5. பட²மஸீலஸுத்தவண்ணனா

32. பஞ்சமே பாபகேன ச ஸீலேனாதி பாபகம் நாம ஸீலம் ஸீலபே⁴த³கரோ அஸம்வரோதி வத³ந்தி. தத்த² யதி³ அஸம்வரோ அஸீலமேவ தம்து³ஸ்ஸீல்யபா⁴வதோ, கத²ம் ஸீலந்தி வுச்சதி? தத்தா²யம் அதி⁴ப்பாயோ ஸியா – யதா² நாம லோகே அதி³ட்ட²ம் ‘‘தி³ட்ட²’’ந்தி வுச்சதி, அஸீலவா ‘‘ஸீலவா’’தி, ஏவமிதா⁴பி அஸீலம்பி அஸம்வரோபி ‘‘ஸீல’’ந்தி வோஹரீயதி. அத² வா ‘‘கதமே ச, த²பதி, அகுஸலா ஸீலா? அகுஸலம் காயகம்மம், அகுஸலம் வசீகம்மம், பாபகோ ஆஜீவோ’’தி (ம. நி. 2.264) வசனதோ அகுஸலத⁴ம்மேஸுபி அத்தே²வ ஸீலஸமஞ்ஞா, தஸ்மா பரிசயவஸேன ஸபா⁴வஸித்³தி⁴ விய பகதிபூ⁴தோ ஸப்³போ³ ஸமாசாரோ ‘‘ஸீல’’ந்தி வுச்சதி. தத்த² யம் அகோஸல்லஸம்பூ⁴தட்டே²ன அகுஸலம் லாமகம், தம் ஸந்தா⁴யாஹ ‘‘பாபகேன ச ஸீலேனா’’தி. பாபிகாய ச தி³ட்டி²யாதி ஸப்³பா³பி மிச்சா²தி³ட்டி²யோ பாபிகாவ. விஸேஸதோ பன அஹேதுகதி³ட்டி², அகிரியதி³ட்டி², நத்தி²கதி³ட்டீ²தி இமா திவிதா⁴ தி³ட்டி²யோ பாபிகதரா. தத்த² பாபகேன ஸீலேன ஸமன்னாக³தோ புக்³க³லோ பயோக³விபன்னோ ஹோதி, பாபிகாய தி³ட்டி²யா ஸமன்னாக³தோ ஆஸயவிபன்னோ ஹோதி, ஏவம் பயோகா³ஸயவிபன்னோ புக்³க³லோ நிரயூபகோ³ ஹோதியேவ. தேன வுத்தம் ‘‘இமேஹி கோ², பி⁴க்க²வே, த்³வீஹி த⁴ம்மேஹி ஸமன்னாக³தோ புக்³க³லோ யதா²ப⁴தம் நிக்கி²த்தோ, ஏவம் நிரயே’’தி. ஏத்த² ச ‘‘த்³வீஹி த⁴ம்மேஹி ஸமன்னாக³தோ’’தி இத³ம் லக்க²ணவசனம் த³ட்ட²ப்³ப³ம், ந தந்தினித்³தே³ஸோ. யதா² தம் லோகே ‘‘யதி³மே ப்³யாதி⁴தா ஸியும், இமேஸம் இத³ம் பே⁴ஸஜ்ஜம் தா³தப்³ப³’’ந்தி. அஞ்ஞேஸுபி ஈதி³ஸேஸு டா²னேஸு ஏஸேவ நயோ. து³ப்பஞ்ஞோதி நிப்பஞ்ஞோ.

பஞ்சமஸுத்தவண்ணனா நிட்டி²தா.