6. ஸாரிபுத்தத்தே²ரஸ்ஸ பா⁴கி³னேய்யவத்து²

யோ ச வஸ்ஸஸதம் ஜந்தூதி இமம் த⁴ம்மதே³ஸனம் ஸத்தா² வேளுவனே விஹரந்தோ ஸாரிபுத்தத்தே²ரஸ்ஸ பா⁴கி³னேய்யம் ஆரப்³ப⁴ கதே²ஸி.

தம்பி ஹி தே²ரோ உபஸங்கமித்வா ஆஹ – ‘‘கிம், ப்³ராஹ்மண, குஸலம் கரோஸீ’’தி? ‘‘ஆம, ப⁴ந்தே’’தி. ‘‘கிம் கரோஸீ’’தி? ‘‘மாஸே மாஸே ஏகம் ஏகம் பஸும் கா⁴தேத்வா அக்³கி³ம் பரிசராமீ’’தி. ‘‘கிமத்த²ம் ஏவம் கரோஸீ’’தி? ‘‘ப்³ரஹ்மலோகமக்³கோ³ கிரேஸோ’’தி. ‘‘கேனேவம் கதி²த’’ந்தி? ‘‘ஆசரியேஹி மே, ப⁴ந்தே’’தி. ‘‘நேவ த்வம் ப்³ரஹ்மலோகஸ்ஸ மக்³க³ம் ஜானாஸி, நாபி தே ஆசரியா, ஏஹி, ஸத்து² ஸந்திகம் க³மிஸ்ஸாமா’’தி தம் ஸத்து² ஸந்திகம் நேத்வா தம் பவத்திம் ஆரோசேத்வா ‘‘இமஸ்ஸ, ப⁴ந்தே, ப்³ரஹ்மலோகஸ்ஸ மக்³க³ம் கதே²தா²’’தி ஆஹ. ஸத்தா² ‘‘ஏவம் கிரா’’தி புச்சி²த்வா ‘‘ஏவம், போ⁴ கோ³தமா’’தி வுத்தே, ‘‘ப்³ராஹ்மண, வஸ்ஸஸதம்பி ஏவம் அக்³கி³ம் பரிசரந்தஸ்ஸ தவ அக்³கி³பாரிசரியா மம ஸாவகஸ்ஸ தங்க²ணமத்தம் பூஜம்பி ந பாபுணாதீ’’தி வத்வா அனுஸந்தி⁴ம் க⁴டேத்வா த⁴ம்மம் தே³ஸேந்தோ இமம் கா³த²மாஹ –

107. ‘‘யோ ச வஸ்ஸஸதம் ஜந்து, அக்³கி³ம் பரிசரே வனே;

ஏகஞ்ச பா⁴விதத்தானம், முஹுத்தமபி பூஜயே;

ஸாயேவ பூஜனா ஸேய்யோ, யஞ்சே வஸ்ஸஸதம் ஹுத’’ந்தி.

தத்த² ஜந்தூதி ஸத்தாதி⁴வசனமேதம். அக்³கி³ம் பரிசரே வனேதி நிப்பபஞ்சபா⁴வபத்த²னாய வனம் பவிஸித்வாபி தத்த² அக்³கி³ம் பரிசரேய்ய. ஸேஸம் புரிமஸதி³ஸமேவாதி.

தே³ஸனாவஸானே ஸோ ப்³ராஹ்மணோ ஸோதாபத்திப²லம் பாபுணி, அஞ்ஞேபி ப³ஹூ ஸோதாபத்திப²லாதீ³னி பாபுணிம்ஸூதி.

ஸாரிபுத்தத்தே²ரஸ்ஸ பா⁴கி³னேய்யவத்து² ச²ட்ட²ம்.