5. மஹாகஸ்ஸபத்தே²ரவத்து²

பமாத³ம் அப்பமாதே³னாதி இமம் த⁴ம்மதே³ஸனம் ஸத்தா² ஜேதவனே விஹரந்தோ மஹாகஸ்ஸபத்தே²ரம் ஆரப்³ப⁴ கதே²ஸி.

ஏகஸ்மிஞ்ஹி தி³வஸே தே²ரோ பிப்ப²லிகு³ஹாயம் விஹரந்தோ ராஜக³ஹே பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ ஆலோகம் வட்³டே⁴த்வா பமத்தே ச அப்பமத்தே ச உத³கபத²வீபப்³ப³தாதீ³ஸு சவனகே உபபஜ்ஜனகே ச ஸத்தே தி³ப்³பே³ன சக்கு²னா ஓலோகேந்தோ நிஸீதி³. ஸத்தா² ஜேதவனே நிஸின்னகோவ ‘‘கேன நு கோ² விஹாரேன அஜ்ஜ மம புத்தோ கஸ்ஸபோ விஹரதீ’’தி தி³ப்³பே³ன சக்கு²னா உபதா⁴ரேந்தோ ‘‘ஸத்தானம் சுதூபபாதம் ஓலோகேந்தோ விஹரதீ’’தி ஞத்வா ‘‘ஸத்தானம் சுதூபபாதோ நாம பு³த்³த⁴ஞாணேனபி அபரிச்சி²ன்னோ, மாதுகுச்சி²யம் படிஸந்தி⁴ம் க³ஹேத்வா மாதாபிதரோ அஜானாபேத்வா சவனஸத்தானம் பரிச்சே²தோ³ காதும் ந ஸக்கா, தே ஜானிதும் தவ அவிஸயோ, கஸ்ஸப, அப்பமத்தகோ தவ விஸயோ, ஸப்³ப³ஸோ பன சவந்தே ச உபபஜ்ஜந்தே ச ஜானிதும் பஸ்ஸிதும் பு³த்³தா⁴னமேவ விஸயோ’’தி வத்வா ஓபா⁴ஸம் ப²ரித்வா ஸம்முகே² நிஸின்னோ விய ஹுத்வா இமம் கா³த²மாஹ –

28. ‘‘பமாத³ம் அப்பமாதே³ன, யதா³ நுத³தி பண்டி³தோ;

பஞ்ஞாபாஸாத³மாருய்ஹ, அஸோகோ ஸோகினிம் பஜம்;

பப்³ப³தட்டோ²வ பூ⁴மட்டே², தீ⁴ரோ பா³லே அவேக்க²தீ’’தி.

தத்த² நுத³தீதி யதா² நாம போக்க²ரணிம் பவிஸந்தம் நவோத³கம் புராணோத³கம் கோ²பே⁴த்வா தஸ்ஸோகாஸம் அத³த்வா தம் அத்தனோ மத்த²கமத்த²கேன பலாயந்தம் நுத³தி நீஹரதி, ஏவமேவ பண்டி³தோ அப்பமாத³லக்க²ணம் ப்³ரூஹேந்தோ பமாத³ஸ்ஸோகாஸம் அத³த்வா யதா³ அப்பமாத³வேகே³ன தம் நுத³தி நீஹரதி, அத² ஸோ பனுன்னபமாதோ³ அச்சுக்³க³தத்தே²ன பரிஸுத்³த⁴ம் தி³ப்³ப³சக்கு²ஸங்கா²தம் பஞ்ஞாபாஸாத³ம் தஸ்ஸ அனுச்ச²விகம் படிபத³ம் பூரேந்தோ தாய படிபதா³ய நிஸ்ஸேணியா பாஸாத³ம் விய ஆருய்ஹ பஹீனஸோகஸல்லதாய அஸோகோ, அப்பஹீனஸோகஸல்லதாய ஸோகினிம் பஜம் ஸத்தனிகாயம் சவமானஞ்சேவ உபபஜ்ஜமானஞ்ச தி³ப்³ப³சக்கு²னா அவேக்க²தி பஸ்ஸதி. யதா² கிம்? பப்³ப³தட்டோ²வ பூ⁴மட்டே²தி பப்³ப³தமுத்³த⁴னி டி²தோ பூ⁴மியம் டி²தே, உபரிபாஸாதே³ வா பன டி²தோ பாஸாத³பரிவேணே டி²தே அகிச்சே²ன அவேக்க²தி, ததா² ஸோபி தீ⁴ரோ பண்டி³தோ மஹாகீ²ணாஸவோ அஸமுச்சி²ன்னவட்டபீ³ஜே பா³லே சவந்தே ச உபபஜ்ஜந்தே ச அகிச்சே²ன அவேக்க²தீதி.

கா³தா²பரியோஸானே ப³ஹூ ஸோதாபத்திப²லாதீ³னி ஸச்சி²கரிம்ஸூதி.

மஹாகஸ்ஸபத்தே²ரவத்து² பஞ்சமம்.