13. கிஸாகோ³தமீவத்து²

யோ ச வஸ்ஸஸதம் ஜீவேதி இமம் த⁴ம்மதே³ஸனம் ஸத்தா² ஜேதவனே விஹரந்தோ கிஸாகோ³தமிம் ஆரப்³ப⁴ கதே²ஸி.

ஸாவத்தி²யம் கிரேகஸ்ஸ ஸேட்டி²ஸ்ஸ கே³ஹே சத்தாலீஸகோடித⁴னம் அங்கா³ரா ஏவ ஹுத்வா அட்டா²ஸி. ஸேட்டி² தம் தி³ஸ்வா உப்பன்னஸோகோ ஆஹாரம் படிக்கி²பித்வா மஞ்சகே நிபஜ்ஜி. தஸ்ஸேகோ ஸஹாயகோ கே³ஹம் க³ந்த்வா, ‘‘ஸம்ம, கஸ்மா ஸோசஸீ’’தி புச்சி²த்வா தம் பவத்திம் ஸுத்வா, ‘‘ஸம்ம, மா ஸோசி, அஹம் ஏகம் உபாயம் ஜானாமி, தம் கரோஹீ’’தி. ‘‘கிம் கரோமி, ஸம்மா’’தி? அத்தனோ ஆபணே கிலஞ்ஜம் பஸாரேத்வா தத்த² தே அங்கா³ரே ராஸிம் கத்வா விக்கிணந்தோ விய நிஸீத³, ஆக³தாக³தேஸு மனுஸ்ஸேஸு யே ஏவம் வத³ந்தி – ‘‘ஸேஸஜனா வத்த²தேலமது⁴பா²ணிதாதீ³னி விக்கிணந்தி, த்வம் பன அங்கா³ரே விக்கிணந்தோ நிஸின்னோ’’தி. தே வதே³ய்யாஸி – ‘‘அத்தனோ ஸந்தகம் அவிக்கிணந்தோ கிம் கரோமீ’’தி? யோ பன தம் ஏவம் வத³தி ‘‘ஸேஸஜனா வத்த²தேலமது⁴பா²ணிதாதீ³னி விக்கிணந்தி, த்வம் பன ஹிரஞ்ஞஸுவண்ணம் விக்கிணந்தோ நிஸின்னோ’’தி. தம் வதே³ய்யாஸி ‘‘கஹம் ஹிரஞ்ஞஸுவண்ண’’ந்தி. ‘‘இத³’’ந்தி ச வுத்தே ‘‘ஆஹர, தாவ ந’’ந்தி ஹத்தே²ஹி படிச்சே²ய்யாஸி. ஏவம் தி³ன்னம் தவ ஹத்தே² ஹிரஞ்ஞஸுவண்ணம் ப⁴விஸ்ஸதி. ஸா பன ஸசே குமாரிகா ஹோதி, தவ கே³ஹே புத்தஸ்ஸ நம் ஆஹரித்வா சத்தாலீஸகோடித⁴னம் தஸ்ஸா நிய்யாதே³த்வா தாய தி³ன்னம் வலஞ்ஜேய்யாஸி. ஸசே குமாரகோ ஹோதி, தவ கே³ஹே வயப்பத்தம் தீ⁴தரம் தஸ்ஸ த³த்வா சத்தாலீஸகோடித⁴னம் நிய்யாதே³த்வா தேன தி³ன்னம் வலஞ்ஜேய்யாஸீதி. ஸோ ‘‘ப⁴த்³த³கோ உபாயோ’’தி அத்தனோ ஆபணே அங்கா³ரே ராஸிம் கத்வா விக்கிணந்தோ விய நிஸீதி³. யே பன நம் ஏவமாஹம்ஸு – ‘‘ஸேஸஜனா வத்த²தேலமது⁴பா²ணிதாதீ³னி விக்கிணந்தி, கிம் பன த்வம் அங்கா³ரே விக்கிணந்தோ நிஸின்னோ’’தி? தேஸம் ‘‘அத்தனோ ஸந்தகம் அவிக்கிணந்தோ கிம் கரோமீ’’தி படிவசனம் அதா³ஸி. அதே²கா கோ³தமீ நாம குமாரிகா கிஸஸரீரதாய கிஸாகோ³தமீதி பஞ்ஞாயமானா பரிஜிண்ணகுலஸ்ஸ தீ⁴தா அத்தனோ ஏகேன கிச்சேன ஆபணத்³வாரம் க³ந்த்வா தம் ஸேட்டி²ம் தி³ஸ்வா ஏவமாஹ – ‘‘கிம், தாத, ஸேஸஜனா வத்த²தேலமது⁴பா²ணிதாதீ³னி விக்கிணந்தி, த்வம் ஹிரஞ்ஞஸுவண்ணம் விக்கிணந்தோ நிஸின்னோ’’தி? ‘‘கஹம், அம்ம, ஹிரஞ்ஞஸுவண்ண’’ந்தி? ‘‘நனு ‘த்வம் ததே³வ க³ஹேத்வா நிஸின்னோஸீ’தி, ஆஹர, தாவ நம், அம்மா’’தி. ஸா ஹத்த²பூரம் க³ஹேத்வா தஸ்ஸ ஹத்தே²ஸு ட²பேஸி, தம் ஹிரஞ்ஞஸுவண்ணமேவ அஹோஸி.

அத² நம் ஸேட்டி² ‘‘கதரம் தே, அம்ம, கே³ஹ’’ந்தி புச்சி²த்வா ‘‘அஸுகம் நாமா’’தி வுத்தே தஸ்ஸா அஸ்ஸாமிகபா⁴வம் ஞத்வா த⁴னம் படிஸாமேத்வா தம் அத்தனோ புத்தஸ்ஸ ஆனேத்வா சத்தாலீஸகோடித⁴னம் படிச்சா²பேஸி. ஸப்³ப³ம் ஹிரஞ்ஞஸுவண்ணமேவ அஹோஸி. தஸ்ஸா அபரேன ஸமயேன க³ப்³போ⁴ பதிட்ட²ஹி. ஸா த³ஸமாஸச்சயேன புத்தம் விஜாயி. ஸோ பத³ஸா க³மனகாலே காலமகாஸி. ஸா அதி³ட்ட²புப்³ப³மரணதாய தம் ஜா²பேதும் நீஹரந்தே வாரேத்வா ‘‘புத்தஸ்ஸ மே பே⁴ஸஜ்ஜம் புச்சி²ஸ்ஸாமீ’’தி மதகளேவரம் அங்கேனாதா³ய ‘‘அபி நு மே புத்தஸ்ஸ பே⁴ஸஜ்ஜம் ஜானாதா²’’தி புச்ச²ந்தீ க⁴ரபடிபாடியா விசரதி. அத² நம் மனுஸ்ஸா, ‘‘அம்ம, த்வம் உம்மத்திகா ஜாதா, மதகபுத்தஸ்ஸ பே⁴ஸஜ்ஜம் புச்ச²ந்தீ விசரஸீ’’தி வத³ந்தி. ஸா ‘‘அவஸ்ஸம் மம புத்தஸ்ஸ பே⁴ஸஜ்ஜம் ஜானனகம் லபி⁴ஸ்ஸாமீ’’தி மஞ்ஞமானா விசரதி. அத² நம் ஏகோ பண்டி³தபுரிஸோ தி³ஸ்வா, ‘‘அயம் மம தீ⁴தா பட²மம் புத்தகம் விஜாதா ப⁴விஸ்ஸதி அதி³ட்ட²புப்³ப³மரணா, மயா இமிஸ்ஸா அவஸ்ஸயேன ப⁴விதும் வட்டதீ’’தி சிந்தேத்வா ஆஹ – ‘‘அம்ம, அஹம் பே⁴ஸஜ்ஜம் ந ஜானாமி, பே⁴ஸஜ்ஜஜானனகம் பன ஜானாமீ’’தி. ‘‘கோ ஜானாதி, தாதா’’தி? ‘‘ஸத்தா², அம்ம, ஜானாதி, க³ச்ச², தம் புச்சா²ஹீ’’தி. ஸா ‘‘க³மிஸ்ஸாமி, தாத, புச்சி²ஸ்ஸாமி, தாதா’’தி வத்வா ஸத்தா²ரம் உபஸங்கமித்வா வந்தி³த்வா ஏகமந்தம் டி²தா புச்சி² – ‘‘தும்ஹே கிர மே புத்தஸ்ஸ பே⁴ஸஜ்ஜம் ஜானாத², ப⁴ந்தே’’தி? ‘‘ஆம, ஜானாமீ’’தி. ‘‘கிம் லத்³து⁴ம் வட்டதீ’’தி? ‘‘அச்ச²ரக்³க³ஹணமத்தே ஸித்³த⁴த்த²கே லத்³து⁴ம் வட்டதீ’’தி. ‘‘லபி⁴ஸ்ஸாமி, ப⁴ந்தே’’. ‘‘கஸ்ஸ பன கே³ஹே லத்³து⁴ம் வட்டதீ’’தி? ‘‘யஸ்ஸ கே³ஹே புத்தோ வா தீ⁴தா வா ந கோசி மதபுப்³போ³’’தி. ஸா ‘‘ஸாது⁴, ப⁴ந்தே’’தி ஸத்தா²ரம் வந்தி³த்வா மதபுத்தகம் அங்கேனாதா³ய அந்தோகா³மம் பவிஸித்வா பட²மகே³ஹஸ்ஸ த்³வாரே ட²த்வா ‘‘அத்தி² நு கோ² இமஸ்மிம் கே³ஹே ஸித்³த⁴த்த²கோ, புத்தஸ்ஸ கிர மே பே⁴ஸஜ்ஜம் ஏத’’ந்தி வத்வா ‘‘அத்தீ²’’தி வுத்தே தேன ஹி தே³தா²தி. தேஹி ஆஹரித்வா ஸித்³த⁴த்த²கேஸு தி³ய்யமானேஸு ‘‘இமஸ்மிம் கே³ஹே புத்தோ வா தீ⁴தா வா மதபுப்³போ³ கோசி நத்தி², அம்மா’’தி புச்சி²த்வா ‘‘கிம் வதே³ஸி, அம்ம? ஜீவமானா ஹி கதிபயா, மதகா ஏவ ப³ஹுகா’’தி வுத்தே ‘‘தேன ஹி க³ண்ஹத² வோ ஸித்³த⁴த்த²கே, நேதம் மம புத்தஸ்ஸ பே⁴ஸஜ்ஜ’’ந்தி படிஅதா³ஸி.

ஸா இமினா நீயாமேன ஆதி³தோ பட்டா²ய நம் புச்ச²ந்தீ விசரி. ஸா ஏககே³ஹேபி ஸித்³த⁴த்த²கே அக³ஹேத்வா ஸாயன்ஹஸமயே சிந்தேஸி – ‘‘அஹோ பா⁴ரியம் கம்மம், அஹம் ‘மமேவ புத்தோ மதோ’தி ஸஞ்ஞமகாஸிம், ஸகலகா³மேபி பன ஜீவந்தேஹி மதகாவ ப³ஹுதரா’’தி. தஸ்ஸா ஏவம் சிந்தயமானாய புத்தஸினேஹம் முது³கஹத³யம் த²த்³த⁴பா⁴வம் அக³மாஸி. ஸா புத்தம் அரஞ்ஞே ச²ட்³டே³த்வா ஸத்து² ஸந்திகம் க³ந்த்வா வந்தி³த்வா ஏகமந்தம் அட்டா²ஸி. அத² நம் ஸத்தா² ‘‘லத்³தா⁴ தே ஏகச்ச²ரமத்தா ஸித்³த⁴த்த²கா’’தி ஆஹ. ‘‘ந லத்³தா⁴, ப⁴ந்தே, ஸகலகா³மே ஜீவந்தேஹி மதகாவ ப³ஹுதரா’’தி. அத² நம் ஸத்தா² ‘‘த்வம் ‘மமேவ புத்தோ மதோ’தி ஸல்லக்கே²ஸி, து⁴வத⁴ம்மோ ஏஸ ஸத்தானம். மச்சுராஜா ஹி ஸப்³ப³ஸத்தே அபரிபுண்ணஜ்ஜா²ஸயே ஏவ மஹோகோ⁴ விய பரிகட்³ட⁴மானோயேவ அபாயஸமுத்³தே³ பக்கி²பதீ’’தி வத்வா த⁴ம்மம் தே³ஸேந்தோ இமம் கா³த²மாஹ –

‘‘தம் புத்தபஸுஸம்மத்தம், ப்³யாஸத்தமனஸம் நரம்;

ஸுத்தம் கா³மம் மஹோகோ⁴வ, மச்சு ஆதா³ய க³ச்ச²தீ’’தி. (த⁴. ப. 287);

கா³தா²பரியோஸானே கிஸாகோ³தமீ ஸோதாபத்திப²லே பதிட்ட²ஹி, அஞ்ஞேபி ப³ஹூ ஸோதாபத்திப²லாதீ³னி பாபுணிம்ஸூதி.

ஸா பன ஸத்தா²ரம் பப்³ப³ஜ்ஜம் யாசி, ஸத்தா² தம் பி⁴க்கு²னீனம் ஸந்திகம் பேஸேத்வா பப்³பா³ஜேஸி. ஸா லத்³தூ⁴பஸம்பதா³ கிஸாகோ³தமீ தே²ரீதி பஞ்ஞாயி. ஸா ஏகதி³வஸம் உபோஸதா²கா³ரே வாரம் பத்வா தீ³பம் ஜாலேத்வா நிஸின்னா தீ³பஜாலா உப்பஜ்ஜந்தியோ ச பி⁴ஜ்ஜந்தியோ ச தி³ஸ்வா ‘‘ஏவமேவ இமே ஸத்தா உப்பஜ்ஜந்தி சேவ நிருஜ்ஜ²ந்தி ச, நிப்³பா³னப்பத்தா ஏவ ந பஞ்ஞாயந்தீ’’தி ஆரம்மணம் அக்³க³ஹேஸி. ஸத்தா² க³ந்த⁴குடியம் நிஸின்னோவ ஓபா⁴ஸம் ப²ரித்வா தஸ்ஸா ஸம்முகே² நிஸீதி³த்வா கதே²ந்தோ விய ‘‘ஏவமேவ, கோ³தமி, இமே ஸத்தா தீ³பஜாலா விய உப்பஜ்ஜந்தி சேவ நிருஜ்ஜ²ந்தி ச, நிப்³பா³னப்பத்தா ஏவ ந பஞ்ஞாயந்தி, ஏவம் நிப்³பா³னம் அபஸ்ஸந்தானம் வஸ்ஸஸதம் ஜீவனதோ நிப்³பா³னம் பஸ்ஸந்தஸ்ஸ க²ணமத்தம்பி ஜீவிதம் ஸேய்யோ’’தி வத்வா அனுஸந்தி⁴ம் க⁴டேத்வா த⁴ம்மம் தே³ஸேந்தோ இமம் கா³த²மாஹ –

114. ‘‘யோ ச வஸ்ஸஸதம் ஜீவே, அபஸ்ஸம் அமதம் பத³ம்;

ஏகாஹம் ஜீவிதம் ஸேய்யோ, பஸ்ஸதோ அமதம் பத³’’ந்தி.

தத்த² அமதம் பத³ந்தி மரணவிரஹிதகோட்டா²ஸம், அமதமஹானிப்³பா³னந்தி அத்தோ². ஸேஸம் புரிமஸதி³ஸமேவ.

தே³ஸனாவஸானே கிஸாகோ³தமீ யதா²னிஸின்னாவ ஸஹ படிஸம்பி⁴தா³ஹி அரஹத்தே பதிட்ட²ஹீதி.

கிஸாகோ³தமீவத்து² தேரஸமம்.