15. ககண்டகவக்³கோ³

[141] 1. கோ³தா⁴ஜாதகவண்ணனா

ந பாபஜனஸம்ஸேவீதி இத³ம் ஸத்தா² வேளுவனே விஹரந்தோ ஏகம் விபக்க²ஸேவிம் பி⁴க்கு²ம் ஆரப்³ப⁴ கதே²ஸி. பச்சுப்பன்னவத்து² மஹிளாமுக²ஜாதகே கதி²தஸதி³ஸமேவ.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ கோ³தா⁴யோனியம் படிஸந்தி⁴ம் க³ண்ஹி. ஸோ வயப்பத்தோ நதீ³தீரே மஹாபி³லே அனேககோ³தா⁴ஸதபரிவாரோ வாஸம் கப்பேஸி. தஸ்ஸ புத்தோ கோ³தா⁴பில்லகோ ஏகேன ககண்டகேன ஸத்³தி⁴ம் ஸந்த²வம் கத்வா தேன ஸத்³தி⁴ம் ஸம்மோத³மானோ விஹரந்தோ ‘‘ககண்டகம் பரிஸ்ஸஜிஸ்ஸாமீ’’தி அவத்த²ரதி. தஸ்ஸ தேன ஸத்³தி⁴ம் விஸ்ஸாஸம் கோ³தா⁴ராஜஸ்ஸ ஆரோசேஸும். கோ³தா⁴ராஜா புத்தம் பக்கோஸாபேத்வா ‘‘தாத, த்வம் அட்டா²னே விஸ்ஸாஸம் கரோஸி, ககண்டகா நாம நீசஜாதிகா, தேஹி ஸத்³தி⁴ம் விஸ்ஸாஸோ ந கத்தப்³போ³. ஸசே த்வம் தேன ஸத்³தி⁴ம் விஸ்ஸாஸம் கரிஸ்ஸஸி, தம் ககண்டகம் நிஸ்ஸாய ஸப்³ப³ம்பேதம் கோ³தா⁴குலம் வினாஸம் பாபுணிஸ்ஸதி, இதோ பட்டா²ய ஏதேன ஸத்³தி⁴ம் விஸ்ஸாஸம் மா அகாஸீ’’தி ஆஹ. ஸோ கரோதியேவ. போ³தி⁴ஸத்தோ புனப்புனம் கதே²ந்தோபி தஸ்ஸ தேன ஸத்³தி⁴ம் விஸ்ஸாஸம் வாரேதும் அஸக்கோந்தோ ‘‘அவஸ்ஸம் அம்ஹாகம் ஏதம் ககண்டகம் நிஸ்ஸாய ப⁴யம் உப்பஜ்ஜிஸ்ஸதி, தஸ்மிம் உப்பன்னே பலாயனமக்³க³ம் ஸம்பாதே³தும் வட்டதீ’’தி ஏகேன பஸ்ஸேன வாதபி³லம் காராபேஸி.

புத்தோபிஸ்ஸ அனுக்கமேன மஹாஸரீரோ அஹோஸி, ககண்டகோ பன புரிமப்பமாணோயேவ. இதரோ ‘‘ககண்டகம் பரிஸ்ஸஜிஸ்ஸாமீ’’தி அந்தரந்தரா அவத்த²ரதியேவ, ககண்டகஸ்ஸ பப்³ப³தகூடேன அவத்த²ரணகாலோ விய ஹோதி. ஸோ கிலமந்தோ சிந்தேஸி ‘‘ஸசே அயம் அஞ்ஞானி கதிபயானி தி³வஸானி மம் ஏவம் பரிஸ்ஸஜிஸ்ஸதி, ஜீவிதம் மே நத்தி², ஏகேன லுத்³த³கேன ஸத்³தி⁴ம் ஏகதோ ஹுத்வா இமம் கோ³தா⁴குலம் வினாஸேஸ்ஸாமீ’’தி. அதே²கதி³வஸம் நிதா³க⁴ஸமயே மேகே⁴ வுட்டே² வம்மிகமக்கி²கா உட்ட²ஹிம்ஸு, ததோ ததோ கோ³தா⁴ நிக்க²மித்வா மக்கி²காயோ கா²த³ந்தி. ஏகோ கோ³தா⁴லுத்³த³கோ கோ³தா⁴பி³லம் பி⁴ந்த³னத்தா²ய குத்³தா³லம் க³ஹேத்வா ஸுனகே²ஹி ஸத்³தி⁴ம் அரஞ்ஞம் பாவிஸி. ககண்டகோ தம் தி³ஸ்வா ‘‘அஜ்ஜ அத்தனோ மனோரத²ம் பூரேஸ்ஸாமீ’’தி தம் உபஸங்கமித்வா அவிதூ³ரே நிபஜ்ஜித்வா ‘‘போ⁴ புரிஸ, கஸ்மா அரஞ்ஞே விசரஸீ’’தி புச்சி². ஸோ ‘‘கோ³தா⁴னம் அத்தா²யா’’தி ஆஹ. ‘‘அஹம் அனேகஸதானம் கோ³தா⁴னம் ஆஸயம் ஜானாமி, அக்³கி³ஞ்ச பலாலஞ்ச ஆதா³ய ஏஹீ’’தி தம் தத்த² நேத்வா ‘‘இமஸ்மிம் டா²னே பலாலம் பக்கி²பித்வா அக்³கி³ம் த³த்வா தூ⁴மம் கத்வா ஸமந்தா ஸுனகே² ட²பேத்வா ஸயம் மஹாமுக்³க³ரம் க³ஹேத்வா நிக்க²ந்தா நிக்க²ந்தா கோ³தா⁴ பஹரித்வா மாரேத்வா ராஸிம் கத்வா யாஹீ’’தி ஏவஞ்ச பன வத்வா ‘‘அஜ்ஜ பச்சாமித்தஸ்ஸ பிட்டி²ம் பஸ்ஸிஸ்ஸாமீ’’தி ஏகஸ்மிம் டா²னே ஸீஸம் உக்கி²பித்வா நிபஜ்ஜி. லுத்³த³கோபி பலாலதூ⁴மம் அகாஸி, தூ⁴மோ பி³லம் பாவிஸி, கோ³தா⁴ தூ⁴மந்தா⁴ மரணப⁴யதஜ்ஜிதா நிக்க²மித்வா பலாயிதும் ஆரத்³தா⁴. லுத்³த³கோ நிக்க²ந்தம் நிக்க²ந்தம் பஹரித்வா மாரேஸி, தஸ்ஸ ஹத்த²தோ முத்தா ஸுனகா² க³ண்ஹிம்ஸு. கோ³தா⁴னம் மஹாவினாஸோ உப்பஜ்ஜி.

போ³தி⁴ஸத்தோ ‘‘ககண்டகம் நிஸ்ஸாய ப⁴யம் உப்பன்ன’’ந்தி ஞத்வா ‘‘பாபபுரிஸஸம்ஸக்³கோ³ நாம ந கத்தப்³போ³, பாபே நிஸ்ஸாய ஹிதஸுக²ம் நாம நத்தி², ஏகஸ்ஸ பாபககண்டகஸ்ஸ வஸேன ஏத்தகானம் கோ³தா⁴னம் வினாஸோ ஜாதோ’’தி வாதபி³லேன பலாயந்தோ இமம் கா³த²மாஹ –

141. ‘‘ந பாபஜனஸம்ஸேவீ, அச்சந்தஸுக²மேத⁴தி;

கோ³தா⁴குலம் ககண்டாவ, கலிம் பாபேதி அத்தான’’ந்தி.

தத்ராயம் ஸங்கே²பத்தோ² – பாபஜனஸம்ஸேவீ புக்³க³லோ அச்சந்தஸுக²ம் ஏகந்தஸுக²ம் நிரந்தரஸுக²ம் நாம ந ஏத⁴தி ந விந்த³தி ந படிலப⁴தி. யதா² கிம்? கோ³தா⁴குலம் ககண்டாவ. யதா² ககண்டகதோ கோ³தா⁴குலம் ஸுக²ம் ந லப⁴தி, ஏவம் பாபஜனஸம்ஸேவீ புக்³க³லோ ஸுக²ம் ந லப⁴தி. பாபஜனம் பன ஸேவந்தோ ஏகந்தேனேவ கலிம் பாபேதி அத்தானம், கலி வுச்சதி வினாஸோ, ஏகந்தேனேவ பாபஸேவீ அத்தானஞ்ச அஞ்ஞே ச அத்தனா ஸத்³தி⁴ம் வஸந்தே வினாஸம் பாபேதி. பாளியம் பன ‘‘ப²லம் பாபேய்யா’’தி லிக²ந்தி. தம் ப்³யஞ்ஜனம் அட்ட²கதா²யம் நத்தி², அத்தோ²பிஸ்ஸ ந யுஜ்ஜதி. தஸ்மா யதா²வுத்தமேவ க³ஹேதப்³ப³ம்.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ ககண்டகோ தே³வத³த்தோ அஹோஸி, போ³தி⁴ஸத்தஸ்ஸ புத்தோ அனோவாத³கோ கோ³தா⁴பில்லகோ விபக்க²ஸேவீ பி⁴க்கு², கோ³தா⁴ராஜா பன அஹமேவ அஹோஸி’’ந்தி.

கோ³தா⁴ஜாதகவண்ணனா பட²மா.

[142] 2. ஸிங்கா³லஜாதகவண்ணனா

ஏதஞ்ஹி தே து³ராஜானந்தி இத³ம் ஸத்தா² வேளுவனே விஹரந்தோ தே³வத³த்தஸ்ஸ வதா⁴ய பரிஸக்கனம் ஆரப்³ப⁴ கதே²ஸி. த⁴ம்மஸபா⁴யஞ்ஹி பி⁴க்கூ²னம் கத²ம் ஸுத்வா ஸத்தா² ‘‘ந, பி⁴க்க²வே, தே³வத³த்தோ இதா³னேவ மய்ஹம் வதா⁴ய பரிஸக்கதி, புப்³பே³பி பரிஸக்கியேவ, ந ச மம் மாரேதும் அஸக்கி², ஸயமேவ பன கிலந்தோ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஸிங்கா³லயோனியம் நிப்³ப³த்தித்வா ஸிங்கா³லராஜா ஹுத்வா ஸிங்கா³லக³ணபரிவுதோ ஸுஸானவனே விஹாஸி. தேன ஸமயேன ராஜக³ஹே உஸ்ஸவோ அஹோஸி, யேபு⁴ய்யேன மனுஸ்ஸா ஸுரம் பிவந்தி, ஸுராச²ணோயேவ கிரேஸோ. அதே²த்த² ஸம்ப³ஹுலா து⁴த்தா ப³ஹும் ஸுரஞ்ச மம்ஸஞ்ச ஆஹராபேத்வா மண்டி³தபஸாதி⁴தா கா³யித்வா கா³யித்வா ஸுரஞ்ச பிவந்தி, மம்ஸஞ்ச கா²த³ந்தி. தேஸம் பட²மயாமாவஸானே மம்ஸம் கீ²யி, ஸுரா பன ப³ஹுகாவ. அதே²கோ து⁴த்தோ ‘‘மம்ஸக²ண்ட³ம் தே³ஹீ’’தி ஆஹ. ‘‘மம்ஸம் கீ²ண’’ந்தி ச வுத்தே ‘‘மயி டி²தே மம்ஸக்க²யோ நாம நத்தீ²’’தி வத்வா ‘‘ஆமகஸுஸானே மதமனுஸ்ஸமம்ஸம் கா²த³னத்தா²ய ஆக³தே ஸிங்கா³லே மாரேத்வா மம்ஸம் ஆஹரிஸ்ஸாமீ’’தி முக்³க³ரம் க³ஹேத்வா நித்³த⁴மனமக்³கே³ன நக³ரா நிக்க²மித்வா ஸுஸானம் க³ந்த்வா முக்³க³ரம் க³ஹேத்வா மதகோ விய உத்தானோ நிபஜ்ஜி. தஸ்மிம் க²ணே போ³தி⁴ஸத்தோ ஸிங்கா³லக³ணபரிவுதோ தத்த² க³தோ தம் தி³ஸ்வா ‘‘நாயம் மதகோ’’தி ஞத்வாபி ‘‘ஸுட்டு²தரம் உபபரிக்கி²ஸ்ஸாமீ’’தி தஸ்ஸ அதோ⁴வாதேன க³ந்த்வா ஸரீரக³ந்த⁴ம் கா⁴யித்வா தத²தோவஸ்ஸ அமதகபா⁴வம் ஞத்வா ‘‘லஜ்ஜாபேத்வா நம் உய்யோஜேஸ்ஸாமீ’’தி க³ந்த்வா முக்³க³ரகோடியம் ட³ம்ஸித்வா ஆகட்³டி⁴, து⁴த்தோ முக்³க³ரம் ந விஸ்ஸஜி, உபஸங்கமந்தம்பி ந ஓலோகேந்தோ நம் கா³ள்ஹதரம் அக்³க³ஹேஸி. போ³தி⁴ஸத்தோ படிக்கமித்வா ‘‘போ⁴ புரிஸ, ஸசே த்வம் மதகோ ப⁴வேய்யாஸி, ந மயி முக்³க³ரம் ஆகட்³ட⁴ந்தே கா³ள்ஹதரம் க³ண்ஹேய்யாஸி, இமினா காரணேன தவ மதகபா⁴வோ வா அமதகபா⁴வோ வா து³ஜ்ஜானோ’’தி வத்வா இமம் கா³த²மாஹ –

142. ‘‘ஏதஞ்ஹி தே து³ராஜானம், யம் ஸேஸி மதஸாயிகம்;

யஸ்ஸ தே கட்³ட⁴மானஸ்ஸ, ஹத்தா² த³ண்டோ³ ந முச்சதீ’’தி.

தத்த² ஏதஞ்ஹி தே து³ராஜானந்தி ஏதம் காரணம் தவ து³விஞ்ஞேய்யம். யம் ஸேஸி மதஸாயிகந்தி யேன காரணேன த்வம் மதஸாயிகம் ஸேஸி, மதகோ விய ஹுத்வா ஸயஸி. யஸ்ஸ தே கட்³ட⁴மானஸ்ஸாதி யஸ்ஸ தவ த³ண்ட³கோடியம் க³ஹேத்வா கட்³டி⁴யமானஸ்ஸ ஹத்த²தோ த³ண்டோ³ ந முச்சதி, ஸோ த்வம் தத²தோ மதகோ நாம ந ஹோஸீதி.

ஏவம் வுத்தே ஸோ து⁴த்தோ ‘‘அயம் மம அமதகபா⁴வம் ஜானாதீ’’தி உட்டா²ய த³ண்ட³ம் கி²பி, த³ண்டோ³ விரஜ்ஜி². து⁴த்தோ ‘‘க³ச்ச², விரத்³தோ⁴ தா³னிஸி மயா’’தி ஆஹ. போ³தி⁴ஸத்தோ நிவத்தித்வா ‘‘போ⁴ புரிஸ, மம் விரஜ்ஜ²ந்தோபி த்வம் அட்ட² மஹானிரயே ஸோளஸ ச உஸ்ஸத³னிரயே அவிரத்³தோ⁴யேவா’’தி வத்வா பக்காமி. து⁴த்தோ கிஞ்சி அலபி⁴த்வா ஸுஸானா நிக்க²மித்வா பரிகா²யம் ந்ஹாயித்வா ஆக³தமக்³கே³னேவ நக³ரம் பாவிஸி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ து⁴த்தோ தே³வத³த்தோ அஹோஸி, ஸிங்கா³லராஜா பன அஹமேவ அஹோஸி’’ந்தி.

ஸிங்கா³லஜாதகவண்ணனா து³தியா.

[143] 3. விரோசஜாதகவண்ணனா

லஸீ ச தே நிப்ப²லிதாதி இத³ம் ஸத்தா² வேளுவனே விஹரந்தோ தே³வத³த்தஸ்ஸ க³யாஸீஸே ஸுக³தாலயஸ்ஸ த³ஸ்ஸிதபா⁴வம் ஆரப்³ப⁴ கதே²ஸி. தே³வத³த்தோ ஹி பரிஹீனஜ்ஜா²னோ லாப⁴ஸக்காரபரிஹீனோ ‘‘அத்தே²கோ உபாயோ’’தி சிந்தேத்வா ஸத்தா²ரம் பஞ்ச வத்தூ²னி யாசித்வா அலப⁴மானோ த்³வின்னம் அக்³க³ஸாவகானம் ஸத்³தி⁴விஹாரிகே அது⁴னா பப்³ப³ஜிதே த⁴ம்மவினயம்ஹி அகோவிதே³ பஞ்சஸதே பி⁴க்கூ² க³ஹேத்வா க³யாஸீஸம் க³ந்த்வா ஸங்க⁴ம் பி⁴ந்தி³த்வா ஏகஸீமாயம் ஆவேணிகம் ஸங்க⁴கம்மம் அகாஸி. ஸத்தா² தேஸம் பி⁴க்கூ²னம் ஞாணபரிபாககாலம் ஞத்வா த்³வே அக்³க³ஸாவகே பேஸேஸி. தே தி³ஸ்வா தே³வத³த்தோ துட்ட²மானஸோ ரத்திம் த⁴ம்மம் தே³ஸயமானோ ‘‘பு³த்³த⁴லீலம் கரிஸ்ஸாமீ’’தி ஸுக³தாலயம் த³ஸ்ஸேந்தோ ‘‘விக³ததி²னமித்³தோ⁴ கோ², ஆவுஸோ ஸாரிபுத்த, பி⁴க்கு²ஸங்கோ⁴, படிபா⁴து தம் பி⁴க்கூ²னம் த⁴ம்மீகதா², பிட்டி² மே ஆகி³லாயதி, தமஹம் ஆயமிஸ்ஸாமீ’’தி வத்வா நித்³த³ம் உபக³தோ. த்³வே அக்³க³ஸாவகா தேஸம் பி⁴க்கூ²னம் த⁴ம்மம் தே³ஸேத்வா மக்³க³ப²லேஹி பபோ³தே⁴த்வா ஸப்³பே³ ஆதா³ய வேளுவனமேவ பச்சாக³மிம்ஸு.

கோகாலிகோ விஹாரம் துச்ச²ம் தி³ஸ்வா தே³வத³த்தஸ்ஸ ஸந்திகம் க³ந்த்வா ‘‘ஆவுஸோ தே³வத³த்த, பரிஸம் தே பி⁴ந்தி³த்வா த்³வே அக்³க³ஸாவகா விஹாரம் துச்ச²ம் கத்வா க³தா, த்வம் பன நித்³தா³யஸியேவா’’தி வத்வா உத்தராஸங்க³மஸ்ஸ அபனேத்வா பி⁴த்தியம் பிட்டி²கண்டகம் பு²ஸந்தோ விய பண்ஹியா நம் ஹத³யே பஹரி. தாவதே³வஸ்ஸ முக²தோ லோஹிதம் உக்³க³ஞ்சி². ஸோ ததோ பட்டா²ய கி³லானோ அஹோஸி. ஸத்தா² தே²ரம் புச்சி² ‘‘ஸாரிபுத்த, தும்ஹாகம் க³தகாலே தே³வத³த்தோ கிம் அகாஸீ’’தி? ப⁴ந்தே, தே³வத³த்தோ அம்ஹே தி³ஸ்வா ‘‘பு³த்³த⁴லீலம் கரிஸ்ஸாமீ’’தி ஸுக³தாலயம் த³ஸ்ஸேத்வா மஹாவினாஸம் பத்தோதி. ஸத்தா² ‘‘ந கோ² ஸாரிபுத்த, தே³வத³த்தோ இதா³னேவ மம அனுகரோந்தோ வினாஸம் பத்தோ, புப்³பே³பி பத்தோயேவா’’தி வத்வா தே²ரேன யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ கேஸரஸீஹோ ஹுத்வா ஹிமவந்தப்பதே³ஸே கஞ்சனகு³ஹாயம் வாஸம் கப்பேஸி. ஸோ ஏகதி³வஸம் கஞ்சனகு³ஹாய நிக்க²மித்வா விஜம்பி⁴த்வா சதுத்³தி³ஸம் ஓலோகேத்வா ஸீஹனாத³ம் நதி³த்வா கோ³சராய பக்கந்தோ மஹாமஹிம்ஸம் வதி⁴த்வா வரமம்ஸம் கா²தி³த்வா ஏகம் ஸரம் ஓதரித்வா மணிவண்ணஸ்ஸ உத³கஸ்ஸ குச்சி²ம் பூரேத்வா கு³ஹம் ஸந்தா⁴ய பாயாஸி. அதே²கோ ஸிங்கா³லோ கோ³சரப்பஸுதோ ஸஹஸாவ ஸீஹம் தி³ஸ்வா பலாயிதும் அஸக்கோந்தோ ஸீஹஸ்ஸ புரதோ பாதே³ஸு பதித்வா நிபஜ்ஜி. ‘‘கிம், ஜம்பு³கா’’தி ச வுத்தே ‘‘அஹம் தே, ஸாமி, பாதே³ உபட்டா²துகாமோ’’தி ஆஹ. ஸீஹோ ‘‘ஸாது⁴ ஏஹி, மம் உபட்ட²ஹ, வரமம்ஸானி தம் கா²தா³பேஸ்ஸாமீ’’தி வத்வா ஸிங்கா³லம் ஆதா³ய கஞ்சனகு³ஹம் அக³மாஸி. ஸிங்கா³லோ ததோ பட்டா²ய ஸீஹவிகா⁴ஸம் கா²த³தி. ஸோ கதிபாஹச்சயேனேவ தூ²லஸரீரோ அஹோஸி.

அத² நம் ஏகதி³வஸம் கு³ஹாய நிபன்னகோவ ஸீஹோ ஆஹ ‘‘க³ச்ச² ஜம்பு³க, பப்³ப³தஸிக²ரே ட²த்வா பப்³ப³தபாதே³ ஸஞ்சரந்தேஸு ஹத்தி²அஸ்ஸமஹிம்ஸாதீ³ஸு யஸ்ஸ மம்ஸம் கா²தி³துகாமோஸி, தம் ஓலோகேத்வா ஆக³ந்த்வா ‘அஸுகமம்ஸம் கா²தி³துகாமோம்ஹீ’தி வத்வா மம் வந்தி³த்வா ‘விரோச, ஸாமீ’தி வதா³ஹி, அஹம் தம் வதி⁴த்வா மது⁴ரமம்ஸம் கா²தி³த்வா துய்ஹம்பி த³ஸ்ஸாமீ’’தி. ஸிங்கா³லோ பப்³ப³தஸிக²ரம் அபி⁴ருஹித்வா நானப்பகாரே மிகே³ ஓலோகேத்வா யஸ்ஸேவ மம்ஸம் கா²தி³துகாமோ ஹோதி, கஞ்சனகு³ஹம் பவிஸித்வா தமேவ ஸீஹஸ்ஸ ஆரோசேத்வா பாதே³ஸு பதித்வா ‘‘விரோச, ஸாமீ’’தி வத³தி. ஸீஹோ வேகே³ன பக்க²ந்தி³த்வா ஸசேபி மத்தவரவாரணோ ஹோதி, தத்தே²வ நம் ஜீவிதக்க²யம் பாபேத்வா ஸயம்பி வரமம்ஸம் கா²த³தி, ஸிங்கா³லஸ்ஸபி தே³தி. ஸிங்கா³லோ குச்சி²பூரம் மம்ஸம் கா²தி³த்வா கு³ஹம் பவிஸித்வா நித்³தா³யதி. ஸோ க³ச்ச²ந்தே க³ச்ச²ந்தே காலே மானம் வட்³டே⁴ஸி ‘‘அஹம்பி சதுப்பதோ³வ, கிம்காரணா தி³வஸே தி³வஸே பரேஹி போஸியமானோ விஹராமி, இதோ பட்டா²ய அஹம்பி ஹத்தி²ஆத³யோ ஹனித்வா மம்ஸம் கா²தி³ஸ்ஸாமி, ஸீஹோபி மிக³ராஜா ‘விரோச, ஸாமீ’தி வுத்தமேவ பத³ம் நிஸ்ஸாய வரவாரணே வதே⁴தி, அஹம்பி ஸீஹேன ‘விரோச, ஜம்பு³கா’தி மம் வதா³பேத்வா ஏகம் வரவாரணம் வதி⁴த்வா மம்ஸம் கா²தி³ஸ்ஸாமீ’’தி.

ஸோ ஸீஹம் உபஸங்கமித்வா ஏதத³வோச ‘‘ஸாமி, மயா தீ³க⁴ரத்தம் தும்ஹேஹி வதி⁴தவரவாரணானம் மம்ஸம் கா²தி³தம், அஹம்பி ஏகம் வரவாரணம் மாரேத்வா மம்ஸம் கா²தி³துகாமோ, தஸ்மா தும்ஹேஹி நிபன்னட்டா²னே கஞ்சனகு³ஹாயம் நிபஜ்ஜிஸ்ஸாமி, தும்ஹே பப்³ப³தபாதே³ விசரந்தம் வரவாரணம் ஓலோகேத்வா மம ஸந்திகம் ஆக³ந்த்வா ‘விரோச, ஜம்பு³கா’தி வதே³த², ஏத்தகமத்தஸ்மிம் மச்சே²ரம் மா கரித்தா²’’தி. அத² நம் ஸீஹோ ஆஹ ‘‘ந, த்வம் ஜம்பு³க, வாரணே வதி⁴தும் ஸமத்தே² ஸீஹகுலே உப்பன்னோ, வாரணம் வதி⁴த்வா மம்ஸம் கா²த³னஸமத்தோ² ஸிங்கா³லோ நாம லோகே நத்தி², மா தே ஏதம் ருச்சி, மயா வதி⁴தவரவாரணானஞ்ஞேவ மம்ஸம் கா²தி³த்வா வஸா’’தி. ஸோ ஏவம் வுத்தேபி விரமிதும் ந இச்சி², புனப்புனம் யாசியேவ. ஸீஹோ தம் வாரேதும் அஸக்கோந்தோ ஸம்படிச்சி²த்வா ‘‘தேன ஹி மம வஸனட்டா²னம் பவிஸித்வா நிபஜ்ஜா’’தி ஜம்பு³கம் கஞ்சனகு³ஹாயம் நிபஜ்ஜாபேத்வா ஸயம் பப்³ப³தபாதே³ மத்தவரவாரணம் ஓலோகேத்வா கு³ஹாத்³வாரம் க³ந்த்வா ‘‘விரோச, ஜம்பு³கா’’தி ஆஹ. ஸிங்கா³லோ கஞ்சனகு³ஹாய நிக்க²மித்வா விஜம்பி⁴த்வா சதுத்³தி³ஸம் ஓலோகேத்வா திக்க²த்தும் வஸ்ஸித்வா ‘‘மத்தவரவாரணஸ்ஸ கும்பே⁴ பதிஸ்ஸாமீ’’தி பக்க²ந்தி³த்வா விரஜ்ஜி²த்வா பாத³மூலே பதி. வாரணோ த³க்கி²ணபாத³ம் உக்கி²பித்வா தஸ்ஸ ஸீஸம் அக்கமி, ஸீஸட்டீ²னி சுண்ணவிசுண்ணானி அஹேஸும். அத²ஸ்ஸ ஸரீரம் வாரணோ பாதே³ன ஸங்க⁴ரித்வா ராஸிம் கத்வா உபரி லண்ட³ம் பாதேத்வா கோஞ்சனாத³ம் நத³ந்தோ அரஞ்ஞம் பாவிஸி.

போ³தி⁴ஸத்தோ இமம் பவத்திம் தி³ஸ்வா ‘‘இதா³னி விரோச, ஜம்பு³கா’’தி வத்வா இமம் கா³த²மாஹ –

143. ‘‘லஸீ ச தே நிப்ப²லிதா, மத்த²கோ ச பதா³லிதோ;

ஸப்³பா³ தே பா²ஸுகா ப⁴க்³கா³, அஜ்ஜ கோ² த்வம் விரோசஸீ’’தி.

தத்த² லஸீதி மத்த²லுங்க³ம். நிப்ப²லிதாதி நிக்க²ந்தா. ஏவம் போ³தி⁴ஸத்தோ இமம் கா³த²ம் வத்வா யாவதாயுகம் ட²த்வா யதா²கம்மம் க³தோ.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ ஸிங்கா³லோ தே³வத³த்தோ அஹோஸி, ஸீஹோ பன அஹமேவ அஹோஸி’’ந்தி.

விரோசஜாதகவண்ணனா ததியா.

[144] 4. நங்கு³ட்ட²ஜாதகவண்ணனா

ப³ஹும்பேதம் அஸப்³பி⁴ ஜாதவேதா³தி இத³ம் ஸத்தா² ஜேதவனே விஹரந்தோ ஆஜீவகானம் மிச்சா²தபம் ஆரப்³ப⁴ கதே²ஸி. ததா³ கிர ஆஜீவகா ஜேதவனபிட்டி²யம் நானப்பகாரம் மிச்சா²தபம் சரந்தி. ஸம்ப³ஹுலா பி⁴க்கூ² தேஸம் உக்குடிகப்பதா⁴னவக்³கு³லிவதகண்டகாபஸ்ஸயபஞ்சாதபதபனாதி³பே⁴த³ம் மிச்சா²தபம் தி³ஸ்வா ப⁴க³வந்தம் புச்சி²ம்ஸு ‘‘அத்தி² நு கோ², ப⁴ந்தே, இமம் மிச்சா²தபம் நிஸ்ஸாய குஸலம் வா வுட்³டி⁴ வா’’தி. ஸத்தா² ‘‘ந, பி⁴க்க²வே, ஏவரூபம் மிச்சா²தபம் நிஸ்ஸாய குஸலம் வா வுட்³டி⁴ வா அத்தி², புப்³பே³ பண்டி³தா ‘ஏவரூபம் தபம் நிஸ்ஸாய குஸலம் வா வுட்³டி⁴ வா ப⁴விஸ்ஸதீ’தி ஸஞ்ஞாய ஜாதக்³கி³ம் க³ஹேத்வா அரஞ்ஞம் பவிஸித்வா அக்³கி³ஜுஹனாதி³வஸேன கிஞ்சி வுட்³டி⁴ம் அபஸ்ஸந்தா அக்³கி³ம் உத³கேன நிப்³பா³பேத்வா கஸிணபரிகம்மம் கத்வா அபி⁴ஞ்ஞா ச ஸமாபத்தியோ ச நிப்³ப³த்தேத்வா ப்³ரஹ்மலோகபராயணா அஹேஸு’’ந்தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ உதி³ச்சப்³ராஹ்மணகுலே நிப்³ப³த்தி. தஸ்ஸ ஜாததி³வஸே மாதாபிதரோ ஜாதக்³கி³ம் க³ஹேத்வா ட²பேஸும். அத² நம் ஸோளஸவஸ்ஸகாலே ஏதத³வோசும் ‘‘மயம் தே, புத்த, ஜாததி³வஸே அக்³கி³ம் க³ண்ஹிம்ஹ. ஸசேஸி அகா³ரம் அஜ்ஜா²வஸிதுகாமோ, தயோ வேதே³ உக்³க³ண்ஹ. அத² ப்³ரஹ்மலோகம் க³ந்துகாமோ, அக்³கி³ம் க³ஹேத்வா அரஞ்ஞம் பவிஸித்வா அக்³கி³ம் பரிசரந்தோ மஹாப்³ரஹ்மானம் ஆராதே⁴த்வா ப்³ரஹ்மலோகபராயணோ ஹோஹீ’’தி. ஸோ ‘‘ந மய்ஹம் அகா³ரேன அத்தோ²’’தி அக்³கி³ம் க³ஹேத்வா அரஞ்ஞம் பவிஸித்வா அஸ்ஸமபத³ம் மாபேத்வா அக்³கி³ம் பரிசரந்தோ அரஞ்ஞே விஹாஸி. ஸோ ஏகதி³வஸம் பச்சந்தகா³மகே கோ³த³க்கி²ணம் லபி⁴த்வா தம் கோ³ணம் அஸ்ஸமபத³ம் நேத்வா சிந்தேஸி ‘‘அக்³கி³ப⁴க³வந்தம் கோ³மம்ஸம் கா²தா³பேஸ்ஸாமீ’’தி. அத²ஸ்ஸ ஏதத³ஹோஸி ‘‘இத⁴ லோணம் நத்தி², அக்³கி³ப⁴க³வா அலோணம் கா²தி³தும் ந ஸக்கி²ஸ்ஸதி, கா³மதோ லோணம் ஆஹரித்வா அக்³கி³ப⁴க³வந்தம் ஸலோணகம் கா²தா³பேஸ்ஸாமீ’’தி. ஸோ தம் தத்தே²வ ப³ந்தி⁴த்வா லோணத்தா²ய கா³மகம் அக³மாஸி. தஸ்மிம் க³தே ஸம்ப³ஹுலா லுத்³த³கா தம் டா²னம் ஆக³தா. கோ³ணம் தி³ஸ்வா வதி⁴த்வா மம்ஸம் பசித்வா கா²தி³த்வா நங்கு³ட்ட²ஞ்ச ஜங்க⁴ஞ்ச சம்மஞ்ச தத்தே²வ ச²ட்³டே³த்வா அவஸேஸமம்ஸம் ஆதா³ய அக³மம்ஸு.

ப்³ராஹ்மணோ ஆக³ந்த்வா நங்கு³ட்டா²தி³மத்தமேவ தி³ஸ்வா சிந்தேஸி ‘‘அயம் அக்³கி³ப⁴க³வா அத்தனோ ஸந்தகம்பி ரக்கி²தும் ந ஸக்கோதி, மம் பன கதா³ ரக்கி²ஸ்ஸதி. இமினா அக்³கி³பரிசரணேன நிரத்த²கேன ப⁴விதப்³ப³ம், நத்தி² இதோனிதா³னம் குஸலம் வா வுட்³டி⁴ வா’’தி. ஸோ அக்³கி³பரிசரியாய விக³தச்ச²ந்தோ³ ‘‘ஹம்போ⁴ அக்³கி³ப⁴க³வா, த்வம் அத்தனோபி ஸந்தகம் ரக்கி²தும் அஸக்கோந்தோ மம் கதா³ ரக்கி²ஸ்ஸஸி, மம்ஸம் நத்தி², ஏத்தகேனபி துஸ்ஸாஹீ’’தி நங்கு³ட்டா²தீ³னி அக்³கி³ம்ஹி பக்கி²பந்தோ இமம் கா³த²மாஹ –

144. ‘‘ப³ஹும்பேதம் அஸப்³பி⁴ ஜாதவேத³, யம் தம் வாலதி⁴னாபி⁴பூஜயாம;

மம்ஸாரஹஸ்ஸ நத்த²ஜ்ஜ மம்ஸம், நங்கு³ட்ட²ம்பி ப⁴வம் படிக்³க³ஹாதூ’’தி.

தத்த² ப³ஹும்பேதந்தி ஏத்தகம்பி ப³ஹும். அஸப்³பீ⁴தி அஸப்புரிஸ அஸாது⁴ஜாதிக. ஜாதவேதா³தி அக்³கி³ம் ஆலபதி. அக்³கி³ ஹி ஜாதமத்தோவ வேதி³யதி பஞ்ஞாயதி பாகடோ ஹோதி, தஸ்மா ‘‘ஜாதவேதோ³’’தி வுச்சதி. யம் தம் வாலதி⁴னாபி⁴பூஜயாமாதி யம் அஜ்ஜ மயம் அத்தனோபி ஸந்தகம் ரக்கி²தும் அஸமத்த²ம் ப⁴க³வந்தம் வாலதி⁴னா அபி⁴பூஜயாம, ஏதம்பி தவ ப³ஹுமேவாதி த³ஸ்ஸேதி. மம்ஸாரஹஸ்ஸாதி மம்ஸம் அரஹஸ்ஸ துய்ஹம் நத்தி² அஜ்ஜ மம்ஸம். நங்கு³ட்ட²ம்பி ப⁴வம் படிக்³க³ஹாதூதி அத்தனோ ஸந்தகம் ரக்கி²தும் அஸக்கோந்தோ ப⁴வம் இமம் ஸஜங்க⁴சம்மம் நங்கு³ட்ட²ம்பி படிக்³க³ண்ஹாதூதி.

ஏவம் வத்வா மஹாஸத்தோ அக்³கி³ம் உத³கேன நிப்³பா³பேத்வா இஸிபப்³ப³ஜ்ஜம் பப்³ப³ஜித்வா அபி⁴ஞ்ஞா ச ஸமாபத்தியோ ச நிப்³ப³த்தேத்வா ப்³ரஹ்மலோகபராயணோ அஹோஸி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘நிப்³பு³தக்³கி³தாபஸோ அஹமேவ தேன ஸமயேனா’’தி.

நங்கு³ட்ட²ஜாதகவண்ணனா சதுத்தா².

[145] 5. ராத⁴ஜாதகவண்ணனா

ந த்வம் ராத⁴ விஜானாஸீதி இத³ம் ஸத்தா² ஜேதவனே விஹரந்தோ புராணது³தியிகாபலோப⁴னம் ஆரப்³ப⁴ கதே²ஸி. பச்சுப்பன்னவத்து² இந்த்³ரியஜாதகே ஆவி ப⁴விஸ்ஸதி. ஸத்தா² பன தம் பி⁴க்கு²ம் ஆமந்தேத்வா ‘‘பி⁴க்கு² மாதுகா³மோ நாம அரக்கி²யோ, ஆரக்க²ம் ட²பேத்வா ரக்க²ந்தாபி ரக்கி²தும் ந ஸக்கோந்தி. த்வம்பி புப்³பே³ ஏதம் ஆரக்க²ம் ட²பேத்வா ரக்க²ந்தோபி ரக்கி²தும் நாஸக்கி², இதா³னி கத²ம் ரக்கி²ஸ்ஸஸீ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஸுகயோனியம் நிப்³ப³த்தி. காஸிரட்டே² ஏகோ ப்³ராஹ்மணோ போ³தி⁴ஸத்தஞ்ச கனிட்ட²பா⁴தரஞ்சஸ்ஸ புத்தட்டா²னே ட²பேத்வா போஸேஸி. தேஸு போ³தி⁴ஸத்தஸ்ஸ ‘‘போட்ட²பாதோ³’’தி நாமம் அஹோஸி, இதரஸ்ஸ ‘‘ராதோ⁴’’தி. தஸ்ஸ பன ப்³ராஹ்மணஸ்ஸ ப⁴ரியா அனாசாரா ஹோதி து³ஸ்ஸீலா. ஸோ வோஹாரத்தா²ய க³ச்ச²ந்தோ உபோ⁴பி பா⁴தரோ ஆஹ – ‘‘தாதா, ஸசே வோ மாதா ப்³ராஹ்மணீ அனாசாரம் ஆசரதி, வாரேய்யாத² ந’’ந்தி. போ³தி⁴ஸத்தோ ஆஹ ‘‘ஸாது⁴, தாத, வாரேதும் ஸக்கோந்தா வாரேய்யாம, அஸக்கோந்தா துண்ஹீ ப⁴விஸ்ஸாமா’’தி. ஏவம் ப்³ராஹ்மணோ ப்³ராஹ்மணிம் ஸுகானம் நிய்யாதே³த்வா வோஹாரத்தா²ய க³தோ.

தஸ்ஸ பன க³ததி³வஸதோ பட்டா²ய ப்³ராஹ்மணீ அதிசரிதும் ஆரத்³தா⁴, பவிஸந்தானஞ்ச நிக்க²மந்தானஞ்ச அந்தோ நத்தி², தஸ்ஸா கிரியம் தி³ஸ்வா ராதோ⁴ போ³தி⁴ஸத்தம் ஆஹ – ‘‘பா⁴திக, அம்ஹாகம் பிதா ‘ஸசே வோ மாதா அனாசாரம் ஆசரதி, வாரேய்யாதா²’தி வத்வா க³தோ, இதா³னி சேஸா அனாசாரம் ஆசரதி, வாரேம ந’’ந்தி. போ³தி⁴ஸத்தோ ‘‘தாத, த்வம் அத்தனோ அப்³யத்ததாய பா³லபா⁴வேன ஏவம் வதே³ஸி, மாதுகா³மம் நாம உக்கி²பித்வா சரந்தாபி ரக்கி²தும் ந ஸக்கோந்தி. யம் கம்மம் காதும் ந ஸக்கா, ந தம் காதும் வட்டதீ’’தி வத்வா இமம் கா³த²மாஹ –

145. ‘‘ந த்வம் ராத⁴ விஜானாஸி, அட்³ட⁴ரத்தே அனாக³தே;

அப்³யயதம் விலபஸி, விரத்தா கோஸியாயனே’’தி.

தத்த² ந த்வம் ராத⁴ விஜானாஸி, அட்³ட⁴ரத்தே அனாக³தேதி தாத ராத⁴, த்வம் ந ஜானாஸி, அட்³ட⁴ரத்தே அனாக³தே பட²மயாமேயேவ ஏத்தகா ஜனா ஆக³தா, இதா³னி கோ ஜானாதி, கித்தகாபி ஆக³மிஸ்ஸந்தி. அப்³யயதம் விலபஸீதி த்வம் அப்³யத்தவிலாபம் விலபஸி. விரத்தா கோஸியாயனேதி மாதா நோ கோஸியாயனீ ப்³ராஹ்மணீ விரத்தா அம்ஹாகம் பிதரி நிப்பேமா ஜாதா. ஸசஸ்ஸா தஸ்மிம் ஸினேஹோ வா பேமம் வா ப⁴வேய்ய, ந ஏவரூபம் அனாசாரம் கரேய்யாதி இமமத்த²ம் ஏதேஹி ப்³யஞ்ஜனேஹி பகாஸேஸி.

ஏவம் பகாஸேத்வா ச பன ப்³ராஹ்மணியா ஸத்³தி⁴ம் ராத⁴ஸ்ஸ வத்தும் ந அதா³ஸி. ஸாபி யாவ ப்³ராஹ்மணஸ்ஸ அனாக³மனா யதா²ருசியா விசரி. ப்³ராஹ்மணோ ஆக³ந்த்வா போட்ட²பாத³ம் புச்சி² – ‘‘தாத, கீதி³ஸீ வோ மாதா’’தி. போ³தி⁴ஸத்தோ ப்³ராஹ்மணஸ்ஸ ஸப்³ப³ம் யதா²பூ⁴தம் கதே²த்வா ‘‘கிம் தே, தாத, ஏவரூபாய து³ஸ்ஸீலாயா’’தி வத்வா ‘‘தாத, அம்ஹேஹி மாதுயா தோ³ஸஸ்ஸ கதி²தகாலதோ பட்டா²ய ந ஸக்கா இத⁴ வஸிது’’ந்தி ப்³ராஹ்மணஸ்ஸ பாதே³ வந்தி³த்வா ஸத்³தி⁴ம் ராதே⁴ன உப்பதித்வா அரஞ்ஞம் அக³மாஸி.

ஸத்தா² இமம் த⁴ம்மதே³ஸனம் ஆஹரித்வா ஸச்சானி பகாஸேஸி, ஸச்சபரியோஸானே உக்கண்டி²தபி⁴க்கு² ஸோதாபத்திப²லே பதிட்ட²ஹி. ‘‘ததா³ ப்³ராஹ்மணோ ச ப்³ராஹ்மணீ ச ஏதேயேவ த்³வே ஜனா அஹேஸும், ராதோ⁴ ஆனந்தோ³, போட்ட²பாதோ³ பன அஹமேவ அஹோஸி’’ந்தி.

ராத⁴ஜாதகவண்ணனா பஞ்சமா.

[146] 6. ஸமுத்³த³காகஜாதகவண்ணனா

அபி நு ஹனுகா ஸந்தாதி இத³ம் ஸத்தா² ஜேதவனே விஹரந்தோ ஸம்ப³ஹுலே மஹல்லகே பி⁴க்கூ² ஆரப்³ப⁴ கதே²ஸி. தே கிர கி³ஹிகாலே ஸாவத்தி²யம் குடும்பி³கா அட்³டா⁴ மஹத்³த⁴னா அஞ்ஞமஞ்ஞஸஹாயகா ஏகதோ ஹுத்வா புஞ்ஞானி கரோந்தா ஸத்து² த⁴ம்மதே³ஸனம் ஸுத்வா ‘‘மயம் மஹல்லகா, கிம் நோ க⁴ராவாஸேன, ஸத்து² ஸந்திகே ரமணீயே பு³த்³த⁴ஸாஸனே பப்³ப³ஜித்வா து³க்க²ஸ்ஸந்தம் கரிஸ்ஸாமா’’தி ஸப்³ப³ம் ஸாபதேய்யம் புத்ததீ⁴தாதீ³னம் த³த்வா அஸ்ஸுமுக²ம் ஞாதிஸங்க⁴ம் பஹாய ஸத்தா²ரம் பப்³ப³ஜ்ஜம் யாசித்வா பப்³ப³ஜிம்ஸு. பப்³ப³ஜித்வா பன பப்³ப³ஜ்ஜானுரூபம் ஸமணத⁴ம்மம் ந கரிம்ஸு, மஹல்லகபா⁴வேன த⁴ம்மம்பி ந பரியாபுணிம்ஸு, கி³ஹிகாலே விய பப்³ப³ஜிதகாலேபி விஹாரபரியந்தே பண்ணஸாலம் காரேத்வா ஏகதோவ வஸிம்ஸு. பிண்டா³ய சரந்தாபி அஞ்ஞத்த² அக³ந்த்வா யேபு⁴ய்யேன அத்தனோ புத்ததா³ரஸ்ஸேவ கே³ஹம் க³ந்த்வா பு⁴ஞ்ஜிம்ஸு. தேஸு ஏகஸ்ஸ புராணது³தியிகா ஸப்³பே³ஸம்பி மஹல்லகத்தே²ரானம் உபகாரா அஹோஸி, தஸ்மா ஸேஸாபி அத்தனா லத்³த⁴ம் ஆஹாரம் க³ஹேத்வா தஸ்ஸாயேவ கே³ஹே நிஸீதி³த்வா பு⁴ஞ்ஜந்தி. ஸாபி தேஸம் யதா²ஸன்னிஹிதம் ஸூபப்³யஞ்ஜனம் தே³தி. ஸா அஞ்ஞதரேன ரோகே³ன பு²ட்டா² காலமகாஸி. அத² தே மஹல்லகத்தே²ரா விஹாரம் க³ந்த்வா அஞ்ஞமஞ்ஞம் கீ³வாஸு க³ஹேத்வா ‘‘மது⁴ரஹத்த²ரஸா உபாஸிகா காலகதா’’தி விஹாரபச்சந்தே ரோத³ந்தா விசரிம்ஸு. தேஸம் ஸத்³த³ம் ஸுத்வா இதோ சிதோ ச பி⁴க்கூ² ஸன்னிபதித்வா ‘‘ஆவுஸோ, கஸ்மா ரோத³தா²’’தி புச்சி²ம்ஸு. தே ‘‘அம்ஹாகம் ஸஹாயஸ்ஸ புராணது³தியிகா மது⁴ரஹத்த²ரஸா காலகதா அம்ஹாகம் அதிவிய உபகாரா, ‘இதா³னி குதோ ததா²ரூபிம் லபி⁴ஸ்ஸாமா’தி இமினா காரணேன ரோதி³ம்ஹா’’தி ஆஹம்ஸு.

தேஸம் தம் விப்பகாரம் தி³ஸ்வா பி⁴க்கூ² த⁴ம்மஸபா⁴யம் கத²ம் ஸமுட்டா²பேஸும் ‘‘ஆவுஸோ, இமினா நாம காரணேன மஹல்லகத்தே²ரா அஞ்ஞமஞ்ஞம் கீ³வாஸு க³ஹேத்வா விஹாரபச்சந்தே ரோத³ந்தா விசரந்தீ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவேதே தஸ்ஸா காலகிரியாய ரோத³ந்தா விசரந்தி, புப்³பே³பேதே இமம் காகயோனியம் நிப்³ப³த்தித்வா ஸமுத்³தே³ மதம் நிஸ்ஸாய ‘ஸமுத்³த³உத³கம் உஸ்ஸிஞ்சித்வா ஏதம் நீஹரிஸ்ஸாமா’தி வாயமந்தா பண்டி³தே நிஸ்ஸாய ஜீவிதம் லபி⁴ம்ஸூ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஸமுத்³த³தே³வதா ஹுத்வா நிப்³ப³த்தி. அதே²கோ காகோ அத்தனோ ப⁴ரியம் காகிம் ஆதா³ய கோ³சரம் பரியேஸமானோ ஸமுத்³த³தீரம் அக³மாஸி. தஸ்மிம் காலே மனுஸ்ஸா ஸமுத்³த³தீரே கீ²ரபாயாஸமச்ச²மம்ஸஸுராதீ³ஹி நாக³ப³லிகம்மம் கத்வா பக்கமிம்ஸு. அத² ஸோ காகோ ப³லிகம்மட்டா²னம் க³ந்த்வா கீ²ராதீ³னி தி³ஸ்வா ஸத்³தி⁴ம் காகியா கீ²ரபாயாஸமச்ச²மம்ஸாதீ³னி பு⁴ஞ்ஜித்வா ப³ஹும் ஸுரம் பிவி. தே உபோ⁴பி ஸுராமத³மத்தா ‘‘ஸமுத்³த³கீளம் கீளிஸ்ஸாமா’’தி வேலந்தே நிஸீதி³த்வா ந்ஹாயிதும் ஆரபி⁴ம்ஸு அதே²கா ஊமி ஆக³ந்த்வா காகிம் க³ஹேத்வா ஸமுத்³த³ம் பவேஸேஸி. தமேகோ மச்சோ² மம்ஸம் கா²தி³த்வா அஜ்ஜோ²ஹரி. காகோ ‘‘ப⁴ரியா மே மதா’’தி ரோதி³ பரிதே³வி. அத²ஸ்ஸ பரிதே³வனஸத்³த³ம் ஸுத்வா ப³ஹூ காகா ஸன்னிபதித்வா ‘‘கிம்காரணா ரோத³ஸீ’’தி புச்சி²ம்ஸு. ‘‘ஸஹாயிகா வோ வேலந்தே ந்ஹாயமானா ஊமியா ஹடா’’தி. தே ஸப்³பே³பி ஏகரவம் ரவந்தா ரோதி³ம்ஸு. அத² நேஸம் ஏதத³ஹோஸி ‘‘இத³ம் ஸமுத்³த³உத³கம் நாம அம்ஹாகம் கிம் பஹோஸி, உத³கம் உஸ்ஸிஞ்சித்வா ஸமுத்³த³ம் துச்ச²ம் கத்வா ஸஹாயிகம் நீஹரிஸ்ஸாமா’’தி. தே முக²ம் பூரேத்வா பூரேத்வா உத³கம் ப³ஹி ச²ட்³டே³ந்தி, லோணூத³கேன ச க³லே ஸுஸ்ஸமானே உட்டா²யுட்டா²ய த²லம் க³ந்த்வா விஸ்ஸமந்தி.

தே ஹனூஸு கிலந்தேஸு முகே²ஸு ஸுக்க²ந்தேஸு அக்கீ²ஸு ரத்தேஸு தீ³னா கிலந்தா ஹுத்வா அஞ்ஞமஞ்ஞம் ஆமந்தேத்வா ‘‘அம்போ⁴, மயம் ஸமுத்³த³உத³கம் க³ஹேத்வா ப³ஹி பாதேம, க³ஹிதக³ஹிதட்டா²னம் புன உத³கேன பூரதி, ஸமுத்³த³ம் துச்ச²ம் காதும் ந ஸக்கி²ஸ்ஸாமா’’தி வத்வா இமம் கா³த²மாஹம்ஸு –

146. ‘‘அபி நு ஹனுகா ஸந்தா, முக²ஞ்ச பரிஸுஸ்ஸதி;

ஓரமாம ந பாரேம, பூரதேவ மஹோத³தீ⁴’’தி.

தத்த² அபி நு ஹனுகா ஸந்தாதி அபி நோ ஹனுகா ஸந்தா, அபி அம்ஹாகம் ஹனுகா கிலந்தா. ஓரமாம ந பாரேமாதி மயம் அத்தனோ ப³லேன மஹாஸமுத்³த³உத³கம் ஆகட்³டா⁴ம ஓஸாரேம, துச்ச²ம் பன நம் காதும் ந ஸக்கோம. அயஞ்ஹி பூரதேவ மஹோத³தீ⁴தி.

ஏவஞ்ச பன வத்வா ஸப்³பே³பி தே காகா ‘‘தஸ்ஸா காகியா ஏவரூபம் நாம துண்ட³ம் அஹோஸி, ஏவரூபானி வட்டக்கீ²னி, ஏவரூபம் ச²விஸண்டா²னம், ஏவரூபோ மது⁴ரஸத்³தோ³. ஸா நோ இமம் சோரஸமுத்³த³ம் நிஸ்ஸாய நட்டா²’’தி ப³ஹும் விப்பலபிம்ஸு. தே ஏவம் விப்பலபமானே ஸமுத்³த³தே³வதா பே⁴ரவரூபம் த³ஸ்ஸேத்வா பலாபேஸி, ஏவம் தேஸம் ஸோத்தி² அஹோஸி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ காகீ அயம் புராணது³தியிகா அஹோஸி, காகோ மஹல்லகத்தே²ரோ, ஸேஸகாகா ஸேஸமஹல்லகத்தே²ரா, ஸமுத்³த³தே³வதா பன அஹமேவ அஹோஸி’’ந்தி.

ஸமுத்³த³காகஜாதகவண்ணனா ச²ட்டா².

[147] 7. புப்ப²ரத்தஜாதகவண்ணனா

நயித³ம் து³க்க²ம் அது³ம் து³க்க²ந்தி இத³ம் ஸத்தா² ஜேதவனே விஹரந்தோ ஏகம் உக்கண்டி²தபி⁴க்கு²ம் ஆரப்³ப⁴ கதே²ஸி. ஸோ ஹி ப⁴க³வதா ‘‘ஸச்சம் கிர த்வம் பி⁴க்கு² உக்கண்டி²தோ’’தி வுத்தே ‘‘ஸச்ச’’ந்தி வத்வா ‘‘கேன உக்கண்டா²பிதோஸீ’’தி ச புட்டோ² ‘‘புராணது³தியிகாயா’’தி வத்வா ‘‘மது⁴ரஹத்த²ரஸா, ப⁴ந்தே, ஸா இத்தீ², ந ஸக்கோமி தம் வினா வஸிது’’ந்தி ஆஹ. அத² நம் ஸத்தா² ‘‘ஏஸா தே பி⁴க்கு² அனத்த²காரிகா, புப்³பே³பி த்வம் ஏதம் நிஸ்ஸாய ஸூலே உத்தாஸிதோ ஏதஞ்ஞேவ பத்த²யமானோ காலம் கத்வா நிரயே நிப்³ப³த்தோ, இதா³னி நம் கஸ்மா புன பத்தே²ஸீ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஆகாஸட்ட²தே³வதா அஹோஸி. அத² பா³ராணஸியம் கத்திகரத்திவாரச²ணோ ஸம்பத்தோ ஹோதி, நக³ரம் தே³வனக³ரம் விய அலங்கரிம்ஸு. ஸப்³போ³ ஜனோ க²ணகீளானிஸ்ஸிதோ அஹோஸி. ஏகஸ்ஸ பன து³க்³க³தமனுஸ்ஸஸ்ஸ ஏகமேவ க⁴னஸாடகயுக³ம் அஹோஸி. ஸோ தம் ஸுதோ⁴தம் தோ⁴வாபேத்வா ஓப⁴ஞ்ஜாபேத்வா ஸதவலிகம் ஸஹஸ்ஸவலிகம் காரேத்வா ட²பேஸி. அத² நம் ப⁴ரியா ஏவமாஹ ‘‘இச்சா²மஹம், ஸாமி, ஏகம் குஸும்ப⁴ரத்தம் நிவாஸேத்வா ஏகம் பாருபித்வா தவ கண்டே² லக்³கா³ கத்திகரத்திவாரம் சரிது’’ந்தி. ‘‘ப⁴த்³தே³, குதோ அம்ஹாகம் த³லித்³தா³னம் குஸும்ப⁴ம், ஸுத்³த⁴வத்த²ம் நிவாஸேத்வா கீளாஹீ’’தி? ‘‘குஸும்ப⁴ரத்தம் அலப⁴மானா ச²ணகீளம் ந கீளிஸ்ஸாமி, த்வம் அஞ்ஞம் இத்தி²ம் க³ஹேத்வா கீளஸ்ஸூ’’தி. ‘‘ப⁴த்³தே³, கிம் மம் பீளேஸி, குதோ அம்ஹாகம் குஸும்ப⁴’’ந்தி? ‘‘ஸாமி, புரிஸஸ்ஸ இச்சா²ய ஸதி கிம் நாம நத்தி², நனு ரஞ்ஞோ குஸும்ப⁴வத்து²ஸ்மிம் ப³ஹு குஸும்ப⁴’’ந்தி. ‘‘ப⁴த்³தே³, தம் டா²னம் ரக்க²ஸபரிக்³க³ஹிதபோக்க²ரணிஸதி³ஸம், ப³லவாரக்கா², ந ஸக்கா உபஸங்கமிதும், மா தே ஏதம் ருச்சி, யதா²லத்³தே⁴னேவ துஸ்ஸஸ்ஸூ’’தி. ‘‘ஸாமி, ரத்திபா⁴கே³ அந்த⁴காரே ஸதி புரிஸஸ்ஸ அக³மனீயட்டா²னம் நாம நத்தீ²’’தி. இதி ஸோ தாய புனப்புனம் கதே²ந்தியா கிலேஸவஸேன தஸ்ஸா வசனம் க³ஹேத்வா ‘‘ஹோது ப⁴த்³தே³, மா சிந்தயித்தா²’’தி தம் ஸமஸ்ஸாஸேத்வா ரத்திபா⁴கே³ ஜீவிதம் பரிச்சஜித்வா நக³ரா நிக்க²மித்வா ரஞ்ஞோ குஸும்ப⁴வத்து²ம் க³ந்த்வா வதிம் மத்³தி³த்வா அந்தோவத்து²ம் பாவிஸி. ஆரக்க²மனுஸ்ஸா வதிஸத்³த³ம் ஸுத்வா ‘‘சோரோ சோரோ’’தி பரிவாரேத்வா க³ஹேத்வா பரிபா⁴ஸித்வா கோட்டேத்வா ப³ந்தி⁴த்வா பபா⁴தாய ரத்தியா ரஞ்ஞோ த³ஸ்ஸேஸும். ராஜா ‘‘க³ச்ச²த², நம் ஸூலே உத்தாஸேதா²’’தி ஆஹ. அத² நம் பச்சா²பா³ஹம் ப³ந்தி⁴த்வா வஜ்ஜ²பே⁴ரியா வஜ்ஜமானாய நக³ரா நிக்க²மாபேத்வா ஸூலே உத்தாஸேஸும். ப³லவவேத³னா பவத்தந்தி, காகா ஸீஸே நிலீயித்வா கணயக்³க³ஸதி³ஸேஹி துண்ஹேஹி அக்கீ²னி விஜ்ஜ²ந்தி.

ஸோ ததா²ரூபம்பி து³க்க²ம் அமனஸிகரித்வா தமேவ இத்தி²ம் அனுஸ்ஸரித்வா ‘‘தாய நாமம்ஹி க⁴னபுப்ப²ரத்தவத்த²னிவத்தா²ய கண்டே² ஆஸத்தபா³ஹுயுக³ளாய ஸத்³தி⁴ம் கத்திகரத்திவாரதோ பரிஹீனோ’’தி சிந்தேத்வா இமம் கா³த²மாஹ –

147. ‘‘நயித³ம் து³க்க²ம் அது³ம் து³க்க²ம், யம் மம் துத³தி வாயஸோ;

யம் ஸாமா புப்ப²ரத்தேன, கத்திகம் நானுபோ⁴ஸ்ஸதீ’’தி.

தத்த² நயித³ம் து³க்க²ம் அது³ம் து³க்க²ம், யம் மம் துத³தி வாயஸோதி யஞ்ச இத³ம் ஸூலே லக்³க³னபச்சயம் காயிகசேதஸிகது³க்க²ம், யஞ்ச லோஹமயேஹி விய துண்டே³ஹி வாயஸோ துத³தி, இத³ம் ஸப்³ப³ம்பி மய்ஹம் ந து³க்க²ம், அது³ம் து³க்க²ம் ஏதம்யேவ பன மே து³க்க²ந்தி அத்தோ². கதரம்? யம் ஸாமா புப்ப²ரத்தேன, கத்திகம் நானுபோ⁴ஸ்ஸதீதி, யம் ஸா பியங்கு³ஸாமா மம ப⁴ரியா ஏகம் குஸும்ப⁴ரத்தம் நிவாஸேத்வா ஏகம் பாருபித்வா ஏவம் க⁴னபுப்ப²ரத்தேன வத்த²யுகே³ன அச்ச²ன்னா மம கண்டே² க³ஹேத்வா கத்திகரத்திவாரம் நானுப⁴விஸ்ஸதி, இத³ம் மய்ஹம் து³க்க²ம், ஏததே³வ ஹி மம் பா³த⁴தீதி? ஸோ ஏவம் மாதுகா³மம் ஆரப்³ப⁴ விப்பலபந்தோயேவ காலம் கத்வா நிரயே நிப்³ப³த்தி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ ஜயம்பதிகாவ இதா³னி ஜயம்பதிகா, தம் காரணம் பச்சக்க²ம் கத்வா டி²தா ஆகாஸட்ட²தே³வதா பன அஹமேவ அஹோஸி’’ந்தி.

புப்ப²ரத்தஜாதகவண்ணனா ஸத்தமா.

[148] 8. ஸிங்கா³லஜாதகவண்ணனா

நாஹம் புனம் ந ச புனந்தி இத³ம் ஸத்தா² ஜேதவனே விஹரந்தோ கிலேஸனிக்³க³ஹம் ஆரப்³ப⁴ கதே²ஸி. ஸாவத்தி²யம் கிர பஞ்சஸதமத்தா ஸஹாயகா மஹாவிப⁴வா ஸேட்டி²புத்தா ஸத்து² த⁴ம்மதே³ஸனம் ஸுத்வா ஸாஸனே உரம் த³த்வா பப்³ப³ஜித்வா ஜேதவனே அந்தோகோடிஸந்தா²ரே விஹரிம்ஸு. அதே²கதி³வஸம் தேஸம் அட்³ட⁴ரத்தஸமயே கிலேஸனிஸ்ஸிதோ ஸங்கப்போ உப்பஜ்ஜி. தே உக்கண்டி²த்வா அத்தனா ஜஹிதகிலேஸே புன க³ண்ஹிதும் சித்தம் உப்பாத³யிம்ஸு. அத² ஸத்தா² அட்³ட⁴ரத்தஸமனந்தரே ஸப்³ப³ஞ்ஞுதஞ்ஞாணத³ண்ட³தீ³பகம் உக்கி²பித்வா ‘‘கதராய நு கோ² ரதியா ஜேதவனே பி⁴க்கூ² விஹரந்தீ’’தி பி⁴க்கூ²னம் அஜ்ஜா²ஸயம் ஓலோகேந்தோ தேஸம் பி⁴க்கூ²னம் அப்³ப⁴ந்தரே காமராக³ஸங்கப்பஸ்ஸ உப்பன்னபா⁴வம் அஞ்ஞாஸி. ஸத்தா² ச நாம ஏகபுத்திகா இத்தீ² அத்தனோ புத்தம் விய, ஏகசக்கு²கோ புரிஸோ சக்கு²ம் விய அத்தனோ ஸாவகே ரக்க²தி. புப்³ப³ண்ஹாதீ³ஸு யஸ்மிம் யஸ்மிம் ஸமயே தேஸம் கிலேஸா உப்பஜ்ஜந்தி, தே தேஸம் கிலேஸே ததோ பரம் வட்³டி⁴தும் அத³த்வா தஸ்மிம் தஸ்மிம்யேவ ஸமயே நிக்³க³ண்ஹாதி. தேனஸ்ஸ ஏதத³ஹோஸி ‘‘அயம் சக்கவத்திரஞ்ஞோ அந்தோனக³ரேயேவ சோரானம் உப்பன்னகாலோ விய வத்ததி, இதா³னேவ தேஸம் த⁴ம்மதே³ஸனம் கத்வா தே கிலேஸே நிக்³க³ண்ஹித்வா அரஹத்தம் த³ஸ்ஸாமீ’’தி. ஸோ ஸுரபி⁴க³ந்த⁴குடிதோ நிக்க²மித்வா மது⁴ரஸ்ஸரேன ‘‘ஆனந்தா³’’தி ஆயஸ்மந்தம் த⁴ம்மப⁴ண்டா³கா³ரிகம் ஆனந்த³த்தே²ரம் ஆமந்தேஸி. தே²ரோ ‘‘கிம், ப⁴ந்தே’’தி ஆக³ந்த்வா வந்தி³த்வா அட்டா²ஸி. ‘‘ஆனந்த³, யத்தகா பி⁴க்கூ² அந்தோகோடிஸந்தா²ரே விஹரந்தி, ஸப்³பே³வ க³ந்த⁴குடிபரிவேணே ஸன்னிபாதேஹீ’’தி. ஏவம் கிரஸ்ஸ அஹோஸி ‘‘ஸசாஹம் தேயேவ பஞ்சஸதே பி⁴க்கூ² பக்கோஸாபேஸ்ஸாமி. ‘ஸத்தா²ரா நோ அப்³ப⁴ந்தரே கிலேஸானம் உப்பன்னபா⁴வோ ஞாதோ’தி ஸம்விக்³க³மானஸா த⁴ம்மதே³ஸனம் ஸம்படிச்சி²தும் ந ஸக்கி²ஸ்ஸந்தீ’’தி. தஸ்மா ‘‘ஸப்³பே³ ஸன்னிபாதேஹீ’’தி ஆஹ. தே²ரோ ‘‘ஸாது⁴, ப⁴ந்தே’’தி அவாபுரணம் ஆதா³ய பரிவேணேன பரிவேணம் ஆஹிண்டி³த்வா ஸப்³பே³ பி⁴க்கூ² க³ந்த⁴குடிபரிவேணே ஸன்னிபாதேத்வா பு³த்³தா⁴ஸனம் பஞ்ஞபேஸி.

ஸத்தா² பல்லங்கம் ஆபு⁴ஜித்வா உஜும் காயம் பணிதா⁴ய ஸிலாபத²வியம் பதிட்ட²ஹமானோ ஸினேரு விய பஞ்ஞத்தே பு³த்³தா⁴ஸனே நிஸீதி³ ஆவேளாவேளா யமகயமகா ச²ப்³ப³ண்ணக⁴னபு³த்³த⁴ரஸ்மியோ விஸ்ஸஜ்ஜேந்தோ. தாபி ரஸ்மியோ பாதிமத்தா ச²த்தமத்தா கூடாகா³ரகுச்சி²மத்தா சி²ஜ்ஜித்வா சி²ஜ்ஜித்வா க³க³னதலே விஜ்ஜுலதா விய ஸஞ்சரிம்ஸு, அண்ணவகுச்சி²ம் கோ²பே⁴த்வா பா³லஸூரியுக்³க³மனகாலோ விய அஹோஸி. பி⁴க்கு²ஸங்கோ⁴பி ஸத்தா²ரம் வந்தி³த்வா க³ருசித்தம் பச்சுபட்ட²பேத்வா ரத்தகம்ப³லஸாணியா பரிக்கி²பந்தோ விய பரிவாரேத்வா நிஸீதி³. ஸத்தா² ப்³ரஹ்மஸ்ஸரம் நிச்சா²ரேந்தோ பி⁴க்கூ² ஆமந்தேத்வா ‘‘ந, பி⁴க்க²வே, பி⁴க்கு²னா நாம காமவிதக்கம் ப்³யாபாத³விதக்கம் விஹிம்ஸாவிதக்கந்தி இமே தயோ அகுஸலவிதக்கே விதக்கேதும் வட்டதி. அந்தோ உப்பன்னகிலேஸோ ஹி ‘பரித்தகோ’தி அவமஞ்ஞிதும் ந வட்டதி, கிலேஸோ நாம பச்சாமித்தஸதி³ஸோ. பச்சாமித்தோ ச கு²த்³த³கோ நாம நத்தி², ஓகாஸம் லபி⁴த்வா வினாஸமேவ பாபேதி, ஏவமேவ அப்பமத்தகோபி கிலேஸோ உப்பஜ்ஜித்வா வட்³டி⁴தும் லப⁴ந்தோ மஹாவினாஸம் பாபேதி. கிலேஸோ நாமேஸ ஹலாஹலவிஸூபமோ உப்பாடிதச்ச²விக³ண்ட³ஸதி³ஸோ ஆஸீவிஸபடிபா⁴கோ³ அஸனிஅக்³கி³ஸதி³ஸோ அல்லீயிதும் ந யுத்தோ ஆஸங்கிதப்³போ³. உப்பன்னுப்பன்னக்க²ணேயேவ படிஸங்கா²னப³லேன பா⁴வனாப³லேன யதா² முஹுத்தம்பி ஹத³யே அட்ட²த்வா பது³மினிபத்தா உத³கபி³ந்து³ விய விவட்டதி, ஏவம் பஜஹிதப்³போ³. போராணகபண்டி³ தாபி அப்பமத்தகம்பி கிலேஸம் க³ரஹித்வா யதா² புன அப்³ப⁴ந்தரே நுப்பஜ்ஜதி, ஏவம் நிக்³க³ண்ஹிம்ஸூ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஸிங்கா³லயோனியம் படிஸந்தி⁴ம் க³ஹேத்வா அரஞ்ஞே நதீ³தீரே நிவாஸம் கப்பேஸி. அதே²கோ ஜரஹத்தீ² க³ங்கா³தீரே காலமகாஸி. ஸிங்கா³லோ கோ³சரப்பஸுதோ தம் மதஹத்தி²ஸரீரம் தி³ஸ்வா ‘‘மஹா மே கோ³சரோ உப்பன்னோ’’தி க³ந்த்வா தம் ஸோண்டே³ ட³ம்ஸி, நங்க³லீஸாய த³ட்ட²காலோ விய அஹோஸி. ஸோ ‘‘நத்தே²த்த² கா²தி³தப்³ப³யுத்தக’’ந்தி த³ந்தேஸு ட³ம்ஸி, த²ம்பே⁴ த³ட்ட²காலோ விய அஹோஸி. கண்ணே ட³ம்ஸி, ஸுப்பகோடியம் த³ட்ட²காலோ விய அஹோஸி. உத³ரே ட³ம்ஸி, குஸூலே த³ட்ட²காலோ விய அஹோஸி. பாதே³ ட³ம்ஸி, உது³க்க²லே த³ட்ட²காலோ விய அஹோஸி. நங்கு³ட்டே² ட³ம்ஸி, முஸலே த³ட்ட²காலோ விய அஹோஸி. ஸோ ‘‘ஏத்தா²பி நத்தி² கா²தி³தப்³ப³யுத்தக’’ந்தி ஸப்³ப³த்த² அஸ்ஸாத³ம் அலப⁴ந்தோ வச்சமக்³கே³ ட³ம்ஸி, முது³பூவே த³ட்ட²காலோ விய அஹோஸி. ஸோ ‘‘லத்³த⁴ம் தா³னி மே இமஸ்மிம் ஸரீரே முது³ கா²தி³தப்³ப³யுத்தகட்டா²ன’’ந்தி ததோ பட்டா²ய கா²த³ந்தோ அந்தோகுச்சி²ம் பவிஸித்வா வக்கஹத³யாதீ³னி கா²தி³த்வா பிபாஸிதகாலே லோஹிதம் பிவித்வா நிபஜ்ஜிதுகாமகாலே உத³ரம் பத்த²ரித்வா நிபஜ்ஜதி.

அத²ஸ்ஸ ஏதத³ஹோஸி – ‘‘இத³ம் ஹத்தி²ஸரீரம் மய்ஹம் நிவாஸஸுக²தாய கே³ஹஸதி³ஸம், கா²தி³துகாமதாய ஸதி பஹூதமம்ஸம், கிம் தா³னி மே அஞ்ஞத்த² கம்ம’’ந்தி ஸோ அஞ்ஞத்த² அக³ந்த்வா ஹத்தி²குச்சி²யம்யேவ மம்ஸம் கா²தி³த்வா வஸதி. க³ச்ச²ந்தே க³ச்ச²ந்தே காலே நிதா³கே⁴ வாதஸம்ப²ஸ்ஸேன சேவ ஸூரியரஸ்மிஸந்தாபேன ச தம் குணபம் ஸுஸ்ஸித்வா வலியோ க³ண்ஹி, ஸிங்கா³லஸ்ஸ பவிட்ட²த்³வாரம் பிஹிதம், அந்தோகுச்சி²யம் அந்த⁴காரோ அஹோஸி. ஸிங்கா³லஸ்ஸ லோகந்தரிகனிவாஸோ விய ஜாதோ. குணபே ஸுஸ்ஸந்தே மம்ஸம்பி ஸுஸ்ஸி, லோஹிதம்பி பச்சி²ஜ்ஜி. ஸோ நிக்க²மனத்³வாரம் அலப⁴ந்தோ ப⁴யப்பத்தோ ஹுத்வா ஸந்தா⁴வந்தோ இதோ சிதோ ச பஹரித்வா நிக்க²மனத்³வாரம் பரியேஸமானோ விசரதி. ஏவம் தஸ்மிம் உக்க²லியம் பிட்ட²பிண்டி³ விய அந்தோகுச்சி²யம் பச்சமானே கதிபாஹச்சயேன மஹாமேகோ⁴ பாவஸ்ஸி. அத² நம் குணபம் தேமேத்வா உட்டா²ய பகதிஸண்டா²னேன அட்டா²ஸி. வச்சமக்³கோ³ விவடோ ஹுத்வா தாரகா விய பஞ்ஞாயி. ஸிங்கா³லோ தம் சி²த்³த³ம் தி³ஸ்வா ‘‘இதா³னி மே ஜீவிதம் லத்³த⁴’’ந்தி யாவ ஹத்தி²ஸீஸா படிக்கமித்வா வேகே³ன பக்க²ந்தி³த்வா வச்சமக்³க³ம் ஸீஸேன பஹரித்வா நிக்க²மி. தஸ்ஸ ஸஞ்ச²ன்னஸரீரத்தா ஸப்³ப³லோமானி வச்சமக்³கே³ அல்லீயிம்ஸு. ஸோ தாலக்க²ந்த⁴ஸதி³ஸேன நில்லோமேன ஸரீரேன உப்³பி³க்³க³சித்தோ முஹுத்தம் தா⁴வித்வா நிவத்தித்வா நிஸின்னோ ஸரீரம் ஓலோகேத்வா ‘‘இத³ம் து³க்க²ம் மய்ஹம் ந அஞ்ஞேன கதம், லோப⁴ஹேது பன லோப⁴காரணா லோப⁴ம் நிஸ்ஸாய மயா ஏதம் கதம், இதோ தா³னி பட்டா²ய ந லோப⁴வஸிகோ ப⁴விஸ்ஸாமி, புன ஹத்தி²ஸரீரம் நாம ந பவிஸிஸ்ஸாமீ’’தி ஸம்விக்³க³ஹத³யோ ஹுத்வா இமம் கா³த²மாஹ –

148. ‘‘நாஹம் புனம் ந ச புனம், ந சாபி அபுனப்புனம்;

ஹத்தி²போ³ந்தி³ம் பவேக்கா²மி, ததா² ஹி ப⁴யதஜ்ஜிதோ’’தி.

தத்த² ந சாபி அபுனப்புனந்தி அ-காரோ நிபாதமத்தோ. அயம் பனேதிஸ்ஸா ஸகலாயபி கா³தா²ய அத்தோ² – அஹஞ்ஹி இதோ புன, ததோ ச புனாதி வுத்தவாரதோ புன ததோபி ச புனப்புனம் வாரணஸரீரஸங்கா²தம் ஹத்தி²போ³ந்தி³ம் ந பவேக்கா²மி. கிம்காரணா? ததா² ஹி ப⁴யதஜ்ஜிதோ, ததா² ஹி அஹம் இமஸ்மிஞ்ஞேவ பவேஸனே ப⁴யதஜ்ஜிதோ மரணப⁴யேன ஸந்தாஸம் ஸம்வேக³ம் ஆபாதி³தோதி.

ஏவஞ்ச பன வத்வா ததோவ பலாயித்வா புன தம் வா அஞ்ஞம் வா ஹத்தி²ஸரீரம் நிவத்தித்வாபி ந ஓலோகேஸி. ததோ பட்டா²ய ந லோப⁴வஸிகோ அஹோஸி.

ஸத்தா² இமம் த⁴ம்மதே³ஸனம் ஆஹரித்வா ‘‘பி⁴க்க²வே, அந்தோ உப்பன்னகிலேஸஸ்ஸ நாம வட்³டி⁴தும் அத³த்வா தத்த² தத்தே²வ நம் நிக்³க³ண்ஹிதும் வட்டதீ’’தி வத்வா ஸச்சானி பகாஸேத்வா ஜாதகம் ஸமோதா⁴னேஸி. ஸச்சபரியோஸானே பஞ்சஸதாபி தே பி⁴க்கூ² அரஹத்தே பதிட்ட²ஹிம்ஸு, அவஸேஸேஸு கேசி ஸோதாபன்னா, கேசி ஸகதா³கா³மினோ, கேசி அனாகா³மினோ அஹேஸும். ததா³ ஸிங்கா³லோ அஹமேவ அஹோஸிந்தி.

ஸிங்கா³லஜாதகவண்ணனா அட்ட²மா.

[149] 9. ஏகபண்ணஜாதகவண்ணனா

ஏகபண்ணோ அயம் ருக்கோ²தி இத³ம் ஸத்தா² வேஸாலிம் உபனிஸ்ஸாய மஹாவனே கூடாகா³ரஸாலாயம் விஹரந்தோ வேஸாலிகம் து³ட்ட²லிச்ச²விகுமாரம் ஆரப்³ப⁴ கதே²ஸி. தஸ்மிஞ்ஹி காலே வேஸாலினக³ரம் கா³வுதகா³வுதந்தரே தீஹி பாகாரேஹி பரிக்கி²த்தம் தீஸு டா²னேஸு கோ³புரட்டாலகயுத்தம் பரமஸோப⁴க்³க³ப்பத்தம். தத்த² நிச்சகாலம் ரஜ்ஜம் காரேத்வா வஸந்தானஞ்ஞேவ ராஜூனம் ஸத்த ஸஹஸ்ஸானி ஸத்த ஸதானி ஸத்த ச ராஜானோ ஹோந்தி, தத்தகாயேவ உபராஜானோ, தத்தகா ஸேனாபதினோ, தத்தகா ப⁴ண்டா³கா³ரிகா. தேஸம் ராஜகுமாரானம் அந்தரே ஏகோ து³ட்ட²லிச்ச²விகுமாரோ நாம அஹோஸி கோத⁴னோ சண்டோ³ ப²ருஸோ ஸாஹஸிகோ, த³ண்டே³ன க⁴ட்டிதஆஸீவிஸோ விய நிச்சம் பஜ்ஜலிதோ கோதே⁴ன. தஸ்ஸ புரதோ த்³வே தீணி வசனானி கதே²தும் ஸமத்தோ² நாம நத்தி². தம் நேவ மாதாபிதரோ, ந ஞாதயோ, ந மித்தஸுஹஜ்ஜா ஸிக்கா²பேதும் ஸக்கி²ம்ஸு. அத²ஸ்ஸ மாதாபிதூனம் ஏதத³ஹோஸி ‘‘அயம் குமாரோ அதிப²ருஸோ ஸாஹஸிகோ, ட²பேத்வா ஸம்மாஸம்பு³த்³த⁴ம் அஞ்ஞோ இமம் வினேதும் ஸமத்தோ² நாம நத்தி², பு³த்³த⁴வேனேய்யேன ப⁴விதப்³ப³’’ந்தி. தே தம் ஆதா³ய ஸத்து² ஸந்திகம் க³ந்த்வா வந்தி³த்வா ஆஹம்ஸு ‘‘ப⁴ந்தே, அயம் குமாரோ சண்டோ³ ப²ருஸோ கோதே⁴ன பஜ்ஜலதி, இமஸ்ஸ ஓவாத³ம் தே³தா²’’தி.

ஸத்தா² தம் குமாரம் ஓவதி³ – ‘‘குமார, இமேஸு நாம ஸத்தேஸு சண்டே³ன ப²ருஸேன ஸாஹஸிகேன விஹேட²கஜாதிகேன ந ப⁴விதப்³ப³ம், ப²ருஸவாசோ ச நாம விஜாதமாதுயாபி பிதுனோபி புத்ததா³ரஸ்ஸபி பா⁴திப⁴கி³னீனம்பி பஜாபதியாபி மித்தப³ந்த⁴வானம்பி அப்பியோ ஹோதி அமனாபோ, ட³ம்ஸிதும் ஆக³ச்ச²ந்தோ ஸப்போ விய, அடவியம் உட்டி²தசோரோ விய, கா²தி³தும் ஆக³ச்ச²ந்தோ யக்கோ² விய ச உப்³பே³ஜனீயோ ஹுத்வா து³தியசித்தவாரே நிரயாதீ³ஸு நிப்³ப³த்ததி. தி³ட்டே²யேவ ச த⁴ம்மே கோத⁴னோ புக்³க³லோ மண்டி³தபஸாதி⁴தோபி து³ப்³ப³ண்ணோவ ஹோதி, புண்ணசந்த³ஸஸ்ஸிரிகம்பிஸ்ஸ முக²ம் ஜாலாபி⁴ஹதபது³மம் விய மலக்³க³ஹிதகஞ்சனாதா³ஸமண்ட³லம் விய ச விரூபம் ஹோதி து³த்³த³ஸிகம். கோத⁴ம் நிஸ்ஸாய ஹி ஸத்தா ஸத்த²ம் ஆதா³ய அத்தனாவ அத்தானம் பஹரந்தி, விஸம் கா²த³ந்தி, ரஜ்ஜுயா உப்³ப³ந்த⁴ந்தி, பபாதா பபதந்தி. ஏவம் கோத⁴வஸேன காலம் கத்வா நிரயாதீ³ஸு உப்பஜ்ஜந்தி, விஹேட²கஜாதிகாபி தி³ட்டே²வ த⁴ம்மே க³ரஹம் பத்வா காயஸ்ஸ பே⁴தா³ நிரயாதீ³ஸு உப்பஜ்ஜந்தி, புன மனுஸ்ஸத்தம் லபி⁴த்வா விஜாதகாலதோ பட்டா²ய ரோக³ப³ஹுலாவ ஹோந்தி. சக்கு²ரோகோ³ ஸோதரோகோ³திஆதீ³ஸு ச ரோகே³ஸு ஏகதோ உட்டா²ய ஏகஸ்மிம் பதந்தி, ரோகே³ன அபரிமுத்தாவ ஹுத்வா நிச்சம் து³க்கி²தாவ ஹோந்தி, தஸ்மா ஸப்³பே³ஸு ஸத்தேஸு மேத்தசித்தேன ஹிதசித்தேன முது³சித்தேன ப⁴விதப்³ப³ம். ஏவரூபோ ஹி புக்³க³லோ நிரயாதி³ப⁴யேஹி ந பரிமுச்சதீ’’தி. ஸோ குமாரோ ஸத்து² ஓவாத³ம் ஸுத்வா ஏகோவாதே³னேவ நிஹதமானோ த³ந்தோ நிப்³பி³ஸேவனோ மேத்தசித்தோ முது³சித்தோ அஹோஸி. அஞ்ஞம் அக்கோஸந்தம்பி பஹரந்தம்பி நிவத்தித்வா ந ஓலோகேஸி, உத்³த⁴டதா³டோ² விய ஸப்போ, அளச்சி²ன்னோ விய கக்கடகோ, சி²ன்னவிஸாணோ விய ச உஸபோ⁴ அஹோஸி.

தஸ்ஸ தம் பவத்திம் ஞத்வா பி⁴க்கூ² த⁴ம்மஸபா⁴யம் கத²ம் ஸமுட்டா²பேஸும் ‘‘ஆவுஸோ, து³ட்ட²லிச்ச²விகுமாரம் ஸுசிரம்பி ஓவதி³த்வா நேவ மாதாபிதரோ, ந ஞாதிமித்தாத³யோ த³மேதும் ஸக்கி²ம்ஸு, ஸம்மாஸம்பு³த்³தோ⁴ பன தம் ஏகோவாதே³னேவ த³மேத்வா நிப்³பி³ஸேவனம் கத்வா மத்தவரவாரணம் விய ஸமுக்³க³ஹிதானேஞ்ஜகாரணம் அகாஸி. யாவ ஸுபா⁴ஸிதம் சித³ம் – ‘ஹத்தி²த³மகேன, பி⁴க்க²வே, ஹத்தி²த³ம்மோ ஸாரிதோ ஏகம்யேவ தி³ஸம் தா⁴வதி புரத்தி²மம் வா பச்சி²மம் வா உத்தரம் வா த³க்கி²ணம் வா. அஸ்ஸத³மகேன…பே… கோ³த³மகேன…பே… த³க்கி²ணம் வா. ததா²க³தேன ஹி, பி⁴க்க²வே, அரஹதா ஸம்மாஸம்பு³த்³தே⁴ன புரிஸத³ம்மோ ஸாரிதோ அட்ட² தி³ஸா விதா⁴வதி, ரூபீ ரூபானி பஸ்ஸதி. அயமேகா தி³ஸா…பே… ஸோ வுச்சதி ‘யோக்³கா³சரியானம் அனுத்தரோ புரிஸத³ம்மஸாரதீ²’தி (ம. நி. 3.312). ந ஹி, ஆவுஸோ, ஸம்மாஸம்பு³த்³தே⁴ன ஸதி³ஸோ புரிஸத³ம்மஸாரதீ² நாம அத்தீ²’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவேஸ மயா ஏகோவாதே³னேவ த³மிதோ, புப்³பே³பாஹம் இமம் ஏகோவாதே³னேவ த³மேஸி’’ந்தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ உதி³ச்சப்³ராஹ்மணகுலே நிப்³ப³த்தித்வா வயப்பத்தோ தக்கஸிலாயம் தயோ வேதே³ ஸப்³ப³ஸிப்பானி ச உக்³க³ஹேத்வா கிஞ்சி காலம் க⁴ராவாஸம் வஸித்வா மாதாபிதூனம் அச்சயேன இஸிபப்³ப³ஜ்ஜம் பப்³ப³ஜித்வா அபி⁴ஞ்ஞா ச ஸமாபத்தியோ ச நிப்³ப³த்தேத்வா ஹிமவந்தே வாஸம் கப்பேஸி. தத்த² சிரம் வஸித்வா லோணம்பி³லஸேவனத்தா²ய ஜனபத³ம் க³ந்த்வா பா³ராணஸிம் பத்வா ராஜுய்யானே வஸித்வா புனதி³வஸே ஸுனிவத்தோ² ஸுபாருதோ தாபஸாகப்பஸம்பன்னோ பி⁴க்கா²ய நக³ரம் பவிஸித்வா ராஜங்க³ணம் பாபுணி. ராஜா ஸீஹபஞ்ஜரேன ஓலோகேந்தோ தம் தி³ஸ்வா இரியாபதே² பஸீதி³த்வா ‘‘அயம் தாபஸோ ஸந்திந்த்³ரியோ ஸந்தமானஸோ யுக³மத்தத³ஸோ, பத³வாரே பத³வாரே ஸஹஸ்ஸத்த²விகம் ட²பேந்தோ விய ஸீஹவிஜம்பி⁴தேன ஆக³ச்ச²தி. ஸசே ஸந்தத⁴ம்மோ நாமேகோ அத்தி², இமஸ்ஸ தேனப்³ப⁴ந்தரே ப⁴விதப்³ப³’’ந்தி சிந்தேத்வா ஏகம் அமச்சம் ஓலோகேஸி. ஸோ ‘‘கிம் கரோமி, தே³வா’’தி ஆஹ. ஏதம் ‘‘தாபஸம் ஆனேஹீ’’தி. ஸோ ‘‘ஸாது⁴, தே³வா’’தி போ³தி⁴ஸத்தம் உபஸங்கமித்வா வந்தி³த்வா ஹத்த²தோ பி⁴க்கா²பா⁴ஜனம் க³ஹேத்வா ‘‘கிம், மஹாபுஞ்ஞா’’தி வுத்தே ‘‘ப⁴ந்தே, ராஜா தம் பக்கோஸதீ’’தி ஆஹ. போ³தி⁴ஸத்தோ ‘‘ந மயம் ராஜகுலூபகா, ஹேமவந்திகா நாமம்ஹா’’தி ஆஹ. அமச்சோ க³ந்த்வா தமத்த²ம் ரஞ்ஞோ ஆரோசேஸி. ராஜா ‘‘அஞ்ஞோ அம்ஹாகம் குலூபகோ நத்தி², ஆனேஹி ந’’ந்தி ஆஹ. அமச்சோ க³ந்த்வா போ³தி⁴ஸத்தம் வந்தி³த்வா யாசித்வா ராஜனிவேஸனம் பவேஸேஸி.

ராஜா போ³தி⁴ஸத்தம் வந்தி³த்வா ஸமுஸ்ஸிதஸேதச்ச²த்தே கஞ்சனபல்லங்கே நிஸீதா³பேத்வா அத்தனோ படியத்தம் நானக்³க³ரஸபோ⁴ஜனம் போ⁴ஜேத்வா ‘‘கஹம், ப⁴ந்தே, வஸதா²’’தி புச்சி². ‘‘ஹேமவந்திகா மயம், மஹாராஜா’’தி. ‘‘இதா³னி கஹம் க³ச்ச²தா²’’தி? ‘‘வஸ்ஸாரத்தானுரூபம் ஸேனாஸனம் உபதா⁴ரேம, மஹாராஜா’’தி. ‘‘தேன ஹி, ப⁴ந்தே, அம்ஹாகஞ்ஞேவ உய்யானே வஸதா²’’தி படிஞ்ஞம் க³ஹேத்வா ஸயம்பி பு⁴ஞ்ஜித்வா போ³தி⁴ஸத்தம் ஆதா³ய உய்யானம் க³ந்த்வா பண்ணஸாலம் மாபேத்வா ரத்திட்டா²னதி³வாட்டா²னாபி காரேத்வா பப்³ப³ஜிதபரிக்கா²ரே த³த்வா உய்யானபாலம் படிச்சா²பேத்வா நக³ரம் பாவிஸி. ததோ பட்டா²ய போ³தி⁴ஸத்தோ உய்யானே வஸதி. ராஜாபிஸ்ஸ தி³வஸே தி³வஸே த்³வத்திக்க²த்தும் உபட்டா²னம் க³ச்ச²தி.

தஸ்ஸ பன ரஞ்ஞோ து³ட்ட²குமாரோ நாம புத்தோ அஹோஸி சண்டோ³ ப²ருஸோ, நேவ நம் ராஜா த³மேதும் அஸக்கி², ந ஸேஸஞாதகா. அமச்சாபி ப்³ராஹ்மணக³ஹபதிகாபி ஏகதோ ஹுத்வா ‘‘ஸாமி, மா ஏவம் கரி, ஏவம் காதும் ந லப்³பா⁴’’தி குஜ்ஜி²த்வா கதே²ந்தாபி கத²ம் கா³ஹாபேதும் நாஸக்கி²ம்ஸு. ராஜா சிந்தேஸி ‘‘ட²பேத்வா மம அய்யம் ஹிமவந்ததாபஸம் அஞ்ஞோ இமம் குமாரம் த³மேதும் ஸமத்தோ² நாம நத்தி², ஸோயேவ நம் த³மேஸ்ஸதீ’’தி. ஸோ குமாரம் ஆதா³ய போ³தி⁴ஸத்தஸ்ஸ ஸந்திகம் க³ந்த்வா ‘‘ப⁴ந்தே, அயம் குமாரோ சண்டோ³ ப²ருஸோ, மயம் இமம் த³மேதும் ந ஸக்கோம, தும்ஹே நம் ஏகேன உபாயேன ஸிக்கா²பேதா²’’தி குமாரம் போ³தி⁴ஸத்தஸ்ஸ நிய்யாதே³த்வா பக்காமி. போ³தி⁴ஸத்தோ குமாரம் க³ஹேத்வா உய்யானே விசரந்தோ ஏகதோ ஏகேன, ஏகதோ ஏகேனாதி த்³வீஹியேவ பத்தேஹி ஏகம் நிம்ப³போதகம் தி³ஸ்வா குமாரம் ஆஹ – ‘‘குமார, ஏதஸ்ஸ தாவ ருக்க²போதகஸ்ஸ பண்ணம் கா²தி³த்வா ரஸம் ஜானாஹீ’’தி? ஸோ தஸ்ஸ ஏகம் பத்தம் கா²தி³த்வா ரஸம் ஞத்வா ‘‘தீ⁴’’தி ஸஹ கே²ளேன பூ⁴மியம் நுட்டா²பி⁴. ‘‘கிம் ஏதம், குமாரா’’தி வுத்தே ‘‘ப⁴ந்தே, இதா³னேவேஸ ருக்கோ² ஹலாஹலவிஸூபமோ, வட்³ட⁴ந்தோ பன ப³ஹூ மனுஸ்ஸே மாரேஸ்ஸதீ’’தி தம் நிம்ப³போதகம் உப்பாடேத்வா ஹத்தே²ஹி பரிமத்³தி³த்வா இமம் கா³த²மாஹ –

149. ‘‘ஏகபண்ணோ அயம் ருக்கோ², ந பூ⁴ம்யா சதுரங்கு³லோ;

ப²லேன விஸகப்பேன, மஹாயம் கிம் ப⁴விஸ்ஸதீ’’தி.

தத்த² ஏகபண்ணோதி உபோ⁴ஸு பஸ்ஸேஸு ஏகேகபண்ணோ. ந பூ⁴ம்யா சதுரங்கு³லோதி பூ⁴மிதோ சதுரங்கு³லமத்தம்பி ந வட்³டி⁴தோ. ப²லேனாதி ப²லரஸேன. விஸகப்பேனாதி ஹலாஹலவிஸஸதி³ஸேன. ஏவம் கு²த்³த³கோபி ஸமானோ ஏவரூபேன தித்தகேன பண்ணேன ஸமன்னாக³தோதி அத்தோ². மஹாயம் கிம் ப⁴விஸ்ஸதீதி யதா³ பனாயம் வுத்³தி⁴ப்பத்தோ மஹா ப⁴விஸ்ஸதி, ததா³ கிம் நாம ப⁴விஸ்ஸதி, அத்³தா⁴ மனுஸ்ஸமாரகோ ப⁴விஸ்ஸதீதி ஏதம் உப்பாடேத்வா மத்³தி³த்வா ச²ட்³டே³ஸிந்தி ஆஹ.

அத² நம் போ³தி⁴ஸத்தோ ஏதத³வோச ‘‘குமார, த்வம் இமம் நிம்ப³போதகம் ‘இதா³னேவ ஏவம்தித்தகோ, மஹல்லககாலே கிம் ப⁴விஸ்ஸதி, குதோ இமம் நிஸ்ஸாய வுட்³டீ⁴’தி உப்பாடேத்வா மத்³தி³த்வா ச²ட்³டே³ஸி? யதா² த்வம் ஏதஸ்மிம் படிபஜ்ஜி, ஏவமேவ தவ ரட்ட²வாஸினோபி ‘அயம் குமாரோ த³ஹரகாலேயேவ ஏவம் சண்டோ³ ப²ருஸோ, மஹல்லககாலே ரஜ்ஜம் பத்வா கிம் நாம கரிஸ்ஸதி, குதோ அம்ஹாகம் ஏதம் நிஸ்ஸாய வுட்³டீ⁴’தி தவ குலஸந்தகம் ரஜ்ஜம் அத³த்வா நிம்ப³போதகம் விய தம் உப்பாடேத்வா ரட்டா² பப்³பா³ஜனீயகம்மம் கரிஸ்ஸந்தி, தஸ்மா நிம்ப³ருக்க²படிபா⁴க³தம் ஹித்வா இதோ பட்டா²ய க²ந்திமேத்தானுத்³த³யஸம்பன்னோ ஹோஹீ’’தி. ஸோ ததோ பட்டா²ய நிஹதமானோ நிப்³பி³ஸேவனோ க²ந்திமேத்தானுத்³த³யஸம்பன்னோ ஹுத்வா போ³தி⁴ஸத்தஸ்ஸ ஓவாதே³ ட²த்வா பிது அச்சயேன ரஜ்ஜம் பத்வா தா³னாதீ³னி புஞ்ஞானி கத்வா யதா²கம்மம் அக³மாஸி.

ஸத்தா² இமம் த⁴ம்மதே³ஸனம் ஆஹரித்வா ‘‘ந, பி⁴க்க²வே, இதா³னேவேஸ து³ட்ட²லிச்ச²விகுமாரோ மயா த³மிதோ, புப்³பே³பாஹம் ஏதம் த³மேஸிம்யேவா’’தி வத்வா ஜாதகம் ஸமோதா⁴னேஸி – ‘‘ததா³ து³ட்ட²குமாரோ அயம் லிச்ச²விகுமாரோ அஹோஸி, ராஜா ஆனந்தோ³, ஓவாத³தா³யகதாபஸோ பன அஹமேவ அஹோஸி’’ந்தி.

ஏகபண்ணஜாதகவண்ணனா நவமா.

[150] 10. ஸஞ்ஜீவஜாதகவண்ணனா

அஸந்தம் யோ பக்³க³ண்ஹாதீதி இத³ம் ஸத்தா² வேளுவனே விஹரந்தோ அஜாதஸத்துஸ்ஸ ரஞ்ஞோ அஸந்தபக்³க³ஹம் ஆரப்³ப⁴ கதே²ஸி. ஸோ ஹி பு³த்³தா⁴னம் படிகண்டகபூ⁴தே து³ஸ்ஸீலே பாபத⁴ம்மே தே³வத³த்தே பஸீதி³த்வா தம் அஸந்தம் அஸப்புரிஸம் பக்³க³ய்ஹ ‘‘தஸ்ஸ ஸக்காரம் கரிஸ்ஸாமீ’’தி ப³ஹும் த⁴னம் பரிச்சஜித்வா க³யாஸீஸே விஹாரம் காரேத்வா தஸ்ஸேவ வசனம் க³ஹேத்வா பிதரம் த⁴ம்மராஜானம் ஸோதாபன்னம் அரியஸாவகம் கா⁴தேத்வா அத்தனோ ஸோதாபத்திமக்³க³ஸ்ஸ உபனிஸ்ஸயம் பி⁴ந்தி³த்வா மஹாவினாஸம் பத்தோ. ஸோ ஹி ‘‘தே³வத³த்தோ பத²வியம் பவிட்டோ²’’தி ஸுத்வா ‘‘கச்சி நு கோ² மம்பி பத²வீ கி³லேய்யா’’தி பீ⁴ததஸிதோ ரஜ்ஜஸுக²ம் ந லப⁴தி, ஸயனே அஸ்ஸாத³ஸுக²ம் ந விந்த³தி, திப்³ப³காரணாபி⁴துன்னோ ஹத்தி²போதோ விய கம்பமானோ விசரதி. ஸோ பத²விம் ப²லமானம் விய, அவீசிஜாலம் நிக்க²மந்திம் விய, பத²வியா அத்தானம் கி³லியமானம் விய, ஆதி³த்தாய லோஹபத²வியா உத்தானகம் நிபஜ்ஜாபேத்வா அயஸூலேஹி கோடியமானம் விய ச ஸமனுபஸ்ஸி. தேனஸ்ஸ பஹடகுக்குடஸ்ஸேவ முஹுத்தம்பி கம்பமானஸ்ஸ அவத்தா²னம் நாம நாஹோஸி. ஸோ ஸம்மாஸம்பு³த்³த⁴ம் பஸ்ஸிதுகாமோ க²மாபேதுகாமோ பஞ்ஹம் புச்சி²துகாமோ அஹோஸி, அத்தனோ பன அபராத⁴மஹந்ததாய உபஸங்கமிதும் ந ஸக்கோதி.

அத²ஸ்ஸ ராஜக³ஹனக³ரே கத்திகரத்திவாரே ஸம்பத்தே தே³வனக³ரம் விய நக³ரே அலங்கதே மஹாதலே அமச்சக³ணபரிவுதஸ்ஸ கஞ்சனாஸனே நிஸின்னஸ்ஸ ஜீவகம் கோமாரப⁴ச்சம் அவிதூ³ரே நிஸின்னம் தி³ஸ்வா ஏதத³ஹோஸி ‘‘ஜீவகம் க³ஹேத்வா ஸம்மாஸம்பு³த்³த⁴ஸ்ஸ ஸந்திகம் க³மிஸ்ஸாமி, ந கோ² பன ஸக்கா மயா உஜுகமேவ வத்தும் ‘அஹம், ஸம்ம ஜீவக, ஸயம் க³ந்தும் ந ஸக்கோமி, ஏஹி மம் ஸத்து² ஸந்திகம் நேஹீ’தி, பரியாயேன பன ரத்திஸம்பத³ம் வண்ணேத்வா ‘கம் நு க்²வஜ்ஜ மயம் ஸமணம் வா ப்³ராஹ்மணம் வா பயிருபாஸேய்யாம, யம் நோ பயிருபாஸதம் சித்தம் பஸீதே³ய்யா’தி வக்கா²மி, தம் ஸுத்வா அமச்சா அத்தனோ அத்தனோ ஸத்தா²ரானம் வண்ணம் கதே²ஸ்ஸந்தி, ஜீவகோபி ஸம்மாஸம்பு³த்³த⁴ஸ்ஸ வண்ணம் கதே²ஸ்ஸதி. அத² நம் க³ஹேத்வா ஸத்து² ஸந்திகம் க³மிஸ்ஸாமீ’’தி. ஸோ பஞ்சஹி பதே³ஹி ரத்திம் வண்ணேஸி ‘‘லக்க²ஞ்ஞா வத போ⁴ தோ³ஸினா ரத்தி, அபி⁴ரூபா வத போ⁴ தோ³ஸினா ரத்தி, த³ஸ்ஸனீயா வத போ⁴ தோ³ஸினா ரத்தி, பாஸாதி³கா வத போ⁴ தோ³ஸினா ரத்தி, ரமணீயா வத போ⁴ தோ³ஸினா ரத்தி, கம் நு க்²வஜ்ஜ மயம் ஸமணம் வா ப்³ராஹ்மணம் வா பயிருபாஸேய்யாம, யம் நோ பயிருபாஸதம் சித்தம் பஸீதே³ய்யா’’தி (தீ³. நி. 1.150).

அதே²கோ அமச்சோ பூரணகஸ்ஸபஸ்ஸ வண்ணம் கதே²ஸி, ஏகோ மக்க²லிகோ³ஸாலஸ்ஸ, ஏகோ அஜிதகேஸகம்ப³லஸ்ஸ, ஏகோ பகுத⁴கச்சாயனஸ்ஸ, ஏகோ ஸஞ்சயஸ்ஸ பே³லட்ட²புத்தஸ்ஸ, ஏகோ நாடபுத்தனிக³ண்ட²ஸ்ஸாதி. ராஜா தேஸம் கத²ம் ஸுத்வா துண்ஹீ அஹோஸி. ஸோ ஹி ஜீவகஸ்ஸேவ மஹாஅமச்சஸ்ஸ கத²ம் பச்சாஸீஸதி. ஜீவகோபி ‘‘ரஞ்ஞா மம் ஆரப்³ப⁴ கதி²தேயேவ ஜானிஸ்ஸாமீ’’தி அவிதூ³ரே துண்ஹீ நிஸீதி³. அத² நம் ராஜா ஆஹ ‘‘த்வம் பன, ஸம்ம ஜீவக, கிம் துண்ஹீ’’தி? தஸ்மிம் க²ணே ஜீவகோ உட்டா²யாஸனா யேன ப⁴க³வா தேனஞ்ஜலிம் பணாமேத்வா ‘‘ஏஸோ, தே³வ, ப⁴க³வா அரஹம் ஸம்மாஸம்பு³த்³தோ⁴ அம்ஹாகம் அம்ப³வனே விஹரதி ஸத்³தி⁴ம் அட்³ட⁴தேளஸேஹி பி⁴க்கு²ஸதேஹி. தம் கோ² பன ப⁴க³வந்தம் ஏவம் கல்யாணோ கித்திஸத்³தோ³ அப்³பு⁴க்³க³தோ’’தி நவ அரஹாதி³கு³ணே வத்வா ஜாதிதோ பட்டா²ய புப்³ப³னிமித்தாதி³பே⁴த³ம் ப⁴க³வதோ ஆனுபா⁴வம் பகாஸேத்வா ‘‘தம் ப⁴க³வந்தம் தே³வோ பயிருபாஸது, த⁴ம்மம் ஸுணாது, பஞ்ஹம் புச்ச²தூ’’தி ஆஹ.

ராஜா ஸம்புண்ணமனோரதோ² ஹுத்வா ‘‘தேன ஹி, ஸம்ம ஜீவக, ஹத்தி²யானானி கப்பாபேஹீ’’தி யானானி கப்பாபேத்வா மஹந்தேன ராஜானுபா⁴வேன ஜீவகம்ப³வனம் க³ந்த்வா தத்த² மண்ட³லமாளே பி⁴க்கு²ஸங்க⁴பரிவுதம் ததா²க³தம் தி³ஸ்வா ஸந்தவீசிமஜ்ஜே² மஹானாவம் விய நிச்சலம் பி⁴க்கு²ஸங்க⁴ம் இதோ சிதோ ச அனுவிலோகேத்வா ‘‘ஏவரூபா நாம மே பரிஸா ந தி³ட்ட²புப்³பா³’’தி இரியாபதே²யேவ பஸீதி³த்வா ஸங்க⁴ஸ்ஸ அஞ்ஜலிம் பக்³க³ண்ஹித்வா து²திம் கத்வா ப⁴க³வந்தம் வந்தி³த்வா ஏகமந்தம் நிஸின்னோ ஸாமஞ்ஞப²லபஞ்ஹம் புச்சி². அத²ஸ்ஸ ப⁴க³வா த்³வீஹி பா⁴ணவாரேஹி படிமண்டி³தம் ஸாமஞ்ஞப²லஸுத்தம் (தீ³. நி. 1.150 ஆத³யோ) கதே²ஸி. ஸோ ஸுத்தபரியோஸானே அத்தமனோ ப⁴க³வந்தம் க²மாபேத்வா உட்டா²யாஸனா பத³க்கி²ணம் கத்வா பக்காமி. ஸத்தா² அசிரபக்கந்தஸ்ஸ ரஞ்ஞோ பி⁴க்கூ² ஆமந்தேத்வா ‘‘க²தாயம், பி⁴க்க²வே, ராஜா, உபஹதாயம், பி⁴க்க²வே, ராஜா. ஸசாயம், பி⁴க்க²வே, ராஜா இஸ்ஸரியஸ்ஸ காரணா பிதரம் த⁴ம்மிகம் த⁴ம்மராஜானம் ஜீவிதா ந வோரோபேஸ்ஸத², இமஸ்மிம்யேவ ஆஸனே விரஜம் வீதமலம் த⁴ம்மசக்கு²ம் உப்பஜ்ஜிஸ்ஸத². தே³வத³த்தம் நிஸ்ஸாய அஸந்தபக்³க³ஹம் கத்வா ஸோதாபத்திப²லா பரிஹீனோ’’தி ஆஹ.

புனதி³வஸே பி⁴க்கூ² த⁴ம்மஸபா⁴யம் கத²ம் ஸமுட்டா²பேஸும் ‘‘ஆவுஸோ, அஜாதஸத்து கிர அஸந்தபக்³க³ஹம் கத்வா து³ஸ்ஸீலம் பாபத⁴ம்மம் தே³வத³த்தம் நிஸ்ஸாய பிதுகா⁴தககம்மஸ்ஸ கதத்தா ஸோதாபத்திப²லா பரிஹீனோ, தே³வத³த்தேன நாஸிதோ ராஜா’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, அஜாதஸத்து இதா³னேவ அஸந்தபக்³க³ஹம் கத்வா மஹாவினாஸம் பத்தோ, புப்³பே³பேஸ அஸந்தபக்³க³ஹேனேவ அத்தானம் நாஸேஸீ’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ மஹாவிப⁴வே ப்³ராஹ்மணகுலே நிப்³ப³த்தித்வா வயப்பத்தோ தக்கஸிலம் க³ந்த்வா ஸப்³ப³ஸிப்பானி உக்³க³ண்ஹித்வா பா³ராணஸியம் தி³ஸாபாமோக்கோ² ஆசரியோ ஹுத்வா பஞ்ச மாணவகஸதானி ஸிப்பம் வாசேஸி. தேஸு மாணவேஸு ஏகோ ஸஞ்ஜீவோ நாம மாணவோ அத்தி², போ³தி⁴ஸத்தோ தஸ்ஸ மதகுட்டா²பனகமந்தம் அதா³ஸி. ஸோ உட்டா²பனகமந்தமேவ க³ஹேத்வா படிபா³ஹனமந்தம் பன அக்³க³ஹேத்வாவ ஏகதி³வஸம் மாணவேஹி ஸத்³தி⁴ம் தா³ருஅத்தா²ய அரஞ்ஞம் க³ந்த்வா ஏகம் மதப்³யக்³க⁴ம் தி³ஸ்வா மாணவே ஆஹ ‘‘போ⁴, இமம் மதப்³யக்³க⁴ம் உட்டா²பேஸ்ஸாமீ’’தி. மாணவா ‘‘ந ஸக்கி²ஸ்ஸஸீ’’தி ஆஹம்ஸு. ‘‘பஸ்ஸந்தானஞ்ஞேவ வோ தம் உட்டா²பேஸ்ஸாமீ’’தி. ‘‘ஸசே, மாணவ, ஸக்கோஸி, உட்டா²பேஹீ’’தி. ஏவஞ்ச பன வத்வா தே மாணவா ருக்க²ம் அபி⁴ருஹிம்ஸு. ஸஞ்ஜீவோ மந்தம் பரிவத்தேத்வா மதப்³யக்³க⁴ம் ஸக்க²ராஹி பஹரி, ப்³யக்³கோ⁴ உட்டா²ய வேகே³னாக³ந்த்வா ஸஞ்ஜீவம் க³லனாளியம் ட³ம்ஸித்வா ஜீவிதக்க²யம் பாபேத்வா தத்தே²வ பதி, ஸஞ்ஜீவோபி தத்தே²வ பதி. உபோ⁴பி ஏகட்டா²னேயேவ மதா நிபஜ்ஜிம்ஸு.

மாணவா தா³ரூனி ஆதா³ய ஆக³ந்த்வா தம் பவத்திம் ஆசரியஸ்ஸ ஆரோசேஸும். ஆசரியோ மாணவே ஆமந்தேத்வா ‘‘தாதா, அஸந்தபக்³க³ஹகாரா நாம அயுத்தட்டா²னே ஸக்காரஸம்மானம் கரோந்தா ஏவரூபம் து³க்க²ம் படிலப⁴ந்தியேவா’’தி வத்வா இமம் கா³த²மாஹ –

150. ‘‘அஸந்தம் யோ பக்³க³ண்ஹாதி, அஸந்தம் சூபஸேவதி;

தமேவ கா⁴ஸம் குருதே, ப்³யக்³கோ⁴ ஸஞ்ஜீவிகோ யதா²’’தி.

தத்த² அஸந்தந்தி தீஹி து³ச்சரிதேஹி ஸமன்னாக³தம் து³ஸ்ஸீலம் பாபத⁴ம்மம். யோ பக்³க³ண்ஹாதீதி க²த்தியாதீ³ஸு யோ கோசி ஏவரூபம் து³ஸ்ஸீலம் பப்³ப³ஜிதம் வா சீவராதி³ஸம்பதா³னேன, க³ஹட்ட²ம் வா உபரஜ்ஜஸேனாபதிட்டா²னாதி³ஸம்பதா³னேன பக்³க³ண்ஹாதி, ஸக்காரஸம்மானம் கரோதீதி அத்தோ². அஸந்தம் சூபஸேவதீதி யோ ச ஏவரூபம் அஸந்தம் து³ஸ்ஸீலம் உபஸேவதி ப⁴ஜதி பயிருபாஸதி. தமேவ கா⁴ஸம் குருதேதி தமேவ அஸந்தபக்³க³ண்ஹகம் ஸோ து³ஸ்ஸீலோ பாபபுக்³க³லோ க⁴ஸதி ஸம்கா²த³தி வினாஸம் பாபேதி. கத²ம்? ப்³யக்³கோ⁴ ஸஞ்ஜீவிகோ யதா²தி, யதா² ஸஞ்ஜீவேன மாணவேன மந்தம் பரிவத்தேத்வா மதப்³யக்³கோ⁴ ஸஞ்ஜீவிகோ ஜீவிதஸம்பதா³னேன ஸம்பக்³க³ஹிதோ அத்தனோ ஜீவிததா³யகம் ஸஞ்ஜீவமேவ ஜீவிதா வோரோபேத்வா தத்தே²வ பாதேஸி, ஏவம் அஞ்ஞோபி யோ அஸந்தபக்³க³ஹம் கரோதி, ஸோ து³ஸ்ஸீலோ தம் அத்தனோ ஸம்பக்³கா³ஹகமேவ வினாஸேதி. ஏவம் அஸந்தஸம்பக்³கா³ஹகா வினாஸம் பாபுணந்தீதி.

போ³தி⁴ஸத்தோ இமாய கா³தா²ய மாணவானம் த⁴ம்மம் தே³ஸேத்வா தா³னாதீ³னி புஞ்ஞானி கத்வா யதா²கம்மம் க³தோ.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ மதப்³யக்³கு⁴ட்டா²பனகோ மாணவோ அஜாதஸத்து அஹோஸி, தி³ஸாபாமோக்கோ² ஆசரியோ பன அஹமேவ அஹோஸி’’ந்தி.

ஸஞ்ஜீவஜாதகவண்ணனா த³ஸமா.

ககண்டகவக்³கோ³ பன்னரஸமோ.

தஸ்ஸுத்³தா³னம் –

கோ³த⁴ஸிங்கா³லவிரோசம், நங்கு³ட்ட²ராத⁴காகஞ்ச;

புப்ப²ரத்தஞ்ச ஸிங்கா³லம், ஏகபண்ணஞ்ச ஸஞ்ஜீவம்.

அத² வக்³கு³த்³தா³னம் –

அபண்ணகோ ஸீலவக்³கோ³, குருங்கோ³ ச குலாவகோ;

அத்த²காமோ ச ஆஸீஸோ, இத்தீ²வருணபாயிம்ஹா.

லித்தோ பரோஸதம் ஹம்சி, குஸனாளா ஸம்பதா³னோ;

ககண்டகோ பன்னரஸ, ஸதபண்ணாஸ ஜாதகாதி.

ஏககனிபாதவண்ணனா நிட்டி²தா.

(பட²மோ பா⁴கோ³ நிட்டி²தோ).