5. அத்த²காமவக்³கோ³

[41] 1. லோஸகஜாதகவண்ணனா

யோ அத்த²காமஸ்ஸாதி இத³ம் ஸத்தா² ஜேதவனே விஹரந்தோ லோஸகதிஸ்ஸத்தே²ரம் நாம ஆரப்³ப⁴ கதே²ஸி. கோ பனேஸ லோஸகதிஸ்ஸத்தே²ரோ நாமாதி? கோஸலரட்டே² ஏகோ அத்தனோ குலனாஸகோ கேவட்டபுத்தகோ அலாபீ⁴ பி⁴க்கு². ஸோ கிர நிப்³ப³த்தட்டா²னேதா சவித்வா கோஸலரட்டே² ஏகஸ்மிம் குலஸஹஸ்ஸவாஸே கேவட்டகா³மே ஏகிஸ்ஸா கேவட்டியா குச்சி²ஸ்மிம் படிஸந்தி⁴ம் க³ண்ஹி. தஸ்ஸ படிஸந்தி⁴க்³க³ஹணதி³வஸே தம் குலஸஹஸ்ஸம் ஜாலஹத்த²ம் நதி³யஞ்ச தளாகாதீ³ஸு ச மச்சே² பரியேஸந்தம் ஏகம் கு²த்³த³கமச்ச²ம்பி நாலத்த². ததோ பட்டா²ய ச தே கேவட்டா பரிஹாயந்தியேவ. தஸ்மிஞ்ஹி குச்சி²க³தேயேவ நேஸம் கா³மோ ஸத்த வாரே அக்³கி³னா த³ட்³டோ⁴, ஸத்த வாரே ரஞ்ஞா த³ண்டி³தோ. ஏவம் அனுக்கமேன து³க்³க³தா ஜாதா. தே சிந்தயிம்ஸு ‘‘புப்³பே³ அம்ஹாகம் ஏவரூபம் நத்தி², இதா³னி பன பரிஹாயாம, அம்ஹாகம் அந்தரே ஏகாய காளகண்ணியா ப⁴விதப்³ப³ம், த்³வே பா⁴கா³ ஹோமா’’தி பஞ்ச பஞ்ச குலஸதானி ஏகதோ அஹேஸும். ததோ யத்த² தஸ்ஸ மாதாபிதரோ, ஸோவ கோட்டா²ஸோ பரிஹாயதி, இதரோ வட்³ட⁴தி. தே தம்பி கோட்டா²ஸம் த்³விதா⁴, தம்பி த்³விதா⁴தி ஏவம் யாவ தமேவ குலம் ஏகம் அஹோஸி, தாவ விப⁴ஜித்வா தேஸம் காளகண்ணிபா⁴வம் ஞத்வா போதே²த்வா நிக்கட்³டி⁴ம்ஸு.

அத²ஸ்ஸ மாதா கிச்சே²ன ஜீவமானா பரிபக்கே க³ப்³பே⁴ ஏகஸ்மிம் டா²னே விஜாயி. பச்சி²மப⁴விகஸத்தம் ந ஸக்கா நாஸேதும், அந்தோக⁴டே பதீ³போ விய தஸ்ஸ ஹத³யே அரஹத்தஸ்ஸ உபனிஸ்ஸயோ ஜலதி. ஸா தம் தா³ரகம் படிஜக்³கி³த்வா ஆதா⁴வித்வா பரிதா⁴வித்வா விசரணகாலே ஏகமஸ்ஸ கபாலகம் ஹத்தே² த³த்வா ‘‘புத்த, ஏதம் க⁴ரம் பவிஸா’’தி பேஸேத்வா பலாதா. ஸோ ததோ பட்டா²ய ஏககோவ ஹுத்வா தத்த² தத்த² பி⁴க்க²ம் பரியேஸித்வா ஏகஸ்மிம் டா²னே ஸயதி, ந ந்ஹாயதி, ந ஸரீரம் படிஜக்³க³தி, பம்ஸுபிஸாசகோ விய கிச்சே²ன ஜீவிகம் கப்பேதி. ஸோ அனுக்கமேன ஸத்தவஸ்ஸிகோ ஹுத்வா ஏகஸ்மிம் கே³ஹத்³வாரே உக்க²லிதோ⁴வனஸ்ஸ ச²ட்³டி³தட்டா²னே காகோ விய ஏகேகம் ப⁴த்தஸித்த²ம் உச்சினித்வா கா²த³தி.

அத² நம் த⁴ம்மஸேனாபதி ஸாவத்தி²யம் பிண்டா³ய சரமானோ தி³ஸ்வா ‘‘அயம் ஸத்தோ அதிகாருஞ்ஞப்பத்தோ, கதரகா³மவாஸிகோ நு கோ²’’தி தஸ்மிம் மேத்தசித்தம் வட்³டே⁴த்வா ‘‘ஏஹி, ரே’’தி ஆஹ. ஸோ ஆக³ந்த்வா தே²ரம் வந்தி³த்வா அட்டா²ஸி. அத² நம் தே²ரோ ‘‘கதரகா³மவாஸிகோஸி, கஹம் வா தே மாதாபிதரோ’’தி புச்சி². ‘‘அஹம், ப⁴ந்தே, நிப்பச்சயோ, மய்ஹம் மாதாபிதரோ மம் நிஸ்ஸாய ‘கிலந்தம்ஹா’தி மம் ச²ட்³டே³த்வா பலாதா’’தி. ‘‘அபி பன பப்³ப³ஜிஸ்ஸஸீ’’தி. ‘‘ப⁴ந்தே, அஹம் தாவ பப்³ப³ஜேய்யம், மாதி³ஸம் பன கபணம் கோ பப்³பா³ஜேஸ்ஸஸீ’’தி? ‘‘அஹம் பப்³பா³ஜேஸ்ஸாமீ’’தி. ‘‘ஸாது⁴, ப⁴ந்தே, பப்³பா³ஜேதா²’’தி. தே²ரோ தஸ்ஸ கா²த³னீயபோ⁴ஜனீயம் த³த்வா தம் விஹாரம் நேத்வா ஸஹத்தே²னேவ ந்ஹாபேத்வா பப்³பா³ஜேத்வா பரிபுண்ணவஸ்ஸம் உபஸம்பாதே³ஸி. ஸோ மஹல்லககாலே ‘‘லோஸகதிஸ்ஸத்தே²ரோ’’தி பஞ்ஞாயித்த² அப்பபுஞ்ஞோ அப்பலாபோ⁴. தேன கிர அஸதி³ஸதா³னேபி குச்சி²பூரோ ந லத்³த⁴புப்³போ³, ஜீவிதக⁴டனமத்தமேவ லப⁴தி. தஸ்ஸ ஹி பத்தே ஏகஸ்மிம்யேவ யாகு³உளுங்கே தி³ன்னே பத்தோ ஸமதித்திகோ விய ஹுத்வா பஞ்ஞாயதி. அத² மனுஸ்ஸா ‘‘இமஸ்ஸ பத்தோ பூரோ’’தி ஹேட்டா² யாகு³ம் தே³ந்தி. தஸ்ஸ பத்தே யாகு³ம் தா³னகாலே மனுஸ்ஸானம் பா⁴ஜனே யாகு³ அந்தரதா⁴யதீதிபி வத³ந்தி. க²ஜ்ஜகாதீ³ஸுபி ஏஸேவ நயோ.

ஸோ அபரேன ஸமயேன விபஸ்ஸனம் வட்³டே⁴த்வா அக்³க³ப²லே அரஹத்தே பதிட்டி²தோபி அப்பலாபோ⁴வ அஹோஸி. அத²ஸ்ஸ அனுபுப்³பே³ன ஆயுஸங்கா²ரேஸு பரிஹீனேஸு பரினிப்³பா³னதி³வஸோ ஸம்பாபுணி. த⁴ம்மஸேனாபதி ஆவஜ்ஜேந்தோ தஸ்ஸ பரினிப்³பா³னபா⁴வம் ஞத்வா ‘‘அயம் லோஸகதிஸ்ஸத்தே²ரோ அஜ்ஜ பரினிப்³பா³யிஸ்ஸதி, அஜ்ஜ மயா ஏதஸ்ஸ யாவத³த்த²ம் ஆஹாரம் தா³தும் வட்டதீ’’தி தம் ஆதா³ய ஸாவத்தி²ம் பிண்டா³ய பாவிஸி. தே²ரோ தம் நிஸ்ஸாய தாவ ப³ஹுமனுஸ்ஸாய ஸாவத்தி²யா ஹத்த²ம் பஸாரேத்வா வந்த³னமத்தம்பி நாலத்த². அத² நம் தே²ரோ ‘‘க³ச்சா²வுஸோ, ஆஸனஸாலாய நிஸீதா³’’தி உய்யோஜேத்வா க³தோ. தம் ஆக³தமேவ மனுஸ்ஸா ‘‘அய்யோ, ஆக³தோ’’தி ஆஸனே நிஸீதா³பேத்வா போ⁴ஜேஸி. தே²ரோபி ‘‘இமம் லோஸகஸ்ஸ தே³தா²’’தி லத்³தா⁴ஹாரம் பேஸேஸி. தம் க³ஹேத்வா க³தா லோஸகதிஸ்ஸத்தே²ரம் அஸரித்வா ஸயமேவ பு⁴ஞ்ஜிம்ஸு. அத² தே²ரஸ்ஸ உட்டா²ய விஹாரம் க³மனகாலே லோஸகதிஸ்ஸத்தே²ரோ ஆக³ந்த்வா தே²ரம் வந்தி³, தே²ரோ நிவத்தித்வா டி²தகோவ ‘‘லத்³த⁴ம் தே, ஆவுஸோ, ப⁴த்த’’ந்தி புச்சி². லபி⁴ஸ்ஸாம நோ, ப⁴ந்தேதி. தே²ரோ ஸம்வேக³பத்தோ காலம் ஓலோகேஸி, காலோ அதிக்கந்தோ. தே²ரோ ‘‘ஹோதாவுஸோ, இதே⁴வ நிஸீதா³’’தி லோஸகத்தே²ரம் ஆஸனஸாலாயம் நிஸீதா³பேத்வா கோஸலரஞ்ஞோ நிவேஸனம் அக³மாஸி. ராஜா தே²ரஸ்ஸ பத்தம் கா³ஹாபேத்வா ‘‘ப⁴த்தஸ்ஸ அகாலோ’’தி பத்தபூரம் சதுமது⁴ரம் தா³பேஸி. தே²ரோ தம் ஆதா³ய க³ந்த்வா ‘‘ஏஹாவுஸோ, திஸ்ஸ இமம் சதுமது⁴ரம் பு⁴ஞ்ஜா’’தி வத்வா பத்தம் க³ஹேத்வா அட்டா²ஸி. ஸோ தே²ரே கா³ரவேன லஜ்ஜந்தோ ந பரிபு⁴ஞ்ஜதி. அத² நம் தே²ரோ ‘‘ஏஹாவுஸோ திஸ்ஸ, அஹம் இமம் பத்தம் க³ஹேத்வாவ ட²ஸ்ஸாமி, த்வம் நிஸீதி³த்வா பரிபு⁴ஞ்ஜ. ஸசே அஹம் பத்தம் ஹத்த²தோ முஞ்சேய்யம், கிஞ்சி ந ப⁴வேய்யா’’தி ஆஹ. அதா²யஸ்மா லோஸகதிஸ்ஸத்தே²ரோ அக்³க³ஸாவகே த⁴ம்மஸேனாபதிம்ஹி பத்தம் க³ஹேத்வா டி²தே சதுமது⁴ரம் பரிபு⁴ஞ்ஜி. தம் தே²ரஸ்ஸ அரியித்³தி⁴ப³லேன பரிக்க²யம் ந அக³மாஸி. ததா³ லோஸகதிஸ்ஸத்தே²ரோ யாவத³த்த²ம் உத³ரபூரம் கத்வா பரிபு⁴ஞ்ஜி, தம் தி³வஸம்யேவ ச அனுபாதி³ஸேஸாய நிப்³பா³னதா⁴துயா பரினிப்³பா³யி. ஸம்மாஸம்பு³த்³தோ⁴ ஸந்திகே ட²த்வா ஸரீரனிக்கே²பம் காரேஸி, தா⁴துயோ க³ஹேத்வா சேதியம் கரிம்ஸு.

ததா³ பி⁴க்கூ² த⁴ம்மஸபா⁴யம் ஸன்னிபதித்வா ‘‘ஆவுஸோ, அஹோ லோஸகதிஸ்ஸத்தே²ரோ அப்பபுஞ்ஞோ அப்பலாபீ⁴, ஏவரூபேன நாம அப்பபுஞ்ஞேன அப்பலாபி⁴னா கத²ம் அரியத⁴ம்மோ லத்³தோ⁴’’தி கதே²ந்தா நிஸீதி³ம்ஸு. ஸத்தா² த⁴ம்மஸப⁴ம் க³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி². தே ‘‘இமாய நாம, ப⁴ந்தே’’தி ஆரோசயிம்ஸு. ஸத்தா² ‘‘பி⁴க்க²வே, ஏஸோ பி⁴க்கு² அத்தனோ அலாபி⁴பா⁴வஞ்ச அரியத⁴ம்மலாபி⁴பா⁴வஞ்ச அத்தனாவ அகாஸி. அயஞ்ஹி புப்³பே³ பரேஸம் லாப⁴ந்தராயம் கத்வா அப்பலாபீ⁴ ஜாதோ, ‘‘அனிச்சம், து³க்க²ம், அனத்தா’’தி விபஸ்ஸனாய யுத்தபா⁴வஸ்ஸ ப³லேன அரியத⁴ம்மலாபீ⁴ ஜாதோ’’தி வத்வா அதீதம் ஆஹரி.

அதீதே கிர கஸ்ஸபஸம்மாஸம்பு³த்³த⁴காலே அஞ்ஞதரோ பி⁴க்கு² ஏகம் குடும்பி³கம் நிஸ்ஸாய கா³மகாவாஸே வஸதி பகதத்தோ ஸீலவா விபஸ்ஸனாய யுத்தப்பயுத்தோ. அதே²கோ கீ²ணாஸவத்தே²ரோ ஸமவத்தவாஸம் வஸமானோ அனுபுப்³பே³ன தஸ்ஸ பி⁴க்கு²னோ உபட்டா²ககுடும்பி³கஸ்ஸ வஸனகா³மம் ஸம்பத்தோ. குடும்பி³கோ தே²ரஸ்ஸ இரியாபதே²யேவ பஸீதி³த்வா பத்தம் ஆதா³ய க⁴ரம் பவேஸேத்வா ஸக்கச்சம் போ⁴ஜேத்வா தோ²கம் த⁴ம்மகத²ம் ஸுத்வா தே²ரம் வந்தி³த்வா ‘‘ப⁴ந்தே, அம்ஹாகம் து⁴ரவிஹாரமேவ க³ச்ச²த², மயம் ஸாயன்ஹஸமயே ஆக³ந்த்வா பஸ்ஸிஸ்ஸாமா’’தி ஆஹ. தே²ரோ விஹாரம் க³ந்த்வா நேவாஸிகத்தே²ரம் வந்தி³த்வா ஆபுச்சி²த்வா ஏகமந்தம் நிஸீதி³. ஸோபி தேன ஸத்³தி⁴ம் படிஸந்தா²ரம் கத்வா ‘‘லத்³தோ⁴ தே, ஆவுஸோ, பி⁴க்கா²ஹாரோ’’தி புச்சி². ‘‘ஆம, லத்³தோ⁴’’தி. ‘‘கஹம் லத்³தோ⁴’’தி? ‘‘தும்ஹாகம் து⁴ரகா³மே குடும்பி³கக⁴ரே’’தி. ஏவஞ்ச பன வத்வா அத்தனோ ஸேனாஸனம் புச்சி²த்வா படிஜக்³கி³த்வா பத்தசீவரம் படிஸாமேத்வா ஜா²னஸுகே²ன ப²லஸுகே²ன ச வீதினாமேந்தோ நிஸீதி³.

ஸோபி குடும்பி³கோ ஸாயன்ஹே க³ந்த⁴மாலஞ்சேவ பதீ³பேய்யஞ்ச கா³ஹாபேத்வா விஹாரம் க³ந்த்வா நேவாஸிகத்தே²ரம் வந்தி³த்வா ‘‘ப⁴ந்தே, ஏகோ ஆக³ந்துகத்தே²ரோ அத்தி², ஆக³தோ நு கோ²’’தி புச்சி². ‘‘ஆம, ஆக³தோ’’தி. ‘‘இதா³னி கஹ’’ந்தி. ‘‘அஸுகஸேனாஸனே நாமா’’தி. ஸோ தஸ்ஸ ஸந்திகம் க³ந்த்வா வந்தி³த்வா ஏகமந்தம் நிஸின்னோ த⁴ம்மகத²ம் ஸுத்வா ஸீதலவேலாய சேதியஞ்ச போ³தி⁴ஞ்ச பூஜேத்வா தீ³பே ஜாலேத்வா உபோ⁴பி ஜனே நிமந்தேத்வா க³தோ. நேவாஸிகத்தே²ரோபி கோ² ‘‘அயம் குடும்பி³கோ பரிபி⁴ன்னோ, ஸசாயம் பி⁴க்கு² இமஸ்மிம் விஹாரே வஸிஸ்ஸதி, ந மம் ஏஸ கிஸ்மிஞ்சி க³ணயிஸ்ஸதீ’’தி தே²ரே அனத்தமனதம் ஆபஜ்ஜித்வா ‘‘இமஸ்மிம் விஹாரே ஏதஸ்ஸ அவஸனாகாரோ மயா காதும் வட்டதீ’’தி தேன உபட்டா²னவேலாய ஆக³தேன ஸத்³தி⁴ம் கிஞ்சி ந கதே²ஸி. கீ²ணாஸவத்தே²ரோ தஸ்ஸ அஜ்ஜா²ஸயம் ஜானித்வா ‘‘அயம் தே²ரோ மம குலே வா க³ணே வா அபலிபு³த்³த⁴பா⁴வம் ந ஜானாதீ’’தி அத்தனோ வஸனட்டா²னம் க³ந்த்வா ஜா²னஸுகே²ன ப²லஸுகே²ன வீதினாமேஸி.

நேவாஸிகோபி புனதி³வஸே நக²பிட்டே²ன க³ண்டி³ம் பஹரித்வா நகே²ன த்³வாரம் ஆகோடேத்வா குடும்பி³கஸ்ஸ கே³ஹம் அக³மாஸி. ஸோ தஸ்ஸ பத்தம் க³ஹேத்வா பஞ்ஞத்தாஸனே நிஸீதா³பேத்வா ‘‘ஆக³ந்துகத்தே²ரோ கஹம், ப⁴ந்தே’’தி புச்சி². ‘‘நாஹம் தவ குலூபகஸ்ஸ பவத்திம் ஜானாமி, க³ண்டி³ம் பஹரந்தோபி த்³வாரம் ஆகோடேந்தோபி பபோ³தே⁴தும் நாஸக்கி²ம், ஹிய்யோ தவ கே³ஹே பணீதபோ⁴ஜனம் பு⁴ஞ்ஜித்வா ஜீராபேதும் அஸக்கோந்தோ இதா³னி நித்³த³ம் ஓக்கந்தோயேவ ப⁴விஸ்ஸதி, த்வம் பஸீத³மானோ ஏவரூபேஸுயேவ டா²னேஸு பஸீத³ஸீ’’தி ஆஹ – ‘‘கீ²ணாஸவத்தே²ரோபி அத்தனோ பி⁴க்கா²சாரவேலம் ஸல்லக்கே²த்வா ஸரீரம் படிஜக்³கி³த்வா பத்தசீவரமாதா³ய ஆகாஸே உப்பதித்வா அஞ்ஞத்த² அக³மாஸி. ஸோ குடும்பி³கோ நேவாஸிகத்தே²ரம் ஸப்பிமது⁴ஸக்க²ராபி⁴ஸங்க²தம் பாயாஸம் பாயேத்வா பத்தம் க³ந்த⁴சுண்ணேஹி உப்³ப³ட்டேத்வா புன பூரேத்வா ‘‘ப⁴ந்தே, ஸோ தே²ரோ மக்³க³கிலந்தோ ப⁴விஸ்ஸதி, இத³மஸ்ஸ ஹரதா²’’தி அதா³ஸி. இதரோ அபடிக்கி²பித்வாவ க³ஹேத்வா க³ச்ச²ந்தோ ‘‘ஸசே ஸோ பி⁴க்கு² இமம் பாயாஸம் பிவிஸ்ஸதி, கீ³வாயம் க³ஹேத்வா நிக்கட்³டி⁴யமானோபி ந க³மிஸ்ஸதி. ஸசே பனாஹம் இமம் பாயாஸம் மனுஸ்ஸானம் த³ஸ்ஸாமி, பாகடம் மே கம்மம் ப⁴விஸ்ஸதி. ஸசே உத³கே ஓபிலாபேஸ்ஸாமி, உத³கபிட்டே² ஸப்பி பஞ்ஞாயிஸ்ஸதி. ஸசே பூ⁴மியம் ச²ட்³டே³ஸ்ஸாமி, காகஸன்னிபாதேன பஞ்ஞாயிஸ்ஸதி. கத்த² நு கோ² இமம் ச²ட்³டே³ய்ய’’ந்தி உபதா⁴ரேந்தோ ஏகம் ஜா²மக்கே²த்தம் தி³ஸ்வா அங்கா³ரே வியூஹித்வா தத்த² பக்கி²பித்வா உபரி அங்கா³ரேஹி படிச்சா²தே³த்வா விஹாரம் க³தோ தம் பி⁴க்கு²ம் அதி³ஸ்வா சிந்தேஸி ‘‘அத்³தா⁴ ஸோ பி⁴க்கு² கீ²ணாஸவோ மம அஜ்ஜா²ஸயம் விதி³த்வா அஞ்ஞத்த² க³தோ ப⁴விஸ்ஸதி, அஹோ மயா உத³ரஹேது அயுத்தம் கத’’ந்தி தாவதே³வஸ்ஸ மஹந்தம் தோ³மனஸ்ஸம் உத³பாதி³. ததோ பட்டா²யேவ ச மனுஸ்ஸபேதோ ஹுத்வா ந சிரஸ்ஸேவ காலம் கத்வா நிரயே நிப்³ப³த்தி.

ஸோ ப³ஹூனி வஸ்ஸஸதஸஹஸ்ஸானி நிரயே பச்சித்வா பக்காவஸேஸேன படிபாடியா பஞ்சஜாதிஸதேஸு யக்கோ² ஹுத்வா ஏகதி³வஸம்பி உத³ரபூரம் ஆஹாரம் ந லபி⁴. ஏகதி³வஸம் பன க³ப்³ப⁴மலம் உத³ரபூரம் லபி⁴. புன பஞ்சஜாதிஸதேஸு ஸுனகோ² அஹோஸி. ததா³பி ஏகதி³வஸம் ப⁴த்தவமனம் உத³ரபூரம் லபி⁴, ஸேஸகாலே பன தேன உத³ரபூரோ ஆஹாரோ நாம ந லத்³த⁴புப்³போ³. ஸுனக²யோனிதோ பன சவித்வா காஸிரட்டே² ஏகஸ்மிம் கா³மே து³க்³க³தகுலே நிப்³ப³த்தி. தஸ்ஸ நிப்³ப³த்திதோ பட்டா²ய தம் குலம் பரமது³க்³க³தமேவ ஜாதம், ஜாதிதோ உத்³த⁴ம் உத³ககஞ்ஜிகாமத்தம்பி ந லபி⁴. தஸ்ஸ பன ‘‘மித்தவிந்த³கோ’’தி நாமம் அஹோஸி. மாதாபிதரோ சா²தகது³க்க²ம் அதி⁴வாஸேதும் அஸக்கோந்தா ‘‘க³ச்ச² காளகண்ணீ’’தி தம் போதே²த்வா நீஹரிம்ஸு. ஸோ அபடிஸரணோ விசரந்தோ பா³ராணஸிம் அக³மாஸி. ததா³ போ³தி⁴ஸத்தோ பா³ராணஸியம் தி³ஸாபாமோக்கோ² ஆசரியோ ஹுத்வா பஞ்ச மாணவகஸதானி ஸிப்பம் வாசேதி. ததா³ பா³ராணஸிவாஸினோ து³க்³க³தானம் பரிப்³ப³யம் த³த்வா ஸிப்பம் ஸிக்கா²பேந்தி. அயம்பி மித்தவிந்த³கோ போ³தி⁴ஸத்தஸ்ஸ ஸந்திகே ஸிப்பம் ஸிக்க²தி. ஸோ ப²ருஸோ அனோவாத³க்க²மோ தம் தம் பஹரந்தோ விசரதி, போ³தி⁴ஸத்தேன ஓவதி³யமானோபி ஓவாத³ம் ந க³ண்ஹாதி. தம் நிஸ்ஸாய ஆயோபிஸ்ஸ மந்தோ³ ஜாதோ.

அத² ஸோ மாணவகேஹி ஸத்³தி⁴ம் ப⁴ண்டி³த்வா ஓவாத³ம் அக்³க³ண்ஹந்தோ ததோ பலாயித்வா ஆஹிண்ட³ந்தோ ஏகம் பச்சந்தகா³மம் பத்வா ப⁴திம் கத்வா ஜீவதி. ஸோ தத்த² ஏகாய து³க்³க³தித்தி²யா ஸத்³தி⁴ம் ஸம்வாஸம் கப்பேஸி. ஸா தம் நிஸ்ஸாய த்³வே தா³ரகே விஜாயி. கா³மவாஸினோ ‘‘அம்ஹாகம் ஸுஸாஸனம் து³ஸ்ஸாஸனம் ஆரோசேய்யாஸீ’’தி மித்தவிந்த³கஸ்ஸ ப⁴திம் த³த்வா தம் கா³மத்³வாரே குடிகாய வஸாபேஸும். தம் பன மித்தவிந்த³கம் நிஸ்ஸாய தே பச்சந்தகா³மவாஸினோ ஸத்தக்க²த்தும் ராஜத³ண்ட³ம் அக³மம்ஸு, ஸத்தக்க²த்தும் நேஸம் கே³ஹானி ஜா²யிம்ஸு, ஸத்தக்க²த்தும் தளாகம் பி⁴ஜ்ஜி. தே சிந்தயிம்ஸு ‘‘அம்ஹாகம் புப்³பே³ இமஸ்ஸ மித்தவிந்த³கஸ்ஸ அனாக³மனகாலே ஏவரூபம் நத்தி², இதா³னி பனஸ்ஸ ஆக³தகாலதோ பட்டா²ய பரிஹாயாமா’’தி தம் போதே²த்வா நீஹரிம்ஸு.

ஸோ அத்தனோ தா³ரகே க³ஹேத்வா அஞ்ஞத்த² க³ச்ச²ந்தோ ஏகம் அமனுஸ்ஸபரிக்³க³ஹம் அடவிம் பாவிஸி. தத்த²ஸ்ஸ அமனுஸ்ஸா தா³ரகே ச ப⁴ரியஞ்ச மாரேத்வா மம்ஸம் கா²தி³ம்ஸு. ஸோ ததோ பலாயித்வா ததோ ததோ ஆஹிண்ட³ந்தோ ஏகம் க³ம்பீ⁴ரம் நாம பட்டனகா³மம் நாவாவிஸ்ஸஜ்ஜனதி³வஸேயேவ பத்வா கம்மகாரகோ ஹுத்வா நாவம் அபி⁴ருஹி. நாவா ஸமுத்³த³பிட்டே² ஸத்தாஹம் க³ந்த்வா ஸத்தமே தி³வஸே ஸமுத்³த³மஜ்ஜே² ஆகோடேத்வா ட²பிதா விய அட்டா²ஸி. தே காளகண்ணிஸலாகம் சாரேஸும், ஸத்தக்க²த்தும் மித்தவிந்த³கஸ்ஸேவ பாபுணி. மனுஸ்ஸா தஸ்ஸேகம் வேளுகலாபம் த³த்வா ஹத்தே² க³ஹேத்வா ஸமுத்³த³பிட்டே² கி²பிம்ஸு, தஸ்மிம் கி²த்தமத்தே நாவா அக³மாஸி. மித்தவிந்த³கோ வேளுகலாபே நிபஜ்ஜித்வா ஸமுத்³த³பிட்டே² க³ச்ச²ந்தோ கஸ்ஸபஸம்மாஸம்பு³த்³த⁴காலே ரக்கி²தஸீலஸ்ஸ ப²லேன ஸமுத்³த³பிட்டே² ஏகஸ்மிம் ப²லிகவிமானே சதஸ்ஸோ தே³வதீ⁴தரோ படிலபி⁴த்வா தாஸம் ஸந்திகே ஸுக²ம் அனுப⁴வமானோ ஸத்தாஹம் வஸி. தா பன விமானபேதியோ ஸத்தாஹம் ஸுக²ம் அனுப⁴வந்தி, ஸத்தாஹம் து³க்க²ம். ஸத்தாஹம் து³க்க²ம் அனுப⁴விதும் க³ச்ச²மானா ‘‘யாவ மயம் ஆக³ச்சா²ம, தாவ இதே⁴வ ஹோஹீ’’தி வத்வா அக³மம்ஸு.

மித்தவிந்த³கோ தாஸம் க³தகாலே வேளுகலாபே நிபஜ்ஜித்வா புரதோ க³ச்ச²ந்தோ ரஜதவிமானே அட்ட² தே³வதீ⁴தரோ லபி⁴. ததோபி பரம் க³ச்ச²ந்தோ மணிவிமானே ஸோளஸ, கனகவிமானே த்³வத்திம்ஸ தே³வதீ⁴தரோ லபி⁴. தாஸம்பி வசனம் அகத்வா பரதோ க³ச்ச²ந்தோ அந்தரதீ³பகே ஏகம் யக்க²னக³ரம் அத்³த³ஸ. தத்தே²கா யக்கி²னீ அஜரூபேன விசரதி. மித்தவிந்த³கோ தஸ்ஸா யக்கி²னிபா⁴வம் அஜானந்தோ ‘‘அஜமம்ஸம் கா²தி³ஸ்ஸாமீ’’தி தம் பாதே³ அக்³க³ஹேஸி, ஸா யக்கா²னுபா⁴வேன தம் உக்கி²பித்வா கி²பி. ஸோ தாய கி²த்தோ ஸமுத்³த³மத்த²கேன க³ந்த்வா பா³ராணஸியம் பரிகா²பிட்டே² ஏகஸ்மிம் கண்டககு³ம்ப³மத்த²கே பதித்வா பவட்டமானோ பூ⁴மியம் பதிட்டா²ஸி. தஸ்மிஞ்ச ஸமயே தஸ்மிம் பரிகா²பிட்டே² ரஞ்ஞோ அஜிகா சரமானா சோரா ஹரந்தி. அஜிககோ³பகா ‘‘சோரே க³ண்ஹிஸ்ஸாமா’’தி ஏகமந்தம் நிலீனா அட்ட²ம்ஸு. மித்தவிந்த³கோ பவட்டித்வா பூ⁴மியம் டி²தோ தா அஜிகா தி³ஸ்வா சிந்தேஸி ‘‘அஹம் ஸமுத்³தே³ ஏகஸ்மிம் தீ³பகே அஜிகம் பாதே³ க³ஹேத்வா தாய கி²த்தோ இத⁴ பதிதோ. ஸசே இதா³னி ஏகம் அஜிகம் பாதே³ க³ஹேஸ்ஸாமி, ஸா மம் பரதோ ஸமுத்³த³பிட்டே² விமானதே³வதானம் ஸந்திகே கி²பிஸ்ஸதீ’’தி. ஸோ ஏவம் அயோனிஸோ மனஸிகரித்வா அஜிகம் பாதே³ க³ண்ஹி, ஸா க³ஹிதமத்தா விரவி. அஜிககோ³பகா இதோ சிதோ ச ஆக³ந்த்வா தம் க³ஹேத்வா ‘‘ஏத்தகம் காலம் ராஜகுலே அஜிககா²த³கோ ஏஸ சோரோ’’தி தம் கோட்டேத்வா ப³ந்தி⁴த்வா ரஞ்ஞோ ஸந்திகம் நேந்தி.

தஸ்மிம் க²ணே போ³தி⁴ஸத்தோ பஞ்சஸதமாணவகபரிவுதோ நக³ரா நிக்க²ம்ம ந்ஹாயிதும் க³ச்ச²ந்தோ மித்தவிந்த³கம் தி³ஸ்வா ஸஞ்ஜானித்வா தே மனுஸ்ஸே ஆஹ – ‘‘தாதா, அயம் அம்ஹாகம் அந்தேவாஸிகோ, கஸ்மா நம் க³ண்ஹதா²’’தி? ‘‘அஜிகசோரகோ, அய்ய, ஏகம் அஜிகம் பாதே³ க³ண்ஹி, தஸ்மா க³ஹிதோ’’தி. ‘‘தேன ஹேதம் அம்ஹாகம் தா³ஸம் கத்வா தே³த², அம்ஹே நிஸ்ஸாய ஜீவிஸ்ஸதீ’’தி. தே, ‘‘ஸாது⁴ அய்யா’’தி தம் விஸ்ஸஜ்ஜேத்வா அக³மம்ஸு. அத² நம் போ³தி⁴ஸத்தோ ‘‘மித்தவிந்த³க, த்வம் ஏத்தகம் காலம் கஹம் வஸீ’’தி புச்சி². ஸோ ஸப்³ப³ம் அத்தனா கதகம்மம் ஆரோசேஸி. போ³தி⁴ஸத்தோ ‘‘அத்த²காமானம் வசனம் அகரோந்தோ ஏவம் து³க்க²ம் பாபுணாதீ’’தி வத்வா இமம் கா³த²மாஹ –

41. ‘‘யோ அத்த²காமஸ்ஸ ஹிதானுகம்பினோ, ஓவஜ்ஜமானோ ந கரோதி ஸாஸனம்;

அஜியா பாத³மோலம்ப³, மித்தகோ விய ஸோசதீ’’தி.

தத்த² அத்த²காமஸ்ஸாதி வுட்³டி⁴ம் இச்ச²ந்தஸ்ஸ. ஹிதானுகம்பினோதி ஹிதேன அனுகம்பமானஸ்ஸ. ஓவஜ்ஜமானோதி முது³கேன ஹிதசித்தேன ஓவதி³யமானோ. ந கரோதி ஸாஸனந்தி அனுஸிட்ட²ம் ந கரோதி, து³ப்³ப³சோ அனோவாத³கோ ஹோதி. மித்தகோ விய ஸோசதீதி யதா²யம் மித்தவிந்த³கோ அஜிகாய பாத³ம் க³ஹேத்வா ஸோசதி கிலமதி, ஏவம் நிச்சகாலம் ஸோசதீதி இமாய கா³தா²ய போ³தி⁴ஸத்தோ த⁴ம்மம் தே³ஸேஸி.

ஏவம் தேன தே²ரேன ஏத்தகே அத்³தா⁴னே தீஸுயேவ அத்தபா⁴வேஸு குச்சி²பூரோ லத்³த⁴புப்³போ³. யக்கே²ன ஹுத்வா ஏகதி³வஸம் க³ப்³ப⁴மலம் லத்³த⁴ம், ஸுனகே²ன ஹுத்வா ஏகதி³வஸம் ப⁴த்தவமனம், பரினிப்³பா³னதி³வஸே த⁴ம்மஸேனாபதிஸ்ஸானுபா⁴வேன சதுமது⁴ரம் லத்³த⁴ம். ஏவம் பரஸ்ஸ லாப⁴ந்தராயகரணம் நாம மஹாதோ³ஸந்தி வேதி³தப்³ப³ம். தஸ்மிம் பன காலே ஸோபி ஆசரியோ மித்தவிந்த³கோபி யதா²கம்மம் க³தோ.

ஸத்தா² ‘‘ஏவம், பி⁴க்க²வே, அத்தனோ அப்பலாபி⁴பா⁴வஞ்ச அரியத⁴ம்மலாபி⁴பா⁴வஞ்ச ஸயமேவ ஏஸ அகாஸீ’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ மித்தவிந்த³கோ லோஸகதிஸ்ஸத்தே²ரோ அஹோஸி, தி³ஸாபாமோக்கா²சரியோ பன அஹமேவ அஹோஸி’’ந்தி.

லோஸகஜாதகவண்ணனா பட²மா.

[42] 2. கபோதஜாதகவண்ணனா

யோ அத்த²காமஸ்ஸாதி இத³ம் ஸத்தா² ஜேதவனே விஹரந்தோ அஞ்ஞதரம் லோலபி⁴க்கு²ம் ஆரப்³ப⁴ கதே²ஸி. தஸ்ஸ லோலபா⁴வோ நவகனிபாதே காகஜாதகே ஆவி ப⁴விஸ்ஸதி. ததா³ பன தம் பி⁴க்கூ² ‘‘அயம், ப⁴ந்தே, பி⁴க்கு² லோலோ’’தி ஸத்து² ஆரோசேஸும். அத² நம் ஸத்தா² ‘‘ஸச்சம் கிர த்வம் பி⁴க்கு² லோலோஸீ’’தி புச்சி². ‘‘ஆம, ப⁴ந்தே’’தி. ஸத்தா² ‘‘புப்³பே³பி த்வம் பி⁴க்கு² லோலோ லோலகாரணா ஜீவிதக்க²யம் பத்தோ, பண்டி³தாபி தம் நிஸ்ஸாய அத்தனோ வஸனட்டா²னா பரிஹீனா’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ பாராவதயோனியம் நிப்³ப³த்தி. ததா³ பா³ராணஸிவாஸினோ புஞ்ஞகாமதாய தஸ்மிம் தஸ்மிம் டா²னே ஸகுணானம் ஸுக²வஸனத்தா²ய து²ஸபச்சி²யோ ஓலம்பே³ந்தி. பா³ராணஸிஸேட்டி²னோபி ப⁴த்தகாரகோ அத்தனோ மஹானஸே ஏகம் து²ஸபச்சி²ம் ஓலம்பே³த்வா ட²பேஸி, போ³தி⁴ஸத்தோ தத்த² வாஸம் கப்பேஸி. ஸோ பாதோவ நிக்க²மித்வா கோ³சரே சரித்வா ஸாயம் ஆக³ந்த்வா தத்த² வஸந்தோ காலம் கே²பேஸி. அதே²கதி³வஸம் ஏகோ காகோ மஹானஸமத்த²கேன க³ச்ச²ந்தோ அம்பி³லானம்பி³லமச்ச²மம்ஸானம் தூ⁴பனவாஸம் கா⁴யித்வா லோப⁴ம் உப்பாதே³த்வா ‘‘கம் நு கோ² நிஸ்ஸாய இமம் மச்ச²மம்ஸம் லபி⁴ஸ்ஸாமீ’’தி அவிதூ³ரே நிஸீதி³த்வா பரிக்³க³ண்ஹந்தோ ஸாயம் போ³தி⁴ஸத்தம் ஆக³ந்த்வா மஹானஸம் பவிஸந்தம் தி³ஸ்வா ‘‘இமம் பாராவதம் நிஸ்ஸாய மச்ச²மம்ஸம் லபி⁴ஸ்ஸாமீ’’தி புனதி³வஸே பாதோவ ஆக³ந்த்வா போ³தி⁴ஸத்தஸ்ஸ நிக்க²மித்வா கோ³சரத்தா²ய க³மனகாலே பிட்டி²தோ பிட்டி²தோ அக³மாஸி. அத² நம் போ³தி⁴ஸத்தோ ‘‘கஸ்மா த்வம், ஸம்ம, அம்ஹேஹி ஸத்³தி⁴ம் சரஸீ’’தி ஆஹ. ‘‘ஸாமி, தும்ஹாஹம் கிரியா மய்ஹம் ருச்சதி, இதோ பட்டா²ய தும்ஹே உபட்ட²ஹிஸ்ஸாமீ’’தி. ‘‘ஸம்ம, தும்ஹே அஞ்ஞகோ³சரா, மயம் அஞ்ஞகோ³சரா, தும்ஹேஹி அம்ஹாகம் உபட்டா²னம் து³க்கர’’ந்தி. ‘‘ஸாமி, தும்ஹாகம் கோ³சரக்³க³ஹணகாலே அஹம்பி கோ³சரம் க³ஹேத்வா தும்ஹேஹி ஸத்³தி⁴ம்யேவ க³மிஸ்ஸாமீ’’தி. ‘‘ஸாது⁴, கேவலம் தே அப்பமத்தேன ப⁴விதப்³ப³’’ந்தி ஏவம் போ³தி⁴ஸத்தோ காகம் ஓவதி³த்வா கோ³சரம் சரந்தோ திணபீ³ஜாதீ³னி கா²த³தி. போ³தி⁴ஸத்தஸ்ஸ பன கோ³சரக்³க³ஹணகாலே காகோ க³ந்த்வா கோ³மயபிண்ட³ம் அபனேத்வா பாணகே கா²தி³த்வா உத³ரம் பூரேத்வா போ³தி⁴ஸத்தஸ்ஸ ஸந்திகம் ஆக³ந்த்வா ‘‘ஸாமி, தும்ஹே அதிவேலம் சரத², அதிப³ஹுப⁴க்கே²ன நாம ப⁴விதும் ந வட்டதீ’’தி வத்வா போ³தி⁴ஸத்தேன கோ³சரம் க³ஹேத்வா ஸாயம் ஆக³ச்ச²ந்தேன ஸத்³தி⁴ம்யேவ மஹானஸம் பாவிஸி. ப⁴த்தகாரகோ ‘‘அம்ஹாகம் கபோதோ அஞ்ஞம்பி க³ஹேத்வா ஆக³தோ’’தி காகஸ்ஸபி பச்சி²ம் ட²பேஸி. ததோ பட்டா²ய த்³வே ஜனா வஸந்தி.

அதே²கதி³வஸம் ஸேட்டி²ஸ்ஸ ப³ஹும் மச்ச²மம்ஸம் ஆஹரிம்ஸு. தம் ஆதா³ய ப⁴த்தகாரகோ மஹானஸே தத்த² தத்த² ஓலம்பே³ஸி. காகோ தம் தி³ஸ்வா லோப⁴ம் உப்பாதே³த்வா ‘‘ஸ்வே கோ³சரபூ⁴மிம் அக³ந்த்வா மயா இத³மேவ கா²தி³தப்³ப³’’ந்தி ரத்திம் நித்து²னந்தோ நிபஜ்ஜி. புனதி³வஸே போ³தி⁴ஸத்தோ கோ³சராய க³ச்ச²ந்தோ ‘‘ஏஹி, ஸம்ம, காகா’’தி ஆஹ. ‘‘ஸாமி, தும்ஹே க³ச்ச²த², மய்ஹம் குச்சி²ரோகோ³ அத்தீ²’’தி. ‘‘ஸம்ம, காகானம் குச்சி²ரோகோ³ நாம ந கதா³சி பூ⁴தபுப்³போ³, ரத்திம் தீஸு யாமேஸு ஏகேகஸ்மிம் யாமே முச்சி²தா ஹோந்தி, தீ³பவட்டிம் கி³லிதகாலே பன நேஸம் முஹுத்தம் தித்தி ஹோதி, த்வம் இமம் மச்ச²மம்ஸம் கா²தி³துகாமோ ப⁴விஸ்ஸஸி, ஏஹி மனுஸ்ஸபரிபோ⁴கோ³ நாம தும்ஹாகம் து³ப்பரிபு⁴ஞ்ஜியோ, மா ஏவரூபம் அகாஸி, மயா ஸத்³தி⁴ம்யேவ கோ³சராய க³ச்சா²ஹீ’’தி. ‘‘ந ஸக்கோமி, ஸாமீ’’தி. ‘‘தேன ஹி பஞ்ஞாயிஸ்ஸஸி ஸகேன கம்மேன, லோப⁴வஸம் அக³ந்த்வா அப்பமத்தோ ஹோஹீ’’தி தம் ஓவதி³த்வா போ³தி⁴ஸத்தோ கோ³சராய க³தோ.

ப⁴த்தகாரகோ நானப்பகாரம் மச்ச²மம்ஸவிகதிம் ஸம்பாதே³த்வா உஸுமனிக்க²மனத்த²ம் பா⁴ஜனானி தோ²கம் விவரித்வா ரஸபரிஸ்ஸாவனகரோடிம் பா⁴ஜனமத்த²கே ட²பேத்வா ப³ஹி நிக்க²மித்வா ஸேத³ம் புஞ்ச²மானோ அட்டா²ஸி. தஸ்மிம் க²ணே காகோ பச்சி²தோ ஸீஸம் உக்கி²பித்வா ப⁴த்தகே³ஹம் ஓலோகேந்தோ தஸ்ஸ நிக்க²ந்தபா⁴வம் ஞத்வா ‘‘அயம்தா³னி மய்ஹம் மனோரத²ம் பூரேத்வா மம்ஸம் கா²தி³தும் காலோ, கிம் நு கோ² மஹாமம்ஸம் கா²தா³மி, உதா³ஹு சுண்ணிகமம்ஸ’’ந்தி சிந்தேத்வா ‘‘சுண்ணிகமம்ஸேன நாம கி²ப்பம் குச்சி²ம் பூரேதும் ந ஸக்கா, மஹந்தம் மம்ஸக²ண்ட³ம் ஆஹரித்வா பச்சி²யம் நிக்கி²பித்வா கா²த³மானோ நிபஜ்ஜிஸ்ஸாமீ’’தி பச்சி²தோ உப்பதித்வா ரஸகரோடியம் நிலீயி. ஸா ‘‘கிரீ’’தி ஸத்³த³மகாஸி. ப⁴த்தகாரகோ தம் ஸத்³த³ம் ஸுத்வா ‘‘கிம் நு கோ² ஏத’’ந்தி பவிட்டோ² காகம் தி³ஸ்வா ‘‘அயம் து³ட்ட²காகோ மஹாஸேட்டி²னோ பக்கமம்ஸம் கா²தி³துகாமோ, அஹம் கோ² பன ஸேட்டி²ம் நிஸ்ஸாய ஜீவாமி, ந இமம் பா³லம், கிம் மே இமினா’’தி த்³வாரம் பிதா⁴ய காகம் க³ஹேத்வா ஸகலஸரீரே பத்தானி லுஞ்சித்வா அல்லஸிங்கீ³வேரலோணஜீரகாத³யோ கோட்டேத்வா அம்பி³லதக்கேன ஆலோளேத்வா தேனஸ்ஸ ஸகலஸரீரம் மக்கே²த்வா தம் காகம் பச்சி²யம் கி²பி. ஸோ அதி⁴மத்தவேத³னாபி⁴பூ⁴தோ நித்து²னந்தோ நிபஜ்ஜி.

போ³தி⁴ஸத்தோ ஸாயம் ஆக³ந்த்வா தம் ப்³யஸனப்பத்தம் தி³ஸ்வா ‘‘லோலகாக, மம வசனம் அகத்வா தவ லோப⁴ம் நிஸ்ஸாய மஹாது³க்க²ம் பத்தோஸீ’’தி வத்வா இமம் கா³த²மாஹ –

42. ‘‘யோ அத்த²காமஸ்ஸ ஹிதானுகம்பினோ, ஓவஜ்ஜமானோ ந கரோதி ஸாஸனம்;

கபோதகஸ்ஸ வசனம் அகத்வா, அமித்தஹத்த²த்த²க³தோவ ஸேதீ’’தி.

தத்த² கபோதகஸ்ஸ வசனம் அகத்வாதி பாராவதஸ்ஸ ஹிதானுஸாஸனவசனம் அகத்வா. அமித்தஹத்த²த்த²க³தோவ ஸேதீதி அமித்தானம் அனத்த²காரகானம் து³க்கு²ப்பாத³கபுக்³க³லானம் ஹத்த²த்த²ம் ஹத்த²பத²ம் க³தோ அயம் காகோ விய ஸோ புக்³க³லோ மஹந்தம் ப்³யஸனம் பத்வா அனுஸோசமானோ ஸேதீதி.

போ³தி⁴ஸத்தோ இமம் கா³த²ம் வத்வா ‘‘இதா³னி மயா ச இமஸ்மிம் டா²னே ந ஸக்கா வஸிது’’ந்தி அஞ்ஞத்த² க³தோ. காகோபி தத்தே²வ ஜீவிதக்க²யம் பத்தோ. அத² நம் ப⁴த்தகாரகோ ஸத்³தி⁴ம் பச்சி²யா க³ஹேத்வா ஸங்காரட்டா²னே ச²ட்³டே³ஸி.

ஸத்தா²பி ‘‘ந த்வம் பி⁴க்கு² இதா³னேவ லோலோ, புப்³பே³பி லோலோயேவ, தஞ்ச பன தே லோல்யம் நிஸ்ஸாய பண்டி³தாபி ஸகாவாஸா பரிஹீனா’’தி இமம் த⁴ம்மதே³ஸனம் ஆஹரித்வா ஸச்சானி பகாஸேஸி, ஸச்சபரியோஸானே ஸோ பி⁴க்கு² அனாகா³மிப²லம் பத்தோ. ஸத்தா² அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ காகோ லோலபி⁴க்கு² அஹோஸி, பாராவதோ பன அஹமேவ அஹோஸி’’ந்தி.

கபோதஜாதகவண்ணனா து³தியா.

[43] 3. வேளுகஜாதகவண்ணனா

யோ அத்த²காமஸ்ஸாதி இத³ம் ஸத்தா² ஜேதவனே விஹரந்தோ அஞ்ஞதரம் து³ப்³ப³சபி⁴க்கு²ம் ஆரப்³ப⁴ கதே²ஸி. தஞ்ஹி ப⁴க³வா ‘‘ஸச்சம் கிர த்வம் பி⁴க்கு² து³ப்³ப³சோஸீ’’தி புச்சி²த்வா ‘‘ஸச்சம், ப⁴ந்தே’’தி வுத்தே ‘‘ந த்வம் பி⁴க்கு² இதா³னேவ து³ப்³ப³சோ, புப்³பே³பி து³ப்³ப³சோயேவ, து³ப்³ப³சத்தாயேவ ச பண்டி³தானம் வசனம் அகத்வா ஸப்பமுகே² ஜீவிதக்க²யம் பத்தோ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ காஸிரட்டே² மஹாபோ⁴க³குலே நிப்³ப³த்தோ விஞ்ஞுதம் பத்வா காமேஸு ஆதீ³னவம் நேக்க²ம்மே சானிஸம்ஸம் தி³ஸ்வா காமே பஹாய ஹிமவந்தம் பவிஸித்வா இஸிபப்³ப³ஜ்ஜம் பப்³ப³ஜித்வா கஸிணபரிகம்மம் கத்வா பஞ்சாபி⁴ஞ்ஞா அட்ட² ஸமாபத்தியோ ச உப்பாதே³த்வா ஜா²னஸுகே²ன வீதினாமேந்தோ அபரபா⁴கே³ மஹாபரிவாரோ பஞ்சஹி தாபஸஸதேஹி பரிவுதோ க³ணஸ்ஸ ஸத்தா² ஹுத்வா விஹாஸி. அதே²கோ ஆஸிவிஸபோதகோ அத்தனோ த⁴ம்மதாய சரந்தோ அஞ்ஞதரஸ்ஸ தாபஸஸ்ஸ அஸ்ஸமபத³ம் பத்தோ. தாபஸோ தஸ்மிம் புத்தஸினேஹம் உப்பாதே³த்வா தம் ஏகஸ்மிம் வேளுபப்³பே³ ஸயாபேத்வா படிஜக்³க³தி. தஸ்ஸ வேளுபப்³பே³ ஸயனதோ ‘‘வேளுகோ’’த்வேவ நாமம் அகம்ஸு. தம் புத்தஸினேஹேன படிஜக்³க³னதோ தாபஸஸ்ஸ ‘‘வேளுகபிதா’’த்வேவ நாமம் அகம்ஸு.

ததா³ போ³தி⁴ஸத்தோ ‘‘ஏகோ கிர தாபஸோ ஆஸிவிஸம் படிஜக்³க³தீ’’தி ஸுத்வா தம் பக்கோஸாபேத்வா ‘‘ஸச்சம் கிர த்வம் ஆஸிவிஸம் படிஜக்³க³ஸீ’’தி புச்சி²த்வா ‘‘ஸச்ச’’ந்தி வுத்தே ‘‘ஆஸிவிஸேன ஸத்³தி⁴ம் விஸ்ஸாஸோ நாம நத்தி², மா ஏவம் ஜக்³கா³ஹீ’’தி ஆஹ. ‘‘ஸோ மே ஆசரிய புத்தோ, நாஹம் தேன வினா வத்திதும் ஸக்கி²ஸ்ஸாமீ’’தி. ‘‘தேன ஹி ஏதஸ்ஸேவ ஸந்திகா ஜீவிதக்க²யம் பாபுணிஸ்ஸஸீ’’தி. தாபஸோ போ³தி⁴ஸத்தஸ்ஸ வசனம் ந க³ண்ஹி, ஆஸிவிஸம்பி ஜஹிதும் நாஸக்கி². ததோ கதிபாஹச்சயேனேவ ஸப்³பே³ தாபஸா ப²லாப²லத்தா²ய க³ந்த்வா க³தட்டா²னே ப²லாப²லஸ்ஸ ஸுலப⁴பா⁴வம் தி³ஸ்வா த்³வே தயோ தி³வஸே தத்தே²வ வஸிம்ஸு, வேளுகபிதாபி தேஹி ஸத்³தி⁴ம் க³ச்ச²ந்தோ ஆஸிவிஸம் வேளுபப்³பே³யேவ ஸயாபேத்வா பித³ஹித்வா க³தோ. ஸோ புன தாபஸேஹி ஸத்³தி⁴ம் த்³வீஹதீஹச்சயேன ஆக³ந்த்வா ‘‘வேளுகஸ்ஸ கோ³சரம் த³ஸ்ஸாமீ’’தி வேளுபப்³ப³ம் உக்³கா⁴டேத்வா ‘‘ஏஹி, புத்தக, சா²தகோஸீ’’தி ஹத்த²ம் பஸாரேஸி. ஆஸிவிஸோ த்³வீஹதீஹம் நிராஹாரதாய குஜ்ஜி²த்வா பஸாரிதஹத்த²ம் ட³ம்ஸித்வா தாபஸம் தத்தே²வ ஜீவிதக்க²யம் பாபேத்வா அரஞ்ஞம் பாவிஸி. தாபஸா தம் தி³ஸ்வா போ³தி⁴ஸத்தஸ்ஸ ஆரோசேஸும். போ³தி⁴ஸத்தோ தஸ்ஸ ஸரீரகிச்சம் காரேத்வா இஸிக³ணஸ்ஸ மஜ்ஜே² நிஸீதி³த்வா இஸீனம் ஓவாத³வஸேன இமம் கா³த²மாஹ –

43. ‘‘யோ அத்த²காமஸ்ஸ ஹிதானுகம்பினோ, ஓவஜ்ஜமானோ ந கரோதி ஸாஸனம்;

ஏவம் ஸோ நிஹதோ ஸேதி, வேளுகஸ்ஸ யதா² பிதா’’தி.

தத்த² ஏவம் ஸோ நிஹதோ ஸேதீதி யோ ஹி இஸீனம் ஓவாத³ம் ந க³ண்ஹாதி, ஸோ யதா² ஏஸ தாபஸோ ஆஸிவிஸமுகே² பூதிபா⁴வம் பத்வா நிஹதோ ஸேதி, ஏவம் மஹாவினாஸம் பத்வா நிஹதோ ஸேதீதி அத்தோ². ஏவம் போ³தி⁴ஸத்தோ இஸிக³ணம் ஓவதி³த்வா சத்தாரோ ப்³ரஹ்மவிஹாரே பா⁴வேத்வா ஆயுபரியோஸானே ப்³ரஹ்மலோகே உப்பஜ்ஜி.

ஸத்தா² ‘‘ந த்வம் பி⁴க்கு² இதா³னேவ து³ப்³ப³சோ, புப்³பே³பி து³ப்³ப³சோயேவ, து³ப்³ப³சபா⁴வேனேவ ச ஆஸிவிஸமுகே² பூதிபா⁴வம் பத்தோ’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ வேளுகபிதா து³ப்³ப³சபி⁴க்கு² அஹோஸி, ஸேஸபரிஸா பு³த்³த⁴பரிஸா, க³ணஸத்தா² பன அஹமேவ அஹோஸி’’ந்தி.

வேளுகஜாதகவண்ணனா ததியா.

[44] 4. மகஸஜாதகவண்ணனா

ஸேய்யோ அமித்தோதி இத³ம் ஸத்தா² மக³தே⁴ஸு சாரிகம் சரமானோ அஞ்ஞதரஸ்மிம் கா³மகே பா³லகா³மிகமனுஸ்ஸே ஆரப்³ப⁴ கதே²ஸி. ததா²க³தோ கிர ஏகஸ்மிம் ஸமயே ஸாவத்தி²தோ மக³த⁴ரட்ட²ம் க³ந்த்வா தத்த² சாரிகம் சரமானோ அஞ்ஞதரம் கா³மகம் ஸம்பாபுணி. ஸோ ச கா³மகோ யேபு⁴ய்யேன அந்த⁴பா³லமனுஸ்ஸேஹியேவ உஸ்ஸன்னோ. தத்தே²கதி³வஸம் தே அந்த⁴பா³லமனுஸ்ஸா ஸன்னிபதித்வா ‘‘போ⁴, அம்ஹே அரஞ்ஞம் பவிஸித்வா கம்மம் கரோந்தே மகஸா கா²த³ந்தி, தப்பச்சயா அம்ஹாகம் கம்மச்சே²தோ³ ஹோதி, ஸப்³பே³வ த⁴னூனி சேவ ஆவுதா⁴னி ச ஆதா³ய க³ந்த்வா மகஸேஹி ஸத்³தி⁴ம் யுஜ்ஜி²த்வா ஸப்³ப³மகஸே விஜ்ஜி²த்வா சி²ந்தி³த்வா ச மாரேஸ்ஸாமா’’தி மந்தயித்வா அரஞ்ஞம் க³ந்த்வா ‘‘மகஸே விஜ்ஜி²ஸ்ஸாமா’’தி அஞ்ஞமஞ்ஞம் விஜ்ஜி²த்வா ச பஹரித்வா ச து³க்க²ப்பத்தா ஆக³ந்த்வா அந்தோகா³மே ச கா³மமஜ்ஜே² ச கா³மத்³வாரே ச நிபஜ்ஜிம்ஸு.

ஸத்தா² பி⁴க்கு²ஸங்க⁴பரிவுதோ தம் கா³மம் பிண்டா³ய பாவிஸி. அவஸேஸா பண்டி³தமனுஸ்ஸா ப⁴க³வந்தம் தி³ஸ்வா கா³மத்³வாரே மண்ட³பம் காரேத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னம் த³த்வா ஸத்தா²ரம் வந்தி³த்வா நிஸீதி³ம்ஸு. ஸத்தா² தஸ்மிம் தஸ்மிம் டா²னே பதிதமனுஸ்ஸே தி³ஸ்வா தே உபாஸகே புச்சி² ‘‘ப³ஹூ இமே கி³லானா மனுஸ்ஸா, கிம் ஏதேஹி கத’’ந்தி? ‘‘ப⁴ந்தே, ஏதே மனுஸ்ஸா ‘மகஸயுத்³த⁴ம் கரிஸ்ஸாமா’தி க³ந்த்வா அஞ்ஞமஞ்ஞம் விஜ்ஜி²த்வா ஸயம் கி³லானா ஜாதா’’தி. ஸத்தா² ‘‘ந இதா³னேவ அந்த⁴பா³லமனுஸ்ஸா ‘மகஸே பஹரிஸ்ஸாமா’தி அத்தானம் பஹரந்தி, புப்³பே³பி ‘மகஸம் பஹரிஸ்ஸாமா’தி பரம் பஹரணகமனுஸ்ஸா அஹேஸும்யேவா’’தி வத்வா தேஹி மனுஸ்ஸேஹி யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ வணிஜ்ஜாய ஜீவிகம் கப்பேதி. ததா³ காஸிரட்டே² ஏகஸ்மிம் பச்சந்தகா³மே ப³ஹூ வட்³ட⁴கீ வஸந்தி. தத்தே²கோ க²லிதவட்³ட⁴கீ ருக்க²ம் தச்ச²தி, அத²ஸ்ஸ ஏகோ மகஸோ தம்ப³லோஹதா²லகபிட்டி²ஸதி³ஸே ஸீஸே நிஸீதி³த்வா ஸத்தியா பஹரந்தோ விய ஸீஸம் முக²துண்ட³கேன விஜ்ஜி². ஸோ அத்தனோ ஸந்திகே நிஸின்னம் புத்தம் ஆஹ – ‘‘தாத, மய்ஹம் ஸீஸம் மகஸோ ஸத்தியா பஹரந்தோ விய விஜ்ஜ²தி, வாரேஹி ந’’ந்தி. ‘‘தாத, அதி⁴வாஸேஹி, ஏகப்பஹாரேனேவ தம் மாரேஸ்ஸாமீ’’தி. தஸ்மிம் ஸமயே போ³தி⁴ஸத்தோபி அத்தனோ ப⁴ண்ட³ம் பரியேஸமானோ தம் கா³மம் பத்வா தஸ்ஸா வட்³ட⁴கிஸாலாய நிஸின்னோ ஹோதி. அத² ஸோ வட்³ட⁴கீ புத்தம் ஆஹ – ‘‘தாத, இமம் மகஸம் வாரேஹீ’’தி. ஸோ ‘‘வாரேஸ்ஸாமி, தாதா’’தி திகி²ணம் மஹாப²ரஸும் உக்கி²பித்வா பிது பிட்டி²பஸ்ஸே ட²த்வா ‘‘மகஸம் பஹரிஸ்ஸாமீ’’தி பிது மத்த²கம் த்³விதா⁴ பி⁴ந்தி³, வட்³ட⁴கீ தத்தே²வ ஜீவிதக்க²யம் பத்தோ.

போ³தி⁴ஸத்தோ தஸ்ஸ தம் கம்மம் தி³ஸ்வா ‘‘பச்சாமித்தோபி பண்டி³தோவ ஸேய்யோ. ஸோ ஹி த³ண்ட³ப⁴யேனபி மனுஸ்ஸே ந மாரேஸ்ஸதீ’’தி சிந்தேத்வா இமம் கா³த²மாஹ –

44. ‘‘ஸேய்யோ அமித்தோ மதியா உபேதோ, ந த்வேவ மித்தோ மதிவிப்பஹீனோ;

‘மகஸம் வதி⁴ஸ்ஸ’ந்தி ஹி ஏளமூகோ³, புத்தோ பிது அப்³பி⁴தா³ உத்தமங்க³’’ந்தி.

தத்த² ஸேய்யோதி பவரோ உத்தமோ. மதியா உபேதோதி பஞ்ஞாய ஸமன்னாக³தோ. ஏளமூகோ³தி லாலாமுகோ² பா³லோ. புத்தோ பிது அப்³பி⁴தா³ உத்தமங்க³ந்தி அத்தனோ பா³லதாய புத்தோபி ஹுத்வா பிது உத்தமங்க³ம் மத்த²கம் ‘‘மகஸம் பஹரிஸ்ஸாமீ’’தி த்³விதா⁴ பி⁴ந்தி³. தஸ்மா பா³லமித்ததோ பண்டி³தஅமித்தோவ ஸேய்யோதி இமம் கா³த²ம் வத்வா போ³தி⁴ஸத்தோ உட்டா²ய யதா²கம்மம் க³தோ. வட்³ட⁴கிஸ்ஸபி ஞாதகா ஸரீரகிச்சம் அகம்ஸு.

ஸத்தா² ‘‘ஏவம் உபாஸகா புப்³பே³பி ‘மகஸம் பஹரிஸ்ஸாமா’தி பரம் பஹரணகமனுஸ்ஸா அஹேஸும்யேவா’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி ‘‘ததா³ கா³த²ம் வத்வா பக்கந்தோ பண்டி³தவாணிஜோ பன அஹமேவ அஹோஸி’’ந்தி.

மகஸஜாதகவண்ணனா சதுத்தா².

[45] 5. ரோஹிணிஜாதகவண்ணனா

ஸேய்யோ அமித்தோதிஇத³ம் ஸத்தா² ஜேதவனே விஹரந்தோ ஏகம் அனாத²பிண்டி³கஸேட்டி²னோ தா³ஸிம் ஆரப்³ப⁴ கதே²ஸி. அனாத²பிண்டி³கஸ்ஸ கிர ஏகா ரோஹிணீ நாம தா³ஸீ அஹோஸி. தஸ்ஸா வீஹிபஹரணட்டா²னே ஆக³ந்த்வா மஹல்லிகா மாதா நிபஜ்ஜி, தம் மக்கி²கா பரிவாரேத்வா ஸூசியாவிஜ்ஜ²மானா விய கா²த³ந்தி. ஸா தீ⁴தரம் ஆஹ – ‘‘அம்ம, மக்கி²கா மம் கா²த³ந்தி, ஏதா வாரேஹீ’’தி. ஸா ‘‘வாரேஸ்ஸாமி, அம்மா’’தி முஸலம் உக்கி²பித்வா ‘‘மாது ஸரீரே மக்கி²கா மாரேத்வா வினாஸம் பாபேஸ்ஸாமீ’’தி மாதரம் முஸலேன பஹரித்வா ஜீவிதக்க²யம் பாபேஸி. தம் தி³ஸ்வா ‘‘மாதா மே மதா’’தி ரோதி³தும் ஆரபி⁴. தம் பவத்திம் ஸேட்டி²ஸ்ஸ ஆரோசேஸும். ஸேட்டி² தஸ்ஸா ஸரீரகிச்சம் காரேத்வா விஹாரம் க³ந்த்வா ஸப்³ப³ம் தம் பவத்திம் ஸத்து² ஆரோசேஸி. ஸத்தா² ‘‘ந கோ², க³ஹபதி, ஏஸா ‘மாது ஸரீரே மக்கி²கா மாரேஸ்ஸாமீ’தி இதா³னேவ முஸலேன பஹரித்வா மாதரம் மாரேஸி, புப்³பே³பி மாரேஸியேவா’’தி வத்வா தேன யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஸேட்டி²குலே நிப்³ப³த்தித்வா பிதுஅச்சயேன ஸேட்டி²ட்டா²னம் பாபுணி. தஸ்ஸாபி ரோஹிணீயேவ நாம தா³ஸீ அஹோஸி. ஸாபி அத்தனோ வீஹிபஹரணட்டா²னம் ஆக³ந்த்வா நிபன்னம் மாதரம் ‘‘மக்கி²கா மே, அம்ம, வாரேஹீ’’தி வுத்தா ஏவமேவ முஸலேன பஹரித்வா மாதரம் ஜீவிதக்க²யம் பாபேத்வா ரோதி³தும் ஆரபி⁴. போ³தி⁴ஸத்தோ தம் பவத்திம் ஸுத்வா ‘‘அமித்தோபி ஹி இமஸ்மிம் லோகே பண்டி³தோவ ஸேய்யோ’’தி சிந்தேத்வா இமம் கா³த²மாஹ –

45. ‘‘ஸேய்யோ அமித்தோ மேதா⁴வீ, யஞ்சே பா³லானுகம்பகோ;

பஸ்ஸ ரோஹிணிகம் ஜம்மிம், மாதரம் ஹந்த்வான ஸோசதீ’’தி.

தத்த² மேதா⁴வீதி பண்டி³தோ ஞாணீ விபா⁴வீ. யஞ்சே பா³லானுகம்பகோதி ஏத்த² யந்தி லிங்க³விபல்லாஸோ கதோ, சேதி நாமத்தே² நிபாதோ. யோ நாம பா³லோ அனுகம்பகோ, ததோ ஸதகு³ணேன ஸஹஸ்ஸகு³ணேன பண்டி³தோ அமித்தோ ஹோந்தோபி ஸேய்யோயேவாதி அத்தோ². அத² வா யந்தி படிஸேத⁴னத்தே² நிபாதோ, நோ சே பா³லானுகம்பகோதி அத்தோ². ஜம்மிந்தி லாமிகம் த³ந்த⁴ம். மாதரம் ஹந்த்வான ஸோசதீதி ‘‘மக்கி²கா மாரேஸ்ஸாமீ’’தி மாதரம் ஹந்த்வா இதா³னி அயம் பா³லா ஸயமேவ ரோத³தி பரிதே³வதி. இமினா காரணேன இமஸ்மிம் லோகே அமித்தோபி பண்டி³தோ ஸேய்யோதி போ³தி⁴ஸத்தோ பண்டி³தம் பஸம்ஸந்தோ இமாய கா³தா²ய த⁴ம்மம் தே³ஸேஸி.

ஸத்தா² ‘‘ந கோ², க³ஹபதி, ஏஸா இதா³னேவ ‘மக்கி²கா மாரேஸ்ஸாமீ’தி மாதரம் கா⁴தேஸி, புப்³பே³பி கா⁴தேஸியேவா’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ மாதாயேவ மாதா அஹோஸி, தீ⁴தாயேவ தீ⁴தா, மஹாஸேட்டி² பன அஹமேவ அஹோஸி’’ந்தி.

ரோஹிணிஜாதகவண்ணனா பஞ்சமா.

[46] 6. ஆராமதூ³ஸகஜாதகவண்ணனா

ந வே அனத்த²குஸலேனாதி இத³ம் ஸத்தா² அஞ்ஞதரஸ்மிம் கோஸலகா³மகே விஹரந்தோ உய்யானதூ³ஸகம் ஆரப்³ப⁴ கதே²ஸி. ஸத்தா² கிர கோஸலேஸு சாரிகம் சரமானோ அஞ்ஞதரம் கா³மகம் ஸம்பாபுணி. தத்தே²கோ குடும்பி³கோ ததா²க³தம் நிமந்தேத்வா அத்தனோ உய்யானே நிஸீதா³பேத்வா பு³த்³த⁴ப்பமுக²ஸ்ஸ ஸங்க⁴ஸ்ஸ மஹாதா³னம் த³த்வா ‘‘ப⁴ந்தே, யதா²ருசியா இமஸ்மிம் உய்யானே விசரதா²’’தி ஆஹ. பி⁴க்கூ² உட்டா²ய உய்யானபாலம் க³ஹேத்வா உய்யானே விசரந்தா ஏகம் அங்க³ணட்டா²னம் தி³ஸ்வா உய்யானபாலம் புச்சி²ம்ஸு ‘‘உபாஸக, இமம் உய்யானம் அஞ்ஞத்த² ஸந்த³ச்சா²யம், இமஸ்மிம் பன டா²னே ந கோசி ருக்கோ² வா க³ச்சோ² வா அத்தி², கிம் நு கோ² காரண’’ந்தி? ‘‘ப⁴ந்தே, இமஸ்ஸ உய்யானஸ்ஸ ரோபனகாலே ஏகோ கா³மதா³ரகோ உத³கம் ஸிஞ்சந்தோ இமஸ்மிம் டா²னே ருக்க²போதகே உம்மூலம் கத்வா மூலப்பமாணேன உத³கம் ஸிஞ்சி. தே ருக்க²போதகா மிலாயித்வா மதா. இமினா காரணேன இத³ம் டா²னம் அங்க³ணம் ஜாத’’ந்தி. பி⁴க்கூ² ஸத்தா²ரம் உபஸங்கமித்வா ஏதமத்த²ம் ஆரோசேஸும். ஸத்தா² ‘‘ந, பி⁴க்க²வே, ஸோ கா³மதா³ரகோ இதா³னேவ ஆராமதூ³ஸகோ, புப்³பே³பி ஆராமதூ³ஸகோயேவா’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே பா³ராணஸியம் நக்க²த்தம் கோ⁴ஸயிம்ஸு. நக்க²த்தபே⁴ரிஸத்³த³ஸவனகாலதோ பட்டா²ய ஸகலனக³ரவாஸினோ நக்க²த்தனிஸ்ஸிதகா ஹுத்வா விசரந்தி. ததா³ ரஞ்ஞோ உய்யானே ப³ஹூ மக்கடா வஸந்தி. உய்யானபாலோ சிந்தேஸி ‘‘நக³ரே நக்க²த்தம் கு⁴ட்ட²ம், இமே வானரே ‘உத³கம் ஸிஞ்சதா²’தி வத்வா அஹம் நக்க²த்தம் கீளிஸ்ஸாமீ’’தி ஜேட்ட²கவானரம் உபஸங்கமித்வா ‘‘ஸம்ம வானரஜேட்ட²க, இமம் உய்யானம் தும்ஹாகம்பி ப³ஹூபகாரம், தும்ஹே ஏத்த² புப்ப²ப²லபல்லவானி கா²த³த², நக³ரே நக்க²த்தம் கு⁴ட்ட²ம், அஹம் நக்க²த்தம் கீளிஸ்ஸாமி. யாவாஹம் ஆக³ச்சா²மி, தாவ இமஸ்மிம் உய்யானே ருக்க²போதகேஸு உத³கம் ஸிஞ்சிதும் ஸக்கி²ஸ்ஸதா²’’தி புச்சி². ‘‘ஸாது⁴, ஸிஞ்சிஸ்ஸாமீ’’தி. ‘‘தேன ஹி அப்பமத்தா ஹோதா²’’தி உத³கஸிஞ்சனத்தா²ய தேஸம் சம்மகுடே ச தா³ருகுடே ச த³த்வா க³தோ. வானரா சம்மகுடே சேவ தா³ருகுடே ச க³ஹேத்வா ருக்க²போதகேஸு உத³கம் ஸிஞ்சந்தி. அத² நே வானரஜேட்ட²கோ ஏவமாஹ ‘‘போ⁴ந்தோ வானரா, உத³கம் நாம ரக்கி²தப்³ப³ம், தும்ஹே ருக்க²போதகேஸு உத³கம் ஸிஞ்சந்தா உப்பாடேத்வா உப்பாடேத்வா மூலம் ஓலோகேத்வா க³ம்பீ⁴ரக³தேஸு மூலேஸு ப³ஹும் உத³கம் ஸிஞ்சத², அக³ம்பீ⁴ரக³தேஸு அப்பம், பச்சா² அம்ஹாகம் உத³கம் து³ல்லப⁴ம் ப⁴விஸ்ஸதீ’’தி. தே ‘‘ஸாதூ⁴’’தி ஸம்படிச்சி²த்வா ததா² அகம்ஸு.

தஸ்மிம் ஸமயே ஏகோ பண்டி³தபுரிஸோ ராஜுய்யானே தே வானரே ததா² கரோந்தே தி³ஸ்வா ஏவமாஹ ‘‘போ⁴ந்தோ வானரா, கஸ்மா தும்ஹே ருக்க²போதகே உப்பாடேத்வா உப்பாடேத்வா மூலப்பமாணேன உத³கம் ஸிஞ்சதா²’’தி? தே ‘‘ஏவம் நோ வானரஜேட்ட²கோ ஓவத³தீ’’தி ஆஹம்ஸு. ஸோ தம் வசனம் ஸுத்வா ‘‘அஹோ வத போ⁴ பா³லா அபண்டி³தா, ‘அத்த²ம் கரிஸ்ஸாமா’தி அனத்த²மேவ கரோந்தீ’’தி சிந்தேத்வா இமம் கா³த²மாஹ –

46. ‘‘ந வே அனத்த²குஸலேன, அத்த²சரியா ஸுகா²வஹா;

ஹாபேதி அத்த²ம் து³ம்மேதோ⁴, கபி ஆராமிகோ யதா²’’தி.

தத்த² வேதி நிபாதமத்தம். அனத்த²குஸலேனாதி அனத்தே² அனாயதனே குஸலேன, அத்தே² ஆயதனே காரணே அகுஸலேன வாதி அத்தோ². அத்த²சரியாதி வுட்³டி⁴கிரியா. ஸுகா²வஹாதி ஏவரூபேன அனத்த²குஸலேன காயிகசேதஸிகஸுக²ஸங்கா²தஸ்ஸ அத்த²ஸ்ஸ சரியா ந ஸுகா²வஹா, ந ஸக்கா ஆவஹிதுந்தி அத்தோ². கிம்காரணா? ஏகந்தேனேவ ஹி ஹாபேதி அத்த²ம் து³ம்மேதோ⁴தி, பா³லபுக்³க³லோ ‘‘அத்த²ம் கரிஸ்ஸாமீ’’தி அத்த²ம் ஹாபேத்வா அனத்த²மேவ கரோதி. கபி ஆராமிகோ யதா²தி யதா² ஆராமே நியுத்தோ ஆராமரக்க²னகோ மக்கடோ ‘‘அத்த²ம் கரிஸ்ஸாமீ’’தி அனத்த²மேவ கரோதி, ஏவம் யோ கோசி அனத்த²குஸலோ, தேன ந ஸக்கா அத்த²சரியம் ஆவஹிதும், ஸோ ஏகம்ஸேன அத்த²ம் ஹாபேதியேவாதி. ஏவம் ஸோ பண்டி³தோ புரிஸோ இமாய கா³தா²ய வானரஜேட்ட²கம் க³ரஹித்வா அத்தனோ பரிஸம் ஆதா³ய உய்யானா நிக்க²மி.

ஸத்தா²பி ‘‘ந, பி⁴க்க²வே, ஏஸ கா³மதா³ரகோ இதா³னேவ ஆராமதூ³ஸகோ, புப்³பே³பி ஆராமதூ³ஸகோயேவா’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ வானரஜேட்ட²கோ ஆராமதூ³ஸககா³மதா³ரகோ அஹோஸி, பண்டி³தபுரிஸோ பன அஹமேவ அஹோஸி’’ந்தி.

ஆராமதூ³ஸகஜாதகவண்ணனா ச²ட்டா².

[47] 7. வாருணிதூ³ஸகஜாதகவண்ணனா

ந வே அனத்த²குஸலேனாதி இத³ம் ஸத்தா² ஜேதவனே விஹரந்தோ வாருணிதூ³ஸகம் ஆரப்³ப⁴ கதே²ஸி. அனாத²பிண்டி³கஸ்ஸ கிர ஸஹாயோ ஏகோ வாருணிவாணிஜோ திகி²ணம் வாருணிம் யோஜேத்வா ஹிரஞ்ஞஸுவண்ணாதீ³னி க³ஹேத்வா விக்கிணந்தோ மஹாஜனே ஸன்னிபதிதே ‘‘தாத, த்வம் மூலம் க³ஹேத்வா வாருணிம் தே³ஹீ’’தி அந்தேவாஸிகம் ஆணாபேத்வா ஸயம் ந்ஹாயிதும் அக³மாஸி. அந்தேவாஸிகோ மஹாஜனஸ்ஸ வாருணிம் தே³ந்தோ மனுஸ்ஸே அந்தரந்தரா லோணஸக்க²ரா ஆஹராபேத்வா கா²த³ந்தே தி³ஸ்வா ‘‘அயம் ஸுரா அலோணிகா ப⁴விஸ்ஸதி, லோணமேத்த² பக்கி²பிஸ்ஸாமீ’’தி ஸுராசாடியம் நாளிமத்தம் லோணம் பக்கி²பித்வா தேஸம் ஸுரம் அதா³ஸி. தே முக²ம் பூரேத்வா பூரேத்வா ச²ட்³டே³த்வா ‘‘கிம் தே கத’’ந்தி புச்சி²ம்ஸு. ‘‘தும்ஹே ஸுரம் பிவித்வா லோணம் ஆஹராபேந்தே தி³ஸ்வா லோணேன யோஜேஸி’’ந்தி. ‘‘ஏவரூபம் நாம மனாபம் வாருணிம் நாஸேஸி பா³லா’’தி தம் க³ரஹித்வா உட்டா²யுட்டா²ய பக்கந்தா. வாருணிவாணிஜோ ஆக³ந்த்வா ஏகம்பி அதி³ஸ்வா ‘‘வாருணிபாயகா கஹம் க³தா’’தி புச்சி², ஸோ தமத்த²ம் ஆரோசேஸி. அத² நம் ஆசரியோ ‘‘பா³ல, ஏவரூபா நாம தே ஸுரா நாஸிதா’’தி க³ரஹித்வா இமம் காரணம் அனாத²பிண்டி³கஸ்ஸ ஆரோசேஸி. அனாத²பிண்டி³கோ ‘‘அத்தி²தா³னி மே இத³ம் கதா²பாப⁴த’’ந்தி ஜேதவனம் க³ந்த்வா ஸத்தா²ரம் வந்தி³த்வா ஏதமத்த²ம் ஆரோசேஸி. ஸத்தா² ‘‘ந ஏஸ, க³ஹபதி, இதா³னேவ வாருணிதூ³ஸகோ, புப்³பே³பி வாருணிதூ³ஸகோயேவா’’தி வத்வா தேன யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ பா³ராணஸியம் ஸேட்டி² அஹோஸி. தம் உபனிஸ்ஸாய ஏகோ வாருணிவாணிஜோ ஜீவதி. ஸோ திகி²ணம் ஸுரம் யோஜேத்வா ‘‘இமம் விக்கிணாஹீ’’தி அந்தேவாஸிகம் வத்வா ந்ஹாயிதும் க³தோ. அந்தேவாஸிகோ தஸ்மிம் க³தமத்தேயேவ ஸுராய லோணம் பக்கி²பித்வா இமினாவ நயேன ஸுரம் வினாஸேஸி. அத²ஸ்ஸ ஆசரியோ ஆக³ந்த்வா தம் காரணம் ஞத்வா ஸேட்டி²ஸ்ஸ ஆரோசேஸி. ஸேட்டி² ‘‘அனத்த²குஸலா நாம பா³லா ‘அத்த²ம் கரிஸ்ஸாமா’தி அனத்த²மேவ கரோந்தீ’’தி வத்வா இமம் கா³த²மாஹ –

47. ‘‘ந வே அனத்த²குஸலேன, அத்த²சரியா ஸுகா²வஹா;

ஹாபேதி அத்த²ம் து³ம்மேதோ⁴, கோண்ட³ஞ்ஞோ வாருணிம் யதா²’’தி.

தத்த² கோண்ட³ஞ்ஞோ வாருணிம் யதா²தி யதா² அயம் கோண்ட³ஞ்ஞனாமகோ அந்தேவாஸிகோ ‘‘அத்த²ம் கரிஸ்ஸாமீ’’தி லோணம் பக்கி²பித்வா வாருணிம் ஹாபேஸி பரிஹாபேஸி வினாஸேஸி, ஏவம் ஸப்³போ³பி அனத்த²குஸலோ அத்த²ம் ஹாபேதீதி போ³தி⁴ஸத்தோ இமாய கா³தா²ய த⁴ம்மம் தே³ஸேஸி.

ஸத்தா²பி ‘‘ந ஏஸ க³ஹபதி இதா³னேவ வாருணிதூ³ஸகோ, புப்³பே³பி வாருணிதூ³ஸகோயேவா’’தி வத்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ வாருணிதூ³ஸகோ இதா³னிபி வாருணிதூ³ஸகோவ அஹோஸி, பா³ராணஸிஸேட்டி² பன அஹமேவ அஹோஸி’’ந்தி.

வாருணிதூ³ஸகஜாதகவண்ணனா ஸத்தமா.

[48] 8. வேத³ப்³ப³ஜாதகவண்ணனா

அனுபாயேன யோ அத்த²ந்தி இத³ம் ஸத்தா² ஜேதவனே விஹரந்தோ து³ப்³ப³சபி⁴க்கு²ம் ஆரப்³ப⁴ கதே²ஸி. தஞ்ஹி பி⁴க்கு²ம் ஸத்தா² ‘‘ந த்வம் பி⁴க்கு² இதா³னேவ து³ப்³ப³சோ, புப்³பே³பி து³ப்³ப³சோயேவ, தேனேவ ச காரணேன பண்டி³தானம் வசனம் அகத்வா திண்ஹேன அஸினா த்³விதா⁴ கத்வா சி²ன்னோ ஹுத்வா மக்³கே³ நிபதித்த², தஞ்ச ஏககம் நிஸ்ஸாய புரிஸஸஹஸ்ஸம் ஜீவிதக்க²யம் பத்த’’ந்தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே ஏகஸ்மிம் கா³மகே அஞ்ஞதரோ ப்³ராஹ்மணோ வேத³ப்³ப³ம் நாம மந்தம் ஜானாதி. ஸோ கிர மந்தோ அனக்³கோ⁴ மஹாரஹோ, நக்க²த்தயோகே³ லத்³தே⁴ தம் மந்தம் பரிவத்தேத்வா ஆகாஸே உல்லோகிதே ஆகாஸதோ ஸத்தரதனவஸ்ஸம் வஸ்ஸதி. ததா³ போ³தி⁴ஸத்தோ தஸ்ஸ ப்³ராஹ்மணஸ்ஸ ஸந்திகே ஸிப்பம் உக்³க³ண்ஹாதி. அதே²கதி³வஸம் ப்³ராஹ்மணோ போ³தி⁴ஸத்தம் ஆதா³ய கேனசிதே³வ கரணீயேன அத்தனோ கா³மா நிக்க²மித்வா சேதரட்ட²ம் அக³மாஸி, அந்தராமக்³கே³ ச ஏகஸ்மிம் அரஞ்ஞட்டா²னே பஞ்சஸதா பேஸனகசோரா நாம பந்த²கா⁴தம் கரோந்தி. தே போ³தி⁴ஸத்தஞ்ச வேத³ப்³ப³ப்³ராஹ்மணஞ்ச க³ண்ஹிம்ஸு. கஸ்மா பனேதே ‘‘பேஸனகசோரா’’தி வுச்சந்தி? தே கிர த்³வே ஜனே க³ஹேத்வா ஏகம் த⁴னாஹரணத்தா²ய பேஸேந்தி, தஸ்மா ‘‘பேஸனகசோரா’’த்வேவ வுச்சந்தி. தேபி ச பிதாபுத்தே க³ஹேத்வா பிதரம் ‘‘த்வம் அம்ஹாகம் த⁴னம் ஆஹரித்வா புத்தம் க³ஹேத்வா யாஹீ’’தி வத³ந்தி. ஏதேனுபாயேன மாதுதீ⁴தரோ க³ஹேத்வா மாதரம் விஸ்ஸஜ்ஜேந்தி, ஜேட்ட²கனிட்டே² க³ஹேத்வா ஜேட்ட²பா⁴திகம் விஸ்ஸஜ்ஜேந்தி, ஆசரியந்தேவாஸிகே க³ஹேத்வா அந்தேவாஸிகம் விஸ்ஸஜ்ஜேந்தி. தே தஸ்மிம் காலே வேத³ப்³ப³ப்³ராஹ்மணம் க³ஹேத்வா போ³தி⁴ஸத்தம் விஸ்ஸஜ்ஜேஸும்.

போ³தி⁴ஸத்தோ ஆசரியம் வந்தி³த்வா ‘‘அஹம் ஏகாஹத்³வீஹச்சயேன ஆக³மிஸ்ஸாமி, தும்ஹே மா பா⁴யித்த², அபிச கோ² பன மம வசனம் கரோத², அஜ்ஜ த⁴னவஸ்ஸாபனகனக்க²த்தயோகோ³ ப⁴விஸ்ஸதி, மா கோ² தும்ஹே து³க்க²ம் அஸஹந்தா மந்தம் பரிவத்தேத்வா த⁴னம் வஸ்ஸாபயித்த². ஸசே வஸ்ஸாபேஸ்ஸத², தும்ஹே ச வினாஸம் பாபுணிஸ்ஸத², இமே ச பஞ்சஸதா சோரா’’தி ஏவம் ஆசரியம் ஓவதி³த்வா த⁴னத்தா²ய அக³மாஸி. சோராபி ஸூரியே அத்த²ங்க³தே ப்³ராஹ்மணம் ப³ந்தி⁴த்வா நிபஜ்ஜாபேஸும். தங்க²ணஞ்ஞேவ பாசீனலோகதா⁴துதோ பரிபுண்ணசந்த³மண்ட³லம் உட்ட²ஹி. ப்³ராஹ்மணோ நக்க²த்தம் ஓலோகேந்தோ ‘‘த⁴னவஸ்ஸாபனகனக்க²த்தயோகோ³ லத்³தோ⁴, கிம் மே து³க்கே²ன அனுபூ⁴தேன, மந்தம் பரிவத்தேத்வா ரதனவஸ்ஸம் வஸ்ஸாபேத்வா சோரானம் த⁴னம் த³த்வா யதா²ஸுக²ம் க³மிஸ்ஸாமீ’’தி சிந்தேத்வா சோரே ஆமந்தேஸி ‘‘போ⁴ந்தோ சோரா, தும்ஹே மம் கிமத்தா²ய க³ண்ஹதா²’’தி? ‘‘த⁴னத்தா²ய, அய்யா’’தி. ‘‘ஸசே வோ, த⁴னேன அத்தோ², கி²ப்பம் மம் ப³ந்த⁴னா மோசேத்வா ஸீஸம் ந்ஹாபேத்வா அஹதவத்தா²னி அச்சா²தே³த்வா க³ந்தே⁴ஹி விலிம்பாபேத்வா புப்பா²னி பிலந்தா⁴பேத்வா ட²பேதா²’’தி. ‘‘சோரா தஸ்ஸ கத²ம் ஸுத்வா ததா² அகம்ஸு’’.

ப்³ராஹ்மணோ நக்க²த்தயோக³ம் ஞத்வா மந்தம் பரிவத்தேத்வா ஆகாஸம் உல்லோகேஸி, தாவதே³வ ஆகாஸதோ ரதனானி பதிம்ஸு. சோரா தம் த⁴னம் ஸங்கட்³டி⁴த்வா உத்தராஸங்கே³ஸு ப⁴ண்டி³கம் கத்வா பாயிம்ஸு. ப்³ராஹ்மணோபி தேஸம் பச்ச²தோவ அக³மாஸி. அத² தே சோரே அஞ்ஞே பஞ்சஸதா சோரா க³ண்ஹிம்ஸு. ‘‘கிமத்த²ம் அம்ஹே க³ண்ஹதா²’’தி ச வுத்தா ‘‘த⁴னத்தா²யா’’தி ஆஹம்ஸு. ‘‘யதி³ வோ த⁴னேன அத்தோ², ஏதம் ப்³ராஹ்மணம் க³ண்ஹத², ஏஸோ ஆகாஸம் உல்லோகேத்வா த⁴னம் வஸ்ஸாபேஸி, அம்ஹாகம்பேதம் ஏதேனேவ தி³ன்ன’’ந்தி. சோரா சோரே விஸ்ஸஜ்ஜேத்வா ‘‘அம்ஹாகம்பி த⁴னம் தே³ஹீ’’தி ப்³ராஹ்மணம் க³ண்ஹிம்ஸு. ப்³ராஹ்மணோ ‘‘அஹம் தும்ஹாகம் த⁴னம் த³தே³ய்யம், த⁴னவஸ்ஸாபனகனக்க²த்தயோகோ³ பன இதோ ஸம்வச்ச²ரமத்த²கே ப⁴விஸ்ஸதி. யதி³ வோ த⁴னேனத்தோ², அதி⁴வாஸேத², ததா³ த⁴னவஸ்ஸம் வஸ்ஸாபேஸ்ஸாமீ’’தி ஆஹ. சோரா குஜ்ஜி²த்வா ‘‘அம்போ⁴, து³ட்ட²ப்³ராஹ்மண, அஞ்ஞேஸம் இதா³னேவ த⁴னம் வஸ்ஸாபேத்வா அம்ஹே அஞ்ஞம் ஸம்வச்ச²ரம் அதி⁴வாஸாபேஸீ’’தி திண்ஹேன அஸினா ப்³ராஹ்மணம் த்³விதா⁴ சி²ந்தி³த்வா மக்³கே³ ச²ட்³டே³த்வா வேகே³ன அனுப³ந்தி⁴த்வா தேஹி சோரேஹி ஸத்³தி⁴ம் யுஜ்ஜி²த்வா தே ஸப்³பே³பி மாரேத்வா த⁴னம் ஆதா³ய புன த்³வே கோட்டா²ஸா ஹுத்வா அஞ்ஞமஞ்ஞம் யுஜ்ஜி²த்வா அட்³ட⁴தேய்யானி புரிஸஸதானி கா⁴தேத்வா ஏதேன உபாயேன யாவ த்³வே ஜனா அவஸிட்டா² அஹேஸும், தாவ அஞ்ஞமஞ்ஞம் கா⁴தயிம்ஸு. ஏவம் தம் புரிஸஸஹஸ்ஸம் வினாஸம் பத்தம்.

தே பன த்³வே ஜனா உபாயேன தம் த⁴னம் ஆஹரித்வா ஏகஸ்மிம் கா³மஸமீபே க³ஹனட்டா²னே த⁴னம் படிச்சா²தே³த்வா ஏகோ க²க்³க³ம் க³ஹேத்வா ரக்க²ந்தோ நிஸீதி³, ஏகோ தண்டு³லே க³ஹேத்வா ப⁴த்தம் பசாபேதும் கா³மம் பாவிஸி. லோபோ⁴ ச நாமேஸ வினாஸமூலமேவாதி த⁴னஸந்திகே நிஸின்னோ சிந்தேஸி ‘‘தஸ்மிம் ஆக³தே இத³ம் த⁴னம் த்³வே கோட்டா²ஸா ப⁴விஸ்ஸந்தி, யம்னூனாஹம் தம் ஆக³தமத்தமேவ க²க்³கே³ன பஹரித்வா கா⁴தேய்ய’’ந்தி. ஸோ க²க்³க³ம் ஸன்னய்ஹித்வா தஸ்ஸ ஆக³மனம் ஓலோகேந்தோ நிஸீதி³. இதரோபி சிந்தேஸி ‘‘தம் த⁴னம் த்³வே கோட்டா²ஸா ப⁴விஸ்ஸந்தி, யம்னூனாஹம் ப⁴த்தே விஸம் பக்கி²பித்வா தம் புரிஸம் போ⁴ஜேத்வா ஜீவிதக்க²யம் பாபேத்வா ஏககோவ த⁴னம் க³ண்ஹேய்ய’’ந்தி. ஸோ நிட்டி²தே ப⁴த்தே ஸயம் பு⁴ஞ்ஜித்வா ஸேஸகே விஸம் பக்கி²பித்வா தம் ஆதா³ய தத்த² அக³மாஸி. தம் ப⁴த்தம் ஓதாரேத்வா டி²தமத்தமேவ இதரோ க²க்³கே³ன த்³விதா⁴ சி²ந்தி³த்வா தம் படிச்ச²ன்னட்டா²னே ச²ட்³டே³த்வா தஞ்ச ப⁴த்தம் பு⁴ஞ்ஜித்வா ஸயம்பி தத்தே²வ ஜீவிதக்க²யம் பாபுணி. ஏவஞ்ச தம் த⁴னம் நிஸ்ஸாய ஸப்³பே³வ வினாஸம் பாபுணிம்ஸு.

போ³தி⁴ஸத்தோபி கோ² ஏகாஹத்³வீஹச்சயேன த⁴னம் ஆதா³ய ஆக³தோ தஸ்மிம் டா²னே ஆசரியம் அதி³ஸ்வா விப்பகிண்ணம் பன த⁴னம் தி³ஸ்வா ‘‘ஆசரியேன மம வசனம் அகத்வா த⁴னம் வஸ்ஸாபிதம் ப⁴விஸ்ஸதி, ஸப்³பே³ஹி வினாஸம் பத்தேஹி ப⁴விதப்³ப³’’ந்தி மஹாமக்³கே³ன பாயாஸி. க³ச்ச²ந்தோ ஆசரியம் மஹாமக்³கே³ த்³விதா⁴ சி²ன்னம் தி³ஸ்வா ‘‘மம வசனம் அகத்வா மதோ’’தி தா³ரூனி உத்³த⁴ரித்வா சிதகம் கத்வா ஆசரியம் ஜா²பேத்வா வனபுப்பே²ஹி பூஜேத்வா புரதோ க³ச்ச²ந்தோ ஜீவிதக்க²யம் பத்தே பஞ்சஸதே, புரதோ அட்³ட⁴தேய்யஸதேதி அனுக்கமேன அவஸானே த்³வே ஜனே ஜீவிதக்க²யம் பத்தே தி³ஸ்வா சிந்தேஸி ‘‘இமம் த்³வீஹி ஊனம் புரிஸஸஹஸ்ஸம் வினாஸம் பத்தம், அஞ்ஞேஹி த்³வீஹி சோரேஹி ப⁴விதப்³ப³ம், தேபி ஸந்த²ம்பி⁴தும் ந ஸக்கி²ஸ்ஸந்தி, கஹம் நு கோ² தே க³தா’’தி க³ச்ச²ந்தோ தேஸம் த⁴னம் ஆதா³ய க³ஹனட்டா²னம் பவிட்ட²மக்³க³ம் தி³ஸ்வா க³ச்ச²ந்தோ ப⁴ண்டி³கப³த்³த⁴ஸ்ஸ த⁴னஸ்ஸ ராஸிம் தி³ஸ்வா ஏகம் ப⁴த்தபாதிம் அவத்த²ரித்வா மதம் அத்³த³ஸ. ததோ ‘‘இத³ம் நாம தேஹி கதம் ப⁴விஸ்ஸதீ’’தி ஸப்³ப³ம் ஞத்வா ‘‘கஹம் நு கோ² ஸோ புரிஸோ’’தி விசினந்தோ தம்பி படிச்ச²ன்னட்டா²னே அபவித்³த⁴ம் தி³ஸ்வா ‘‘அம்ஹாகம் ஆசரியோ மம வசனம் அகத்வா அத்தனோ து³ப்³ப³சபா⁴வேன அத்தனாபி வினாஸம் பத்தோ, அபரம்பி தேன புரிஸஸஹஸ்ஸம் வினாஸிதம், அனுபாயேன வத அகாரணேன அத்தனோ வுட்³டி⁴ம் பத்த²யமானா அம்ஹாகம் ஆசரியோ விய மஹாவினாஸமேவ பாபுணிஸ்ஸந்தீ’’தி சிந்தேத்வா இமம் கா³த²மாஹ –

48. ‘‘அனுபாயேன யோ அத்த²ம், இச்ச²தி ஸோ விஹஞ்ஞதி;

சேதா ஹனிம்ஸு வேத³ப்³ப³ம், ஸப்³பே³ தே ப்³யஸனமஜ்ஜ²கூ³’’தி.

தத்த² ஸோ விஹஞ்ஞதீதி ஸோ அனுபாயேன ‘‘அத்தனோ அத்த²ம் வுட்³டி⁴ம் ஸுக²ம் இச்சா²மீ’’தி அகாலே வாயாமம் கரோந்தோ புக்³க³லோ விஹஞ்ஞதி கிலமதி மஹாவினாஸம் பாபுணாதி. சேதாதி சேதரட்ட²வாஸினோ சோரா. ஹனிம்ஸு வேத³ப்³ப³ந்தி வேத³ப்³ப³மந்தவஸேன ‘‘வேத³ப்³போ³’’தி லத்³த⁴னாமம் ப்³ராஹ்மணம் ஹனிம்ஸு. ஸப்³பே³ தே ப்³யஸனமஜ்ஜ²கூ³தி தேபி ச அனவஸேஸா அஞ்ஞமஞ்ஞம் கா⁴தயமானா ப்³யஸனம் அதி⁴க³ச்சி²ம்ஸு படிலபி⁴ம்ஸூதி.

ஏவம் போ³தி⁴ஸத்தோ ‘‘யதா² அம்ஹாகம் ஆசரியோ அனுபாயேன அட்டா²னே பரக்கமம் கரோந்தோ த⁴னம் வஸ்ஸாபேத்வா அத்தனாபி ஜீவிதக்க²யம் பத்தோ, அஞ்ஞேஸஞ்ச வினாஸபச்சயோ ஜாதோ, ஏவமேவ யோ அஞ்ஞோபி அனுபாயேன அத்தனோ அத்த²ம் இச்ச²ந்தோ வாயாமம் கரிஸ்ஸதி, ஸப்³போ³ ஸோ அத்தனா ச வினஸ்ஸிஸ்ஸதி, பரேஸஞ்ச வினாஸபச்சயோ ப⁴விஸ்ஸதீ’’தி வனம் உன்னாதே³ந்தோ தே³வதாஸு ஸாது⁴காரம் த³த³மானாஸு இமாய கா³தா²ய த⁴ம்மம் தே³ஸேத்வா தம் த⁴னம் உபாயேன அத்தனோ கே³ஹம் ஆஹரித்வா தா³னாதீ³னி புஞ்ஞானி கரோந்தோ யாவதாயுகம் ட²த்வா ஜீவிதபரியோஸானே ஸக்³க³பத²ம் பூரயமானோ அக³மாஸி.

ஸத்தா²பி ‘‘ந த்வம் பி⁴க்கு² இதா³னேவ து³ப்³ப³சோ, புப்³பே³பி து³ப்³ப³சோவ, து³ப்³ப³சத்தா பன மஹாவினாஸம் பத்தோ’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ வேத³ப்³ப³ப்³ராஹ்மணோ து³ப்³ப³சபி⁴க்கு² அஹோஸி, அந்தேவாஸிகோ பன அஹமேவ அஹோஸி’’ந்தி.

வேத³ப்³ப³ஜாதகவண்ணனா அட்ட²மா.

[49] 9. நக்க²த்தஜாதகவண்ணனா

நக்க²த்தம் பதிமானேந்தந்தி இத³ம் ஸத்தா² ஜேதவனே விஹரந்தோ அஞ்ஞதரம் ஆஜீவகம் ஆரப்³ப⁴ கதே²ஸி. ஸாவத்தி²யம் கிரேகம் குலதீ⁴தரம் ஜனபதே³ ஏகோ குலபுத்தோ அத்தனோ புத்தஸ்ஸ வாரேத்வா ‘‘அஸுகதி³வஸே நாம க³ண்ஹிஸ்ஸாமீ’’தி தி³வஸம் ட²பேத்வா தஸ்மிம் தி³வஸே ஸம்பத்தே அத்தனோ குலூபகம் ஆஜீவகம் புச்சி² ‘‘ப⁴ந்தே, அஜ்ஜ மயம் ஏகம் மங்க³லம் கரிஸ்ஸாம, ஸோப⁴னம் நு கோ² நக்க²த்த’’ந்தி. ஸோ ‘‘அயம் மம் பட²மம் அபுச்சி²த்வாவ தி³வஸம் ட²பேத்வா இதா³னி படிபுச்ச²தி, ஹோது, ஸிக்கா²பேஸ்ஸாமி ந’’ந்தி குஜ்ஜி²த்வா ‘‘அஜ்ஜ அஸோப⁴னம் நக்க²த்தம், மா அஜ்ஜ மங்க³லம் கரித்த², ஸசே கரிஸ்ஸத², மஹாவினாஸோ ப⁴விஸ்ஸதீ’’தி ஆஹ. தஸ்மிம் குலே மனுஸ்ஸா தஸ்ஸ ஸத்³த³ஹித்வா தம் தி³வஸம் ந க³ச்சி²ம்ஸு. நக³ரவாஸினோ ஸப்³ப³ம் மங்க³லகிரியம் கத்வா தேஸம் அனாக³மனம் தி³ஸ்வா ‘‘தேஹி அஜ்ஜ தி³வஸோ ட²பிதோ, நோ ச கோ² ஆக³தா, அம்ஹாகம்பி ப³ஹு வயகம்மம் கதம், கிம் நோ தேஹி, அம்ஹாகம் தீ⁴தரம் அஞ்ஞஸ்ஸ த³ஸ்ஸாமா’’தி யதா²கதேனேவ மங்க³லேன தீ⁴தரம் அஞ்ஞஸ்ஸ குலஸ்ஸ அத³ம்ஸு.

இதரே புனதி³வஸே ஆக³ந்த்வா ‘‘தே³த² நோ தா³ரிக’’ந்தி ஆஹம்ஸு. அத² நே ஸாவத்தி²வாஸினோ ‘‘ஜனபத³வாஸினோ நாம தும்ஹே க³ஹபதிகா பாபமனுஸ்ஸா தி³வஸம் ட²பேத்வா அவஞ்ஞாய ந ஆக³தா, ஆக³தமக்³கே³னேவ படிக³ச்ச²த², அம்ஹேஹி அஞ்ஞேஸம் தா³ரிகா தி³ன்னா’’தி பரிபா⁴ஸிம்ஸு. தே தேஹி ஸத்³தி⁴ம் கலஹம் கத்வா தா³ரிகம் அலபி⁴த்வா யதா²க³தமக்³கே³னேவ க³தா. தேனபி ஆஜீவகேன தேஸம் மனுஸ்ஸானம் மங்க³லந்தராயஸ்ஸ கதபா⁴வோ பி⁴க்கூ²னம் அந்தரே பாகடோ ஜாதோ. தே பி⁴க்கூ² த⁴ம்மஸபா⁴யம் ஸன்னிபதிதா ‘‘ஆவுஸோ, ஆஜீவகேன குலஸ்ஸ மங்க³லந்தராயோ கதோ’’தி கத²யமானா நிஸீதி³ம்ஸு. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி². தே ‘‘இமாய நாமா’’தி கத²யிம்ஸு. ‘‘ந, பி⁴க்க²வே, இதா³னேவ ஆஜீவகோ தஸ்ஸ குலஸ்ஸ மங்க³லந்தராயம் கரோதி, புப்³பே³பி ஏஸ தேஸம் குஜ்ஜி²த்வா மங்க³லந்தராயம் அகாஸியேவா’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே நக³ரவாஸினோ ஜனபத³வாஸீனம் தீ⁴தரம் வாரேத்வா தி³வஸம் ட²பேத்வா அத்தனோ குலூபகம் ஆஜீவகம் புச்சி²ம்ஸு ‘‘ப⁴ந்தே, அஜ்ஜ அம்ஹாகம் ஏகா மங்க³லகிரியா, ஸோப⁴னம் நு கோ² நக்க²த்த’’ந்தி. ஸோ ‘‘இமே அத்தனோ ருசியா தி³வஸம் ட²பேத்வா இதா³னி மம் புச்ச²ந்தீ’’தி குஜ்ஜி²த்வா ‘‘அஜ்ஜ நேஸம் மங்க³லந்தராயம் கரிஸ்ஸாமீ’’தி சிந்தேத்வா ‘‘அஜ்ஜ அஸோப⁴னம் நக்க²த்தம், ஸசே கரோத², மஹாவினாஸம் பாபுணிஸ்ஸதா²’’தி ஆஹ. தே தஸ்ஸ ஸத்³த³ஹித்வா ந க³மிம்ஸு. ஜனபத³வாஸினோ தேஸம் அனாக³மனம் ஞத்வா ‘‘தே அஜ்ஜ தி³வஸம் ட²பேத்வாபி ந ஆக³தா, கிம் நோ தேஹி, அஞ்ஞேஸம் தீ⁴தரம் த³ஸ்ஸாமா’’தி அஞ்ஞேஸம் தீ⁴தரம் அத³ம்ஸு. நக³ரவாஸினோ புனதி³வஸே ஆக³ந்த்வா தா³ரிகம் யாசிம்ஸு. ஜனபத³வாஸினோ ‘‘தும்ஹே நக³ரவாஸினோ நாம சி²ன்னஹிரிகா க³ஹபதிகா, தி³வஸம் ட²பேத்வா தா³ரிகம் ந க³ண்ஹித்த², மயம் தும்ஹாகம் அனாக³மனபா⁴வேன அஞ்ஞேஸம் அத³ம்ஹா’’தி. மயம் ஆஜீவகம் படிபுச்சி²த்வா ‘‘‘நக்க²த்தம் ந ஸோப⁴ன’ந்தி நாக³தா, தே³த² நோ தா³ரிக’’ந்தி. ‘‘அம்ஹேஹி தும்ஹாகம் அனாக³மனபா⁴வேன அஞ்ஞேஸம் தி³ன்னா, இதா³னி தி³ன்னதா³ரிகம் கத²ம் புன ஆனேஸ்ஸாமா’’தி.

ஏவம் தேஸு அஞ்ஞமஞ்ஞம் கலஹம் கரோந்தேஸு ஏகோ நக³ரவாஸீ பண்டி³தபுரிஸோ ஏகேன கம்மேன ஜனபத³ம் க³தோ தேஸம் நக³ரவாஸீனம் ‘‘மயம் ஆஜீவகம் புச்சி²த்வா நக்க²த்தஸ்ஸ அஸோப⁴னபா⁴வேன நாக³தா’’தி கதே²ந்தானம் ஸுத்வா ‘‘நக்க²த்தேன கோ அத்தோ², நனு தா³ரிகாய லத்³த⁴பா⁴வோவ நக்க²த்த’’ந்தி வத்வா இமம் கா³த²மாஹ –

49. ‘‘நக்க²த்தம் பதிமானேந்தம், அத்தோ² பா³லம் உபச்சகா³;

அத்தோ² அத்த²ஸ்ஸ நக்க²த்தம், கிம் கரிஸ்ஸந்தி தாரகா’’தி.

தத்த² பதிமானேந்தந்தி ஓலோகேந்தம், ‘‘இதா³னி நக்க²த்தம் ப⁴விஸ்ஸதி, இதா³னி நக்க²த்தம் ப⁴விஸ்ஸதீ’’தி ஆக³மயமானம். அத்தோ² பா³லம் உபச்சகா³தி ஏதம் நக³ரவாஸிகம் பா³லம் தா³ரிகாபடிலாப⁴ஸங்கா²தோ அத்தோ² அதிக்கந்தோ. அத்தோ² அத்த²ஸ்ஸ நக்க²த்தந்தி யம் அத்த²ம் பரியேஸந்தோ சரதி, ஸோ படிலத்³தோ⁴ அத்தோ²வ அத்த²ஸ்ஸ நக்க²த்தம் நாம. கிம் கரிஸ்ஸந்தி தாரகாதி இதரே பன ஆகாஸே தாரகா கிம் கரிஸ்ஸந்தி, கதரம் அத்த²ம் ஸாதே⁴ஸ்ஸந்தீதி அத்தோ². நக³ரவாஸினோ கலஹம் கத்வா தா³ரிகம் அலபி⁴த்வாவ அக³மம்ஸு.

ஸத்தா² ‘‘ந, பி⁴க்க²வே, ஏஸ ஆஜீவகோ இதா³னேவ குலஸ்ஸ மங்க³லந்தராயம் கரோதி, புப்³பே³பி அகாஸியேவா’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ ஆஜீவகோ ஏதரஹி ஆஜீவகோவ அஹோஸி, தானிபி குலானி ஏதரஹி குலானியேவ, கா³த²ம் வத்வா டி²தோ பண்டி³தபுரிஸோ பன அஹமேவ அஹோஸி’’ந்தி.

நக்க²த்தஜாதகவண்ணனா நவமா.

[50] 10. து³ம்மேத⁴ஜாதகவண்ணனா

து³ம்மேதா⁴னந்தி இத³ம் ஸத்தா² ஜேதவனே விஹரந்தோ லோகத்த²சரியம் ஆரப்³ப⁴ கதே²ஸி. ஸா த்³வாத³ஸகனிபாதே மஹாகண்ஹஜாதகே (ஜா. 1.12.61 ஆத³யோ) ஆவி ப⁴விஸ்ஸதி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ தஸ்ஸ ரஞ்ஞோ அக்³க³மஹேஸியா குச்சி²ம்ஹி படிஸந்தி⁴ம் க³ண்ஹி. தஸ்ஸ மாதுகுச்சி²தோ நிக்க²ந்தஸ்ஸ நாமக்³க³ஹணதி³வஸே ‘‘ப்³ரஹ்மத³த்தகுமாரோ’’தி நாமம் அகம்ஸு. ஸோ ஸோளஸவஸ்ஸுத்³தே³ஸிகோ ஹுத்வா தக்கஸிலாயம் ஸிப்பம் உக்³க³ண்ஹித்வா திண்ணம் வேதா³னம் பாரம் க³ந்த்வா அட்டா²ரஸன்னம் விஜ்ஜட்டா²னானம் நிப்ப²த்திம் பாபுணி, அத²ஸ்ஸ பிதா ஓபரஜ்ஜம் அதா³ஸி. தஸ்மிம் ஸமயே பா³ராணஸிவாஸினோ தே³வதாமங்க³லிகா ஹோந்தி, தே³வதா நமஸ்ஸந்தி, ப³ஹூ அஜேளககுக்குடபூ⁴கராத³யோ வதி⁴த்வா நானப்பகாரேஹி புப்ப²க³ந்தே⁴ஹி சேவ மம்ஸலோஹிதேஹி ச ப³லிகம்மம் கரோந்தி. போ³தி⁴ஸத்தோ சிந்தேஸி ‘‘இதா³னி ஸத்தா தே³வதாமங்க³லிகா, ப³ஹும் பாணவத⁴ம் கரோந்தி, மஹாஜனோ யேபு⁴ய்யேன அத⁴ம்மஸ்மிம்யேவ நிவிட்டோ², அஹம் பிது அச்சயேன ரஜ்ஜம் லபி⁴த்வா ஏகம்பி அகிலமேத்வா உபாயேனேவ பாணவத⁴ம் காதும் ந த³ஸ்ஸாமீ’’தி. ஸோ ஏகதி³வஸம் ரத²ம் அபி⁴ருய்ஹ நக³ரா நிக்க²ந்தோ அத்³த³ஸ ஏகஸ்மிம் மஹந்தே வடருக்கே² மஹாஜனம் ஸன்னிபதிதம், தஸ்மிம் ருக்கே² நிப்³ப³த்ததே³வதாய ஸந்திகே புத்ததீ⁴துயஸத⁴னாதீ³ஸு யம் யம் இச்ச²தி, தம் தம் பத்தே²ந்தம். ஸோ தம் தி³ஸ்வா ரதா² ஓருய்ஹ தம் ருக்க²ம் உபஸங்கமித்வா க³ந்த⁴புப்பே²ஹி பூஜேத்வா உத³கேன அபி⁴ஸேகம் கத்வா ருக்க²ம் பத³க்கி²ணம் கத்வா தே³வதாமங்க³லிகோ விய ஹுத்வா தே³வதம் நமஸ்ஸித்வா ரத²ம் அபி⁴ருய்ஹ நக³ரம் பாவிஸி. ததோ பட்டா²ய இமினாவ நியாமேன அந்தரந்தரே தத்த² க³ந்த்வா தே³வதாமங்க³லிகோ விய பூஜம் கரோதி.

ஸோ அபரேன ஸமயேன பிது அச்சயேன ரஜ்ஜே பதிட்டா²ய சதஸ்ஸோ அக³தியோ வஜ்ஜேத்வா த³ஸ ராஜத⁴ம்மே அகோபேந்தோ த⁴ம்மேன ரஜ்ஜம் காரேந்தோ சிந்தேஸி ‘‘மய்ஹம் மனோரதோ² மத்த²கம் பத்தோ, ரஜ்ஜே பதிட்டி²தோம்ஹி. யம் பனாஹம் புப்³பே³ ஏகம் அத்த²ம் சிந்தயிம், இதா³னி தம் மத்த²கம் பாபேஸ்ஸாமீ’’தி அமச்சே ச ப்³ராஹ்மணக³ஹபதிகாத³யோ ச ஸன்னிபாதாபேத்வா ஆமந்தேஸி ‘‘ஜானாத² போ⁴ மயா கேன காரணேன ரஜ்ஜம் பத்த’’ந்தி? ‘‘ந ஜானாம, தே³வா’’தி. ‘‘அபி வோஹம் அஸுகம் நாம வடருக்க²ம் க³ந்தா⁴தீ³ஹி பூஜேத்வா அஞ்ஜலிம் பக்³க³ஹேத்வா நமஸ்ஸமானோ தி³ட்ட²புப்³போ³’’தி. ‘‘ஆம, தே³வா’’தி. ததா³ஹம் பத்த²னம் அகாஸிம் ‘‘ஸசே ரஜ்ஜம் பாபுணிஸ்ஸாமி, ப³லிகம்மம் தே கரிஸ்ஸாமீ’’தி. ‘‘தஸ்ஸா மே தே³வதாய ஆனுபா⁴வேன இத³ம் ரஜ்ஜம் லத்³த⁴ம், இதா³னிஸ்ஸா ப³லிகம்மம் கரிஸ்ஸாமி, தும்ஹே பபஞ்சம் அகத்வா கி²ப்பம் தே³வதாய ப³லிகம்மம் ஸஜ்ஜேதா²’’தி. ‘‘கிம் கிம் க³ண்ஹாம, தே³வா’’தி? போ⁴ அஹம் தே³வதாய ஆயாசமானோ ‘‘யே மய்ஹம் ரஜ்ஜே பாணாதிபாதாதீ³னி பஞ்ச து³ஸ்ஸீலகம்மானி த³ஸ அகுஸலகம்மபதே² ஸமாதா³ய வத்திஸ்ஸந்தி, தே கா⁴தேத்வா அந்தவட்டிமம்ஸலோஹிதாதீ³ஹி ப³லிகம்மம் கரிஸ்ஸாமீ’’தி ஆயாசிம். தஸ்மா தும்ஹே ஏவம் பே⁴ரிம் சராபேத² ‘‘அம்ஹாகம் ராஜா உபராஜகாலேயேவ ஏவம் ஆயாசி ‘ஸசாஹம் ரஜ்ஜம் பாபுணிஸ்ஸாமி, யே மே ரஜ்ஜே து³ஸ்ஸீலா ப⁴விஸ்ஸந்தி, தே ஸப்³பே³ கா⁴தேத்வா ப³லிகம்மம் கரிஸ்ஸாமீ’தி, ஸோ இதா³னி பஞ்சவித⁴ம் து³ஸ்ஸீலகம்மம் த³ஸவித⁴ம் அகுஸலகம்மபத²ம் ஸமாதா³ய வத்தமானானம் து³ஸ்ஸீலானம் ஸஹஸ்ஸம் கா⁴தேத்வா தேஸம் ஹத³யமம்ஸாதீ³னி கா³ஹாபேத்வா தே³வதாய ப³லிகம்மம் காதுகாமோ, ஏவம் நக³ரவாஸினோ ஜானந்தூ’’தி. ஏவஞ்ச பன வத்வா ‘‘யேதா³னி இதோ பட்டா²ய து³ஸ்ஸீலகம்மே வத்திஸ்ஸந்தி, தேஸம் ஸஹஸ்ஸம் கா⁴தேத்வா யஞ்ஞம் யஜித்வா ஆயாசனதோ முச்சிஸ்ஸாமீ’’தி ஏதமத்த²ம் பகாஸேந்தோ இமம் கா³த²மாஹ –

50. ‘‘து³ம்மேதா⁴னம் ஸஹஸ்ஸேன, யஞ்ஞோ மே உபயாசிதோ;

இதா³னி கோ²ஹம் யஜிஸ்ஸாமி, ப³ஹு அத⁴ம்மிகோ ஜனோ’’தி.

தத்த² து³ம்மேதா⁴னம் ஸஹஸ்ஸேனாதி ‘‘இத³ம் கம்மம் காதும் வட்டதி, இத³ம் ந வட்டதீ’’தி அஜானனபா⁴வேன, த³ஸஸு வா பன அகுஸலகம்மபதே²ஸு ஸமாதா³ய வத்தனபா⁴வேன து³ட்டா² மேதா⁴ ஏதேஸந்தி து³ம்மேதா⁴, தேஸம் து³ம்மேதா⁴னம் நிப்பஞ்ஞானம் பா³லபுக்³க³லானம் க³ணித்வா க³ஹிதேன ஸஹஸ்ஸேன. யஞ்ஞோ மே உபயாசிதோதி மயா தே³வதம் உபஸங்கமித்வா ‘‘ஏவம் யஜிஸ்ஸாமீ’’தி யஞ்ஞோ யாசிதோ. இதா³னி கோ²ஹம் யஜிஸ்ஸாமீதி ஸோ அஹம் இமினா ஆயாசனேன ரஜ்ஜஸ்ஸ படிலத்³த⁴த்தா இதா³னி யஜிஸ்ஸாமி. கிம்காரணா? இதா³னி ஹி ப³ஹு அத⁴ம்மிகோ ஜனோ, தஸ்மா இதா³னேவ நம் க³ஹேத்வா ப³லிகம்மம் கரிஸ்ஸாமீதி.

அமச்சா போ³தி⁴ஸத்தஸ்ஸ வசனம் ஸுத்வா ‘‘ஸாது⁴, தே³வா’’தி த்³வாத³ஸயோஜனிகே பா³ராணஸினக³ரே பே⁴ரிம் சராபேஸும். பே⁴ரியா ஆணம் ஸுத்வா ஏகம்பி து³ஸ்ஸீலகம்மம் ஸமாதா³ய டி²தோ ஏகபுரிஸோபி நாஹோஸி. இதி யாவ போ³தி⁴ஸத்தோ ரஜ்ஜம் காரேஸி, தாவ ஏகபுக்³க³லோபி பஞ்சஸு த³ஸஸு வா து³ஸ்ஸீலகம்மேஸு ஏகம்பி கம்மம் கரோந்தோ ந பஞ்ஞாயித்த². ஏவம் போ³தி⁴ஸத்தோ ஏகபுக்³க³லம்பி அகிலமேந்தோ ஸகலரட்ட²வாஸினோ ஸீலம் ரக்கா²பேத்வா ஸயம்பி தா³னாதீ³னி புஞ்ஞானி கத்வா ஜீவிதபரியோஸானே அத்தனோ பரிஸம் ஆதா³ய தே³வனக³ரம் பூரேந்தோ அக³மாஸி.

ஸத்தா²பி ‘‘ந, பி⁴க்க²வே, ததா²க³தோ இதா³னேவ லோகஸ்ஸ அத்த²ம் சரதி, புப்³பே³பி சரியேவா’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³பரிஸா பு³த்³த⁴பரிஸா அஹேஸும், பா³ராணஸிராஜா பன அஹமேவ அஹோஸி’’ந்தி.

து³ம்மேத⁴ஜாதகவண்ணனா த³ஸமா.

அத்த²காமவக்³கோ³ பஞ்சமோ.

தஸ்ஸுத்³தா³னம் –

லோஸகதிஸ்ஸகபோத, வேளுகம் மகஸம்பி ச;

ரோஹிணீ ஆராமதூ³ஸம், வாருணீதூ³ஸவேத³ப்³ப³ம்;

நக்க²த்தம் து³ம்மேத⁴ம் த³ஸாதி.

பட²மோ பண்ணாஸகோ.