7. மக⁴வத்து²

அப்பமாதே³ன மக⁴வாதி இமம் த⁴ம்மதே³ஸனம் ஸத்தா² வேஸாலியம் உபனிஸ்ஸாய கூடாகா³ரஸாலாயம் விஹரந்தோ ஸக்கம் தே³வராஜானம் ஆரப்³ப⁴ கதே²ஸி.

வேஸாலியஞ்ஹி மஹாலி நாம லிச்ச²வீ வஸதி, ஸோ ததா²க³தஸ்ஸ ஸக்கபஞ்ஹஸுத்தந்ததே³ஸனம் (தீ³. நி. 2.344 ஆத³யோ) ஸுத்வா ‘‘ஸம்மாஸம்பு³த்³தோ⁴ ஸக்கஸம்பத்திம் மஹதிம் கத்வா கதே²ஸி, ‘தி³ஸ்வா நு கோ² கதே²ஸி, உதா³ஹு அதி³ஸ்வா. ஜானாதி நு கோ² ஸக்கம், உதா³ஹு நோ’தி புச்சி²ஸ்ஸாமி ந’’ந்தி சிந்தேஸி. அத² கோ², மஹாலி, லிச்ச²வீ யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³, ஏகமந்தம் நிஸின்னோ கோ², மஹாலி, லிச்ச²வீ ப⁴க³வந்தம் ஏதத³வோச – ‘‘தி³ட்டோ² கோ², ப⁴ந்தே, ப⁴க³வதா ஸக்கோ தே³வானமிந்தோ³’’தி? ‘‘தி³ட்டோ² கோ² மே, மஹாலி, ஸக்கோ தே³வானமிந்தோ³’’தி. ‘‘ஸோ ஹி நுன, ப⁴ந்தே, ஸக்கபதிரூபகோ ப⁴விஸ்ஸதி. து³த்³த³ஸோ ஹி, ப⁴ந்தே, ஸக்கோ தே³வானமிந்தோ³’’தி. ‘‘ஸக்கஞ்ச க்²வாஹம், மஹாலி, பஜானாமி ஸக்ககரணே ச த⁴ம்மே, யேஸம் த⁴ம்மானம் ஸமாதி³ன்னத்தா ஸக்கோ ஸக்கத்தம் அஜ்ஜ²கா³, தஞ்ச பஜானாமி’’.

ஸக்கோ, மஹாலி, தே³வானமிந்தோ³ புப்³பே³ மனுஸ்ஸபூ⁴தோ ஸமானோ மகோ⁴ நாம மாணவோ அஹோஸி, தஸ்மா ‘‘மக⁴வா’’தி வுச்சதி.

ஸக்கோ, மஹாலி, தே³வானமிந்தோ³ புப்³பே³ மனுஸ்ஸபூ⁴தோ ஸமானோ புரே தா³னம் அதா³ஸி, தஸ்மா ‘‘புரிந்த³தோ³’’தி வுச்சதி.

ஸக்கோ, மஹாலி, தே³வானமிந்தோ³ புப்³பே³ மனுஸ்ஸபூ⁴தோ ஸமானோ ஸக்கச்சம் தா³னம் அதா³ஸி, தஸ்மா ‘‘ஸக்கோ’’தி வுச்சதி.

ஸக்கோ, மஹாலி, தே³வானமிந்தோ³ புப்³பே³ மனுஸ்ஸபூ⁴தோ ஸமானோ ஆவஸத²ம் அதா³ஸி, தஸ்மா ‘‘வாஸவோ’’தி வுச்சதி.

ஸக்கோ, மஹாலி, தே³வானமிந்தோ³ ஸஹஸ்ஸம்பி அத்த²ம் முஹுத்தேன சிந்தேதி, தஸ்மா ‘‘ஸஹஸ்ஸக்கோ²’’தி வுச்சதி.

ஸக்கஸ்ஸ, மஹாலி, தே³வானமிந்த³ஸ்ஸ ஸுஜா நாம அஸுரகஞ்ஞா, பஜாபதி, தஸ்மா ‘‘ஸுஜம்பதீ’’தி வுச்சதி.

ஸக்கோ, மஹாலி, தே³வானமிந்தோ³ தே³வானம் தாவதிம்ஸானம் இஸ்ஸரியாதி⁴பச்சம் ரஜ்ஜம் காரேதி, தஸ்மா ‘‘தே³வானமிந்தோ³’’தி வுச்சதி.

ஸக்கஸ்ஸ, மஹாலி, தே³வானமிந்த³ஸ்ஸ புப்³பே³ மனுஸ்ஸபூ⁴தஸ்ஸ ஸத்த வதபதா³னி ஸமத்தானி ஸமாதி³ன்னானி அஹேஸும், யேஸம் ஸமாதி³ன்னத்தா ஸக்கோ ஸக்கத்தம் அஜ்ஜ²கா³. கதமானி ஸத்த வதபதா³னி? யாவஜீவம் மாதாபேத்திப⁴ரோ அஸ்ஸம், யாவஜீவம் குலே ஜேட்டா²பசாயீ அஸ்ஸம், யாவஜீவம் ஸண்ஹவாசோ அஸ்ஸம், யாவஜீவம் அபிஸுணவாசோ அஸ்ஸம், யாவஜீவம் விக³தமலமச்சே²ரேன சேதஸா அகா³ரம் அஜ்ஜா²வஸேய்யம், முத்தசாகோ³ பயதபாணி வோஸக்³க³ரதோ யாசயோகோ³ தா³னஸம்விபா⁴க³ரதோ அஸ்ஸம். யாவஜீவம் ஸச்சவாசோ அஸ்ஸம், யாவஜீவம் அக்கோத⁴னோ அஸ்ஸம், ‘‘ஸசேபி மே கோதோ⁴ உப்பஜ்ஜேய்ய, கி²ப்பமேவ ந படிவினேய்ய’’ந்தி. ஸக்கஸ்ஸ, மஹாலி, தே³வானமிந்த³ஸ்ஸ புப்³பே³ மனுஸ்ஸபூ⁴தஸ்ஸ இமானி ஸத்த வதபதா³னி ஸமத்தானி ஸமாதி³ன்னானி அஹேஸும், யேஸம் ஸமாதி³ன்னத்தா ஸக்கோ ஸக்கத்தம் அஜ்ஜ²கா³தி.

‘‘மாதாபேத்திப⁴ரம் ஜந்தும், குலே ஜேட்டா²பசாயினம்;

ஸண்ஹம் ஸகி²லஸம்பா⁴ஸம், பேஸுணேய்யப்பஹாயினம்.

‘‘மச்சே²ரவினயே யுத்தம், ஸச்சம் கோதா⁴பி⁴பு⁴ம் நரம்;

தம் வே தே³வா தாவதிம்ஸா, ஆஹு ஸப்புரிஸோ இதீ’’தி. (ஸம். நி. 1.257) –

இத³ம், மஹாலி, ஸக்கேன மக⁴மாணவகாலே கதகம்மந்தி வத்வா புன தேன ‘‘கத²ம், ப⁴ந்தே, மக⁴மாணவோ படிபஜ்ஜீ’’தி? தஸ்ஸ படிபத்திம் வித்தா²ரதோ ஸோதுகாமேன புட்டோ² ‘‘தேன ஹி, மஹாலி, ஸுணாஹீ’’தி வத்வா அதீதம் ஆஹரி –

அதீதே மக³த⁴ரட்டே² மசலகா³மே மகோ⁴ நாம மாணவோ கா³மகம்மகரணட்டா²னம் க³ந்த்வா அத்தனோ டி²தட்டா²னம் பாத³ந்தேன பம்ஸும் வியூஹித்வா ரமணீயம் கத்வா அட்டா²ஸி. அபரோ தம் பா³ஹுனா பஹரித்வா ததோ அபனேத்வா ஸயம் தத்த² அட்டா²ஸி. ஸோ தஸ்ஸ அகுஜ்ஜி²த்வாவ அஞ்ஞம் டா²னம் ரமணீயம் கத்வா டி²தோ. ததோபி நம் அஞ்ஞோ ஆக³ந்த்வா பா³ஹுனா பஹரித்வா அபனேத்வா ஸயம் அட்டா²ஸி. ஸோ தஸ்ஸபி அகுஜ்ஜி²த்வாவ அஞ்ஞம் டா²னம் ரமணீயம் கத்வா டி²தோ, இதி தம் கே³ஹதோ நிக்க²ந்தா நிக்க²ந்தா புரிஸா பா³ஹுனா பஹரித்வா டி²தடி²தட்டா²னதோ அபனேஸும். ஸோ ‘‘ஸப்³பே³பேதே மம் நிஸ்ஸாய ஸுகி²தா ஜாதா, இமினா கம்மேன மய்ஹம் ஸுக²தா³யகேன புஞ்ஞகம்மேன ப⁴விதப்³ப³’’ந்தி சிந்தேத்வா, புனதி³வஸே குதா³லம் ஆதா³ய க²லமண்ட³லமத்தம் டா²னம் ரமணீயம் அகாஸி. ஸப்³பே³ க³ந்த்வா தத்தே²வ அட்ட²ம்ஸு. அத² நேஸம் ஸீதஸமயே அக்³கி³ம் கத்வா அதா³ஸி, கி³ம்ஹகாலே உத³கம். ததோ ‘‘ரமணீயம் டா²னம் நாம ஸப்³பே³ஸம் பியம், கஸ்ஸசி அப்பியம் நாம நத்தி², இதோ பட்டா²ய மயா மக்³க³ம் ஸமம் கரோந்தேன விசரிதும் வட்டதீ’’தி சிந்தேத்வா, பாதோவ நிக்க²மித்வா, மக்³க³ம் ஸமம் கரோந்தோ சி²ந்தி³த்வா, ஹரிதப்³ப³யுத்தகா ருக்க²ஸாகா² ஹரந்தோ விசரதி. அத² நம் அபரோ தி³ஸ்வா ஆஹ – ‘‘ஸம்ம, கிம் கரோஸீ’’தி? ‘‘மய்ஹம் ஸக்³க³கா³மினம் மக்³க³ம் கரோமி, ஸம்மா’’தி. ‘‘தேன ஹி அஹம்பி தே ஸஹாயோ ஹோமீ’’தி. ‘‘ஹோஹி, ஸம்ம, ஸக்³கோ³ நாம ப³ஹூனம்பி மனாபோ ஸுக²ப³ஹுலோ’’தி. ததோ பட்டா²ய த்³வே ஜனா அஹேஸும். தே தி³ஸ்வா ததே²வ புச்சி²த்வா ச ஸுத்வா ச அபரோபி தேஸம் ஸஹாயோ ஜாதோ, ஏவம் அபரோபி அபரோபீதி ஸப்³பே³பி தேத்திம்ஸ ஜனா ஜாதா. தே ஸப்³பே³பி குதா³லாதி³ஹத்தா² மக்³க³ம் ஸமம் கரோந்தா ஏகயோஜனத்³வியோஜனமத்தட்டா²னம் க³ச்ச²ந்தி.

தே தி³ஸ்வா கா³மபோ⁴ஜகோ சிந்தேஸி – ‘‘இமே மனுஸ்ஸா அயோகே³ யுத்தா, ஸசே இமே அரஞ்ஞதோ மச்ச²மம்ஸாதீ³னி வா ஆஹரேய்யும். ஸுரம் வா கத்வா பிவேய்யும், அஞ்ஞம் வா தாதி³ஸம் கம்மம் கரேய்யும், அஹம்பி கிஞ்சி கிஞ்சி லபே⁴ய்ய’’ந்தி. அத² நே பக்கோஸாபேத்வா புச்சி² – ‘‘கிம் கரோந்தா விசரதா²’’தி? ‘‘ஸக்³க³மக்³க³ம், ஸாமீ’’தி. ‘‘க⁴ராவாஸம் வஸந்தேஹி நாம ஏவம் காதும் ந வட்டதி, அரஞ்ஞதோ மச்ச²மம்ஸாதீ³னி ஆஹரிதும், ஸுரம் கத்வா பாதும், நானப்பகாரே ச கம்மந்தே காதும் வட்டதீ’’தி. தே தஸ்ஸ வசனம் படிக்கி²பிம்ஸு, ஏவம் புனப்புனம் வுச்சமானாபி படிக்கி²பிம்ஸுயேவ. ஸோ குஜ்ஜி²த்வா ‘‘நாஸேஸ்ஸாமி நே’’தி ரஞ்ஞோ ஸந்திகம் க³ந்த்வா, ‘‘சோரே தே, தே³வ, வக்³க³ப³ந்த⁴னேன விசரந்தே பஸ்ஸாமீ’’தி வத்வா, ‘‘க³ச்ச², தே க³ஹேத்வா ஆனேஹீ’’தி வுத்தே ததா² கத்வா ஸப்³பே³ தே ப³ந்தி⁴த்வா ஆனேத்வா ரஞ்ஞோ த³ஸ்ஸேஸி. ராஜா அவீமம்ஸித்வாவ ‘‘ஹத்தி²னா மத்³தா³பேதா²’’தி ஆணாபேஸி. மகோ⁴ ஸேஸானம் ஓவாத³மதா³ஸி – ‘‘ஸம்மா, ட²பேத்வா மேத்தம் அஞ்ஞோ அம்ஹாகம் அவஸ்ஸயோ நத்தி², தும்ஹே கத்த²சி கோபம் அகத்வா ரஞ்ஞே ச கா³மபோ⁴ஜகே ச மத்³த³னஹத்தி²ம்ஹி ச அத்தனி ச மேத்தசித்தேன ஸமசித்தாவ ஹோதா²’’தி. தே ததா² கரிம்ஸு. அத² நேஸம் மேத்தானுபா⁴வேன ஹத்தீ² உப்பஸங்கமிதும்பி ந விஸஹி. ராஜா தமத்த²ம் ஸுத்வா ப³ஹூ மனுஸ்ஸே தி³ஸ்வா மத்³தி³தும் ந விஸஹிஸ்ஸதி? ‘‘க³ச்ச²த², நே கிலஞ்ஜேன படிச்சா²தே³த்வா மத்³தா³பேதா²’’தி ஆஹ. தே கிலஞ்ஜேன படிச்சா²தே³த்வா மத்³தி³தும் பேஸியமானோபி ஹத்தீ² தூ³ரதோவ படிக்கமி.

ராஜா தம் பவத்திம் ஸுத்வா ‘‘காரணேனேத்த² ப⁴விதப்³ப³’’ந்தி தே பக்கோஸாபேத்வா புச்சி² – ‘‘தாதா, மம் நிஸ்ஸாய தும்ஹே கிம் ந லப⁴தா²’’தி? ‘‘கிம் நாமேதம், தே³வா’’தி? ‘‘தும்ஹே கிர வக்³க³ப³ந்த⁴னேன சோரா ஹுத்வா அரஞ்ஞே விசரதா²’’தி? ‘‘கோ ஏவமாஹ, தே³வா’’தி? ‘‘கா³மபோ⁴ஜகோ, தாதா’’தி. ‘‘ந மயம், தே³வ, சோரா, மயம் பன அத்தனோ ஸக்³க³மக்³க³ம் ஸோதே⁴ந்தா இத³ஞ்சித³ஞ்ச கரோம, கா³மபோ⁴ஜகோ அம்ஹே அகுஸலகிரியாய நியோஜேத்வா அத்தனோ வசனம் அகரோந்தே நாஸேதுகாமோ குஜ்ஜி²த்வா ஏவமாஹா’’தி. அத² ராஜா தேஸம் கத²ம் ஸுத்வா ஸோமனஸ்ஸப்பத்தோ ஹுத்வா, ‘‘தாதா, அயம் திரச்சா²னோ தும்ஹாகம் கு³ணே ஜானாதி, அஹம் மனுஸ்ஸபூ⁴தோ ஜானிதும் நாஸக்கி²ம், க²மத² மே’’தி. ஏவஞ்ச பன வத்வா ஸபுத்ததா³ரம் கா³மபோ⁴ஜகம் தேஸம் தா³ஸம், ஹத்தி²ம் ஆரோஹனியம், தஞ்ச கா³மம் யதா²ஸுக²ம் பரிபோ⁴க³ம் கத்வா அதா³ஸி. தே ‘‘இதே⁴வ நோ கதபுஞ்ஞஸ்ஸானிஸம்ஸோ தி³ட்டோ²’’தி பி⁴ய்யோஸோமத்தாய பஸன்னமானஸா ஹுத்வா தம் ஹத்தி²ம் வாரேன வாரேன அபி⁴ருய்ஹ க³ச்ச²ந்தா மந்தயிம்ஸு ‘‘இதா³னி அம்ஹேஹி அதிரேகதரம் புஞ்ஞம் காதப்³ப³ம், கிம் கரோம? சதுமஹாபதே² தா²வரம் கத்வா மஹாஜனஸ்ஸ விஸ்ஸமனஸாலம் கரிஸ்ஸாமா’’தி. தே வட்³ட⁴கிம் பக்கோஸாபேத்வா ஸாலம் பட்ட²பேஸும். மாதுகா³மேஸு பன விக³தச்ச²ந்த³தாய தஸ்ஸா ஸாலாய மாதுகா³மானம் பத்திம் நாத³ம்ஸு.

மக⁴ஸ்ஸ பன கே³ஹே நந்தா³, சித்தா, ஸுத⁴ம்மா, ஸுஜாதி சதஸ்ஸோ இத்தி²யோ ஹோந்தி. தாஸு ஸுத⁴ம்மா வட்³ட⁴கினா ஸத்³தி⁴ம் ஏகதோ ஹுத்வா, ‘‘பா⁴திக, இமிஸ்ஸா ஸாலாய மம் ஜேட்டி²கம் கரோஹீ’’தி வத்வா லஞ்ஜம் அதா³ஸி. ஸோ ‘‘ஸாதூ⁴’’தி ஸம்படிச்சி²த்வா பட²மமேவ கண்ணிகத்தா²ய ருக்க²ம் ஸுக்கா²பேத்வா தச்சே²த்வா விஜ்ஜி²த்வா கண்ணிகம் நிட்டா²பேத்வா, ‘‘ஸுத⁴ம்மா நாம அயம் ஸாலா’’தி அக்க²ரானி சி²ந்தி³த்வா வத்தே²ன பலிவேடே²த்வா ட²பேஸி. அத² நே வட்³ட⁴கீ ஸாலம் நிட்டா²பேத்வா கண்ணிகாரோபனதி³வஸே ‘‘அஹோ, அய்யா, ஏகம் கரணீயம் ந ஸரிம்ஹா’’தி ஆஹ. ‘‘கிம் நாம, போ⁴’’தி? ‘‘கண்ணிக’’ந்தி. ‘‘ஹோது தம் ஆஹரிஸ்ஸாமா’’தி. ‘‘இதா³னி சி²ன்னருக்கே²ன காதும் ந ஸக்கா, புப்³பே³யேவ தம் சி²ந்தி³த்வா தச்சே²த்வா விஜ்ஜி²த்வா ட²பிதகண்ணிகா லத்³து⁴ம் வட்டதீ’’தி. ‘‘இதா³னி கிம் காதப்³ப³’’ந்தி? ‘‘ஸசே கஸ்ஸசி கே³ஹே நிட்டா²பேத்வா ட²பிதா விக்காயிககண்ணிகா அத்தி², ஸா பரியேஸிதப்³பா³’’தி. தே பரியேஸந்தா ஸுத⁴ம்மாய கே³ஹே தி³ஸ்வா ஸஹஸ்ஸம் த³த்வாபி மூலேன ந லபி⁴ம்ஸு. ‘‘ஸசே மம் ஸாலாய பத்திம் கரோத², த³ஸ்ஸாமீ’’தி வுத்தே பன ‘‘மயம் மாதுகா³மானம் பத்திம் ந த³ம்மா’’தி ஆஹம்ஸு.

அத² நே வட்³ட⁴கீ ஆஹ – ‘‘அய்யா, தும்ஹே கிம் கதே²த², ட²பேத்வா ப்³ரஹ்மலோகம் அஞ்ஞம் மாதுகா³மரஹிதட்டா²னம் நாம நத்தி², க³ண்ஹத² கண்ணிகம். ஏவம் ஸந்தே அம்ஹாகம் கம்மம் நிட்ட²ம் க³மிஸ்ஸதீ’’தி. தே ‘‘ஸாதூ⁴’’தி கண்ணிகம் க³ஹேத்வா ஸாலம் நிட்டா²பேத்வா திதா⁴ விப⁴ஜிம்ஸு. ஏகஸ்மிம் கோட்டா²ஸே இஸ்ஸரானம் வஸனட்டா²னம் கரிம்ஸு, ஏகஸ்மிம் து³க்³க³தானம், ஏகஸ்மிம் கி³லானானம். தேத்திம்ஸ ஜனா தேத்திம்ஸ ப²லகானி பஞ்ஞபேத்வா ஹத்தி²ஸ்ஸ ஸஞ்ஞம் அத³ம்ஸு – ‘‘ஆக³ந்துகோ ஆக³ந்த்வா யஸ்ஸ அத்த²தப²லகே நிஸீத³தி, தம் க³ஹேத்வா ப²லகஸாமிகஸ்ஸேவ கே³ஹே பதிட்ட²பேஹி, தஸ்ஸ பாத³பரிகம்மபிட்டி²பரிகம்மபானீயகா²த³னீயபோ⁴ஜனீயஸயனானி ஸப்³பா³னி ப²லகஸாமிகஸ்ஸேவ பா⁴ரோ ப⁴விஸ்ஸதீ’’தி. ஹத்தீ² ஆக³தாக³தம் க³ஹேத்வா ப²லகஸாமிகஸ்ஸேவ க⁴ரம் நேதி. ஸோ தஸ்ஸ தம் தி³வஸம் கத்தப்³ப³ம் கரோதி. மகோ⁴ ஸாலாய அவிதூ³ரே கோவிளாரருக்க²ம் ரோபேத்வா தஸ்ஸ மூலே பாஸாணப²லகம் அத்த²ரி. ஸாலம் பவிட்ட²பவிட்டா² ஜனா கண்ணிகம் ஓலோகேத்வா அக்க²ரானி வாசேத்வா, ‘‘ஸுத⁴ம்மா நாமேஸா ஸாலா’’தி வத³ந்தி. தேத்திம்ஸஜனானம் நாமம் ந பஞ்ஞாயதி. நந்தா³ சிந்தேஸி – ‘‘இமே ஸாலம் கரோந்தா அம்ஹே அபத்திகா கரிம்ஸு, ஸுத⁴ம்மா பன அத்தனோ ப்³யத்ததாய கண்ணிகம் கத்வா பத்திகா ஜாதா, மயாபி கிஞ்சி காதும் வட்டதி, கிம் நு கோ² கரிஸ்ஸாமீ’’தி? அத²ஸ்ஸா ஏதத³ஹோஸி – ‘‘ஸாலம் ஆக³தாக³தானம் பானீயஞ்சேவ ந்ஹானோத³கஞ்ச லத்³து⁴ம் வட்டதி, போக்க²ரணிம் க²ணாபேஸ்ஸாமீ’’தி. ஸா போக்க²ரணிம் காரேஸி. சித்தா சிந்தேஸி – ‘‘ஸுத⁴ம்மாய கண்ணிகா தி³ன்னா, நந்தா³ய போக்க²ரணீ காரிதா, மயாபி கிஞ்சி காதும் வட்டதி, கிம் நு கோ² கரிஸ்ஸாமீ’’தி? அத²ஸ்ஸா ஏதத³ஹோஸி – ‘‘ஸாலம் ஆக³தாக³தேஹி பானீயம் பிவித்வா ந்ஹத்வா க³மனகாலேபி மாலம் பிலந்தி⁴த்வா க³ந்தும் வட்டதி, புப்பா²ராமம் காராபேஸ்ஸாமீ’’தி. ஸா ரமணீயம் புப்பா²ராமம் காரேஸி. யேபு⁴ய்யேன தஸ்மிம் ஆராமே ‘‘அஸுகோ நாம புப்பூ²பக³ப²லூபக³ருக்கோ² நத்தீ²’’தி நாஹோஸி.

ஸுஜா பன ‘‘அஹம் மக⁴ஸ்ஸ மாதுலதீ⁴தா சேவ பாத³பரிசாரிகா ச, ஏதேன கதம் கம்மம் மய்ஹமேவ, மயா கதம் ஏதஸ்ஸேவா’’தி சிந்தேத்வா, கிஞ்சி அகத்வா அத்தபா⁴வமேவ மண்ட³யமானா காலம் வீதினாமேஸி. மகோ⁴பி மாதாபிதுஉபட்டா²னம் குலே ஜேட்டா²பசாயனகம்மம் ஸச்சவாசம் அப²ருஸவாசம் அபி, ஸுணவாசம் மச்சே²ரவினயம் அக்கோத⁴னந்தி இமானி ஸத்த வதபதா³னி பூரேத்வா –

‘‘மாதாபேத்திப⁴ரம் ஜந்தும், குலே ஜேட்டா²பசாயினம்;

ஸண்ஹம் ஸகி²லஸம்பா⁴ஸம், பேஸுணேய்யப்பஹாயினம்.

‘‘மச்சே²ரவினயே யுத்தம், ஸச்சம் கோதா⁴பி⁴பு⁴ம் நரம்;

தம் வே தே³வா தாவதிம்ஸா, ஆஹு ‘ஸப்புரிஸோ’இதீ’’தி. (ஸம். நி. 1.257) –

ஏவம் பஸம்ஸியபா⁴வம் ஆபஜ்ஜித்வா ஜீவிதபரியோஸானே தாவதிம்ஸப⁴வனே ஸக்கோ தே³வராஜா ஹுத்வா நிப்³ப³த்தி, தேபிஸ்ஸ ஸஹாயகா தத்தே²வ நிப்³ப³த்திம்ஸு, வட்³ட⁴கீ விஸ்ஸகம்மதே³வபுத்தோ ஹுத்வா நிப்³ப³த்தி. ததா³ தாவதிம்ஸப⁴வனே அஸுரா வஸந்தி. தே ‘‘அபி⁴னவா தே³வபுத்தா நிப்³ப³த்தா’’தி தி³ப்³ப³பானம் ஸஜ்ஜயிம்ஸு. ஸக்கோ அத்தனோ பரிஸாய கஸ்ஸசி அபிவனத்தா²ய ஸஞ்ஞமதா³ஸி. அஸுரா தி³ப்³ப³பானம் பிவித்வா மஜ்ஜிம்ஸு. ஸக்கோ ‘‘கிம் மே இமேஹி ஸாதா⁴ரணேன ரஜ்ஜேனா’’தி அத்தனோ பரிஸாய ஸஞ்ஞம் த³த்வா தே பாதே³ஸு கா³ஹாபேத்வா மஹாஸமுத்³தே³ கி²பாபேஸி. தே அவம்ஸிரா ஸமுத்³தே³ பதிம்ஸு. அத² நேஸம் புஞ்ஞானுபா⁴வேன ஸினேருனோ ஹேட்டி²மதலே அஸுரவிமானம் நாம நிப்³ப³த்தி, சித்தபாடலி நாம நிப்³ப³த்தி.

தே³வாஸுரஸங்கா³மே பன அஸுரேஸு பராஜிதேஸு த³ஸயோஜனஸஹஸ்ஸம் தாவதிம்ஸதே³வனக³ரம் நாம நிப்³ப³த்தி. தஸ்ஸ பன நக³ரஸ்ஸ பாசீனபச்சி²மத்³வாரானம் அந்தரா த³ஸயோஜனஸஹஸ்ஸம் ஹோதி, ததா² த³க்கி²ணுத்தரத்³வாரானம். தம் கோ² பன நக³ரம் த்³வாரஸஹஸ்ஸயுத்தம் அஹோஸி ஆராமபோக்க²ரணிபடிமண்டி³தம். தஸ்ஸ மஜ்ஜே² ஸாலாய நிஸ்ஸந்தே³ன தியோஜனஸதுப்³பே³தே⁴ஹி த⁴ஜேஹி படிமண்டி³தோ ஸத்தரதனமயோ ஸத்தயோஜனஸதுப்³பே³தோ⁴ வேஜயந்தோ நாம பாஸாதோ³ உக்³க³ஞ்சி². ஸுவண்ணயட்டீ²ஸு மணித⁴ஜா அஹேஸும், மணியட்டீ²ஸு ஸுவண்ணத⁴ஜா; பவாளயட்டீ²ஸு முத்தத⁴ஜா, முத்தயட்டீ²ஸு பவாளத⁴ஜா; ஸத்தரதனமயாஸு யட்டீ²ஸு ஸத்தரதனத⁴ஜா, மஜ்ஜே² டி²தோ த⁴ஜோ தியோஜனஸதுப்³பே³தோ⁴ அஹோஸி. இதி ஸாலாய நிஸ்ஸந்தே³ன யோஜனஸஹஸ்ஸுப்³பே³தோ⁴ பாஸாதோ³ ஸத்தரதனமயோவ ஹுத்வா நிப்³ப³த்தி, கோவிளாரருக்க²ஸ்ஸ நிஸ்ஸந்தே³ன ஸமந்தா தியோஜனஸதபரிமண்ட³லோ பாரிச்ச²த்தகோ நிப்³ப³த்தி, பாஸாணப²லகஸ்ஸ நிஸ்ஸந்தே³ன பாரிச்ச²த்தகமூலே தீ³க⁴தோ ஸட்டி²யோஜனா புது²லதோ பண்ணாஸயோஜனா ப³ஹலதோ பஞ்சத³ஸயோஜனா ஜயஸுமனரத்தகம்ப³லவண்ணா பண்டு³கம்ப³லஸிலா நிப்³ப³த்தி. தத்த² நிஸின்னகாலே உபட்³ட⁴காயோ பவிஸதி, உட்டி²தகாலே ஊனம் பரிபூரதி.

ஹத்தீ² பன ஏராவணோ நாம தே³வபுத்தோ ஹுத்வா நிப்³ப³த்தி. தே³வலோகஸ்மிஞ்ஹி திரச்சா²னக³தா ந ஹோந்தி. தஸ்மா ஸோ உய்யானகீளாய நிக்க²மனகாலே அத்தபா⁴வம் விஜஹித்வா தி³யட்³ட⁴யோஜனஸதிகோ ஏராவணோ நாம ஹத்தீ² அஹோஸி. ஸோ தேத்திம்ஸஜனானம் அத்தா²ய தேத்திம்ஸ கும்பே⁴ மாபேஸி ஆவட்டேன திகா³வுதஅட்³ட⁴யோஜனப்பமாணே, ஸப்³பே³ஸம் மஜ்ஜே² ஸக்கஸ்ஸ அத்தா²ய ஸுத³ஸ்ஸனம் நாம திம்ஸயோஜனிகம் கும்ப⁴ம் மாபேஸி. தஸ்ஸ உபரி த்³வாத³ஸயோஜனிகோ ரதனமண்ட³போ ஹோதி. தத்த² அந்தரந்தரா ஸத்தரதனமயா யோஜனுப்³பே³தா⁴ த⁴ஜா உட்ட²ஹந்தி. பரியந்தே கிங்கிணிகஜாலம் ஓலம்ப³தி. யஸ்ஸ மந்த³வாதேரிதஸ்ஸ பஞ்சங்கி³கதூரியஸத்³த³ஸம்மிஸ்ஸோ தி³ப்³ப³கீ³தஸத்³தோ³ விய ரவோ நிச்ச²ரதி. மண்ட³பமஜ்ஜே² ஸக்கஸ்ஸத்தா²ய யோஜனிகோ மணிபல்லங்கோ பஞ்ஞத்தோ ஹோதி, தத்த² ஸக்கோ நிஸீதி³. தேத்திம்ஸ தே³வபுத்தா அத்தனோ கும்பே⁴ ரதனபல்லங்கே நிஸீதி³ம்ஸு. தேத்திம்ஸாய கும்பா⁴னம் ஏகேகஸ்மிம் கும்பே⁴ ஸத்த ஸத்த த³ந்தே மாபேஸி. தேஸு ஏகேகோ பண்ணாஸயோஜனாயாமோ, ஏகேகஸ்மிஞ்சேத்த² த³ந்தே ஸத்த ஸத்த போக்க²ரணியோ ஹோந்தி, ஏகேகாய போக்க²ரணியா ஸத்த ஸத்த பது³மினீக³ச்சா²னி, ஏகேகஸ்மிம் க³ச்சே² ஸத்த ஸத்த புப்பா²னி ஹோந்தி, ஏகேகஸ்மிம் புப்பே² ஸத்த ஸத்த பத்தானி, ஏகேகஸ்மிம் பத்தே ஸத்த ஸத்த தே³வதீ⁴தரோ நச்சந்தி. ஏவம் ஸமந்தா பண்ணாஸயோஜனடா²னேஸு ஹத்தி²த³ந்தேஸுயேவ நடஸமஜ்ஜா ஹோந்தி. ஏவம் மஹந்தம் யஸம் அனுப⁴வந்தோ ஸக்கோ தே³வராஜா விசரதி.

ஸுத⁴ம்மாபி காலம் கத்வா க³ந்த்வா தத்தே²வ நிப்³ப³த்தி. தஸ்ஸா ஸுத⁴ம்மா நாம நவ யோஜனஸதிகா தே³வஸபா⁴ நிப்³ப³த்தி. ததோ ரமணீயதரம் கிர அஞ்ஞம் டா²னம் நாம நத்தி², மாஸஸ்ஸ அட்ட² தி³வஸே த⁴ம்மஸ்ஸவனம் தத்தே²வ ஹோதி. யாவஜ்ஜதனா அஞ்ஞதரம் ரமணீயம் டா²னம் தி³ஸ்வா, ‘‘ஸுத⁴ம்மா தே³வஸபா⁴ வியா’’தி வத³ந்தி. நந்தா³பி காலம் கத்வா க³ந்த்வா தத்தே²வ நிப்³ப³த்தி, தஸ்ஸா பஞ்சயோஜனஸதிகா நந்தா³ நாம போக்க²ரணீ நிப்³ப³த்தி. சித்தாபி காலம் கத்வா க³ந்த்வா தத்தே²வ நிப்³ப³த்தி, தஸ்ஸாபி பஞ்சயோஜனஸதிகம் சித்தலதாவனம் நாம நிப்³ப³த்தி, தத்த² உப்பன்னபுப்³ப³னிமித்தே தே³வபுத்தே நேத்வா மோஹயமானா விசரந்தி. ஸுஜா பன காலம் கத்வா ஏகிஸ்ஸா கி³ரிகந்த³ராய ஏகா ப³கஸகுணிகா ஹுத்வா நிப்³ப³த்தி. ஸக்கோ அத்தனோ பரிசாரிகா ஓலோகேந்தோ ‘‘ஸுத⁴ம்மா இதே⁴வ நிப்³ப³த்தா, ததா² நந்தா³ ச சித்தா ச, ஸுஜா நு கோ² குஹிம் நிப்³ப³த்தா’’தி சிந்தேந்தோ தம் தத்த² நிப்³ப³த்தம் தி³ஸ்வா, ‘‘பா³லா கிஞ்சி புஞ்ஞம் அகத்வா இதா³னி திரச்சா²னயோனியம் நிப்³ப³த்தா, இதா³னி பன தம் புஞ்ஞம் காரேத்வா இதா⁴னேதும் வட்டதீ’’தி அத்தபா⁴வம் விஜஹித்வா அஞ்ஞாதகவேஸேன தஸ்ஸா ஸந்திகம் க³ந்த்வா, ‘‘கிம் கரோந்தீ இத⁴ விசரஸீ’’தி புச்சி². ‘‘கோ பன த்வம், ஸாமீ’’தி? ‘‘அஹம் தே ஸாமிகோ மகோ⁴’’தி. ‘‘குஹிம் நிப்³ப³த்தோஸி, ஸாமீ’’தி? ‘‘அஹம் தாவதிம்ஸதே³வலோகே நிப்³ப³த்தோ’’. ‘‘தவ ஸஹாயிகானம் பன நிப்³ப³த்தட்டா²னம் ஜானாஸீ’’தி? ‘‘ந ஜானாமி, ஸாமீ’’தி. ‘‘தாபி மமேவ ஸந்திகே நிப்³ப³த்தா, பஸ்ஸிஸ்ஸஸி தா ஸஹாயிகா’’தி. ‘‘கதா²ஹம் தத்த² க³மிஸ்ஸாமீ’’தி? ஸக்கோ ‘‘அஹம் தம் தத்த² நேஸ்ஸாமீ’’தி வத்வா ஹத்த²தலே ட²பேத்வா தே³வலோகம் நேத்வா நந்தா³ய போக்க²ரணியா தீரே விஸ்ஸஜ்ஜேத்வா இதராஸம் திஸ்ஸன்னம் ஆரோசேஸி – ‘‘தும்ஹாகம் ஸஹாயிகம் ஸுஜம் பஸ்ஸிஸ்ஸதா²’’தி. ‘‘குஹிம் ஸா, தே³வா’’தி? ‘‘நந்தா³ய போக்க²ரணியா தீரே டி²தா’’தி ஆஹ. தா திஸ்ஸோபி க³ந்த்வா, ‘‘அஹோ அய்யாய ஏவரூபம் அத்தபா⁴வமண்ட³னஸ்ஸ ப²லம், இதா³னிஸ்ஸா துண்ட³ம் பஸ்ஸத², பாதே³ பஸ்ஸத², ஜங்கா⁴ பஸ்ஸத², ஸோப⁴தி வதஸ்ஸா அத்தபா⁴வோ’’தி கேளிம் கத்வா பக்கமிம்ஸு.

புன ஸக்கோ தஸ்ஸா ஸந்திகம் க³ந்த்வா, ‘‘தி³ட்டா² தே ஸஹாயிகா’’தி வத்வா ‘‘தி³ட்டா² மம் உப்பண்டே³த்வா க³தா, தத்தே²வ மம் நேஹீ’’தி வுத்தே தம் தத்தே²வ நேத்வா உத³கே விஸ்ஸஜ்ஜேத்வா, ‘‘தி³ட்டா² தே தாஸம் ஸம்பத்தீ’’தி புச்சி². ‘‘தி³ட்டா², தே³வா’’தி? ‘‘தயாபி தத்த² நிப்³ப³த்தனூபாயம் காதும் வட்டதீ’’தி. ‘‘கிம் கரோமி, தே³வா’’தி? ‘‘மயா தி³ன்னம் ஓவாத³ம் ரக்கி²ஸ்ஸஸீ’’தி. ‘‘ரக்கி²ஸ்ஸாமி, தே³வா’’தி. அத²ஸ்ஸா பஞ்ச ஸீலானி த³த்வா, ‘‘அப்பமத்தா ரக்கா²ஹீ’’தி வத்வா பக்காமி. ஸா ததோ பட்டா²ய ஸயம்மதமச்ச²கேயேவ பரியேஸித்வா கா²த³தி. ஸக்கோ கதிபாஹச்சயேன தஸ்ஸா வீமம்ஸனத்தா²ய க³ந்த்வா, வாலுகாபிட்டே² மதமச்ச²கோ விய ஹுத்வா உத்தானோ நிபஜ்ஜி. ஸா தம் தி³ஸ்வா ‘‘மதமச்ச²கோ’’தி ஸஞ்ஞாய அக்³க³ஹேஸி. மச்சோ² கி³லனகாலே நங்கு³ட்ட²ம் சாலேஸி. ஸா ‘‘ஸஜீவமச்ச²கோ’’தி உத³கே விஸ்ஸஜ்ஜேஸி. ஸோ தோ²கம் வீதினாமேத்வா புன தஸ்ஸா புரதோ உத்தானோ ஹுத்வா நிபஜ்ஜி. புன ஸா ‘‘மதமச்ச²கோ’’தி ஸஞ்ஞாய க³ஹேத்வா கி³லனகாலே அக்³க³னங்கு³ட்ட²ம் சாலேஸி. தம் தி³ஸ்வா ‘‘ஸஜீவமச்சோ²’’தி விஸ்ஸஜ்ஜேஸி. ஏவம் திக்க²த்தும் வீமம்ஸித்வா ‘‘ஸாது⁴கம் ஸீலம் ரக்க²தீ’’தி அத்தானம் ஜானாபேத்வா ‘‘அஹம் தவ வீமம்ஸனத்தா²ய ஆக³தோ, ஸாது⁴கம் ஸீலம் ரக்க²ஸி, ஏவம் ரக்க²மானா ந சிரஸ்ஸேவ மம ஸந்திகே நிப்³ப³த்திஸ்ஸஸி, அப்பமத்தா ஹோஹீ’’தி வத்வா பக்காமி.

ஸா ததோ பட்டா²ய பன ஸயம்மதமச்ச²ம் லப⁴தி வா, ந வா. அலப⁴மானா கதிபாஹச்சயேனேவ ஸுஸ்ஸித்வா காலம் கத்வா தஸ்ஸ ஸீலஸ்ஸ ப²லேன பா³ராணஸியம் கும்ப⁴காரஸ்ஸ தீ⁴தா ஹுத்வா நிப்³ப³த்தி. அத²ஸ்ஸா பன்னரஸஸோளஸவஸ்ஸுத்³தே³ஸிககாலே ஸக்கோ ‘‘குஹிம் நு கோ² ஸா நிப்³ப³த்தா’’தி ஆவஜ்ஜேந்தோ தி³ஸ்வா, ‘‘இதா³னி மயா தத்த² க³ந்தும் வட்டதீ’’தி ஏளாலுகவண்ணேன பஞ்ஞாயமானேஹி ஸத்தஹி ரதனேஹி யானகம் பூரேத்வா தம் பாஜேந்தோ பா³ராணஸிம் பவிஸித்வா, ‘‘அம்மதாதா, ஏளாலுகானி க³ண்ஹத² க³ண்ஹதா²’’தி உக்³கோ⁴ஸேந்தோ வீதி²ம் படிபஜ்ஜி. முக்³க³மாஸாதீ³னி க³ஹேத்வா ஆக³தே பன ‘‘மூலேன ந தே³மீ’’தி வத்வா, ‘‘கத²ம் தே³ஸீ’’தி வுத்தே, ‘‘ஸீலரக்கி²காய இத்தி²யா த³ம்மீ’’தி ஆஹ. ‘‘ஸீலம் நாம, ஸாமி, கீதி³ஸம், கிம் காளம், உதா³ஹு நீலாதி³வண்ண’’ந்தி? ‘‘தும்ஹே ‘ஸீலம் கீதி³ஸ’ந்திபி ந ஜானாத², கிமேவ நம் ரக்கி²ஸ்ஸத², ஸீலரக்கி²காய பன த³ஸ்ஸாமீ’’தி. ‘‘ஸாமி, ஏஸா கும்ப⁴காரஸ்ஸ தீ⁴தா ‘ஸீலம் ரக்கா²மீ’தி விசரதி, ஏதிஸ்ஸா தே³ஹீ’’தி. ஸாபி நம் ‘‘தேன ஹி மய்ஹம் தே³ஹி, ஸாமீ’’தி ஆஹ. ‘‘காஸி த்வ’’ந்தி? ‘‘அஹம் அவிஜஹிதபஞ்சஸீலா’’தி. ‘‘துய்ஹமேவேதானி மயா ஆனீதானீ’’தி யானகம் பாஜேந்தோ தஸ்ஸா க⁴ரம் க³ந்த்வா அஞ்ஞேஹி அனாஹரியம் கத்வா ஏளாலுகவண்ணேன தே³வத³த்தியம் த⁴னம் த³த்வா அத்தானம் ஜானாபேத்வா, ‘‘இத³ம் தே ஜீவிதவுத்தியா த⁴னம், பஞ்சஸீலானி அக²ண்டா³தீ³னி கத்வா ரக்கா²ஹீ’’தி வத்வா பக்காமி.

ஸாபி ததோ சவித்வா அஸுரப⁴வனே அஸுரஜேட்ட²கஸ்ஸ தீ⁴தா ஹுத்வா ஸக்கஸ்ஸ வேரிக⁴ரே நிப்³ப³த்தி. த்³வீஸு பன அத்தபா⁴வேஸு ஸீலஸ்ஸ ஸுரக்கி²தத்தா அபி⁴ரூபா அஹோஸி ஸுவண்ணவண்ணா அஸாதா⁴ரணாய ரூபஸிரியா ஸமன்னாக³தா. வேபசித்திஅஸுரிந்தோ³ ஆக³தாக³தானம் அஸுரானம் ‘‘தும்ஹே மம தீ⁴து அனுச்ச²விகா ந ஹோதா²’’தி தம் கஸ்ஸசி அத³த்வா, ‘‘மம தீ⁴தா அத்தனாவ அத்தனோ அனுச்ச²விகம் ஸாமிகம் க³ஹேஸ்ஸதீ’’தி அஸுரப³லம் ஸன்னிபாதாபேத்வா, ‘‘துய்ஹம் அனுச்ச²விகம் ஸாமிகம் க³ண்ஹா’’தி தஸ்ஸா, ஹத்தே² புப்ப²தா³மம் அதா³ஸி. தஸ்மிம் க²ணே ஸக்கோ தஸ்ஸா நிப்³ப³த்தட்டா²னம் ஓலோகேந்தோ தம் பவத்திம் ஞத்வா, ‘‘இதா³னி மயா க³ந்த்வா தம் ஆனேதும் வட்டதீ’’தி மஹல்லகஅஸுரவண்ணம் நிம்மினித்வா க³ந்த்வா பரிஸபரியந்தே அட்டா²ஸி. ஸாபி இதோ சிதோ ச ஓலோகேந்தீ தம் தி³ட்ட²மத்தாவ புப்³ப³ஸன்னிவாஸவஸேன உப்பன்னேன பேமேன மஹோகே⁴னேவ அஜ்ஜோ²த்த²டஹத³யா ஹுத்வா, ‘‘ஏஸோ மே ஸாமிகோ’’தி தஸ்ஸ உபரி புப்ப²தா³மம் கி²பி. அஸுரா ‘‘அம்ஹாகம் ராஜா ஏத்தகம் காலம் தீ⁴து அனுச்ச²விகம் அலபி⁴த்வா இதா³னி லபி⁴, அயமேவஸ்ஸ தீ⁴து பிதாமஹதோ மஹல்லகோ அனுச்ச²விகோ’’தி லஜ்ஜமானா அபக்கமிம்ஸு. ஸக்கோபி தம் ஹத்தே² க³ஹேத்வா ‘‘ஸக்கோஹமஸ்மீ’’தி நதி³த்வா ஆகாஸே பக்க²ந்தி³. அஸுரா ‘‘வஞ்சிதம்ஹா ஜரஸக்கேனா’’தி தம் அனுப³ந்தி⁴ம்ஸு. மாதலி, ஸங்கா³ஹகோ வேஜயந்தரத²ம் ஆஹரித்வா அந்தராமக்³கே³ அட்டா²ஸி. ஸக்கோ தம் தத்த² ஆரோபேத்வா தே³வனக³ராபி⁴முகோ² பாயாஸி. அத²ஸ்ஸ ஸிப்பலிவனம் ஸம்பத்தகாலே ரத²ஸத்³த³ம் ஸுத்வா பீ⁴தா க³ருளபோதகா விரவிம்ஸு. தேஸம் ஸத்³த³ம் ஸுத்வா ஸக்கோ மாதலிம் புச்சி² – ‘‘கே ஏதே விரவந்தீ’’தி? ‘‘க³ருளபோதகா, தே³வா’’தி. ‘‘கிம் காரணா’’தி? ‘‘ரத²ஸத்³த³ம் ஸுத்வா மரணப⁴யேனா’’தி. ‘‘மம் ஏகம் நிஸ்ஸாய ஏத்தகோ தி³ஜோ ரத²வேகே³ன விசுண்ணிதோ மா நஸ்ஸி, நிவத்தேஹி ரத²’’ந்தி. ஸோபி ஸிந்த⁴வஸஹஸ்ஸஸ்ஸ த³ண்ட³கஸஞ்ஞம் த³த்வா ரத²ம் நிவத்தேஸி. தம் தி³ஸ்வா அஸுரா ‘‘ஜரஸக்கோ அஸுரபுரதோ பட்டா²ய பலாயந்தோ இதா³னி ரத²ம் நிவத்தேஸி, அத்³தா⁴ தேன உபத்த²ம்போ⁴ லத்³தோ⁴ ப⁴விஸ்ஸதீ’’தி நிவத்தேத்வா ஆக³மனமக்³கே³னேவ அஸுரபுரம் பவிஸித்வா புன ஸீஸம் ந உக்கி²பிம்ஸு.

ஸக்கோபி ஸுஜம் அஸுரகஞ்ஞம் தே³வனக³ரம் நேத்வா அட்³ட⁴தேய்யானம் அச்ச²ராகோடீனம் ஜேட்டி²கட்டா²னே ட²பேஸி. ஸா ஸக்கம் வரம் யாசி – ‘‘மஹாராஜ, மம இமஸ்மிம் தே³வலோகே மாதாபிதரோ வா பா⁴திகப⁴கி³னியோ வா நத்தி², யத்த² யத்த² க³ச்ச²ஸி, தத்த² தத்த² மம் க³ஹேத்வாவ க³ச்சே²ய்யாஸீ’’தி. ஸோ ‘‘ஸாதூ⁴’’தி தஸ்ஸா படிஞ்ஞம் அதா³ஸி. ததோ பட்டா²ய சித்தபாடலியா புப்பி²தாய அஸுரா ‘‘அம்ஹாகம் நிப்³ப³த்தட்டா²னே தி³ப்³ப³பாரிச்ச²த்தகஸ்ஸ புப்ப²னகாலோ’’தி யுத்³த⁴த்தா²ய ஸக்³க³ம் அபி⁴ருஹந்தி. ஸக்கோ ஹேட்டா²ஸமுத்³தே³ நாகா³னம் ஆரக்க²ம் அதா³ஸி, ததோ ஸுபண்ணானம், ததோ கும்ப⁴ண்டா³னம், ததோ யக்கா²னம். ததோ சதுன்னம் மஹாராஜானம். ஸப்³பூ³பரி பன உபத்³த³வனிவத்தனத்தா²ய தே³வனக³ரத்³வாரேஸு வஜிரஹத்தா² இந்த³படிமா ட²பேஸி. அஸுரா நாகா³த³யோ ஜினித்வா ஆக³தாபி இந்த³படிமா தூ³ரதோ தி³ஸ்வா ‘‘ஸக்கோ நிக்க²ந்தோ’’தி பலாயந்தி. ஏவம், மஹாலி, மகோ⁴ மாணவோ அப்பமாத³படிபத³ம் படிபஜ்ஜி. ஏவம் அப்பமத்தோ பனேஸ ஏவரூபம் இஸ்ஸரியம் பத்வா த்³வீஸு தே³வலோகேஸு ரஜ்ஜம் காரேஸி. அப்பமாதோ³ நாமேஸ பு³த்³தா⁴தீ³ஹி பஸத்தோ². அப்பமாத³ஞ்ஹி நிஸ்ஸாய ஸப்³பே³ஸம்பி லோகியலோகுத்தரானம் விஸேஸானம் அதி⁴க³மோ ஹோதீதி வத்வா இமம் கா³த²மாஹ –

30. ‘‘அப்பமாதே³ன மக⁴வா, தே³வானம் ஸேட்ட²தம் க³தோ;

அப்பமாத³ம் பஸம்ஸந்தி, பமாதோ³ க³ரஹிதோ ஸதா³’’தி.

தத்த² அப்பமாதே³னாதி மசலகா³மே பூ⁴மிப்பதே³ஸஸோத⁴னம் ஆதி³ம் கத்வா கதேன அப்பமாதே³ன. மக⁴வாதி இதா³னி ‘‘மக⁴வா’’திபஞ்ஞாதோ மகோ⁴ மாணவோ த்³வின்னம் தே³வலோகானம் ராஜபா⁴வேன தே³வானம் ஸேட்ட²தம் க³தோ. பஸம்ஸந்தீதி பு³த்³தா⁴த³யோ பண்டி³தா அப்பமாத³மேவ தோ²மேந்தி வண்ணயந்தி. கிம் காரணா? ஸப்³பே³ஸம் லோகியலோகுத்தரானம் விஸேஸானம் படிலாப⁴காரணத்தா. பமாதோ³ க³ரஹிதோ ஸதா³தி பமாதோ³ பன தேஹி அரியேஹி நிச்சம் க³ரஹிதோ நிந்தி³தோ. கிம் காரணா? ஸப்³ப³விபத்தீனம் மூலபா⁴வதோ. மனுஸ்ஸதோ³ப⁴க்³க³ம் வா ஹி அபாயுப்பத்தி வா ஸப்³பா³ பமாத³மூலிகாயேவாதி.

கா³தா²பரியோஸானே மஹாலி லிச்ச²வீ ஸோதாபத்திப²லே பதிட்ட²ஹி, ஸம்பத்தபரிஸாயபி ப³ஹூ ஸோதாபன்னாத³யோ ஜாதாதி.

மக⁴வத்து² ஸத்தமம்.