6. ஜராஸுத்தனித்³தே³ஸவண்ணனா

39. ச²ட்டே² ஜராஸுத்தே அப்பம் வத ஜீவிதம் இத³ந்தி இத³ம் வத மனுஸ்ஸானம் ஜீவிதம் அப்பகம் பரித்தம் டி²திபரித்ததாய ஸரஸபரித்ததாயாதி கு³ஹட்ட²கஸுத்தேபி வுத்தனயமேதம். ஓரம் வஸ்ஸஸதாபி மிய்யதீதி வஸ்ஸஸதா ஓரம் கலலாதி³காலேபி மிய்யதி. அதிச்சாதி வஸ்ஸஸதம் அதிக்கமித்வா. ஜரஸாபி மிய்யதீதி ஜராய மிய்யதி. இதோ பரம் கு³ஹட்ட²கஸுத்தவண்ணனாய வுத்தனயேனேவ க³ஹேதப்³ப³ம்.

அப்பந்தி மந்த³ம். க³மனீயோ ஸம்பராயோதி பரலோகோ க³ந்தப்³போ³. கலலகாலேபீதி ஏத்த² கலலகாலம் நாம படிஸந்தி⁴க்க²ணே தீஹி ஜாதிஉண்ணம்ஸூஹி கதஸுத்தக்³கே³ டி²ததேலபி³ந்து³ப்பமாணம் அச்ச²ம் விப்பஸன்னகலலம் ஹோதி. யம் ஸந்தா⁴ய வுத்தம் –

‘‘திலதேலஸ்ஸ யதா² பி³ந்து³, ஸப்பிமண்டோ³ அனாவிலோ;

ஏவம் வண்ணப்படிபா⁴க³ம், கலலம் ஸம்பவுச்சதீ’’தி. (ஸம். நி. அட்ட². 1.1.235; விப⁴. அட்ட². 26 பகிண்ணககதா²);

தஸ்மிம் கலலகாலேபி. சவதீதி ஜீவிதம் க³ளதி. மரதீதி ஜீவிதவியோக³ம் ஆபஜ்ஜதி. அந்தரதா⁴யதீதி அத³ஸ்ஸனம் பாபுணாதி. விப்பலுஜ்ஜதீதி சி²ஜ்ஜதி. ‘‘அண்ட³ஜயோனியா சவதி. ஜலாபு³ஜயோனியா மரதி. ஸம்ஸேத³ஜயோனியா அந்தரதா⁴யதி. ஓபபாதிகயோனியா விப்பலுஜ்ஜதீ’’தி ஏவமேகே வண்ணயந்தி. அப்³பு³த³காலேபீதி அப்³பு³த³ம் நாம கலலதோ ஸத்தாஹச்சயேன மம்ஸதோ⁴வனஉத³கவண்ணம் ஹோதி, கலலந்தி நாமம் அந்தரதா⁴யதி. வுத்தம்பி சேதம் –

‘‘ஸத்தாஹம் கலலம் ஹோதி, பரிபக்கம் ஸமூஹதம்;

விவட்டமானம் தப்³பா⁴வம், அப்³பு³த³ம் நாம ஜாயதீ’’தி. (ஸம். நி. அட்ட². 1.1.235);

தஸ்மிம் அப்³பு³த³காலேபி. பேஸிகாலேபீதி தஸ்மாபி அப்³பு³தா³ ஸத்தாஹச்சயேன விலீனதிபுஸதி³ஸா பேஸி நாம ஸஞ்ஜாயதி. ஸா மரிசபா²ணிதேன தீ³பேதப்³பா³. கா³மதா³ரிகா ஹி ஸுபக்கானி மரிசானி க³ஹேத்வா ஸாடகந்தே ப⁴ண்டி³கம் கத்வா பீளேத்வா மண்ட³ம் ஆதா³ய கபாலே பக்கி²பித்வா ஆதபே ட²பேந்தி, தம் ஸுக்க²மானம் ஸப்³ப³பா⁴கே³ஹி முச்சதி. ஏவரூபா பேஸி ஹோதி, அப்³பு³த³ந்தி நாமம் அந்தரதா⁴யதி. வுத்தம்பி சேதம் –

‘‘ஸத்தாஹம் அப்³பு³த³ம் ஹோதி, பரிபக்கம் ஸமூஹதம்;

விவட்டமானம் தப்³பா⁴வம், பேஸி நாம பஜாயதீ’’தி. (ஸம். நி. அட்ட². 1.1.235);

தஸ்மிம் பேஸிகாலேபி. க⁴னகாலேபீதி ததோபி பேஸிதோ ஸத்தாஹச்சயேன குக்குடண்ட³ஸண்டா²னோ க⁴னோ நாம மம்ஸபிண்டோ³ நிப்³ப³த்ததி, பேஸீதி நாமம் அந்தரதா⁴யதி. வுத்தம்பி சேதம் –

‘‘ஸத்தாஹம் பேஸி ப⁴வதி, பரிபக்கம் ஸமூஹதம்;

விவட்டமானம் தப்³பா⁴வம், க⁴னோதி நாம ஜாயதி.

‘‘யதா² குக்குடியா அண்ட³ம், ஸமந்தா பரிமண்ட³லம்;

ஏவம் க⁴னஸ்ஸ ஸண்டா²னம், நிப்³ப³த்தம் கம்மபச்சயா’’தி. (ஸம். நி. அட்ட². 1.1.235);

தஸ்மிம் க⁴னகாலேபி. பஸாக²காலேபீதி பஞ்சமே ஸத்தாஹே த்³வின்னம் த்³வின்னம் ஹத்த²பாதா³னம் ஸீஸஸ்ஸ சத்தா²ய பஞ்ச பீளகா ஜாயந்தி, யம் ஸந்தா⁴ய வுத்தம் – ‘‘பஞ்சமே, பி⁴க்க²வே, ஸத்தாஹே பஞ்ச பீளகா ஸண்ட²ஹந்தி கம்மதோ’’தி. தஸ்மிம் பஸாக²காலேபி. ததோ பரம் ச²ட்ட²ஸத்தமாதீ³னி ஸத்தாஹானி அதிக்கம்ம தே³ஸனம் ஸங்கி²பித்வா த்³வாசத்தாலீஸஸத்தாஹே பரிணதகாலே கேஸலோமனகா²தீ³னம் உப்பத்திகாலஞ்ச. தஸ்ஸ ச நாபி⁴தோ உட்டி²தோ நாளோ மாது உத³ரபடலேன ஏகாப³த்³தோ⁴ ஹோதி, ஸோ உப்பலத³ண்ட³கோ விய சி²த்³தோ³, தேன ஆஹாரரஸோ ஸம்ஸரித்வா ஆஹாரஸமுட்டா²னரூபம் ஸமுட்டா²பேதி. ஏவம் ஸோ த³ஸமாஸே யாபேதி, தம் ஸப்³ப³ம் அவத்வா ‘‘ஸூதிக⁴ரே’’தி ஆஹ. யம் ஸந்தா⁴ய வுத்தம் –

‘‘கேஸா லோமா நகா²னி ச’’;

‘‘யஞ்சஸ்ஸ பு⁴ஞ்ஜதீ மாதா, அன்னம் பானஞ்ச போ⁴ஜனம்;

தேன ஸோ தத்த² யாபேதி, மாதுகுச்சி²க³தோ நரோ’’தி. (ஸம். நி. 1.235; கதா². 692);

தத்த² ஸூதிக⁴ரேதி ஸூதிகக⁴ரே, விஜாயனக⁴ரேதி அத்தோ². ‘‘ஸூதிகாக⁴ரே’’தி வா பாடோ², ஸூதிகாயாதி பத³ச்சே²தோ³. அத்³த⁴மாஸிகோபீதி ஜாததி³வஸதோ பட்டா²ய அத்³த⁴மாஸோ ஏதஸ்ஸ அத்தீ²தி அத்³த⁴மாஸிகோ. த்³வேமாஸிகாதீ³ஸுபி ஏஸேவ நயோ. ஜாததி³வஸதோ பட்டா²ய ஏகம் ஸம்வச்ச²ரம் ஏதஸ்ஸ அத்தீ²தி ஸம்வச்ச²ரிகோ. உபரி த்³வேவஸ்ஸிகாதீ³ஸுபி ஏஸேவ நயோ.

யதா³ ஜிண்ணோ ஹோதீதி யஸ்மிம் காலே ஜராஜிண்ணோ ப⁴வதி ஜஜ்ஜரீபூ⁴தோ. வுத்³தோ⁴தி வயோவுத்³தோ⁴. மஹல்லகோதி ஜாதிமஹல்லகோ. அத்³த⁴க³தோதி தயோ அத்³தே⁴ அதிக்கந்தோ. வயோஅனுப்பத்தோதி ததியம் வயம் அனுப்பத்தோ. க²ண்ட³த³ந்தோதி அந்தரந்தரா பதிதா த³ந்தா பா²லிதா ச ஜரானுபா⁴வேன க²ண்டா³ த³ந்தா ஜாதா அஸ்ஸாதி க²ண்ட³த³ந்தோ. பலிதகேஸோதி பண்ட³ரகேஸோ. விலூனந்தி லுஞ்சித்வா க³ஹிதகேஸா விய க²ல்லாடஸீஸோ. க²லிதஸிரோதி மஹாக²ல்லாடஸீஸோ. வலினந்தி ஸஞ்ஜாதவலி. திலகாஹதக³த்தோதி ஸேததிலககாளதிலகேஹி விகிண்ணஸரீரோ. போ⁴க்³கோ³தி ப⁴க்³கோ³, இமினாபிஸ்ஸ வங்கபா⁴வம் தீ³பேதி. த³ண்ட³பராயணோதி த³ண்ட³படிஸ்ஸரணோ த³ண்ட³து³தியோ. ஸோ ஜராயபீதி ஸோ புக்³க³லோ ஜராயபி அபி⁴பூ⁴தோ மரதி. நத்தி² மரணம்ஹா மோக்கோ²தி மரணதோ முஞ்சனுபாயோ நத்தி² நுபலப்³ப⁴தி.

ப²லானமிவ பக்கானம், பாதோ பதனதோ ப⁴யந்தி பரிபாகக³தானம் ஸிதி²லவண்டானம் பனஸப²லாதி³பக்கானம் பச்சூஸகாலே அவஸ்ஸம் பதிஸ்ஸந்தீதி ப²லஸாமிகானம் பா⁴யமானானம் விய. ஏவம் ஜாதான மச்சானம், நிச்சம் மரணதோ ப⁴யந்தி ஏவமேவ உப்பன்னானம் ஸத்தானம் மச்சுஸங்கா²தமரணதோ ஸததம் காலம் ப⁴யம்.

யதா²பி கும்ப⁴காரஸ்ஸாதி யதா² நாம மத்திகாபா⁴ஜனம் கரோந்தஸ்ஸ. கதம் மத்திகபா⁴ஜனந்தி (ஸு. நி. 582) தேன நிட்டா²பிதபா⁴ஜனம். ஸப்³ப³ம் பே⁴த³னபரியந்தந்தி பக்காபக்கம் ஸப்³ப³ம் பே⁴த³னம் பி⁴ஜ்ஜபரியந்தம் அவஸானம் அஸ்ஸாதி பே⁴த³னபரியந்தம். ஏவம் மச்சான ஜீவிதந்தி ஏவமேவ ஸத்தானம் ஆயுஸங்கா²ரம்.

த³ஹரா ச மஹந்தா சாதி தருணா ச மஹல்லகா ச. யே பா³லா யே ச பண்டி³தாதி யே ச அஸ்ஸாஸபஸ்ஸாஸாயத்தா ஜீவிதா பா³லா யே ச பண்டி³ச்சேன ஸமன்னாக³தா பு³த்³தா⁴த³யோ. ஸப்³பே³ மச்சுவஸம் யந்தீதி ஏதே வுத்தப்பகாரா த³ஹராத³யோ ஸப்³பே³ மச்சுனோ இஸ்ஸரியம் உபக³ச்ச²ந்தி.

தேஸம் மச்சுபரேதானந்தி ஏதேஸம் மச்சுனா பரிவாரிதானம். க³ச்ச²தம் பரலோகதோதி இதோ மனுஸ்ஸலோகதோ பரலோகம் க³ச்ச²ந்தானம். ந பிதா தாயதே புத்தந்தி பிதா புத்தம் ந ரக்க²தி. ஞாதீ வா பன ஞாதகேதி மாதாபிதிபக்கி²கா ஞாதீ வா தேயேவ ஞாதகே ரக்கி²தும் ந ஸக்கோந்தி.

பேக்க²தஞ்ஞேவ ஞாதீனந்தி வுத்தவிதா⁴னம்யேவ ஞாதீனம் பேக்க²ந்தானம்யேவ ஓலோகேந்தானம்யேவ. பஸ்ஸ லாலப்பதம் புதூ²தி பஸ்ஸாதி ஆலபனம். லாலபந்தானம் விலபந்தானம் புதூ²னம் நானப்பகாரானம். ஏகமேகோவ மச்சானம், கோ³வஜ்ஜோ² விய நிய்யதீதி ஸத்தானம் ஏகமேகோ வதா⁴ய நிய்யமானகோ³ணோ விய மரணாய நிய்யதி பாபுணீயதி. ஏவமப்³பா⁴ஹதோ லோகோதி ஏவமேவ ஸத்தலோகோ பு⁴ஸம் ஆஹதோ. மச்சுனா ச ஜராய சாதி மரணேன ச ஜராய ச அபி⁴பூ⁴தோ.

40. மமாயிதேதி மமாயிதவத்து²காரணா. வினாபா⁴வம் ஸந்தமேவித³ந்தி ஸந்தம் விஜ்ஜமானம் வினாபா⁴வமேவ இத³ம், ந ஸக்கா அவினாபா⁴வேன ப⁴விதுந்தி வுத்தம் ஹோதி.

ஸோசந்தீதி சித்தேன ஸோசனம் கரோந்தி. கிலமந்தீதி காயேன கிலமத²ம் பாபுணந்தி. பரிதே³வந்தீதி நானாவித⁴ம் வாசாவிலாபம் ப⁴ணந்தி. உரத்தாளிம் கந்த³ந்தீதி உரம் தாளேத்வா தாளேத்வா கந்த³ந்தி. ஸம்மோஹம் ஆபஜ்ஜந்தீதி ஸம்மோஹபா⁴வம் பாபுணந்தி.

அனிச்சோதி ஹுத்வா அபா⁴வட்டே²ன. ஸங்க²தோதி பச்சயேஹி ஸங்க³ம்ம கதோ. படிச்சஸமுப்பன்னோதி பச்சயஸாமக்³கி³ம் படிச்ச ந பச்சக்கா²ய ஸஹ ஸம்மா ச உப்பன்னோ. க²யத⁴ம்மோதி க²யம் க³மனஸபா⁴வோ. வயத⁴ம்மோதி வயம் க³மனஸபா⁴வோ, ப⁴ங்க³வஸேன ப⁴ங்க³க³மனஸபா⁴வோதி அத்தோ². விராக³த⁴ம்மோதி விரஜ்ஜனஸபா⁴வோ. நிரோத⁴த⁴ம்மோதி நிருஜ்ஜ²னஸபா⁴வோ. ய்வாயம் பரிக்³க³ஹோதி யோ அயம் பரிக்³க³ஹோ. ‘‘யாய பரிக்³க³ஹோ’’திபி பாடோ², அயமேவ பத³ச்சே²தோ³. நிச்சோதி ஸததகாலிகோ. து⁴வோதி தி²ரோ. ஸஸ்ஸதோதி அசவனோ. அவிபரிணாமத⁴ம்மோதி பகதிஅஜஹனஸபா⁴வோ. ஸஸ்ஸதி ஸமம் ததே²வ ட²ஸ்ஸதீதி சந்த³ஸூரியஸினேருமஹாஸமுத்³த³பத²வீபப்³ப³தாத³யோ விய திட்டே²ய்ய.

நானாபா⁴வோதி ஜாதியா நானாபா⁴வோ. வினாபா⁴வோதி மரணேன வியோக³பா⁴வோ. அஞ்ஞதா²பா⁴வோதி ஸப்³பா⁴வதோ அஞ்ஞதா²பா⁴வோ. புரிமானம் புரிமானம் க²ந்தா⁴னந்தி அனந்தரே புரே உப்பன்னானம் க²ந்தா⁴னம். விபரிணாமஞ்ஞதா²பா⁴வாதி பகதிபா⁴வம் ஜஹித்வா அஞ்ஞதா²பா⁴வேன. பச்சி²மா பச்சி²மா க²ந்தா⁴த³யோ பவத்தந்தி உப்பஜ்ஜந்தீதி ஸம்ப³ந்தோ⁴.

ஸப்³ப³ம் க⁴ராவாஸபலிபோ³த⁴ந்தி ஸகலம் கி³ஹிபா⁴வஜடம். ஞாதிமித்தாமச்சபலிபோ³த⁴ந்தி மாதாபிதுபக்கி²கா ஞாதீ, மித்தா ஸஹாயா, அமச்சா ப⁴ச்சா. ஸன்னிதி⁴பலிபோ³த⁴ந்தி நிதா⁴னஜடம் சி²ந்தி³த்வா. கேஸமஸ்ஸும் ஓஹாரேத்வாதி கேஸே ச மஸ்ஸூனி ச ஓரோபயித்வா. காஸாயானி வத்தா²னீதி கஸாயரஸபீதானி வத்தா²னி.

41. மாமகோதி மம உபாஸகோ பி⁴க்கு² வாதி ஸங்க²ம் க³தோ, பு³த்³தா⁴தீ³னி வா வத்தூ²னி மமாயமானோ.

தேஸம் தேஸம் ஸத்தானந்தி அனேகேஸம் ஸத்தானம் ஸாதா⁴ரணனித்³தே³ஸோ. ‘‘யஞ்ஞத³த்தஸ்ஸ மரணம், ஸோமத³த்தஸ்ஸ மரண’’ந்தி ஏவஞ்ஹி தி³வஸம்பி கதி²யமானே நேவ ஸத்தா பரியாதா³னம் க³ச்ச²ந்தி, ந ஸப்³ப³ம் அபரத்ததீ³பனம் ஸிஜ்ஜ²தி. இமேஹி பன த்³வீஹி பதே³ஹி ந கோசி ஸத்தோ அபரியாதி³ன்னோ ஹோதி, ந கிஞ்சி அபரத்தாதீ³பனம் ந ஸிஜ்ஜ²தி. தம்ஹா தம்ஹாதி அயம் க³திவஸேன அனேகேஸம் நிகாயானம் ஸாதா⁴ரணனித்³தே³ஸோ. ஸத்தனிகாயாதி ஸத்தானம் நிகாயா, ஸத்தக⁴டா ஸத்தஸமூஹாதி அத்தோ². சுதீதி சவனவஸேன வுத்தம். ஏகசதுபஞ்சக்க²ந்தா⁴ய சுதியா ஸாமஞ்ஞவசனமேதம். சவனதாதி பா⁴வவசனேன லக்க²ணனித³ஸ்ஸனம். பே⁴தோ³தி சுதிக²ந்தா⁴னம் ப⁴ங்கு³ப்பத்திபரிதீ³பனம். அந்தரதா⁴னந்தி க⁴டஸ்ஸ விய பி⁴ன்னஸ்ஸ பி⁴ன்னானம் க²ந்தா⁴னம் யேன கேனசி பரியாயேன டா²னாபா⁴வபரிதீ³பனம். மச்சுமரணந்தி மச்சுஸங்கா²தம் மரணம், ந க²ணிகமரணம். காலோ நாம அந்தகோ, தஸ்ஸ கிரியாதி காலம்கிரியா. ஏத்தாவதா ஸம்முதிமரணம் தீ³பிதம். இதா³னி பரமத்தே²ன தீ³பேதும் ‘‘க²ந்தா⁴னம் பே⁴தோ³’’திஆதி³மாஹ. பரமத்தே²ன ஹி க²ந்தா⁴யேவ பி⁴ஜ்ஜந்தி, ந ஸத்தோ நாம கோசி மரதி. க²ந்தே⁴ஸு பன பி⁴ஜ்ஜமானேஸு ஸத்தோ மரதி, பி⁴ன்னேஸு ‘‘மதோ’’தி வோஹாரோ ஹோதி.

ஏத்த² ச சதுவோகாரபஞ்சவோகாரவஸேன க²ந்தா⁴னம் பே⁴தோ³, ஏகவோகாரவஸேன களேவரஸ்ஸ நிக்கே²போ. சதுவோகாரவஸேன வா க²ந்தா⁴னம் பே⁴தோ³, ஸேஸத்³வயவஸேன களேவரஸ்ஸ நிக்கே²போ வேதி³தப்³போ³. கஸ்மா? காமரூபப⁴வத்³வயேபி ரூபகாயஸங்கா²தஸ்ஸ களேவரஸ்ஸ ஸப்³பா⁴வதோ. யஸ்மா வா சாதுமஹாராஜிகாதீ³ஸு க²ந்தா⁴ பி⁴ஜ்ஜந்தேவ, ந கிஞ்சி நிக்கி²பந்தி, தஸ்மா தேஸம் வஸேன க²ந்தா⁴னம் பே⁴தோ³, மனுஸ்ஸாதீ³ஸு களேவரஸ்ஸ நிக்கே²போ. ஏத்த² ச களேவரஸ்ஸ நிக்கே²பகரணதோ மரணம் ‘‘களேவரஸ்ஸ நிக்கே²போ’’தி வுத்தம். ஜீவிதிந்த்³ரியஸ்ஸுபச்சே²தோ³தி இமினா இந்த்³ரியப³த்³த⁴ஸ்ஸேவ மரணம் நாம ஹோதி, அனிந்த்³ரியப³த்³த⁴ஸ்ஸ மரணம் நாம நத்தீ²தி த³ஸ்ஸேதி. ‘‘ஸஸ்ஸம் மதம், ருக்கோ² மதோ’’தி இத³ம் பன வோஹாரமத்தமேவ. அத்த²தோ பன ஏவரூபானி வசனானி ஸஸ்ஸாதீ³னம் க²யவயபா⁴வமேவ தீ³பேந்தி. ரூபக³தந்தி ரூபமேவ ரூபக³தம். வேத³னாக³தந்திஆதீ³ஸுபி ஏஸேவ நயோ.

தத்த² புப்³பே³வ மச்சந்தி மச்சம் வா போ⁴கா³ புப்³பே³வ பட²மதரஞ்ஞேவ விஜஹந்தி. மச்சோ வா தே போ⁴கே³ புப்³ப³தரம் ஜஹதி. காமகாமீதி சோரராஜானம் ஆலபதி. அம்போ⁴ காமே காமயமான காமகாமி போ⁴கி³னோ நாம லோகே அஸஸ்ஸதா, போ⁴கே³ஸு வா நட்டே²ஸு ஜீவமானா ச அபோ⁴கி³னோ ஹோந்தி. போ⁴கே³ வா பஹாய ஸயம் நஸ்ஸந்தி, தஸ்மா அஹம் மஹாஜனஸ்ஸ ஸோககாலேபி ந ஸோசாமீதி அத்தோ².

விதி³தா மயா ஸத்துக லோகத⁴ம்மாதி சோரராஜானம் ஆலபந்தோ ஆஹ. அம்போ⁴ ஸத்துக மயா லாபோ⁴ அலாபோ⁴ யஸோ அயஸோதிஆத³யோ லோகத⁴ம்மா விதி³தா. யதே²வ ஹி சந்தோ³ உதே³தி ச பூரதி ச புன ச கீ²யதி, யதா² ச ஸூரியோ அந்த⁴காரம் வித⁴மேந்தோ மஹந்தம் லோகப்பதே³ஸம் தபித்வான புன ஸாயம் அத்த²ம் பலேதி அத்த²ம் க³ச்ச²தி ந தி³ஸ்ஸதி, ஏவமேவ போ⁴கா³ உப்பஜ்ஜந்தி ச வினஸ்ஸந்தி ச, தத்த² கிம் ஸோகேன, தஸ்மா ந ஸோசாமீதி அத்தோ².

தண்ஹாமஞ்ஞனாய மஞ்ஞதீதி தண்ஹாய ஜனிதமானமஞ்ஞனாய மஞ்ஞதி. மானம் கரோதி தி³ட்டி²மஞ்ஞனாயாதி தி³ட்டி²ம் உபனிஸ்ஸயம் கத்வா உப்பன்னாய மஞ்ஞனாய. மானமஞ்ஞனாயாதி ஸஹஜாதமானமஞ்ஞனாய. கிலேஸமஞ்ஞனாயாதி வுத்தப்பகாராய உபதாபனட்டே²ன கிலேஸமஞ்ஞனாய மஞ்ஞதி.

குஹாதி விம்ஹாபகா. த²த்³தா⁴தி கா²ணு விய த²த்³தா⁴. லபாதி பச்சயனிமித்தேன லபனகா.

42. ஸங்க³தந்தி ஸமாக³தம், தி³ட்ட²ம் பு²ட்ட²ம் வா. பியாயிதந்தி பியகதம்.

ஸங்க³தந்தி ஸம்முகீ²பூ⁴தம். ஸமாக³தந்தி ஸமீபம் ஆக³தம். ஸமாஹிதந்தி ஏகீபூ⁴தம். ஸன்னிபதிதந்தி பிண்டி³தம். ஸுபினக³தோதி ஸுபினம் பவிட்டோ². ஸேனாப்³யூஹம் பஸ்ஸதீதி ஸேனாஸன்னிவேஸம் த³க்க²தி. ஆராமராமணேய்யகந்தி புப்பா²ராமாதீ³னம் ரமணீயபா⁴வம். வனராமணேய்யகாதீ³ஸுபி ஏஸேவ நயோ. பேதந்தி இதோ பரலோகம் க³தம். காலங்கதந்தி மதம்.

43. நாமம்யேவாவஸிஸ்ஸதி, அக்கே²ய்யந்தி ஸப்³ப³ம் ரூபாதி³த⁴ம்மஜாதம் பஹீயதி, நாமமத்தமேவ து அவஸிஸ்ஸதி ‘‘பு³த்³த⁴ரக்கி²தோ த⁴ம்மரக்கி²தோ’’தி ஏவம் அக்கா²தும் கதே²தும்.

யே சக்கு²விஞ்ஞாணாபி⁴ஸம்பூ⁴தாதி யே ஸயம் சக்கு²விஞ்ஞாணேன அபி⁴ஸம்பூ⁴தா ராஸிகதா தி³ட்டா² சதுஸமுட்டா²னிகா ரூபா. ஸோதவிஞ்ஞாணாபி⁴ஸம்பூ⁴தாதி பரதோகோ⁴ஸேன ஸோதவிஞ்ஞாணேன ராஸிகதா ஸுதா த்³விஸமுட்டா²னிகா ஸத்³தா³.

44. முனயோதி கீ²ணாஸவமுனயோ. கே²மத³ஸ்ஸினோதி நிப்³பா³னத³ஸ்ஸினோ.

ஸோகோதி ஸோகனித்³தே³ஸே – ப்³யஸதீதி ப்³யஸனம், ஹிதஸுக²ம் கி²பதி வித்³த⁴ம்ஸேதீதி அத்தோ². ஞாதீனம் ப்³யஸனம் ஞாதிப்³யஸனம், சோரரோக³ப⁴யாதீ³ஹி ஞாதிக்க²யோ ஞாதிவினாஸோதி அத்தோ². தேன ஞாதிப்³யஸனேன. பு²ட்ட²ஸ்ஸாதி அஜ்ஜோ²த்த²டஸ்ஸ, அபி⁴பூ⁴தஸ்ஸ ஸமன்னாக³தஸ்ஸாதி அத்தோ². ஸேஸேஸுபி ஏஸேவ நயோ. அயம் பன விஸேஸோ – போ⁴கா³னம் ப்³யஸனம் போ⁴க³ப்³யஸனம், ராஜசோராதி³வஸேன போ⁴க³க்க²யோ போ⁴க³வினாஸோதி அத்தோ². ரோகோ³யேவ ப்³யஸனம் ரோக³ப்³யஸனம். ரோகோ³ ஹி ஆரோக்³யம் ப்³யஸதி வினாஸேதீதி ப்³யஸனம். ஸீலஸ்ஸ ப்³யஸனம் ஸீலப்³யஸனம், து³ஸ்ஸில்யஸ்ஸேதம் நாமம். ஸம்மாதி³ட்டி²ம் வினாஸயமானா உப்பன்னா தி³ட்டி²யேவ ப்³யஸனம் தி³ட்டி²ப்³யஸனம். ஏத்த² ச புரிமானி த்³வே அனிப்ப²ன்னானி, பச்சி²மானி தீணி நிப்ப²ன்னானி திலக்க²ணப்³பா⁴ஹதானி. புரிமானி ச தீணி நேவ குஸலானி நாகுஸலானி, ஸீலதி³ட்டி²ப்³யஸனத்³வயம் அகுஸலம்.

அஞ்ஞதரஞ்ஞதரேனாதி க³ஹிதேஸு வா யேன கேனசி அக்³க³ஹிதேஸு வா மித்தாமச்சப்³யஸனாதீ³ஸு யேன கேனசி. ஸமன்னாக³தஸ்ஸாதி ஸமனுப³ந்த⁴ஸ்ஸ அபரிமுச்சமானஸ்ஸ. அஞ்ஞதரஞ்ஞதரேன து³க்க²த⁴ம்மேனாதி யேன கேனசி ஸோகது³க்க²ஸ்ஸ உப்பத்திஹேதுனா. ஸோகோதி ஸோசனகவஸேன ஸோகோ. இத³ம் தேஹி காரணேஹி உப்பஜ்ஜனகஸோகஸ்ஸ ஸபா⁴வபச்சத்தம். ஸோசனாதி ஸோசனாகாரோ. ஸோசிதத்தந்தி ஸோசிதபா⁴வோ. அந்தோஸோகோதி அப்³ப⁴ந்தரஸோகோ. து³தியபத³ம் உபஸக்³கே³ன வட்³டி⁴தம். ஸோ ஹி அப்³ப⁴ந்தரம் ஸுக்கா²பேந்தோ விய பரிஸுக்கா²பேந்தோ விய உப்பஜ்ஜதீதி ‘‘அந்தோஸோகோ அந்தோபரிஸோகோ’’தி வுச்சதி. அந்தோதா³ஹோதி அப்³ப⁴ந்தரதா³ஹோ. து³தியபத³ம் உபஸக்³கே³ன வட்³டி⁴தம். சேதஸோ பரிஜ்ஜா²யனாதி சித்தஸ்ஸ ஜா²னனாகாரோ. ஸோகோ ஹி உப்பஜ்ஜமானோ அக்³கி³ விய சித்தம் ஜா²பேதி த³ஹதி, ‘‘சித்தம் மே ஜா²மம், ந மே கிஞ்சி படிபா⁴தீ’’தி வதா³பேதி. து³க்கி²தோ மனோ து³ம்மனோ, தஸ்ஸ பா⁴வோ தோ³மனஸ்ஸம். அனுபவிட்ட²ட்டே²ன ஸோகோவ ஸல்லந்தி ஸோகஸல்லம்.

பரிதே³வனித்³தே³ஸே – ‘‘மய்ஹம் தீ⁴தா, மய்ஹம் புத்தோ’’தி ஏவம் ஆதி³ஸ்ஸ ஆதி³ஸ்ஸ தே³வந்தி ரோத³ந்தி ஏதேனாதி ஆதே³வோ. தம் தம் வண்ணம் பரிகித்தேத்வா பரிகித்தேத்வா தே³வந்தி ஏதேனாதி பரிதே³வோ. ததோ பரானி த்³வே த்³வே பதா³னி புரிமத்³வயஸ்ஸேவ ஆகாரபா⁴வனித்³தே³ஸவஸேன வுத்தானி. வாசாதி வசனம். பலாபோதி துச்ச²ம் நிரத்த²கவசனம். உப்பட்³ட⁴ப⁴ணிதஅஞ்ஞப⁴ணிதாதி³வஸேன விரூபோ பலாபோ விப்பலாபோ. லாலப்போதி புனப்புனம் லபனம். லாலப்பனாகாரோ லாலப்பனா. லாலப்பிதஸ்ஸ பா⁴வோ லாலப்பிதத்தம். மச்ச²ரியாதீ³னி வுத்தத்தா²னேவ.

45. ஸத்தமகா³தா² ஏவம் மரணப்³பா⁴ஹதே லோகே அனுரூபபடிபத்தித³ஸ்ஸனத்த²ம் வுத்தா. தத்த² பதிலீனசரஸ்ஸாதி ததோ ததோ பதிலீனம் சித்தம் கத்வா சரந்தஸ்ஸ. பி⁴க்கு²னோதி கல்யாணபுது²ஜ்ஜனஸ்ஸ வா ஸேக்க²ஸ்ஸ வா. ஸாமக்³கி³யமாஹு தஸ்ஸ தம், யோ அத்தானம் ப⁴வனே ந த³ஸ்ஸயேதி தஸ்ஸேதம் பதிரூபமாஹு, யோ ஏவம்படிபன்னோ நிரயாதி³பே⁴தே³ ப⁴வனே அத்தானம் ந த³ஸ்ஸயே. ஏவஞ்ஹி ஸோ இமம்ஹா மரணா முச்சேய்யாதி அதி⁴ப்பாயோ.

பதிலீனசரா வுச்சந்தீதி ததோ ததோ லீனசித்தாசாரா கதீ²யந்தி. ஸத்த ஸேக்கா²தி அதி⁴ஸீலாதீ³ஸு தீஸு ஸிக்கா²ஸு ஸிக்க²ந்தீதி ஸோதாபத்திமக்³க³ட்ட²ம் ஆதி³ம் கத்வா யாவ அரஹத்தமக்³க³ட்டா² ஸத்த ஸேக்கா². அரஹாதி ப²லட்டோ². ஸோ நிட்டி²தசித்தத்தா பதிலீனோ. ஸேக்கா²னம் பதிலீனசரணபா⁴வே காரணம் த³ஸ்ஸேந்தோ ‘‘கிம் காரணா’’திஆதி³மாஹ. தே ததோ ததோதி தே ஸத்த ஸேக்கா² தேஹி தேஹி ஆரம்மணேஹி சித்தம் பதிலீனேந்தாதி அத்தனோ சித்தம் நிலீனேந்தா. பதிகுடேந்தாதி ஸங்கோசேந்தா. பதிவட்டேந்தாதி கடஸாரகம் விய ஆபு⁴ஜேந்தா. ஸன்னிருத்³த⁴ந்தாதி ஸன்னிருஜ்ஜ²ந்தா. ஸன்னிக³ண்ஹந்தாதி நிக்³க³ஹம் குருமானா. ஸன்னிவாரேந்தாதி வாரயமானா. ரக்க²ந்தாதி ரக்க²ம் குருமானா. கோ³பேந்தாதி சித்தமஞ்ஜூஸாய கோ³பயமானா.

இதா³னி த்³வாரவஸேன த³ஸ்ஸேந்தோ ‘‘சக்கு²த்³வாரே’’திஆதி³மாஹ. தத்த² சக்கு²த்³வாரேதி சக்கு²விஞ்ஞாணத்³வாரே. ஸோதத்³வாராதீ³ஸுபி ஏஸேவ நயோ. பி⁴க்கு²னோதி புது²ஜ்ஜனகல்யாணகஸ்ஸ வா பி⁴க்கு²னோ, ஸேக்க²ஸ்ஸ வா பி⁴க்கு²னோதி பி⁴க்கு²ஸத்³த³ஸ்ஸ வசனத்த²ம் அவத்வா இதா⁴தி⁴ப்பேதபி⁴க்கு²யேவ த³ஸ்ஸிதோ. தத்த² புது²ஜ்ஜனோ ச ஸோ கிலேஸானம் அஸமுச்சி²ன்னத்தா, கல்யாணோ ச ஸீலாதி³படிபத்தியுத்தத்தாதி புது²ஜ்ஜனகல்யாணோவ புது²ஜ்ஜனகல்யாணகோ, தஸ்ஸ புது²ஜ்ஜனகல்யாணகஸ்ஸ. அதி⁴ஸீலாதீ³னி ஸிக்க²தீதி ஸேக்கோ², தஸ்ஸ ஸேக்க²ஸ்ஸ வா ஸோதாபன்னஸ்ஸ வா ஸகதா³கா³மினோ வா அனாகா³மினோ வா.

ஆஸந்தி நிஸீத³ந்தி ஏத்தா²தி ஆஸனம். யத்தா²தி யேஸு மஞ்சபீடா²தீ³ஸு. மஞ்சோதிஆதீ³னி ஆஸனஸ்ஸ பபே⁴த³வசனானி. மஞ்சோபி ஹி நிஸஜ்ஜாயபி ஓகாஸத்தா இத⁴ ஆஸனேஸு வுத்தோ, ஸோ பன மஸாரகபு³ந்தி³காப³த்³த⁴குளீரபாத³கஆஹச்சபாத³கானம் அஞ்ஞதரோ. பீட²ம்பி தேஸம் அஞ்ஞதரமேவ. பி⁴ஸீதி உண்ணபி⁴ஸி சோளபி⁴ஸி வாகபி⁴ஸி திணபி⁴ஸி பண்ணபி⁴ஸீனம் அஞ்ஞதரா. தட்டிகாதி தாலபண்ணாதீ³ஹி வினித்வா கதா. சம்மக²ண்டோ³தி நிஸஜ்ஜாரஹோ யோ கோசி சம்மக²ண்டோ³. திணஸந்தா²ராத³யோ திணாதீ³னி கு³ம்பே³த்வா கதா. அஸப்பாயரூபத³ஸ்ஸனேனாதி அஸப்பாயானம் இட்ட²ரூபானம் ஓலோகனேன. ரித்தந்தி அப்³ப⁴ந்தரதோ துச்ச²ம். விவித்தந்தி ப³ஹித்³தா⁴பவேஸனேன ஸுஞ்ஞம். பவிவித்தந்தி கோசி க³ஹட்டோ² தத்த² நத்தீ²தி அதிரேகேன ஸுஞ்ஞம். அஸப்பாயஸத்³த³ஸ்ஸவனேபி ஏஸேவ நயோ. பஞ்சஹி காமகு³ணேஹீதி இத்தி²ரூபஸத்³த³க³ந்த⁴ரஸபோ²ட்ட²ப்³பே³ஹி பஞ்சஹி காமகோட்டா²ஸேஹி. வுத்தம்பி சேதம் –

‘‘ரூபா ஸத்³தா³ ரஸா க³ந்தா⁴, போ²ட்ட²ப்³பா³ ச மனோரமா;

பஞ்ச காமகு³ணா லோகே, இத்தி²ரூபஸ்மிம் தி³ஸ்ஸரே’’தி. (அ. நி. 5.55);

ப⁴ஜதோதி சித்தேன ஸேவனம் கரோந்தஸ்ஸ. ஸம்ப⁴ஜதோதி ஸம்மா ஸேவந்தஸ்ஸ. ஸேவதோதி உபஸங்கமந்தஸ்ஸ. நிஸேவதோதி நிஸ்ஸயம் கத்வா ஸேவந்தஸ்ஸ. ஸம்ஸேவதோதி ஸுட்டு² ஸேவந்தஸ்ஸ. படிஸேவதோதி புனப்புனம் உபஸங்கமந்தஸ்ஸ.

க³ணஸாமக்³கீ³தி ஸமணானம் ஏகீபா⁴வோ ஸமக்³க³பா⁴வோ. த⁴ம்மஸாமக்³கீ³தி ஸத்ததிம்ஸபோ³தி⁴பக்கி²யத⁴ம்மானம் ஸமூஹபா⁴வோ. அனபி⁴னிப்³ப³த்திஸாமக்³கீ³தி அனிப்³ப³த்தமானானம் அனுப்பஜ்ஜமானானம் அனுபாதி³ஸேஸாய நிப்³பா³னதா⁴துயா பரினிப்³பு³தானம் அரஹந்தானம் ஸமூஹோ. ஸமக்³கா³தி காயேன அவியோகா³. ஸம்மோத³மானாதி சித்தேன ஸுட்டு² மோத³மானா துஸ்ஸமானா. அவிவத³மானாதி வாசாய விவாத³ம் அகுருமானா. கீ²ரோத³கீபூ⁴தாதி கீ²ரேன ஸம்ஸட்ட²உத³கஸதி³ஸா.

தே ஏகதோ பக்க²ந்த³ந்தீதி தே போ³தி⁴பக்கி²யத⁴ம்மா ஏகம் ஆரம்மணம் பவிஸந்தி. பஸீத³ந்தீதி தஸ்மிம்யேவ ஆரம்மணே பஸாத³மாபஜ்ஜந்தி. அனுபாதி³ஸேஸாயாதி உபாதி³விரஹிதாய.

நிப்³பா³னதா⁴துயாதி அமதமஹானிப்³பா³னதா⁴துயா. ஊனத்தம் வாதி ஏத்த² உனபா⁴வோ ஊனத்தம், அபரிபுண்ணபா⁴வோதி அத்தோ². புண்ணத்தம் வாதி பரிபுண்ணபா⁴வோ புண்ணத்தம், புண்ணபா⁴வோ வா ந பஞ்ஞாயதி நத்தீ²தி அத்தோ².

நேரயிகானந்தி நிரயே நிப்³ப³த்தனககம்மானம் அத்தி²பா⁴வேன. நிரயம் அரஹந்தீதி நேரயிகா, தேஸம் நேரயிகானம். நிரயோ ப⁴வனந்தி நிரயோ ஏவ தேஸம் வஸனட்டா²னம் க⁴ரம். திரச்சா²னயோனிகானந்திஆதீ³ஸுபி ஏஸேவ நயோ. தஸ்ஸேஸா ஸாமக்³கீ³தி தஸ்ஸ கீ²ணாஸவஸ்ஸ ஏஸா நிப்³பா³னஸாமக்³கீ³. ஏதம் ச²ன்னந்தி ஏதம் அனுச்ச²விகம். பதிரூபந்தி ஸதி³ஸம் படிபா⁴க³ம், அஸதி³ஸம் அப்படிபா⁴க³ம் ந ஹோதி. அனுச்ச²விகந்தி ஏதம் ஸமணப்³ராஹ்மணானம் வா த⁴ம்மானம், மக்³க³ப²லனிப்³பா³னஸாஸனத⁴ம்மானம் வா அனுச்ச²விகம். தேஸம் ச²விம் சா²யம் ஸுந்த³ரபா⁴வம் அன்வேதி அனுக³ச்ச²தி, அத² கோ² ஸந்திகாவ தேஹி த⁴ம்மேஹி அனுச்ச²விகத்தா ஏவ ச அனுலோமம். தேஸஞ்ச அனுலோமேதி, அத² கோ² ந விலோமம் ந பச்சனீகபா⁴வே டி²தம்.

46. இதா³னி ‘‘யோ அத்தானம் ப⁴வனே ந த³ஸ்ஸயே’’தி ஏவம் கீ²ணாஸவோ விபா⁴விதோ, தஸ்ஸ வண்ணப⁴ணனத்த²ம் இதோ பரா திஸ்ஸோ கா³தா²யோ ஆஹ. தத்த² பட²மகா³தா²ய ஸப்³ப³த்தா²தி த்³வாத³ஸஸு ஆயதனேஸு. ந பியம் குப்³ப³தி நோபி அப்பியந்தி நித்³தே³ஸே பியாதி சித்தே பீதிகரா. தே விபா⁴க³தோ த³ஸ்ஸேந்தோ ‘‘கதமே ஸத்தா பியா, இத⁴ யஸ்ஸ தே ஹோந்தீ’’தி ஆஹ. தத்த² யஸ்ஸ தேதி யே அஸ்ஸ தே. ஹோந்தீதி ப⁴வந்தி. அத்த²காமாதி வட்³டி⁴காமா. ஹிதகாமாதி ஸுக²காமா. பா²ஸுகாமாதி ஸுக²விஹாரகாமா. யோக³க்கே²மகாமாதி சதூஹி யோகே³ஹி கே²மம் நிப்³ப⁴யம் காமா. மமாயதீதி மாதா. பியாயதீதி பிதா. ப⁴ஜதீதி பா⁴தா. ப⁴கி³னீதி ஏத்தா²பி ஏஸேவ நயோ. பும் தாயதி ரக்க²தீதி புத்தோ. குலவம்ஸம் தா⁴ரேதீதி தீ⁴தா. மித்தா ஸஹாயா. அமச்சா ப⁴ச்சா. ஞாதீ பிதுபக்கி²கா. ஸாலோஹிதா மாதிபக்கி²கா. இமே ஸத்தா பியாதி இமே ஸத்தா பீதிஜனகா. வுத்தவிபரியாயேன அப்பியா வேதி³தப்³பா³.

47. யதி³த³ம் தி³ட்ட²ஸுதமுதேஸு வாதி ஏத்த² பன யதி³த³ம் தி³ட்ட²ஸுதம், ஏத்த² வா முதேஸு வா த⁴ம்மேஸு; ஏவம் முனி ந உபலிம்பதீதி ஏவம் ஸம்ப³ந்தோ⁴ வேதி³தப்³போ³.

உத³கதே²வோதி உத³கஸ்ஸ தே²வோ. ‘‘உத³கத்தே²வகோ’’திபி பாடோ². பது³மபத்தேதி பது³மினிபத்தே.

48. தோ⁴னோ ந ஹி தேன மஞ்ஞதி, யதி³த³ம் தி³ட்ட²ஸுதமுதேஸு வாதி அத்ராபி யதி³த³ம் தி³ட்ட²ஸுதம், தேன வத்து²னா ந மஞ்ஞதி, முதேஸு வா த⁴ம்மேஸு ந மஞ்ஞதீதி ஏவமேவ ஸம்ப³ந்தோ⁴ வேதி³தப்³போ³. ந ஹி ஸோ ரஜ்ஜதி, நோ விரஜ்ஜதீதி பா³லபுது²ஜ்ஜனோ விய ந ரஜ்ஜதி, கல்யாணபுது²ஜ்ஜனஸேக்கா² விய ந விரஜ்ஜதி, ராக³ஸ்ஸ கீ²ணத்தா ‘‘விரத்தோ’’த்வேவ ஸங்க²ம் க³ச்ச²தி. ஸேஸம் பாகடமேவாதி.

தாய பஞ்ஞாய காயது³ச்சரிதந்தி ஸம்பயுத்தாய புப்³ப³பா⁴கா³யேவ வா பஞ்ஞாய பரிக்³க³ஹேதப்³பே³ பரிக்³க³ண்ஹந்தோ யோகீ³ திவித⁴ம் காயது³ச்சரிதம் ஸமுச்சே²த³வஸேன து⁴னாதி. அயஞ்ச புக்³க³லோ விபன்னத⁴ம்மம் தே³ஸனாத⁴ம்மேஸு து⁴னந்தேஸு தம்த⁴ம்மஸமங்கீ³புக்³க³லோபி து⁴னாதி நாம. தே ச த⁴ம்மே பஞ்ஞாய அத்தனோ பவத்திக்க²ணே து⁴னிதுமாரத்³தோ⁴ து⁴தாதி வுச்சதி, யதா² பு⁴ஞ்ஜிதுமாரத்³தோ⁴ பு⁴த்தோதி வுச்சதி. லக்க²ணம் பனேத்த² ஸத்³த³ஸத்த²தோ வேதி³தப்³ப³ம். து⁴தந்தி கத்துஸாத⁴னம். து⁴தம் பட²மமக்³கே³ன. தோ⁴தம் து³தியமக்³கே³ன. ஸந்தோ⁴தம் ததியமக்³கே³ன. நித்³தோ⁴தம் சதுத்த²மக்³கே³ன.

தோ⁴னோ தி³ட்ட²ம் ந மஞ்ஞதீதி அரஹா மம்ஸசக்கு²னா தி³ட்ட²ம் தி³ப்³ப³சக்கு²னா தி³ட்ட²ம் ரூபாயதனம் ந மஞ்ஞதி தீஹி மஞ்ஞனாஹி, கத²ம்? ரூபாயதனம் ஸுப⁴ஸஞ்ஞாய ஸுக²ஸஞ்ஞாய ச பஸ்ஸந்தோ ந தத்த² ச²ந்த³ராக³ம் ஜனேதி ந தம் அஸ்ஸாதே³தி நாபி⁴னந்த³தி, ஏவம் தி³ட்ட²ம் தண்ஹாமஞ்ஞனாய ந மஞ்ஞதி. ‘‘இதி மே ரூபம் ஸியா அனாக³தமத்³தா⁴ன’’ந்தி வா பனேத்த² நந்தி³ம் ந ஸமன்னானேதி. ரூபஸம்பத³ம் வா ஆகங்க²மானோ தா³னம் ந தே³தி, ஸீலம் ந ஸமாதி³யதி, உபோஸத²கம்மம் ந கரோதி. ஏவம்பி தி³ட்ட²ம் தண்ஹாமஞ்ஞனாய ந மஞ்ஞதி, அத்தனோ பன பரஸ்ஸ ச ரூபஸம்பத்திவிபத்திம் நிஸ்ஸாய மானம் ந ஜனேதி. ‘‘இமினாஹம் ஸேய்யோஸ்மீதி வா, ஸதி³ஸோஸ்மீதி வா, ஹீனோஸ்மீதி வா’’தி ஏவம் தி³ட்ட²ம் மானமஞ்ஞனாய ந மஞ்ஞதி. ரூபாயதனம் பன ‘‘நிச்சம் து⁴வம் ஸஸ்ஸத’’ந்தி ந மஞ்ஞதி. அத்தானம் ‘‘அத்தனிய’’ந்தி ந மஞ்ஞதி. மங்க³லம் ‘‘அமங்க³ல’’ந்தி ந மஞ்ஞதி. ஏவம் தி³ட்ட²ம் தி³ட்டி²மஞ்ஞனாய ந மஞ்ஞதி. தி³ட்ட²ஸ்மிம் ந மஞ்ஞதீதி ரூபஸ்மிம் அத்தானம் ஸமனுபஸ்ஸனனயேன அமஞ்ஞந்தோ தி³ட்ட²ஸ்மிம் ந மஞ்ஞதி. யதா² வா த²னே த²ஞ்ஞம், ஏவம் ரூபஸ்மிம் ராகா³த³யோதி அமஞ்ஞந்தோபி தி³ட்ட²ஸ்மிம் ந மஞ்ஞதி. தஸ்மிம்யேவ பனஸ்ஸ தி³ட்டி²மஞ்ஞனாய அமஞ்ஞிதே வத்து²ஸ்மிம் ஸினேஹம் மானஞ்ச ந உப்பாத³யதோ தண்ஹாமானமஞ்ஞனாபி நத்தீ²தி வேதி³தப்³பா³. ஏவம் தி³ட்ட²ஸ்மிம் ந மஞ்ஞதி. தி³ட்ட²தோ ந மஞ்ஞதீதி ஏத்த² பன தி³ட்ட²தோதி நிஸ்ஸக்கவசனம். தஸ்மா ஸஉபகாரணஸ்ஸ அத்தனோ வா பரஸ்ஸ வா யதா²வுத்தப்பபே⁴த³தோ தி³ட்ட²தோ உபபத்தி வா நிக்³க³மனம் வா தி³ட்ட²தோ வா அஞ்ஞோ அத்தாதி அமஞ்ஞமானோ தி³ட்ட²தோ ந மஞ்ஞதீதி வேதி³தப்³போ³. அயமஸ்ஸ ந தி³ட்டி²மஞ்ஞனா. தஸ்மிம்யேவ பனஸ்ஸ தி³ட்டி²மஞ்ஞனாய அமஞ்ஞிதே வத்து²ஸ்மிம் ஸினேஹம் மானஞ்ச ந உப்பாத³யதோ ந தண்ஹாமானமஞ்ஞனாபி வேதி³தப்³பா³.

தி³ட்டா² மேதி ந மஞ்ஞதீதி ஏத்த² பன ‘‘ஏதம் மமா’’தி தண்ஹாவஸேன அமமாயமானோ தி³ட்ட²ம் தண்ஹாமஞ்ஞனாய ந மஞ்ஞதி. ஸுதந்தி மம்ஸஸோதேனபி ஸுதம், தி³ப்³ப³ஸோதேனபி ஸுதம், ஸத்³தா³யதனஸ்ஸேதம் அதி⁴வசனம். முதந்தி முத்வா முனித்வா ச க³ஹிதம் ஆஹச்ச உபக³ந்த்வாதி அத்தோ². இந்த்³ரியானம் ஆரம்மணானஞ்ச அஞ்ஞமஞ்ஞம் ஸம்கிலேஸே விஞ்ஞாதந்தி வுத்தம் ஹோதி. க³ந்த⁴ரஸபோ²ட்ட²ப்³பா³யதனானம் ஏதம் அதி⁴வசனம். விஞ்ஞாதந்தி மனஸா விஞ்ஞாதம், ஸேஸானம் ஸத்தானம் ஆயதனானமேதம் அதி⁴வசனம், த⁴ம்மாரம்மணஸ்ஸ வா, இத⁴ பன ஸக்காயபரியாபன்னமேவ லப்³ப⁴தி. வித்தா²ரோ பனேத்த² தி³ட்ட²வாரே வுத்தனயேன வேதி³தப்³போ³.

இதா³னி ப⁴க³வதா வுத்தஸுத்தவஸேன த³ஸ்ஸேந்தோ ‘‘அஸ்மீதி பி⁴க்க²வே’’திஆதி³மாஹ. தத்த² அஸ்மீதி ப⁴வாமி, நிச்சஸ்ஸேதம் அதி⁴வசனம். மஞ்ஞிதமேதந்தி தி³ட்டி²கப்பனம் ஏதம். அயமஹமஸ்மீதி அயம் அஹம் அஸ்மி ப⁴வாமி.

அஞ்ஞத்ர ஸதிபட்டா²னேஹீதி ட²பேத்வா சதுஸதிபட்டா²னே.

ஸப்³பே³ பா³லபுது²ஜ்ஜனா ரஜ்ஜந்தீதி ஸகலா அந்த⁴பா³லா நானாஜனா லக்³க³ந்தி. ஸத்த ஸேக்கா² விரஜ்ஜந்தீதி ஸோதாபன்னாத³யோ ஸத்த அரியஜனா விராக³ம் ஆபஜ்ஜந்தி. அரஹா நேவ ரஜ்ஜதி நோ விரஜ்ஜதீதி கிலேஸானம் பரினிப்³பா³பிதத்தா உப⁴யம்பி ந கரோதி. க²யா ராக³ஸ்ஸாதிஆத³யோ திவிதா⁴பி நிப்³பா³னமேவ.

ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய

ஜராஸுத்தனித்³தே³ஸவண்ணனா நிட்டி²தா.