16. பிங்கி³யமாணவஸுத்தனித்³தே³ஸவண்ணனா

89. ஸோளஸமே பிங்கி³யஸுத்தனித்³தே³ஸே – ஜிண்ணோஹமஸ்மி அப³லோ வீதவண்ணோதி ஸோ கிர ப்³ராஹ்மணோ ஜராபி⁴பூ⁴தோ வீஸவஸ்ஸஸதிகோ ஜாதியா, து³ப்³ப³லோ ச ‘‘இத⁴ பாத³ம் கரிஸ்ஸாமீ’’தி அஞ்ஞத்ரேவ கரோதி, வினட்ட²புரிமச²விவண்ணோ ச. தேனாஹ – ‘‘ஜிண்ணோஹமஸ்மி அப³லோ வீதவண்ணோ’’தி. மாஹம் நஸ்ஸம் மோமுஹோ அந்தராவாதி மாஹம் துய்ஹம் த⁴ம்மம் அஸச்சி²கத்வா அந்தரா ஏவ அவித்³வா ஹுத்வா அனஸ்ஸிம். ஜாதிஜராய இத⁴ விப்பஹானந்தி இதே⁴வ தவ பாத³மூலே பாஸாணகே சேதியே வா ஜாதிஜராய விப்பஹானம் நிப்³பா³னம் த⁴ம்மரஸம் அஹம் விஜஞ்ஞம், தம் மே ஆசிக்க².

அப³லோதி ப³லவிரஹிதோ. து³ப்³ப³லோதி து³ப்³ப³லப³லோ. அப்பப³லோதி பரித்தப³லோ. அப்பதா²மோதி பரித்தவீரியோ. வீதவண்ணோதி பரிவத்திதச²விவண்ணோ. விக³தவண்ணோதி அபக³தச²விவண்ணோ. விக³ச்சி²தவண்ணோதி தூ³ரீபூ⁴தச²விவண்ணோ. யா ஸா புரிமா ஸுபா⁴ வண்ணனிபா⁴தி யா ஸா ஸுபா⁴ ஸுந்த³ரா புரிமகாலே ஸதி, ஸா வண்ணனிபா⁴ ஏதரஹி அந்தரஹிதா விக³தா. ஆதீ³னவோ பாதுபூ⁴தோதி உபத்³த³வோ பாதுரஹோஸி. ‘‘யா ஸா புரிமா ஸுபா⁴ வண்ணனிபா⁴’’தி பாட²ம் ட²பேத்வா ‘‘யா ஸுபா⁴ அஸ்ஸா’’தி ஏகே வண்ணயந்தி.

அஸுத்³தா⁴தி படலாதீ³ஹி அஸுத்³தா⁴. அவிஸுத்³தா⁴தி திமிராதீ³ஹி அவிஸுத்³தா⁴. அபரிஸுத்³தா⁴தி ஸமந்ததோ போ²டபடலாதீ³ஹி பரியோனத்³த⁴த்தா அபரிஸுத்³தா⁴. அவோதா³தாதி நப்பஸன்னா பஸன்னஸதி³ஸா. நோ ததா² சக்கு²னா ரூபே பஸ்ஸாமீதி யதா² போராணசக்கு²னா ரூபாரம்மணம் பஸ்ஸாமி ஓலோகேமி, ததா² தேன பகாரேன இதா³னி ந பஸ்ஸாமி. ஸோதம் அஸுத்³த⁴ந்திஆதீ³ஸுபி ஏஸேவ நயோ. மாஹம் நஸ்ஸந்தி அஹம் மா வினஸ்ஸம்.

90. இதா³னி யஸ்மா பிங்கி³யோ காயே ஸாபேக்க²தாய ‘‘ஜிண்ணோஹமஸ்மீ’’திஆதி³மாஹ. தேனஸ்ஸ ப⁴க³வா காயே ஸினேஹப்பஹானத்த²ம் ‘‘தி³ஸ்வான ரூபேஸு விஹஞ்ஞமானே’’தி கா³த²மாஹ. தத்த² ரூபேஸூதி ரூபஹேது ரூபபச்சயா. விஹஞ்ஞமானேதி கம்மகாரணாதீ³ஹி உபஹஞ்ஞமானே. ருப்பந்தி ரூபேஸூதி சக்கு²ரோகா³தீ³ஹி ச ரூபஹேதுயேவ ஜனா ருப்பந்தி பா³தி⁴யந்தி.

ஹஞ்ஞந்தீதி க⁴டீயந்தி. விஹஞ்ஞந்தீதி விஹேஸியந்தி. உபவிஹஞ்ஞந்தீதி ஹத்த²பாத³ச்சே²தா³தி³ம் லப⁴ந்தி. உபகா⁴தியந்தீதி மரணம் லப⁴ந்தி. குப்பந்தீதி பரிவத்தந்தி. பீளயந்தீதி விகா⁴தம் ஆபஜ்ஜந்தி. க⁴ட்டயந்தீதி க⁴ட்டனம் பாபுணந்தி. ப்³யாதி⁴தாதி பீ⁴தா. தோ³மனஸ்ஸிதாதி சித்தவிகா⁴தம் பத்தா. வேமானேதி நஸ்ஸமானே.

91. ஏவம் ப⁴க³வதா யாவ அரஹத்தம், தாவ கதி²தம் படிபத்திம் ஸுத்வா பிங்கி³யோ ஜராது³ப்³ப³லதாய விஸேஸம் அனதி⁴க³ந்த்வா ச புன ‘‘தி³ஸா சதஸ்ஸோ’’தி இமாய கா³தா²ய ப⁴க³வந்தம் தோ²மேந்தோ தே³ஸனம் யாசதி.

92. அத²ஸ்ஸ ப⁴க³வா புனபி யாவ அரஹத்தம், தாவ படிபத³ம் த³ஸ்ஸேந்தோ ‘‘தண்ஹாதி⁴பன்னே’’தி கா³த²மாஹ.

தண்ஹாதி⁴பன்னேதி தண்ஹாய விமுச்சித்வா டி²தே. தண்ஹானுகே³தி தண்ஹாய ஸஹ க³ச்ச²ந்தே. தண்ஹானுக³தேதி தண்ஹாய அனுப³ந்த⁴ந்தே. தண்ஹானுஸடேதி தண்ஹாய ஸஹ தா⁴வந்தே. தண்ஹாய பன்னேதி தண்ஹாய நிமுக்³கே³. படிபன்னேதி தண்ஹாய அவத்த²டே. அபி⁴பூ⁴தேதி மத்³தி³தே. பரியாதி³ன்னசித்தேதி பரியாதி³யித்வா க³ஹிதகுஸலசித்தே.

ஸந்தாபஜாதேதி ஸஞ்ஜாதசித்தஸந்தாபே. ஈதிஜாதேதி ரோகு³ப்பன்னே. உபத்³த³வஜாதேதி ஆதீ³னவஜாதே. உபஸக்³க³ஜாதேதி உப்பன்னது³க்க²ஜாதே.

விரஜம் வீதமலந்தி ஏத்த² விரஜந்தி விக³தராகா³தி³ரஜம். வீதமலந்தி வீதராகா³தி³மலம். ராகா³த³யோ ஹி அஜ்ஜோ²த்த²ரணட்டே²ன ரஜோ நாம, தூ³ஸட்டே²ன மலம் நாம. த⁴ம்மசக்கு²ந்தி கத்த²சி பட²மமக்³க³ஞாணம், கத்த²சி ஆதீ³னி தீணி மக்³க³ஞாணானி, கத்த²சி சதுத்த²மக்³க³ஞாணம்பி. இத⁴ பன ஜடிலஸஹஸ்ஸஸ்ஸ சதுத்த²மக்³க³ஞாணம். பிங்கி³யஸ்ஸ ததியமக்³க³ஞாணமேவ. யம் கிஞ்சி ஸமுத³யத⁴ம்மம், ஸப்³ப³ம் தம் நிரோத⁴த⁴ம்மந்தி விபஸ்ஸனாவஸேன ஏவம் பவத்தஸ்ஸ த⁴ம்மசக்கு²ம் உத³பாதீ³தி அத்தோ². ஸேஸம் ஸப்³ப³த்த² பாகடமேவ.

ஏவம் இத³ம்பி ஸுத்தம் ப⁴க³வா அரஹத்தனிகூடேனேவ தே³ஸேஸி, தே³ஸனாபரியோஸானே ச பிங்கி³யோ அனாகா³மிப²லே பதிட்டா²ஸி. ஸோ கிர அந்தரந்தரா சிந்தேஸி – ‘‘ஏவம் விசித்ரபடிபா⁴னம் நாம தே³ஸனம் ந லப⁴தி மய்ஹம் மாதுலோ பா³வரீ ஸவனாயா’’தி. தேன ஸினேஹவிக்கே²பேன அரஹத்தம் பாபுணிதும் நாஸக்கி². அந்தேவாஸிகா பனஸ்ஸ ஸஹஸ்ஸஜடிலா அரஹத்தம் பாபுணிம்ஸு. ஸப்³பே³வ இத்³தி⁴மயபத்தசீவரத⁴ரா ஏஹிபி⁴க்கு²னோ அஹேஸுந்தி.

ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய

பிங்கி³யமாணவஸுத்தனித்³தே³ஸவண்ணனா நிட்டி²தா.