞ்ச. இமே கோ², பி⁴க்க²வே, அட்ட² லோகத⁴ம்மா லோகம் அனுபரிவத்தந்தி, லோகோ ச இமே அட்ட² லோகத⁴ம்மே அனுபரிவத்ததீ’’தி (அ. நி. 8.6).

தத்த² அனுபரிவத்தந்தீதி அனுப³ந்த⁴ந்தி நப்பஜஹந்தி, லோகதோ ந நிவத்தந்தீதி அத்தோ². லாபோ⁴தி பப்³ப³ஜிதஸ்ஸ சீவராதி³, க³ஹட்ட²ஸ்ஸ த⁴னத⁴ஞ்ஞாதி³லாபோ⁴. ஸோயேவ அலப்³ப⁴மானோ லாபோ⁴ அலாபோ⁴ ந லாபோ⁴ அலாபோ⁴தி வுச்சதி, நோ ச அத்தாபா⁴வப்பத்திதோ பரிஞ்ஞேய்யோ ஸியா. யஸோதி பரிவாரோ. ஸோயேவ அலப்³ப⁴மானோ யஸோ அயஸோ. நிந்தா³தி அவண்ணப⁴ணனம். பஸம்ஸாதி வண்ணப⁴ணனம். ஸுக²ந்தி காமாவசரகாயிகசேதஸிகம். து³க்க²ந்தி புது²ஜ்ஜனஸோதாபன்னஸகதா³கா³மீனம் காயிகசேதஸிகம், அனாகா³மிஅரஹந்தானம் காயிகமேவ. ஸத்தாவாஸாதி ஸத்தானம் ஆவாஸா, வஸனட்டா²னானீதி அத்தோ². தானி பன ததா² பகாஸிதா க²ந்தா⁴ ஏவ. ஸத்தஸு விஞ்ஞாணட்டி²தீஸு அஸஞ்ஞஸத்தேன ச நேவஸஞ்ஞானாஸஞ்ஞாயதனேன ச ஸத்³தி⁴ம் நவ ஸத்தாவாஸா. த³ஸாயதனானீதி சக்கா²யதனம், ரூபாயதனம், ஸோதாயதனம், ஸத்³தா³யதனம், கா⁴னாயதனம், க³ந்தா⁴யதனம், ஜிவ்ஹாயதனம், ரஸாயதனம், காயாயதனம், போ²ட்ட²ப்³பா³யதனந்தி ஏவம் த³ஸ. த்³வாத³ஸாயதனானீதி மனாயதனத⁴ம்மாயதனேஹி ஸத்³தி⁴ம் ஏவம் த்³வாத³ஸ. அட்டா²ரஸ தா⁴துயோதி சக்கு²தா⁴து, ரூபதா⁴து, சக்கு²விஞ்ஞாணதா⁴து…பே… மனோதா⁴து, த⁴ம்மதா⁴து, மனோவிஞ்ஞாணதா⁴தூதி ஏகேகஸ்மிம் தீணி தீணி கத்வா அட்டா²ரஸ தா⁴துயோ.

ஸதி³ஸனாமோதி தேஸம் ஸதி³ஸனாமோ ஏககு³ணவண்ணனாமோ. ஸதி³ஸவ்ஹயோதி ஏககு³ணவண்ணனாமேன அவ்ஹாயனோ. ஸச்சஸதி³ஸவ்ஹயோதி அவிதத²ஏககு³ணவண்ணனாமேன அவிபரீதேன அவ்ஹாயனோ.

ஆஸிதோதி உபஸங்கமிதோ. உபாஸிதோதி உபக³ந்த்வா ஸேவிதோ. பயிருபாஸிதோதி ப⁴த்திவஸேன அதீவ ஸேவிதோ.

105. குப்³ப³னகந்தி பரித்தவனம். ப³ஹுப்ப²லம் கானனமாவஸேய்யாதி அனேகப²லாதி³விகதிப⁴ரிதகானனம் ஆக³ம்ம வஸேய்ய. அப்பத³ஸ்ஸேதி பா³வரிப்பபு⁴திகே பரித்தபஞ்ஞே. மஹோத³தி⁴ந்தி அனோதத்தாதி³ம் மஹந்தம் உத³கராஸிம்.

அப்பத³ஸ்ஸாதி மந்த³த³ஸ்ஸினோ. பரித்தத³ஸ்ஸாதி அதிமந்த³த³ஸ்ஸினோ. தோ²கத³ஸ்ஸாதி பரித்ததோபி அதிபரித்தத³ஸ்ஸினோ. ஓமகத³ஸ்ஸாதி ஹேட்டி²மத³ஸ்ஸினோ. லாமகத³ஸ்ஸாதி அப்பதா⁴னத³ஸ்ஸினோ. ச²துக்கத³ஸ்ஸாதி ந உத்தமத³ஸ்ஸினோ. அப்பமாணத³ஸ்ஸந்தி பமாணம் அதிக்கமித்வா அப்பமாணம் நிப்³பா³னத³ஸ்ஸம். அக்³க³த³ஸ்ஸந்தி ‘‘அக்³க³தோ வே பஸன்னான’’ந்திஆதி³னா (அ. நி. 4.34; இதிவு. 90) நயேன அக்³க³த⁴ம்மத³ஸ்ஸம். ஸேட்ட²த³ஸ்ஸந்தி ஸம்பு³த்³தோ⁴ த்³விபத³ஸேட்டோ²தி ஸேட்ட²த³ஸ்ஸம். விஸேட்ட²த³ஸ்ஸந்திஆதீ³னி சத்தாரி உபஸக்³கே³ன வட்³டி⁴தானி. அஸமந்தி ந ஸமம் அஸமம் ஸப்³ப³ஞ்ஞும். அஸமஸமந்தி அஸமேஹி அதீதபு³த்³தே⁴ஹி ஸமம் அஸமஸமம். அப்படிஸமந்தி அத்தனோ ஸதி³ஸவிரஹிதம். அப்படிபா⁴க³ந்தி அத்தனோ படிபி³ம்ப³விரஹிதம். அப்படிபுக்³க³லந்தி படிமல்லபுக்³க³லவிரஹிதம். தே³வாதிதே³வந்தி விஸுத்³தி⁴தே³வானம்பி அதிதே³வம். அபி⁴மங்க³லஸம்மதட்டே²ன உஸப⁴ம். அச²ம்பி⁴தட்டே²ன புரிஸஸீஹம். நித்³தோ³ஸட்டே²ன புரிஸனாக³ம். உத்தமட்டே²ன புரிஸாஜஞ்ஞம். அட்ட²பரிஸபத²விம் உப்பீளேத்வா ஸதே³வகே லோகே கேனசி பச்சத்தி²கேன பச்சாமித்தேன அகம்பியே அசலட்டா²னே திட்ட²னட்டே²ன புரிஸனிஸப⁴ம். த⁴ம்மதே³ஸனாது⁴ரவஹனட்டே²ன புரிஸதோ⁴ரய்ஹம்.

மானஸகம் வா ஸரந்தி மனஸா சிந்தேத்வா கதம் பல்லம் வா நாமமேவ வா. அனோதத்தம் வா த³ஹந்தி சந்தி³மஸூரியா த³க்கி²ணேன வா உத்தரேன வா க³ச்ச²ந்தா பப்³ப³தந்தரேன தம் ஓபா⁴ஸேந்தி, உஜும் க³ச்ச²ந்தா ந ஓபா⁴ஸேந்தி, தேனேவஸ்ஸ ‘‘அனோதத்த’’ந்தி ஸங்கா² உத³பாதி³. ஏவரூபம் அனோதத்தம் வா த³ஹம். அக்கோ²ப⁴ம் அமிதோத³கந்தி சாலேதும் அஸக்குணேய்யம் அபரிமிதம் உத³கஜலராஸிம். ஏவமேவாதி ஓபம்மஸம்ஸந்த³னம், பு³த்³த⁴ம் ப⁴க³வந்தம் அக்கோ²ப⁴ம் ஆஸப⁴ம் டா²னட்டா²னேன சாலேதும் அஸக்குணேய்யம். அமிததேஜந்தி அபரிமிதஞாணதேஜம். பபி⁴ன்னஞாணந்தி த³ஸப³லஞாணாதி³வஸேன பபே⁴த³க³தஞாணம். விவடசக்கு²ந்தி ஸமந்தசக்கு²ம்.

பஞ்ஞாபபே⁴த³குஸலந்தி ‘‘யா பஞ்ஞா பஜானனா விசயோ பவிசயோ’’திஆதி³னா (த⁴. ஸ. 16; விப⁴. 525) நயேன பஞ்ஞாய பபே⁴த³ஜானனே சே²கம். அதி⁴க³தபடிஸம்பி⁴த³ந்தி படிலத்³த⁴சதுபடிஸம்பி⁴த³ம். சதுவேஸாரஜ்ஜப்பத்தந்தி ‘‘ஸம்மாஸம்பு³த்³த⁴ஸ்ஸ தே படிஜானதோ இமே த⁴ம்மா அனபி⁴ஸம்பு³த்³தா⁴’’திஆதி³னா (ம. நி. 1.150; அ. நி. 4.8) நயேன வுத்தேஸு சதூஸு டா²னேஸு விஸாரத³பா⁴வப்பத்தம். ஸத்³தா⁴தி⁴முத்தந்தி பரிஸுத்³தே⁴ ப²லஸமாபத்திசித்தே அதி⁴முத்தம், தத்த² பவிட்ட²ம். ஸேதபச்சத்தந்தி வாஸனாய விப்பஹீனத்தா பரிஸுத்³த⁴ம் ஆவேணிகஅத்தபா⁴வம். அத்³வயபா⁴ணிந்தி பரிச்சி²ன்னவசனத்தா த்³விவசனவிரஹிதம். தாதி³ந்தி தாதி³ஸம், இட்டா²னிட்டே²ஸு அகம்பனம் வா. ததா² படிஞ்ஞா அஸ்ஸாதி ததா²படிஞ்ஞோ, தம். அபரித்தந்தி ந கு²த்³த³கம். மஹந்தந்தி தேதா⁴தும் அதிக்கமித்வா மஹந்தப்பத்தம்.

க³ம்பீ⁴ரந்தி அஞ்ஞேஸம் து³ப்பவேஸம். அப்பமேய்யந்தி அதுலட்டே²ன அப்பமேய்யம். து³ப்பரியோகா³ஹந்தி பரியோகா³ஹிதும் து³க்க²ப்பவேஸம். பஹூதரதனந்தி ஸத்³தா⁴தி³ரதனேஹி பஹூதரதனம். ஸாக³ரஸமந்தி ரதனாகரதோ ஸமுத்³த³ஸதி³ஸம். ச²ளங்கு³பேக்கா²ய ஸமன்னாக³தந்தி ‘‘சக்கு²னா ரூபம் தி³ஸ்வா நேவ ஸுமனோ ஹோதி ந து³ம்மனோ’’தி (அ. நி. 6.1) வுத்தனயேன ச²ளங்கு³பேக்கா²ய பரிபுண்ணம். அதுலந்தி துலவிரஹிதம், துலயிதும் அஸக்குணேய்யம். விபுலந்தி அதிமஹந்தம். அப்பமேய்யந்தி பமேதும் அஸக்குணேய்யம். தம் தாதி³ஸந்தி தம் ப⁴க³வந்தம் தாதி³கு³ணஸம்பன்னம். பவத³தம் மக்³க³வாதி³னந்தி பவத³ந்தானம் கதே²ந்தானம் உத்தமம் கத²யந்தம் வத³ந்தம் அதி⁴க³ச்சி²ந்தி ஸம்ப³ந்தோ⁴. மேருமிவ நகா³னந்தி பப்³ப³தானம் அந்தரே ஸினேரும் விய. க³ருளமிவ தி³ஜானந்தி பக்கி²ஜாதானம் அந்தரே ஸுபண்ணம் விய. ஸீஹமிவ மிகா³னந்தி சதுப்பதா³னமந்தரே ஸீஹம் விய. உத³தி⁴மிவ அண்ணவானந்தி வித்தி²ண்ணஅண்ணவானம் அந்தரே ஸமுத்³த³ம் விய அதி⁴க³ச்சி²ம். ஜினபவரந்தி பு³த்³து⁴த்தமம்.

106. யேமே புப்³பே³தி யே இமே புப்³பே³.

107. தமோனுதா³ஸீனோதி தமோனுதோ³ ஆஸீனோ. பூ⁴ரிபஞ்ஞாணோதி ஞாணத்³த⁴ஜோ. பூ⁴ரிமேத⁴ஸோதி விபுலபஞ்ஞோ.

நித்³தே³ஸே பப⁴ங்கரோதி தேஜம்கரோ. ஆலோககரோதி அனந்த⁴காரகரோ. ஓபா⁴ஸகரோதி ஓபா⁴ஸம் ஜோதிம் கரோதீதி ஓபா⁴ஸகரோ. தீ³பஸதி³ஸம் ஆலோகம் கரோதீதி தீ³பங்கரோ. பதீ³பஸதி³ஸம் ஆலோகம் கரோதீதி பதீ³பகரோ. உஜ்ஜோதகரோதி பதாபகரோ. பஜ்ஜோதகரோதி தி³ஸாவிதி³ஸா பதாபகரோ.

பூ⁴ரிபஞ்ஞாணோதி புது²லஞாணோ. ஞாணபஞ்ஞாணோதி ஞாணேன பாகடோ. பஞ்ஞாத⁴ஜோதி உஸ்ஸிதட்டே²ன பஞ்ஞாவ த⁴ஜோ அஸ்ஸாதி பஞ்ஞாத⁴ஜோ, த⁴ஜோ ரத²ஸ்ஸ பஞ்ஞாணந்திஆதீ³ஸு (ஜா. 2.22.1841; சூளனி. பாராயனானுகீ³திகா³தா²னித்³தே³ஸ 107) விய. விபூ⁴தவிஹாரீதி பாகடவிஹாரோ.

108. ஸந்தி³ட்டி²கமகாலிகந்தி ஸாமம் பஸ்ஸிதப்³ப³ம் ப²லம், ந ச காலந்தரே பத்தப்³ப³ப²லம். அனீதிகந்தி கிலேஸாதி³ஈதிவிரஹிதம்.

ஸந்தி³ட்டி²கந்தி லோகுத்தரத⁴ம்மோ யேன அதி⁴க³தோ ஹோதி, தேன பரஸத்³தா⁴ய க³ந்தப்³ப³தம் ஹித்வா பச்சவேக்க²ணஞாணேன ஸயம் த³ட்ட²ப்³போ³தி ஸந்தி³ட்டி²கோ, தம் ஸந்தி³ட்டி²கம். அத்தனோ ப²லம்தா³னம் ஸந்தா⁴ய நாஸ்ஸ காலோதி அகாலோ, அகாலோயேவ அகாலிகோ. யோ ஏத்த² அரியமக்³க³த⁴ம்மோ, ஸோ அத்தனோ ஸமனந்தரமேவ ப²லம் தே³தீதி அத்தோ², தம் அகாலிகம். ஏஹி பஸ்ஸ இமம் த⁴ம்மந்தி ஏவம் பவத்தம் ஏஹிபஸ்ஸவிதி⁴ம் அரஹதீதி ஏஹிபஸ்ஸிகோ, தம் ஏஹிபஸ்ஸிகம். ஆதி³த்தம் சேலம் வா ஸீஸம் வா அஜ்ஜு²பேக்கி²த்வாபி அத்தனோ சித்தே உபனயம் அரஹதீதி ஓபனேய்யிகோ, தம் ஓபனேய்யிகம். ஸப்³பே³ஹிபி உக்³க⁴டிதஞ்ஞூஆதீ³ஹி ‘‘பா⁴விதோ மே மக்³கோ³, அதி⁴க³தம் ப²லம், ஸச்சி²கதோ நிரோதோ⁴’’தி அத்தனி அத்தனி வேதி³தப்³ப³ந்தி பச்சத்தம் வேதி³தப்³ப³ம் விஞ்ஞூஹி.

109. அத² நம் பா³வரீ ஆஹ ‘‘கிம் நு தம்ஹா’’தி த்³வே கா³தா².

முஹுத்தம்பீதி தோ²கம்பி. க²ணம்பீதி ந ப³ஹுகம்பி. லயம்பீதி மனம்பி. வயம்பீதி கோட்டா²ஸம்பி. அத்³த⁴ம்பீதி தி³வஸம்பி.

111-113. ததோ பிங்கி³யோ ப⁴க³வதோ ஸந்திகா அவிப்பவாஸமேவ தீ³பேந்தோ ‘‘நாஹம் தம்ஹா’’திஆதி³மாஹ. நாஹம் யோ மே…பே… பஸ்ஸாமி நம் மனஸா சக்கு²னாவாதி தம் பு³த்³த⁴ம் மம்ஸசக்கு²னா விய மனஸா பஸ்ஸாமி. நமஸ்ஸமானோ விவஸேமி ரத்திந்தி நமஸ்ஸமானோவ ரத்திம் அதினாமேமி.

114. தேன தேனேவ நதோதி யேன யேன தி³ஸாபா⁴கே³ன பு³த்³தோ⁴, தேன தேனேவாஹம்பி நதோ, தன்னின்னோ தப்போணோதி த³ஸ்ஸேதி.

115. து³ப்³ப³லதா²மகஸ்ஸாதி அப்பதா²மகஸ்ஸ. அத² வா து³ப்³ப³லஸ்ஸ து³த்தா²மகஸ்ஸ ச, ப³லவீரியஹீனஸ்ஸாபீதி வுத்தம் ஹோதி. தேனேவ காயோ ந பலேதீதி தேனேவ து³ப்³ப³லத்தா²மகத்தேன காயோ ந க³ச்ச²தி, யேன பு³த்³தோ⁴, ந தேன க³ச்ச²தி. ‘‘ந பரேதீ’’திபி பாடோ², ஸோ ஏவத்தோ². தத்தா²தி பு³த்³த⁴ஸ்ஸ ஸந்திகே. ஸங்கப்பயந்தாயாதி ஸங்கப்பக³மனேன. தேன யுத்தோதி யேன பு³த்³தோ⁴, தேன யுத்தோ பயுத்தோ அனுயுத்தோதி த³ஸ்ஸேதி.

யேன பு³த்³தோ⁴தி யேன தி³ஸாபா⁴கே³ன பு³த்³தோ⁴ உபஸங்கமிதப்³போ³, தேன தி³ஸாபா⁴கே³ன ந பலேதி. அத² வா பு⁴ம்மத்தே² கரணவசனம். யத்த² பு³த்³தோ⁴ தத்த² ந பலேதி ந க³ச்ச²தி. ந வஜதீதி புரதோ ந யாதி. ந க³ச்ச²தீதி நிவத்ததி. நாதிக்கமதீதி ந உபஸங்கமதி.

116. பங்கே ஸயானோதி காமகத்³த³மே ஸயமானோ. தீ³பா தீ³பம் உபல்லவிந்தி ஸத்தா²ராதி³தோ ஸத்தா²ராதி³ம் அதி⁴க³ச்சி²ம். அத²த்³த³ஸாஸிம் ஸம்பு³த்³த⁴ந்தி ஸோஹம் ஏவம் து³தி³ட்டி²ம் க³ஹேத்வா அன்வாஹிண்ட³ந்தோ அத² பாஸாணகசேதியே பு³த்³த⁴மத்³த³க்கி²ம்.

தத்த² ஸேமானோதி நிஸஜ்ஜமானோ. ஸயமானோதி ஸேய்யம் கப்பயமானோ. ஆவஸமானோதி வஸமானோ. பரிவஸமானோதி நிச்சம் வஸமானோ.

பல்லவிந்தி உக்³க³மிம். உபல்லவிந்தி உத்தரிம், ஸம்பல்லவிந்தி உபஸக்³கே³ன பத³ம் வட்³டி⁴தம். அத்³த³ஸந்தி நித்³தே³ஸஸ்ஸ உத்³தே³ஸபத³ம். அத்³த³ஸந்தி பஸ்ஸிம். அத்³த³க்கி²ந்தி ஓலோகேஸிம். அபஸ்ஸிந்தி ஏஸிம். படிவிஜ்ஜி²ந்தி வினிவிஜ்ஜி²ம்.

117. இமிஸ்ஸா கா³தா²ய அவஸானே பிங்கி³யஸ்ஸ ச பா³வரிஸ்ஸ ச இந்த்³ரியபரிபாகம் விதி³த்வா ப⁴க³வா ஸாவத்தி²யம் டி²தோயேவ ஸுவண்ணோபா⁴ஸம் முஞ்சி. பிங்கி³யோ பா³வரிஸ்ஸ பு³த்³த⁴கு³ணே வண்ணயந்தோ நிஸின்னோ ஏவ தம் ஓபா⁴ஸம் தி³ஸ்வா ‘‘கிம் இத³’’ந்தி ஓலோகேந்தோ ப⁴க³வந்தம் அத்தனோ புரதோ டி²தம் விய தி³ஸ்வா பா³வரிப்³ராஹ்மணஸ்ஸ ‘‘பு³த்³தோ⁴ ஆக³தோ’’தி ஆரோசேஸி. ப்³ராஹ்மணோ உட்டா²யாஸனா அஞ்ஜலிம் பக்³க³ஹேத்வா அட்டா²ஸி. ப⁴க³வாபி ஓபா⁴ஸம் ப²ரித்வா ப்³ராஹ்மணஸ்ஸ அத்தானம் த³ஸ்ஸேந்தோ உபி⁴ன்னம்பி ஸப்பாயம் விதி³த்வா பிங்கி³யமேவ ஆலபமானோ ‘‘யதா² அஹூ, வக்கலீ’’தி இமம் கா³த²மபா⁴ஸி.

தஸ்ஸத்தோ² – யதா² வக்கலித்தே²ரோ ஸத்³தா⁴தி⁴முத்தோ அஹோஸி, ஸத்³தா⁴து⁴ரேனேவ அரஹத்தம் பாபுணி, யதா² ச ஸோளஸன்னம் ஏகோ ப⁴த்³ராவுதோ⁴ நாம, யதா² ச ஆளவிகோ³தமோ ச. ஏவமேவ த்வம்பி பமுஞ்சஸ்ஸு ஸத்³த⁴ம், ததோ ஸத்³தா⁴ய அதி⁴முச்சந்தோ ‘‘ஸப்³பே³ ஸங்கா²ரா அனிச்சா’’திஆதி³னா (த⁴. ப. 277; தே²ரகா³. 676; படி. ம. 1.31; கதா². 753) நயேன விபஸ்ஸனம் ஆரபி⁴த்வா மச்சுதே⁴ய்யஸ்ஸ பாரம் நிப்³பா³னம் க³மிஸ்ஸஸீதி அரஹத்தனிகூடேன தே³ஸனம் நிட்டா²பேஸி, தே³ஸனாபரியோஸானே பிங்கி³யோ அரஹத்தே, பா³வரீ அனாகா³மிப²லே பதிட்ட²ஹி, பா³வரிப்³ராஹ்மணஸ்ஸ ஸிஸ்ஸா பன பஞ்சஸதா ஸோதாபன்னா அஹேஸும்.

தத்த² முஞ்சஸ்ஸூதி மோசஸ்ஸு. பமுஞ்சஸ்ஸூதி மோசேஹி. அதி⁴முஞ்சஸ்ஸூதி தத்த² அதி⁴மோக்க²ம் கரஸ்ஸு. ஓகப்பேஹீதி ப³ஹுமானம் உப்பாதே³ஹீதி. ஸப்³பே³ ஸங்கா²ரா அனிச்சாதி ஹுத்வா அபா⁴வட்டே²ன. ஸப்³பே³ ஸங்கா²ரா து³க்கா²தி து³க்க²மட்டே²ன. ஸப்³பே³ த⁴ம்மா அனத்தாதி அவஸவத்தனட்டே²ன.

118. இதா³னி பிங்கி³யோ அத்தனோ பஸாத³ம் நிவேதே³ந்தோ ‘‘ஏஸ பி⁴ய்யோதிஆதி³மாஹ. தத்த² படிபா⁴னவாதி படிபா⁴னப்படிஸம்பி⁴தா³ய உபேதோ.

பி⁴ய்யோ பி⁴ய்யோதி உபரூபரி.

119. அதி⁴தே³வே அபி⁴ஞ்ஞாயாதி அதி⁴தே³வகரே த⁴ம்மே ஞத்வா. பரோபரந்தி ஹீனபணீதம், அத்தனோ ச பரஸ்ஸ ச அதி⁴தே³வத்தகரம் ஸப்³ப³த⁴ம்மஜாதம் அவேதீ³தி வுத்தம் ஹோதி. கங்கீ²னம் படிஜானதந்தி கங்கீ²னம்யேவ ஸதம் ‘‘நிக்கங்க²ம்ஹா’’தி படிஜானந்தானம்.

நித்³தே³ஸே பாராயனிகபஞ்ஹானந்தி பாராயனிகப்³ராஹ்மணானம் புச்சா²னம். அவஸானம் கரோதீதி அந்தகரோ. கோடிம் கரோதீதி பரியந்தகரோ. ஸீமம் மரியாத³ம் கரோதீதி பரிச்சே²த³கரோ. நிக³மம் கரோதீதி பரிவடுமகரோ. ஸபி⁴யபஞ்ஹானந்தி ந கேவலம் பாராயனிகப்³ராஹ்மணானம் பஞ்ஹானம் ஏவ, அத² கோ² ஸபி⁴யபரிப்³பா³ஜகாதீ³னம்பி பஞ்ஹானம் அந்தம் கரோதீதி த³ஸ்ஸேதும் ‘‘ஸபி⁴யபஞ்ஹான’’ந்திஆதி³மாஹ.

120. அஸம்ஹீரந்தி ராகா³தீ³ஹி அஸம்ஹாரியம். அஸங்குப்பந்தி அஸங்குப்பம் அவிபரிணாமத⁴ம்மம். த்³வீஹிபி பதே³ஹி நிப்³பா³னம் ப⁴ணதி. அத்³தா⁴ க³மிஸ்ஸாமீதி ஏகம்ஸேனேவ தம் அனுபாதி³ஸேஸனிப்³பா³னதா⁴தும் க³மிஸ்ஸாமி. ந மேத்த² கங்கா²தி நத்தி² மே ஏத்த² நிப்³பா³னே கங்கா². ஏவம் மம் தா⁴ரேஹி அதி⁴முத்தசித்தந்தி பிங்கி³யோ ‘‘ஏவமேவ த்வம்பி பமுஞ்சஸ்ஸு ஸத்³த⁴’’ந்தி இமினா ப⁴க³வதோ ஓவாதே³ன அத்தனி ஸத்³த⁴ம் உப்பாதே³த்வா ஸத்³தா⁴து⁴ரேனேவ ச விமுஞ்சித்வா தம் ஸத்³தா⁴தி⁴முத்திம் பகாஸேந்தோ ப⁴க³வந்தம் ஆஹ – ‘‘ஏவம் மம் தா⁴ரேஹி அதி⁴முத்தசித்த’’ந்தி. அயஞ்ஹேத்த² அதி⁴ப்பாயோ ‘‘யதா² மம் த்வம் அவச, ஏவமேவ மம் அதி⁴முத்தசித்தம் தா⁴ரேஹீ’’தி.

ந ஸம்ஹரியதீதி க³ஹேத்வா ஸம்ஹரிதும் ந ஸக்கா. நியோக³வசனந்தி யுத்தவசனம். அவத்தா²பனவசனந்தி ஸன்னிட்டா²னவசனம். இமஸ்மிம் பாராயனவக்³கே³ யம் அந்தரந்தரா ந வுத்தம், தம் ஹேட்டா² வுத்தனயேன க³ஹேதப்³ப³ம். ஸேஸம் ஸப்³ப³த்த² பாகடமேவ.

ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய

பாராயனானுகீ³திகா³தா²னித்³தே³ஸவண்ணனா நிட்டி²தா.

பாராயனவக்³க³வண்ணனா நிட்டி²தா.