7. ஆதாபீஸுத்தவண்ணனா

34. ஸத்தமே அனாதாபீதி கிலேஸானம் ஆதாபனட்டே²ன ஆதாபோ, வீரியம், ஸோ ஏதஸ்ஸ அத்தீ²தி ஆதாபீ, ந ஆதாபீ அனாதாபீ, ஸம்மப்பதா⁴னவிரஹிதோ குஸீதோதி வுத்தம் ஹோதி. ஓத்தாபோ வுச்சதி பாபுத்ராஸோ, ஸோ ஏதஸ்ஸ அத்தீ²தி ஓத்தாபீ, ந ஓத்தாபீ அனோத்தாபீ, ஓத்தாபரஹிதோ. அத² வா ஆதாபப்படிபக்கோ² அனாதாபோ, கோஸஜ்ஜம் ஸோ அஸ்ஸ அத்தீ²தி அனாதாபீ. யம் ‘‘ந ஓத்தபதி ஓத்தப்பிதப்³பே³ன, ந ஓத்தபதி பாபகானம் அகுஸலானம் த⁴ம்மானம் ஸமாபத்தியா’’தி ஏவம் வுத்தம், தம் அனோத்தப்பம் அனோத்தாபோ. ஸோ அஸ்ஸ அத்தீ²தி அனோத்தாபீதி ஏவமேத்த² அத்தோ² வேதி³தப்³போ³.

அப⁴ப்³போ³தி அனரஹோ. ஸம்போ³தா⁴யாதி அரியமக்³க³த்தா²ய. நிப்³பா³னாயாதி கிலேஸானம் அச்சந்தவூபஸமாய அமதமஹானிப்³பா³னாய. அனுத்தரஸ்ஸ யோக³க்கே²மஸ்ஸாதி அரஹத்தப²லஸ்ஸ. தஞ்ஹி உத்தரிதரஸ்ஸ அபா⁴வதோ அனுத்தரம், சதூஹி யோகே³ஹி அனுபத்³து³தத்தா கே²மம் நிப்³ப⁴யந்தி யோக³க்கே²மந்தி ச வுச்சதி. அதி⁴க³மாயாதி பத்தியா. ஆதாபீதி வீரியவா. ஸோ ஹி ‘‘ஆரத்³த⁴வீரியோ விஹரதி அகுஸலானம் த⁴ம்மானம் பஹானாய, குஸலானம் த⁴ம்மானம் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸூ’’தி (தீ³. நி. 3.345) ஏவம் வுத்தேன வீரியாரம்பே⁴ன ஸமன்னாக³தோ கிலேஸானம் அச்சந்தமேவ ஆதாபனஸீலோதி ஆதாபீ. ஓத்தாபீதி ‘‘யம் ஓத்தபதி ஓத்தப்பிதப்³பே³ன, ஓத்தபதி பாபகானம் அகுஸலானம் த⁴ம்மானம் ஸமாபத்தியா’’தி (த⁴. ஸ. 31) ஏவம் வுத்தேன ஓத்தப்பேன ஸமன்னாக³தத்தா ஓத்தபனஸீலோதி ஓத்தப்பீ. அயஞ்ஹி ஓத்தாபீதி வுத்தோ. தத³வினாபா⁴வதோ ஹிரியா ச ஸமன்னாக³தோ ஏவ ஹோதீதி ஹிரோத்தப்பஸம்பன்னோ அணுமத்தேபி வஜ்ஜே ப⁴யத³ஸ்ஸாவீ ஸீலேஸு பரிபூரகாரீ ஹோதி. இச்சஸ்ஸ ஸீலஸம்பதா³ த³ஸ்ஸிதா. ஆதாபீதி இமினா நயேனஸ்ஸ கிலேஸபரிதாபிதாதீ³பனேன ஸமத²விபஸ்ஸனாபா⁴வனானுயுத்ததா த³ஸ்ஸிதா. யதா²வுத்தஞ்ச வீரியம் ஸத்³தா⁴ஸதிஸமாதி⁴பஞ்ஞாஹி வினா ந ஹோதீதி விமுத்திபரிபாசகானி ஸத்³தா⁴பஞ்சமானி இந்த்³ரியானி அத்த²தோ வுத்தானேவ ஹோந்தி. தேஸு ச ஸித்³தே⁴ஸு அனிச்சே அனிச்சஸஞ்ஞா, அனிச்சே து³க்க²ஸஞ்ஞா, து³க்கே² அனத்தஸஞ்ஞா, பஹானஸஞ்ஞா, விராக³ஸஞ்ஞா, நிரோத⁴ஸஞ்ஞாதி ச² நிப்³பே³த⁴பா⁴கி³யா ஸஞ்ஞா ஸித்³தா⁴ ஏவாதி. ஏவம் இமேஹி த்³வீஹி த⁴ம்மேஹி ஸமன்னாக³தஸ்ஸ லோகியானம் ஸீலஸமாதி⁴பஞ்ஞானம் ஸிஜ்ஜ²னதோ மக்³க³ப²லனிப்³பா³னாதி⁴க³மஸ்ஸ ப⁴ப்³ப³தம் த³ஸ்ஸேந்தோ ‘‘ஆதாபீ ச கோ²…பே… அதி⁴க³மாயா’’தி ஆஹ.

கா³தா²ஸு குஸீதோதி மிச்சா²விதக்கப³ஹுலதாய காமப்³யாபாத³விஹிம்ஸாவிதக்கஸங்கா²தேஹி குச்சி²தேஹி பாபத⁴ம்மேஹி ஸிதோ ஸம்ப³ந்தோ⁴ யுத்தோதி குஸீதோ. குச்சி²தம் வா ஸீத³தி ஸம்மாபடிபத்திதோ அவஸீத³தீதி குஸீதோ, த³-காரஸ்ஸ த-காரம் கத்வா. ஹீனவீரியோதி நிப்³பீ³ரியோ, சதூஸுபி இரியாபதே²ஸு வீரியகரணரஹிதோ. அனுஸ்ஸாஹஸம்ஹனனஸபா⁴வஸ்ஸ சித்தாலஸியஸ்ஸ தி²னஸ்ஸ, அஸத்திவிகா⁴தஸபா⁴வஸ்ஸ காயாலஸியஸ்ஸ மித்³த⁴ஸ்ஸ ச அபி⁴ண்ஹப்பவத்தியா தி²னமித்³த⁴ப³ஹுலோ. பாபஜிகு³ச்ச²னலக்க²ணாய ஹிரியா அபா⁴வேன தப்படிபக்கே²ன அஹிரிகேன ஸமன்னாக³தத்தா ச அஹிரிகோ. ஹிரோத்தப்பவீரியானம் அபா⁴வேனேவ ஸம்மாபடிபத்தியம் நத்தி² ஏதஸ்ஸ ஆத³ரோதி அனாத³ரோ. உப⁴யதா²பி ததா² த⁴ம்மபுக்³க³லேன து³வித⁴கிரியாகரணேன அனாத³ரோ. பு²ட்டு²ந்தி பு²ஸிதும். ஸம்போ³தி⁴முத்தமந்தி ஸம்போ³தி⁴ஸங்கா²தம் உத்தமம் அரஹத்தம் அதி⁴க³ந்தும் அப⁴ப்³போ³தி அத்தோ².

ஸதிமாதி சிரகதசிரபா⁴ஸிதானம் அனுஸ்ஸரணே ஸமத்த²ஸ்ஸ ஸதினேபக்கஸ்ஸ பா⁴வேன சதுஸதிபட்டா²னயோகே³ன ஸதிமா. நிபகோதி ஸத்தட்டா²னியஸம்பஜஞ்ஞஸங்கா²தேன சேவ கம்மட்டா²னபரிஹரணபஞ்ஞாஸங்கா²தேன ச நேபக்கேன ஸமன்னாக³தத்தா நிபகோ. ஜா²யீதி ஆரம்மணூபனிஜ்ஜா²னேன லக்க²ணூபனிஜ்ஜா²னேன சாதி த்³வீஹிபி ஜா²னேஹி ஜா²யீ. அப்பமத்தோதி ‘‘தி³வஸம் சங்கமேன நிஸஜ்ஜாய ஆவரணியேஹி த⁴ம்மேஹி சித்தம் பரிஸோதே⁴தீ’’திஆதி³னா நயேன கம்மட்டா²னபா⁴வனாய அப்பமத்தோ. ஸம்யோஜனம் ஜாதிஜராய சே²த்வாதி ஜாதியா சேவ ஜராய ச ஸத்தே ஸம்யோஜேதீதி ஸம்யோஜனந்தி லத்³த⁴னாமம் காமராகா³தி³கம் த³ஸவித⁴ம்பி கிலேஸஜாதம் அனுஸயஸமுக்³கா⁴தவஸேன மூலதோ சி²ந்தி³த்வா. அத² வா ஸம்யோஜனம் ஜாதிஜராய சே²த்வாதி ஜாதிஜராய ஸம்யோஜனம் சி²ந்தி³த்வா. யஸ்ஸ ஹி ஸம்யோஜனானி அச்சி²ன்னானி, தஸ்ஸ ஜாதிஜராய அச்சே²தோ³ அஸமுக்³கா⁴தோவ. யஸ்ஸ பன தானி சி²ன்னானி, தஸ்ஸ ஜாதிஜராபி சி²ன்னாவ காரணஸ்ஸ ஸமுக்³கா⁴திதத்தா. தஸ்மா ஸம்யோஜனம் சி²ந்த³ந்தோ ஏவ ஜாதிஜராபி சி²ந்த³தி. தேன வுத்தம் ‘‘ஸம்யோஜனம் ஜாதிஜராய சே²த்வா’’தி. இதே⁴வ ஸம்போ³தி⁴மனுத்தரம் பு²ஸேதி இமஸ்மிம்யேவ அத்தபா⁴வே அக்³க³மக்³க³ம் அரஹத்தம் வா பு²ஸே பாபுணேய்ய.

ஸத்தமஸுத்தவண்ணனா நிட்டி²தா.