ஸுமேத⁴கதா²

கப்பஸதஸஹஸ்ஸாதி⁴கானஞ்ஹி சதுன்னம் அஸங்க்²யேய்யானம் மத்த²கே த³ஸஹி ஸத்³தே³ஹி அவிவித்தம் ‘‘அமரவதீ’’தி ச ‘‘அமர’’ந்தி ச லத்³த⁴னாமம் நக³ரம் அஹோஸி, யம் ஸந்தா⁴ய பு³த்³த⁴வம்ஸே வுத்தம் –

‘‘கப்பே ச ஸதஸஹஸ்ஸே, சதுரோ ச அஸங்கி²யே;

அமரம் நாம நக³ரம், த³ஸ்ஸனேய்யம் மனோரமம்;

த³ஸஹி ஸத்³தே³ஹி அவிவித்தம், அன்னபானஸமாயுத’’ந்தி. (பு³. வம். 2.1-2);

தத்த² த³ஸஹி ஸத்³தே³ஹி அவிவித்தந்தி ஹத்தி²ஸத்³தே³ன அஸ்ஸஸத்³தே³ன ரத²ஸத்³தே³ன பே⁴ரிஸத்³தே³ன முதி³ங்க³ஸத்³தே³ன வீணாஸத்³தே³ன கீ³தஸத்³தே³ன ஸங்க²ஸத்³தே³ன ஸம்மஸத்³தே³ன தாளஸத்³தே³ன ‘‘அஸ்னாத² பிவத² கா²த³தா²’’தி த³ஸமேன ஸத்³தே³னாதி இமேஹி த³ஸஹி ஸத்³தே³ஹி அவிவித்தம் அஹோஸி. தேஸம் பன ஸத்³தா³னம் ஏகதே³ஸமேவ க³ஹேத்வா –

‘‘ஹத்தி²ஸத்³த³ம் அஸ்ஸஸத்³த³ம், பே⁴ரிஸங்க²ரதா²னி ச;

கா²த³த² பிவத² சேவ, அன்னபானேன கோ⁴ஸித’’ந்தி. –

பு³த்³த⁴வம்ஸே (பு³. வம். 2.3-5) இமம் கா³த²ம் வத்வா –

‘‘நக³ரம் ஸப்³ப³ங்க³ஸம்பன்னம், ஸப்³ப³கம்மமுபாக³தம்;

ஸத்தரதனஸம்பன்னம், நானாஜனஸமாகுலம்;

ஸமித்³த⁴ம் தே³வனக³ரம்வ, ஆவாஸம் புஞ்ஞகம்மினம்.

‘‘நக³ரே அமரவதியா, ஸுமேதோ⁴ நாம ப்³ராஹ்மணோ;

அனேககோடிஸன்னிசயோ, பஹூதத⁴னத⁴ஞ்ஞவா.

‘‘அஜ்ஜா²யகோ மந்தத⁴ரோ, திண்ணம் வேதா³ன பாரகூ³;

லக்க²ணே இதிஹாஸே ச, ஸத⁴ம்மே பாரமிம் க³தோ’’தி. – வுத்தம்;

அதே²கதி³வஸம் ஸோ ஸுமேத⁴பண்டி³தோ உபரிபாஸாத³வரதலே ரஹோக³தோ ஹுத்வா பல்லங்கம் ஆபு⁴ஜித்வா நிஸின்னோ ஏவம் சிந்தேஸி – ‘‘புனப்³ப⁴வே, பண்டி³த, படிஸந்தி⁴க்³க³ஹணம் நாம து³க்க²ம், ததா² நிப்³ப³த்தனிப்³ப³த்தட்டா²னே ஸரீரஸ்ஸ பே⁴த³னம், அஹஞ்ச ஜாதித⁴ம்மோ, ஜராத⁴ம்மோ, ப்³யாதி⁴த⁴ம்மோ, மரணத⁴ம்மோ, ஏவம்பூ⁴தேன மயா அஜாதிம் அஜரம் அப்³யாதி⁴ம் அமரணம் அது³க்க²ம் ஸுக²ம் ஸீதலம் அமதமஹானிப்³பா³னம் பரியேஸிதும் வட்டதி. அவஸ்ஸம் ப⁴வதோ முச்சித்வா நிப்³பா³னகா³மினா ஏகேன மக்³கே³ன ப⁴விதப்³ப³’’ந்தி. தேன வுத்தம் –

‘‘ரஹோக³தோ நிஸீதி³த்வா, ஏவம் சிந்தேஸஹம் ததா³;

து³க்கோ² புனப்³ப⁴வோ நாம, ஸரீரஸ்ஸ ச பே⁴த³னம்.

‘‘ஜாதித⁴ம்மோ ஜராத⁴ம்மோ, ப்³யாதி⁴த⁴ம்மோ ஸஹம் ததா³;

அஜரம் அமரம் கே²மம், பரியேஸிஸ்ஸாமி நிப்³பு³திம்.

‘‘யம்னூனிமம் பூதிகாயம், நானாகுணபபூரிதம்;

ச²ட்³ட³யித்வான க³ச்சே²ய்யம், அனபேக்கோ² அனத்தி²கோ.

‘‘அத்தி² ஹேஹிதி ஸோ மக்³கோ³, ந ஸோ ஸக்கா ந ஹேதுயே;

பரியேஸிஸ்ஸாமி தம் மக்³க³ம், ப⁴வதோ பரிமுத்தியா’’தி.

ததோ உத்தரிபி ஏவம் சிந்தேஸி – ‘‘யதா² ஹி லோகே து³க்க²ஸ்ஸ படிபக்க²பூ⁴தம் ஸுக²ம் நாம அத்தி², ஏவம் ப⁴வே ஸதி தப்படிபக்கே²ன விப⁴வேனாபி ப⁴விதப்³ப³ம். யதா² ச உண்ஹே ஸதி தஸ்ஸ வூபஸமபூ⁴தம் ஸீதலம்பி அத்தி², ஏவம் ராக³க்³கி³ஆதீ³னம் வூபஸமேன நிப்³பா³னேனாபி ப⁴விதப்³ப³ம். யதா² நாம பாபஸ்ஸ லாமகஸ்ஸ த⁴ம்மஸ்ஸ படிபக்க²பூ⁴தோ கல்யாணோ அனவஜ்ஜபூ⁴தோ த⁴ம்மோபி அத்தி²யேவ, ஏவமேவ பாபிகாய ஜாதியா ஸதி ஸப்³ப³ஜாதிகே²பனதோ அஜாதிஸங்கா²தேன நிப்³பா³னேனாபி ப⁴விதப்³ப³மேவா’’தி. தேன வுத்தம் –

‘‘யதா²பி து³க்கே² விஜ்ஜந்தே, ஸுக²ம் நாமபி விஜ்ஜதி;

ஏவம் ப⁴வே விஜ்ஜமானே, விப⁴வோபிச்சி²தப்³ப³கோ.

‘‘யதா²பி உண்ஹே விஜ்ஜந்தே, அபரம் விஜ்ஜதி ஸீதலம்;

ஏவம் திவித⁴க்³கி³ விஜ்ஜந்தே, நிப்³பா³னம்பிச்சி²தப்³ப³கம்.

‘‘யதா²பி பாபே விஜ்ஜந்தே, கல்யாணமபி விஜ்ஜதி;

ஏவமேவ ஜாதி விஜ்ஜந்தே, அஜாதிபிச்சி²தப்³ப³க’’ந்தி.

அபரம்பி சிந்தேஸி – ‘‘யதா² நாம கூ³த²ராஸிம்ஹி நிமுக்³கே³ன புரிஸேன தூ³ரதோவ பஞ்சவண்ணபது³மஸஞ்ச²ன்னம் மஹாதளாகம் தி³ஸ்வா ‘கதரேன நு கோ² மக்³கே³ன ஏத்த² க³ந்தப்³ப³’ந்தி தம் தளாகம் க³வேஸிதும் யுத்தம். யம் தஸ்ஸ அக³வேஸனம், ந ஸோ தளாகஸ்ஸ தோ³ஸோ, புரிஸஸ்ஸேவ தோ³ஸோ. ஏவம் கிலேஸமலதோ⁴வனே அமதமஹானிப்³பா³னதளாகே விஜ்ஜந்தே யம் தஸ்ஸ அக³வேஸனம், ந ஸோ அமதமஹானிப்³பா³னதளாகஸ்ஸ தோ³ஸோ, புரிஸஸ்ஸேவ தோ³ஸோ. யதா² ச சோரேஹி ஸம்பரிவாரிதோ புரிஸோ பலாயனமக்³கே³ விஜ்ஜமானேபி ஸசே ந பலாயதி, ந ஸோ மக்³க³ஸ்ஸ தோ³ஸோ, புரிஸஸ்ஸேவ தோ³ஸோ. ஏவமேவ கிலேஸேஹி பரிவாரேத்வா க³ஹிதஸ்ஸ புரிஸஸ்ஸ விஜ்ஜமானேயேவ நிப்³பா³னகா³மிம்ஹி ஸிவே மக்³கே³ மக்³க³ஸ்ஸ அக³வேஸனம் நாம ந மக்³க³ஸ்ஸ தோ³ஸோ, புரிஸஸ்ஸேவ தோ³ஸோ. யதா² ச ப்³யாதி⁴பீளிதோ புரிஸோ விஜ்ஜமானே ப்³யாதி⁴திகிச்ச²கே வேஜ்ஜே ஸசே தம் வேஜ்ஜம் க³வேஸித்வா ப்³யாதி⁴ம் ந திகிச்சா²பேதி, ந ஸோ வேஜ்ஜஸ்ஸ தோ³ஸோ, புரிஸஸ்ஸேவ தோ³ஸோ. ஏவமேவ யோ கிலேஸப்³யாதி⁴பீளிதோ கிலேஸவூபஸமமக்³க³கோவித³ம் விஜ்ஜமானமேவ ஆசரியம் ந க³வேஸதி, தஸ்ஸேவ தோ³ஸோ, ந கிலேஸவினாஸகஸ்ஸ ஆசரியஸ்ஸ தோ³ஸோ’’தி. தேன வுத்தம் –

‘‘யதா² கூ³த²க³தோ புரிஸோ, தளாகம் தி³ஸ்வான பூரிதம்;

ந க³வேஸதி தம் தளாகம், ந தோ³ஸோ தளாகஸ்ஸ ஸோ.

‘‘ஏவம் கிலேஸமலதோ⁴வே, விஜ்ஜந்தே அமதந்தளே;

ந க³வேஸதி தம் தளாகம், ந தோ³ஸோ அமதந்தளே.

‘‘யதா² அரீஹி பரிருத்³தோ⁴, விஜ்ஜந்தே க³மனம்பதே²;

ந பலாயதி ஸோ புரிஸோ, ந தோ³ஸோ அஞ்ஜஸஸ்ஸ ஸோ.

‘‘ஏவம் கிலேஸபரிருத்³தோ⁴, விஜ்ஜமானே ஸிவே பதே²;

ந க³வேஸதி தம் மக்³க³ம், ந தோ³ஸோ ஸிவமஞ்ஜஸே.

‘‘யதா²பி ப்³யாதி⁴தோ புரிஸோ, விஜ்ஜமானே திகிச்ச²கே;

ந திகிச்சா²பேதி தம் ப்³யாதி⁴ம், ந தோ³ஸோ ஸோ திகிச்ச²கே.

‘‘ஏவம் கிலேஸப்³யாதீ⁴ஹி, து³க்கி²தோ பரிபீளிதோ;

ந க³வேஸதி தம் ஆசரியம், ந தோ³ஸோ ஸோ வினாயகே’’தி.

அபரம்பி சிந்தேஸி – ‘‘யதா² மண்ட³னகஜாதிகோ புரிஸோ கண்டே² ஆஸத்தம் குணபம் ச²ட்³டே³த்வா ஸுக²ம் க³ச்சே²ய்ய, ஏவம் மயாபி இமம் பூதிகாயம் ச²ட்³டே³த்வா அனபேக்கே²ன நிப்³பா³னனக³ரம் பவிஸிதப்³ப³ம். யதா² ச நரனாரியோ உக்காரபூ⁴மியம் உச்சாரபஸ்ஸாவம் கத்வா ந தம் உச்ச²ங்கே³ன வா ஆதா³ய, து³ஸ்ஸந்தேன வா வேடே²த்வா க³ச்ச²ந்தி, ஜிகு³ச்ச²மானா பன அனபேக்கா²வ, ச²ட்³டே³த்வா க³ச்ச²ந்தி, ஏவம் மயாபி இமம் பூதிகாயம் அனபேக்கே²ன ச²ட்³டே³த்வா அமதனிப்³பா³னனக³ரம் பவிஸிதும் வட்டதி. யதா² ச நாவிகா நாம ஜஜ்ஜரம் நாவம் அனபேக்கா²வ ச²ட்³டே³த்வா க³ச்ச²ந்தி, ஏவம் அஹம்பி இமம் நவஹி வணமுகே²ஹி பக்³க⁴ரந்தம் காயம் ச²ட்³டே³த்வா அனபேக்கோ² நிப்³பா³னபுரம் பவிஸிஸ்ஸாமி. யதா² ச புரிஸோ நானாரதனானி ஆதா³ய சோரேஹி ஸத்³தி⁴ம் மக்³க³ம் க³ச்ச²ந்தோ அத்தனோ ரதனனாஸப⁴யேன தே ச²ட்³டே³த்வா கே²மம் மக்³க³ம் க³ண்ஹாதி, ஏவம் அயம்பி கரஜகாயோ ரதனவிலோபகசோரஸதி³ஸோ. ஸசாஹம் ஏத்த² தண்ஹம் கரிஸ்ஸாமி, அரியமக்³க³குஸலத⁴ம்மரதனம் மே நஸ்ஸிஸ்ஸதி, தஸ்மா மயா இமம் சோரஸதி³ஸம் காயம் ச²ட்³டே³த்வா அமதமஹானிப்³பா³னனக³ரம் பவிஸிதும் வட்டதீ’’தி. தேன வுத்தம் –

‘‘யதா²பி குணபம் புரிஸோ, கண்டே² ப³த்³த⁴ம் ஜிகு³ச்சி²ய;

மோசயித்வான க³ச்சே²ய்ய, ஸுகீ² ஸேரீ ஸயம்வஸீ.

‘‘ததே²விமம் பூதிகாயம், நானாகுணபஸஞ்சயம்;

ச²ட்³ட³யித்வான க³ச்சே²ய்யம், அனபேக்கோ² அனத்தி²கோ.

‘‘யதா² உச்சாரட்டா²னம்ஹி, கரீஸம் நரனாரியோ;

ச²ட்³ட³யித்வான க³ச்ச²ந்தி, அனபேக்கா² அனத்தி²கா.

‘‘ஏவமேவாஹம் இமம் காயம், நானாகுணபபூரிதம்;

ச²ட்³ட³யித்வான க³ச்சி²ஸ்ஸம், வச்சம் கத்வா யதா² குடிம்.

‘‘யதா²பி ஜஜ்ஜரம் நாவம், பலுக்³க³ம் உத³கா³ஹினிம்;

ஸாமீ ச²ட்³டே³த்வா க³ச்ச²ந்தி, அனபேக்கா² அனத்தி²கா.

‘‘ஏவமேவாஹம் இமம் காயம், நவச்சி²த்³த³ம் து⁴வஸ்ஸவம்;

ச²ட்³ட³யித்வான க³ச்சி²ஸ்ஸம், ஜிண்ணனாவம்வ ஸாமிகா.

‘‘யதா²பி புரிஸோ சோரேஹி, க³ச்ச²ந்தோ ப⁴ண்ட³மாதி³ய;

ப⁴ண்ட³ச்சே²த³ப⁴யம் தி³ஸ்வா, ச²ட்³ட³யித்வான க³ச்ச²தி.

‘‘ஏவமேவ அயம் காயோ, மஹாசோரஸமோ விய;

பஹாயிமம் க³மிஸ்ஸாமி, குஸலச்சே²த³னா ப⁴யா’’தி.

ஏவம் ஸுமேத⁴பண்டி³தோ நானாவிதா⁴ஹி உபமாஹி இமம் நேக்க²ம்மூபஸம்ஹிதம் அத்த²ம் சிந்தேத்வா ஸகனிவேஸனே அபரிமிதபோ⁴க³க்க²ந்த⁴ம் ஹேட்டா² வுத்தனயேன கபணத்³தி⁴காதீ³னம் விஸ்ஸஜ்ஜேத்வா மஹாதா³னம் த³த்வா வத்து²காமே ச கிலேஸகாமே ச பஹாய அமரனக³ரதோ நிக்க²மித்வா ஏககோவ ஹிமவந்தே த⁴ம்மிகம் நாம பப்³ப³தம் நிஸ்ஸாய அஸ்ஸமம் கத்வா தத்த² பண்ணஸாலஞ்ச சங்கமஞ்ச மாபேத்வா பஞ்சஹி நீவரணதோ³ஸேஹி வஜ்ஜிதம் ‘‘ஏவம் ஸமாஹிதே சித்தே’’திஆதி³னா நயேன வுத்தேஹி அட்ட²ஹி காரணகு³ணேஹி ஸமுபேதம் அபி⁴ஞ்ஞாஸங்கா²தம் ப³லம் ஆஹரிதும் தஸ்மிம் அஸ்ஸமபதே³ நவதோ³ஸஸமன்னாக³தம் ஸாடகம் பஜஹித்வா, த்³வாத³ஸகு³ணஸமன்னாக³தம் வாகசீரம் நிவாஸேத்வா, இஸிபப்³ப³ஜ்ஜம் பப்³ப³ஜி. ஏவம் பப்³ப³ஜிதோ அட்ட²தோ³ஸஸமாகிண்ணம் தம் பண்ணஸாலம் பஹாய த³ஸகு³ணஸமன்னாக³தம் ருக்க²மூலம் உபக³ந்த்வா ஸப்³ப³ம் த⁴ஞ்ஞவிகதிம் பஹாய பவத்தப²லபோ⁴ஜனோ ஹுத்வா நிஸஜ்ஜட்டா²னசங்கமனவஸேனேவ பதா⁴னம் பத³ஹந்தோ ஸத்தாஹப்³ப⁴ந்தரேயேவ அட்ட²ன்னம் ஸமாபத்தீனம் பஞ்சன்னஞ்ச அபி⁴ஞ்ஞானம் லாபீ⁴ அஹோஸி. ஏவம் தம் யதா²பத்தி²தம் அபி⁴ஞ்ஞாப³லம் பாபுணி. தேன வுத்தம் –

‘‘ஏவாஹம் சிந்தயித்வான, நேககோடிஸதம் த⁴னம்;

நாதா²னாதா²னம் த³த்வான, ஹிமவந்தமுபாக³மிம்.

‘‘ஹிமவந்தஸ்ஸாவிதூ³ரே, த⁴ம்மிகோ நாம பப்³ப³தோ;

அஸ்ஸமோ ஸுகதோ மய்ஹம், பண்ணஸாலா ஸுமாபிதா.

‘‘சங்கமம் தத்த² மாபேஸிம், பஞ்சதோ³ஸவிவஜ்ஜிதம்;

அட்ட²கு³ணஸமுபேதம், அபி⁴ஞ்ஞாப³லமாஹரிம்.

‘‘ஸாடகம் பஜஹிம் தத்த², நவதோ³ஸமுபாக³தம்;

வாகசீரம் நிவாஸேஸிம், த்³வாத³ஸகு³ணமுபாக³தம்.

‘‘அட்ட²தோ³ஸஸமாகிண்ணம், பஜஹிம் பண்ணஸாலகம்;

உபாக³மிம் ருக்க²மூலம், கு³ணே த³ஸஹுபாக³தம்.

‘‘வாபிதம் ரோபிதம் த⁴ஞ்ஞம், பஜஹிம் நிரவஸேஸதோ;

அனேககு³ணஸம்பன்னம், பவத்தப²லமாதி³யிம்.

‘‘தத்த²ப்பதா⁴னம் பத³ஹிம், நிஸஜ்ஜட்டா²னசங்கமே;

அப்³ப⁴ந்தரம்ஹி ஸத்தாஹே, அபி⁴ஞ்ஞாப³ல பாபுணி’’ந்தி.

தத்த² ‘‘அஸ்ஸமோ ஸுகதோ மய்ஹம், பண்ணஸாலா ஸுமாபிதா’’தி இமாய பன பாளியா ஸுமேத⁴பண்டி³தேன அஸ்ஸமபண்ணஸாலசங்கமா ஸஹத்தா² மாபிதா விய வுத்தா. அயம் பனேத்த² அத்தோ² – மஹாஸத்தஞ்ஹி ‘‘ஹிமவந்தம் அஜ்ஜோ²கா³ஹேத்வா அஜ்ஜ த⁴ம்மிகபப்³ப³தம் பவிஸிஸ்ஸதீ’’தி தி³ஸ்வா ஸக்கோ விஸ்ஸகம்மதே³வபுத்தம் ஆமந்தேஸி – ‘‘தாத, அயம் ஸுமேத⁴பண்டி³தோ ‘பப்³ப³ஜிஸ்ஸாமீ’தி நிக்க²ந்தோ, ஏதஸ்ஸ வஸனட்டா²னம் மாபேஹீ’’தி. ஸோ தஸ்ஸ வசனம் ஸம்படிச்சி²த்வா ரமணீயம் அஸ்ஸமம், ஸுகு³த்தம் பண்ணஸாலம், மனோரமம் சங்கமஞ்ச மாபேஸி. ப⁴க³வா பன ததா³ அத்தனோ புஞ்ஞானுபா⁴வேன நிப்ப²ன்னம் தம் அஸ்ஸமபத³ம் ஸந்தா⁴ய ‘‘ஸாரிபுத்த, தஸ்மிம் த⁴ம்மிகபப்³ப³தே –

‘‘அஸ்ஸமோ ஸுகதோ மய்ஹம், பண்ணஸாலா ஸுமாபிதா;

சங்கமம் தத்த² மாபேஸிம், பஞ்சதோ³ஸவிவஜ்ஜித’’’ந்தி. –

ஆஹ. தத்த² ஸுகதோ மய்ஹந்தி ஸுட்டு² கதோ மயா. பண்ணஸாலா ஸுமாபிதாதி பண்ணச்ச²த³னஸாலாபி மே ஸுமாபிதா அஹோஸி.

பஞ்சதோ³ஸவிவஜ்ஜிதந்தி பஞ்சிமே சங்கமதோ³ஸா நாம த²த்³த⁴விஸமதா, அந்தோருக்க²தா, க³ஹனச்ச²ன்னதா, அதிஸம்பா³த⁴தா, அதிவிஸாலதாதி. த²த்³த⁴விஸமபூ⁴மிபா⁴க³ஸ்மிஞ்ஹி சங்கமே சங்கமந்தஸ்ஸ பாதா³ ருஜ்ஜந்தி, போ²டா உட்ட²ஹந்தி, சித்தம் ஏகக்³க³தம் ந லப⁴தி, கம்மட்டா²னம் விபஜ்ஜதி. முது³ஸமதலே பன பா²ஸுவிஹாரம் ஆக³ம்ம கம்மட்டா²னம் ஸம்பஜ்ஜதி. தஸ்மா த²த்³த⁴விஸமபூ⁴மிபா⁴க³தா ஏகோ தோ³ஸோதி வேதி³தப்³போ³. சங்கமஸ்ஸ அந்தோ வா மஜ்ஜே² வா கோடியம் வா ருக்கே² ஸதி பமாத³மாக³ம்ம சங்கமந்தஸ்ஸ நலாடம் வா ஸீஸம் வா படிஹஞ்ஞதீதி அந்தோருக்க²தா து³தியோ தோ³ஸோ. திணலதாதி³க³ஹனச்ச²ன்னே சங்கமே சங்கமந்தோ அந்த⁴காரவேலாயம் உரகா³தி³கே பாணே அக்கமித்வா வா மாரேதி, தேஹி வா த³ட்டோ² து³க்க²ம் ஆபஜ்ஜதீதி க³ஹனச்ச²ன்னதா ததியோ தோ³ஸோ. அதிஸம்பா³தே⁴ சங்கமே வித்தா²ரதோ ரதனிகே வா அட்³ட⁴ரதனிகே வா சங்கமந்தஸ்ஸ பரிச்சே²தே³ பக்க²லித்வா நகா²பி அங்கு³லியோபி பி⁴ஜ்ஜந்தீதி அதிஸம்பா³த⁴தா சதுத்தோ² தோ³ஸோ. அதிவிஸாலே சங்கமே சங்கமந்தஸ்ஸ சித்தம் விதா⁴வதி, ஏகக்³க³தம் ந லப⁴தீதி அதிவிஸாலதா பஞ்சமோ தோ³ஸோ. புது²லதோ பன தி³யட்³ட⁴ரதனம் த்³வீஸு பஸ்ஸேஸு ரதனமத்தம் அனுசங்கமம் தீ³க⁴தோ ஸட்டி²ஹத்த²ம் முது³தலம் ஸமவிப்பகிண்ணவாலுகம் சங்கமம் வட்டதி சேதியகி³ரிம்ஹி தீ³பப்பஸாத³கமஹாமஹிந்த³த்தே²ரஸ்ஸ சங்கமம் விய, தாதி³ஸம் தம் அஹோஸி. தேனாஹ – ‘‘சங்கமம் தத்த² மாபேஸிம், பஞ்சதோ³ஸவிவஜ்ஜித’’ந்தி.

அட்ட²கு³ணஸமுபேதந்தி அட்ட²ஹி ஸமணஸுகே²ஹி உபேதம். அட்டி²மானி ஸமணஸுகா²னி நாம த⁴னத⁴ஞ்ஞபரிக்³க³ஹாபா⁴வோ, அனவஜ்ஜபிண்ட³பாதபரியேஸனபா⁴வோ, நிப்³பு³தபிண்ட³பாதபு⁴ஞ்ஜனபா⁴வோ, ரட்ட²ம் பீளேத்வா த⁴னஸாரம் வா ஸீஸகஹாபணாதீ³னி வா க³ண்ஹந்தேஸு ராஜகுலேஸு ரட்ட²பீளனகிலேஸாபா⁴வோ, உபகரணேஸு நிச்ச²ந்த³ராக³பா⁴வோ, சோரவிலோபே நிப்³ப⁴யபா⁴வோ, ராஜராஜமஹாமத்தேஹி அஸம்ஸட்ட²பா⁴வோ, சதூஸு தி³ஸாஸு அப்படிஹதபா⁴வோதி. இத³ம் வுத்தம் ஹோதி – ‘‘யதா² தஸ்மிம் அஸ்ஸமே வஸந்தேன ஸக்கா ஹோந்தி இமானி அட்ட² ஸுகா²னி விந்தி³தும், ஏவம் அட்ட²கு³ணஸமுபேதம் தம் அஸ்ஸமம் மாபேஸி’’ந்தி.

அபி⁴ஞ்ஞாப³லமாஹரிந்தி பச்சா² தஸ்மிம் அஸ்ஸமே வஸந்தோ கஸிணபரிகம்மம் கத்வா அபி⁴ஞ்ஞானஞ்ச ஸமாபத்தீனஞ்ச உப்பாத³னத்தா²ய அனிச்சதோ ச து³க்க²தோ ச விபஸ்ஸனம் ஆரபி⁴த்வா தா²மப்பத்தம் விபஸ்ஸனாப³லம் ஆஹரிம். யதா² தஸ்மிம் வஸந்தோ தம் ப³லம் ஆஹரிதும் ஸக்கோமி, ஏவம் தம் அஸ்ஸமம் அபி⁴ஞ்ஞத்தா²ய விபஸ்ஸனாப³லஸ்ஸ அனுச்ச²விகம் கத்வா மாபேஸிந்தி அத்தோ².

ஸாடகம் பஜஹிம் தத்த², நவதோ³ஸமுபாக³தந்தி ஏத்தா²யம் அனுபுப்³பி³கதா². ததா³ கிர குடிலேணசங்கமாதி³படிமண்டி³தம் புப்பூ²பக³ப²லூபக³ருக்க²ஸஞ்ச²ன்னம் ரமணீயம் மது⁴ரஸலிலாஸயம் அபக³தவாளமிக³பி⁴ம்ஸனகஸகுணம் பவிவேகக்க²மம் அஸ்ஸமம் மாபேத்வா அலங்கதசங்கமஸ்ஸ உபோ⁴ஸு அந்தேஸு ஆலம்ப³னப²லகம் ஸம்விதா⁴ய நிஸீத³னத்தா²ய சங்கமவேமஜ்ஜே² ஸமதலம் முக்³க³வண்ணஸிலம் மாபேத்வா அந்தோ பண்ணஸாலாய ஜடாமண்ட³லவாகசீரதித³ண்ட³குண்டி³காதி³கே தாபஸபரிக்கா²ரே மண்ட³பே பானீயக⁴டபானீயஸங்க²பானீயஸராவானி, அக்³கி³ஸாலாயம் அங்கா³ரகபல்லதா³ருஆதீ³னீதி ஏவம் யம் யம் பப்³ப³ஜிதானம் உபகாராய ஸம்வத்ததி, தம் ஸப்³ப³ம் மாபேத்வா பண்ணஸாலாய பி⁴த்தியம் – ‘‘யே கேசி பப்³ப³ஜிதுகாமா இமே பரிக்கா²ரே க³ஹேத்வா பப்³ப³ஜந்தூ’’தி அக்க²ரானி சி²ந்தி³த்வா தே³வலோகமேவ க³தே விஸ்ஸகம்மதே³வபுத்தே ஸுமேத⁴பண்டி³தோ ஹிமவந்தபாதே³ கி³ரிகந்த³ரானுஸாரேன அத்தனோ நிவாஸானுரூபம் பா²ஸுகட்டா²னம் ஓலோகேந்தோ நதீ³னிவத்தனே விஸ்ஸகம்மனிம்மிதம் ஸக்கத³த்தியம் ரமணீயம் அஸ்ஸமம் தி³ஸ்வா சங்கமனகோடிம் க³ந்த்வா பத³வளஞ்ஜம் அபஸ்ஸந்தோ ‘‘து⁴வம் பப்³ப³ஜிதா து⁴ரகா³மே பி⁴க்க²ம் பரியேஸித்வா கிலந்தரூபா ஆக³ந்த்வா பண்ணஸாலம் பவிஸித்வா நிஸின்னா ப⁴விஸ்ஸந்தீ’’தி சிந்தேத்வா தோ²கம் ஆக³மேத்வா ‘‘அதிவிய சிராயந்தி, ஜானிஸ்ஸாமீ’’தி பண்ணஸாலத்³வாரம் விவரித்வா அந்தோ பவிஸித்வா இதோ சிதோ ச ஓலோகேந்தோ மஹாபி⁴த்தியம் அக்க²ரானி வாசேத்வா ‘‘மய்ஹம் கப்பியபரிக்கா²ரா ஏதே, இமே க³ஹேத்வா பப்³ப³ஜிஸ்ஸாமீ’’தி அத்தனா நிவத்த²பாருதம் ஸாடகயுக³ம் பஜஹி. தேனாஹ ‘‘ஸாடகம் பஜஹிம் தத்தா²’’தி. ஏவம் பவிட்டோ² அஹம், ஸாரிபுத்த, தஸ்ஸம் பண்ணஸாலாயம் ஸாடகம் பஜஹிம்.

நவதோ³ஸமுபாக³தந்தி ஸாடகம் பஜஹந்தோ நவ தோ³ஸே தி³ஸ்வா பஜஹிந்தி தீ³பேதி. தாபஸபப்³ப³ஜ்ஜம் பப்³ப³ஜிதானஞ்ஹி ஸாடகஸ்மிம் நவ தோ³ஸா உபட்ட²ஹந்தி. மஹக்³க⁴பா⁴வோ ஏகோ தோ³ஸோ, பரபடிப³த்³த⁴தாய உப்பஜ்ஜனபா⁴வோ ஏகோ, பரிபோ⁴கே³ன லஹும் கிலிஸ்ஸனபா⁴வோ ஏகோ, கிலிட்டோ² ஹி தோ⁴விதப்³போ³ ச ரஜிதப்³போ³ ச ஹோதி, பரிபோ⁴கே³ன ஜீரணபா⁴வோ ஏகோ, ஜிண்ணஸ்ஸ ஹி துன்னம் வா அக்³க³ளதா³னம் வா காதப்³ப³ம் ஹோதி, புன பரியேஸனாய து³ரபி⁴ஸம்ப⁴வபா⁴வோ ஏகோ, தாபஸபப்³ப³ஜ்ஜாய அஸாருப்பபா⁴வோ ஏகோ, பச்சத்தி²கானம் ஸாதா⁴ரணபா⁴வோ ஏகோ, யதா² ஹி நம் பச்சத்தி²கா ந க³ண்ஹந்தி, ஏவம் கோ³பேதப்³போ³ ஹோதி, பரிபு⁴ஞ்ஜந்தஸ்ஸ விபூ⁴ஸனட்டா²னபா⁴வோ ஏகோ, க³ஹேத்வா விசரந்தஸ்ஸ க²ந்த⁴பா⁴ரமஹிச்ச²பா⁴வோ ஏகோதி.

வாகசீரம் நிவாஸேஸிந்தி ததா³ஹம், ஸாரிபுத்த, இமே நவ தோ³ஸே தி³ஸ்வா ஸாடகம் பஹாய வாகசீரம் நிவாஸேஸிம், முஞ்ஜதிணம் ஹீரம் ஹீரம் கத்வா க³ந்தே²த்வா கதம் வாகசீரம் நிவாஸனபாருபனத்தா²ய ஆதி³யிந்தி அத்தோ².

த்³வாத³ஸ கு³ணமுபாக³தந்தி த்³வாத³ஸஹி ஆனிஸம்ஸேஹி ஸமன்னாக³தம். வாகசீரஸ்மிஞ்ஹி த்³வாத³ஸ ஆனிஸம்ஸா – அப்பக்³க⁴ம் ஸுந்த³ரம் கப்பியந்தி அயம் தாவ ஏகோ ஆனிஸம்ஸோ, ஸஹத்தா² காதும் ஸக்காதி அயம் து³தியோ, பரிபோ⁴கே³ன ஸணிகம் கிலிஸ்ஸதி, தோ⁴வியமானேபி பபஞ்சோ நத்தீ²தி அயம் ததியோ, பரிபோ⁴கே³ன ஜிண்ணேபி ஸிப்³பி³தப்³பா³பா⁴வோ சதுத்தோ², புன பரியேஸந்தஸ்ஸ ஸுகே²ன கரணபா⁴வோ பஞ்சமோ, தாபஸபப்³ப³ஜ்ஜாய ஸாருப்பபா⁴வோ ச²ட்டோ², பச்சத்தி²கானம் நிருபபோ⁴க³பா⁴வோ ஸத்தமோ, பரிபு⁴ஞ்ஜந்தஸ்ஸ விபூ⁴ஸனட்டா²னாபா⁴வோ அட்ட²மோ, தா⁴ரணே ஸல்லஹுகபா⁴வோ நவமோ, சீவரபச்சயே அப்பிச்ச²பா⁴வோ த³ஸமோ, வாகுப்பத்தியா த⁴ம்மிகஅனவஜ்ஜபா⁴வோ ஏகாத³ஸமோ, வாகசீரே நட்டே²பி அனபேக்க²பா⁴வோ த்³வாத³ஸமோதி.

அட்ட²தோ³ஸஸமாகிண்ணம், பஜஹிம் பண்ணஸாலகந்தி கத²ம் பஜஹிம்? ஸோ கிர வரஸாடகயுக³ம் ஓமுஞ்சந்தோ சீவரவம்ஸே லக்³கி³தம் அனோஜபுப்ப²தா³மஸதி³ஸம் ரத்தம் வாகசீரம் க³ஹேத்வா நிவாஸேத்வா தஸ்ஸூபரி அபரம் ஸுவண்ணவண்ணம் வாகசீரம் பரித³ஹித்வா புன்னாக³புப்ப²ஸந்த²ரஸதி³ஸம் ஸகு²ரம் அஜினசம்மம் ஏகம்ஸம் கத்வா ஜடாமண்ட³லம் படிமுஞ்சித்வா சூளாய ஸத்³தி⁴ம் நிச்சலபா⁴வகரணத்த²ம் ஸாரஸூசிம் பவேஸேத்வா முத்தாஜாலஸதி³ஸாய ஸிக்காய பவாளவண்ணம் குண்டி³கம் ஓத³ஹித்வா தீஸு டா²னேஸு வங்கம் காஜம் ஆதா³ய ஏகிஸ்ஸா காஜகோடியா குண்டி³கம், ஏகிஸ்ஸா அங்குஸபச்சி²தித³ண்ட³காதீ³னி ஓலக்³கே³த்வா கா²ரிகாஜம் அம்ஸே கத்வா த³க்கி²ணேன ஹத்தே²ன கத்தரத³ண்ட³ம் க³ஹேத்வா பண்ணஸாலதோ நிக்க²மித்வா ஸட்டி²ஹத்தே² மஹாசங்கமே அபராபரம் சங்கமந்தோ அத்தனோ வேஸம் ஓலோகேத்வா – ‘‘மய்ஹம் மனோரதோ² மத்த²கம் பத்தோ, ஸோப⁴தி வத மே பப்³ப³ஜ்ஜா, பு³த்³த⁴பச்சேகபு³த்³தா⁴தீ³ஹி ஸப்³பே³ஹி தீ⁴ரபுரிஸேஹி வண்ணிதா தோ²மிதா அயம் பப்³ப³ஜ்ஜா நாம, பஹீனம் மே கி³ஹிப³ந்த⁴னம், நிக்க²ந்தோஸ்மி நேக்க²ம்மம், லத்³தா⁴ மே உத்தமபப்³ப³ஜ்ஜா, கரிஸ்ஸாமி ஸமணத⁴ம்மம், லபி⁴ஸ்ஸாமி மக்³க³ப²லஸுக²’’ந்தி உஸ்ஸாஹஜாதோ கா²ரிகாஜம் ஓதாரேத்வா சங்கமவேமஜ்ஜே² முக்³க³வண்ணஸிலாபட்டே ஸுவண்ணபடிமா விய நிஸின்னோ தி³வஸபா⁴க³ம் வீதினாமேத்வா ஸாயன்ஹஸமயம் பண்ணஸாலம் பவிஸித்வா பி³த³லமஞ்சகபஸ்ஸே கட்ட²த்த²ரிகாய நிபன்னோ ஸரீரம் உதும் கா³ஹாபேத்வா ப³லவபச்சூஸே பபு³ஜ்ஜி²த்வா அத்தனோ ஆக³மனம் ஆவஜ்ஜேஸி – ‘‘அஹம் க⁴ராவாஸே ஆதீ³னவம் தி³ஸ்வா அமிதபோ⁴க³ம் அனந்தயஸம் பஹாய அரஞ்ஞம் பவிஸித்வா நேக்க²ம்மக³வேஸகோ ஹுத்வா பப்³ப³ஜிதோ. இதோ தா³னி பட்டா²ய பமாத³சாரம் சரிதும் ந வட்டதி, பவிவேகஞ்ஹி பஹாய விசரந்தம் மிச்சா²விதக்கமக்கி²கா கா²த³ந்தி, இதா³னி மயா விவேகமனுப்³ரூஹேதும் வட்டதி, அஹஞ்ஹி க⁴ராவாஸம் பலிபோ³த⁴தோ தி³ஸ்வா நிக்க²ந்தோ, அயஞ்ச மனாபா பண்ணஸாலா, பே³லுவபக்கவண்ணா பரிப⁴ண்ட³கதா பூ⁴மி, ரஜதவண்ணா ஸேதபி⁴த்தியோ, கபோதபாத³வண்ணம் பண்ணச்ச²த³னம், விசித்தத்த²ரணவண்ணோ பி³த³லமஞ்சகோ, நிவாஸபா²ஸுகம் வஸனட்டா²னம், ந ஏத்தோ அதிரேகதரா விய மே கே³ஹஸம்பதா³ பஞ்ஞாயதீ’’தி பண்ணஸாலாய தோ³ஸே விசினந்தோ அட்ட² தோ³ஸே பஸ்ஸி.

பண்ணஸாலபரிபோ⁴க³ஸ்மிஞ்ஹி அட்ட² ஆதீ³னவா – மஹாஸமாரம்பே⁴ன த³ப்³ப³ஸம்பா⁴ரே ஸமோதா⁴னேத்வா கரணபரியேஸனபா⁴வோ ஏகோ ஆதீ³னவோ, திணபண்ணமத்திகாஸு பதிதாஸு தாஸம் புனப்புனம் ட²பேதப்³ப³தாய நிப³த்³த⁴ஜக்³க³னபா⁴வோ து³தியோ, ஸேனாஸனம் நாம மஹல்லகஸ்ஸ பாபுணாதி, அவேலாய வுட்டா²பியமானஸ்ஸ சித்தேகக்³க³தா ந ஹோதீதி உட்டா²பனீயபா⁴வோ ததியோ, ஸீதுண்ஹாதி³படிகா⁴தேன காயஸ்ஸ ஸுகு²மாலகரணபா⁴வோ சதுத்தோ², கே³ஹம் பவிட்டே²ன யம்கிஞ்சி பாபம் ஸக்கா காதுந்தி க³ரஹாபடிச்சா²த³னபா⁴வோ பஞ்சமோ, ‘‘மய்ஹ’’ந்தி பரிக்³க³ஹகரணபா⁴வோ ச²ட்டோ², கே³ஹஸ்ஸ அத்தி²பா⁴வோ நாமேஸ ஸது³தியகவாஸோ வியாதி ஸத்தமோ, ஊகாமங்கு³லக⁴ரகோ³ளிகாதீ³னம் ஸாதா⁴ரணதாய ப³ஹுஸாதா⁴ரணபா⁴வோ அட்ட²மோ. இதி இமே அட்ட² ஆதீ³னவே தி³ஸ்வா மஹாஸத்தோ பண்ணஸாலம் பஜஹி. தேனாஹ – ‘‘அட்ட²தோ³ஸஸமாகிண்ணம், பஜஹிம் பண்ணஸாலக’’ந்தி.

உபாக³மிம் ருக்க²மூலம், கு³ணே த³ஸஹுபாக³தந்தி ச²ன்னம் படிக்கி²பித்வா த³ஸஹி கு³ணேஹி உபேதம் ருக்க²மூலம் உபக³தோஸ்மீதி வத³தி. தத்ரிமே த³ஸ கு³ணா – அப்பஸமாரம்ப⁴தா ஏகோ கு³ணோ, உபக³மனமத்தகமேவ ஹி தத்த² ஹோதீதி. அப்படிஜக்³க³னதா து³தியோ, தஞ்ஹி ஸம்மட்ட²ம்பி அஸம்மட்ட²ம்பி பரிபோ⁴க³பா²ஸுகம் ஹோதியேவ. அனுட்டா²பனீயபா⁴வோ ததியோ. க³ரஹம் நப்படிச்சா²தே³தி, தத்த² ஹி பாபம் கரோந்தோ லஜ்ஜதீதி க³ரஹாய அப்படிச்ச²ன்னபா⁴வோ சதுத்தோ². அப்³போ⁴காஸவாஸோ விய காயம் ந ஸந்த²ம்பே⁴தீதி காயஸ்ஸ அஸந்த²ம்ப⁴னபா⁴வோ பஞ்சமோ, பரிக்³க³ஹகரணாபா⁴வோ ச²ட்டோ², கே³ஹாலயபடிக்கே²போ ஸத்தமோ. ப³ஹுஸாதா⁴ரணே கே³ஹே விய ‘‘படிஜக்³கி³ஸ்ஸாமி நம், நிக்க²மதா²’’தி நீஹரணகாபா⁴வோ அட்ட²மோ, வஸந்தஸ்ஸ ஸப்பீதிகபா⁴வோ நவமோ, ருக்க²மூலஸேனாஸனஸ்ஸ க³தக³தட்டா²னே ஸுலப⁴தாய அனபேக்க²பா⁴வோ த³ஸமோதி இமே த³ஸகு³ணே தி³ஸ்வா ருக்க²மூலம் உபக³தோஸ்மீதி வத³தி.

இமானி ஹி ஏத்தகானி காரணானி ஸல்லக்கே²த்வா மஹாஸத்தோ புனதி³வஸே பி⁴க்கா²ய கா³மம் பாவிஸி. அத²ஸ்ஸ ஸம்பத்தகா³மே மனுஸ்ஸா மஹந்தேன உஸ்ஸாஹேன பி⁴க்க²ம் அத³ம்ஸு. ஸோ ப⁴த்தகிச்சம் நிட்டா²பேத்வா அஸ்ஸமம் ஆக³ம்ம நிஸீதி³த்வா சிந்தேஸி – ‘‘நாஹம் ‘ஆஹாரம் லபா⁴மீ’தி பப்³ப³ஜிதோ, ஸினித்³தா⁴ஹாரோ நாமேஸ மானமத³புரிஸமதே³ வட்³டே⁴தி, ஆஹாரமூலகஸ்ஸ ச து³க்க²ஸ்ஸ அந்தோ நத்தி², யம்னூனாஹம் வாபிதரோபிதத⁴ஞ்ஞனிப்³ப³த்தகம் ஆஹாரம் பஜஹித்வா பவத்தப²லபோ⁴ஜனோ ப⁴வேய்ய’’ந்தி. ஸோ ததோ பட்டா²ய ததா² கத்வா க⁴டேந்தோ வாயமந்தோ ஸத்தாஹப்³ப⁴ந்தரேயேவ அட்ட² ஸமாபத்தியோ பஞ்ச ச அபி⁴ஞ்ஞாயோ நிப்³ப³த்தேஸி. தேன வுத்தம் –

‘‘வாபிதம் ரோபிதம் த⁴ஞ்ஞம், பஜஹிம் நிரவஸேஸதோ;

அனேககு³ணஸம்பன்னம், பவத்தப²லமாதி³யிம்.

‘‘தத்த²ப்பதா⁴னம் பத³ஹிம், நிஸஜ்ஜட்டா²னசங்கமே;

அப்³ப⁴ந்தரம்ஹி ஸத்தாஹே, அபி⁴ஞ்ஞாப³ல பாபுணி’’ந்தி.