8. ஸாரிபுத்தத்தே²ரவத்து²

அஸாரே ஸாரமதினோதி இமம் த⁴ம்மதே³ஸனம் ஸத்தா² வேளுவனே விஹரந்தோ அக்³க³ஸாவகேஹி நிவேதி³தம் ஸஞ்சயஸ்ஸ அனாக³மனம் ஆரப்³ப⁴ கதே²ஸி.

தத்ராயம் அனுபுப்³பி³கதா² – அம்ஹாகஞ்ஹி ஸத்தா² இதோ கப்பஸதஸஹஸ்ஸாதி⁴கானம் சதுன்னம் அஸங்க்²யேய்யானம் மத்த²கே அமரவதியா நாம நக³ரே ஸுமேதோ⁴ நாம ப்³ராஹ்மணகுமாரோ ஹுத்வா ஸப்³ப³ஸிப்பேஸு நிப்ப²த்திம் பத்வா மாதாபிதூனம் அச்சயேன அனேககோடிஸங்க்²யம் த⁴னம் பரிச்சஜித்வா இஸிபப்³ப³ஜ்ஜம் பப்³ப³ஜித்வா ஹிமவந்தே வஸந்தோ ஜா²னாபி⁴ஞ்ஞா நிப்³ப³த்தேத்வா ஆகாஸேன க³ச்ச²ந்தோ தீ³பங்கரத³ஸப³லஸ்ஸ ஸுத³ஸ்ஸனவிஹாரதோ ரம்மவதீனக³ரம் பவிஸனத்தா²ய மக்³க³ம் ஸோத⁴யமானம் ஜனம் தி³ஸ்வா ஸயம்பி ஏகம் பதே³ஸம் க³ஹேத்வா மக்³க³ம் ஸோதே⁴தி. தஸ்மிம் அஸோதி⁴தேயேவ ஆக³தஸ்ஸ ஸத்து²னோ அத்தானம் ஸேதும் கத்வா கலலே அஜினசம்மம் அத்த²ரித்வா ‘‘ஸத்தா² ஸஸாவகஸங்கோ⁴ கலலம் அனக்கமித்வா மம் அக்கமந்தோ க³ச்ச²தூ’’தி நிபன்னோ. ஸத்தா²ரா தம் தி³ஸ்வாவ ‘‘பு³த்³த⁴ங்குரோ ஏஸ, அனாக³தே கப்பஸதஸஹஸ்ஸாதி⁴கானம் சதுன்னம் அஸங்க்²யேய்யானம் பரியோஸானே கோ³தமோ நாம பு³த்³தோ⁴ ப⁴விஸ்ஸதீ’’தி ப்³யாகதோ. தஸ்ஸ ஸத்து²னோ அபரபா⁴கே³ ‘‘கோண்ட³ஞ்ஞோ மங்க³லோ ஸுமனோ ரேவதோ ஸோபி⁴தோ அனோமத³ஸ்ஸீ பது³மோ நாரதோ³ பது³முத்தரோ ஸுமேதோ⁴ ஸுஜாதோ பியத³ஸ்ஸீ அத்த²த³ஸ்ஸீ த⁴ம்மத³ஸ்ஸீ ஸித்³த⁴த்தோ² திஸ்ஸோ பு²ஸ்ஸோ விபஸ்ஸீ ஸிகீ² வேஸ்ஸபூ⁴ ககுஸந்தோ⁴ கோணாக³மனோ கஸ்ஸபோ’’தி லோகம் ஓபா⁴ஸேத்வா உப்பன்னானம் இமேஸம்பி தேவீஸதியா பு³த்³தா⁴னம் ஸந்திகே லத்³த⁴ப்³யாகரணோ, ‘‘த³ஸ பாரமியோ, த³ஸ உபபாரமியோ, த³ஸ பரமத்த²பாரமியோ’’தி ஸமத்திம்ஸ பாரமியோ பூரேத்வா வேஸ்ஸந்தரத்தபா⁴வே டி²தோ பத²விகம்பனானி மஹாதா³னானி த³த்வா புத்ததா³ரம் பரிச்சஜித்வா ஆயுபரியோஸானே துஸிதபுரே நிப்³ப³த்தித்வா தத்த² யாவதாயுகம் ட²த்வா த³ஸ ஸஹஸ்ஸசக்கவாளதே³வதாஹி ஸன்னிபதித்வா –

‘‘காலோ தே³வ மஹாவீர, உப்பஜ்ஜ மாதுகுச்சி²யம்;

ஸதே³வகம் தாரயந்தோ, பு³ஜ்ஜ²ஸ்ஸு அமதம் பத³’’ந்தி. (பு³. வம். 1.67) –

வுத்தே –

‘‘காலம் தே³ஸஞ்ச தீ³பஞ்ச, குலம் மாதரமேவ ச;

இமே பஞ்ச விலோகேத்வா, உப்பஜ்ஜதி மஹாயஸோ’’தி. –

பஞ்ச மஹாவிலோகனானி விலோகேத்வா ததோ சுதோ ஸக்யராஜகுலே படிஸந்தி⁴ம் க³ஹேத்வா த³ஸமாஸச்சயேன மாதுகுச்சி²தோ விஜாயி. ஸோளஸவஸ்ஸகாலே தத்த² மஹாஸம்பத்தியா பரிஹரியமானோ அனுக்கமேன ப⁴த்³ரயோப்³ப³னம் பத்வா திண்ணம் உதூனம் அனுச்ச²விகேஸு தீஸு பாஸாதே³ஸு தே³வலோகஸிரிம் விய ரஜ்ஜஸிரிம் அனுப⁴வந்தோ உய்யானகீளாய க³மனஸமயே அனுக்கமேன ஜிண்ணப்³யாதி⁴மதஸங்கா²தே தயோ தே³வதூ³தே தி³ஸ்வா ஸஞ்ஜாதஸம்வேகோ³ நிவத்தித்வா சதுத்த²வாரே பப்³ப³ஜிதம் தி³ஸ்வா, ‘‘ஸாது⁴ பப்³ப³ஜ்ஜா’’தி பப்³ப³ஜ்ஜாய ருசிம் உப்பாதே³த்வா உய்யானம் க³ந்த்வா தத்த² தி³வஸம் கே²பேத்வா மங்க³லபோக்க²ரணீதீரே நிஸின்னோ கப்பகவேஸம் க³ஹேத்வா ஆக³தேன விஸ்ஸகம்மேன தே³வபுத்தேன அலங்கதபடியத்தோ ராஹுலகுமாரஸ்ஸ ஜாதஸாஸனம் ஸுத்வா புத்தஸினேஹஸ்ஸ ப³லவபா⁴வம் ஞத்வா, ‘‘யாவ இத³ம் ப³ந்த⁴னம் ந வட்³ட⁴தி, தாவதே³வ நம் சி²ந்தி³ஸ்ஸாமீ’’தி சிந்தேத்வா ஸாயம் நக³ரம் பவிஸந்தோ –

‘‘நிப்³பு³தா நூன ஸா மாதா, நிப்³பு³தோ நூன ஸோ பிதா;

நிப்³பு³தா நூன ஸா நாரீ, யஸ்ஸாயம் ஈதி³ஸோ பதீ’’தி. –

கிஸாகோ³தமியா நாம பிதுச்சா²தீ⁴தாய பா⁴ஸிதம் இமம் கா³த²ம் ஸுத்வா, ‘‘அஹம் இமாய நிப்³பு³தபத³ம் ஸாவிதோ’’தி முத்தாஹாரம் ஓமுஞ்சித்வா தஸ்ஸா பேஸேத்வா அத்தனோ ப⁴வனம் பவிஸித்வா ஸிரிஸயனே நிஸின்னோ நித்³தோ³பக³தானம் நாடகித்தீ²னம் விப்பகாரம் தி³ஸ்வா நிப்³பி³ன்னஹத³யோ ச²ன்னம் உட்டா²பேத்வா கண்ட³கம் ஆஹராபேத்வா தம் ஆருய்ஹ ச²ன்னஸஹாயோ த³ஸஸஹஸ்ஸசக்கவாளதே³வதாஹி பரிவுதோ மஹாபி⁴னிக்க²மனம் நிக்க²மித்வா அனோமானதீ³தீரே பப்³ப³ஜித்வா அனுக்கமேன ராஜக³ஹம் க³ந்த்வா தத்த² பிண்டா³ய சரித்வா பண்ட³வபப்³ப³தபப்³பா⁴ரே நிஸின்னோ மக³த⁴ரஞ்ஞா ரஜ்ஜேன நிமந்தியமானோ தம் படிக்கி²பித்வா ஸப்³ப³ஞ்ஞுதம் பத்வா அத்தனோ விஜிதம் ஆக³மனத்தா²ய தேன க³ஹிதபடிஞ்ஞோ ஆளாரஞ்ச உத³கஞ்ச உபஸங்கமித்வா தேஸம் ஸந்திகே அதி⁴க³தவிஸேஸம் அனலங்கரித்வா ச²ப்³ப³ஸ்ஸானி மஹாபதா⁴னம் பத³ஹித்வா விஸாக²புண்ணமதி³வஸே பாதோவ ஸுஜாதாய தி³ன்னபாயஸம் பரிபு⁴ஞ்ஜித்வா நேரஞ்ஜராய நதி³யா ஸுவண்ணபாதிம் பவாஹேத்வா நேரஞ்ஜராய நதி³யா தீரே மஹாவனஸண்டே³ நானாஸமாபத்தீஹி தி³வஸபா⁴க³ம் வீதினாமேத்வா ஸாயன்ஹஸமயே ஸோத்தியேன தி³ன்னம் திணம் க³ஹேத்வா காளேன நாக³ராஜேன அபி⁴த்து²தகு³ணோ போ³தி⁴மண்ட³ம் ஆருய்ஹ திணானி ஸந்த²ரித்வா ‘‘ந தாவிமம் பல்லங்கம் பி⁴ந்தி³ஸ்ஸாமி, யாவ மே அனுபாதா³ய ஆஸவேஹி சித்தம் ந முச்சிஸ்ஸதீ’’தி படிஞ்ஞம் கத்வா புரத்தா²பி⁴முகோ² நிஸீதி³த்வா ஸூரியே அனத்த²ங்க³மிதேயேவ மாரப³லம் வித⁴மித்வா பட²மயாமே புப்³பே³னிவாஸஞாணம், மஜ்ஜி²மயாமே சுதூபபாதஞாணம் பத்வா பச்சி²மயாமாவஸானே பச்சயாகாரே ஞாணம் ஓதாரேத்வா அருணுக்³க³மனே த³ஸப³லசதுவேஸாரஜ்ஜாதி³ஸப்³ப³கு³ணபடிமண்டி³தம் ஸப்³ப³ஞ்ஞுதஞ்ஞாணம் படிவிஜ்ஜி²த்வா ஸத்தஸத்தாஹம் போ³தி⁴மண்டே³ வீதினாமேத்வா அட்ட²மே ஸத்தாஹே அஜபாலனிக்³ரோத⁴மூலே நிஸின்னோ த⁴ம்மக³ம்பீ⁴ரதாபச்சவேக்க²ணேன அப்போஸ்ஸுக்கதம் ஆபஜ்ஜமானோ த³ஸஸஹஸ்ஸசக்கவாளமஹாப்³ரஹ்மபரிவாரேன ஸஹம்பதிப்³ரஹ்முனா ஆயாசிதத⁴ம்மதே³ஸனோ பு³த்³த⁴சக்கு²னா லோகம் வோலோகேத்வா ப்³ரஹ்முனோ அஜ்ஜே²ஸனம் அதி⁴வாஸேத்வா, ‘‘கஸ்ஸ நு கோ² அஹம் பட²மம் த⁴ம்மம் தே³ஸேய்ய’’ந்தி ஓலோகேந்தோ ஆளாருத³கானம் காலகதபா⁴வம் ஞத்வா பஞ்சவக்³கி³யானம் பி⁴க்கூ²னம் ப³ஹூபகாரதம் அனுஸ்ஸரித்வா உட்டா²யாஸனா காஸிபுரம் க³ச்ச²ந்தோ அந்தராமக்³கே³ உபகேன ஸத்³தி⁴ம் மந்தேத்வா ஆஸாள்ஹிபுண்ணமதி³வஸே இஸிபதனே மிக³தா³யே பஞ்சவக்³கி³யானம் வஸனட்டா²னம் பத்வா தே அனனுச்ச²விகேன ஸமுதா³சாரேன ஸமுதா³சரந்தே ஸஞ்ஞாபேத்வா அஞ்ஞாதகோண்ட³ஞ்ஞப்பமுகே² அட்டா²ரஸ ப்³ரஹ்மகோடியோ அமதபானம் பாயேந்தோ த⁴ம்மசக்கம் பவத்தேத்வா பவத்திதவரத⁴ம்மசக்கோ பஞ்சமியம் பக்க²ஸ்ஸ ஸப்³பே³பி தே பி⁴க்கூ² அரஹத்தே பதிட்டா²பேத்வா தம் தி³வஸமேவ யஸகுலபுத்தஸ்ஸ உபனிஸ்ஸயஸம்பத்திம் தி³ஸ்வா தம் ரத்திபா⁴கே³ நிப்³பி³ந்தி³த்வா கே³ஹம் பஹாய நிக்க²ந்தம் தி³ஸ்வா, ‘‘ஏஹி யஸா’’தி பக்கோஸித்வா தஸ்மிம்யேவ ரத்திபா⁴கே³ ஸோதாபத்திப²லம் பாபேத்வா புனதி³வஸே அரஹத்தம் பாபேத்வா அபரேபி தஸ்ஸ ஸஹாயகே சதுபண்ணாஸ ஜனே ஏஹிபி⁴க்கு²பப்³ப³ஜ்ஜாய பப்³பா³ஜேத்வா அரஹத்தம் பாபேஸி.

ஏவம் லோகே ஏகஸட்டி²யா அரஹந்தேஸு ஜாதேஸு வுட்ட²வஸ்ஸோ பவாரேத்வா, ‘‘சரத², பி⁴க்க²வே, சாரிக’’ந்தி ஸட்டி² பி⁴க்கூ² தி³ஸாஸு பேஸேத்வா ஸயம் உருவேலம் க³ச்ச²ந்தோ அந்தராமக்³கே³ கப்பாஸிகவனஸண்டே³ திம்ஸ ஜனே ப⁴த்³த³வக்³கி³யகுமாரே வினேஸி. தேஸு ஸப்³ப³பச்சி²மகோ ஸோதாபன்னோ ஸப்³பு³த்தமோ அனாகா³மீ அஹோஸி. தே ஸப்³பே³பி ஏஹிபி⁴க்கு²பா⁴வேனேவ பப்³பா³ஜேத்வா தி³ஸாஸு பேஸேத்வா ஸயம் உருவேலம் க³ந்த்வா அட்³டு⁴ட்³டா⁴னி பாடிஹாரியஸஹஸ்ஸானி த³ஸ்ஸேத்வா உருவேலகஸ்ஸபாத³யோ ஸஹஸ்ஸஜடிலபரிவாரே தேபா⁴திகஜடிலே வினேத்வா ஏஹிபி⁴க்கு²பா⁴வேனேவ பப்³பா³ஜேத்வா க³யாஸீஸே நிஸீதா³பேத்வா ஆதி³த்தபரியாயதே³ஸனாய (மஹாவ. 54; ஸம். நி. 4.28) அரஹத்தே பதிட்டா²பேத்வா தேன அரஹந்தஸஹஸ்ஸேன பரிவுதோ ‘‘பி³ம்பி³ஸாரரஞ்ஞோ தி³ன்னம் படிஞ்ஞம் மோசேஸ்ஸாமீ’’தி ராஜக³ஹனக³ரூபசாரே லட்டி²வனுய்யானம் க³ந்த்வா, ‘‘ஸத்தா² கிர ஆக³தோ’’தி ஸுத்வா த்³வாத³ஸனஹுதேஹி ப்³ராஹ்மணக³ஹபதிகேஹி ஸத்³தி⁴ம் ஆக³தஸ்ஸ ரஞ்ஞோ மது⁴ரத⁴ம்மகத²ம் கதே²ந்தோ ராஜானம் ஏகாத³ஸஹி நஹுதேஹி ஸத்³தி⁴ம் ஸோதாபத்திப²லே பதிட்டா²பேத்வா ஏகனஹுதம் ஸரணேஸு பதிட்டா²பேத்வா புனதி³வஸே ஸக்கேன தே³வராஜேன மாணவகவண்ணம் க³ஹேத்வா அபி⁴த்து²தகு³ணோ ராஜக³ஹனக³ரம் பவிஸித்வா ராஜனிவேஸனே கதப⁴த்தகிச்சோ வேளுவனாராமம் படிக்³க³ஹேத்வா தத்தே²வ வாஸம் கப்பேஸி. தத்த² நம் ஸாரிபுத்தமோக்³க³ல்லானா உபஸங்கமிம்ஸு.

தத்ராயம் அனுபுப்³பி³கதா² – அனுப்பன்னேயேவ ஹி பு³த்³தே⁴ ராஜக³ஹதோ அவிதூ³ரே உபதிஸ்ஸகா³மோ கோலிதகா³மோதி த்³வே ப்³ராஹ்மணகா³மா அஹேஸும். தேஸு உபதிஸ்ஸகா³மே ஸாரியா நாம ப்³ராஹ்மணியா க³ப்³ப⁴ஸ்ஸ பதிட்டி²ததி³வஸேயேவ கோலிதகா³மே மோக்³க³லியா நாம ப்³ராஹ்மணியாபி க³ப்³போ⁴ பதிட்டா²ஸி. தானி கிர த்³வேபி குலானி யாவ ஸத்தமா குலபரிவட்டா ஆப³த்³த⁴படிப³த்³த⁴ஸஹாயகானேவ அஹேஸும், தாஸம் த்³வின்னம்பி ஏகதி³வஸமேவ க³ப்³ப⁴பரிஹாரம் அத³ம்ஸு. தா உபோ⁴பி த³ஸமாஸச்சேயேன புத்தே விஜாயிம்ஸு. நாமக்³க³ஹணதி³வஸே ஸாரியா ப்³ராஹ்மணியா புத்தஸ்ஸ உபதிஸ்ஸகா³மகே ஜேட்ட²குலஸ்ஸ புத்தத்தா உபதிஸ்ஸோதி நாமம் கரிம்ஸு, இதரஸ்ஸ கோலிதகா³மே ஜேட்ட²குலஸ்ஸ புத்தத்தா கோலிதோதி நாமம் கரிம்ஸு. தே உபோ⁴பி வுட்³டி⁴மன்வாய ஸப்³ப³ஸிப்பானம் பாரம் அக³மம்ஸு. உபதிஸ்ஸமாணவஸ்ஸ கீளனத்தா²ய நதி³ம் வா உய்யானம் வா க³மனகாலே பஞ்ச ஸுவண்ணஸிவிகஸதானி பரிவாரானி ஹோந்தி, கோலிதமாணவஸ்ஸ பஞ்ச ஆஜஞ்ஞயுத்தரத²ஸதானி. த்³வேபி ஜனா பஞ்சபஞ்சமாணவகஸதபரிவாரா ஹோந்தி. ராஜக³ஹே ச அனுஸம்வச்ச²ரம் கி³ரக்³க³ஸமஜ்ஜோ நாம அஹோஸி. தேஸம் த்³வின்னம்பி ஏகட்டா²னேயேவ மஞ்சம் ப³ந்த⁴ந்தி. த்³வேபி ஏகதோ நிஸீதி³த்வா ஸமஜ்ஜம் பஸ்ஸந்தா ஹஸிதப்³ப³ட்டா²னே ஹஸந்தி, ஸம்வேக³ட்டா²னே ஸம்வேஜேந்தி, தா³யம் தா³தும் யுத்தட்டா²னே தா³யம் தே³ந்தி. தேஸம் இமினாவ நியாமேன ஏகதி³வஸம் ஸமஜ்ஜம் பஸ்ஸந்தானம் பரிபாகக³தத்தா ஞாணஸ்ஸ புரிமதி³வஸேஸு விய ஹஸிதப்³ப³ட்டா²னே ஹாஸோ வா ஸம்வேக³ட்டா²னே ஸம்வேகோ³ வா தா³தும் யுத்தட்டா²னே தா³னம் வா நாஹோஸி. த்³வேபி பன ஜனா ஏவம் சிந்தயிம்ஸு – ‘‘கிமேத்த² ஓலோகேதப்³ப³ம் அத்தி², ஸப்³பே³பிமே அப்பத்தே வஸ்ஸஸதே அப்பண்ணத்திகபா⁴வம் க³மிஸ்ஸந்தி, அம்ஹேஹி பன ஏகம் மோக்க²த⁴ம்மம் பரியேஸிதும் வட்டதீ’’தி ஆரம்மணம் க³ஹேத்வா நிஸீதி³ம்ஸு. ததோ கோலிதோ உபதிஸ்ஸம் ஆஹ – ‘‘ஸம்ம உபதிஸ்ஸ, ந த்வம் அஞ்ஞேஸு தி³வஸேஸு விய ஹட்ட²பஹட்டோ², இதா³னி அனத்தமனதா⁴துகோஸி, கிம் தே ஸல்லக்கி²த’’ந்தி? ‘‘ஸம்ம கோலித, ஏதேஸம் வோலோகனே ஸாரோ நத்தி², நிரத்த²கமேதம், அத்தனோ மோக்க²த⁴ம்மம் க³வேஸிதும் வட்டதீ’’தி இத³ம் சிந்தயந்தோ நிஸின்னோம்ஹி. த்வம் பன கஸ்மா அனத்தமனோஸீதி? ஸோபி ததே²வ ஆஹ. அத²ஸ்ஸ அத்தனா ஸத்³தி⁴ம் ஏகஜ்ஜா²ஸயதம் ஞத்வா உபதிஸ்ஸோ ஆஹ – ‘‘அம்ஹாகம் உபி⁴ன்னம்பி ஸுசிந்திகம், மோக்க²த⁴ம்மம் பன க³வேஸந்தேஹி ஏகா பப்³ப³ஜ்ஜா லத்³து⁴ம் வட்டதி. கஸ்ஸ ஸந்திகே பப்³ப³ஜாமா’’தி?

தேன கோ² பன ஸமயேன ஸஞ்சயோ நாம பரிப்³பா³ஜகோ ராஜக³ஹே படிவஸதி மஹதியா பரிப்³பா³ஜகபரிஸாய ஸத்³தி⁴ம். தே ‘‘தஸ்ஸ ஸந்திகே பப்³ப³ஜிஸ்ஸாமா’’தி பஞ்சமாணவகஸதானி ‘‘ஸிவிகாயோ ச ரதே² ச க³ஹேத்வா க³ச்ச²தா²’’தி உய்யோஜேத்வா ஏகாய ஸிவிகாய ஏகேன ரதே²ன க³ந்த்வா ஸஞ்சயஸ்ஸ ஸந்திகே பப்³ப³ஜிம்ஸு. தேஸம் பப்³ப³ஜிதகாலதோ பட்டா²ய ஸஞ்சயோ அதிரேகலாப⁴க்³க³யஸக்³க³ப்பத்தோ அஹோஸி. தே கதிபாஹேனேவ ஸப்³ப³ம் ஸஞ்சயஸ்ஸ ஸமயம் பரிமத்³தி³த்வா, ‘‘ஆசரிய, தும்ஹாகம் ஜானனஸமயோ ஏத்தகோவ, உதா³ஹு உத்தரிம்பி அத்தீ²’’தி புச்சி²ம்ஸு. ‘‘ஏத்தகோவ ஸப்³ப³ம் தும்ஹேஹி ஞாத’’ந்தி வுத்தே சிந்தயிம்ஸு – ‘‘ஏவம் ஸதி இமஸ்ஸ ஸந்திகே ப்³ரஹ்மசரியவாஸோ நிரத்த²கோ, மயம் யம் மோக்க²த⁴ம்மம் க³வேஸிதும் நிக்க²ந்தா, ஸோ இமஸ்ஸ ஸந்திகே உப்பாதே³தும் ந ஸக்கா, மஹா கோ² பன ஜம்பு³தீ³போ, கா³மனிக³மராஜதா⁴னியோ சரந்தா அத்³தா⁴ மோக்க²த⁴ம்மதே³ஸகம் கஞ்சி ஆசரியம் லபி⁴ஸ்ஸாமா’’தி. ததோ பட்டா²ய, ‘‘யத்த² யத்த² பண்டி³தா ஸமணப்³ராஹ்மணா அத்தீ²’’தி வத³ந்தி, தத்த² தத்த² க³ந்த்வா ஸாகச்ச²ம் கரோந்தி. தேஹி புட்ட²ம் பஞ்ஹம் அஞ்ஞே கதே²தும் ந ஸக்கோந்தி, தே பன தேஸம் பஞ்ஹம் விஸ்ஸஜ்ஜேந்தி. ஏவம் ஸகலஜம்பு³தீ³பம் பரிக்³க³ண்ஹித்வா நிவத்தித்வா ஸகட்டா²னமேவ ஆக³ந்த்வா, ‘‘ஸம்ம கோலித, அம்ஹேஸு யோ பட²மம் அமதம் அதி⁴க³ச்ச²தி, ஸோ இதரஸ்ஸ ஆரோசேதூ’’தி கதிகம் அகம்ஸும்.

ஏவம் தேஸு கதிகம் கத்வா விஹரந்தேஸு ஸத்தா² வுத்தானுக்கமேன ராஜக³ஹம் பத்வா வேளுவனம் படிக்³க³ஹேத்வா வேளுவனே விஹரதி. ததா³ ‘‘சரத², பி⁴க்க²வே, சாரிகம் ப³ஹுஜனஹிதாயா’’தி ரதனத்தயகு³ணபகாஸனத்த²ம் உய்யோஜிதானம் ஏகஸட்டி²யா அரஹந்தானம் அந்தரே பஞ்சவக்³கி³யானம் அப்³ப⁴ந்தரோ அஸ்ஸஜித்தே²ரோ படினிவத்தித்வா ராஜக³ஹம் ஆக³தோ, புனதி³வஸே பாதோவ பத்தசீவரமாதா³ய ராஜக³ஹம் பிண்டா³ய பாவிஸி. தஸ்மிம் ஸமயே உபதிஸ்ஸபரிப்³பா³ஜகோபி பாதோவ ப⁴த்தகிச்சம் கத்வா பரிப்³பா³ஜகாராமம் க³ச்ச²ந்தோ தே²ரம் தி³ஸ்வா சிந்தேஸி – ‘‘மயா ஏவரூபோ பப்³ப³ஜிதோ நாம ந தி³ட்ட²புப்³போ³யேவ, யே லோகே அரஹந்தோ வா அரஹத்தமக்³க³ம் வா ஸமாபன்னா, அயம் தேஸம் பி⁴க்கூ²னம் அஞ்ஞதரோ, யம்னூனாஹம் இமம் பி⁴க்கு²ம் உபஸங்கமித்வா புச்சே²ய்யம் – ‘கம்ஸி த்வம், ஆவுஸோ, உத்³தி³ஸ்ஸ பப்³ப³ஜிதோ, கோ வா தே ஸத்தா², கஸ்ஸ வா த்வம் த⁴ம்மம் ரோசேஸீ’’’தி? அத²ஸ்ஸ ஏதத³ஹோஸி – ‘‘அகாலோ கோ² இமம் பி⁴க்கு²ம் பஞ்ஹம் புச்சி²தும், அந்தரக⁴ரம் பவிட்டோ² பிண்டா³ய சரதி, யம்னூனாஹம் இமம் பி⁴க்கு²ம் பிட்டி²தோ பிட்டி²தோ அனுப³ந்தே⁴ய்யம், அத்தி²கேஹி உபஞ்ஞாதம் மக்³க³’’ந்தி. ஸோ தே²ரம் லத்³த⁴பிண்ட³பாதம் அஞ்ஞதரம் ஓகாஸம் க³ச்ச²ந்தம் தி³ஸ்வா நிஸீதி³துகாமதஞ்சஸ்ஸ ஞத்வா அத்தனோ பரிப்³பா³ஜகபீட²கம் பஞ்ஞாபேத்வா அதா³ஸி, ஸோ ப⁴த்தகிச்சபரியோஸானேபிஸ்ஸ அத்தனோ குண்டி³காய உத³கம் அதா³ஸி.

ஏவம் ஆசரியவத்தம் கத்வா கதப⁴த்தகிச்சேன தே²ரேன ஸத்³தி⁴ம் மது⁴ரபடிஸந்தா²ரம் கத்வா ஏவமாஹ – ‘‘விப்பஸன்னானி கோ² பன தே, ஆவுஸோ, இந்த்³ரியானி, பரிஸுத்³தோ⁴ ச²விவண்ணோ பரியோதா³தோ, கம்ஸி த்வம், ஆவுஸோ, உத்³தி³ஸ்ஸ பப்³ப³ஜிதோ, கோ வா தே ஸத்தா², கஸ்ஸ வா த்வம் த⁴ம்மம் ரோசேஸீ’’தி புச்சி². தே²ரோ சிந்தேஸி – ‘‘இமே பரிப்³பா³ஜகா நாம ஸாஸனஸ்ஸ படிபக்க²பூ⁴தா, இமஸ்ஸ ஸாஸனஸ்ஸ க³ம்பீ⁴ரதம் த³ஸ்ஸேஸ்ஸாமீ’’தி. அத்தனோ நவகபா⁴வம் த³ஸ்ஸேந்தோ ஆஹ – ‘‘அஹம் கோ², ஆவுஸோ, நவோ அசிரபப்³ப³ஜிதோ, அது⁴னாக³தோ இமம் த⁴ம்மவினயம், ந தாவாஹம் ஸக்கி²ஸ்ஸாமி வித்தா²ரேன த⁴ம்மம் தே³ஸேது’’ந்தி. பரிப்³பா³ஜகோ – ‘‘அஹம் உபதிஸ்ஸோ நாம, த்வம் யதா²ஸத்தியா அப்பம் வா ப³ஹும் வா வத³, ஏதம் நயஸதேன நயஸஹஸ்ஸேன படிவிஜ்ஜி²தும் மய்ஹம் பா⁴ரோ’’தி சிந்தேத்வா ஆஹ –

‘‘அப்பம் வா ப³ஹும் வா பா⁴ஸஸ்ஸு, அத்த²ம்யேவ மே ப்³ரூஹி;

அத்தே²னேவ மே அத்தோ², கிம் காஹஸி ப்³யஞ்ஜனம் ப³ஹு’’ந்தி. (மஹாவ. 60);

ஏவம் வுத்தே தே²ரோ – ‘‘யே த⁴ம்மா ஹேதுப்பப⁴வா’’தி (மஹாவ. 60; அப. தே²ர 1.1.286) கா³த²மாஹ. பரிப்³பா³ஜகோ பட²மபத³த்³வயமேவ ஸுத்வா ஸஹஸ்ஸனயபடிமண்டி³தே ஸோதாபத்திப²லே பதிட்ட²ஹி, இதரம் பத³த்³வயம் ஸோதாபன்னகாலே நிட்டா²பேஸி. ஸோ ஸோதாபன்னோ ஹுத்வா உபரிவிஸேஸே அப்பவத்தந்தே ‘‘ப⁴விஸ்ஸதி ஏத்த² காரண’’ந்தி ஸல்லக்கே²த்வா தே²ரம் ஆஹ – ‘‘ப⁴ந்தே, மா உபரி த⁴ம்மதே³ஸனம் வட்³ட⁴யித்த², ஏத்தகமேவ ஹோது, குஹிம் அம்ஹாகம் ஸத்தா² வஸதீ’’தி? ‘‘வேளுவனே, ஆவுஸோ’’தி. ‘‘தேன ஹி, ப⁴ந்தே, தும்ஹே புரதோ யாத², மய்ஹம் ஏகோ ஸஹாயகோ அத்தி², அம்ஹேஹி ச அஞ்ஞமஞ்ஞம் கதிகா கதா ‘அம்ஹேஸு யோ அமதம் பட²மம் அதி⁴க³ச்ச²தி, ஸோ இதரஸ்ஸ ஆரோசேதூ’தி. அஹம் தம் படிஞ்ஞம் மோசேத்வா ஸஹாயகம் க³ஹேத்வா தும்ஹாகம் க³தமக்³கே³னேவ ஸத்து² ஸந்திகம் ஆக³மிஸ்ஸாமீதி பஞ்சபதிட்டி²தேன தே²ரஸ்ஸ பாதே³ஸு நிபதித்வா திக்க²த்தும் பத³க்கி²ணம் கத்வா தே²ரம் உய்யோஜேத்வா பரிப்³பா³ஜகாராமாபி⁴முகோ² அக³மாஸி’’.

அத² கோ² கோலிதபரிப்³பா³ஜகோ தம் தூ³ரதோவ ஆக³ச்ச²ந்தம் தி³ஸ்வா, ‘‘அஜ்ஜ மய்ஹம் ஸஹாயகஸ்ஸ முக²வண்ணோ ந அஞ்ஞதி³வஸேஸு விய, அத்³தா⁴ தேன அமதம் அதி⁴க³தம் ப⁴விஸ்ஸதீ’’தி அமதாதி⁴க³மம் புச்சி². ஸோபிஸ்ஸ ‘‘ஆமாவுஸோ, அமதம் அதி⁴க³த’’ந்தி படிஜானித்வா தமேவ கா³த²ம் அபா⁴ஸி. கா³தா²பரியோஸானே கோலிதோ ஸோதாபத்திப²லே பதிட்ட²ஹித்வா ஆஹ – ‘‘குஹிம் கிர, ஸம்ம, அம்ஹாகம் ஸத்தா² வஸதீ’’தி? ‘‘வேளுவனே கிர, ஸம்ம, ஏவம் நோ ஆசரியேன அஸ்ஸஜித்தே²ரேன கதி²த’’ந்தி. ‘‘தேன ஹி, ஸம்ம, ஆயாம, ஸத்தா²ரம் பஸ்ஸிஸ்ஸாமா’’தி. ஸாரிபுத்தத்தே²ரோ ச நாமேஸ ஸதா³பி ஆசரியபூஜகோவ, தஸ்மா ஸஹாயம் ஏவமாஹ – ‘‘ஸம்ம, அம்ஹேஹி அதி⁴க³தம் அமதம் அம்ஹாகம் ஆசரியஸ்ஸ ஸஞ்சயபரிப்³பா³ஜகஸ்ஸாபி கதே²ஸ்ஸாம, பு³ஜ்ஜ²மானோ படிவிஜ்ஜி²ஸ்ஸதி, அப்படிவிஜ்ஜ²ந்தோ அம்ஹாகம் ஸத்³த³ஹித்வா ஸத்து², ஸந்திகம் க³மிஸ்ஸதி, பு³த்³தா⁴னம் தே³ஸனம் ஸுத்வா மக்³க³ப²லபடிவேத⁴ம் கரிஸ்ஸதீ’’தி. ததோ த்³வேபி ஜனா ஸஞ்சயஸ்ஸ ஸந்திகம் அக³மம்ஸு.

ஸஞ்சயோ தே தி³ஸ்வாவ – ‘‘கிம், தாதா, கோசி வோ அமதமக்³க³தே³ஸகோ லத்³தோ⁴’’தி புச்சி². ‘‘ஆம, ஆசரிய, லத்³தோ⁴, பு³த்³தோ⁴ லோகே உப்பன்னோ, த⁴ம்மோ லோகே உப்பன்னோ, ஸங்கோ⁴ லோகே உப்பன்னோ, தும்ஹே துச்சே² அஸாரே விசரத², தஸ்மா ஏத², ஸத்து² ஸந்திகம் க³மிஸ்ஸாமா’’தி. ‘‘க³ச்ச²த² தும்ஹே, நாஹம் ஸக்கி²ஸ்ஸாமீ’’தி. ‘‘கிம் காரணாஹி’’? ‘‘அஹம் மஹாஜனஸ்ஸ ஆசரியோ ஹுத்வா விசரிம், விசரந்தஸ்ஸ மே அந்தேவாஸிகவாஸோ சாடியா உத³ஞ்சனபா⁴வப்பத்தி விய ஹோதி, ந ஸக்கி²ஸ்ஸாமஹம் அந்தேவாஸிகவாஸம் வஸிது’’ந்தி. ‘‘மா ஏவம் கரித்த², ஆசரியா’’தி. ‘‘ஹோது, தாதா, க³ச்ச²த² தும்ஹே, நாஹம் ஸக்கி²ஸ்ஸாமீ’’தி. ஆசரிய, லோகே பு³த்³த⁴ஸ்ஸ உப்பன்னகாலதோ பட்டா²ய மஹாஜனோ க³ந்த⁴மாலாதி³ஹத்தோ² க³ந்த்வா தமேவ பூஜேஸ்ஸதி, மயம்பி தத்தே²வ க³மிஸ்ஸாம. ‘‘தும்ஹே கிம் கரிஸ்ஸதா²’’தி? ‘‘தாதா, கிம் நு கோ² இமஸ்மிம் லோகே த³ந்தா⁴ ப³ஹூ, உதா³ஹு பண்டி³தா’’தி. ‘‘த³ந்தா⁴, ஆசரிய, ப³ஹூ, பண்டி³தா ச நாம கதிபயா ஏவ ஹோந்தீ’’தி. ‘‘தேன ஹி, தாதா, பண்டி³தா பண்டி³தஸ்ஸ ஸமணஸ்ஸ கோ³தமஸ்ஸ ஸந்திகம் க³மிஸ்ஸந்தி, த³ந்தா⁴ த³ந்த⁴ஸ்ஸ மம ஸந்திகம் ஆக³மிஸ்ஸந்தி, க³ச்ச²த² தும்ஹே, நாஹம் க³மிஸ்ஸாமீ’’தி. தே ‘‘பஞ்ஞாயிஸ்ஸத² தும்ஹே, ஆசரியா’’தி பக்கமிம்ஸு. தேஸு க³ச்ச²ந்தேஸு ஸஞ்சயஸ்ஸ பரிஸா பி⁴ஜ்ஜி, தஸ்மிம் க²ணே ஆராமோ துச்சோ² அஹோஸி. ஸோ துச்ச²ம் ஆராமம் தி³ஸ்வா உண்ஹம் லோஹிதம் ச²ட்³டே³ஸி. தேஹிபி ஸத்³தி⁴ம் க³ச்ச²ந்தேஸு பஞ்சஸு பரிப்³பா³ஜகஸதேஸு ஸஞ்சயஸ்ஸ அட்³ட⁴தேய்யஸதானி நிவத்திம்ஸு, அத² கோ² தே அத்தனோ அந்தேவாஸிகேஹி அட்³ட⁴தேய்யேஹி பரிப்³பா³ஜகஸதேஹி ஸத்³தி⁴ம் வேளுவனம் அக³மம்ஸு.

ஸத்தா² சதுபரிஸமஜ்ஜே² நிஸின்னோ த⁴ம்மம் தே³ஸேந்தோ தே தூ³ரதோவ தி³ஸ்வா பி⁴க்கூ² ஆமந்தேஸி – ‘‘ஏதே, பி⁴க்க²வே, த்³வே ஸஹாயகா ஆக³ச்ச²ந்தி கோலிதோ ச உபதிஸ்ஸோ ச, ஏதம் மே ஸாவகயுக³ம் ப⁴விஸ்ஸதி அக்³க³ம் ப⁴த்³த³யுக³’’ந்தி. தே ஸத்தா²ரம் வந்தி³த்வா ஏகமந்தம் நிஸீதி³ம்ஸு, நிஸீதி³த்வா ச பன ப⁴க³வந்தம் ஏதத³வோசும் – ‘‘லபே⁴ய்யாம மயம், ப⁴ந்தே, ப⁴க³வதோ ஸந்திகே பப்³ப³ஜ்ஜம், லபே⁴ய்யாம உபஸம்பத³’’ந்தி. ‘‘ஏத², பி⁴க்க²வோ’’தி ப⁴க³வா அவோச – ‘‘ஸ்வாக்கா²தோ த⁴ம்மோ, சரத² ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி. ஸப்³பே³பி இத்³தி⁴மயபத்தசீவரத⁴ரா ஸட்டி²வஸ்ஸிகத்தே²ரா விய அஹேஸும்.

அத² நேஸம் பரிஸாய சரிதவஸேன ஸத்தா² த⁴ம்மதே³ஸனம் வட்³டே⁴ஸி. ட²பேத்வா த்³வே அக்³க³ஸாவகே அவஸேஸா அரஹத்தம் பாபுணிம்ஸு, அக்³க³ஸாவகானம் பன உபரிமக்³க³த்தயகிச்சம் ந நிட்டா²ஸி. கிம் காரணா? ஸாவகபாரமிஞாணஸ்ஸ மஹந்ததாய. அதா²யஸ்மா மஹாமோக்³க³ல்லானோ பப்³ப³ஜிததி³வஸதோ ஸத்தமே தி³வஸே மக³த⁴ரட்டே² கல்லவாலகா³மகம் உபனிஸ்ஸாய விஹரந்தோ தி²னமித்³தே⁴ ஓக்கமந்தே ஸத்தா²ரா ஸம்வேஜிதோ தி²னமித்³த⁴ம் வினோதே³த்வா ததா²க³தேன தி³ன்னம் தா⁴துகம்மட்டா²னம் ஸுணந்தோவ உபரிமக்³க³த்தயகிச்சம் நிட்டா²பேத்வா ஸாவகபாரமிஞாணஸ்ஸ மத்த²கம் பத்தோ. ஸாரிபுத்தத்தே²ரோபி பப்³ப³ஜிததி³வஸதோ அட்³ட⁴மாஸம் அதிக்கமித்வா ஸத்தா²ரா ஸத்³தி⁴ம் தமேவ ராஜக³ஹம் உபனிஸ்ஸாய ஸூகரக²தலேணே விஹரந்தோ அத்தனோ பா⁴கி³னேய்யஸ்ஸ தீ³க⁴னக²பரிப்³பா³ஜகஸ்ஸ வேத³னாபரிக்³க³ஹஸுத்தந்தே தே³ஸியமானே ஸுத்தானுஸாரேன ஞாணம் பேஸேத்வா பரஸ்ஸ வட்³டி⁴தப⁴த்தம் பரிபு⁴ஞ்ஜந்தோ விய ஸாவகபாரமிஞாணஸ்ஸ மத்த²கம் பத்தோ. நனு சாயஸ்மா மஹாபஞ்ஞோ, அத² கஸ்மா மஹாமோக்³க³ல்லானதோ சிரதரேன ஸாவகபாரமிஞாணம் பாபுணீதி? பரிகம்மமஹந்ததாய. யதா² ஹி து³க்³க³தமனுஸ்ஸா யத்த² கத்த²சி க³ந்துகாமா கி²ப்பமேவ நிக்க²மந்தி, ராஜூனம் பன ஹத்தி²வாஹனகப்பனாதி³ம் மஹந்தம் பரிகம்மம் லத்³து⁴ம் வட்டதி, ஏவம்ஸம்பத³மித³ம் வேதி³தப்³ப³ம்.

தம் தி³வஸஞ்ஞேவ பன ஸத்தா² வட்³ட⁴மானகச்சா²யாய வேளுவனே ஸாவகஸன்னிபாதம் கத்வா த்³வின்னம் தே²ரானம் அக்³க³ஸாவகட்டா²னம் த³த்வா பாதிமோக்க²ம் உத்³தி³ஸி. பி⁴க்கூ² உஜ்ஜா²யிம்ஸு – ‘‘ஸத்தா² முகோ²லோகனேன பி⁴க்க²ம் தே³தி, அக்³க³ஸாவகட்டா²னம் த³த³ந்தேன நாம பட²மம் பப்³ப³ஜிதானம் பஞ்சவக்³கி³யானம் தா³தும் வட்டதி, ஏதே அனோலோகேந்தேன யஸதே²ரப்பமுகா²னம் பஞ்சபண்ணாஸபி⁴க்கூ²னம் தா³தும் வட்டதி, ஏதே அனோலோகேந்தேன ப⁴த்³த³வக்³கி³யானம் திம்ஸஜனானம், ஏதே அனோலோகேந்தேன உருவேலகஸ்ஸபாதீ³னம் தேபா⁴திகானம், ஏதே பன ஏத்தகே மஹாதே²ரே பஹாய ஸப்³ப³பச்சா² பப்³ப³ஜிதானம் அக்³க³ஸாவகட்டா²னம் த³த³ந்தேன முக²ம் ஓலோகேத்வா தி³ன்ன’’ந்தி. ஸத்தா², ‘‘கிம் கதே²த², பி⁴க்க²வே’’தி புச்சி²த்வா, ‘‘இத³ம் நாமா’’தி வுத்தே ‘‘நாஹம், பி⁴க்க²வே, முக²ம் ஓலோகேத்வா பி⁴க்க²ம் தே³மி, ஏதேஸம் பன அத்தனா அத்தனா பத்தி²தபத்தி²தமேவ தே³மி. அஞ்ஞாதகோண்ட³ஞ்ஞோ ஹி ஏகஸ்மிம் ஸஸ்ஸே நவ வாரே அக்³க³ஸஸ்ஸதா³னம் த³த³ந்தோ அக்³க³ஸாவகட்டா²னம் பத்தே²த்வா நாதா³ஸி, அக்³க³த⁴ம்மம் பன அரஹத்தம் ஸப்³ப³பட²மம் படிவிஜ்ஜி²தும் பத்தே²த்வா அதா³ஸீ’’தி. ‘‘கதா³ பன ப⁴க³வா’’தி? ‘‘ஸுணிஸ்ஸத², பி⁴க்க²வே’’தி. ‘‘ஆம, ப⁴ந்தே’’தி, ப⁴க³வா அதீதம் ஆஹரி –

பி⁴க்க²வே, இதோ ஏகனவுதிகப்பே விபஸ்ஸீ நாம ப⁴க³வா லோகே உத³பாதி³. ததா³ மஹாகாளோ சூளகாளோதி த்³வேபா⁴திகா குடும்பி³கா மஹந்தம் ஸாலிக்கே²த்தம் வபாபேஸும். அதே²கதி³வஸம் சூளகாளோ ஸாலிக்கே²த்தம் க³ந்த்வா ஏகம் ஸாலிக³ப்³ப⁴ம் பா²லேத்வா கா²தி³, தம் அதிமது⁴ரம் அஹோஸி. ஸோ பு³த்³த⁴ப்பமுக²ஸ்ஸ ஸங்க⁴ஸ்ஸ ஸாலிக³ப்³ப⁴தா³னம் தா³துகாமோ ஹுத்வா ஜேட்ட²பா⁴திகம் உபஸங்கமித்வா, ‘‘பா⁴திக, ஸாலிக³ப்³ப⁴ம் பா²லேத்வா பு³த்³தா⁴னம் அனுச்ச²விகம் கத்வா பசாபேத்வா தா³னம் தே³மா’’தி ஆஹ. ‘‘கிம் வதே³ஸி, தாத, ஸாலிக³ப்³ப⁴ம் பா²லேத்வா தா³னம் நாம நேவ அதீதே பூ⁴தபுப்³ப³ம், ந அனாக³தேபி ப⁴விஸ்ஸதி, மா ஸஸ்ஸம் நாஸயீ’’தி; வுத்தோபி ஸோ புனப்புனம் யாசியேவ. அத² நம் பா⁴தா, ‘‘தேன ஹி ஸாலிக்கே²த்தம் த்³வே கோட்டா²ஸே கத்வா மம கோட்டா²ஸம் அனாமஸித்வா அத்தனோ கோட்டா²ஸே கே²த்தே யம் இச்ச²ஸி, தம் கரோஹீ’’தி ஆஹ. ஸோ ‘‘ஸாதூ⁴’’தி கே²த்தம் விப⁴ஜித்வா ப³ஹூ மனுஸ்ஸே ஹத்த²கம்மம் யாசித்வா ஸாலிக³ப்³ப⁴ம் பா²லேத்வா நிருத³கேன கீ²ரேன பசாபேத்வா ஸப்பிமது⁴ஸக்க²ராதீ³ஹி யோஜேத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ தா³னம் த³த்வா ப⁴த்தகிச்சபரியோஸானே – ‘‘இத³ம், ப⁴ந்தே, மம அக்³க³தா³னம் அக்³க³த⁴ம்மஸ்ஸ ஸப்³ப³பட²மம் படிவேதா⁴ய ஸம்வத்ததூ’’தி ஆஹ. ஸத்தா² ‘‘ஏவம் ஹோதூ’’தி அனுமோத³னமகாஸி.

ஸோ கே²த்தம் க³ந்த்வா ஓலோகேந்தோ ஸகலக்கே²த்தம் கண்ணிகப³த்³தே⁴ஹி விய ஸாலிஸீஸேஹி ஸஞ்ச²ன்னம் தி³ஸ்வா பஞ்சவித⁴பீதிம் படிலபி⁴த்வா, ‘‘லாபா⁴ வத மே’’தி சிந்தேத்வா புது²ககாலே புது²கக்³க³ம் நாம அதா³ஸி, கா³மவாஸீஹி ஸத்³தி⁴ம் அக்³க³ஸஸ்ஸதா³னம் நாம அதா³ஸி, லாயனே லாயனக்³க³ம், வேணிகரணே வேணக்³க³ம், கலாபாதீ³ஸு கலாபக்³க³ம், க²லக்³க³ம், க²லப⁴ண்ட³க்³க³ம், கோட்ட²க்³க³ந்தி. ஏவம் ஏகஸஸ்ஸே நவ வாரே அக்³க³தா³னம் அதா³ஸி. தஸ்ஸ ஸப்³ப³வாரேஸு க³ஹிதக³ஹிதட்டா²னம் பரிபூரி, ஸஸ்ஸம் அதிரேகம் உட்டா²னஸம்பன்னம் அஹோஸி. த⁴ம்மோ ஹி நாமேஸ அத்தானம் ரக்க²ந்தம் ரக்க²தி. தேனாஹ ப⁴க³வா –

‘‘த⁴ம்மோ ஹவே ரக்க²தி த⁴ம்மசாரிம்,

த⁴ம்மோ ஸுசிண்ணோ ஸுக²மாவஹாதி;

ஏஸானிஸம்ஸோ த⁴ம்மே ஸுசிண்ணே,

ந து³க்³க³திம் க³ச்ச²தி த⁴ம்மசாரீ’’தி. (தே²ரகா³. 303; ஜா. 1.10.102) –

‘‘ஏவமேஸ விபஸ்ஸீஸம்மாஸம்பு³த்³த⁴காலே அக்³க³த⁴ம்மம் பட²மம் படிவிஜ்ஜி²தும் பத்தே²ந்தோ நவ வாரே அக்³க³தா³னானி அதா³ஸி. இதோ ஸதஸஹஸ்ஸகப்பமத்த²கே பன ஹம்ஸவதீனக³ரே பது³முத்தரஸம்பு³த்³த⁴காலேபி ஸத்தாஹம் மஹாதா³னம் த³த்வா தஸ்ஸ ப⁴க³வதோ பாத³மூலே நிபஜ்ஜித்வா அக்³க³த⁴ம்மஸ்ஸ பட²மம் படிவிஜ்ஜ²னத்த²மேவ பத்த²னம் ட²பேஸி. இதி இமினா பத்தி²தமேவ மயா தி³ன்னம், நாஹம், பி⁴க்க²வே, முக²ம் ஓலோகேத்வா தே³மீ’’தி.

‘‘யஸகுலபுத்தப்பமுகா² பஞ்சபஞ்ஞாஸ ஜனா கிம் கம்மம் கரிம்ஸு, ப⁴ந்தே’’தி? ‘‘ஏதேபி ஏகஸ்ஸ பு³த்³த⁴ஸ்ஸ ஸந்திகே அரஹத்தம் பத்தே²ந்தா ப³ஹும் புஞ்ஞகம்மம் கத்வா அபரபா⁴கே³ அனுப்பன்னே பு³த்³தே⁴ ஸஹாயகா ஹுத்வா வக்³க³ப³ந்த⁴னேன புஞ்ஞானி கரோந்தா அனாத²மதஸரீரானி படிஜக்³க³ந்தா விசரிம்ஸு. தே ஏகதி³வஸம் ஸக³ப்³ப⁴ம் இத்தி²ம் காலகதம் தி³ஸ்வா, ‘ஜா²பேஸ்ஸாமா’தி ஸுஸானம் ஹரிம்ஸு. தேஸு பஞ்ச ஜனே ‘தும்ஹே ஜா²பேதா²’தி ஸுஸானே ட²பேத்வா ஸேஸா கா³மம் பவிட்டா². யஸதா³ரகோ தம் மதஸரீரம் ஸூலேஹி விஜ்ஜி²த்வா பரிவத்தேத்வா பரிவத்தேத்வா ஜா²பேந்தோ அஸுப⁴ஸஞ்ஞம் படிலபி⁴, இதரேஸம்பி சதுன்னம் ஜனானம் – ‘பஸ்ஸத², போ⁴, இமம் ஸரீரம் தத்த² தத்த² வித்³த⁴ம்ஸிதசம்மம், கப³ரகோ³ரூபம் விய அஸுசிம் து³க்³க³ந்த⁴ம் படிகூல’ந்தி த³ஸ்ஸேஸி. தேபி தத்த² அஸுப⁴ஸஞ்ஞம் படிலபி⁴ம்ஸு. தே பஞ்சபி ஜனா கா³மம் க³ந்த்வா ஸேஸஸஹாயகானம் கத²யிம்ஸு. யஸோ பன தா³ரகோ கே³ஹம் க³ந்த்வா மாதாபிதூனஞ்ச ப⁴ரியாய ச கதே²ஸி. தே ஸப்³பே³பி அஸுப⁴ம் பா⁴வயிம்ஸு. இத³மேதேஸம் புப்³ப³கம்மம். தேனேவ யஸஸ்ஸ இத்தா²கா³ரே ஸுஸானஸஞ்ஞா உப்பஜ்ஜி, தாய ச உபனிஸ்ஸயஸம்பத்தியா ஸப்³பே³ஸம்பி விஸேஸாதி⁴க³மோ நிப்³ப³த்தி. ஏவம் இமேபி அத்தனா பத்தி²தமேவ லபி⁴ம்ஸு. நாஹம் முக²ம் ஓலோகேத்வா த³ம்மீ’’தி.

‘‘ப⁴த்³த³வக்³கி³யஸஹாயகா பன கிம் கம்மம் கரிம்ஸு, ப⁴ந்தே’’தி? ‘‘ஏதேபி புப்³ப³பு³த்³தா⁴னம் ஸந்திகே அரஹத்தம் பத்தே²த்வா புஞ்ஞானி கத்வா அபரபா⁴கே³ அனுப்பன்னே பு³த்³தே⁴ திம்ஸ து⁴த்தா ஹுத்வா துண்டி³லோவாத³ம் ஸுத்வா ஸட்டி²வஸ்ஸஸஹஸ்ஸானி பஞ்ச ஸீலானி ரக்கி²ம்ஸு. ஏவம் இமேபி அத்தனா பத்தி²தமேவ லபி⁴ம்ஸு. நாஹம் முக²ம் ஓலோகேத்வா த³ம்மீ’’தி.

‘‘உருவேலகஸ்ஸபாத³யோ பன கிம் கம்மம் கரிம்ஸு, ப⁴ந்தே’’தி? ‘‘தேபி அரஹத்தமேவ பத்தே²த்வா புஞ்ஞானி கரிம்ஸு. இதோ ஹி த்³வேனவுதிகப்பே திஸ்ஸோ பு²ஸ்ஸோதி த்³வே பு³த்³தா⁴ உப்பஜ்ஜிம்ஸு. பு²ஸ்ஸபு³த்³த⁴ஸ்ஸ மஹிந்தோ³ நாம ராஜா பிதா அஹோஸி. தஸ்மிம் பன ஸம்போ³தி⁴ம் பத்தே ரஞ்ஞோ கனிட்ட²புத்தோ பட²மஅக்³க³ஸாவகோ புரோஹிதபுத்தோ து³தியஅக்³க³ஸாவகோ அஹோஸி. ராஜா ஸத்து² ஸந்திகம் க³ந்த்வா – ‘ஜேட்ட²புத்தோ மே பு³த்³தோ⁴, கனிட்ட²புத்தோ பட²மஅக்³க³ஸாவகோ, புரோஹிதபுத்தோ து³தியஅக்³க³ஸாவகோ’தி தே ஓலோகேத்வா, ‘மமேவ பு³த்³தோ⁴, மமேவ த⁴ம்மோ, மமேவ ஸங்கோ⁴, நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸா’தி திக்க²த்தும் உதா³னம் உதா³னேத்வா ஸத்து² பாத³மூலே நிபஜ்ஜித்வா, ‘ப⁴ந்தே, இதா³னி மே நவுதிவஸ்ஸஸஹஸ்ஸபரிமாணஸ்ஸ ஆயுனோ கோடியம் நிஸீதி³த்வா நித்³தா³யனகாலோ விய அஞ்ஞேஸம் கே³ஹத்³வாரம் அக³ந்த்வா யாவாஹம் ஜீவாமி, தாவ மே சத்தாரோ பச்சயே அதி⁴வாஸேதா²’தி படிஞ்ஞம் க³ஹேத்வா நிப³த்³த⁴ம் பு³த்³து⁴பட்டா²னம் கரோதி. ரஞ்ஞோ பன அபரேபி ததோ புத்தா அஹேஸும். தேஸு ஜேட்ட²ஸ்ஸ பஞ்ச யோத⁴ஸதானி பரிவாரானி, மஜ்ஜி²மஸ்ஸ தீணி, கனிட்ட²ஸ்ஸ த்³வே. தே ‘மயம்பி பா⁴திகம் போ⁴ஜேஸ்ஸாமா’தி பிதரம் ஓகாஸம் யாசித்வா அலப⁴மானா புனப்புனம் யாசந்தாபி அலபி⁴த்வா பச்சந்தே குபிதே தஸ்ஸ வூபஸமனத்தா²ய பேஸிதா பச்சந்தம் வூபஸமேத்வா பிது ஸந்திகம் ஆக³மிம்ஸு. அத² நே பிதா ஆலிங்கி³த்வா ஸீஸே சும்பி³த்வா, ‘வரம் வோ, தாதா, த³ம்மீ’தி ஆஹ.

‘‘தே ‘ஸாது⁴ தே³வா’தி வரம் க³ஹிதகம் கத்வா புன கதிபாஹச்சயேன பிதரா ‘க³ண்ஹத², தாதா, வர’ந்தி வுத்தா, ‘‘தே³வ, அம்ஹாகம் அஞ்ஞேன கேனசி அத்தோ² நத்தி², இதோ பட்டா²ய மயம் பா⁴திகம் போ⁴ஜேஸ்ஸாம, இமம் நோ வரம் தே³ஹீ’’தி ஆஹம்ஸு. ‘ந தே³மி, தாதா’தி. ‘நிச்சகாலம் அதே³ந்தோ ஸத்த ஸம்வச்ச²ரானி தே³த², தே³வா’தி. ‘ந தே³மி, தாதா’தி. ‘தேன ஹி ச² பஞ்ச சத்தாரி தீணி த்³வே ஏகம் ஸம்வச்ச²ரம் தே³த², தே³வா’தி. ‘ந தே³மி, தாதா’தி. ‘தேன ஹி, தே³வ, ஸத்த மாஸே தே³தா²’தி. ‘ச² மாஸே பஞ்ச மாஸே சத்தாரோ மாஸே தயோ மாஸே தே³த², தே³வா’தி. ‘ந தே³மி, தாதா’தி. ‘ஹோது, தே³வ, ஏகேகஸ்ஸ நோ ஏகேகம் மாஸம் கத்வா தயோ மாஸே தே³தா²’தி. ‘ஸாது⁴, தாதா, தேன ஹி தயோ மாஸே போ⁴ஜேதா²’தி ஆஹ. தே துட்டா² ராஜானம் வந்தி³த்வா ஸகட்டா²னமேவ க³தா. தேஸம் பன திண்ணம்பி ஏகோவ கோட்டா²கா³ரிகோ, ஏகோவ ஆயுத்தகோ, தஸ்ஸ த்³வாத³ஸனஹுதா புரிஸபரிவாரா. தே தே பக்கோஸாபேத்வா, ‘மயம் இமம் தேமாஸம் த³ஸ ஸீலானி க³ஹேத்வா த்³வே காஸாவானி நிவாஸேத்வா ஸத்தா²ரா ஸஹவாஸம் வஸிஸ்ஸாம, தும்ஹே ஏத்தகம் நாம தா³னவத்தம் க³ஹேத்வா தே³வஸிகம் நவுதிஸஹஸ்ஸானம் பி⁴க்கூ²னம் யோத⁴ஸஹஸ்ஸஸ்ஸ ச ஸப்³ப³ம் கா²த³னீயபோ⁴ஜனீயம் பவத்தேய்யாத². மயஞ்ஹி இதோ பட்டா²ய ந கிஞ்சி வக்கா²மா’தி வதி³ம்ஸு.

‘‘தே தயோபி ஜனா பரிவாரஸஹஸ்ஸம் க³ஹேத்வா த³ஸ ஸீலானி ஸமாதா³ய காஸாயவத்தா²னி நிவாஸேத்வா விஹாரேயேவ வஸிம்ஸு. கோட்டா²கா³ரிகோ ச ஆயுத்தகோ ச ஏகதோ ஹுத்வா திண்ணம் பா⁴திகானம் கோட்டா²கா³ரேஹி வாரேன வாரேன தா³னவத்தம் க³ஹேத்வா தா³னம் தே³ந்தி, கம்மகாரானம் பன புத்தா யாகு³ப⁴த்தாதீ³னம் அத்தா²ய ரோத³ந்தி. தே தேஸம் பி⁴க்கு²ஸங்கே⁴ அனாக³தேயேவ யாகு³ப⁴த்தாதீ³னி தே³ந்தி. பி⁴க்கு²ஸங்க⁴ஸ்ஸ ப⁴த்தகிச்சாவஸானே கிஞ்சி அதிரேகம் ந பூ⁴தபுப்³ப³ம். தே ‘அபரபா⁴கே³ தா³ரகானம் தே³மா’தி அத்தனாபி க³ஹேத்வா கா²தி³ம்ஸு. மனுஞ்ஞம் ஆஹாரம் தி³ஸ்வா அதி⁴வாஸேதும் நாஸக்கி²ம்ஸு. தே பன சதுராஸீதிஸஹஸ்ஸா அஹேஸும். தே ஸங்க⁴ஸ்ஸ தி³ன்னதா³னவத்தம் கா²தி³த்வா காயஸ்ஸ பே⁴தா³ பரம் மரணா பேத்திவிஸயே நிப்³ப³த்திம்ஸு. தேபா⁴திகா பன புரிஸஸஹஸ்ஸேன ஸத்³தி⁴ம் காலம் கத்வா தே³வலோகே நிப்³ப³த்தித்வா தே³வலோகா மனுஸ்ஸலோகம், மனுஸ்ஸலோகா தே³வலோகம் ஸம்ஸரந்தா த்³வேனவுதிகப்பே கே²பேஸும். ‘ஏவம் தே தயோ பா⁴தரோ அரஹத்தம் பத்தே²ந்தா ததா³ கல்யாணகம்மம் கரிம்ஸு. தே அத்தனா பத்தி²தமேவ லபி⁴ம்ஸு. நாஹம் முக²ம் ஓலோகேத்வா த³ம்மீ’’’தி.

ததா³ பன தேஸம் ஆயுத்தகோ பி³ம்பி³ஸாரோ ராஜா அஹோஸி, கோட்டா²கா³ரிகோ விஸாகோ² உபாஸகோ. தயோ ராஜகுமாரா தயோ ஜடிலா அஹேஸும். தேஸம் கம்மகாரா ததா³ பேதேஸு நிப்³ப³த்தித்வா ஸுக³திது³க்³க³திவஸேன ஸம்ஸரந்தா இமஸ்மிம் கப்பே சத்தாரி பு³த்³த⁴ந்தரானி பேதலோகேயேவ நிப்³ப³த்திம்ஸு. தே இமஸ்மிம் கப்பே ஸப்³ப³பட²மம் உப்பன்னம் சத்தாலீஸவஸ்ஸஸஹஸ்ஸாயுகம் ககுஸந்த⁴ம் ப⁴க³வந்தம் உபஸங்கமித்வா, ‘‘அம்ஹாகம் ஆஹாரம் லப⁴னகாலம் ஆசிக்க²தா²’’தி புச்சி²ம்ஸு. ஸோ ‘‘மம தாவ காலே ந லபி⁴ஸ்ஸத², மம பச்ச²தோ மஹாபத²வியா யோஜனமத்தம் அபி⁴ருள்ஹாய கோணாக³மனோ நாம பு³த்³தோ⁴ உப்பஜ்ஜிஸ்ஸதி, தம் புச்சே²ய்யாதா²’’தி ஆஹ. தே தத்தகம் காலம் கே²பேத்வா தஸ்மிம் உப்பன்னே தம் புச்சி²ம்ஸு. ஸோபி ‘‘மம காலே ந லபி⁴ஸ்ஸத², மம பச்ச²தோ மஹாபத²வியா யோஜனமத்தம் அபி⁴ருள்ஹாய கஸ்ஸபோ நாம பு³த்³தோ⁴ உப்பஜ்ஜிஸ்ஸதி, தம் புச்சே²ய்யாதா²’’தி ஆஹ. தே தத்தகம் காலம் கே²பேத்வா தஸ்மிம் உப்பன்னே தம் புச்சி²ம்ஸு. ஸோபி ‘‘மம காலே ந லபி⁴ஸ்ஸத², மம பன பச்ச²தோ மஹாபத²வியா யோஜனமத்தம் அபி⁴ருள்ஹாய கோ³தமோ நாம பு³த்³தோ⁴ உப்பஜ்ஜிஸ்ஸதி, ததா³ தும்ஹாகம் ஞாதகோ பி³ம்பி³ஸாரோ நாம ராஜா ப⁴விஸ்ஸதி, ஸோ ஸத்து² தா³னம் த³த்வா தும்ஹாகம் பத்திம் பாபேஸ்ஸதி, ததா³ லபி⁴ஸ்ஸதா²’’தி ஆஹ. தேஸம் ஏகம் பு³த்³த⁴ந்தரம் ஸ்வேதி³வஸஸதி³ஸம் அஹோஸி. தே ததா²க³தே உப்பன்னே பி³ம்பி³ஸாரரஞ்ஞா பட²மதி³வஸம் தா³னே தி³ன்னே பத்திம் அலபி⁴த்வா ரத்திபா⁴கே³ பே⁴ரவஸத்³த³ம் கத்வா ரஞ்ஞோ அத்தானம் த³ஸ்ஸயிம்ஸு. ஸோ புனதி³வஸே வேளுவனம் க³ந்த்வா ததா²க³தஸ்ஸ தம் பவத்திம் ஆரோசேஸி.

ஸத்தா², ‘‘மஹாராஜ, இதோ த்³வேனவுதிகப்பமத்த²கே பு²ஸ்ஸபு³த்³த⁴காலே ஏதே தவ ஞாதகா, பி⁴க்கு²ஸங்க⁴ஸ்ஸ தி³ன்னதா³னவத்தம் கா²தி³த்வா பேதலோகே நிப்³ப³த்தித்வா ஸம்ஸரந்தா ககுஸந்தா⁴த³யோ பு³த்³தே⁴ புச்சி²த்வா தேஹி இத³ஞ்சித³ஞ்ச வுத்தா ஏத்தகம் காலம் தவ தா³னம் பச்சாஸீஸமானா ஹிய்யோ தயா தா³னே தி³ன்னே பத்திம் அலப⁴மானா ஏவமகம்ஸூ’’தி ஆஹ. ‘‘கிம் பன, ப⁴ந்தே, இதா³னிபி தி³ன்னே லபி⁴ஸ்ஸந்தீ’’தி? ‘‘ஆம, மஹாராஜா’’தி. ராஜா பு³த்³த⁴ப்பமுக²ம் பி⁴க்கு²ஸங்க⁴ம் நிமந்தேத்வா புனதி³வஸே மஹாதா³னம் த³த்வா, ‘‘ப⁴ந்தே, இதோ தேஸம் பேதானம் தி³ப்³ப³அன்னபானம் ஸம்பஜ்ஜதூ’’தி பத்திம் அதா³ஸி, தேஸம் ததே²வ நிப்³ப³த்தி. புனதி³வஸே நக்³கா³ ஹுத்வா அத்தானம் த³ஸ்ஸேஸும். ராஜா ‘‘அஜ்ஜ, ப⁴ந்தே, நக்³கா³ ஹுத்வா அத்தானம் த³ஸ்ஸேஸு’’ந்தி ஆரோசேஸி. ‘‘வத்தா²னி தே ந தி³ன்னானி, மஹாராஜா’’தி. ராஜாபி புனதி³வஸே பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ சீவரதா³னம் த³த்வா, ‘‘இதோ தேஸம் பேதானம் தி³ப்³ப³வத்தா²னி ஹோந்தூ’’தி பாபேஸி. தங்க²ணஞ்ஞேவ தேஸம் தி³ப்³ப³வத்தா²னி உப்பஜ்ஜிம்ஸு. தே பேதத்தபா⁴வம் விஜஹித்வா தி³ப்³ப³த்தபா⁴வே ஸண்ட²ஹிம்ஸு. ஸத்தா² அனுமோத³னம் கரோந்தோ ‘‘திரோகுட்டேஸு திட்ட²ந்தீ’’திஆதி³னா (கு². பா. 7.1; பே. வ. 14) திரோகுட்டானுமோத³னம் அகாஸி. அனுமோத³னாவஸானே சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸி. இதி ஸத்தா² தேபா⁴திகஜடிலானம் வத்து²ம் கதே²த்வா இமம்பி த⁴ம்மதே³ஸனம் ஆஹரி.

அக்³க³ஸாவகா பன, ‘‘ப⁴ந்தே, கிம் கரிம்ஸூ’’தி? ‘‘அக்³க³ஸாவகபா⁴வாய பத்த²னம் கரிம்ஸு’’. இதோ கப்பஸதஸஹஸ்ஸாதி⁴கஸ்ஸ ஹி கப்பானம் அஸங்க்²யேய்யஸ்ஸ மத்த²கே ஸாரிபுத்தோ ப்³ராஹ்மணமஹாஸாலகுலே நிப்³ப³த்தி, நாமேன ஸரத³மாணவோ நாம அஹோஸி. மோக்³க³ல்லானோ க³ஹபதிமஹாஸாலகுலே நிப்³ப³த்தி, நாமேன ஸிரிவட்³ட⁴னகுடும்பி³கோ நாம அஹோஸி. தே உபோ⁴பி ஸஹபம்ஸுகீளகா ஸஹாயகா அஹேஸும். தேஸு ஸரத³மாணவோ பிது அச்சயேன குஸலந்தகம் மஹாத⁴னம் படிபஜ்ஜித்வா ஏகதி³வஸம் ரஹோக³தோ சிந்தேஸி – ‘‘அஹம் இத⁴லோகத்தபா⁴வமேவ ஜானாமி, நோ பரலோகத்தபா⁴வம். ஜாதஸத்தானஞ்ச மரணம் நாம து⁴வம், மயா ஏகம் பப்³ப³ஜ்ஜம் பப்³ப³ஜித்வா மோக்க²த⁴ம்மக³வேஸனம் காதும் வட்டதீ’’தி. ஸோ ஸஹாயகம் உபஸங்கமித்வா ஆஹ – ‘‘ஸம்ம ஸிரிவட்³ட⁴ன, அஹம் பப்³ப³ஜித்வா மோக்க²த⁴ம்மம் க³வேஸிஸ்ஸாமி, த்வம் மயா ஸத்³தி⁴ம் பப்³ப³ஜிதும் ஸக்கி²ஸ்ஸஸி, ந ஸக்கி²ஸ்ஸஸீ’’தி? ‘‘ந ஸக்கி²ஸ்ஸாமி, ஸம்ம, த்வம்யேவ பப்³ப³ஜாஹீ’’தி. ஸோ சிந்தேஸி – ‘‘பரலோகம் க³ச்ச²ந்தோ ஸஹாயே வா ஞாதிமித்தே வா க³ஹேத்வா க³தோ நாம நத்தி², அத்தனா கதம் அத்தனோவ ஹோதீ’’தி. ததோ ரதனகோட்டா²கா³ரம் விவராபேத்வா கபணத்³தி⁴கவணிப்³ப³கயாசகானம் மஹாதா³னம் த³த்வா பப்³ப³தபாத³ம் பவிஸித்வா இஸிபப்³ப³ஜ்ஜம் பப்³ப³ஜி. தஸ்ஸ ஏகோ த்³வே தயோதி ஏவம் அனுபப்³ப³ஜ்ஜம் பப்³ப³ஜிதா சதுஸத்ததிஸஹஸ்ஸமத்தா ஜடிலா அஹேஸும். ஸோ பஞ்ச அபி⁴ஞ்ஞா, அட்ட² ச ஸமாபத்தியோ நிப்³ப³த்தேத்வா தேஸம் ஜடிலானம் கஸிணபரிகம்மம் ஆசிக்கி². தேபி ஸப்³பே³ பஞ்ச அபி⁴ஞ்ஞா அட்ட² ச ஸமாபத்தியோ நிப்³ப³த்தேஸும்.

தேன ஸமயேன அனோமத³ஸ்ஸீ நாம ஸம்மாஸம்பு³த்³தோ⁴ லோகே உத³பாதி³. நக³ரம் சந்த³வதீ நாம அஹோஸி, பிதா யஸவா நாம க²த்தியோ, மாதா யஸோத⁴ரா நாம தே³வீ, போ³தி⁴ அஜ்ஜுனருக்கோ², நிஸபோ⁴ ச அனோமோ ச த்³வே அக்³க³ஸாவகா, வருணோ நாம உபட்டா²கோ, ஸுந்த³ரா ச ஸுமனா ச த்³வே அக்³க³ஸாவிகா அஹேஸும். ஆயு வஸ்ஸஸதஸஹஸ்ஸம் அஹோஸி, ஸரீரம் அட்ட²பஞ்ஞாஸஹத்து²ப்³பே³த⁴ம், ஸரீரப்பபா⁴ த்³வாத³ஸயோஜனம் ப²ரி, பி⁴க்கு²ஸதஸஹஸ்ஸபரிவாரோ அஹோஸி. ஸோ ஏகதி³வஸம் பச்சூஸகாலே மஹாகருணாஸமாபத்திதோ வுட்டா²ய லோகம் வோலோகேந்தோ ஸரத³தாபஸம் தி³ஸ்வா, ‘‘அஜ்ஜ மய்ஹம் ஸரத³தாபஸஸ்ஸம் ஸந்திகம் க³தபச்சயேன த⁴ம்மதே³ஸனா ச மஹதீ ப⁴விஸ்ஸதி, ஸோ ச அக்³க³ஸாவகட்டா²னம் பத்தே²ஸ்ஸதி, தஸ்ஸ ஸஹாயகோ ஸிரிவட்³ட⁴னகுடும்பி³கோ து³தியஸாவகட்டா²னம், தே³ஸனாபரியோஸானே சஸ்ஸ பரிவாரா சதுஸத்ததிஸஹஸ்ஸமத்தா ஜடிலா அரஹத்தம் பாபுணிஸ்ஸந்தி, மயா தத்த² க³ந்தும் வட்டதீ’’தி அத்தனோ பத்தசீவரமாதா³ய அஞ்ஞம் கஞ்சி அனாமந்தேத்வா ஸீஹோ விய ஏகசரோ ஹுத்வா ஸரத³தாபஸஸ்ஸ அந்தேவாஸிகேஸு ப²லாப²லத்தா²ய க³தேஸு ‘‘பு³த்³த⁴பா⁴வம் மே ஜானாதூ’’தி அதி⁴ட்ட²ஹித்வா பஸ்ஸந்தஸ்ஸேவ ஸரத³தாபஸஸ்ஸ ஆகாஸதோ ஓதரித்வா பத²வியம் பதிட்டா²ஸி. ஸரத³தாபஸோ பு³த்³தா⁴னுபா⁴வஞ்சேவ ஸரீரனிப்ப²த்திஞ்சஸ்ஸ தி³ஸ்வா லக்க²ணமந்தே ஸம்மஸித்வா ‘‘இமேஹி லக்க²ணேஹி ஸமன்னாக³தோ நாம அகா³ரமஜ்ஜே² வஸந்தோ ராஜா ஹோதி சக்கவத்தீ, பப்³ப³ஜந்தோ லோகே விவட்டச்ச²தோ³ ஸப்³ப³ஞ்ஞுபு³த்³தோ⁴ ஹோதி. அயம் புரிஸோ நிஸ்ஸம்ஸயம் பு³த்³தோ⁴’’தி ஜானித்வா பச்சுக்³க³மனம் கத்வா பஞ்சபதிட்டி²தேன வந்தி³த்வா அக்³கா³ஸனம் பஞ்ஞாபேத்வா அதா³ஸி. நிஸீதி³ ப⁴க³வா பஞ்ஞத்தே அக்³கா³ஸனே. ஸரத³தாபஸோபி அத்தனோ அனுச்ச²விகம் ஆஸனம் க³ஹேத்வா ஏகமந்தம் நிஸீதி³.

தஸ்மிம் ஸமயே சதுஸத்ததிஸஹஸ்ஸஜடிலா பணீதபணீதானி ஓஜவந்தானி ப²லாப²லானி க³ஹேத்வா ஆசரியஸ்ஸ ஸந்திகம் ஸம்பத்தா பு³த்³தா⁴னஞ்சேவ ஆசரியஸ்ஸ ச நிஸின்னாஸனம் ஓலோகேத்வா ஆஹம்ஸு – ‘‘ஆசரிய, மயம் ‘இமஸ்மிம் லோகே தும்ஹேஹி மஹந்ததரோ நத்தீ²’தி விசராம, அயம் பன புரிஸோ தும்ஹேஹி மஹந்ததரோ மஞ்ஞே’’தி? ‘‘தாதா, கிம் வதே³த², ஸாஸபேன ஸத்³தி⁴ம் அட்ட²ஸட்டி²யோஜனஸதஸஹஸ்ஸுப்³பே³த⁴ம் ஸினேரும் ஸமம் காதும் இச்ச²த², ஸப்³ப³ஞ்ஞுபு³த்³தே⁴ன ஸத்³தி⁴ம் மமம் உபமம் மா கரித்த² புத்தகா’’தி. அத² தே தாபஸா, ‘‘ஸசாயம் இத்தரஸத்தோ அப⁴விஸ்ஸ, அம்ஹாகம் ஆசரியோ ந ஏவரூபம் உபமம் ஆஹரிஸ்ஸ, யாவ மஹா வதாயம் புரிஸோ’’தி ஸப்³பே³வ பாதே³ஸு நிபதித்வா ஸிரஸா வந்தி³ம்ஸு. அத² நே ஆசரியோ ஆஹ – ‘‘தாதா, அம்ஹாகம் பு³த்³தா⁴னம் அனுச்ச²விகோ தே³ய்யத⁴ம்மோ நத்தி², ஸத்தா² ச பி⁴க்கா²சாரவேலாயம் இதா⁴க³தோ, மயம் யதா²ஸத்தி யதா²ப³லம் தே³ய்யத⁴ம்மம் த³ஸ்ஸாம, தும்ஹே யம் யம் பணீதம் ப²லாப²லம், தம் தம் ஆஹரதா²’’தி ஆஹராபேத்வா ஹத்தே² தோ⁴வித்வா ஸயம் ததா²க³தஸ்ஸ பத்தே பதிட்டா²பேஸி. ஸத்தா²ரா ப²லாப²லே படிக்³க³ஹிதமத்தே தே³வதா தி³ப்³போ³ஜம் பக்கி²பிம்ஸு. ஸோ தாபஸோ உத³கம்பி ஸயமேவ பரிஸ்ஸாவேத்வா அதா³ஸி. ததோ ப⁴த்தகிச்சம் கத்வா நிஸின்னே ஸத்த²ரி ஸப்³பே³ அந்தேவாஸிகே பக்கோஸித்வா ஸத்து² ஸந்திகே ஸாரணீயகத²ம் கதே²ந்தோ நிஸீதி³. ஸத்தா² ‘‘த்³வே அக்³க³ஸாவகா பி⁴க்கு²ஸங்கே⁴ன ஸத்³தி⁴ம் ஆக³ச்ச²ந்தூ’’தி சிந்தேஸி. தே ஸத்து² சித்தம் ஞத்வா ஸதஸஹஸ்ஸகீ²ணாஸவபரிவாரா ஆக³ந்த்வா ஸத்தா²ரம் வந்தி³த்வா ஏகமந்தம் அட்ட²ம்ஸு.

ததோ ஸரத³தாபஸோ அந்தேவாஸிகே ஆமந்தேஸி – ‘‘தாதா, பு³த்³தா⁴னம் நிஸின்னாஸனம்பி நீசம், ஸமணஸதஸஹஸ்ஸானம்பி ஆஸனம் நத்தி², அஜ்ஜ தும்ஹேஹி உளாரம் பு³த்³த⁴ஸக்காரம் காதும் வட்டதி, பப்³ப³தபாத³தோ வண்ணக³ந்த⁴ஸம்பன்னானி புப்பா²னி ஆஹரதா²’’தி. கத²னகாலோ பபஞ்சோ விய ஹோதி, இத்³தி⁴மதோ பன இத்³தி⁴விஸயோ அசிந்தேய்யோதி முஹுத்தமத்தேனேவ தே தாபஸா வண்ணக³ந்த⁴ஸம்பன்னானி புப்பா²னி ஆஹரித்வா பு³த்³தா⁴னம் யோஜனப்பமாணம் புப்பா²ஸனம் பஞ்ஞாபேஸும். உபி⁴ன்னம் அக்³க³ஸாவகானம் திகா³வுதம், ஸேஸபி⁴க்கூ²னம் அட்³ட⁴யோஜனிகாதி³பே⁴த³ம், ஸங்க⁴னவகஸ்ஸ உஸப⁴மத்தம் அஹோஸி. ‘‘கத²ம் ஏகஸ்மிம் அஸ்ஸமபதே³ தாவ மஹந்தானி ஆஸனானி பஞ்ஞத்தானீ’’தி ந சிந்தேதப்³ப³ம். இத்³தி⁴விஸயோ ஹேஸ. ஏவம் பஞ்ஞத்தேஸு ஆஸனேஸு ஸரத³தாபஸோ ததா²க³தஸ்ஸ புரதோ அஞ்ஜலிம் பக்³க³ய்ஹ டி²தோ, ‘‘ப⁴ந்தே, மய்ஹம் தீ³க⁴ரத்தம் ஹிதாய ஸுகா²ய இமம் புப்பா²ஸனம் அபி⁴ருஹதா²’’தி ஆஹ. தேன வுத்தம் –

‘‘நானாபுப்ப²ஞ்ச க³ந்த⁴ஞ்ச, ஸம்பாதே³த்வான ஏகதோ;

புப்பா²ஸனம் பஞ்ஞாபேத்வா, இத³ம் வசனமப்³ரவி.

‘‘இத³ம் மே ஆஸனம் வீர, பஞ்ஞத்தம் தவனுச்ச²விம்;

மம சித்தம் பஸாதே³ந்தோ, நிஸீத³ புப்ப²மாஸனே.

‘‘ஸத்தரத்திந்தி³வம் பு³த்³தோ⁴, நிஸீதி³ புப்ப²மாஸனே;

மம சித்தம் பஸாதே³த்வா, ஹாஸயித்வா ஸதே³வகே’’தி.

ஏவம் நிஸின்னே ஸத்த²ரி த்³வே அக்³க³ஸாவகா ஸேஸபி⁴க்கூ² ச அத்தனோ அத்தனோ பத்தாஸனே நிஸீதி³ம்ஸு. ஸரத³தாபஸோ மஹந்தம் புப்ப²ச்ச²த்தம் க³ஹேத்வா ததா²க³தஸ்ஸ மத்த²கே தா⁴ரேந்தோ அட்டா²ஸி. ஸத்தா² ‘‘ஜடிலானம் அயம் ஸக்காரோ மஹப்ப²லோ ஹோதூ’’தி நிரோத⁴ஸமாபத்திம் ஸமாபஜ்ஜி. ஸத்து² ஸமாபத்திம் ஸமாபன்னபா⁴வம் ஞத்வா த்³வே அக்³க³ஸாவகாபி ஸேஸபி⁴க்கூ²பி ஸமாபத்திம் ஸமாபஜ்ஜிம்ஸு. ததா²க³தே ஸத்தாஹம் நிரோத⁴ஸமாபத்திம் ஸமாபஜ்ஜித்வா நிஸின்னே அந்தேவாஸிகா பி⁴க்கா²சாரகாலே ஸம்பத்தே வனமூலப²லாப²லம் பரிபு⁴ஞ்ஜித்வா ஸேஸகாலே பு³த்³தா⁴னம் அஞ்ஜலிம் பக்³க³ய்ஹ திட்ட²ந்தி. ஸரத³தாபஸோ பன பி⁴க்கா²சாரம்பி அக³ந்த்வா புப்ப²ச்ச²த்தம் தா⁴ரயமானோவ ஸத்தாஹம் பீதிஸுகே²ன வீதினாமேஸி. ஸத்தா² நிரோத⁴தோ வுட்டா²ய த³க்கி²ணபஸ்ஸே நிஸின்னம் பட²மஅக்³க³ஸாவகம் நிஸப⁴த்தே²ரம் ஆமந்தேஸி – ‘‘நிஸப⁴, ஸக்காரகாரகானம் தாபஸானம் புப்பா²ஸனானுமோத³னம் கரோஹீ’’தி. தே²ரோ சக்கவத்திரஞ்ஞோ ஸந்திகா படிலத்³த⁴மஹாலாபோ⁴ மஹாயோதோ⁴ விய துட்ட²மானஸோ ஸாவகபாரமிஞாணே ட²த்வா புப்பா²ஸனானுமோத³னம் ஆரபி⁴. தஸ்ஸ தே³ஸனாவஸானே து³தியஸாவகம் ஆமந்தேஸி – ‘‘த்வம்பி பி⁴க்கு² த⁴ம்மம் தே³ஸேஹீ’’தி. அனோமத்தே²ரோ தேபிடகம் பு³த்³த⁴வசனம் ஸம்மஸித்வா த⁴ம்மம் கதே²ஸி. த்³வின்னம் அக்³க³ஸாவகானம் தே³ஸனாய ஏகஸ்ஸாபி அபி⁴ஸமயோ நாஹோஸி. அத² ஸத்தா² அபரிமாணே பு³த்³த⁴விஸயே ட²த்வா த⁴ம்மதே³ஸனம் ஆரபி⁴. தே³ஸனாபரியோஸானே ட²பேத்வா ஸரத³தாபஸம் ஸப்³பே³பி சதுஸத்ததிஸஹஸ்ஸஜடிலா அரஹத்தம் பாபுணிம்ஸு, ஸத்தா² ‘‘ஏத², பி⁴க்க²வோ’’தி ஹத்த²ம் பஸாரேஸி. தேஸம் தாவதே³வ கேஸமஸ்ஸூனி அந்தரதா⁴யிம்ஸு, அட்ட²பரிக்கா²ரா காயே படிமுக்காவ அஹேஸும்.

ஸரத³தாபஸோ ‘‘கஸ்மா அரஹத்தம் ந பத்தோ’’தி? விக்கி²த்தசித்தத்தா. ஸோ கிர பு³த்³தா⁴னம் து³தியாஸனே நிஸீதி³த்வா ஸாவகபாரமிஞாணே ட²த்வா த⁴ம்மம் தே³ஸயதோ அக்³க³ஸாவகஸ்ஸ த⁴ம்மதே³ஸனம் ஸோதும் ஆரத்³த⁴காலதோ பட்டா²ய, ‘‘அஹோ வதாஹம்பி அனாக³தே உப்பஜ்ஜனகபு³த்³த⁴ஸ்ஸ ஸாஸனே இமினா ஸாவகேன படிலத்³த⁴து⁴ரம் லபே⁴ய்ய’’ந்தி சித்தம் உப்பாதே³ஸி. ஸோ தேன பரிவிதக்கேன மக்³க³ப²லபடிவேத⁴ம் காதும் நாஸக்கி². ததா²க³தம் பன வந்தி³த்வா ஸம்முகே² ட²த்வா ஆஹ – ‘‘ப⁴ந்தே, தும்ஹாகம் அனந்தராஸனே நிஸின்னோ பி⁴க்கு² தும்ஹாகம் ஸாஸனே கோ நாம ஹோதீ’’தி? ‘‘மயா பவத்திதம் த⁴ம்மசக்கம் அனுபவத்தேந்தோ ஸாவகபாரமிஞாணஸ்ஸ கோடிப்பத்தோ ஸோளஸ பஞ்ஞா படிவிஜ்ஜி²த்வா டி²தோ மய்ஹம் ஸாஸனே அக்³க³ஸாவகோ நிஸபோ⁴ நாம ஏஸோ’’தி. ‘‘ப⁴ந்தே, ய்வாயம் மயா ஸத்தாஹம் புப்ப²ச்ச²த்தம் தா⁴ரேந்தேன ஸக்காரோ கதோ, அஹம் இமஸ்ஸ ப²லேன அஞ்ஞம் ஸக்கத்தம் வா ப்³ரஹ்மத்தம் வா ந பத்தே²மி, அனாக³தே பன அயம் நிஸப⁴த்தே²ரோ விய ஏகஸ்ஸ பு³த்³த⁴ஸ்ஸ அக்³க³ஸாவகோ ப⁴வேய்ய’’ந்தி பத்த²னம் அகாஸிந்தி. ஸத்தா² ‘‘ஸமஜ்ஜி²ஸ்ஸதி நு கோ² இமஸ்ஸ புரிஸஸ்ஸ பத்த²னா’’தி அனாக³தம்ஸஞாணம் பேஸேத்வா ஓலோகேந்தோ கப்பஸதஸஹஸ்ஸாதி⁴கம் ஏகம் அஸங்க்²யேய்யம் அதிக்கமித்வா ஸமிஜ்ஜ²னபா⁴வம் அத்³த³ஸ. தி³ஸ்வான ஸரத³தாபஸம் ஆஹ – ‘‘ந தே அயம் பத்த²னா மோகா⁴ ப⁴விஸ்ஸதி, அனாக³தே பன கப்பஸதஸஹஸ்ஸாதி⁴கம் ஏகம் அஸங்க்²யேய்யம் அதிக்கமித்வா கோ³தமோ நாம பு³த்³தோ⁴ உப்பஜ்ஜிஸ்ஸதி, தஸ்ஸ மாதா மஹாமாயா நாம தே³வீ ப⁴விஸ்ஸதி, பிதா ஸுத்³தோ⁴த³னோ நாம மஹாராஜா, புத்தோ ராஹுலோ நாம, உபட்டா²கோ ஆனந்தோ³ நாம, து³தியஅக்³க³ஸாவகோ மோக்³க³ல்லானோ நாம, த்வம் பனஸ்ஸ பட²மஅக்³க³ஸாவகோ த⁴ம்மஸேனாபதி ஸாரிபுத்தோ நாம ப⁴விஸ்ஸஸீ’’தி. ஏவம் தாபஸம் ப்³யாகரித்வா த⁴ம்மகத²ம் கதே²த்வா பி⁴க்கு²ஸங்க⁴பரிவுதோ ஆகாஸம் பக்க²ந்தி³.

ஸரத³தாபஸோபி அந்தேவாஸிகத்தே²ரானம் ஸந்திகம் க³ந்த்வா ஸஹாயகஸ்ஸ ஸிரிவட்³ட⁴னகுடும்பி³கஸ்ஸ ஸாஸனம் பேஸேஸி, ‘‘ப⁴ந்தே, மம ஸஹாயகஸ்ஸ வதே³த², ஸஹாயகேன தே ஸரத³தாபஸேன அனோமத³ஸ்ஸீபு³த்³த⁴ஸ்ஸ பாத³மூலே அனாக³தே உப்பஜ்ஜனகஸ்ஸ கோ³தமபு³த்³த⁴ஸ்ஸ ஸாஸனே பட²மஅக்³க³ஸாவகட்டா²னம் பத்தி²தம், த்வம் து³தியஅக்³க³ஸாவகட்டா²னம் பத்தே²ஹீ’’தி. ஏவஞ்ச பன வத்வா தே²ரேஹி புரேதரமேவ ஏகபஸ்ஸேன க³ந்த்வா ஸிரிவட்³ட⁴னஸ்ஸ நிவேஸனத்³வாரே அட்டா²ஸி. ஸிரிவட்³ட⁴னோ ‘‘சிரஸ்ஸம் வத மே அய்யோ ஆக³தோ’’தி ஆஸனே நிஸீதா³பேத்வா அத்தனா நீசாஸனே நிஸின்னோ, ‘‘அந்தேவாஸிகபரிஸா பன வோ, ப⁴ந்தே, ந பஞ்ஞாயதீ’’தி புச்சி². ‘‘ஆம, ஸம்ம, அம்ஹாகம் அஸ்ஸமம் அனோமத³ஸ்ஸீ பு³த்³தோ⁴ ஆக³தோ, மயம் தஸ்ஸ அத்தனோ ப³லேன ஸக்காரம் அகரிம்ஹா, ஸத்தா² ஸப்³பே³ஸம் த⁴ம்மம் தே³ஸேஸி, தே³ஸனாபரியோஸானே ட²பேத்வா மம் ஸேஸா அரஹத்தம் பத்வா பப்³ப³ஜிம்ஸு. அஹம் ஸத்து² பட²மஅக்³க³ஸாவகம் நிஸப⁴த்தே²ரம் தி³ஸ்வா அனாக³தே உப்பஜ்ஜனகஸ்ஸ கோ³தமபு³த்³த⁴ஸ்ஸ நாம ஸாஸனே பட²மஅக்³க³ஸாவகட்டா²னம் பத்தே²ஸிம், த்வம்பி தஸ்ஸ ஸாஸனே து³தியஅக்³க³ஸாவகட்டா²னம் பத்தே²ஹீ’’தி. ‘‘மய்ஹம் பு³த்³தே⁴ஹி ஸத்³தி⁴ம் பரிசயோ நத்தி², ப⁴ந்தே’’தி. ‘‘பு³த்³தே⁴ஹி ஸத்³தி⁴ம் கத²னம் மய்ஹம் பா⁴ரோ ஹோது, த்வம் மஹந்தம் ஸக்காரம் ஸஜ்ஜேஹீ’’தி.

ஸிரிவட்³ட⁴னோ தஸ்ஸ வசனம் ஸுத்வா அத்தனோ நிவேஸனத்³வாரே ராஜமானேன அட்ட²கரீஸமத்தம் டா²னம் ஸமதலம் காரேத்வா வாலுகம் ஓகிராபேத்வா லாஜபஞ்சமானிபுப்பா²னி விகிராபேத்வா நீலுப்பலச்ச²த³னம் மண்ட³பம் காரேத்வா பு³த்³தா⁴ஸனம் பஞ்ஞாபேத்வா ஸேஸபி⁴க்கூ²னம்பி ஆஸனானி படியாதே³த்வா மஹந்தம் ஸக்காரஸம்மானம் ஸஜ்ஜேத்வா பு³த்³தா⁴னம் நிமந்தனத்தா²ய ஸரத³தாபஸஸ்ஸ ஸஞ்ஞம் அதா³ஸி. தாபஸோ பு³த்³த⁴ப்பமுக²ம் பி⁴க்கு²ஸங்க⁴ம் க³ஹேத்வா தஸ்ஸ நிவேஸனம் அக³மாஸி. ஸிரிவட்³ட⁴னோபி பச்சுக்³க³மனம் கத்வா ததா²க³தஸ்ஸ ஹத்த²தோ பத்தம் க³ஹேத்வா மண்ட³பம் பவேஸேத்வா பஞ்ஞத்தாஸனேஸு நிஸின்னஸ்ஸ பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ த³க்கி²ணோத³கம் த³த்வா பணீதேன போ⁴ஜனேன பரிவிஸித்வா ப⁴த்தகிச்சபரியோஸானே பு³த்³த⁴ப்பமுக²ம் பி⁴க்கு²ஸங்க⁴ம் மஹாரஹேஹி வத்தே²ஹி அச்சா²தே³த்வா, ‘‘ப⁴ந்தே, நாயம் ஆரப்³போ⁴ அப்பமத்தகட்டா²னத்தா²ய, இமினாவ நியாமேன ஸத்தாஹம் அனுகம்பம் கரோதா²’’தி ஆஹ. ஸத்தா² அதி⁴வாஸேஸி. ஸோ தேனேவ நியாமேன ஸத்தாஹம் மஹாதா³னம் பவத்தேத்வா ப⁴க³வந்தம் வந்தி³த்வா அஞ்ஜலிம் பக்³க³ய்ஹ டி²தோ ஆஹ – ‘‘ப⁴ந்தே, மம ஸஹாயோ ஸரத³தாபஸோ யஸ்ஸ ஸத்து²ஸ்ஸ பட²மஅக்³க³ஸாவகோ ப⁴வேய்ய’’ந்தி பத்தே²ஸி, அஹம்பி ‘‘தஸ்ஸேவ து³தியஅக்³க³ஸாவகோ ப⁴வேய்ய’’ந்தி பத்தே²மீதி.

ஸத்தா² அனாக³தம் ஓலோகேத்வா தஸ்ஸ பத்த²னாய ஸமிஜ்ஜ²னபா⁴வம் தி³ஸ்வா ப்³யாகாஸி – ‘‘த்வம் இதோ கப்பஸதஸஹஸ்ஸாதி⁴கம் அஸங்க்²யேய்யம் அதிக்கமித்வா கோ³தமபு³த்³த⁴ஸ்ஸ து³தியஅக்³க³ஸாவகோ ப⁴விஸ்ஸஸீ’’தி. பு³த்³தா⁴னம் ப்³யாகரணம் ஸுத்வா ஸிரிவட்³ட⁴னோ ஹட்ட²பஹட்டோ² அஹோஸி. ஸத்தா²பி ப⁴த்தானுமோத³னம் கத்வா ஸபரிவாரோ விஹாரமேவ க³தோ. ‘‘அயம், பி⁴க்க²வே, மம புத்தேஹி ததா³ பத்தி²தபத்த²னா. தே யதா²பத்தி²தமேவ லபி⁴ம்ஸு. நாஹம் முக²ம் ஓலோகேத்வா தே³மீ’’தி.

ஏவம் வுத்தே த்³வே அக்³க³ஸாவகா ப⁴க³வந்தம் வந்தி³த்வா, ‘‘ப⁴ந்தே, மயம் அகா³ரியபூ⁴தா ஸமானா கி³ரக்³க³ஸமஜ்ஜம் த³ஸ்ஸனாய க³தா’’தி யாவ அஸ்ஸஜித்தே²ரஸ்ஸ ஸந்திகா ஸோதாபத்திப²லபடிவேதா⁴ ஸப்³ப³ம் பச்சுப்பன்னவத்து²ம் கதே²த்வா, ‘‘தே மயம், ப⁴ந்தே, ஆசரியஸ்ஸ ஸஞ்சயஸ்ஸ ஸந்திகம் க³ந்த்வா தம் தும்ஹாகம் பாத³மூலே ஆனேதுகாமா தஸ்ஸ லத்³தி⁴யா நிஸ்ஸாரபா⁴வம் கதே²த்வா இதா⁴க³மனே ஆனிஸம்ஸம் கத²யிம்ஹா. ஸோ இதா³னி மய்ஹம் அந்தேவாஸிகவாஸோ நாம சாடியா உத³ஞ்சனபா⁴வப்பத்திஸதி³ஸோ, ந ஸக்கி²ஸ்ஸாமி அந்தேவாஸிவாஸம் வஸிது’’ந்தி வத்வா, ‘‘ஆசரிய, இதா³னி மஹாஜனோ க³ந்த⁴மாலாதி³ஹத்தோ² க³ந்த்வா ஸத்தா²ரமேவ பூஜேஸ்ஸதி, தும்ஹே கத²ம் ப⁴விஸ்ஸதா²’’தி வுத்தே ‘‘கிம் பன இமஸ்மிம் லோகே பண்டி³தா ப³ஹூ, உதா³ஹு த³ந்தா⁴’’தி? ‘‘த³ந்தா⁴’’தி கதி²தே ‘‘தேன ஹி பண்டி³தா பண்டி³தஸ்ஸ ஸமணஸ்ஸ கோ³தமஸ்ஸ ஸந்திகம் க³மிஸ்ஸந்தி, த³ந்தா⁴ த³ந்த⁴ஸ்ஸ மம ஸந்திகம் ஆக³மிஸ்ஸந்தி, க³ச்ச²த² தும்ஹே’’தி வத்வா ‘‘ஆக³ந்தும் ந இச்சி², ப⁴ந்தே’’தி. தம் ஸுத்வா ஸத்தா², ‘‘பி⁴க்க²வே, ஸஞ்சயோ அத்தனோ மிச்சா²தி³ட்டி²தாய அஸாரம் ஸாரோதி, ஸாரஞ்ச அஸாரோதி க³ண்ஹி. தும்ஹே பன அத்தனோ பண்டி³ததாய ஸாரஞ்ச ஸாரதோ, அஸாரஞ்ச அஸாரதோ ஞத்வா அஸாரம் பஹாய ஸாரமேவ க³ண்ஹித்தா²’’தி வத்வா இமா கா³தா² அபா⁴ஸி –

11. ‘‘அஸாரே ஸாரமதினோ, ஸாரே சாஸாரத³ஸ்ஸினோ;

தே ஸாரம் நாதி⁴க³ச்ச²ந்தி, மிச்சா²ஸங்கப்பகோ³சரா.

12. ‘‘ஸாரஞ்ச ஸாரதோ ஞத்வா, அஸாரஞ்ச அஸாரதோ;

தே ஸாரம் அதி⁴க³ச்ச²ந்தி, ஸம்மாஸங்கப்பகோ³சரா’’தி.

தத்த² அஸாரே ஸாரமதினோதி சத்தாரோ பச்சயா, த³ஸவத்து²கா மிச்சா²தி³ட்டி², தஸ்ஸா உபனிஸ்ஸயபூ⁴தா த⁴ம்மதே³ஸனாதி அயம் அஸாரோ நாம, தஸ்மிம் ஸாரதி³ட்டி²னோதி அத்தோ². ஸாரே சாஸாரத³ஸ்ஸினோதி த³ஸவத்து²கா ஸம்மாதி³ட்டி², தஸ்ஸா உபனிஸ்ஸயபூ⁴தா த⁴ம்மதே³ஸனாதி அயம் ஸாரோ நாம, தஸ்மிம் ‘‘நாயம் ஸாரோ’’தி அஸாரத³ஸ்ஸினோ. தே ஸாரந்தி தே பன தம் மிச்சா²தி³ட்டி²க்³க³ஹணம் க³ஹேத்வா டி²தா காமவிதக்காதீ³னம் வஸேன மிச்சா²ஸங்கப்பகோ³சரா ஹுத்வா ஸீலஸாரம், ஸமாதி⁴ஸாரம், பஞ்ஞாஸாரம், விமுத்திஸாரம், விமுத்திஞாணத³ஸ்ஸனஸாரம், ‘‘பரமத்த²ஸாரம், நிப்³பா³னஞ்ச நாதி⁴க³ச்ச²’’ந்தி. ஸாரஞ்சாதி தமேவ ஸீலஸாராதி³ஸாரம் ‘‘ஸாரோ நாமாய’’ந்தி, வுத்தப்பகாரஞ்ச அஸாரம் ‘‘அஸாரோ அய’’ந்தி ஞத்வா. தே ஸாரந்தி தே பண்டி³தா ஏவம் ஸம்மாத³ஸ்ஸனம் க³ஹேத்வா டி²தா நேக்க²ம்மஸங்கப்பாதீ³னம் வஸேன ஸம்மாஸங்கப்பகோ³சரா ஹுத்வா தம் வுத்தப்பகாரம் ஸாரம் அதி⁴க³ச்ச²ந்தீதி.

கா³தா²பரியோஸானே ப³ஹூ ஸோதாபத்திப²லாதீ³னி பாபுணிம்ஸு. ஸன்னிபதிதானம் ஸாத்தி²கா த⁴ம்மதே³ஸனா அஹோஸீதி.

ஸாரிபுத்தத்தே²ரவத்து² அட்ட²மம்.