3. தபனீயஸுத்தவண்ணனா

30. ததியே தபனீயாதி இத⁴ சேவ ஸம்பராயே ச தபந்தி விபா³தே⁴ந்தி விஹேடே²ந்தீதி தபனீயா. தபனம் வா து³க்க²ம் தி³ட்டே² சேவ த⁴ம்மே அபி⁴ஸம்பராயே ச தஸ்ஸ உப்பாத³னேன சேவ அனுப³லப்பதா³னேன ச ஹிதாதி தபனீயா. அத² வா தபந்தி தேனாதி தபனம், பச்சா²னுதாபோ, விப்படிஸாரோதி அத்தோ², தஸ்ஸ ஹேதுபா⁴வதோ ஹிதாதி தபனீயா. அகதகல்யாணோதி அகதம் கல்யாணம் ப⁴த்³த³கம் புஞ்ஞம் ஏதேனாதி அகதகல்யாணோ. ஸேஸபத³த்³வயம் தஸ்ஸேவ வேவசனம். புஞ்ஞஞ்ஹி பவத்திஹிததாய ஆயதிம்ஸுக²தாய ச ப⁴த்³த³கட்டே²ன கல்யாணந்தி ச குச்சி²தஸலனாதி³அத்தே²ன குஸலந்தி ச து³க்க²பீ⁴ரூனம் ஸம்ஸாரபீ⁴ரூனஞ்ச ரக்க²னட்டே²ன பீ⁴ருத்தாணந்தி ச வுச்சதி. கதபாபோதி கதம் உபசிதம் பாபம் ஏதேனாதி கதபாபோ. ஸேஸபத³த்³வயம் தஸ்ஸேவ வேவசனம். அகுஸலகம்மஞ்ஹி லாமகட்டே²ன பாபந்தி ச அத்தனோ பவத்திக்க²ணே விபாகக்க²ணே ச கோ⁴ரஸபா⁴வதாய லுத்³த³ந்தி ச கிலேஸேஹி தூ³ஸிதபா⁴வேன கிப்³பி³ஸந்தி ச வுச்சதி. இதி ப⁴க³வா ‘‘த்³வே த⁴ம்மா தபனீயா’’தி த⁴ம்மாதி⁴ட்டா²னேன உத்³தி³ஸித்வா அகதம் குஸலம் த⁴ம்மம் கதஞ்ச அகுஸலம் த⁴ம்மம் புக்³க³லாதி⁴ட்டா²னேன நித்³தி³ஸி. இதா³னி தேஸம் தபனீயபா⁴வம் த³ஸ்ஸேந்தோ ‘‘ஸோ அகதம் மே கல்யாணந்திபி தப்பதி, கதம் மே பாபந்திபி தப்பதீ’’தி ஆஹ. சித்தஸந்தாஸேன தப்பதி அனுதப்பதி அனுஸோசதீதி அத்தோ².

கா³தா²ஸு து³ட்டு² சரிதம், கிலேஸபூதிகத்தா வா து³ட்ட²ம் சரிதந்தி து³ச்சரிதம். காயேன து³ச்சரிதம், காயதோ வா பவத்தம் து³ச்சரிதம் காயது³ச்சரிதம். ஏவம் வசீமனோது³ச்சரிதானிபி த³ட்ட²ப்³பா³னி. இமானி ச காயது³ச்சரிதாதீ³னி கம்மபத²ப்பத்தானி அதி⁴ப்பேதானீதி யம் ந கம்மபத²ப்பத்தம் அகுஸலஜாதம், தம் ஸந்தா⁴யாஹ ‘‘யஞ்சஞ்ஞம் தோ³ஸஸஞ்ஹித’’ந்தி. தஸ்ஸத்தோ² – யம்பி ச அஞ்ஞம் கம்மபத²பா⁴வம் அப்பத்தத்தா நிப்பரியாயேன காயகம்மாதி³ஸங்க²ம் ந லப⁴தி, ராகா³தி³கிலேஸஸம்ஸட்ட²த்தா தோ³ஸஸஹிதம் அகுஸலம் தம்பி கத்வாதி அத்தோ². நிரயந்தி நிரதிஅத்தே²ன நிரஸ்ஸாத³ட்டே²ன வா நிரயந்தி லத்³த⁴னாமம் ஸப்³ப³ம்பி து³க்³க³திம், அயஸங்கா²தஸுக²ப்படிக்கே²பேன வா ஸப்³ப³த்த² ஸுக³திது³க்³க³தீஸு நிரயது³க்க²ம். ஸோ தாதி³ஸோ புக்³க³லோ உபக³ச்ச²தீதி ஏவமேத்த² அத்தோ² த³ட்ட²ப்³போ³.

ஏத்த² ச காயது³ச்சரிதஸ்ஸ தபனீயபா⁴வே நந்தோ³ யக்கோ² நந்தோ³ மாணவகோ நந்தோ³ கோ³கா⁴தகோ த்³வே பா⁴திகாதி ஏதேஸம் வத்தூ²னி கதே²தப்³பா³னி. தே கிர கா³விம் வதி⁴த்வா மம்ஸம் த்³வே கோட்டா²ஸே அகம்ஸு. ததோ கனிட்டோ² ஜேட்ட²ம் ஆஹ – ‘‘மய்ஹம் தா³ரகா ப³ஹூ, இமானி மே அந்தானி தே³ஹீ’’தி. அத² நம் ஜேட்டோ² – ‘‘ஸப்³ப³ம் மம்ஸம் த்³வேதா⁴ விப⁴த்தம், புன கிமக்³க³ஹேஸீ’’தி பஹரித்வா ஜீவிதக்க²யம் பாபேஸி. நிவத்தித்வா ச நம் ஓலோகேந்தோ மதம் தி³ஸ்வா ‘‘பா⁴ரியம் வத மயா கதம், ஸ்வாஹம் அகாரணேனேவ நம் மாரேஸி’’ந்தி சித்தம் உப்பாதே³ஸி. அத²ஸ்ஸ ப³லவவிப்படிஸாரோ உப்பஜ்ஜி. ஸோ டி²தட்டா²னேபி நிஸின்னட்டா²னேபி ததே³வ கம்மம் ஆவஜ்ஜேதி, சித்தஸ்ஸாத³ம் ந லப⁴தி, அஸிதபீதகா²யிதம்பிஸ்ஸ ஸரீரே ஓஜம் ந ப²ரதி, அட்டி²சம்மமத்தமேவ அஹோஸி. அத² நம் ஏகோ தே²ரோ புச்சி² ‘‘உபாஸக, த்வம் அதிவிய கிஸோ அட்டி²சம்மமத்தோ ஜாதோ, கீதி³ஸோ தே ரோகோ³, உதா³ஹு அத்தி² கிஞ்சி தபனீயம் கம்மம் கத’’ந்தி? ஸோ ‘‘ஆம, ப⁴ந்தே’’தி ஸப்³ப³ம் ஆரோசேஸி. அத²ஸ்ஸ ஸோ ‘‘பா⁴ரியம் தே, உபாஸக, கம்மம் கதம், அனபராத⁴ட்டா²னே அபரத்³த⁴’’ந்தி ஆஹ. ஸோ தேனேவ கம்முனா காலம் கத்வா நிரயே நிப்³ப³த்தி. வசீது³ச்சரிதஸ்ஸ பன ஸுப்பபு³த்³த⁴ஸக்ககோகாலிகசிஞ்சமாணவிகாதீ³னம் வத்தூ²னி கதே²தப்³பா³னி, மனோது³ச்சரிதஸ்ஸ உக்கலஜயப⁴ஞ்ஞாதீ³னம்.

ததியஸுத்தவண்ணனா நிட்டி²தா.