நிதா³னகதா²

‘‘கேன கத்த² கதா³ சேதம், பா⁴ஸிதம் த⁴ம்மமுத்தம’’ந்தி ச, ‘‘கரிஸ்ஸாமத்த²வண்ணன’’ந்தி ச படிஞ்ஞாதத்தா ஸா பனாயம் அபதா³னஸ்ஸத்த²வண்ணனா தூ³ரேனிதா³னம், அவிதூ³ரேனிதா³னம், ஸந்திகேனிதா³னந்தி இமானி தீணி நிதா³னானி த³ஸ்ஸேத்வா வண்ணியமானா யே நம் ஸுணந்தி, தேஹி ஸமுதா³க³மதோ பட்டா²ய விஞ்ஞாதத்தா யஸ்மா ஸுட்டு² விஞ்ஞாதா நாம ஹோதி, தஸ்மா நம் தானி நிதா³னானி த³ஸ்ஸேத்வாவ வண்ணயிஸ்ஸாம.

தத்த² ஆதி³தோ தாவ தேஸம் நிதா³னானம் பரிச்சே²தோ³ வேதி³தப்³போ³. தீ³பங்கரபாத³மூலஸ்மிஞ்ஹி கதாபி⁴னீஹாரஸ்ஸ மஹாஸத்தஸ்ஸ யாவ வேஸ்ஸந்தரத்தபா⁴வா சவித்வா துஸிதபுரே நிப்³ப³த்தி, தாவ பவத்தோ கதா²மக்³கோ³ தூ³ரேனிதா³னம் நாம. துஸிதப⁴வனதோ பன சவித்வா யாவ போ³தி⁴மண்டே³ ஸப்³ப³ஞ்ஞுதப்பத்தி, தாவ பவத்தோ கதா²மக்³கோ³ அவிதூ³ரேனிதா³னம் நாம. ஸந்திகேனிதா³னம் பன தேஸு தேஸு டா²னேஸு விஹரதோ தஸ்மிம் தஸ்மிம்யேவ டா²னே லப்³ப⁴தீதி.

1. தூ³ரேனிதா³னகதா²

தத்ரித³ம் தூ³ரேனிதா³னம் நாம – இதோ கிர கப்பஸதஸஹஸ்ஸாதி⁴கானம் சதுன்னம் அஸங்க்²யேய்யானம் மத்த²கே அமரவதீ நாம நக³ரம் அஹோஸி. தத்த² ஸுமேதோ⁴ நாம ப்³ராஹ்மணோ படிவஸதி, உப⁴தோ ஸுஜாதோ மாதிதோ ச பிதிதோ ச, ஸம்ஸுத்³த⁴க³ஹணிகோ யாவ ஸத்தமா குலபரிவட்டா, அக்கி²த்தோ அனுபகுட்டோ² ஜாதிவாதே³ன, அபி⁴ரூபோ த³ஸ்ஸனீயோ பாஸாதி³கோ பரமாய வண்ணபோக்க²ரதாய ஸமன்னாக³தோ. ஸோ அஞ்ஞம் கம்மம் அகத்வா ப்³ராஹ்மணஸிப்பமேவ உக்³க³ண்ஹி. தஸ்ஸ த³ஹரகாலேயேவ மாதாபிதரோ காலமகம்ஸு. அத²ஸ்ஸ ராஸிவட்³ட⁴கோ அமச்சோ ஆயபோத்த²கம் ஆஹரித்வா ஸுவண்ணரஜதமணிமுத்தாதி³ப⁴ரிதே க³ப்³பே⁴ விவரித்வா ‘‘ஏத்தகம் தே, குமார, மாது ஸந்தகம், ஏத்தகம் பிது ஸந்தகம், ஏத்தகம் அய்யகபய்யகான’’ந்தி யாவ ஸத்தமா குலபரிவட்டா த⁴னம் ஆசிக்கி²த்வா ‘‘ஏதம் படிபஜ்ஜாஹீ’’தி ஆஹ. ஸுமேத⁴பண்டி³தோ சிந்தேஸி – ‘‘இமம் த⁴னம் ஸம்ஹரித்வா மய்ஹம் பிதுபிதாமஹாத³யோ பரலோகம் க³ச்ச²ந்தா ஏககஹாபணம்பி க³ஹேத்வா ந க³தா, மயா பன க³ஹேத்வா க³மனகாரணம் காதும் வட்டதீ’’தி, ஸோ ரஞ்ஞோ ஆரோசேத்வா நக³ரே பே⁴ரிம் சராபேத்வா மஹாஜனஸ்ஸ தா³னம் த³த்வா தாபஸபப்³ப³ஜ்ஜம் பப்³ப³ஜி. இமஸ்ஸ பனத்த²ஸ்ஸ ஆவிபா⁴வத்த²ம் இமஸ்மிம் டா²னே ஸுமேத⁴கதா² கதே²தப்³பா³. ஸா பனேஸா கிஞ்சாபி பு³த்³த⁴வம்ஸே நிரந்தரம் ஆக³தாயேவ, கா³தா²ப³ந்தே⁴ன பன ஆக³தத்தா ந ஸுட்டு² பாகடா, தஸ்மா தம் அந்தரந்தரா கா³தா²ஸம்ப³ந்த⁴தீ³பகேஹி வசனேஹி ஸத்³தி⁴ம் கதே²ஸ்ஸாம.