2. ஸிக்கா²பத³வண்ணனா

ஸிக்கா²பத³பாட²மாதிகா

ஏவம் ஸரணக³மனேஹி ஸாஸனோதாரம் த³ஸ்ஸேத்வா ஸாஸனம் ஓதிண்ணேன உபாஸகேன வா பப்³ப³ஜிதேன வா யேஸு ஸிக்கா²பதே³ஸு பட²மம் ஸிக்கி²தப்³ப³ம், தானி த³ஸ்ஸேதும் நிக்கி²த்தஸ்ஸ ஸிக்கா²பத³பாட²ஸ்ஸ இதா³னி வண்ணனத்த²ம் அயம் மாதிகா –

‘‘யேன யத்த² யதா³ யஸ்மா, வுத்தானேதானி தம் நயம்;

வத்வா கத்வா வவத்தா²னம், ஸாதா⁴ரணவிஸேஸதோ.

‘‘பகதியா ச யம் வஜ்ஜம், வஜ்ஜம் பண்ணத்தியா ச யம்;

வவத்த²பேத்வா தம் கத்வா, பதா³னம் ப்³யஞ்ஜனத்த²தோ.

‘‘ஸாதா⁴ரணானம் ஸப்³பே³ஸம், ஸாதா⁴ரணவிபா⁴வனம்;

அத² பஞ்சஸு புப்³பே³ஸு, விஸேஸத்த²ப்பகாஸதோ.

‘‘பாணாதிபாதபபு⁴தி-ஹேகதானானதாதி³தோ;

ஆரம்மணாதா³னபே⁴தா³, மஹாஸாவஜ்ஜதோ ததா².

‘‘பயோக³ங்க³ஸமுட்டா²னா, வேத³னாமூலகம்மதோ;

விரமதோ ச ப²லதோ, விஞ்ஞாதப்³போ³ வினிச்ச²யோ.

‘‘யோஜேதப்³ப³ம் ததோ யுத்தம், பச்சி²மேஸ்வபி பஞ்சஸு;

ஆவேணிகஞ்ச வத்தப்³ப³ம், ஞேய்யா ஹீனாதி³தாபி சா’’தி.

தத்த² ஏதானி பாணாதிபாதாவேரமணீதிஆதீ³னி த³ஸ ஸிக்கா²பதா³னி ப⁴க³வதா ஏவ வுத்தானி, ந ஸாவகாதீ³ஹி. தானி ச ஸாவத்தி²யம் வுத்தானி ஜேதவனே அனாத²பிண்டி³கஸ்ஸ ஆராமே ஆயஸ்மந்தம் ராஹுலம் பப்³பா³ஜேத்வா கபிலவத்து²தோ ஸாவத்தி²ம் அனுப்பத்தேன ஸாமணேரானம் ஸிக்கா²பத³வவத்தா²பனத்த²ம். வுத்தம் ஹேதம் –

‘‘அத² கோ² ப⁴க³வா கபிலவத்து²ஸ்மிம் யதா²பி⁴ரந்தம் விஹரித்வா யேன ஸாவத்தி² தேன சாரிகம் பக்காமி. அனுபுப்³பே³ன சாரிகம் சரமானோ யேன ஸாவத்தி² தத³வஸரி. தத்ர ஸுத³ம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன …பே… அத² கோ² ஸாமணேரானம் ஏதத³ஹோஸி – ‘கதி நு கோ² அம்ஹாகம் ஸிக்கா²பதா³னி, கத்த² ச அம்ஹேஹி ஸிக்கி²தப்³ப³’’’ந்தி. ப⁴க³வதோ ஏதமத்த²ம் ஆரோசேஸும் – ‘‘அனுஜானாமி, பி⁴க்க²வே, ஸாமணேரானம் த³ஸ ஸிக்கா²பதா³னி, தேஸு ச ஸாமணேரேஹி ஸிக்கி²தும், பாணாதிபாதாவேரமணீ…பே… ஜாதரூபரஜதபடிக்³க³ஹணா வேரமணீ’’தி (மஹாவ. 105).

தானேதானி ‘‘ஸமாதா³ய ஸிக்க²தி ஸிக்கா²பதே³ஸூ’’தி (தீ³. நி. 1.193; ம. நி. 2.24; விப⁴. 508) ஸுத்தானுஸாரேன ஸரணக³மனேஸு ச த³ஸ்ஸிதபாடா²னுஸாரேன ‘‘பாணாதிபாதா வேரமணிஸிக்கா²பத³ம் ஸமாதி³யாமீ’’தி ஏவம் வாசனாமக்³க³ம் ஆரோபிதானீதி வேதி³தப்³பா³னி. ஏவம் தாவ ‘‘யேன யத்த² யதா³ யஸ்மா, வுத்தானேதானி தம் நயம் வத்வா’’தி ஸோ நயோ த³ட்ட²ப்³போ³.

ஸாதா⁴ரணவிஸேஸவவத்தா²னம்

ஏத்த² ச ஆதி³தோ த்³வே சதுத்த²பஞ்சமானி உபாஸகானம் ஸாமணேரானஞ்ச ஸாதா⁴ரணானி நிச்சஸீலவஸேன. உபோஸத²ஸீலவஸேன பன உபாஸகானம் ஸத்தமட்ட²மம் சேகம் அங்க³ம் கத்வா ஸப்³ப³பச்சி²மவஜ்ஜானி ஸப்³பா³னிபி ஸாமணேரேஹி ஸாதா⁴ரணானி, பச்சி²மம் பன ஸாமணேரானமேவ விஸேஸபூ⁴தந்தி ஏவம் ஸாதா⁴ரணவிஸேஸதோ வவத்தா²னம் காதப்³ப³ம். புரிமானி சேத்த² பஞ்ச ஏகந்தஅகுஸலசித்தஸமுட்டா²னத்தா பாணாதிபாதாதீ³னம் பகதிவஜ்ஜதோ வேரமணியா, ஸேஸானி பண்ணத்திவஜ்ஜதோதி ஏவம் பகதியா ச யம் வஜ்ஜம், வஜ்ஜம் பண்ணத்தியா ச யம், தம் வவத்த²பேதப்³ப³ம்.

ஸாதா⁴ரணவிபா⁴வனா

யஸ்மா சேத்த² ‘‘வேரமணிஸிக்கா²பத³ம் ஸமாதி³யாமீ’’தி ஏதானி ஸப்³ப³ஸாதா⁴ரணானி பதா³னி, தஸ்மா ஏதேஸம் பதா³னம் ப்³யஞ்ஜனதோ ச அத்த²தோ ச அயம் ஸாதா⁴ரணவிபா⁴வனா வேதி³தப்³பா³ –

தத்த² ப்³யஞ்ஜனதோ தாவ வேரம் மணதீதி வேரமணீ, வேரம் பஜஹதி, வினோதே³தி, ப்³யந்தீகரோதி, அனபா⁴வம் க³மேதீதி அத்தோ². விரமதி வா ஏதாய கரணபூ⁴தாய வேரம்ஹா புக்³க³லோதி, விகாரஸ்ஸ வேகாரம் கத்வா வேரமணீ. தேனேவ சேத்த² ‘‘வேரமணிஸிக்கா²பத³ம் விரமணிஸிக்கா²பத³’’ந்தி த்³விதா⁴ ஸஜ்ஜா²யம் கரோந்தி. ஸிக்கி²தப்³பா³தி ஸிக்கா², பஜ்ஜதே அனேனாதி பத³ம். ஸிக்கா²ய பத³ம் ஸிக்கா²பத³ம், ஸிக்கா²ய அதி⁴க³மூபாயோதி அத்தோ². அத² வா மூலம் நிஸ்ஸயோ பதிட்டா²தி வுத்தம் ஹோதி. வேரமணீ ஏவ ஸிக்கா²பத³ம் வேரமணிஸிக்கா²பத³ம், விரமணிஸிக்கா²பத³ம் வா து³தியேன நயேன. ஸம்மா ஆதி³யாமி ஸமாதி³யாமி, அவீதிக்கமனாதி⁴ப்பாயேன அக²ண்ட³காரிதாய அச்சி²த்³த³காரிதாய அஸப³லகாரிதாய ச ஆதி³யாமீதி வுத்தம் ஹோதி.

அத்த²தோ பன வேரமணீதி காமாவசரகுஸலசித்தஸம்பயுத்தா விரதி, ஸா பாணாதிபாதா விரமந்தஸ்ஸ ‘‘யா தஸ்மிம் ஸமயே பாணாதிபாதா ஆரதி விரதி படிவிரதி வேரமணீ அகிரியா அகரணம் அனஜ்ஜா²பத்தி வேலாஅனதிக்கமோ ஸேதுகா⁴தோ’’தி ஏவமாதி³னா (விப⁴. 704) நயேன விப⁴ங்கே³ வுத்தா. காமஞ்சேஸா வேரமணீ நாம லோகுத்தராபி அத்தி², இத⁴ பன ஸமாதி³யாமீதி வுத்தத்தா ஸமாதா³னவஸேன பவத்தாரஹா, தஸ்மா ஸா ந ஹோதீதி காமாவசரகுஸலசித்தஸம்பயுத்தா விரதீதி வுத்தா.

ஸிக்கா²தி திஸ்ஸோ ஸிக்கா² அதி⁴ஸீலஸிக்கா², அதி⁴சித்தஸிக்கா², அதி⁴பஞ்ஞாஸிக்கா²தி. இமஸ்மிம் பனத்தே² ஸம்பத்தவிரதிஸீலம் லோகிகா விபஸ்ஸனா ரூபாரூபஜா²னானி அரியமக்³கோ³ ச ஸிக்கா²தி அதி⁴ப்பேதா. யதா²ஹ –

‘‘கதமே த⁴ம்மா ஸிக்கா²? யஸ்மிம் ஸமயே காமாவசரம் குஸலம் சித்தம் உப்பன்னம் ஹோதி, ஸோமனஸ்ஸஸஹக³தம் ஞாணஸம்பயுத்தம்…பே… தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி, இமே த⁴ம்மா ஸிக்கா².

‘‘கதமே த⁴ம்மா ஸிக்கா²? யஸ்மிம் ஸமயே ரூபூபபத்தியா மக்³க³ம் பா⁴வேதி விவிச்சேவ காமேஹி விவிச்ச அகுஸலேஹி த⁴ம்மேஹி…பே… பட²மம் ஜா²னம்…பே… பஞ்சமம் ஜா²னம் உபஸம்பஜ்ஜ விஹரதி…பே… அவிக்கே²போ ஹோதி, இமே த⁴ம்மா ஸிக்கா².

‘‘கதமே த⁴ம்மா ஸிக்கா²? யஸ்மிம் ஸமயே அரூபபத்தியா…பே… நேவஸஞ்ஞானாஸஞ்ஞாயதனஸஹக³தம்…பே… அவிக்கே²போ ஹோதி, இமே த⁴ம்மா ஸிக்கா².

‘‘கதமே த⁴ம்மா ஸிக்கா²? யஸ்மிம் ஸமயே லோகுத்தரம் ஜா²னம் பா⁴வேதி நிய்யானிகம்…பே… அவிக்கே²போ ஹோதி, இமே த⁴ம்மா ஸிக்கா²’’தி (விப⁴. 712-713).

ஏதாஸு ஸிக்கா²ஸு யாய காயசி ஸிக்கா²ய பத³ம் அதி⁴க³மூபாயோ, அத² வா மூலம் நிஸ்ஸயோ பதிட்டா²தி ஸிக்கா²பத³ம். வுத்தஞ்ஹேதம் – ‘‘ஸீலம் நிஸ்ஸாய ஸீலே பதிட்டா²ய ஸத்த போ³ஜ்ஜ²ங்கே³ பா⁴வேந்தோ ப³ஹுலீகரோந்தோ’’தி ஏவமாதி³ (ஸம். நி. 5.182). ஏவமேத்த² ஸாதா⁴ரணானம் பதா³னம் ஸாதா⁴ரணா ப்³யஞ்ஜனதோ அத்த²தோ ச விபா⁴வனா காதப்³பா³.

புரிமபஞ்சஸிக்கா²பத³வண்ணனா

இதா³னி யம் வுத்தம் – ‘‘அத² பஞ்சஸு புப்³பே³ஸு, விஸேஸத்த²ப்பகாஸதோ…பே… விஞ்ஞாதப்³போ³ வினிச்ச²யோ’’தி, தத்தே²தம் வுச்சதி – பாணாதிபாதோதி ஏத்த² தாவ பாணோதி ஜீவிதிந்த்³ரியப்படிப³த்³தா⁴ க²ந்த⁴ஸந்ததி, தம் வா உபாதா³ய பஞ்ஞத்தோ ஸத்தோ. தஸ்மிம் பன பாணே பாணஸஞ்ஞினோ தஸ்ஸ பாணஸ்ஸ ஜீவிதிந்த்³ரியுபச்சே²த³கஉபக்கமஸமுட்டா²பிகா காயவசீத்³வாரானம் அஞ்ஞதரத்³வாரப்பவத்தா வத⁴கசேதனா பாணாதிபாதோ. அதி³ன்னாதா³னந்தி ஏத்த² அதி³ன்னந்தி பரபரிக்³க³ஹிதம், யத்த² பரோ யதா²காமகாரிதம் ஆபஜ்ஜந்தோ அத³ண்டா³ரஹோ அனுபவஜ்ஜோ ச ஹோதி, தஸ்மிம் பரபரிக்³க³ஹிதே பரபரிக்³க³ஹிதஸஞ்ஞினோ ததா³தா³யகஉபக்கமஸமுட்டா²பிகா காயவசீத்³வாரானம் அஞ்ஞதரத்³வாரப்பவத்தா ஏவ தே²ய்யசேதனா அதி³ன்னாதா³னம். அப்³ரஹ்மசரியந்தி அஸேட்ட²சரியம், த்³வயம்த்³வயஸமாபத்திமேது²னப்படிஸேவனா காயத்³வாரப்பவத்தா அஸத்³த⁴ம்மப்படிஸேவனட்டா²னவீதிக்கமசேதனா அப்³ரஹ்மசரியம். முஸாவாதோ³தி ஏத்த² முஸாதி விஸம்வாத³னபுரேக்கா²ரஸ்ஸ அத்த²ப⁴ஞ்ஜனகோ வசீபயோகோ³ காயபயோகோ³ வா, விஸம்வாத³னாதி⁴ப்பாயேன பனஸ்ஸ பரவிஸம்வாத³ககாயவசீபயோக³ஸமுட்டா²பிகா காயவசீத்³வாரானமேவ அஞ்ஞதரத்³வாரப்பவத்தா மிச்சா²சேதனா முஸாவாதோ³. ஸுராமேரயமஜ்ஜபமாத³ட்டா²னந்தி ஏத்த² பன ஸுராதி பஞ்ச ஸுரா – பிட்ட²ஸுரா, பூவஸுரா, ஓத³னஸுரா, கிண்ணபக்கி²த்தா, ஸம்பா⁴ரஸம்யுத்தா சாதி. மேரயம்பி புப்பா²ஸவோ, ப²லாஸவோ, கு³ளாஸவோ, மத்⁴வாஸவோ, ஸம்பா⁴ரஸம்யுத்தோ சாதி பஞ்சவித⁴ம். மஜ்ஜந்தி தது³ப⁴யமேவ மத³னியட்டே²ன மஜ்ஜம், யம் வா பனஞ்ஞம்பி கிஞ்சி அத்தி² மத³னியம், யேன பீதேன மத்தோ ஹோதி பமத்தோ, இத³ம் வுச்சதி மஜ்ஜம். பமாத³ட்டா²னந்தி யாய சேதனாய தம் பிவதி அஜ்ஜோ²ஹரதி, ஸா சேதனா மத³ப்பமாத³ஹேதுதோ பமாத³ட்டா²னந்தி வுச்சதி, யதோ அஜ்ஜோ²ஹரணாதி⁴ப்பாயேன காயத்³வாரப்பவத்தா ஸுராமேரயமஜ்ஜானம் அஜ்ஜோ²ஹரணசேதனா ‘‘ஸுராமேரயமஜ்ஜபமாத³ட்டா²ன’’ந்தி வேதி³தப்³பா³. ஏவம் தாவேத்த² பாணாதிபாதப்பபு⁴தீஹி விஞ்ஞாதப்³போ³ வினிச்ச²யோ.

ஏகதானானதாதி³வினிச்ச²யம்

ஏகதானானதாதி³தோதி ஏத்த² ஆஹ – கிம் பன வஜ்ஜ²வத⁴கப்பயோக³சேதனாதீ³னம் ஏகதாய பாணாதிபாதஸ்ஸ அஞ்ஞஸ்ஸ வா அதி³ன்னாதா³னாதி³னோ ஏகத்தம், நானதாய நானத்தம் ஹோதி, உதா³ஹு நோதி. கஸ்மா பனேதம் வுச்சதி? யதி³ தாவ ஏகதாய ஏகத்தம், அத² யதா³ ஏகம் வஜ்ஜ²ம் ப³ஹூ வத⁴கா வதே⁴ந்தி, ஏகோ வா வத⁴கோ ப³ஹுகே வஜ்ஜே² வதே⁴தி, ஏகேன வா ஸாஹத்தி²காதி³னா பயோகே³ன ப³ஹூ வஜ்ஜா² வதீ⁴யந்தி, ஏகா வா சேதனா ப³ஹூனம் வஜ்ஜா²னம் ஜீவிதிந்த்³ரியுபச்சே²த³கபயோக³ம் ஸமுட்டா²பேதி, ததா³ ஏகேன பாணாதிபாதேன ப⁴விதப்³ப³ம். யதி³ பன நானதாய நானத்தம். அத² யதா³ ஏகோ வத⁴கோ ஏகஸ்ஸத்தா²ய ஏகம் பயோக³ம் கரோந்தோ ப³ஹூ வஜ்ஜே² வதே⁴தி, ப³ஹூ வா வத⁴கா தே³வத³த்தயஞ்ஞத³த்தஸோமத³த்தாதீ³னம் ப³ஹூனமத்தா²ய ப³ஹூ பயோகே³ கரோந்தா ஏகமேவ தே³வத³த்தம் யஞ்ஞத³த்தம் ஸோமத³த்தம் வா வதே⁴ந்தி, ப³ஹூஹி வா ஸாஹத்தி²காதீ³ஹி பயோகே³ஹி ஏகோ வஜ்ஜோ² வதீ⁴யதி. ப³ஹூ வா சேதனா ஏகஸ்ஸேவ வஜ்ஜ²ஸ்ஸ ஜீவிதிந்த்³ரியுபச்சே²த³கபயோக³ம் ஸமுட்டா²பேந்தி, ததா³ ப³ஹூஹி பாணாதிபாதேஹி ப⁴விதப்³ப³ம். உப⁴யம்பி சேதமயுத்தம். அத² நேவ ஏதேஸம் வஜ்ஜா²தீ³னம் ஏகதாய ஏகத்தம், நானதாய நானத்தம், அஞ்ஞதே²வ து ஏகத்தம் நானத்தஞ்ச ஹோதி, தம் வத்தப்³ப³ம் பாணாதிபாதஸ்ஸ, ஏவம் ஸேஸானம்பீதி.

வுச்சதே – தத்த² தாவ பாணாதிபாதஸ்ஸ ந வஜ்ஜ²வத⁴காதீ³னம் பச்சேகமேகதாய ஏகதா, நானதாய நானதா, கிந்து வஜ்ஜ²வத⁴காதீ³னம் யுக³னந்த⁴மேகதாய ஏகதா, த்³வின்னம்பி து தேஸம், ததோ அஞ்ஞதரஸ்ஸ வா நானதாய நானதா. ததா² ஹி ப³ஹூஸு வத⁴கேஸு ப³ஹூஹி ஸரக்கே²பாதீ³ஹி ஏகேன வா ஓபாதக²ணனாதி³னா பயோகே³ன ப³ஹூ வஜ்ஜே² வதே⁴ந்தேஸுபி ப³ஹூ பாணாதிபாதா ஹோந்தி. ஏகஸ்மிம் வத⁴கே ஏகேன, ப³ஹூஹி வா பயோகே³ஹி தப்பயோக³ஸமுட்டா²பிகாய ச ஏகாய, ப³ஹூஹி வா சேதனாஹி ப³ஹூ வஜ்ஜே² வதே⁴ந்தேபி ப³ஹூ பாணாதிபாதா ஹோந்தி, ப³ஹூஸு ச வத⁴கேஸு யதா²வுத்தப்பகாரேஹி ப³ஹூஹி, ஏகேன வா பயோகே³ன ஏகம் வஜ்ஜ²ம் வதே⁴ந்தேஸுபி ப³ஹூ பாணாதிபாதா ஹோந்தி. ஏஸ நயோ அதி³ன்னாதா³னாதீ³ஸுபீதி. ஏவமேத்த² ஏகதானானதாதி³தோபி விஞ்ஞாதப்³போ³ வினிச்ச²யோ.

ஆரம்மணதோதி பாணாதிபாதோ சேத்த² ஜீவிதிந்த்³ரியாரம்மணோ. அதி³ன்னாதா³னஅப்³ரஹ்மசரியஸுராமேரயமஜ்ஜபமாத³ட்டா²னானி ரூபத⁴ம்மேஸு ரூபாயதனாதி³அஞ்ஞதரஸங்கா²ராரம்மணானி. முஸாவாதோ³ யஸ்ஸ முஸா ப⁴ணதி, தமாரபி⁴த்வா பவத்தனதோ ஸத்தாரம்மணோ. அப்³ரஹ்மசரியம்பி ஸத்தாரம்மணந்தி ஏகே. அதி³ன்னாதா³னஞ்ச யதா³ ஸத்தோ ஹரிதப்³போ³ ஹோதி, ததா³ ஸத்தாரம்மணந்தி. அபி சேத்த² ஸங்கா²ரவஸேனேவ ஸத்தாரம்மணம், ந பண்ணத்திவஸேனாதி. ஏவமேத்த² ஆரம்மணதோபி விஞ்ஞாதப்³போ³ வினிச்ச²யோ.

ஆதா³னதோதி பாணாதிபாதாவேரமணிஸிக்கா²பதா³தீ³னி சேதானி ஸாமணேரேன பி⁴க்கு²ஸந்திகே ஸமாதி³ன்னானேவ ஸமாதி³ன்னானி ஹோந்தி, உபாஸகேன பன அத்தனா ஸமாதி³யந்தேனாபி ஸமாதி³ன்னானி ஹோந்தி, பரஸ்ஸ ஸந்திகே ஸமாதி³யந்தேனாபி. ஏகஜ்ஜ²ம் ஸமாதி³ன்னானிபி ஸமாதி³ன்னானி ஹோந்தி, பச்சேகம் ஸமாதி³ன்னானிபி. கிந்து நானம் ஏகஜ்ஜ²ம் ஸமாதி³யதோ ஏகாயேவ விரதி, ஏகாவ சேதனா ஹோதி, கிச்சவஸேன பனேதாஸம் பஞ்சவித⁴த்தம் விஞ்ஞாயதி. பச்சேகம் ஸமாதி³யதோ பன பஞ்சேவ விரதியோ, பஞ்ச ச சேதனா ஹோந்தீதி வேதி³தப்³பா³. ஏவமேத்த² ஆதா³னதோபி விஞ்ஞாதப்³போ³ வினிச்ச²யோ.

பே⁴த³தோதி ஸாமணேரானஞ்சேத்த² ஏகஸ்மிம் பி⁴ன்னே ஸப்³பா³னிபி பி⁴ன்னானி ஹோந்தி. பாராஜிகட்டா²னியானி ஹி தானி தேஸம், யம் தம் வீதிக்கந்தம் ஹோதி, தேனேவ கம்மப³த்³தோ⁴. க³ஹட்டா²னம் பன ஏகஸ்மிம் பி⁴ன்னே ஏகமேவ பி⁴ன்னம் ஹோதி, யதோ தேஸம் தம்ஸமாதா³னேனேவ புன பஞ்சங்கி³கத்தம் ஸீலஸ்ஸ ஸம்பஜ்ஜதி. அபரே பனாஹு – ‘‘விஸும் விஸும் ஸமாதி³ன்னேஸு ஏகஸ்மிம் பி⁴ன்னே ஏகமேவ பி⁴ன்னம் ஹோதி, ‘பஞ்சங்க³ஸமன்னாக³தம் ஸீலம் ஸமாதி³யாமீ’தி ஏவம் பன ஏகதோ ஸமாதி³ன்னேஸு ஏகஸ்மிம் பி⁴ன்னே ஸேஸானிபி ஸப்³பா³னி பி⁴ன்னானி ஹோந்தி. கஸ்மா? ஸமாதி³ன்னஸ்ஸ அபி⁴ன்னத்தா, யம் தம் வீதிக்கந்தம், தேனேவ கம்மப³த்³தோ⁴’’தி. ஏவமேத்த² பே⁴த³தோபி விஞ்ஞாதப்³போ³ வினிச்ச²யோ.

மஹாஸாவஜ்ஜதோதி கு³ணவிரஹிதேஸு திரச்சா²னக³தாதீ³ஸு பாணேஸு கு²த்³த³கே பாணே பாணாதிபாதோ அப்பஸாவஜ்ஜோ, மஹாஸரீரே மஹாஸாவஜ்ஜோ. கஸ்மா? பயோக³மஹந்ததாய. பயோக³ஸமத்தேபி வத்து²மஹந்ததாய. கு³ணவந்தேஸு பன மனுஸ்ஸாதீ³ஸு அப்பகு³ணே பாணாதிபாதோ அப்பஸாவஜ்ஜோ, மஹாகு³ணே மஹாஸாவஜ்ஜோ. ஸரீரகு³ணானந்து ஸமபா⁴வே ஸதி கிலேஸானம் உபக்கமானஞ்ச முது³தாய அப்பஸாவஜ்ஜதா, திப்³ப³தாய மஹாஸாவஜ்ஜதா ச வேதி³தப்³பா³. ஏஸ நயோ ஸேஸேஸுபி. அபி சேத்த² ஸுராமேரயமஜ்ஜபமாத³ட்டா²னமேவ மஹாஸாவஜ்ஜம், ந ததா² பாணாதிபாதாத³யோ. கஸ்மா? மனுஸ்ஸபூ⁴தஸ்ஸாபி உம்மத்தகபா⁴வஸம்வத்தனேன அரியத⁴ம்மந்தராயகரணதோதி. ஏவமேத்த² மஹாஸாவஜ்ஜதோபி விஞ்ஞாதப்³போ³ வினிச்ச²யோ.

பயோக³தோதி ஏத்த² ச பாணாதிபாதஸ்ஸ ஸாஹத்தி²கோ, ஆணத்திகோ, நிஸ்ஸக்³கி³யோ, தா²வரோ, விஜ்ஜாமயோ, இத்³தி⁴மயோதி ச²ப்பயோகா³. தத்த² காயேன வா காயப்படிப³த்³தே⁴ன வா பஹரணம் ஸாஹத்தி²கோ பயோகோ³, ஸோ உத்³தி³ஸ்ஸானுத்³தி³ஸ்ஸபே⁴த³தோ து³விதோ⁴ ஹோதி. தத்த² உத்³தி³ஸ்ஸகே யம் உத்³தி³ஸ்ஸ பஹரதி, தஸ்ஸேவ மரணேன கம்முனா ப³ஜ்ஜ²தி. ‘‘யோ கோசி மரதூ’’தி ஏவம் அனுத்³தி³ஸ்ஸகே பஹாரபச்சயா யஸ்ஸ கஸ்ஸசி மரணேன. உப⁴யதா²பி ச பஹரிதமத்தே வா மரது, பச்சா² வா தேனேவ ரோகே³ன, பஹரிதக்க²ணே ஏவ கம்முனா ப³ஜ்ஜ²தி. மரணாதி⁴ப்பாயேன ச பஹாரம் த³த்வா தேன அமதஸ்ஸ புன அஞ்ஞேன சித்தேன பஹாரே தி³ன்னே பச்சா²பி யதி³ பட²மபஹாரேனேவ மரதி, ததா³ ஏவ கம்முனா ப³த்³தோ⁴ ஹோதி. அத² து³தியபஹாரேன, நத்தி² பாணாதிபாதோ. உப⁴யேஹி மதேபி பட²மபஹாரேனேவ கம்முனா ப³த்³தோ⁴, உப⁴யேஹிபி அமதே நேவத்தி² பாணாதிபாதோ. ஏஸ நயோ ப³ஹுகேஹிபி ஏகஸ்ஸ பஹாரே தி³ன்னே. தத்ராபி ஹி யஸ்ஸ பஹாரேன மரதி, தஸ்ஸேவ கம்மப³த்³தோ⁴ ஹோதி.

அதி⁴ட்ட²ஹித்வா பன ஆணாபனம் ஆணத்திகோ பயோகோ³. தத்த²பி ஸாஹத்தி²கே பயோகே³ வுத்தனயேனேவ கம்மப³த்³தோ⁴ அனுஸ்ஸரிதப்³போ³. ச²ப்³பி³தோ⁴ சேத்த² நியமோ வேதி³தப்³போ³ –

‘‘வத்து² காலோ ச ஓகாஸோ, ஆவுத⁴ம் இரியாபதோ²;

கிரியாவிஸேஸோதி இமே, ச² ஆணத்தினியாமகா’’தி. (பாசி. அட்ட². 2.174);

தத்த² வத்தூ²தி மாரேதப்³போ³ பாணோ. காலோதி புப்³ப³ண்ஹஸாயன்ஹாதி³காலோ ச, யோப்³ப³னதா²வரியாதி³காலோ ச. ஓகாஸோதி கா³மோ வா நிக³மோ வா வனம் வா ரச்சா² வா ஸிங்கா⁴டகம் வாதி ஏவமாதி³. ஆவுத⁴ந்தி அஸி வா உஸு வா ஸத்தி வாதி ஏவமாதி³. இரியாபதோ²தி மாரேதப்³ப³ஸ்ஸ மாரகஸ்ஸ ச டா²னம் வா நிஸஜ்ஜா வாதி ஏவமாதி³.

கிரியாவிஸேஸோதி விஜ்ஜ²னம் வா சே²த³னம் வா பே⁴த³னம் வா ஸங்க²முண்டி³கம் வாதி ஏவமாதி³. யதி³ ஹி வத்து²ம் விஸம்வாதே³த்வா ‘‘யம் மாரேஹீ’’தி ஆணத்தோ, ததோ அஞ்ஞம் மாரேதி, ஆணாபகஸ்ஸ நத்தி² கம்மப³த்³தோ⁴. அத² வத்து²ம் அவிஸம்வாதே³த்வா மாரேதி, ஆணாபகஸ்ஸ ஆணத்திக்க²ணே ஆணத்தஸ்ஸ மாரணக்க²ணேதி உப⁴யேஸம்பி கம்மப³த்³தோ⁴. ஏஸ நயோ காலாதீ³ஸுபி.

மாரணத்த²ந்து காயேன வா காயப்படிப³த்³தே⁴ன வா பஹரணனிஸ்ஸஜ்ஜனம் நிஸ்ஸக்³கி³யோ பயோகோ³. ஸோபி உத்³தி³ஸ்ஸானுத்³தி³ஸ்ஸபே⁴த³தோ து³விதோ⁴ ஏவ, கம்மப³த்³தோ⁴ சேத்த² புப்³பே³ வுத்தனயேனேவ வேதி³தப்³போ³.

மாரணத்த²மேவ ஓபாதக²ணனம், அபஸ்ஸேனஉபனிக்கி²பனம், பே⁴ஸஜ்ஜவிஸயந்தாதி³ப்பயோஜனம் வா தா²வரோ பயோகோ³. ஸோபி உத்³தி³ஸ்ஸானுத்³தி³ஸ்ஸபே⁴த³தோ து³விதோ⁴, யதோ தத்த²பி புப்³பே³ வுத்தனயேனேவ கம்மப³த்³தோ⁴ வேதி³தப்³போ³. அயந்து விஸேஸோ – மூலட்டே²ன ஓபாதாதீ³ஸு பரேஸம் மூலேன வா முதா⁴ வா தி³ன்னேஸுபி யதி³ தப்பச்சயா கோசி மரதி, மூலட்ட²ஸ்ஸேவ கம்மப³த்³தோ⁴. யதி³பி ச தேன அஞ்ஞேன வா தத்த² ஓபாதே வினாஸேத்வா பூ⁴மிஸமே கதேபி பம்ஸுதோ⁴வகா வா பம்ஸும் க³ண்ஹந்தா, மூலக²ணகா வா மூலானி க²ணந்தா ஆவாடம் கரோந்தி, தே³வே வா வஸ்ஸந்தே கத்³த³மோ ஜாயதி, தத்த² ச கோசி ஓதரித்வா வா லக்³கி³த்வா வா மரதி, மூலட்ட²ஸ்ஸேவ கம்மப³த்³தோ⁴. யதி³ பன யேன லத்³த⁴ம், ஸோ அஞ்ஞோ வா தம் வித்த²டதரம் க³ம்பீ⁴ரதரம் வா கரோதி, தப்பச்சயாவ கோசி மரதி, உப⁴யேஸம்பி கம்மப³த்³தோ⁴. யதா² து மூலானி மூலேஹி ஸம்ஸந்த³ந்தி, ததா² தத்ர த²லே கதே முச்சதி. ஏவம் அபஸ்ஸேனாதீ³ஸுபி யாவ தேஸம் பவத்தி, தாவ யதா²ஸம்ப⁴வம் கம்மப³த்³தோ⁴ வேதி³தப்³போ³.

மாரணத்த²ம் பன விஜ்ஜாபரிஜப்பனம் விஜ்ஜாமயோ பயோகோ³. தா³டா²வுதா⁴தீ³னம் தா³டா²கோடனாதி³மிவ மாரணத்த²ம் கம்மவிபாகஜித்³தி⁴விகாரகரணம் இத்³தி⁴மயோ பயோகோ³தி. அதி³ன்னாதா³னஸ்ஸ து தே²ய்யபஸய்ஹபடிச்ச²ன்னபரிகப்பகுஸாவஹாரவஸப்பவத்தா ஸாஹத்தி²காணத்திகாத³யோ பயோகா³, தேஸம்பி வுத்தானுஸாரேனேவ பபே⁴தோ³ வேதி³தப்³போ³. அப்³ரஹ்மசரியாதீ³னம் திண்ணம்பி ஸாஹத்தி²கோ ஏவ பயோகோ³ லப்³ப⁴தீதி. ஏவமேத்த² பயோக³தோபி விஞ்ஞாதப்³போ³ வினிச்ச²யோ.

அங்க³தோதி ஏத்த² ச பாணாதிபாதஸ்ஸ பஞ்ச அங்கா³னி ப⁴வந்தி – பாணோ ச ஹோதி, பாணஸஞ்ஞீ ச, வத⁴கசித்தஞ்ச பச்சுபட்டி²தம் ஹோதி, வாயமதி, தேன ச மரதீதி. அதி³ன்னாதா³னஸ்ஸாபி பஞ்சேவ – பரபரிக்³க³ஹிதஞ்ச ஹோதி, பரபரிக்³க³ஹிதஸஞ்ஞீ ச, தே²ய்யசித்தஞ்ச பச்சுபட்டி²தம் ஹோதி, வாயமதி, தேன ச ஆதா³தப்³ப³ம் ஆதா³னம் க³ச்ச²தீதி. அப்³ரஹ்மசரியஸ்ஸ பன சத்தாரி அங்கா³னி ப⁴வந்தி – அஜ்ஜா²சரியவத்து² ச ஹோதி, தத்த² ச ஸேவனசித்தம் பச்சுபட்டி²தம் ஹோதி, ஸேவனபச்சயா பயோக³ஞ்ச ஸமாபஜ்ஜதி, ஸாதி³யதி சாதி, ததா² பரேஸம் த்³வின்னம்பி. தத்த² முஸாவாத³ஸ்ஸ தாவ முஸா ச ஹோதி தம் வத்து², விஸம்வாத³னசித்தஞ்ச பச்சுபட்டி²தம் ஹோதி, தஜ்ஜோ ச வாயாமோ, பரவிஸம்வாத³னஞ்ச விஞ்ஞாபயமானா விஞ்ஞத்தி பவத்ததீதி சத்தாரி அங்கா³னி வேதி³தப்³பா³னி. ஸுராமேரயமஜ்ஜபமாத³ட்டா²னஸ்ஸ பன ஸுராதீ³னஞ்ச அஞ்ஞதரம் ஹோதி மத³னீயபாதுகம்யதாசித்தஞ்ச பச்சுபட்டி²தம் ஹோதி, தஜ்ஜஞ்ச வாயாமம் ஆபஜ்ஜதி, பீதே ச பவிஸதீதி இமானி சத்தாரி அங்கா³னீதி. ஏவமேத்த² அங்க³தோபி விஞ்ஞாதப்³போ³ வினிச்ச²யோ.

ஸமுட்டா²னதோதி பாணாதிபாதஅதி³ன்னாதா³னமுஸாவாதா³ சேத்த² காயசித்ததோ, வாசாசித்ததோ, காயவாசாசித்ததோ சாதி திஸமுட்டா²னா ஹோந்தி. அப்³ரஹ்மசரியம் காயசித்தவஸேன ஏகஸமுட்டா²னமேவ. ஸுராமேரயமஜ்ஜபமாத³ட்டா²னம் காயதோ ச, காயசித்ததோ சாதி த்³விஸமுட்டா²னந்தி. ஏவமேத்த² ஸமுட்டா²னதோபி விஞ்ஞாதப்³போ³ வினிச்ச²யோ.

வேத³னாதோதி ஏத்த² ச பாணாதிபாதோ து³க்க²வேத³னாஸம்பயுத்தோவ. அதி³ன்னாதா³னம் தீஸு வேத³னாஸு அஞ்ஞதரவேத³னாஸம்பயுத்தம், ததா² முஸாவாதோ³. இதரானி த்³வே ஸுகா²ய வா அது³க்க²மஸுகா²ய வா வேத³னாய ஸம்பயுத்தானீதி. ஏவமேத்த² வேத³னாதோபி விஞ்ஞாதப்³போ³ வினிச்ச²யோ.

மூலதோதி பாணாதிபாதோ சேத்த² தோ³ஸமோஹமூலோ. அதி³ன்னாதா³னமுஸாவாதா³ லோப⁴மோஹமூலா வா தோ³ஸமோஹமூலா வா. இதரானி த்³வே லோப⁴மோஹமூலானீதி. ஏவமேத்த² மூலதோபி விஞ்ஞாதப்³போ³ வினிச்ச²யோ.

கம்மதோதி பாணாதிபாதஅதி³ன்னாதா³னஅப்³ரஹ்மசரியானி சேத்த² காயகம்மமேவ கம்மபத²ப்பத்தானேவ ச, முஸாவாதோ³ வசீகம்மமேவ. யோ பன அத்த²ப⁴ஞ்ஜகோ, ஸோ கம்மபத²ப்பத்தோ. இதரோ கம்மமேவ. ஸுராமேரயமஜ்ஜபமாத³ட்டா²னம் காயகம்மமேவாதி. ஏவமேத்த² கம்மதோபி விஞ்ஞாதப்³போ³ வினிச்ச²யோ.

விரமதோதி ஏத்த² ஆஹ ‘‘பாணாதிபாதாதீ³ஹி விரமந்தோ குதோ விரமதீ’’தி? வுச்சதே – ஸமாதா³னவஸேன தாவ விரமந்தோ அத்தனோ வா பரேஸம் வா பாணாதிபாதாதி³அகுஸலதோ விரமதி. கிமாரபி⁴த்வா? யதோ விரமதி, ததே³வ. ஸம்பத்தவஸேனாபி விரமந்தோ வுத்தப்பகாராகுஸலதோவ. கிமாரபி⁴த்வா? பாணாதிபாதாதீ³னம் வுத்தாரம்மணானேவ. கேசி பன ப⁴ணந்தி ‘‘ஸுராமேரயமஜ்ஜஸங்கா²தே ஸங்கா²ரே ஆரபி⁴த்வா ஸுராமேரயமஜ்ஜபமாத³ட்டா²னா விரமதி, ஸத்தஸங்கா²ரேஸு யம் பன அவஹரிதப்³ப³ம் ப⁴ஞ்ஜிதப்³ப³ஞ்ச, தம் ஆரபி⁴த்வா அதி³ன்னாதா³னா முஸாவாதா³ ச, ஸத்தேயேவாரபி⁴த்வா பாணாதிபாதா அப்³ரஹ்மசரியா சா’’தி. தத³ஞ்ஞே ‘‘ஏவம் ஸந்தே ‘அஞ்ஞம் சிந்தேந்தோ அஞ்ஞம் கரேய்ய, யஞ்ச பஜஹதி, தம் ந ஜானேய்யா’தி ஏவம்தி³ட்டி²கா ஹுத்வா அனிச்ச²மானா யதே³வ பஜஹதி, தம் அத்தனோ பாணாதிபாதாதி³அகுஸலமேவாரபி⁴த்வா விரமதீ’’தி வத³ந்தி. தத³யுத்தம். கஸ்மா? தஸ்ஸ பச்சுப்பன்னாபா⁴வதோ ப³ஹித்³தா⁴பா⁴வதோ ச. ஸிக்கா²பதா³னஞ்ஹி விப⁴ங்க³பாடே² ‘‘பஞ்சன்னம் ஸிக்கா²பதா³னம் கதி குஸலா…பே… கதி அரணா’’தி புச்சி²த்வா ‘‘குஸலாயேவ, ஸியா ஸுகா²ய வேத³னாய ஸம்பயுத்தா’’தி (விப⁴. 716) ஏவம் பவத்தமானே விஸ்ஸஜ்ஜனே ‘‘பச்சுப்பன்னாரம்மணா’’தி ச ‘‘ப³ஹித்³தா⁴ரம்மணா’’தி ச ஏவம் பச்சுப்பன்னப³ஹித்³தா⁴ரம்மணத்தம் வுத்தம், தம் அத்தனோ பாணாதிபாதாதி³அகுஸலம் ஆரபி⁴த்வா விரமந்தஸ்ஸ ந யுஜ்ஜதி. யம் பன வுத்தம் – ‘‘அஞ்ஞம் சிந்தேந்தோ அஞ்ஞம் கரேய்ய, யஞ்ச பஜஹதி, தம் ந ஜானேய்யா’’தி. தத்த² வுச்சதே – ந கிச்சஸாத⁴னவஸேன பவத்தேந்தோ அஞ்ஞம் சிந்தேந்தோ அஞ்ஞம் கரோதீதி வா, யஞ்ச பஜஹதி, தம் ந ஜானாதீதி வா வுச்சதி.

‘‘ஆரபி⁴த்வான அமதம், ஜஹந்தோ ஸப்³ப³பாபகே;

நித³ஸ்ஸனஞ்சேத்த² ப⁴வே, மக்³க³ட்டோ²ரியபுக்³க³லோ’’தி.

ஏவமேத்த² விரமதோபி விஞ்ஞாதப்³போ³ வினிச்ச²யோ.

ப²லதோதி ஸப்³பே³ ஏவ சேதே பாணாதிபாதாத³யோ து³க்³க³திப²லனிப்³ப³த்தகா ஹோந்தி, ஸுக³தியஞ்ச அனிட்டா²கந்தாமனாபவிபாகனிப்³ப³த்தகா ஹோந்தி, ஸம்பராயே தி³ட்ட²த⁴ம்மே ஏவ ச அவேஸாரஜ்ஜாதி³ப²லனிப்³ப³த்தகா. அபிச ‘‘யோ ஸப்³ப³லஹுஸோ பாணாதிபாதஸ்ஸ விபாகோ மனுஸ்ஸபூ⁴தஸ்ஸ அப்பாயுகஸம்வத்தனிகோ ஹோதீ’’தி (அ. நி. 8.40) ஏவமாதி³னா நயேனேத்த² ப²லதோபி விஞ்ஞாதப்³போ³ வினிச்ச²யோ.

அபி சேத்த² பாணாதிபாதாதி³வேரமணீனம்பி ஸமுட்டா²னவேத³னாமூலகம்மப²லதோ விஞ்ஞாதப்³போ³ வினிச்ச²யோ. தத்தா²யம் விஞ்ஞாபனா – ஸப்³பா³ ஏவ சேதா வேரமணியோ சதூஹி ஸமுட்ட²ஹந்தி காயதோ, காயசித்ததோ, வாசாசித்ததோ, காயவாசாசித்ததோ சாதி. ஸப்³பா³ ஏவ ச ஸுக²வேத³னாஸம்பயுத்தா வா, அது³க்க²மஸுக²வேத³னாஸம்பயுத்தா வா, அலோபா⁴தோ³ஸமூலா வா அலோபா⁴தோ³ஸாமோஹமூலா வா. சதஸ்ஸோபி சேத்த² காயகம்மம், முஸாவாதா³வேரமணீ வசீகம்மம், மக்³க³க்க²ணே ச சித்ததோவ ஸமுட்ட²ஹந்தி, ஸப்³பா³பி மனோகம்மம்.

பாணாதிபாதா வேரமணியா சேத்த² அங்க³பச்சங்க³ஸம்பன்னதா ஆரோஹபரிணாஹஸம்பத்திதா ஜவஸம்பத்திதா ஸுப்பதிட்டி²தபாத³தா சாருதா முது³தா ஸுசிதா ஸூரதா மஹப்³ப³லதா விஸ்ஸத்த²வசனதா லோகபியதா நேலதா அபே⁴ஜ்ஜபரிஸதா அச்ச²ம்பி⁴தா து³ப்பத⁴ம்ஸிதா பரூபக்கமேன அமரணதா அனந்தபரிவாரதா ஸுரூபதா ஸுஸண்டா²னதா அப்பாபா³த⁴தா அஸோகிதா பியேஹி மனாபேஹி ஸத்³தி⁴ம் அவிப்பயோக³தா தீ³கா⁴யுகதாதி ஏவமாதீ³னி ப²லானி.

அதி³ன்னாதா³னா வேரமணியா மஹத்³த⁴னதா பஹூதத⁴னத⁴ஞ்ஞதா அனந்தபோ⁴க³தா அனுப்பன்னபோ⁴கு³ப்பத்திதா உப்பன்னபோ⁴க³தா²வரதா இச்சி²தானம் போ⁴கா³னம் கி²ப்பப்படிலாபி⁴தா ராஜசோருத³கக்³கி³அப்பியதா³யாதே³ஹி அஸாதா⁴ரணபோ⁴க³தா அஸாதா⁴ரணத⁴னப்படிலாபி⁴தா லோகுத்தமதா நத்தி²கபா⁴வஸ்ஸ அஜானனதா ஸுக²விஹாரிதாதி ஏவமாதீ³னி.

அப்³ரஹ்மசரியா வேரமணியா விக³தபச்சத்தி²கதா ஸப்³ப³ஜனபியதா அன்னபானவத்த²ஸயனாதீ³னம் லாபி⁴தா ஸுக²ஸயனதா ஸுக²ப்படிபு³ஜ்ஜ²னதா அபாயப⁴யவினிமுத்ததா இத்தி²பா⁴வப்படிலாப⁴ஸ்ஸ வா நபும்ஸகபா⁴வப்படிலாப⁴ஸ்ஸ வா அப⁴ப்³ப³தா அக்கோத⁴னதா பச்சக்க²காரிதா அபதிதக்க²ந்த⁴தா அனதோ⁴முக²தா இத்தி²புரிஸானம் அஞ்ஞமஞ்ஞபியதா பரிபுண்ணிந்த்³ரியதா பரிபுண்ணலக்க²ணதா நிராஸங்கதா அப்போஸ்ஸுக்கதா ஸுக²விஹாரிதா அகுதோப⁴யதா பியவிப்பயோகா³பா⁴வதாதி ஏவமாதீ³னி.

முஸாவாதா³ வேரமணியா விப்பஸன்னிந்த்³ரியதா விஸ்ஸட்ட²மது⁴ரபா⁴ணிதா ஸமஸிதஸுத்³த⁴த³ந்ததா நாதிதூ²லதா நாதிகிஸதா நாதிரஸ்ஸதா நாதிதீ³க⁴தா ஸுக²ஸம்ப²ஸ்ஸதா உப்பலக³ந்த⁴முக²தா ஸுஸ்ஸூஸகபரிஜனதா ஆதே³ய்யவசனதா கமலுப்பலஸதி³ஸமுது³லோஹிததனுஜிவ்ஹதா அனுத்³த⁴ததா அசபலதாதி ஏவமாதீ³னி.

ஸுராமேரயமஜ்ஜபமாத³ட்டா²னா வேரமணியா அதீதானாக³தபச்சுப்பன்னேஸு ஸப்³ப³கிச்சகரணீயேஸு கி²ப்பம் படிஜானனதா ஸதா³ உபட்டி²தஸதிதா அனும்மத்தகதா ஞாணவந்ததா அனலஸதா அஜளதா அனேலமூக³தா அமத்ததா அப்பமத்ததா அஸம்மோஹதா அச்ச²ம்பி⁴தா அஸாரம்பி⁴தா அனுஸ்ஸங்கிதா ஸச்சவாதி³தா அபிஸுணாப²ருஸாஸம்ப²பலாபவாதி³தா ரத்திந்தி³வமதந்தி³ததா கதஞ்ஞுதா கதவேதி³தா அமச்ச²ரிதா சாக³வந்ததா ஸீலவந்ததா உஜுதா அக்கோத⁴னதா ஹிரிமனதா ஓத்தப்பிதா உஜுதி³ட்டி²கதா மஹாபஞ்ஞதா மேதா⁴விதா பண்டி³ததா அத்தா²னத்த²குஸலதாதி ஏவமாதீ³னி ப²லானி. ஏவமேத்த² பாணாதிபாதாதி³வேரமணீனம் ஸமுட்டா²னவேத³னாமூலகம்மப²லதோபி விஞ்ஞாதப்³போ³ வினிச்ச²யோ.

பச்சி²மபஞ்சஸிக்கா²பத³வண்ணனா

இதா³னி யம் வுத்தம் –

‘‘யோஜேதப்³ப³ம் ததோ யுத்தம், பச்சி²மேஸ்வபி பஞ்சஸு;

ஆவேணிகஞ்ச வத்தப்³ப³ம், ஞேய்யா ஹீனாதி³தாபி சா’’தி.

தஸ்ஸாயம் அத்த²வண்ணனா – ஏதிஸ்ஸா புரிமபஞ்சஸிக்கா²பத³வண்ணனாய யம் யுஜ்ஜதி, தம் ததோ க³ஹேத்வா பச்சி²மேஸ்வபி பஞ்சஸு ஸிக்கா²பதே³ஸு யோஜேதப்³ப³ம். தத்தா²யம் யோஜனா – யதே²வ ஹி புரிமஸிக்கா²பதே³ஸு ஆரம்மணதோ ச ஸுராமேரயமஜ்ஜபமாத³ட்டா²னம் ரூபாயதனாதி³அஞ்ஞதரஸங்கா²ராரம்மணம், ததா² இத⁴ விகாலபோ⁴ஜனம். ஏதேன நயேன ஸப்³பே³ஸம் ஆரம்மணபே⁴தோ³ வேதி³தப்³போ³. ஆதா³னதோ ச யதா² புரிமானி ஸாமணேரேன வா உபாஸகேன வா ஸமாதி³யந்தேன ஸமாதி³ன்னானி ஹோந்தி, ததா² ஏதானிபி. அங்க³தோபி யதா² தத்த² பாணாதிபாதாதீ³னம் அங்க³பே⁴தோ³ வுத்தோ, ஏவமிதா⁴பி விகாலபோ⁴ஜனஸ்ஸ சத்தாரி அங்கா³னி – விகாலோ, யாவகாலிகம், அஜ்ஜோ²ஹரணம், அனும்மத்தகதாதி. ஏதேனானுஸாரேன ஸேஸானம்பி அங்க³விபா⁴கோ³ வேதி³தப்³போ³. யதா² ச தத்த² ஸமுட்டா²னதோ ஸுராமேரயமஜ்ஜபமாத³ட்டா²னம் காயதோ ச காயசித்ததோ சாதி த்³விஸமுட்டா²னம், ஏவமித⁴ விகாலபோ⁴ஜனம். ஏதேன நயேன ஸப்³பே³ஸம் ஸமுட்டா²னம் வேதி³தப்³ப³ம். யதா² ச தத்த² வேத³னாதோ அதி³ன்னாதா³னம் தீஸு வேத³னாஸு அஞ்ஞதரவேத³னாஸம்பயுத்தம், ததா² இத⁴ விகாலபோ⁴ஜனம். ஏதேன நயேன ஸப்³பே³ஸம் வேத³னாஸம்பயோகோ³ வேதி³தப்³போ³. யதா² ச தத்த² அப்³ரஹ்மசரியம் லோப⁴மோஹமூலம், ஏவமித⁴ விகாலபோ⁴ஜனம். அபரானி ச த்³வே ஏதேன நயேன ஸப்³பே³ஸம் மூலபே⁴தோ³ வேதி³தப்³போ³. யதா² ச தத்த² பாணாதிபாதாத³யோ காயகம்மம், ஏவமிதா⁴பி விகாலபோ⁴ஜனாதீ³னி. ஜாதரூபரஜதப்படிக்³க³ஹணம் பன காயகம்மம் வா ஸியா வசீகம்மம் வா காயத்³வாராதீ³ஹி பவத்திஸப்³பா⁴வபரியாயேன, ந கம்மபத²வஸேன. விரமதோதி யதா² ச தத்த² விரமந்தோ அத்தனோ வா பரேஸம் வா பாணாதிபாதாதி³அகுஸலதோ விரமதி, ஏவமிதா⁴பி விகாலபோ⁴ஜனாதி³அகுஸலதோ, குஸலதோபி வா ஏகதோ. யதா² ச புரிமா பஞ்ச வேரமணியோ சதுஸமுட்டா²னா காயதோ, காயசித்ததோ, வாசாசித்ததோ, காயவாசாசித்ததோ சாதி, ஸப்³பா³ ஸுக²வேத³னாஸம்பயுத்தா வா அது³க்க²மஸுக²வேத³னாஸம்பயுத்தா வா, அலோபா⁴தோ³ஸமூலா வா அலோபா⁴தோ³ஸாமோஹமூலா வா, ஸப்³பா³ ச நானப்பகாரஇட்ட²ப²லனிப்³ப³த்தகா, ததா² இதா⁴பீதி.

‘‘யோஜேதப்³ப³ம் ததோ யுத்தம், பச்சி²மேஸ்வபி பஞ்சஸு;

ஆவேணிகஞ்ச வத்தப்³ப³ம், ஞேய்யா ஹீனாதி³தாபி சா’’தி. –

ஏத்த² பன விகாலபோ⁴ஜனந்தி மஜ்ஜ²ன்ஹிகவீதிக்கமே போ⁴ஜனம். ஏதஞ்ஹி அனுஞ்ஞாதகாலே வீதிக்கந்தே போ⁴ஜனம், தஸ்மா ‘‘விகாலபோ⁴ஜன’’ந்தி வுச்சதி, ததோ விகாலபோ⁴ஜனா. நச்சகீ³தவாதி³தவிஸூகத³ஸ்ஸனந்தி ஏத்த² நச்சம் நாம யம்கிஞ்சி நச்சம், கீ³தந்தி யம்கிஞ்சி கீ³தம், வாதி³தந்தி யம்கிஞ்சி வாதி³தம். விஸூகத³ஸ்ஸனந்தி கிலேஸுப்பத்திபச்சயதோ குஸலபக்க²பி⁴ந்த³னேன விஸூகானம் த³ஸ்ஸனம், விஸூகபூ⁴தம் வா த³ஸ்ஸனம் விஸூகத³ஸ்ஸனம். நச்சா ச கீ³தா ச வாதி³தா ச விஸூகத³ஸ்ஸனா ச நச்சகீ³தவாதி³தவிஸூகத³ஸ்ஸனா. விஸூகத³ஸ்ஸனஞ்சேத்த² ப்³ரஹ்மஜாலே வுத்தனயேனேவ க³ஹேதப்³ப³ம். வுத்தஞ்ஹி தத்த² –

‘‘யதா² வா பனேகே போ⁴ந்தோ ஸமணப்³ராஹ்மணா ஸத்³தா⁴தே³ய்யானி போ⁴ஜனானி பு⁴ஞ்ஜித்வா தே ஏவரூபம் விஸூகத³ஸ்ஸனமனுயுத்தா விஹரந்தி, ஸேய்யதி²த³ம், நச்சம் கீ³தம் வாதி³தம் பேக்க²ம் அக்கா²னம் பாணிஸ்ஸரம் வேதாலம் கும்ப⁴தூ²ணம் ஸோப⁴னகம் சண்டா³லம் வம்ஸம் தோ⁴வனம் ஹத்தி²யுத்³த⁴ம் அஸ்ஸயுத்³த⁴ம் மஹிம்ஸயுத்³த⁴ம் உஸப⁴யுத்³த⁴ம் அஜயுத்³த⁴ம் மேண்ட³யுத்³த⁴ம் குக்குடயுத்³த⁴ம் வட்டகயுத்³த⁴ம் த³ண்ட³யுத்³த⁴ம் முட்டி²யுத்³த⁴ம் நிப்³பு³த்³த⁴ம் உய்யோதி⁴கம் ப³லக்³க³ம் ஸேனாப்³யூஹம் அனீகத³ஸ்ஸனம் இதி வா, இதி ஏவரூபா விஸூகத³ஸ்ஸனா படிவிரதோ ஸமணோ கோ³தமோ’’தி (தீ³. நி. 1.12).

அத² வா யதா²வுத்தேனத்தே²ன நச்சகீ³தவாதி³தானி ஏவ விஸூகானி நச்சகீ³தவாதி³தவிஸூகானி, தேஸம் த³ஸ்ஸனம் நச்சகீ³தவாதி³தவிஸூகத³ஸ்ஸனம், தஸ்மா நச்சகீ³தவாதி³தவிஸூகத³ஸ்ஸனா. ‘‘த³ஸ்ஸனஸவனா’’தி வத்தப்³பே³ யதா² ‘‘ஸோ ச ஹோதி மிச்சா²தி³ட்டி²கோ விபரீதத³ஸ்ஸனோ’’தி ஏவமாதீ³ஸு (அ. நி. 1.308) அசக்கு²த்³வாரப்பவத்தம்பி விஸயக்³க³ஹணம் ‘‘த³ஸ்ஸன’’ந்தி வுச்சதி, ஏவம் ஸவனம்பி ‘‘த³ஸ்ஸன’’ந்த்வேவ வுத்தம். த³ஸ்ஸனகம்யதாய உபஸங்கமித்வா பஸ்ஸதோ ஏவ சேத்த² வீதிக்கமோ ஹோதி. டி²தனிஸின்னஸயனோகாஸே பன ஆக³தம் க³ச்ச²ந்தஸ்ஸ வா ஆபாத²க³தம் பஸ்ஸதோ ஸியா ஸம்கிலேஸோ, ந வீதிக்கமோ. த⁴ம்மூபஸம்ஹிதம்பி சேத்த² கீ³தம் ந வட்டதி, கீ³தூபஸம்ஹிதோ பன த⁴ம்மோ வட்டதீதி வேதி³தப்³போ³.

மாலாதீ³னி தா⁴ரணாதீ³ஹி யதா²ஸங்க்²யம் யோஜேதப்³பா³னி. தத்த² மாலாதி யம்கிஞ்சி புப்ப²ஜாதம். விலேபனந்தி யம்கிஞ்சி விலேபனத்த²ம் பிஸித்வா படியத்தம். அவஸேஸம் ஸப்³ப³ம்பி வாஸசுண்ணதூ⁴பனாதி³கம் க³ந்த⁴ஜாதம் க³ந்தோ⁴. தம் ஸப்³ப³ம்பி மண்ட³னவிபூ⁴ஸனத்த²ம் ந வட்டதி, பே⁴ஸஜ்ஜத்த²ந்து வட்டதி, பூஜனத்த²ஞ்ச அபி⁴ஹடம் ஸாதி³யதோ ந கேனசி பரியாயேன ந வட்டதி. உச்சாஸயனந்தி பமாணாதிக்கந்தம் வுச்சதி. மஹாஸயனந்தி அகப்பியஸயனம் அகப்பியத்த²ரணஞ்ச. தது³ப⁴யம்பி ஸாதி³யதோ ந கேனசி பரியாயேன வட்டதி. ஜாதரூபந்தி ஸுவண்ணம். ரஜதந்தி கஹாபணோ, லோஹமாஸகதா³ருமாஸகஜதுமாஸகாதி³ யம் யம் தத்த² தத்த² வோஹாரம் க³ச்ச²தி, தது³ப⁴யம்பி ஜாதரூபரஜதம். தஸ்ஸ யேன கேனசி பகாரேன ஸாதி³யனம் படிக்³க³ஹோ நாம, ஸோ ந யேன கேனசி பரியாயேன வட்டதீதி ஏவம் ஆவேணிகம் வத்தப்³ப³ம்.

த³ஸபி சேதானி ஸிக்கா²பதா³னி ஹீனேன ச²ந்தே³ன சித்தவீரியவீமம்ஸாஹி வா ஸமாதி³ன்னானி ஹீனானி, மஜ்ஜி²மேஹி மஜ்ஜி²மானி, பணீதேஹி பணீதானி. தண்ஹாதி³ட்டி²மானேஹி வா உபக்கிலிட்டா²னி ஹீனானி, அனுபக்கிலிட்டா²னி மஜ்ஜி²மானி, தத்த² தத்த² பஞ்ஞாய அனுக்³க³ஹிதானி பணீதானி. ஞாணவிப்பயுத்தேன வா குஸலசித்தேன ஸமாதி³ன்னானி ஹீனானி, ஸஸங்கா²ரிகஞாணஸம்பயுத்தேன மஜ்ஜி²மானி, அஸங்கா²ரிகேன பணீதானீதி ஏவம் ஞேய்யா ஹீனாதி³தாபி சாதி.

ஏத்தாவதா ச யா புப்³பே³ ‘‘யேன யத்த² யதா³ யஸ்மா’’திஆதீ³ஹி ச²ஹி கா³தா²ஹி ஸிக்கா²பத³பாட²ஸ்ஸ வண்ணனத்த²ம் மாதிகா நிக்கி²த்தா, ஸா அத்த²தோ பகாஸிதா ஹோதீதி.

பரமத்த²ஜோதிகாய கு²த்³த³கபாட²-அட்ட²கதா²ய

ஸிக்கா²பத³வண்ணனா நிட்டி²தா.