4. குலாவகவக்³கோ³

[31] 1. குலாவகஜாதகவண்ணனா

குலாவகாதி இத³ம் ஸத்தா² ஜேதவனே விஹரந்தோ அபரிஸ்ஸாவேத்வா பானீயம் பீதம் பி⁴க்கு²ம் ஆரப்³ப⁴ கதே²ஸி. ஸாவத்தி²தோ கிர த்³வே ஸஹாயகா த³ஹரபி⁴க்கூ² ஜனபத³ம் க³ந்த்வா ஏகஸ்மிம் பா²ஸுகட்டா²னே யதா²ஜ்ஜா²ஸயம் வஸித்வா ‘‘ஸம்மாஸம்பு³த்³த⁴ம் பஸ்ஸிஸ்ஸாமா’’தி புன ததோ நிக்க²மித்வா ஜேதவனாபி⁴முகா² பாயிம்ஸு. ஏகஸ்ஸ ஹத்தே² பரிஸ்ஸாவனம் அத்தி², ஏகஸ்ஸ நத்தி². த்³வேபி ஏகதோ பானீயம் பரிஸ்ஸாவேத்வா பிவந்தி. தே ஏகதி³வஸம் விவாத³ம் அகம்ஸு. பரிஸ்ஸாவனஸாமிகோ இதரஸ்ஸ பரிஸ்ஸாவனம் அத³த்வா ஸயமேவ பானீயம் பரிஸ்ஸாவேத்வா பிவி, இதரோ பன பரிஸ்ஸாவனம் அலபி⁴த்வா பிபாஸம் ஸந்தா⁴ரேதும் அஸக்கோந்தோ அபரிஸ்ஸாவேத்வா பானீயம் பிவி. தே உபோ⁴பி அனுபுப்³பே³ன ஜேதவனம் பத்வா ஸத்தா²ரம் வந்தி³த்வா நிஸீதி³ம்ஸு. ஸத்தா² ஸம்மோத³னீயம் கத²ம் கதே²த்வா ‘‘குதோ ஆக³தத்தா²’’தி புச்சி². ‘‘ப⁴ந்தே, மயம் கோஸலஜனபதே³ ஏகஸ்மிம் கா³மகே வஸித்வா ததோ நிக்க²மித்வா தும்ஹாகம் த³ஸ்ஸனத்தா²ய ஆக³தா’’தி. ‘‘கச்சி பன வோ ஸமக்³கா³ ஆக³தத்தா²’’தி? அபரிஸ்ஸாவனகோ ஆஹ ‘‘அயம், ப⁴ந்தே, அந்தராமக்³கே³ மயா ஸத்³தி⁴ம் விவாத³ம் கத்வா பரிஸ்ஸாவனம் நாதா³ஸீ’’தி. இதரோபி ஆஹ ‘‘அயம், ப⁴ந்தே, அபரிஸ்ஸாவேத்வாவ ஜானம் ஸபாணகம் உத³கம் பிவீ’’தி. ‘‘ஸச்சம் கிர த்வம் பி⁴க்கு² ஜானம் ஸபாணகம் உத³கம் பிவீ’’தி? ‘‘ஆம, ப⁴ந்தே, அபரிஸ்ஸாவிதம் உத³கம் பிவிந்தி. ஸத்தா² ‘‘பி⁴க்கு² புப்³பே³ பண்டி³தா தே³வனக³ரே ரஜ்ஜம் காரேந்தா யுத்³த⁴பராஜிதா ஸமுத்³த³பிட்டே²ன பலாயந்தா ‘இஸ்ஸரியம் நிஸ்ஸாய பாணவத⁴ம் ந கரிஸ்ஸாமா’தி தாவ மஹந்தம் யஸம் பரிச்சஜித்வா ஸுபண்ணபோதகானம் ஜீவிதம் த³த்வா ரத²ம் நிவத்தயிம்ஸூ’’தி வத்வா அதீதம் ஆஹரி.

அதீதே மக³த⁴ரட்டே² ராஜக³ஹே ஏகோ மாக³த⁴ராஜா ரஜ்ஜம் காரேஸி. ததா³ போ³தி⁴ஸத்தோ யதா² ஏதரஹி ஸக்கோ புரிமத்தபா⁴வே மக³த⁴ரட்டே² மசலகா³மகே நிப்³ப³த்தி, ஏவம் தஸ்மிம்யேவ மசலகா³மகே மஹாகுலஸ்ஸ புத்தோ ஹுத்வா நிப்³ப³த்தி. நாமக்³க³ஹணதி³வஸே சஸ்ஸ ‘‘மக⁴குமாரோ’’த்வேவ நாமம் அகம்ஸு. ஸோ வயப்பத்தோ ‘‘மக⁴மாணவோ’’தி பஞ்ஞாயித்த². அத²ஸ்ஸ மாதாபிதரோ ஸமானஜாதிககுலதோ தா³ரிகம் ஆனயிம்ஸு. ஸோ புத்ததீ⁴தாஹி வட்³ட⁴மானோ தா³னபதி அஹோஸி, பஞ்ச ஸீலானி ரக்க²தி. தஸ்மிஞ்ச கா³மே தேத்திம்ஸேவ குலானி ஹோந்தி, தேபி தேத்திம்ஸ குலா மனுஸ்ஸா ஏகதி³வஸம் கா³மமஜ்ஜே² ட²த்வா கா³மகம்மம் கரோந்தி. போ³தி⁴ஸத்தோ டி²தட்டா²னே பாதே³ஹி பம்ஸும் வியூஹித்வா தம் பதே³ஸம் ரமணீயம் கத்வா அட்டா²ஸி, அத²ஞ்ஞோ ஏகோ ஆக³ந்த்வா தஸ்மிம் டா²னே டி²தோ. போ³தி⁴ஸத்தோ அபரம் டா²னம் ரமணீயம் கத்வா அட்டா²ஸி, தத்ராபி அஞ்ஞோ டி²தோ. போ³தி⁴ஸத்தோ அபரம்பி அபரம்பீதி ஸப்³பே³ஸம்பி டி²தட்டா²னம் ரமணீயம் கத்வா அபரேன ஸமயேன தஸ்மிம் டா²னே மண்ட³பம் காரேஸி, மண்ட³பம்பி அபனேத்வா ஸாலம் காரேஸி, தத்த² ப²லகாஸனானி ஸந்த²ரித்வா பானீயசாடிம் ட²பேஸி.

அபரேன ஸமயேன தேபி தேத்திம்ஸஜனா போ³தி⁴ஸத்தேன ஸமானச்ச²ந்தா³ அஹேஸும். தே போ³தி⁴ஸத்தோ பஞ்சஸு ஸீலேஸு பதிட்டா²பேத்வா ததோ பட்டா²ய தேஹி ஸத்³தி⁴ம் புஞ்ஞானி கரோந்தோ விசரதி. தேபி தேனேவ ஸத்³தி⁴ம் புஞ்ஞானி கரோந்தா காலஸ்ஸேவ வுட்டா²ய வாஸிப²ரஸுமுஸலஹத்தா² சதுமஹாபதா²தீ³ஸு முஸலேன பாஸாணே உப்³ப³த்தேத்வா பவட்டேந்தி, யானானம் அக்க²படிகா⁴தருக்கே² ஹரந்தி, விஸமம் ஸமம் கரோந்தி, ஸேதும் அத்த²ரந்தி, போக்க²ரணியோ க²ணந்தி, ஸாலம் கரோந்தி, தா³னானி தே³ந்தி, ஸீலானி ரக்க²ந்தி. ஏவம் யேபு⁴ய்யேன ஸகலகா³மவாஸினோ போ³தி⁴ஸத்தஸ்ஸ ஓவாதே³ ட²த்வா ஸீலானி ரக்கி²ம்ஸு.

அத² நேஸம் கா³மபோ⁴ஜகோ சிந்தேஸி ‘‘அஹம் புப்³பே³ ஏதேஸு ஸுரம் பிவந்தேஸு பாணாதிபாதாதீ³னி கரோந்தேஸு சாடிகஹாபணாதி³வஸேன சேவ த³ண்ட³ப³லிவஸேன ச த⁴னம் லபா⁴மி, இதா³னி பன மகோ⁴ மாணவோ ஸீலம் ரக்கா²பேதி, தேஸம் பாணாதிபாதாதீ³னி காதும் ந தே³தி, இதா³னி பன தே பஞ்ச ஸீலானி ந ரக்கா²பேஸ்ஸாமீ’’தி குத்³தோ⁴ ராஜானம் உபஸங்கமித்வா ‘‘தே³வ, ப³ஹூ சோரா கா³மகா⁴தாதீ³னி கரோந்தா விசரந்தீ’’தி ஆஹ. ராஜா தஸ்ஸ வசனம் ஸுத்வா ‘‘க³ச்ச², தே ஆனேஹீ’’தி ஆஹ. ஸோ க³ந்த்வா ஸப்³பே³பி தே ப³ந்தி⁴த்வா ஆனேத்வா ‘‘ஆனீதா, தே³வ, சோரா’’தி ரஞ்ஞோ ஆரோசேஸி. ராஜா தேஸம் கம்மம் அஸோதே⁴த்வாவ ‘‘ஹத்தி²னா நே மத்³தா³பேதா²’’தி ஆஹ. ததோ ஸப்³பே³பி தே ராஜங்க³ணே நிபஜ்ஜாபேத்வா ஹத்தி²ம் ஆனயிம்ஸு. போ³தி⁴ஸத்தோ தேஸம் ஓவாத³ம் அதா³ஸி ‘‘தும்ஹே ஸீலானி ஆவஜ்ஜேத², பேஸுஞ்ஞகாரகே ச ரஞ்ஞே ச ஹத்தி²ம்ஹி ச அத்தனோ ஸரீரே ச ஏகஸதி³ஸமேவ மேத்தம் பா⁴வேதா²’’தி. தே ததா² அகம்ஸு. அத² நேஸம் மத்³த³னத்தா²ய ஹத்தி²ம் உபனேஸும். ஸோ உபனீயமானோபி ந உபக³ச்ச²தி, மஹாவிரவம் விரவித்வா பலாயதி. அஞ்ஞம் அஞ்ஞம் ஹத்தி²ம் ஆனயிம்ஸு, தேபி ததே²வ பலாயிம்ஸு.

ராஜா ‘‘ஏதேஸம் ஹத்தே² கிஞ்சி ஓஸத⁴ம் ப⁴விஸ்ஸதீ’’தி சிந்தேத்வா ‘‘விசினதா²’’தி ஆஹ. விசினந்தா அதி³ஸ்வா ‘‘நத்தி², தே³வா’’தி ஆஹம்ஸு. தேன ஹி கிஞ்சி மந்தம் பரிவத்தேஸ்ஸந்தி, புச்ச²த² நே ‘‘அத்தி² வோ பரிவத்தனமந்தோ’’தி? ராஜபுரிஸா புச்சி²ம்ஸு, போ³தி⁴ஸத்தோ ‘‘அத்தீ²’’தி ஆஹ. ராஜபுரிஸா ‘‘அத்தி² கிர, தே³வா’’தி ஆரோசயிம்ஸு, ராஜா ஸப்³பே³பி தே பக்கோஸாபேத்வா ‘‘தும்ஹாகம் ஜானனமந்தம் கதே²தா²’’தி ஆஹ. போ³தி⁴ஸத்தோ அவோச ‘‘தே³வ, அஞ்ஞோ அம்ஹாகம் மந்தோ நாம நத்தி², அம்ஹே பன தேத்திம்ஸமத்தா ஜனா பாணம் ந ஹனாம, அதி³ன்னம் நாதி³யாம, மிச்சா²சாரம் ந சராம, முஸாவாத³ம் ந ப⁴ணாம, மஜ்ஜம் ந பிவாம, மேத்தம் பா⁴வேம, தா³னம் தே³ம, மக்³க³ம் ஸமம் கரோம, போக்க²ரணியோ க²ணாம, ஸாலம் கரோம, அயம் அம்ஹாகம் மந்தோ ச பரித்தஞ்ச வுட்³டி⁴ சா’’தி. ராஜா தேஸம் பஸன்னோ பேஸுஞ்ஞகாரகஸ்ஸ ஸப்³ப³ம் கே³ஹவிப⁴வம் தஞ்ச தேஸம்யேவ தா³ஸம் கத்வா அதா³ஸி, தம் ஹத்தி²ஞ்ச கா³மஞ்ச தேஸம்யேவ அதா³ஸி.

தே ததோ பட்டா²ய யதா²ருசியா புஞ்ஞானி கரோந்தா ‘‘சதுமஹாபதே² மஹந்தம் ஸாலம் காரேஸ்ஸாமா’’தி வட்³ட⁴கிம் பக்கோஸாபேத்வா ஸாலம் பட்ட²பேஸும். மாதுகா³மேஸு பன விக³தச்ச²ந்த³தாய தஸ்ஸா ஸாலாய மாதுகா³மானம் பத்திம் நாத³ம்ஸு. தேன ச ஸமயேன போ³தி⁴ஸத்தஸ்ஸ கே³ஹே ஸுத⁴ம்மா, சித்தா, நந்தா³, ஸுஜாதி சதஸ்ஸோ இத்தி²யோ ஹோந்தி. தாஸு ஸுத⁴ம்மா வட்³ட⁴கினா ஸத்³தி⁴ம் ஏகதோ ஹுத்வா ‘‘பா⁴திக, இமிஸ்ஸா ஸாலாய மம் ஜேட்டி²கம் கரோஹீ’’தி வத்வா லஞ்ஜம் அதா³ஸி. ஸோ ‘‘ஸாதூ⁴’’தி ஸம்படிச்சி²த்வா பட²மமேவ கண்ணிகாருக்க²ம் ஸுக்கா²பேத்வா தச்சே²த்வா விஜ்ஜி²த்வா கண்ணிகம் நிட்டா²பேத்வா வத்தே²ன பலிவேடே²த்வா ட²பேஸி. அத² ஸாலம் நிட்டா²பேத்வா கண்ணிகாரோபனகாலே ‘‘அஹோ, அய்யா, ஏகம் ந ஸரிம்ஹா’’தி ஆஹ. ‘‘கிம் நாம, போ⁴’’தி. ‘‘கண்ணிகா லத்³து⁴ம் வட்டதீ’’தி. ‘‘ஹோது ஆஹரிஸ்ஸாமா’’தி? ‘‘இதா³னி சி²ன்னருக்கே²ன காதும் ந ஸக்கா, புப்³பே³யேவ சி²ந்தி³த்வா தச்சே²த்வா விஜ்ஜி²த்வா ட²பிதகண்ணிகா லத்³து⁴ம் வட்டதீ’’தி. ‘‘இதா³னி கிம் காதப்³ப³’’ந்தி? ‘‘ஸசே கஸ்ஸசி கே³ஹே நிட்டா²பேத்வா ட²பிதா விக்காயிககண்ணிகா அத்தி², ஸா பரியேஸிதப்³பா³’’தி. தே பரியேஸந்தா ஸுத⁴ம்மாய கே³ஹே தி³ஸ்வா மூலேன ந லபி⁴ம்ஸு. ‘‘ஸசே மம் ஸாலாய பத்திகம் கரோத², த³ஸ்ஸாமீ’’தி வுத்தே ‘‘ந மயம் மாதுகா³மானம் பத்திம் த³ம்ஹா’’தி ஆஹம்ஸு.

அத² நே வட்³ட⁴கீ ஆஹ ‘‘அய்யா, தும்ஹே கிம் கதே²த², ட²பேத்வா ப்³ரஹ்மலோகம் அஞ்ஞம் மாதுகா³மரஹிதட்டா²னம் நாம நத்தி², க³ண்ஹத² கண்ணிகம், ஏவம் ஸந்தே அம்ஹாகம் கம்மம் நிட்ட²ம் க³மிஸ்ஸதீ’’தி. தே ‘‘ஸாதூ⁴’’தி கண்ணிகம் க³ஹேத்வா ஸாலம் நிட்டா²பேத்வா ஆஸனப²லகானி ஸந்த²ரித்வா பானீயசாடியோ ட²பேத்வா யாகு³ப⁴த்தம் நிப³ந்தி⁴ம்ஸு. ஸாலம் பாகாரேன பரிக்கி²பித்வா த்³வாரம் யோஜேத்வா அந்தோபாகாரே வாலுகம் ஆகிரித்வா ப³ஹிபாகாரே தாலபந்தியோ ரோபேஸும். சித்தாபி தஸ்மிம் டா²னே உய்யானம் காரேஸி, ‘‘புப்பூ²பக³ப²லூபக³ருக்கோ² அஸுகோ நாம தஸ்மிம் நத்தீ²’’தி நாஹோஸி. நந்தா³பி தஸ்மிம்யேவ டா²னே போக்க²ரணிம் காரேஸி பஞ்சவண்ணேஹி பது³மேஹி ஸஞ்ச²ன்னம் ரமணீயம். ஸுஜா ந கிஞ்சி அகாஸி.

போ³தி⁴ஸத்தோ மாது உபட்டா²னம் பிது உபட்டா²னம் குலே ஜேட்டா²பசாயிககம்மம் ஸச்சவாசம் அப²ருஸவாசம் அபிஸுணவாசம் மச்சே²ரவினயந்தி இமானி ஸத்த வதபதா³னி பூரேத்வா –

‘‘மாதாபேத்திப⁴ரம் ஜந்தும், குலே ஜேட்டா²பசாயினம்;

ஸண்ஹம் ஸகி²லஸம்பா⁴ஸம், பேஸுணேய்யப்பஹாயினம்.

‘‘மச்சே²ரவினயே யுத்தம், ஸச்சம் கோதா⁴பி⁴பு⁴ம் நரம்;

தம் வே தே³வா தாவதிம்ஸா, ஆஹு ஸப்புரிஸோ இதீ’’தி. (ஸம். நி. 1.257) –

ஏவம் பஸம்ஸியபா⁴வம் ஆபஜ்ஜித்வா ஜீவிதபரியோஸானே தாவதிம்ஸப⁴வனே ஸக்கோ தே³வராஜா ஹுத்வா நிப்³ப³த்தி, தேபிஸ்ஸ ஸஹாயா தத்தே²வ நிப்³ப³த்திம்ஸு. தஸ்மிம் காலே தாவதிம்ஸப⁴வனே அஸுரா படிவஸந்தி. ஸக்கோ தே³வராஜா ‘‘கிம் நோ ஸாதா⁴ரணேன ரஜ்ஜேனா’’தி அஸுரே தி³ப்³ப³பானம் பாயேத்வா மத்தே ஸமானே பாதே³ஸு கா³ஹாபேத்வா ஸினேருபப்³ப³தபாதே³ கி²பாபேஸி. தே அஸுரப⁴வனமேவ ஸம்பாபுணிம்ஸு.

அஸுரப⁴வனம் நாம ஸினேருஸ்ஸ ஹேட்டி²மதலே தாவதிம்ஸதே³வலோகப்பமாணமேவ, தத்த² தே³வானம் பாரிச்ச²த்தகோ விய சித்தபாடலி நாம கப்பட்டி²யருக்கோ² ஹோதி. தே சித்தபாடலியா புப்பி²தாய ஜானந்தி ‘‘நாயம் அம்ஹாகம் தே³வலோகோ, தே³வலோகஸ்மிஞ்ஹி பாரிச்ச²த்தகோ புப்ப²தீ’’தி. அத² தே ‘‘ஜரஸக்கோ அம்ஹே மத்தே கத்வா மஹாஸமுத்³த³பிட்டே² கி²பித்வா அம்ஹாகம் தே³வனக³ரம் க³ண்ஹி, தே மயம் தேன ஸத்³தி⁴ம் யுஜ்ஜி²த்வா அம்ஹாகம் தே³வனக³ரமேவ க³ண்ஹிஸ்ஸாமா’’தி கிபில்லிகா விய த²ம்ப⁴ம் ஸினேரும் அனுஸஞ்சரமானா உட்ட²ஹிம்ஸு. ஸக்கோ ‘‘அஸுரா கிர உட்டி²தா’’தி ஸுத்வா ஸமுத்³த³பிட்டே²யேவ அப்³பு⁴க்³க³ந்த்வா யுஜ்ஜ²மானோ தேஹி பராஜிதோ தி³யட்³ட⁴யோஜனஸதிகேன வேஜயந்தரதே²ன த³க்கி²ணஸமுத்³த³ஸ்ஸ மத்த²கேன பலாயிதும் ஆரத்³தோ⁴. அத²ஸ்ஸ ரதோ² ஸமுத்³த³பிட்டே²ன வேகே³ன க³ச்ச²ந்தோ ஸிம்ப³லிவனம் பக்க²ந்தோ, தஸ்ஸ க³மனமக்³கே³ ஸிம்ப³லிவனம் நளவனம் விய சி²ஜ்ஜித்வா சி²ஜ்ஜித்வா ஸமுத்³த³பிட்டே² பததி. ஸுபண்ணபோதகா ஸமுத்³த³பிட்டே² பரிபதந்தா மஹாவிரவம் ரவிம்ஸு. ஸக்கோ மாதலிம் புச்சி² ‘‘ஸம்ம மாதலி, கிம் ஸத்³தோ³ நாமேஸ, அதிகாருஞ்ஞரவோ வத்ததீ’’தி? ‘‘தே³வ, தும்ஹாகம் ரத²வேகே³ன விசுண்ணிதே ஸிம்ப³லிவனே பதந்தே ஸுபண்ணபோதகா மரணப⁴யதஜ்ஜிதா ஏகவிரவம் விரவந்தீ’’தி.

மஹாஸத்தோ ‘‘ஸம்ம மாதலி, மா அம்ஹே நிஸ்ஸாய ஏதே கிலமந்து, ந மயம் இஸ்ஸரியம் நிஸ்ஸாய பாணவத⁴கம்மம் கரோம, ஏதேஸம் பன அத்தா²ய மயம் ஜீவிதம் பரிச்சஜித்வா அஸுரானம் த³ஸ்ஸாம, நிவத்தயேதம் ரத²’’ந்தி வத்வா இமம் கா³த²மாஹ –

31. ‘‘குலாவகா மாதலி ஸிம்ப³லிஸ்மிம், ஈஸாமுகே²ன பரிவஜ்ஜயஸ்ஸு;

காமம் சஜாம அஸுரேஸு பாணம், மாமே தி³ஜா விகுலாவா அஹேஸு’’ந்தி.

தத்த² குலாவகாதி ஸுபண்ணபோதகா. மாதலீதி ஸாரதி²ம் ஆமந்தேஸி. ஸிம்ப³லிஸ்மிந்தி பஸ்ஸ ஏதே ஸிம்ப³லிருக்கே² ஓலம்ப³ந்தா டி²தாதி த³ஸ்ஸேதி. ஈஸாமுகே²ன பரிவஜ்ஜயஸ்ஸூதி ஏதே ஏதஸ்ஸ ரத²ஸ்ஸ ஈஸாமுகே²ன யதா² ந ஹஞ்ஞந்தி, ஏவம் தே பரிவஜ்ஜயஸ்ஸு. காமம் சஜாம அஸுரேஸு பாணந்தி யதி³ அம்ஹேஸு அஸுரானம் பாணம் சஜந்தேஸு ஏதேஸம் ஸோத்தி² ஹோதி, காமம் சஜாம ஏகம்ஸேனேவ மயம் அஸுரேஸு அம்ஹாகம் பாணம் சஜாம. மாமே தி³ஜா விகுலாவா அஹேஸுந்தி இமே பன தி³ஜா இமே க³ருளபோதகா வித்³த⁴ஸ்தவிசுண்ணிதகுலாவகதாய விகுலாவா மா அஹேஸும், மா அம்ஹாகம் து³க்க²ம் ஏதேஸம் உபரி கி²ப, நிவத்தய நிவத்தய ரத²ந்தி. மாதலிஸங்கா³ஹகோ தஸ்ஸ வசனம் ஸுத்வா ரத²ம் நிவத்தேத்வா அஞ்ஞேன மக்³கே³ன தே³வலோகாபி⁴முக²ம் அகாஸி. அஸுரா பன தம் நிவத்தயமானமேவ தி³ஸ்வா ‘‘அத்³தா⁴ அஞ்ஞேஹிபி சக்கவாளேஹி ஸக்கா ஆக³ச்ச²ந்தி, ப³லம் லபி⁴த்வா ரதோ² நிவத்தோ ப⁴விஸ்ஸதீ’’தி மரணப⁴யபீ⁴தா பலாயித்வா அஸுரப⁴வனமேவ பவிஸிம்ஸு.

ஸக்கோபி தே³வனக³ரம் பவிஸித்வா த்³வீஸு தே³வலோகேஸு தே³வக³ணேன பரிவுதோ நக³ரமஜ்ஜே² அட்டா²ஸி. தஸ்மிம் க²ணே பத²விம் பி⁴ந்தி³த்வா யோஜனஸஹஸ்ஸுப்³பே³தோ⁴ வேஜயந்தபாஸாதோ³ உட்ட²ஹி. விஜயந்தே உட்டி²தத்தா ‘‘வேஜயந்தோ’’ த்வேவ நாமம் அகம்ஸு. அத² ஸக்கோ புன அஸுரானம் அனாக³மனத்தா²ய பஞ்சஸு டா²னேஸு ஆரக்க²ம் ட²பேஸி. யம் ஸந்தா⁴ய வுத்தம் –

‘‘அந்தரா த்³வின்னம் அயுஜ்ஜ²புரானம், பஞ்சவிதா⁴ ட²பிதா அபி⁴ரக்கா²;

உரக³கரோடிபயஸ்ஸ ச ஹாரீ, மத³னயுதா சதுரோ ச மஹந்தா’’தி. (ஸம். நி. அட்ட². 1.1.247);

த்³வே நக³ரானிபி யுத்³தே⁴ன க³ஹேதும் அஸக்குணேய்யதாய அயுஜ்ஜ²புரானி நாம ஜாதானி தே³வனக³ரஞ்ச அஸுரனக³ரஞ்ச. யதா³ ஹி அஸுரா ப³லவந்தா ஹோந்தி, அத² தே³வேஹி பலாயித்வா தே³வனக³ரம் பவிஸித்வா த்³வாரே பிஹிதே அஸுரானம் ஸதஸஹஸ்ஸம்பி கிஞ்சி காதும் ந ஸக்கோதி. யதா³ தே³வா ப³லவந்தா ஹோந்தி, அத² அஸுரேஹி பலாயித்வா அஸுரனக³ரம் பவிஸித்வா த்³வாரே பிஹிதே ஸக்கானம் ஸதஸஹஸ்ஸம்பி கிஞ்சி காதும் ந ஸக்கோதி. இதி இமானி த்³வே நக³ரானி அயுஜ்ஜ²புரானி நாம. தேஸம் அந்தரா ஏதேஸு உரகா³தீ³ஸு பஞ்சஸு டா²னேஸு ஸக்கேன ஆரக்கா² ட²பிதா. தத்த² உரக³-ஸத்³தே³ன நாகா³ க³ஹிதா. தே உத³கே ப³லவந்தா ஹோந்தி, தஸ்மா ஸினேருஸ்ஸ பட²மாலிந்தே³ தேஸம் ஆரக்கா². கரோடி-ஸத்³தே³ன ஸுபண்ணா க³ஹிதா. தேஸம் கிர கரோடி நாம பானபோ⁴ஜனம், தேன தம் நாமம் லபி⁴ம்ஸு, து³தியாலிந்தே³ தேஸம் ஆரக்கா². பயஸ்ஸஹாரி-ஸத்³தே³ன கும்ப⁴ண்டா³ க³ஹிதா. தா³னவரக்க²ஸா கிரேதே, ததியாலிந்தே³ தேஸம் ஆரக்கா². மத³னயுத-ஸத்³தே³ன யக்கா² க³ஹிதா. விஸமசாரினோ கிர தே யுத்³த⁴ஸோண்டா³, சதுத்தா²லிந்தே³ தேஸம் ஆரக்கா². சதுரோ ச மஹந்தாதி சத்தாரோ மஹாராஜானோ வுத்தா, பஞ்சமாலிந்தே³ தேஸம் ஆரக்கா². தஸ்மா யதி³ அஸுரா குபிதா ஆவிலசித்தா தே³வபுரம் உபயந்தி, பஞ்சவிதே⁴ஸு யம் கி³ரினோ பட²மம் பரிப⁴ண்ட³ம், தம் உரகா³ பரிபா³ஹிய திட்ட²ந்தி. ஏவம் ஸேஸேஸு ஸேஸா.

இமேஸு பன பஞ்சஸு டா²னேஸு ஆரக்க²ம் ட²பேத்வா ஸக்கே தே³வானமிந்தே³ தி³ப்³ப³ஸம்பத்திம் அனுப⁴வமானே ஸுத⁴ம்மா சவித்வா தஸ்ஸேவ பாத³பரிசாரிகா ஹுத்வா நிப்³ப³த்தி, கண்ணிகாய தி³ன்னனிஸ்ஸந்தே³ன சஸ்ஸா பஞ்சயோஜனஸதிகா ஸுத⁴ம்மா நாம தே³வஸபா⁴ உத³பாதி³, யத்த² தி³ப்³ப³ஸேதச்ச²த்தஸ்ஸ ஹேட்டா² யோஜனப்பமாணே கஞ்சனபல்லங்கே நிஸின்னோ ஸக்கோ தே³வானமிந்தோ³ தே³வமனுஸ்ஸானம் கத்தப்³ப³கிச்சானி கரோதி. சித்தாபி சவித்வா தஸ்ஸேவ பாத³பரிசாரிகா ஹுத்வா நிப்³ப³த்தி, உய்யானஸ்ஸ கரணனிஸ்ஸந்தே³ன சஸ்ஸா சித்தலதாவனம் நாம உய்யானம் உத³பாதி³. நந்தா³பி சவித்வா தஸ்ஸேவ பாத³பரிசாரிகா ஹுத்வா நிப்³ப³த்தி, போக்க²ரணியா நிஸ்ஸந்தே³ன சஸ்ஸா நந்தா³ நாம போக்க²ரணீ உத³பாதி³.

ஸுஜா பன குஸலகம்மஸ்ஸ அகதத்தா ஏகஸ்மிம் அரஞ்ஞே கந்த³ராய ப³கஸகுணிகா ஹுத்வா நிப்³ப³த்தா. ஸக்கோ ‘‘ஸுஜா ந பஞ்ஞாயதி, கத்த² நு கோ² நிப்³ப³த்தா’’தி ஆவஜ்ஜேந்தோ தம் தி³ஸ்வா தத்த² க³ந்த்வா தம் ஆதா³ய தே³வலோகம் ஆக³ந்த்வா தஸ்ஸா ரமணீயம் தே³வனக³ரம் ஸுத⁴ம்மம் தே³வஸப⁴ம் சித்தலதாவனம் நந்தா³போக்க²ரணிஞ்ச த³ஸ்ஸேத்வா ‘‘ஏதா குஸலம் கத்வா மய்ஹம் பாத³பரிசாரிகா ஹுத்வா நிப்³ப³த்தா, த்வம் பன குஸலம் அகத்வா திரச்சா²னயோனியம் நிப்³ப³த்தா, இதோ பட்டா²ய ஸீலம் ரக்கா²ஹீ’’தி தம் ஓவதி³த்வா பஞ்சஸு ஸீலேஸு பதிட்டா²பேத்வா தத்தே²வ நேத்வா விஸ்ஸஜ்ஜேஸி. ஸாபி ததோ பட்டா²ய ஸீலம் ரக்க²தி. ஸக்கோ கதிபாஹச்சயேன ‘‘ஸக்கா நு கோ² ஸீலம் ரக்கி²து’’ந்தி க³ந்த்வா மச்ச²ரூபேன உத்தானோ ஹுத்வா புரதோ நிபஜ்ஜி, ஸா ‘‘மதமச்ச²கோ’’தி ஸஞ்ஞாய ஸீஸே அக்³க³ஹேஸி, மச்சோ² நங்கு³ட்ட²ம் சாலேஸி, அத² நம் ‘‘ஜீவதி மஞ்ஞே’’தி விஸ்ஸஜ்ஜேஸி. ஸக்கோ ‘‘ஸாது⁴ ஸாது⁴, ஸக்கி²ஸ்ஸஸி ஸீலம் ரக்கி²து’’ந்தி அக³மாஸி. ஸா ததோ சுதா பா³ராணஸியம் கும்ப⁴காரகே³ஹே நிப்³ப³த்தி.

ஸக்கோ ‘‘கஹம் நு கோ² நிப்³ப³த்தா’’தி தத்த² நிப்³ப³த்தபா⁴வம் ஞத்வா ஸுவண்ணஏளாலுகானம் யானகம் பூரேத்வா மஜ்ஜே² கா³மஸ்ஸ மஹல்லகவேஸேன நிஸீதி³த்வா ‘‘ஏளாலுகானி க³ண்ஹத², ஏளாலுகானி க³ண்ஹதா²’’தி உக்³கோ⁴ஸேஸி. மனுஸ்ஸா ஆக³ந்த்வா ‘‘தே³ஹி, தாதா’’தி ஆஹம்ஸு. ‘‘அஹம் ஸீலரக்க²கானம் த³ம்மி, தும்ஹே ஸீலம் ரக்க²தா²’’தி? ‘‘மயம் ஸீலம் நாம ந ஜானாம, மூலேன தே³ஹீ’’தி. ‘‘ந மய்ஹம் மூலேன அத்தோ², ஸீலரக்க²கானஞ்ஞேவாஹம் த³ம்மீ’’தி. மனுஸ்ஸா ‘‘கோ சாயம் ஏளாலுகோ’’தி பக்கமிம்ஸு. ஸுஜா தம் பவத்திம் ஸுத்வா ‘‘மய்ஹம் ஆனீதம் ப⁴விஸ்ஸதீ’’தி சிந்தேத்வா க³ந்த்வா தம் ‘‘தே³ஹி, தாதா’’தி ஆஹ. ‘‘ஸீலம் ரக்க²ஸி, அம்மா’’தி? ‘‘ஆம, ரக்கா²மீ’’தி. ‘‘இத³ம் மயா துய்ஹமேவ அத்தா²ய ஆப⁴த’’ந்தி ஸத்³தி⁴ம் யானகேன கே³ஹத்³வாரே ட²பேத்வா பக்காமி.

ஸாபி யாவஜீவம் ஸீலம் ரக்கி²த்வா ததோ சுதா வேபசித்திஸ்ஸ அஸுரிந்த³ஸ்ஸ தீ⁴தா ஹுத்வா நிப்³ப³த்தி, ஸீலானிஸம்ஸேன அபி⁴ரூபா அஹோஸி. ஸோ தஸ்ஸா வயப்பத்தகாலே ‘‘மய்ஹம் தீ⁴தா அத்தனோ சித்தருசிதம் ஸாமிகம் க³ண்ஹதூ’’தி அஸுரே ஸன்னிபாதேஸி. ஸக்கோ ‘‘கஹம் நு கோ² ஸா நிப்³ப³த்தா’’தி ஓலோகேந்தோ தத்த² நிப்³ப³த்தபா⁴வம் ஞத்வா ‘‘ஸுஜா சித்தருசிதம் ஸாமிகம் க³ண்ஹந்தீ மம் க³ண்ஹிஸ்ஸதீ’’தி அஸுரவண்ணம் மாபேத்வா தத்த² அக³மாஸி. ஸுஜம் அலங்கரித்வா ஸன்னிபாதட்டா²னம் ஆனேத்வா ‘‘சித்தருசிதம் ஸாமிகம் க³ண்ஹா’’தி ஆஹம்ஸு. ஸா ஓலோகேந்தீ ஸக்கம் தி³ஸ்வா புப்³பே³பி ஸினேஹவஸேன உப்பன்னபேமேன மஹோகே⁴ன விய அஜ்ஜோ²த்த²டஹத³யா ஹுத்வா ‘‘அயம் மே ஸாமிகோ’’தி வத்வா தஸ்ஸ உபரி புப்ப²தா³மம் கி²பித்வா அக்³க³ஹேஸி. அஸுரா ‘‘அம்ஹாகம் ராஜா ஏத்தகம் காலம் தீ⁴து அனுச்ச²விகம் அலபி⁴த்வா இதா³னி லப⁴தி, அயமேவஸ்ஸா தீ⁴து பிதாமஹதோ மஹல்லகோ அனுச்ச²விகோ’’தி லஜ்ஜமானா பக்கமிம்ஸு. ஸோ தம் தே³வனக³ரம் ஆனேத்வா அட்³ட⁴தேய்யானம் நாடிகாகோடீனம் ஜேட்டி²கம் கத்வா யாவதாயுகம் ட²த்வா யதா²கம்மம் க³தோ.

ஸத்தா² இமம் த⁴ம்மதே³ஸனம் ஆஹரித்வா ‘‘ஏவம் பி⁴க்கு² புப்³பே³ பண்டி³தா தே³வனக³ரே ரஜ்ஜம் காரயமானா அத்தனோ ஜீவிதம் பரிச்சஜந்தாபி பாணாதிபாதம் ந கரிம்ஸு, த்வம் நாம ஏவரூபே நிய்யானிகே ஸாஸனே பப்³ப³ஜித்வா அபரிஸ்ஸாவிதம் ஸபாணகம் உத³கம் பிவிஸ்ஸஸீ’’தி தம் பி⁴க்கு²ம் க³ரஹித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ மாதலிஸங்கா³ஹகோ ஆனந்தோ³ அஹோஸி, ஸக்கோ பன அஹமேவ அஹோஸி’’ந்தி.

குலாவகஜாதகவண்ணனா பட²மா.

[32] 2. நச்சஜாதகவண்ணனா

ருத³ம் மனுஞ்ஞந்தி இத³ம் ஸத்தா² ஜேதவனே விஹரந்தோ ஏகம் ப³ஹுப⁴ண்டி³கம் பி⁴க்கு²ம் ஆரப்³ப⁴ கதே²ஸி. வத்து² ஹேட்டா² தே³வத⁴ம்மஜாதகே (ஜா. 1.1.6) வுத்தஸதி³ஸமேவ. ஸத்தா² தம் பி⁴க்கு²ம் ‘‘ஸச்சம் கிர த்வம் பி⁴க்கு² ப³ஹுப⁴ண்டோ³’’தி புச்சி². ‘‘ஆம, ப⁴ந்தே’’தி. ‘‘கிம்காரணா த்வம் பி⁴க்கு² ப³ஹுப⁴ண்டோ³ ஜாதோஸீ’’தி? ஸோ ஏத்தகம் ஸுத்வாவ குத்³தோ⁴ நிவாஸனபாருபனம் ச²ட்³டே³த்வா ‘‘இமினா தா³னி நீஹாரேன விசராமீ’’தி ஸத்து² புரதோ நக்³கோ³ அட்டா²ஸி. மனுஸ்ஸா ‘‘தீ⁴ தீ⁴’’தி ஆஹம்ஸு. ஸோ ததோ பலாயித்வா ஹீனாயாவத்தோ. பி⁴க்கூ² த⁴ம்மஸபா⁴யம் ஸன்னிஸின்னா ‘‘ஸத்து² நாம புரதோ ஏவரூபம் கரிஸ்ஸதீ’’தி தஸ்ஸ அகு³ணகத²ம் கதே²ஸும். ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி பி⁴க்கூ² புச்சி². ப⁴ந்தே, ‘‘ஸோ ஹி நாம பி⁴க்கு² தும்ஹாகம் புரதோ சதுபரிஸமஜ்ஜே² ஹிரோத்தப்பம் பஹாய கா³மதா³ரகோ விய நக்³கோ³ ட²த்வா மனுஸ்ஸேஹி ஜிகு³ச்சி²யமானோ ஹீனாயாவத்தித்வா ஸாஸனா பரிஹீனோ’’தி தஸ்ஸ அகு³ணகதா²ய நிஸின்னாம்ஹாதி. ஸத்தா² ‘‘ந, பி⁴க்க²வே, இதா³னேவ ஸோ பி⁴க்கு² ஹிரோத்தப்பாபா⁴வேன ரதனஸாஸனா பரிஹீனோ, புப்³பே³ இத்தி²ரதனபடிலாப⁴தோபி பரிஹீனோயேவா’’தி வத்வா அதீதம் ஆஹரி.

அதீதே பட²மகப்பே சதுப்பதா³ ஸீஹம் ராஜானம் அகம்ஸு, மச்சா² ஆனந்த³மச்ச²ம், ஸகுணா ஸுவண்ணஹம்ஸம். தஸ்ஸ பன ஸுவண்ணஹம்ஸராஜஸ்ஸ தீ⁴தா ஹம்ஸபோதிகா அபி⁴ரூபா அஹோஸி. ஸோ தஸ்ஸா வரம் அதா³ஸி, ஸா அத்தனோ சித்தருசிதம் ஸாமிகம் வாரேஸி. ஹம்ஸராஜா தஸ்ஸா வரம் த³த்வா ஹிமவந்தே ஸப்³பே³ ஸகுணே ஸன்னிபாதாபேஸி, நானப்பகாரா ஹம்ஸமோராத³யோ ஸகுணக³ணா ஸமாக³ந்த்வா ஏகஸ்மிம் மஹந்தே பாஸாணதலே ஸன்னிபதிம்ஸு. ஹம்ஸராஜா ‘‘அத்தனோ சித்தருசிதம் ஸாமிகம் ஆக³ந்த்வா க³ண்ஹாதூ’’தி தீ⁴தரம் பக்கோஸாபேஸி. ஸா ஸகுணஸங்க⁴ம் ஓலோகேந்தீ மணிவண்ணகீ³வம் சித்ரபேகு²ணம் மோரம் தி³ஸ்வா ‘‘அயம் மே ஸாமிகோ ஹோதூ’’தி ஆரோசேஸி. ஸகுணஸங்கா⁴ மோரம் உபஸங்கமித்வா ஆஹம்ஸு ‘‘ஸம்ம மோர, அயம் ராஜதீ⁴தா ஏத்தகானம் ஸகுணானம் மஜ்ஜே² ஸாமிகம் ரோசேந்தீ தயி ருசிம் உப்பாதே³ஸீ’’தி. மோரோ ‘‘அஜ்ஜாபி தாவ மே ப³லம் ந பஸ்ஸதீ’’தி அதிதுட்டி²யா ஹிரோத்தப்பம் பி⁴ந்தி³த்வா தாவ மஹதோ ஸகுணஸங்க⁴ஸ்ஸ மஜ்ஜே² பக்கே² பஸாரேத்வா நச்சிதும் ஆரபி⁴, நச்சந்தோ அப்படிச்ச²ன்னோ அஹோஸி.

ஸுவண்ணஹம்ஸராஜா லஜ்ஜிதோ ‘‘இமஸ்ஸ நேவ அஜ்ஜ²த்தஸமுட்டா²னா ஹிரீ அத்தி², ந ப³ஹித்³தா⁴ஸமுட்டா²னம் ஓத்தப்பம், நாஸ்ஸ பி⁴ன்னஹிரோத்தப்பஸ்ஸ மம தீ⁴தரம் த³ஸ்ஸாமீ’’தி ஸகுணஸங்க⁴மஜ்ஜே² இமம் கா³த²மாஹ –

32. ‘‘ருத³ம் மனுஞ்ஞம் ருசிரா ச பிட்டி², வேளுரியவண்ணூபனிபா⁴ ச கீ³வா;

ப்³யாமமத்தானி ச பேகு²ணானி, நச்சேன தே தீ⁴தரம் நோ த³தா³மீ’’தி.

தத்த² ருத³ம் மனுஞ்ஞந்தி த-காரஸ்ஸ த³-காரோ கதோ, ருதம் மனாபம், வஸ்ஸிதஸத்³தோ³ மது⁴ரோதி அத்தோ². ருசிரா ச பிட்டீ²தி பிட்டி²பி தே சித்ரா சேவ ஸோப⁴னா ச. வேளுரியவண்ணூபனிபா⁴தி வேளுரியமணிவண்ணஸதி³ஸா. ப்³யாமமத்தானீதி ஏகப்³யாமப்பமாணானி. பேகு²ணானீதி பிஞ்சா²னி. நச்சேன தே தீ⁴தரம் நோ த³தா³மீதி ஹிரோத்தப்பம் பி⁴ந்தி³த்வா நச்சிதபா⁴வேனேவ தே ஏவரூபஸ்ஸ நில்லஜ்ஜஸ்ஸ தீ⁴தரம் நோ த³தா³மீதி வத்வா ஹம்ஸராஜா தஸ்மிம்யேவ பரிஸமஜ்ஜே² அத்தனோ பா⁴கி³னேய்யஸ்ஸ ஹம்ஸபோதகஸ்ஸ தீ⁴தரம் அதா³ஸி. மோரோ ஹம்ஸபோதிகம் அலபி⁴த்வா லஜ்ஜித்வா ததோவ உப்பதித்வா பலாயி. ஹம்ஸராஜாபி அத்தனோ வஸனட்டா²னமேவ க³தோ.

ஸத்தா² ‘‘ந, பி⁴க்க²வே, இதா³னேவ ஏஸ ஹிரோத்தப்பம் பி⁴ந்தி³த்வா ரதனஸாஸனா பரிஹீனோ, புப்³பே³பி இத்தி²ரதனபடிலாப⁴தோ பரிஹீனோயேவா’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ மோரோ ப³ஹுப⁴ண்டி³கோ அஹோஸி, ஹம்ஸராஜா பன அஹமேவ அஹோஸி’’ந்தி.

நச்சஜாதகவண்ணனா து³தியா.

[33] 3. ஸம்மோத³மானஜாதகவண்ணனா

ஸம்மோத³மானாதி இத³ம் ஸத்தா² கபிலவத்து²ம் உபனிஸ்ஸாய நிக்³ரோதா⁴ராமே விஹரந்தோ சும்ப³டககலஹம் ஆரப்³ப⁴ கதே²ஸி. ஸோ குணாலஜாதகே (ஜா. 2.21.குணாலஜாதக) ஆவி ப⁴விஸ்ஸதி. ததா³ பன ஸத்தா² ஞாதகே ஆமந்தேத்வா ‘‘மஹாராஜா ஞாதகானம் அஞ்ஞமஞ்ஞம் விக்³க³ஹோ நாம ந யுத்தோ, திரச்சா²னக³தாபி ஹி புப்³பே³ ஸமக்³க³காலே பச்சாமித்தே அபி⁴ப⁴வித்வா ஸோத்தி²ம் பத்தா யதா³ விவாத³மாபன்னா, ததா³ மஹாவினாஸம் பத்தா’’தி வத்வா ஞாதிராஜகுலேஹி ஆயாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ வட்டகயோனியம் நிப்³ப³த்தித்வா அனேகவட்டகஸஹஸ்ஸபரிவாரோ அரஞ்ஞே படிவஸதி. ததா³ ஏகோ வட்டகலுத்³த³கோ தேஸம் வஸனட்டா²னம் க³ந்த்வா வட்டகவஸ்ஸிதம் கத்வா தேஸம் ஸன்னிபதிதபா⁴வம் ஞத்வா தேஸம் உபரி ஜாலம் கி²பித்வா பரியந்தேஸு மத்³த³ந்தோ ஸப்³பே³ ஏகதோ கத்வா பச்சி²ம் பூரேத்வா க⁴ரம் க³ந்த்வா தே விக்கிணித்வா தேன மூலேன ஜீவிகம் கப்பேதி. அதே²கதி³வஸம் போ³தி⁴ஸத்தோ தே வட்டகே ஆஹ – ‘‘அயம் ஸாகுணிகோ அம்ஹாகம் ஞாதகே வினாஸம் பாபேதி, அஹம் ஏகம் உபாயம் ஜானாமி, ஏனேஸ அம்ஹே க³ண்ஹிதும் ந ஸக்கி²ஸ்ஸதி, இதோ தா³னி பட்டா²ய ஏதேன தும்ஹாகம் உபரி ஜாலே கி²த்தமத்தே ஏகேகோ ஏகேகஸ்மிம் ஜாலக்கி²கே ஸீஸம் ட²பேத்வா ஜாலம் உக்கி²பித்வா இச்சி²தட்டா²னம் ஹரித்வா ஏகஸ்மிம் கண்டககு³ம்பே³ பக்கி²பத², ஏவம் ஸந்தே ஹேட்டா² தேன தேன டா²னேன பலாயிஸ்ஸாமா’’தி. தே ஸப்³பே³ ‘‘ஸாதூ⁴’’தி படிஸ்ஸுணிம்ஸு. து³தியதி³வஸே உபரி ஜாலே கி²த்தே தே போ³தி⁴ஸத்தேன வுத்தனயேனேவ ஜாலம் உக்கி²பித்வா ஏகஸ்மிம் கண்டககு³ம்பே³ கி²பித்வா ஸயம் ஹேட்டா²பா⁴கே³ன ததோ ததோ பலாயிம்ஸு. ஸாகுணிகஸ்ஸ கு³ம்ப³தோ ஜாலம் மோசேந்தஸ்ஸேவ விகாலோ ஜாதோ, ஸோ துச்ச²ஹத்தோ²வ அக³மாஸி.

புனதி³வஸதோ பட்டா²யபி வட்டகா ததே²வ கரோந்தி. ஸோபி யாவ ஸூரியத்த²ங்க³மனா ஜாலமேவ மோசேந்தோ கிஞ்சி அலபி⁴த்வா துச்ச²ஹத்தோ²வ கே³ஹம் க³ச்ச²தி. அத²ஸ்ஸ ப⁴ரியா குஜ்ஜி²த்வா ‘‘த்வம் தி³வஸே தி³வஸே துச்ச²ஹத்தோ² ஆக³ச்ச²ஸி, அஞ்ஞம்பி தே ப³ஹி போஸிதப்³ப³ட்டா²னம் அத்தி² மஞ்ஞே’’தி ஆஹ. ஸாகுணிகோ ‘‘ப⁴த்³தே³, மம அஞ்ஞம் போஸிதப்³ப³ட்டா²னம் நத்தி², அபிச கோ² பன தே வட்டகா ஸமக்³கா³ ஹுத்வா சரந்தி, மயா கி²த்தமத்தே ஜாலம் ஆதா³ய கண்டககு³ம்பே³ கி²பித்வா க³ச்ச²ந்தி, ந கோ² பனேதே ஸப்³ப³காலமேவ ஸம்மோத³மானா விஹரிஸ்ஸந்தி, த்வம் மா சிந்தயி, யதா³ தே விவாத³மாபஜ்ஜிஸ்ஸந்தி, ததா³ தே ஸப்³பே³வ ஆதா³ய தவ முக²ம் ஹாஸயமானோ ஆக³ச்சி²ஸ்ஸாமீ’’தி வத்வா ப⁴ரியாய இமம் கா³த²மாஹ –

33. ‘‘ஸம்மோத³மானா க³ச்ச²ந்தி, ஜாலமாதா³ய பக்கி²னோ;

யதா³ தே விவதி³ஸ்ஸந்தி, ததா³ ஏஹிந்தி மே வஸ’’ந்தி.

தத்த² யதா³ தே விவதி³ஸ்ஸந்தீதி யஸ்மிம் காலே தே வட்டகா நானாலத்³தி⁴கா நானாகா³ஹா ஹுத்வா விவதி³ஸ்ஸந்தி, கலஹம் கரிஸ்ஸந்தீதி அத்தோ². ததா³ ஏஹிந்தி மே வஸந்தி தஸ்மிம் காலே ஸப்³பே³பி தே மம வஸம் ஆக³ச்சி²ஸ்ஸந்தி. அதா²ஹம் தே க³ஹேத்வா தவ முக²ம் ஹாஸேந்தோ ஆக³ச்சி²ஸ்ஸாமீதி ப⁴ரியம் ஸமஸ்ஸாஸேஸி.

கதிபாஹஸ்ஸேவ பன அச்சயேன ஏகோ வட்டகோ கோ³சரபூ⁴மிம் ஓதரந்தோ அஸல்லக்கே²த்வா அஞ்ஞஸ்ஸ ஸீஸம் அக்கமி, இதரோ ‘‘கோ மம் ஸீஸே அக்கமீ’’தி குஜ்ஜி²ம். ‘‘அஹம் அஸல்லக்கே²த்வா அக்கமிம், மா குஜ்ஜீ²’’தி வுத்தேபி குஜ்ஜி²யேவ. தே புனப்புனம் கதே²ந்தா ‘‘த்வமேவ மஞ்ஞே ஜாலம் உக்கி²பஸீ’’தி அஞ்ஞமஞ்ஞம் விவாத³ம் கரிம்ஸு. தேஸு விவத³ந்தேஸு போ³தி⁴ஸத்தோ சிந்தேஸி ‘‘விவாத³கே ஸோத்தி²பா⁴வோ நாம நத்தி², இதா³னேவ தே ஜாலம் ந உக்கி²பிஸ்ஸந்தி, ததோ மஹந்தம் வினாஸம் பாபுணிஸ்ஸந்தி, ஸாகுணிகோ ஓகாஸம் லபி⁴ஸ்ஸதி, மயா இமஸ்மிம் டா²னே ந ஸக்கா வஸிது’’ந்தி. ஸோ அத்தனோ பரிஸம் ஆதா³ய அஞ்ஞத்த² க³தோ. ஸாகுணிகோபி கோ² கதிபாஹச்சயேன ஆக³ந்த்வா வட்டகவஸ்ஸிதம் வஸ்ஸித்வா தேஸம் ஸன்னிபதிதானம் உபரி ஜாலம் கி²பி. அதே²கோ வட்டகோ ‘‘துய்ஹம் கிர ஜாலம் உக்கி²பந்தஸ்ஸேவ மத்த²கே லோமானி பதிதானி, இதா³னி உக்கி²பா’’தி ஆஹ. அபரோ ‘‘துய்ஹம் கிர ஜாலம் உக்கி²பந்தஸ்ஸேவ த்³வீஸு பக்கே²ஸு பத்தானி பதிதானி, இதா³னி உக்கி²பா’’தி ஆஹ. இதி தேஸம் ‘‘த்வம் உக்கி²ப, த்வம் உக்கி²பா’’தி வத³ந்தானஞ்ஞேவ ஸாகுணிகோ ஜாலம் உக்கி²பித்வா ஸப்³பே³வ தே ஏகதோ கத்வா பச்சி²ம் பூரேத்வா ப⁴ரியம் ஹாஸயமானோ கே³ஹம் அக³மாஸி.

ஸத்தா² ‘‘ஏவம் மஹாராஜா ஞாதகானம் கலஹோ நாம ந யுத்தோ, கலஹோ வினாஸமூலமேவ ஹோதீ’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ அபண்டி³தவட்டகோ தே³வத³த்தோ அஹோஸி, பண்டி³தவட்டகோ பன அஹமேவ அஹோஸி’’ந்தி.

ஸம்மோத³மானஜாதகவண்ணனா ததியா.

[34] 4. மச்ச²ஜாதகவண்ணனா

ந மம் ஸீதம் ந மம் உண்ஹந்தி இத³ம் ஸத்தா² ஜேதவனே விஹரந்தோ புராணது³தியிகாபலோப⁴னம் ஆரப்³ப⁴ கதே²ஸி. ததா³ ஹி ஸத்தா² தம் பி⁴க்கு²ம் ‘‘ஸச்சம் கிர த்வம் பி⁴க்கு² உக்கண்டி²தோஸீ’’தி புச்சி². ‘‘ஸச்சம், ப⁴க³வா’’தி. ‘‘கேனாஸி உக்கண்டா²பிதோ’’தி? ‘‘புராணது³தியிகா மே, ப⁴ந்தே மது⁴ரஹத்த²ரஸா, தம் ஜஹிதும் ந ஸக்கோமீ’’தி. அத² நம் ஸத்தா² ‘‘பி⁴க்கு² ஏஸா இத்தீ² தவ அனத்த²காரிகா, புப்³பே³பி த்வம் ஏதம் நிஸ்ஸாய மரணம் பாபுணந்தோ மம் ஆக³ம்ம மரணா முத்தோ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ தஸ்ஸ புரோஹிதோ அஹோஸி. ததா³ கேவட்டா நதி³யம் ஜாலம் கி²பிம்ஸு. அதே²கோ மஹாமச்சோ² ரதிவஸேன அத்தனோ மச்சி²யா ஸத்³தி⁴ம் கீளமானோ ஆக³ச்ச²தி. தஸ்ஸ ஸா மச்சீ² புரதோ க³ச்ச²மானா ஜாலக³ந்த⁴ம் கா⁴யித்வா ஜாலம் பரிஹரமானா க³தா. ஸோ பன காமகி³த்³தோ⁴ லோலமச்சோ² ஜாலகுச்சி²மேவ பவிட்டோ². கேவட்டா தஸ்ஸ ஜாலம் பவிட்ட²பா⁴வம் ஞத்வா ஜாலம் உக்கி²பித்வா மச்ச²ம் க³ஹேத்வா அமாரேத்வாவ வாலிகாபிட்டே² கி²பித்வா ‘‘இமம் அங்கா³ரேஸு பசித்வா கா²தி³ஸ்ஸாமா’’தி அங்கா³ரே கரோந்தி, ஸூலம் தச்சே²ந்தி. மச்சோ² ‘‘ஏதம் அங்கா³ரதாபனம் வா ஸூலவிஜ்ஜ²னம் வா அஞ்ஞம் வா பன து³க்க²ம் ந மம் கிலமேதி, யம் பனேஸா மச்சீ² ‘அஞ்ஞம் ஸோ நூன ரதியா க³தோ’தி மயி தோ³மனஸ்ஸம் ஆபஜ்ஜதி, தமேவ மம் பா³த⁴தீ’’தி பரிதே³வமானோ இமம் கா³த²மாஹ –

34. ‘‘ந மம் ஸீதம் ந மம் உண்ஹம், ந மம் ஜாலஸ்மி பா³த⁴னம்;

யஞ்ச மம் மஞ்ஞதே மச்சீ², அஞ்ஞம் ஸோ ரதியா க³தோ’’தி.

தத்த² ந மம் ஸீதம் ந மம் உண்ஹந்தி மச்சா²னம் உத³கா நீஹடகாலே ஸீதம் ஹோதி, தஸ்மிம் விக³தே உண்ஹம் ஹோதி, தது³ப⁴யம்பி ஸந்தா⁴ய ‘‘ந மம் ஸீதம் ந மம் உண்ஹம் பா³த⁴தீ’’தி பரிதே³வதி. யம்பி அங்கா³ரேஸு பச்சனமூலகம் து³க்க²ம் ப⁴விஸ்ஸதி, தம்பி ஸந்தா⁴ய ‘‘ந மம் உண்ஹ’’ந்தி பரிதே³வதேவ. ந மம் ஜாலஸ்மி பா³த⁴னந்தி யம்பி மே ஜாலஸ்மிம் பா³த⁴னம் அஹோஸி, தம்பி மம் ந பா³தே⁴தீதி பரிதே³வதி. ‘‘யஞ்ச ம’’ந்திஆதீ³ஸு அயம் பிண்ட³த்தோ² – ஸா மச்சீ² மம ஜாலே பதிதஸ்ஸ இமேஹி கேவட்டேஹி க³ஹிதபா⁴வம் அஜானந்தீ மம் அபஸ்ஸமானா ‘‘ஸோ மச்சோ² இதா³னி அஞ்ஞம் மச்சி²ம் காமரதியா க³தோ ப⁴விஸ்ஸதீ’’தி சிந்தேதி, தம் தஸ்ஸா தோ³மனஸ்ஸப்பத்தாய சிந்தனம் மம் பா³த⁴தீதி வாலிகாபிட்டே² நிபன்னோ பரிதே³வதி.

தஸ்மிம் ஸமயே புரோஹிதோ தா³ஸபரிவுதோ ந்ஹானத்தா²ய நதீ³தீரம் ஆக³தோ. ஸோ பன ஸப்³ப³ருதஞ்ஞூ ஹோதி. தேனஸ்ஸ மச்ச²பரிதே³வனம் ஸுத்வா ஏதத³ஹோஸி ‘‘அயம் மச்சோ² கிலேஸவஸேன பரிதே³வதி, ஏவம் ஆதுரசித்தோ கோ² பனேஸ மீயமானோ நிரயேயேவ நிப்³ப³த்திஸ்ஸதி, அஹமஸ்ஸ அவஸ்ஸயோ ப⁴விஸ்ஸாமீ’’தி கேவட்டானம் ஸந்திகம் க³ந்த்வா ‘‘அம்போ⁴ தும்ஹே அம்ஹாகம் ஏகதி³வஸம்பி ப்³யஞ்ஜனத்தா²ய மச்ச²ம் ந தே³தா²’’தி ஆஹ. கேவட்டா ‘‘கிம் வதே³த², ஸாமி, தும்ஹாகம் ருச்சனகமச்ச²ம் க³ண்ஹித்வா க³ச்ச²தா²’’தி ஆஹம்ஸு. ‘‘அம்ஹாகம் அஞ்ஞேன கம்மம் நத்தி², இமஞ்ஞேவ தே³தா²’’தி. ‘‘க³ண்ஹத² ஸாமீ’’தி. போ³தி⁴ஸத்தோ தம் உபோ⁴ஹி ஹத்தே²ஹி க³ஹேத்வா நதீ³தீரே நிஸீதி³த்வா ‘‘அம்போ⁴ மச்ச², ஸசே தாஹம் அஜ்ஜ ந பஸ்ஸேய்யம், ஜீவிதக்க²யம் பாபுணேய்யாஸி, இதா³னி இதோ பட்டா²ய மா கிலேஸவஸிகோ அஹோஸீ’’தி ஓவதி³த்வா உத³கே விஸ்ஸஜ்ஜேத்வா ந்ஹத்வா நக³ரம் பாவிஸி.

ஸத்தா² இமம் த⁴ம்மதே³ஸனம் ஆஹரித்வா ஸச்சானி பகாஸேஸி, ஸச்சபரியோஸானே உக்கண்டி²தபி⁴க்கு² ஸோதாபத்திப²லே பதிட்டா²ஸி. ஸத்தா²பி அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ மச்சீ² புராணது³தியிகா அஹோஸி, மச்சோ² உக்கண்டி²தபி⁴க்கு² புரோஹிதோ பன அஹமேவ அஹோஸி’’ந்தி.

மச்ச²ஜாதகவண்ணனா சதுத்தா².

[35] 5. வட்டகஜாதகவண்ணனா

ஸந்தி பக்கா² அபதனாதி இத³ம் ஸத்தா² மக³தே⁴ஸு சாரிகம் சரமானோ தா³வக்³கி³னிப்³பா³னம் ஆரப்³ப⁴ கதே²ஸி. ஏகஸ்மிஞ்ஹி ஸமயே ஸத்தா² மக³தே⁴ஸு சாரிகம் சரமானோ அஞ்ஞதரஸ்மிம் மக³த⁴கா³மகே பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ பி⁴க்கு²க³ணபரிவுதோ மக்³க³ம் படிபஜ்ஜி. தஸ்மிம் ஸமயே மஹாடா³ஹோ உட்ட²ஹி, புரதோ ச பச்ச²தோ ச ப³ஹூ பி⁴க்கூ² தி³ஸ்ஸந்தி, ஸோபி கோ² அக்³கி³ ஏகதூ⁴மோ ஏகஜாலோ ஹுத்வா அவத்த²ரமானோ ஆக³ச்ச²தேவ. தத்தே²கே புது²ஜ்ஜனபி⁴க்கூ² மரணப⁴யபீ⁴தா ‘‘படக்³கி³ம் த³ஸ்ஸாம, தேன த³ட்³ட⁴ட்டா²னம் இதரோ அக்³கி³ ந ஓத்த²ரிஸ்ஸதீ’’தி அரணிஸஹிதம் நீஹரித்வா அக்³கி³ம் கரோந்தி. அபரே ஆஹம்ஸு ‘‘ஆவுஸோ, தும்ஹே கிம் நாம கரோத², க³க³னமஜ்ஜே² டி²தம் சந்த³மண்ட³லம், பாசீனலோகதா⁴துதோ உக்³க³ச்ச²ந்தம் ஸஹஸ்ஸரம்ஸிபடிமண்டி³தம் ஸூரியமண்ட³லம், வேலாய தீரே டி²தா ஸமுத்³த³ம், ஸினேரும் நிஸ்ஸாய டி²தா ஸினேரும் அபஸ்ஸந்தா விய ஸதே³வகே லோகே அக்³க³புக்³க³லம் அத்தனா ஸத்³தி⁴ம் க³ச்ச²ந்தமேவ ஸம்மாஸம்பு³த்³த⁴ம் அனோலோகேத்வா ‘படக்³கி³ம் தே³மா’தி வத³த², பு³த்³த⁴ப³லம் நாம ந ஜானாத², ஏத² ஸத்து² ஸந்திகம் க³மிஸ்ஸாமா’’தி. தே புரதோ ச பச்ச²தோ ச க³ச்ச²ந்தா ஸப்³பே³பி ஏகதோ ஹுத்வா த³ஸப³லஸ்ஸ ஸந்திகம் அக³மம்ஸு. ஸத்தா² மஹாபி⁴க்கு²ஸங்க⁴பரிவாரோ அஞ்ஞதரஸ்மிம் பதே³ஸே அட்டா²ஸி. தா³வக்³கி³ அபி⁴ப⁴வந்தோ விய விரவந்தோ ஆக³ச்ச²தி. ஆக³ந்த்வா ததா²க³தஸ்ஸ டி²தட்டா²னம் பத்வா தஸ்ஸ பதே³ஸஸ்ஸ ஸமந்தா ஸோளஸகரீஸமத்தட்டா²னம் பத்தோ உத³கே ஓபிலாபிததிணுக்கா விய நிப்³பா³யி, வினிப்³பே³த⁴தோ த்³வத்திம்ஸகரீஸமத்தட்டா²னம் அவத்த²ரிதும் நாஸக்கி².

பி⁴க்கூ² ஸத்து² கு³ணகத²ம் ஆரபி⁴ம்ஸு – ‘‘அஹோ பு³த்³தா⁴னம் கு³ணா நாம, அயஞ்ஹி நாம அசேதனோ அக்³கி³ பு³த்³தா⁴னம் டி²தட்டா²னம் அவத்த²ரிதும் ந ஸக்கோதி, உத³கே திணுக்கா விய நிப்³பா³யதி, அஹோ பு³த்³தா⁴னம் ஆனுபா⁴வோ நாமா’’தி. ஸத்தா² தேஸம் கத²ம் ஸுத்வா ‘‘ந, பி⁴க்க²வே, ஏதம் ஏதரஹி மய்ஹம் ப³லம், யம் இமம் பூ⁴மிப்பதே³ஸம் பத்வா ஏஸ அக்³கி³ நிப்³பா³யதி. இத³ம் பன மய்ஹம் போராணகஸச்சப³லம். இமஸ்மிஞ்ஹி பதே³ஸே ஸகலம்பி இமம் கப்பம் அக்³கி³ ந ஜலிஸ்ஸதி, கப்பட்டி²யபாடிஹாரியம் நாமேத’’ந்தி ஆஹ. அதா²யஸ்மா ஆனந்தோ³ ஸத்து² நிஸீத³னத்தா²ய சதுக்³கு³ணம் ஸங்கா⁴டிம் பஞ்ஞபேஸி, நிஸீதி³ ஸத்தா² பல்லங்கம் ஆபு⁴ஜித்வா. பி⁴க்கு²ஸங்கோ⁴பி ததா²க³தம் வந்தி³த்வா பரிவாரேத்வா நிஸீதி³. அத² ஸத்தா² ‘‘இத³ம் தாவ, ப⁴ந்தே, அம்ஹாகம் பாகடம், அதீதம் படிச்ச²ன்னம், தம் நோ பாகடம் கரோதா²’’தி பி⁴க்கூ²ஹி ஆயாசிதோ அதீதம் ஆஹரி.

அதீதே மக³த⁴ரட்டே² தஸ்மிம்யேவ பதே³ஸே போ³தி⁴ஸத்தோ வட்டகயோனியம் படிஸந்தி⁴ம் க³ஹேத்வா மாதுகுச்சி²தோ ஜாதோ அண்ட³கோஸம் பதா³லேத்வா நிக்க²ந்தகாலே மஹாகே³ண்டு³கப்பமாணோ வட்டகபோதகோ அஹோஸி. அத² நம் மாதாபிதரோ குலாவகே நிபஜ்ஜாபேத்வா முக²துண்ட³கேன கோ³சரம் ஆஹரித்வா போஸேந்தி. தஸ்ஸ பக்கே² பஸாரேத்வா ஆகாஸே க³மனப³லம் வா பாதே³ உக்கி²பித்வா த²லே க³மனப³லம் வா நத்தி². தஞ்ச பதே³ஸம் ஸம்வச்ச²ரே ஸம்வச்ச²ரே தா³வக்³கி³ க³ண்ஹாதி, ஸோ தஸ்மிம்பி ஸமயே மஹாரவம் ரவந்தோ தம் பதே³ஸம் க³ண்ஹி, ஸகுணஸங்கா⁴ அத்தனோ அத்தனோ குலாவகேஹி நிக்க²மித்வா மரணப⁴யபீ⁴தா விரவந்தா பலாயந்தி, போ³தி⁴ஸத்தஸ்ஸபி மாதாபிதரோ மரணப⁴யபீ⁴தா போ³தி⁴ஸத்தம் ச²ட்³டே³த்வா பலாயிம்ஸு. போ³தி⁴ஸத்தோ குலாவகே நிபன்னகோவ கீ³வம் உக்கி²பித்வா அவத்த²ரித்வா ஆக³ச்ச²ந்தம் அக்³கி³ம் தி³ஸ்வா சிந்தேஸி ‘‘ஸசே மய்ஹம் பக்கே² பஸாரேத்வா ஆகாஸேன க³மனப³லம் ப⁴வேய்ய, உப்பதித்வா அஞ்ஞத்த² க³ச்சே²ய்யம். ஸசே பாதே³ உக்கி²பித்வா க³மனப³லம் ப⁴வேய்ய, பத³வாரேன அஞ்ஞத்த² க³ச்சே²ய்யம். மாதாபிதரோபி கோ² மே மரணப⁴யபீ⁴தா மம் ஏககம் பஹாய அத்தானம் பரித்தாயந்தா பலாதா. இதா³னி மே அஞ்ஞம் படிஸரணம் நத்தி², அதாணோம்ஹி அஸரணோ, கிம் நு கோ² அஜ்ஜ மயா காதும் வட்டதீ’’தி.

அத²ஸ்ஸ ஏதத³ஹோஸி ‘‘இமஸ்மிம் லோகே ஸீலகு³ணோ நாம அத்தி², ஸச்சகு³ணோ நாம அத்தி², அதீதே பாரமியோ பூரேத்வா போ³தி⁴மூலே நிஸீதி³த்வா அபி⁴ஸம்பு³த்³தா⁴ ஸீலஸமாதி⁴பஞ்ஞாவிமுத்திவிமுத்திஞாணத³ஸ்ஸனஸம்பன்னா ஸச்சானுத்³த³யகாருஞ்ஞக²ந்திஸமன்னாக³தா ஸப்³ப³ஸத்தேஸு ஸமப்பவத்தமேத்தாபா⁴வனா ஸப்³ப³ஞ்ஞுபு³த்³தா⁴ நாம அத்தி², தேஹி ச படிவித்³தா⁴ த⁴ம்மகு³ணா நாம அத்தி², மயி சாபி ஏகம் ஸச்சம் அத்தி², ஸம்விஜ்ஜமானோ ஏகோ ஸபா⁴வத⁴ம்மோ பஞ்ஞாயதி, தஸ்மா அதீதே பு³த்³தே⁴ சேவ தேஹி படிவித்³த⁴கு³ணே ச ஆவஜ்ஜேத்வா மயி விஜ்ஜமானம் ஸச்சஸபா⁴வத⁴ம்மம் க³ஹேத்வா ஸச்சகிரியம் கத்வா அக்³கி³ம் படிக்கமாபேத்வா அஜ்ஜ மயா அத்தனோ சேவ ஸேஸஸகுணானஞ்ச ஸோத்தி²பா⁴வம் காதும் வட்டதீ’’தி. தேன வுத்தம் –

‘‘அத்தி² லோகே ஸீலகு³ணோ, ஸச்சம் ஸோசேய்யனுத்³த³யா;

தேன ஸச்சேன காஹாமி, ஸச்சகிரியமனுத்தரம்.

‘‘ஆவஜ்ஜேத்வா த⁴ம்மப³லம், ஸரித்வா புப்³ப³கே ஜினே;

ஸச்சப³லமவஸ்ஸாய, ஸச்சகிரியமகாஸஹ’’ந்தி. (சரியா. 3.79-80);

அத² போ³தி⁴ஸத்தோ அதீதே பரினிப்³பு³தானம் பு³த்³தா⁴னம் கு³ணே ஆவஜ்ஜேத்வா அத்தனி விஜ்ஜமானம் ஸச்சஸபா⁴வம் ஆரப்³ப⁴ ஸச்சகிரியம் கரோந்தோ இமம் கா³த²மாஹ –

35. ‘‘ஸந்தி பக்கா² அபதனா, ஸந்தி பாதா³ அவஞ்சனா;

மாதாபிதா ச நிக்க²ந்தா, ஜாதவேத³ படிக்கமா’’தி.

தத்த² ஸந்தி பக்கா² அபதனாதி மய்ஹம் பக்கா² நாம அத்தி² உபலப்³ப⁴ந்தி, நோ ச கோ² ஸக்கா ஏதேஹி உப்பதிதும் ஆகாஸேன க³ந்துந்தி அபதனா. ஸந்தி பாதா³ அவஞ்சனாதி பாதா³பி மே அத்தி², தேஹி பன வஞ்சிதும் பத³வாரக³மனேன க³ந்தும் ந ஸக்காதி அவஞ்சனா. மாதாபிதா ச நிக்க²ந்தாதி யே ச மம் அஞ்ஞத்த² நேய்யும், தேபி மரணப⁴யேன மாதாபிதரோ நிக்க²ந்தா. ஜாதவேதா³தி அக்³கி³ம் ஆலபதி. ஸோ ஹி ஜாதோவ வேத³யதி பஞ்ஞாயதி, தஸ்மா ‘‘ஜாதவேதோ³’’தி வுச்சதி. படிக்கமாதி படிக³ச்ச² நிவத்தாதி ஜாதவேத³ம் ஆணாபேதி.

இதி மஹாஸத்தோ ‘‘ஸசே மய்ஹம் பக்கா²னம் அத்தி²பா⁴வோ, தே ச பஸாரேத்வா ஆகாஸே அபதனபா⁴வோ, பாதா³னம் அத்தி²பா⁴வோ, தே ச உக்கி²பித்வா அவஞ்சனபா⁴வோ, மாதாபிதூனம் மம் குலாவகேயேவ ச²ட்³டே³த்வா பலாதபா⁴வோ ச ஸச்சோ ஸபா⁴வபூ⁴தோயேவ, ஜாதவேத³, ஏதேன ஸச்சேன த்வம் இதோ படிக்கமா’’தி குலாவகே நிபன்னகோவ ஸச்சகிரியம் அகாஸி. தஸ்ஸ ஸஹ ஸச்சகிரியாய ஸோளஸகரீஸமத்தே டா²னே ஜாதவேதோ³ படிக்கமி. படிக்கமந்தோ ச ந ஜா²யமானோவ அஞ்ஞம் க³தோ, உத³கே பன ஓபிலாபிதா உக்கா விய தத்தே²வ நிப்³பா³யி. தேன வுத்தம் –

‘‘ஸஹ ஸச்சே கதே மய்ஹம், மஹாபஜ்ஜலிதோ ஸிகீ²;

வஜ்ஜேஸி ஸோளஸ கரீஸானி, உத³கம் பத்வா யதா² ஸிகீ²’’தி. (சரியா. 3.82);

தம் பன டா²னம் ஸகலேபி இமஸ்மிம் கப்பே அக்³கி³னா அனபி⁴ப⁴வனீயத்தா கப்பட்டி²யபாடிஹாரியம் நாம ஜாதம். ஏவம் போ³தி⁴ஸத்தோ ஸச்சகிரியம் கத்வா ஜீவிதபரியோஸானே யதா²கம்மம் க³தோ.

ஸத்தா² ‘‘ந, பி⁴க்க²வே, இமஸ்ஸ வனஸ்ஸ அக்³கி³னா அனஜ்ஜோ²த்த²ரணம் ஏதரஹி மய்ஹம் ப³லம், போராணம் பனேதம் வட்டபோதககாலே மய்ஹமேவ ஸச்சப³ல’’ந்தி இமம் த⁴ம்மதே³ஸனம் ஆஹரித்வா ஸச்சானி பகாஸேஸி. ஸச்சபரியோஸானே கேசி ஸோதாபன்னா அஹேஸும், கேசி ஸகதா³கா³மினோ, கேசி அனாகா³மினோ, கேசி அரஹத்தம் பத்தாதி. ஸத்தா²பி அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ மாதாபிதரோ ஏதரஹி மாதாபிதரோவ அஹேஸும், வட்டகராஜா பன அஹமேவ அஹோஸி’’ந்தி.

வட்டகஜாதகவண்ணனா பஞ்சமா.

[36] 6. ஸகுணஜாதகவண்ணனா

யம் நிஸ்ஸிதாதி இத³ம் ஸத்தா² ஜேதவனே விஹரந்தோ த³ட்³ட⁴பண்ணஸாலம் பி⁴க்கு²ம் ஆரப்³ப⁴ கதே²ஸி. ஏகோ கிர பி⁴க்கு² ஸத்து² ஸந்திகே கம்மட்டா²னம் க³ஹேத்வா ஜேதவனதோ நிக்க²ம்ம கோஸலேஸு ஏகம் பச்சந்தகா³மம் நிஸ்ஸாய ஏகஸ்மிம் அரஞ்ஞஸேனாஸனே வஸதி. அத²ஸ்ஸ பட²மமாஸேயேவ பண்ணஸாலா ட³ய்ஹித்த². ஸோ ‘‘பண்ணஸாலா மே த³ட்³டா⁴, து³க்க²ம் வஸாமீ’’தி மனுஸ்ஸானம் ஆசிக்கி². மனுஸ்ஸா ‘‘இதா³னி நோ கே²த்தம் பரிஸுக்க²ம், கேதா³ரே பாயேத்வா கரிஸ்ஸாம’’, தஸ்மிம் பாயிதே ‘‘பீ³ஜம் வபித்வா’’, பீ³ஜே வுத்தே ‘‘வதிம் கத்வா’’, வதியா கதாய ‘‘நித்³தா³யித்வா, லாயித்வா, மத்³தி³த்வா’’தி ஏவம் தம் தம் கம்மம் அபதி³ஸந்தாயேவ தேமாஸம் வீதினாமேஸும். ஸோ பி⁴க்கு² தேமாஸம் அஜ்ஜோ²காஸே து³க்க²ம் வஸந்தோ கம்மட்டா²னம் வட்³டே⁴த்வா விஸேஸம் நிப்³ப³த்தேதும் நாஸக்கி². பவாரேத்வா பன ஸத்து² ஸந்திகம் க³ந்த்வா வந்தி³த்வா ஏகமந்தம் நிஸீதி³. ஸத்தா² தேன ஸத்³தி⁴ம் படிஸந்தா²ரம் கத்வா ‘‘கிம் பி⁴க்கு² ஸுகே²ன வஸ்ஸம்வுத்தோ²ஸி, கம்மட்டா²னம் தே மத்த²கம் பத்த’’ந்தி புச்சி². ஸோ தம் பவத்திம் ஆசிக்கி²த்வா ‘‘ஸேனாஸனஸப்பாயஸ்ஸ மே அபா⁴வேன கம்மட்டா²னம் மத்த²கம் ந பத்த’’ந்தி ஆஹ. ஸத்தா² ‘‘புப்³பே³ பி⁴க்கு² திரச்சா²னக³தாபி அத்தனோ ஸப்பாயாஸப்பாயம் ஜானிம்ஸு, த்வம் கஸ்மா ந அஞ்ஞாஸீ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஸகுணயோனியம் நிப்³ப³த்தித்வா ஸகுணஸங்க⁴பரிவுதோ அரஞ்ஞாயதனே ஸாகா²விடபஸம்பன்னம் மஹாருக்க²ம் நிஸ்ஸாய வஸதி. அதே²கதி³வஸம் தஸ்ஸ ருக்க²ஸ்ஸ ஸாகா²ஸு அஞ்ஞமஞ்ஞம் க⁴ம்ஸந்தீஸு சுண்ணம் பததி, தூ⁴மோ உட்டா²தி. தம் தி³ஸ்வா போ³தி⁴ஸத்தோ சிந்தேஸி ‘‘இமா த்³வே ஸாகா² ஏவம் க⁴ம்ஸமானா அக்³கி³ம் விஸ்ஸஜ்ஜேஸ்ஸந்தி, ஸோ பதித்வா புராணபண்ணானி க³ண்ஹிஸ்ஸதி, ததோ பட்டா²ய இமம்பி ருக்க²ம் ஜா²பேஸ்ஸதி, ந ஸக்கா இத⁴ அம்ஹேஹி வஸிதும், இதோ பலாயித்வா அஞ்ஞத்த² க³ந்தும் வட்டதீ’’தி. ஸோ ஸகுணஸங்க⁴ஸ்ஸ இமம் கா³த²மாஹ –

36. ‘‘யம் நிஸ்ஸிதா ஜக³திருஹம் விஹங்க³மா, ஸ்வாயம் அக்³கி³ம் பமுஞ்சதி;

தி³ஸா ப⁴ஜத² வக்கங்கா³, ஜாதம் ஸரணதோ ப⁴ய’’ந்தி.

தத்த² ஜக³திருஹந்தி ஜக³தி வுச்சதி பத²வீ, தத்த² ஜாதத்தா ருக்கோ² ‘‘ஜக³திருஹோ’’தி வுச்சதி. விஹங்க³மாதி விஹம் வுச்சதி ஆகாஸம், தத்த² க³மனதோ பக்கீ² ‘‘விஹங்க³மா’’தி வுச்சந்தி. தி³ஸா ப⁴ஜதா²தி இமம் ருக்க²ம் முஞ்சித்வா இதோ பலாயந்தா சதஸ்ஸோ தி³ஸா ப⁴ஜத². வக்கங்கா³தி ஸகுணே ஆலபதி. தே ஹி உத்தமங்க³ம் க³லம் கதா³சி கதா³சி வங்கம் கரோந்தி, தஸ்மா ‘‘வக்கங்கா³’’தி வுச்சந்தி. வங்கா வா தேஸம் உபோ⁴ஸு பஸ்ஸேஸு பக்கா² ஜாதாதி வக்கங்கா³. ஜாதம் ஸரணதோ ப⁴யந்தி அம்ஹாகம் அவஸ்ஸயருக்க²தோயேவ ப⁴யம் நிப்³ப³த்தம், ஏத² அஞ்ஞத்த² க³ச்சா²மாதி.

போ³தி⁴ஸத்தஸ்ஸ வசனகரா பண்டி³தஸகுணா தேன ஸத்³தி⁴ம் ஏகப்பஹாரேனேவ உப்பதித்வா அஞ்ஞத்த² க³தா. யே பன அபண்டி³தா, தே ‘‘ஏவமேவ ஏஸ பி³ந்து³மத்தே உத³கே கும்பீ⁴லே பஸ்ஸதீ’’தி தஸ்ஸ வசனம் அக்³க³ஹேத்வா தத்தே²வ வஸிம்ஸு. ததோ ந சிரஸ்ஸேவ போ³தி⁴ஸத்தேன சிந்திதாகாரேனேவ அக்³கி³ நிப்³ப³த்தித்வா தம் ருக்க²ம் அக்³க³ஹேஸி. தூ⁴மேஸு ச ஜாலாஸு ச உட்டி²தாஸு தூ⁴மந்தா⁴ ஸகுணா அஞ்ஞத்த² க³ந்தும் நாஸக்கி²ம்ஸு, அக்³கி³ம்ஹி பதித்வா பதித்வா வினாஸம் பாபுணிம்ஸு.

ஸத்தா² ‘‘ஏவம் பி⁴க்கு² புப்³பே³ திரச்சா²னக³தாபி ருக்க²க்³கே³ வஸந்தா அத்தனோ ஸப்பாயாஸப்பாயம் ஜானந்தி, த்வம் கஸ்மா ந அஞ்ஞாஸீ’’தி இமம் த⁴ம்மதே³ஸனம் ஆஹரித்வா ஸச்சானி பகாஸேஸி. ஸச்சபரியோஸானே ஸோ பி⁴க்கு² ஸோதாபத்திப²லே பதிட்டி²தோ. ஸத்தா²பி அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ போ³தி⁴ஸத்தஸ்ஸ வசனகரா ஸகுணா பு³த்³த⁴பரிஸா அஹேஸும், பண்டி³தஸகுணோ பன அஹமேவ அஹோஸி’’ந்தி.

ஸகுணஜாதகவண்ணனா ச²ட்டா².

[37] 7. தித்திரஜாதகவண்ணனா

யே வுட்³ட⁴மபசாயந்தீதி இத³ம் ஸத்தா² ஸாவத்தி²ம் க³ச்ச²ந்தோ ஸாரிபுத்தத்தே²ரஸ்ஸ ஸேனாஸனபடிபா³ஹனம் ஆரப்³ப⁴ கதே²ஸி. அனாத²பிண்டி³கேன ஹி விஹாரம் காரேத்வா தூ³தே பேஸிதே ஸத்தா² ராஜக³ஹா நிக்க²ம்ம வேஸாலிம் பத்வா தத்த² யதா²பி⁴ரந்தம் விஹரித்வா ‘‘ஸாவத்தி²ம் க³மிஸ்ஸாமீ’’தி மக்³க³ம் படிபஜ்ஜி. தேன ச ஸமயேன ச²ப்³ப³க்³கி³யானம் அந்தேவாஸிகா புரதோ புரதோ க³ந்த்வா தே²ரானம் ஸேனாஸனேஸு அக்³க³ஹிதேஸ்வேவ ‘‘இத³ம் ஸேனாஸனம் அம்ஹாகம் உபஜ்ஜா²யஸ்ஸ, இத³ம் ஆசரியஸ்ஸ, இத³ம் அம்ஹாகமேவ ப⁴விஸ்ஸதீ’’தி ஸேனாஸனானி பலிபு³ந்தே⁴ந்தி. பச்சா² ஆக³தா தே²ரா ஸேனாஸனானி ந லப⁴ந்தி. ஸாரிபுத்தத்தே²ரஸ்ஸாபி அந்தேவாஸிகா தே²ரஸ்ஸ ஸேனாஸனம் பரியேஸந்தா ந லபி⁴ம்ஸு. தே²ரோ ஸேனாஸனம் அலப⁴ந்தோ ஸத்து² ஸேனாஸனஸ்ஸ அவிதூ³ரே ஏகஸ்மிம் ருக்க²மூலே நிஸஜ்ஜாய ச சங்கமேன ச ரத்திம் வீதினாமேஸி. ஸத்தா² பச்சூஸஸமயே நிக்க²மித்வா உக்காஸி, தே²ரோபி உக்காஸி. ‘‘கோ ஏஸோ’’தி? ‘‘அஹம், ப⁴ந்தே, ஸாரிபுத்தோ’’தி. ‘‘ஸாரிபுத்த, இமாய வேலாய இத⁴ கிம் கரோஸீ’’தி? ‘‘ஸோ தம் பவத்திம் ஆரோசேஸி’’. ஸத்தா² தே²ரஸ்ஸ வசனம் ஸுத்வா ‘‘இதா³னி தாவ மயி ஜீவந்தேயேவ பி⁴க்கூ² அஞ்ஞமஞ்ஞம் அகா³ரவா அபதிஸ்ஸா விஹரந்தி, பரினிப்³பு³தே கிம் நு கோ² கரிஸ்ஸந்தீ’’தி ஆவஜ்ஜேந்தஸ்ஸ த⁴ம்மஸம்வேகோ³ உத³பாதி³.

ஸோ பபா⁴தாய ரத்தியா பி⁴க்கு²ஸங்க⁴ம் ஸன்னிபாதாபேத்வா பி⁴க்கூ² புச்சி² ‘‘ஸச்சம் கிர, பி⁴க்க²வே, ச²ப்³ப³க்³கி³யா பி⁴க்கூ² புரதோ புரதோ க³ந்த்வா தே²ரானம் பி⁴க்கூ²னம் ஸேனாஸனம் படிபா³ஹந்தீ’’தி. ‘‘ஸச்சம், ப⁴க³வா’’தி? ததோ ச²ப்³ப³க்³கி³யே க³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி ‘‘கோ நு கோ², பி⁴க்க²வே, அக்³கா³ஸனம் அக்³கோ³த³கம் அக்³க³பிண்ட³ம் அரஹதீ’’தி? ஏகச்சே ‘‘க²த்தியகுலா பப்³ப³ஜிதோ’’தி ஆஹம்ஸு, ஏகச்சே ‘‘ப்³ராஹ்மணகுலா, க³ஹபதிகுலா பப்³ப³ஜிதோ’’தி, அபரே ‘‘வினயத⁴ரோ, த⁴ம்மகதி²கோ, பட²மஸ்ஸ ஜா²னஸ்ஸ லாபீ⁴, து³தியஸ்ஸ, ததியஸ்ஸ, சதுத்த²ஸ்ஸ ஜா²னஸ்ஸ லாபீ⁴’’தி. அபரே ‘‘ஸோதாபன்னோ, ஸகதா³கா³மீ, அனாகா³மீ, அரஹா, தேவிஜ்ஜோ, ச²ளபி⁴ஞ்ஞோ’’தி ஆஹம்ஸு. ஏவம் தேஹி பி⁴க்கூ²ஹி அத்தனோ அத்தனோ ருசிவஸேன அக்³கா³ஸனாதி³ரஹானம் கதி²தகாலே ஸத்தா² ஆஹ – ‘‘ந, பி⁴க்க²வே, மய்ஹம் ஸாஸனே அக்³கா³ஸனாதீ³னி பத்வா க²த்தியகுலா பப்³ப³ஜிதோ பமாணம், ந ப்³ராஹ்மணகுலா பப்³ப³ஜிதோ, ந க³ஹபதிகுலா பப்³ப³ஜிதோ, ந வினயத⁴ரோ, ந ஸுத்தந்திகோ, ந ஆபி⁴த⁴ம்மிகோ, ந பட²மஜ்ஜா²னாதி³லாபி⁴னோ, ந ஸோதாபன்னாத³யோ பமாணம், அத² கோ², பி⁴க்க²வே, இமஸ்மிம் ஸாஸனே யதா²வுட்³ட⁴ம் அபி⁴வாத³னம் பச்சுட்டா²னம் அஞ்ஜலிகம்மம் ஸாமீசிகம்மம் காதப்³ப³ம், அக்³கா³ஸனம் அக்³கோ³த³கம் அக்³க³பிண்டோ³ லத்³த⁴ப்³போ³. இத³மேத்த² பமாணம். தஸ்மா வுட்³ட⁴தரோ பி⁴க்கு² ஏதேஸம் அனுச்ச²விகோ. இதா³னி கோ² பன, பி⁴க்க²வே, ஸாரிபுத்தோ மய்ஹம் அக்³க³ஸாவகோ அனுத⁴ம்மசக்கப்பவத்தகோ மமானந்தரம் ஸேனாஸனம் லத்³து⁴ம் அரஹதி, ஸோ இமம் ரத்திம் ஸேனாஸனம் அலப⁴ந்தோ ருக்க²மூலே வீதினாமேஸி, தும்ஹே இதா³னேவ ஏவம் அகா³ரவா அபதிஸ்ஸா, க³ச்ச²ந்தே க³ச்ச²ந்தே காலே கிந்தி கத்வா விஹரிஸ்ஸதா²’’தி. அத² நேஸம் ஓவாத³தா³னத்தா²ய ‘‘புப்³பே³, பி⁴க்க²வே, திரச்சா²னக³தாபி ‘ந கோ² பனேதம் அம்ஹாகம் பதிரூபம், யம் மயம் அஞ்ஞமஞ்ஞம் அகா³ரவா அபதிஸ்ஸா அஸபா⁴க³வுத்தினோ விஹரேய்யாம, அம்ஹேஸு மஹல்லகதரம் ஜானித்வா தஸ்ஸ அபி⁴வாத³னாதீ³னி கரிஸ்ஸாமா’தி ஸாது⁴கம் வீமம்ஸித்வா ‘அயம் நோ மஹல்லகோ’தி ஞத்வா தஸ்ஸ அபி⁴வாத³னாதீ³னி கத்வா தே³வபத²ம் பூரயமானா க³தா’’தி வத்வா அதீதம் ஆஹரி.

அதீதே ஹிமவந்தப்பதே³ஸே ஏகம் மஹானிக்³ரோத⁴ம் உபனிஸ்ஸாய தயோ ஸஹாயா விஹரிம்ஸு – தித்திரோ, மக்கடோ, ஹத்தீ²தி. தே அஞ்ஞமஞ்ஞம் அகா³ரவா அபதிஸ்ஸா அஸபா⁴க³வுத்தினோ அஹேஸும். அத² நேஸம் ஏதத³ஹோஸி ‘‘ந யுத்தம் அம்ஹாகம் ஏவம் விஹரிதும், யம்னூன மயம் யோ நோ மஹல்லகதரோ, தஸ்ஸ அபி⁴வாத³னாதீ³னி கரோந்தா விஹரேய்யாமா’’தி. ‘‘கோ பன நோ மஹல்லகதரோ’’தி சிந்தேந்தா ஏகதி³வஸம் ‘‘அத்தே²ஸோ உபாயோ’’தி தயோபி ஜனா நிக்³ரோத⁴மூலே நிஸீதி³த்வா தித்திரோ ச மக்கடோ ச ஹத்தி²ம் புச்சி²ம்ஸு ‘‘ஸம்ம ஹத்தி², த்வம் இமம் நிக்³ரோத⁴ருக்க²ம் கீவப்பமாணகாலதோ பட்டா²ய ஜானாஸீ’’தி? ஸோ ஆஹ ‘‘ஸம்மா, அஹம் தருணபோதககாலே இமம் நிக்³ரோத⁴க³ச்ச²ம் அந்தரஸத்தீ²ஸு கத்வா க³ச்சா²மி, அவத்த²ரித்வா டி²தகாலே ச பன மே ஏதஸ்ஸ அக்³க³ஸாகா² நாபி⁴ம் க⁴ட்டேதி, ஏவாஹம் இமம் க³ச்ச²காலதோ பட்டா²ய ஜானாமீ’’தி புன உபோ⁴பி ஜனா புரிமனயேனேவ மக்கடம் புச்சி²ம்ஸு. ஸோ ஆஹ ‘‘அஹம் ஸம்மா மக்கடச்சா²பகோ ஸமானோ பூ⁴மியம் நிஸீதி³த்வா கீ³வம் அனுக்கி²பித்வாவ இமஸ்ஸ நிக்³ரோத⁴போதகஸ்ஸ அக்³க³ங்குரே கா²தா³மி, ஏவாஹம் இமம் கு²த்³த³ககாலதோ பட்டா²ய ஜானாமீ’’தி. அத² இதரே உபோ⁴பி புரிமனயேனேவ தித்திரம் புச்சி²ம்ஸு. ஸோ ஆஹ ‘‘ஸம்மா, புப்³பே³ அஸுகஸ்மிம் நாம டா²னே மஹானிக்³ரோத⁴ருக்கோ² அஹோஸி, அஹம் தஸ்ஸ ப²லானி கா²தி³த்வா இமஸ்மிம் டா²னே வச்சம் பாதேஸிம், ததோ ஏஸ ருக்கோ² ஜாதோ, ஏவாஹம் இமம் அஜாதகாலதோ பட்டா²ய ஜானாமி, தஸ்மா அஹம் தும்ஹேஹி ஜாதியா மஹல்லகதரோ’’தி.

ஏவம் வுத்தே மக்கடோ ச ஹத்தீ² ச தித்திரபண்டி³தம் ஆஹம்ஸு ‘‘ஸம்ம, த்வம் அம்ஹேஹி மஹல்லகதரோ, இதோ பட்டா²ய மயம் தவ ஸக்காரக³ருகாரமானனவந்த³னபூஜனானி சேவ அபி⁴வாத³னபச்சுட்டா²னஅஞ்ஜலிகம்மஸாமீசிகம்மானி ச கரிஸ்ஸாம, ஓவாதே³ ச தே ட²ஸ்ஸாம, த்வம் பன இதோ பட்டா²ய அம்ஹாகம் ஓவாதா³னுஸாஸனிம் த³தே³ய்யாஸீ’’தி. ததோ பட்டா²ய தித்திரோ தேஸம் ஓவாத³ம் அதா³ஸி, ஸீலேஸு பதிட்டா²பேஸி, ஸயம்பி ஸீலானி ஸமாதி³யி. தே தயோபி ஜனா பஞ்சஸு ஸீலேஸு பதிட்டா²ய அஞ்ஞமஞ்ஞம் ஸகா³ரவா ஸப்பதிஸ்ஸா ஸபா⁴க³வுத்தினோ ஹுத்வா ஜீவிதபரியோஸானே தே³வலோகபராயணா அஹேஸும். தேஸம் திண்ணம் ஸமாதா³னம் தித்திரியம் ப்³ரஹ்மசரியம் நாம அஹோஸி.

தே ஹி நாம, பி⁴க்க²வே, திரச்சா²னக³தா அஞ்ஞமஞ்ஞம் ஸகா³ரவா ஸப்பதிஸ்ஸா விஹரிம்ஸு, தும்ஹே ஏவம் ஸ்வாகா²தே த⁴ம்மவினயே பப்³ப³ஜித்வா கஸ்மா அஞ்ஞமஞ்ஞம் அகா³ரவா அபதிஸ்ஸா விஹரத². அனுஜானாமி, பி⁴க்க²வே, இதோ பட்டா²ய தும்ஹாகம் யதா²வுட்³ட⁴ம் அபி⁴வாத³னம் பச்சுட்டா²னம் அஞ்ஜலிகம்மம் ஸாமீசிகம்மம், யதா²வுட்³ட⁴ம் அக்³கா³ஸனம் அக்³கோ³த³கம் அக்³க³பிண்ட³ம், ந இதோ பட்டா²ய ச நவகதரேன வுட்³ட⁴தரோ ஸேனாஸனேன படிபா³ஹிதப்³போ³, யோ படிபா³ஹேய்ய, ஆபத்திது³க்கடஸ்ஸாதி ஏவம் ஸத்தா² இமம் த⁴ம்மதே³ஸனம் ஆஹரித்வா அபி⁴ஸம்பு³த்³தோ⁴ ஹுத்வா இமம் கா³த²மாஹ –

37. ‘‘யே வுட்³ட⁴மபசாயந்தி, நரா த⁴ம்மஸ்ஸ கோவிதா³;

தி³ட்டே²வ த⁴ம்மே பாஸம்ஸா, ஸம்பராயே ச ஸுக்³க³தீ’’தி.

தத்த² யே வுட்³ட⁴மபசாயந்தீதி ஜாதிவுட்³டோ⁴, வயோவுட்³டோ⁴, கு³ணவுட்³டோ⁴தி தயோ வுட்³டா⁴. தேஸு ஜாதிஸம்பன்னோ ஜாதிவுட்³டோ⁴ நாம, வயே டி²தோ வயோவுட்³டோ⁴ நாம, கு³ணஸம்பன்னோ கு³ணவுட்³டோ⁴ நாம. தேஸு கு³ணஸம்பன்னோ வயோவுட்³டோ⁴ இமஸ்மிம் டா²னே ‘‘வுட்³டோ⁴’’தி அதி⁴ப்பேதோ. அபசாயந்தீதி ஜேட்டா²பசாயிககம்மேன பூஜேந்தி. த⁴ம்மஸ்ஸ கோவிதா³தி ஜேட்டா²பசாயனத⁴ம்மஸ்ஸ கோவிதா³ குஸலா. தி³ட்டே²வ த⁴ம்மேதி இமஸ்மிம்யேவ அத்தபா⁴வே. பாஸம்ஸாதி பஸம்ஸாரஹா. ஸம்பராயே ச ஸுக்³க³தீதி ஸம்பரேதப்³பே³ இமம் லோகம் ஹித்வா க³ந்தப்³பே³ பரலோகேபி தேஸம் ஸுக³தியேவ ஹோதீதி. அயம் பனேத்த² பிண்ட³த்தோ² – பி⁴க்க²வே, க²த்தியா வா ஹோந்து ப்³ராஹ்மணா வா வேஸ்ஸா வா ஸுத்³தா³ வா க³ஹட்டா² வா பப்³ப³ஜிதா வா திரச்சா²னக³தா வா, யே கேசி ஸத்தா ஜேட்டா²பசிதிகம்மே சே²கா குஸலா கு³ணஸம்பன்னானம் வயோவுட்³டா⁴னம் அபசிதிம் கரோந்தி, தே இமஸ்மிஞ்ச அத்தபா⁴வே ஜேட்டா²பசிதிகாரகாதி பஸம்ஸம் வண்ணனம் தோ²மனம் லப⁴ந்தி, காயஸ்ஸ ச பே⁴தா³ ஸக்³கே³ நிப்³ப³த்தந்தீதி.

ஏவம் ஸத்தா² ஜேட்டா²பசிதிகம்மஸ்ஸ கு³ணம் கதே²த்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ ஹத்தி²னாகோ³ மோக்³க³ல்லானோ அஹோஸி, மக்கடோ ஸாரிபுத்தோ, தித்திரபண்டி³தோ பன அஹமேவ அஹோஸி’’ந்தி.

தித்திரஜாதகவண்ணனா ஸத்தமா.

[38] 8. ப³கஜாதகவண்ணனா

நாச்சந்தம் நிகதிப்பஞ்ஞோதி இத³ம் ஸத்தா² ஜேதவனே விஹரந்தோ சீவரவட்³ட⁴கம் பி⁴க்கு² ஆரப்³ப⁴ கதே²ஸி. ஏகோ கிர ஜேதவனவாஸிகோ பி⁴க்கு² யம்கிஞ்சி சீவரே கத்தப்³ப³ம் சே²த³னக⁴ட்டனவிசாரணஸிப்³ப³னாதி³கம் கம்மம், தத்த² ஸுகுஸலோ. ஸோ தாய குஸலதாய சீவரம் வட்³டே⁴தி, தஸ்மா ‘‘சீவரவட்³ட⁴கோ’’ த்வேவ பஞ்ஞாயித்த². கிம் பனேஸ கரோதீதி? ஜிண்ணபிலோதிகாஸு ஹத்த²கம்மம் த³ஸ்ஸேத்வா ஸுப²ஸ்ஸிகம் மனாபம் சீவரம் கத்வா ரஜனபரியோஸானே பிட்டோ²த³கேன ரஜித்வா ஸங்கே²ன க⁴ம்ஸித்வா உஜ்ஜலம் மனுஞ்ஞம் கத்வா நிக்கி²பதி. சீவரகம்மம் காதும் அஜானந்தா பி⁴க்கூ² அஹதே ஸாடகே க³ஹேத்வா தஸ்ஸ ஸந்திகம் ஆக³ந்த்வா ‘‘மயம் சீவரம் காதும் ந ஜானாம, சீவரம் நோ கத்வா தே³தா²’’தி வத³ந்தி. ஸோ ‘‘சீவரம் ஆவுஸோ கரியமானம் சிரேன நிட்டா²தி, மயா கதசீவரமேவ அத்தி², இமே ஸாடகே ட²பேத்வா தம் க³ண்ஹித்வா க³ச்ச²தா²’’தி நீஹரித்வா த³ஸ்ஸேதி. தே தஸ்ஸ வண்ணஸம்பத்திமேவ தி³ஸ்வா அந்தரம் அஜானந்தா ‘‘தி²ர’’ந்தி ஸஞ்ஞாய அஹதஸாடகே சீவரவட்³ட⁴கஸ்ஸ த³த்வா தம் க³ண்ஹித்வா க³ச்ச²ந்தி. தம் தேஹி தோ²கம் கிலிட்ட²காலே உண்ஹோத³கேன தோ⁴வியமானம் அத்தனோ பகதிம் த³ஸ்ஸேதி, தத்த² தத்த² ஜிண்ணட்டா²னம் பஞ்ஞாயதி, தே விப்படிஸாரினோ ஹோந்தி. ஏவம் ஆக³தாக³தே பிலோதிகாஹி வஞ்சேந்தோ ஸோ பி⁴க்கு² ஸப்³ப³த்த² பாகடோ ஜாதோ.

யதா² சேஸ ஜேதவனே, ததா² அஞ்ஞதரஸ்மிம் கா³மகேபி ஏகோ சீவரவட்³ட⁴கோ லோகம் வஞ்சேதி. தஸ்ஸ ஸம்ப⁴த்தா பி⁴க்கூ² ‘‘ப⁴ந்தே, ஜேதவனே கிர ஏகோ சீவரவட்³ட⁴கோ ஏவம் லோகம் வஞ்சேதீ’’தி ஆரோசேஸும். அத²ஸ்ஸ ஏதத³ஹோஸி ‘‘ஹந்தா³ஹம், தம் நக³ரவாஸிகம் வஞ்சேமீ’’தி பிலோதிகசீவரம் அதிமனாபம் கத்வா ஸுரத்தம் ரஜித்வா தம் பாருபித்வா ஜேதவனம் அக³மாஸி. இதரோ தம் தி³ஸ்வாவ லோப⁴ம் உப்பாதே³த்வா ‘‘ப⁴ந்தே, இமம் சீவரம் தும்ஹேஹி கத’’ந்தி புச்சி². ‘‘ஆமாவுஸோ’’தி. ‘‘ப⁴ந்தே, இமம் சீவரம் மய்ஹம் தே³த², தும்ஹே அஞ்ஞம் லபி⁴ஸ்ஸதா²’’தி? ‘‘ஆவுஸோ, மயம் கா³மவாஸிகா து³ல்லப⁴பச்சயா, இமாஹம் துய்ஹம் த³த்வா அத்தனா கிம் பாருபிஸ்ஸாமீ’’தி? ‘‘ப⁴ந்தே, மம ஸந்திகே அஹதஸாடகா அத்தி², தே க³ஹேத்வா தும்ஹாகம் சீவரம் கரோதா²’’தி. ‘‘ஆவுஸோ, மயா ஏத்த² ஹத்த²கம்மம் த³ஸ்ஸிதம், தயி பன ஏவம் வத³ந்தே கிம் ஸக்கா காதும், க³ண்ஹாஹி ந’’ந்தி தஸ்ஸ பிலோதிகசீவரம் த³த்வா அஹதஸாடகே ஆதா³ய தம் வஞ்சேத்வா பக்காமி. ஜேதவனவாஸிகோபி தம் சீவரம் பாருபித்வா கதிபாஹச்சயேன உண்ஹோத³கேன தோ⁴வந்தோ ஜிண்ணபிலோதிகபா⁴வம் தி³ஸ்வா லஜ்ஜிதோ ‘‘கா³மவாஸிசீவரவட்³ட⁴கேன கிர ஜேதவனவாஸிகோ வஞ்சிதோ’’தி தஸ்ஸ வஞ்சிதபா⁴வோ ஸங்க⁴மஜ்ஜே² பாகடோ ஜாதோ.

அதே²கதி³வஸம் பி⁴க்கூ² த⁴ம்மஸபா⁴யம் தம் கத²ம் கதே²ந்தா நிஸீதி³ம்ஸு. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி². தே தமத்த²ம் ஆரோசேஸும். ஸத்தா² ‘‘ந, பி⁴க்க²வே, ஜேதவனவாஸீ சீவரவட்³ட⁴கோ இதா³னேவ அஞ்ஞே வஞ்சேதி, புப்³பே³பி வஞ்சேஸியேவ. ந கா³மவாஸிகேனாபி இதா³னேவ ஏஸ ஜேதவனவாஸீ சீவரவட்³ட⁴கோ வஞ்சிதோ, புப்³பே³பி வஞ்சிதோயேவா’’தி வத்வா அதீதம் ஆஹரி.

அதீதே ஏகஸ்மிம் அரஞ்ஞாயதனே போ³தி⁴ஸத்தோ அஞ்ஞதரம் பது³மஸரம் நிஸ்ஸாய டி²தே வரணருக்கே² ருக்க²தே³வதா ஹுத்வா நிப்³ப³த்தி. ததா³ அஞ்ஞதரஸ்மிம் நாதிமஹந்தே ஸரே நிதா³க⁴ஸமயே உத³கம் மந்த³ம் அஹோஸி, ப³ஹூ சேத்த² மச்சா² ஹோந்தி. அதே²கோ ப³கோ தே மச்சே² தி³ஸ்வா ‘‘ஏகேன உபாயேன இமே மச்சே² வஞ்சேத்வா கா²தி³ஸ்ஸாமீ’’தி க³ந்த்வா உத³கபரியந்தே சிந்தேந்தோ நிஸீதி³. அத² நம் மச்சா² தி³ஸ்வா ‘‘கிம், அய்ய, சிந்தேந்தோ நிஸின்னோஸீ’’தி புச்சி²ம்ஸு. ‘‘தும்ஹாகம் சிந்தேந்தோ நிஸின்னோம்ஹீ’’தி. ‘‘கிம் அம்ஹாகம் சிந்தேஸி, அய்யா’’தி? ‘‘‘இமஸ்மிம் ஸரே உத³கம் பரித்தம், கோ³சரோ மந்தோ³, நிதா³கோ⁴ ச மஹந்தோ, இதா³னிமே மச்சா² கிம் நாம கரிஸ்ஸந்தீ’தி தும்ஹாகம் சிந்தேந்தோ நிஸின்னோம்ஹீ’’தி. ‘‘அத² கிம் கரோம, அய்யா’’தி? ‘‘தும்ஹே ஸசே மய்ஹம் வசனம் கரேய்யாத², அஹம் வோ ஏகேகம் முக²துண்ட³கேன க³ஹேத்வா ஏகம் பஞ்சவண்ணபது³மஸஞ்ச²ன்னம் மஹாஸரம் நேத்வா விஸ்ஸஜ்ஜேய்ய’’ந்தி. ‘‘அய்ய, பட²மகப்பிகதோ பட்டா²ய மச்சா²னம் சிந்தனகப³கோ நாம நத்தி², த்வம் அம்ஹேஸு ஏகேகம் கா²தி³துகாமோஸீ’’தி. ‘‘நாஹம் தும்ஹே மய்ஹம் ஸத்³த³ஹந்தே கா²தி³ஸ்ஸாமி’’. ‘‘ஸசே பன ஸரஸ்ஸ அத்தி²பா⁴வம் மய்ஹம் ந ஸத்³த³ஹத², ஏகம் மச்ச²ம் மயா ஸத்³தி⁴ம் ஸரம் பஸ்ஸிதும் பேஸேதா²’’தி. மச்சா² தஸ்ஸ ஸத்³த³ஹித்வா ‘‘அயம் ஜலேபி த²லேபி ஸமத்தோ²’’தி ஏகம் காளமஹாமச்ச²ம் அத³ம்ஸு ‘‘இமம் க³ஹேத்வா க³ச்ச²தா²’’தி. ஸோ தம் க³ஹேத்வா நேத்வா ஸரே விஸ்ஸஜ்ஜேத்வா ஸப்³ப³ம் ஸரம் த³ஸ்ஸேத்வா புன ஆனேத்வா தேஸம் மச்சா²னம் ஸந்திகே விஸ்ஸஜ்ஜேஸி. ஸோ தேஸம் மச்சா²னம் ஸரஸ்ஸ ஸம்பத்திம் வண்ணேஸி. தே தஸ்ஸ கத²ம் ஸுத்வா க³ந்துகாமா ஹுத்வா ‘‘ஸாது⁴, அய்ய, அம்ஹே க³ண்ஹித்வா க³ச்சா²ஹீ’’தி ஆஹம்ஸு.

ப³கோ பட²மம் தம் காளமஹாமச்ச²மேவ க³ஹேத்வா ஸரதீரம் நேத்வா ஸரம் த³ஸ்ஸேத்வா ஸரதீரே ஜாதே வரணருக்கே² நிலீயித்வா தம் விடபந்தரே பக்கி²பித்வா துண்டே³ன விஜ்ஜ²ந்தோ ஜீவிதக்க²யம் பாபேத்வா மம்ஸம் கா²தி³த்வா கண்டகே ருக்க²மூலே பாதேத்வா புன க³ந்த்வா ‘‘விஸ்ஸட்டோ², மே ஸோ மச்சோ², அஞ்ஞோ ஆக³ச்ச²தூ’’தி ஏதேனுபாயேன ஏகேகம் க³ஹேத்வா ஸப்³பே³ மச்சே² கா²தி³த்வா புன ஆக³தோ ஏகம் மச்ச²ம்பி நாத்³த³ஸ. ஏகோ பனேத்த² கக்கடகோ அவஸிட்டோ². ப³கோ தம்பி கா²தி³துகாமோ ஹுத்வா ‘‘போ⁴, கக்கடக, மயா ஸப்³பே³தே மச்சா² நேத்வா பது³மஸஞ்ச²ன்னே மஹாஸரே விஸ்ஸஜ்ஜிதா, ஏஹி தம்பி நேஸ்ஸாமீ’’தி. ‘‘மம் க³ஹேத்வா க³ச்ச²ந்தோ கத²ம் க³ண்ஹிஸ்ஸஸீ’’தி? ‘‘ட³ம்ஸித்வா க³ண்ஹிஸ்ஸாமீ’’தி. ‘‘த்வம் ஏவம் க³ஹேத்வா க³ச்ச²ந்தோ மம் பாதேஸ்ஸஸி, நாஹம் தயா ஸத்³தி⁴ம் க³மிஸ்ஸாமீ’’தி. ‘‘மா பா⁴யி, அஹம் தம் ஸுக்³க³ஹிதம் க³ஹேத்வா க³மிஸ்ஸாமீ’’தி. கக்கடகோ சிந்தேஸி ‘‘இமஸ்ஸ மச்சே² நேத்வா ஸரே விஸ்ஸஜ்ஜனம் நாம நத்தி². ஸசே பன மம் ஸரே விஸ்ஸஜ்ஜேஸ்ஸதி, இச்சேதம் குஸலம். நோ சே விஸ்ஸஜ்ஜேஸ்ஸதி, கீ³வமஸ்ஸ சி²ந்தி³த்வா ஜீவிதம் ஹரிஸ்ஸாமீ’’தி.

அத² நம் ஏவமாஹ ‘‘ஸம்ம ப³க, ந கோ² த்வம் ஸுக்³க³ஹிதம் க³ஹேதும் ஸக்கி²ஸ்ஸஸி, அம்ஹாகம் பன க³ஹணம் ஸுக்³க³ஹணம், ஸசாஹம் அளேஹி தவ கீ³வம் க³ஹேதும் லபி⁴ஸ்ஸாமி, தவ கீ³வம் ஸுக்³க³ஹிதம் கத்வா தயா ஸத்³தி⁴ம் க³மிஸ்ஸாமீ’’தி. ஸோ தம் ‘‘வஞ்சேதுகாமோ ஏஸ ம’’ந்தி அஜானந்தோ ‘‘ஸாதூ⁴’’தி ஸம்படிச்சி². கக்கடகோ அத்தனோ அளேஹி கம்மாரஸண்டா³ஸேன விய தஸ்ஸ கீ³வம் ஸுக்³க³ஹிதம் கத்வா ‘‘இதா³னி க³ச்சா²’’தி ஆஹ. ஸோ தம் நேத்வா ஸரம் த³ஸ்ஸேத்வா வரணருக்கா²பி⁴முகோ² பாயாஸி. கக்கடகோ ஆஹ ‘‘மாதுல, அயம் ஸரோ ஏத்தோ, த்வம் பன இதோ கிம் நேஸீ’’தி? ப³கோ ‘‘ந தே மாதுலோ அஹம், ந ப⁴கி³னிபுத்தோஸி வத மே த்வ’’ந்தி வத்வா ‘‘த்வம் ‘ஏஸ மம் உக்கி²பித்வா விசரந்தோ மய்ஹம் தா³ஸோ’தி ஸஞ்ஞம் கரோஸி மஞ்ஞே, பஸ்ஸேதம் வரணருக்க²ஸ்ஸ மூலே கண்டகராஸிம், யதா² மே தே ஸப்³பே³ மச்சா² கா²தி³தா, தம்பி ததே²வ கா²தி³ஸ்ஸாமீ’’தி ஆஹ. கக்கடகோ ‘‘ஏதே மச்சா² அத்தனோ பா³லதாய தயா கா²தி³தா, அஹம் பன தே மம் கா²தி³தும் ந த³ஸ்ஸாமி, தஞ்ஞேவ பன வினாஸம் பாபேஸ்ஸாமி. த்வஞ்ஹி பா³லதாய மயா வஞ்சிதபா⁴வம் ந ஜானாஸி, மரந்தா உபோ⁴பி மரிஸ்ஸாம, அஹம் தே ஸீஸம் சி²ந்தி³த்வா பூ⁴மியம் கி²பிஸ்ஸாமீ’’தி வத்வா கம்மாரஸண்டா³ஸேன விய அளேஹி தஸ்ஸ கீ³வம் நிப்பீளேஸி. ஸோ விவடேன முகே²ன அக்கீ²ஹி அஸ்ஸுனா பக்³க⁴ரந்தேன மரணப⁴யதஜ்ஜிதோ ‘‘ஸாமி, அஹம் தம் ந கா²தி³ஸ்ஸாமி, ஜீவிதம் மே தே³ஹீ’’தி ஆஹ. ‘‘யதி³ ஏவம் ஓதரித்வா மம் ஸரஸ்மிம் விஸ்ஸஜ்ஜேஹீ’’தி. ஸோ நிவத்தித்வா ஸரமேவ ஓதரித்வா கக்கடகம் ஸரபரியந்தே பங்கபிட்டே² ட²பேஸி, கக்கடகோ கத்தரிகாய குமுத³னாளம் கப்பேந்தோ விய தஸ்ஸ கீ³வம் கப்பேத்வா உத³கம் பாவிஸி.

தம் அச்ச²ரியம் தி³ஸ்வா வரணருக்கே² அதி⁴வத்தா² தே³வதா ஸாது⁴காரம் த³த³மானா வனம் உன்னாத³யமானா மது⁴ரஸ்ஸரேன இமம் கா³த²மாஹ –

38. ‘‘நாச்சந்தம் நிகதிப்பஞ்ஞோ, நிகத்யா ஸுக²மேத⁴தி;

ஆராதே⁴தி நிகதிப்பஞ்ஞோ, ப³கோ கக்கடகாமிவா’’தி.

தத்த² நாச்சந்தம் நிகதிப்பஞ்ஞோ, நிகத்யா ஸுக²மேத⁴தீதி நிகதி வுச்சதி வஞ்சனா, நிகதிப்பஞ்ஞோ வஞ்சனபஞ்ஞோ புக்³க³லோ தாய நிகத்யா நிகதியா வஞ்சனாய ந அச்சந்தம் ஸுக²மேத⁴தி, நிச்சகாலே ஸுக²ஸ்மிம்யேவ பதிட்டா²தும் ந ஸக்கோதி, ஏகம்ஸேன பன வினாஸம் பாபுணாதியேவாதி அத்தோ². ஆராதே⁴தீதி படிலப⁴தி. நிகதிப்பஞ்ஞோதி கேராடிகபா⁴வம் ஸிக்கி²தபஞ்ஞோ பாபபுக்³க³லோ அத்தனா கதஸ்ஸ பாபஸ்ஸ ப²லம் ஆராதே⁴தி படிலப⁴தி விந்த³தீதி அத்தோ². கத²ம்? ப³கோ கக்கடகாமிவ, யதா² ப³கோ கக்கடகா கீ³வச்சே²த³ம் பாபுணாதி, ஏவம் பாபபுக்³க³லோ அத்தனா கதபாபதோ தி³ட்ட²த⁴ம்மே வா ஸம்பராயே வா ப⁴யம் ஆராதே⁴தி படிலப⁴தீதி இமமத்த²ம் பகாஸேந்தோ மஹாஸத்தோ வனம் உன்னாதே³ந்தோ த⁴ம்மம் தே³ஸேஸி.

ஸத்தா² ‘‘ந, பி⁴க்க²வே, இதா³னேவ கா³மவாஸிசீவரவட்³ட⁴கேனேஸ வஞ்சிதோ, அதீதேபி வஞ்சிதோயேவா’’தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ ஸோ ப³கோ ஜேதவனவாஸீ சீவரவட்³ட⁴கோ அஹோஸி, கக்கடகோ கா³மவாஸீ சீவரவட்³ட⁴கோ, ருக்க²தே³வதா பன அஹமேவ அஹோஸி’’ந்தி.

ப³கஜாதகவண்ணனா அட்ட²மா.

[39] 9. நந்த³ஜாதகவண்ணனா

மஞ்ஞே ஸோவண்ணயோ ராஸீதி இத³ம் ஸத்தா² ஜேதவனே விஹரந்தோ ஸாரிபுத்தத்தே²ரஸ்ஸ ஸத்³தி⁴விஹாரிகம் ஆரப்³ப⁴ கதே²ஸி. ஸோ கிர பி⁴க்கு² ஸுப்³ப³சோ அஹோஸி வசனக்க²மோ, தே²ரஸ்ஸ மஹந்தேனுஸ்ஸாஹேன உபகாரம் கரோதி. அதே²கம் ஸமயம் தே²ரோ ஸத்தா²ரம் ஆபுச்சி²த்வா சாரிகம் சரந்தோ த³க்கி²ணாகி³ரிஜனபத³ம் அக³மாஸி. ஸோ பி⁴க்கு² தத்த² க³தகாலே மானத்த²த்³தோ⁴ ஹுத்வா தே²ரஸ்ஸ வசனம் ந கரோதி ‘‘ஆவுஸோ, இத³ம் நாம கரோஹீ’’தி வுத்தே பன தே²ரஸ்ஸ படிபக்கோ² ஹோதி. தே²ரோ தஸ்ஸ ஆஸயம் ந ஜானாதி. ஸோ தத்த² சாரிகம் சரித்வா புன ஜேதவனம் ஆக³தோ. ஸோ பி⁴க்கு² தே²ரஸ்ஸ ஜேதவனவிஹாரம் ஆக³தகாலதோ பட்டா²ய புன தாதி³ஸோவ ஜாதோ. தே²ரோ ததா²க³தஸ்ஸ ஆரோசேஸி ‘‘ப⁴ந்தே, மய்ஹம் ஏகோ ஸத்³தி⁴விஹாரிகோ ஏகஸ்மிம் டா²னே ஸதேன கீததா³ஸோ விய ஹோதி, ஏகஸ்மிம் டா²னே மானத்த²த்³தோ⁴ ஹுத்வா ‘இத³ம் நாம கரோஹீ’தி வுத்தே படிபக்கோ² ஹோதீ’’தி. ஸத்தா² ‘‘நாயம், ஸாரிபுத்த, பி⁴க்கு² இதா³னேவ ஏவம்ஸீலோ, புப்³பே³பேஸ ஏகம் டா²னம் க³தோ ஸதேன கீததா³ஸோ விய ஹோதி. ஏகம் டா²னம் க³தோ படிபக்கோ² படிஸத்து ஹோதீ’’தி வத்வா தே²ரேன யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஏகஸ்மிம் குடும்பி³யகுலே படிஸந்தி⁴ம் க³ண்ஹி. தஸ்ஸேகோ ஸஹாயகோ குடும்பி³கோ ஸயம் மஹல்லகோ, ப⁴ரியா பனஸ்ஸ தருணீ. ஸா தம் நிஸ்ஸாய புத்தம் படிலபி⁴. ஸோ சிந்தேஸி ‘‘அயம் இத்தீ² தருணத்தா மமச்சயேன கஞ்சிதே³வ புரிஸம் க³ஹேத்வா இமம் த⁴னம் வினாஸேய்ய, புத்தஸ்ஸ மே ந த³தே³ய்ய, யம்னூனாஹம் இமம் த⁴னம் பத²விக³தம் கரேய்ய’’ந்தி க⁴ரே நந்த³ம் நாம தா³ஸம் க³ஹேத்வா அரஞ்ஞம் க³ந்த்வா ஏகஸ்மிம் டா²னே தம் த⁴னம் நித³ஹித்வா தஸ்ஸ ஆசிக்கி²த்வா ‘‘தாத, நந்த³, இமம் த⁴னம் மமச்சயேன மய்ஹம் புத்தஸ்ஸ ஆசிக்கே²ய்யாஸி, மா ச நம் பரிச்சஜஸீ’’தி ஓவதி³த்வா காலமகாஸி.

புத்தோபிஸ்ஸ அனுக்கமேன வயப்பத்தோ ஜாதோ. அத² நம் மாதா ஆஹ – ‘‘தாத, தவ பிதா நந்த³ம் தா³ஸம் க³ஹேத்வா த⁴னம் நிதே⁴ஸி, தம் ஆஹராபேத்வா குடும்ப³ம் ஸண்ட²பேஹீ’’தி. ஸோ ஏகதி³வஸம் நந்த³ம் ஆஹ – ‘‘மாதுல, அத்தி² கிஞ்சி மய்ஹம் பிதரா த⁴னம் நித³ஹித’’ந்தி. ‘‘ஆம, ஸாமீ’’தி. ‘‘குஹிம் தம் நித³ஹித’’ந்தி. ‘‘அரஞ்ஞே, ஸாமீ’’தி. ‘‘தேன ஹி க³ச்சா²மா’’தி குத்³தா³லபிடகம் ஆதா³ய நிதி⁴ட்டா²னம் க³ந்த்வா ‘‘கஹம் மாதுல, த⁴ன’’ந்தி ஆஹ. நந்தோ³ ஆருய்ஹ த⁴னமத்த²கே ட²த்வா த⁴னம் நிஸ்ஸாய மானம் உப்பாதே³த்வா ‘‘அரே தா³ஸிபுத்த சேடக, குதோ தே இமஸ்மிம் டா²னே த⁴ன’’ந்தி குமாரம் அக்கோஸதி. குமாரோ தஸ்ஸ ப²ருஸவசனம் ஸுத்வா அஸுணந்தோ விய ‘‘தேன ஹி க³ச்சா²மா’’தி தம் க³ஹேத்வா படினிவத்தித்வா புன த்³வே தயோ தி³வஸே அதிக்கமித்வா அக³மாஸி, நந்தோ³ ததே²வ அக்கோஸதி. குமாரோ தேன ஸத்³தி⁴ம் ப²ருஸவசனம் அவத்வாவ நிவத்தித்வா ‘‘அயம் தா³ஸோ இதோ பட்டா²ய ‘த⁴னம் ஆசிக்கி²ஸ்ஸாமீ’தி க³ச்ச²தி, க³ந்த்வா பன மம் அக்கோஸதி, தத்த² காரணம் ந ஜானாமி, அத்தி² கோ² பன மே பிது ஸஹாயோ குடும்பி³கோ, தம் படிபுச்சி²த்வா ஜானிஸ்ஸாமீ’’தி போ³தி⁴ஸத்தஸ்ஸ ஸந்திகம் க³ந்த்வா ஸப்³ப³ம் தம் பவத்திம் ஆரோசேத்வா ‘‘கிம் நு கோ², தாத, காரண’’ந்தி புச்சி².

போ³தி⁴ஸத்தோ ‘‘யஸ்மிம் தே, தாத, டா²னே டி²தோ நந்தோ³ அக்கோஸதி, தத்தே²வ தே பிது ஸந்தகம் த⁴னம், தஸ்மா யதா³ தே நந்தோ³ அக்கோஸதி, ததா³ நம் ‘ஏஹி ரே தா³ஸ, கிம் அக்கோஸஸீ’தி ஆகட்³டி⁴த்வா தம் டா²னம் பி⁴ந்தி³த்வா குலஸந்தகம் த⁴னம் நீஹரித்வா தா³ஸம் உக்கி²பாபேத்வா த⁴னம் ஆஹரா’’தி வத்வா இமம் கா³த²மாஹ –

39. ‘‘மஞ்ஞே ஸோவண்ணயோ ராஸி, ஸோவண்ணமாலா ச நந்த³கோ;

யத்த² தா³ஸோ ஆமஜாதோ, டி²தோ து²ல்லானி க³ஜ்ஜதீ’’தி.

தத்த² மஞ்ஞேதி ஏவம் அஹம் ஜானாமி. ஸோவண்ணயோதி ஸுந்த³ரோ வண்ணோ ஏதேஸந்தி ஸோவண்ணானி. கானி தானி? ரஜதமணிகஞ்சனபவாளாதீ³னி ரதனானி. இமஸ்மிஞ்ஹி டா²னே ஸப்³பா³னேதானி ‘‘ஸுவண்ணானீ’’தி அதி⁴ப்பேதானி, தேஸம் ராஸி ஸோவண்ணயோ ராஸி. ஸோவண்ணமாலா சாதி துய்ஹம் பிதுஸந்தகா ஸுவண்ணமாலா ச ஏத்தே²வாதி மஞ்ஞாமி. நந்த³கோ யத்த² தா³ஸோதி யஸ்மிம் டா²னே டி²தோ நந்த³கோ தா³ஸோ. ஆமஜாதோதி ‘‘ஆம, அஹம் வோ தா³ஸீ’’தி ஏவம் தா³ஸப்³யம் உபக³தாய ஆமதா³ஸிஸங்கா²தாய தா³ஸியா புத்தோ. டி²தோ து²ல்லானி க³ஜ்ஜதீதி ‘‘ஸோ யஸ்மிம் டா²னே டி²தோ து²ல்லானி ப²ருஸவசனானி வத³தி, தத்தே²வ தே குலஸந்தகம் த⁴னம், ஏவம் அஹம் தம் மஞ்ஞாமீ’’தி போ³தி⁴ஸத்தோ குமாரஸ்ஸ த⁴னக்³க³ஹணூபாயம் ஆசிக்கி².

குமாரோ போ³தி⁴ஸத்தம் வந்தி³த்வா க⁴ரம் க³ந்த்வா நந்த³ம் ஆதா³ய நிதி⁴ட்டா²னம் க³ந்த்வா யதா²னுஸிட்ட²ம் படிபஜ்ஜித்வா தம் த⁴னம் ஆஹரித்வா குடும்ப³ம் ஸண்ட²பேத்வா போ³தி⁴ஸத்தஸ்ஸ ஓவாதே³ டி²தோ தா³னாதீ³னி புஞ்ஞானி கத்வா ஜீவிதபரியோஸானே யதா²கம்மம் க³தோ.

ஸத்தா² ‘‘புப்³பே³பேஸ ஏவம்ஸீலோயேவா’’தி வத்வா இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி – ‘‘ததா³ நந்தோ³ ஸாரிபுத்தஸ்ஸ ஸத்³தி⁴விஹாரிகோ அஹோஸி, பண்டி³தகுடும்பி³கோ பன அஹமேவ அஹோஸி’’ந்தி.

நந்த³ஜாதகவண்ணனா நவமா.

[40] 10. க²தி³ரங்கா³ரஜாதகவண்ணனா

காமம் பதாமி நிரயந்தி இத³ம் ஸத்தா² ஜேதவனே விஹரந்தோ அனாத²பிண்டி³கம் ஆரப்³ப⁴ கதே²ஸி. அனாத²பிண்டி³கோ ஹி விஹாரமேவ ஆரப்³ப⁴ சதுபஞ்ஞாஸகோடித⁴னம் பு³த்³த⁴ஸாஸனே பரிச்சஜித்வா விகிரித்வா ட²பேத்வா தீணி ரதனானி அஞ்ஞத்த² ரதனஸஞ்ஞமேவ அனுப்பாதே³த்வா ஸத்த²ரி ஜேதவனே விஹரந்தே தே³வஸிகம் தீணி மஹாஉபட்டா²னானி க³ச்ச²தி. பாதோவ ஏகவாரம் க³ச்ச²தி, கதபாதராஸோ ஏகவாரம், ஸாயன்ஹே ஏகவாரம். அஞ்ஞானிபி அந்தரந்தருபட்டா²னானி ஹோந்தியேவ. க³ச்ச²ந்தோ ச ‘‘கிம் நு கோ² ஆதா³ய ஆக³தோதி ஸாமணேரா வா த³ஹரா வா ஹத்த²ம்பி மே ஓலோகேய்யு’’ந்தி துச்ச²ஹத்தோ² நாம ந க³தபுப்³போ³. பாதோவ க³ச்ச²ந்தோ யாகு³ம் கா³ஹாபேத்வா க³ச்ச²தி, கதபாதராஸோ ஸப்பினவனீதமது⁴பா²ணிதாதீ³னிபி, ஸாயன்ஹஸமயே க³ந்த⁴மாலாவத்தா²தி³ஹத்தோ²தி. ஏவம் தி³வஸே தி³வஸே பரிச்சஜந்தஸ்ஸ பனஸ்ஸ பரிச்சாகே³ பமாணம் நத்தி².

ப³ஹூ வோஹாரூபஜீவினோபிஸ்ஸ ஹத்த²தோ பண்ணே ஆரோபேத்வா அட்டா²ரஸகோடிஸங்க்²யம் த⁴னம் இணம் க³ண்ஹிம்ஸு, தே மஹாஸேட்டி² ந ஆஹராபேதி. அஞ்ஞா பனஸ்ஸ குலஸந்தகா அட்டா²ரஸ கோடியோ நதீ³தீரே நித³ஹித்வா ட²பிதா அசிரவதோத³கேன நதீ³கூலே பி⁴ன்னே மஹாஸமுத்³த³ம் பவிட்டா², தா யதா²பிஹிதலஞ்சி² தாவ லோஹசாடியோ அண்ட³வகுச்சி²யம் பவட்டந்தா விசரந்தி. கே³ஹே பனஸ்ஸ பஞ்சன்னம் பி⁴க்கு²ஸதானம் நிச்சப⁴த்தம் நிப³த்³த⁴மேவ ஹோதி. ஸேட்டி²னோ ஹி கே³ஹம் பி⁴க்கு²ஸங்க⁴ஸ்ஸ சதுமஹாபதே² க²தபோக்க²ரணிஸதி³ஸம், ஸப்³ப³பி⁴க்கூ²னம் மாதாபிதுட்டா²னே டி²தம். தேனஸ்ஸ க⁴ரம் ஸம்மாஸம்பு³த்³தோ⁴பி க³ச்ச²தி, அஸீதிமஹாதே²ராபி க³ச்ச²ந்தியேவ. ஸேஸபி⁴க்கூ²னம் பன க³ச்ச²ந்தானஞ்ச ஆக³ச்ச²ந்தானஞ்ச பமாணம் நத்தி². தம் பன க⁴ரம் ஸத்தபூ⁴மகம் ஸத்தத்³வாரகோட்ட²கபடிமண்டி³தம், தஸ்ஸ சதுத்தே² த்³வாரகோட்ட²கே ஏகா மிச்சா²தி³ட்டி²கா தே³வதா வஸதி, ஸா ஸம்மாஸம்பு³த்³தே⁴ கே³ஹம் பவிஸந்தே அத்தனோ விமானே டா²தும் ந ஸக்கோதி, தா³ரகே க³ஹேத்வா ஓதரித்வா பூ⁴மியம் திட்ட²தி. அஸீதிமஹாதே²ரேஸுபி அவஸேஸத்தே²ரேஸுபி பவிஸந்தேஸு ச நிக்க²மந்தேஸு ச ததே²வ கரோதி. ஸா சிந்தேஸி ‘‘ஸமணே கோ³தமே ச ஸாவகேஸு சஸ்ஸ இமம் கே³ஹம் பவிஸந்தேஸு மய்ஹம் ஸுக²ம் நாம நத்தி², நிச்சகாலம் ஓதரித்வா ஓதரித்வா பூ⁴மியம் டா²தும் ந ஸக்கி²ஸ்ஸாமி. யதா² இமே ஏதம் க⁴ரம் ந பவிஸந்தி, ததா² மயா காதும் வட்டதீ’’தி. அதே²கதி³வஸம் ஸயனூபக³தஸ்ஸேவ மஹாகம்மந்திகஸ்ஸ ஸந்திகம் க³ந்த்வா ஓபா⁴ஸம் ப²ரித்வா அட்டா²ஸி. ‘‘கோ ஏத்தா²’’தி ச வுத்தே ‘‘அஹம் சதுத்த²த்³வாரகோட்ட²கே நிப்³ப³த்ததே³வதா’’தி ஆஹ. ‘‘கஸ்மா ஆக³தாஸீ’’தி? ‘‘கிம் தும்ஹே ஸேட்டி²ஸ்ஸ கிரியம் ந பஸ்ஸத², அத்தனோ பச்சி²மகாலம் அனோலோகேத்வா த⁴னம் நீஹரித்வா ஸமணம் கோ³தமம்யேவ பூஜேதி, நேவ வணிஜ்ஜம் பயோஜேதி, ந கம்மந்தே பட்ட²பேதி, தும்ஹே ஸேட்டி²ம் ததா² ஓவத³த², யதா² அத்தனோ கம்மந்தம் கரோதி. யதா² ச ஸமணோ கோ³தமோ ஸஸாவகோ இமம் க⁴ரம் ந பவிஸதி, ததா² கரோதா²’’தி. அத² நம் ஸோ ஆஹ ‘‘பா³லதே³வதே, ஸேட்டி² த⁴னம் விஸ்ஸஜ்ஜேந்தோ நிய்யானிகே பு³த்³த⁴ஸாஸனே விஸ்ஸஜ்ஜேதி, ஸோ ஸசே மம் சூளாயம் க³ஹேத்வா விக்கிணிஸ்ஸதி, நேவாஹம் கிஞ்சி கதே²ஸ்ஸாமி, க³ச்ச² த்வம்’’ந்தி. ஸா புனேகதி³வஸம் ஸேட்டி²னோ ஜேட்ட²புத்தம் உபஸங்கமித்வா ததே²வ ஓவதி³, ஸோபி தம் புரிமனயேனேவ தஜ்ஜேஸி. ஸேட்டி²னா பன ஸத்³தி⁴ம் கதே²தும்யேவ ந ஸக்கோதி.

ஸேட்டி²னோபி நிரந்தரம் தா³னம் தே³ந்தஸ்ஸ வோஹாரே அகரோந்தஸ்ஸ ஆயே மந்தீ³பூ⁴தே த⁴னம் பரிக்க²யம் அக³மாஸி. அத²ஸ்ஸ அனுக்கமேன தா³லித்³தி³யப்பத்தஸ்ஸ பரிபோ⁴க³ஸாடகஸயனபோ⁴ஜனானிபி புராணஸதி³ஸானி ந ப⁴விம்ஸு. ஏவம்பூ⁴தோபி பி⁴க்கு²ஸங்க⁴ஸ்ஸ தா³னம் தே³தி, பணீதம் பன கத்வா தா³தும் ந ஸக்கோதி. அத² நம் ஏகதி³வஸம் வந்தி³த்வா நிஸின்னம் ஸத்தா² ‘‘தீ³யதி பன தே, க³ஹபதி, குலே தா³ன’’ந்தி புச்சி². ஸோ ‘‘தீ³யதி, ப⁴ந்தே, தஞ்ச கோ² கணாஜகம் பி³லங்க³து³திய’’ந்தி ஆஹ. அத² நம் ஸத்தா² ‘‘க³ஹபதி, ‘லூக²ம் தா³னம் தே³மீ’தி மா சித்தம் ஸங்கோசயித்த². சித்தஸ்மிஞ்ஹி பணீதே பு³த்³த⁴பச்சேகபு³த்³த⁴பு³த்³த⁴ஸாவகானம் தி³ன்னதா³னம் லூக²ம் நாம ந ஹோதி. கஸ்மா? விபாகமஹந்தத்தா’’தி ஆஹ. சித்தஞ்ஹி பணீதம் காதும் ஸக்கோந்தஸ்ஸ தா³னம் லூக²ம் நாம நத்தீ²தி சேதம் ஏவம் வேதி³தப்³ப³ம் –

‘‘நத்தி² சித்தே பஸன்னம்ஹி, அப்பகா நாம த³க்கி²ணா;

ததா²க³தே வா ஸம்பு³த்³தே⁴, அத² வா தஸ்ஸ ஸாவகே. (வி. வ. 804);

‘‘ந கிரத்தி² அனோமத³ஸ்ஸிஸு, பாரிசரியா பு³த்³தே⁴ஸு அப்பகா;

ஸுக்கா²ய அலோணிகாய ச, பஸ்ஸ ப²லம் கும்மாஸபிண்டி³யா’’தி.

அபரம்பி நம் ஆஹ ‘‘க³ஹபதி, த்வம் தாவ லூக²ம் தா³னம் த³த³மானோ அட்ட²ன்னம் அரியபுக்³க³லானம் தே³ஸி, அஹம் வேலாமகாலே ஸகலஜம்பு³தீ³பம் உன்னங்க³லம் கத்வா ஸத்த ரதனானி த³த³மானோ பஞ்ச மஹானதி³யோ ஏகோக⁴புண்ணம் கத்வா விய ச மஹாதா³னம் பவத்தயமானோ திஸரணக³தம் வா பஞ்சஸீலரக்க²னகம் வா கஞ்சி நாலத்த²ம், த³க்கி²ணேய்யபுக்³க³லா நாம ஏவம் து³ல்லபா⁴. தஸ்மா ‘லூக²ம் மே தா³ன’ந்தி மா சித்தம் ஸங்கோசயித்தா²’’தி ஏவஞ்ச பன வத்வா வேலாமஸுத்தம் (அ. நி. 9.20) கதே²ஸி.

அத² கோ² ஸா தே³வதா இஸ்ஸரகாலே ஸேட்டி²னா ஸத்³தி⁴ம் கதே²தும்பி அஸக்கோந்தீ ‘‘இதா³னாயம் து³க்³க³தத்தா மம வசனம் க³ண்ஹிஸ்ஸதீ’’தி மஞ்ஞமானா அட்³ட⁴ரத்தஸமயே ஸிரிக³ப்³ப⁴ம் பவிஸித்வா ஓபா⁴ஸம் ப²ரித்வா ஆகாஸே அட்டா²ஸி. ஸேட்டி² தம் தி³ஸ்வா ‘‘கோ ஏஸோ’’தி ஆஹ. ‘‘அஹம் மஹாஸேட்டி² சதுத்த²த்³வாரகோட்ட²கே அதி⁴வத்தா², தே³வதா’’தி. ‘‘கிமத்த²மாக³தாஸீ’’தி? ‘‘துய்ஹம் ஓவாத³ம் கதே²துகாமா ஹுத்வா ஆக³ச்சா²மீ’’தி. ‘‘தேன ஹி கதே²ஹீ’’தி. மஹாஸேட்டி² த்வம் பச்சி²மகாலம் ந சிந்தேஸி, புத்ததீ⁴தரோ ந ஓலோகேஸி, ஸமணஸ்ஸ தே கோ³தமஸ்ஸ ஸாஸனே ப³ஹும் த⁴னம் விப்பகிண்ணம், ஸோ த்வம் அதிவேலம் த⁴னவிஸ்ஸஜ்ஜனேன வா வணிஜ்ஜாதி³கம்மானம் அகரணேன வா ஸமணம் கோ³தமம் நிஸ்ஸாய து³க்³க³தோ ஜாதோ, ஏவம்பூ⁴தோபி ஸமணம் கோ³தமம் ந முஞ்சஸி, அஜ்ஜபி தே ஸமணா க⁴ரம் பவிஸந்தியேவ. யம் தாவ தேஹி நீதம், தம் ந ஸக்கா பச்சாஹராபேதும், க³ஹிதம் க³ஹிதமேவ ஹோது, இதோ பட்டா²ய பன ஸயஞ்ச ஸமணஸ்ஸ கோ³தமஸ்ஸ ஸந்திகம் மா க³மித்த², ஸாவகானஞ்சஸ்ஸ இமம் க⁴ரம் பவிஸிதும் மா அதா³ஸி, ஸமணம் கோ³தமம் நிவத்தித்வாபி அனோலோகேந்தோ அத்தனோ வோஹாரே ச வணிஜ்ஜஞ்ச கத்வா குடும்ப³ம் ஸண்ட²பேஹீ’’தி. அத² நம் ஸோ ஏவமாஹ ‘‘அயம் தயா மய்ஹம் தா³தப்³ப³ஓவாதோ³’’தி. ‘‘ஆம, அய்யா’’தி. தாதி³ஸானம் தே³வதானம் ஸதேனபி ஸஹஸ்ஸேனபி ஸதஸஹஸ்ஸேனபி அகம்பனீயோ அஹம் த³ஸப³லேன கதோ. மம ஹி ஸத்³தா⁴ ஸினேரு விய அசலா ஸுப்பதிட்டி²தா, மயா நிய்யானிகே ரதனஸாஸனே த⁴னம் விஸ்ஸஜ்ஜிதம், அயுத்தம் தே கதி²தம், பு³த்³த⁴ஸாஸனே பஹாரோ தி³ன்னோ, ஏவரூபாய அனாசாராய து³ஸ்ஸீலாய காளகண்ணியா ஸத்³தி⁴ம் தயா மம ஏககே³ஹே வஸனகிச்சம் நத்தி², ஸீக⁴ம் மம கே³ஹா நிக்க²மித்வா அஞ்ஞத்த² க³ச்சா²தி.

ஸா ஸோதாபன்னஸ்ஸ அரியஸாவகஸ்ஸ வசனம் ஸுத்வா டா²தும் அஸக்கோந்தீ அத்தனோ வஸனட்டா²னம் க³ந்த்வா தா³ரகே ஹத்தே²ன க³ஹேத்வா நிக்க²மி. நிக்க²மித்வா ச பன அஞ்ஞத்த² வஸனட்டா²னம் அலப⁴மானா ‘‘ஸேட்டி²ம் க²மாபேத்வா தத்தே²வ வஸிஸ்ஸாமீ’’தி சிந்தேத்வா நக³ரபரிக்³கா³ஹகதே³வபுத்தஸ்ஸ ஸந்திகம் க³ந்த்வா தம் வந்தி³த்வா அட்டா²ஸி. ‘‘கேனட்டே²ன ஆக³தாஸீ’’தி ச வுத்தே ‘‘அஹம் ஸாமி, அத்தனோ பா³லதாய அனுபதா⁴ரேத்வா அனாத²பிண்டி³கேன ஸேட்டி²னா ஸத்³தி⁴ம் கதே²ஸிம், ஸோ மம் குஜ்ஜி²த்வா வஸனட்டா²னா நிக்கட்³டி⁴, மம் ஸேட்டி²ஸ்ஸ ஸந்திகம் நேத்வா க²மாபேத்வா வஸனட்டா²னம் மே தே³தா²’’தி. ‘‘கிம் பன தயா ஸேட்டி² வுத்தோ’’தி ‘‘இதோ பட்டா²ய பு³த்³து⁴பட்டா²னம் ஸங்கு⁴பட்டா²னம் மா கரி, ஸமணஸ்ஸ கோ³தமஸ்ஸ க⁴ரப்பவேஸனம் மா அதா³ஸீ’’தி ‘‘ஏவம் மே வுத்தோ, ஸாமீ’’தி. அயுத்தம் தயா வுத்தம், ஸாஸனே பஹாரோ தி³ன்னோ, ‘‘அஹம் தம் ஆதா³ய ஸேட்டி²னோ ஸந்திகம் க³ந்தும் ந உஸ்ஸஹாமீ’’தி. ஸா தஸ்ஸ ஸந்திகா ஸங்க³ஹம் அலபி⁴த்வா சதுன்னம் மஹாராஜானம் ஸந்திகம் அக³மாஸி.

தேஹிபி ததே²வ படிக்கி²த்தா ஸக்கம் தே³வராஜம் உபஸங்கமித்வா தம் பவத்திம் ஆசிக்கி²த்வா ‘‘அஹம், தே³வ, வஸனட்டா²னம் அலப⁴மானா தா³ரகே ஹத்தே²ன க³ஹேத்வா அனாதா² விசராமி, தும்ஹாகம் ஸிரியா மய்ஹம் வஸனட்டா²னம் தா³பேதா²’’தி ஸுட்டு²தரம் யாசி. ஸோபி நம் ஆஹ ‘‘தயா அயுத்தம் கதம், ஜினஸாஸனே பஹாரோ தி³ன்னோ, அஹம்பி தம் நிஸ்ஸாய ஸேட்டி²னா ஸத்³தி⁴ம் கதே²தும் ந ஸக்கோமி, ஏகம் பன தே ஸேட்டி²ஸ்ஸ க²மனூபாயம் கதே²ஸ்ஸாமீ’’தி. ‘‘ஸாது⁴, தே³வ, கதே²ஹீ’’தி. மஹாஸேட்டி²ஸ்ஸ ஹத்த²தோ மனுஸ்ஸேஹி பண்ணே ஆரோபேத்வா அட்டா²ரஸகோடிஸங்க்²யம் த⁴னம் க³ஹிதம் அத்தி², த்வம் தஸ்ஸ ஆயுத்தகவேஸம் க³ஹேத்வா கஞ்சி அஜானாபேத்வா தானி பண்ணானி ஆதா³ய கதிபயேஹி யக்க²தருணேஹி பரிவாரிதா ஏகேன ஹத்தே²ன பண்ணம், ஏகேன லேக²னிம் க³ஹேத்வா தேஸம் கே³ஹம் க³ந்த்வா கே³ஹமஜ்ஜே² டி²தா அத்தனோ யக்கா²னுபா⁴வேன தே உத்தாஸேத்வா ‘‘இத³ம் தும்ஹாகம் இணபண்ணம், அம்ஹாகம் ஸேட்டி² அத்தனோ இஸ்ஸரகாலே தும்ஹே ந கிஞ்சி ஆஹ, இதா³னி து³க்³க³தோ ஜாதோ, தும்ஹேஹி க³ஹிதகஹாபணானி தே³தா²’’தி அத்தனோ யக்கா²னுபா⁴வம் த³ஸ்ஸேத்வா ஸப்³பா³பி தா அட்டா²ரஸ ஹிரஞ்ஞகோடியோ ஸாதே⁴த்வா ஸேட்டி²ஸ்ஸ துச்ச²கோட்ட²கே பூரேத்வா அஞ்ஞம் அசிரவதினதீ³தீரே நித³ஹிதம் த⁴னம் நதீ³கூலே பி⁴ன்னே ஸமுத்³த³ம் பவிட்ட²ம் அத்தி², தம்பி அத்தனோ ஆனுபா⁴வேன ஆஹரித்வா துச்ச²கோட்ட²கே பூரேத்வா, அஞ்ஞம்பி அஸுகட்டா²னே நாம அஸ்ஸாமிகம் அட்டா²ரஸகோடிமத்தமேவ த⁴னம் அத்தி², தம்பி ஆஹரித்வா துச்ச²கோட்ட²கே பூரேஹி, இமாஹி சதுபஞ்ஞாஸகோடீஹி இமம் துச்ச²கோட்ட²கபூரகம் த³ண்ட³கம்மம் கத்வா மஹாஸேட்டி²ம் க²மாபேஹீதி.

ஸா ‘‘ஸாது⁴, தே³வா’’தி தஸ்ஸ வசனம் ஸம்படிச்சி²த்வா வுத்தனயேனேவ ஸப்³ப³ம் த⁴னம் ஆஹரித்வா கோட்ட²கே பூரேத்வா அட்³ட⁴ரத்தஸமயே ஸேட்டி²ஸ்ஸ ஸிரிக³ப்³ப⁴ம் பவிஸித்வா ஓபா⁴ஸம் ப²ரித்வா ஆகாஸே அட்டா²ஸி. ‘‘கோ ஏஸோ’’தி வுத்தே ‘‘அஹம் தே மஹாஸேட்டி² சதுத்த²த்³வாரகோட்ட²கே அதி⁴வத்தா² அந்த⁴பா³லதே³வதா, மயா மஹாமோஹமூள்ஹாய பு³த்³த⁴கு³ணே அஜானித்வா புரிமேஸு தி³வஸேஸு தும்ஹேஹி ஸத்³தி⁴ம் கிஞ்சி கதி²தம் அத்தி², தம் மே தோ³ஸம் க²மத². ஸக்கஸ்ஸ ஹி மே தே³வராஜஸ்ஸ வசனேன தும்ஹாகம் இணம் ஸோதே⁴த்வா அட்டா²ரஸ கோடியோ, ஸமுத்³த³ம் க³தா அட்டா²ரஸ கோடியோ, தஸ்மிம் தஸ்மிம் டா²னே அஸ்ஸாமிகத⁴னஸ்ஸ அட்டா²ரஸ கோடியோதி சதுபண்ணாஸ கோடியோ ஆஹரித்வா துச்ச²கோட்ட²கபூரணேன த³ண்ட³கம்மம் கதம், ஜேதவனவிஹாரம் ஆரப்³ப⁴ பரிக்க²யம் க³தத⁴னம் ஸப்³ப³ம் ஸம்பிண்டி³தம், வஸனட்டா²னம் அலப⁴மானா கிலமாமி, மயா அஞ்ஞாணதாய கதி²தம் மனஸி அகத்வா க²மத² மஹாஸேட்டீ²’’தி ஆஹ.

அனாத²பிண்டி³கோ தஸ்ஸா வசனம் ஸுத்வா சிந்தேஸி ‘‘அயம் தே³வதா ‘த³ண்ட³கம்மஞ்ச மே கத’ந்தி வத³தி, அத்தனோ ச தோ³ஸம் படிஜானாதி, ஸத்தா² இமம் வினேத்வா அத்தனோ கு³ணே ஜானாபேஸ்ஸதி, ஸம்மாஸம்பு³த்³த⁴ஸ்ஸ நம் த³ஸ்ஸேஸ்ஸாமீ’’தி. அத² நம் ஆஹ ‘‘அம்ம, தே³வதே, ஸசேஸி மம் க²மாபேதுகாமா, ஸத்து² ஸந்திகே மம் க²மாபேஹீ’’தி. ஸாது⁴ ஏவம் கரிஸ்ஸாமி, ‘‘ஸத்து² பன மம் ஸந்திகம் க³ஹேத்வா க³ச்சா²ஹீ’’தி. ஸோ ‘‘ஸாதூ⁴’’தி வத்வா விபா⁴தாய ரத்தியா பாதோவ தம் க³ஹேத்வா ஸத்து² ஸந்திகம் க³ந்த்வா தாய கதகம்மம் ஸப்³ப³ம் ததா²க³தஸ்ஸ ஆரோசேஸி. ஸத்தா² தஸ்ஸ வசனம் ஸுத்வா ‘‘இத⁴, க³ஹபதி, பாபபுக்³க³லோபி யாவ பாபம் ந பச்சதி, தாவ ப⁴த்³ரானி பஸ்ஸதி. யதா³ பனஸ்ஸ பாபம் பச்சதி, ததா³ பாபமேவ பஸ்ஸதி. ப⁴த்³ரபுக்³க³லோபி யாவ ப⁴த்³ரம் ந பச்சதி, தாவ பாபானி பஸ்ஸதி. யதா³ பனஸ்ஸ ப⁴த்³ரம் பச்சதி, ததா³ ப⁴த்³ரமேவ பஸ்ஸதீ’’தி வத்வா இமா த⁴ம்மபதே³ த்³வே கா³தா² அபா⁴ஸி –

‘‘பாபோபி பஸ்ஸதீ ப⁴த்³ரம், யாவ பாபம் ந பச்சதி;

யதா³ ச பச்சதீ பாபம், அத² பாபோ பாபானி பஸ்ஸதி.

‘‘ப⁴த்³ரோபி பஸ்ஸதீ பாபம், யாவ ப⁴த்³ரம் ந பச்சதி;

யதா³ ச பச்சதீ ப⁴த்³ரம், அத² ப⁴த்³ரோ ப⁴த்³ரானி பஸ்ஸதீ’’தி. (த⁴. ப. 119-120);

இமாஸஞ்ச பன கா³தா²னம் பரியோஸானே ஸா தே³வதா ஸோதாபத்திப²லே பதிட்டா²ஸி. ஸா சக்கங்கிதேஸு ஸத்து² பாதே³ஸு நிபதித்வா ‘‘மயா, ப⁴ந்தே, ராக³ரத்தாய தோ³ஸபது³ட்டா²ய மோஹமூள்ஹாய அவிஜ்ஜந்தா⁴ய தும்ஹாகம் கு³ணே அஜானந்தியா பாபகம் வசனம் வுத்தம், தம் மே க²மதா²’’தி ஸத்தா²ரம் க²மாபேத்வா மஹாஸேட்டி²ம்பி க²மாபேஸி.

தஸ்மிம் ஸமயே அனாத²பிண்டி³கோ ஸத்து² புரதோ அத்தனோ கு³ணம் கதே²ஸி ‘‘ப⁴ந்தே, அயம் தே³வதா ‘பு³த்³து⁴பட்டா²னாதீ³னி மா கரோஹீ’தி வாரயமானாபி மம் வாரேதும் நாஸக்கி², ‘தா³னம் ந தா³தப்³ப³’ந்தி இமாய வாரியமானோபஹம் தா³னம் அதா³ஸிமேவ, நூன ஏஸ, ப⁴ந்தே, மய்ஹம் கு³ணோ’’தி. ஸத்தா² ‘‘த்வம் கோ²ஸி க³ஹபதி ஸோதாபன்னோ அரியஸாவகோ அசலஸத்³தோ⁴ விஸுத்³த⁴த³ஸ்ஸனோ, துய்ஹம் இமாய அப்பேஸக்க²தே³வதாய வாரேந்தியா அவாரிதபா⁴வோ ந அச்ச²ரியோ. யம் பன புப்³பே³ பண்டி³தா அனுப்பன்னே பு³த்³தே⁴ அபரிபக்கஞாணே டி²தா காமாவசரிஸ்ஸரேன மாரேன ஆகாஸே ட²த்வா ‘ஸசே தா³னம் த³ஸ்ஸஸி, இமஸ்மிம் நிரயே பச்சிஸ்ஸஸீ’தி அஸீதிஹத்த²க³ம்பீ⁴ரம் அங்கா³ரகாஸும் த³ஸ்ஸேத்வா ‘மா தா³னம் அதா³ஸீ’தி வாரிதாபி பது³மகண்ணிகாமஜ்ஜே² ட²த்வா தா³னம் அத³ம்ஸு, இத³ம் அச்ச²ரிய’’ந்தி வத்வா அனாத²பிண்டி³கேன யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ பா³ராணஸிஸேட்டி²ஸ்ஸ குலே நிப்³ப³த்தித்வா நானப்பகாரேஹி ஸுகூ²பகரணேஹி தே³வகுமாரோ விய ஸம்வட்³டி⁴யமானோ அனுக்கமேன விஞ்ஞுதம் பத்வா ஸோளஸவஸ்ஸகாலேயேவ ஸப்³ப³ஸிப்பேஸு நிப்ப²த்திம் பத்தோ. ஸோ பிது அச்சயேன ஸேட்டி²ட்டா²னே ட²த்வா சதூஸு நக³ரத்³வாரேஸு சதஸ்ஸோ தா³னஸாலாயோ, மஜ்ஜே² நக³ரஸ்ஸ ஏகம், அத்தனோ நிவேஸனத்³வாரே ஏகந்தி ச² தா³னஸாலாயோ காரேத்வா மஹாதா³னம் தே³தி, ஸீலம் ரக்க²தி, உபோஸத²கம்மம் கரோதி.

அதே²கதி³வஸம் பாதராஸவேலாய போ³தி⁴ஸத்தஸ்ஸ நானக்³க³ரஸே மனுஞ்ஞபோ⁴ஜனே உபனீயமானே ஏகோ பச்சேகபு³த்³தோ⁴ ஸத்தாஹச்சயேன நிரோதா⁴ வுட்டா²ய பி⁴க்கா²சாரவேலம் ஸல்லக்கே²த்வா ‘‘அஜ்ஜ மயா பா³ராணஸிஸேட்டி²ஸ்ஸ கே³ஹத்³வாரம் க³ந்தும் வட்டதீ’’தி நாக³லதாத³ந்தகட்ட²ம் கா²தி³த்வா அனோதத்தத³ஹே முக²தோ⁴வனம் கத்வா மனோஸிலாதலே டி²தோ நிவாஸேத்வா விஜ்ஜுலதாஸதி³ஸம் காயப³ந்த⁴னம் ப³ந்தி⁴த்வா சீவரம் பாருபித்வா இத்³தி⁴மயமத்திகாபத்தம் ஆதா³ய ஆகாஸேனாக³ந்த்வா போ³தி⁴ஸத்தஸ்ஸ ப⁴த்தே உபனீதமத்தே கே³ஹத்³வாரே அட்டா²ஸி. போ³தி⁴ஸத்தோ தம் தி³ஸ்வாவ ஆஸனா வுட்டா²ய நிபச்சகாரம் த³ஸ்ஸேத்வா பரிகம்மகாரகம் ஓலோகேஸி. ‘‘கிம் கரோமி, ஸாமீ’’தி ச வுத்தே ‘‘அய்யஸ்ஸ பத்தம் ஆஹரதா²’’தி ஆஹ. தங்க²ணஞ்ஞேவ மாரோ பாபிமா விகம்பமானோ உட்டா²ய ‘‘அயம் பச்சேகபு³த்³தோ⁴ இதோ ஸத்தமே தி³வஸே ஆஹாரம் லபி⁴, அஜ்ஜ அலப⁴மானோ வினஸ்ஸிஸ்ஸதி, இமஞ்ச வினாஸேஸ்ஸாமி, ஸேட்டி²னோ ச தா³னந்தராயம் கரிஸ்ஸாமீ’’தி தங்க²ணஞ்ஞேவ ஆக³ந்த்வா அந்தரவத்து²ம்ஹி அஸீதிஹத்த²மத்தம் அங்கா³ரகாஸும் நிம்மினி. ஸா க²தி³ரங்கா³ரபுண்ணா ஸம்பஜ்ஜலிதா ஸஜோதிபூ⁴தா அவீசிமஹானிரயோ விய கா²யித்த². தம் பன மாபேத்வா ஸயம் ஆகாஸே அட்டா²ஸி. பத்தாஹரணத்தா²ய க³ச்ச²மானோ புரிஸோ தம் தி³ஸ்வா மஹாப⁴யப்பத்தோ நிவத்தி. போ³தி⁴ஸத்தோ ‘‘கிம், தாத, நிவத்தோஸீ’’தி புச்சி². அயம் ஸாமி அந்தரவத்து²ம்ஹி மஹதீ அங்கா³ரகாஸு ஸம்பஜ்ஜலிதா ஸஜோதிபூ⁴தாதி. அத²ஞ்ஞோ அத²ஞ்ஞோதி ஏவம் ஆக³தாக³தா ஸப்³பே³பி ப⁴யப்பத்தா வேகே³ன பலாயிம்ஸு.

போ³தி⁴ஸத்தோ சிந்தேஸி ‘‘அஜ்ஜ மய்ஹம் தா³னந்தராயம் காதுகாமோ வஸவத்தீ மாரோ உய்யுத்தோ ப⁴விஸ்ஸதி, ந கோ² பன ஜானாதி மாரஸதேன மாரஸஹஸ்ஸேனபி மய்ஹம் அகம்பியபா⁴வம், அஜ்ஜ தா³னி மய்ஹம் வா மாரஸ்ஸ வா ப³லமஹந்ததம், ஆனுபா⁴வமஹந்ததம் ஜானிஸ்ஸாமீ’’தி தம் யதா²ஸஜ்ஜிதமேவ ப⁴த்தபாதிம் ஸயம் ஆதா³ய கே³ஹா நிக்க²ம்ம அங்கா³ரகாஸுதடே ட²த்வா ஆகாஸம் உல்லோகேத்வா மாரம் தி³ஸ்வா ‘‘கோஸி த்வ’’ந்தி ஆஹ. ‘‘அஹம், மாரோ’’தி. ‘‘அயம் அங்கா³ரகாஸு தயா நிம்மிதா’’தி? ‘‘ஆம, மயா’’தி. ‘‘கிமத்தா²யா’’தி. ‘‘தவ தா³னஸ்ஸ அந்தராயகரணத்தா²ய ச பச்சேகபு³த்³த⁴ஸ்ஸ ச ஜீவிதனாஸனத்தா²யா’’தி. போ³தி⁴ஸத்தோ ‘‘நேவ தே அஹம் அத்தனோ தா³னஸ்ஸ அந்தராயம், ந பச்சேகபு³த்³த⁴ஸ்ஸ ஜீவிதந்தராயம் காதும் த³ஸ்ஸாமி, அஜ்ஜ தா³னி மய்ஹம் வா துய்ஹம் வா ப³லமஹந்ததம், ஆனுபா⁴வமஹந்ததம் ஜானிஸ்ஸாமீ’’தி அங்கா³ரகாஸுதடே ட²த்வா ‘‘ப⁴ந்தே, பச்சேகபு³த்³த⁴ அஹம் இமிஸ்ஸா அங்கா³ரகாஸுயா அதோ⁴ஸீஸோ பதமானோபி ந நிவத்திஸ்ஸாமி, கேவலம் தும்ஹே மயா தி³ன்னம் போ⁴ஜனம் படிக்³க³ண்ஹதா²’’தி வத்வா இமம் கா³த²மாஹ –

40. ‘‘காமம் பதாமி நிரயம், உத்³த⁴ம்பாதோ³ அவம்ஸிரோ;

நானரியம் கரிஸ்ஸாமி, ஹந்த³ பிண்ட³ம் படிக்³க³ஹா’’தி.

தத்தா²யம் பிண்ட³த்தோ² – ப⁴ந்தே, பச்சேகவரபு³த்³த⁴ ஸசேபஹம் தும்ஹாகம் பிண்ட³பாதம் தே³ந்தோ ஏகம்ஸேனேவ இமம் நிரயம் உத்³த⁴ம்பாதோ³ அவம்ஸிரோ ஹுத்வா பதாமி, ததா²பி யதி³த³ம் அதா³னஞ்ச அஸீலஞ்ச அரியேஹி அகத்தப்³ப³த்தா அனரியேஹி ச கத்தப்³ப³த்தா ‘‘அனரிய’’ந்தி வுச்சதி, ‘‘ந தம் அனரியம் கரிஸ்ஸாமி, ஹந்த³ இமம் மயா தீ³யமானம் பிண்ட³ம் படிக்³க³ஹ படிக்³க³ண்ஹாஹீ’’தி. ஏத்த² ச ஹந்தா³தி வோஸ்ஸக்³க³த்தே² நிபாதோ.

ஏவம் வத்வா போ³தி⁴ஸத்தோ த³ள்ஹஸமாதா³னேன ப⁴த்தபாதிம் க³ஹேத்வா அங்கா³ரகாஸுமத்த²கேன பக்க²ந்தோ, தாவதே³வ அஸீதிஹத்த²க³ம்பீ⁴ராய அங்கா³ரகாஸுயா தலதோ உபரூபரிஜாதம் ஸதபத்தபுப்பி²தம் ஏகம் மஹாபது³மம் உக்³க³ந்த்வா போ³தி⁴ஸத்தஸ்ஸ பாதே³ ஸம்படிச்சி². ததோ மஹாதும்ப³மத்தா ரேணு உக்³க³ந்த்வா மஹாஸத்தஸ்ஸ முத்³த⁴னி ட²த்வா ஸகலஸரீரம் ஸுவண்ணசுண்ணஸமோகிண்ணமிவ அகாஸி. ஸோ பது³மகண்ணிகாய ட²த்வா நானக்³க³ரஸபோ⁴ஜனம் பச்சேகபு³த்³த⁴ஸ்ஸ பத்தே பதிட்டா²பேஸி. ஸோ தம் படிக்³க³ஹேத்வா அனுமோத³னம் கத்வா பத்தம் ஆகாஸே கி²பித்வா பஸ்ஸந்தஸ்ஸேவ மஹாஜனஸ்ஸ ஸயம்பி வேஹாஸம் அப்³பு⁴க்³க³ந்த்வா நானப்பகாரம் வலாஹகபந்திம் மத்³த³மானோ விய ஹிமவந்தமேவ க³தோ. மாரோபி பராஜிதோ தோ³மனஸ்ஸம் பத்வா அத்தனோ வஸனட்டா²னமேவ க³தோ. போ³தி⁴ஸத்தோ பன பது³மகண்ணிகாய டி²தகோவ மஹாஜனஸ்ஸ தா³னஸீலஸம்வண்ணனேன த⁴ம்மம் தே³ஸேத்வா மஹாஜனேன பரிவுதோ அத்தனோ நிவேஸனமேவ பவிஸித்வா யாவஜீவம் தா³னாதீ³னி புஞ்ஞானி கத்வா யதா²கம்மம் க³தோ.

ஸத்தா² ‘‘நயித³ம், க³ஹபதி, அச்ச²ரியம், யம் த்வம் ஏவம் த³ஸ்ஸனஸம்பன்னோ ஏதரஹி தே³வதாய ந கம்பிதோ, புப்³பே³ பண்டி³தேஹி கதமேவ அச்ச²ரிய’’ந்தி இமம் த⁴ம்மதே³ஸனம் ஆஹரித்வா அனுஸந்தி⁴ம் க⁴டேத்வா ஜாதகம் ஸமோதா⁴னேஸி ‘‘ததா³ பச்சேகபு³த்³தோ⁴ தத்தே²வ பரினிப்³பா³யி, மாரம் பராஜேத்வா பது³மகண்ணிகாய ட²த்வா பச்சேகபு³த்³த⁴ஸ்ஸ பிண்ட³பாததா³யகோ பா³ராணஸிஸேட்டி² பன அஹமேவ அஹோஸி’’ந்தி.

க²தி³ரங்கா³ரஜாதகவண்ணனா த³ஸமா.