12. தே³வத³த்தவத்து²

இத⁴ தப்பதீதி இமம் த⁴ம்மதே³ஸனம் ஸத்தா² ஜேதவனே விஹரந்தோ தே³வத³த்தம் ஆரப்³ப⁴ கதே²ஸி.

தே³வத³த்தஸ்ஸ வத்து² பப்³ப³ஜிதகாலதோ பட்டா²ய யாவ பத²விப்பவேஸனா தே³வத³த்தம் ஆரப்³ப⁴ பா⁴ஸிதானி ஸப்³பா³னி ஜாதகானி வித்தா²ரேத்வா கதி²தம். அயம் பனேத்த² ஸங்கே²போ – ஸத்த²ரி அனுபியம் நாம மல்லானம் நிக³மோ அத்தி². தம் நிஸ்ஸாய அனுபியம்ப³வனே விஹரந்தேயேவ ததா²க³தஸ்ஸ லக்க²ணபடிக்³க³ஹணதி³வஸேயேவ அஸீதிஸஹஸ்ஸேஹி ஞாதிகுலேஹி ‘‘ராஜா வா ஹோது, பு³த்³தோ⁴ வா, க²த்தியபரிவாரோவ விசரிஸ்ஸதீ’’தி அஸீதிஸஹஸ்ஸபுத்தா படிஞ்ஞாதா. தேஸு யேபு⁴ய்யேன பப்³ப³ஜிதேஸு ப⁴த்³தி³யம் நாம ராஜானம், அனுருத்³த⁴ம், ஆனந்த³ம், ப⁴கு³ம், கிமிலம், தே³வத³த்தந்தி இமே ச² ஸக்யே அபப்³ப³ஜந்தே தி³ஸ்வா, ‘‘மயம் அத்தனோ புத்தே பப்³பா³ஜேம, இமே ச² ஸக்யா ந ஞாதகா மஞ்ஞே, கஸ்மா ந பப்³ப³ஜந்தீ’’தி? கத²ம் ஸமுட்டா²பேஸும். அத² கோ² மஹானாமோ ஸக்யோ அனுருத்³த⁴ம் உபஸங்கமித்வா, ‘‘தாத, அம்ஹாகம் குலா பப்³ப³ஜிதோ நத்தி², த்வம் வா பப்³ப³ஜ, அஹம் வா பப்³ப³ஜிஸ்ஸாமீ’’தி ஆஹ. ஸோ பன ஸுகு²மாலோ ஹோதி ஸம்பன்னபோ⁴கோ³, ‘‘நத்தீ²’’தி வசனம்பி தேன ந ஸுதபுப்³ப³ம். ஏகதி³வஸஞ்ஹி தேஸு ச²ஸு க²த்தியேஸு கு³ளகீளம் கீளந்தேஸு அனுருத்³தோ⁴ பூவேன பராஜிதோ பூவத்தா²ய பஹிணி, அத²ஸ்ஸ மாதா பூவே ஸஜ்ஜேத்வா பஹிணி. தே கா²தி³த்வா புன கீளிம்ஸு. புனப்புனம் தஸ்ஸேவ பராஜயோ ஹோதி. மாதா பனஸ்ஸ பஹிதே பஹிதே திக்க²த்தும் பூவே பஹிணித்வா சதுத்த²வாரே ‘‘பூவா நத்தீ²’’தி பஹிணி. ஸோ ‘‘நத்தீ²’’தி வசனஸ்ஸ அஸுகபுப்³ப³த்தா ‘‘ஏஸாபேகா பூவவிகதி ப⁴விஸ்ஸதீ’’தி மஞ்ஞமானோ ‘‘நத்தி²பூவம் மே ஆஹரதா²’’தி பேஸேஸி. மாதா பனஸ்ஸ ‘‘நத்தி²பூவம் கிர, அய்யே, தே³தா²’’தி வுத்தே, ‘‘மம புத்தேன ‘நத்தீ²’தி பத³ம் ந ஸுதபுப்³ப³ம், இமினா பன உபாயேன நம் ஏதமத்த²ம் ஜானாபேஸ்ஸாமீ’’தி துச்ச²ம் ஸுவண்ணபாதிம் அஞ்ஞாய ஸுவண்ணபாதியா படிகுஜ்ஜித்வா பேஸேஸி. நக³ரபரிக்³கா³ஹிகா தே³வதா சிந்தேஸும் – ‘‘அனுருத்³த⁴ஸக்யேன அன்னபா⁴ரகாலே அத்தனோ பா⁴க³ப⁴த்தம் உபரிட்ட²பச்சேகபு³த்³த⁴ஸ்ஸ த³த்வா ‘‘‘நத்தீ²’தி மே வசனஸ்ஸ ஸவனம் மா ஹோது, போ⁴ஜனுப்பத்திட்டா²னஜானனம் மா ‘ஹோதூ’தி பத்த²னா கதா, ஸசாயம் துச்ச²பாதிம் பஸ்ஸிஸ்ஸதி, தே³வஸமாக³மம் பவிஸிதும் ந லபி⁴ஸ்ஸாம, ஸீஸம்பி நோ ஸத்ததா⁴ ப²லேய்யா’’தி. அத² நம் பாதிம் தி³ப்³ப³பூவேஹி புண்ணம் அகம்ஸு. கஸ்ஸா கு³ளமண்ட³லே ட²பேத்வா உக்³கா⁴டிதமத்தாய பூவக³ந்தோ⁴ ஸகலனக³ரே சா²தே³த்வா டி²தோ. பூவக²ண்ட³ம் முகே² ட²பிதமத்தமேவ ஸத்தரஸஹரணீஸஹஸ்ஸானி அனுப²ரி.

ஸோ சிந்தேஸி – ‘‘நாஹம் மாது பியோ, ஏத்தகம் மே காலம் இமம் நத்தி²பூவம் நாம ந பசி, இதோ பட்டா²ய அஞ்ஞம் பூவம் நாம ந கா²தி³ஸ்ஸாமீ’’தி, ஸோ கே³ஹம் க³ந்த்வாவ மாதரம் புச்சி² – ‘‘அம்ம, தும்ஹாகம் அஹம் பியோ, அப்பியோ’’தி? ‘‘தாத, ஏகக்கி²னோ அக்கி² விய ச ஹத³யம் விய ச அதிவிய பியோ மே அஹோஸீ’’தி. ‘‘அத² கஸ்மா ஏத்தகம் காலம் மய்ஹம் நத்தி² பூவம் ந பசித்த², அம்மா’’தி? ஸா சூளூபட்டா²கம் புச்சி² – ‘‘அத்தி² கிஞ்சி பாதியம், தாதா’’தி? ‘‘பரிபுண்ணா, அய்யே, பாதி பூவேஹி, ஏவரூபா பூவா நாம மே ந தி³ட்ட²புப்³பா³’’தி ஆரோசேஸி. ஸா சிந்தேஸி – ‘‘மய்ஹம் புத்தோ புஞ்ஞவா கதாபி⁴னீஹாரோ ப⁴விஸ்ஸதி, தே³வதாஹி பாதிம் பூரேத்வா பூவா பஹிதா ப⁴விஸ்ஸந்தீ’’தி. ‘‘அத² நம் புத்தோ, அம்ம, இதோ பட்டா²யாஹம் அஞ்ஞம் பூவம் நாம ந கா²தி³ஸ்ஸாமி, நத்தி²பூவமேவ பசேய்யாஸீ’’தி. ஸாபிஸ்ஸ ததோ பட்டா²ய ‘‘பூவம் கா²தி³துகாமோம்ஹீ’’தி வுத்தே துச்ச²பாதிமேவ அஞ்ஞாய பாதியா படிகுச்சி²த்வா பேஸேஸி. யாவ அகா³ரமஜ்ஜே² வஸி, தாவஸ்ஸ தே³வதாவ பூவே பஹிணிம்ஸு.

ஸோ ஏத்தகம்பி அஜானந்தோ பப்³ப³ஜ்ஜம் நாம கிம் ஜானிஸ்ஸதி? தஸ்மா ‘‘கா ஏஸா பப்³ப³ஜ்ஜா நாமா’’தி பா⁴தரம் புச்சி²த்வா ‘‘ஓஹாரிதகேஸமஸ்ஸுனா காஸாயனிவத்தே²ன கட்ட²த்த²ரகே வா பி³த³லமஞ்சகே வா நிபஜ்ஜித்வா பிண்டா³ய சரந்தேன விஹரிதப்³ப³ம். ஏஸா பப்³ப³ஜ்ஜா நாமா’’தி வுத்தே, ‘‘பா⁴திக, அஹம் ஸுகு²மாலோ. நாஹம் ஸக்கி²ஸ்ஸாமி பப்³ப³ஜிது’’ந்தி ஆஹ. ‘‘தேன ஹி, தாத, கம்மந்தம் உக்³க³ஹேத்வா க⁴ராவாஸம் வஸ. ந ஹி ஸக்கா அம்ஹேஸு ஏகேன அபப்³ப³ஜிது’’ந்தி. அத² நம் ‘‘கோ ஏஸ கம்மந்தோ நாமா’’தி புச்சி². ‘‘ப⁴த்துட்டா²னட்டா²னம்பி அஜானந்தோ குலபுத்தோ கம்மந்தம் நாம கிம் ஜானிஸ்ஸதீ’’தி? ஏகதி³வஸஞ்ஹி திண்ணம் க²த்தியானம் கதா² உத³பாதி³ – ‘‘ப⁴த்தம் நாம குஹிம் உட்ட²ஹதீ’’தி? கிமிலோ ஆஹ – ‘‘கோட்டே² உட்ட²ஹதீ’’தி. அத² நம் ப⁴த்³தி³யோ ‘‘த்வம் ப⁴த்தஸ்ஸ உட்டா²னட்டா²னம் ந ஜானாஸி, ப⁴த்தம் நாம உக்க²லியம் உட்ட²ஹதீ’’தி ஆஹ. அனுருத்³தோ⁴ ‘‘தும்ஹே த்³வேபி ந ஜானாத², ப⁴த்தம் நாம ரதனமகுளாய ஸுவண்ணபாதியம் உட்ட²ஹதீ’’தி ஆஹ.

தேஸு கிர ஏகதி³வஸம் கிமிலோ கோட்ட²தோ வீஹீ ஓதாரியமானே தி³ஸ்வா, ‘‘ஏதே கோட்டே²யேவ ஜாதா’’தி ஸஞ்ஞீ அஹோஸி. ப⁴த்³தி³யோ ஏகதி³வஸம் உக்க²லிதோ ப⁴த்தம் வட்³டி⁴யமானம் தி³ஸ்வா ‘‘உக்க²லியஞ்ஞேவ உப்பன்ன’’ந்தி ஸஞ்ஞீ அஹோஸி. அனுருத்³தே⁴ன பன நேவ வீஹீ கோட்டேந்தா, ந ப⁴த்தம் பசந்தா, ந வட்³டே⁴ந்தா தி³ட்ட²புப்³பா³, வட்³டே⁴த்வா பன புரதோ ட²பிதமேவ பஸ்ஸதி. ஸோ பு⁴ஞ்ஜிதுகாமகாலே ‘‘ப⁴த்தம் பாதியம் உட்ட²ஹதீ’’தி ஸஞ்ஞமகாஸி. ஏவம் தயோபி தே ப⁴த்துட்டா²னட்டா²னம் ந ஜானந்தி. தேனாயம் ‘‘கோ ஏஸ கம்மந்தோ நாமா’’தி புச்சி²த்வா, ‘‘பட²மம் கே²த்தம் கஸாபேதப்³ப³’’ந்திஆதி³கம் ஸம்வச்ச²ரே ஸம்வச்ச²ரே கத்தப்³ப³ம் கிச்சம் ஸுத்வா, ‘‘கதா³ கம்மந்தானம் அந்தோ பஞ்ஞாயிஸ்ஸதி, கதா³ மயம் அப்போஸ்ஸுக்கா போ⁴கே³ பு⁴ஞ்ஜிஸ்ஸாமா’’தி வத்வா கம்மந்தானம் அபரியந்ததாய அக்கா²தாய ‘‘தேன ஹி த்வஞ்ஞேவ க⁴ராவாஸம் வஸ, ந மய்ஹம் ஏதேனத்தோ²’’தி மாதரம் உபஸங்கமித்வா, ‘‘அனுஜானாஹி மம், அம்ம, பப்³ப³ஜிஸ்ஸாமீ’’தி வத்வா தாய நானப்பகாரேஹி திக்க²த்தும் படிக்கி²பித்வா, ‘‘ஸசே தே ஸஹாயகோ ப⁴த்³தி³யராஜா பப்³ப³ஜிஸ்ஸதி, தேன ஸத்³தி⁴ம் பப்³ப³ஜாஹீ’’தி வுத்தே தம் உபஸங்கமித்வா, ‘‘மம கோ², ஸம்ம, பப்³ப³ஜ்ஜா தவ படிப³த்³தா⁴’’தி வத்வா தம் நானப்பகாரேஹி ஸஞ்ஞாபேத்வா ஸத்தமே தி³வஸே அத்தனா ஸத்³தி⁴ம் பப்³ப³ஜனத்தா²ய படிஞ்ஞம் க³ண்ஹி.

ததோ ப⁴த்³தி³யோ ஸக்யராஜா அனுருத்³தோ⁴ ஆனந்தோ³ ப⁴கு³ கிமிலோ தே³வத³த்தோதி இமே ச² க²த்தியா உபாலிகப்பகஸத்தமா தே³வா விய தி³ப்³ப³ஸம்பத்திம் ஸத்தாஹம் ஸம்பத்திம் அனுப⁴வித்வா உய்யானம் க³ச்ச²ந்தா விய சதுரங்கி³னியா ஸேனாய நிக்க²மித்வா பரவிஸயம் பத்வா ராஜாணாய ஸேனம் நிவத்தாபேத்வா பரவிஸயம் ஓக்கமிம்ஸு. தத்த² ச² க²த்தியா அத்தனோ அத்தனோ ஆப⁴ரணானி ஓமுஞ்சித்வா ப⁴ண்டி³கம் கத்வா, ‘‘ஹந்த³ ப⁴ணே, உபாலி, நிவத்தஸ்ஸு, அலம் தே ஏத்தகம் ஜீவிகாயா’’தி தஸ்ஸ அத³ம்ஸு. ஸோ தேஸம் பாத³மூலே பரிவத்தித்வா பரிதே³வித்வா தேஸம் ஆணம் அதிக்கமிதும் அஸக்கோந்தோ உட்டா²ய தம் க³ஹேத்வா நிவத்தி. தேஸம் த்³விதா⁴ ஜாதகாலே, வனம் ஆரோத³னப்பத்தம் விய பத²வீகம்பமானாகாரப்பத்தா விய அஹோஸி. உபாலி கப்பகோபி தோ²கம் க³ந்த்வா நிவத்தித்வா ‘‘சண்டா³ கோ² ஸாகியா, ‘இமினா குமாரா நிப்பாதிதா’தி கா⁴தேய்யும்பி மம். இமே ஹி நாம ஸக்யகுமாரா ஏவரூபம் ஸம்பத்திம் பஹாய இமானி அனக்³கா⁴னி ஆப⁴ரணானி கே²ளபிண்ட³ம் விய ச²ட்³டே³த்வா பப்³ப³ஜிஸ்ஸந்தி, கிமங்க³ம் பனாஹ’’ந்தி ப⁴ண்டி³கம் ஓமுஞ்சித்வா தானி ஆப⁴ரணானி ருக்கே² லக்³கே³த்வா ‘‘அத்தி²கா க³ண்ஹந்தூ’’தி வத்வா தேஸம் ஸந்திகம் க³ந்த்வா தேஹி ‘‘கஸ்மா நிவத்தோஸீ’’தி புட்டோ² தமத்த²ம் ஆரோசேஸி. அத² நம் தே ஆதா³ய ஸத்து² ஸந்திகம் க³ந்த்வா, ‘‘மயம், ப⁴ந்தே, ஸாகியா நாம மானனிஸ்ஸிதா, அயம் அம்ஹாகம் தீ³க⁴ரத்தம் பரிசாரகோ, இமம் பட²மதரம் பப்³பா³ஜேத², மயமஸ்ஸ அபி⁴வாத³னாதீ³னி கரிஸ்ஸாம, ஏவம் நோ மானோ நிம்மானாயிஸ்ஸதீ’’தி வத்வா தம் பட²மதரம் பப்³பா³ஜேத்வா பச்சா² ஸயம் பப்³ப³ஜிம்ஸு. தேஸு ஆயஸ்மா ப⁴த்³தி³யோ தேனேவ அந்தரவஸ்ஸேன தேவிஜ்ஜோ அஹோஸி. ஆயஸ்மா அனுருத்³தோ⁴ தி³ப்³ப³சக்கு²கோ ஹுத்வா பச்சா² மஹாவிதக்கஸுத்தம் (அ. நி. 8.30) ஸுத்வா அரஹத்தம் பாபுணி. ஆயஸ்மா ஆனந்தோ³ ஸோதாபத்திப²லே பதிட்ட²ஹி. ப⁴கு³த்தே²ரோ ச கிமிலத்தே²ரோ ச அபரபா⁴கே³ விபஸ்ஸனம் வட்³டே⁴த்வா அரஹத்தம் பாபுணிம்ஸு. தே³வத³த்தோ போது²ஜ்ஜனிகம் இத்³தி⁴ம் பத்தோ.

அபரபா⁴கே³ ஸத்த²ரி கோஸம்பி³யம் விஹரந்தே ஸஸாவகஸங்க⁴ஸ்ஸ ததா²க³தஸ்ஸ மஹந்தோ லாப⁴ஸக்காரோ நிப்³ப³த்தி. வத்த²பே⁴ஸஜ்ஜாதி³ஹத்தா² மனுஸ்ஸா விஹாரம் பவிஸித்வா ‘‘குஹிம் ஸத்தா², குஹிம் ஸாரிபுத்தத்தே²ரோ, குஹிம் மஹாமோக்³க³ல்லானத்தே²ரோ, குஹிம் மஹாகஸ்ஸபத்தே²ரோ, குஹிம் ப⁴த்³தி³யத்தே²ரோ, குஹிம் அனுருத்³த⁴த்தே²ரோ, குஹிம் ஆனந்த³த்தே²ரோ, குஹிம் ப⁴கு³த்தே²ரோ, குஹிம் கிமிலத்தே²ரோ’’தி அஸீதிமஹாஸாவகானம் நிஸின்னட்டா²னம் ஓலோகேந்தா விசரந்தி. ‘‘தே³வத³த்தத்தே²ரோ குஹிம் நிஸின்னோ வா, டி²தோ வா’’தி புச்ச²ந்தோ நாம நத்தி². ஸோ சிந்தேஸி – ‘‘அஹம்பி ஏதேஹி ஸத்³தி⁴ஞ்ஞேவ பப்³ப³ஜிதோ, ஏதேபி க²த்தியபப்³ப³ஜிதா, அஹம்பி க²த்தியபப்³ப³ஜிதோ, லாப⁴ஸக்காரஹத்தா² மனுஸ்ஸா ஏதேயேவ பரியேஸந்தி, மம நாமம் க³ஹேதாபி நத்தி². கேன நு கோ² ஸத்³தி⁴ம் ஏகதோ ஹுத்வா கம் பஸாதே³த்வா மம லாப⁴ஸக்காரம் நிப்³ப³த்தேய்ய’’ந்தி. அத²ஸ்ஸ ஏதத³ஹோஸி – ‘‘அயம் கோ² ராஜா பி³ம்பி³ஸாரோ பட²மத³ஸ்ஸனேனேவ ஏகாத³ஸஹி நஹுதேஹி ஸத்³தி⁴ம் ஸோதாபத்திப²லே பதிட்டி²தோ, ந ஸக்கா ஏதேன ஸத்³தி⁴ம் ஏகதோ ப⁴விதும், கோஸலரஞ்ஞாபி ஸத்³தி⁴ம் ந ஸக்கா ப⁴விதும். அயம் கோ² பன ரஞ்ஞோ புத்தோ அஜாதஸத்து குமாரோ கஸ்ஸசி கு³ணதோ³ஸே ந ஜானாதி, ஏதேன ஸத்³தி⁴ம் ஏகதோ ப⁴விஸ்ஸாமீ’’தி. ஸோ கோஸம்பி³தோ ராஜக³ஹம் க³ந்த்வா குமாரகவண்ணம் அபி⁴னிம்மினித்வா சத்தாரோ ஆஸீவிஸே சதூஸு ஹத்த²பாதே³ஸு ஏகம் கீ³வாய பிலந்தி⁴த்வா ஏகம் ஸீஸே சும்ப³டகம் கத்வா ஏகம் ஏகம்ஸம் கரித்வா இமாய அஹிமேக²லாய ஆகாஸதோ ஓருய்ஹ அஜாதஸத்துஸ்ஸ உச்ச²ங்கே³ நிஸீதி³த்வா தேன பீ⁴தேன ‘‘கோஸி த்வ’’ந்தி வுத்தே ‘‘அஹம் தே³வத³த்தோ’’தி வத்வா தஸ்ஸ ப⁴யவினோத³னத்த²ம் தம் அத்தபா⁴வம் படிஸம்ஹரித்வா ஸங்கா⁴டிபத்தசீவரத⁴ரோ புரதோ ட²த்வா தம் பஸாதே³த்வா லாப⁴ஸக்காரம் நிப்³ப³த்தேஸி. ஸோ லாப⁴ஸக்காராபி⁴பூ⁴தோ ‘‘அஹம் பி⁴க்கு²ஸங்க⁴ம் பரிஹரிஸ்ஸாமீ’’தி பாபகம் சித்தம் உப்பாதே³த்வா ஸஹ சித்துப்பாதே³ன இத்³தி⁴தோ பரிஹாயித்வா ஸத்தா²ரம் வேளுவனவிஹாரே ஸராஜிகாய பரிஸாய த⁴ம்மம் தே³ஸேந்தம் வந்தி³த்வா உட்டா²யாஸனா அஞ்ஜலிம் பக்³க³ய்ஹ – ‘‘ப⁴க³வா, ப⁴ந்தே, ஏதரஹி ஜிண்ணோ வுட்³டோ⁴ மஹல்லகோ, அப்போஸ்ஸுக்கோ தி³ட்ட²த⁴ம்மஸுக²விஹாரம் அனுயுஞ்ஜது, அஹம் பி⁴க்கு²ஸங்க⁴ம் பரிஹரிஸ்ஸாமி, நிய்யாதே³த² மே பி⁴க்கு²ஸங்க⁴’’ந்தி வத்வா ஸத்தா²ரா கே²ளாஸகவாதே³ன அபஸாதே³த்வா படிக்கி²த்தோ அனத்தமனோ இமம் பட²மம் ததா²க³தே ஆகா⁴தம் ப³ந்தி⁴த்வா பக்காமி.

அத²ஸ்ஸ ப⁴க³வா ராஜக³ஹே பகாஸனீயகம்மம் காரேஸி. ஸோ ‘‘பரிச்சத்தோ தா³னி அஹம் ஸமணேன கோ³தமேன, இதா³னிஸ்ஸ அனத்த²ம் கரிஸ்ஸாமீ’’தி அஜாதஸத்தும் உபஸங்கமித்வா, ‘‘புப்³பே³ கோ², குமார, மனுஸ்ஸா தீ³கா⁴யுகா, ஏதரஹி அப்பாயுகா. டா²னம் கோ² பனேதம் விஜ்ஜதி, யம் த்வம் குமாரோவ ஸமானோ காலம் கரேய்யாஸி, தேன ஹி த்வம், குமார, பிதரம் ஹந்த்வா ராஜா ஹோஹி, அஹம் ப⁴க³வந்தம் ஹந்த்வா பு³த்³தோ⁴ ப⁴விஸ்ஸாமீ’’தி வத்வா தஸ்மிம் ரஜ்ஜே பதிட்டி²தே ததா²க³தஸ்ஸ வதா⁴ய புரிஸே பயோஜேத்வா தேஸு ஸோதாபத்திப²லம் பத்வா நிவத்தேஸு ஸயம் கி³ஜ்ஜ²கூடபப்³ப³தம் அபி⁴ருஹித்வா, ‘‘அஹமேவ ஸமணம் கோ³தமம் ஜீவிதா வோரோபேஸ்ஸாமீ’’தி ஸிலம் பவிஜ்ஜி²த்வா ருஹிருப்பாத³ககம்மம் கத்வா இமினாபி உபாயேன மாரேதும் அஸக்கோந்தோ புன நாளாகி³ரிம் விஸ்ஸஜ்ஜாபேஸி. தஸ்மிம் ஆக³ச்ச²ந்தே ஆனந்த³த்தே²ரோ அத்தனோ ஜீவிதம் ஸத்து² பரிச்சஜித்வா புரதோ அட்டா²ஸி. ஸத்தா² நாக³ம் த³மேத்வா நக³ரா நிக்க²மித்வா விஹாரம் க³ந்த்வா அனேகஸஹஸ்ஸேஹி உபாஸகேஹி அபி⁴ஹடம் மஹாதா³னம் பரிபு⁴ஞ்ஜித்வா தஸ்மிம் தி³வஸே ஸன்னிபதிதானம் அட்டா²ரஸகோடிஸங்கா²தானம் ராஜக³ஹவாஸீனம் அனுபுப்³பி³ம் கத²ம் கதே²த்வா சதுராஸீதியா பாணஸஹஸ்ஸானம் த⁴ம்மாபி⁴ஸமயே ஜாதே ‘‘அஹோ ஆயஸ்மா ஆனந்தோ³ மஹாகு³ணோ, ததா²ரூபே நாம ஹத்தி²னாகே³ ஆக³ச்ச²ந்தே அத்தனோ ஜீவிதம் பரிச்சஜித்வா ஸத்து² புரதோவ அட்டா²ஸீ’’தி தே²ரஸ்ஸ கு³ணகத²ம் ஸுத்வா ‘‘ந, பி⁴க்க²வே, இதா³னேவ, புப்³பே³பேஸ மமத்தா²ய ஜீவிதம் பரிச்சஜியேவா’’தி வத்வா பி⁴க்கூ²ஹி யாசிதோ சூளஹம்ஸ (ஜா. 1.15.133 ஆத³யோ; 2.21.1 ஆத³யோ) – மஹாஹம்ஸ (ஜா. 2.21.89 ஆத³யோ) – கக்கடகஜாதகானி (ஜா. 1.3.49 ஆத³யோ) கதே²ஸி. தே³வத³த்தஸ்ஸாபி கம்மம் நேவ பாகடம், ததா² ரஞ்ஞோ மாராபிதத்தா, ந வத⁴கானம் பயோஜிதத்தா ந ஸிலாய பவித்³த⁴த்தா பாகடம் அஹோஸி, யதா² நாளாகி³ரிஹத்தி²னோ விஸ்ஸஜ்ஜிதத்தா. ததா³ ஹி மஹாஜனோ ‘‘ராஜாபி தே³வத³த்தேனேவ மாராபிதோ, வத⁴கோபி பயோஜிதோ, ஸிலாபி அபவித்³தா⁴. இதா³னி பன தேன நாளாகி³ரி விஸ்ஸஜ்ஜாபிதோ, ஏவரூபம் நாம பாபகம் க³ஹேத்வா ராஜா விசரதீ’’தி கோலாஹலமகாஸி.

ராஜா மஹாஜனஸ்ஸ கத²ம் ஸுத்வா பஞ்ச தா²லிபாகஸதானி நீஹராபேத்வா ந புன தஸ்ஸூபட்டா²னம் அக³மாஸி, நாக³ராபிஸ்ஸ குலம் உபக³தஸ்ஸ பி⁴க்கா²மத்தம்பி ந அத³ம்ஸு. ஸோ பரிஹீனலாப⁴ஸக்காரோ கோஹஞ்ஞேன ஜீவிதுகாமோ ஸத்தா²ரம் உபஸங்கமித்வா பஞ்ச வத்தூ²னி யாசித்வா ப⁴க³வதோ ‘‘அலம், தே³வத³த்த, யோ இச்ச²தி, ஸோ ஆரஞ்ஞகோ ஹோதூ’’தி படிக்கி²த்தோ கஸ்ஸாவுஸோ, வசனம் ஸோப⁴னம், கிம் ததா²க³தஸ்ஸ உதா³ஹு மம, அஹஞ்ஹி உக்கட்ட²வஸேன ஏவம் வதா³மி, ‘‘ஸாது⁴, ப⁴ந்தே, பி⁴க்கூ² யாவஜீவம் ஆரஞ்ஞகா அஸ்ஸு, பிண்ட³பாதிகா, பம்ஸுகூலிகா, ருக்க²மூலிகா, மச்ச²மம்ஸம் ந கா²தே³ய்யு’’ந்தி. ‘‘யோ து³க்கா² முச்சிதுகாமோ, ஸோ மயா ஸத்³தி⁴ம் ஆக³ச்ச²தூ’’தி வத்வா பக்காமி. தஸ்ஸ வசனம் ஸுத்வா ஏகச்சே நவகபப்³ப³ஜிதா மந்த³பு³த்³தி⁴னோ ‘‘கல்யாணம் தே³வத³த்தோ ஆஹ, ஏதேன ஸத்³தி⁴ம் விசரிஸ்ஸாமா’’தி தேன ஸத்³தி⁴ம் ஏகதோ அஹேஸும். இதி ஸோ பஞ்சஸதேஹி பி⁴க்கூ²ஹி ஸத்³தி⁴ம் தேஹி பஞ்சஹி வத்தூ²ஹி லூக²ப்பஸன்னம் ஜனம் ஸஞ்ஞாபேந்தோ குலேஸு விஞ்ஞாபேத்வா விஞ்ஞாபேத்வா பு⁴ஞ்ஜந்தோ ஸங்க⁴பே⁴தா³ய பரக்கமி. ஸோ ப⁴க³வதா, ‘‘ஸச்சம் கிர த்வம், தே³வத³த்த, ஸங்க⁴பே⁴தா³ய பரக்கமஸி சக்கபே⁴தா³யா’’தி புட்டோ² ‘‘ஸச்சம் ப⁴க³வா’’தி வத்வா, ‘‘க³ருகோ கோ², தே³வத³த்த, ஸங்க⁴பே⁴தோ³’’திஆதீ³ஹி ஓவதி³தோபி ஸத்து² வசனம் அனாதி³யித்வா பக்கந்தோ ஆயஸ்மந்தம் ஆனந்த³ம் ராஜக³ஹே பிண்டா³ய சரந்தம் தி³ஸ்வா, ‘‘அஜ்ஜதக்³கே³ தா³னாஹம், ஆவுஸோ ஆனந்த³, அஞ்ஞத்ரேவ ப⁴க³வதா, அஞ்ஞத்ர, பி⁴க்கு²ஸங்கா⁴ உபோஸத²ம் கரிஸ்ஸாமி, ஸங்க⁴கம்மம் கரிஸ்ஸாமீ’’தி ஆஹ. தே²ரோ தமத்த²ம் ப⁴க³வதோ ஆரோசேஸி. தம் விதி³த்வா ஸத்தா² உப்பன்னத⁴ம்மஸம்வேகோ³ ஹுத்வா, ‘‘தே³வத³த்தோ ஸதே³வகஸ்ஸ லோகஸ்ஸ அனத்த²னிஸ்ஸிதம் அத்தனோ அவீசிம்ஹி பச்சனககம்மம் கரோதீ’’தி விதக்கேத்வா –

‘‘ஸுகரானி அஸாதூ⁴னி, அத்தனோ அஹிதானி ச;

யம் வே ஹிதஞ்ச ஸாது⁴ஞ்ச, தம் வே பரமது³க்கர’’ந்தி. (த⁴. ப. 163) –

இமம் கா³த²ம் வத்வா புன இமம் உதா³னம் உதா³னேஸி –

‘‘ஸுகரம் ஸாது⁴னா ஸாது⁴, ஸாது⁴ பாபேன து³க்கரம்;

பாபம் பாபேன ஸுகரம், பாபமரியேஹி து³க்கர’’ந்தி. (உதா³. 48; சூளவ. 343);

அத² கோ² தே³வத³த்தோ உபோஸத²தி³வஸே அத்தனோ பரிஸாய ஸத்³தி⁴ம் ஏகமந்தம் நிஸீதி³த்வா, ‘‘யஸ்ஸிமானி பஞ்ச வத்தூ²னி க²மந்தி, ஸோ ஸலாகம் க³ண்ஹதூ’’தி வத்வா பஞ்சஸதேஹி வஜ்ஜிபுத்தகேஹி நவகேஹி அப்பகதஞ்ஞூஹி ஸலாகாய க³ஹிதாய ஸங்க⁴ம் பி⁴ந்தி³த்வா தே பி⁴க்கூ² ஆதா³ய க³யாஸீஸம் அக³மாஸி. தஸ்ஸ தத்த² க³தபா⁴வம் ஸுத்வா ஸத்தா² தேஸம் பி⁴க்கூ²னம் ஆனயனத்தா²ய த்³வே அக்³க³ஸாவகே பேஸேஸி. தே தத்த² க³ந்த்வா ஆதே³ஸனாபாடிஹாரியானுஸாஸனியா சேவ இத்³தி⁴பாடிஹாரியானுஸாஸனியா ச அனுஸாஸந்தா தே அமதம் பாயேத்வா ஆதா³ய ஆகாஸேன ஆக³மிம்ஸு. கோகாலிகோபி கோ² ‘‘உட்டே²ஹி, ஆவுஸோ தே³வத³த்த, நீதா தே பி⁴க்கூ² ஸாரிபுத்தமோக்³க³ல்லானேஹி, நனு த்வம் மயா வுத்தோ ‘மா, ஆவுஸோ, ஸாரிபுத்தமோக்³க³ல்லானே விஸ்ஸாஸீ’தி. பாபிச்சா² ஸாரிபுத்தமோக்³க³ல்லானா, பாபிகானம் இச்சா²னம் வஸம் க³தா’’தி வத்வா ஜண்ணுகேன ஹத³யமஜ்ஜே² பஹரி, தஸ்ஸ தத்தே²வ உண்ஹம் லோஹிதம் முக²தோ உக்³க³ஞ்சி². ஆயஸ்மந்தம் பன ஸாரிபுத்தம் பி⁴க்கு²ஸங்க⁴பரிவுதம் ஆகாஸேன ஆக³ச்ச²ந்தம் தி³ஸ்வா பி⁴க்கூ² ஆஹம்ஸு – ‘‘ப⁴ந்தே, ஆயஸ்மா ஸாரிபுத்தோ க³மனகாலே அத்தது³தியோ க³தோ, இதா³னி மஹாபரிவாரோ ஆக³ச்ச²ந்தோ ஸோப⁴தீ’’தி. ஸத்தா² ‘‘ந, பி⁴க்க²வே, இதா³னேவ ஸாரிபுத்தோ ஸோப⁴தி, புப்³பே³ திரச்சா²னயோனியம் நிப்³ப³த்தகாலேபி மய்ஹம் புத்தோ மம ஸந்திகம் ஆக³ச்ச²ந்தோ ஸோபி⁴யேவா’’தி வத்வா –

‘‘ஹோதி ஸீலவதம் அத்தோ², படிஸந்தா²ரவுத்தினம்;

லக்க²ணம் பஸ்ஸ ஆயந்தம், ஞாதிஸங்க⁴புரக்க²தம்;

அத² பஸ்ஸஸிமம் காளம், ஸுவிஹீனம்வ ஞாதிபீ⁴’’தி. (ஜா. 1.1.11) –

இத³ம் ஜாதகம் கதே²ஸி. புன பி⁴க்கூ²ஹி, ‘‘ப⁴ந்தே, தே³வத³த்தோ கிர த்³வே அக்³க³ஸாவகே உபோ⁴ஸு பஸ்ஸேஸு நிஸீதா³பேத்வா ‘பு³த்³த⁴லீளாய த⁴ம்மம் தே³ஸேஸ்ஸாமீ’தி தும்ஹாகம் அனுகிரியம் கரோதீ’’தி வுத்தே, ‘‘ந, பி⁴க்க²வே, இதா³னேவ, புப்³பே³பேஸ மம அனுகிரியம் காதும் வாயமி, ந பன ஸக்கீ²’’தி வத்வா –

‘‘அபி வீரக பஸ்ஸேஸி, ஸகுணம் மஞ்ஜுபா⁴ணகம்;

மயூரகீ³வஸங்காஸம், பதிம் மய்ஹம் ஸவிட்ட²கம்.

‘‘உத³கத²லசரஸ்ஸ பக்கி²னோ,

நிச்சம் ஆமகமச்ச²போ⁴ஜினோ;

தஸ்ஸானுகரம் ஸவிட்ட²கோ,

ஸேவாலே பலிகு³ண்டி²தோ மதோ’’தி. (ஜா. 1.2.107-108) –

ஆதி³னா ஜாதகம் வத்வா அபராபரேஸுபி தி³வஸேஸு ததா²னுரூபமேவ கத²ம் ஆரப்³ப⁴ –

‘‘அசாரி வதாயம் விதுத³ம் வனானி,

கட்ட²ங்க³ருக்கே²ஸு அஸாரகேஸு;

அதா²ஸதா³ க²தி³ரம் ஜாதஸாரம்,

யத்த²ப்³பி⁴தா³ க³ருளோ உத்தமங்க³’’ந்தி. (ஜா. 1.2.120);

‘‘லஸீ ச தே நிப்ப²லிகா, மத்த²கோ ச பதா³லிதோ;

ஸப்³பா³ தே பா²ஸுகா ப⁴க்³கா³, அஜ்ஜ கோ² த்வம் விரோசஸீ’’தி. (ஜா. 1.1.143) –

ஏவமாதீ³னி ஜாதகானி கதே²ஸி. புன ‘‘அகதஞ்ஞூ தே³வத³த்தோ’’தி கத²ம் ஆரப்³ப⁴ –

‘‘அகரம்ஹஸ தே கிச்சம், யம் ப³லம் அஹுவம்ஹஸே;

மிக³ராஜ நமோ த்யத்து², அபி கிஞ்சி லபா⁴மஸே.

‘‘மம லோஹிதப⁴க்க²ஸ்ஸ, நிச்சம் லுத்³தா³னி குப்³ப³தோ;

த³ந்தந்தரக³தோ ஸந்தோ, தம் ப³ஹும் யம்பி ஜீவஸீ’’தி. (ஜா. 1.4.29-30) –

ஆதீ³னி ஜாதகானி கதே²ஸி. புன வதா⁴ய பரிஸக்கனமஸ்ஸ ஆரப்³ப⁴ –

‘‘ஞாதமேதம் குருங்க³ஸ்ஸ, யம் த்வம் ஸேபண்ணி ஸிய்யஸி;

அஞ்ஞம் ஸேபண்ணி க³ச்சா²மி, ந மே தே ருச்சதே ப²ல’’ந்தி. (ஜா. 1.1.21) –

ஆதீ³னி ஜாதகானி கதே²ஸி. புனதி³வஸே ‘‘உப⁴தோ பரிஹீனோ தே³வத³த்தோ லாப⁴ஸக்காரதோ ச ஸாமஞ்ஞதோ சா’’தி கதா²ஸு பவத்தமானாஸு ‘‘ந, பி⁴க்க²வே, இதா³னேவ தே³வத³த்தோ பரிஹீனோ, புப்³பே³பேஸ பரிஹீனோயேவா’’தி வத்வா –

‘‘அக்கீ² பி⁴ன்னா படோ நட்டோ², ஸகி²கே³ஹே ச ப⁴ண்ட³னம்;

உப⁴தோ பது³ட்டா² கம்மந்தா, உத³கம்ஹி த²லம்ஹி சா’’தி. (ஜா. 1.1.139) –

ஆதீ³னி ஜாதகானி கதே²ஸி. ஏவம் ராஜக³ஹே விஹரந்தோவ தே³வத³த்தம் ஆரப்³ப⁴ ப³ஹூனி ஜாதகானி கதே²த்வா ராஜக³ஹதோ ஸாவத்தி²ம் க³ந்த்வா ஜேதவனே விஹாரே வாஸம் கப்பேஸி. தே³வத³த்தோபி கோ² நவ மாஸே கி³லானோ பச்சி²மே காலே ஸத்தா²ரம் த³ட்டு²காமோ ஹுத்வா அத்தனோ ஸாவகே ஆஹ – ‘‘அஹம் ஸத்தா²ரம் த³ட்டு²காமோ, தம் மே த³ஸ்ஸேதா²’’தி. ‘‘த்வம் ஸமத்த²காலே ஸத்தா²ரா ஸத்³தி⁴ம் வேரீ ஹுத்வா அசரி, ந மயம் தத்த² நேஸ்ஸாமா’’தி வுத்தே, ‘‘மா மம் நாஸேத², மயா ஸத்த²ரி ஆகா⁴தோ கதோ, ஸத்து² பன மயி கேஸக்³க³மத்தோபி ஆகா⁴தோ நத்தி²’’. ஸோ ஹி ப⁴க³வா –

‘‘வத⁴கே தே³வத³த்தம்ஹி, சோரே அங்கு³லிமாலகே;

த⁴னபாலே ராஹுலே ச, ஸப்³ப³த்த² ஸமமானஸோ’’தி. (அப. தே²ர 1.1.585; மி. ப. 6.6.5) –

‘‘த³ஸ்ஸேத² மே ப⁴க³வந்த’’ந்தி புனப்புனம் யாசி. அத² நம் தே மஞ்சகேனாதா³ய நிக்க²மிம்ஸு. தஸ்ஸ ஆக³மனம் ஸுத்வா பி⁴க்கூ² ஸத்து² ஆரோசேஸும் – ‘‘ப⁴ந்தே, தே³வத³த்தோ கிர தும்ஹாகம் த³ஸ்ஸனத்தா²ய ஆக³ச்ச²தீ’’தி. ‘‘ந, பி⁴க்க²வே, ஸோ தேனத்தபா⁴வேன மம் பஸ்ஸிதும் லபி⁴ஸ்ஸதீ’’தி. தே³வத³த்தோ கிர பஞ்சன்னம் வத்தூ²னம் ஆயாசிதகாலதோ பட்டா²ய புன பு³த்³த⁴ம் த³ட்டு²ம் ந லப⁴தி, அயம் த⁴ம்மதா. ‘‘அஸுகட்டா²னஞ்ச அஸுகட்டா²னஞ்ச ஆக³தோ, ப⁴ந்தே’’தி. ‘‘யம் இச்ச²தி, தம் கரோது, ந ஸோ மம் பஸ்ஸிதும் லபி⁴ஸ்ஸதீ’’தி. ‘‘ப⁴ந்தே, இதோ யோஜனமத்தம் ஆக³தோ, அட்³ட⁴யோஜனம், கா³வுதம், ஜேதவனபோக்க²ரணீஸமீபம் ஆக³தோ, ப⁴ந்தே’’தி. ‘‘ஸசேபி அந்தோஜேதவனம் பவிஸதி, நேவ மம் பஸ்ஸிதும் லபி⁴ஸ்ஸதீ’’தி. தே³வத³த்தம் க³ஹேத்வா ஆக³தா ஜேதவனபோக்க²ரணீதீரே மஞ்சம் ஓதாரேத்வா போக்க²ரணிம் ந்ஹாயிதும் ஓதரிம்ஸு. தே³வத³த்தோபி கோ² மஞ்சதோ வுட்டா²ய உபோ⁴ பாதே³ பூ⁴மியம் ட²பேத்வா நிஸீதி³. பாதா³ பத²விம் பவிஸிம்ஸு. ஸோ அனுக்கமேன யாவ கோ³ப்ப²கா, யாவ ஜண்ணுகா, யாவ கடிதோ, யாவ த²னதோ, யாவ கீ³வதோ பவிஸித்வா ஹனுகட்டி²கஸ்ஸ பூ⁴மியம் பவிட்ட²காலே –

‘‘இமேஹி அட்டீ²ஹி தமக்³க³புக்³க³லம்,

தே³வாதிதே³வம் நரத³ம்மஸாரதி²ம்;

ஸமந்தசக்கு²ம் ஸதபுஞ்ஞலக்க²ணம்,

பாணேஹி பு³த்³த⁴ம் ஸரணம் உபேமீ’’தி. (மி. ப. 4.1.3) –

இமம் கா³த²மாஹ. இத³ம் கிர டா²னம் தி³ஸ்வா ததா²க³தோ தே³வத³த்தம் பப்³பா³ஜேஸி. ஸசே ஹி ந ஸோ பப்³ப³ஜிஸ்ஸ, கி³ஹீ ஹுத்வா கம்மஞ்ச பா⁴ரியம் அகரிஸ்ஸ, ஆயதிம் ப⁴வனிஸ்ஸரணபச்சயம் காதும் ந ஸக்கி²ஸ்ஸ, பப்³ப³ஜித்வா ச பன கிஞ்சாபி கம்மம் பா⁴ரியம் கரிஸ்ஸதி, ஆயதிம் ப⁴வனிஸ்ஸரணபச்சயம் காதும் ஸக்கி²ஸ்ஸதீதி தம் ஸத்தா² பப்³பா³ஜேஸி. ஸோ ஹி இதோ ஸதஸஹஸ்ஸகப்பமத்த²கே அட்டி²ஸ்ஸரோ நாம பச்சேகபு³த்³தோ⁴ ப⁴விஸ்ஸதி, ஸோ பத²விம் பவிஸித்வா அவீசிம்ஹி நிப்³ப³த்தி. நிச்சலே பு³த்³தே⁴ அபரஜ்ஜ²பா⁴வேன பன நிச்சலோவ ஹுத்வா பச்சதூதி யோஜனஸதிகே அந்தோ அவீசிம்ஹி யோஜனஸதுப்³பே³த⁴மேவஸ்ஸ ஸரீரம் நிப்³ப³த்தி. ஸீஸம் யாவ கண்ணஸக்க²லிதோ உபரி அயகபல்லம் பாவிஸி, பாதா³ யாவ கோ³ப்ப²கா ஹேட்டா² அயபத²வியம் பவிட்டா², மஹாதாலக்க²ந்த⁴பரிமாணம் அயஸூலம் பச்சி²மபி⁴த்திதோ நிக்க²மித்வா பிட்டி²மஜ்ஜ²ம் பி⁴ந்தி³த்வா உரேன நிக்க²மித்வா புரிமபி⁴த்திம் பாவிஸி, அபரம் த³க்கி²ணபி⁴த்திதோ நிக்க²மித்வா த³க்கி²ணபஸ்ஸம் பி⁴ந்தி³த்வா வாமபஸ்ஸேன நிக்க²மித்வா உத்தரபி⁴த்திம் பாவிஸி, அபரம் உபரி கபல்லதோ நிக்க²மித்வா மத்த²கம் பி⁴ந்தி³த்வா அதோ⁴பா⁴கே³ன நிக்க²மித்வா அயபத²விம் பாவிஸி. ஏவம் ஸோ தத்த² நிச்சலோவ பச்சி.

பி⁴க்கூ² ‘‘ஏத்தகம் டா²னம் தே³வத³த்தோ ஆக³ச்ச²ந்தோ ஸத்தா²ரம் த³ட்டு²ம் அலபி⁴த்வாவ பத²விம் பவிட்டோ²’’தி கத²ம் ஸமுட்டா²பேஸும். ஸத்தா² ‘‘ந, பி⁴க்க²வே, தே³வத³த்தோ இதா³னேவ மயி அபரஜ்ஜி²த்வா பத²விம் பாவிஸி, புப்³பே³பி பவிட்டோ²யேவா’’தி வத்வா ஹத்தி²ராஜகாலே மக்³க³மூள்ஹம் புரிஸம் ஸமஸ்ஸாஸேத்வா அத்தனோ பிட்டி²ம் ஆரோபேத்வா கே²மந்தம் பாபிதஸ்ஸ புன திக்க²த்தும் ஆக³ந்த்வா அக்³க³ட்டா²னே மஜ்ஜி²மட்டா²னே மூலேஹி ஏவம் த³ந்தே சி²ந்தி³த்வா ததியவாரே மஹாபுரிஸஸ்ஸ சக்கு²பத²ம் அதிக்கமந்தஸ்ஸ தஸ்ஸ பத²விம் பவிட்ட²பா⁴வம் தீ³பேதும் –

‘‘அகதஞ்ஞுஸ்ஸ போஸஸ்ஸ, நிச்சம் விவரத³ஸ்ஸினோ;

ஸப்³ப³ம் சே பத²விம் த³ஜ்ஜா, நேவ நம் அபி⁴ராத⁴யே’’தி. (ஜா. 1.1.72; 1.9.107) –

இத³ம் ஜாதகம் கதே²த்வா புனபி ததே²வ கதா²ய ஸமுட்டி²தாய க²ந்திவாதி³பூ⁴தே அத்தனி அபரஜ்ஜி²த்வா கலாபு³ராஜபூ⁴தஸ்ஸ தஸ்ஸ பத²விம் பவிட்ட²பா⁴வம் தீ³பேதும் க²ந்திவாதி³ஜாதகஞ்ச (ஜா. 1.4.49 ஆத³யோ), சூளத⁴ம்மபாலபூ⁴தே அத்தனி அபரஜ்ஜி²த்வா மஹாபதாபராஜபூ⁴தஸ்ஸ தஸ்ஸ பத²விம் பவிட்ட²பா⁴வம் தீ³பேதும் சூளத⁴ம்மபாலஜாதகஞ்ச (ஜா. 1.5.44 ஆத³யோ) கதே²ஸி.

பத²விம் பவிட்டே² பன தே³வத³த்தே மஹாஜனோ ஹட்ட²துட்டோ² த⁴ஜபடாககத³லியோ உஸ்ஸாபேத்வா புண்ணக⁴டே ட²பேத்வா ‘‘லாபா⁴ வத நோ’’தி மஹந்தம் ச²ணம் அனுபோ⁴தி. தமத்த²ம் ப⁴க³வதோ ஆரோசேஸும். ப⁴க³வா ‘‘ந, பி⁴க்க²வே, இதா³னேவ தே³வத³த்தே மதே மஹாஜனோ துஸ்ஸதி, புப்³பே³பி துஸ்ஸியேவா’’தி வத்வா ஸப்³ப³ஜனஸ்ஸ அப்பியே சண்டே³ ப²ருஸே பா³ராணஸியம் பிங்க³லரஞ்ஞே நாம மதே மஹாஜனஸ்ஸ துட்ட²பா⁴வம் தீ³பேதும் –

‘‘ஸப்³போ³ ஜனோ ஹிம்ஸிதோ பிங்க³லேன,

தஸ்மிம் மதே பச்சயா வேத³யந்தி;

பியோ நு தே ஆஸி அகண்ஹனேத்தோ,

கஸ்மா துவம் ரோத³ஸி த்³வாரபால.

‘‘ந மே பியோ ஆஸி அகண்ஹனேத்தோ,

பா⁴யாமி பச்சாக³மனாய தஸ்ஸ;

இதோ க³தோ ஹிம்ஸேய்ய மச்சுராஜம்,

ஸோ ஹிம்ஸிதோ ஆனேய்ய புன இதா⁴’’தி. (ஜா. 1.2.179-180) –

இத³ம் பிங்க³லஜாதகம் கதே²ஸி. பி⁴க்கூ² ஸத்தா²ரம் புச்சி²ம்ஸு – ‘‘இதா³னி, ப⁴ந்தே, தே³வத³த்தோ குஹிம் நிப்³ப³த்தோ’’தி? ‘‘அவீசிமஹானிரயே, பி⁴க்க²வே’’தி. ‘‘ப⁴ந்தே, இத⁴ தப்பந்தோ விசரித்வா புன க³ந்த்வா தப்பனட்டா²னேயேவ நிப்³ப³த்தோ’’தி. ‘‘ஆம, பி⁴க்க²வே, பப்³ப³ஜிதா வா ஹோந்து க³ஹட்டா² வா, பமாத³விஹாரினோ உப⁴யத்த² தப்பந்தியேவா’’தி வத்வா இமம் கா³த²மாஹ –

17. ‘‘இத⁴ தப்பதி பேச்ச தப்பதி, பாபகாரீ உப⁴யத்த² தப்பதி;

பாபம் மே கதந்தி தப்பதி, பி⁴ய்யோ தப்பதி து³க்³க³திம் க³தோ’’தி.

தத்த² இத⁴ தப்பதீதி இத⁴ கம்மதப்பனேன தோ³மனஸ்ஸமத்தேன தப்பதி. பேச்சாதி பரலோகே பன விபாகதப்பனேன அதிதா³ருணேன அபாயது³க்கே²ன தப்பதி. பாபகாரீதி நானப்பகாரஸ்ஸ பாபஸ்ஸ கத்தா. உப⁴யத்தா²தி இமினா வுத்தப்பகாரேன தப்பனேன உப⁴யத்த² தப்பதி நாம. பாபம் மேதி ஸோ ஹி கம்மதப்பனேன கப்பந்தோ ‘‘பாபம் மே கத’’ந்தி தப்பதி. தம் அப்பமத்தகம் தப்பனம், விபாகதப்பனேன பன தப்பந்தோ பி⁴ய்யோ தப்பதி து³க்³க³திம் க³தோ அதிப²ருஸேன தப்பனேன அதிவிய தப்பதீதி.

கா³தா²பரியோஸானே ப³ஹூ ஸோதாபன்னாத³யோ அஹேஸும். தே³ஸனா மஹாஜனஸ்ஸ ஸாத்தி²கா ஜாதாதி.

தே³வத³த்தவத்து² த்³வாத³ஸமம்.