13. மஹாப்³யூஹஸுத்தனித்³தே³ஸவண்ணனா

130. தேரஸமே மஹாப்³யூஹஸுத்தனித்³தே³ஸே யே கேசிமே தி³ட்டி²பரிப்³ப³ஸானாதி இத³ம்பி ‘‘கிம் நு கோ² இமே தி³ட்டி²பரிப்³ப³ஸானா விஞ்ஞூனம் ஸந்திகா நிந்த³மேவ லப⁴ந்தி, உதா³ஹு பஸம்ஸம்பீ’’தி உப்பன்னசித்தானம் ஏகச்சானம் தே³வதானம் தமத்த²ம் ஆவிகாதும் புரிமனயேனேவ நிம்மிதபு³த்³தே⁴ன அத்தானம் புச்சா²பேத்வா வுத்தம். தத்த² அன்வானயந்தீதி அனு ஆனயந்தி புனப்புனம் ஆஹரந்தி.

நிந்த³மேவ அன்வேந்தீதி க³ரஹமேவ உபக³ச்ச²ந்தி.

131. இதா³னி யஸ்மா தே ‘‘இத³மேவ ஸச்ச’’ந்தி வத³ந்தாபி தி³ட்டி²க³திகவாதி³னோ கதா³சி கத்த²சி பஸம்ஸம்பி லப⁴ந்தி, யம் ஏதம் பஸம்ஸாஸங்கா²தம் வாத³ப²லம், தம் அப்பம், ராகா³தீ³னம் ஸமாய ஸமத்த²ம் ந ஹோதி, கோ பன வாதோ³ து³தியே நிந்தா³ப²லே, தஸ்மா ஏதமத்த²ம் த³ஸ்ஸேந்தோ இமம் தாவ விஸ்ஸஜ்ஜனகா³த²ம் ஆஹ ‘‘அப்பஞ்ஹி ஏதம் ந அலம் ஸமாய, து³வே விவாத³ஸ்ஸ ப²லானி ப்³ரூமீ’’தி. தத்த² து³வே விவாத³ஸ்ஸ ப²லானீதி நிந்தா³ ச பஸம்ஸா ச ஜயபராஜயாதீ³னி வா தம்ஸபா⁴கா³னி. ஏதம்பி தி³ஸ்வாதி ‘‘நிந்தா³ அனிட்டா² ஏவ, பஸம்ஸா நாலம் ஸமாயா’’தி ஏதம்பி விவாத³ப²லே ஆதீ³னவம் தி³ஸ்வா. கே²மாபி⁴பஸ்ஸம் அவிவாத³பூ⁴மிந்தி அவிவாத³பூ⁴மிம் நிப்³பா³னம் கே²மந்தி பஸ்ஸமானோ.

அப்பகந்தி மந்த³ம். பரித்தகந்தி தோ²கம். ஓமகந்தி ஹேட்டி²மகம். லாமகந்தி பாபகம். ஸமாயாதி ராகா³தீ³னம் ஸமனத்தா²ய. உபஸமாயாதி உபரூபரி ஸமனத்தா²ய. வூபஸமாயாதி ஸன்னிஸீதா³பனத்தா²ய. நிப்³பா³னாயாதி அமதமஹானிப்³பா³னத்தா²ய. படினிஸ்ஸக்³கா³யாதி மக்³கே³ன கிலேஸானம் நிஸ்ஸஜ்ஜனத்தா²ய. படிபஸ்ஸத்³தி⁴யாதி ப²லேன படிபஸ்ஸத்³தா⁴னம் அனுப்பஜ்ஜனத்தா²ய நாலம்.

132. ஏவஞ்ஹி அவிவாத³மானோ – யா காசிமாதி கா³தா². தத்த² ஸம்முதியோதி தி³ட்டி²யோ. புது²ஜ்ஜாதி புது²ஜ்ஜனஸம்ப⁴வா. ஸோ உபயம் கிமேய்யாதி ஸோ உபக³ந்தப்³ப³ட்டே²ன உபயம் ரூபாதீ³ஸு ஏகம்பி த⁴ம்மம் கிம் உபேய்ய, கேன வா காரணேன உபேய்ய. தி³ட்டே² ஸுதே க²ந்திமகுப்³ப³மானோதி தி³ட்ட²ஸுதஸுத்³தீ⁴ஸு பேமம் அகரோந்தோ.

புது²ஜ்ஜனேஹி ஜனிதாதி புது²ஜ்ஜனேஹி உப்பாதி³தா. ஸம்முதியோதி தி³ட்டி²யோ. புது² நானாஜனேஹி ஜனிதா வாதி அனேகவிதே⁴ஹி தி³ட்டி²க³திகேஹி உப்பாதி³தா வா. நேதீதி ந ஏதி. ந உபேதீதி ஸமீபம் ந ஏதி. ந உபக³ச்ச²தீதி நிவத்ததி. நாபி⁴னிவிஸதீதி பவிஸித்வா நப்பதிட்ட²தி.

133. இதோ பா³ஹிரா பன – ஸீலுத்தமாதி கா³தா² தஸ்ஸத்தோ² – ஸீலம்யேவ ‘‘உத்தம’’ந்தி மஞ்ஞமானா ஸீலுத்தமாதி ஏகே போ⁴ந்தோ ஸம்யமமத்தேன ஸுத்³தி⁴ம் வத³ந்தி, ஹத்தி²வதாதி³ஞ்ச வதம் ஸமாதா³ய உபட்டி²தாஸே. இதே⁴வ தி³ட்டி²யம் அஸ்ஸ ஸத்து²னோ ஸுத்³தி⁴ம் ப⁴வூபனீதா ப⁴வஜ்ஜோ²ஸிதா ஸமானா வத³ந்தி, அபி ச தே குஸலாவதா³னா ‘‘குஸலா மய’’ந்தி ஏவம்வாதா³.

134. ஏவம் ஸீலுத்தமேஸு ச தேஸு ததா² படிபன்னோ யோ கோசி – ஸசே சுதோதி கா³தா². தஸ்ஸத்தோ² – ஸசே ததோ ஸீலவததோ பரவிச்சி²ந்த³னேன வா அனபி⁴ஸம்பு⁴ணந்தோ வா சுதோ ஹோதி, ஸோ தம் ஸீலப்³ப³தகம்மம் புஞ்ஞாபி⁴ஸங்கா²ராதி³கம்மம் வா விராத⁴யித்வா வேத⁴தீ. ந கேவலஞ்ச வேத⁴தி, அபி ச கோ² தம் ஸீலப்³ப³தஸுத்³தி⁴ம் பஜப்பதீ ச விப்பலபதி ச பத்த²யதீ ச. கிமிவ? ஸத்தா²வ ஹீனோ பவஸம் க⁴ரம்ஹா, க⁴ரம்ஹா பவஸந்தோ ஸத்த²தோ ஹீனோ யதா² தம் க⁴ரம் வா ஸத்த²ம் வா பத்த²யதீதி.

பரவிச்சி²ந்த³னாய வாதி பரேன வாரியமானோ வா. அனபி⁴ஸம்பு⁴ணந்தோ வாதி தம் படிபத்திம் அஸம்பாதே³ந்தோ வா.

அஞ்ஞாய அபரத்³தோ⁴தி நிப்³பா³னேன பரிஹீனோ மக்³க³தோ வா. தம் வா ஸத்த²ம் அனுப³ந்த⁴தீதி தம் வா ஸத்த²ம் ஸப்³ப³த்த² பச்ச²தோ க³ச்ச²தி.

135. ஏவம் பன ஸீலுத்தமானம் பவேத⁴னகாரணம் அரியஸாவகோ ஸீலப்³ப³தம் வாபி பஹாய ஸப்³ப³ந்தி கா³தா². தத்த² ஸாவஜ்ஜானவஜ்ஜந்தி ஸப்³பா³குஸலம் லோகியகுஸலஞ்ச. ஏதம் ஸுத்³தி⁴ம் அஸுத்³தி⁴ந்தி அபத்த²யானோதி பஞ்சகாமகு³ணாதி³பே⁴த³ம் ஸுத்³தி⁴ம் அகுஸலாதி³பே⁴த³ம் அஸுத்³தி⁴ஞ்ச அபத்த²யமானோ. விரதோ சரேதி ஸுத்³தி⁴யா அஸுத்³தி⁴யா ச விரதோ சரேய்ய. ஸந்தி மனுக்³க³ஹாயாதி தி³ட்டி²ம் அக்³க³ஹேத்வா.

கண்ஹம் கண்ஹவிபாகந்தி அகுஸலகம்மம் அகுஸலவிபாகதா³யகம். ஸுக்கம் ஸுக்கவிபாகந்தி லோகியகுஸலம் அத்தனா ஸதி³ஸம் ஸுக்கவிபாகதா³யகம்.

நியாமாவக்கந்திந்தி மக்³க³பவிஸனம். ஸேக்கா²தி ஸத்த ஸேக்கா². அக்³க³த⁴ம்மந்தி உத்தமத⁴ம்மம், அரஹத்தப²லம்.

136. ஏவம் இதோ பா³ஹிரகே ஸீலுத்தமே ஸம்யமேன விஸுத்³தி⁴வாதே³ தேஸஞ்ச விபாகம் ஸீலப்³ப³தபஹாயினோ அரஹதோ ச படிபத்திம் த³ஸ்ஸேத்வா இதா³னி அஞ்ஞதா²பி ஸுத்³தி⁴வாதே³ பா³ஹிரகே த³ஸ்ஸேந்தோ ‘‘தமூபனிஸ்ஸாயா’’தி கா³த²மாஹ. தஸ்ஸத்தோ² – ஸந்தஞ்ஞேபி ஸமணப்³ராஹ்மணா, தே ஜிகு³ச்சி²தம் அமரந்தபம் வா தி³ட்ட²ஸுத்³தி⁴ஆதீ³ஸு வா அஞ்ஞதரஞ்ஞதரம் உபனிஸ்ஸாயஅகிரியதி³ட்டி²யா வா உத்³த⁴ம்ஸரா ஹுத்வா ப⁴வாப⁴வேஸு அவீததண்ஹா ஸுத்³தி⁴’மனுத்து²னந்தி வத³ந்தி கதே²ந்தீதி.

தபோஜிகு³ச்ச²வாதா³தி காயபீளனாதி³தபேன பாபஹிரீயனவாதா³. தபோஜிகு³ச்ச²ஸாராதி தேனேவ தபேன ஹிரீயனஸாரவந்தோ. உத்³த⁴ம்ஸராவாதா³தி ஸம்ஸாரேன ஸுத்³தி⁴ம் கத²யந்தா.

137. ஏவம் தேஸம் அவீததண்ஹானம் ஸுத்³தி⁴ம் அனுத்து²னந்தானம் யோபி ஸுத்³தி⁴ப்பத்தமேவ அத்தானம் மஞ்ஞேய்ய, தஸ்ஸாபி அவீததண்ஹத்தா ப⁴வாப⁴வேஸு தம் தம் வத்து²ம் பத்த²யமானஸ்ஸ ஹி ஜப்பிதானி புனப்புனம் ஹோந்தியேவாதி அதி⁴ப்பாயோ. தண்ஹா ஹி ஆஸேவிதா தண்ஹம் வட்³ட⁴யதேவ, ந கேவலஞ்ச ஜப்பிதானி, பவேதி⁴தம் வாபி பகப்பிதேஸு, தண்ஹாதி³ட்டீ²ஹி சஸ்ஸ பகப்பிதேஸு வத்தூ²ஸு பவேதி⁴தம்பி ஹோதீதி வுத்தம் ஹோதி. ப⁴வாப⁴வேஸு பன வீததண்ஹத்தா ஆயதிம் சுதூபபாதோ இத⁴ யஸ்ஸ நத்தி², ஸ கேன வேதே⁴ய்ய குஹிம் வ ஜப்பேதி அயமேதிஸ்ஸா கா³தா²ய ஸம்ப³ந்தோ⁴.

ஆக³மனந்தி புன ஆக³மனம். க³மனந்தி இதோ அஞ்ஞத்த² க³மனம். க³மனாக³மனந்தி இதோ க³ந்த்வா புன நிவத்தனம். காலந்தி மரணம். க³தீதி க³மனவஸேன க³தியா க³ந்தப்³ப³ம்.

138. யமாஹு த⁴ம்மந்தி புச்சா²கா³தா².

139. இதா³னி யஸ்மா ஏகோபி ஏத்த² வாதோ³ ஸச்சோ நத்தி², கேவலம் தி³ட்டி²மத்தகேன ஹி தே வத³ந்தி, தஸ்மா தமத்த²ம் த³ஸ்ஸேந்தோ ‘‘ஸகம் ஹீ’’தி இமம் தாவ விஸ்ஸஜ்ஜனகா³த²மாஹ. தத்த² ஸம்முதிந்தி தி³ட்டி²ம். அனோமந்தி அனூனம்.

140. ஏவமேதேஸு ஸகம் த⁴ம்மம் பரிபுண்ணம் ப்³ரூவந்தேஸு அஞ்ஞஸ்ஸ த⁴ம்மம் பன ஹீனந்தி வத³ந்தேஸு யஸ்ஸ கஸ்ஸசி – பரஸ்ஸ சே வம்ப⁴யிதேன ஹீனோதி கா³தா². தஸ்ஸத்தோ² – யதி³ பரஸ்ஸ நிந்தி³தகாரணா ஹீனோ ப⁴வேய்ய, ந கோசி த⁴ம்மேஸு விஸேஸி அக்³கோ³ ப⁴வேய்ய. கிம்காரணா? புதூ² ஹி அஞ்ஞஸ்ஸ வத³ந்தி த⁴ம்மம் நிஹீனதோ ஸப்³பே³வ தே ஸம்ஹி த³ள்ஹம் வதா³னாஸகத⁴ம்மே த³ள்ஹவாதா³ ஏவ.

வம்ப⁴யிதகாரணாதி த⁴ம்ஸிதகாரணா. க³ரஹிதகாரணாதி லாமககதகாரணா. உபவதி³தகாரணாதி அக்கோஸிதகாரணா. ஸகாயனந்தி ஸகமக்³க³ம்.

141. கிஞ்ச பி⁴ய்யோ – ஸத்³த⁴ம்மபூஜாதி கா³தா². தஸ்ஸத்தோ² – தே ச தித்தி²யா யதா² பஸம்ஸந்தி ஸகாயனானி, ஸத்³த⁴ம்மபூஜாபி நேஸம் ததே²வ வத்ததி. தே ஹி அதிவிய ஸத்தா²ராதீ³னி ஸத்தரோந்தி. தத்த² யதி³ தே பமாணா ஸியும், ஏவம் ஸந்தே ஸப்³பே³வ வாதா³ ததி²யா ப⁴வேய்யும். கிம்காரணா? ஸுத்³தீ⁴ ஹி நேஸம் பச்சத்தமேவ. ந ஸா அஞ்ஞத்த² ஸிஜ்ஜ²தி, நாபி பரமத்த²தோ. அத்தனி தி³ட்டி²கா³ஹமத்தமேவ ஹி தம் தேஸம் பரபச்சயனேய்யபு³த்³தீ⁴னம். பச்சத்தமேவாதி பாடேக்கமேவ.

142. யோ பன விபரீததோ பா³ஹிதபாபத்தா ப்³ராஹ்மணோ, தஸ்ஸ ந ப்³ராஹ்மணஸ்ஸ பரனேய்யமத்தீ²தி கா³தா². தஸ்ஸத்தோ² – ப்³ராஹ்மணஸ்ஸ ஹி ‘‘ஸப்³பே³ ஸங்கா²ரா அனிச்சா’’திஆதி³னா நயேன ஸுதி³ட்ட²த்தா பரேன நேதப்³ப³ம் ஞாணம் நத்தி². தி³ட்டி²த⁴ம்மேஸு ‘‘இத³மேவ ஸச்ச’’ந்தி நிச்சி²னித்வா ஸுமக்³க³ஹீதம்பி நத்தி². தம்காரணா ஸோ தி³ட்டி²கலஹானி அதிக்கந்தோ, ந ஹி ஸோ ஸேட்ட²தோ பஸ்ஸதி த⁴ம்மமஞ்ஞம் அஞ்ஞத்ர ஸதிபட்டா²னாதீ³ஹி.

ந பரனேய்யோதி பரேன நேதப்³போ³ ஜானாபேதப்³போ³ ந ஹோதி. ந பரபத்தியோ ந பரபச்சயோதி பரேஸம் பச்சேதப்³போ³ ந ஹோதி. ந பரபடிப³த்³த⁴கூ³தி பரேஸம் படிப³த்³த⁴க³மனோ ந ஹோதி.

143. ஜானாமீதி கா³தா²ய ஸம்ப³ந்தோ⁴ அத்தோ² ச – ஏவம் தாவ பரமத்த²ப்³ராஹ்மணோ ந ஹி ஸேட்ட²தோ பஸ்ஸதி த⁴ம்மமஞ்ஞம், அஞ்ஞே பன தித்தி²யா பரசித்தஞாணாதீ³ஹி ஜானந்தாபி பஸ்ஸந்தாபி ‘‘ஜானாமி பஸ்ஸாமி ததே²வ ஏத’’ந்தி ஏவம் வத³ந்தாபி ச தி³ட்டி²யா ஸுத்³தி⁴ம் பச்சேந்தி. கஸ்மா? யஸ்மா தேஸு ஏகோபி அத³க்கி² சே அத்³த³ஸ சேபி தேன பரசித்தஞாணாதி³னா யதா²பூ⁴தமத்த²ம், கிஞ்ஹி துமஸ்ஸ தேன தஸ்ஸ தேன த³ஸ்ஸனேன கிம் கதம், கிம் து³க்க²பரிஞ்ஞா ஸாதி⁴தா, உதா³ஹு ஸமுத³யப்பஹானாதீ³னம் அஞ்ஞதரம், யதோ ஸப்³ப³தா²பி அதிக்கமித்வா அரியமக்³க³ம் தே தித்தி²யா அஞ்ஞேனேவ வத³ந்தி ஸுத்³தி⁴ம், அதிக்கமித்வா வா தே தித்தி²யே பு³த்³தா⁴த³யோ அஞ்ஞேனேவ வத³ந்தி ஸுத்³தி⁴ந்தி.

144. பஸ்ஸம் நரோதி கா³தா²ய ஸம்ப³ந்தோ⁴ அத்தோ² ச – கிஞ்ச பி⁴ய்யோ? ய்வாயம் பரசித்தஞாணாதீ³ஹி அத்³த³க்கி², ஸோ பஸ்ஸம் நரோ த³க்க²தி நாமரூபம், ந ததோ பரம், தி³ஸ்வான வா ஞஸ்ஸதி தானிமேவ நாமரூபானி நிச்சதோ ஸுக²தோ வா, ந அஞ்ஞதா²; ஸோ ஏவம் பஸ்ஸந்தோ காமம் ப³ஹும் பஸ்ஸது அப்பகம் வா நாமரூபம் நிச்சதோ ஸுக²தோ ச அத²ஸ்ஸ ஏவரூபேன த³ஸ்ஸனேன ந ஹி தேன ஸுத்³தி⁴ம் குஸலா வத³ந்தி.

145. நிவிஸ்ஸவாதீ³தி கா³தா²ய ஸம்ப³ந்தோ⁴ அத்தோ² ச – தேன ச த³ஸ்ஸனேன ஸுத்³தி⁴யா அஸதியாபி யோ ‘‘ஜானாமி பஸ்ஸாமி ததே²வ ஏத’’ந்தி ஏவம் நிவிஸ்ஸவாதீ³, ஏதம் வா த³ஸ்ஸனம் படிச்ச தி³ட்டி²யா ஸுத்³தி⁴ம் பச்சேந்தோ ‘‘இத³மேவ ஸச்ச’’ந்தி ஏவம் நிவிஸ்ஸவாதீ³, ஸோ ஸுப்³பி³னயோ ந ஹோதி தம் ததா² பகப்பிதம் அபி⁴ஸங்க²தம் தி³ட்டி²ம் புரக்க²ரானோ. ஸோ ஹி யம் ஸத்தா²ராதி³ம் நிஸ்ஸிதோ, தத்தே²வ ஸுப⁴ம் வதா³னோ ஸுத்³தி⁴ம் வதோ³, ‘‘பரிஸுத்³தி⁴வாதோ³ பரிஸுத்³தி⁴த³ஸ்ஸனோ வா அஹ’’ந்தி அத்தானம் மஞ்ஞமானோ தத்த² தத²த்³த³ஸா ஸோ, தத்த² ஸகாய தி³ட்டி²யா அவிபரீதமேவ ஸோ அத்³த³ஸ. யதா² ஸா தி³ட்டி² பவத்ததி, ததே²வ தம் அத்³த³ஸ, ந அஞ்ஞதா² பஸ்ஸிதும் இச்ச²தீதி அதி⁴ப்பாயோ.

நிவிஸ்ஸவாதீ³தி பதிட்ட²ஹித்வா கதே²ந்தோ. து³ப்³பி³னயோதி வினேதும் து³க்கோ². து³ப்பஞ்ஞாபயோதி ஞாபேதும் சித்தேன லப்³பா⁴பேதும் து³க்கோ². து³ன்னிஜ்ஜா²பயோதி சித்தேன வீமம்ஸித்வா க³ஹணத்த²ம் புனப்புனம் நிஜ்ஜா²பயிதும் து³க்கோ². து³ப்பேக்கா²பயோதி இக்கா²பயிதும் து³க்கோ². து³ப்பஸாத³யோதி சித்தே பஸாத³ம் உப்பாதே³தும் து³க்கோ².

அப்பஸ்ஸீதி ஞாணேன படிவேத⁴ம் பாபுணி. படிவிஜ்ஜீ²தி சித்தேன அவபோ³த⁴ம் பாபுணி.

146. ஏவம் பகப்பிதம் தி³ட்டி²ம் புரக்க²ரானேஸு தித்தி²யேஸு – ந ப்³ராஹ்மணோ கப்பமுபேதி ஸங்கா²தி கா³தா². தத்த² ஸங்கா²தி ஸங்கா²ய, ஜானித்வாதி அத்தோ². நபி ஞாணப³ந்தூ⁴தி ஸமாபத்திஞாணாதி³னா அகததண்ஹாதி³ட்டி²ப³ந்து⁴. தத்த² விக்³க³ஹோ – நாபி அஸ்ஸ ஞாணேன கதோ ப³ந்து⁴ அத்தீ²தி நபி ஞாணப³ந்து⁴. ஸம்முதியோதி தி³ட்டி²ஸம்முதியோ. புது²ஜ்ஜாதி புது²ஜ்ஜனஸம்ப⁴வா. உக்³க³ஹணந்தி மஞ்ஞேதி உக்³க³ஹணந்தி அஞ்ஞே, அஞ்ஞே தா ஸம்முதியோ உக்³க³ண்ஹந்தீதி வுத்தம் ஹோதி.

உபேக்க²தீதி உபபத்திதோ அபக்க²பதிதோ ஹுத்வா பஸ்ஸதி.

147. கிஞ்ச பி⁴ய்யோ – விஸ்ஸஜ்ஜ க³ந்தா²னீதி கா³தா². தத்த² அனுக்³க³ஹோதி உக்³க³ஹணவிரஹிதோ, ஸோபி நாஸ்ஸ உக்³க³ஹோதி அனுக்³க³ஹோ. ந வா உக்³க³ண்ஹாதீதி அனுக்³க³ஹோ.

க³ந்தே² வோஸ்ஸஜ்ஜித்வாதி அபி⁴ஜ்ஜா²தி³கே க³ந்தே² சஜித்வா. விஸ்ஸஜ்ஜாதி புன அனாதி³யனவஸேன ஜஹித்வா. க³தி⁴தேதி க⁴டிதே. க³ந்தி²தேதி ஸுத்தேன ஸங்க³ஹிதே விய க³ந்தி²தே. ப³ந்தே⁴தி ஸுட்டு² ப³ந்தே⁴. விப³ந்தே⁴தி விவிதா⁴ ப³ந்தே⁴. பலிபு³த்³தே⁴தி ஸமந்ததோ ப³ந்த⁴னேன ப³ந்தே⁴. ப³ந்த⁴னேதி கிலேஸப³ந்த⁴னே. போ²டயித்வாதி பப்போ²டேத்வா. ஸச்சம் விஸ்ஸஜ்ஜம் கரோந்தீதி விஸங்க²ரித்வா அபரிபோ⁴க³ம் கரோந்தி. விகோபேந்தீதி சுண்ணவிசுண்ணம் கரோந்தி.

148. கிஞ்ச பி⁴ய்யோ – ஸோ ஏவரூபோ – புப்³பா³ஸவேதி கா³தா². தத்த² புப்³பா³ஸவேதி அதீதரூபாதீ³னி ஆரப்³ப⁴ உப்பஜ்ஜனத⁴ம்மகிலேஸே. நவேதி பச்சுப்பன்னரூபாதீ³னி ஆரப்³ப⁴ உப்பஜ்ஜனத⁴ம்மே. ந ச²ந்த³கூ³தி ச²ந்தா³தி³வஸேன ந க³ச்ச²தி. அனத்தக³ரஹீதி கதாகதவஸேன அத்தானம் அக³ரஹந்தோ.

149. ஏவம் அனத்தக³ரஹீ ச – ஸ ஸப்³ப³த⁴ம்மேஸூதி கா³தா². தத்த² ஸப்³ப³த⁴ம்மேஸூதி த்³வாஸட்டி²தி³ட்டி²த⁴ம்மேஸு ‘‘யம் கிஞ்சி தி³ட்ட²ம் வா’’தி ஏவம்பபே⁴தே³ஸு. பன்னபா⁴ரோதி பதிதபா⁴ரோ. ந கப்பேதீதி ந கப்பியோ, து³வித⁴ம்பி கப்பம் ந கரோதீதி அத்தோ². நூபரதோதி புது²ஜ்ஜனகல்யாணகஸேக்கா² விய உபரதிஸமங்கீ³பி நோ ஹோதி. ந பத்தி²யோதி நித்தண்ஹோ. தண்ஹா ஹி பத்த²யதீதி பத்தி²யா, நாஸ்ஸ பத்தி²யாதி ந பத்தி²யோ. இதோ பரஞ்ச ஹேட்டா² ச தத்த² தத்த² வுத்தனயத்தா உத்தானத்த²மேவ. ஏவம் அரஹத்தனிகூடேனேவ தே³ஸனம் நிட்டா²பேஸி, தே³ஸனாபரியோஸானே புராபே⁴த³ஸுத்தே (மஹானி. 83) வுத்தஸதி³ஸோ ஏவ அபி⁴ஸமயோ அஹோஸீதி.

ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய

மஹாப்³யூஹஸுத்தனித்³தே³ஸவண்ணனா நிட்டி²தா.