1. ஸாமாவதீவத்து²

அப்பமாதோ³ அமதபத³ந்தி இமம் த⁴ம்மதே³ஸனம் ஸத்தா² கோஸம்பி³ம் உபனிஸ்ஸாய கோ⁴ஸிதாராமே விஹரந்தோ ஸாமாவதிப்பமுகா²னம் பஞ்சன்னம் இத்தி²ஸதானம், மாக³ண்டி³யப்பமுகா²னஞ்ச ஏதிஸ்ஸா பஞ்சன்னம் ஞாதிஸதானம் மரணப்³யஸனம் ஆரப்³ப⁴ கதே²ஸி.

தத்ராயம் அனுபுப்³பி³கதா² – அதீதே அல்லகப்பரட்டே² அல்லகப்பராஜா நாம, வேட²தீ³பகரட்டே² வேட²தீ³பகராஜா நாமாதி இமே த்³வே த³ஹரகாலதோ பட்டா²ய ஸஹாயகா ஹுத்வா ஏகாசரியகுலே ஸிப்பம் உக்³க³ண்ஹித்வா அத்தனோ அத்தனோ பிதூனம் அச்சயேன ச²த்தம் உஸ்ஸாபேத்வா ஆயாமேன த³ஸத³ஸயோஜனிகே ரட்டே² ராஜானோ அஹேஸும். தே காலேன காலம் ஸமாக³ந்த்வா ஏகதோ திட்ட²ந்தா நிஸீத³ந்தா நிபஜ்ஜந்தா மஹாஜனம் ஜாயமானஞ்ச ஜீயமானஞ்ச மீயமானஞ்ச தி³ஸ்வா ‘‘பரலோகம் க³ச்ச²ந்தம் அனுக³ச்ச²ந்தோ நாம நத்தி², அந்தமஸோ அத்தனோ ஸரீரம்பி நானுக³ச்ச²தி, ஸப்³ப³ம் பஹாய க³ந்தப்³ப³ம், கிம் நோ க⁴ராவாஸேன, பப்³ப³ஜிஸ்ஸாமா’’தி மந்தேத்வா ரஜ்ஜானி புத்ததா³ரானம் நிய்யாதே³த்வா இஸிபப்³ப³ஜ்ஜம் பப்³ப³ஜித்வா ஹிமவந்தப்பதே³ஸே வஸந்தா மந்தயிம்ஸு – ‘‘மயம் ரஜ்ஜம் பஹாய பப்³ப³ஜிதா, ந ஜீவிதும் அஸக்கோந்தா. தே மயம் ஏகட்டா²னே வஸந்தா அபப்³ப³ஜிதஸதி³ஸாயேவ ஹோம, தஸ்மா விஸும் வஸிஸ்ஸாம. த்வம் ஏதஸ்மிம் பப்³ப³தே வஸ, அஹம் இமஸ்மிம் பப்³ப³தே வஸிஸ்ஸாமி. அன்வட்³ட⁴மாஸம் பன உபோஸத²தி³வஸே ஏகதோ ப⁴விஸ்ஸாமா’’தி. அத² கோ² நேஸம் ஏதத³ஹோஸி – ‘‘ஏவம்பி நோ க³ணஸங்க³ணிகாவ ப⁴விஸ்ஸதி, த்வம் பன தவ பப்³ப³தே அக்³கி³ம் ஜாலேய்யாஸி, அஹம் மம பப்³ப³தே அக்³கி³ம் ஜாலேஸ்ஸாமி, தாய ஸஞ்ஞாய அத்தி²பா⁴வம் ஜானிஸ்ஸாமா’’தி. தே ததா² கரிம்ஸு.

அத² அபரபா⁴கே³ வேட²தீ³பகதாபஸோ காலம் கத்வா மஹேஸக்கோ² தே³வராஜா ஹுத்வா நிப்³ப³த்தோ. ததோ அட்³ட⁴மாஸே ஸம்பத்தே அக்³கி³ம் அதி³ஸ்வாவ இதரோ ‘‘ஸஹாயகோ மே காலகதோ’’தி அஞ்ஞாஸி. இதரோபி நிப்³ப³த்தக்க²ணேயேவ அத்தனோ தே³வஸிரிம் ஓலோகேத்வா கம்மம் உபதா⁴ரேந்தோ நிக்க²மனதோ பட்டா²ய அத்தனோ தபசரியம் தி³ஸ்வா ‘‘க³ந்த்வா மம ஸஹாயகம் பஸ்ஸிஸ்ஸாமீ’’தி தம் அத்தபா⁴வம் விஜஹித்வா மக்³கி³கபுரிஸோ விய தஸ்ஸ ஸந்திகம் க³ந்த்வா வந்தி³த்வா ஏகமந்தம் அட்டா²ஸி. அத² நம் ஸோ ஆஹ – ‘‘குதோ ஆக³தோஸீ’’தி? ‘‘மக்³கி³கபுரிஸோ அஹம், ப⁴ந்தே, தூ³ரதோவ ஆக³தோம்ஹி. கிம் பன, ப⁴ந்தே, அய்யோ இமஸ்மிம் டா²னே ஏககோவ வஸதி, அஞ்ஞோபி கோசி அத்தீ²’’தி? ‘‘அத்தி² மே ஏகோ ஸஹாயகோ’’தி. ‘‘குஹிம் ஸோ’’தி? ‘‘ஏதஸ்மிம் பப்³ப³தே வஸதி, உபோஸத²தி³வஸே பன அக்³கி³ம் ந ஜாலேதி, மதோ நூன ப⁴விஸ்ஸதீ’’தி. ‘‘ஏவம், ப⁴ந்தே’’தி? ‘‘ஏவமாவுஸோ’’தி. ‘‘அஹம் ஸோ, ப⁴ந்தே’’தி. ‘‘குஹிம் நிப்³ப³த்தோஸீ’’தி? ‘‘தே³வலோகே மஹேஸக்கோ² தே³வராஜா ஹுத்வா நிப்³ப³த்தோஸ்மி, ப⁴ந்தே, ‘அய்யம் பஸ்ஸிஸ்ஸாமீ’தி புன ஆக³தோம்ஹி. அபி நு கோ² அய்யானம் இமஸ்மிம் டா²னே வஸந்தானம் கோசி உபத்³த³வோ அத்தீ²’’தி? ‘‘ஆம, ஆவுஸோ, ஹத்தீ² நிஸ்ஸாய கிலமாமீ’’தி. ‘‘கிம் வோ, ப⁴ந்தே, ஹத்தீ² கரோந்தீ’’தி? ‘‘ஸம்மஜ்ஜனட்டா²னே லண்ட³ம் பாதேந்தி, பாதே³ஹி பூ⁴மியம் பஹரித்வா பம்ஸும் உத்³த⁴ரந்தி, ஸ்வாஹம் லண்ட³ம் ச²ட்³டே³ந்தோ பம்ஸும் ஸமம் கரோந்தோ கிலமாமீ’’தி. ‘‘கிம் பன தேஸம் அனாக³மனம் இச்ச²தா²’’தி? ‘‘ஆமாவுஸோ’’தி. ‘‘தேன ஹி தேஸம் அனாக³மனம் கரிஸ்ஸாமீ’’தி தாபஸஸ்ஸ ஹத்தி²கந்தவீணஞ்சேவ ஹத்தி²கந்தமந்தஞ்ச அதா³ஸி. த³த³ந்தோ ச பன வீணாய திஸ்ஸோ தந்தியோ த³ஸ்ஸேத்வா தயோ மந்தே உக்³க³ண்ஹாபேத்வா ‘‘இமம் தந்திம் பஹரித்வா இமஸ்மிம் மந்தே வுத்தே நிவத்தித்வா ஓலோகேதும்பி அஸக்கோந்தா ஹத்தீ² பலாயந்தி, இமம் தந்திம் பஹரித்வா இமஸ்மிம் மந்தே வுத்தே நிவத்தித்வா பச்ச²தோ ஓலோகேந்தா ஓலோகேந்தா பலாயந்தி, இமம் தந்திம் பஹரித்வா இமஸ்மிம் மந்தே வுத்தே ஹத்தி²யூத²பதி பிட்டி²ம் உபனாமேந்தோ ஆக³ச்ச²தீ’’தி ஆசிக்கி²த்வா, ‘‘யம் வோ ருச்சதி, தம் கரேய்யாதா²’’தி வத்வா தாபஸம் வந்தி³த்வா பக்காமி. தாபஸோ பலாயனமந்தம் வத்வா பலாயனதந்திம் பஹரித்வா ஹத்தீ² பலாபேத்வா வஸி.

தஸ்மிம் ஸமயே கோஸம்பி³யம் பூரந்தப்போ நாம ராஜா ஹோதி. ஸோ ஏகதி³வஸம் க³ப்³பி⁴னியா தே³வியா ஸத்³தி⁴ம் பா³லஸூரியதபம் தப்பமானோ அப்³போ⁴காஸதலே நிஸீதி³. தே³வீ ரஞ்ஞோ பாருபனம் ஸதஸஹஸ்ஸக்³க⁴னிகம் ரத்தகம்ப³லம் பாருபித்வா நிஸின்னா ரஞ்ஞா ஸத்³தி⁴ம் ஸமுல்லபமானா ரஞ்ஞோ அங்கு³லிதோ ஸதஸஹஸ்ஸக்³க⁴னிகம் ராஜமுத்³தி³கம் நீஹரித்வா அத்தனோ அங்கு³லியம் பிலந்தி⁴. தஸ்மிம் ஸமயே ஹத்தி²லிங்க³ஸகுணோ ஆகாஸேன க³ச்ச²ந்தோ தூ³ரதோ ரத்தகம்ப³லபாருபனம் தே³விம் தி³ஸ்வா ‘‘மம்ஸபேஸீ’’தி ஸஞ்ஞாய பக்கே² விஸ்ஸஜ்ஜேத்வா ஓதரி. ராஜா தஸ்ஸ ஓதரணஸத்³தே³ன பீ⁴தோ உட்டா²ய அந்தோனிவேஸனம் பாவிஸி. தே³வீ க³ருக³ப்³ப⁴தாய சேவ பீ⁴ருகஜாதிகதாய ச வேகே³ன க³ந்தும் நாஸக்கி². அத² நம் ஸோ ஸகுணோ அஜ்ஜ²ப்பத்தோ நக²பஞ்ஜரே நிஸீதா³பேத்வா ஆகாஸம் பக்க²ந்தி³. தே கிர ஸகுணா பஞ்சன்னம் ஹத்தீ²னம் ப³லம் தா⁴ரேந்தி. தஸ்மா ஆகாஸேன நேத்வா யதா²ருசிதட்டா²னே நிஸீதி³த்வா மம்ஸம் கா²த³ந்தி. ஸாபி தேன நீயமானா மரணப⁴யபீ⁴தா சிந்தேஸி – ‘‘ஸசாஹம் விரவிஸ்ஸாமி, மனுஸ்ஸஸத்³தோ³ நாம திரச்சா²னக³தானம் உப்³பே³ஜனீயோ, தம் ஸுத்வா மம் ச²ட்³டே³ஸ்ஸதி. ஏவம் ஸந்தே ஸஹ க³ப்³பே⁴ன ஜீவிதக்க²யம் பாபுணிஸ்ஸாமி, யஸ்மிம் பன டா²னே நிஸீதி³த்வா மம் கா²தி³தும் ஆரபி⁴ஸ்ஸதி, தத்ர நம் ஸத்³த³ம் கத்வா பலாபேஸ்ஸாமீ’’தி. ஸா அத்தனோ பண்டி³ததாய அதி⁴வாஸேஸி.

ததா³ ச ஹிமவந்தபதே³ஸே தோ²கம் வட்³டி⁴த்வா மண்ட³பாகாரேன டி²தோ ஏகோ மஹானிக்³ரோதோ⁴ ஹோதி. ஸோ ஸகுணோ மிக³ரூபாதீ³னி தத்த² நேத்வா கா²த³தி, தஸ்மா தம்பி தத்தே²வ நேத்வா விடபப்³ப⁴ந்தரே ட²பேத்வா ஆக³தமக்³க³ம் ஓலோகேஸி. ஆக³தமக்³கோ³லோகனம் கிர தேஸம் த⁴ம்மதா. தஸ்மிம் க²ணே தே³வீ, ‘‘இதா³னி இமம் பலாபேதும் வட்டதீ’’தி சிந்தேத்வா உபோ⁴ ஹத்தே² உக்கி²பித்வா பாணிஸத்³த³ஞ்சேவ முக²ஸத்³த³ஞ்ச கத்வா தம் பலாபேஸி. அத²ஸ்ஸா ஸூரியத்த²ங்க³மனகாலே க³ப்³பே⁴ கம்மஜவாதா சலிம்ஸு. ஸப்³ப³தி³ஸாஸு க³ஜ்ஜந்தோ மஹாமேகோ⁴ உட்ட²ஹி. ஸுகே²தி⁴தாய ராஜமஹேஸியா ‘‘மா பா⁴யி, அய்யே’’தி வசனமத்தம்பி அலப⁴மானாய து³க்க²பரேதாய ஸப்³ப³ரத்திம் நித்³தா³ நாம நாஹோஸி. விபா⁴தாய பன ரத்தியா வலாஹகவிக³மோ ச அருணுக்³க³மனஞ்ச தஸ்ஸா க³ப்³ப⁴வுட்டா²னஞ்ச ஏகக்க²ணேயேவ அஹோஸி. ஸா மேக⁴உதுஞ்ச பப்³ப³தஉதுஞ்ச அருணஉதுஞ்ச க³ஹேத்வா ஜாதத்தா புத்தஸ்ஸ உதேனோதி நாமம் அகாஸி.

அல்லகப்பதாபஸஸ்ஸபி கோ² ததோ அவிதூ³ரே வஸனட்டா²னம் ஹோதி. ஸோ பகதியாவ வஸ்ஸதி³வஸே ஸீதப⁴யேன ப²லாப²லத்தா²ய வனம் ந பவிஸதி, தம் ருக்க²மூலம் க³ந்த்வா ஸகுணேஹி கா²தி³தமம்ஸானம் அட்டி²ம் ஆஹரித்வா கோட்டேத்வா ரஸம் கத்வா பிவதி. தஸ்மா தம் தி³வஸம் ‘‘அட்டி²ம் ஆஹரிஸ்ஸாமீ’’தி தத்த² க³ந்த்வா ருக்க²மூலே அட்டி²ம் பரியேஸேந்தோ உபரி தா³ரகஸத்³த³ம் ஸுத்வா உல்லோகேந்தோ தே³விம் தி³ஸ்வா ‘‘காஸி த்வ’’ந்தி வத்வா ‘‘மானுஸித்தி²ம்ஹீ’’தி. ‘‘கத²ம் ஆக³தாஸீ’’தி? ‘‘ஹத்தி²லிங்க³ஸகுணேனானீதாம்ஹீ’’தி வுத்தே ‘‘ஓதராஹீ’’தி ஆஹ. ‘‘ஜாதிஸம்பே⁴த³தோ பா⁴யாமி, அய்யா’’தி. ‘‘காஸி த்வ’’ந்தி? ‘‘க²த்தியாம்ஹீ’’தி. ‘‘அஹம்பி க²த்தியோயேவா’’தி. ‘‘தேன ஹி க²த்தியமாயம் கதே²ஹீ’’தி. ஸோ க²த்தியமாயம் கதே²ஸி. ‘‘தேன ஹி ஆருய்ஹ புத்தம் மே ஓதாரேஹீ’’தி. ஸோ ஏகேன பஸ்ஸேன அபி⁴ருஹனமக்³க³ம் கத்வா அபி⁴ருஹித்வா தா³ரகம் க³ண்ஹி. ‘‘மா மம் ஹத்தே²ன சு²பீ’’தி ச வுத்தே தம் அசு²பித்வாவ தா³ரகம் ஓதாரேஸி. தே³வீபி ஓதரி. அத² நம் அஸ்ஸமபத³ம் நேத்வா ஸீலபே⁴த³ம் அகத்வாவ அனுகம்பாய படிஜக்³கி³, நிம்மக்கி²கமது⁴ம் ஆஹரித்வா ஸயம்ஜாதஸாலிம் ஆஹரித்வா யாகு³ம் பசித்வா அதா³ஸி. ஏவம் தஸ்மிம் படிஜக்³க³ந்தே ஸா அபரபா⁴கே³ சிந்தேஸி – ‘‘அஹம் நேவ ஆக³தமக்³க³ம் ஜானாமி, ந க³மனமக்³க³ம் ஜானாமி, இமினாபி மே ஸத்³தி⁴ம் விஸ்ஸாஸமத்தம்பி நத்தி². ஸசே பனாயம் அம்ஹே பஹாய கத்த²சி க³மிஸ்ஸதி, உபோ⁴பி இதே⁴வ மரணம் பாபுணிஸ்ஸாம, யம்கிஞ்சி கத்வா இமஸ்ஸ ஸீலம் பி⁴ந்தி³த்வா யதா² மம் ந முஞ்சதி, ததா² தம் காதும் வட்டதீ’’தி. அத² நம் து³ன்னிவத்த²து³ப்பாருதத³ஸ்ஸனேன பலோபே⁴த்வா ஸீலவினாஸம் பாபேஸி. ததோ பட்டா²ய த்³வேபி ஸமக்³க³வாஸம் வஸிம்ஸு.

அதே²கதி³வஸம் தாபஸோ நக்க²த்தயோக³ம் உல்லோகேந்தோ பூரந்தப்பஸ்ஸ நக்க²த்தமிலாயனம் தி³ஸ்வா ‘‘ப⁴த்³தே³ கோஸம்பி³யம் பூரந்தப்பராஜா மதோ’’தி ஆஹ. ‘‘கஸ்மா, அய்ய, ஏவம் வதே³ஸி? கிம் தே தேன ஸத்³தி⁴ம் ஆகா⁴தோ அத்தீ²’’தி? ‘‘நத்தி², ப⁴த்³தே³, நக்க²த்தமிலாயனமஸ்ஸ தி³ஸ்வா ஏவம் வதா³மீ’’தி, ஸா பரோதி³. அத² நம் ‘‘கஸ்மா ரோத³ஸீ’’தி புச்சி²த்வா தாய தஸ்ஸ அத்தனோ ஸாமிகபா⁴வே அக்கா²தே ஆஹ – ‘‘மா, ப⁴த்³தே³, ரோதி³, ஜாதஸ்ஸ நாம நியதோ மச்சூ’’தி. ‘‘ஜானாமி, அய்யா’’தி வுத்தே ‘‘அத² கஸ்மா ரோத³ஸீ’’தி? ‘‘புத்தோ மே குலஸந்தகஸ்ஸ ரஜ்ஜஸ்ஸ அனுச்ச²விகோ, ‘ஸசே தத்ர அப⁴விஸ்ஸ, ஸேதச்ச²த்தம் உஸ்ஸாபயிஸ்ஸ. இதா³னி மஹாஜானிகோ வத ஜாதோ’தி ஸோகேன ரோதா³மி, அய்யா’’தி. ‘‘ஹோது, ப⁴த்³தே³, மா சிந்தயி, ஸசஸ்ஸ ரஜ்ஜம் பத்தே²ஸி, அஹமஸ்ஸ ரஜ்ஜலப⁴னாகாரம் கரிஸ்ஸாமீ’’தி. அத²ஸ்ஸ ஹத்தி²கந்தவீணஞ்சேவ ஹத்தி²கந்தமந்தே ச அதா³ஸி. ததா³ அனேகானி ஹத்தி²ஸஹஸ்ஸானி ஆக³ந்த்வா வடருக்க²மூலே நிஸீத³ந்தி. அத² நம் ஆஹ – ‘‘ஹத்தீ²ஸு அனாக³தேஸுயேவ ருக்க²ம் அபி⁴ருஹித்வா தேஸு ஆக³தேஸு இமம் மந்தம் வத்வா இமம் தந்திம் பஹர, ஸப்³பே³ நிவத்தித்வா ஓலோகேதும்பி அஸக்கோந்தா பலாயிஸ்ஸந்தி, அத² ஓதரித்வா ஆக³ச்சே²ய்யாஸீ’’தி. ஸோ ததா² கத்வா ஆக³ந்த்வா தம் பவத்திம் ஆரோசேஸி. அத² நம் து³தியதி³வஸே ஆஹ – ‘‘அஜ்ஜ இமம் மந்தம் வத்வா இமம் தந்திம் பஹரேய்யாஸி, ஸப்³பே³ நிவத்தித்வா ஓலோகேந்தா பலாயிஸ்ஸந்தீ’’தி. ததா³பி ததா² கத்வா ஆக³ந்த்வா ஆரோசேஸி. அத² நம் ததியதி³வஸே ஆஹ – ‘‘அஜ்ஜ இமம் மந்தம் வத்வா இமம் தந்திம் பஹரேய்யாஸி, யூத²பதி பிட்டி²ம் உபனாமேந்தோ ஆக³மிஸ்ஸதீ’’தி. ததா³பி ததா² கத்வா ஆரோசேஸி.

அத²ஸ்ஸ மாதரம் ஆமந்தேத்வா, ‘‘ப⁴த்³தே³, புத்தஸ்ஸ தே ஸாஸனம் வதே³ஹி, ஏத்தோவ க³ந்த்வா ராஜா ப⁴விஸ்ஸதீ’’தி ஆஹ. ஸா புத்தம் ஆமந்தேத்வா, ‘‘தாத, த்வம் கோஸம்பி³யம் பூரந்தப்பரஞ்ஞோ புத்தோ, மம் ஸக³ப்³ப⁴ம் ஹத்தி²லிங்க³ஸகுணோ ஆனேஸீ’’தி வத்வா ஸேனாபதிஆதீ³னம் நாமானி ஆசிக்கி²த்வா ‘‘அஸத்³த³ஹந்தானம் இமம் பிது பாருபனகம்ப³லஞ்சேவ பிலந்த⁴னமுத்³தி³கஞ்ச த³ஸ்ஸேய்யாஸீ’’தி வத்வா உய்யோஜேஸி. குமாரோ தாபஸம் ‘‘இதா³னி கிம் கரோமீ’’தி ஆஹ. ‘‘ருக்க²ஸ்ஸ ஹேட்டி²மஸாகா²ய நிஸீதி³த்வா இமம் மந்தம் வத்வா இமம் தந்திம் பஹர, ஜேட்ட²கஹத்தீ² தே பிட்டி²ம் உபனாபேத்வா உபஸங்கமிஸ்ஸதி, தஸ்ஸ பிட்டி²யம் நிஸின்னோவ ரட்ட²ம் க³ந்த்வா ரஜ்ஜம் க³ண்ஹாஹீ’’தி. ஸோ மாதாபிதரோ வந்தி³த்வா ததா² கத்வா ஆக³தஸ்ஸ ஹத்தி²னோ பிட்டி²யம் நிஸீதி³த்வா கண்ணே மந்தயி – ‘‘அஹம் கோஸம்பி³யம் பூரந்தப்பரஞ்ஞோ புத்தோ, பேத்திகம் மே ரஜ்ஜம் க³ண்ஹித்வா தே³ஹி ஸாமீ’’தி. ஸோ தம் ஸுத்வா ‘‘அனேகானி ஹத்தி²ஸஹஸ்ஸானி ஸன்னிபதந்தூ’’தி ஹத்தி²ரவம் ரவி, அனேகானி ஹத்தி²ஸஹஸ்ஸானி ஸன்னிபதிம்ஸு. புன ‘‘ஜிண்ணா ஹத்தீ² படிக்கமந்தூ’’தி ஹத்தி²ரவம் ரவி, ஜிண்ணா ஹத்தீ² படிக்கமிம்ஸு. புன ‘‘அதிதருணா ஹத்தீ² நிவத்தந்தூ’’தி ஹத்தி²ரவம் ரவி, தேபி நிவத்திம்ஸு. ஸோ அனேகேஹி யூத²ஹத்தி²ஸஹஸ்ஸேஹேவ பரிவுதோ பச்சந்தகா³மம் பத்வா ‘‘அஹம் ரஞ்ஞோ புத்தோ, ஸம்பத்திம் பத்த²யமானா மயா ஸத்³தி⁴ம் ஆக³ச்ச²ந்தூ’’தி ஆஹ. ‘‘ததோ பட்டா²ய மனுஸ்ஸானம் ஸங்க³ஹம் கரோந்தோ க³ந்த்வா நக³ரம் பரிவாரேத்வா ‘யுத்³த⁴ம் வா மே தே³து, ரஜ்ஜம் வா’’’தி ஸாஸனம் பேஸேஸி. நாக³ரா ஆஹம்ஸு – ‘‘மயம் த்³வேபி ந த³ஸ்ஸாம. அம்ஹாகஞ்ஹி தே³வீ க³ருக³ப்³பா⁴ ஹத்தி²லிங்க³ஸகுணேன நீதா, தஸ்ஸா அத்தி²பா⁴வம் வா நத்தி²பா⁴வம் வா மயம் ந ஜானாம. யாவ தஸ்ஸா பவத்திம் ந ஸுணாம. தாவ நேவ யுத்³த⁴ம் த³ஸ்ஸாம, ந ரஜ்ஜ’’ந்தி. ததா³ கிர தம் பவேணிரஜ்ஜம் அஹோஸி. ததோ குமாரோ ‘‘அஹம் தஸ்ஸா புத்தோ’’தி வத்வா ஸேனாபதிஆதீ³னம் நாமானி கதே²த்வா ததா²பி அஸத்³த³ஹந்தானம் கம்ப³லஞ்ச முத்³தி³கஞ்ச த³ஸ்ஸேஸி. தே கம்ப³லஞ்ச முத்³தி³கஞ்ச ஸஞ்ஜானித்வா நிக்கங்கா² ஹுத்வா த்³வாரம் விவரித்வா தம் ரஜ்ஜே அபி⁴ஸிஞ்சிம்ஸு. அயம் தாவ உதேனஸ்ஸ உப்பத்தி.

அல்லகப்பரட்டே² பன து³ப்³பி⁴க்கே² ஜீவிதும் அஸக்கோந்தோ ஏகோ கோதுஹலிகோ நாம மனுஸ்ஸோ காபிம் நாம தருணபுத்தஞ்ச காளிம் நாம ப⁴ரியஞ்ச ஆதா³ய ‘‘கோஸம்பி³ம் க³ந்த்வா ஜீவிஸ்ஸாமீ’’தி பாதே²ய்யம் க³ஹேத்வா நிக்க²மி. ‘‘அஹிவாதரோகே³ன மஹாஜனே மரந்தே தி³ஸ்வா நிக்க²மீ’’திபி வத³ந்தியேவ. தே க³ச்ச²ந்தா பாதே²ய்யே பரிக்கீ²ணே கு²தா³பி⁴பூ⁴தா தா³ரகம் வஹிதும் நாஸக்கி²ம்ஸு. அத² ஸாமிகோ பஜாபதிம் ஆஹ – ‘‘ப⁴த்³தே³, மயம் ஜீவந்தா புன புத்தம் லபி⁴ஸ்ஸாம, ச²ட்³டே³த்வா நம் க³ச்சா²மா’’தி. மாது ஹத³யம் நாம முது³கம் ஹோதி. தஸ்மா ஸா ஆஹ – ‘‘நாஹம் ஜீவந்தமேவ புத்தம் ச²ட்³டே³தும் ஸக்கி²ஸ்ஸாமீ’’தி. ‘‘அத² கிம் கரோமா’’தி? ‘‘வாரேன நம் வஹாமா’’தி. மாதா அத்தனோ வாரே புப்ப²தா³மம் விய நம் உக்கி²பித்வா உரே நிபஜ்ஜாபேத்வா அங்கேன வஹித்வா பிதுனோ தே³தி. தஸ்ஸ தம் க³ஹேத்வா க³மனகாலே சா²தகதோபி ப³லவதரா வேத³னா உப்பஜ்ஜி. ஸோ புனப்புனம் ஆஹ – ‘‘ப⁴த்³தே³, மயம் ஜீவந்தா புத்தம் லபி⁴ஸ்ஸாம, ச²ட்³டே³ம ந’’ந்தி. ஸாபி புனப்புனம் படிக்கி²பித்வா படிவசனம் நாதா³ஸி. தா³ரகோ வாரேன பரிவத்தியமானோ கிலந்தோ பிது ஹத்தே² நித்³தா³யி. ஸோ தஸ்ஸ நித்³தா³யனபா⁴வம் ஞத்வா மாதரம் புரதோ கத்வா ஏகஸ்ஸ க³ச்ச²ஸ்ஸ ஹேட்டா² பண்ணஸந்த²ரே தம் நிபஜ்ஜாபேத்வா பாயாஸி. மாதா நிவத்தித்வா ஓலோகேந்தீ புத்தம் அதி³ஸ்வா, ‘‘ஸாமி, குஹிம் மே புத்தோ’’தி புச்சி². ‘‘ஏகஸ்ஸ மே க³ச்ச²ஸ்ஸ ஹேட்டா² நிபஜ்ஜாபிதோ’’தி. ‘‘ஸாமி, மா மம் நாஸயி, புத்தம் வினா ஜீவிதும் ந ஸக்கி²ஸ்ஸாமி, ஆனேஹி மே புத்த’’ந்தி உரம் பஹரித்வா பரிதே³வி. அத² நம் நிவத்தித்வா ஆனேஸி. புத்தோபி அந்தராமக்³கே³ மதோ ஹோதி. இதி ஸோ ஏத்தகே டா²னே புத்தம் ச²ட்³டே³த்வா தஸ்ஸ நிஸ்ஸந்தே³ன ப⁴வந்தரே ஸத்த வாரே ச²ட்³டி³தோ. ‘‘பாபகம்மம் நாமேதம் அப்பக’’ந்தி ந அவமஞ்ஞிதப்³ப³ம்.

தே க³ச்ச²ந்தா ஏகம் கோ³பாலகுலம் பாபுணிம்ஸு. தம் தி³வஸஞ்ச கோ³பாலகஸ்ஸ தே⁴னுமங்க³லம் ஹோதி. கோ³பாலகஸ்ஸ கே³ஹே நிப³த்³த⁴ம் ஏகோ பச்சேகபு³த்³தோ⁴ பு⁴ஞ்ஜதி. ஸோ தம் போ⁴ஜேத்வா மங்க³லமகாஸி. ப³ஹு பாயாஸோ படியத்தோ ஹோதி. கோ³பாலகோ தே ஆக³தே தி³ஸ்வா, ‘‘குதோ ஆக³தத்தா²’’தி புச்சி²த்வா ஸப்³ப³ம் பவத்திம் ஸுத்வா முது³ஜாதிகோ குலபுத்தோ தேஸு அனுகம்பம் கத்வா ப³ஹுகேன ஸப்பினா பாயாஸம் தா³பேஸி. ப⁴ரியா ‘‘ஸாமி, தயி ஜீவந்தே அஹம்பி ஜீவாமி நாம, தீ³க⁴ரத்தம் ஊனோத³ரோஸி, யாவத³த்த²ம் பு⁴ஞ்ஜாஹீ’’தி ஸப்பிஞ்ச த³தி⁴ஞ்ச தத³பி⁴முக²ஞ்ஞேவ கத்வா அத்தனா மந்த³ஸப்பினா தோ²கமேவ பு⁴ஞ்ஜி. இதரோ ப³ஹும் பு⁴ஞ்ஜித்வா ஸத்தட்ட²தி³வஸே சா²ததாய ஆஹாரதண்ஹம் சி²ந்தி³தும் நாஸக்கி². கோ³பாலகோ தேஸம் பாயாஸம் தா³பேத்வா ஸயம் பு⁴ஞ்ஜிதும் ஆரபி⁴. கோதுஹலிகோ தம் ஓலோகேந்தோ நிஸீதி³த்வா ஹேட்டா²பீடே² நிபன்னாய ஸுனகி²யா கோ³பாலகேன வட்³டே⁴த்வா தி³ய்யமானம் பாயாஸபிண்ட³ம் தி³ஸ்வா ‘‘புஞ்ஞா வதாயம் ஸுனகீ², நிப³த்³த⁴ம் ஏவரூபம் போ⁴ஜனம் லப⁴தீ’’தி சிந்தேஸி. ஸோ ரத்திபா⁴கே³ தம் பாயாஸம் ஜீராபேதும் அஸக்கோந்தோ காலம் கத்வா தஸ்ஸா ஸுனகி²யா குச்சி²ம்ஹி நிப்³ப³த்தி.

அத²ஸ்ஸ ப⁴ரியா ஸரீரகிச்சம் கத்வா தஸ்மிம்யேவ கே³ஹே ப⁴திம் கத்வா தண்டு³லனாளிம் லபி⁴த்வா பசித்வா பச்சேகபு³த்³த⁴ஸ்ஸ பத்தே பதிட்டா²பேத்வா, ‘‘தா³ஸஸ்ஸ வோ பாபுணாதூ’’தி வத்வா சிந்தேஸி – ‘‘மயா இதே⁴வ வஸிதும் வட்டதி, நிப³த்³த⁴ம், அய்யோ, இதா⁴க³ச்ச²தி, தே³ய்யத⁴ம்மோ ஹோது வா, மா வா, தே³வஸிகம் வந்த³ந்தீ வேய்யாவச்சம் கரோந்தீ சித்தம் பஸாதே³ந்தீ ப³ஹும் புஞ்ஞம் பஸவிஸ்ஸாமீ’’தி. ஸா தத்தே²வ ப⁴திம் கரோந்தீ வஸி. ஸாபி ஸுனகீ² ச²ட்டே² வா ஸத்தமே வா மாஸே ஏகமேவ குக்குரம் விஜாயி. கோ³பாலகோ தஸ்ஸ ஏகதே⁴னுயா கீ²ரம் தா³பேஸி. ஸோ ந சிரஸ்ஸேவ வட்³டி⁴. அத²ஸ்ஸ பச்சேகபு³த்³தோ⁴ பு⁴ஞ்ஜந்தோ நிப³த்³த⁴ம் ஏகம் ப⁴த்தபிண்ட³ம் தே³தி. ஸோ ப⁴த்தபிண்ட³ம் நிஸ்ஸாய பச்சேகபு³த்³தே⁴ ஸினேஹமகாஸி. கோ³பாலகோபி நிப³த்³த⁴ம் த்³வே வாரே பச்சேகபு³த்³த⁴ஸ்ஸுபட்டா²னம் யாதி. க³ச்ச²ந்தோபி அந்தராமக்³கே³ வாளமிக³ட்டா²னே த³ண்டே³ன க³ச்சே² ச பூ⁴மிஞ்ச பஹரித்வா ‘‘ஸுஸூ’’தி திக்க²த்தும் ஸத்³த³ம் கத்வா வாளமிகே³ பலாபேதி. ஸுனகோ²பி தேன ஸத்³தி⁴ம் க³ச்ச²தி.

ஸோ ஏகதி³வஸம் பச்சேகபு³த்³த⁴ம் ஆஹ – ‘‘ப⁴ந்தே, யதா³ மே ஓகாஸோ ந ப⁴விஸ்ஸதி, ததா³ இமம் ஸுனக²ம் பேஸேஸ்ஸாமி, தேன ஸஞ்ஞாணேன ஆக³ச்சே²ய்யாதா²’’தி. ததோ பட்டா²ய அனோகாஸதி³வஸே, ‘‘க³ச்ச², தாத, அய்யம் ஆனேஹீ’’தி ஸுனக²ம் பேஸேஸி. ஸோ ஏகவசனேனேவ பக்க²ந்தி³த்வா ஸாமிகஸ்ஸ க³ச்ச²போத²னபூ⁴மிபோத²னட்டா²னே திக்க²த்தும் பு⁴ஸ்ஸித்வா தேன ஸத்³தே³ன வாளமிகா³னம் பலாதபா⁴வம் ஞத்வா பாதோவ ஸரீரபடிஜக்³க³னம் கத்வா பண்ணஸாலம் பவிஸித்வா நிஸின்னஸ்ஸ பச்சேகபு³த்³த⁴ஸ்ஸ வஸனட்டா²னம் க³ந்த்வா பண்ணஸாலத்³வாரே திக்க²த்தும் பு⁴ஸ்ஸித்வா அத்தனோ ஆக³தபா⁴வம் ஜானாபேத்வா ஏகமந்தே நிபஜ்ஜதி, பச்சேகபு³த்³தே⁴ வேலம் ஸல்லக்கே²த்வா நிக்க²ந்தே பு⁴ஸ்ஸந்தோ புரதோ க³ச்ச²தி. அந்தரந்தரா பச்சேகபு³த்³தோ⁴ தம் வீமம்ஸந்தோ அஞ்ஞம் மக்³க³ம் படிபஜ்ஜதி. அத²ஸ்ஸ புரதோ திரியம் ட²த்வா பு⁴ஸ்ஸித்வா இதரமக்³க³மேவ நம் ஆரோபேதி. அதே²கதி³வஸம் அஞ்ஞம் மக்³க³ம் படிபஜ்ஜித்வா தேன புரதோ திரியம் ட²த்வா வாரியமானோபி அனிவத்தித்வா ஸுனக²ம் பாதே³ன பஹரித்வா பாயாஸி. ஸுனகோ² தஸ்ஸ அனிவத்தனபா⁴வம் ஞத்வா நிவாஸனகண்ணே ட³ம்ஸித்வா ஆகட்³ட⁴ந்தோ இதரமக்³க³மேவ நம் ஆரோபேஸி. ஏவம் ஸோ தஸ்மிம் ப³லவஸினேஹம் உப்பாதே³ஸி.

ததோ அபரபா⁴கே³ பச்சேகபு³த்³த⁴ஸ்ஸ சீவரம் ஜீரி. அத²ஸ்ஸ கோ³பாலகோ சீவரவத்தா²னி அதா³ஸி. தமேனம் பச்சேகபு³த்³தோ⁴ ஆஹ – ‘‘ஆவுஸோ, சீவரம் நாம ஏககேன காதும் து³க்கரம், பா²ஸுகட்டா²னம் க³ந்த்வா காரேஸ்ஸாமீ’’தி. ‘‘இதே⁴வ, ப⁴ந்தே, கரோதா²’’தி. ‘‘ந ஸக்கா, ஆவுஸோ’’தி. ‘‘தேன ஹி, ப⁴ந்தே, மா சிரம் ப³ஹி வஸித்தா²’’தி. ஸுனகோ² தேஸம் கத²ம் ஸுணந்தோவ அட்டா²ஸி, பச்சேகபு³த்³தோ⁴பி ‘‘திட்ட², உபாஸகா’’தி கோ³பாலகம் நிவத்தாபேத்வா வேஹாஸம் அப்³பு⁴க்³க³ந்த்வா க³ந்த⁴மாத³னாபி⁴முகோ² பாயாஸி. ஸுனக²ஸ்ஸ தம் ஆகாஸேன க³ச்ச²ந்தம் தி³ஸ்வா பு⁴க்கரித்வா டி²தஸ்ஸ தஸ்மிம் சக்கு²பத²ம் விஜஹந்தே ஹத³யம் ப²லித்வா மதோ. திரச்சா²னா கிர நாமேதே உஜுஜாதிகா ஹோந்தி அகுடிலா. மனுஸ்ஸா பன அஞ்ஞம் ஹத³யேன சிந்தேந்தி, அஞ்ஞம் முகே²ன கதே²ந்தி. தேனேவாஹ – ‘‘க³ஹனஞ்ஹேதம், ப⁴ந்தே, யதி³த³ம் மனுஸ்ஸா, உத்தானகஞ்ஹேதம், ப⁴ந்தே, யதி³த³ம் பஸவோ’’தி (ம. நி. 2.3).

இதி ஸோ தாய உஜுசித்ததாய அகுடிலதாய காலம் கத்வா தாவதிம்ஸப⁴வனே நிப்³ப³த்தோ அச்ச²ராஸஹஸ்ஸபரிவுதோ மஹாஸம்பத்திம் அனுபோ⁴ஸி. தஸ்ஸ கண்ணமூலே மந்தயந்தஸ்ஸ ஸத்³தோ³ ஸோளஸயோஜனட்டா²னம் ப²ரதி, பகதிகதா²ஸத்³தோ³ பன ஸகலம் த³ஸயோஜனஸஹஸ்ஸம் தே³வனக³ரம் சா²தே³தி. தேனேவஸ்ஸ ‘‘கோ⁴ஸகதே³வபுத்தோ’’தி நாமம் அஹோஸி. ‘‘கிஸ்ஸ பனேஸ நிஸ்ஸந்தோ³’’தி. பச்சேகபு³த்³தே⁴ பேமேன பு⁴க்கரணஸ்ஸ நிஸ்ஸந்தோ³. ஸோ தத்த² ந சிரம் ட²த்வா சவி. தே³வலோகதோ ஹி தே³வபுத்தா ஆயுக்க²யேன புஞ்ஞக்க²யேன ஆஹாரக்க²யேன கோபேனாதி சதூஹி காரணேஹி சவந்தி.

தத்த² யேன ப³ஹும் புஞ்ஞகம்மம் கதம் ஹோதி, ஸோ தே³வலோகே உப்பஜ்ஜித்வா யாவதாயுகம் ட²த்வா உபரூபரி நிப்³ப³த்ததி. ஏவம் ஆயுக்க²யேன சவதி நாம. யேன பரித்தம் புஞ்ஞம் கதம் ஹோதி, தஸ்ஸ ராஜகோட்டா²கா³ரே பக்கி²த்தம் திசதுனாளிமத்தம் த⁴ஞ்ஞம் விய அந்தராவ தம் புஞ்ஞம்கீ²யதி, அந்தராவ காலம் கரோதி. ஏவம் புஞ்ஞக்க²யேன சவதி நாம. அபரோபி காமகு³ணே பரிபு⁴ஞ்ஜமானோ ஸதிஸம்மோஸேன ஆஹாரம் அபரிபு⁴ஞ்ஜித்வா கிலந்தகாயோ காலம் கரோதி. ஏவம் ஆஹாரக்க²யேன சவதி நாம. அபரோபி பரஸ்ஸ ஸம்பத்திம் அஸஹந்தோ குஜ்ஜி²த்வா காலம் கரோதி. ஏவம் கோபேன சவதி நாம.

அயம் பன காமகு³ணே பரிபு⁴ஞ்ஜந்தோ முட்ட²ஸ்ஸதி ஹுத்வா ஆஹாரக்க²யேன சவி, சவித்வா ச பன கோஸம்பி³யம் நக³ரஸோபி⁴னியா குச்சி²ம்ஹி படிஸந்தி⁴ம் க³ண்ஹி. ஸாபி ஜாததி³வஸே ‘‘கிம் ஏத’’ந்தி தா³ஸிம் புச்சி²த்வா, ‘‘புத்தோ, அய்யே’’தி வுத்தே – ‘‘ஹந்த³, ஜே, இமம் தா³ரகம் கத்தரஸுப்பே ஆரோபேத்வா ஸங்காரகூடே ச²ட்³டே³ஹீ’’தி ச²ட்³டா³பேஸி. நக³ரஸோபி⁴னியோ ஹி தீ⁴தரம் படிஜக்³க³ந்தி, ந புத்தம். தீ⁴தரா ஹி தாஸம் பவேணீ க⁴டீயதி. தா³ரகம் காகாபி ஸுனகா²பி பரிவாரேத்வா நிஸீதி³ம்ஸு. பச்சேகபு³த்³தே⁴ ஸினேஹப்பப⁴வஸ்ஸ பு⁴க்கரணஸ்ஸ நிஸ்ஸந்தே³ன ஏகோபி உபக³ந்தும் ந விஸஹி. தஸ்மிம் க²ணே ஏகோ மனுஸ்ஸோ ப³ஹி நிக்க²ந்தோ தம் காகஸுனக²ஸன்னிபாதம் தி³ஸ்வா, ‘‘கிம் நு கோ² ஏத’’ந்தி க³ந்த்வா தா³ரகம் தி³ஸ்வா புத்தஸினேஹம் படிலபி⁴த்வா ‘‘புத்தோ மே லத்³தோ⁴’’தி கே³ஹம் நேஸி. ததா³ கோஸம்ப³கஸேட்டி² ராஜகுலம் க³ச்ச²ந்தோ ராஜனிவேஸனதோ ஆக³ச்ச²ந்தம் புரோஹிதம் தி³ஸ்வா, ‘‘கிம், ஆசரிய, அஜ்ஜ தே திதி²கரணனக்க²த்தயோகோ³ ஓலோகிதோ’’தி புச்சி². ‘‘ஆம, மஹாஸேட்டி², அம்ஹாகம் கிம் அஞ்ஞம் கிச்சந்தி? ஜனபத³ஸ்ஸ கிம் ப⁴விஸ்ஸதீ’’தி? ‘‘அஞ்ஞம் நத்தி², இமஸ்மிம் பன நக³ரே அஜ்ஜ ஜாததா³ரகோ ஜேட்ட²கஸேட்டி² ப⁴விஸ்ஸதீ’’தி. ததா³ ஸேட்டி²னோ ப⁴ரியா க³ருக³ப்³பா⁴ ஹோதி. தஸ்மா ஸோ ஸீக⁴ம் கே³ஹம் புரிஸம் பேஸேஸி – ‘‘க³ச்ச² ப⁴ணே, ஜானாஹி நம் விஜாதா வா, நோ வா’’தி. ‘‘ந விஜாயதீ’’தி ஸுத்வா ராஜானம் தி³ஸ்வாவ வேகே³ன கே³ஹம் க³ந்த்வா காளிம் நாம தா³ஸிம் பக்கோஸித்வா ஸஹஸ்ஸம் த³த்வா, ‘‘க³ச்ச² ஜே, இமஸ்மிம் நக³ரே உபதா⁴ரேத்வா ஸஹஸ்ஸம் த³த்வா அஜ்ஜ ஜாததா³ரகம் க³ண்ஹித்வா ஏஹீ’’தி. ஸா உபதா⁴ரேந்தீ தம் கே³ஹம் க³ந்த்வா தா³ரகம் தி³ஸ்வா, ‘‘அயம் தா³ரகோ கதா³ ஜாதோ’’தி க³ஹபதானிம் புச்சி²த்வா ‘‘அஜ்ஜ ஜாதோ’’தி வுத்தே, ‘‘இமம் மய்ஹம் தே³ஹீ’’தி ஏககஹாபணம் ஆதி³ம் கத்வா மூலம் வட்³டே⁴ந்தீ ஸஹஸ்ஸம் த³த்வா தம் ஆனேத்வா ஸேட்டி²னோ த³ஸ்ஸேஸி. ஸேட்டி² ‘‘ஸசே மே தீ⁴தா விஜாயிஸ்ஸதி, தாய நம் ஸத்³தி⁴ம் நிவேஸேத்வா ஸேட்டி²ட்டா²னஸ்ஸ ஸாமிகம் கரிஸ்ஸாமி. ஸசே மே புத்தோ விஜாயிஸ்ஸதி, மாரேஸ்ஸாமி ந’’ந்தி சிந்தேத்வா தம் கே³ஹே காரேஸி.

அத²ஸ்ஸ ப⁴ரியா கதிபாஹச்சயேன புத்தம் விஜாயி. ஸேட்டி² ‘‘இமஸ்மிம் அஸதி மம புத்தோவ ஸேட்டி²ட்டா²னம் லபி⁴ஸ்ஸதி, இதா³னேவ தம் மாரேதும் வட்டதீ’’தி சிந்தேத்வா காளிம் ஆமந்தேத்வா, ‘‘க³ச்ச², ஜே, வஜதோ கு³ன்னம் நிக்க²மனவேலாய வஜத்³வாரமஜ்ஜே² இமம் திரியம் நிபஜ்ஜாபேஹி, கா³வியோ நம் மத்³தி³த்வா மாரேஸ்ஸந்தி, மத்³தி³தாமத்³தி³தபா⁴வம் பனஸ்ஸ ஞத்வா ஏஹீ’’தி ஆஹ. ஸா க³ந்த்வா கோ³பாலகேன வஜத்³வாரே விவடமத்தேயேவ தம் ததா² நிபஜ்ஜாபேஸி. கோ³க³ணஜேட்ட²கோ உஸபோ⁴ அஞ்ஞஸ்மிம் காலே ஸப்³ப³பச்சா² நிக்க²மந்தோபி தம் தி³வஸம் ஸப்³ப³பட²மம் நிக்க²மித்வா தா³ரகம் சதுன்னம் பாதா³னம் அந்தரே கத்வா அட்டா²ஸி. அனேகஸதகா³வியோ உஸப⁴ஸ்ஸ த்³வே பஸ்ஸானி க⁴ம்ஸந்தியோ நிக்க²மிம்ஸு. கோ³பாலகோபி ‘‘அயம் உஸபோ⁴ புப்³பே³ ஸப்³ப³பச்சா² நிக்க²மதி, அஜ்ஜ பன ஸப்³ப³பட²மம் நிக்க²மித்வா வஜத்³வாரமஜ்ஜே² நிச்சலோவ டி²தோ, கிம் நு கோ² ஏத’’ந்தி சிந்தேத்வா க³ந்த்வா தஸ்ஸ ஹேட்டா² நிபன்னம் தா³ரகம் தி³ஸ்வா புத்தஸினேஹம் படிலபி⁴த்வா, ‘‘புத்தோ மே லத்³தோ⁴’’தி கே³ஹம் நேஸி.

காளீ க³ந்த்வா ஸேட்டி²னா புச்சி²தா தமத்த²ம் ஆரோசேத்வா, ‘‘க³ச்ச², நம் புன ஸஹஸ்ஸம் த³த்வா ஆனேஹீ’’தி வுத்தா ஸஹஸ்ஸம் த³த்வா புன ஆனேத்வா அதா³ஸி. அத² நம் ஆஹ – ‘‘அம்ம, காளி இமஸ்மிம் நக³ரே பஞ்ச ஸகடஸதானி பச்சூஸகாலே உட்டா²ய வாணிஜ்ஜாய க³ச்ச²ந்தி, த்வம் இமம் நேத்வா சக்கமக்³கே³ நிபஜ்ஜாபேஹி, கோ³ணா வா நம் மத்³தி³ஸ்ஸந்தி, சக்கா வா சி²ந்தி³ஸ்ஸந்தி, பவத்திம் சஸ்ஸ ஞத்வாவ ஆக³ச்சே²ய்யாஸீ’’தி. ஸா தம் நேத்வா சக்கமக்³கே³ நிபஜ்ஜாபேஸி. ததா³ ஸாகடிகஜேட்ட²கோ புரதோ அஹோஸி. அத²ஸ்ஸ கோ³ணா தம் டா²னம் பத்வா து⁴ரம் ச²ட்³டே³ஸும், புனப்புனம் ஆரோபேத்வா பாஜியமானாபி புரதோ ந க³ச்சி²ம்ஸு. ஏவம் தஸ்ஸ தேஹி ஸத்³தி⁴ம் வாயமந்தஸ்ஸேவ அருணம் உட்ட²ஹி. ஸோ ‘‘கிம் நாமேதம் கோ³ணா கரிம்ஸூ’’தி மக்³க³ம் ஓலோகேந்தோ தா³ரகம் தி³ஸ்வா, ‘‘பா⁴ரியம் வத மே கம்ம’’ந்தி சிந்தேத்வா, ‘‘புத்தோ மே லத்³தோ⁴’’தி துட்ட²மானஸோ தம் கே³ஹம் நேஸி.

காளீ க³ந்த்வா ஸேட்டி²னா புச்சி²தா தம் பவத்திம் ஆசிக்கி²த்வா, ‘‘க³ச்ச², நம் புன ஸஹஸ்ஸம் த³த்வா ஆனேஹீ’’தி வுத்தா ததா² அகாஸி. அத² நம் ஸோ ஆஹ – ‘‘இதா³னி நம் ஆமகஸுஸானம் நேத்வா க³ச்ச²ந்தரே நிபஜ்ஜாபேஹி, தத்த² ஸுனகா²தீ³ஹி வா கா²தி³தோ, அமனுஸ்ஸேஹி வா பஹடோ மரிஸ்ஸதி, மாதாமதபா⁴வஞ்சஸ்ஸ ஜானித்வாவ ஆக³ச்சே²ய்யாஸீ’’தி. ஸா தம் நேத்வா தத்த² நிபஜ்ஜாபேத்வா ஏகமந்தே அட்டா²ஸி. தம் ஸுனகோ² வா காகோ வா அமனுஸ்ஸோ வா உபஸங்கமிதும் நாஸக்கி². ‘‘நனு சஸ்ஸ நேவ மாதா ந பிதா ந பா⁴திகாதீ³ஸு கோசி ரக்கி²தா நாம அத்தி², கோ தம் ரக்க²தீ’’தி? ஸுனக²காலே பச்சேகபு³த்³தே⁴ ஸினேஹேன பவத்திதபு⁴க்கரணமத்தமேவ தம் ரக்க²தி. அதே²கோ அஜபாலகோ அனேகஸஹஸ்ஸா அஜா கோ³சரம் நேந்தோ ஸுஸானபஸ்ஸேன க³ச்ச²தி. ஏகா அஜா பண்ணானி கா²த³மானா க³ச்ச²ந்தரம் பவிட்டா² தா³ரகம் தி³ஸ்வா ஜண்ணுகேஹி ட²த்வா தா³ரகஸ்ஸ த²னம் அதா³ஸி, அஜபாலகேன ‘‘ஹே ஹே’’தி ஸத்³தே³ கதேபி ந நிக்க²மி. ஸோ ‘‘யட்டி²யா நம் பஹரித்வா நீஹரிஸ்ஸாமீ’’தி க³ச்ச²ந்தரம் பவிட்டோ² ஜண்ணுகேஹி ட²த்வா தா³ரகம் கீ²ரம் பாயந்திம் அஜிம் தி³ஸ்வா தா³ரகே புத்தஸினேஹம் படிலபி⁴த்வா, ‘‘புத்தோ மே லத்³தோ⁴’’தி ஆதா³ய பக்காமி.

காளீ க³ந்த்வா ஸேட்டி²னா புச்சி²தா தம் பவத்திம் ஆசிக்கி²த்வா, ‘‘க³ச்ச², தம் புன ஸஹஸ்ஸம் த³த்வா ஆனேஹீ’’தி வுத்தா ததா² அகாஸி. அத² நம் ஆஹ – ‘‘அம்ம காளி, இமம் ஆதா³ய சோரபபாதபப்³ப³தம் அபி⁴ருஹித்வா பபாதே கி²ப, பப்³ப³தகுச்சி²யம் படிஹஞ்ஞமானோ க²ண்டா³க²ண்டி³கோ ஹுத்வா பூ⁴மியம் பதிஸ்ஸதி, மதாமதபா⁴வஞ்சஸ்ஸ ஞத்வாவ ஆக³ச்சே²ய்யாஸீ’’தி. ஸா தம் தத்த² நேத்வா பப்³ப³தமத்த²கே ட²த்வா கி²பி. தம் கோ² பன பப்³ப³தகுச்சி²ம் நிஸ்ஸாய மஹாவேளுகு³ம்போ³ பப்³ப³தானுஸாரேனேவ வட்³டி⁴, தஸ்ஸ மத்த²கம் க⁴னஜாதோ ஜிஞ்ஜுககு³ம்போ³ அவத்த²ரி. தா³ரகோ பதந்தோ கோஜவகே விய தஸ்மிம் பதி. தம் தி³வஸஞ்ச நளகாரஜேட்ட²கஸ்ஸ வேளுப³லி பத்தோ ஹோதி. ஸோ புத்தேன ஸத்³தி⁴ம் க³ந்த்வா தம் வேளுகு³ம்ப³ம் சி²ந்தி³தும் ஆரபி⁴. தஸ்மிம் சலந்தே தா³ரகோ ஸத்³த³மகாஸி. ஸோ ‘‘தா³ரகஸத்³தோ³ வியா’’தி ஏகேன பஸ்ஸேன அபி⁴ருஹித்வா தம் தி³ஸ்வா, ‘‘புத்தோ மே லத்³தோ⁴’’தி துட்ட²சித்தோ ஆதா³ய க³தோ.

காளீ ஸேட்டி²ஸ்ஸ ஸந்திகம் க³ந்த்வா தேன புச்சி²தா தம் பவத்திம் ஆசிக்கி²த்வா, ‘‘க³ச்ச², நம் புன ஸஹஸ்ஸம் த³த்வா ஆனேஹீ’’தி வுத்தா ததா² அகாஸி. ஸேட்டி²னோ இத³ஞ்சித³ஞ்ச கரோந்தஸ்ஸேவ தா³ரகோ வட்³டி⁴தோ ‘‘கோ⁴ஸகோ’’த்வேவஸ்ஸ நாமம் அஹோஸி. ஸோ ஸேட்டி²னோ அக்கி²ம்ஹி கண்டகோ விய கா²யி, உஜுகம் தம் ஓலோகேதும்பி ந விஸதி. அத²ஸ்ஸ மாரணூபாயம் சிந்தேந்தோ அத்தனோ ஸஹாயகஸ்ஸ கும்ப⁴காரஸ்ஸ ஸந்திகம் க³ந்த்வா, ‘‘கதா³ த்வம் ஆவாபம் ஆலிம்பேஸ்ஸஸீ’’தி புச்சி²த்வா – ‘‘ஸ்வே’’தி வுத்தே, ‘‘தேன ஹி இத³ம் ஸஹஸ்ஸம் க³ஹேத்வா மம ஏகம் கம்மம் கரோஹீ’’தி ஆஹ. ‘‘கிம், ஸாமீ’’தி? ‘‘ஏகோ மே அவஜாதபுத்தோ அத்தி², தம் தவ ஸந்திகம் பேஸேஸ்ஸாமி, அத² நம் க³ஹேத்வா க³ப்³ப⁴ம் பவேஸேத்வா திகி²ணாய வாஸியா க²ண்டா³க²ண்டி³கம் சி²ந்தி³த்வா சாடியம் பக்கி²பித்வா ஆவாபே பசேய்யாஸி, இத³ம் தே ஸஹஸ்ஸம் ஸச்சகாரஸதி³ஸம். உத்தரிம் பன தே கத்தப்³ப³யுத்தகம் பச்சா² கரிஸ்ஸாமீ’’தி. கும்ப⁴காரோ ‘‘ஸாதூ⁴’’தி ஸம்படிச்சி². ஸேட்டி² புனதி³வஸே கோ⁴ஸகம் பக்கோஸித்வா, ‘‘ஹிய்யோ மயா கும்ப⁴காரோ ஏகம் கம்மம் ஆணத்தோ, ஏஹி, த்வம் தஸ்ஸ ஸந்திகம் க³ந்த்வா ஏவம் வதே³ஹி – ‘ஹிய்யோ கிர மே பிதரா ஆணத்தம் கம்மம் நிப்பா²தே³ஹீ’’’தி பஹிணி. ஸோ ‘‘ஸாதூ⁴’’தி அக³மாஸி. தம் தத்த² க³ச்ச²ந்தம் இதரோ ஸேட்டி²னோ புத்தோ தா³ரகேஹி ஸத்³தி⁴ம் கு³ளம் கீளந்தோ தி³ஸ்வா தம் பக்கோஸித்வா, ‘‘குஹிம் க³ச்ச²ஸி பா⁴திகா’’தி புச்சி²த்வா ‘‘பிது ஸாஸனம் க³ஹேத்வா கும்ப⁴காரஸ்ஸ ஸந்திக’’ந்தி வுத்தே ‘‘அஹம் தத்த² க³மிஸ்ஸாமி. இமே மம் தா³ரகா ப³ஹும் லக்க²ம் ஜினிம்ஸு, தம் மே படிஜினித்வா தே³ஹீ’’தி ஆஹ. ‘‘அஹம் பிது பா⁴யாமீ’’தி. ‘‘மா பா⁴யி, பா⁴திக, அஹம் தம் ஸாஸனம் ஹரிஸ்ஸாமி. ப³ஹூஹி ஜிதோ, யாவாஹம் ஆக³ச்சா²மி, தாவ மே லக்க²ம் படிஜினா’’தி.

கோ⁴ஸகோ கிர கு³ளகீளாய சே²கோ, தேன நம் ஏவம் நிப³ந்தி⁴. ஸோபி தம் ‘‘தேன ஹி க³ந்த்வா கும்ப⁴காரம் வதே³ஹி – ‘பிதரா கிர மே ஹிய்யோ ஏகம் கம்மம் ஆணத்தம், தம் நிப்பா²தே³ஹீ’’’தி வத்வா உய்யோஜேஸி. ஸோ தஸ்ஸ ஸந்திகம் க³ந்த்வா ததா² அவச. அத² நம் கும்ப⁴காரோ ஸேட்டி²னா வுத்தனியாமேனேவ மாரேத்வா ஆவாபே கி²பி. கோ⁴ஸகோபி தி³வஸபா⁴க³ம் கீளித்வா ஸாயன்ஹஸமயே கே³ஹம் க³ந்த்வா ‘‘கிம், தாத, ந க³தோஸீ’’தி வுத்தே அத்தனோ அக³தகாரணஞ்ச கனிட்ட²ஸ்ஸ க³தகாரணஞ்ச ஆரோசேஸி. தம் ஸுத்வா ஸேட்டி² ‘‘அஹம் தீ⁴’’தி மஹாவிரவம் விரவித்வா ஸகலஸரீரே பக்குதி²தலோஹிதோ விய ஹுத்வா, ‘‘அம்போ⁴, கும்ப⁴கார, மா மம் நாஸயி, மா மம் நாஸயீ’’தி பா³ஹா பக்³க³ய்ஹ கந்த³ந்தோ தஸ்ஸ ஸந்திகம் அக³மாஸி. கும்ப⁴காரோ தம் ததா² ஆக³ச்ச²ந்தம் தி³ஸ்வா, ‘‘ஸாமி, மா ஸத்³த³ம் கரி, கம்மம் தே நிப்ப²ன்ன’’ந்தி ஆஹ. ஸோ பப்³ப³தேன விய மஹந்தேன ஸோகேன அவத்த²டோ ஹுத்வா அனப்பகம் தோ³மனஸ்ஸம் படிஸம்வேதே³ஸி. யதா² தம் அப்பது³ட்ட²ஸ்ஸ பது³ஸ்ஸமானோ. தேனாஹ ப⁴க³வா –

‘‘யோ த³ண்டே³ன அத³ண்டே³ஸு, அப்பது³ட்டே²ஸு து³ஸ்ஸதி;

த³ஸன்னமஞ்ஞதரம் டா²னம், கி²ப்பமேவ நிக³ச்ச²தி.

‘‘வேத³னம் ப²ருஸம் ஜானிம், ஸரீரஸ்ஸ ச பே⁴த³னம்;

க³ருகம் வாபி ஆபா³த⁴ம், சித்தக்கே²பஞ்ச பாபுணே.

‘‘ராஜதோ வா உபஸக்³க³ம், அப்³ப⁴க்கா²னஞ்ச தா³ருணம்;

பரிக்க²யஞ்ச ஞாதீனம், போ⁴கா³னஞ்ச பப⁴ங்கு³ரம்.

‘‘அத² வாஸ்ஸ அகா³ரானி, அக்³கி³ ட³ஹதி பாவகோ;

காயஸ்ஸ பே⁴தா³ து³ப்பஞ்ஞோ, நிரயம் ஸோபபஜ்ஜதீ’’தி. (த⁴. ப. 137-140);

ஏவம் ஸந்தேபி புன நம் ஸேட்டி² உஜுகம் ஓலோகேதும் ந ஸக்கோதி. ‘‘கிந்தி நம் மாரேய்ய’’ந்தி சிந்தேந்தோ, ‘‘மம கா³மஸதே ஆயுத்தகஸ்ஸ ஸந்திகம் பேஸேத்வா மாரேஸ்ஸாமீ’’தி உபாயம் தி³ஸ்வா, ‘‘அயம் மே அவஜாதபுத்தோ, இமம் மாரேத்வா வச்சகூபே கி²பது, ஏவம் கதே அஹம் மாதுலஸ்ஸ கத்தப்³ப³யுத்தகம் பச்சா² ஜானிஸ்ஸாமீ’’தி தஸ்ஸ பண்ணம் லிகி²த்வா, ‘‘தாத கோ⁴ஸக, அம்ஹாகம் கா³மஸதே ஆயுத்தகோ அத்தி², இமம் பண்ணம் ஹரித்வா தஸ்ஸ தே³ஹீ’’தி வத்வா பண்ணம் தஸ்ஸ து³ஸ்ஸந்தே ப³ந்தி⁴. ஸோ பன அக்க²ரஸமயம் ந ஜானாதி. த³ஹரகாலதோ பட்டா²ய ஹி நம் மாராபேந்தோவ ஸேட்டி² மாரேதும் நாஸக்கி², கிம் அக்க²ரஸமயம் ஸிக்கா²பேஸ்ஸதி? இதி ஸோ அத்தனோ மாராபனபண்ணமேவ து³ஸ்ஸந்தே ப³ந்தி⁴த்வா நிக்க²மந்தோ ஆஹ – ‘‘பாதே²ய்யம் மே, தாத, நத்தீ²’’தி. ‘‘பாதே²ய்யேன தே கம்மம் நத்தி², அந்தராமக்³கே³ ‘அஸுககா³மே நாம மமஸஹாயகோ ஸேட்டி² அத்தி², தஸ்ஸ க⁴ரே பாதராஸம் கத்வா புரதோ க³ச்சா²ஹீ’’’தி. ஸோ ‘‘ஸாதூ⁴’’தி பிதரம் வந்தி³த்வா நிக்க²ந்தோ தம் கா³மம் பத்வா ஸேட்டி²ஸ்ஸ க⁴ரம் புச்சி²த்வா க³ந்த்வா ஸேட்டி²ஜாயம் பஸ்ஸி. ‘‘த்வம் குதோ ஆக³தோஸீ’’தி ச வுத்தே, ‘‘அந்தோனக³ரதோ’’தி ஆஹ. ‘‘கஸ்ஸ புத்தோஸீ’’தி? ‘‘தும்ஹாகம் ஸஹாயகஸேட்டி²னோ, அம்மா’’தி. ‘‘த்வம்ஸி கோ⁴ஸகோ நாமா’’தி? ‘‘ஆம, அம்மா’’தி. தஸ்ஸா ஸஹ த³ஸ்ஸனேனேவ தஸ்மிம் புத்தஸினேஹோ உப்பஜ்ஜி. ஸேட்டி²னோ பனேகா தீ⁴தா அத்தி² பன்னரஸஸோளஸவஸ்ஸுத்³தே³ஸிகா அபி⁴ரூபா பாஸாதி³கா, தம் ரக்கி²தும் ஏகமேவ பேஸனகாரிகம் தா³ஸிம் த³த்வா ஸத்தபூ⁴மிகஸ்ஸ பாஸாத³ஸ்ஸ உபரிமதலே ஸிரிக³ப்³பே⁴ வஸாபேந்தி. ஸேட்டி²தீ⁴தா தஸ்மிம் க²ணே தம் தா³ஸிம் அந்தராபணம் பேஸேஸி. அத² நம் ஸேட்டி²ஜாயா தி³ஸ்வா, ‘‘குஹிம் க³ச்ச²ஸீ’’தி புச்சி²த்வா, ‘‘அய்யதீ⁴தாய பேஸனேனா’’தி வுத்தே ‘‘இதோ தாவ ஏஹி, திட்ட²து பேஸனம், புத்தஸ்ஸ மே பீட²கம் அத்த²ரித்வா பாதே³ தோ⁴வித்வா தேலம் மக்கி²த்வா ஸயனம் அத்த²ரித்வா தே³ஹி, பச்சா² பேஸனம் கரிஸ்ஸஸீ’’தி ஆஹ. ஸா ததா² அகாஸி.

அத² நம் சிரேனாக³தம் ஸேட்டி²தீ⁴தா ஸந்தஜ்ஜேஸி. அத² நம் ஸா ஆஹ – ‘‘மா மே குஜ்ஜி², ஸேட்டி²புத்தோ கோ⁴ஸகோ ஆக³தோ, தஸ்ஸ இத³ஞ்சித³ஞ்ச கத்வா தத்த² க³ந்த்வா ஆக³தாம்ஹீ’’தி. ஸேட்டி²தீ⁴தாய ‘‘ஸேட்டி²புத்தோ கோ⁴ஸகோ’’தி நாமம் ஸுத்வாவ பேமம் ச²வியாதீ³னி சி²ந்தி³த்வா அட்டி²மிஞ்ஜம் ஆஹச்ச டி²தம். கோதுஹலகாலஸ்மிஞ்ஹி ஸா தஸ்ஸ பஜாபதீ ஹுத்வா நாளிகோத³னம் பச்சேகபு³த்³த⁴ஸ்ஸ அதா³ஸி, தஸ்ஸானுபா⁴வேனாக³ந்த்வா இமஸ்மிம் ஸேட்டி²குலே நிப்³ப³த்தா. இதி தம் ஸோ புப்³ப³ஸினேஹோ அவத்த²ரித்வா க³ண்ஹி. தேனாஹ ப⁴க³வா –

‘‘புப்³பே³வ ஸன்னிவாஸேன, பச்சுப்பன்னஹிதேன வா;

ஏவம் தம் ஜாயதே பேமம், உப்பலம்வ யதோ²த³கே’’தி. (ஜா. 1.2.174);

அத² நம் புச்சி² – ‘‘குஹிம் ஸோ, அம்மா’’தி? ‘‘ஸயனே நிபன்னோ நித்³தா³யதீ’’தி. ‘‘அத்தி² பனஸ்ஸ ஹத்தே² கிஞ்சீ’’தி? ‘‘து³ஸ்ஸந்தே பண்ணம் அத்தீ²’’தி. ஸா ‘‘கிம் பண்ணம் நு கோ² ஏத’’ந்தி தஸ்மிம் நித்³தா³யந்தே மாதாபிதூனம் அஞ்ஞவிஹிததாய அபஸ்ஸந்தானம் ஓதரித்வா ஸமீபம் க³ந்த்வா தம் பண்ணம் மோசேத்வா ஆதா³ய அத்தனோ க³ப்³ப⁴ம் பவிஸித்வா த்³வாரம் பிதா⁴ய வாதபானம் விவரித்வா அக்க²ரஸமயே குஸலதாய பண்ணம் வாசேத்வா, ‘‘அஹோ வத பா³லோ, அத்தனோ மரணபண்ணம் து³ஸ்ஸந்தே ப³ந்தி⁴த்வா விசரதி, ஸசே மயா ந தி³ட்ட²ம் அஸ்ஸ, நத்தி²ஸ்ஸ ஜீவித’’ந்தி தம் பண்ணம் பா²லேத்வா ஸேட்டி²ஸ்ஸ வசனேன அபரம் பண்ணம் லிகி² – ‘‘அயம் மம புத்தோ கோ⁴ஸகோ நாம, கா³மஸததோ பண்ணாகாரம் ஆஹராபேத்வா இமஸ்ஸ ஜனபத³ஸேட்டி²னோ தீ⁴தரா ஸத்³தி⁴ம் மங்க³லம் கத்வா அத்தனோ வஸனகா³மஸ்ஸ மஜ்ஜே² த்³விபூ⁴மகம் கே³ஹம் காரேத்வா பாகாரபரிக்கே²பேன சேவ புரிஸகு³த்தியா ச ஸுஸம்விஹிதாரக்க²ம் கரோது, மய்ஹஞ்ச ‘இத³ஞ்சித³ஞ்ச மயா கத’ந்தி ஸாஸனம் பேஸேது, ஏவம் கதே அஹம் மாதுலஸ்ஸ கத்தப்³ப³யுத்தகம் பச்சா² ஜானிஸ்ஸாமீ’’தி, லிகி²த்வா ச பன ஸங்க⁴ரித்வா ஓதரித்வா து³ஸ்ஸந்தேயேவஸ்ஸ ப³ந்தி⁴.

ஸோ தி³வஸபா⁴க³ம் நித்³தா³யித்வா உட்டா²ய பு⁴ஞ்ஜித்வா பக்காமி. புனதி³வஸே பாதோவ தம் கா³மம் க³ந்த்வா ஆயுத்தகம் கா³மகிச்சம் கரோந்தம்யேவ பஸ்ஸி. ஸோ தம் தி³ஸ்வா, ‘‘கிம், தாதா’’தி புச்சி². ‘‘பிதரா மே தும்ஹாகம் பண்ணம் பேஸித’’ந்தி. ‘‘கிம் பண்ணம், தாத, ஆஹரா’’தி பண்ணம் க³ஹேத்வா வாசேத்வா துட்ட²மானஸோ ‘‘பஸ்ஸத², போ⁴, மம ஸாமினோ மயி ஸினேஹம் கத்வா ஜேட்ட²புத்தஸ்ஸ மே மங்க³லம் கரோதூ’’தி மம ஸந்திகம் பஹிணி. ‘‘ஸீக⁴ம் தா³ருஆதீ³னி ஆஹரதா²’’தி க³ஹபதிகே வத்வா கா³மமஜ்ஜே² வுத்தபகாரம் கே³ஹம் காராபேத்வா கா³மஸததோ பண்ணாகாரம் ஆஹராபேத்வா ஜனபத³ஸேட்டி²னோ ஸந்திகா தீ⁴தரம் ஆனேத்வா மங்க³லம் கத்வா ஸேட்டி²ஸ்ஸ ஸாஸனம் பஹிணி ‘‘இத³ஞ்சித³ஞ்ச மயா கத’’ந்தி.

தம் ஸுத்வா ஸேட்டி²னோ ‘‘யம் காரேமி, தம் ந ஹோதி; யம் ந காரேமி, ததே³வ ஹோதீ’’தி மஹந்தம் தோ³மனஸ்ஸம் உப்பஜ்ஜி. புத்தஸோகேன ஸத்³தி⁴ம் ஸோ ஸோகோ ஏகதோ ஹுத்வா குச்சி²டா³ஹம் உப்பாதே³த்வா அதிஸாரம் ஜனேஸி. ஸேட்டி²தீ⁴தாபி ‘‘ஸசே கோசி ஸேட்டி²னோ ஸந்திகா ஆக³ச்ச²தி, மம அகதே²த்வா ஸேட்டி²புத்தஸ்ஸ பட²மதரம் மா கத²யித்தா²’’தி ஜனே ஆணாபேஸி. ஸேட்டி²பி கோ² ‘‘தா³னி தம் து³ட்ட²புத்தம் மம ஸாபதேய்யஸ்ஸ ஸாமிகம் ந கரிஸ்ஸாமீ’’தி சிந்தேத்வா ஏகம் ஆயுத்தகம் ஆஹ – ‘‘மாதுல, புத்தம் மே த³ட்டு²காமோம்ஹி, ஏகம் பாத³மூலிகம் பேஸேத்வா மம புத்தம் பக்கோஸாபேஹீ’’தி. ஸோ ‘‘ஸாதூ⁴’’தி வத்வா பண்ணம் த³த்வா ஏகம் புரிஸம் பேஸேஸி. ஸேட்டி²தீ⁴தாபி தஸ்ஸ ஆக³ந்த்வா த்³வாரே டி²தபா⁴வம் ஸுத்வா தம் பக்கோஸாபேத்வா, ‘‘கிம், தாதா’’தி புச்சி². ஸோ ஆஹ – ‘‘ஸேட்டி² கி³லானோ, புத்தம் பஸ்ஸிதும் பக்கோஸாபேஸி, அய்யே’’தி. ‘‘கிம், தாத, ப³லவா, து³ப்³ப³லோ’’தி? ‘‘ப³லவா தாவ, ஆஹாரம் பு⁴ஞ்ஜதியேவ, அய்யே’’தி. ஸா ஸேட்டி²புத்தம் அஜானாபேத்வாவ தஸ்ஸ நிவேஸனஞ்ச பரிப்³ப³யஞ்ச தா³பேத்வா ‘‘மயா பேஸிதகாலே க³மிஸ்ஸஸி, அச்ச²ஸ்ஸு தாவா’’தி ஆஹ. ஸேட்டி² புன ஆயுத்தகம் அவச, ‘‘கிம், மாதுல, ந தே மம புத்தஸ்ஸ ஸந்திகம் பஹித’’ந்தி? ‘‘பஹிதம், ஸாமி, க³தபுரிஸோ ந தாவ ஏதீ’’தி. ‘‘தேன ஹி புன அபரம் பேஸேஹீ’’தி. ஸோ பேஸேஸி. ஸேட்டி²தீ⁴தா தஸ்மிம்பி ததே²வ படிபஜ்ஜி. அத² ஸேட்டி²னோ ரோகோ³ ப³லவா ஜாதோ, ஏகம் பா⁴ஜனம் பவிஸதி, ஏகம் நிக்க²மதி. புன ஸேட்டி² ஆயுத்தகம் புச்சி² – ‘‘கிம், மாதுல, ந தே மம புத்தஸ்ஸ ஸந்திகம் பஹித’’ந்தி? ‘‘பஹிதம், ஸாமி, க³தபுரிஸோ ந தாவ ஏதீ’’தி. ‘‘தேன ஹி புன அபரம் பேஸேஹீ’’தி. ஸோ பேஸேஸி. ஸேட்டி²தீ⁴தா ததியவாரே ஆக³தம்பி தம் பவத்திம் புச்சி². ஸோ ‘‘பா³ள்ஹகி³லானோ, அய்யே, ஸேட்டி² ஆஹாரம் பச்சி²ந்தி³த்வா மச்சுபராயணோ ஜாதோ, ஏகம் பா⁴ஜனம் நிக்க²மதி, ஏகம் பவிஸதீ’’தி ஆஹ. ஸேட்டி²தீ⁴தா ‘‘இதா³னி க³ந்தும் காலோ’’தி ஸேட்டி²புத்தஸ்ஸ ‘‘பிதா தே கிர கி³லானோ’’தி ஆரோசேத்வா ‘‘கிம் வதே³ஸி ப⁴த்³தே³’’தி வுத்தே ‘‘அபா²ஸுகமஸ்ஸ, ஸாமீ’’தி ஆஹ. ‘‘இதா³னி கிம் காதப்³ப³’’ந்தி. ஸாமி? ‘‘கா³மஸததோ வுட்டா²னகபண்ணாகாரம் ஆதா³ய க³ந்த்வா பஸ்ஸிஸ்ஸாம ந’’ந்தி. ஸோ ‘‘ஸாதூ⁴’’தி பண்ணாகாரம் ஆஹராபேத்வா ஸகடேஹி ஆதா³ய பக்காமி.

அத² நம் ஸா ‘‘பிதா தே து³ப்³ப³லோ, ஏத்தகம் பண்ணாகாரம் க³ஹேத்வா க³ச்ச²ந்தானம் பபஞ்சோ ப⁴விஸ்ஸதி, ஏதம் நிவத்தாபேஹீ’’தி வத்வா தம் ஸப்³ப³ம் அத்தனோ குலகே³ஹம் பேஸேத்வா புன தம் ஆஹ – ‘‘ஸாமி, த்வம் அத்தனோ பிது பாத³பஸ்ஸே திட்டே²ய்யாஸி, அஹம் உஸ்ஸீஸகபஸ்ஸே ட²ஸ்ஸாமீ’’தி. கே³ஹம் பவிஸமானாயேவ ச ‘‘கே³ஹஸ்ஸ புரதோ ச பச்ச²தோ ச ஆரக்க²ம் க³ண்ஹதா²’’தி அத்தனோ புரிஸே ஆணாபேஸி. பவிட்ட²காலே பன ஸேட்டி²புத்தோ பிது பாத³பஸ்ஸே அட்டா²ஸி, இதரா உஸ்ஸீஸகபஸ்ஸே.

தஸ்மிம் க²ணே ஸேட்டி² உத்தானகோ நிபன்னோ ஹோதி. ஆயுத்தகோ பன தஸ்ஸ பாதே³ பரிமஜ்ஜந்தோ ‘‘புத்தோ தே, ஸாமி, ஆக³தோ’’தி ஆஹ. ‘‘குஹிம் ஸோ’’தி? ‘‘ஏஸ பாத³மூலே டி²தோ’’தி. அத² நம் தி³ஸ்வா ஆயகம்மிகம் பக்கோஸாபேத்வா, ‘‘மம கே³ஹே கித்தகம் த⁴ன’’ந்தி புச்சி². ‘‘ஸாமி, த⁴னஸ்ஸேவ சத்தாலீஸகோடியோ, உபபோ⁴க³பரிபோ⁴க³ப⁴ண்டா³னம் பன வனகா³மக்கே²த்தத்³விபத³சதுப்பத³யானவாஹனானஞ்ச அயஞ்ச அயஞ்ச பரிச்சே²தோ³’’தி வுத்தே, ‘‘அஹம் ஏத்தகம் த⁴னம் மம புத்தஸ்ஸ கோ⁴ஸகஸ்ஸ ந தே³மீ’’தி வத்துகாமோ ‘‘தே³மீ’’தி ஆஹ. தம் ஸுத்வா ஸேட்டி²தீ⁴தா ‘‘அயம் புன கதே²ந்தோ அஞ்ஞம் கிஞ்சி கதே²ய்யா’’தி சிந்தேத்வா ஸோகாதுரா விய கேஸே விகிரித்வா ரோத³மானா ‘‘கிம் நாமேதம், தாத, வதே³த², இத³ம்பி நாம வோ வசனம் ஸுணோம, அலக்கி²கா வதம்ஹா’’தி வத்வா மத்த²கேன நம் உரமஜ்ஜே² பஹரந்தீ பதித்வா யதா² புன வத்தும் ந ஸக்கோதி, ததா²ஸ்ஸ உரமஜ்ஜே² மத்த²கேன க⁴ம்ஸேந்தீ ஆரோத³னம் த³ஸ்ஸேஸி. ஸேட்டி² தம்க²ணஞ்ஞேவ காலமகாஸி. ‘‘ஸேட்டி² மதோ’’தி க³ந்த்வா உதேனஸ்ஸ ரஞ்ஞோ ஆரோசயிம்ஸு. ராஜா தஸ்ஸ ஸரீரகிச்சம் காராபேத்வா, ‘‘அத்தி² பனஸ்ஸ புத்தோ வா தீ⁴தா வா’’தி புச்சி². ‘‘அத்தி², தே³வ, கோ⁴ஸகோ நாம தஸ்ஸ புத்தோ, ஸப்³ப³ம் ஸாபதேய்யம் தஸ்ஸ நிய்யாதே³த்வாவ மதோ, தே³வா’’தி.

ராஜா அபரபா⁴கே³ ஸேட்டி²புத்தம் பக்கோஸாபேஸி. தஸ்மிஞ்ச தி³வஸே தே³வோ வஸ்ஸி. ராஜங்க³ணே தத்த² தத்த² உத³கம் ஸண்டா²தி. ஸேட்டி²புத்தோ ‘‘ராஜானம் பஸ்ஸிஸ்ஸாமீ’’தி பாயாஸி. ராஜா வாதபானம் விவரித்வா தம் ஆக³ச்ச²ந்தம் ஓலோகேந்தோ ராஜங்க³ணே உத³கம் லங்கி⁴த்வா ஆக³ச்ச²ந்தம் தி³ஸ்வா ஆக³ந்த்வா வந்தி³த்வா டி²தம் ‘‘த்வம் கோ⁴ஸகோ நாம, தாதா’’தி புச்சி²த்வா ‘‘ஆம, தே³வா’’தி வுத்தே ‘‘பிதா மே மதோதி மா ஸோசி, தவ பேத்திகம் ஸேட்டி²ட்டா²னம் துய்ஹமேவ த³ஸ்ஸாமீ’’தி தம் ஸமஸ்ஸாஸேத்வா ‘‘க³ச்ச², தாதா’’தி உய்யோஜேஸி. ராஜா க³ச்ச²ந்தஞ்ச நம் ஓலோகேந்தோவ அட்டா²ஸி. ஸோ ஆக³மனகாலே லங்கி⁴தம் உத³கம் க³மனகாலே ஓதரித்வா ஸணிகம் அக³மாஸி. அத² நம் ராஜா ததோவ பக்கோஸாபேத்வா, ‘‘கிம் நு கோ², தாத, த்வம் மம ஸந்திகம் ஆக³ச்ச²ந்தோ உத³கம் லங்கி⁴த்வா ஆக³ம்ம க³ச்ச²ந்தோ ஓதரித்வா ஸணிகம் க³ச்ச²ஸீ’’தி புச்சி². ‘‘ஆம, தே³வ, அஹம் தஸ்மிம் க²ணே குமாரகோ, கீளனகாலோ நாம, ஸோ இதா³னி பன மே தே³வேன டா²னந்தரம் படிஸ்ஸுதம். தஸ்மா யதா² புரே அசரித்வா இதா³னி ஸன்னிஸின்னேன ஹுத்வா சரிதும் வட்டதீ’’தி. தம் ஸுத்வா ராஜா ‘‘தி⁴திமாயம் புரிஸோ, இதா³னேவஸ்ஸ டா²னந்தரம் த³ஸ்ஸாமீ’’தி பிதரா பு⁴த்தம் போ⁴க³ம் த³த்வா ஸப்³ப³ஸதேன ஸேட்டி²ட்டா²னம் அதா³ஸி.

ஸோ ரதே² ட²த்வா நக³ரம் பத³க்கி²ணம் அகாஸி. ஓலோகிதோலோகிதட்டா²னம் கம்பதி. ஸேட்டி²தீ⁴தா காளிதா³ஸியா ஸத்³தி⁴ம் மந்தயமானா நிஸின்னா ‘‘அம்ம காளி, புத்தஸ்ஸ தே ஏத்திகா ஸம்பத்தி மம் நிஸ்ஸாய உப்பன்னா’’தி ஆஹ. ‘‘கிம் காரணா, அம்மா’’தி? ‘‘அயஞ்ஹி அத்தனோ மரணபண்ணம் து³ஸ்ஸந்தே ப³ந்தி⁴த்வா அம்ஹாகம் க⁴ரம் ஆக³தோ, அத²ஸ்ஸ மயா தம் பண்ணம் பா²லேத்வா மயா ஸத்³தி⁴ம் மங்க³லகரணத்தா²ய அஞ்ஞம் பண்ணம் லிகி²த்வா ஏத்தகம் காலம் தத்த² ஆரக்கோ² கதோ’’தி. ‘‘அம்ம, த்வம் ஏத்தகம் பஸ்ஸஸி, இமம் பன ஸேட்டி² த³ஹரகாலதோ பட்டா²ய மாரேதுகாமோ மாரேதும் நாஸக்கி², கேவலம் இமம் நிஸ்ஸாய ப³ஹும் த⁴னம் கீ²யீ’’தி. ‘‘அம்ம, அதிபா⁴ரியம் வத ஸேட்டி²னா கத’’ந்தி. நக³ரம் பத³க்கி²ணம் கத்வா கே³ஹம் பவிஸந்தம் பன நம் தி³ஸ்வா, ‘‘அயம் ஏத்திகா ஸம்பத்தி மம் நிஸ்ஸாய உப்பன்னா’’தி ஹஸிதம் அகாஸி. அத² நம் ஸேட்டி²புத்தோ தி³ஸ்வா, ‘‘கிம் காரணா ஹஸீ’’தி புச்சி². ‘‘ஏகம் காரணம் நிஸ்ஸாயா’’தி. ‘‘கதே²ஹி ந’’ந்தி? ‘‘ஸா ந கதே²ஸி’’. ஸோ ‘‘ஸசே ந கதே²ஸ்ஸஸி, த்³விதா⁴ தம் சி²ந்தி³ஸ்ஸாமீ’’தி தஜ்ஜேத்வா அஸிம் நிக்கட்³டி⁴. ஸா ‘‘அயம் ஏத்திகா ஸம்பத்தி தயா மம் நிஸ்ஸாய லத்³தா⁴தி சிந்தேத்வா ஹஸித’’ந்தி ஆஹ. ‘‘யதி³ மம பிதரா அத்தனோ ஸந்தகம் மய்ஹம் நிய்யாதி³தம், த்வம் ஏத்த² கிம் ஹோஸீ’’தி? ஸோ கிர ஏத்தகம் காலம் கிஞ்சி ந ஜானாதி, தேனஸ்ஸா வசனம் ந ஸத்³த³ஹி. அத²ஸ்ஸ ஸா ‘‘தும்ஹாகம் பிதரா மரணபண்ணம் த³த்வா பேஸிதா, தும்ஹே மயா இத³ஞ்சித³ஞ்ச கத்வா ரக்கி²தா’’தி ஸப்³ப³ம் கதே²ஸி. ‘‘த்வம் அபூ⁴தம் கதே²ஸீ’’தி அஸத்³த³ஹந்தோ ‘‘மாதரம் காளிம் புச்சி²ஸ்ஸாமீ’’தி சிந்தேத்வா ‘‘ஏவம் கிர, அம்மா’’தி. ‘‘ஆம, தாத, த³ஹரகாலதோ பட்டா²ய தம் மாரேதுகாமோ மாரேதும் அஸக்கோந்தோ தம் நிஸ்ஸாய ப³ஹும் த⁴னம் கீ²யி, ஸத்தஸு டா²னேஸு த்வம் மரணதோ முத்தோ, இதா³னி போ⁴க³கா³மதோ ஆக³ம்ம ஸப்³ப³ஸதேன ஸத்³தி⁴ம் ஸேட்டி²ட்டா²னம் பத்தோ’’தி. ஸோ தம் ஸுத்வா ‘‘பா⁴ரியம் வத கம்மம், ஏவரூபா கோ² பன மரணா முத்தஸ்ஸ மம பமாத³ஜீவிதம் ஜீவிதும் அயுத்தம், அப்பமத்தோ ப⁴விஸ்ஸாமீ’’தி சிந்தேத்வா தே³வஸிகம் ஸஹஸ்ஸம் விஸ்ஸஜ்ஜேத்வா அத்³தி⁴ககபணாதீ³னம் தா³னம் பட்ட²பேஸி. மித்தோ நாமஸ்ஸ குடும்பி³கோ தா³னப்³யாவடோ அஹோஸி. அயம் கோ⁴ஸகஸேட்டி²னோ உப்பத்தி.

தஸ்மிம் பன காலே ப⁴த்³த³வதீனக³ரே ப⁴த்³த³வதியஸேட்டி² நாம கோ⁴ஸகஸேட்டி²னோ அதி³ட்ட²புப்³ப³ஸஹாயகோ அஹோஸி. ப⁴த்³த³வதீனக³ரதோ ஆக³தானம் வாணிஜானம் ஸந்திகே கோ⁴ஸகஸேட்டி² ப⁴த்³த³வதியஸேட்டி²னோ ஸம்பத்திஞ்ச வயப்பதே³ஸஞ்ச ஸுத்வா தேன ஸத்³தி⁴ம் ஸஹாயகபா⁴வம் இச்ச²ந்தோ பண்ணாகாரம் பேஸேஸி. ப⁴த்³த³வதியஸேட்டி²பி கோஸம்பி³தோ ஆக³தானம் வாணிஜானம் ஸந்திகே கோ⁴ஸகஸேட்டி²னோ ஸம்பத்திஞ்ச வயப்பதே³ஸஞ்ச ஸுத்வா தேன ஸத்³தி⁴ம் ஸஹாயகபா⁴வம் இச்ச²ந்தோ பண்ணாகாரம் பேஸேஸி. ஏவம் தே அஞ்ஞமஞ்ஞம் அதி³ட்ட²புப்³ப³ஸஹாயகா ஹுத்வா வஸிம்ஸு. அபரபா⁴கே³ ப⁴த்³த³வதியஸேட்டி²னோ கே³ஹே அஹிவாதரோகோ³ பதிதோ. தஸ்மிம் பதிதே பட²மம் மக்கி²கா மரந்தி, ததோ அனுக்கமேனேவ கீடா மூஸிகா குக்குடா ஸூகரா கா³வோ தா³ஸீ தா³ஸா ஸப்³ப³பச்சா² க⁴ரமானுஸகாபி மரந்தி. தேஸு யே பி⁴த்திம் பி⁴ந்தி³த்வா பலாயந்தி, தே ஜீவிதம் லப⁴ந்தி, ததா³ பன ஸேட்டி² ச ப⁴ரியா ச தீ⁴தா சஸ்ஸ ததா² பலாயித்வா கோ⁴ஸகஸேட்டி²ம் பஸ்ஸிதும் பத்தே²ந்தா கோஸம்பி³மக்³க³ம் படிபஜ்ஜிம்ஸு. தே அந்தராமக்³கே³யேவ கீ²ணபாதே²ய்யா வாதாதபேன சேவ கு²ப்பிபாஸாஹி ச கிலந்தஸரீரா கிச்சே²ன கோஸம்பி³ம் பத்வா உத³கபா²ஸுகட்டா²னே ட²த்வா ந்ஹத்வா நக³ரத்³வாரே ஏகம் ஸாலம் பவிஸிம்ஸு.

ததோ ஸேட்டி² ப⁴ரியம் ஆஹ – ‘‘ப⁴த்³தே³, இமினா நீஹாரேன க³ச்ச²ந்தா விஜாதமாதுயாபி அமனாபா ஹோந்தி, ஸஹாயகோ கிர மே அத்³தி⁴ககபணாதீ³னம் தே³வஸிகம் ஸஹஸ்ஸம் விஸ்ஸஜ்ஜேத்வா தா³னம் தா³பேஸி. தத்த² தீ⁴தரம் பேஸேத்வா ஆஹாரம் ஆஹராபேத்வா ஏகாஹம் த்³வீஹம் இதே⁴வ ஸரீரம் ஸந்தப்பேத்வா ஸஹாயகம் பஸ்ஸிஸ்ஸாமா’’தி. ஸா ‘‘ஸாது⁴, ஸாமீ’’தி. தே ஸாலாயமேவ வஸிம்ஸு. புனதி³வஸே காலே ஆரோசிதே கபணத்³தி⁴காதீ³ஸு ஆஹாரத்தா²ய க³ச்ச²ந்தேஸு மாதாபிதரோ, ‘‘அம்ம, க³ந்த்வா அம்ஹாகம் ஆஹாரம் ஆஹரா’’தி தீ⁴தரம் பேஸயிம்ஸு. மஹாபோ⁴க³குலஸ்ஸ தீ⁴தா விபத்தியா அச்சி²ன்னலஜ்ஜிதாய அலஜ்ஜமானா பாதிம் க³ஹேத்வா கபணஜனேன ஸத்³தி⁴ம் ஆஹாரத்தா²ய க³ந்த்வா ‘‘கதி படிவீஸே க³ண்ஹிஸ்ஸஸி, அம்மா’’தி புட்டா² ச பன ‘‘தயோ’’தி ஆஹ. அத²ஸ்ஸா தயோ படிவீஸே அதா³ஸி. தாய ப⁴த்தே ஆஹடே தயோபி ஏகதோ பு⁴ஞ்ஜிதும் நிஸீதி³ம்ஸு.

அத² மாதாதீ⁴தரோ ஸேட்டி²ம் ஆஹம்ஸு – ‘‘ஸாமி, விபத்தி நாம மஹாகுலானம்பி உப்பஜ்ஜதி, மா அம்ஹே ஓலோகேத்வா பு⁴ஞ்ஜ, மா சிந்தயீ’’தி. இதி நம் நானப்பகாரேஹி யாசித்வா போ⁴ஜேஸும். ஸோ பு⁴ஞ்ஜித்வா ஆஹாரம் ஜீராபேதும் அஸக்கோந்தோ அருணே உக்³க³ச்ச²ந்தே காலமகாஸி. மாதாதீ⁴தரோ நானப்பகாரேஹி பரிதே³வித்வா ரோதி³ம்ஸு. குமாரிகா புனதி³வஸே ரோத³மானா ஆஹாரத்தா²ய க³ந்த்வா, ‘‘கதி படிவீஸே க³ண்ஹிஸ்ஸஸீ’’தி வுத்தா, ‘‘த்³வே’’தி வத்வா ஆஹாரம் ஆஹரித்வா மாதரம் யாசித்வா போ⁴ஜேஸி. ஸாபி தாய யாசியமானா பு⁴ஞ்ஜித்வா ஆஹாரம் ஜீராபேதும் அஸக்கோந்தீ தம் தி³வஸமேவ காலமகாஸி. குமாரிகா ஏகிகாவ ரோதி³த்வா பரிதே³வித்வா தாய து³க்கு²ப்பத்தியா அதிவிய ஸஞ்ஜாதசா²தகது³க்கா² புனதி³வஸே யாசகேஹி ஸத்³தி⁴ம் ரோத³ந்தீ ஆஹாரத்தா²ய க³ந்த்வா, ‘‘கதி படிவீஸே க³ண்ஹிஸ்ஸஸி, அம்மா’’தி வுத்தா ‘‘ஏக’’ந்தி ஆஹ. மித்தகுடும்பி³கோ தம் தயோ தி³வஸே ப⁴த்தம் க³ண்ஹந்திம் ஸஞ்ஜானாதி, தேன தம் ‘‘அபேஹி நஸ்ஸ, வஸலி, அஜ்ஜ தவ குச்சி²ப்பமாணம் அஞ்ஞாஸீ’’தி ஆஹ. ஹிரோத்தப்பஸம்பன்னா குலதீ⁴தா பச்சோரஸ்மிம் ஸத்திபஹாரம் விய வணே கா²ரோத³கஸேசனகம் விய ச பத்வா ‘‘கிம், ஸாமீ’’தி ஆஹ. ‘‘தயா புரே தயோ கோட்டா²ஸா க³ஹிதா, ஹிய்யோ த்³வே, அஜ்ஜ ஏகம் க³ண்ஹாஸி. அஜ்ஜ தே அத்தனோ குச்சி²ப்பமாணம் ஞாத’’ந்தி. ‘‘மா மம், ஸாமி, ‘அத்தனோவ அத்தா²ய க³ண்ஹீ’தி மஞ்ஞித்தா²’’தி. ‘‘அத² கஸ்மா ஏவம் க³ண்ஹீ’’தி? ‘‘புரே தயோ ஜனா அஹும்ஹ, ஸாமி, ஹிய்யோ த்³வே, அஜ்ஜ ஏகிகாவ ஜாதாம்ஹீ’’தி. ஸோ ‘‘கேன காரணேனா’’தி புச்சி²த்வா ஆதி³தோ பட்டா²ய தாய கதி²தம் ஸப்³ப³ம் பவத்திம் ஸுத்வா அஸ்ஸூனி ஸந்தா⁴ரேதும் அஸக்கோந்தோ ஸஞ்ஜாதப³லவதோ³மனஸ்ஸோ ஹுத்வா, ‘‘அம்ம, ஏவம் ஸந்தே மா சிந்தயி, த்வம் ப⁴த்³த³வதியஸேட்டி²னோ தீ⁴தா அஜ்ஜகாலதோ பட்டா²ய மம தீ⁴தாயேவ நாமா’’தி வத்வா ஸீஸே சும்பி³த்வா க⁴ரம் நேத்வா அத்தனோ ஜேட்ட²தீ⁴துட்டா²னே ட²பேஸி.

ஸா தா³னக்³கே³ உச்சாஸத்³த³ம் மஹாஸத்³த³ம் ஸுத்வா, ‘‘தாத, கஸ்மா ஏதம் ஜனம் நிஸ்ஸத்³த³ம் கத்வா தா³னம் ந தே³தா²’’தி ஆஹ. ‘‘ந ஸக்கா காதும், அம்மா’’தி. ‘‘ஸக்கா, தாதா’’தி. ‘‘கத²ம் ஸக்கா, அம்மா’’தி? ‘‘தாத தா³னக்³க³ம் பரிக்கி²பித்வா ஏகேகஸ்ஸேவ பவேஸனப்பமாணேன த்³வே த்³வாரானி யோஜேத்வா, ‘ஏகேன த்³வாரேன பவிஸித்வா ஏகேன நிக்க²மதா²’தி வதே³த², ஏவம் நிஸ்ஸத்³தா³ ஹுத்வாவ க³ண்ஹிஸ்ஸந்தீ’’தி. ஸோ தம் ஸுத்வா, ‘‘ப⁴த்³த³கோவ, அம்ம, உபாயோ’’தி ததா² காரேஸி. ஸாபி புப்³பே³ ஸாமா நாம. வதியா பன காரிதத்தா ஸாமாவதீ நாம ஜாதா. ததோ பட்டா²ய தா³னக்³கே³ கோலாஹலம் பச்சி²ந்தீ³. கோ⁴ஸகஸேட்டி² புப்³பே³ தம் ஸத்³த³ம் ஸுணந்தோ ‘‘மய்ஹம் தா³னக்³கே³ ஸத்³தோ³’’தி துஸ்ஸதி. த்³வீஹதீஹம் பன ஸத்³த³ம் அஸுணந்தோ மித்தகுடும்பி³கம் அத்தனோ உபட்டா²னம் ஆக³தம் புச்சி² – ‘‘தி³ய்யதி கபணத்³தி⁴காதீ³னம் தா³ன’’ந்தி? ‘‘ஆம, ஸாமீ’’தி. ‘‘அத² கிம் த்³வீஹதீஹம் ஸத்³தோ³ ந ஸுய்யதீ’’தி? ‘‘யதா² நிஸ்ஸத்³தா³ ஹுத்வா க³ண்ஹந்தி, ததா² மே உபாயோ கதோ’’தி. ‘‘அத² புப்³பே³வ கஸ்மா நாகாஸீ’’தி? ‘‘அஜானனதாய, ஸாமீ’’தி. ‘‘இதா³னி கத²ம் தே ஞாதோ’’தி? ‘‘தீ⁴தரா மே அக்கா²தோ, ஸாமீ’’தி. மய்ஹம் அவிதி³தா ‘‘தவ தீ⁴தா நாம அத்தீ²’’தி. ஸோ அஹிவாதரோகு³ப்பத்திதோ பட்டா²ய ஸப்³ப³ம் ப⁴த்³த³வதியஸேட்டி²னோ பவத்திம் ஆசிக்கி²த்வா தஸ்ஸா அத்தனோ ஜேட்ட²தீ⁴துட்டா²னே ட²பிதபா⁴வம் ஆரோசேஸி. அத² நம் ஸேட்டி² ‘‘ஏவம் ஸந்தே மம கஸ்மா ந கதே²ஸி, மம ஸஹாயகஸ்ஸ தீ⁴தா மம தீ⁴தா நாமா’’தி தம் பக்கோஸாபேத்வா புச்சி² – ‘‘அம்ம, ஸேட்டி²னோ தீ⁴தாஸீ’’தி? ‘‘ஆம, தாதா’’தி. ‘‘தேன ஹி மா சிந்தயி, த்வம் மம தீ⁴தாஸீ’’தி தம் ஸீஸே சும்பி³த்வா பரிவாரத்தா²ய தஸ்ஸா பஞ்ச இத்தி²ஸதானி த³த்வா தம் அத்தனோ ஜேட்ட²தீ⁴துட்டா²னே ட²பேஸி.

அதே²கதி³வஸம் தஸ்மிம் நக³ரே நக்க²த்தம் ஸங்கு⁴ட்ட²ம் ஹோதி. தஸ்மிம் பன நக்க²த்தே ப³ஹி அனிக்க²மனகா குலதீ⁴தரோபி அத்தனோ பரிவாரேன ஸத்³தி⁴ம் பத³ஸாவ நதி³ம் க³ந்த்வா ந்ஹாயந்தி. தஸ்மா தம் தி³வஸம் ஸாமாவதீபி பஞ்சஹி இத்தி²ஸதேஹி பரிவாரிதா ராஜங்க³ணேனேவ ந்ஹாயிதும் அக³மாஸி. உதேனோ ஸீஹபஞ்ஜரே டி²தோ தம் தி³ஸ்வா ‘‘கஸ்ஸிமா நாடகித்தி²யோ’’தி புச்சி². ‘‘ந கஸ்ஸசி நாடகித்தி²யோ, தே³வா’’தி. ‘‘அத² கஸ்ஸ தீ⁴தரோ’’தி? ‘‘கோ⁴ஸகஸேட்டி²னோ தீ⁴தா தே³வ, ஸாமாவதீ நாமேஸா’’தி. ஸோ தி³ஸ்வாவ உப்பன்னஸினேஹோ ஸேட்டி²னோ ஸாஸனம் பாஹேஸி – ‘‘தீ⁴தரம் கிர மே பேஸேதூ’’தி. ‘‘ந பேஸேமி, தே³வா’’தி. ‘‘மா கிர ஏவம் கரோது, பேஸேதுயேவா’’தி. ‘‘மயம் க³ஹபதிகா நாம குமாரிகானம் போதே²த்வா விஹேடே²த்வா கட்³ட⁴னப⁴யேன ந தே³ம, தே³வா’’தி. ராஜா குஜ்ஜி²த்வா கே³ஹம் லஞ்சா²பேத்வா ஸேட்டி²ஞ்ச ப⁴ரியஞ்ச ஹத்தே² க³ஹேத்வா ப³ஹி காராபேஸி. ஸாமாவதீ, ந்ஹாயித்வா ஆக³ந்த்வா கே³ஹம் பவிஸிதும் ஓகாஸம் அலப⁴ந்தீ, ‘‘கிம் ஏதம், தாதா’’தி புச்சி². ‘‘அம்ம, ராஜா தவ காரணா பஹிணி. அத² ‘ந மயம் த³ஸ்ஸாமா’தி வுத்தே க⁴ரம் லஞ்சா²பேத்வா அம்ஹே ப³ஹி காராபேஸீ’’தி. ‘‘தாத, பா⁴ரியம் வோ கம்மம் கதம், ரஞ்ஞா நாம பஹிதே ‘ந, தே³மா’தி அவத்வா ‘ஸசே மே தீ⁴தரம் ஸபரிவாரம் க³ண்ஹத², தே³மா’தி வத்தப்³ப³ம் ப⁴வேய்ய, தாதா’’தி. ‘‘ஸாது⁴, அம்ம, தவ ருசியா ஸதி ஏவம் கரிஸ்ஸாமீ’’தி ரஞ்ஞோ ததா² ஸாஸனம் பாஹேஸி. ராஜா ‘‘ஸாதூ⁴’’தி ஸம்படிச்சி²த்வா தம் ஸபரிவாரம் ஆனேத்வா அபி⁴ஸிஞ்சித்வா அக்³க³மஹேஸிட்டா²னே ட²பேஸி. ஸேஸா தஸ்ஸாயேவ பரிவாரித்தி²யோ அஹேஸும். அயம் ஸாமாவதியா உப்பத்தி.

உதேனஸ்ஸ பன அபராபி வாஸுலத³த்தா நாம தே³வீ அஹோஸி சண்ட³பஜ்ஜோதஸ்ஸ தீ⁴தா. உஜ்ஜேனியஞ்ஹி சண்ட³பஜ்ஜோதோ நாம ராஜா அஹோஸி. ஸோ ஏகதி³வஸம் உய்யானதோ ஆக³ச்ச²ந்தோ அத்தனோ ஸம்பத்திம் ஓலோகேத்வா, ‘‘அத்தி² நு கோ² அஞ்ஞஸ்ஸபி கஸ்ஸசி ஏவரூபா ஸம்பத்தீ’’தி வத்வா தம் ஸுத்வா மனுஸ்ஸேஹி ‘‘கிம் ஸம்பத்தி நாமேஸா, கோஸம்பி³யம் உதேனஸ்ஸ ரஞ்ஞோ அதிமஹதீ ஸம்பதீ’’தி வுத்தே ராஜா ஆஹ – ‘‘தேன ஹி க³ண்ஹிஸ்ஸாம ந’’ந்தி? ‘‘ந ஸக்கா ஸோ க³ஹேது’’ந்தி. ‘‘கிஞ்சி கத்வா க³ண்ஹிஸ்ஸாமயேவா’’தி? ‘‘ந ஸக்கா தே³வா’’தி. ‘‘கிம் காரணா’’தி? ‘‘ஸோ ஹத்தி²கந்தம் நாம ஸிப்பம் ஜானாதி, மந்தம் பரிவத்தேத்வா ஹத்தி²கந்தவீணம் வாதே³ந்தோ நாகே³ பலாபேதிபி க³ண்ஹாதிபி. ஹத்தி²வாஹனஸம்பன்னோ தேன ஸதி³ஸோ நாம நத்தீ²’’தி. ‘‘ந ஸக்கா மயா ஸோ க³ஹேது’’ந்தி. ‘‘ஸசே தே, தே³வ, ஏகந்தேன அயம் நிச்ச²யோ, தேன ஹி தா³ருஹத்தி²ம் காரேத்வா தஸ்ஸாஸன்னட்டா²னம் பேஸேஹி. ஸோ ஹத்தி²வாஹனம் வா அஸ்ஸவாஹனம் வா ஸுத்வா தூ³ரம்பி க³ச்ச²தி. தத்த² நம் ஆக³தம் க³ஹேதும் ஸக்கா ப⁴விஸ்ஸதீ’’தி.

ராஜா ‘‘அத்தே²ஸோ உபாயோ’’தி தா³ருமயம் யந்தஹத்தி²ம் காராபேத்வா ப³ஹி பிலோதிகாஹி வேடே²த்வா கதசித்தகம்மம் கத்வா தஸ்ஸ விஜிதே ஆஸன்னட்டா²னே ஏகஸ்மிம் ஸரதீரே விஸ்ஸஜ்ஜாபேஸி. ஹத்தி²னோ அந்தோகுச்சி²யம் ஸட்டி² புரிஸா அபராபரம் சங்கமந்தி, ஹத்தி²லண்ட³ம் ஆஹரித்வா தத்த² தத்த² ச²ட்³டே³ஸும். ஏகோ வனசரகோ ஹத்தி²ம் தி³ஸ்வா, ‘‘அம்ஹாகம் ரஞ்ஞோ அனுச்ச²விகோ’’தி சிந்தேத்வா, க³ந்த்வா ரஞ்ஞோ ஆரோசேஸி – ‘‘தே³வ, மயா ஸப்³ப³ஸேதோ கேலாஸகூடபடிபா⁴கோ³ தும்ஹாகஞ்ஞேவ அனுச்ச²விகோ வரவாரணோ தி³ட்டோ²’’தி. உதேனோ தமேவ மக்³க³தே³ஸகம் கத்வா ஹத்தி²ம் அபி⁴ருய்ஹ ஸபரிவாரோ நிக்க²மி. தஸ்ஸ ஆக³மனம் ஞத்வா சரபுரிஸா க³ந்த்வா சண்ட³பஜ்ஜோதஸ்ஸ ஆரோசேஸும். ஸோ ஆக³ந்த்வா மஜ்ஜே² துச்ச²ம் கத்வா உபோ⁴ஸு பஸ்ஸேஸு ப³லகாயம் பயோஜேஸி. உதேனோ தஸ்ஸாக³மனம் அஜானந்தோ ஹத்தி²ம் அனுப³ந்தி⁴. அந்தோ டி²தமனுஸ்ஸா வேகே³ன பலாபேஸும். கட்ட²ஹத்தீ² ரஞ்ஞோ மந்தம் பரிவத்தேத்வா வீணம் வாதே³ந்தஸ்ஸ தந்திஸத்³த³ம் அஸுணந்தோ விய பலாயதியேவ. ராஜா ஹத்தி²னாக³ம் பாபுணிதும் அஸக்கோந்தோ அஸ்ஸம் ஆருய்ஹ அனுப³ந்தி⁴. தஸ்மிம் வேகே³ன அனுப³ந்த⁴ந்தே ப³லகாயோ ஓஹீயி. ராஜா ஏககோவ அஹோஸி. அத² நம் உபோ⁴ஸு பஸ்ஸேஸு பயுத்தா சண்ட³பஜ்ஜோதஸ்ஸ புரிஸா க³ண்ஹித்வா அத்தனோ ரஞ்ஞோ அத³ம்ஸு. அத²ஸ்ஸ ப³லகாயோ அமித்தவஸம் க³தபா⁴வம் ஞத்வா ப³ஹினக³ரேவ க²ந்தா⁴வாரம் நிவேஸேத்வா அச்சி².

சண்ட³பஜ்ஜோதோபி உதேனம் ஜீவக்³கா³ஹமேவ கா³ஹாபேத்வா ஏகஸ்மிம் சோரகே³ஹே பக்கி²பித்வா த்³வாரம் பித³ஹாபேத்வா தயோ தி³வஸே ஜயபானம் பிவி. உதேனோ ததியதி³வஸே ஆரக்க²கே புச்சி² – ‘‘கஹம் வோ, தாத, ராஜா’’தி? ‘‘‘பச்சாமித்தோ மே க³ஹிதோ’தி ஜயபானம் பிவதீ’’தி. ‘‘கா நாமேஸா மாதுகா³மஸ்ஸ விய தும்ஹாகம் ரஞ்ஞோ கிரியா, நனு படிராஜூனம் க³ஹேத்வா விஸ்ஸஜ்ஜேதும் வா மாரேதும் வா வட்டதி, அம்ஹே து³க்க²ம் நிஸீதா³பேத்வா ஜயபானம் கிர பிவதீ’’தி. தே க³ந்த்வா தமத்த²ம் ரஞ்ஞோ ஆரோசேஸும். ஸோ ஆக³ந்த்வா ‘‘ஸச்சம் கிர த்வம் ஏவம் வத³ஸீ’’தி புச்சி². ‘‘ஆம, மஹாராஜா’’தி. ‘‘ஸாது⁴ தம் விஸ்ஸஜ்ஜேஸ்ஸாமி, ஏவரூபோ கிர தே மந்தோ அத்தி², தம் மய்ஹம் த³ஸ்ஸஸீ’’தி. ‘‘ஸாது⁴ த³ஸ்ஸாமி, க³ஹணஸமயே மம் வந்தி³த்வா தம் க³ண்ஹாஹி. கிம் பன த்வம் வந்தி³ஸ்ஸஸீ’’தி? ‘‘க்யாஹம் தம் வந்தி³ஸ்ஸாமி, ந வந்தி³ஸ்ஸாமீ’’தி? ‘‘அஹம்பி தே ந த³ஸ்ஸாமீ’’தி. ‘‘ஏவம் ஸந்தே ராஜாணம் தே கரிஸ்ஸாமீ’’தி. ‘‘கரோஹி, ஸரீரஸ்ஸ மே இஸ்ஸரோ, ந பன சித்தஸ்ஸா’’தி. ராஜா தஸ்ஸ ஸூரக³ஜ்ஜிதம் ஸுத்வா, ‘‘கத²ம் நு கோ² இமம் மந்தம் க³ண்ஹிஸ்ஸாமீ’’தி சிந்தேத்வா, ‘‘இமம் மந்தம் அஞ்ஞம் ஜானாபேதும் ந ஸக்கா, மம தீ⁴தரம் ஏதஸ்ஸ ஸந்திகே உக்³க³ண்ஹாபேத்வா அஹம் தஸ்ஸா ஸந்திகே க³ண்ஹிஸ்ஸாமீ’’தி. அத² நம் ஆஹ – ‘‘அஞ்ஞஸ்ஸ வந்தி³த்வா க³ண்ஹந்தஸ்ஸ த³ஸ்ஸஸீ’’தி. ‘‘ஆம, மஹாராஜா’’தி. ‘‘தேன ஹி அம்ஹாகம் க⁴ரே ஏகா கு²ஜ்ஜா அத்தி² தஸ்ஸா அந்தோஸாணியம் வந்தி³த்வா நிஸின்னாய த்வம் ப³ஹிஸாணியம் டி²தோவ மந்தம் வாசேஹீ’’தி. ‘‘ஸாது⁴, மஹாராஜ, கு²ஜ்ஜா வா ஹோது பீட²ஸப்பி வா, வந்த³ந்தியா த³ஸ்ஸாமீ’’தி. ததோ ராஜா க³ந்த்வா தீ⁴தரம் வாஸுலத³த்தம் ஆஹ – ‘‘அம்ம, ஏகோ ஸங்க²குட்டீ² அனக்³க⁴மந்தம் ஜானாதி, தம் அஞ்ஞம் ஜானாபேதும் ந ஸக்கா. த்வம் அந்தோஸாணியம் நிஸீதி³த்வா தம் வந்தி³த்வா மந்தம் க³ண்ஹ, ஸோ ப³ஹிஸாணியம் ட²த்வா துய்ஹம் வாசேஸ்ஸதி. தவ ஸந்திகா அஹம் தம் க³ண்ஹிஸ்ஸாமீ’’தி.

ஏவம் ஸோ தேஸம் அஞ்ஞமஞ்ஞம் ஸந்த²வகரணப⁴யேன தீ⁴தரம் கு²ஜ்ஜம், இதரம் ஸங்க²குட்டி²ம் கத்வா கதே²ஸி. ஸோ தஸ்ஸா அந்தோஸாணியம் வந்தி³த்வா நிஸின்னாய ப³ஹி டி²தோ மந்தம் வாசேஸி. அத² நம் ஏகதி³வஸம் புனப்புனம் வுச்சமானம்பி மந்தபத³ம் வத்தும் அஸக்கோந்திம் ‘‘அரே கு²ஜ்ஜே அதிப³ஹலோட்ட²கபோலம் தே முக²ம், ஏவம் நாம வதே³ஹீ’’தி ஆஹ. ‘‘ஸா குஜ்ஜி²த்வா அரே து³ட்ட²ஸங்க²குட்டி² கிம் வதே³ஸி, கிம் மாதி³ஸா கு²ஜ்ஜா நாம ஹோதீ’’தி? ஸாணிகண்ணம் உக்கி²பித்வா ‘‘காஸி த்வ’’ந்தி வுத்தே, ‘‘ரஞ்ஞோ தீ⁴தா வாஸுலத³த்தா நாமாஹ’’ந்தி ஆஹ. ‘‘பிதா தே தம் மய்ஹம் கதே²ந்தோ ‘கு²ஜ்ஜா’தி கதே²ஸீ’’தி. ‘‘மய்ஹம்பி கதே²ந்தோ தம் ஸங்க²குட்டி²ம் கத்வா கதே²ஸீ’’தி. தே உபோ⁴பி ‘‘தேன ஹி அம்ஹாகம் ஸந்த²வகரணப⁴யேன கதி²தம் ப⁴விஸ்ஸதீ’’தி அந்தோஸாணியஞ்ஞேவ ஸந்த²வம் கரிம்ஸு.

ததோ பட்டா²ய மந்தக்³க³ஹணம் வா ஸிப்பக்³க³ஹணம் வா நத்தி². ராஜாபி தீ⁴தரம் நிச்சம் புச்ச²தி – ‘‘ஸிப்பம் க³ண்ஹஸி, அம்மா’’தி? ‘‘க³ண்ஹாமி, தாதா’’தி. அத² நம் ஏகதி³வஸம் உதேனோ ஆஹ – ‘‘ப⁴த்³தே³, ஸாமிகேன கத்தப்³ப³ம் நாம நேவ மாதாபிதரோ ந பா⁴துப⁴கி³னியோ காதும் ஸக்கோந்தி, ஸசே மய்ஹம் ஜீவிதம் த³ஸ்ஸஸி, பஞ்ச தே இத்தி²ஸதானி பரிவாரம் த³த்வா அக்³க³மஹேஸிட்டா²னம் த³ஸ்ஸாமீ’’தி. ‘‘ஸசே இமஸ்மிம் வசனே பதிட்டா²தும் ஸக்கி²ஸ்ஸத², த³ஸ்ஸாமி வோ ஜீவித’’ந்தி. ‘‘ஸக்கி²ஸ்ஸாமி, ப⁴த்³தே³’’தி. ஸா ‘‘ஸாது⁴, ஸாமீ’’தி பிது ஸந்திகம் க³ந்த்வா வந்தி³த்வா ஏகமந்தம் அட்டா²ஸி. அத² நம் ஸோ புச்சி² – ‘‘அம்ம, நிட்டி²தம் ஸிப்ப’’ந்தி? ‘‘ந தாவ நிட்டி²தம், தாத, ஸிப்ப’’ந்தி. அத² நம் ஸோ புச்சி² – ‘‘கிம், அம்மா’’தி? ‘‘அம்ஹாகம் ஏகம் த்³வாரஞ்ச ஏகம் வாஹனஞ்ச லத்³து⁴ம் வட்டதி, தாதா’’தி. ‘‘இத³ம் கிம், அம்மா’’தி? ‘‘தாத, ரத்திம் கிர தாரகஸஞ்ஞாய மந்தஸ்ஸ உபசாரத்தா²ய ஏகம் ஓஸத⁴ம் க³ஹேதப்³ப³ம் அத்தி². தஸ்மா அம்ஹாகம் வேலாய வா அவேலாய வா நிக்க²மனகாலே ஏகம் த்³வாரஞ்சேவ ஏகம் வாஹனஞ்ச லத்³து⁴ம் வட்டதீ’’தி. ராஜா ‘‘ஸாதூ⁴’’தி ஸம்படிச்சி². தே அத்தனோ அபி⁴ருசிதம் ஏகம் த்³வாரம் ஹத்த²க³தம் கரிம்ஸு. ரஞ்ஞோ பன பஞ்ச வாஹனானி அஹேஸும். ப⁴த்³த³வதீ நாம கரேணுகா ஏகதி³வஸம் பஞ்ஞாஸ யோஜனானி க³ச்ச²தி, காகோ நாம தா³ஸோ ஸட்டி² யோஜனானி க³ச்ச²தி, சேலகட்டி² ச முஞ்சகேஸீ சாதி த்³வே அஸ்ஸா யோஜனஸதம் க³ச்ச²ந்தி, நாளாகி³ரி ஹத்தீ² வீஸதி யோஜனஸதந்தி.

ஸோ கிர ராஜா அனுப்பன்னே பு³த்³தே⁴ ஏகஸ்ஸ இஸ்ஸரஸ்ஸ உபட்டா²கோ அஹோஸி. அதே²கதி³வஸம் இஸ்ஸரே ப³ஹினக³ரம் க³ந்த்வா ந்ஹத்வா ஆக³ச்ச²ந்தே ஏகோ பச்சேகபு³த்³தோ⁴ நக³ரம் பிண்டா³ய பவிஸித்வா ஸகலனக³ரவாஸீனம் மாரேன ஆவட்டிதத்தா ஏகம் பி⁴க்கா²ம்பி அலபி⁴த்வா யதா²தோ⁴தேன பத்தேன நிக்க²மி. அத² நம் நக³ரத்³வாரம் பத்தகாலே மாரோ அஞ்ஞாதகவேஸேன உபஸங்கமித்வா, ‘‘அபி, ப⁴ந்தே, வோ கிஞ்சி லத்³த⁴’’ந்தி புச்சி². ‘‘கிம் பன மே த்வம் அலப⁴னாகாரம் கரீ’’தி? ‘‘தேன ஹி நிவத்தித்வா புன பவிஸத², இதா³னி ந கரிஸ்ஸாமீ’’தி. ‘‘நாஹம் புன நிவத்திஸ்ஸாமீ’’தி. ஸசே ஹி நிவத்தேய்ய, புன ஸோ ஸகலனக³ரவாஸீனம் ஸரீரே அதி⁴முஞ்சித்வா பாணிம் பஹரித்வா ஹஸனகேளிம் கரேய்ய. பச்சேகபு³த்³தே⁴ அனிவத்தித்வா க³தே மாரோ தத்தே²வ அந்தரதா⁴யி. அத² ஸோ இஸ்ஸரோ யதா²தோ⁴தேனேவ பத்தேன ஆக³ச்ச²ந்தம் பச்சேகபு³த்³த⁴ம் தி³ஸ்வா வந்தி³த்வா, ‘‘அபி, ப⁴ந்தே, கிஞ்சி லத்³த⁴’’ந்தி புச்சி². ‘‘சரித்வா நிக்க²ந்தம்ஹாவுஸோ’’தி. ஸோ சிந்தேஸி – ‘‘அய்யோ, மயா புச்சி²தம் அகதே²த்வா அஞ்ஞம் வத³தி, ந கிஞ்சி லத்³த⁴ம் ப⁴விஸ்ஸதீ’’தி. அத²ஸ்ஸ பத்தம் ஓலோகேந்தோ துச்ச²ம் தி³ஸ்வா கே³ஹே ப⁴த்தஸ்ஸ நிட்டி²தானிட்டி²தபா⁴வம் அஜானனதாய ஸூரோ ஹுத்வா பத்தம் க³ஹேதும் அவிஸஹந்தோ ‘‘தோ²கம், ப⁴ந்தே, அதி⁴வாஸேதா²’’தி வத்வா வேகே³ன க⁴ரம் க³ந்த்வா ‘‘அம்ஹாகம் ப⁴த்தம் நிட்டி²த’’ந்தி புச்சி²த்வா, ‘‘நிட்டி²த’’ந்தி வுத்தே தம் உபட்டா²கம் ஆஹ – ‘‘தாத, அஞ்ஞோ தயா ஸம்பன்னவேக³தரோ நாம நத்தி², ஸீகே⁴ன ஜவேன ப⁴த³ந்தம் பத்வா ‘பத்தம் மே, ப⁴ந்தே, தே³தா²’தி வத்வா பத்தம் க³ஹேத்வா வேகே³ன ஏஹீ’’தி. ஸோ ஏகவசனேனேவ பக்க²ந்தி³த்வா பத்தம் க³ஹேத்வா ஆஹரி. இஸ்ஸரோபி அத்தனோ போ⁴ஜனஸ்ஸ பத்தம் பூரேத்வா ‘‘இமம் ஸீக⁴ம் க³ந்த்வா அய்யஸ்ஸ ஸம்பாதே³ஹி, அஹம் தே இதோ பத்திம் த³ம்மீ’’தி ஆஹ.

ஸோபி தம் க³ஹேத்வா ஜவேன க³ந்த்வா பச்சேகபு³த்³த⁴ஸ்ஸ பத்தம் த³த்வா பஞ்சபதிட்டி²தேன வந்தி³த்வா, ‘‘ப⁴ந்தே, ‘வேலா உபகட்டா²’தி அஹம் அதிஸீகே⁴ன ஜவேன ஆக³தோ ச க³தோ ச, ஏதஸ்ஸ மே ஜவஸ்ஸ ப²லேன யோஜனானம் பண்ணாஸஸட்டி²ஸதவீஸஸதக³மனஸமத்தா²னி பஞ்ச வாஹனானி நிப்³ப³த்தந்து, ஆக³ச்ச²ந்தஸ்ஸ ச மே க³ச்ச²ந்தஸ்ஸ ச ஸரீரம் ஸூரியதேஜேன தத்த²ம், தஸ்ஸ மே ப²லேன நிப்³ப³த்தனிப்³ப³த்தட்டா²னே ஆணா ஸூரியதேஜஸதி³ஸா ஹோது, இமஸ்மிம் மே பிண்ட³பாதே ஸாமினா பத்தி தி³ன்னா, தஸ்ஸா மே நிஸ்ஸந்தே³ன தும்ஹேஹி தி³ட்ட²த⁴ம்மஸ்ஸ பா⁴கீ³ ஹோமீ’’தி ஆஹ. பச்சேகபு³த்³தோ⁴ ‘‘ஏவம் ஹோதூ’’தி வத்வா –

‘‘இச்சி²தம் பத்தி²தம் துய்ஹம், ஸப்³ப³மேவ ஸமிஜ்ஜ²து;

ஸப்³பே³ பூரேந்து ஸங்கப்பா, சந்தோ³ பன்னரஸோ யதா². (தீ³. நி. அட்ட². 2.95 புப்³பூ³பனிஸ்ஸயஸம்பத்திகதா²; அ. நி. அட்ட². 1.1. 192);

‘‘இச்சி²தம் பத்தி²தம் துய்ஹம், கி²ப்பமேவ ஸமிஜ்ஜ²து;

ஸப்³பே³ பூரேந்து ஸங்கப்பா, மணிஜோதிரஸோ யதா²’’தி. –

அனுமோத³னம் அகாஸி. பச்சேகபு³த்³தா⁴னம் கிர இதா⁴வ த்³வே கா³தா² அனுமோத³னகா³தா² நாம ஹோந்தி. தத்த² ஜோதிரஸோதி ஸப்³ப³காமத³த³ம் மணிரதனம் வுச்சதி. இத³ம் தஸ்ஸ புப்³ப³சரிதம். ஸோ ஏதரஹி சண்ட³பஜ்ஜோதோ அஹோஸி. தஸ்ஸ ச கம்மஸ்ஸ நிஸ்ஸந்தே³ன இமானி பஞ்ச வாஹனானி நிப்³ப³த்திம்ஸு. அதே²கதி³வஸம் ராஜா உய்யானகீளாய நிக்க²மி. உதேனோ ‘‘அஜ்ஜ பலாயிதப்³ப³’’ந்தி மஹந்தாமஹந்தே சம்மபஸிப்³ப³கே ஹிரஞ்ஞஸுவண்ணஸ்ஸ பூரேத்வா கரேணுகாபிட்டே² ட²பேத்வா வாஸுலத³த்தம் ஆதா³ய பலாயி. அந்தேபுரபாலகா பலாயந்தம் தம் தி³ஸ்வா க³ந்த்வா ரஞ்ஞோ ஆரோசேஸும். ராஜா ‘‘ஸீக⁴ம் க³ச்ச²தா²’’தி ப³லம் பஹிணி. உதேனோ ப³லஸ்ஸ பக்க²ந்த³பா⁴வம் ஞத்வா கஹாபணபஸிப்³ப³கம் மோசேத்வா பாதேஸி, மனுஸ்ஸா கஹாபணே உச்சினித்வா புன பக்க²ந்தி³ம்ஸு. இதரோ ஸுவண்ணபஸிப்³ப³கம் மோசேத்வா பாதேத்வா நேஸம் ஸுவண்ணலோபே⁴ன பபஞ்சேந்தானஞ்ஞேவ ப³ஹி நிவுட்ட²ம் அத்தனோ க²ந்தா⁴வாரம் பாபுணி. அத² நம் ஆக³ச்ச²ந்தம் தி³ஸ்வாவ அத்தனோ ப³லகாயோ பரிவாரேத்வா நக³ரம் பவேஸேஸி. ஸோ பத்வாவ வாஸுலத³த்தம் அபி⁴ஸிஞ்சித்வா அக்³க³மஹேஸிட்டா²னே ட²பேஸீதி. அயம் வாஸுலத³த்தாய உப்பத்தி.

அபரா பன மாக³ண்டி³யா நாம ரஞ்ஞோ ஸந்திகா அக்³க³மஹேஸிட்டா²னம் லபி⁴. ஸா கிர குருரட்டே² மாக³ண்டி³யப்³ராஹ்மணஸ்ஸ தீ⁴தா. மாதாபிஸ்ஸா மாக³ண்டி³யாயேவ நாமம். சூளபிதாபிஸ்ஸா மாக³ண்டி³யோவ, ஸா அபி⁴ரூபா அஹோஸி தே³வச்ச²ரபடிபா⁴கா³. பிதா பனஸ்ஸா அனுச்ச²விகம் ஸாமிகம் அலப⁴ந்தோ மஹந்தேஹி மஹந்தேஹி குலேஹி யாசிதோபி ‘‘ந மய்ஹம் தீ⁴து தும்ஹே அனுச்ச²விகா’’தி தஜ்ஜேத்வா உய்யோஜேஸி. அதே²கதி³வஸம் ஸத்தா² பச்சூஸஸமயே லோகம் வோலோகேந்தோ மாக³ண்டி³யப்³ராஹ்மணஸ்ஸ ஸபஜாபதிகஸ்ஸ அனாகா³மிப²லூபனிஸ்ஸயம் தி³ஸ்வா அத்தனோ பத்தசீவரமாதா³ய தஸ்ஸ ப³ஹினிக³மே அக்³கி³பரிசரணட்டா²னம் அக³மாஸி. ஸோ ததா²க³தஸ்ஸ ரூபஸோப⁴க்³க³ப்பத்தம் அத்தபா⁴வம் ஓலோகேத்வா, ‘‘இமஸ்மிம் லோகே இமினா புரிஸேன ஸதி³ஸோ அஞ்ஞோ புரிஸோ நாம நத்தி², அயம் மய்ஹம் தீ⁴து அனுச்ச²விகோ, இமஸ்ஸ போஸாபனத்தா²ய தீ⁴தரம் த³ஸ்ஸாமீ’’தி சிந்தேத்வா, ‘‘ஸமண, ஏகா மே தீ⁴தா அத்தி², அஹம் ஏத்தகம் காலம் தஸ்ஸா அனுச்ச²விகம் புரிஸம் ந பஸ்ஸாமி, தும்ஹே தஸ்ஸா அனுச்ச²விகா, ஸா ச தும்ஹாகஞ்ஞேவ அனுச்ச²விகா. தும்ஹாகஞ்ஹி பாத³பரிசாரிகா, தஸ்ஸா ச ப⁴த்தா லத்³து⁴ம் வட்டதி, தம் வோ அஹம் த³ஸ்ஸாமி, யாவ மமாக³மனா இதே⁴வ திட்ட²தா²’’தி ஆஹ. ஸத்தா² கிஞ்சி அவத்வா துண்ஹீ அஹோஸி. ப்³ராஹ்மணோ வேகே³ன க⁴ரம் க³ந்த்வா, ‘‘போ⁴தி, போ⁴தி தீ⁴து மே அனுச்ச²விகோ புரிஸோ தி³ட்டோ², ஸீக⁴ம் ஸீக⁴ம் நம் அலங்கரோஹீ’’தி தம் அலங்காராபேத்வா ஸத்³தி⁴ம் ப்³ராஹ்மணியா ஆதா³ய ஸத்து² ஸந்திகம் பாயாஸி. ஸகலனக³ரம் ஸங்கு²பி⁴. அயம் ‘‘ஏத்தகம் காலம் மய்ஹம் தீ⁴து அனுச்ச²விகோ நத்தீ²’’தி கஸ்ஸசி அத³த்வா ‘‘அஜ்ஜ மே தீ⁴து அனுச்ச²விகோ தி³ட்டோ²’’தி கிர வதே³தி, ‘‘கீதி³ஸோ நு கோ² ஸோ புரிஸோ, பஸ்ஸிஸ்ஸாம ந’’ந்தி மஹாஜனோ தேனேவ ஸத்³தி⁴ம் நிக்க²மி.

தஸ்மிம் தீ⁴தரம் க³ஹேத்வா ஆக³ச்ச²ந்தே ஸத்தா² தேன வுத்தட்டா²னே அட்ட²த்வா தத்த² பத³சேதியம் த³ஸ்ஸேத்வா க³ந்த்வா அஞ்ஞஸ்மிம் டா²னே அட்டா²ஸி. பு³த்³தா⁴னஞ்ஹி பத³சேதியம் அதி⁴ட்ட²ஹித்வா அக்கந்தட்டா²னேயேவ பஞ்ஞாயதி, ந அஞ்ஞத்த². யேஸஞ்சத்தா²ய அதி⁴ட்டி²தம் ஹோதி, தேயேவ நம் பஸ்ஸந்தி. தேஸம் பன அத³ஸ்ஸனகரணத்த²ம் ஹத்தி²ஆத³யோ வா அக்கமந்து, மஹாமேகோ⁴ வா பவஸ்ஸது, வேரம்ப⁴வாதா வா பஹரந்து, ந தம் கோசி மக்கே²தும் ஸக்கோதி. அத² ப்³ராஹ்மணீ ப்³ராஹ்மணம் ஆஹ – ‘‘குஹிம் ஸோ புரிஸோ’’தி. ‘‘‘இமஸ்மிம் டா²னே திட்டா²ஹீ’தி நம் அவசம், குஹிம் நு கோ² ஸோ க³தோ’’தி இதோ சிதோ ஓலோகேந்தோ பத³சேதியம் தி³ஸ்வா ‘‘அயமஸ்ஸ பத³வலஞ்ஜோ’’தி ஆஹ. ப்³ராஹ்மணீ ஸலக்க²ணமந்தானம் திண்ணம் வேதா³னம் பகு³ணதாய லக்க²ணமந்தே பரிவத்தேத்வா பத³லக்க²ணம் உபதா⁴ரேத்வா, ‘‘நயித³ம், ப்³ராஹ்மண, பஞ்சகாமகு³ணஸேவினோ பத³’’ந்தி வத்வா இமம் கா³த²மாஹ –

‘‘ரத்தஸ்ஸ ஹி உக்குடிகம் பத³ம் ப⁴வே,

து³ட்ட²ஸ்ஸ ஹோதி ஸஹஸானுபீளிதம்;

மூள்ஹஸ்ஸ ஹோதி அவகட்³டி⁴தம் பத³ம்,

விவட்டச்ச²த³ஸ்ஸ இத³மீதி³ஸம் பத³’’ந்தி. (அ. நி. அட்ட². 1.1.260-261; விஸுத்³தி⁴. 1.45);

அத² நம் ப்³ராஹ்மணோ ஏவமாஹ – ‘‘போ⁴தி த்வம் உத³கபாதியம் கும்பீ⁴லம், கே³ஹமஜ்ஜே² ச பன சோரம் விய மந்தே பஸ்ஸனஸீலா, துண்ஹீ ஹோஹீ’’தி. ப்³ராஹ்மண, யம் இச்ச²ஸி, தம் வதே³ஹி, நயித³ம் பஞ்சகாமகு³ணஸேவினோ பத³ந்தி. ததோ இதோ சிதோ ச ஓலோகேந்தோ ஸத்தா²ரம் தி³ஸ்வா, ‘‘அயம் ஸோ புரிஸோ’’தி வத்வா ப்³ராஹ்மணோ க³ந்த்வா, ‘‘ஸமண, தீ⁴தரம் மே தவ போஸாபனத்தா²ய தே³மீ’’தி ஆஹ. ஸத்தா² ‘‘தீ⁴தரா தே மய்ஹம் அத்தோ² அத்தி² வா நத்தி² வா’’தி அவத்வாவ, ‘‘ப்³ராஹ்மண, ஏகம் தே காரணம் கதே²மீ’’தி வத்வா, ‘‘கதே²ஹி ஸமணா’’தி வுத்தே மஹாபி⁴னிக்க²மனதோ பட்டா²ய யாவ அஜபாலனிக்³ரோத⁴மூலா மாரேன அனுப³த்³த⁴பா⁴வம் அஜபாலனிக்³ரோத⁴மூலே ச பன ‘‘அதீதோ தா³னி மே ஏஸ விஸய’’ந்தி தஸ்ஸ ஸோகாதுரஸ்ஸ ஸோகவூபஸமனத்த²ம் ஆக³தாஹி மாரதீ⁴தாஹி குமாரிகவண்ணாதி³வஸேன பயோஜிதம் பலோப⁴னம் ஆசிக்கி²த்வா, ‘‘ததா³பி மய்ஹம் ச²ந்தோ³ நாஹோஸீ’’தி வத்வா –

‘‘தி³ஸ்வான தண்ஹம் அரதிம் ரக³ஞ்ச,

நாஹோஸி ச²ந்தோ³ அபி மேது²னஸ்மிம்;

கிமேவித³ம் முத்தகரீஸபுண்ணம்,

பாதா³பி நம் ஸம்பு²ஸிதும் ந இச்சே²’’தி. (அ. நி. அட்ட². 1.1.260-261; ஸு. நி. 841) –

இமம் கா³த²மாஹ. கா³தா²பரியோஸானே ப்³ராஹ்மணோ ச ப்³ராஹ்மணீ ச அனாகா³மிப²லே பதிட்ட²ஹிம்ஸு. மாக³ண்டி³யாபி கோ² ‘‘ஸசஸ்ஸ மயா அத்தோ² நத்தி², அனத்தி²கபா⁴வோவ வத்தப்³போ³, அயம் பன மம் முத்தகரீஸபுண்ணம் கரோதி, பாதா³பி நம் ஸம்பு²ஸிதும் ந இச்சே²தி, ஹோது, அத்தனோ ஜாதிகுலபதே³ஸபோ⁴க³யஸவயஸம்பத்திம் ஆக³ம்ம ததா²ரூபம் ப⁴த்தாரம் லபி⁴த்வா ஸமணஸ்ஸ கோ³தமஸ்ஸ கத்தப்³ப³யுத்தகம் ஜானிஸ்ஸாமீ’’தி ஸத்த²ரி ஆகா⁴தம் ப³ந்தி⁴. ‘‘கிம் பன ஸத்தா² தாய அத்தனி ஆகா⁴துப்பத்திம் ஜானாதி, நோ’’தி? ‘‘ஜானாதியேவ. ஜானந்தோ கஸ்மா கா³த²மாஹா’’தி? இதரேஸம் த்³வின்னம் வஸேன. பு³த்³தா⁴ ஹி ஆகா⁴தம் அக³ணேத்வா மக்³க³ப²லாதி⁴க³மாரஹானம் வஸேன த⁴ம்மம் தே³ஸேந்தியேவ. மாதாபிதரோ தம் நேத்வா சூளமாக³ண்டி³யம் கனிட்ட²ம் படிச்சா²பேத்வா பப்³ப³ஜித்வா அரஹத்தம் பாபுணிம்ஸு. சூளமாக³ண்டி³யோபி சிந்தேஸி – ‘‘மம தீ⁴தா ஓமகஸத்தஸ்ஸ ந அனுச்ச²விகா, ஏகஸ்ஸ ரஞ்ஞோவ அனுச்ச²விகா’’தி. தம் ஆதா³ய கோஸம்பி³ம் க³ந்த்வா ஸப்³பா³லங்காரேஹி அலங்கரித்வா, ‘‘இமம் இத்தி²ரதனம் தே³வஸ்ஸ அனுச்ச²விக’’ந்தி உதேனஸ்ஸ ரஞ்ஞோ அதா³ஸி. ஸோ தம் தி³ஸ்வாவ உப்பன்னப³லவஸினேஹோ அபி⁴ஸேகம் கத்வா பஞ்சஸதமாதுகா³மபரிவாரம் த³த்வா அக்³க³மஹேஸிட்டா²னே ட²பேஸி. அயம் மாக³ண்டி³யாய உப்பத்தி.

ஏவமஸ்ஸ தி³யட்³ட⁴ஸஹஸ்ஸனாடகித்தி²பரிவாரா திஸ்ஸோ அக்³க³மஹேஸியோ அஹேஸும். தஸ்மிம் கோ² பன ஸமயே கோ⁴ஸகஸேட்டி² குக்குடஸேட்டி² பாவாரிகஸேட்டீ²தி கோஸம்பி³யம் தயோ ஸேட்டி²னோ ஹோந்தி. தே உபகட்டா²ய வஸ்ஸூபனாயிகாய பஞ்சஸததாபஸே ஹிமவந்ததோ ஆக³ந்த்வா நக³ரே பி⁴க்கா²ய சரந்தே தி³ஸ்வா பஸீதி³த்வா நிஸீதா³பேத்வா போ⁴ஜேத்வா படிஞ்ஞம் க³ஹேத்வா சத்தாரோ மாஸே அத்தனோ ஸந்திகே வஸாபேத்வா புன வஸ்ஸாரத்தே ஆக³மனத்தா²ய படிஜானாபேத்வா உய்யோஜேஸும். தாபஸாபி ததோ பட்டா²ய அட்ட² மாஸே ஹிமவந்தே வஸித்வா சத்தாரோ மாஸே தேஸம் ஸந்திகே வஸிம்ஸு. தே அபரபா⁴கே³ ஹிமவந்ததோ ஆக³ச்ச²ந்தா அரஞ்ஞாயதனே ஏகம் மஹானிக்³ரோத⁴ம் தி³ஸ்வா தஸ்ஸ மூலே நிஸீதி³ம்ஸு. தேஸு ஜேட்ட²கதாபஸோ சிந்தேஸி – ‘‘இமஸ்மிம் ருக்கே² அதி⁴வத்தா² தே³வதா ஓரமத்திகா ந ப⁴விஸ்ஸதி, மஹேஸக்கே²னேவேத்த² தே³வராஜேன ப⁴விதப்³ப³ம், ஸாது⁴ வத ஸசாயம் இஸிக³ணஸ்ஸ பானீயம் த³தே³ய்யா’’தி. ஸோபி பானீயம் அதா³ஸி. தாபஸோ ந்ஹானோத³கம் சிந்தேஸி, தம்பி அதா³ஸி. ததோ போ⁴ஜனம் சிந்தேஸி, தம்பி அதா³ஸி. அத²ஸ்ஸ ஏதத³ஹோஸி – ‘‘அயம் தே³வராஜா அம்ஹேஹி சிந்திதம் சிந்திதம் ஸப்³ப³ம் தே³தி, அஹோ வத நம் பஸ்ஸேய்யாமா’’தி. ஸோ ருக்க²க்க²ந்த⁴ம் பதா³லேத்வா அத்தானம் த³ஸ்ஸேஸி. அத² நம் தாபஸா, ‘‘தே³வராஜ, மஹதீ தே ஸம்பத்தி, கிம் நு கோ² கத்வா அயம் தே லத்³தா⁴’’தி புச்சி²ம்ஸு. ‘‘மா புச்ச²த², அய்யா’’தி. ‘‘ஆசிக்க², தே³வராஜா’’தி. ஸோ அத்தனா கதகம்மஸ்ஸ பரித்தகத்தா லஜ்ஜமானோ கதே²தும் ந விஸஹி. தேஹி புனப்புனம் நிப்பீளியமானோ பன ‘‘தேன ஹி ஸுணாதா²’’தி வத்வா கதே²ஸி.

ஸோ கிரேகோ து³க்³க³தமனுஸ்ஸோ ஹுத்வா ப⁴திம் பரியேஸந்தோ அனாத²பிண்டி³கஸ்ஸ ஸந்திகே ப⁴திகம்மம் லபி⁴த்வா தம் நிஸ்ஸாய ஜீவிகம் கப்பேஸி. அதே²கஸ்மிம் உபோஸத²தி³வஸே ஸம்பத்தே அனாத²பிண்டி³கோ விஹாரதோ ஆக³ந்த்வா புச்சி² – ‘‘தஸ்ஸ ப⁴திகஸ்ஸ அஜ்ஜுபோஸத²தி³வஸபா⁴வோ கேனசி கதி²தோ’’தி? ‘‘ந கதி²தோ, ஸாமீ’’தி. ‘‘தேன ஹிஸ்ஸ ஸாயமாஸம் பசதா²’’தி. அத²ஸ்ஸ பத்தோ²த³னம் பசிம்ஸு. ஸோ தி³வஸம் அரஞ்ஞே கம்மம் கத்வா ஸாயம் ஆக³ந்த்வா ப⁴த்தே வட்³டே⁴த்வா தி³ன்னே ‘‘சா²தோம்ஹீ’’தி ஸஹஸா அபு⁴ஞ்ஜித்வாவ ‘‘அஞ்ஞேஸு தி³வஸேஸு இமஸ்மிம் கே³ஹே ‘ப⁴த்தம் தே³த², ஸூபம் தே³த², ப்³யஞ்ஜனம் தே³தா²’தி மஹாகோலாஹலம் அஹோஸி, அஜ்ஜ தே ஸப்³பே³ நிஸ்ஸத்³தா³ நிபஜ்ஜிம்ஸு, மய்ஹமேவ ஏகஸ்ஸாஹாரம் வட்³ட⁴யிம்ஸு, கிம் நு கோ² ஏத’’ந்தி சிந்தேத்வா புச்சி² – ‘‘அவஸேஸா பு⁴ஞ்ஜிம்ஸு, ந பு⁴ஞ்ஜிம்ஸூ’’தி? ‘‘ந பு⁴ஞ்ஜிம்ஸு, தாதா’’தி. ‘‘கிம் காரணா’’தி? இமஸ்மிம் கே³ஹே உபோஸத²தி³வஸேஸு ஸாயமாஸம் ந பு⁴ஞ்ஜந்தி, ஸப்³பே³வ உபோஸதி²கா ஹோந்தி. அந்தமஸோ த²னபாயினோபி தா³ரகே முக²ம் விக்கா²லாபேத்வா சதுமது⁴ரம் முகே² பக்கி²பாபேத்வா மஹாஸேட்டி² உபோஸதி²கே காரேதி. க³ந்த⁴தேலப்பதீ³பே ஜாலந்தே கு²த்³த³கமஹல்லகதா³ரகா ஸயனக³தா த்³வத்திம்ஸாகாரம் ஸஜ்ஜா²யந்தி. துய்ஹம் பன உபோஸத²தி³வஸபா⁴வம் கதே²தும் ஸதிம் ந கரிம்ஹா. தஸ்மா தவேவ ப⁴த்தம் பக்கம், நம் பு⁴ஞ்ஜஸ்ஸூதி. ஸசே இதா³னி உபோஸதி²கேன ப⁴விதும் வட்டதி, அஹம்பி ப⁴வேய்யந்தி. ‘‘இத³ம் ஸேட்டி² ஜானாதீ’’தி. ‘‘தேன ஹி நம் புச்ச²தா²’’தி. தே க³ந்த்வா ஸேட்டி²ம் புச்சி²ம்ஸு. ஸோ ஏவமாஹ – ‘‘இதா³னி பன அபு⁴ஞ்ஜித்வா முக²ம் விக்கா²லேத்வா உபோஸத²ங்கா³னி அதி⁴ட்ட²ஹந்தோ உபட்³ட⁴ம் உபோஸத²கம்மம் லபி⁴ஸ்ஸதீ’’தி. இதரோ தம் ஸுத்வா ததா² அகாஸி.

தஸ்ஸ ஸகலதி³வஸம் கம்மம் கத்வா சா²தஸ்ஸ ஸரீரே வாதா குப்பிம்ஸு. ஸோ யோத்தேன உரம் ப³ந்தி⁴த்வா யோத்தகோடியம் க³ஹேத்வா பரிவத்ததி. ஸேட்டி² தம் பவத்திம் ஸுத்வா உக்காஹி தா⁴ரியமானாஹி சதுமது⁴ரம் கா³ஹாபேத்வா தஸ்ஸ ஸந்திகம் ஆக³ந்த்வா, ‘‘கிம், தாதா’’தி புச்சி². ‘‘ஸாமி, வாதா மே குப்பிதா’’தி. ‘‘தேன ஹி உட்டா²ய இத³ம் பே⁴ஸஜ்ஜம் கா²தா³ஹீ’’தி. ‘‘தும்ஹேபி கா²த³த², ஸாமீ’’தி. ‘‘அம்ஹாகம் அபா²ஸுகம் நத்தி², த்வம் கா²தா³ஹீ’’தி. ‘‘ஸாமி, அஹம் உபோஸத²கம்மம் கரோந்தோ ஸகலம் காதும் நாஸக்கி²ம், உபட்³ட⁴கம்மம்பி மே விகலம் மா அஹோஸீ’’தி ந இச்சி². ‘‘மா ஏவம் கரி, தாதா’’தி வுச்சமானோபி அனிச்சி²த்வா அருணே உட்ட²ஹந்தே மிலாதமாலா விய காலம் கத்வா தஸ்மிம் நிக்³ரோத⁴ருக்கே² தே³வதா ஹுத்வா நிப்³ப³த்தி. தஸ்மா இமமத்த²ம் கதே²த்வா ‘‘ஸோ ஸேட்டி² பு³த்³த⁴மாமகோ, த⁴ம்மமாமகோ, ஸங்க⁴மாமகோ, தம் நிஸ்ஸாய கதஸ்ஸ உபட்³டு⁴போஸத²கம்மஸ்ஸ நிஸ்ஸந்தே³னேஸா ஸம்பத்தி மயா லத்³தா⁴’’தி ஆஹ.

‘‘பு³த்³தோ⁴’’தி வசனம் ஸுத்வாவ பஞ்சஸதா தாபஸா உட்டா²ய தே³வதாய அஞ்ஜலிம் பக்³க³ய்ஹ ‘‘பு³த்³தோ⁴தி வதே³ஸி, பு³த்³தோ⁴தி வதே³ஸீ’’தி புச்சி²த்வா, ‘‘பு³த்³தோ⁴தி வதா³மி, பு³த்³தோ⁴தி வதா³மீ’’தி திக்க²த்தும் படிஜானாபேத்வா ‘‘கோ⁴ஸோபி கோ² ஏஸோ து³ல்லபோ⁴ லோகஸ்மி’’ந்தி உதா³னம் உதா³னேத்வா ‘‘தே³வதே அனேகேஸு கப்பஸதஸஹஸ்ஸேஸு அஸுதபுப்³ப³ம் ஸத்³த³ம் தயா ஸுணாபிதம்ஹா’’தி ஆஹம்ஸு. அத² அந்தேவாஸினோ ஆசரியம் ஏதத³வோசும் – ‘‘தேன ஹி ஸத்து² ஸந்திகம் க³ச்சா²மா’’தி. ‘‘தாதா, தயோ ஸேட்டி²னோ அம்ஹாகம் ப³ஹூபகாரா, ஸ்வே தேஸம் நிவேஸனே பி⁴க்க²ம் க³ண்ஹித்வா தேஸம்பி ஆசிக்கி²த்வா க³மிஸ்ஸாம, அதி⁴வாஸேத², தாதா’’தி. தே அதி⁴வாஸயிம்ஸு. புனதி³வஸே ஸேட்டி²னோ யாகு³ப⁴த்தம் ஸம்பாதே³த்வா ஆஸனானி பஞ்ஞாபேத்வா ‘‘அஜ்ஜ நோ அய்யானம் ஆக³மனதி³வஸோ’’தி ஞத்வா பச்சுக்³க³மனம் கத்வா தே ஆதா³ய நிவேஸனம் க³ந்த்வா நிஸீதா³பேத்வா பி⁴க்க²ம் அத³ம்ஸு. தே கதப⁴த்தகிச்சா மஹாஸேட்டி²னோ ‘‘மயம் க³மிஸ்ஸாமா’’தி வதி³ம்ஸு. ‘‘நனு, ப⁴ந்தே, தும்ஹேஹி சத்தாரோ வஸ்ஸிகே மாஸே அம்ஹாகம் க³ஹிதாவ படிஞ்ஞா, இதா³னி குஹிம் க³ச்ச²தா²’’தி? ‘‘லோகே கிர பு³த்³தோ⁴ உப்பன்னோ, த⁴ம்மோ உப்பன்னோ, ஸங்கோ⁴ உப்பன்னோ, தஸ்மா ஸத்து² ஸந்திகம் க³மிஸ்ஸாமா’’தி. ‘‘கிம் பன தஸ்ஸ ஸத்து²னோ ஸந்திகம் தும்ஹாகஞ்ஞேவ க³ந்தும் வட்டதீ’’தி? ‘‘அஞ்ஞேஸம்பி அவாரிதம், ஆவுஸோ’’தி. ‘‘தேன ஹி, ப⁴ந்தே, ஆக³மேத², மயம்பி க³மனபரிவச்ச²ம் கத்வா க³ச்சா²மா’’தி. ‘‘தும்ஹேஸு பரிவச்ச²ம் கரோந்தேஸு அம்ஹாகம் பபஞ்சோ ஹோதி, மயம் புரதோ க³ச்சா²ம, தும்ஹே பச்சா² ஆக³ச்சே²ய்யாதா²’’தி வத்வா தே புரேதரம் க³ந்த்வா ஸம்மாஸம்பு³த்³த⁴ம் தி³ஸ்வா அபி⁴த்த²வித்வா வந்தி³த்வா ஏகமந்தம் நிஸீதி³ம்ஸு. அத² நேஸம் ஸத்தா² அனுபுப்³பி³ம் கத²ம் கதே²த்வா த⁴ம்மம் தே³ஸேஸி. தே³ஸனாபரியோஸானே ஸப்³பே³பி ஸஹ படிஸம்பி⁴தா³ஹி அரஹத்தம் பத்வா பப்³ப³ஜ்ஜம் யாசித்வா ‘‘ஏத², பி⁴க்க²வோ’’தி வசனஸமனந்தரம்யேவ இத்³தி⁴மயபத்தசீவரத⁴ரா ஏஹிபி⁴க்கூ² அஹேஸும்.

தேபி கோ² தயோ ஸேட்டி²னோ பஞ்சஹி பஞ்சஹி ஸகடஸதேஹி ப⁴த்தச்சா²த³னஸப்பிமது⁴பா²ணிதாதீ³னி தா³னூபகரணானி ஆதா³ய ஸாவத்தி²ம் பத்வா ஸத்தா²ரம் வந்தி³த்வா த⁴ம்மகத²ம் ஸுத்வா கதா²பரியோஸானே ஸோதாபத்திப²லே பதிட்டா²ய அத்³த⁴மாஸமத்தம்பி தா³னம் த³த³மானா ஸத்து² ஸந்திகே வஸித்வா கோஸம்பி³ம் ஆக³மனத்தா²ய ஸத்தா²ரம் யாசித்வா ஸத்தா²ரா படிஞ்ஞம் த³த³ந்தேன ‘‘ஸுஞ்ஞாகா³ரே கோ² க³ஹபதயோ ததா²க³தா அபி⁴ரமந்தீ’’தி வுத்தே, ‘‘அஞ்ஞாதம், ப⁴ந்தே, அம்ஹேஹி பஹிதஸாஸனேன ஆக³ந்தும் வட்டதீ’’தி வத்வா கோஸம்பி³ம் க³ந்த்வா கோ⁴ஸகஸேட்டி² கோ⁴ஸிதாராமம், குக்குடஸேட்டி² குக்குடாராமம், பாவாரிகஸேட்டி² பாவாரிகாராமந்தி தயோ மஹாவிஹாரே காரேத்வா ஸத்து² ஆக³மனத்தா²ய ஸாஸனம் பஹிணிம்ஸு. ஸத்தா² தேஸம் ஸாஸனம் ஸுத்வா தத்த² அக³மாஸி. தே பச்சுக்³க³ந்த்வா ஸத்தா²ரம் விஹாரம் பவேஸேத்வா வாரேன வாரேன படிஜக்³க³ந்தி. ஸத்தா² தே³வஸிகம் ஏகேகஸ்மிம் விஹாரே வஸதி. யஸ்ஸ விஹாரே வுட்டோ² ஹோதி, தஸ்ஸேவ க⁴ரத்³வாரே பிண்டா³ய சரதி. தேஸம் பன திண்ணம் ஸேட்டீ²னம் உபட்டா²கோ ஸுமனோ நாம மாலாகாரோ அஹோஸி. ஸோ தே ஸேட்டி²னோ ஏவமாஹ – ‘‘அஹம் தும்ஹாகம் தீ³க⁴ரத்தம் உபகாரகோ, ஸத்தா²ரம் போ⁴ஜேதுகாமோம்ஹி, மய்ஹம்பி ஏகதி³வஸம் ஸத்தா²ரம் தே³தா²’’தி. ‘‘தேன ஹி ப⁴ணே ஸ்வே போ⁴ஜேஹீ’’தி. ‘‘ஸாது⁴, ஸாமீ’’தி ஸோ ஸத்தா²ரம் நிமந்தேத்வா ஸக்காரம் படியாதே³ஸி.

ததா³ ராஜா ஸாமாவதியா தே³வஸிகம் புப்ப²மூலே அட்ட² கஹாபணே தே³தி. தஸ்ஸா கு²ஜ்ஜுத்தரா நாம தா³ஸீ ஸுமனமாலாகாரஸ்ஸ ஸந்திகம் க³ந்த்வா நிப³த்³த⁴ம் புப்பா²னி க³ண்ஹாதி. அத² நம் தஸ்மிம் தி³வஸே ஆக³தம் மாலாகாரோ ஆஹ – ‘‘மயா ஸத்தா² நிமந்திதோ, அஜ்ஜ புப்பே²ஹி ஸத்தா²ரம் பூஜேஸ்ஸாமி, திட்ட² தாவ, த்வம் பரிவேஸனாய ஸஹாயிகா ஹுத்வா த⁴ம்மம் ஸுத்வா அவஸேஸானி புப்பா²னி க³ஹேத்வா க³மிஸ்ஸஸீ’’தி. ஸா ‘‘ஸாதூ⁴’’தி அதி⁴வாஸேஸி. ஸுமனோ பு³த்³த⁴ப்பமுக²ம் பி⁴க்கு²ஸங்க⁴ம் பரிவிஸித்வா அனுமோத³னகரணத்தா²ய பத்தம் அக்³க³ஹேஸி. ஸத்தா² அனுமோத³னத⁴ம்மதே³ஸனம் ஆரபி⁴. கு²ஜ்ஜுத்தராபி ஸத்து² த⁴ம்மகத²ம் ஸுணந்தீயேவ ஸோதாபத்திப²லே பதிட்ட²ஹி. ஸா அஞ்ஞேஸு தி³வஸேஸு சத்தாரோ கஹாபணே அத்தனோ க³ஹேத்வா சதூஹி புப்பா²னி க³ஹேத்வா க³ச்ச²தி, தம் தி³வஸம் அட்ட²ஹிபி புப்பா²னி க³ஹேத்வா க³தா. அத² நம் ஸாமாவதீ ஆஹ – ‘‘கிம் நு கோ², அம்ம, அஜ்ஜ அம்ஹாகம் ரஞ்ஞா த்³விகு³ணம் புப்ப²மூலம் தி³ன்ன’’ந்தி? ‘‘நோ, அய்யே’’தி. ‘‘அத² கஸ்மா ப³ஹூனி புப்பா²னீ’’தி? ‘‘அஞ்ஞேஸு தி³வஸேஸு அஹம் சத்தாரோ கஹாபணே அத்தனோ க³ஹேத்வா சதூஹி புப்பா²னி ஆஹராமீ’’தி. ‘‘அஜ்ஜ கஸ்மா ந க³ண்ஹீ’’தி? ‘‘ஸம்மாஸம்பு³த்³த⁴ஸ்ஸ த⁴ம்மகத²ம் ஸுத்வா த⁴ம்மஸ்ஸ அதி⁴க³தத்தா’’தி. அத² நம் ‘‘அரே, து³ட்ட²தா³ஸி ஏத்தகம் காலம் தயா க³ஹிதகஹாபணே மே தே³ஹீ’’தி அதஜ்ஜேத்வா, ‘‘அம்ம, தயா பிவிதம் அமதம் அம்ஹேபி பாயேஹீ’’தி வத்வா ‘‘தேன ஹி மம் ந்ஹாபேஹீ’’தி வுத்தே ஸோளஸஹி க³ந்தோ⁴த³கக⁴டேஹி ந்ஹாபேத்வா த்³வே மட்ட²ஸாடகே தா³பேஸி. ஸா ஏகம் நிவாஸேத்வா ஏகம் ஏகம்ஸம் பாருபித்வா ஆஸனம் பஞ்ஞாபேத்வா ஏகம் பீ³ஜனிம் ஆஹராபேத்வா ஆஸனே நிஸீதி³த்வா சித்ரபீ³ஜனிம் ஆதா³ய பஞ்ச மாதுகா³மஸதானி ஆமந்தேத்வா தாஸம் ஸத்தா²ரா தே³ஸிதனியாமேனேவ த⁴ம்மம் தே³ஸேஸி. தஸ்ஸா த⁴ம்மகத²ம் ஸுத்வா தா ஸப்³பா³பி ஸோதாபத்திப²லே பதிட்ட²ஹிம்ஸு.

தா ஸப்³பா³பி கு²ஜ்ஜுத்தரம் வந்தி³த்வா, ‘‘அம்ம, அஜ்ஜதோ பட்டா²ய த்வம் கிலிட்ட²கம்மம் மா கரி, அம்ஹாகம் மாதுட்டா²னே ச ஆசரியட்டா²னே ச ட²த்வா ஸத்து² ஸந்திகம் க³ந்த்வா ஸத்தா²ரா தே³ஸிதம் த⁴ம்மம் ஸுத்வா அம்ஹாகம் கதே²ஹீ’’தி வதி³ம்ஸு. ஸா ததா² கரோந்தீ அபரபா⁴கே³ திபிடகத⁴ரா ஜாதா. அத² நம் ஸத்தா² ‘‘ஏதத³க்³க³ம், பி⁴க்க²வே, மம ஸாவிகானம் உபாஸிகானம் ப³ஹுஸ்ஸுதானம் த⁴ம்மகதி²கானம் யதி³த³ம் கு²ஜ்ஜுத்தரா’’தி ஏதத³க்³கே³ ட²பேஸி. தாபி கோ² பஞ்சஸதா இத்தி²யோ தம் ஏவமாஹம்ஸு – ‘‘அம்ம, ஸத்தா²ரம் த³ட்டு²காமாம்ஹா, தம் நோ த³ஸ்ஸேஹி, க³ந்த⁴மாலாதீ³ஹி தம் பூஜேஸ்ஸாமா’’தி. ‘‘அய்யே, ராஜகுலம் நாம பா⁴ரியம், தும்ஹே க³ஹேத்வா ப³ஹி க³ந்தும் ந ஸக்கா’’தி. ‘‘அம்ம, நோ மா நாஸேஹி, த³ஸ்ஸேஹேவ அம்ஹாகம் ஸத்தா²ர’’ந்தி. ‘‘தேன ஹி தும்ஹாகம் வஸனக³ப்³பா⁴னம் பி⁴த்தீஸு யத்தகேன ஓலோகேதும் ஸக்கா ஹோதி, தத்தகம் சி²த்³த³ம் கத்வா க³ந்த⁴மாலாதீ³னி ஆஹராபேத்வா ஸத்தா²ரம் திண்ணம் ஸேட்டீ²னம் க⁴ரத்³வாரம் க³ச்ச²ந்தம் தும்ஹே தேஸு தேஸு டா²னேஸு ட²த்வா ஓலோகேத² சேவ, ஹத்தே² ச பஸாரேத்வா வந்த³த², பூஜேத² சா’’தி. தா ததா² கத்வா ஸத்தா²ரம் க³ச்ச²ந்தஞ்ச ஆக³ச்ச²ந்தஞ்ச ஓலோகேத்வா வந்தி³ம்ஸு சேவ பூஜேஸுஞ்ச.

அதே²கதி³வஸம் மாக³ண்டி³யா அத்தனோ பாஸாத³தலதோ நிக்க²மித்வா சங்கமமானா தாஸம் வஸனட்டா²னம் க³ந்த்வா க³ப்³பே⁴ஸு சி²த்³த³ம் தி³ஸ்வா, ‘‘இத³ம் கி’’ந்தி புச்சி²த்வா, தாஹி தஸ்ஸா ஸத்த²ரி ஆகா⁴தப³த்³த⁴பா⁴வம் அஜானந்தீஹி ‘‘ஸத்தா² இமம் நக³ரம் ஆக³தோ, மயம் ஏத்த² ட²த்வா ஸத்தா²ரம் வந்தா³ம சேவ பூஜேம சா’’தி வுத்தே, ‘‘ஆக³தோ நாம இமம் நக³ரம் ஸமணோ கோ³தமோ, இதா³னிஸ்ஸ கத்தப்³ப³ம் ஜானிஸ்ஸாமி, இமாபி தஸ்ஸ உபட்டா²யிகா, இமாஸம்பி கத்தப்³ப³ம் ஜானிஸ்ஸாமீ’’தி சிந்தேத்வா க³ந்த்வா ரஞ்ஞோ ஆரோசேஸி – ‘‘மஹாராஜ, ஸாமாவதிமிஸ்ஸிகானம் ப³ஹித்³தா⁴ பத்த²னா அத்தி², கதிபாஹேனேவ தே ஜீவிதம் மாரேஸ்ஸந்தீ’’தி. ராஜா ‘‘ந தா ஏவரூபம் கரிஸ்ஸந்தீ’’தி ந ஸத்³த³ஹி. புனப்புனம் வுத்தேபி ந ஸத்³த³ஹி ஏவ. அத² நம் ஏவம் திக்க²த்தும் வுத்தேபி அஸத்³த³ஹந்தம் ‘‘ஸசே மே ந ஸத்³த³ஹஸி, தாஸம் வஸனட்டா²னம் க³ந்த்வா உபசாரேஹி, மஹாராஜா’’தி ஆஹ. ராஜா க³ந்த்வா க³ப்³பே⁴ஸு சி²த்³த³ம் தி³ஸ்வா, ‘‘இத³ம் கி’’ந்தி புச்சி²த்வா, தஸ்மிம் அத்தே² ஆரோசிதே தாஸம் அகுஜ்ஜி²த்வா, கிஞ்சி அவத்வாவ சி²த்³தா³னி பித³ஹாபேத்வா ஸப்³ப³க³ப்³பே⁴ஸு உத்³த⁴ச்சி²த்³த³கவாதபானானி காரேஸி. உத்³த⁴ச்சி²த்³த³கவாதபானானி கிர தஸ்மிம் காலே உப்பன்னானி. மாக³ண்டி³யா தாஸம் கிஞ்சி காதும் அஸக்குணித்வா, ‘‘ஸமணஸ்ஸ கோ³தமஸ்ஸேவ கத்தப்³ப³ம் கரிஸ்ஸாமீ’’தி நாக³ரானம் லஞ்ஜம் த³த்வா, ‘‘ஸமணம் கோ³தமம் அந்தோனக³ரம் பவிஸித்வா விசரந்தம் தா³ஸகம்மகரபோரிஸேஹி அக்கோஸேத்வா பரிபா⁴ஸேத்வா பலாபேதா²’’தி ஆணாபேஸி. மிச்சா²தி³ட்டி²கா தீஸு ரதனேஸு அப்பஸன்னா அந்தோனக³ரம் பவிட்ட²ம் ஸத்தா²ரம் அனுப³ந்தி⁴த்வா, ‘‘சோரோஸி, பா³லோஸி, மூள்ஹோஸி, ஓட்டோ²ஸி, கோ³ணோஸி, க³த்³ரபோ⁴ஸி, நேரயிகோஸி, திரச்சா²னக³தோஸி, நத்தி² துய்ஹம் ஸுக³தி, து³க்³க³தியேவ துய்ஹம் பாடிகங்கா²’’தி த³ஸஹி அக்கோஸவத்தூ²ஹி அக்கோஸந்தி பரிபா⁴ஸந்தி.

தம் ஸுத்வா ஆயஸ்மா ஆனந்தோ³ ஸத்தா²ரம் ஏதத³வோச – ‘‘ப⁴ந்தே, இமே நாக³ரா அம்ஹே அக்கோஸந்தி பரிபா⁴ஸந்தி, இதோ அஞ்ஞத்த² க³ச்சா²மா’’தி. ‘‘குஹிம், ஆனந்தோ³தி’’? ‘‘அஞ்ஞம் நக³ரம், ப⁴ந்தே’’தி. ‘‘தத்த² மனுஸ்ஸேஸு அக்கோஸந்தேஸு புன கத்த² க³மிஸ்ஸாம, ஆனந்தோ³’’தி? ‘‘ததோபி அஞ்ஞம் நக³ரம், ப⁴ந்தே’’தி. ‘‘தத்தா²பி மனுஸ்ஸேஸு அக்கோஸந்தேஸு குஹிம் க³மிஸ்ஸாமா’’தி? ‘‘ததோபி அஞ்ஞம் நக³ரம், ப⁴ந்தே’’தி. ‘‘ஆனந்த³, ஏவம் காதும் ந வட்டதி. யத்த² அதி⁴கரணம் உப்பன்னம், தத்தே²வ தஸ்மிம் வூபஸந்தே அஞ்ஞத்த² க³ந்தும் வட்டதி. கே பன தே, ஆனந்த³, அக்கோஸந்தீ’’தி? ‘‘ப⁴ந்தே, தா³ஸகம்மகரே உபாதா³ய ஸப்³பே³ அக்கோஸந்தீ’’தி. ‘‘அஹம், ஆனந்த³, ஸங்கா³மம் ஓதிண்ணஹத்தி²ஸதி³ஸோ, ஸங்கா³மம் ஓதிண்ணஹத்தி²னோ ஹி சதூஹி தி³ஸாஹி ஆக³தே ஸரே ஸஹிதும் பா⁴ரோ, ததே²வ ப³ஹூஹி து³ஸ்ஸீலேஹி கதி²தகதா²னம் ஸஹனம் நாம மய்ஹம் பா⁴ரோ’’தி வத்வா அத்தானம் ஆரப்³ப⁴ த⁴ம்மம் தே³ஸேந்தோ இமா நாக³வக்³கே³ திஸ்ஸோ கா³தா² அபா⁴ஸி –

‘‘அஹம் நாகோ³வ ஸங்கா³மே, சாபதோ பதிதம் ஸரம்;

அதிவாக்யம் திதிக்கி²ஸ்ஸம், து³ஸ்ஸீலோ ஹி ப³ஹுஜ்ஜனோ.

‘‘த³ந்தம் நயந்தி ஸமிதிம், த³ந்தம் ராஜாபி⁴ரூஹதி;

த³ந்தோ ஸேட்டோ² மனுஸ்ஸேஸு, யோதிவாக்யம் திதிக்க²தி.

‘‘வரமஸ்ஸதரா த³ந்தா, ஆஜானீயா ச ஸிந்த⁴வா;

குஞ்ஜரா ச மஹானாகா³, அத்தத³ந்தோ ததோ வர’’ந்தி. (த⁴. ப. 320-322);

த⁴ம்மகதா² ஸம்பத்தமஹாஜனஸ்ஸ ஸாத்தி²கா அஹோஸி. ஏவம் த⁴ம்மம் தே³ஸேத்வா மா சிந்தயி, ஆனந்த³, ஏதே ஸத்தாஹமத்தமேவ அக்கோஸிஸ்ஸந்தி, அட்ட²மே தி³வஸே துண்ஹீ ப⁴விஸ்ஸந்தி, பு³த்³தா⁴னஞ்ஹி உப்பன்னம் அதி⁴கரணம் ஸத்தாஹதோ உத்தரி ந க³ச்ச²தி. மாக³ண்டி³யா ஸத்தா²ரம் அக்கோஸாபேத்வா பலாபேதும் அஸக்கோந்தீ, ‘‘கிம் நு கோ² கரிஸ்ஸாமீ’’தி சிந்தேத்வா, ‘‘இமா ஏதஸ்ஸ உபத்த²ம்ப⁴பூ⁴தா, ஏதாஸம்பி ப்³யஸனம் கரிஸ்ஸாமீ’’தி ஏகதி³வஸம் ரஞ்ஞோ ஸுராபானட்டா²னே உபட்டா²னம் கரோந்தீ சூளபிது ஸாஸனம் பஹிணி ‘‘அத்தோ² மே கிர குக்குடேஹி, அட்ட² மதகுக்குடே, அட்ட² ஸஜீவகுக்குடே ச க³ஹேத்வா ஆக³ச்ச²து, ஆக³ந்த்வா ச ஸோபானமத்த²கே ட²த்வா ஆக³தபா⁴வம் நிவேதே³த்வா ‘பவிஸதூ’தி வுத்தேபி அபவிஸித்வா பட²மம் அட்ட² ஸஜீவகுக்குடே பஹிணது, ‘பச்சா² இதரே’’’தி. சூளாபட்டா²கஸ்ஸ ச ‘‘மம வசனம் கரேய்யாஸீ’’தி லஞ்ஜம் அதா³ஸி. மாக³ண்டி³யோ ஆக³ந்த்வா, ரஞ்ஞோ நிவேதா³பேத்வா, ‘‘பவிஸதூ’’தி வுத்தே, ‘‘ரஞ்ஞோ ஆபானபூ⁴மிம் ந பவிஸிஸ்ஸாமீ’’தி ஆஹ. இதரா சூளுபட்டா²கம் பஹிணி – ‘‘க³ச்ச², தாத, மம சூளபிது ஸந்திக’’ந்தி. ஸோ க³ந்த்வா தேன தி³ன்னே அட்ட² ஸஜீவகுக்குடே ஆனேத்வா, ‘‘தே³வ, புரோஹிதேன பண்ணாகாரோ பஹிதோ’’தி ஆஹ. ராஜா ‘‘ப⁴த்³த³கோ வத நோ உத்தரிப⁴ங்கோ³ உப்பன்னோ, கோ நு கோ² பசேய்யா’’தி ஆஹ. மாக³ண்டி³யா, ‘‘மஹாராஜ, ஸாமாவதிப்பமுகா² பஞ்சஸதா இத்தி²யோ நிக்கம்மிகா விசரந்தி, தாஸம் பேஸேஹி, தா பசித்வா ஆஹரிஸ்ஸந்தீ’’தி ஆஹ. ராஜா ‘‘க³ச்ச², தாஸம் த³த்வா அஞ்ஞஸ்ஸ கிர ஹத்தே² அத³த்வா ஸயமேவ மாரேத்வா பசந்தூ’’தி பேஸேஸி. சூளுபட்டா²கோ ‘‘ஸாது⁴ தே³வா’’தி க³ந்த்வா ததா² வத்வா தாஹி ‘‘மயம் பாணாதிபாதம் ந கரோமா’’தி படிக்கி²த்தோ ஆக³ந்த்வா தமத்த²ம் ரஞ்ஞோ ஆரோசேஸி. மாக³ண்டி³யா ‘‘தி³ட்ட²ம் தே, மஹாராஜ, இதா³னி தாஸம் பாணாதிபாதஸ்ஸ கரணம் வா அகரணம் வா ஜானிஸ்ஸஸி, ‘ஸமணஸ்ஸ கோ³தமஸ்ஸ பசித்வா பேஸேந்தூ’தி வதே³ஹி தே³வா’’தி ஆஹ. ராஜா ததா² வத்வா பேஸேஸி. இதரோ தே க³ஹேத்வா க³ச்ச²ந்தோ விய ஹுத்வா க³ந்த்வா தே குக்குடே புரோஹிதஸ்ஸ த³த்வா மதகுக்குடே தாஸம் ஸந்திகம் நேத்வா, ‘‘இமே கிர குக்குடே பசித்வா ஸத்து² ஸந்திகம் பஹிணதா²’’தி ஆஹ. தா, ‘‘ஸாமி, ஆஹர, இத³ம் நாம அம்ஹாகம் கிச்ச’’ந்தி பச்சுக்³க³ந்த்வா க³ண்ஹிம்ஸு. ஸோ ரஞ்ஞோ ஸந்திகம் க³ந்த்வா, ‘‘கிம், தாதா’’தி புட்டோ², ‘‘ஸமணஸ்ஸ கோ³தமஸ்ஸ பசித்வா பேஸேதா²தி வுத்தமத்தேயேவ படிமக்³க³ம் ஆக³ந்த்வா க³ண்ஹிம்ஸூ’’தி ஆசிக்கி². மாக³ண்டி³யா ‘‘பஸ்ஸ, மஹாராஜ, ந தா தும்ஹாதி³ஸானம் கரோந்தி, ப³ஹித்³தா⁴ பத்த²னா தாஸம் அத்தீ²தி வுத்தே ந ஸத்³த³ஹஸீ’’தி ஆஹ. ராஜா தம் ஸுத்வாபி அதி⁴வாஸேத்வா துண்ஹீயேவ அஹோஸி. மாக³ண்டி³யா ‘‘கிம் நு கோ² கரிஸ்ஸாமீ’’தி சிந்தேஸி.

ததா³ பன ராஜா ‘‘ஸாமாவதியா வாஸுலத³த்தாய மாக³ண்டி³யாய சா’’தி திஸ்ஸன்னம்பி ஏதாஸம் பாஸாத³தலே வாரேன வாரேன ஸத்தாஹம் ஸத்தாஹம் வீதினாமேதி. அத² நம் ‘‘ஸ்வே வா பரஸுவே வா ஸாமாவதியா பாஸாத³தலம் க³மிஸ்ஸதீ’’தி ஞத்வா மாக³ண்டி³யா சூளபிது ஸாஸனம் பஹிணி – ‘‘அக³தே³ன கிர தா³டா² தோ⁴வித்வா ஏகம் ஸப்பம் பேஸேதூ’’தி. ஸோ ததா² கத்வா பேஸேஸி. ராஜா அத்தனோ க³மனட்டா²னம் ஹத்தி²கந்தவீணம் ஆதா³யயேவ க³ச்ச²தி, தஸ்ஸா போக்க²ரே ஏகம் சி²த்³த³ம் அத்தி². மாக³ண்டி³யா தேன சி²த்³தே³ன ஸப்பம் பவேஸேத்வா சி²த்³த³ம் மாலாகு³ளேன த²கேஸி. ஸப்போ த்³வீஹதீஹம் அந்தோவீணாயமேவ அஹோஸி. மாக³ண்டி³யா ரஞ்ஞோ க³மனதி³வஸே ‘‘அஜ்ஜ கதரிஸ்ஸித்தி²யா பாஸாத³ம் க³மிஸ்ஸஸி தே³வா’’தி புச்சி²த்வா ‘‘ஸாமாவதியா’’தி வுத்தே, ‘‘அஜ்ஜ மயா, மஹாராஜ, அமனாபோ ஸுபினோ தி³ட்டோ². ந ஸக்கா தத்த² க³ந்தும், தே³வா’’தி? ‘‘க³ச்சா²மேவா’’தி. ஸா யாவ ததியம் வாரேத்வா, ‘‘ஏவம் ஸந்தே அஹம்பி தும்ஹேஹி ஸத்³தி⁴ம் க³மிஸ்ஸாமி, தே³வா’’தி வத்வா நிவத்தியமானாபி அனிவத்தித்வா, ‘‘ந ஜானாமி, கிம் ப⁴விஸ்ஸதி தே³வா’’தி ரஞ்ஞா ஸத்³தி⁴ம்யேவ அக³மாஸி.

ராஜா ஸாமாவதிமிஸ்ஸிகாஹி தி³ன்னானி வத்த²புப்ப²க³ந்தா⁴ப⁴ரணானி தா⁴ரேத்வா ஸுபோ⁴ஜனம் பு⁴ஞ்ஜித்வா வீணம் உஸ்ஸீஸகே ட²பேத்வா ஸயனே நிபஜ்ஜி. மாக³ண்டி³யா அபராபரம் விசரந்தீ விய ஹுத்வா வீணாசி²த்³த³தோ புப்ப²கு³ளம் அபனேஸி. ஸப்போ த்³வீஹதீஹம் நிராஹாரோ தேன சி²த்³தே³ன நிக்க²மித்வா பஸ்ஸஸந்தோ ப²ணம் கத்வா ஸயனபிட்டே² நிபஜ்ஜி. மாக³ண்டி³யா தம் தி³ஸ்வா, ‘‘தீ⁴ தீ⁴, தே³வ, ஸப்போ’’தி மஹாஸத்³த³ம் கத்வா ராஜானஞ்ச தா ச அக்கோஸந்தீ, ‘‘அயம் அந்த⁴பா³லராஜா அலக்கி²கோ மய்ஹம் வசனம் ந ஸுணாதி, இமாபி நிஸ்ஸிரீகா து³ப்³பி³னீதா, கிம் நாம ரஞ்ஞோ ஸந்திகா ந லப⁴ந்தி, கிம் நு தும்ஹே இமஸ்மிம் மதேயேவ ஸுக²ம் ஜீவிஸ்ஸத², ஜீவந்தே து³க்க²ம் ஜீவத², ‘அஜ்ஜ மயா பாபஸுபினோ தி³ட்டோ², ஸாமாவதியா பாஸாத³ம் க³ந்தும் ந வட்டதீ’தி வாரேந்தியாபி மே வசனம் ந ஸுணஸி, தே³வா’’தி ஆஹ. ராஜா ஸப்பம் தி³ஸ்வா மரணப⁴யதஜ்ஜிதோ ‘‘ஏவரூபம்பி நாம இமா கரிஸ்ஸந்தி, அஹோ பாபா, அஹம் இமாஸம் பாபபா⁴வம் ஆசிக்க²ந்தியாபி இமிஸ்ஸா வசனம் ந ஸத்³த³ஹிம், பட²மம் அத்தனோ க³ப்³பே⁴ஸு சி²த்³தா³னி கத்வா நிஸின்னா, புன மயா பேஸிதே குக்குடே படிபஹிணிம்ஸு, அஜ்ஜ ஸயனே ஸப்பம் விஸ்ஸஜ்ஜிம்ஸூ’’தி கோதே⁴ன ஸம்பஜ்ஜலிதோ விய அஹோஸி.

ஸாமாவதீபி பஞ்சன்னம் இத்தி²ஸதானம் ஓவாத³ம் அதா³ஸி – ‘‘அம்மா, அம்ஹாகம் அஞ்ஞம் படிஸரணம் நத்தி², நரிந்தே³ ச தே³வியா ச அத்தனி ச ஸமமேவ மேத்தசித்தம் பவத்தேத², மா கஸ்ஸசி கோபம் கரித்தா²’’தி. ராஜா ஸஹஸ்ஸதா²மம் ஸிங்க³த⁴னும் ஆதா³ய ஜியம் போதே²த்வா விஸபீதம் ஸரம் ஸன்னய்ஹித்வா ஸாமாவதிம் து⁴ரே கத்வா ஸப்³பா³ தா படிபாடியா ட²பாபேத்வா ஸாமாவதியா உரே ஸரம் விஸ்ஸஜ்ஜேஸி. ஸோ தஸ்ஸா மேத்தானுபா⁴வேன படினிவத்தித்வா ஆக³தமக்³கா³பி⁴முகோ²வ ஹுத்வா ரஞ்ஞோ ஹத³யம் பவிஸந்தோ விய அட்டா²ஸி. ராஜா சிந்தேஸி – ‘‘மயா கி²த்தோ ஸரோ ஸிலம்பி வினிவிஜ்ஜி²த்வா க³ச்ச²தி, ஆகாஸே படிஹனனகட்டா²னம் நத்தி², அத² ச பனேஸ நிவத்தித்வா மம ஹத³யாபி⁴முகோ² ஜாதோ, அயஞ்ஹி நாம நிஸ்ஸத்தோ நிஜ்ஜீவோ ஸரோபி ஏதிஸ்ஸா கு³ணம் ஜானாதி, அஹம் மனுஸ்ஸபூ⁴தோபி ந ஜானாமீ’’தி, ஸோ த⁴னும் ச²ட்³டே³த்வா அஞ்ஜலிம் பக்³க³ய்ஹ ஸாமாவதியா பாத³மூலே உக்குடிகம் நிஸீதி³த்வா இமம் கா³த²மாஹ –

‘‘ஸம்முய்ஹாமி பமுய்ஹாமி, ஸப்³பா³ முய்ஹந்தி மே தி³ஸா;

ஸாமாவதி மம் தாயஸ்ஸு, த்வஞ்ச மே ஸரணம் ப⁴வா’’தி.

ஸா தஸ்ஸ வசனம் ஸுத்வா, ‘‘ஸாது⁴, தே³வ, மம் ஸரணம் க³ச்சா²’’தி அவத்வா, ‘‘யமஹம், மஹாராஜ, ஸரணம் க³தா, தமேவ த்வம்பி ஸரணம் க³ச்சா²ஹீ’’தி இத³ம் வத்வா ஸாமாவதீ ஸம்மாஸம்பு³த்³த⁴ஸாவிகா –

‘‘மா மம் த்வம் ஸரணம் க³ச்ச², யமஹம் ஸரணம் க³தா;

ஏஸ பு³த்³தோ⁴ மஹாராஜ, ஏஸ பு³த்³தோ⁴ அனுத்தரோ;

ஸரணம் க³ச்ச² தம் பு³த்³த⁴ம், த்வஞ்ச மே ஸரணம் ப⁴வா’’தி. –

ஆஹ. ராஜா தஸ்ஸ வசனம் ஸுத்வா, ‘‘இதா³னாஹம் அதிரேகதரம் பா⁴யாமீ’’தி வத்வா இமம் கா³த²மாஹ –

‘‘ஏஸ பி⁴ய்யோ பமுய்ஹாமி, ஸப்³பா³ முய்ஹந்தி மே தி³ஸா;

ஸாமாவதி மம் தாயஸ்ஸு, த்வஞ்ச மே ஸரணம் ப⁴வா’’தி.

அத² நம் ஸா புரிமனயேனேவ புன படிக்கி²பித்வா, ‘‘தேன ஹி த்வஞ்ச ஸரணம் க³ச்சா²மி, ஸத்தா²ரஞ்ச ஸரணம் க³ச்சா²மி, வரஞ்ச தே த³ம்மீ’’தி வுத்தே, ‘‘வரோ க³ஹிதோ ஹோது, மஹாராஜா’’தி ஆஹ. ஸோ ஸத்தா²ரம் உபஸங்கமித்வா ஸரணம் க³ந்த்வா நிமந்தேத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ ஸத்தாஹம் மஹாதா³னம் த³த்வா ஸாமாவதிம் ஆமந்தேத்வா, ‘‘உட்டே²ஹி, வரம் க³ண்ஹா’’தி ஆஹ. ‘‘மஹாராஜ, மய்ஹம் ஹிரஞ்ஞாதீ³ஹி அத்தோ² நத்தி², இமம் பன மே வரம் தே³ஹி, ததா² கரோஹி, யதா² ஸத்தா² நிப³த்³த⁴ம் பஞ்சஹி பி⁴க்கு²ஸதேஹி ஸத்³தி⁴ம் இதா⁴க³ச்ச²தி, த⁴ம்மம் ஸுணிஸ்ஸாமீ’’தி. ராஜா ஸத்தா²ரம் வந்தி³த்வா, ‘‘ப⁴ந்தே, பஞ்சஹி பி⁴க்கு²ஸதேஹி ஸத்³தி⁴ம் நிப³த்³த⁴ம் இதா⁴க³ச்ச²த², ஸாமாவதிமிஸ்ஸிகா ‘த⁴ம்மம் ஸுணிஸ்ஸாமா’தி வத³ந்தீ’’தி ஆஹ. ‘‘மஹாராஜ, பு³த்³தா⁴னம் நாம ஏகஸ்மிம் டா²னே நிப³த்³த⁴ம் க³ந்தும் ந வட்டதி, மஹாஜனோ ஸத்தா²ரம் ஆக³மனத்தா²ய பச்சாஸீஸதீ’’தி. ‘‘தேன ஹி, ப⁴ந்தே, ஏகம் பி⁴க்கு²ம் ஆணாபேதா²’’தி. ஸத்தா² ஆனந்த³த்தே²ரம் ஆணாபேஸி. ஸோ ததோ பட்டா²ய பஞ்ச பி⁴க்கு²ஸதானி ஆதா³ய நிப³த்³த⁴ம் ராஜகுலம் க³ச்ச²தி. தாபி தே³வியோ நிப³த்³த⁴ம் தே²ரம் ஸபரிவாரம் போ⁴ஜேந்தி, த⁴ம்மம் ஸுணந்தி. தா ஏகதி³வஸம் தே²ரஸ்ஸ த⁴ம்மகத²ம் ஸுத்வா பஸீதி³த்வா, பஞ்சஹி உத்தராஸங்க³ஸதேஹி த⁴ம்மபூஜம் அகம்ஸு. ஏகேகோ உத்தராஸங்கோ³ பஞ்ச ஸதானி பஞ்ச ஸதானி அக்³க⁴தி.

தா ஏகவத்தா² தி³ஸ்வா ராஜா புச்சி² – ‘‘குஹிம் வோ உத்தராஸங்கோ³’’தி. ‘‘அய்யஸ்ஸ நோ தி³ன்னா’’தி. ‘‘தேன ஸப்³பே³ க³ஹிதா’’தி? ‘‘ஆம, க³ஹிதா’’தி. ராஜா தே²ரம் உபஸங்கமித்வா வந்தி³த்வா தாஹி உத்தராஸங்கா³னம் தி³ன்னபா⁴வம் புச்சி²த்வா தாஹி தி³ன்னபா⁴வஞ்ச தே²ரேன க³ஹிதபா⁴வஞ்ச ஸுத்வா, ‘‘நனு, ப⁴ந்தே, அதிப³ஹூனி வத்தா²னி, ஏத்தகேஹி கிம் கரிஸ்ஸதா²’’தி புச்சி². ‘‘அம்ஹாகம் பஹோனகானி வத்தா²னி க³ண்ஹித்வா ஸேஸானி ஜிண்ணசீவரிகானம் பி⁴க்கூ²னம் த³ஸ்ஸாமி, மஹாராஜா’’தி. ‘‘தே அத்தனோ ஜிண்ணசீவரானி கிம் கரிஸ்ஸந்தீ’’தி? ‘‘ஜிண்ணதரசீவரிகானம் த³ஸ்ஸந்தீ’’தி. ‘‘தே அத்தனோ ஜிண்ணதரசீவரானி கிம் கரிஸ்ஸந்தீ’’தி? ‘‘பச்சத்த²ரணானி கரிஸ்ஸந்தீ’’தி. ‘‘புராணபச்சத்த²ரணானி கிம் கரிஸ்ஸந்தீ’’தி? ‘‘பூ⁴மத்த²ரணானி கரிஸ்ஸந்தீ’’தி. ‘‘புராணபூ⁴மத்த²ரணானி கிம் கரிஸ்ஸந்தீ’’தி? ‘‘பாத³புஞ்ச²னானி கரிஸ்ஸந்தி, மஹாராஜா’’தி. ‘‘புராணபாத³புஞ்ச²னானி கிம் கரிஸ்ஸந்தீ’’தி? ‘‘க²ண்டா³க²ண்டி³கம் கோட்டேத்வா மத்திகாய மத்³தி³த்வா பி⁴த்திம் லிம்பிஸ்ஸந்தீ’’தி. ‘‘ப⁴ந்தே, ஏத்தகானி கத்வாபி அய்யானம் தி³ன்னானி ந நஸ்ஸந்தீ’’தி? ‘‘ஆம, மஹாராஜா’’தி. ராஜா பஸன்னோ அபரானிபி பஞ்ச வத்த²ஸதானி ஆஹராபேத்வா தே²ரஸ்ஸ பாத³மூலே ட²பாபேஸி. தே²ரோ கிர பஞ்சஸதக்³க⁴னகானேவ வத்தா²னி பஞ்சஸதபா⁴கே³ன பாத³மூலே ட²பேத்வா தி³ன்னானி பஞ்சஸதக்க²த்தும் லபி⁴, ஸஹஸ்ஸக்³க⁴னகானி ஸஹஸ்ஸபா⁴கே³ன பாத³மூலே ட²பேத்வா தி³ன்னானி ஸஹஸ்ஸக்க²த்தும் லபி⁴, ஸதஸஹஸ்ஸக்³க⁴னகானி ஸதஸஹஸ்ஸபா⁴கே³ன பாத³மூலே ட²பேத்வா தி³ன்னானி ஸதஸஹஸ்ஸக்க²த்தும் லபி⁴. ஏகம் த்³வே தீணி சத்தாரி பஞ்ச த³ஸாதிஆதி³னா நயேன லத்³தா⁴னம் பன க³ணனா நாம நத்தி². ததா²க³தே கிர பரினிப்³பு³தே தே²ரோ ஸகலஜம்பு³தீ³பம் விசரித்வா ஸப்³ப³விஹாரேஸு பி⁴க்கூ²னம் அத்தனோ ஸந்தகானேவ பத்தசீவரானி அதா³ஸி.

ததா³ மாக³ண்டி³யாபி ‘‘யமஹம் கரோமி. தம் ததா² அஹுத்வா அஞ்ஞதா²வ ஹோதி, இதா³னி கிம் நு கோ² கரிஸ்ஸாமீ’’தி சிந்தேத்வா, ‘‘அத்தே²ஸோ உபாயோ’’தி ரஞ்ஞே உய்யானகீளம் க³ச்ச²ந்தே சூளபிது ஸாஸனம் பஹிணி – ‘‘ஸாமாவதியா பாஸாத³ம் க³ந்த்வா, து³ஸ்ஸகோட்டா²கா³ரானி ச தேலகோட்டா²கா³ரானி ச விவராபேத்வா, து³ஸ்ஸானி தேலசாடீஸு தேமேத்வா தேமேத்வா த²ம்பே⁴ வேடே²த்வா தா ஸப்³பா³பி ஏகதோ கத்வா த்³வாரம் பித³ஹித்வா ப³ஹி யந்தகம் த³த்வா த³ண்ட³தீ³பிகாஹி கே³ஹே அக்³கி³ம் த³த³மானோ ஓதரித்வா க³ச்ச²தூ’’தி. ஸோ பாஸாத³ம் அபி⁴ருய்ஹ கோட்டா²கா³ரானி விவரித்வா வத்தா²னி தேலசாடீஸு தேமேத்வா தேமேத்வா த²ம்பே⁴ வேடே²தும் ஆரபி⁴. அத² நம் ஸாமாவதிப்பமுகா² இத்தி²யோ ‘‘கிம் ஏதம் சூளபிதா’’தி வத³ந்தியோ உபஸங்கமிம்ஸு. ‘‘அம்மா, ராஜா த³ள்ஹிகம்மத்தா²ய இமே த²ம்பே⁴ தேலபிலோதிகாஹி வேடா²பேதி, ராஜகே³ஹே நாம ஸுயுத்தம் து³யுத்தம் து³ஜ்ஜானம், மா மே ஸந்திகே ஹோத², அம்மா’’தி ஏவம் வத்வா தா ஆக³தா க³ப்³பே⁴ பவேஸேத்வா த்³வாரானி பித³ஹித்வா ப³ஹி யந்தகம் த³த்வா ஆதி³தோ பட்டா²ய அக்³கி³ம் தே³ந்தோ ஓதரி. ஸாமாவதீ தாஸம் ஓவாத³ம் அதா³ஸி – ‘‘அம்ஹாகம் அனமதக்³கே³ ஸம்ஸாரே விசரந்தீனம் ஏவமேவ அக்³கி³னா ஜா²யமானானம் அத்தபா⁴வானம் பரிச்சே²தோ³ பு³த்³த⁴ஞாணேனபி ந ஸுகரோ, அப்பமத்தா ஹோதா²’’தி. தா கே³ஹே ஜா²யந்தே வேத³னாபரிக்³க³ஹகம்மட்டா²னம் மனஸிகரோந்தியோ காசி து³தியப²லம், காசி ததியப²லம் பாபுணிம்ஸு. தேன வுத்தம் – ‘‘அத² கோ² ஸம்ப³ஹுலா பி⁴க்கூ² பச்சா²ப⁴த்தம் பிண்ட³பாதபடிக்கந்தா யேன ப⁴க³வா தேனுபஸங்கமிம்ஸு, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு, ஏகமந்தம் நிஸின்னா கோ² தே பி⁴க்கூ² ப⁴க³வந்தம் ஏதத³வோசும் – ‘இத⁴, ப⁴ந்தே, ரஞ்ஞோ உதேனஸ்ஸ உய்யானக³தஸ்ஸ அந்தேபுரம் த³ட்³ட⁴ம், பஞ்ச ச இத்தி²ஸதானி காலகதானி ஸாமாவதிப்பமுகா²னி. தாஸம், ப⁴ந்தே, உபாஸிகானம் கா க³தி, கோ அபி⁴ஸம்பராயோ’தி? ஸந்தேத்த², பி⁴க்க²வே, உபாஸிகாயோ ஸோதாபன்னா, ஸந்தி ஸகதா³கா³மியோ, ஸந்தி அனாகா³மியோ, ஸப்³பா³ தா, பி⁴க்க²வே, உபாஸிகாயோ அனிப்ப²லா காலகதா’’தி. அத² கோ² ப⁴க³வா ஏதமத்த²ம் விதி³த்வா தாயம் வேலாயம் இமம் உதா³னம் உதா³னேஸி –

‘‘மோஹஸம்ப³ந்த⁴னோ லோகோ, ப⁴ப்³ப³ரூபோவ தி³ஸ்ஸதி;

உபதீ⁴ப³ந்த⁴னோ பா³லோ, தமஸா பரிவாரிதோ;

ஸஸ்ஸதோரிவ கா²யதி, பஸ்ஸதோ நத்தி² கிஞ்சன’’ந்தி. (உதா³. 70);

ஏவஞ்ச பன வத்வா, ‘‘பி⁴க்க²வே, ஸத்தா நாம வட்டே விசரந்தா நிச்சகாலம் அப்பமத்தா ஹுத்வா புஞ்ஞகம்மமேவ ந கரோந்தி, பமாதி³னோ ஹுத்வா பாபகம்மம்பி கரோந்தி. தஸ்மா வட்டே விசரந்தா ஸுக²ம்பி து³க்க²ம்பி அனுப⁴வந்தீ’’தி த⁴ம்மம் தே³ஸேஸி.

ராஜா ‘‘ஸாமாவதியா கே³ஹம் கிர ஜா²யதீ’’தி ஸுத்வா வேகே³னாக³ச்ச²ந்தோபி அத³ட்³டே⁴ ஸம்பாபுணிதும் நாஸக்கி². ஆக³ந்த்வா பன கே³ஹம் நிப்³பா³பேந்தோ உப்பன்னப³லவதோ³மனஸ்ஸோ அமச்சக³ணபரிவுதோ நிஸீதி³த்வா ஸாமாவதியா கு³ணே அனுஸ்ஸரந்தோ, ‘‘கஸ்ஸ நு கோ² இத³ம் கம்ம’’ந்தி சிந்தேத்வா – ‘‘மாக³ண்டி³யாய காரிதம் ப⁴விஸ்ஸதீ’’தி ஞத்வா, ‘‘தாஸேத்வா புச்சி²யமானா ந கதே²ஸ்ஸதி, ஸணிகம் உபாயேன புச்சி²ஸ்ஸாமீ’’தி சிந்தேத்வா அமச்சே ஆஹ – ‘‘அம்போ⁴, அஹம் இதோ புப்³பே³ உட்டா²ய ஸமுட்டா²ய ஆஸங்கிதபரிஸங்கிதோவ ஹோமி, ஸாமாவதீ மே நிச்சம் ஓதாரமேவ க³வேஸதி, இதா³னி பன மே சித்தம் நிப்³பு³தம் ப⁴விஸ்ஸதி, ஸுகே²ன ச வஸிதும் லபி⁴ஸ்ஸாமீ’’தி, தே ‘‘கேன நு கோ², தே³வ, இத³ம் கத’’ந்தி ஆஹம்ஸு. ‘‘மயி ஸினேஹேன கேனசி கதம் ப⁴விஸ்ஸதீ’’தி. மாக³ண்டி³யாபி ஸமீபே டி²தா தம் ஸுத்வா, ‘‘நாஞ்ஞோ கோசி காதும் ஸக்கி²ஸ்ஸதி, மயா கதம், தே³வ, அஹம் சூளபிதரம் ஆணாபேத்வா காரேஸி’’ந்தி ஆஹ. ‘‘தம் ட²பேத்வா அஞ்ஞோ மயி ஸினேஹோ ஸத்தோ நாம நத்தி², பஸன்னோஸ்மி, வரம் தே த³ம்மி, அத்தனோ ஞாதிக³ணம் பக்கோஸாபேஹீ’’தி. ஸா ஞாதகானம் ஸாஸனம் பஹிணி – ‘‘ராஜா மே பஸன்னோ வரம் தே³தி, ஸீக⁴ம் ஆக³ச்ச²ந்தூ’’தி. ராஜா ஆக³தாக³தானம் மஹந்தம் ஸக்காரம் காரேஸி. தம் தி³ஸ்வா தஸ்ஸா அஞ்ஞாதகாபி லஞ்ஜம் த³த்வா ‘‘மயம் மாக³ண்டி³யாய ஞாதகா’’தி ஆக³ச்சி²ம்ஸு. ராஜா தே ஸப்³பே³ கா³ஹாபேத்வா ராஜங்க³ணே நாபி⁴ப்பமாணே ஆவாடே க²ணாபேத்வா தே தத்த² நிஸீதா³பேத்வா பம்ஸூஹி பூரேத்வா உபரி பலாலே விகிராபேத்வா அக்³கி³ம் தா³பேஸி. சம்மஸ்ஸ த³ட்³ட⁴காலே அயனங்க³லேன கஸாபேத்வா க²ண்டா³க²ண்ட³ம் ஹீராஹீரம் காரேஸி. மாக³ண்டி³யாய ஸரீரதோபி திகி²ணேன ஸத்தே²ன க⁴னக⁴னட்டா²னேஸு மம்ஸம் உப்பாடேத்வா தேலகபாலம் உத்³த⁴னம் ஆரோபேத்வா பூவே விய பசாபேத்வா தமேவ கா²தா³பேஸி.

த⁴ம்மஸபா⁴யம்பி பி⁴க்கூ² கத²ம் ஸமுட்டா²பேஸும், ‘‘அனனுச்ச²விகம் வத, ஆவுஸோ, ஏவரூபாய ஸத்³தா⁴ய பஸன்னாய உபாஸிகாய ஏவரூபம் மரண’’ந்தி. ஸத்தா² ஆக³ந்த்வா, ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா, ‘‘இமாய நாமா’’தி வுத்தே ‘‘பி⁴க்க²வே, இமஸ்மிம் அத்தபா⁴வே ஸாமாவதிப்பமுகா²னம் இத்தீ²னம் ஏதம் அயுத்தம் ஸம்பத்தம். புப்³பே³ கதகம்மஸ்ஸ பன யுத்தமேவ ஏதாஹி லத்³த⁴’’ந்தி வத்வா, ‘‘கிம், ப⁴ந்தே, ஏதாஹி புப்³பே³ கதம், தம் ஆசிக்க²தா²’’தி தேஹி யாசிதோ அதீதம் ஆஹரி –

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே ராஜகே³ஹே நிப³த்³த⁴ம் அட்ட² பச்சேகபு³த்³தா⁴ பு⁴ஞ்ஜந்தி. பஞ்சஸதா இத்தி²யோ தே உபட்ட²ஹந்தி. தேஸு ஸத்த பச்சேகபு³த்³தா⁴ ஹிமவந்தம் க³ச்ச²ந்தி, ஏகோ நதீ³தீரே ஏகம் திணக³ஹனம் அத்தி², தத்த² ஜா²னம் ஸமாபஜ்ஜித்வா நிஸீதி³. அதே²கதி³வஸம் ராஜா பச்சேகபு³த்³தே⁴ஸு க³தேஸு தா இத்தி²யோ ஆதா³ய நதி³யம் உத³ககீளம் கீளிதும் க³தோ. தத்த² தா இத்தி²யோ தி³வஸபா⁴க³ம் உத³கே கீளித்வா உத்தரித்வா ஸீதபீளிதா அக்³கி³ம் விஸிப்³பே³துகாமா ‘‘அம்ஹாகம் அக்³கி³கரணட்டா²னம் ஓலோகேதா²’’தி அபராபரம் விசரந்தியோ தம் திணக³ஹனம் தி³ஸ்வா, ‘‘திணராஸீ’’தி ஸஞ்ஞாய தம் பரிவாரேத்வா டி²தா அக்³கி³ம் அத³ம்ஸு. திணேஸு ஜா²யித்வா பதந்தேஸு பச்சேகபு³த்³த⁴ம் தி³ஸ்வா, ‘‘நட்டா²ம்ஹா, அம்ஹாகம் ரஞ்ஞோ பச்சேகபு³த்³தோ⁴ ஜா²யதி, ராஜா ஞத்வா அம்ஹே நாஸேஸ்ஸதி, ஸுத³ட்³ட⁴ம் நம் கரிஸ்ஸாமா’’தி ஸப்³பா³ தா இத்தி²யோ இதோ சிதோ ச தா³ரூனி ஆஹரித்வா தஸ்ஸ உபரி தா³ருராஸிம் கரிம்ஸு. மஹாதா³ருராஸி அஹோஸி. அத² நம் ஆலிம்பேத்வா, ‘‘இதா³னி ஜா²யிஸ்ஸதீ’’தி பக்கமிம்ஸு. தா பட²மம் அஸஞ்சேதனிகா ஹுத்வா கம்முனா ந ப³ஜ்ஜி²ம்ஸு, இதா³னி பச்சா² ஸஞ்சேதனாய கம்முனா ப³ஜ்ஜி²ம்ஸு. பச்சேகபு³த்³த⁴ம் பன அந்தோஸமாபத்தியம் ஸகடஸஹஸ்ஸேஹி தா³ரூனி ஆஹரித்வா ஆலிம்பேந்தாபி உஸ்மாகாரமத்தம்பி க³ஹேதும் ந ஸக்கோந்தி. தஸ்மா ஸோ ஸத்தமே தி³வஸே உட்டா²ய யதா²ஸுக²ம் அக³மாஸி. தா தஸ்ஸ கம்மஸ்ஸ கதத்தா ப³ஹூனி வஸ்ஸஸதஸஹஸ்ஸானி நிரயே பச்சித்வா தஸ்ஸேவ கம்மஸ்ஸ விபாகாவஸேஸேன அத்தபா⁴வஸதே இமினாவ நியாமேன கே³ஹே ஜா²யமானே ஜா²யிம்ஸு. இத³ம் ஏதாஸம் புப்³ப³கம்மந்தி.

ஏவம் வுத்தே பி⁴க்கூ² ஸத்தா²ரம் படிபுச்சி²ம்ஸு – ‘‘கு²ஜ்ஜுத்தரா பன, ப⁴ந்தே, கேன கம்மேன கு²ஜ்ஜா ஜாதா, கேன கம்மேன மஹாபஞ்ஞா, கேன கம்மேன ஸோதாபத்திப²லம் அதி⁴க³தா, கேன கம்மேன பரேஸம் பேஸனகாரிதா ஜாதா’’தி? பி⁴க்க²வே, தஸ்ஸேவ ரஞ்ஞோ பா³ராணஸியம் ரஜ்ஜம் கரணகாலே ஸ்வேவ பச்சேகபு³த்³தோ⁴ தோ²கம் கு²ஜ்ஜதா⁴துகோ அஹோஸி. அதே²கா உபட்டா²யிகா இத்தீ² கம்ப³லம் பாருபித்வா ஸுவண்ணஸரணம் க³ஹேத்வா, ‘‘அம்ஹாகம் பச்சேகபு³த்³தோ⁴ ஏவஞ்ச ஏவஞ்ச விசரதீ’’தி கு²ஜ்ஜா ஹுத்வா தஸ்ஸ விசரணாகாரம் த³ஸ்ஸேஸி. தஸ்ஸ நிஸ்ஸந்தே³ன கு²ஜ்ஜா ஜாதா. தே பன பச்சேகபு³த்³தே⁴ பட²மதி³வஸே ராஜகே³ஹே நிஸீதா³பேத்வா பத்தே கா³ஹாபேத்வா பாயாஸஸ்ஸ பூரேத்வா தா³பேஸி. உண்ஹபாயாஸஸ்ஸ பூரே பத்தே பச்சேகபு³த்³தா⁴ பரிவத்தேத்வா பரிவத்தேத்வா க³ண்ஹந்தி. ஸா இத்தீ² தே ததா² கரோந்தே தி³ஸ்வா அத்தனோ ஸந்தகானி அட்ட² த³ந்தவலயானி த³த்வா, ‘‘இத⁴ ட²பேத்வா க³ண்ஹதா²’’தி ஆஹ. தேஸு ததா² கத்வா தம் ஓலோகேத்வா டி²தேஸு தேஸம் அதி⁴ப்பாயம் ஞத்வா, ‘‘நத்தி², ப⁴ந்தே, அம்ஹாகம் ஏதேஹி அத்தோ². தும்ஹாகஞ்ஞேவ ஏதானி பரிச்சத்தானி, க³ஹேத்வா க³ச்ச²தா²’’தி ஆஹ. தே க³ஹேத்வா நந்த³மூலகபப்³பா⁴ரம் அக³மம்ஸு. அஜ்ஜதனாபி தானி வலயானி அரோகா³னேவ. ஸா தஸ்ஸ கம்மஸ்ஸ நிஸ்ஸந்தே³ன இதா³னி திபிடகத⁴ரா மஹாபஞ்ஞா ஜாதா. பச்சேகபு³த்³தா⁴னம் கதஉபட்டா²னஸ்ஸ நிஸ்ஸந்தே³ன பன ஸோதாபத்திப²லம் பத்தா. இத³மஸ்ஸா பு³த்³த⁴ந்தரே புப்³ப³கம்மம்.

கஸ்ஸபஸம்மாஸம்பு³த்³த⁴காலே பன ஏகா பா³ராணஸிஸேட்டி²னோ தீ⁴தா வட்³ட⁴மானகச்சா²யாய ஆதா³ஸம் க³ஹேத்வா அத்தானம் அலங்கரோந்தீ நிஸீதி³. அத²ஸ்ஸா விஸ்ஸாஸிகா ஏகா கீ²ணாஸவா பி⁴க்கு²னீ தம் த³ட்டு²ம் அக³மாஸி. பி⁴க்கு²னியோ ஹி கீ²ணாஸவாபி ஸாயன்ஹஸமயே உபட்டா²ககுலானி த³ட்டு²காமா ஹோந்தி. தஸ்மிம் பன க²ணே ஸேட்டி²தீ⁴தாய ஸந்திகே காசி பேஸனகாரிகா நத்தி², ஸா ‘‘வந்தா³மி, அய்யே, ஏதம் தாவ மே பஸாத⁴னபேளகம் க³ஹேத்வா தே³தா²’’தி ஆஹ. தே²ரீ சிந்தேஸி – ‘‘ஸசஸ்ஸா இமம் க³ண்ஹித்வா ந த³ஸ்ஸாமி, மயி ஆகா⁴தம் கத்வா நிரயே நிப்³ப³த்திஸ்ஸதி. ஸசே பன த³ஸ்ஸாமி, பரஸ்ஸ பேஸனகாரிகா ஹுத்வா நிப்³ப³த்திஸ்ஸதி. நிரயஸந்தாபதோ கோ² பன பரஸ்ஸ பேஸனபா⁴வோவ ஸேய்யோ’’தி. ‘‘ஸா அனுத³யம் படிச்ச தம் க³ஹேத்வா தஸ்ஸா அதா³ஸி. தஸ்ஸ கம்மஸ்ஸ நிஸ்ஸந்தே³ன பரேஸம் பேஸனகாரிகா ஜாதா’’தி.

அத² புனேகதி³வஸம் பி⁴க்கூ² த⁴ம்மஸபா⁴யம் கத²ம் ஸமுட்டா²பேஸும் ‘‘ஸாமாவதிப்பமுகா² பஞ்சஸதா இத்தி²யோ கே³ஹே அக்³கி³னா ஜா²யிம்ஸு, மாக³ண்டி³யாய ஞாதகா உபரி பலாலக்³கி³ம் த³த்வா அயனங்க³லேஹி பி⁴ன்னா, மாக³ண்டி³யா பக்குதி²ததேலே பக்கா, கே நு கோ² ஏத்த² ஜீவந்தி நாம, கே மதா நாமா’’தி. ஸத்தா² ஆக³ந்த்வா, ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா, ‘‘இமாய நாமா’’தி வுத்தே, ‘‘பி⁴க்க²வே, யே கேசி பமத்தா, தே வஸ்ஸஸதம் ஜீவந்தாபி மதாயேவ நாம. யே அப்பமத்தா, தே மதாபி ஜீவந்தியேவ. தஸ்மா மாக³ண்டி³யா ஜீவந்தீபி மதாயேவ நாம, ஸாமாவதிப்பமுகா² பஞ்சஸதா இத்தி²யோ மதாபி ஜீவந்தியேவ நாம. ந ஹி, பி⁴க்க²வே, அப்பமத்தா மரந்தி நாமா’’தி வத்வா இமா கா³தா² அபா⁴ஸி –

21. ‘‘அப்பமாதோ³ அமதபத³ம், பமாதோ³ மச்சுனோ பத³ம்;

அப்பமத்தா ந மீயந்தி, யே பமத்தா யதா² மதா.

22. ‘‘ஏவம் விஸேஸதோ ஞத்வா, அப்பமாத³ம்ஹி பண்டி³தா;

அப்பமாதே³ பமோத³ந்தி, அரியானம் கோ³சரே ரதா.

23. ‘‘தே ஜா²யினோ ஸாததிகா, நிச்சம் த³ள்ஹபரக்கமா;

பு²ஸந்தி தீ⁴ரா நிப்³பா³னம், யோக³க்கே²மம் அனுத்தர’’ந்தி.

தத்த² அப்பமாதோ³தி பத³ம் மஹந்தம் அத்த²ம் தீ³பேதி, மஹந்தம் அத்த²ம் க³ஹேத்வா திட்ட²தி. ஸகலம்பி ஹி தேபிடகம் பு³த்³த⁴வசனம் ஆஹரித்வா கதி²யமானம் அப்பமாத³பத³மேவ ஓதரதி. தேன வுத்தம் –

‘‘ஸேய்யதா²பி, பி⁴க்க²வே, யானி கானிசி ஜங்க³லானம் பாணானம் பத³ஜாதானி, ஸப்³பா³னி தானி ஹத்தி²பதே³ ஸமோதா⁴னம் க³ச்ச²ந்தி, ஹத்தி²பத³ம் தேஸம் அக்³க³மக்கா²யதி யதி³த³ம் மஹந்தத்தேன. ஏவமேவ கோ², பி⁴க்க²வே, யே கேசி குஸலா த⁴ம்மா, ஸப்³பே³தே அப்பமாத³மூலகா அப்பமாத³ஸமோஸரணா, அப்பமாதோ³ தேஸம் த⁴ம்மானம் அக்³க³மக்கா²யதீ’’தி (ஸம். நி. 5.140).

ஸோ பனேஸ அத்த²தோ ஸதியா அவிப்பவாஸோ நாம. நிச்சம் உபட்டி²தாய ஸதியா சேதம் நாமம். அமதபத³ந்தி அமதம் வுச்சதி நிப்³பா³னம். தஞ்ஹி அஜாதத்தா நு ஜீயதி ந மீயதி, தஸ்மா அமதந்தி வுச்சதி. பஜ்ஜந்தி இமினாதி பத³ம், அமதம் பாபுணந்தீதி அத்தோ². அமதஸ்ஸ பத³ம் அமதபத³ம், அமதஸ்ஸ அதி⁴க³மூபாயோதி வுத்தம் ஹோதி, பமாதோ³தி பமஜ்ஜனபா⁴வோ, முட்ட²ஸ்ஸதிஸங்கா²தஸ்ஸ ஸதியா வோஸக்³க³ஸ்ஸேதம் நாமம். மச்சுனோதி மரணஸ்ஸ. பத³ந்தி உபாயோ மக்³கோ³. பமத்தோ ஹி ஜாதிம் நாதிவத்ததி, ஜாதோ ஜீயதி சேவ மீயதி சாதி பமாதோ³ மச்சுனோ பத³ம் நாம ஹோதி, மரணம் உபேதி. அப்பமத்தா ந மீயந்தீதி ஸதியா ஸமன்னாக³தா ஹி அப்பமத்தா ந மரந்தி. அஜரா அமரா ஹோந்தீதி ந ஸல்லக்கே²தப்³ப³ம். ந ஹி கோசி ஸத்தோ அஜரோ அமரோ நாம அத்தி², பமத்தஸ்ஸ பன வட்டம் நாம அபரிச்சி²ன்னம், அப்பமத்தஸ்ஸ பரிச்சி²ன்னம். தஸ்மா பமத்தா ஜாதிஆதீ³ஹி அபரிமுத்தத்தா ஜீவந்தாபி மதாயேவ நாம. அப்பமத்தா பன அப்பமாத³லக்க²ணம் வட்³டே⁴த்வா கி²ப்பம் மக்³க³ப²லானி ஸச்சி²கத்வா து³தியததியஅத்தபா⁴வேஸு ந நிப்³ப³த்தந்தி. தஸ்மா தே ஜீவந்தாபி மதாபி ந மீயந்தியேவ நாம. யே பமத்தா யதா² மதாதி யே பன ஸத்தா பமத்தா, தே பமாத³மரணேன மதத்தா, யதா² ஹி ஜீவிதிந்த்³ரியுபச்சே²தே³ன மதா தா³ருக்க²ந்த⁴ஸதி³ஸா அபக³தவிஞ்ஞாணா, ததே²வ ஹோந்தி. தேஸம்பி ஹி மதானம் விய க³ஹட்டா²னம் தாவ ‘‘தா³னம் த³ஸ்ஸாம, ஸீலம் ரக்கி²ஸ்ஸாம, உபோஸத²கம்மம் கரிஸ்ஸாமா’’தி ஏகசித்தம்பி ந உப்பஜ்ஜதி, பப்³ப³ஜிதானம்பி ‘‘ஆசரியுபஜ்ஜா²யவத்தாதீ³னி பூரேஸ்ஸாம, து⁴தங்கா³னி ஸமாதி³யிஸ்ஸாம, பா⁴வனம் வட்³டே⁴ஸ்ஸாமா’’தி ந உப்பஜ்ஜதீதி மதேன தே கிம் நானாகரணாவ ஹோந்தி. தேன வுத்தம் – ‘‘யே பமத்தா யதா² மதா’’தி.

ஏவம் விஸேஸதோ ஞத்வாதி பமத்தஸ்ஸ வட்டதோ நிஸ்ஸரணம் நத்தி², அப்பமத்தஸ்ஸ அத்தீ²தி ஏவம் விஸேஸதோவ ஜானித்வா. கே பனேதம் விஸேஸம் ஜானந்தீதி? அப்பமாத³ம்ஹி பண்டி³தாதி யே பண்டி³தா மேதா⁴வினோ ஸப்பஞ்ஞா அத்தனோ அப்பமாதே³ ட²த்வா அப்பமாத³ம் வட்³டே⁴ந்தி, தே ஏவம் விஸேஸகாரணம் ஜானந்தி. அப்பமாதே³ பமோத³ந்தீதி தே ஏவம் ஞத்வா தஸ்மிம் அத்தனோ அப்பமாதே³ பமோத³ந்தி, பஹம்ஸிதமுகா² துட்ட²பஹட்டா² ஹோந்தி. அரியானம் கோ³சரே ரதாதி தே ஏவம் அப்பமாதே³ பமோத³ந்தா தம் அப்பமாத³ம் வட்³டே⁴த்வா அரியானம் பு³த்³த⁴பச்சேகபு³த்³த⁴பு³த்³த⁴ஸாவகானம் கோ³சரஸங்கா²தே சதுஸதிபட்டா²னாதி³பே⁴தே³ ஸத்ததிம்ஸ போ³தி⁴பக்கி²யத⁴ம்மே நவவித⁴லோகுத்தரத⁴ம்மே ச ரதா நிரதா, அபி⁴ரதா ஹோந்தீதி அத்தோ².

தே ஜா²யினோதி தே அப்பமத்தா பண்டி³தா அட்ட²ஸமாபத்திஸங்கா²தேன ஆரம்மணூபனிஜ்ஜா²னேன விபஸ்ஸனாமக்³க³ப²லஸங்கா²தேன லக்க²ணூபனிஜ்ஜா²னேன சாதி து³விதே⁴னபி ஜா²னேன ஜா²யினோ. ஸாததிகாதி அபி⁴னிக்க²மனகாலதோ பட்டா²ய யாவ அரஹத்தமக்³கா³ ஸததம் பவத்தகாயிகசேதஸிகவீரியா. நிச்சம் த³ள்ஹபரக்கமாதி யம் தம் புரிஸதா²மேன புரிஸவீரியேன புரிஸபரக்கமேன பத்தப்³ப³ம், ந தம் அபாபுணித்வா வீரியஸ்ஸ ஸண்டா²னம் ப⁴விஸ்ஸதீதி ஏவரூபேன வீரியேன அந்தரா அனோஸக்கித்வா நிச்சப்பவத்தேன த³ள்ஹபரக்கமேன ஸமன்னாக³தா. பு²ஸந்தீதி ஏத்த² த்³வே பு²ஸனா ஞாணபு²ஸனா ச, விபாகபு²ஸனா ச. தத்த² சத்தாரோ மக்³கா³ ஞாணபு²ஸனா நாம, சத்தாரி ப²லானி விபாகபு²ஸனா நாம. தேஸு இத⁴ விபாகபு²ஸனா அதி⁴ப்பேதா. அரியப²லேன நிப்³பா³னம் ஸச்சி²கரோந்தோ தீ⁴ரா பண்டி³தா தாய விபாகபு²ஸனாய பு²ஸந்தி, நிப்³பா³னம் ஸச்சி²கரோந்தி. யோக³க்கே²மம் அனுத்தரந்தி யே சத்தாரோ யோகா³ மஹாஜனம் வட்டே ஓஸீதா³பேந்தி, தேஹி கே²மம் நிப்³ப⁴யம் ஸப்³பே³ஹி லோகியலோகுத்தரத⁴ம்மேஹி ஸேட்ட²த்தா அனுத்தரந்தி.

தே³ஸனாபரியோஸானே ப³ஹூ ஸோதாபன்னாத³யோ அஹேஸும். தே³ஸனா மஹாஜனஸ்ஸ ஸாத்தி²கா ஜாதாதி.

ஸாமாவதீவத்து² பட²மம்.