22. ஸிகீ²பு³த்³த⁴வம்ஸவண்ணனா

விபஸ்ஸிஸ்ஸ அபரபா⁴கே³ அந்தரஹிதே ச தஸ்மிம் கப்பே ததோ பரம் ஏகூனஸட்டி²யா கப்பேஸு பு³த்³தா⁴ லோகே ந உப்பஜ்ஜிம்ஸு. அபக³தபு³த்³தா⁴லோகோ அஹோஸி. கிலேஸதே³வபுத்தமாரானம் ஏகரஜ்ஜம் அபக³தகண்டகம் அஹோஸி. இதோ பன ஏகத்திம்ஸகப்பே ஸினித்³த⁴ஸுக்க²ஸாரதா³ருபசிதோ பஹூதஸப்பிஸித்தோ நிதூ⁴மோ ஸிகீ² விய ஸிகீ² ச வேஸ்ஸபூ⁴ சாதி த்³வே ஸம்மாஸம்பு³த்³தா⁴ லோகே உப்பஜ்ஜிம்ஸு. தத்த² ஸிகீ² பன ப⁴க³வா பாரமியோ பூரேத்வா துஸிதபுரே நிப்³ப³த்தித்வா ததோ சவித்வா குஸலகரணவதீ அருணவதீனக³ரே பரமகு³ணவதோ அருணவதோ நாம ரஞ்ஞோ அக்³க³மஹேஸியா ரத்தகனகபடிபி³ம்ப³ருசிரப்பபா⁴ய பபா⁴வதியா நாம தே³வியா குச்சி²ஸ்மிம் படிஸந்தி⁴ம் க³ஹேத்வா த³ஸ மாஸே வீதினாமேத்வா நிஸபு⁴ய்யானே மாதுகுச்சி²தோ நிக்க²மி. நேமித்திகா பனஸ்ஸ நாமம் கரோந்தா உண்ஹீஸஸ்ஸ ஸிகா² விய உக்³க³தத்தா ‘‘ஸிகீ²’’தி நாமமகம்ஸு. ஸோ ஸத்தவஸ்ஸஸஹஸ்ஸானி அகா³ரம் அஜ்ஜா²வஸி. ஸுசந்த³கஸிரீகி³ரியஸனாரிவஸப⁴ நாமகா தயோ பாஸாதா³ அஹேஸும். ஸப்³ப³காமாதே³விப்பமுகா²னி சதுவீஸதி இத்தி²ஸஹஸ்ஸானி பச்சுபட்டி²தானி அஹேஸும்.

ஸோ சத்தாரி நிமித்தானி தி³ஸ்வா ஸப்³ப³காமாதே³வியா கு³ணக³ணாதுலே அதுலே நாம புத்தே உப்பன்னே ஹத்தி²யானேன ஹத்தி²க்க²ந்த⁴வரக³தோ மஹாபி⁴னிக்க²மனம் நிக்க²மித்வா பப்³ப³ஜி. தம் ஸத்ததிபுரிஸஸதஸஹஸ்ஸானி அனுபப்³ப³ஜிம்ஸு. ஸோ தேஹி பரிவுதோ அட்ட²மாஸம் பதா⁴னசரியம் சரித்வா விஸாக²புண்ணமாய க³ணஸங்க³ணிகம் பஹாய ஸுத³ஸ்ஸனனிக³மே பியத³ஸ்ஸீஸேட்டி²னோ தீ⁴துயா தி³ன்னம் மது⁴பாயாஸம் பரிபு⁴ஞ்ஜித்வா தருணக²தி³ரவனே தி³வாவிஹாரம் வீதினாமேத்வா அனோமத³ஸ்ஸினா நாம தாபஸேன தி³ன்னா அட்ட² குஸதிணமுட்டி²யோ க³ஹேத்வா புண்ட³ரீகபோ³தி⁴ம் உபஸங்கமி. தஸ்ஸா கிர புண்ட³ரீகபோ³தி⁴யாபி பாடலியா பமாணமேவ பமாணம் அஹோஸி. தம்தி³வஸமேவ ஸோ பண்ணாஸரதனக்க²ந்தோ⁴ ஹுத்வா அப்³பு⁴க்³க³தோ, ஸாகா²பிஸ்ஸ பண்ணாஸரதனமத்தாவ. ஸோ தி³ப்³பே³ஹி க³ந்தே⁴ஹி புப்பே²ஹி ஸஞ்ச²ன்னோ அஹோஸி. ந கேவலம் புப்பே²ஹேவ, ப²லேஹிபி ஸஞ்ச²ன்னோ அஹோஸி. தஸ்ஸ ஏகபஸ்ஸதோ தருணானி ப²லானி ஏகதோ மஜ்ஜி²மானி ஏகதோ நாதிபக்கானி ஏகதோ பக்கி²த்ததி³ப்³போ³ஜானி விய ஸுரஸானி வண்ணக³ந்த⁴ரஸஸம்பன்னானி ததோ ததோ ஓலம்ப³ந்தி. யதா² ச ஸோ, ஏவம் த³ஸஸஹஸ்ஸிசக்கவாளேஸு புப்பூ²பகா³ ருக்கா² புப்பே²ஹி ப²லூபகா³ ருக்கா² ப²லேஹி படிமண்டி³தா அஹேஸும்.

ஸோ தத்த² சதுவீஸதிஹத்த²வித்த²தம் திணஸந்த²ரம் ஸந்த²ரித்வா பல்லங்கம் ஆபு⁴ஜித்வா சதுரங்க³வீரியம் அதி⁴ட்டா²ய நிஸீதி³. ஏவம் நிஸீதி³த்வா ச²த்திம்ஸ யோஜனவித்த²தம் ஸமாரம் மாரப³லம் வித⁴மித்வா ஸம்போ³தி⁴ம் பாபுணித்வா – ‘‘அனேகஜாதிஸம்ஸாரம்…பே… தண்ஹானம் க²யமஜ்ஜ²கா³’’தி உதா³னம் உதா³னேத்வா போ³தி⁴ஸமீபேயேவ ஸத்தஸத்தாஹம் வீதினாமேத்வா ப்³ரஹ்மாயாசனம் ஸம்படிச்சி²த்வா அத்தனா ஸஹ பப்³ப³ஜிதானம் ஸத்ததியா பி⁴க்கு²ஸதஸஹஸ்ஸானம் உபனிஸ்ஸயஸம்பத்திம் தி³ஸ்வா ஸுரபதே²ன க³ந்த்வா விவிதா⁴வரணவதியா அருணவதியா ராஜதா⁴னியா ஸமீபே மிகா³ஜினுய்யானே ஓதரித்வா தேஹி முனிக³ணேஹி பரிவுதோ தேஸம் மஜ்ஜே² த⁴ம்மசக்கம் பவத்தேஸி. ததா³ கோடிஸதஸஹஸ்ஸானம் பட²மோ அபி⁴ஸமயோ அஹோஸி. தேன வுத்தம் –

1. ‘‘விபஸ்ஸிஸ்ஸ அபரேன, ஸம்பு³த்³தோ⁴ த்³விபது³த்தமோ;

ஸிகி²வ்ஹயோ ஆஸி ஜினோ, அஸமோ அப்படிபுக்³க³லோ.

2. ‘‘மாரஸேனம் பமத்³தி³த்வா, பத்தோ ஸம்போ³தி⁴முத்தமம்;

த⁴ம்மசக்கம் பவத்தேஸி, அனுகம்பாய பாணினம்.

3. ‘‘த⁴ம்மசக்கம் பவத்தேந்தே, ஸிகி²ம்ஹி ஜினபுங்க³வே;

கோடிஸதஸஹஸ்ஸானம், பட²மாபி⁴ஸமயோ அஹூ’’தி.

புனபி அருணவதியா ராஜதா⁴னியா ஸமீபேயேவ அபி⁴பூ⁴ராஜபுத்தஸ்ஸ ச ஸம்ப⁴வராஜபுத்தஸ்ஸ சாதி த்³வின்னம் ஸபரிவாரானம் த⁴ம்மம் தே³ஸேத்வா நவுதிகோடிஸஹஸ்ஸானி த⁴ம்மாமதம் பாயேஸி. ஸோ து³தியோ அபி⁴ஸமயோ அஹோஸி. தேன வுத்தம் –

4. ‘‘அபரம்பி த⁴ம்மம் தே³ஸேந்தே, க³ணஸேட்டே² நருத்தமே;

நவுத்திகோடிஸஹஸ்ஸானம், து³தியாபி⁴ஸமயோ அஹூ’’தி.

யதா³ பன ஸூரியவதீனக³ரத்³வாரே சம்பகருக்க²மூலே தித்தி²யமத³மானப⁴ஞ்ஜனத்த²ம் ஸப்³ப³ஜனப³ந்த⁴னமோக்க²த்த²ஞ்ச யமகபாடிஹாரியம் கரோந்தோ ப⁴க³வா த⁴ம்மம் தே³ஸேஸி, ததா³ அஸீதிகோடிஸஹஸ்ஸானம் ததியோ அபி⁴ஸமயோ அஹோஸி. தேன வுத்தம் –

5. ‘‘யமகபாடிஹாரியஞ்ச, த³ஸ்ஸயந்தே ஸதே³வகே;

அஸீதிகோடிஸஹஸ்ஸானம், ததியாபி⁴ஸமயோ அஹூ’’தி.

அபி⁴பு⁴னா ச ஸம்ப⁴வேன ச ராஜபுத்தேன ஸத்³தி⁴ம் பப்³ப³ஜிதானம் அரஹந்தானம் ஸதஸஹஸ்ஸானம் மஜ்ஜே² நிஸீதி³த்வா பாதிமோக்க²ம் உத்³தி³ஸி, ஸோ பட²மோ ஸன்னிபாதோ அஹோஸி, அருணவதீனக³ரே ஞாதிஸமாக³மே பப்³ப³ஜிதானம் அஸீதியா பி⁴க்கு²ஸஹஸ்ஸானம் மஜ்ஜே² நிஸீதி³த்வா பாதிமோக்க²ம் உத்³தி³ஸி, ஸோ து³தியோ ஸன்னிபாதோ அஹோஸி. த⁴னஞ்ஜயனக³ரே த⁴னபாலகனாக³வினயனஸமயே பப்³ப³ஜிதானம் ஸத்ததியா பி⁴க்கு²ஸஹஸ்ஸானம் மஜ்ஜே² ப⁴க³வா பாதிமோக்க²ம் உத்³தி³ஸி, ஸோ ததியோ ஸன்னிபாதோ அஹோஸி. தேன வுத்தம் –

6. ‘‘ஸன்னிபாதா தயோ ஆஸும், ஸிகி²ஸ்ஸாபி மஹேஸினோ;

கீ²ணாஸவானம் விமலானம், ஸந்தசித்தான தாதி³னம்.

7. ‘‘பி⁴க்கு²ஸதஸஹஸ்ஸானம், பட²மோ ஆஸி ஸமாக³மோ;

அஸீதிபி⁴க்கு²ஸஹஸ்ஸானம், து³தியோ ஆஸி ஸமாக³மோ.

8. ‘‘ஸத்ததிபி⁴க்கு²ஸஹஸ்ஸானம், ததியோ ஆஸி ஸமாக³மோ;

அனுபலித்தோ பது³மம்வ, தோயம்ஹி ஸம்பவட்³டி⁴த’’ந்தி.

தத்த² அனுபலித்தோ பது³மம்வாதி தோயே ஜாதம் தோயேவ வட்³டி⁴தம் பது³மம் விய தோயேன அனுபலித்தம், ஸோபி பி⁴க்கு²ஸன்னிபாதோ லோகே ஜாதோபி லோகத⁴ம்மேஹி அனுபலித்தோ அஹோஸீதி அத்தோ².

ததா³ கிர அம்ஹாகம் போ³தி⁴ஸத்தோ கத்த²சி அஸம்ஸட்டோ² பரிபு⁴த்தனக³ரே அரிந்த³மோ நாம ராஜா ஹுத்வா ஸிகி²ம்ஹி ஸத்த²ரி பரிபு⁴த்தனக³ரமனுப்பத்தே ஸபரிவாரோ ராஜா ப⁴க³வதோ பச்சுக்³க³ந்த்வா பஸாத³வட்³டி⁴தஹத³யனயனஸோதோ த³ஸப³லஸ்ஸ அமலசரணகமலயுக³ளேஸு ஸபரிவாரோ ஸிரஸா அபி⁴வந்தி³த்வா த³ஸப³லம் நிமந்தேத்வா ஸத்தாஹம் இஸ்ஸரியகுலவிப⁴வஸத்³தா⁴னுரூபம் மஹாதா³னம் த³த்வா து³ஸ்ஸப⁴ண்டா³கா³ரத்³வாரானி விவராபேத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹக்³கா⁴னி வத்தா²னி அதா³ஸி. அத்தனோ ச ப³லரூபலக்க²ணஜவஸம்பன்னஹேமஜாலமாலாஸமலங்கதம் நவகனகருசிரத³ண்ட³கோஸசாமரயுக³விராஜிதம் விபுலமுது³கண்ணம் சந்த³ராஜிவிராஜிதவத³னஸோப⁴ம் ஏராவணவாரணமிவ அரிவாரணம் வரவாரணம் த³த்வா வாரணப்பமாணமேவ கத்வா கப்பியப⁴ண்ட³ஞ்ச அதா³ஸி. ஸோபி நம் ஸத்தா² – ‘‘இதோ ஏகத்திம்ஸகப்பே பு³த்³தோ⁴ ப⁴விஸ்ஸதீ’’தி ப்³யாகாஸி. தேன வுத்தம் –

9. ‘‘அஹம் தேன ஸமயேன, அரிந்த³மோ நாம க²த்தியோ;

ஸம்பு³த்³த⁴ப்பமுக²ம் ஸங்க⁴ம், அன்னபானேன தப்பயிம்.

10. ‘‘ப³ஹும் து³ஸ்ஸவரம் த³த்வா, து³ஸ்ஸகோடிம் அனப்பகம்;

அலங்கதம் ஹத்தி²யானம், ஸம்பு³த்³த⁴ஸ்ஸ அதா³ஸஹம்.

11. ‘‘ஹத்தி²யானம் நிம்மினித்வா, கப்பியம் உபனாமயிம்;

பூரயிம் மானஸம் மய்ஹம், நிச்சம் த³ள்ஹமுபட்டி²தம்.

12. ‘‘ஸோபி மம் பு³த்³தோ⁴ ப்³யாகாஸி, ஸிகீ² லோகக்³க³னாயகோ;

ஏகத்திம்ஸே இதோ கப்பே, அயம் பு³த்³தோ⁴ ப⁴விஸ்ஸதி.

13. ‘‘அஹு கபிலவ்ஹயா ரம்மா…பே… ஹேஸ்ஸாம ஸம்முகா² இமம்.

14. ‘‘தஸ்ஸாஹம் வசனம் ஸுத்வா, பி⁴ய்யோ சித்தம் பஸாத³யிம்;

உத்தரிம் வதமதி⁴ட்டா²ஸிம், த³ஸபாரமிபூரியா’’தி.

தத்த² நிம்மினித்வாதி தஸ்ஸ ஹத்தி²னோ பமாணேன துலயித்வா. கப்பியந்தி கப்பியப⁴ண்ட³ம், பி⁴க்கூ²னம் யம் ப⁴ண்ட³ம் கப்பதி க³ஹேதும், தம் கப்பியப⁴ண்ட³ம் நாம. பூரயிம் மானஸம் மய்ஹந்தி மம சித்தம் தா³னபீதியா பூரயிம், மய்ஹம் ஹாஸுப்பாத³னஸமத்த²ம் அகாஸிந்தி அத்தோ². நிச்சம் த³ள்ஹமுபட்டி²தந்தி நிச்சகாலம் தா³னம் த³ஸ்ஸாமீ’’தி தா³னவஸேன த³ள்ஹம் உபட்டி²தம் சித்தந்தி அத்தோ².

தஸ்ஸ பன ப⁴க³வதோ நக³ரம் அருணவதீ நாம அஹோஸி. அருணவா நாம ராஜா பிதா, பபா⁴வதீ நாம மாதா, அபி⁴பூ⁴ ச ஸம்ப⁴வோ ச த்³வே அக்³க³ஸாவகா, கே²மங்கரோ நாமுபட்டா²கோ, ஸகி²லா ச மது³மா ச த்³வே அக்³க³ஸாவிகா, புண்ட³ரீகருக்கோ² போ³தி⁴, ஸரீரஞ்சஸ்ஸ ஸத்ததிஹத்து²ப்³பே³த⁴ம் அஹோஸி. ஸரீரப்பபா⁴ நிச்சகாலம் யோஜனத்தயம் ப²ரித்வா அட்டா²ஸி. ஸத்ததிவஸ்ஸஸஹஸ்ஸானி ஆயு, ஸப்³ப³காமா நாமஸ்ஸ அக்³க³மஹேஸீ, அதுலோ நாமஸ்ஸ புத்தோ, ஹத்தி²யானேன நிக்க²மி. தேன வுத்தம் –

15. ‘‘நக³ரம் அருணவதீ நாம, அருணோ நாம க²த்தியோ;

பபா⁴வதீ நாம ஜனிகா, ஸிகி²ஸ்ஸாபி மஹேஸினோ.

20. ‘‘அபி⁴பூ⁴ ஸம்ப⁴வோ சேவ, அஹேஸும் அக்³க³ஸாவகா;

கே²மங்கரோ நாமுபட்டா²கோ, ஸிகி²ஸ்ஸாபி மஹேஸினோ.

21. ‘‘ஸகி²லா ச பது³மா ச, அஹேஸும் அக்³க³ஸாவிகா;

போ³தி⁴ தஸ்ஸ ப⁴க³வதோ, புண்ட³ரீகோதி வுச்சதி.

22. ‘‘ஸிரிவட்³டோ⁴ ச நந்தோ³ ச, அஹேஸும் அக்³கு³பட்ட²கா;

சித்தா சேவ ஸுகு³த்தா ச, அஹேஸும் அக்³கு³பட்டி²கா.

23. ‘‘உச்சத்தனேன ஸோ பு³த்³தோ⁴, ஸத்ததிஹத்த²முக்³க³தோ;

கஞ்சனக்³கி⁴யஸங்காஸோ, த்³வத்திம்ஸவரலக்க²ணோ.

24. ‘‘தஸ்ஸாபி ப்³யாமப்பபா⁴ காயா, தி³வாரத்திம் நிரந்தரம்;

தி³ஸோதி³ஸம் நிச்ச²ரந்தி, தீணி யோஜனஸோ பபா⁴.

25. ‘‘ஸத்ததிவஸ்ஸஸஹஸ்ஸானி, ஆயு தஸ்ஸ மஹேஸினோ;

தாவதா திட்ட²மானோ ஸோ, தாரேஸி ஜனதம் ப³ஹும்.

26. ‘‘த⁴ம்மமேக⁴ம் பவஸ்ஸேத்வா, தேமயித்வா ஸதே³வகே;

கே²மந்தம் பாபயித்வான, நிப்³பு³தோ ஸோ ஸஸாவகோ.

27. ‘‘அனுப்³யஞ்ஜனஸம்பன்னம், த்³வத்திம்ஸவரலக்க²ணம்;

ஸப்³ப³ம் தமந்தரஹிதம், நனு ரித்தா ஸப்³ப³ஸங்கா²ரா’’தி.

தத்த² புண்ட³ரீகோதி ஸேதம்ப³ருக்கோ². தீணி யோஜனஸோ பபா⁴தி தீணி யோஜனானி பபா⁴ நிச்ச²ரந்தீதி அத்தோ². த⁴ம்மமேக⁴ந்தி த⁴ம்மவஸ்ஸம், த⁴ம்மவஸ்ஸனகோ பு³த்³த⁴மேகோ⁴. தேமயித்வாதி த⁴ம்மகதா²ஸலிலேன தேமேத்வா, ஸிஞ்சித்வாதி அத்தோ². ஸதே³வகேதி ஸதே³வகே ஸத்தே. கே²மந்தந்தி கே²மந்தம் நிப்³பா³னம். அனுப்³யஞ்ஜனஸம்பன்னந்தி தம்ப³னக²துங்க³னாஸவட்டங்கு³லிதாதீ³ஹி அஸீதியா அனுப்³யஞ்ஜனேஹி ஸம்பன்னம், த்³வத்திம்ஸமஹாபுரிஸலக்க²ணபடிமண்டி³தம் ப⁴க³வதோ ஸரீரந்தி அத்தோ². ஸிகீ² கிர ஸம்மாஸம்பு³த்³தோ⁴ ஸீலவதீனக³ரே அஸ்ஸாராமே பரினிப்³பா³யி.

‘‘ஸிகீ²வ லோகே தபஸா ஜலித்வா, ஸிகீ²வ மேகா⁴க³மனே நதி³த்வா;

ஸிகீ² மஹேஸிந்த⁴னவிப்பஹீனோ, ஸிகீ²வ ஸந்திம் ஸுக³தோ க³தோ ஸோ’’.

ஸிகி²ஸ்ஸ கிர ப⁴க³வதோ தா⁴துயோ ஏகக்³க⁴னாவ ஹுத்வா அட்ட²ம்ஸு ந விப்பகிரிம்ஸு. ஸகலஜம்பு³தீ³பவாஸினோ பன மனுஸ்ஸா தியோஜனுப்³பே³த⁴ம் ஸத்தரதனமயம் ஹிமகி³ரிஸதி³ஸஸோப⁴ம் தூ²பமகம்ஸு. ஸேஸமேத்த² கா³தா²ஸு பாகடமேவாதி.

ஸிகீ²பு³த்³த⁴வம்ஸவண்ணனா நிட்டி²தா.

நிட்டி²தோ வீஸதிமோ பு³த்³த⁴வம்ஸோ.