5. பரமட்ட²கஸுத்தனித்³தே³ஸவண்ணனா

31. பஞ்சமே பரமட்ட²கஸுத்தே பரமந்தி தி³ட்டீ²ஸு பரிப்³ப³ஸானோதி இத³ம் பரமந்தி க³ஹேத்வா ஸகாய ஸகாய தி³ட்டி²யா வஸமானோ. யது³த்தரிம் குருதேதி யம் அத்தனோ ஸத்தா²ராதி³ம் ஸேட்ட²ம் கரோதி. ஹீனாதி அஞ்ஞே ததோ ஸப்³ப³மாஹாதி தம் அத்தனோ ஸத்தா²ராதி³ம் ட²பேத்வா ததோ அஞ்ஞே ஸப்³பே³ ‘‘ஹீனா இமே’’தி ஆஹ. தஸ்மா விவாதா³னி அவீதிவத்தோதி தேன காரணேன ஸோ தி³ட்டி²கலஹே அவீதிவத்தோவ ஹோதி.

வஸந்தீதி பட²முப்பன்னதி³ட்டி²வஸேன வஸந்தி. பவஸந்தீதி பவிஸித்வா வஸந்தி. ஆவஸந்தீதி விஸேஸேன வஸந்தி. பரிவஸந்தீதி ஸப்³ப³பா⁴கே³ன வஸந்தி. தம் உபமாய ஸாதே⁴ந்தோ ‘‘யதா² ஆகா³ரிகா வா’’திஆதி³மாஹ. ஆகா³ரிகா வாதி க⁴ரஸாமிகா. க⁴ரேஸு வஸந்தீதி அத்தனோ க⁴ரேஸு ஆஸங்கவிரஹிதா ஹுத்வா நிவஸந்தி. ஸாபத்திகா வாதி ஆபத்திப³ஹுலா. ஸகிலேஸா வாதி ராகா³தி³கிலேஸப³ஹுலா. உத்தரிம் கரோதீதி அதிரேகம் கரோதி. அயம் ஸத்தா² ஸப்³ப³ஞ்ஞூதி ‘அயம் அம்ஹாகம் ஸத்தா² ஸப்³ப³ம் ஜானாதி’.

ஸப்³பே³ பரப்பவாதே³ கி²பதீதி ஸப்³பா³ பரலத்³தி⁴யோ ச²ட்³டே³தி. உக்கி²பதீதி நீஹரதி. பரிக்கி²பதீதி பரம்முகே² கரோதி. தி³ட்டி²மேத⁴கா³னீதி தி³ட்டி²விஹேஸகானி.

32. து³தியகா³தா²யத்தோ² – ஏவம் அவீதிவத்தோ ச யம் தி³ட்டே² ஸுதே ஸீலவதே முதேதி ஏதேஸு சதூஸு வத்தூ²ஸு உப்பன்னதி³ட்டி²ஸங்கா²தே அத்தனி புப்³பே³ வுத்தப்பகாரம் ஆனிஸம்ஸம் பஸ்ஸதி, ததே³வ ஸோ தத்த² ஸகாய தி³ட்டி²யா ஆனிஸம்ஸம் ‘‘இத³ம் ஸேட்ட²’’ந்தி அபி⁴னிவிஸித்வா அஞ்ஞம் ஸப்³ப³ம் பரஸத்தா²ராதி³கம் நிஹீனதோ பஸ்ஸதி.

த்³வே ஆனிஸம்ஸே பஸ்ஸதீதி த்³வே கு³ணே ஓலோகேதி. தி³ட்ட²த⁴ம்மிகஞ்சாதி தி³ட்டே² பச்சக்கே² அத்தபா⁴வே விபச்சனகரணம். ஸம்பராயிகஞ்சாதி பரலோகே படிலபி⁴தப்³ப³கு³ணஞ்ச. யம்தி³ட்டி²கோ ஸத்தா²தி யம்லத்³தி⁴கோ தித்தா²யதனஸாமிகோ. அலம் நாக³த்தாய வாதி நாக³ராஜபா⁴வாய வா பரியத்தம். ஸுபண்ணத்தாதீ³ஸுபி ஏஸேவ நயோ. தே³வத்தாய வாதி ஸம்முதிதே³வாதி³பா⁴வாய. ஆயதிம் ப²லபாடிகங்கீ² ஹோதீதி அனாக³தே விபாகப²லம் பத்த²யானோ ஹோதி. தி³ட்ட²ஸுத்³தி⁴யாபி த்³வே ஆனிஸம்ஸே பஸ்ஸதீதி சக்கு²விஞ்ஞாணேன தி³ட்ட²ரூபாயதனஸ்ஸ வஸேன ஸுத்³தி⁴யா ஹேதுத்தாபி அத்தனோ க³ஹிதக³ஹணேன த்³வே கு³ணே ஓலோகேதி. ஸுதஸுத்³தி⁴யாதீ³ஸுபி ஏஸேவ நயோ.

33. ததியகா³தா²யத்தோ² – ஏவம் பஸ்ஸதோ ச யம் அத்தனோ ஸத்தா²ராதி³ம் நிஸ்ஸிதோ அஞ்ஞம் பரஸத்தா²ராதி³ம் ஹீனம் பஸ்ஸதி, தம் பன த³ஸ்ஸனம் க³ந்த²மேவ குஸலா வத³ந்தி, ப³ந்த⁴னந்தி வுத்தம் ஹோதி. யஸ்மா ஏததே³வ, தஸ்மா ஹி தி³ட்ட²ம் வ ஸுதம் முதம் வா, ஸீலப்³ப³தம் பி⁴க்கு² ந நிஸ்ஸயேய்ய, நாபி⁴னிவேஸேய்யாதி வுத்தம் ஹோதி.

குஸலாதி க²ந்தா⁴தி³ஜானனே சே²கா. க²ந்த⁴குஸலாதி ரூபாதீ³ஸு பஞ்சஸு க²ந்தே⁴ஸு குஸலா. தா⁴துஆயதனபடிச்சஸமுப்பாத³ஸதிபட்டா²னஸம்மப்பதா⁴னஇத்³தி⁴பாத³இந்த்³ரியப³லபோ³ஜ்ஜ²ங்க³மக்³க³ப²லனிப்³பா³னேஸுபி ஏஸேவ நயோ. தத்த² மக்³க³குஸலாதி சதூஸு மக்³கே³ஸு. ப²லகுஸலாதி சதூஸு ப²லேஸு. நிப்³பா³னகுஸலாதி து³விதே⁴ நிப்³பா³னே சே²கா. தே குஸலாதி தே ஏதேஸு வுத்தப்பகாரேஸு சே²கா. ஏவம் வத³ந்தீதி ஏவம் கதே²ந்தி. க³ந்தோ² ஏஸோதி பஸ்ஸதோ ச அத்தனோ ஸத்தா²ராதி³னிஸ்ஸிதஞ்ச அஞ்ஞம் பரஸத்தா²ராதி³ம் ஹீனதோ த³ஸ்ஸனஞ்ச க³ந்தோ² ப³ந்த⁴னோ ஏஸோதி வத³ந்தி. லக்³க³னம் ஏதந்தி ஏதம் வுத்தப்பகாரம் நாக³த³ந்தே லக்³கி³தம் விய அதோ⁴லம்ப³னம். ப³ந்த⁴னம் ஏதந்தி நிச்சி²ந்தி³தும் து³க்க²ட்டே²ன ஸங்க²லிகாதி³ப³ந்த⁴னம் விய ஏதம் ப³ந்த⁴னம். பலிபோ³தோ⁴ ஏஸோதி ஸம்ஸாரதோ நிக்க²மிதும் அப்பதா³னட்டே²ன ஏஸோ பலிபோ³தோ⁴.

34. சதுத்த²கா³தா²யத்தோ² – ந கேவலம் தி³ட்ட²ஸுதாதீ³ஸு ந நிஸ்ஸயேய்ய, அபிச கோ² பன அஸஞ்ஜாதம் உபரூபரி தி³ட்டி²ம்பி லோகஸ்மிம் ந கப்பயேய்ய, ந ஜனேய்யாதி வுத்தம் ஹோதி. கீதி³ஸம்? ஞாணேன வா ஸீலவதேன வாபி, ஸமாபத்திஞாணாதி³ஞாணேன வா ஸீலவதேன வா யா கப்பியதி, ஏதம் தி³ட்டி²ம் ந கப்பேய்ய. ந கேவலஞ்ச தி³ட்டி²ம் ந கப்பயேய்ய, அபிச கோ² பன மானேனபி ஜாதிஆதீ³ஹி வத்தூ²ஹி ஸமோதி அத்தானமனூபனேய்ய, ஹீனோ ந மஞ்ஞேத² விஸேஸி வாபீதி.

அட்ட²ஸமாபத்திஞாணேன வாதி பட²மஜ்ஜா²னாதீ³னம் அட்ட²ன்னம் ஸமாபத்தீனம் ஸம்பயுத்தபஞ்ஞாய வா. பஞ்சாபி⁴ஞ்ஞாஞாணேன வாதி லோகியானம் பஞ்சன்னம் அபி⁴ஞ்ஞானம் ஸம்பயுத்தபஞ்ஞாய வா. மிச்சா²ஞாணேன வாதி விபரீதஸபா⁴வேன பவத்தாய பஞ்ஞாய அமுத்தே முத்தம் பஸ்ஸாதி ஏவம் உப்பன்னேன மிச்சா²ஞாணேன வா.

35. பஞ்சமகா³தா²யத்தோ² – ஏவஞ்ஹி தி³ட்டி²ம் அகப்பேந்தோ அமஞ்ஞமானோ ச அத்தம் பஹாய அனுபாதி³யானோ யம் புப்³பே³ க³ஹிதம், தம் பஹாய பரம் அக்³க³ண்ஹந்தோ தஸ்மிம்பி வுத்தப்பகாரே ஞாணே து³வித⁴ம் நிஸ்ஸயம் நோ கரோதி, அகரோந்தோ ச ஸ வே வியத்தேஸு நானாதி³ட்டி²வஸேன பி⁴ன்னேஸு ஸத்தேஸு ந வக்³க³ஸாரீ ச²ந்தா³தி³வஸேன அக³ச்ச²னத⁴ம்மோ ஹுத்வா த்³வாஸட்டி²யா தி³ட்டீ²ஸு கிஞ்சி தி³ட்டி²ம் ந பச்சேதி, ந பச்சாக³ச்ச²தீதி வுத்தம் ஹோதி.

சதூஹி உபாதா³னேஹீதி காமுபாதா³னாதீ³ஹி சதூஹி பு⁴ஸம் க³ஹணேஹி ஸ வே வியத்தேஸூதி ஸோ புக்³க³லோ நிச்சி²தேஸு. பி⁴ன்னேஸூதி த்³விதா⁴ பி⁴ன்னேஸு.

36. இதா³னி யோ ஸோ இமாய கா³தா²ய வுத்தோ கீ²ணாஸவோ, தஸ்ஸ வண்ணப⁴ணனத்த²ம் ‘‘யஸ்ஸூப⁴யந்தே’’திஆதி³கா திஸ்ஸோ கா³தா²யோ ஆஹ. தத்த² பட²மகா³தா²ய யஸ்ஸூப⁴யந்தேதி புப்³பே³ வுத்தே ப²ஸ்ஸாதி³பே⁴தே³. பணிதீ⁴தி தண்ஹா. ப⁴வாப⁴வாயாதி புனப்புனப⁴வாய. இத⁴ வா ஹுரம் வாதி ஸகத்தபா⁴வாதி³பே⁴தே³ இத⁴ வா பரத்தபா⁴வாதி³பே⁴தே³ பரத்த² வா.

ப²ஸ்ஸோ ஏகோ அந்தோதி சக்கு²ஸம்ப²ஸ்ஸாதி³கோ ஏகோ கோட்டா²ஸோ. ப²ஸ்ஸஸமுத³யோதி வத்தா²ரம்மணோ. யதோ ஸமுதே³தி உப்பஜ்ஜதி, ஸோ ஸமுத³யோ. து³தியோ அந்தோதி து³தியோ கோட்டா²ஸோ. அதீதந்தி அதி இதம் அதீதம், அதிக்கந்தந்தி வுத்தம் ஹோதி. அனாக³தந்தி ந ஆக³தம், அனுப்பன்னந்தி வுத்தம் ஹோதி. ஸுகா² வேத³னாத³யோ விஸபா⁴க³வஸேன. நாமரூபது³கம் நமனருப்பனவஸேன. அஜ்ஜ²த்திகாத³யோ அஜ்ஜ²த்தபா³ஹிரவஸேன. ஸக்காயாத³யோ க²ந்த⁴பஞ்சகானம் பவத்திஸமுத³யவஸேன வுத்தாதி வேதி³தப்³பா³.

ஸகத்தபா⁴வோதி அத்தனோ அத்தபா⁴வோ. பரத்தபா⁴வோதி பரஸ்ஸ அத்தபா⁴வோ.

37. து³தியகா³தா²ய தி³ட்டே² வாதி தி³ட்ட²ஸுத்³தி⁴யா வா. ஏஸ நயோ ஸுதாதீ³ஸு. ஸஞ்ஞாதி ஸஞ்ஞாஸமுட்டா²பிகா தி³ட்டி².

அபராமஸந்தந்தி தண்ஹாமானதி³ட்டீ²ஹி ந பராமஸந்தம். அனபி⁴னிவேஸந்தந்தி தேஹேவ அனபி⁴னிவிஸந்தம்.

‘‘வினிப³த்³தோ⁴’’தி வாதி மானேன வினிப³த்³தோ⁴தி வா. ‘‘பராமட்டோ²’’தி வாதி பரதோ நிச்சஸுக²ஸுபா⁴தீ³ஹி பராமட்டோ²தி வா. விக்கே²பக³தோதி உத்³த⁴ச்சவஸேன. அனிட்ட²ங்க³தோதி விசிகிச்சா²வஸேன. தா²மக³தோதி அனுஸயவஸேன. க³தியாதி க³ந்தப்³ப³வஸேன.

38. ததியகா³தா²ய த⁴ம்மாபி தேஸம் ந படிச்சி²தாஸேதி த்³வாஸட்டி²தி³ட்டி²க³தத⁴ம்மாபி தேஸம் ‘‘இத³மேவ ஸச்சம், மோக⁴மஞ்ஞ’’ந்தி (உதா³. 54) ஏவம் ந படிச்சி²தா. பாரங்க³தோ ந பச்சேதி தாதீ³தி நிப்³பா³னபாரம் க³தோ தேன தேன மக்³கே³ன பஹீனே கிலேஸே புன நாக³ச்ச²தி பஞ்சஹி ச ஆகாரேஹி தாதீ³ ஹோதீதி. ஸேஸம் பாகடமேவ.

வீஸதிவத்து²கா ஸக்காயதி³ட்டீ²தி ‘‘ரூபம் அத்ததோ ஸமனுபஸ்ஸதீ’’திஆதி³னா (படி. ம. 1.132) நயேன ஏகேகஸ்மிம் க²ந்தே⁴ சதூஹி சதூஹி ஆகாரேஹி பஞ்சக்க²ந்தே⁴ பதிட்ட²ம் கத்வா பவத்தா விஜ்ஜமானே காயே தி³ட்டி². த³ஸவத்து²கா மிச்சா²தி³ட்டீ²தி ‘‘நத்தி² தி³ன்ன’’ந்திஆதி³னயப்பவத்தா (த⁴. ஸ. 1221) தி³ட்டி². அந்தக்³கா³ஹிகாதி³ட்டீ²தி ‘‘ஸஸ்ஸதோ லோகோ இத³மேவ ஸச்சம், மோக⁴மஞ்ஞ’’ந்திஆதி³னயப்பவத்தா (ம. நி. 3.27) ஏகேகம் அந்தம் அத்தீ²தி க³ஹேத்வா பவத்தா தி³ட்டி². யா ஏவரூபா தி³ட்டீ²தி இதா³னி வுச்சமானானம் ஏகூனவீஸபதா³னம் ஸாதா⁴ரணம் மூலபத³ம். யா தி³ட்டி², ததே³வ தி³ட்டி²க³தம்; யா தி³ட்டி², ததே³வ தி³ட்டி²க³ஹனந்தி ஸப்³பே³ஸம் ஸம்ப³ந்தோ⁴ காதப்³போ³. யா அயாதா²வத³ஸ்ஸனட்டே²ன தி³ட்டி², ததே³வ தி³ட்டீ²ஸு க³தம் த³ஸ்ஸனம் த்³வாஸட்டி²தி³ட்டி²யா அந்தோக³தத்தாதி தி³ட்டி²க³தம். ஹேட்டா²பிஸ்ஸ அத்தோ² வுத்தோயேவ.

த்³வின்னம் அந்தானம் ஏகந்தக³தத்தாதிபி தி³ட்டி²க³தம். தத்த² ஸஸ்ஸதோதி நிச்சோ. லோகோதி அத்தா. ‘‘இத⁴ ஸரீரம்யேவ நஸ்ஸதி, அத்தா பன இத⁴ பரத்த² ச ஸோயேவா’’தி மஞ்ஞந்தி. ஸோ ஹி ஸாமஞ்ஞேவ ஆலோகேதீதி கத்வா லோகோதி மஞ்ஞதி. அஸஸ்ஸதோதி அனிச்சோ. அத்தா ஸரீரேனேவ ஸஹ நஸ்ஸதீதி மஞ்ஞந்தி. அந்தவாதி பரித்தே கஸிணே ஜா²னம் உப்பாதே³த்வா தம் பரித்தகஸிணாரம்மணம் சேதனம் ‘‘ஸபரியந்தோ அத்தா’’தி மஞ்ஞந்தி. அனந்த வாதி ந அந்தவா அப்பமாணே கஸிணே ஜா²னம் உப்பாதே³த்வா தம் அப்பமாணகஸிணாரம்மணம் சேதனம் ‘‘அபரியந்தோ அத்தா’’தி மஞ்ஞந்தி. தம் ஜீவம் தம் ஸரீரந்தி ஜீவோ ச ஸரீரஞ்ச தம்யேவ. ஜீவோதி அத்தா, லிங்க³விபல்லாஸேன நபும்ஸகவசனம் கதம். ஸரீரந்தி ராஸட்டே²ன க²ந்த⁴பஞ்சகம். அஞ்ஞம் ஜீவம் அஞ்ஞம் ஸரீரந்தி அஞ்ஞோ ஜீவோ அஞ்ஞம் க²ந்த⁴பஞ்சகம். ஹோதி ததா²க³தோ பரம் மரணாதி க²ந்தா⁴ இதே⁴வ வினஸ்ஸந்தி, ஸத்தோ மரணதோ பரம் ஹோதி விஜ்ஜதி ந நஸ்ஸதி, ததா²க³தோதி சேதம் ஸத்தாதி⁴வசனந்தி. கேசி பன ‘‘ததா²க³தோதி அரஹா’’தி வத³ந்தி. இமே ந ஹோதீதி பக்கே² தோ³ஸம் தி³ஸ்வா ஏவம் க³ண்ஹந்தி. ந ஹோதி ததா²க³தோ பரம் மரணாதி க²ந்தா⁴பி இதே⁴வ நஸ்ஸந்தி, ததா²க³தோ ச மரணதோ பரம் ந ஹோதி உச்சி²ஜ்ஜதி. இமே ஹோதீதி பக்கே² தோ³ஸம் தி³ஸ்வா ஏவம் க³ண்ஹந்தி. ஹோதி ச ந ச ஹோதீதி இமே ஏகேகபக்க²பரிக்³க³ஹே தோ³ஸம் தி³ஸ்வா உப⁴யபக்க²ம் க³ண்ஹந்தி. நேவ ஹோதி ந ந ஹோதீதி இமே உப⁴யபக்க²பரிக்³க³ஹே உப⁴யதோ³ஸாபத்திம் தி³ஸ்வா ‘‘ஹோதி ச ந ஹோதீ’’தி ச ‘‘நேவ ஹோதி ந ந ஹோதீ’’தி ச அமராவிக்கே²பபக்க²ம் க³ண்ஹந்தி.

அயம் பனேத்த² அட்ட²கதா²னயோ (படி. ம. அட்ட². 2.1.113) – ‘‘ஸஸ்ஸதோ லோகோ’’தி வாதிஆதீ³ஹி த³ஸஹாகாரேஹி தி³ட்டி²பபே⁴தோ³வ வுத்தோ. தத்த² ஸஸ்ஸதோலோகோதி ச க²ந்த⁴பஞ்சகம் லோகோதி க³ஹேத்வா ‘‘அயம் லோகோ நிச்சோ து⁴வோ ஸப்³ப³காலிகோ’’தி க³ண்ஹந்தஸ்ஸ ஸஸ்ஸதந்தி க³ஹணாகாரப்பவத்தா தி³ட்டி². அஸஸ்ஸதோதி தமேவ லோகம் ‘‘உச்சி²ஜ்ஜதி வினஸ்ஸதீ’’தி க³ண்ஹந்தஸ்ஸ உச்சே²த³க்³க³ஹணாகாரப்பவத்தா தி³ட்டி². அந்தவாதி பரித்தகஸிணலாபி⁴னோ ஸுப்பமத்தே வா ஸராவமத்தே வா கஸிணே ஸமாபன்னஸ்ஸ அந்தோஸமாபத்தியம் பவத்திதரூபாரூபத⁴ம்மே ‘‘லோகோ’’தி ச கஸிணபரிச்சே²த³ந்தேன ‘‘அந்தவா’’தி ச க³ண்ஹந்தஸ்ஸ ‘‘அந்தவா லோகோ’’தி க³ஹணாகாரப்பவத்தா தி³ட்டி². ஸா ஸஸ்ஸததி³ட்டி²பி ஹோதி உச்சே²த³தி³ட்டி²பி. விபுலகஸிணலாபி⁴னோ பன தஸ்மிம் கஸிணே ஸமாபன்னஸ்ஸ அந்தோஸமாபத்தியம் பவத்திதரூபாரூபத⁴ம்மே ‘‘லோகோ’’தி ச கஸிணபரிச்சே²த³ந்தேன ச ‘‘அனந்தோ’’தி க³ண்ஹந்தஸ்ஸ ‘‘அனந்தவா லோகோ’’தி க³ஹணாகாரப்பவத்தா தி³ட்டி². ஸா ஸஸ்ஸததி³ட்டி² ஹோதி, உச்சே²த³தி³ட்டி²பி. தம் ஜீவம் தம் ஸரீரந்தி பே⁴த³னத⁴ம்மஸ்ஸ ஸரீரஸ்ஸேவ ‘‘ஜீவ’’ந்தி க³ஹிதத்தா ‘‘ஸரீரே உச்சி²ஜ்ஜமானே ஜீவம்பி உச்சி²ஜ்ஜதீ’’தி உச்சே²த³க்³க³ஹணாகாரப்பவத்தா தி³ட்டி². து³தியபதே³ன ஸரீரதோ அஞ்ஞஸ்ஸ ஜீவஸ்ஸ க³ஹிதத்தா ‘‘ஸரீரே ச உச்சி²ஜ்ஜமானேபி ஜீவம் ந உச்சி²ஜ்ஜதீ’’தி ஸஸ்ஸதக³ஹணாகாரப்பவத்தா தி³ட்டி². ஹோதி ததா²க³தோதிஆதீ³ஸு ‘‘ஸத்தோ ததா²க³தோ நாம, ஸோ பரம் மரணா ஹோதீ’’தி க³ண்ஹதோ பட²மா ஸஸ்ஸததி³ட்டி². ‘‘ந ஹோதீ’’தி க³ண்ஹதோ து³தியா உச்சே²த³தி³ட்டி². ‘‘ஹோதி ச ந ச ஹோதீ’’தி க³ண்ஹதோ ததியா ஏகச்சஸஸ்ஸததி³ட்டி². ‘‘நேவ ஹோதி ந ந ஹோதீ’’தி க³ண்ஹதோ சதுத்தா² அமராவிக்கே²பதி³ட்டீ²தி வுத்தப்பகாரா த³ஸவிதா⁴ தி³ட்டி². யதா²யோக³ம் ப⁴வதி³ட்டி² ச விப⁴வதி³ட்டி² சாதி த்³விதா⁴ ஹோதி. தாஸு ஏகாபி தேஸம் கீ²ணாஸவானம் ந படிச்சி²தாதி அத்தோ².

யே கிலேஸாதி யே கிலேஸா ஸோதாபத்திமக்³கே³ன பஹீனா, தே கிலேஸே. ந புனேதீதி ந புன ஏதி. ந பச்சேதீதி புன நிப்³ப³த்தேத்வா ந படிஏதி, ந பச்சாக³ச்ச²தீதி பச்சப⁴வே நாக³ச்ச²தி. பஞ்சஹாகாரேஹி தாதீ³தி பஞ்சஹி காரணேஹி கோட்டா²ஸேஹி வா ஸதி³ஸோ. இட்டா²னிட்டே² தாதீ³தி இட்டா²ரம்மணே ச அனிட்டா²ரம்மணே ச அனுனயபடிக⁴ம் முஞ்சித்வா டி²தத்தா த்³வீஸு ஸதி³ஸோ. சத்தாவீதி கிலேஸே சஜிதவா. திண்ணாவீதி ஸம்ஸாரம் அதிக்கமிதவா. முத்தாவீதி ராகா³தி³தோ முத்தவா. தம்னித்³தே³ஸா தாதீ³தி தேன தேன ஸீலஸத்³தா⁴தி³னா நித்³தி³ஸித்வா நித்³தி³ஸித்வா கதே²தப்³ப³தோ ஸதி³ஸோ.

தம் பஞ்சவித⁴ம் வித்தா²ரேத்வா கதே²துகாமோ ‘‘கத²ம் அரஹா இட்டா²னிட்டே² தாதீ³’’திஆதி³மாஹ. தத்த² லாபே⁴பீதி சதுன்னம் பச்சயானம் லாபே⁴பி. அலாபே⁴பீதி தேஸம் அலாபே⁴பி. யஸேபீதி பரிவாரேபி. அயஸேபீதி பரிவாரவிபத்தியாபி. பஸம்ஸாயபீதி வண்ணப⁴ணனாயபி. நிந்தா³யபீதி க³ரஹாயபி. ஸுகே²பீதி காயிகஸுகே²பி. து³க்கே²பீதி காயிகது³க்கே²பி. ஏகஞ்சே பா³ஹம் க³ந்தே⁴ன லிம்பேய்யுந்தி ஸசே ஏகம் பா³ஹம் சதுஜாதியக³ந்தே⁴ன லேபம் உபரூபரி த³தே³ய்யும். வாஸியா தச்சே²ய்யுந்தி யதி³ ஏகம் பா³ஹம் வட்³ட⁴கீ வாஸியா தச்சே²த்வா தச்சே²த்வா தனும் கரேய்யும். அமுஸ்மிம் நத்தி² ராகோ³தி அமுஸ்மிம் க³ந்த⁴லேபனே ஸினேஹோ நத்தி² ந ஸம்விஜ்ஜதி. அமுஸ்மிம் நத்தி² படிக⁴ந்தி அமுஸ்மிம் வாஸியா தச்ச²னே படிஹனனஸங்கா²தம் படிக⁴ம் கோபம் நத்தி² ந ஸம்விஜ்ஜதி. அனுனயபடிக⁴விப்பஹீனோதி ஸினேஹஞ்ச கோபஞ்ச பஜஹித்வா டி²தோ. உக்³கா⁴தினிகா⁴திவீதிவத்தோதி அனுனயவஸேன அனுக்³க³ஹஞ்ச படிக⁴வஸேன நிக்³க³ஹஞ்ச அதிக்கமித்வா டி²தோ. அனுரோத⁴விரோத⁴ஸமதிக்கந்தோதி அனுனயஞ்ச படிக⁴ஞ்ச ஸம்மா அதிக்கந்தோ.

ஸீலே ஸதீதி ஸீலே ஸம்விஜ்ஜமானே. ஸீலவாதி ஸீலஸம்பன்னோ. தேன நித்³தே³ஸம் கத²னம் லப⁴தீதி தாதீ³. ஸத்³தா⁴ய ஸதி ஸத்³தோ⁴தி ஏவமாதீ³ஸுபி ஏஸேவ நயோ.

ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய

பரமட்ட²கஸுத்தனித்³தே³ஸவண்ணனா நிட்டி²தா.