2. பது³மவக்³கோ³

[261] 1. பது³மஜாதகவண்ணனா

யதா² கேஸா ச மஸ்ஸூ சாதி இத³ம் ஸத்தா² ஜேதவனே விஹரந்தோ ஆனந்த³போ³தி⁴ம்ஹி மாலாபூஜகாரகே பி⁴க்கூ² ஆரப்³ப⁴ கதே²ஸி. வத்து² காலிங்க³போ³தி⁴ஜாதகே ஆவிப⁴விஸ்ஸதி. ஸோ பன ஆனந்த³த்தே²ரேன ரோபிதத்தா ‘‘ஆனந்த³போ³தீ⁴’’தி ஜாதோ. தே²ரேன ஹி ஜேதவனத்³வாரகோட்ட²கே போ³தி⁴ஸ்ஸ ரோபிதபா⁴வோ ஸகலஜம்பு³தீ³பே பத்த²ரி. அதே²கச்சே ஜனபத³வாஸினோ பி⁴க்கூ² ‘‘ஆனந்த³போ³தி⁴ம்ஹி மாலாபூஜம் கரிஸ்ஸாமா’’தி ஜேதவனம் ஆக³ந்த்வா ஸத்தா²ரம் வந்தி³த்வா புனதி³வஸே ஸாவத்தி²ம் பவிஸித்வா உப்பலவீதி²ம் க³ந்த்வா மாலம் அலபி⁴த்வா ஆக³ந்த்வா ஆனந்த³த்தே²ரஸ்ஸ ஆரோசேஸும் – ‘‘ஆவுஸோ, மயம் ‘போ³தி⁴ம்ஹி மாலாபூஜம் கரிஸ்ஸாமா’தி உப்பலவீதி²ம் க³ந்த்வா ஏகமாலம்பி ந லபி⁴ம்ஹா’’தி. தே²ரோ ‘‘அஹம் வோ, ஆவுஸோ, ஆஹரிஸ்ஸாமீ’’தி உப்பலவீதி²ம் க³ந்த்வா ப³ஹூ நீலுப்பலகலாபே உக்கி²பாபேத்வா ஆக³ம்ம தேஸம் தா³பேஸி, தே தானி க³ஹேத்வா போ³தி⁴ஸ்ஸ பூஜம் கரிம்ஸு. தம் பவத்திம் ஸுத்வா த⁴ம்மஸபா⁴யம் பி⁴க்கூ² தே²ரஸ்ஸ கு³ணகத²ம் ஸமுட்டா²பேஸும் – ‘‘ஆவுஸோ, ஜானபதா³ பி⁴க்கூ² அப்பபுஞ்ஞா உப்பலவீதி²ம் க³ந்த்வா மாலம் ந லபி⁴ம்ஸு, தே²ரோ பன க³ந்த்வாவ ஆஹராபேஸீ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவ வத்துசே²கா கதா²குஸலா மாலம் லப⁴ந்தி, புப்³பே³பி லபி⁴ம்ஸுயேவா’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஸேட்டி²புத்தோ அஹோஸி. அந்தோனக³ரே ச ஏகஸ்மிம் ஸரே பது³மானி புப்ப²ந்தி. ஏகோ சி²ன்னனாஸோ புரிஸோ தம் ஸரம் ரக்க²தி. அதே²கதி³வஸம் பா³ராணஸியம் உஸ்ஸவே கு⁴ட்டே² மாலம் பிளந்தி⁴த்வா உஸ்ஸவம் கீளிதுகாமா தயோ ஸேட்டி²புத்தா ‘‘நாஸச்சி²ன்னஸ்ஸ அபூ⁴தேன வண்ணம் வத்வா மாலம் யாசிஸ்ஸாமா’’தி தஸ்ஸ பது³மானி ப⁴ஞ்ஜனகாலே ஸரஸ்ஸ ஸந்திகம் க³ந்த்வா ஏகமந்தம் அட்ட²ம்ஸு.

தேஸு ஏகோ தம் ஆமந்தேத்வா பட²மம் கா³த²மாஹ –

31. ‘‘யதா² கேஸா ச மஸ்ஸூ ச, சி²ன்னம் சி²ன்னம் விரூஹதி;

ஏவம் ருஹது தே நாஸா, பது³மம் தே³ஹி யாசிதோ’’தி.

ஸோ தஸ்ஸ குஜ்ஜி²த்வா பது³மம் ந அதா³ஸி.

அத²ஸ்ஸ து³தியோ து³தியம் கா³த²மாஹ –

32. ‘‘யதா² ஸாரதி³கம் பீ³ஜம், கே²த்தே வுத்தம் விரூஹதி;

ஏவம் ருஹது தே நாஸா, பது³மம் தே³ஹி யாசிதோ’’தி.

தத்த² ஸாரதி³கந்தி ஸரத³ஸமயே க³ஹேத்வா நிக்கி²த்தம் ஸாரஸம்பன்னம் பீ³ஜம். ஸோ தஸ்ஸபி குஜ்ஜி²த்வா பது³மம் ந அதா³ஸி.

அத²ஸ்ஸ ததியோ ததியம் கா³த²மாஹ –

33. ‘‘உபோ⁴பி பலபந்தேதே, அபி பத்³மானி த³ஸ்ஸதி;

வஜ்ஜும் வா தே ந வா வஜ்ஜும், நத்தி² நாஸாய ரூஹனா;

தே³ஹி ஸம்ம பது³மானி, அஹம் யாசாமி யாசிதோ’’தி.

தத்த² உபோ⁴பி பலபந்தேதேதி ஏதே த்³வேபி முஸா வத³ந்தி. அபி பத்³மானீதி ‘‘அபி நாம நோ பது³மானி த³ஸ்ஸதீ’’தி சிந்தேத்வா ஏவம் வத³ந்தி. வஜ்ஜும் வா தே ந வா வஜ்ஜுந்தி ‘‘தவ நாஸா ருஹதூ’’தி ஏவம் வதே³ய்யும் வா ந வா வதே³ய்யும், ஏதேஸம் வசனம் அப்பமாணம், ஸப்³ப³த்தா²பி நத்தி² நாஸாய ருஹனா, அஹம் பன தே நாஸம் படிச்ச ந கிஞ்சி வதா³மி, கேவலம் யாசாமி, தஸ்ஸ மே தே³ஹி, ஸம்ம, பது³மானி யாசிதோதி.

தம் ஸுத்வா பது³மஸரகோ³பகோ ‘‘இமேஹி த்³வீஹி முஸாவாதோ³ கதி²தோ, தும்ஹேஹி ஸபா⁴வோ கதி²தோ, தும்ஹாகம் அனுச்ச²விகானி பது³மானீ’’தி மஹந்தம் பது³மகலாபம் ஆதா³ய தஸ்ஸ த³த்வா அத்தனோ பது³மஸரமேவ க³தோ.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ பது³மலாபீ⁴ ஸேட்டி²புத்தோ அஹமேவ அஹோஸி’’ந்தி.

பது³மஜாதகவண்ணனா பட²மா.

[262] 2. முது³பாணிஜாதகவண்ணனா

பாணி சே முது³கோ சஸ்ஸாதி இத³ம் ஸத்தா² ஜேதவனே விஹரந்தோ ஏகம் உக்கண்டி²தபி⁴க்கு²ம் ஆரப்³ப⁴ கதே²ஸி. தஞ்ஹி ஸத்தா² த⁴ம்மஸப⁴ம் ஆனீதம் ‘‘ஸச்சம் கிர த்வம், பி⁴க்கு², உக்கண்டி²தோஸீ’’தி புச்சி²த்வா ‘‘ஸச்சம், ப⁴ந்தே’’தி வுத்தே ‘‘பி⁴க்கு², இத்தி²யோ நாமேதா கிலேஸவஸேன க³மனதோ அரக்கி²யா, போராணகபண்டி³தாபி அத்தனோ தீ⁴தரம் ரக்கி²தும் நாஸக்கி²ம்ஸு, பிதரா ஹத்தே² க³ஹேத்வா டி²தாவ பிதரம் அஜானாபேத்வா கிலேஸவஸேன புரிஸேன ஸத்³தி⁴ம் பலாயீ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ தஸ்ஸ அக்³க³மஹேஸியா குச்சி²ம்ஹி நிப்³ப³த்தித்வா வயப்பத்தோ தக்கஸிலாயம் ஸப்³ப³ஸிப்பானி உக்³க³ண்ஹித்வா பிது அச்சயேன ரஜ்ஜே பதிட்டா²ய த⁴ம்மேன ரஜ்ஜம் காரேஸி. ஸோ தீ⁴தரஞ்ச பா⁴கி³னேய்யஞ்ச த்³வேபி அந்தோனிவேஸனே போஸேந்தோ ஏகதி³வஸம் அமச்சேஹி ஸத்³தி⁴ம் நிஸின்னோ ‘‘மமச்சயேன மய்ஹம் பா⁴கி³னேய்யோ ராஜா ப⁴விஸ்ஸதி, தீ⁴தாபி மே தஸ்ஸ அக்³க³மஹேஸீ ப⁴விஸ்ஸதீ’’தி வத்வா அபரபா⁴கே³ பா⁴கி³னேய்யஸ்ஸ வயப்பத்தகாலே புன அமச்சேஹி ஸத்³தி⁴ம் நிஸின்னோ ‘‘மய்ஹம் பா⁴கி³னேய்யஸ்ஸ அஞ்ஞஸ்ஸ ரஞ்ஞோ தீ⁴தரம் ஆனேஸ்ஸாம, மய்ஹம் தீ⁴தரம்பி அஞ்ஞஸ்மிம் ராஜகுலே த³ஸ்ஸாம, ஏவம் நோ ஞாதகா ப³ஹுதரா ப⁴விஸ்ஸந்தீ’’தி ஆஹ. அமச்சா ஸம்படிச்சி²ம்ஸு.

அத² ராஜா பா⁴கி³னேய்யஸ்ஸ ப³ஹிகே³ஹம் தா³பேஸி, அந்தோ பவேஸனம் நிவாரேஸி. தே பன அஞ்ஞமஞ்ஞம் படிப³த்³த⁴சித்தா அஹேஸும். குமாரோ ‘‘கேன நு கோ² உபாயேன ராஜதீ⁴தரம் ப³ஹி நீஹராபேய்ய’’ந்தி சிந்தேந்தோ ‘‘அத்தி² உபாயோ’’தி தா⁴தியா லஞ்ஜம் த³த்வா ‘‘கிம், அய்யபுத்த, கிச்ச’’ந்தி வுத்தே ‘‘அம்ம, கத²ம் நு கோ² ராஜதீ⁴தரம் ப³ஹி காதும் ஓகாஸம் லபே⁴ய்யாமா’’தி ஆஹ. ‘‘ராஜதீ⁴தாய ஸத்³தி⁴ம் கதே²த்வா ஜானிஸ்ஸாமீ’’தி. ‘‘ஸாது⁴, அம்மா’’தி. ஸா க³ந்த்வா ‘‘ஏஹி, அம்ம, ஸீஸே தே ஊகா க³ண்ஹிஸ்ஸாமீ’’தி தம் நீசபீட²கே நிஸீதா³பேத்வா ஸயம் உச்சே நிஸீதி³த்வா தஸ்ஸா ஸீஸம் அத்தனோ ஊரூஸு ட²பேத்வா ஊகா க³ண்ஹயமானா ராஜதீ⁴தாய ஸீஸம் நகே²ஹி விஜ்ஜி². ராஜதீ⁴தா ‘‘நாயம் அத்தனோ நகே²ஹி விஜ்ஜ²தி, பிதுச்சா²புத்தஸ்ஸ மே குமாரஸ்ஸ நகே²ஹி விஜ்ஜ²தீ’’தி ஞத்வா ‘‘அம்ம, த்வம் குமாரஸ்ஸ ஸந்திகம் அக³மாஸீ’’தி புச்சி². ‘‘ஆம, அம்மா’’தி. ‘‘கிம் தேன ஸாஸனம் கதி²த’’ந்தி? ‘‘தவ ப³ஹிகரணூபாயம் புச்ச²தி, அம்மா’’தி. ராஜதீ⁴தா ‘‘பண்டி³தோ ஹோந்தோ ஜானிஸ்ஸதீ’’தி பட²மம் கா³த²ம் ப³ந்தி⁴த்வா ‘‘அம்ம, இமம் உக்³க³ஹேத்வா குமாரஸ்ஸ கதே²ஹீ’’தி ஆஹ.

34. ‘‘பாணி சே முது³கோ சஸ்ஸ, நாகோ³ சஸ்ஸ ஸுகாரிதோ;

அந்த⁴காரோ ச வஸ்ஸேய்ய, அத² நூன ததா³ ஸியா’’தி.

ஸா தம் உக்³க³ண்ஹித்வா குமாரஸ்ஸ ஸந்திகம் க³ந்த்வா ‘‘அம்ம, ராஜதீ⁴தா கிமாஹா’’தி வுத்தே ‘‘அய்யபுத்த, அஞ்ஞம் கிஞ்சி அவத்வா இமம் கா³த²ம் பஹிணீ’’தி தம் கா³த²ம் உதா³ஹாஸி. குமாரோ ச தஸ்ஸத்த²ம் ஞத்வா ‘‘க³ச்ச², அம்மா’’தி தம் உய்யோஜேஸி.

கா³தா²யத்தோ² – ஸசே தே ஏகிஸ்ஸா சூளுபட்டா²காய மம ஹத்தோ² விய ஹத்தோ² முது³ அஸ்ஸ, யதி³ ச தே ஆனேஞ்ஜகாரணம் ஸுகாரிதோ ஏகோ ஹத்தீ² அஸ்ஸ, யதி³ ச தம் தி³வஸம் சதுரங்க³ஸமன்னாக³தோ அதிவிய ப³ஹலோ அந்த⁴காரோ அஸ்ஸ, தே³வோ ச வஸ்ஸேய்ய. அத² நூன ததா³ ஸியாதி தாதி³ஸே காலே இமே சத்தாரோ பச்சயே ஆக³ம்ம ஏகம்ஸேன தே மனோரத²ஸ்ஸ மத்த²கக³மனம் ஸியாதி.

குமாரோ ஏதமத்த²ம் தத²தோ ஞத்வா ஏகம் அபி⁴ரூபம் முது³ஹத்த²ம் சூளுபட்டா²கம் ஸஜ்ஜம் கத்வா மங்க³லஹத்தி²கோ³பகஸ்ஸ லஞ்ஜம் த³த்வா ஹத்தி²ம் ஆனேஞ்ஜகாரணம் காரேத்வா காலம் ஆக³மேந்தோ அச்சி².

அதே²கஸ்மிம் காளபக்கு²போஸத²தி³வஸே மஜ்ஜி²மயாமஸமனந்தரே க⁴னகாளமேகோ⁴ வஸ்ஸி. ஸோ ‘‘அயம் தா³னி ராஜதீ⁴தாய வுத்ததி³வஸோ’’தி வாரணம் அபி⁴ருஹித்வா முது³ஹத்த²கம் சூளுபட்டா²கம் ஹத்தி²பிட்டே² நிஸீதா³பேத்வா க³ந்த்வா ராஜனிவேஸனஸ்ஸ ஆகாஸங்க³ணாபி⁴முகே² டா²னே ஹத்தி²ம் மஹாபி⁴த்தியம் அல்லீயாபேத்வா வாதபானஸமீபே தேமேந்தோ அட்டா²ஸி. ராஜாபி தீ⁴தரம் ரக்க²ந்தோ அஞ்ஞத்த² ஸயிதும் ந தே³தி, அத்தனோ ஸந்திகே சூளஸயனே ஸயாபேதி. ஸாபி ‘‘அஜ்ஜ குமாரோ ஆக³மிஸ்ஸதீ’’தி ஞத்வா நித்³த³ம் அனோக்கமித்வாவ நிபன்னா ‘‘தாத ந்ஹாயிதுகாமாம்ஹீ’’தி ஆஹ. ராஜா ‘‘ஏஹி, அம்மா’’தி தம் ஹத்தே² க³ஹேத்வா வாதபானஸமீபம் நேத்வா ‘‘ந்ஹாயாஹி, அம்மா’’தி உக்கி²பித்வா வாதபானஸ்ஸ ப³ஹிபஸ்ஸே பமுகே² ட²பேத்வா ஏகஸ்மிம் ஹத்தே² க³ஹேத்வா அட்டா²ஸி. ஸா ந்ஹாயமானாவ குமாரஸ்ஸ ஹத்த²ம் பஸாரேஸி, ஸோ தஸ்ஸா ஹத்த²தோ ஆப⁴ரணானி ஓமுஞ்சித்வா உபட்டா²காய ஹத்தே² பிளந்தி⁴த்வா தம் உக்கி²பித்வா ராஜதீ⁴தரம் நிஸ்ஸாய பமுகே² ட²பேஸி. ஸா தஸ்ஸா ஹத்த²ம் க³ஹேத்வா பிது ஹத்தே² ட²பேஸி, ஸோ தஸ்ஸா ஹத்த²ம் க³ஹேத்வா தீ⁴து ஹத்த²ம் முஞ்சி, ஸா இதரஸ்மாபி ஹத்தா² ஆப⁴ரணானி ஓமுஞ்சித்வா தஸ்ஸா து³தியஹத்தே² பிளந்தி⁴த்வா பிது ஹத்தே² ட²பேத்வா குமாரேன ஸத்³தி⁴ம் அக³மாஸி. ராஜா ‘‘தீ⁴தாயேவ மே’’தி ஸஞ்ஞாய தம் தா³ரிகம் ந்ஹானபரியோஸானே ஸிரிக³ப்³பே⁴ ஸயாபேத்வா த்³வாரம் பிதா⁴ய லஞ்சே²த்வா ஆரக்க²ம் த³த்வா அத்தனோ ஸயனம் க³ந்த்வா நிபஜ்ஜி.

ஸோ பபா⁴தாய ரத்தியா த்³வாரம் விவரித்வா தம் தா³ரிகம் தி³ஸ்வா ‘‘கிமேத’’ந்தி புச்சி². ஸா தஸ்ஸா குமாரேன ஸத்³தி⁴ம் க³தபா⁴வம் கதே²ஸி. ராஜா விப்படிஸாரீ ஹுத்வா ‘‘ஹத்தே² க³ஹேத்வா சரந்தேனபி மாதுகா³மம் ரக்கி²தும் ந ஸக்கா, ஏவம் அரக்கி²யா நாமித்தி²யோ’’தி சிந்தேத்வா இதரா த்³வே கா³தா² அவோச –

35. ‘‘அனலா முது³ஸம்பா⁴ஸா, து³ப்பூரா தா நதீ³ஸமா;

ஸீத³ந்தி நம் விதி³த்வான, ஆரகா பரிவஜ்ஜயே.

36. ‘‘யம் ஏதா உபஸேவந்தி, ச²ந்த³ஸா வா த⁴னேன வா;

ஜாதவேதோ³வ ஸம் டா²னம், கி²ப்பம் அனுத³ஹந்தி ந’’ந்தி.

தத்த² அனலா முது³ஸம்பா⁴ஸாதி முது³வசனேனபி அஸக்குணேய்யா, நேவ ஸக்கா ஸண்ஹவாசாய ஸங்க³ண்ஹிதுந்தி அத்தோ². புரிஸேஹி வா ஏதாஸம் ந அலந்தி அனலா. முது³ஸம்பா⁴ஸாதி ஹத³யே த²த்³தே⁴பி ஸம்பா⁴ஸாவ முது³ ஏதாஸந்தி முது³ஸம்பா⁴ஸா. து³ப்பூரா தா நதீ³ஸமாதி யதா² நதீ³ ஆக³தாக³தஸ்ஸ உத³கஸ்ஸ ஸந்த³னதோ உத³கேன து³ப்பூரா, ஏவம் அனுபூ⁴தானுபூ⁴தேஹி மேது²னாதீ³ஹி அபரிதுஸ்ஸனதோ து³ப்பூரா. தேன வுத்தம் –

‘‘திண்ணம், பி⁴க்க²வே, த⁴ம்மானம் அதித்தோ அப்படிவானோ மாதுகா³மோ காலம் கரோதி. கதமேஸம் திண்ணம்? மேது²னஸமாபத்தியா ச விஜாயனஸ்ஸ ச அலங்காரஸ்ஸ ச. இமேஸம் கோ², பி⁴க்க²வே, திண்ணம் த⁴ம்மானம் அதித்தோ அப்படிவானோ மாதுகா³மோ காலம் கரோதீ’’தி.

ஸீத³ந்தீதி அட்ட²ஸு மஹானிரயேஸு ஸோளஸஸு உஸ்ஸத³னிரயேஸு நிமுஜ்ஜந்தி. நந்தி நிபாதமத்தம். விதி³த்வானாதி ஏவம் ஜானித்வா. ஆரகா பரிவஜ்ஜயேதி ‘‘ஏதா இத்தி²யோ நாம மேது²னத⁴ம்மாதீ³ஹி அதித்தா காலம் கத்வா ஏதேஸு நிரயேஸு ஸீத³ந்தி, ஏதா ஏவம் அத்தனா ஸீத³மானா கஸ்ஸஞ்ஞஸ்ஸ ஸுகா²ய ப⁴விஸ்ஸந்தீ’’தி ஏவம் ஞத்வா பண்டி³தோ புரிஸோ தூ³ரதோவ தா பரிவஜ்ஜயேதி தீ³பேதி. ச²ந்த³ஸா வா த⁴னேன வாதி அத்தனோ வா ச²ந்தே³ன ருசியா பேமேன, ப⁴திவஸேன லத்³த⁴த⁴னேன வா யம் புரிஸம் ஏதா இத்தி²யோ உபஸேவந்தி ப⁴ஜந்தி. ஜாதவேதோ³தி அக்³கி³. ஸோ ஹி ஜாதமத்தோவ வேதி³யதி, விதி³தோ பாகடோ ஹோதீதி ஜாதவேதோ³. ஸோ யதா² அத்தனோ டா²னம் காரணம் ஓகாஸம் அனுத³ஹதி, ஏவமேதாபி யம் உபஸேவந்தி, தம் புரிஸம் த⁴னயஸஸீலபஞ்ஞாஸமன்னாக³தம்பி தேஸம் ஸப்³பே³ஸம் த⁴னாதீ³னம் வினாஸனதோ புன தாய ஸம்பத்தியா அப⁴ப்³பு³ப்பத்திகம் குருமானா கி²ப்பம் அனுத³ஹந்தி ஜா²பேந்தி. வுத்தம்பி சேதம் –

‘‘ப³லவந்தோ து³ப்³ப³லா ஹோந்தி, தா²மவந்தோபி ஹாயரே;

சக்கு²மா அந்த⁴கா ஹோந்தி, மாதுகா³மவஸம் க³தா.

‘‘கு³ணவந்தோ நிக்³கு³ணா ஹோந்தி, பஞ்ஞவந்தோபி ஹாயரே;

பமத்தா ப³ந்த⁴னே ஸேந்தி, மாதுகா³மவஸம் க³தா.

‘‘அஜ்ஜே²னஞ்ச தபம் ஸீலம், ஸச்சம் சாக³ம் ஸதிம் மதிம்;

அச்சி²ந்த³ந்தி பமத்தஸ்ஸ, பந்த²தூ³பீ⁴வ தக்கரா.

‘‘யஸம் கித்திம் தி⁴திம் ஸூரம், பா³ஹுஸச்சம் பஜானனம்;

கே²பயந்தி பமத்தஸ்ஸ, கட்ட²புஞ்ஜம்வ பாவகோ’’தி.

ஏவம் வத்வா மஹாஸத்தோ ‘‘பா⁴கி³னேய்யோபி மயாவ போஸேதப்³போ³’’தி மஹந்தேன ஸக்காரேன தீ⁴தரம் தஸ்ஸேவ த³த்வா தம் ஓபரஜ்ஜே பதிட்ட²பேஸி. ஸோபி மாதுலஸ்ஸ அச்சயேன ரஜ்ஜே பதிட்ட²ஹி.

ஸத்தா² இமம் த⁴ம்மதே³ஸேனம் ஆஹரித்வா ஸச்சானி பகாஸேத்வா ஜாதகம் ஸமோதா⁴னேஸி, ஸச்சபரியோஸானே உக்கண்டி²தபி⁴க்கு² ஸோதாபத்திப²லே பதிட்ட²ஹி. ‘‘ததா³ ராஜா அஹமேவ அஹோஸி’’ந்தி.

முது³பாணிஜாதகவண்ணனா து³தியா.

[263] 3. சூளபலோப⁴னஜாதகவண்ணனா

அபி⁴ஜ்ஜமானே வாரிஸ்மிந்தி இத³ம் ஸத்தா² ஜேதவனே விஹரந்தோ ஏகம் உக்கண்டி²தபி⁴க்கு²மேவ ஆரப்³ப⁴ கதே²ஸி. தஞ்ஹி ஸத்தா² த⁴ம்மஸப⁴ம் ஆனீதம் ‘‘ஸச்சம் கிர, த்வம் பி⁴க்கு², உக்கண்டி²தோஸீ’’தி புச்சி²த்வா ‘‘ஸச்சம், ப⁴ந்தே’’தி வுத்தே ‘‘பி⁴க்கு², இத்தி²யோ நாமேதா போராணகே ஸுத்³த⁴ஸத்தேபி ஸம்கிலேஸேஸு’’ந்தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தோ ராஜா அபுத்தகோ ஹுத்வா அத்தனோ இத்தி²யோ ‘‘புத்தபத்த²னம் கரோதா²’’தி ஆஹ. தா புத்தே பத்தே²ந்தி. ஏவம் அத்³தா⁴னே க³தே போ³தி⁴ஸத்தோ ப்³ரஹ்மலோகா சவித்வா அக்³க³மஹேஸியா குச்சி²ஸ்மிம் நிப்³ப³த்தி. தம் ஜாதமத்தம் ந்ஹாபேத்வா த²ஞ்ஞபாயனத்தா²ய தா⁴தியா அத³ம்ஸு. ஸோ பாயமானோ ரோத³தி, அத² நம் அஞ்ஞிஸ்ஸா அத³ம்ஸு. மாதுகா³மஹத்த²க³தோ நேவ துண்ஹீ ஹோதி. அத² நம் ஏகஸ்ஸ பாத³மூலிகஸ்ஸ அத³ம்ஸு, தேன க³ஹிதமத்தோயேவ துண்ஹீ அஹோஸி. ததோ பட்டா²ய புரிஸாவ தம் க³ஹேத்வா சரந்தி. த²ஞ்ஞம் பாயேந்தா து³ஹித்வா வா பாயேந்தி, ஸாணிஅந்தரேன வா த²னம் முகே² ட²பேந்தி. தேனஸ்ஸ அனித்தி²க³ந்த⁴குமாரோதி நாமம் கரிம்ஸு. தஸ்ஸ அபராபரம் வத்³த⁴மானஸ்ஸபி மாதுகா³மம் நாம த³ஸ்ஸேதும் ந ஸக்கா. தேனஸ்ஸ ராஜா விஸும்யேவ நிஸஜ்ஜாதி³ட்டா²னானி ஜா²னாகா³ரஞ்ச காரேஸி.

ஸோ தஸ்ஸ ஸோளஸவஸ்ஸிககாலே சிந்தேஸி – ‘‘மய்ஹம் அஞ்ஞோ புத்தோ நத்தி², அயம் பன குமாரோ காமே ந பரிபு⁴ஞ்ஜதி, ரஜ்ஜம்பி ந இச்சி²ஸ்ஸதி, து³ல்லத்³தோ⁴ வத மே புத்தோ’’தி. அத² நம் ஏகா நச்சகீ³தவாதி³தகுஸலா புரிஸே பரிசரித்வா அத்தனோ வஸே காதும் படிப³லா தருணனாடகித்தீ² உபஸங்கமித்வா ‘‘தே³வ, கிம் நு சிந்தேஸீ’’தி ஆஹ, ராஜா தம் காரணம் ஆசிக்கி². ‘‘ஹோது, தே³வ, அஹம் தம் பலோபே⁴த்வா காமரஸம் ஜானாபேஸ்ஸாமீ’’தி. ‘‘ஸசே மே புத்தம் அனித்தி²க³ந்த⁴குமாரம் பலோபே⁴தும் ஸக்கிஸ்ஸஸி, ஸோ ராஜா ப⁴விஸ்ஸதி, த்வம் அக்³க³மஹேஸீ’’தி. ஸா ‘‘மமேஸோ பா⁴ரோ, தும்ஹே மா சிந்தயித்தா²’’தி வத்வா ஆரக்க²மனுஸ்ஸே உபஸங்கமித்வா ஆஹ – ‘‘அஹம் பச்சூஸஸமயே ஆக³ந்த்வா அய்யபுத்தஸ்ஸ ஸயனட்டா²னே ப³ஹிஜா²னாகா³ரே ட²த்வா கா³யிஸ்ஸாமி. ஸசே ஸோ குஜ்ஜ²தி, மய்ஹம் கதே²ய்யாத², அஹம் அபக³ச்சி²ஸ்ஸாமி. ஸசே ஸுணாதி, வண்ணம் மே கதே²ய்யாதா²’’தி. தே ‘‘ஸாதூ⁴’’தி ஸம்படிச்சி²ம்ஸு.

ஸாபி பச்சூஸகாலே தஸ்மிம் பதே³ஸே ட²த்வா தந்திஸ்ஸரேன கீ³தஸ்ஸரம், கீ³தஸ்ஸரேன தந்திஸ்ஸரம் அனதிக்கமித்வா மது⁴ரேன ஸத்³தே³ன கா³யி, குமாரோ ஸுணந்தோவ நிபஜ்ஜி, புனதி³வஸே ச ஆஸன்னட்டா²னே ட²த்வா கா³யிதும் ஆணாபேஸி, புனதி³வஸே ஜா²னாகா³ரே ட²த்வா கா³யிதும் ஆணாபேஸி, புனதி³வஸே அத்தனோ ஸமீபே ட²த்வாதி ஏவம் அனுக்கமேனேவ தண்ஹம் உப்பாதே³த்வா லோகத⁴ம்மம் ஸேவித்வா காமரஸம் ஞத்வா ‘‘மாதுகா³மம் நாம அஞ்ஞேஸம் ந த³ஸ்ஸாமீ’’தி அஸிம் க³ஹேத்வா அந்தரவீதி²ம் ஓதரித்வா புரிஸே அனுப³ந்த⁴ந்தோ விசரி. அத² நம் ராஜா கா³ஹாபேத்வா தாய குமாரிகாய ஸத்³தி⁴ம் நக³ரா நீஹராபேஸி. உபோ⁴பி அரஞ்ஞம் பவிஸித்வா அதோ⁴க³ங்க³ம் க³ந்த்வா ஏகஸ்மிம் பஸ்ஸே க³ங்க³ம், ஏகஸ்மிம் ஸமுத்³த³ம் கத்வா உபி⁴ன்னமந்தரே அஸ்ஸமபத³ம் மாபேத்வா வாஸம் கப்பயிம்ஸு. குமாரிகா பண்ணஸாலாயம் நிஸீதி³த்வா கந்த³மூலாதீ³னி பசதி, போ³தி⁴ஸத்தோ அரஞ்ஞதோ ப²லாப²லம் ஆஹரதி.

அதே²கதி³வஸம் தஸ்மிம் ப²லாப²லத்தா²ய க³தே ஸமுத்³த³தீ³பகா ஏகோ தாபஸோ பி⁴க்கா²சாரத்தா²ய ஆகாஸேன க³ச்ச²ந்தோ தூ⁴மம் தி³ஸ்வா அஸ்ஸமபதே³ ஓதரி. அத² நம் ஸா ‘‘நிஸீத³, யாவ பச்சதீ’’தி நிஸீதா³பேத்வா இத்தி²குத்தேன பலோபே⁴த்வா ஜா²னா சாவேத்வா ப்³ரஹ்மசரியமஸ்ஸ அந்தரதா⁴பேஸி. ஸோ பக்க²ச்சி²ன்னகாகோ விய ஹுத்வா தம் ஜஹிதும் அஸக்கோந்தோ ஸப்³ப³தி³வஸம் தத்தே²வ ட²த்வா போ³தி⁴ஸத்தம் ஆக³ச்ச²ந்தம் தி³ஸ்வா வேகே³ன ஸமுத்³தா³பி⁴முகோ² பலாயி. அத² நம் ஸோ ‘‘பச்சாமித்தோ மே அயம் ப⁴விஸ்ஸதீ’’தி அஸிம் க³ஹேத்வா அனுப³ந்தி⁴. தாபஸோ ஆகாஸே உப்பதனாகாரம் த³ஸ்ஸேத்வா ஸமுத்³தே³ பதி. போ³தி⁴ஸத்தோ ‘‘ஏஸ தாபஸோ ஆகாஸேனாக³தோ ப⁴விஸ்ஸதி, ஜா²னஸ்ஸ பரிஹீனத்தா ஸமுத்³தே³ பதிதோ, மயா தா³னிஸ்ஸ அவஸ்ஸயேன ப⁴விதும் வட்டதீ’’தி சிந்தேத்வா வேலந்தே ட²த்வா இமா கா³தா² அவோச –

37. ‘‘அபி⁴ஜ்ஜமானே வாரிஸ்மிம், ஸயம் ஆக³ம்ம இத்³தி⁴யா;

மிஸ்ஸீபா⁴வித்தி²யா க³ந்த்வா, ஸம்ஸீத³ஸி மஹண்ணவே.

38. ‘‘ஆவட்டனீ மஹாமாயா, ப்³ரஹ்மசரியவிகோபனா;

ஸீத³ந்தி நம் விதி³த்வான, ஆரகா பரிவஜ்ஜயே.

39. ‘‘யம் ஏதா உபஸேவந்தி, ச²ந்த³ஸா வா த⁴னேன வா;

ஜாதவேதோ³வ ஸம் டா²னம், கி²ப்பம் அனுத³ஹந்தி ந’’ந்தி.

தத்த² அபி⁴ஜ்ஜமானே வாரிஸ்மிந்தி இமஸ்மிம் உத³கே அசலமானே அகம்பமானே உத³கம் அனாமஸித்வா ஸயம் ஆகாஸேனேவ இத்³தி⁴யா ஆக³ந்த்வா. மிஸ்ஸீபா⁴வித்தி²யாதி லோகத⁴ம்மவஸேன இத்தி²யா ஸத்³தி⁴ம் மிஸ்ஸீபா⁴வம். ஆவட்டனீ மஹாமாயாதி இத்தி²யோ நாமேதா காமாவட்டேன ஆவட்டனதோ ஆவட்டனீ, அனந்தாஹி இத்தி²மாயாஹி ஸமன்னாக³தத்தா மஹாமாயா நாம. வுத்தஞ்ஹேதம் –

‘‘மாயா சேதா மரீசீ ச, ஸோகோ ரோகோ³ சுபத்³த³வோ;

க²ரா ச ப³ந்த⁴னா சேதா, மச்சுபாஸோ கு³ஹாஸயோ;

தாஸு யோ விஸ்ஸஸே போஸோ, ஸோ நரேஸு நராத⁴மோ’’தி. (ஜா. 2.21.118);

ப்³ரஹ்மசரியவிகோபனாதி ஸேட்ட²சரியஸ்ஸ மேது²னவிரதிப்³ரஹ்மசரியஸ்ஸ விகோபனா. ஸீத³ந்தீதி இத்தி²யோ நாமேதா இஸீனம் ப்³ரஹ்மசரியவிகோபனேன அபாயேஸு ஸீத³ந்தி. ஸேஸம் புரிமனயேனேவ யோஜேதப்³ப³ம்.

ஏதம் பன போ³தி⁴ஸத்தஸ்ஸ வசனம் ஸுத்வா தாபஸோ ஸமுத்³த³மஜ்ஜே² டி²தோயேவ நட்ட²ஜ்ஜா²னம் புன உப்பாதே³த்வா ஆகாஸேன அத்தனோ வஸனட்டா²னமேவ க³தோ. போ³தி⁴ஸத்தோ சிந்தேஸி – ‘‘அயம் தாபஸோ ஏவம் பா⁴ரிகோ ஸமானோ ஸிம்ப³லிதூலம் விய ஆகாஸேன க³தோ, மயாபி இமினா விய ஜா²னம் உப்பாதே³த்வா ஆகாஸேன சரிதும் வட்டதீ’’தி. ஸோ அஸ்ஸமம் க³ந்த்வா தம் இத்தி²ம் மனுஸ்ஸபத²ம் நேத்வா ‘‘க³ச்ச², த்வ’’ந்தி உய்யோஜேத்வா அரஞ்ஞம் பவிஸித்வா மனுஞ்ஞே பூ⁴மிபா⁴கே³ அஸ்ஸமம் மாபேத்வா இஸிபப்³ப³ஜ்ஜம் பப்³ப³ஜித்வா கஸிணபரிகம்மம் கத்வா அபி⁴ஞ்ஞா ச ஸமாபத்தியோ ச நிப்³ப³த்தேத்வா ப்³ரஹ்மலோகபராயணோ அஹோஸி.

ஸத்தா² இமம் த⁴ம்மதே³ஸனம் ஆஹரித்வா ஸச்சானி பகாஸேத்வா ஜாதகம் ஸமோதா⁴னேஸி, ஸச்சபரியோஸானே உக்கண்டி²தபி⁴க்கு² ஸோதாபத்திப²லே பதிட்ட²ஹி. ‘‘ததா³ அனித்தி²க³ந்த⁴குமாரோ அஹமேவ அஹோஸி’’ந்தி.

சூளபலோப⁴னஜாதகவண்ணனா ததியா.

[264] 4. மஹாபனாத³ஜாதகவண்ணனா

பனாதோ³ நாம ஸோ ராஜாதி இத³ம் ஸத்தா² க³ங்கா³தீரே நிஸின்னோ ப⁴த்³த³ஜித்தே²ரஸ்ஸானுபா⁴வம் ஆரப்³ப⁴ கதே²ஸி. ஏகஸ்மிஞ்ஹி ஸமயே ஸத்தா² ஸாவத்தி²யம் வஸ்ஸம் வஸித்வா ‘‘ப⁴த்³த³ஜிகுமாரஸ்ஸ ஸங்க³ஹம் கரிஸ்ஸாமீ’’தி பி⁴க்கு²ஸங்க⁴பரிவுதோ சாரிகம் சரமானோ ப⁴த்³தி³யனக³ரம் பத்வா ஜாதியாவனே தயோ மாஸே வஸி குமாரஸ்ஸ ஞாணபரிபாகம் ஆக³மயமானோ. ப⁴த்³த³ஜிகுமாரோ மஹாயஸோ அஸீதிகோடிவிப⁴வஸ்ஸ ப⁴த்³தி³யஸேட்டி²னோ ஏகபுத்தகோ. தஸ்ஸ திண்ணம் உதூனம் அனுச்ச²விகா தயோ பாஸாதா³ அஹேஸும். ஏகேகஸ்மிம் சத்தாரோ சத்தாரோ மாஸே வஸதி. ஏகஸ்மிம் வஸித்வா நாடகபரிவுதோ மஹந்தேன யஸேன அஞ்ஞம் பாஸாத³ம் க³ச்ச²தி. தஸ்மிம் க²ணே ‘‘குமாரஸ்ஸ யஸம் பஸ்ஸிஸ்ஸாமா’’தி ஸகலனக³ரம் ஸங்கு²பி⁴, பாஸாத³ந்தரே சக்காதிசக்கானி மஞ்சாதிமஞ்சானி ப³ந்த⁴ந்தி.

ஸத்தா² தயோ மாஸே வஸித்வா ‘‘மயம் க³ச்சா²மா’’தி நக³ரவாஸீனம் ஆரோசேஸி. நாக³ரா ‘‘ப⁴ந்தே, ஸ்வே க³மிஸ்ஸதா²’’தி ஸத்தா²ரம் நிமந்தேத்வா து³தியதி³வஸே பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னம் ஸஜ்ஜேத்வா நக³ரமஜ்ஜே² மண்ட³பம் கத்வா அலங்கரித்வா ஆஸனானி பஞ்ஞபேத்வா காலம் ஆரோசேஸும். ஸத்தா² பி⁴க்கு²ஸங்க⁴பரிவுதோ தத்த² க³ந்த்வா நிஸீதி³, மனுஸ்ஸா மஹாதா³னம் அத³ம்ஸு. ஸத்தா² நிட்டி²தப⁴த்தகிச்சோ மது⁴ரஸ்ஸரேன அனுமோத³னம் ஆரபி⁴. தஸ்மிம் க²ணே ப⁴த்³த³ஜிகுமாரோபி பாஸாத³தோ பாஸாத³ம் க³ச்ச²தி, தஸ்ஸ ஸம்பத்தித³ஸ்ஸனத்தா²ய தம் தி³வஸம் ந கோசி அக³மாஸி, அத்தனோ மனுஸ்ஸாவ பரிவாரேஸும். ஸோ மனுஸ்ஸே புச்சி² – ‘‘அஞ்ஞஸ்மிம் காலே மயி பாஸாத³தோ பாஸாத³ம் க³ச்ச²ந்தே ஸகலனக³ரம் ஸங்கு²ப⁴தி, சக்காதிசக்கானி மஞ்சாதிமஞ்சானி ப³ந்த⁴ந்தி, அஜ்ஜ பன ட²பேத்வா மய்ஹம் மனுஸ்ஸே அஞ்ஞோ கோசி நத்தி², கிம் நு கோ² காரண’’ந்தி. ‘‘ஸாமி, ஸம்மாஸம்பு³த்³தோ⁴ இமம் ப⁴த்³தி³யனக³ரம் உபனிஸ்ஸாய தயோ மாஸே வஸித்வா அஜ்ஜேவ க³மிஸ்ஸதி, ஸோ ப⁴த்தகிச்சம் நிட்டா²பேத்வா மஹாஜனஸ்ஸ த⁴ம்மம் தே³ஸேதி, ஸகலனக³ரவாஸினோபி தஸ்ஸ த⁴ம்மகத²ம் ஸுணந்தீ’’தி. ஸோ ‘‘தேன ஹி ஏத², மயம்பி ஸுணிஸ்ஸாமா’’தி ஸப்³பா³ப⁴ரணபடிமண்டி³தோவ மஹந்தேன பரிவாரேன உபஸங்கமித்வா பரிஸபரியந்தே டி²தோ த⁴ம்மம் ஸுணந்தோ டி²தோவ ஸப்³ப³கிலேஸே கே²பேத்வா அக்³க³ப²லம் அரஹத்தம் பாபுணி.

ஸத்தா² ப⁴த்³தி³யஸேட்டி²ம் ஆமந்தேத்வா ‘‘மஹாஸேட்டி², புத்தோ தே அலங்கதபடியத்தோவ த⁴ம்மகத²ம் ஸுணந்தோ அரஹத்தே பதிட்டி²தோ, தேனஸ்ஸ அஜ்ஜேவ பப்³ப³ஜிதும் வா வட்டதி பரினிப்³பா³யிதும் வா’’தி ஆஹ. ‘‘ப⁴ந்தே, மய்ஹம் புத்தஸ்ஸ பரினிப்³பா³னேன கிச்சம் நத்தி², பப்³பா³ஜேத² நம், பப்³பா³ஜேத்வா ச பன நம் க³ஹேத்வா ஸ்வே அம்ஹாகம் கே³ஹம் உபஸங்கமதா²’’தி. ப⁴க³வா நிமந்தனம் அதி⁴வாஸேத்வா குலபுத்தம் ஆதா³ய விஹாரம் க³ந்த்வா பப்³பா³ஜேத்வா உபஸம்பத³ம் தா³பேஸி. தஸ்ஸ மாதாபிதரோ ஸத்தாஹம் மஹாஸக்காரம் கரிம்ஸு. ஸத்தா² ஸத்தாஹம் வஸித்வா குலபுத்தமாதா³ய சாரிகம் சரந்தோ கோடிகா³மம் பாபுணி. கோடிகா³மவாஸினோ மனுஸ்ஸா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னம் அத³ம்ஸு. ஸத்தா² ப⁴த்தகிச்சாவஸானே அனுமோத³னம் ஆரபி⁴. குலபுத்தோ அனுமோத³னகரணகாலே ப³ஹிகா³மம் க³ந்த்வா ‘‘ஸத்து² ஆக³தகாலேயேவ உட்ட²ஹிஸ்ஸாமீ’’தி க³ங்கா³தித்த²ஸமீபே ஏகஸ்மிம் ருக்க²மூலே ஜா²னம் ஸமாபஜ்ஜித்வா நிஸீதி³. மஹல்லகத்தே²ரேஸு ஆக³ச்ச²ந்தேஸுபி அனுட்ட²ஹித்வா ஸத்து² ஆக³தகாலேயேவ உட்ட²ஹி. புது²ஜ்ஜனா பி⁴க்கூ² ‘‘அயம் புரே விய பப்³ப³ஜித்வா மஹாதே²ரே ஆக³ச்ச²ந்தேபி தி³ஸ்வா ந உட்ட²ஹதீ’’தி குஜ்ஜி²ம்ஸு.

கோடிகா³மவாஸினோ மனுஸ்ஸா நாவாஸங்கா⁴தே ப³ந்தி⁴ம்ஸு. ஸத்தா² நாவாஸங்கா⁴தே ட²த்வா ‘‘கஹம், ப⁴த்³த³ஜீ’’தி புச்சி². ‘‘ஏஸ, ப⁴ந்தே, இதே⁴வா’’தி. ‘‘ஏஹி, ப⁴த்³த³ஜி, அம்ஹேஹி ஸத்³தி⁴ம் ஏகனாவம் அபி⁴ருஹா’’தி. தே²ரோபி உப்பதித்வா ஏகனாவாய அட்டா²ஸி. அத² நம் க³ங்கா³ய மஜ்ஜ²ம் க³தகாலே ஸத்தா² ஆஹ – ‘‘ப⁴த்³த³ஜி, தயா மஹாபனாத³ராஜகாலே அஜ்ஜா²வுத்த²பாஸாதோ³ கஹ’’ந்தி. இமஸ்மிம் டா²னே நிமுக்³கோ³, ப⁴ந்தேதி. புது²ஜ்ஜனா பி⁴க்கூ² ‘‘ப⁴த்³த³ஜித்தே²ரோ அஞ்ஞம் ப்³யாகரோதீ’’தி ஆஹம்ஸு. ஸத்தா² ‘‘தேன ஹி, ப⁴த்³த³ஜி, ஸப்³ரஹ்மசாரீனம் கங்க²ம் சி²ந்தா³’’தி ஆஹ. தஸ்மிம் க²ணே தே²ரோ ஸத்தா²ரம் வந்தி³த்வா இத்³தி⁴ப³லேன க³ந்த்வா பாஸாத³தூ²பிகம் பாத³ங்கு³லியா க³ஹேத்வா பஞ்சவீஸதியோஜனம் பாஸாத³ம் க³ஹேத்வா ஆகாஸே உப்பதி. உப்பதிதோ ச பன ஹேட்டா²பாஸாதே³ டி²தானம் பாஸாத³ம் பி⁴ந்தி³த்வா பஞ்ஞாயி. ஸோ ஏகயோஜனம் த்³வியோஜனம் தியோஜனந்தி யாவ வீஸதியோஜனா உத³கதோ பாஸாத³ம் உக்கி²பி. அத²ஸ்ஸ புரிமப⁴வே ஞாதகா பாஸாத³லோபே⁴ன மச்ச²கச்ச²பனாக³மண்டூ³கா ஹுத்வா தஸ்மிம்யேவ பாஸாதே³ நிப்³ப³த்தா பாஸாதே³ உட்ட²ஹந்தே பரிவத்தித்வா பரிவத்தித்வா உத³கேயேவ பதிம்ஸு. ஸத்தா² தே பதந்தே தி³ஸ்வா ‘‘ஞாதகா தே, ப⁴த்³த³ஜி, கிலமந்தீ’’தி ஆஹ. தே²ரோ ஸத்து² வசனம் ஸுத்வா பாஸாத³ம் விஸ்ஸஜ்ஜேஸி, பாஸாதோ³ யதா²டா²னேயேவ பதிட்ட²ஹி, ஸத்தா² பாரக³ங்க³ம் க³தோ. அத²ஸ்ஸ க³ங்கா³தீரேயேவ ஆஸனம் பஞ்ஞாபயிம்ஸு, ஸோ பஞ்ஞத்தே வரபு³த்³தா⁴ஸனே தருணஸூரியோ விய ரஸ்மியோ முஞ்சந்தோ நிஸீதி³. அத² நம் பி⁴க்கூ² ‘‘கஸ்மிம் காலே, ப⁴ந்தே, அயம் பாஸாதோ³ ப⁴த்³த³ஜித்தே²ரேன அஜ்ஜா²வுத்தோ²’’தி புச்சி²ம்ஸு. ஸத்தா² ‘‘மஹாபனாத³ராஜகாலே’’தி வத்வா அதீதம் ஆஹரி.

அதீதே விதே³ஹரட்டே² மிதி²லாயம் ஸுருசி நாம ராஜா அஹோஸி, புத்தோபி தஸ்ஸ ஸுருசியேவ, தஸ்ஸ பன புத்தோ மஹாபனாதோ³ நாம அஹோஸி, தே இமம் பாஸாத³ம் படிலபி⁴ம்ஸு. படிலாப⁴த்தா²ய பனஸ்ஸ இத³ம் புப்³ப³கம்மம் – த்³வே பிதாபுத்தா நளேஹி ச உது³ம்ப³ரதா³ரூஹி ச பச்சேகபு³த்³த⁴ஸ்ஸ வஸனபண்ணஸாலம் கரிம்ஸு. இமஸ்மிம் ஜாதகே ஸப்³ப³ம் அதீதவத்து² பகிண்ணகனிபாதே ஸுருசிஜாதகே (ஜா. 1.14.102 ஆத³யோ) ஆவிப⁴விஸ்ஸதி.

ஸத்தா² இமம் அதீதம் ஆஹரித்வா ஸம்மாஸம்பு³த்³தோ⁴ ஹுத்வா இமா கா³தா² அவோச –

40. ‘‘பனாதோ³ நாம ஸோ ராஜா, யஸ்ஸ யூபோ ஸுவண்ணயோ;

திரியம் ஸோளஸுப்³பே³தோ⁴, உத்³த⁴மாஹு ஸஹஸ்ஸதா⁴.

41. ‘‘ஸஹஸ்ஸகண்டோ³ ஸதகே³ண்டு³, த⁴ஜாலு ஹரிதாமயோ;

அனச்சும் தத்த² க³ந்த⁴ப்³பா³, ச² ஸஹஸ்ஸானி ஸத்ததா⁴.

42. ‘‘ஏவமேதம் ததா³ ஆஸி, யதா² பா⁴ஸஸி ப⁴த்³த³ஜி;

ஸக்கோ அஹம் ததா³ ஆஸிம், வேய்யாவச்சகரோ தவா’’தி.

தத்த² யூபோதி பாஸாதோ³. திரியம் ஸோளஸுப்³பே³தோ⁴தி வித்தா²ரதோ ஸோளஸகண்ட³பாதவித்தா²ரோ அஹோஸி. உத்³த⁴மாஹு ஸஹஸ்ஸதா⁴தி உப்³பே³தே⁴ன ஸஹஸ்ஸகண்ட³க³மனமத்தம் உச்சோ அஹு, ஸஹஸ்ஸகண்ட³க³மனக³ணனாய பஞ்சவீஸதியோஜனப்பமாணம் ஹோதி. வித்தா²ரோ பனஸ்ஸ அட்ட²யோஜனமத்தோ.

ஸஹஸ்ஸகண்டோ³ ஸதகே³ண்டூ³தி ஸோ பனேஸ ஸஹஸ்ஸகண்டு³ப்³பே³தோ⁴ பாஸாதோ³ ஸதபூ⁴மிகோ அஹோஸி. த⁴ஜாலூதி த⁴ஜஸம்பன்னோ. ஹரிதாமயோதி ஹரிதமணிபரிக்கி²த்தோ. அட்ட²கதா²யம் பன ‘‘ஸமாலுஹரிதாமயோ’’தி பாடோ², ஹரிதமணிமயேஹி த்³வாரகவாடவாதபானேஹி ஸமன்னாக³தோதி அத்தோ². ஸமாலூதி கிர த்³வாரகவாடவாதபானானம் நாமம். க³ந்த⁴ப்³பா³தி நடா, ச² ஸஹஸ்ஸானி ஸத்ததா⁴தி ச² க³ந்த⁴ப்³ப³ஸஹஸ்ஸானி ஸத்ததா⁴ ஹுத்வா தஸ்ஸ பாஸாத³ஸ்ஸ ஸத்தஸு டா²னேஸு ரஞ்ஞோ ரதிஜனனத்தா²ய நச்சிம்ஸூதி அத்தோ². தே ஏவம் நச்சந்தாபி ராஜானம் ஹாஸேதும் நாஸக்கி²ம்ஸு, அத² ஸக்கோ தே³வராஜா தே³வனடம் பேஸேத்வா ஸமஜ்ஜம் காரேஸி, ததா³ மஹாபனாதோ³ ஹஸி.

யதா² பா⁴ஸஸி, ப⁴த்³த³ஜீதி ப⁴த்³த³ஜித்தே²ரேன ஹி ‘‘ப⁴த்³த³ஜி, தயா மஹாபனாத³ராஜகாலே அஜ்ஜா²வுத்த²பாஸாதோ³ கஹ’’ந்தி வுத்தே ‘‘இமஸ்மிம் டா²னே நிமுக்³கோ³, ப⁴ந்தே’’தி வத³ந்தேன தஸ்மிம் காலே அத்தனோ அத்தா²ய தஸ்ஸ பாஸாத³ஸ்ஸ நிப்³ப³த்தபா⁴வோ ச மஹாபனாத³ராஜபா⁴வோ ச பா⁴ஸிதோ ஹோதி. தம் க³ஹேத்வா ஸத்தா² ‘‘யதா² த்வம், ப⁴த்³த³ஜி, பா⁴ஸஸி, ததா³ ஏதம் ததே²வ அஹோஸி, அஹம் ததா³ தவ காயவேய்யாவச்சகரோ ஸக்கோ தே³வானமிந்தோ³ அஹோஸி’’ந்தி ஆஹ. தஸ்மிம் க²ணே புது²ஜ்ஜனபி⁴க்கூ² நிக்கங்கா² அஹேஸும்.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ மஹாபனாதோ³ ராஜா ப⁴த்³த³ஜி அஹோஸி, ஸக்கோ பன அஹமேவ அஹோஸி’’ந்தி.

மஹாபனாத³ஜாதகவண்ணனா சதுத்தா².

[265] 5. கு²ரப்பஜாதகவண்ணனா

தி³ஸ்வா கு²ரப்பேதி இத³ம் ஸத்தா² ஜேதவனே விஹரந்தோ ஏகம் ஓஸ்ஸட்ட²வீரியம் பி⁴க்கு²ம் ஆரப்³ப⁴ கதே²ஸி. தஞ்ஹி ஸத்தா² ‘‘ஸச்சம் கிர த்வம், பி⁴க்கு², ஓஸ்ஸட்ட²வீரியோ’’தி புச்சி²த்வா ‘‘ஸச்சம், ப⁴ந்தே’’தி வுத்தே ‘‘பி⁴க்கு², கஸ்மா ஏவம் த்வம் நிய்யானிகஸாஸனே பப்³ப³ஜித்வா வீரியம் ஓஸ்ஸஜி, போராணகபண்டி³தா அனிய்யானிகட்டா²னேபி வீரியம் கரிம்ஸூ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஏகஸ்மிம் அடவிஆரக்க²ககுலே நிப்³ப³த்தித்வா வயப்பத்தோ பஞ்சபுரிஸஸதபரிவாரோ அடவிஆரக்க²கேஸு ஸப்³ப³ஜேட்ட²கோ ஹுத்வா அடவிமுகே² ஏகஸ்மிம் கா³மே வாஸம் கப்பேஸி. ஸோ ப⁴திம் க³ஹேத்வா மனுஸ்ஸே அடவிம் அதிக்காமேதி. அதே²கஸ்மிம் தி³வஸே பா³ராணஸேய்யகோ ஸத்த²வாஹபுத்தோ பஞ்சஹி ஸகடஸதேஹி தம் கா³மம் பத்வா தம் பக்கோஸாபேத்வா ‘‘ஸம்ம, ஸஹஸ்ஸம் க³ஹேத்வா மம் அடவிம் அதிக்காமேஹீ’’தி ஆஹ. ஸோ ‘‘ஸாதூ⁴’’தி தஸ்ஸ ஹத்த²தோ ஸஹஸ்ஸம் க³ண்ஹி, ப⁴திம் க³ண்ஹந்தோயேவ தஸ்ஸ ஜீவிதம் பரிச்சஜி. ஸோ தம் ஆதா³ய அடவிம் பாவிஸி, அடவிமஜ்ஜே² பஞ்சஸதா சோரா உட்ட²ஹிம்ஸு, சோரே தி³ஸ்வாவ ஸேஸபுரிஸா உரேன நிபஜ்ஜிம்ஸு, ஆரக்க²கஜேட்ட²கோ ஏகோவ நத³ந்தோ வக்³க³ந்தோ பஹரித்வா பஞ்சஸதேபி சோரே பலாபேத்வா ஸத்த²வாஹபுத்தம் ஸோத்தி²னா கந்தாரம் தாரேஸி.

ஸத்த²வாஹபுத்தோ பரகந்தாரே ஸத்த²ம் நிவேஸேத்வா ஆரக்க²கஜேட்ட²கம் நானக்³க³ரஸபோ⁴ஜனம் போ⁴ஜேத்வா ஸயம்பி பு⁴த்தபாதராஸோ ஸுக²னிஸின்னோ தேன ஸத்³தி⁴ம் ஸல்லபந்தோ ‘‘ஸம்ம, ததா²தா³ருணானம் சோரானம் ஆவுதா⁴னி க³ஹேத்வா அவத்த²ரணகாலே கேன நு கோ² தே காரணேன சித்துத்ராஸமத்தம்பி ந உப்பன்ன’’ந்தி புச்ச²ந்தோ பட²மம் கா³த²மாஹ –

43. ‘‘தி³ஸ்வா கு²ரப்பே த⁴னுவேக³னுன்னே, க²க்³கே³ க³ஹீதே திகி²ணே தேலதோ⁴தே;

தஸ்மிம் ப⁴யஸ்மிம் மரணே வியூள்ஹே, கஸ்மா நு தே நாஹு ச²ம்பி⁴தத்த’’ந்தி.

தத்த² த⁴னுவேக³னுன்னேதி த⁴னுவேகே³ன விஸ்ஸட்டே². க²க்³கே³ க³ஹீதேதி த²ருத³ண்டே³ஹி ஸுக³ஹிதே க²க்³கே³. மரணே வியூள்ஹேதி மரணே பச்சுபட்டி²தே. கஸ்மா நு தே நாஹூதி கேன நு கோ² காரணேன நாஹோஸி. ச²ம்பி⁴தத்தந்தி ஸரீரசலனம்.

தம் ஸுத்வா ஆரக்க²கஜேட்ட²கோ இதரா த்³வே கா³தா² அபா⁴ஸி –

44. ‘‘தி³ஸ்வா கு²ரப்பே த⁴னுவேக³னுன்னே, க²க்³கே³ க³ஹீதே திகி²ணே தேலதோ⁴தே;

தஸ்மிம் ப⁴யஸ்மிம் மரணே வியூள்ஹே, வேத³ம் அலத்த²ம் விபுலம் உளாரம்.

45. ‘‘ஸோ வேத³ஜாதோ அஜ்ஜ²ப⁴விம் அமித்தே, புப்³பே³வ மே ஜீவிதமாஸி சத்தம்;

ந ஹி ஜீவிதே ஆலயம் குப்³ப³மானோ, ஸூரோ கயிரா ஸூரகிச்சம் கதா³சீ’’தி.

தத்த² வேத³ம் அலத்த²ந்தி துட்டி²ஞ்சேவ ஸோமனஸ்ஸஞ்ச படிலபி⁴ம். விபுலந்தி ப³ஹும். உளாரந்தி உத்தமம். அஜ்ஜ²ப⁴விந்தி ஜீவிதம் பரிச்சஜித்வா அபி⁴ப⁴விம். புப்³பே³வ மே ஜீவிதமாஸி சத்தந்தி மயா புப்³பே³வ தவ ஹத்த²தோ ப⁴திம் க³ண்ஹந்தேனேவ ஜீவிதம் சத்தமாஸி. ந ஹி ஜீவிதே ஆலயம் குப்³ப³மானோதி ஜீவிதஸ்மிஞ்ஹி நிகந்திம் குருமானோ புரிஸகிச்சம் கதா³சிபி ந கரோதி.

ஏவம் ஸோ ஸரவஸ்ஸே வஸ்ஸந்தே ஜீவிதனிகந்தியா விஸ்ஸட்ட²த்தா அத்தனா ஸூரகிச்சஸ்ஸ கதபா⁴வம் ஞாபேத்வா ஸத்த²வாஹபுத்தம் உய்யோஜேத்வா ஸககா³மமேவ பச்சாக³ந்த்வா தா³னாதீ³னி புஞ்ஞானி கத்வா யதா²கம்மம் க³தோ.

ஸத்தா² இமம் த⁴ம்மதே³ஸனம் ஆஹரித்வா ஸச்சானி பகாஸேத்வா ஜாதகம் ஸமோதா⁴னேஸி, ஸச்சபரியோஸானே ஓஸ்ஸட்ட²வீரியோ பி⁴க்கு² அரஹத்தே பதிட்ட²ஹி. ‘‘ததா³ ஆரக்க²கஜேட்ட²கோ அஹமேவ அஹோஸி’’ந்தி.

கு²ரப்பஜாதகவண்ணனா பஞ்சமா.

[266] 6. வாதக்³க³ஸிந்த⁴வஜாதகவண்ணனா

யேனாஸி கிஸியா பண்டூ³தி இத³ம் ஸத்தா² ஜேதவனே விஹரந்தோ ஸாவத்தி²யம் அஞ்ஞதரம் குடும்பி³கம் ஆரப்³ப⁴ கதே²ஸி. ஸாவத்தி²யம் கிரேகா அபி⁴ரூபா இத்தீ² ஏகம் அபி⁴ரூபம் குடும்பி³கம் தி³ஸ்வா படிப³த்³த⁴சித்தா அஹோஸி, ஸகலஸரீரம் ஜா²யமானோ வியஸ்ஸா அப்³ப⁴ந்தரே கிலேஸக்³கி³ உப்பஜ்ஜி. ஸா நேவ காயஸ்ஸாத³ம் லபி⁴, ந சித்தஸ்ஸாத³ம், ப⁴த்தம்பிஸ்ஸா ந ருச்சி, கேவலம் மஞ்சகஅடனிம் க³ஹேத்வா நிபஜ்ஜி. அத² நம் உபட்டா²யிகா ச ஸஹாயிகா ச புச்சி²ம்ஸு – ‘‘கிம் நு கோ² த்வம் கம்பமானசித்தா அடனிம் க³ஹேத்வா நிபன்னா, கிம் தே அபா²ஸுக’’ந்தி. ஸா ஏகம் த்³வே வாரே அகதே²த்வா புனப்புனம் வுச்சமானா தமத்த²ம் ஆரோசேஸி. அத² நம் தா ஸமஸ்ஸாஸேத்வா ‘‘த்வம் மா சிந்தயி, மயம் தம் ஆனேஸ்ஸாமா’’தி வத்வா க³ந்த்வா குடும்பி³கேன ஸத்³தி⁴ம் மந்தேஸும், ஸோ படிக்கி²பித்வா புனப்புனம் வுச்சமானோ அதி⁴வாஸேஸி. தா ‘‘அஸுகதி³வஸே அஸுகவேலாயம் ஆக³ச்சா²’’தி படிஞ்ஞம் க³ஹேத்வா க³ந்த்வா தஸ்ஸா ஆரோசேஸும். ஸா அத்தனோ ஸயனக³ப்³ப⁴ம் ஸஜ்ஜேத்வா அத்தானம் அலங்கரித்வா ஸயனபிட்டே² நிஸின்னா தஸ்மிம் ஆக³ந்த்வா ஸயனேகதே³ஸே நிஸின்னே சிந்தேஸி – ‘‘ஸசாஹம் இமஸ்ஸ க³ருகம் அகத்வா இதா³னேவ ஓகாஸம் கரிஸ்ஸாமி, இஸ்ஸரியம் மே பரிஹாயிஸ்ஸதி, ஆக³ததி³வஸேயேவ ஓகாஸகரணம் நாம அகாரணம், அஜ்ஜ ந மங்கும் கத்வா அஞ்ஞஸ்மிம் தி³வஸே ஓகாஸம் கரிஸ்ஸாமீ’’தி. அத² நம் ஹத்த²க³ஹணாதி³வஸேன கேளிம் காதும் ஆரத்³த⁴ம் ஹத்தே² க³ஹேத்வா ‘‘அபேஹி அபேஹி, ந மே தயா அத்தோ²’’தி நிப்³ப⁴ச்சே²ஸி. ஸோ ஓஸக்கித்வா லஜ்ஜிதோ உட்டா²ய அத்தனோ கே³ஹமேவ க³தோ.

இதரா இத்தி²யோ தாய ததா² கதபா⁴வம் ஞத்வா குடும்பி³கே நிக்க²ந்தே தம் உபஸங்கமித்வா ஏவமாஹம்ஸு – ‘‘த்வம் ஏதஸ்மிம் படிப³த்³த⁴சித்தா ஆஹாரம் படிக்கி²பித்வா நிபஜ்ஜி, அத² நம் மயம் புனப்புனம் யாசித்வா ஆனயிம்ஹ, தஸ்ஸ கஸ்மா ஓகாஸம் ந அகாஸீ’’தி. ஸா தமத்த²ம் ஆரோசேஸி. இதரா ‘‘தேன ஹி பஞ்ஞாயிஸ்ஸஸீ’’தி வத்வா பக்கமிம்ஸு. குடும்பி³கோ புன நிவத்தித்வாபி ந ஓலோகேஸி. ஸா தம் அலப⁴மானா நிராஹாரா தத்தே²வ ஜீவிதக்க²யம் பாபுணி. குடும்பி³கோ தஸ்ஸா மதபா⁴வம் ஞத்வா ப³ஹும் மாலாக³ந்த⁴விலேபனம் ஆதா³ய ஜேதவனம் க³ந்த்வா ஸத்தா²ரம் பூஜேத்வா ஏகமந்தம் நிஸீதி³த்வா ஸத்தா²ரா ச ‘‘கிம் நு கோ², உபாஸக, ந பஞ்ஞாயஸீ’’தி புச்சி²தே தமத்த²ம் ஆரோசேத்வா ‘‘ஸ்வாஹம், ப⁴ந்தே, ஏத்தகம் காலம் லஜ்ஜாய பு³த்³து⁴பட்டா²னம் நாக³தோ’’தி ஆஹ. ஸத்தா² ‘‘ந, உபாஸக, இதா³னேவேஸா கிலேஸவஸேன தம் பக்கோஸாபேத்வா ஆக³தகாலே தம் ஓகாஸம் அகத்வா லஜ்ஜாபேஸி, புப்³பே³பி பன பண்டி³தேஸு படிப³த்³த⁴சித்தா ஹுத்வா பக்கோஸாபேத்வா ஆக³தகாலே ஓகாஸம் அகத்வா கிலமேத்வாவ உய்யோஜேஸீ’’தி வத்வா தேன யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஸிந்த⁴வகுலே நிப்³ப³த்தித்வா வாதக்³க³ஸிந்த⁴வோ நாம ஹுத்வா தஸ்ஸ மங்க³லஅஸ்ஸோ அஹோஸி. அஸ்ஸகோ³பகா தம் நேத்வா க³ங்கா³யம் ந்ஹாபேந்தி. அத² நம் ப⁴த்³த³லீ நாம க³த்³ரபீ⁴ தி³ஸ்வா படிப³த்³த⁴சித்தா ஹுத்வா கிலேஸவஸேன கம்பமானா நேவ திணம் கா²தி³, ந உத³கம் பிவி, பரிஸுஸ்ஸித்வா கிஸா அட்டி²சம்மமத்தா அஹோஸி. அத² நம் புத்தோ க³த்³ரப⁴போதகோ மாதரம் பரிஸுஸ்ஸமானம் தி³ஸ்வா ‘‘கிம் நு கோ² த்வம், அம்ம, நேவ திணம் கா²த³ஸி, ந உத³கம் பிவஸி, பரிஸுஸ்ஸித்வா தத்த² தத்த² கம்பமானா நிபஜ்ஜஸி, கிம் தே அபா²ஸுக’’ந்தி புச்சி². ஸா அகதே²த்வா புனப்புனம் வுச்சமானா தமத்த²ம் கதே²ஸி. அத² நம் புத்தோ ஸமஸ்ஸாஸேத்வா ‘‘அம்ம, மா சிந்தயி, அஹம் தம் ஆனேஸ்ஸாமீ’’தி வத்வா வாதக்³க³ஸிந்த⁴வஸ்ஸ ந்ஹாயிதும் ஆக³தகாலே தம் உபஸங்கமித்வா ‘‘தாத, மய்ஹம் மாதா தும்ஹேஸு படிப³த்³த⁴சித்தா நிராஹாரா ஸுஸ்ஸித்வா மரிஸ்ஸதி, ஜீவிததா³னமஸ்ஸா தே³தா²’’தி ஆஹ. ‘‘ஸாது⁴, தாத, த³ஸ்ஸாமி, அஸ்ஸகோ³பகா மம் ந்ஹாபேத்வா தோ²கம் க³ங்கா³தீரே விசரணத்தா²ய விஸ்ஸஜ்ஜேந்தி, த்வம் மாதரம் க³ஹேத்வா தம் பதே³ஸம் ஏஹீ’’தி. ஸோ க³ந்த்வா மாதரம் ஆனேத்வா தஸ்மிம் பதே³ஸே விஸ்ஸஜ்ஜேத்வா ஏகமந்தம் படிச்ச²ன்னோ அட்டா²ஸி.

அஸ்ஸகோ³பகாபி வாதக்³க³ஸிந்த⁴வம் தஸ்மிம் டா²னே விஸ்ஸஜ்ஜேஸும். ஸோ தம் க³த்³ரபி⁴ம் ஓலோகேத்வா உபஸங்கமி. அத² ஸா க³த்³ரபீ⁴ தஸ்மிம் உபஸங்கமித்வா அத்தனோ ஸரீரம் உபஸிங்க⁴மானே ‘‘ஸசாஹம் க³ரும் அகத்வா ஆக³தக்க²ணேயேவஸ்ஸ ஓகாஸம் கரிஸ்ஸாமி, ஏவம் மே யஸோ ச இஸ்ஸரியஞ்ச பரிஹாயிஸ்ஸதி, அனிச்ச²மானா விய ப⁴விதும் வட்டதீ’’தி சிந்தேத்வா ஸிந்த⁴வஸ்ஸ ஹேட்டா²ஹனுகே பாதே³ன பஹரித்வா பலாயி, த³ந்தமூலமஸ்ஸ பி⁴ஜ்ஜித்வா க³தகாலோ விய அஹோஸி. வாதக்³க³ஸிந்த⁴வோ ‘‘கோ மே ஏதாய அத்தோ²’’தி லஜ்ஜிதோ ததோவ பலாயி. ஸா விப்படிஸாரினீ ஹுத்வா தத்தே²வ பதித்வா ஸோசமானா நிபஜ்ஜி.

அத² நம் புத்தோ உபஸங்கமித்வா புச்ச²ந்தோ பட²மம் கா³த²மாஹ –

46. ‘‘யேனாஸி கிஸியா பண்டு³, யேன ப⁴த்தம் ந ருச்சதி;

அயம் ஸோ ஆக³தோ ப⁴த்தா, கஸ்மா தா³னி பலாயஸீ’’தி.

தத்த² யேனாதி தஸ்மிம் படிப³த்³த⁴சித்ததாய யேன காரணபூ⁴தேன.

புத்தஸ்ஸ வசனம் ஸுத்வா க³த்³ரபீ⁴ து³தியம் கா³த²மாஹ –

47. ‘‘ஸசே பனாதி³கேனேவ, ஸந்த²வோ நாம ஜாயதி;

யஸோ ஹாயதி இத்தீ²னம், தஸ்மா தாத பலாயஹ’’ந்தி.

தத்த² ஆதி³கேனேவாதிஆதி³தோவ பட²மமேவ. ஸந்த²வோதி மேது²னத⁴ம்மஸம்யோக³வஸேன மித்தஸந்த²வோ. யஸோ ஹாயதி இத்தீ²னந்தி, தாத, இத்தீ²னஞ்ஹி க³ருகம் அகத்வா ஆதி³தோவ ஸந்த²வம் குருமானானம் யஸோ ஹாயதி, இஸ்ஸரியக³ப்³பி³தபா⁴வோ பரிஹாயதீதி. ஏவம் ஸா இத்தீ²னம் ஸபா⁴வம் புத்தஸ்ஸ கதே²ஸி.

ததியகா³த²ம் பன ஸத்தா² அபி⁴ஸம்பு³த்³தோ⁴ ஹுத்வா ஆஹ –

48. ‘‘யஸஸ்ஸினம் குலே ஜாதம், ஆக³தம் யா ந இச்ச²தி;

ஸோசதி சிரரத்தாய, வாதக்³க³மிவ ப⁴த்³த³லீ’’தி.

தத்த² யஸஸ்ஸினந்தி யஸஸம்பன்னம். யா ந இச்ச²தீதி யா இத்தீ² ததா²ரூபம் புரிஸம் ந இச்ச²தி. சிரரத்தாயாதி சிரரத்தம், தீ³க⁴மத்³தா⁴னந்தி அத்தோ².

ஸத்தா² இமம் த⁴ம்மதே³ஸனம் ஆஹரித்வா ஸச்சானி பகாஸேத்வா ஜாதகம் ஸமோதா⁴னேஸி, ஸச்சபரியோஸானே குடும்பி³கோ ஸோதாபத்திப²லே பதிட்ட²ஹி. ‘‘ததா³ க³த்³ரபீ⁴ ஸா இத்தீ² அஹோஸி, வாதக்³க³ஸிந்த⁴வோ பன அஹமேவ அஹோஸி’’ந்தி.

வாதக்³க³ஸிந்த⁴வஜாதகவண்ணனா ச²ட்டா².

[267] 7. கக்கடகஜாதகவண்ணனா

ஸிங்கீ³ மிகோ³தி இத³ம் ஸத்தா² ஜேதவனே விஹரந்தோ அஞ்ஞதரம் இத்தி²ம் ஆரப்³ப⁴ கதே²ஸி. ஸாவத்தி²யம் கிரேகோ குடும்பி³கோ அத்தனோ ப⁴ரியம் க³ஹேத்வா உத்³தா⁴ரஸோத⁴னத்தா²ய ஜனபத³ம் க³ந்த்வா உத்³தா⁴ரம் ஸோதே⁴த்வா ஆக³ச்ச²ந்தோ அந்தராமக்³கே³ சோரேஹி க³ஹிதோ. ப⁴ரியா பனஸ்ஸ அபி⁴ரூபா பாஸாதி³கா த³ஸ்ஸனீயா, சோரஜேட்ட²கோ தஸ்ஸா ஸினேஹேன குடும்பி³கம் மாரேதும் ஆரபி⁴. ஸா பன இத்தீ² ஸீலவதீ ஆசாரஸம்பன்னா பதிதே³வதா, ஸா சோரஜேட்ட²கஸ்ஸ பாதே³ஸு நிபதித்வா ‘‘ஸாமி, ஸசே மயி ஸினேஹோ அத்தி², மா மய்ஹம் ஸாமிகம் மாரேஹி. ஸசே மாரேஸி, அஹம்பி விஸம் வா கா²தி³த்வா நாஸவாதம் வா ஸன்னிரும்பி⁴த்வா மரிஸ்ஸாமி, தயா பன ஸத்³தி⁴ம் ந க³மிஸ்ஸாமி, மா மே அகாரணேன ஸாமிகம் மாரேஹீ’’தி யாசித்வா தம் விஸ்ஸஜ்ஜாபேஸி. தே உபோ⁴பி ஸோத்தி²னா ஸாவத்தி²ம் பத்வா ஜேதவனபிட்டி²விஹாரேன க³ச்ச²ந்தா ‘‘விஹாரம் பவிஸித்வா ஸத்தா²ரம் வந்தி³ஸ்ஸாமா’’தி க³ந்த⁴குடிபரிவேணம் க³ந்த்வா ஸத்தா²ரம் வந்தி³த்வா ஏகமந்தம் நிஸீதி³ம்ஸு. தே ஸத்தா²ரா ‘‘கஹம் க³தத்த², உபாஸகா’’தி புட்டா² ‘‘உத்³தா⁴ரஸோத⁴னத்தா²யா’’தி ஆஹம்ஸு. ‘‘அந்தராமக்³கே³ பன ஆரோக்³யேன ஆக³தத்தா²’’தி வுத்தே குடும்பி³கோ ஆஹ – ‘‘அந்தராமக்³கே³ நோ, ப⁴ந்தே, சோரா க³ண்ஹிம்ஸு, தத்ரேஸா மம் மாரியமானம் சோரஜேட்ட²கம் யாசித்வா மோசேஸி, இமம் நிஸ்ஸாய மயா ஜீவிதம் லத்³த⁴’’ந்தி. ஸத்தா² ‘‘ந, உபாஸக, இதா³னேவேதாய ஏவம் துய்ஹம் ஜீவிதம் தி³ன்னம், புப்³பே³பி பண்டி³தானம்பி ஜீவிதம் அதா³ஸியேவா’’தி வத்வா தேன யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே ஹிமவந்தே மஹாஉத³கரஹதோ³, தத்த² மஹாஸுவண்ணகக்கடகோ அஹோஸி. ஸோ தஸ்ஸ நிவாஸபா⁴வேன ‘‘குளீரத³ஹோ’’தி பஞ்ஞாயித்த². கக்கடகோ மஹா அஹோஸி க²லமண்ட³லப்பமாணோ, ஹத்தீ² க³ஹேத்வா வதி⁴த்வா கா²த³தி. ஹத்தீ² தஸ்ஸ ப⁴யேன தத்த² ஓதரித்வா கோ³சரம் க³ண்ஹிதும் ந ஸக்கோந்தி. ததா³ போ³தி⁴ஸத்தோ குளீரத³ஹம் உபனிஸ்ஸாய வஸமானம் ஹத்தி²யூத²ஜேட்ட²கம் படிச்ச கரேணுயா குச்சி²ஸ்மிம் படிஸந்தி⁴ம் க³ண்ஹி. அத²ஸ்ஸ மாதா ‘‘க³ப்³ப⁴ம் ரக்கி²ஸ்ஸாமீ’’தி அஞ்ஞம் பப்³ப³தப்பதே³ஸம் க³ந்த்வா க³ப்³ப⁴ம் ரக்கி²த்வா புத்தம் விஜாயி. ஸோ அனுக்கமேன விஞ்ஞுதம் பத்தோ மஹாஸரீரோ தா²மஸம்பன்னோ ஸோப⁴க்³க³ப்பத்தோ அஞ்ஜனபப்³ப³தோ விய அஹோஸி. ஸோ ஏகாய கரேணுயா ஸத்³தி⁴ம் ஸம்வாஸம் கப்பேத்வா ‘‘கக்கடகம் க³ண்ஹிஸ்ஸாமீ’’தி அத்தனோ ப⁴ரியஞ்ச மாதரஞ்ச ஆதா³ய தம் ஹத்தி²யூத²ம் உபஸங்கமித்வா பிதரம் பஸ்ஸித்வா ‘‘தாத, அஹம் கக்கடகம் க³ண்ஹிஸ்ஸாமீ’’தி ஆஹ. அத² நம் பிதா ‘‘ந ஸக்கி²ஸ்ஸஸி, தாதா’’தி வாரேத்வா புனப்புனம் வத³ந்தம் ‘‘த்வஞ்ஞேவ ஜானிஸ்ஸஸீ’’தி ஆஹ.

ஸோ குளீரத³ஹம் உபனிஸ்ஸாய வஸந்தே ஸப்³ப³வாரணே ஸன்னிபாதேத்வா ஸப்³பே³ஹி ஸத்³தி⁴ம் த³ஹஸமீபம் க³ந்த்வா ‘‘கிம் ஸோ கக்கடகோ ஓதரணகாலே க³ண்ஹாதி, உதா³ஹு கோ³சரம் க³ண்ஹனகாலே, உதா³ஹு உத்தரணகாலே’’தி புச்சி²த்வா ‘‘உத்தரணகாலே’’தி ஸுத்வா ‘‘தேன ஹி தும்ஹே குளீரத³ஹம் ஓதரித்வா யாவத³த்த²ம் கோ³சரம் க³ஹேத்வா பட²மம் உத்தரத², அஹம் பச்ச²தோ ப⁴விஸ்ஸாமீ’’தி ஆஹ. வாரணா ததா² கரிம்ஸு. குளீரோ பச்ச²தோ உத்தரந்தம் போ³தி⁴ஸத்தம் மஹாஸண்டா³ஸேன கம்மாரோ லோஹஸலாகம் விய அளத்³வயேன பாதே³ த³ள்ஹம் க³ண்ஹி, கரேணுகா போ³தி⁴ஸத்தம் அவிஜஹித்வா ஸமீபேயேவ அட்டா²ஸி. போ³தி⁴ஸத்தோ ஆகட்³ட⁴ந்தோ குளீரம் சாலேதும் நாஸக்கி², குளீரோ பன தம் ஆகட்³ட⁴ந்தோ அத்தனோ அபி⁴முக²ம் கரோதி. ஸோ மரணப⁴யதஜ்ஜிதோ ப³த்³த⁴ரவம் ரவி, ஸப்³பே³ வாரணா மரணப⁴யதஜ்ஜிதா கோஞ்சனாத³ம் கத்வா முத்தகரீஸம் சஜமானா பலாயிம்ஸு, கரேணுகாபிஸ்ஸ ஸண்டா²தும் அஸக்கோந்தீ பலாயிதும் ஆரபி⁴.

அத² நம் ஸோ அத்தனோ ப³த்³த⁴பா⁴வம் ஸஞ்ஞாபேத்வா தஸ்ஸா அபலாயனத்த²ம் பட²மம் கா³த²மாஹ –

49. தத்த² ஸிங்கீ³ மிகோ³தி ஸிங்கீ³ ஸுவண்ணவண்ணோ மிகோ³. த்³வீஹி அளேஹி ஸிங்க³கிச்சம் ஸாதே⁴ந்தேஹி யுத்ததாய ஸிங்கீ³தி அத்தோ². மிகோ³தி பன ஸப்³ப³பாணஸங்கா³ஹகவஸேன இத⁴ குளீரோ வுத்தோ. ஆயதசக்கு²னேத்தோதி ஏத்த² த³ஸ்ஸனட்டே²ன சக்கு², நயனட்டே²ன நேத்தம், ஆயதானி சக்கு²ஸங்கா²தானி நேத்தானி அஸ்ஸாதி ஆயதசக்கு²னேத்தோ, தீ³க⁴அக்கீ²தி அத்தோ². அட்டி²மேவஸ்ஸ தசகிச்சம் ஸாதே⁴தீதி அட்டி²த்தசோ. தேனாபி⁴பூ⁴தோதி தேன மிகே³ன அபி⁴பூ⁴தோ அஜ்ஜோ²த்த²தோ நிச்சலம் க³ஹிதோ ஹுத்வா. கபணம் ருதா³மீதி காருஞ்ஞப்பத்தோ ஹுத்வா ருதா³மி விரவாமி. மா ஹேவ மந்தி மம் ஏவரூபம் ப்³யஸனப்பத்தம் அத்தனோ பாணஸமம் பியஸாமிகம் த்வம் மா ஹேவ ஜஹீதி.

அத² ஸா கரேணுகா நிவத்தித்வா தம் அஸ்ஸாஸயமானா து³தியம் கா³த²மாஹ –

50. ‘‘அய்ய ந தம் ஜஹிஸ்ஸாமி, குஞ்ஜரம் ஸட்டி²ஹாயனம்;

பத²ப்³யா சாதுரந்தாய, ஸுப்பியோ ஹோஸி மே துவ’’ந்தி.

தத்த² ஸட்டி²ஹாயனந்தி ஜாதியா ஸட்டி²வஸ்ஸகாலஸ்மிஞ்ஹி குஞ்ஜரா தா²மேன பரிஹாயந்தி, ஸா அஹம் ஏவம் தா²மஹீனம் இமம் ப்³யஸனம் பத்தம் தம் ந ஜஹிஸ்ஸாமி, மா பா⁴யி, இமிஸ்ஸா ஹி சதூஸு தி³ஸாஸு ஸமுத்³த³ம் பத்வா டி²தாய சாதுரந்தாய பத²வியா த்வம் மய்ஹம் ஸுட்டு² பியோதி.

அத² நம் ஸந்த²ம்பே⁴த்வா ‘‘அய்ய, இதா³னி தம் குளீரேன ஸத்³தி⁴ம் தோ²கம் கதா²ஸல்லாபம் லப⁴மானா விஸ்ஸஜ்ஜாபேஸ்ஸாமீ’’தி வத்வா குளீரம் யாசமானா ததியம் கா³த²மாஹ –

51. ‘‘யே குளீரா ஸமுத்³த³ஸ்மிம், க³ங்கா³ய யமுனாய ச;

தேஸம் த்வம் வாரிஜோ ஸேட்டோ², முஞ்ச ரோத³ந்தியா பதி’’ந்தி.

தஸ்ஸத்தோ² – யே ஸமுத்³தே³ வா க³ங்கா³ய வா யமுனாய வா குளீரா, ஸப்³பே³ஸம் வண்ணஸம்பத்தியா ச மஹந்தத்தேன ச த்வமேவ ஸேட்டோ² உத்தமோ. தேன தம் யாசாமி, மய்ஹம் ரோத³மானாய ஸாமிகம் முஞ்சாதி.

குளீரோ தஸ்ஸா கத²யமானாய இத்தி²ஸத்³தே³ நிமித்தம் க³ஹேத்வா ஆகட்³டி⁴யமானஸோ ஹுத்வா வாரணஸ்ஸ பாத³தோ அளே வினிவேடே²ந்தோ ‘‘அயம் விஸ்ஸட்டோ² இத³ம் நாம கரிஸ்ஸதீ’’தி ந கிஞ்சி அஞ்ஞாஸி. அத² நம் வாரணோ பாத³ம் உக்கி²பித்வா பிட்டி²யம் அக்கமி, தாவதே³வ அட்டீ²னி பி⁴ஜ்ஜிம்ஸு. வாரணோ துட்ட²ரவம் ரவி, ஸப்³பே³ வாரணா ஸன்னிபதித்வா குளீரம் நீஹரித்வா மஹீதலே ட²பேத்வா மத்³த³ந்தா சுண்ணவிசுண்ணமகம்ஸு. தஸ்ஸ த்³வே அளா ஸரீரதோ பி⁴ஜ்ஜித்வா ஏகமந்தே பதிம்ஸு. ஸோ ச குளீரத³ஹோ க³ங்கா³ய ஏகாப³த்³தோ⁴, க³ங்கா³ய பூரணகாலே க³ங்கோ³த³கேன பூரதி, உத³கே மந்தீ³பூ⁴தே த³ஹதோ உத³கம் க³ங்க³ம் ஓதரதி. அத² த்³வேபி தே அளா உப்லவித்வா க³ங்கா³ய வுய்ஹிம்ஸு. தேஸு ஏகோ ஸமுத்³த³ம் பாவிஸி, ஏகம் த³ஸபா⁴திகராஜானோ உத³கே கீளமானா லபி⁴த்வா ஆளிங்க³ம் நாம முதி³ங்க³ம் அகம்ஸு. ஸமுத்³த³ம் பன பவிட்ட²ம் அஸுரா க³ஹேத்வா ஆலம்ப³ரம் நாம பே⁴ரிம் காரேஸும். தே அபரபா⁴கே³ ஸக்கேன ஸங்கா³மே பராஜிதா தம் ச²ட்³டே³த்வா பலாயிம்ஸு, அத² நம் ஸக்கோ அத்தனோ அத்தா²ய க³ண்ஹாபேஸி. ‘‘ஆலம்ப³ரமேகோ⁴ விய த²னதீ’’தி தம் ஸந்தா⁴ய வத³ந்தி.

ஸத்தா² இமம் த⁴ம்மதே³ஸனம் ஆஹரித்வா ஸச்சானி பகாஸேத்வா ஜாதகம் ஸமோதா⁴னேஸி, ஸச்சபரியோஸானே உபோ⁴ ஜயம்பதிகா ஸோதாபத்திப²லே பதிட்ட²ஹிம்ஸு. ‘‘ததா³ கரேணுகா அயம் உபாஸிகா அஹோஸி, வாரணோ பன அஹமேவ அஹோஸி’’ந்தி.

கக்கடகஜாதகவண்ணனா ஸத்தமா.

[268] 8. ஆராமதூ³ஸகஜாதகவண்ணனா

யோ வே ஸப்³ப³ஸமேதானந்தி இத³ம் ஸத்தா² த³க்கி²ணாகி³ரிஜனபதே³ அஞ்ஞதரம் உய்யானபாலபுத்தம் ஆரப்³ப⁴ கதே²ஸி. ஸத்தா² கிர வுத்த²வஸ்ஸோ ஜேதவனா நிக்க²மித்வா த³க்கி²ணாகி³ரிஜனபதே³ சாரிகம் சரி. அதே²கோ உபாஸகோ பு³த்³த⁴ப்பமுக²ம் பி⁴க்கு²ஸங்க⁴ம் நிமந்தேத்வா உய்யானே நிஸீதா³பேத்வா யாகு³க²ஜ்ஜகேஹி ஸந்தப்பேத்வா ‘‘அய்யா, உய்யானசாரிகம் சரிதுகாமா இமினா உய்யானபாலேன ஸத்³தி⁴ம் சரந்தூ’’தி வத்வா ‘‘அய்யானம் ப²லாப²லானி த³தே³ய்யாஸீ’’தி உய்யானபாலம் ஆணாபேஸி. பி⁴க்கூ² சரமானா ஏகம் சி²த்³த³ட்டா²னம் தி³ஸ்வா ‘‘இத³ம் டா²னம் சி²த்³த³ம் விரளருக்க²ம், கிம் நு கோ² காரண’’ந்தி புச்சி²ம்ஸு. அத² நேஸம் உய்யானபாலோ ஆசிக்கி² – ‘‘ஏகோ கிர உய்யானபாலபுத்தோ உபரோபகேஸு உத³கம் ஆஸிஞ்சந்தோ ‘மூலப்பமாணேன ஆஸிஞ்சிஸ்ஸாமீ’தி உப்பாடேத்வா மூலப்பமாணேன உத³கம் ஆஸிஞ்சி, தேன தம் டா²னம் சி²த்³த³ம் ஜாத’’ந்தி. பி⁴க்கூ² ஸத்து² ஸந்திகம் க³ந்த்வா தமத்த²ம் ஆரோசேஸும். ஸத்தா² ‘‘ந, பி⁴க்க²வே, இதா³னேவ புப்³பே³பி ஸோ குமாரகோ ஆராமதூ³ஸகோயேவா’’தி வத்வா அதீதம் ஆஹரி.

அதீதே பா³ராணஸியம் விஸ்ஸஸேனே நாம ரஞ்ஞே ரஜ்ஜம் காரேந்தே உஸ்ஸவே கு⁴ட்டே² உய்யானபாலோ ‘‘உஸ்ஸவம் கீளிஸ்ஸாமீ’’தி உய்யானவாஸினோ மக்கடே ஆஹ – ‘‘இத³ம் உய்யானம் தும்ஹாகம் ப³ஹூபகாரம், அஹம் ஸத்தாஹம் உஸ்ஸவம் கீளிஸ்ஸாமி, தும்ஹே ஸத்த தி³வஸே உபரோபகேஸு உத³கம் ஆஸிஞ்சதா²’’தி. தே ‘‘ஸாதூ⁴’’தி ஸம்படிச்சி²ம்ஸு. ஸோ தேஸம் சம்மக⁴டகே த³த்வா பக்காமி. மக்கடா உத³கம் ஆஸிஞ்சந்தா உபரோபகேஸு ஆஸிஞ்சிம்ஸு. அத² நே மக்கடஜேட்ட²கோ ஆஹ – ‘‘ஆக³மேத² தாவ, உத³கம் நாம ஸப்³ப³காலம் து³ல்லப⁴ம், தம் ரக்கி²தப்³ப³ம், உபரோபகே உப்பாடேத்வா மூலப்பமாணம் ஞத்வா தீ³க⁴மூலகேஸு ப³ஹும், ரஸ்ஸமூலகேஸு அப்பம் உத³கம் ஸிஞ்சிதும் வட்டதீ’’தி. தே ‘‘ஸாதூ⁴’’தி வத்வா ஏகச்சே உபரோபகே உப்பாடேத்வா க³ச்ச²ந்தி, ஏகச்சே தே ரோபேத்வா உத³கம் ஸிஞ்சந்தி.

தஸ்மிம் காலே போ³தி⁴ஸத்தோ பா³ராணஸியம் ஏகஸ்ஸ குலஸ்ஸ புத்தோ அஹோஸி, ஸோ கேனசிதே³வ கரணீயேன உய்யானம் க³ந்த்வா தே மக்கடே ததா² கரோந்தே தி³ஸ்வா ‘‘கோ தும்ஹே ஏவம் காரேதீ’’தி புச்சி²த்வா ‘‘வானரஜேட்ட²கோ’’தி வுத்தே ‘‘ஜேட்ட²கஸ்ஸ தாவ வோ அயம் பஞ்ஞா, தும்ஹாகம் பன கீதி³ஸீ ப⁴விஸ்ஸதீ’’தி தமத்த²ம் பகாஸேந்தோ இமம் பட²மம் கா³த²மாஹ –

52. ‘‘யோ வே ஸப்³ப³ஸமேதானம், அஹுவா ஸேட்ட²ஸம்மதோ;

தஸ்ஸாயம் ஏதி³ஸீ பஞ்ஞா, கிமேவ இதரா பஜா’’தி.

தத்த² ஸப்³ப³ஸமேதானந்தி இமேஸம் ஸப்³பே³ஸம் ஸமானஜாதீனம். அஹுவாதி அஹோஸி. கிமேவ இதரா பஜாதி யா இதரா ஏதேஸு லாமிகா பஜா, கீதி³ஸா நு கோ² தஸ்ஸா பஞ்ஞாதி.

தஸ்ஸ கத²ம் ஸுத்வா வானரா து³தியம் கா³த²மாஹம்ஸு –

53. ‘‘ஏவமேவ துவம் ப்³ரஹ்மே, அனஞ்ஞாய வினிந்த³ஸி;

கத²ம் மூலம் அதி³ஸ்வான, ருக்க²ம் ஜஞ்ஞா பதிட்டி²த’’ந்தி.

தத்த² ப்³ரஹ்மேதி ஆலபனமத்தம். அயம் பனேத்த² ஸங்கே²பத்தோ² – த்வம், போ⁴ புரிஸ, காரணாகாரணம் அஜானித்வா ஏவமேவ அம்ஹே வினிந்த³ஸி, ருக்க²ம் நாம ‘‘க³ம்பீ⁴ரே பதிட்டி²தோ வா ஏஸ, ந வா’’தி மூலம் அனுப்பாடேத்வா கத²ம் ஞாதும் ஸக்கா, தேன மயம் உப்பாடேத்வா மூலப்பமாணேன உத³கம் ஆஸிஞ்சாமாதி.