7. ஸதிபட்டா²னவிப⁴ங்கோ³

1. ஸுத்தந்தபா⁴ஜனீயம் உத்³தே³ஸவாரவண்ணனா

355. இதா³னி தத³னந்தரே ஸதிபட்டா²னவிப⁴ங்கே³ சத்தாரோதி க³ணனபரிச்சே²தோ³. தேன ந ததோ ஹேட்டா² ந உத்³த⁴ந்தி ஸதிபட்டா²னபரிச்சே²த³ம் தீ³பேதி. ஸதிபட்டா²னாதி தயோ ஸதிபட்டா²னா – ஸதிகோ³சரோபி, திதா⁴ படிபன்னேஸு ஸாவகேஸு ஸத்து²னோ படிதா⁴னுனயவீதிவத்ததாபி, ஸதிபி. ‘‘சதுன்னம், பி⁴க்க²வே, ஸதிபட்டா²னானம் ஸமுத³யஞ்ச அத்த²ங்க³மஞ்ச தே³ஸேஸ்ஸாமி. தம் ஸுணாத²…பே… கோ ச, பி⁴க்க²வே, காயஸ்ஸ ஸமுத³யோ? ஆஹாரஸமுத³யா காயஸ்ஸ ஸமுத³யோ’’திஆதீ³ஸு (ஸம். நி. 5.408) ஹி ஸதிகோ³சரோ ஸதிபட்டா²னந்தி வுச்சதி. ததா² ‘‘காயோ உபட்டா²னம், நோ ஸதி. ஸதி உபட்டா²னஞ்சேவ ஸதி சா’’திஆதீ³ஸு (படி. ம. 3.35). தஸ்ஸத்தோ² – பதிட்டா²தி அஸ்மிந்தி பட்டா²னம். கா பதிட்டா²தி? ஸதி. ஸதியா பட்டா²னம் ஸதிபட்டா²னம், பதா⁴னம் டா²னந்தி வா பட்டா²னம்; ஸதியா பட்டா²னம் ஸதிபட்டா²னம் ஹத்தி²ட்டா²னஅஸ்ஸட்டா²னாதீ³னி விய.

‘‘தயோ ஸதிபட்டா²னா யத³ரியோ ஸேவதி, யத³ரியோ ஸேவமானோ ஸத்தா² க³ணம் அனுஸாஸிதுமரஹதீ’’தி (ம. நி. 3.304, 311) ஏத்த² திதா⁴ படிபன்னேஸு ஸாவகேஸு ஸத்து²னோ படிகா⁴னுனயவீதிவத்ததா ஸதிபட்டா²னந்தி வுத்தா. தஸ்ஸத்தோ² – பட்ட²பேதப்³ப³தோ பட்டா²னம், பவத்தயிதப்³ப³தோதி அத்தோ². கேன பட்ட²பேதப்³ப³தோதி? ஸதியா; ஸதியா பட்டா²னம் ஸதிபட்டா²னம். ‘‘சத்தாரோ ஸதிபட்டா²னா பா⁴விதா ப³ஹுலீகதா ஸத்த போ³ஜ்ஜ²ங்கே³ பரிபூரேந்தீ’’திஆதீ³ஸு (ம. நி. 3.147) பன ஸதியேவ ஸதிபட்டா²னந்தி வுச்சதி. தஸ்ஸத்தோ² – பதிட்டா²தீதி பட்டா²னம், உபட்டா²தி ஓக்கந்தி³த்வா பக்க²ந்தி³த்வா பவத்ததீதி அத்தோ²; ஸதியேவ பட்டா²னட்டே²ன ஸதிபட்டா²னம்; அத²வா ஸரணட்டே²ன ஸதி, உபட்டா²னட்டே²ன பட்டா²னம். இதி ஸதி ச ஸா பட்டா²னஞ்சாதிபி ஸதிபட்டா²னம். இத³மித⁴ அதி⁴ப்பேதம். யதி³ ஏவம், கஸ்மா ஸதிபட்டா²னாதி ப³ஹுவசனம் கதந்தி? ஸதியா ப³ஹுத்தா; ஆரம்மணபே⁴தே³ன ஹி ப³ஹுகா தா ஸதியோதி.

கஸ்மா பன ப⁴க³வதா சத்தாரோவ ஸதிபட்டா²னா வுத்தா, அனூனா அனதி⁴காதி? வேனேய்யஹிதத்தா. தண்ஹாசரிததி³ட்டி²சரிதஸமத²யானிகவிபஸ்ஸனாயானிகேஸு ஹி மந்த³திக்க²வஸேன த்³விதா⁴ பவத்தேஸு மந்த³ஸ்ஸ தண்ஹாசரிதஸ்ஸ ஓளாரிகம் காயானுபஸ்ஸனாஸதிபட்டா²னம் விஸுத்³தி⁴மக்³கோ³, திக்க²ஸ்ஸ ஸுகு²மம் வேத³னானுபஸ்ஸனாஸதிபட்டா²னம். தி³ட்டி²சரிதஸ்ஸபி மந்த³ஸ்ஸ நாதிப்பபே⁴த³க³தம் சித்தானுபஸ்ஸனாஸதிபட்டா²னம் விஸுத்³தி⁴மக்³கோ³, திக்க²ஸ்ஸ அதிப்பபே⁴த³க³தம் த⁴ம்மானுபஸ்ஸனாஸதிபட்டா²னம். ஸமத²யானிகஸ்ஸ ச மந்த³ஸ்ஸ அகிச்சே²ன அதி⁴க³ந்தப்³ப³னிமித்தம் பட²மம் ஸதிபட்டா²னம் விஸுத்³தி⁴மக்³கோ³, திக்க²ஸ்ஸ ஓளாரிகாரம்மணே அஸண்ட²ஹனதோ து³தியம். விபஸ்ஸனாயானிகஸ்ஸாபி மந்த³ஸ்ஸ நாதிப்பபே⁴த³க³தாரம்மணம் ததியம், திக்க²ஸ்ஸ அதிப்பபே⁴த³க³தாரம்மணம் சதுத்த²ம். இதி சத்தாரோவ வுத்தா, அனூனா அனதி⁴காதி.

ஸுப⁴ஸுக²னிச்சஅத்தபா⁴வவிபல்லாஸப்பஹானத்த²ம் வா. காயோ ஹி அஸுபோ⁴. தத்த² ஸுப⁴விபல்லாஸவிபல்லத்தா² ஸத்தா. தேஸம் தத்த² அஸுப⁴பா⁴வத³ஸ்ஸனேன தஸ்ஸ விபல்லாஸஸ்ஸ பஹானத்த²ம் பட²மம் ஸதிபட்டா²னம் வுத்தம். ஸுக²ம், நிச்சம், அத்தாதி க³ஹிதேஸுபி ச வேத³னாதீ³ஸு வேத³னா து³க்கா², சித்தம் அனிச்சம், த⁴ம்மா அனத்தா. ஏதேஸு ச ஸுக²னிச்சஅத்தபா⁴வவிபல்லாஸவிபல்லத்தா² ஸத்தா. தேஸம் தத்த² து³க்கா²தி³பா⁴வத³ஸ்ஸனேன தேஸம் விபல்லாஸானம் பஹானத்த²ம் ஸேஸானி தீணி வுத்தானீதி. ஏவம் ஸுப⁴ஸுக²னிச்சஅத்தபா⁴வவிபல்லாஸப்பஹானத்த²ம் வா சத்தாரோவ வுத்தா அனூனா அனதி⁴காதி வேதி³தப்³பா³. ந கேவலஞ்ச விபல்லாஸபஹானத்த²மேவ, அத² கோ² சதுரோக⁴யோகா³ஸவக³ந்த²உபாதா³னஅக³திப்பஹானத்த²ம்பி சதுப்³பி³தா⁴ஹாரபரிஞ்ஞத்த²ஞ்ச சத்தாரோவ வுத்தாதி வேதி³தப்³பா³. அயம் தாவ பகரணனயோ.

அட்ட²கதா²யம் பன ‘‘ஸரணவஸேன சேவ ஏகத்தஸமோஸரணவஸேன ச ஏகமேவ ஸதிபட்டா²னம் ஆரம்மணவஸேன சத்தாரோதி ஏததே³வ வுத்தம். யதா² ஹி சதுத்³வாரே நக³ரே பாசீனதோ ஆக³ச்ச²ந்தா பாசீனதி³ஸாய உட்டா²னகம் ப⁴ண்ட³ம் க³ஹேத்வா பாசீனத்³வாரேன நக³ரமேவ பவிஸந்தி, த³க்கி²ணதோ, பச்சி²மதோ, உத்தரதோ ஆக³ச்ச²ந்தா உத்தரதி³ஸாய உட்டா²னகம் ப⁴ண்ட³ம் க³ஹேத்வா உத்தரத்³வாரேன நக³ரமேவ பவிஸந்தி, ஏவம் ஸம்பத³மித³ம் வேதி³தப்³ப³ம். நக³ரம் விய ஹி நிப்³பா³னமஹானக³ரம், த்³வாரம் விய அட்ட²ங்கி³கோ லோகுத்தரமக்³கோ³. பாசீனதி³ஸாத³யோ விய காயாத³யோ.

யதா² பாசீனதோ ஆக³ச்ச²ந்தா பாசீனதி³ஸாய உட்டா²னகம் ப⁴ண்ட³ம் க³ஹேத்வா பாசீனத்³வாரேன நக³ரமேவ பவிஸந்தி, ஏவம் காயானுபஸ்ஸனாமுகே²ன ஆக³ச்ச²ந்தா சுத்³த³ஸவிதே⁴ன காயானுபஸ்ஸனம் பா⁴வேத்வா காயானுபஸ்ஸனாபா⁴வனானுபா⁴வனிப்³ப³த்தேன அரியமக்³கே³ன ஏகம் நிப்³பா³னமேவ ஓஸரந்தி. யதா² த³க்கி²ணதோ ஆக³ச்ச²ந்தா த³க்கி²ணதி³ஸாய உட்டா²னகம் ப⁴ண்ட³ம் க³ஹேத்வா த³க்கி²ணத்³வாரேன நக³ரமேவ பவிஸந்தி, ஏவம் வேத³னானுபஸ்ஸனாமுகே²ன ஆக³ச்ச²ந்தா நவவிதே⁴ன வேத³னானுபஸ்ஸனம் பா⁴வேத்வா வேத³னானுபஸ்ஸனாபா⁴வனானுபா⁴வனிப்³ப³த்தேன அரியமக்³கே³ன ஏகம் நிப்³பா³னமேவ ஓஸரந்தி. யதா² பச்சி²மதோ ஆக³ச்ச²ந்தா பச்சி²மதி³ஸாய உட்டா²னகம் ப⁴ண்ட³ம் க³ஹேத்வா பச்சி²மத்³வாரேன நக³ரமேவ பவிஸந்தி, ஏவம் சித்தானுபஸ்ஸனாமுகே²ன ஆக³ச்ச²ந்தா ஸோளஸவிதே⁴ன சித்தானுபஸ்ஸனம் பா⁴வேத்வா சித்தானுபஸ்ஸனாபா⁴வனானுபா⁴வனிப்³ப³த்தேன அரியமக்³கே³ன ஏகம் நிப்³பா³னமேவ ஓஸரந்தி. யதா² உத்தரதோ ஆக³ச்ச²ந்தா உத்தரதி³ஸாய உட்டா²னகம் ப⁴ண்ட³ம் க³ஹேத்வா உத்தரத்³வாரேன நக³ரமேவ பவிஸந்தி, ஏவம் த⁴ம்மானுபஸ்ஸனாமுகே²ன ஆக³ச்ச²ந்தா பஞ்சவிதே⁴ன த⁴ம்மானுபஸ்ஸனம் பா⁴வேத்வா த⁴ம்மானுபஸ்ஸனாபா⁴வனானுபா⁴வனிப்³ப³த்தேன அரியமக்³கே³ன ஏகம் நிப்³பா³னமேவ ஓஸரந்தீதி. ஏவம் ஸரணவஸேன சேவ ஏகத்தஸமோஸரணவஸேன ச ஏகமேவ ஸதிபட்டா²னம் ஆரம்மணவஸேன சத்தாரோதி வுத்தாதி வேதி³தப்³பா³.

இத⁴ பி⁴க்கூ²தி ஏத்த² கிஞ்சாபி ப⁴க³வதா தே³வலோகே நிஸீதி³த்வா அயம் ஸதிபட்டா²னவிப⁴ங்கோ³ கதி²தோ, ஏகபி⁴க்கு²பி தத்த² ப⁴க³வதோ ஸந்திகே நிஸின்னகோ நாம நத்தி². ஏவம் ஸந்தேபி யஸ்மா இமே சத்தாரோ ஸதிபட்டா²னே பி⁴க்கூ² பா⁴வேந்தி, பி⁴க்கு²கோ³சரா ஹி ஏதே, தஸ்மா இத⁴ பி⁴க்கூ²தி ஆலபதி. கிம் பனேதே ஸதிபட்டா²னே பி⁴க்கூ²யேவ பா⁴வேந்தி, ந பி⁴க்கு²னீஆத³யோதி? பி⁴க்கு²னீஆத³யோபி பா⁴வேந்தி. பி⁴க்கூ² பன அக்³க³பரிஸா. இதி அக்³க³பரிஸத்தா இத⁴ பி⁴க்கூ²தி ஆலபதி. படிபத்தியா வா பி⁴க்கு²பா⁴வத³ஸ்ஸனதோ ஏவமாஹ. யோ ஹி இமம் படிபத்திம் படிபஜ்ஜதி, ஸோ பி⁴க்கு² நாம ஹோதி. படிபன்னகோ ஹி தே³வோ வா ஹோது மனுஸ்ஸோ வா, பி⁴க்கூ²தி ஸங்க²ம் க³ச்ச²தியேவ. யதா²ஹ –

‘‘அலங்கதோ சேபி ஸமஞ்சரேய்ய,

ஸந்தோ த³ந்தோ நியதோ ப்³ரஹ்மசாரீ;

ஸப்³பே³ஸு பூ⁴தேஸு நிதா⁴ய த³ண்ட³ம்,

ஸோ ப்³ராஹ்மணோ ஸோ ஸமணோ ஸ பி⁴க்கூ²’’தி. (த⁴. ப. 142);

காயானுபஸ்ஸனாஉத்³தே³ஸவண்ணனா

அஜ்ஜ²த்தந்தி நியகஜ்ஜ²த்தம் அதி⁴ப்பேதம். தஸ்மா அஜ்ஜ²த்தம் காயேதி அத்தனோ காயேதி அத்தோ². தத்த² காயேதி ரூபகாயே. ரூபகாயோ ஹி இத⁴ அங்க³பச்சங்கா³னம் கேஸாதீ³னஞ்ச த⁴ம்மானம் ஸமூஹட்டே²ன, ஹத்தி²காயஅஸ்ஸகாயரத²காயாத³யோ விய, காயோதி அதி⁴ப்பேதோ. யதா² ச ஸமூஹட்டே²ன ஏவம் குச்சி²தானம் ஆயட்டே²ன. குச்சி²தானஞ்ஹி பரமஜேகு³ச்சா²னம் ஸோ ஆயோதிபி காயோ. ஆயோதி உப்பத்திதே³ஸோ. தத்ராயம் வசனத்தோ² – ஆயந்தி ததோதி ஆயோ. கே ஆயந்தி? குச்சி²தா கேஸாத³யோ. இதி குச்சி²தானம் கேஸாதீ³னம் ஆயோதி காயோ.

காயானுபஸ்ஸீதி காயம் அனுபஸ்ஸனஸீலோ, காயம் வா அனுபஸ்ஸமானோ காயேதி ச வத்வாபி புன காயானுபஸ்ஸீதி து³தியம் காயக்³க³ஹணம் அஸம்மிஸ்ஸதோ வவத்தா²னக⁴னவினிப்³போ⁴கா³தி³த³ஸ்ஸனத்த²ம் கதந்தி வேதி³தப்³ப³ம். தேன ந காயே வேத³னானுபஸ்ஸீ சித்தத⁴ம்மானுபஸ்ஸீ வா; அத² கோ² காயே காயானுபஸ்ஸீ யேவாதி காயஸங்கா²தே வத்து²ஸ்மிம் காயானுபஸ்ஸனாகாரஸ்ஸேவ த³ஸ்ஸனேன அஸம்மிஸ்ஸதோ வவத்தா²னம் த³ஸ்ஸிதம் ஹோதி. ததா² ந காயே அங்க³பச்சங்க³வினிமுத்தஏகத⁴ம்மானுபஸ்ஸீ, நாபி கேஸலோமாதி³வினிமுத்தஇத்தி²புரிஸானுபஸ்ஸீ. யோபி சேத்த² கேஸலோமாதி³கோ பூ⁴துபாதா³யஸமூஹஸங்கா²தோ காயோ, தத்தா²பி ந பூ⁴துபாதா³யவினிமுத்தஏகத⁴ம்மானுபஸ்ஸீ; அத² கோ² ரத²ஸம்பா⁴ரானுபஸ்ஸகோ விய அங்க³பச்சங்க³ஸமூஹானுபஸ்ஸீ, நக³ராவயவானுபஸ்ஸகோ விய கேஸலோமாதி³ஸமூஹானுபஸ்ஸீ, கத³லிக்க²ந்த⁴பத்தவட்டிவினிபு⁴ஞ்ஜகோ விய ரித்தமுட்டி²வினிவேட²கோ விய ச பூ⁴துபாதா³யஸமூஹானுபஸ்ஸீயேவாதி நானப்பகாரதோ ஸமூஹவஸேன காயஸங்கா²தஸ்ஸ வத்து²னோ த³ஸ்ஸனேன க⁴னவினிப்³போ⁴கோ³ த³ஸ்ஸிதோ ஹோதி. ந ஹேத்த² யதா²வுத்தஸமூஹவினிமுத்தோ காயோ வா இத்தீ² வா புரிஸோ வா அஞ்ஞோ வா கோசி த⁴ம்மோ தி³ஸ்ஸதி. யதா²வுத்தத⁴ம்மஸமூஹமத்தேயேவ பன ததா² ததா² ஸத்தா மிச்சா²பி⁴னிவேஸம் கரோந்தி. தேனாஹு போராணா –

‘‘யம் பஸ்ஸதி ந தம் தி³ட்ட²ம், யம் தி³ட்ட²ம் தம் ந பஸ்ஸதி;

அபஸ்ஸம் ப³ஜ்ஜ²தே மூள்ஹோ, ப³ஜ்ஜ²மானோ ந முச்சதீ’’தி.

க⁴னவினிப்³போ⁴கா³தி³த³ஸ்ஸனத்த²ந்தி வுத்தம். ஆதி³ஸத்³தே³ன சேத்த² அயம்பி அத்தோ² வேதி³தப்³போ³ – அயஞ்ஹி ஏதஸ்மிம் காயே காயானுபஸ்ஸீயேவ, ந அஞ்ஞத⁴ம்மானுபஸ்ஸீ. கிம் வுத்தம் ஹோதி? யதா² அனுத³கபூ⁴தாயபி மரீசியா உத³கானுபஸ்ஸினோ ஹோந்தி, ந ஏவம் அனிச்சது³க்கா²னத்தஅஸுப⁴பூ⁴தேயேவ இமஸ்மிம் காயே நிச்சஸுக²அத்தஸுப⁴பா⁴வானுபஸ்ஸீ; அத² கோ² காயானுபஸ்ஸீ அனிச்சது³க்கா²னத்தஅஸுபா⁴காரஸமூஹானுபஸ்ஸீயேவாதி வுத்தம் ஹோதி. அத² வா ய்வாயம் மஹாஸதிபட்டா²னே ‘‘இத⁴, பி⁴க்க²வே, பி⁴க்கு² அரஞ்ஞக³தோ வா…பே… ஸோ ஸதோவ அஸ்ஸஸதீ’’திஆதி³னா (தீ³. நி. 2.374; ம. நி. 1.107) நயேன அஸ்ஸாஸபஸ்ஸாஸாதி³சுண்ணகஜாதஅட்டி²கபரியோஸானோ காயோ வுத்தோ, யோ ச ‘‘இதே⁴கச்சோ பத²வீகாயம் அனிச்சதோ அனுபஸ்ஸதி, ததா² ஆபோகாயம், தேஜோகாயம், வாயோகாயம், கேஸகாயம், லோமகாயம், ச²விகாயம், சம்மகாயம், மம்ஸகாயம், ருதி⁴ரகாயம், ந்ஹாருகாயம், அட்டி²காயம், அட்டி²மிஞ்ஜகாய’’ந்தி படிஸம்பி⁴தா³யம் காயோ வுத்தோ, தஸ்ஸ ஸப்³ப³ஸ்ஸ இமஸ்மிம்யேவ காயே அனுபஸ்ஸனதோ காயே காயானுபஸ்ஸீதி ஏவம்பி அத்தோ² த³ட்ட²ப்³போ³.

அத² வா காயே அஹந்தி வா மமந்தி வா ஏவம் க³ஹேதப்³ப³ஸ்ஸ கஸ்ஸசி அனனுபஸ்ஸனதோ, தஸ்ஸ தஸ்ஸேவ பன கேஸலோமாதி³கஸ்ஸ நானாத⁴ம்மஸமூஹஸ்ஸ அனுபஸ்ஸனதோ காயே கேஸாதி³த⁴ம்மஸமூஹஸங்கா²தே காயானுபஸ்ஸீதி ஏவமத்தோ² த³ட்ட²ப்³போ³. அபிச ‘‘இமஸ்மிம் காயே அனிச்சதோ அனுபஸ்ஸதி, நோ நிச்சதோ’’திஆதி³னா (படி. ம. 3.35) அனுக்கமேன படிஸம்பி⁴தா³யம் ஆக³தனயஸ்ஸ ஸப்³ப³ஸ்ஸேவ அனிச்சலக்க²ணாதி³னோ ஆகாரஸமூஹஸங்கா²தஸ்ஸ காயஸ்ஸ அனுபஸ்ஸனதோபி காயே காயானுபஸ்ஸீதி ஏவம்பி அத்தோ² த³ட்ட²ப்³போ³.

ததா² ஹி அயம் காயே காயானுபஸ்ஸனாபடிபத³ம் படிபன்னோ பி⁴க்கு² இமம் காயம் அனிச்சானுபஸ்ஸனாதீ³னம் ஸத்தன்னம் அனுபஸ்ஸனானம் வஸேன அனிச்சதோ அனுபஸ்ஸதி நோ நிச்சதோ, து³க்க²தோ அனுபஸ்ஸதி நோ ஸுக²தோ, அனத்ததோ அனுபஸ்ஸதி நோ அத்ததோ, நிப்³பி³ந்த³தி நோ நந்த³தி, விரஜ்ஜதி நோ ரஜ்ஜதி, நிரோதே⁴தி நோ ஸமுதே³தி, படினிஸ்ஸஜ்ஜதி நோ ஆதி³யதி. ஸோ தம் அனிச்சதோ அனுபஸ்ஸந்தோ நிச்சஸஞ்ஞம் பஜஹதி, து³க்க²தோ அனுபஸ்ஸந்தோ ஸுக²ஸஞ்ஞம் பஜஹதி, அனத்ததோ அனுபஸ்ஸந்தோ அத்தஸஞ்ஞம் பஜஹதி, நிப்³பி³ந்த³ந்தோ நந்தி³ம் பஜஹதி, விரஜ்ஜந்தோ ராக³ம் பஜஹதி, நிரோதே⁴ந்தோ ஸமுத³யம் பஜஹதி, படினிஸ்ஸஜ்ஜந்தோ ஆதா³னம் பஜஹதீதி (படி. ம. 3.35) வேதி³தப்³போ³.

விஹரதீதி சதூஸு இரியாபத²விஹாரேஸு அஞ்ஞதரவிஹாரஸமாயோக³பரிதீ³பனமேதம், ஏகம் இரியாபத²பா³த⁴னம் அபரேன இரியாபதே²ன விச்சி²ந்தி³த்வா அபதமானம் அத்தபா⁴வம் ஹரதி பவத்தேதீதி அத்தோ².

ப³ஹித்³தா⁴ காயேதி பரஸ்ஸ காயே. அஜ்ஜ²த்தப³ஹித்³தா⁴ காயேதி காலேன அத்தனோ காயே, காலேன பரஸ்ஸ காயே. பட²மனயேன ஹி அத்தனோ காயே காயபரிக்³க³ஹோ வுத்தோ, து³தியனயேன பரஸ்ஸ காயே, ததியனயேன காலேன அத்தனோ காலேன பரஸ்ஸ காயே. அஜ்ஜ²த்தப³ஹித்³தா⁴ பன க⁴டிதாரம்மணம் நாம நத்தி². பகு³ணகம்மட்டா²னஸ்ஸ பன அபராபரம் ஸஞ்சரணகாலோ ஏத்த² கதி²தோ. ஆதாபீதி காயபரிக்³கா³ஹகவீரியஸமாயோக³பரிதீ³பனமேதம். ஸோ ஹி யஸ்மா தஸ்மிம் ஸமயே யம் தம் வீரியம் தீஸு ப⁴வேஸு கிலேஸானம் ஆதாபனதோ ஆதாபோதி வுச்சதி, தேன ஸமன்னாக³தோ ஹோதி, தஸ்மா ஆதாபீதி வுச்சதி.

ஸம்பஜானோதி காயபரிக்³கா³ஹகேன ஸம்பஜஞ்ஞஸங்கா²தேன ஞாணேன ஸமன்னாக³தோ. ஸதிமாதி காயபரிக்³கா³ஹிகாய ஸதியா ஸமன்னாக³தோ. அயம் பன யஸ்மா ஸதியா ஆரம்மணம் பரிக்³க³ஹேத்வா பஞ்ஞாய அனுபஸ்ஸதி, ந ஹி ஸதிவிரஹிதஸ்ஸ அனுபஸ்ஸனா நாம அத்தி², தேனேவாஹ – ‘‘ஸதிஞ்ச க்²வாஹம், பி⁴க்க²வே, ஸப்³ப³த்தி²கம் வதா³மீ’’தி (ஸம். நி. 5.234), தஸ்மா ஏத்த² ‘‘காயே காயானுபஸ்ஸீ விஹரதீ’’தி ஏத்தாவதா காயானுபஸ்ஸனாஸதிபட்டா²னகம்மட்டா²னம் வுத்தம் ஹோதி. அத² வா யஸ்மா அனாதாபினோ அந்தோஸங்கே²போ அந்தராயகரோ ஹோதி, அஸம்பஜானோ உபாயபரிக்³க³ஹே அனுபாயபரிவஜ்ஜனே ச ஸம்முய்ஹதி, முட்ட²ஸ்ஸதீ உபாயாபரிச்சாகே³ அனுபாயாபரிக்³க³ஹே ச அஸமத்தோ²வ ஹோதி, தேனஸ்ஸ தம் கம்மட்டா²னம் ந ஸம்பஜ்ஜதி; தஸ்மா யேஸம் த⁴ம்மானம் ஆனுபா⁴வேன தம் ஸம்பஜ்ஜதி தேஸம் த³ஸ்ஸனத்த²ம் ‘‘ஆதாபீ ஸம்பஜானோ ஸதிமா’’தி இத³ம் வுத்தந்தி வேதி³தப்³ப³ம்.

இதி காயானுபஸ்ஸனாஸதிபட்டா²னம் ஸம்பயோக³ங்க³ஞ்ச த³ஸ்ஸேத்வா இதா³னி பஹானங்க³ம் த³ஸ்ஸேதும் வினேய்ய லோகே அபி⁴ஜ்ஜா²தோ³மனஸ்ஸந்தி வுத்தம். தத்த² வினேய்யாதி தத³ங்க³வினயேன வா விக்க²ம்ப⁴னவினயேன வா வினயித்வா. லோகேதி ஏத்த² ய்வாயம் அஜ்ஜ²த்தாதி³பே⁴தோ³ காயோ பரிக்³க³ஹிதோ ஸ்வேவ இத⁴ லோகோ நாம. தஸ்மிம் லோகே அபி⁴ஜ்ஜா²தோ³மனஸ்ஸம் வினயித்வாதி அத்தோ². யஸ்மா பனேத்த² அபி⁴ஜ்ஜா²க³ஹணேன காமச்ச²ந்தோ³, தோ³மனஸ்ஸக்³க³ஹணேன ப்³யாபாதோ³ ஸங்க³ஹம் க³ச்ச²தி, தஸ்மா நீவரணபரியாபன்னப³லவத⁴ம்மத்³வயத³ஸ்ஸனேன நீவரணப்பஹானம் வுத்தம் ஹோதீதி வேதி³தப்³ப³ம்.

விஸேஸேன சேத்த² அபி⁴ஜ்ஜா²வினயேன காயஸம்பத்திமூலகஸ்ஸ அனுரோத⁴ஸ்ஸ, தோ³மனஸ்ஸவினயேன காயவிபத்திமூலகஸ்ஸ விரோத⁴ஸ்ஸ, அபி⁴ஜ்ஜா²வினயேன ச காயே அபி⁴ரதியா, தோ³மனஸ்ஸவினயேன காயபா⁴வனாய அனபி⁴ரதியா, அபி⁴ஜ்ஜா²வினயேன காயே அபூ⁴தானம் ஸுப⁴ஸுக²பா⁴வாதீ³னம் பக்கே²பஸ்ஸ, தோ³மனஸ்ஸவினயேன காயே பூ⁴தானம் அஸுபா⁴ஸுக²பா⁴வாதீ³னம் அபனயனஸ்ஸ ச பஹானம் வுத்தம். தேன யோகா³வசரஸ்ஸ யோகா³னுபா⁴வோ யோக³ஸமத்த²தா ச தீ³பிதா ஹோதி. யோகா³னுபா⁴வோ ஹி ஏஸ யதி³த³ம் அனுரோத⁴விரோத⁴விப்பமுத்தோ, அரதிரதிஸஹோ, அபூ⁴தபக்கே²பபூ⁴தாபனயனவிரஹிதோ ச ஹோதி. அனுரோத⁴விரோத⁴விப்பமுத்தோ சேஸ அரதிரதிஸஹோ அபூ⁴தம் அபக்கி²பந்தோ பூ⁴தஞ்ச அனபனேந்தோ யோக³ஸமத்தோ² ஹோதீதி.

அபரோ நயோ – ‘‘காயே காயானுபஸ்ஸீ’’தி ஏத்த² அனுபஸ்ஸனாய கம்மட்டா²னம் வுத்தம். விஹரதீதி ஏத்த² வுத்தவிஹாரேன கம்மட்டா²னிகஸ்ஸ காயபரிஹரணம். ஆதாபீதிஆதீ³ஸு ஆதாபேன ஸம்மப்பதா⁴னம், ஸதிஸம்பஜஞ்ஞேன ஸப்³ப³த்தி²ககம்மட்டா²னம், கம்மட்டா²னபரிஹரணூபாயோ வா; ஸதியா வா காயானுபஸ்ஸனாவஸேன படிலத்³த⁴ஸமதோ², ஸம்பஜஞ்ஞேன விபஸ்ஸனா, அபி⁴ஜ்ஜா²தோ³மனஸ்ஸவினயேன பா⁴வனாப²லம் வுத்தந்தி வேதி³தப்³ப³ம். அயம் தாவ காயானுபஸ்ஸனாஸதிபட்டா²னுத்³தே³ஸஸ்ஸ அத்த²வண்ணனா.

வேத³னானுபஸ்ஸனாதி³உத்³தே³ஸவண்ணனா

வேத³னானுபஸ்ஸனாஸதிபட்டா²னுத்³தே³ஸாதீ³ஸுபி அஜ்ஜ²த்தாதீ³னி வுத்தனயேனேவ வேதி³தப்³பா³னி. ஏதேஸுபி ஹி அத்தனோ வேத³னாதீ³ஸு, பரஸ்ஸ வேத³னாதீ³ஸு, காலேன அத்தனோ காலேன பரஸ்ஸ வேத³னாதீ³ஸூதி திவிதோ⁴ பரிக்³க³ஹோ வுத்தோ. வேத³னாஸு வேத³னானுபஸ்ஸீதிஆதீ³ஸு ச வேத³னாதீ³னம் புனவசனே பயோஜனம் காயானுபஸ்ஸனாயம் வுத்தனயேனேவ வேதி³தப்³ப³ம். வேத³னாஸு வேத³னானுபஸ்ஸீ, சித்தே சித்தானுபஸ்ஸீ, த⁴ம்மேஸு த⁴ம்மானுபஸ்ஸீதி ஏத்த² பன வேத³னாதி திஸ்ஸோ வேத³னா. தா ச லோகியா ஏவ; சித்தம்பி லோகியம், ததா² த⁴ம்மா. தேஸம் விபா⁴கோ³ நித்³தே³ஸவாரே பாகடோ ப⁴விஸ்ஸதி. கேவலம் பனித⁴ யதா² வேத³னா அனுபஸ்ஸிதப்³பா³ ததா² அனுபஸ்ஸந்தோ ‘‘வேத³னாஸு வேத³னானுபஸ்ஸீ’’தி வேதி³தப்³போ³. ஏஸ நயோ சித்தத⁴ம்மேஸு. கத²ஞ்ச வேத³னா அனுபஸ்ஸிதப்³பா³தி? ஸுகா² தாவ வேத³னா து³க்க²தோ, து³க்கா² ஸல்லதோ, அது³க்க²மஸுகா² அனிச்சதோ. யதா²ஹ –

‘‘யோ ஸுக²ம் து³க்க²தோ அத்³த³, து³க்க²மத்³த³க்கி² ஸல்லதோ;

அது³க்க²மஸுக²ம் ஸந்தம், அத்³த³க்கி² நம் அனிச்சதோ;

ஸ வே ஸம்மத³ஸோ பி⁴க்கு², உபஸந்தோ சரிஸ்ஸதீ’’தி. (ஸம். நி. 4.253);

ஸப்³பா³ ஏவ சேதா து³க்கா²திபி அனுபஸ்ஸிதப்³பா³. வுத்தஞ்சேதம் – ‘‘யம் கிஞ்சி வேத³யிதம் தம் து³க்க²ஸ்மிந்தி வதா³மீ’’தி (ஸம். நி. 4.259). ஸுக²து³க்க²தோபி ச அனுபஸ்ஸிதப்³பா³, யதா²ஹ – ‘‘ஸுகா² கோ², ஆவுஸோ விஸாக², வேத³னா டி²திஸுகா², விபரிணாமது³க்கா²’’தி (ம. நி. 1.465) ஸப்³ப³ம் வித்தா²ரேதப்³ப³ம். அபிச அனிச்சாதி³ஸத்தானுபஸ்ஸனாவஸேனபி (படி. ம. 3.35) அனுபஸ்ஸிதப்³பா³. ஸேஸம் நித்³தே³ஸவாரேயேவ பாகடம் ப⁴விஸ்ஸதி.

சித்தத⁴ம்மேஸுபி சித்தம் தாவ ஆரம்மணாதி⁴பதிஸஹஜாதபூ⁴மிகம்மவிபாககிரியாதி³னானத்தபே⁴தா³னம் அனிச்சாதி³னுபஸ்ஸனானம் நித்³தே³ஸவாரே ஆக³தஸராகா³தி³பே⁴தா³னஞ்ச வஸேன அனுபஸ்ஸிதப்³ப³ம். த⁴ம்மா ஸலக்க²ணஸாமஞ்ஞலக்க²ணானம் ஸுஞ்ஞதாத⁴ம்மஸ்ஸ அனிச்சாதி³ஸத்தானுபஸ்ஸனானம் நித்³தே³ஸவாரே ஆக³தஸந்தாஸந்தாதி³பே⁴தா³னஞ்ச வஸேன அனுபஸ்ஸிதப்³பா³. ஸேஸம் வுத்தனயமேவ. காமஞ்சேத்த² யஸ்ஸ காயஸங்கா²தே லோகே அபி⁴ஜ்ஜா²தோ³மனஸ்ஸம் பஹீனம், தஸ்ஸ வேத³னாதி³லோகேஸுபி தம் பஹீனமேவ. நானாபுக்³க³லவஸேன பன நானாசித்தக்க²ணிகஸதிபட்டா²னபா⁴வனாவஸேன ச ஸப்³ப³த்த² வுத்தம். யதோ வா ஏகத்த² பஹீனம், ஸேஸேஸுபி பஹீனம் ஹோதி. தேனேவஸ்ஸ தத்த² பஹானத³ஸ்ஸனத்த²ம்பி ஏவம் வுத்தந்தி வேதி³தப்³ப³ந்தி.

உத்³தே³ஸவாரவண்ணனா நிட்டி²தா.

காயானுபஸ்ஸனானித்³தே³ஸவண்ணனா

356. இதா³னி ஸேய்யதா²பி நாம சே²கோ விலீவகாரகோ தூ²லகிலஞ்ஜஸண்ஹகிலஞ்ஜசங்கோடகபேளாபுடாதீ³னி உபகரணானி கத்துகாமோ ஏகம் மஹாவேளும் லபி⁴த்வா சதுதா⁴ சி²ந்தி³த்வா ததோ ஏகேகம் வேளுக²ண்ட³ம் க³ஹேத்வா பா²லேத்வா தம் தம் உபகரணம் கரேய்ய, யதா² வா பன சே²கோ ஸுவண்ணகாரோ நானாவிஹிதம் பிளந்த⁴னவிகதிம் கத்துகாமோ ஸுபரிஸுத்³த⁴ம் ஸுவண்ணக⁴டிகம் லபி⁴த்வா சதுதா⁴ பி⁴ந்தி³த்வா ததோ ஏகேகம் கோட்டா²ஸம் க³ஹேத்வா தம் தம் பிளந்த⁴னம் கரேய்ய, ஏவமேவ ப⁴க³வா ஸதிபட்டா²னதே³ஸனாய ஸத்தானம் அனேகப்பகாரம் விஸேஸாதி⁴க³மம் கத்துகாமோ ஏகமேவ ஸம்மாஸதிம் ‘‘சத்தாரோ ஸதிபட்டா²னா – இத⁴ பி⁴க்கு² அஜ்ஜ²த்தம் காயே காயானுபஸ்ஸீ விஹரதீ’’திஆதி³னா நயேன ஆரம்மணவஸேன சதுதா⁴ பி⁴ந்தி³த்வா ததோ ஏகேகம் ஸதிபட்டா²னம் க³ஹேத்வா விப⁴ஜந்தோ கத²ஞ்ச பி⁴க்கு² அஜ்ஜ²த்தம் காயேதிஆதி³னா நயேன நித்³தே³ஸவாரம் வத்துமாரத்³தோ⁴.

தத்த² கத²ஞ்சாதிஆதி³ வித்தா²ரேதும் கதே²துகம்யதாபுச்சா². அயம் பனேத்த² ஸங்கே²பத்தோ² – கேன ச ஆகாரேன கேன பகாரேன பி⁴க்கு² அஜ்ஜ²த்தம் காயே காயானுபஸ்ஸீ விஹரதீதி? ஸேஸபுச்சா²வாரேஸுபி ஏஸேவ நயோ. இத⁴ பி⁴க்கூ²தி இமஸ்மிம் ஸாஸனே பி⁴க்கு². அயஞ்ஹேத்த² இத⁴-ஸத்³தோ³ அஜ்ஜ²த்தாதி³வஸேன ஸப்³ப³ப்பகாரகாயானுபஸ்ஸனானிப்³ப³த்தகஸ்ஸ புக்³க³லஸ்ஸ ஸன்னிஸ்ஸயபூ⁴தஸாஸனபரிதீ³பனோ அஞ்ஞஸாஸனஸ்ஸ ததா²பா⁴வபடிஸேத⁴னோ ச. வுத்தஞ்ஹேதம் – ‘‘இதே⁴வ, பி⁴க்க²வே, ஸமணோ…பே… ஸுஞ்ஞா பரப்பவாதா³ ஸமணேபி⁴ அஞ்ஞேஹீ’’தி (ம. நி. 1.139; அ. நி. 4.241). தேன வுத்தம் ‘‘இமஸ்மிம் ஸாஸனே பி⁴க்கூ²’’தி.

அஜ்ஜ²த்தம் காயந்தி அத்தனோ காயம். உத்³த⁴ம் பாத³தலாதி பாத³தலதோ உபரி. அதோ⁴ கேஸமத்த²காதி கேஸக்³க³தோ ஹேட்டா². தசபரியந்தந்தி திரியம் தசபரிச்சி²ன்னம். பூரம் நானப்பகாரஸ்ஸ அஸுசினோ பச்சவேக்க²தீதி நானப்பகாரகேஸாதி³அஸுசிப⁴ரிதோ அயம் காயோதி பஸ்ஸதி. கத²ம்? அத்தி² இமஸ்மிம் காயே கேஸா…பே… முத்தந்தி. தத்த² அத்தீ²தி ஸம்விஜ்ஜந்தி. இமஸ்மிந்தி ய்வாயம் உத்³த⁴ம் பாத³தலா அதோ⁴ கேஸமத்த²கா திரியம் தசபரியந்தோ பூரோ நானப்பகாரஸ்ஸ அஸுசினோதி வுச்சதி தஸ்மிம். காயேதி ஸரீரே. ஸரீரஞ்ஹி அஸுசிஸஞ்சயதோ குச்சி²தானம் கேஸாதீ³னஞ்சேவ சக்கு²ரோகா³தீ³னஞ்ச ரோக³ஸதானம் ஆயபூ⁴ததோ காயோதி வுச்சதி.

கேஸா லோமாதி ஏதே கேஸாத³யோ த்³வத்திம்ஸாகாரா. தத்த² அத்தி² இமஸ்மிம் காயே கேஸா, அத்தி² இமஸ்மிம் காயே லோமாதி ஏவம் ஸம்ப³ந்தோ⁴ வேதி³தப்³போ³. இமஸ்மிஞ்ஹி பாத³தலதோ பட்டா²ய உபரி, கேஸமத்த²கா பட்டா²ய ஹேட்டா², தசதோ பட்டா²ய திரியந்ததோதி ஏத்தகே ப்³யாமமத்தே களேவரே ஸப்³பா³காரேனபி விசினந்தோ ந கோசி கிஞ்சி முத்தம் வா மணிம் வா வேளுரியம் வா அக³ரும் வா குங்குமம் வா கப்பூரம் வா வாஸசுண்ணாதி³ம் வா அணுமத்தம்பி ஸுசிபா⁴வம் பஸ்ஸதி, அத² கோ² பரமது³க்³க³ந்த⁴ஜேகு³ச்ச²ம் அஸ்ஸிரீகத³ஸ்ஸனம் நானப்பகாரம் கேஸலோமாதி³பே⁴த³ம் அஸுசிம்யேவ பஸ்ஸதி. தேன வுத்தம் – அத்தி² இமஸ்மிம் காயே கேஸா லோமா…பே… முத்தந்தி. அயமேத்த² பத³ஸம்ப³ந்த⁴தோ வண்ணனா.

இமம் பன கம்மட்டா²னம் பா⁴வேத்வா அரஹத்தம் பாபுணிதுகாமேன குலபுத்தேன ஆதி³தோவ சதுப்³பி³த⁴ம் ஸீலம் ஸோதே⁴த்வா ஸுபரிஸுத்³த⁴ஸீலே பதிட்டி²தேன, ய்வாயம் த³ஸஸு பலிபோ³தே⁴ஸு பலிபோ³தோ⁴ அத்தி² தம் உபச்சி²ந்தி³த்வா, படிக்கூலமனஸிகாரகம்மட்டா²னபா⁴வனாய பட²மஜ்ஜா²னம் நிப்³ப³த்தேத்வா, ஜா²னம் பாத³கம் கத்வா விபஸ்ஸனம் பட்ட²பேத்வா, அரஹத்தம் அனாகா³மிப²லாதீ³ஸு வா அஞ்ஞதரம் பத்தஸ்ஸ ஸப்³ப³ந்திமேன பரிச்சே²தே³ன ஸாட்ட²கதா²ய பாளியா கதபரிசயஸ்ஸ தந்திஆசரியஸ்ஸாபி கல்யாணமித்தஸ்ஸ ஸந்திகே உக்³க³ஹேதப்³ப³ம். விஸுத்³த⁴ம் ததா²ரூபம் கல்யாணமித்தம் ஏகவிஹாரே அலப⁴ந்தேன தஸ்ஸ வஸனட்டா²னம் க³ந்த்வா உக்³க³ஹேதப்³ப³ம். தத்த² சதுப்³பி³த⁴ஸீலவிஸோத⁴னஞ்சேவ (விஸுத்³தி⁴. 1.19) பலிபோ³தோ⁴ (விஸுத்³தி⁴. 1.41) ச பலிபோ³து⁴பச்சே²தோ³ ச ஆசரியஸ்ஸ ஸந்திகம் உபஸங்கமனவிதா⁴னஞ்ச ஸப்³ப³ம்பி விஸுத்³தி⁴மக்³கே³ வித்தா²ரதோ கதி²தம். தஸ்மா தம் தத்த² கதி²தனயேனேவ வேதி³தப்³ப³ம்.

ஆசரியேன பன கம்மட்டா²னம் கதே²ந்தேன திவிதே⁴ன கதே²தப்³ப³ம். ஏகோ பி⁴க்கு² பகதியா உக்³க³ஹிதகம்மட்டா²னோ ஹோதி. தஸ்ஸ ஏகம் த்³வே நிஸஜ்ஜவாரே ஸஜ்ஜா²யம் காரேத்வா கதே²தப்³ப³ம். ஏகோ ஸந்திகே வஸித்வா உக்³க³ண்ஹிதுகாமோ ஹோதி. தஸ்ஸ ஆக³தாக³தவேலாய கதே²தப்³ப³ம். ஏகோ உக்³க³ண்ஹித்வா அஞ்ஞத்த² க³ந்துகாமோ ஹோதி. தஸ்ஸ நாதிபபஞ்சம் நாதிஸங்கே²பம் கத்வா நிஜ்ஜடம் நிக்³க³ண்டி²கம் கம்மட்டா²னம் கதே²தப்³ப³ம். கதே²ந்தேன கிம் ஆசிக்கி²தப்³ப³ந்தி? ஸத்ததா⁴ உக்³க³ஹகோஸல்லம் த³ஸதா⁴ ச மனஸிகாரகோஸல்லம் ஆசிக்கி²தப்³ப³ம்.

தத்த² வசஸா மனஸா வண்ணதோ ஸண்டா²னதோ தி³ஸதோ ஓகாஸதோ பரிச்சே²த³தோதி ஏவம் ஸத்ததா⁴ உக்³க³ஹகோஸல்லம் ஆசிக்கி²தப்³ப³ம். இமஸ்மிஞ்ஹி படிக்கூலமனஸிகாரகம்மட்டா²னே யோபி திபிடகோ ஹோதி, தேனபி மனஸிகாரகாலே பட²மம் வாசாய ஸஜ்ஜா²யோ காதப்³போ³. ஏகச்சஸ்ஸ ஹி ஸஜ்ஜா²யம் கரோந்தஸ்ஸேவ கம்மட்டா²னம் பாகடம் ஹோதி, மலயவாஸீமஹாதே³வத்தே²ரஸ்ஸ ஸந்திகே உக்³க³ஹிதகம்மட்டா²னானம் த்³வின்னம் தே²ரானம் விய. தே²ரோ கிர தேஹி கம்மட்டா²னம் யாசிதோ ‘சத்தாரோ மாஸே இமம் ஏவம் ஸஜ்ஜா²யம் கரோதா²’தி த்³வத்திஸாகாரபாளிம் அதா³ஸி. தே, கிஞ்சாபி தேஸம் த்³வே தயோ நிகாயா பகு³ணா, பத³க்கி²ணக்³கா³ஹிதாய பன சத்தாரோ மாஸே த்³வத்திம்ஸாகாரம் ஸஜ்ஜா²யந்தாவ ஸோதாபன்னா அஹேஸும்.

தஸ்மா கம்மட்டா²னம் கதே²ந்தேன ஆசரியேன அந்தேவாஸிகோ வத்தப்³போ³ – ‘பட²மம் தாவ வாசாய ஸஜ்ஜா²யம் கரோஹீ’தி. கரோந்தேன ச தசபஞ்சகாதீ³னி பரிச்சி²ந்தி³த்வா அனுலோமபடிலோமவஸேன ஸஜ்ஜா²யோ காதப்³போ³. ‘‘கேஸா லோமா நகா² த³ந்தா தசோ’’தி ஹி வத்வா புன படிலோமதோ ‘‘தசோ த³ந்தா நகா² லோமா கேஸா’’தி வத்தப்³ப³ம். தத³னந்தரம் வக்கபஞ்சகே ‘‘மம்ஸம் ந்ஹாரு அட்டி² அட்டி²மிஞ்ஜம் வக்க’’ந்தி வத்வா புன படிலோமதோ ‘‘வக்கம் அட்டி²மிஞ்ஜம் அட்டி² ந்ஹாரு மம்ஸம் தசோ த³ந்தா நகா² லோமா கேஸா’’தி வத்தப்³ப³ம். ததோ பப்பா²ஸபஞ்சகே ‘‘ஹத³யம் யகனம் கிலோமகம் பிஹகம் பப்பா²ஸ’’ந்தி வத்வா புன படிலோமதோ ‘‘பப்பா²ஸம் பிஹகம் கிலோமகம் யகனம் ஹத³யம் வக்கம் அட்டி²மிஞ்ஜம் அட்டி² ந்ஹாரு மம்ஸம் தசோ த³ந்தா நகா² லோமா கேஸா’’தி வத்தப்³ப³ம்.

ததோ இமம் தந்திம் அனாருள்ஹம்பி படிஸம்பி⁴தா³மக்³கே³ (படி. ம. 1.4) ஆக³தம் மத்த²லுங்க³ம் கரீஸாவஸானே தந்திம் ஆரோபேத்வா இமஸ்மிம் மத்த²லுங்க³பஞ்சகே ‘‘அந்தம் அந்தகு³ணம் உத³ரியம் கரீஸம் மத்த²லுங்க³’’ந்தி வத்வா புன படிலோமதோ ‘‘மத்த²லுங்க³ம் கரீஸம் உத³ரியம் அந்தகு³ணம் அந்தம் பப்பா²ஸம் பிஹகம் கிலோமகம் யகனம் ஹத³யம் வக்கம் அட்டி²மிஞ்ஜம் அட்டி² ந்ஹாரு மம்ஸம் தசோ த³ந்தா நகா² லோமா கேஸா’’தி வத்தப்³ப³ம்.

ததோ மேத³ச²க்கே ‘‘பித்தம் ஸேம்ஹம் புப்³போ³ லோஹிதம் ஸேதோ³ மேதோ³’’தி வத்வா புன படிலோமதோ ‘‘மேதோ³ ஸேதோ³ லோஹிதம் புப்³போ³ ஸேம்ஹம் பித்தம் மத்த²லுங்க³ம் கரீஸம் உத³ரியம் அந்தகு³ணம் அந்தம் பப்பா²ஸம் பிஹகம் கிலோமகம் யகனம் ஹத³யம் வக்கம் அட்டி²மிஞ்ஜம் அட்டி² ந்ஹாரு மம்ஸம் தசோ த³ந்தா நகா² லோமா கேஸா’’தி வத்தப்³ப³ம்.

ததோ முத்தச²க்கே ‘‘அஸ்ஸு வஸா கே²ளோ ஸிங்கா⁴ணிகா லஸிகா முத்த’’ந்தி வத்வா புன படிலோமதோ ‘‘முத்தம் லஸிகா ஸிங்கா⁴ணிகா கே²ளோ வஸா அஸ்ஸு மேதோ³ ஸேதோ³ லோஹிதம் புப்³போ³ ஸேம்ஹம் பித்தம் மத்த²லுங்க³ம் கரீஸம் உத³ரியம் அந்தகு³ணம் அந்தம் பப்பா²ஸம் பிஹகம் கிலோமகம் யகனம் ஹத³யம் வக்கம் அட்டி²மிஞ்ஜம் அட்டி² ந்ஹாரு மம்ஸம் தசோ த³ந்தா நகா² லோமா கேஸா’’தி ஏவம் காலஸதம்பி காலஸஹஸ்ஸம்பி காலஸதஸஹஸ்ஸம்பி வாசாய ஸஜ்ஜா²யோ காதப்³போ³. வசஸா ஸஜ்ஜா²யேன ஹி கம்மட்டா²னதந்தி பகு³ணா ஹோதி; ந இதோ சிதோ ச சித்தம் விதா⁴வதி; கோட்டா²ஸா பாகடா ஹோந்தி, ஹத்த²ஸங்க²லிகா விய கா²யந்தி, வதிபாத³பந்தி விய ச கா²யந்தி. யதா² ச பன வசஸா, ததே²வ மனஸாபி ஸஜ்ஜா²யோ காதப்³போ³. வசஸா ஸஜ்ஜா²யோ ஹி மனஸா ஸஜ்ஜா²யஸ்ஸ பச்சயோ ஹோதி. மனஸா ஸஜ்ஜா²யோ லக்க²ணபடிவேத⁴ஸ்ஸ பச்சயோ ஹோதி. லக்க²ணபடிவேதோ⁴ மக்³க³ப²லபடிவேத⁴ஸ்ஸ பச்சயோ ஹோதி.

‘வண்ணதோ’தி கேஸாதீ³னம் வண்ணோ வவத்த²பேதப்³போ³. ‘ஸண்டா²னதோ’தி தேஸம்யேவ ஸண்டா²னம் வவத்த²பேதப்³ப³ம். ‘தி³ஸதோ’தி இமஸ்மிம் ஸரீரே நாபி⁴தோ உத்³த⁴ம் உபரிமா தி³ஸா, அதோ⁴ ஹேட்டி²மா தி³ஸா. தஸ்மா ‘‘அயம் கோட்டா²ஸோ இமிஸ்ஸா நாம தி³ஸாயா’’தி தி³ஸா வவத்த²பேதப்³பா³. ‘ஓகாஸதோ’தி ‘‘அயம் கோட்டா²ஸோ இமஸ்மிம் நாம ஓகாஸே பதிட்டி²தோ’’தி ஏவம் தஸ்ஸ தஸ்ஸ ஓகாஸோ வவத்த²பேதப்³போ³. ‘பரிச்சே²த³தோ’தி ஸபா⁴க³பரிச்சே²தோ³ விஸபா⁴க³பரிச்சே²தோ³தி த்³வே பரிச்சே²தா³. தத்த² ‘‘அயம் கோட்டா²ஸோ ஹேட்டா² ச உபரி ச திரியஞ்ச இமினா நாம பரிச்சி²ன்னோ’’தி ஏவம் ஸபா⁴க³பரிச்சே²தோ³ வேதி³தப்³போ³. ‘‘கேஸா ந லோமா, லோமாபி ந கேஸா’’தி ஏவம் அமிஸ்ஸீகதவஸேன விஸபா⁴க³பரிச்சே²தோ³ வேதி³தப்³போ³.

ஏவம் ஸத்ததா⁴ உக்³க³ஹகோஸல்லம் ஆசிக்க²ந்தேன பன ‘‘இத³ம் கம்மட்டா²னம் அஸுகஸ்மிம் ஸுத்தே படிக்கூலவஸேன கதி²தம், அஸுகஸ்மிம் தா⁴துவஸேனா’’தி ஞத்வா ஆசிக்கி²தப்³ப³ம். இத³ஞ்ஹி மஹாஸதிபட்டா²னே (தீ³. நி. 2.372; ம. நி. 1.105 ஆத³யோ) படிக்கூலவஸேனேவ கதி²தம், மஹாஹத்தி²பதோ³பம (ம. நி. 1.300 ஆத³யோ) -மஹாராஹுலோவாத³ (ம. நி. 2.113 ஆத³யோ) -தா⁴துவிப⁴ங்கே³ஸு (ம. நி. 3.342 ஆத³யோ) தா⁴துவஸேன கதி²தம். காயக³தாஸதிஸுத்தே (ம. நி. 3.153 ஆத³யோ) பன யஸ்ஸ வண்ணதோ உபட்டா²தி, தம் ஸந்தா⁴ய சத்தாரி ஜா²னானி விப⁴த்தானி. தத்த² தா⁴துவஸேன கதி²தம் விபஸ்ஸனாகம்மட்டா²னம் ஹோதி, படிக்கூலவஸேன கதி²தம் ஸமத²கம்மட்டா²னம். ததே³தம் இத⁴ ஸமத²கம்மட்டா²னம் அவிஸேஸதோ ஸப்³ப³ஸாதா⁴ரணவஸேன கதி²தந்தி வத³ந்தியேவாதி.

ஏவம் ஸத்ததா⁴ உக்³க³ஹகோஸல்லம் ஆசிக்கி²த்வா ‘‘அனுபுப்³ப³தோ, நாதிஸீக⁴தோ, நாதிஸணிகதோ, விக்கே²பபடிபா³ஹனதோ, பண்ணத்திஸமதிக்கமனதோ, அனுபுப்³ப³முஞ்சனதோ, அப்பனாதோ, தயோ ச ஸுத்தந்தா’’தி ஏவம் த³ஸதா⁴ மனஸிகாரகோஸல்லம் ஆசிக்கி²தப்³ப³ம். தத்த² ‘அனுபுப்³ப³தோ’தி இத³ஞ்ஹி ஸஜ்ஜா²யகரணதோ பட்டா²ய அனுபடிபாடியா மனஸிகாதப்³ப³ம், ந ஏகந்தரிகாய. ஏகந்தரிகாய ஹி மனஸிகரோந்தோ யதா² நாம அகுஸலோ புரிஸோ த்³வத்திம்ஸபத³ம் நிஸ்ஸேணிம் ஏகந்தரிகாய ஆரோஹந்தோ கிலந்தகாயோ பததி, ந ஆரோஹனம் ஸம்பாதே³தி; ஏவமேவ பா⁴வனாஸம்பத்திவஸேன அதி⁴க³ந்தப்³ப³ஸ்ஸ அஸ்ஸாத³ஸ்ஸ அனதி⁴க³மா கிலந்தசித்தோ பததி, ந பா⁴வனம் ஸம்பாதே³தி.

அனுபுப்³ப³தோ மனஸிகரோந்தேனாபி ச ‘நாதிஸீக⁴தோ’ மனஸிகாதப்³ப³ம். அதிஸீக⁴தோ மனஸிகரோதோ ஹி யதா² நாம தியோஜனம் மக்³க³ம் படிபஜ்ஜித்வா ஓக்கமனவிஸ்ஸஜ்ஜனம் அஸல்லக்கே²த்வா ஸீகே⁴ன ஜவேன ஸத்தக்க²த்தும்பி க³மனாக³மனம் கரோதோ புரிஸஸ்ஸ கிஞ்சாபி அத்³தா⁴னம் பரிக்க²யம் க³ச்ச²தி, அத² கோ² புச்சி²த்வாவ க³ந்தப்³ப³ம் ஹோதி; ஏவமேவ கேவலம் கம்மட்டா²னம் பரியோஸானம் பாபுணாதி, அவிபூ⁴தம் பன ஹோதி, ந விஸேஸம் ஆவஹதி. தஸ்மா நாதிஸீக⁴தோ மனஸிகாதப்³ப³ம்.

யதா² ச நாதிஸீக⁴தோ ஏவம் ‘நாதிஸணிகதோ’பி. அதிஸணிகதோ மனஸிகரோதோ ஹி யதா² நாம தத³ஹேவ தியோஜனம் மக்³க³ம் க³ந்துகாமஸ்ஸ புரிஸஸ்ஸ அந்தராமக்³கே³ ருக்க²பப்³ப³தக³ஹனாதீ³ஸு விலம்ப³மானஸ்ஸ மக்³கோ³ பரிக்க²யம் ந க³ச்ச²தி, த்³வீஹதீஹேன பரியோஸாபேதப்³போ³ ஹோதி; ஏவமேவ கம்மட்டா²னம் பரியோஸானம் ந க³ச்ச²தி, விஸேஸாதி⁴க³மஸ்ஸ பச்சயோ ந ஹோதி.

‘விக்கே²பபடிபா³ஹனதோ’தி கம்மட்டா²னம் விஸ்ஸஜ்ஜேத்வா ப³ஹித்³தா⁴ புது²த்தாரம்மணே சேதஸோ விக்கே²போ படிபா³ஹிதப்³போ³. அப்படிபா³ஹதோ ஹி யதா² நாம ஏகபதி³கம் பபாதமக்³க³ம் படிபன்னஸ்ஸ புரிஸஸ்ஸ அக்கமனபத³ம் அஸல்லக்கே²த்வா இதோ சிதோ ச விலோகயதோ பத³வாரோ விரஜ்ஜ²தி, ததோ ஸதபோரிஸே பபாதே பதிதப்³ப³ம் ஹோதி; ஏவமேவ ப³ஹித்³தா⁴ விக்கே²பே ஸதி கம்மட்டா²னம் பரிஹாயதி, பரித⁴ம்ஸதி. தஸ்மா விக்கே²பபடிபா³ஹனதோ மனஸிகாதப்³ப³ம்.

‘பண்ணத்திஸமதிக்கமனதோ’தி யா அயம் ‘‘கேஸா லோமா’’தி ஆதி³கா பண்ணத்தி தம் அதிக்கமித்வா படிக்கூலந்தி சித்தம் ட²பேதப்³ப³ம். யதா² ஹி உத³கது³ல்லப⁴காலே மனுஸ்ஸா அரஞ்ஞே உத³பானம் தி³ஸ்வா தத்த² தாலபண்ணாதி³கம் கிஞ்சிதே³வ ஸஞ்ஞாணம் ப³ந்தி⁴த்வா தேன ஸஞ்ஞாணேன ஆக³ந்த்வா ந்ஹாயந்தி சேவ பிவந்தி ச, யதா³ பன தேஸம் அபி⁴ண்ஹஸஞ்சாரேன ஆக³தாக³தபத³ம் பாகடம் ஹோதி, ததா³ ஸஞ்ஞாணேன கிச்சம் ந ஹோதி, இச்சி²திச்சி²தக்க²ணே க³ந்த்வா ந்ஹாயந்தி சேவ பிவந்தி ச; ஏவமேவ புப்³ப³பா⁴கே³ ‘கேஸா லோமா’தி பண்ணத்திவஸேன மனஸிகரோதோ படிக்கூலபா⁴வோ பாகடோ ஹோதி. அத² ‘கேஸா லோமா’தி பண்ணத்திம் ஸமதிக்கமித்வா படிக்கூலபா⁴வேயேவ சித்தம் ட²பேதப்³ப³ம்.

‘அனுபுப்³ப³முஞ்சனதோ’தி யோ யோ கோட்டா²ஸோ ந உபட்டா²தி, தம் தம் முஞ்சந்தேன அனுபுப்³ப³முஞ்சனதோ மனஸிகாதப்³ப³ம். ஆதி³கம்மிகஸ்ஸ ஹி ‘கேஸா’தி மனஸிகரோதோ மனஸிகாரோ க³ந்த்வா ‘முத்த’ந்தி இமம் பரியோஸானகோட்டா²ஸமேவ ஆஹச்ச திட்ட²தி. ‘முத்த’ந்தி ச மனஸிகரோதோ மனஸிகாரோ க³ந்த்வா ‘கேஸா’தி இமம் ஆதி³கோட்டா²ஸமேவ ஆஹச்ச திட்ட²தி. அத²ஸ்ஸ மனஸிகரோதோ கேசி கோட்டா²ஸா உபட்ட²ஹந்தி, கேசி ந உபட்ட²ஹந்தி. தேன யே யே உபட்ட²ஹந்தி தேஸு தேஸு தாவ கம்மம் காதப்³ப³ம், யாவ த்³வீஸு உபட்டி²தேஸு தேஸம்பி ஏகோ ஸுட்டு²தரம் உபட்ட²ஹதி. ஏவம் உபட்டி²தம் பன தமேவ புனப்புனம் மனஸிகரோந்தேன அப்பனா உப்பாதே³தப்³பா³.

தத்ராயம் உபமா – யதா² ஹி த்³வத்திம்ஸதாலகே தாலவனே வஸந்தம் மக்கடம் க³ஹேதுகாமோ லுத்³தோ³ ஆதி³ம்ஹி டி²ததாலஸ்ஸ பண்ணம் ஸரேன விஜ்ஜி²த்வா உக்குட்டி²ம் கரேய்ய; அத² ஸோ மக்கடோ படிபாடியா தஸ்மிம் தஸ்மிம் தாலே பதித்வா பரியந்ததாலமேவ க³ச்சே²ய்ய; தத்த²பி க³ந்த்வா லுத்³தே³ன ததே²வ கதே புன தேனேவ நயேன ஆதி³தாலம் ஆக³ச்சே²ய்ய; ஸோ ஏவம் புனப்புனம் படிபாடியா க³ச்ச²ந்தோ உக்குட்டு²க்குட்டி²ட்டா²னேயேவ உட்ட²ஹித்வா புன அனுக்கமேன ஏகஸ்மிம் தாலே நிபதித்வா தஸ்ஸ வேமஜ்ஜே² மகுளதாலபண்ணஸூசிம் த³ள்ஹம் க³ஹேத்வா விஜ்ஜி²யமானோபி ந உட்ட²ஹேய்ய, ஏவம்ஸம்பத³மித³ம் த³ட்ட²ப்³ப³ம்.

தத்ரித³ம் ஓபம்மஸம்ஸந்த³னம் – யதா² ஹி தாலவனே த்³வத்திம்ஸதாலா, ஏவம் இமஸ்மிம் காயே த்³வத்திம்ஸ கோட்டா²ஸா; மக்கடோ விய சித்தம்; லுத்³தோ³ விய யோகா³வசரோ; மக்கடஸ்ஸ த்³வத்திம்ஸதாலகே தாலவனே நிவாஸோ விய யோகி³னோ சித்தஸ்ஸ த்³வத்திம்ஸகோட்டா²ஸகே காயே ஆரம்மணவஸேன அனுஸம்சரணம்; லுத்³தே³ன ஆதி³ம்ஹி டி²ததாலஸ்ஸ பண்ணம் ஸரேன விஜ்ஜி²த்வா உக்குட்டி²யா கதாய மக்கடஸ்ஸ தஸ்மிம் தஸ்மிம் தாலே பதித்வா பரியந்ததாலக³மனம் விய யோகி³னோ ‘கேஸா’தி மனஸிகாரே ஆரத்³தே⁴ படிபாடியா க³ந்த்வா பரியோஸானகோட்டா²ஸே ஏவ சித்தஸ்ஸ ஸண்டா²னம்; புன பச்சாக³மனேபி ஏஸேவ நயோ; புனப்புனம் படிபாடியா க³ச்ச²மானஸ்ஸ மக்கடஸ்ஸ உக்குட்டு²க்குட்டி²ட்டா²னே உட்டா²னம் விய புனப்புனம் மனஸிகரோதோ கேஸுசி கேஸுசி உபட்டி²தேஸு அனுபட்ட²ஹந்தே விஸ்ஸஜ்ஜேத்வா உபட்டி²தேஸு பரிகம்மகரணம்; அனுக்கமேன ஏகஸ்மிம் தாலே நிபதித்வா தஸ்ஸ வேமஜ்ஜே² மகுளதாலபண்ணஸூசிம் த³ள்ஹம் க³ஹேத்வா விஜ்ஜி²யமானஸ்ஸாபி அனுட்டா²னம் விய அவஸானே த்³வீஸு உபட்டி²தேஸு யோ ஸுட்டு²தரம் உபட்டா²தி தமேவ புனப்புனம் மனஸிகரித்வா அப்பனாய உப்பாத³னம்.

அபராபி உபமா – யதா² நாம பிண்ட³பாதிகோ பி⁴க்கு² த்³வத்திம்ஸகுலம் கா³மம் உபனிஸ்ஸாய வஸந்தோ பட²மகே³ஹே ஏவ த்³வே பி⁴க்கா² லபி⁴த்வா பரதோ ஏகம் விஸ்ஸஜ்ஜேய்ய; புனதி³வஸே திஸ்ஸோ லபி⁴த்வா பரதோ த்³வே விஸ்ஸஜ்ஜேய்ய; ததியதி³வஸே ஆதி³ம்ஹியேவ பத்தபூரம் லபி⁴த்வா ஆஸனஸாலம் க³ந்த்வா பரிபு⁴ஞ்ஜேய்ய, ஏவம்ஸம்பத³மித³ம் த³ட்ட²ப்³ப³ம். த்³வத்திம்ஸகுலகா³மோ விய ஹி த்³வத்திம்ஸாகாரோ; பிண்ட³பாதிகோ விய யோகா³வசரோ; தஸ்ஸ தம் கா³மம் உபனிஸ்ஸாய வாஸோ விய யோகி³னோ த்³வத்திம்ஸாகாரே பரிகம்மகரணம்; பட²மகே³ஹே த்³வே பி⁴க்கா² லபி⁴த்வா பரதோ ஏகிஸ்ஸா விஸ்ஸஜ்ஜனம் விய து³தியதி³வஸே திஸ்ஸோ லபி⁴த்வா பரதோ த்³வின்னம் விஸ்ஸஜ்ஜனம் விய ச மனஸிகரோதோ மனஸிகரோதோ அனுபட்ட²ஹந்தே அனுபட்ட²ஹந்தே விஸ்ஸஜ்ஜேத்வா உபட்டி²தேஸு உபட்டி²தேஸு யாவ கோட்டா²ஸத்³வயே பரிகம்மகரணம்; ததியதி³வஸே ஆதி³ம்ஹியேவ பத்தபூரம் லபி⁴த்வா ஆஸனஸாலாயம் நிஸீதி³த்வா பரிபோ⁴கோ³ விய த்³வீஸு யோ ஸுட்டு²தரம் உபட்ட²ஹதி தமேவ புனப்புனம் மனஸிகரித்வா அப்பனாய உப்பாத³னம்.

‘அப்பனாதோ’தி அப்பனாகோட்டா²ஸதோ. கேஸாதீ³ஸு ஏகேகஸ்மிம் கோட்டா²ஸே அப்பனா ஹோதீதி வேதி³தப்³பா³தி அயமேத்த² அதி⁴ப்பாயோ.

‘தயோ ச ஸுத்தந்தா’தி அதி⁴சித்தம், ஸீதிபா⁴வோ, போ³ஜ்ஜ²ங்க³கோஸல்லந்தி இமே தயோ ஸுத்தந்தா வீரியஸமாதி⁴யோஜனத்த²ம் வேதி³தப்³பா³தி அயமேத்த² அதி⁴ப்பாயோ. தத்த² –

‘‘அதி⁴சித்தமனுயுத்தேன, பி⁴க்க²வே, பி⁴க்கு²னா தீணி நிமித்தானி காலேன காலம் மனஸிகாதப்³பா³னி…காலேன காலம் ஸமாதி⁴னிமித்தம் மனஸிகாதப்³ப³ம், காலேன காலம் பக்³க³ஹனிமித்தம் மனஸிகாதப்³ப³ம், காலேன காலம் உபேக்கா²னிமித்தம் மனஸிகாதப்³ப³ம். ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் ஸமாதி⁴னிமித்தம்யேவ மனஸிகரேய்ய, டா²னம் தம் சித்தம் கோஸஜ்ஜாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் பக்³க³ஹனிமித்தம்யேவ மனஸிகரேய்ய, டா²னம் தம் சித்தம் உத்³த⁴ச்சாய ஸம்வத்தேய்ய. ஸசே, பி⁴க்க²வே, அதி⁴சித்தமனுயுத்தோ பி⁴க்கு² ஏகந்தம் உபேக்கா²னிமித்தம்யேவ மனஸிகரேய்ய, டா²னம் தம் சித்தம் ந ஸம்மாஸமாதி⁴யேய்ய ஆஸவானம் க²யாய. யதோ ச கோ², பி⁴க்க²வே, அதி⁴சித்தமனுயுத்தோ பி⁴க்கு² காலேன காலம் ஸமாதி⁴னிமித்தம், பக்³க³ஹனிமித்தம், உபேக்கா²னிமித்தம் மனஸிகரோதி, தம் ஹோதி சித்தம் முது³ ச கம்மனியஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா ஸமாதி⁴யதி ஆஸவானம் க²யாய.

‘‘ஸேய்யதா²பி, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா உக்கம் ப³ந்த⁴தி, உக்கம் ப³ந்தி⁴த்வா உக்காமுக²ம் ஆலிம்பேதி, உக்காமுக²ம் ஆலிம்பேத்வா ஸண்டா³ஸேன ஜாதரூபம் க³ஹேத்வா உக்காமுகே² பக்கி²பேய்ய, உக்காமுகே² பக்கி²பித்வா காலேன காலம் அபி⁴த⁴மதி, காலேன காலம் உத³கேன பரிப்போ²ஸேதி, காலேன காலம் அஜ்ஜு²பேக்க²தி. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் அபி⁴த⁴மேய்ய, டா²னம் தம் ஜாதரூபம் ட³ஹேய்ய. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் உத³கேன பரிப்போ²ஸேய்ய, டா²னம் தம் ஜாதரூபம் நிப்³பா³யேய்ய. ஸசே, பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் ஏகந்தம் அஜ்ஜு²பேக்கே²ய்ய, டா²னம் தம் ஜாதரூபம் ந ஸம்மா பரிபாகம் க³ச்சே²ய்ய.

‘‘யதோ ச கோ², பி⁴க்க²வே, ஸுவண்ணகாரோ வா ஸுவண்ணகாரந்தேவாஸீ வா தம் ஜாதரூபம் காலேன காலம் அபி⁴த⁴மதி, காலேன காலம் உத³கேன பரிப்போ²ஸேதி, காலேன காலம் அஜ்ஜு²பேக்க²தி, தம் ஹோதி ஜாதரூபம் முது³ ச கம்மனியஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா உபேதி கம்மாய; யஸ்ஸா யஸ்ஸா ச பிளந்த⁴னவிகதியா ஆகங்க²தி – யதி³ பட்டிகாய யதி³ குண்ட³லாய யதி³ கீ³வேய்யகாய யதி³ ஸுவண்ணமாலாய, தஞ்சஸ்ஸ அத்த²ம் அனுபோ⁴தி.

‘‘ஏவமேவ கோ², பி⁴க்க²வே, அதி⁴சித்தமனுயுத்தேன…பே… ஸம்மா ஸமாதி⁴யதி ஆஸவானம் க²யாய; யஸ்ஸ யஸ்ஸ ச அபி⁴ஞ்ஞாஸச்சி²கரணீயஸ்ஸ த⁴ம்மஸ்ஸ சித்தம் அபி⁴னின்னாமேதி அபி⁴ஞ்ஞா ஸச்சி²கிரியாய, தத்ர தத்ரேவ ஸக்கி²ப⁴ப்³ப³தம் பாபுணாதி ஸதி ஸதிஆயதனே’’தி (அ. நி. 3.103) இத³ம் ஸுத்தம் அதி⁴சித்தந்தி வேதி³தப்³ப³ம்.

‘‘ச²ஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ப⁴ப்³போ³ அனுத்தரம் ஸீதிபா⁴வம் ஸச்சி²காதும். கதமேஹி ச²ஹி? இத⁴, பி⁴க்க²வே, பி⁴க்கு² யஸ்மிம் ஸமயே சித்தம் நிக்³க³ஹேதப்³ப³ம் தஸ்மிம் ஸமயே சித்தம் நிக்³க³ண்ஹாதி, யஸ்மிம் ஸமயே சித்தம் பக்³க³ஹேதப்³ப³ம் தஸ்மிம் ஸமயே சித்தம் பக்³க³ண்ஹாதி, யஸ்மிம் ஸமயே சித்தம் ஸம்பஹம்ஸிதப்³ப³ம் தஸ்மிம் ஸமயே சித்தம் ஸம்பஹம்ஸேதி, யஸ்மிம் ஸமயே சித்தம் அஜ்ஜு²பேக்கி²தப்³ப³ம் தஸ்மிம் ஸமயே சித்தம் அஜ்ஜு²பேக்க²தி, பணீதாதி⁴முத்திகோ ச ஹோதி நிப்³பா³னாபி⁴ரதோ ச. இமேஹி கோ², பி⁴க்க²வே, ச²ஹி த⁴ம்மேஹி ஸமன்னாக³தோ பி⁴க்கு² ப⁴ப்³போ³ அனுத்தரம் ஸீதிபா⁴வம் ஸச்சி²காது’’ந்தி (அ. நி. 6.85) இத³ம் ஸுத்தம் ஸீதிபா⁴வோதி வேதி³தப்³ப³ம்.

போ³ஜ்ஜ²ங்க³கோஸல்லம் பன ‘‘ஏவமேவ கோ², பி⁴க்க²வே, யஸ்மிம் ஸமயே லீனம் சித்தம் ஹோதி, அகாலோ தஸ்மிம் ஸமயே பஸ்ஸத்³தி⁴ஸம்போ³ஜ்ஜ²ங்க³ஸ்ஸ பா⁴வனாயா’’தி (ஸம். நி. 5.234) ஸம்யுத்தமஹாவக்³கே³ போ³ஜ்ஜ²ங்க³ஸம்யுத்தே ஆக³தமேவ.

இதி இத³ம் ஸத்தவித⁴ம் உக்³க³ஹகோஸல்லம் ஸுக்³க³ஹிதம் கத்வா இமஞ்ச த³ஸவித⁴ம் மனஸிகாரகோஸல்லம் ஸுட்டு² வவத்த²பேத்வா தேன யோகி³னா உப⁴யகோஸல்லவஸேன கம்மட்டா²னம் ஸாது⁴கம் உக்³க³ஹேதப்³ப³ம். ஸசே பனஸ்ஸ ஆசரியேன ஸத்³தி⁴ம் ஏகவிஹாரேயேவ பா²ஸு ஹோதி, ஏவம் வித்தா²ரேன அகதா²பேத்வா கம்மட்டா²னமனுயுஞ்ஜந்தேன விஸேஸம் லபி⁴த்வா உபரூபரி கதா²பேதப்³ப³ம். அஞ்ஞத்த² வஸிதுகாமேன யதா²வுத்தேன விதி⁴னா வித்தா²ரதோ கதா²பேத்வா புனப்புனம் பரிவத்தேத்வா ஸப்³ப³ம் க³ண்டி²ட்டா²னம் சி²ந்தி³த்வா கம்மட்டா²னபா⁴வனாய அனனுரூபம் ஸேனாஸனம் பஹாய மஹாவாஸதாதி³அட்டா²ரஸதோ³ஸவஜ்ஜிதே அனுரூபே விஹாரே விஹரந்தேன கு²த்³த³கபலிபோ³து⁴பச்சே²த³ம் கத்வா யோ தாவ ராக³சரிதோ ஹோதி, தேன யஸ்மா ராகோ³ பஹாதப்³போ³, தஸ்மா படிக்கூலமனஸிகாரே பரிகம்மம் காதப்³ப³ம்.

கரோந்தேன பன கேஸேஸு தாவ நிமித்தம் க³ஹேதப்³ப³ம். கத²ம்? ஏகம் வா த்³வே வா கேஸே லுஞ்சித்வா ஹத்த²தலே ட²பேத்வா வண்ணோ தாவ வவத்த²பேதப்³போ³. சி²ன்னட்டா²னேபி கேஸே ஓலோகேதும் வட்டதி; உத³கபத்தே வா யாகு³பத்தே வா ஓலோகேதும்பி வட்டதியேவ. காளககாலே தி³ஸ்வா காளகாதி மனஸிகாதப்³பா³; ஸேதகாலே ஸேதாதி. மிஸ்ஸககாலே பன உஸ்ஸத³வஸேன மனஸிகாதப்³பா³ ஹோந்தி. யதா² ச கேஸேஸு, ஏவம் ஸகலேபி தசபஞ்சகே தி³ஸ்வாவ நிமித்தம் க³ஹேதப்³ப³ம். ஏவம் நிமித்தம் க³ஹேத்வா ஸப்³ப³கோட்டா²ஸேஸு வண்ணஸண்டா²னதி³ஸோகாஸபரிச்சே²த³வஸேன வவத்த²பேத்வா வண்ணஸண்டா²னக³ந்த⁴ஆஸயோகாஸவஸேன பஞ்சதா⁴ படிக்கூலதோ வவத்த²பேதப்³பா³.

தத்ராயம் ஸப்³ப³கோட்டா²ஸேஸு அனுபுப்³ப³கதா² – கேஸா தாவ பகதிவண்ணேன காளகா அத்³தா³ரிட்ட²கவண்ணா, ஸண்டா²னதோ தீ³க⁴வட்டலிகா துலாத³ண்ட³ஸண்டா²னா, தி³ஸதோ உபரிமதி³ஸாய ஜாதா, ஓகாஸதோ உபோ⁴ஸு பஸ்ஸேஸு கண்ணசூளிகாஹி, புரதோ நலாடந்தேன, பச்ச²தோ க³லவாடகேன பரிச்சி²ன்னா. ஸீஸகடாஹவேட²னம் அல்லசம்மம் கேஸானம் ஓகாஸோ. பரிச்சே²த³தோ கேஸா ஸீஸவேட²னசம்மே வீஹக்³க³மத்தம் பவிஸித்வா பதிட்டி²தேன ஹேட்டா² அத்தனோ மூலதலேன, உபரி ஆகாஸேன, திரியம் அஞ்ஞமஞ்ஞேன பரிச்சி²ன்னா. த்³வே கேஸா ஏகதோ நத்தீ²தி அயம் ஸபா⁴க³பரிச்சே²தோ³.

‘கேஸா ந லோமா, லோமா ந கேஸா’தி ஏவம் அவஸேஸேஹி ஏகதிம்ஸகோட்டா²ஸேஹி அமிஸ்ஸீகதா கேஸா நாம பாடியேக்கோ கோட்டா²ஸோதி அயம் விஸபா⁴க³பரிச்சே²தோ³. இத³ம் கேஸானம் வண்ணாதி³தோ வவத்தா²பனம்.

இத³ம் பன தேஸம் வண்ணாதி³வஸேன பஞ்சதா⁴ படிக்கூலதோ வவத்தா²பனம் – கேஸா ச நாமேதே வண்ணதோபி படிக்கூலா, ஸண்டா²னதோபி க³ந்த⁴தோபி ஆஸயதோபி ஓகாஸதோபி படிக்கூலா. மனுஞ்ஞேபி ஹி யாகு³பத்தே வா ப⁴த்தபத்தே வா கேஸவண்ணம் கிஞ்சி தி³ஸ்வா ‘கேஸமிஸ்ஸகமித³ம், ஹரத² ந’ந்தி ஜிகு³ச்ச²ந்தி. ஏவம் கேஸா வண்ணதோ படிக்கூலா. ரத்திம் பு⁴ஞ்ஜந்தாபி கேஸஸண்டா²னம் அக்கவாகம் வா மகசிவாகம் வா சு²பித்வாபி ததே²வ ஜிகு³ச்ச²ந்தி. ஏவம் ஸண்டா²னதோ படிக்கூலா.

தேலமக்க²னபுப்ப²தூ⁴மாதி³ஸங்கா²ரவிரஹிதானஞ்ச கேஸானம் க³ந்தோ⁴ பரமஜேகு³ச்சோ² ஹோதி, ததோ ஜேகு³ச்ச²தரோ அக்³கி³ம்ஹி பக்கி²த்தானம். கேஸா ஹி வண்ணஸண்டா²னதோ அப்படிக்கூலாபி ஸியும், க³ந்தே⁴ன பன படிக்கூலாயேவ. யதா² ஹி த³ஹரஸ்ஸ குமாரஸ்ஸ வச்சம் வண்ணதோ ஹளித்³தி³வண்ணம், ஸண்டா²னதோபி ஹலித்³தி³பிண்ட³ஸண்டா²னம்; ஸங்கா²ரட்டா²னே ச²ட்³டி³தஞ்ச உத்³து⁴மாதககாளஸுனக²ஸரீரம் வண்ணதோ தாலபக்கவண்ணம், ஸண்டா²னதோ வட்டேத்வா விஸ்ஸட்ட²முதி³ங்க³ஸண்டா²னம், தா³டா²பிஸ்ஸ ஸுமனமகுளஸதி³ஸாதி உப⁴யம்பி வண்ணஸண்டா²னதோ ஸியா அப்படிக்கூலம், க³ந்தே⁴ன பன படிக்கூலமேவ; ஏவம் கேஸாபி ஸியும் வண்ணஸண்டா²னதோ அப்படிக்கூலா, க³ந்தே⁴ன பன படிக்கூலா ஏவாதி.

யதா² பன அஸுசிட்டா²னே கா³மனிஸ்ஸந்தே³ன ஜாதானி ஸூபேய்யபண்ணானி நாக³ரிகமனுஸ்ஸானம் ஜேகு³ச்சா²னி ஹோந்தி அபரிபோ⁴கா³னி, ஏவம் கேஸாபி புப்³ப³லோஹிதமுத்தகரீஸபித்தஸேம்ஹாதி³னிஸ்ஸந்தே³ன ஜாதத்தா அதிஜேகு³ச்சா²தி இத³ம் நேஸம் ‘ஆஸயதோ’ பாடிகுல்யம். இமே ச கேஸா நாம கூ³த²ராஸிம்ஹி உட்டி²தகண்ணிகம் விய ஏகத்திம்ஸகோட்டா²ஸராஸிம்ஹி ஜாதா. தே ஸுஸானஸங்காரட்டா²னாதீ³ஸு ஜாதஸாகம் விய, பரிகா²தீ³ஸு ஜாதகமலகுவலயாதி³புப்ப²ம் விய ச அஸுசிட்டா²னே ஜாதத்தா பரமஜேகு³ச்சா²தி இத³ம் தேஸம் ‘ஓகாஸதோ’ பாடிக்கூல்யம்.

யதா² ச கேஸானம், ஏவம் ஸப்³ப³கோட்டா²ஸானம் வண்ணஸண்டா²னக³ந்தா⁴ஸயோகாஸவஸேன பஞ்சதா⁴ படிக்கூலதா வவத்த²பேதப்³பா³. வண்ணஸண்டா²னதி³ஸோகாஸபரிச்சே²த³வஸேன பன ஸப்³பே³பி விஸும் விஸும் வவத்த²பேதப்³பா³.

தத்த² லோமா தாவ பகதிவண்ணதோ ந கேஸா விய அஸம்பி⁴ன்னகாளகா, காளபிங்க³லா பன ஹோந்தி; ஸண்டா²னதோ ஓனதக்³க³தாலமூலஸண்டா²னா; தி³ஸதோ த்³வீஸு தி³ஸாஸு ஜாதா; ஓகாஸதோ ட²பேத்வா கேஸானம் பதிட்டி²தோகாஸஞ்ச ஹத்த²பாத³தலானி ச யேபு⁴ய்யேன அவஸேஸஸரீரவேட²னசம்மே ஜாதா; பரிச்சே²த³தோ ஸரீரவேட²னசம்மே லிக்கா²மத்தம் பவிஸித்வா பதிட்டி²தேன ஹேட்டா² அத்தனோ மூலதலேன, உபரி ஆகாஸேன, திரியம் அஞ்ஞமஞ்ஞேன பரிச்சி²ன்னா. த்³வே லோமா ஏகதோ நத்தி². அயம் தேஸம் ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோயேவ.

நகா²தி வீஸதியா நக²பட்டானம் நாமம். தே ஸப்³பே³பி வண்ணதோ ஸேதா; ஸண்டா²னதோ மச்ச²ஸகலிகஸண்டா²னா; தி³ஸதோ பாத³னகா² ஹேட்டி²மதி³ஸாய ஜாதா, ஹத்த²னகா² உபரிமதி³ஸாயாதி த்³வீஸு தி³ஸாஸு ஜாதா; ஓகாஸதோ அங்கு³லீனம் அக்³க³பிட்டே²ஸு பதிட்டி²தா; பரிச்சே²த³தோ த்³வீஸு தி³ஸாஸு அங்கு³லிகோடிமம்ஸேஹி, அந்தோ அங்கு³லிபிட்டி²மம்ஸேன, ப³ஹி சேவ அக்³கே³ ச ஆகாஸேன, திரியம் அஞ்ஞமஞ்ஞேன பரிச்சி²ன்னா. த்³வே நகா² ஏகதோ நத்தி². அயம் நேஸம் ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோயேவ.

த³ந்தாதி பரிபுண்ணத³ந்தஸ்ஸ த்³வத்திம்ஸ த³ந்தட்டி²கானி. தேபி வண்ணதோ ஸேதா; ஸண்டா²னதோ அனேகஸண்டா²னா. தேஸஞ்ஹி ஹேட்டி²மாய தாவ த³ந்தபாளியா மஜ்ஜே² சத்தாரோ த³ந்தா மத்திகாபிண்டே³ படிபாடியா ட²பிதஅலாபு³பீ³ஜஸண்டா²னா. தேஸம் உபோ⁴ஸு பஸ்ஸேஸு ஏகேகோ ஏகமூலகோ ஏககோடிகோ மல்லிகமகுளஸண்டா²னோ. ததோ ஏகேகோ த்³விமூலகோ த்³விகோடிகோ யானகஉபத்த²ம்ப⁴னிகஸண்டா²னோ. ததோ த்³வே த்³வே திமூலா திகோடிகா. ததோ த்³வே த்³வே சதுமூலா சதுகோடிகாதி. உபரிமபாளியாபி ஏஸேவ நயோ. தி³ஸதோ உபரிமதி³ஸாய ஜாதா. ஓகாஸதோ த்³வீஸு ஹனுகட்டி²கேஸு பதிட்டி²தா. பரிச்சே²த³தோ ஹேட்டா² ஹனுகட்டி²கே பதிட்டி²தேன அத்தனோ மூலதலேன, உபரி ஆகாஸேன, திரியம் அஞ்ஞமஞ்ஞேன பரிச்சி²ன்னா. த்³வே த³ந்தா ஏகதோ நத்தி². அயம் நேஸம் ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோயேவ.

தசோதி ஸகலஸரீரம் வேடே²த்வா டி²தசம்மம். தஸ்ஸ உபரி காளஸாமபீதாதி³வண்ணா ச²வி நாம, யா ஸகலஸரீரதோபி ஸங்கட்³டி⁴யமானா ப³த³ரட்டி²மத்தா ஹோதி. தசோ பன வண்ணதோ ஸேதோயேவ. ஸோ சஸ்ஸ ஸேதபா⁴வோ அக்³கி³ஜாலாபி⁴கா⁴தபஹரணபஹாராதீ³ஹி வித்³த⁴ம்ஸிதாய ச²வியா பாகடோ ஹோதி. ஸண்டா²னதோ ஸரீரஸண்டா²னோவ ஹோதி. அயமேத்த² ஸங்கே²போ.

வித்தா²ரதோ பன பாத³ங்கு³லித்தசோ கோஸகாரககோஸஸண்டா²னோ. பிட்டி²பாத³த்தசோ புடப³ந்த⁴உபாஹனஸண்டா²னோ. ஜங்க⁴த்தசோ ப⁴த்தபுடகதாலபண்ணஸண்டா²னோ. ஊருத்தசோ தண்டு³லப⁴ரிததீ³க⁴த்த²விகஸண்டா²னோ. ஆனிஸத³த்தசோ உத³கபூரிதபடபரிஸ்ஸாவனஸண்டா²னோ. பிட்டி²த்தசோ ப²லகோனத்³த⁴சம்மஸண்டா²னோ. குச்சி²த்தசோ வீணாதோ³ணிகோனத்³த⁴சம்மஸண்டா²னோ. உரத்தசோ யேபு⁴ய்யேன சதுரஸ்ஸஸண்டா²னோ. உப⁴யபா³ஹுத்தசோ தூணீரோனத்³த⁴சம்மஸண்டா²னோ. பிட்டி²ஹத்த²த்தசோ கு²ரகோஸகஸண்டா²னோ, ப²ணகத்த²விகஸண்டா²னோ வா. ஹத்த²ங்கு³லித்தசோ குஞ்சிகாகோஸகஸண்டா²னோ. கீ³வத்தசோ க³லகஞ்சுகஸண்டா²னோ. முக²த்தசோ சி²த்³தா³வச்சி²த்³தோ³ கீடகுலாவகஸண்டா²னோ. ஸீஸத்தசோ பத்தத்த²விகஸண்டா²னோதி.

தசபரிக்³க³ண்ஹகேன ச யோகா³வசரேன உத்தரோட்ட²தோ பட்டா²ய உபரி முக²ம் ஞாணம் பேஸேத்வா பட²மம் தாவ முக²ம் பரியோனந்தி⁴த்வா டி²தசம்மம் வவத்த²பேதப்³ப³ம். ததோ நலாடட்டி²சம்மம். ததோ த²விகாய பக்கி²த்தபத்தஸ்ஸ ச த²விகாய ச அந்தரேன ஹத்த²மிவ ஸீஸட்டி²கஸ்ஸ ச ஸீஸசம்மஸ்ஸ ச அந்தரேன ஞாணம் பேஸேத்வா அட்டி²கேன ஸத்³தி⁴ம் சம்மஸ்ஸ ஏகாப³த்³த⁴பா⁴வம் வியோஜேந்தேன ஸீஸசம்மம் வவத்த²பேதப்³ப³ம். ததோ க²ந்த⁴சம்மம். ததோ அனுலோமேன படிலோமேன ச த³க்கி²ணஹத்த²சம்மம். அத² தேனேவ நயேன வாமஹத்த²சம்மம். ததோ பிட்டி²சம்மம். தம் தம் வவத்த²பேத்வா அனுலோமேன ச படிலோமேன ச த³க்கி²ணபாத³சம்மம். அத² தேனேவ நயேன வாமபாத³சம்மம். ததோ அனுக்கமேனேவ வத்தி²உத³ரஹத³யகீ³வசம்மானி வவத்த²பேதப்³பா³னி. அத² கீ³வாசம்மானந்தரம் ஹேட்டி²மஹனுசம்மம் வவத்த²பேத்வா அத⁴ரோட்ட²பரியோஸானம் பாபேத்வா நிட்ட²பேதப்³ப³ம். ஏவம் ஓளாரிகோளாரிகம் பரிக்³க³ண்ஹந்தஸ்ஸ ஸுகு²மம்பி பாகடம் ஹோதி.

தி³ஸதோ த்³வீஸு தி³ஸாஸு ஜாதோ. ஓகாஸதோ ஸகலஸரீரம் பரியோனந்தி⁴த்வா டி²தோ. பரிச்சே²த³தோ ஹேட்டா² பதிட்டி²ததலேன, உபரி ஆகாஸேன பரிச்சி²ன்னோ. அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோயேவ.

மம்ஸந்தி நவ மம்ஸபேஸிஸதானி. தம் ஸப்³ப³ம்பி வண்ணதோ ரத்தம் கிம்ஸுகபுப்ப²ஸதி³ஸம்; ஸண்டா²னதோ ஜங்க⁴பிண்டி³கமம்ஸம் தாலபண்ணபுடப⁴த்தஸண்டா²னம், ஊருமம்ஸம் நிஸத³போதகஸண்டா²னம், ஆனிஸத³மம்ஸம் உத்³த⁴னகோடிஸண்டா²னம், பிட்டி²மம்ஸம் தாலகு³ளபடலஸண்டா²னம், பா²ஸுகத்³வயமம்ஸம் போத்த²லிகாய குச்சி²யம் தனுமத்திகாலேபனஸண்டா²னம், த²னமம்ஸம் வட்டேத்வா அவக்கி²த்தமத்திகாபிண்ட³ஸண்டா²னம், பா³ஹுத்³வயமம்ஸம் தி³கு³ணம் கத்வா ட²பிதனிச்சம்மமஹாமூஸிகஸண்டா²னம். ஏவம் ஓளாரிகோளாரிகம் மம்ஸம் பரிக்³க³ண்ஹந்தஸ்ஸ ஸுகு²மம்பி பாகடம் ஹோதி. தி³ஸதோ த்³வீஸு தி³ஸாஸு ஜாதம். ஓகாஸதோ ஸாதி⁴கானி தீணி அட்டி²ஸதானி அனுலிம்பேத்வா டி²தம். பரிச்சே²த³தோ ஹேட்டா² அட்டி²ஸங்கா⁴தே பதிட்டி²ததலேன, உபரி தசேன, திரியம் அஞ்ஞமஞ்ஞேன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

‘ந்ஹாரூ’தி நவ ந்ஹாருஸதானி. வண்ணதோ ஸப்³பே³பி ந்ஹாரூ ஸேதா; ஸண்டா²னதோ நானாஸண்டா²னா. ஏதேஸு ஹி கீ³வாய உபரிபா⁴க³தோ பட்டா²ய பஞ்ச மஹான்ஹாரூ ஸரீரம் வினத்³த⁴மானா ஹத³யஸ்ஸ புரிமபஸ்ஸேன ஓதிண்ணா, பஞ்ச பச்சி²மபஸ்ஸேன, பஞ்ச த³க்கி²ணபஸ்ஸேன, பஞ்ச வாமபஸ்ஸேன, த³க்கி²ணஹத்த²ம் வினத்³த⁴மானாபி ஹத்த²ஸ்ஸ புரிமபஸ்ஸேன பஞ்ச, பச்சி²மபஸ்ஸேன பஞ்ச, ததா² வாமஹத்த²ம் வினத்³த⁴மானாபி. த³க்கி²ணபாத³ம் வினத்³த⁴மானாபி பாத³ஸ்ஸ புரிமபஸ்ஸேன பஞ்ச, பச்சி²மபஸ்ஸேன பஞ்ச, ததா² வாமபாத³ம் வினத்³த⁴மானாபீதி. ஏவம் ஸரீரதா⁴ரகா நாம ஸட்டி² மஹான்ஹாரூ காயம் வினத்³த⁴மானா ஓதிண்ணா, யே கண்ட³ராதிபி வுச்சந்தி. தே ஸப்³பே³பி கந்த³லமகுளஸண்டா²னா.

அஞ்ஞே பன தம் தம் பதே³ஸம் அஜ்ஜோ²த்த²ரித்வா டி²தா ததோ ஸுகு²மதரா ஸுத்தரஜ்ஜுகஸண்டா²னா. அஞ்ஞே ததோ ஸுகு²மதரா பூதிலதாஸண்டா²னா. அஞ்ஞே ததோ ஸுகு²மதரா மஹாவீணாதந்திஸண்டா²னா. அஞ்ஞே தூ²லஸுத்தகஸண்டா²னா. ஹத்த²பாத³பிட்டி²யம் ந்ஹாரூ ஸகுணபாத³ஸண்டா²னா. ஸீஸன்ஹாரூ தா³ரகானம் ஸீஸஜாலகஸண்டா²னா. பிட்டி²ன்ஹாரூ ஆதபே பஸாரிதஅல்லஜாலஸண்டா²னா. அவஸேஸா தம்தம்அங்க³பச்சங்கா³னுக³தா ந்ஹாரூ ஸரீரே படிமுக்கஜாலகஞ்சுகஸண்டா²னா. தி³ஸதோ த்³வீஸு தி³ஸாஸு ஜாதா. ஓகாஸதோ ஸகலஸரீரே அட்டீ²னி ஆப³ந்தி⁴த்வா டி²தா. பரிச்சே²த³தோ ஹேட்டா² திண்ணம் அட்டி²ஸதானம் உபரி பதிட்டி²ததலேஹி, உபரி மம்ஸசம்மானி ஆஹச்ச டி²தபதே³ஸேஹி, திரியம் அஞ்ஞமஞ்ஞேன பரிச்சி²ன்னா. அயம் நேஸம் ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோயேவ.

அட்டீ²தி ட²பேத்வா த்³வத்திம்ஸ த³ந்தட்டீ²னி அவஸேஸானி சதுஸட்டி² ஹத்த²ட்டீ²னி, சதுஸட்டி² பாத³ட்டீ²னி, சதுஸட்டி² மம்ஸனிஸ்ஸிதானி முது³அட்டீ²னி, த்³வே பண்ஹிகட்டீ²னி, ஏகேகஸ்மிம் பாதே³ த்³வே கோ³ப்ப²கட்டீ²னி, த்³வே ஜங்க⁴ட்டீ²னி, த்³வே ஜண்ணுகட்டீ²னி, த்³வே ஊருட்டீ²னி, த்³வே கடிட்டீ²னி, அட்டா²ரஸ பிட்டி²கண்டகட்டீ²னி, சதுவீஸதி பா²ஸுகட்டீ²னி, சுத்³த³ஸ உரட்டீ²னி, ஏகம் ஹத³யட்டி², த்³வே அக்க²கட்டீ²னி, த்³வே கோட்ட²ட்டீ²னி, த்³வே பா³ஹட்டீ²னி, த்³வே த்³வே அக்³க³பா³ஹட்டீ²னி, ஸத்த கீ³வட்டீ²னி, த்³வே ஹனுகட்டீ²னி, ஏகம் நாஸிகட்டி², த்³வே அக்கி²ட்டீ²னி, த்³வே கண்ணட்டீ²னி, ஏகம் நலாடட்டி², ஏகம் முத்³த⁴ட்டி², நவ ஸீஸகபாலட்டீ²னீதி ஏவம் திமத்தானி அட்டி²ஸதானி.

தானி ஸப்³பா³னிபி வண்ணதோ ஸேதானி, ஸண்டா²னதோ நானாஸண்டா²னானி. தத்த² ஹி அக்³க³பாத³ங்கு³லிட்டீ²னி கதகபீ³ஜஸண்டா²னானி. தத³னந்தரானி மஜ்ஜ²பப்³ப³ட்டீ²னி பனஸட்டி²ஸண்டா²னானி. மூலபப்³ப³ட்டீ²னி பணவஸண்டா²னானி. பிட்டி²பாத³ட்டீ²னி கோட்டி²தகந்த³லகந்த³ராஸிஸண்டா²னானி. பண்ஹிகட்டி² ஏகட்டி²தாலப²லபீ³ஜஸண்டா²னம். கோ³ப்ப²கட்டீ²னி ப³ந்த⁴கீளாகோ³ளகஸண்டா²னானி. ஜங்க⁴ட்டீ²னம் கோ³ப்ப²கட்டீ²ஸு பதிட்டி²தட்டா²னம் அனபனீததசஸிந்தி³களீரஸண்டா²னம். கு²த்³த³கஜங்க⁴ட்டி²கம் த⁴னுகத³ண்ட³ஸண்டா²னம், மஹந்தம் மிலாதஸப்பபிட்டி²ஸண்டா²னம். ஜண்ணுகட்டி² ஏகதோ பரிக்கீ²ணபே²ணகஸண்டா²னம்.

தத்த² ஜங்க⁴ட்டி²கஸ்ஸ பதிட்டி²தட்டா²னம் அதிகி²ணக்³க³கோ³ஸிங்க³ஸண்டா²னம். ஊருட்டி² து³த்தச்சி²தவாஸிப²ரஸுத³ண்ட³கஸண்டா²னம். தஸ்ஸ கடிட்டி²ம்ஹி பதிட்டி²தட்டா²னம் கீளாகோ³ளகஸண்டா²னம். தேன கடிட்டி²னோ பதிட்டி²தட்டா²னம் அக்³க³ச்சி²ன்னமஹாபுன்னாக³ப²லஸண்டா²னம். கடிட்டீ²னி த்³வேபி ஏகாப³த்³தா⁴னி ஹுத்வா கும்ப⁴காரகஉத்³த⁴னஸண்டா²னானி, பாடியேக்கம் கம்மாரகூடயோத்தகஸண்டா²னானி. கோடியம் டி²தஆனிஸத³ட்டி² அதோ⁴முக²ம் கத்வா க³ஹிதஸப்பப²ணஸண்டா²னம் ஸத்தஸு டா²னேஸு சி²த்³தா³வசி²த்³த³ம். பிட்டி²கண்டகட்டீ²னி அப்³ப⁴ந்தரதோ உபரூபரி ட²பிதஸீஸகபட்டவேட²கஸண்டா²னானி, பா³ஹிரதோ வட்டனாவளிஸண்டா²னானி. தேஸம் அந்தரந்தரா ககசத³ந்தஸதி³ஸா த்³வே தயோ கண்டகா ஹோந்தி. சதுவீஸதியா பா²ஸுகட்டீ²ஸு அபரிபுண்ணானி அபரிபுண்ணாஸிதஸண்டா²னானி, பரிபுண்ணானி பரிபுண்ணாஸிதஸண்டா²னானி. ஸப்³பா³னிபி ஓதா³தகுக்குடஸ்ஸ பஸாரிதபக்க²ஸண்டா²னானி.

சுத்³த³ஸ உரட்டீ²னி ஜிண்ணஸந்த³மானிகபஞ்ஜரஸண்டா²னானி. ஹத³யட்டி² த³ப்³பி³ப²ணஸண்டா²னம். அக்க²கட்டீ²னி கு²த்³த³கலோஹவாஸித³ண்ட³ஸண்டா²னானி. கோட்ட²ட்டீ²னி ஏகதோ பரிக்கீ²ணஸீஹளகுதா³லஸண்டா²னானி. பா³ஹுட்டீ²னி ஆதா³ஸத³ண்ட³கஸண்டா²னானி. அக்³க³பா³ஹுட்டீ²னி யமகதாலகந்த³ஸண்டா²னானி. மணிப³ந்த⁴ட்டீ²னி ஏகதோ அல்லீயாபேத்வா ட²பிதஸீஸகபட்டவேட²கஸண்டா²னானி. பிட்டி²ஹத்த²ட்டீ²னி கோட்டிதகந்த³லகந்த³ராஸிஸண்டா²னானி. ஹத்த²ங்கு³லீஸு மூலபப்³ப³ட்டீ²னி பணவஸண்டா²னானி; மஜ்ஜ²பப்³ப³ட்டீ²னி அபரிபுண்ணபனஸட்டி²ஸண்டா²னானி; அக்³க³பப்³ப³ட்டீ²னி கதகபீ³ஜஸண்டா²னானி. ஸத்த கீ³வட்டீ²னி த³ண்டே³ன விஜ்ஜி²த்வா படிபாடியா ட²பிதவம்ஸகளீரசக்கலிகஸண்டா²னானி. ஹேட்டி²மஹனுகட்டி² கம்மாரானம் அயோகூடயோத்தகஸண்டா²னம், உபரிமம் அவலேக²னஸத்த²கஸண்டா²னம்.

அக்கி²கூபனாஸாகூபட்டீ²னி அபனீதமிஞ்ஜதருணதாலட்டி²ஸண்டா²னானி. நலாடட்டி² அதோ⁴முக²ட²பிதஸங்க²தா²லககபாலஸண்டா²னம். கண்ணசூளிகட்டீ²னி ந்ஹாபிதகு²ரகோஸகஸண்டா²னானி. நலாடகண்ணசூளிகானம் உபரி பட்டப³ந்த⁴னோகாஸே அட்டி² ஸங்குடிதக⁴டபுண்ணபடலக²ண்ட³ஸண்டா²னம். முத்³த⁴ட்டி² முக²ச்சி²ன்னவங்கனாளிகேரஸண்டா²னம். ஸீஸட்டீ²னி ஸிப்³பே³த்வா ட²பிதஜஜ்ஜரலாபு³கடாஹஸண்டா²னானி.

தி³ஸதோ த்³வீஸு தி³ஸாஸு ஜாதானி. ஓகாஸதோ அவிஸேஸேன ஸகலஸரீரே டி²தானி. விஸேஸேன பனேத்த² ஸீஸட்டீ²னி கீ³வட்டீ²ஸு பதிட்டி²தானி, கீ³வட்டீ²னி பிட்டி²கண்டகட்டீ²ஸு, பிட்டி²கண்டகட்டீ²னி கடிட்டீ²ஸு, கடிட்டீ²னி ஊருட்டீ²ஸு, ஊருட்டீ²னி ஜண்ணுகட்டீ²ஸு, ஜண்ணுகட்டீ²னி ஜங்க⁴ட்டீ²ஸு, ஜங்க⁴ட்டீ²னி கோ³ப்ப²கட்டீ²ஸு, கோ³ப்ப²கட்டீ²னி பிட்டி²பாத³ட்டீ²ஸு பதிட்டி²தானி. பரிச்சே²த³தோ அந்தோ அட்டி²மிஞ்ஜேன, உபரி மம்ஸேன, அக்³கே³ மூலே ச அஞ்ஞமஞ்ஞேன பரிச்சி²ன்னானி. அயம் நேஸம் ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

அட்டி²மிஞ்ஜந்தி தேஸம் தேஸம் அட்டீ²னம் அப்³ப⁴ந்தரக³தம் மிஞ்ஜம். தம் வண்ணதோ ஸேதம். ஸண்டா²னதோ மஹந்தமஹந்தானம் அட்டீ²னம் அப்³ப⁴ந்தரக³தம் வேளுனாளியம் பக்கி²த்தஸேதி³தமஹாவேத்தக்³க³ஸண்டா²னம், கு²த்³தா³னுகு²த்³த³கானம் அப்³ப⁴ந்தரக³தம் வேளுயட்டி²பப்³பே³ஸு பக்கி²த்தஸேதி³ததனுவேத்தக்³க³ஸண்டா²னம். தி³ஸதோ த்³வீஸு தி³ஸாஸு ஜாதம். ஓகாஸதோ அட்டீ²னம் அப்³ப⁴ந்தரே பதிட்டி²தம். பரிச்சே²த³தோ அட்டீ²னம் அப்³ப⁴ந்தரதலேஹி பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

வக்கந்தி ஏகப³ந்த⁴னா த்³வே மம்ஸபிண்டா³. தம் வண்ணதோ மந்த³ரத்தம் பாளிப⁴த்³த³கட்டி²வண்ணம். ஸண்டா²னதோ தா³ரகானம் யமககீளாகோ³ளகஸண்டா²னம், ஏகவண்டபடிப³த்³த⁴அம்ப³ப²லத்³வயஸண்டா²னம் வா. தி³ஸதோ உபரிமாய தி³ஸாய ஜாதம். ஓகாஸதோ க³லவாடகா நிக்க²ந்தேன ஏகமூலேன தோ²கம் க³ந்த்வா த்³விதா⁴ பி⁴ன்னேன தூ²லன்ஹாருனா வினிப³த்³த⁴ம் ஹுத்வா ஹத³யமம்ஸம் பரிக்கி²பித்வா டி²தம். பரிச்சே²த³தோ வக்கம் வக்கபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

ஹத³யந்தி ஹத³யமம்ஸம். தம் வண்ணதோ ரத்தம் பது³மபத்தபிட்டி²வண்ணம். ஸண்டா²னதோ பா³ஹிரபத்தானி அபனேத்வா அதோ⁴முக²ட²பிதபது³மமகுளஸண்டா²னம். ப³ஹி மட்ட²ம்; அந்தோ கோஸாதகீப²லஸ்ஸ அப்³ப⁴ந்தரஸதி³ஸம். பஞ்ஞவந்தானம் தோ²கம் விகஸிதம், மந்த³பஞ்ஞானம் மகுளிதமேவ. அந்தோ சஸ்ஸ புன்னாக³ட்டி²பதிட்டா²னமத்தோ ஆவாடகோ ஹோதி, யத்த² அட்³ட⁴பஸதமத்தம் லோஹிதம் ஸண்டா²தி; யம் நிஸ்ஸாய மனோதா⁴து மனோவிஞ்ஞாணதா⁴து ச வத்தந்தி. தம் பனேதம் ராக³சரிதஸ்ஸ ரத்தம் ஹோதி, தோ³ஸசரிதஸ்ஸ காளகம், மோஹசரிதஸ்ஸ மம்ஸதோ⁴வனுத³கஸதி³ஸம், விதக்கசரிதஸ்ஸ குலத்த²யூஸவண்ணம், ஸத்³தா⁴சரிதஸ்ஸ கணிகாரபுப்ப²வண்ணம், பஞ்ஞாசரிதஸ்ஸ அச்ச²ம் விப்பஸன்னம் அனாவிலம் பண்ட³ரம் பரிஸுத்³த⁴ம் நித்³தோ⁴தஜாதிமணி விய ஜுதிமந்தம் கா²யதி. தி³ஸதோ உபரிமாய தி³ஸாய ஜாதம். ஓகாஸதோ ஸரீரப்³ப⁴ந்தரே த்³வின்னம் த²னானம் மஜ்ஜே² பதிட்டி²தம். பரிச்சே²த³தோ ஹத³யம் ஹத³யபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

யகனந்தி யமகமம்ஸபடலம். தம் வண்ணதோ ரத்தபண்டு³கதா⁴துகம், நாதிரத்தகுமுத³ஸ்ஸ பத்தபிட்டி²வண்ணம். ஸண்டா²னதோ மூலே ஏகம், அக்³கே³ யமகம் கோவிளாரபத்தஸண்டா²னம். தஞ்ச த³ந்தா⁴னம் ஏகமேவ ஹோதி மஹந்தம், பஞ்ஞவந்தானம் த்³வே வா தீணி வா கு²த்³த³கானி. தி³ஸதோ உபரிமதி³ஸாய ஜாதம். ஓகாஸதோ த்³வின்னம் த²னானம் அப்³ப⁴ந்தரே த³க்கி²ணபஸ்ஸம் நிஸ்ஸாய டி²தம். பரிச்சே²த³தோ யகனம் யகனபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

கிலோமகந்தி படிச்ச²ன்னாபடிச்ச²ன்னபே⁴த³தோ து³வித⁴ம் பரியோனஹனமம்ஸம். தம் து³வித⁴ம்பி வண்ணதோ ஸேதம், து³கூலபிலோதிகவண்ணம். ஸண்டா²னதோ அத்தனோ ஓகாஸஸண்டா²னம். தி³ஸதோ படிச்ச²ன்னகிலோமகம் உபரிமாய தி³ஸாய ஜாதம். இதரம் த்³வீஸு தி³ஸாஸு ஜாதம். ஓகாஸதோ படிச்ச²ன்னகிலோமகம் ஹத³யஞ்ச வக்கஞ்ச படிச்சா²தே³த்வா டி²தம். அபடிச்ச²ன்னகிலோமகம் ஸகலஸரீரே சம்மஸ்ஸ ஹேட்ட²தோ மம்ஸம் பரியோனத்³தி⁴த்வா டி²தம். பரிச்சே²த³தோ ஹேட்டா² மம்ஸேன, உபரி சம்மேன, திரியம் கிலோமகபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

பிஹகந்தி உத³ரஜிவ்ஹாமம்ஸம். தம் வண்ணதோ நீலம் நிக்³கு³ண்டி³கபுப்ப²வண்ணம். ஸண்டா²னதோ ஸத்தங்கு³லப்பமாணம் அப³ந்த⁴னம் காளவச்ச²கஜிவ்ஹாஸண்டா²னம். தி³ஸதோ உபரிமாய தி³ஸாய ஜாதம். ஓகாஸதோ ஹத³யஸ்ஸ வாமபஸ்ஸே உத³ரபடலஸ்ஸ மத்த²கபஸ்ஸம் நிஸ்ஸாய டி²தம், யஸ்மிம் பஹரணப்பஹாரேன ப³ஹி நிக்க²ந்தே ஸத்தானம் ஜீவிதக்க²யோ ஹோதி. பரிச்சே²த³தோ பிஹகபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

பப்பா²ஸந்தி த்³வத்திம்ஸமம்ஸக²ண்ட³ப்பபே⁴த³ம் பப்பா²ஸமம்ஸம். தம் வண்ணதோ ரத்தம் நாதிபக்கஉது³ம்ப³ரப²லவண்ணம். ஸண்டா²னதோ விஸமச்சி²ன்னப³ஹலபூவக²ண்ட³ஸண்டா²னம். அப்³ப⁴ந்தரே அஸிதபீதானம் அபா⁴வே உக்³க³தேன கம்மஜதேஜுஸ்மனா அப்³பா⁴ஹதத்தா ஸங்கா²தி³தபலாலபிண்ட³மிவ நிரஸம் நிரோஜம். தி³ஸதோ உபரிமாய தி³ஸாய ஜாதம். ஓகாஸதோ ஸரீரப்³ப⁴ந்தரே த்³வின்னம் த²னானமந்தரே ஹத³யஞ்ச யகனஞ்ச படிச்சா²தே³த்வா ஓலம்ப³ந்தம் டி²தம். பரிச்சே²த³தோ ப²ப்பா²ஸபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

அந்தந்தி புரிஸஸ்ஸ த்³வத்திம்ஸ ஹத்தா², இத்தி²யா அட்ட²வீஸதிஹத்தா² ஏகவீஸதியா டா²னேஸு ஓப⁴க்³கா³ அந்தவட்டி. ததே³தம் வண்ணதோ ஸேதம் ஸக்க²ரஸுதா⁴வண்ணம். ஸண்டா²னதோ லோஹிததோ³ணியம் ஆபு⁴ஜித்வா ட²பிதஸீஸச்சி²ன்னஸப்பஸண்டா²னம். தி³ஸதோ த்³வீஸு தி³ஸாஸு ஜாதம். ஓகாஸதோ உபரி க³லவாடகே ஹேட்டா² ச கரீஸமக்³கே³ வினிப³ந்த⁴த்தா க³லவாடககரீஸமக்³க³பரியந்தே ஸரீரப்³ப⁴ந்தரே டி²தம். பரிச்சே²த³தோ அந்தபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

அந்தகு³ணந்தி அந்தபோ⁴க³ட்டா²னேஸு ப³ந்த⁴னம். தம் வண்ணதோ ஸேதம் த³கஸீதலிகமூலவண்ணம். ஸண்டா²னதோ த³கஸீதலிகமூலஸண்டா²னமேவ. தி³ஸதோ த்³வீஸு தி³ஸாஸு ஜாதம். ஓகாஸதோ குதா³ளப²ரஸுகம்மாதீ³னி கரோந்தானம் யந்தாகட்³ட⁴னகாலே யந்தஸுத்தமிவ, யந்தப²லகானி அந்தபோ⁴கே³ ஏகதோ அக³ளந்தே ஆப³ந்தி⁴த்வா பாத³புஞ்ச²னரஜ்ஜுமண்ட³லகஸ்ஸ அந்தரா தம் ஸிப்³பே³த்வா டி²தரஜ்ஜுகா விய ஏகவீஸதியா டா²னேஸு அந்தபோ⁴கா³னம் அந்தரா டி²தம். பரிச்சே²த³தோ அந்தகு³ணபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

உத³ரியந்தி உத³ரே ப⁴வம் அஸிதபிதகா²யிதஸாயிதம். தம் வண்ணதோ அஜ்ஜோ²ஹடாஹாரவண்ணம். ஸண்டா²னதோ பரிஸ்ஸாவனே ஸிதி²லப³ந்த⁴தண்டு³லஸண்டா²னம். தி³ஸதோ உபரிமாய தி³ஸாய ஜாதம். ஓகாஸதோ உத³ரே டி²தம். உத³ரம் நாம உப⁴தோ நிப்பீளியமானஸ்ஸ அல்லஸாடகஸ்ஸ மஜ்ஜே² ஸஞ்ஜாதபோ²டகஸதி³ஸம் அந்தபடலம்; ப³ஹி மட்ட²ம், அந்தோ மம்ஸகஸம்பு³கபலிவேட²னகிலிட்ட²பாவாரகபுப்ப²கஸதி³ஸம், குதி²தபனஸதசஸ்ஸ அப்³ப⁴ந்தரஸதி³ஸந்திபி வத்தும் வட்டதி; யத்த² தக்கோடகா, க³ண்டு³ப்பாத³கா, தாலஹீரகா, ஸூசிமுக²கா, படதந்தஸுத்தகா இச்சேவமாதி³த்³வத்திம்ஸகுலப்பபே⁴தா³ கிமயோ ஆகுலப்³யாகுலா ஸண்ட³ஸண்ட³சாரினோ ஹுத்வா நிவஸந்தி; யே பானபோ⁴ஜனாதி³ம்ஹி அவிஜ்ஜமானே உல்லங்கி⁴த்வா விரவந்தா ஹத³யமம்ஸம் அபி⁴ஹனந்தி, பானபோ⁴ஜனாதி³அஜ்ஜோ²ஹரணவேலாய ச உத்³த⁴ம்முகா² ஹுத்வா பட²மஜ்ஜோ²ஹடே த்³வே தயோ ஆலோபே துரிததுரிதா விலும்பந்தி; யம் தேஸம் கிமீனம் ஸூதிக⁴ரம், வச்சகுடி, கி³லானஸாலா, ஸுஸானஞ்ச ஹோதி.

யத்த² ஸேய்யதா²பி நாம சண்டா³லகா³மத்³வாரே சந்த³னிகாய நிதா³க⁴ஸமயே தூ²லபு²ஸிதகே தே³வே வஸ்ஸந்தே உத³கேன வுய்ஹமானம் முத்தகரீஸசம்மஅட்டி²ன்ஹாருக²ண்ட³கே²ளஸிங்கா⁴ணிகலோஹிதப்பபு⁴தி நானாகுணபஜாதம் நிபதித்வா கத்³த³மோத³காலுளிதம் த்³வீஹதீஹச்சயேன ஸஞ்ஜாதகிமிகுலம் ஸூரியாதபவேக³ஸந்தாபகுதி²தம் உபரி பே²ணபுப்³பு³லகே முஞ்சந்தம் அபி⁴னீலவண்ணம் பரமது³க்³க³ந்த⁴ஜேகு³ச்ச²ம் நேவ உபக³ந்தும் ந த³ட்டு²ம் அரஹரூபதம் ஆபஜ்ஜித்வா திட்ட²தி, பகே³வ கா⁴யிதும் வா ஸாயிதும் வா; ஏவமேவ நானப்பகாரபானபோ⁴ஜனாதி³த³ந்தமுஸலஸஞ்சுண்ணிதம் ஜிவ்ஹாஹத்த²பரிவத்திதகே²ளலாலாபலிபு³த்³த⁴ம் தங்க²ணவிக³தவண்ணக³ந்த⁴ரஸாதி³ஸம்பத³ம் தந்தவாயக²லிஸுவானவமது²ஸதி³ஸம் நிபதித்வா பித்தஸேம்ஹவாதபலிவேடி²தம் ஹுத்வா உத³ரக்³கி³ஸந்தாபவேக³குதி²தம் கிமிகுலாகுலம் உபரூபரி பே²ணபுப்³பு³லகானி முஞ்சந்தம் பரமகஸம்பு³து³க்³க³ந்த⁴ஜேகு³ச்ச²பா⁴வம் ஆபஜ்ஜித்வா திட்ட²தி; யம் ஸுத்வாபி பானபோ⁴ஜனாதீ³ஸு அமனுஞ்ஞதா ஸண்டா²தி, பகே³வ பஞ்ஞாசக்கு²னா அவலோகேத்வா, யத்த² ச பதிதம் பானபோ⁴ஜனாதி³ பஞ்சதா⁴ விபா⁴க³ம் க³ச்ச²தி – ஏகம் பா⁴க³ம் பாணகா கா²த³ந்தி, ஏகம் பா⁴க³ம் உத³ரக்³கி³ ஜா²பேதி, ஏகோ பா⁴கோ³ முத்தம் ஹோதி, ஏகோ கரீஸம், ஏகோ ரஸபா⁴வம் ஆபஜ்ஜித்வா ஸோணிதமம்ஸாதீ³னி உபப்³ரூஹயதி. பரிச்சே²த³தோ உத³ரபடலேன சேவ உத³ரியபா⁴கே³ன ச பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

கரீஸந்தி வச்சம். தம் வண்ணதோ யேபு⁴ய்யேன அஜ்ஜோ²ஹடாஹாரவண்ணமேவ ஹோதி. ஸண்டா²னதோ ஓகாஸஸண்டா²னம். தி³ஸதோ ஹேட்டி²மாய தி³ஸாய ஜாதம். ஓகாஸதோ பக்காஸயே டி²தம். பக்காஸயோ நாம ஹேட்டா² நாபி⁴பிட்டி²கண்டகமூலானமந்தரே அந்தாவஸானே உப்³பே³தே⁴ன அட்ட²ங்கு³லமத்தோ வேளுனாளிகஸதி³ஸோ, யத்த² ஸேய்யதா²பி நாம உபரூபரி பூ⁴மிபா⁴கே³ பதிதம் வஸ்ஸோத³கம் ஓக³ளித்வா ஹேட்டா² பூ⁴மிபா⁴க³ம் பூரேத்வா திட்ட²தி; ஏவமேவ யம் கிஞ்சி ஆமாஸயே பதிதம் பானபோ⁴ஜனாதி³கம் உத³ரக்³கி³னா பே²ணுத்³தே³ஹகம் பக்கம் பக்கம் நிஸதா³ய பிஸிதமிவ ஸண்ஹபா⁴வம் ஆபஜ்ஜித்வா அந்தபி³லேன ஓக³ளித்வா ஓக³ளித்வா மத்³தி³த்வா வேளுபப்³பே³ பக்கி²பமானபண்டு³மத்திகா விய ஸன்னிசிதம் ஹுத்வா திட்ட²தி. பரிச்சே²த³தோ பக்காஸயபடலேன சேவ கரீஸபா⁴கே³ன ச பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

மத்த²லுங்க³ந்தி ஸீஸகடாஹப்³ப⁴ந்தரே டி²தமிஞ்ஜராஸி. தம் வண்ணதோ ஸேதம் அஹிச்ச²த்தகபிண்டி³கவண்ணம், த³தி⁴பா⁴வம் அஸம்பத்தது³ட்ட²கீ²ரவண்ணந்திபி வத்தும் வட்டதி. ஸண்டா²னதோ ஓகாஸஸண்டா²னம். தி³ஸதோ உபரிமாய தி³ஸாய ஜாதம். ஓகாஸதோ ஸீஸகடாஹப்³ப⁴ந்தரே சத்தாரோ ஸிப்³பி³னிமக்³கே³ நிஸ்ஸாய ஸமோதா⁴னேத்வா ட²பிதா சத்தாரோ பிட்ட²பிண்டா³ விய ஸமோஹிதம் திட்ட²தி. பரிச்சே²த³தோ ஸீஸகடாஹஸ்ஸ அப்³ப⁴ந்தரதலேஹி சேவ மத்த²லுங்க³பா⁴கே³ன ச பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

பித்தந்தி த்³வே பித்தானி – ப³த்³த⁴பித்தஞ்ச அப³த்³த⁴பித்தஞ்ச. தத்த² ப³த்³த⁴பித்தம் வண்ணதோ ப³ஹலமது⁴கதேலவண்ணம், அப³த்³த⁴பித்தம் மிலாதஆகுலிதபுப்ப²வண்ணம். தம் ஸண்டா²னதோ உப⁴யம்பி ஓகாஸஸண்டா²னம். தி³ஸதோ ப³த்³த⁴பித்தம் உபரிமாய தி³ஸாய ஜாதம், இதரம் த்³வீஸு தி³ஸாஸு ஜாதம். ஓகாஸதோ அப³த்³த⁴பித்தம் ட²பேத்வா கேஸலோமத³ந்தனகா²னம் மம்ஸவினிமுத்தட்டா²னஞ்சேவ த²த்³த⁴ஸுக்க²சம்மஞ்ச உத³கமிவ தேலபி³ந்து³ம் அவஸேஸஸரீரம் ப்³யாபேத்வா டி²தம், யம்ஹி குபிதே அக்கீ²னி பீதகானி ஹோந்தி ப⁴மந்தி, க³த்தம் கம்பதி கண்டு³யதி. ப³த்³த⁴பித்தம் ஹத³யபப்பா²ஸானமந்தரே யகனமம்ஸம் நிஸ்ஸாய பதிட்டி²தே மஹாகோஸாதகீகோஸகஸதி³ஸே பித்தகோஸகே டி²தம், யம்ஹி குபிதே ஸத்தா உம்மத்தகா ஹோந்தி, விபல்லத்த²சித்தா ஹிரோத்தப்பம் ச²ட்³டே³த்வா அகத்தப்³ப³ம் கரோந்தி, அபா⁴ஸிதப்³ப³ம் பா⁴ஸந்தி, அசிந்தேதப்³ப³ம் சிந்தேந்தி. பரிச்சே²த³தோ பித்தபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

ஸேம்ஹந்தி ஸரீரப்³ப⁴ந்தரே ஏகபத்தபூரப்பமாணம் ஸேம்ஹம். தம் வண்ணதோ ஸேதம் நாக³ப³லபண்ணரஸவண்ணம். ஸண்டா²னதோ ஓகாஸஸண்டா²னம். தி³ஸதோ உபரிமாய தி³ஸாய ஜாதம். ஓகாஸதோ உத³ரபடலே டி²தம், யம் பானபோ⁴ஜனாதீ³னி அஜ்ஜோ²ஹரணகாலே ஸேய்யதா²பி நாம உத³கே ஸேவாலபணகம் கட்டே² வா கபாலே வா பதந்தே சி²ஜ்ஜித்வா த்³விதா⁴ ஹுத்வா புன அஜ்ஜோ²த்த²ரித்வா திட்ட²தி, ஏவமேவ பானபோ⁴ஜனாதி³ம்ஹி நிபதந்தே சி²ஜ்ஜித்வா த்³விதா⁴ ஹுத்வா புன அஜ்ஜோ²த்த²ரித்வா திட்ட²தி; யம்ஹி ச மந்தீ³பூ⁴தே பக்கக³ண்டோ³ விய பூதிகுக்குடண்ட³மிவ ச உத³ரம் பரமஜேகு³ச்ச²ம் குணபக³ந்த⁴ம் ஹோதி; ததோ உக்³க³தேன ச க³ந்தே⁴ன உத்³தே³கோபி முக²ம்பி து³க்³க³ந்த⁴ம் பூதிகுணபஸதி³ஸம் ஹோதி; ஸோ ச புரிஸோ ‘அபேஹி, து³க்³க³ந்த⁴ம் வாயஸீ’தி வத்தப்³ப³தம் ஆபஜ்ஜதி; யஞ்ச வட்³டி⁴த்வா ப³ஹலத்தமாபன்னம் பிதா⁴னப²லகமிவ வச்சகுடியா உத³ரபடலஸ்ஸ அப்³ப⁴ந்தரேயேவ குணபக³ந்த⁴ம் ஸன்னிருஜ்ஜி²த்வா திட்ட²தி. பரிச்சே²த³தோ ஸேம்ஹபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

புப்³போ³தி பூதிலோஹிதவஸேன பவத்தபுப்³போ³. ஸோ வண்ணதோ பண்டு³பலாஸவண்ணோ, மதகஸரீரே பன பூதிப³ஹலாசாமவண்ணோ ஹோதி. ஸண்டா²னதோ ஓகாஸஸண்டா²னோ. தி³ஸதோ த்³வீஸு தி³ஸாஸு ஜாதோ. ஓகாஸதோ பன புப்³ப³ஸ்ஸ ஓகாஸோ நாம நிப³த்³தோ⁴ நத்தி² யத்த² ஸோ ஸன்னிசிதோ திட்டே²ய்ய; யத்ர யத்ர பன கா²ணுகண்டகப்பஹரணக்³கி³ஜாலாதீ³ஹி அபி⁴ஹதே ஸரீரப்பதே³ஸே லோஹிதம் ஸண்ட²ஹித்வா பச்சதி, க³ண்ட³பிளகாத³யோ வா உப்பஜ்ஜந்தி, தத்ர தத்ரேவ திட்ட²தி. பரிச்சே²த³தோ புப்³ப³பா⁴கே³ன பரிச்சி²ன்னோ. அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

லோஹிதந்தி த்³வே லோஹிதானி – ஸன்னிசிதலோஹிதஞ்ச ஸம்ஸரணலோஹிதஞ்ச. தத்த² ஸன்னிசிதலோஹிதம் வண்ணதோ நிபக்கப³ஹலலாகா²ரஸவண்ணம், ஸம்ஸரணலோஹிதம் அச்ச²லாகா²ரஸவண்ணம். ஸண்டா²னதோ உப⁴யம்பி ஓகாஸஸண்டா²னம். தி³ஸதோ ஸன்னிசிதலோஹிதம் உபரிமாய தி³ஸாய ஜாதம், இதரம் த்³வீஸு தி³ஸாஸு ஜாதம். ஓகாஸதோ ஸம்ஸரணலோஹிதம், ட²பேத்வா கேஸலோமத³ந்தனகா²னம் மம்ஸவினிம்முத்தட்டா²னஞ்சேவ த²த்³த⁴ஸுக்க²சம்மஞ்ச, த⁴மனிஜாலானுஸாரேன ஸப்³ப³ம் உபாதி³ன்னகஸரீரம் ப²ரித்வா டி²தம்; ஸன்னிசிதலோஹிதம் யகனட்டா²னஸ்ஸ ஹேட்டா²பா⁴க³ம் பூரேத்வா ஏகபத்தபூரமத்தம் ஹத³யவக்கபப்பா²ஸானம் உபரி தோ²கம் தோ²கம் பக்³க⁴ரந்தம் வக்கஹத³யயகனபப்பா²ஸே தேமயமானம் டி²தம். தஸ்மிஞ்ஹி வக்கஹத³யாதீ³னி அதேமேந்தே ஸத்தா பிபாஸிதா ஹோந்தி. பரிச்சே²த³தோ லோஹிதபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

ஸேதோ³தி லோமகூபாதீ³ஹி பக்³க⁴ரணகஆபோதா⁴து. ஸோ வண்ணதோ விப்பஸன்னதிலதேலவண்ணோ. ஸண்டா²னதோ ஓகாஸஸண்டா²னோ. தி³ஸதோ த்³வீஸு தி³ஸாஸு ஜாதோ. ஓகாஸதோ ஸேத³ஸ்ஸோகாஸோ நாம நிப³த்³தோ⁴ நத்தி², யத்த² ஸோ லோஹிதம் விய ஸதா³ திட்டே²ய்ய; யதா³ பன அக்³கி³ஸந்தாபஸூரியஸந்தாபஉதுவிகாராதீ³ஹி ஸரீரம் ஸந்தப்பதி ததா³ உத³கதோ அப்³பு³ள்ஹமத்தவிஸமச்சி²ன்னபி⁴ஸமூளாலகுமுத³னாளகலாபோ விய ஸப்³ப³கேஸலோமகூபவிவரேஹி பக்³க⁴ரதி. தஸ்மா தஸ்ஸ ஸண்டா²னம்பி கேஸலோமகூபவிவரானம்யேவ வஸேன வேதி³தப்³ப³ம். ஸேத³பரிக்³க³ண்ஹகேன ச யோகி³னா கேஸலோமகூபவிவரே பூரேத்வா டி²தவஸேனேவ ஸேதோ³ மனஸிகாதப்³போ³. பரிச்சே²த³தோ ஸேத³பா⁴கே³ன பரிச்சி²ன்னோ. அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

மேதோ³தி தி²னஸினேஹோ. ஸோ வண்ணதோ பா²லிதஹலித்³தி³வண்ணோ. ஸண்டா²னதோ தூ²லஸரீரஸ்ஸ தாவ சம்மமம்ஸந்தரே ட²பிதஹலித்³தி³வண்ணது³கூலபிலோதிகஸண்டா²னோ ஹோதி, கிஸஸரீரஸ்ஸ ஜங்க⁴மம்ஸம் ஊருமம்ஸம் பிட்டி²கண்டகனிஸ்ஸிதம் பிட்ட²மம்ஸம் உத³ரவட்டிமம்ஸந்தி ஏதானி நிஸ்ஸாய தி³கு³ணம் திகு³ணம் கத்வா ட²பிதஹலித்³தி³வண்ணது³கூலபிலோதிகஸண்டா²னோ. தி³ஸதோ த்³வீஸு தி³ஸாஸு ஜாதோ. ஓகாஸதோ தூ²லஸ்ஸ ஸகலஸரீரம் ப²ரித்வா, கிஸஸ்ஸ ஜங்க⁴மம்ஸாதீ³னி நிஸ்ஸாய டி²தோ, யம் ஸினேஹஸங்க²ம் க³தம்பி பரமஜேகு³ச்ச²த்தா நேவ முத்³த⁴னி தேலத்தா²ய, ந நாஸாதேலாதீ³னம் அத்தா²ய க³ண்ஹந்தி. பரிச்சே²த³தோ ஹேட்டா² மம்ஸேன, உபரி சம்மேன, திரியம் மேத³பா⁴கே³ன பரிச்சி²ன்னோ. அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

அஸ்ஸூதி அக்கீ²ஹி பக்³த⁴ரணகஆபோதா⁴து. தம் வண்ணதோ விப்பஸன்னதிலதேலவண்ணம். ஸண்டா²னதோ ஓகாஸஸண்டா²னம். தி³ஸதோ உபரிமாய தி³ஸாய ஜாதம். ஓகாஸதோ அக்கி²கூபகேஸு டி²தம். ந சேதம் பித்தகோஸகே பித்தமிவ அக்கி²கூபகேஸு ஸதா³ ஸன்னிசிதம் திட்ட²தி; யதா³ பன ஸத்தா ஸோமனஸ்ஸஜாதா மஹாஹஸிதம் ஹஸந்தி, தோ³மனஸ்ஸஜாதா ரோத³ந்தி பரிதே³வந்தி ததா²ரூபம் விஸபா⁴கா³ஹாரம் ஆஹரந்தி, யதா³ ச நேஸம் அக்கீ²னி தூ⁴மரஜபம்ஸுகாதீ³ஹி அபி⁴ஹஞ்ஞந்தி, ததா³ ஏதேஹி ஸோமனஸ்ஸதோ³மனஸ்ஸவிஸபா⁴கா³ஹாரஉதூஹி ஸமுட்ட²ஹித்வா அக்கி²கூபகே பூரேத்வா திட்ட²தி வா பக்³க⁴ரதி வா. அஸ்ஸுபரிக்³க³ண்ஹகேன பன யோகி³னா அக்கி²கூபகே பூரேத்வா டி²தவஸேனேவ பரிக்³க³ண்ஹிதப்³ப³ம். பரிச்சே²த³தோ அஸ்ஸுபா⁴கே³ன பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

வஸாதி விலீனஸ்னேஹோ. ஸா வண்ணதோ நாளிகேரதேலவண்ணா, ஆசாமே ஆஸித்ததேலவண்ணாதிபி வத்தும் வட்டதி. ஸண்டா²னதோ ந்ஹானகாலே பஸன்னஉத³கஸ்ஸ உபரி பரிப்³ப⁴மந்தஸினேஹபி³ந்து³விஸடஸண்டா²னா. தி³ஸதோ த்³வீஸு தி³ஸாஸு ஜாதா. ஓகாஸதோ யேபு⁴ய்யேன ஹத்த²தலஹத்த²பிட்டி²பாத³தலபாத³பிட்டி²னாஸாபுடனலாடஅம்ஸகூடேஸு டி²தா. ந சேஸா ஏதேஸு ஓகாஸேஸு ஸதா³ விலீனாவ ஹுத்வா திட்ட²தி; யதா³ பன அக்³கி³ஸந்தாபஸூரியஸந்தாபஉதுவிஸபா⁴க³தா⁴துவிஸபா⁴கே³ஹி தே பதே³ஸா உஸ்மா ஜாதா ஹோந்தி, ததா³ தத்த² ந்ஹானகாலே பஸன்னஉத³கூபரி ஸினேஹபி³ந்து³விஸடோ விய இதோ சிதோ ச ஸம்ஸரதி. பரிச்சே²த³தோ வஸாபா⁴கே³ன பரிச்சி²ன்னா. அயமஸ்ஸா ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

கே²ளோதி அந்தோமுகே² பே²ணமிஸ்ஸா ஆபோதா⁴து. ஸோ வண்ணதோ ஸேதோ பே²ணவண்ணோ. ஸண்டா²னதோ ஓகாஸஸண்டா²னோ, பே²ணஸண்டா²னதோதிபி வத்தும் வட்டதி. தி³ஸதோ உபரிமாய தி³ஸாய ஜாதோ. ஓகாஸதோ உபோ⁴ஹி கபோலபஸ்ஸேஹி ஓருய்ஹ ஜிவ்ஹாய டி²தோ. ந சேஸ ஏத்த² ஸதா³ ஸன்னிசிதோ ஹுத்வா திட்ட²தி. யதா³ பன ஸத்தா ததா²ரூபம் ஆஹாரம் பஸ்ஸந்தி வா ஸரந்தி வா உண்ஹதித்தகடுகலோணம்பி³லானம் வா கிஞ்சி முகே² ட²பேந்தி, யதா³ வா நேஸம் ஹத³யம் ஆகிலாயதி, கிஸ்மிஞ்சிதே³வ வா ஜிகு³ச்சா² உப்பஜ்ஜதி, ததா³ கே²ளோ உப்பஜ்ஜித்வா உபோ⁴ஹி கபோலபஸ்ஸேஹி ஓருய்ஹ ஜிவ்ஹாய ஸண்டா²தி. அக்³க³ஜிவ்ஹாய சேஸ தனுகோ ஹோதி, மூலஜிவ்ஹாய ப³ஹலோ; முகே² பக்கி²த்தஞ்ச புது²கம் வா தண்டு³லம் வா அஞ்ஞம் வா கிஞ்சி கா²த³னீயம், நதீ³புளினே க²தகூபகஸலிலம் விய, பரிக்க²யம் அக³ச்ச²ந்தோவ தேமேதும் ஸமத்தோ² ஹோதி. பரிச்சே²த³தோ கே²ளபா⁴கே³ன பரிச்சி²ன்னோ. அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

ஸிங்கா⁴ணிகாதி மத்த²லுங்க³தோ பக்³க⁴ரணகஅஸுசி. ஸா வண்ணதோ தருணதாலட்டி²மிஞ்ஜவண்ணா. ஸண்டா²னதோ ஓகாஸஸண்டா²னா. தி³ஸதோ உபரிமாய தி³ஸாய ஜாதா. ஓகாஸதோ நாஸாபுடே பூரேத்வா டி²தா. ந சேஸா ஏத்த² ஸதா³ ஸன்னிசிதா ஹுத்வா திட்ட²தி; அத² கோ² யதா² நாம புரிஸோ பது³மினீபத்தேன த³தி⁴ம் ப³ந்தி⁴த்வா ஹேட்டா² கண்டகேன விஜ்ஜே²ய்ய, அத² தேன சி²த்³தே³ன த³தி⁴மத்து² க³ளித்வா ப³ஹி பதேய்ய, ஏவமேவ யதா³ ஸத்தா ரோத³ந்தி வா விஸபா⁴கா³ஹாரஉதுவஸேன வா ஸஞ்ஜாததா⁴துக்கோ²பா⁴ ஹோந்தி, ததா³ அந்தோஸீஸதோ பூதிஸேம்ஹபா⁴வம் ஆபன்னம் மத்த²லுங்க³ம் க³ளித்வா தாலுமத்த²கவிவரேன ஓதரித்வா நாஸாபுடே பூரேத்வா திட்ட²தி வா பக்³க⁴ரதி வா. ஸிங்கா⁴ணிகா பரிக்³க³ண்ஹகேன பன யோகி³னா நாஸாபுடே பூரேத்வா டி²தவஸேனேவ பரிக்³க³ண்ஹிதப்³பா³. பரிச்சே²த³தோ ஸிங்கா⁴ணிகாபா⁴கே³ன பரிச்சி²ன்னா. அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

லஸிகாதி ஸரீரஸந்தீ⁴னம் அப்³ப⁴ந்தரே பிச்சி²லகுணபம். ஸா வண்ணதோ கணிகாரனிய்யாஸவண்ணா. ஸண்டா²னதோ ஓகாஸஸண்டா²னா. தி³ஸதோ த்³வீஸு தி³ஸாஸு ஜாதா. ஓகாஸதோ அட்டி²ஸந்தீ⁴னம் அப்³ப⁴ஞ்ஜனகிச்சம் ஸாத⁴யமானா அஸீதிஸதஸந்தீ⁴னம் அப்³ப⁴ந்தரே டி²தா. யஸ்ஸ சேஸா மந்தா³ ஹோதி, தஸ்ஸ உட்ட²ஹந்தஸ்ஸ நிஸீத³ந்தஸ்ஸ அபி⁴க்கமந்தஸ்ஸ படிக்கமந்தஸ்ஸ ஸம்மிஞ்ஜந்தஸ்ஸ பஸாரேந்தஸ்ஸ அட்டி²கானி கடகடாயந்தி, அச்ச²ராஸத்³த³ம் கரோந்தோ விய விசரதி, ஏகயோஜனத்³வியோஜனமத்தம்பி அத்³தா⁴னம் க³தஸ்ஸ வாயோதா⁴து குப்பதி, க³த்தானி து³க்க²ந்தி. யஸ்ஸ பன ப³ஹுகா ஹோதி தஸ்ஸ உட்டா²னனிஸஜ்ஜாதீ³ஸு ந அட்டீ²னி கடகடாயந்தி, தீ³க⁴ம்பி அத்³தா⁴னம் க³தஸ்ஸ ந வாயோதா⁴து குப்பதி, ந க³த்தானி து³க்க²ந்தி. பரிச்சே²த³தோ லஸிகாபா⁴கே³ன பரிச்சி²ன்னா. அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

முத்தந்தி வண்ணதோ மாஸகா²ரோத³கவண்ணம். ஸண்டா²னதோ அதோ⁴முக²ட²பிதஉத³ககும்ப⁴ந்தரக³தஉத³கஸண்டா²னம். தி³ஸதோ ஹேட்டி²மாய தி³ஸாய ஜாதம். ஓகாஸதோ வத்தி²ஸ்ஸ அப்³ப⁴ந்தரே டி²தம். வத்தி² நாம வத்தி²புடோ வுச்சதி, யத்த² ஸேய்யதா²பி நாம சந்த³னிகாய பக்கி²த்தே அமுகே² ரவணக⁴டே சந்த³னிகரஸோ பவிஸதி, ந சஸ்ஸ பவிஸனமக்³கோ³ பஞ்ஞாயதி; ஏவமேவ ஸரீரதோ முத்தம் பவிஸதி, ந சஸ்ஸ பவிஸனமக்³கோ³ பஞ்ஞாயதி, நிக்க²மனமக்³கோ³ பன பாகடோ ஹோதி; யம்ஹி ச முத்தஸ்ஸ ப⁴ரிதே ‘பஸ்ஸாவம் கரோமா’தி ஸத்தானம் ஆயூஹனம் ஹோதி. பரிச்சே²த³தோ வத்தி²அப்³ப⁴ந்தரேன சேவ முத்தபா⁴கே³ன ச பரிச்சி²ன்னம். அயமஸ்ஸ ஸபா⁴க³பரிச்சே²தோ³. விஸபா⁴க³பரிச்சே²தோ³ பன கேஸஸதி³ஸோவ.

ஏவஞ்ஹி கேஸாதி³கே கோட்டா²ஸே வண்ணஸண்டா²னதி³ஸோகாஸபரிச்சே²த³வஸேன வவத்த²பேத்வா அனுபுப்³ப³தோ நாதிஸீக⁴தோ நாதிஸணிகதோதிஆதி³னா நயேன வண்ணஸண்டா²னக³ந்தா⁴ஸயோகாஸவஸேன பஞ்சதா⁴ ‘படிக்கூலா படிக்கூலா’தி மனஸிகரோதோ பண்ணத்திஸமதிக்கமவஸேன, ஸேய்யதா²பி சக்கு²மதோ புரிஸஸ்ஸ த்³வத்திம்ஸவண்ணானம் குஸுமானம் ஏகஸுத்தக³ண்டி²தம் மாலம் ஓலோகேந்தஸ்ஸ ஸப்³ப³புப்பா²னி அபுப்³பா³பரியமிவ பாகடானி ஹோந்தி, ஏவமேவ ‘‘அத்தி² இமஸ்மிம் காயே கேஸா’’தி இமம் காயம் ஓலோகேந்தஸ்ஸ ஸப்³பே³ தே த⁴ம்மா அபுப்³பா³பரியமிவ பாகடா ஹோந்தி. தேன வுத்தம் மனஸிகாரகோஸல்லகதா²யம் ‘‘ஆதி³கம்மிகஸ்ஸ ஹி ‘கேஸா’தி மனஸிகரோதோ மனஸிகாரோ க³ந்த்வா ‘முத்த’ந்தி இமம் பரியோஸானகோட்டா²ஸமேவ ஆஹச்ச திட்ட²தீ’’தி.

ஸசே பன ப³ஹித்³தா⁴பி மனஸிகாரம் உபஸம்ஹரதி, அத²ஸ்ஸ ஏவம் ஸப்³ப³கோட்டா²ஸேஸு பாகடீபூ⁴தேஸு ஆஹிண்ட³ந்தா மனுஸ்ஸதிரச்சா²னாத³யோ ஸத்தாகாரம் விஜஹித்வா கோட்டா²ஸராஸிவஸேனேவ உபட்ட²ஹந்தி; தேஹி ச அஜ்ஜோ²ஹரியமானம் பானபோ⁴ஜனாதி³ கோட்டா²ஸராஸிம்ஹி பக்கி²பியமானமிவ உபட்டா²தி. அத²ஸ்ஸ அனுபுப்³ப³முஞ்சனாதி³வஸேன ‘படிகூலா படிகூலா’தி புனப்புனம் மனஸிகரோதோ அனுக்கமேன அப்பனா உப்பஜ்ஜதி.

தத்த² கேஸாதீ³னம் வண்ணஸண்டா²னதி³ஸோகாஸபரிச்சே²த³வஸேன உபட்டா²னம் உக்³க³ஹனிமித்தம், ஸப்³பா³காரதோ படிகூலவஸேன உபட்டா²னம் படிபா⁴க³னிமித்தம். தம் புனப்புனம் ஆவஜ்ஜேந்தஸ்ஸ மனஸிகரோந்தஸ்ஸ தக்காஹதம் விதக்காஹதம் கரோந்தஸ்ஸ சத்தாரோ க²ந்தா⁴ படிகூலாரம்மணா ஹோந்தி, பட²மஜ்ஜா²னவஸேன அப்பனா பவத்ததி. புப்³ப³பா⁴கே³ பரிகம்மஉபசாரசித்தானி ஸவிதக்கஸவிசாரானி ஸப்பீதிகானி ஸோமனஸ்ஸஸஹக³தானி படிகூலனிமித்தாரம்மணானி; அப்பனாபி ஸவிதக்கஸவிசாரா ஸப்பீதிகா ஸோமனஸ்ஸஸஹக³தாவ. பூ⁴மந்தரேன பன மஹக்³க³தா ரூபாவசரா ஹோந்தி. படிக்கூலேபி ச ஏதஸ்மிம் ஆரம்மணே ஆனிஸம்ஸத³ஸ்ஸாவிதாய ஸோமனஸ்ஸம் உப்பஜ்ஜதி, ஏகத்தாரம்மணப³லேனேவ வா தம் உப்பஜ்ஜதி. து³தியஜ்ஜா²னாதீ³னி பனேத்த² ந நிப்³ப³த்தந்தி. கஸ்மா? ஓளாரிகத்தா. இத³ஞ்ஹி ஆரம்மணம் ஓளாரிகம். விதக்கப³லேனேவேத்த² சித்தேகக்³க³தா ஜாயதி, ந விதக்கஸமதிக்கமேனாதி. அயம் தாவ ஸமத²வஸேன கம்மட்டா²னகதா².

அவிஸேஸதோ பன ஸாதா⁴ரணவஸேன ஏவம் வேதி³தப்³ப³ம் – இத³ஞ்ஹி கம்மட்டா²னம் பா⁴வேதுகாமேன கம்மட்டா²னம் உக்³க³ஹேத்வா ஸஜ்ஜா²யகாலே ஏவ கேஸாதீ³னம் வண்ணனிமித்தஸண்டா²னனிமித்ததி³ஸானிமித்தஓகாஸனிமித்தபரிச்சே²த³னிமித்தானி வாசாய போதே²த்வா போதே²த்வா ஏகேககோட்டா²ஸே ‘அயம் ஏதம்ஸரிக்க²கோ’தி திவிதே⁴ன ஸஜ்ஜா²யோ காதப்³போ³. கத²ம்? தசபஞ்சகே தாவ ஹேட்டா² வுத்தனயேனேவ அனுலோமதோ பஞ்சாஹம், படிலோமதோ பஞ்சாஹம், அனுலோமபடிலோமதோ பஞ்சாஹந்தி அத்³த⁴மாஸம் ஸஜ்ஜா²யோ காதப்³போ³. ததோ ஆசரியஸ்ஸ ஸந்திகம் க³ந்த்வா வக்கபஞ்சகம் உக்³க³ண்ஹித்வா ததே²வ அத்³த⁴மாஸம் ஸஜ்ஜா²யோ காதப்³போ³. ததோ தே த³ஸபி கோட்டா²ஸே ஏகதோ கத்வா அத்³த⁴மாஸம். புன பப்பா²ஸபஞ்சகாதீ³ஸுபி ஏகேகம் உக்³க³ண்ஹித்வா அத்³த⁴மாஸம். ததோ தே பஞ்சத³ஸபி கோட்டா²ஸே அத்³த⁴மாஸம். மத்த²லுங்க³பஞ்சகம் அத்³த⁴மாஸம். ததோ தேவீஸதி கோட்டா²ஸே அத்³த⁴மாஸம். மேத³ச²க்கம் அத்³த⁴மாஸம். ததோ தே ச²ப்³பீ³ஸதிபி கோட்டா²ஸே ஏகதோ கத்வா அத்³த⁴மாஸம். முத்தச²க்கம் அத்³த⁴மாஸம். ததோ ஸப்³பே³பி த்³வத்திம்ஸ கோட்டா²ஸே ஏகதோ கத்வா அத்³த⁴மாஸந்தி ஏவம் ச² மாஸே ஸஜ்ஜா²யோ காதப்³போ³.

தத்த² – உபனிஸ்ஸயஸம்பன்னஸ்ஸ ஸப்பஞ்ஞஸ்ஸ பி⁴க்கு²னோ கம்மட்டா²னம் உக்³க³ண்ஹந்தஸ்ஸேவ கோட்டா²ஸா உபட்ட²ஹந்தி, ஏகச்சஸ்ஸ ந உபட்ட²ஹந்தி. தேன ‘ந உபட்ட²ஹந்தீ’தி வீரியம் ந விஸ்ஸஜ்ஜேதப்³ப³ம். யத்தகா கோட்டா²ஸா உபட்ட²ஹந்தி தத்தகே க³ஹேத்வா ஸஜ்ஜா²யோ காதப்³போ³. ஏவம் கம்மட்டா²னம் கதே²ந்தேன பன நேவ பஞ்ஞவதோ ந மந்த³பஞ்ஞஸ்ஸ வஸேன கதே²தப்³ப³ம், மஜ்ஜி²மபஞ்ஞஸ்ஸ வஸேன கதே²தப்³ப³ம். மஜ்ஜி²மபஞ்ஞஸ்ஸ ஹி வஸேன ஆசரியா ச²ஹி மாஸேஹி பரிச்சி²ந்தி³த்வா தந்திம் ட²பயிம்ஸு. யஸ்ஸ பன ஏத்தாவதாபி கோட்டா²ஸா பாகடா ந ஹோந்தி, தேன ததோ பரம்பி ஸஜ்ஜா²யோ காதப்³போ³ ஏவ; நோ ச கோ² அபரிச்சி²ந்தி³த்வா, ச² ச² மாஸே பரிச்சி²ந்தி³த்வாவ காதப்³போ³.

ஸஜ்ஜா²யம் கரோந்தேன வண்ணோ ந பச்சவேக்கி²தப்³போ³, ந லக்க²ணம் மனஸிகாதப்³ப³ம், கோட்டா²ஸவஸேனேவ ஸஜ்ஜா²யோ காதப்³போ³. ஆசரியேனாபி ‘வண்ணவஸேன ஸஜ்ஜா²யம் கரோஹீ’தி நியமேத்வா ந கதே²தப்³ப³ம். நியமேத்வா கதி²தே கோ தோ³ஸோதி? ஸம்பத்தியம்பி விபத்திஸஞ்ஞாஆபஜ்ஜனம். ஸசே ஹி ஆசரியேன ‘வண்ணவஸேன ஸஜ்ஜா²யம் கரோஹீ’தி வுத்தே இமஸ்ஸ பி⁴க்கு²னோ ததா² கரோந்தஸ்ஸ கம்மட்டா²னம் வண்ணதோ ந உபட்டா²தி, படிகூலவஸேன வா தா⁴துவஸேன வா உபட்டா²தி, அதே²ஸ ‘ந இத³ம் கம்மட்டா²னம் விலக்க²ண’ந்தி ஸஞ்ஞீ ஹோதி, ஆசரியேன கதி²தமேவ கப்பேத்வா க³ண்ஹாதி. ‘படிகூலவஸேன ஸஜ்ஜா²யம் கரோஹீ’தி வுத்தேபி ஸசே தஸ்ஸ ததா² கரோந்தஸ்ஸ படிக்கூலதோ ந உபட்டா²தி, வண்ணவஸேன வா தா⁴துவஸேன வா உபட்டா²தி, அதே²ஸ ‘நயித³ம் கம்மட்டா²னம் விலக்க²ண’ந்தி ஸஞ்ஞீ ஹோதி, ஆசரியேன கதி²தமேவ கப்பேத்வா க³ண்ஹாதி. ‘தா⁴துவஸேன தம் ஸஜ்ஜா²யம் கரோஹீ’தி வுத்தேபி ஸசே தஸ்ஸ ததா² கரோந்தஸ்ஸ தா⁴துதோ ந உபட்டா²தி, வண்ணவஸேன வா படிகூலவஸேன வா உபட்டா²தி, அதே²ஸ ‘நயித³ம் கம்மட்டா²னம் விலக்க²ண’ந்தி ஸஞ்ஞீ ஹோதி, ஆசரியேன கதி²தமேவ கப்பேத்வா க³ண்ஹாதி. அயம் ஆசரியேன நியமேத்வா கதி²தே தோ³ஸோ.

கிந்தி பன வத்தப்³போ³ ஹோதீதி? ‘கோட்டா²ஸவஸேன ஸஜ்ஜா²யம் கரோஹீ’தி வத்தப்³போ³. கத²ம்? ‘கேஸகோட்டா²ஸோ லோமகோட்டா²ஸோதி ஸஜ்ஜா²யம் கரோஹீ’தி வத்தப்³போ³. ஸசே பனஸ்ஸ ஏவம் கோட்டா²ஸவஸேன ஸஜ்ஜா²யம் கரோந்தஸ்ஸ வண்ணதோ உபட்டா²தி, அதா²னேன ஓவாதா³சரியஸ்ஸ ஆசிக்கி²தப்³ப³ம் – ‘அஹம் த்³வத்திம்ஸாகாரம் கோட்டா²ஸவஸேன ஸஜ்ஜா²யம் கரோமி; மய்ஹம் பன வண்ணதோ உபட்டா²தீ’தி. ஆசரியேன ‘கம்மட்டா²னம் விய அகம்மட்டா²னம், விலக்க²ணம் ஏத’ந்தி ந விஸம்வாதே³தப்³ப³ம். ‘ஸாது⁴, ஸப்புரிஸ, புப்³பே³ தயா வண்ணகஸிணே பரிகம்மம் கதபுப்³ப³ம் ப⁴விஸ்ஸதி. ஏததே³வ கம்மட்டா²னம் துய்ஹம் ஸப்பாயம். வண்ணவஸேனேவ ஸஜ்ஜா²யம் கரோஹீ’தி வத்தப்³போ³. தேனபி வண்ணவஸேனேவ ஸஜ்ஜா²யோ காதப்³போ³.

ஸோ ஏவம் கரோந்தோ அஜ்ஜ²த்தம் நீலகம் பீதகம் லோஹிதகம் ஓதா³தகந்தி சத்தாரி வண்ணகஸிணானி லப⁴தி. கத²ம்? தஸ்ஸ ஹி கேஸலோமபித்தேஸு சேவ அக்கீ²னஞ்ச காளகட்டா²னே வண்ணம் ‘நீலம் நீல’ந்தி மனஸிகரோந்தஸ்ஸ சதுக்கபஞ்சகஜ்ஜா²னானி உப்பஜ்ஜந்தி; ஜா²னம் பாத³கம் கத்வா விபஸ்ஸனம் பட்ட²பேத்வா அரஹத்தம் பாபுணாதி. மேத³ஸ்மிம் பன அக்கீ²னஞ்ச பீதகட்டா²னே வண்ணம் ‘பீதகம் பீதக’ந்தி மனஸிகரோந்தஸ்ஸ சதுக்கபஞ்சகஜ்ஜா²னானி உப்பஜ்ஜந்தி; ஜா²னம் பாத³கம் கத்வா விபஸ்ஸனம் பட்ட²பேத்வா அரஹத்தம் பாபுணாதி. மம்ஸலோஹிதேஸு பன அக்கீ²னஞ்ச ரத்தட்டா²னே வண்ணம் ‘லோஹிதகம் லோஹிதக’ந்தி மனஸிகரோந்தஸ்ஸ சதுக்கபஞ்சகஜ்ஜா²னானி உப்பஜ்ஜந்தி; ஜா²னம் பாத³கம் கத்வா விபஸ்ஸனம் பட்ட²பேத்வா அரஹத்தம் பாபுணாதி. நக²த³ந்தசம்மஅட்டீ²ஸு பன அக்கீ²னஞ்ச பண்ட³ரட்டா²னே வண்ணம் ‘ஓதா³தம் ஓதா³த’ந்தி மனஸிகரோந்தஸ்ஸ சதுக்கபஞ்சகஜ்ஜா²னானி உப்பஜ்ஜந்தி, ஜா²னம் பாத³கம் கத்வா விபஸ்ஸனம் பட்ட²பேத்வா அரஹத்தம் பாபுணாதி. இத³ம் வண்ணவஸேன அபி⁴னிவிட்ட²ஸ்ஸ பி⁴க்கு²னோ யாவ அரஹத்தா நிக³மனம்.

அபரஸ்ஸ கோட்டா²ஸவஸேன ஸஜ்ஜா²யம் கரோந்தஸ்ஸ படிகூலதோ உபட்டா²தி. அதா²னேன ஓவாதா³சரியஸ்ஸ ஆசிக்கி²தப்³ப³ம். ஆசரியேன ‘கம்மட்டா²னம் விய அகம்மட்டா²னம், விலக்க²ணம் ஏத’ந்தி ந விஸம்வாதே³தப்³ப³ம். ‘ஸாது⁴, ஸப்புரிஸ, புப்³பே³ தயா படிகூலமனஸிகாரே யோகோ³ கதோ ப⁴விஸ்ஸதி. ஏததே³வ கம்மட்டா²னம் துய்ஹம் ஸப்பாயம். படிகூலவஸேனேவ ஸஜ்ஜா²யம் கரோஹீ’தி வத்தப்³போ³. தேனபி படிகூலவஸேன ஸஜ்ஜா²யோ காதப்³போ³. தஸ்ஸ கேஸா நாம ‘அஜஞ்ஞா து³க்³க³ந்தா⁴ ஜேகு³ச்சா² படிகூலா’தி ஏவம் படிகூலவஸேன ஸஜ்ஜா²யம் கரோந்தஸ்ஸ படிகூலாரம்மணே பட²மஜ்ஜா²னம் நிப்³ப³த்ததி. ஸோ ஜா²னம் பாத³கம் கத்வா விபஸ்ஸனம் பட்ட²பேத்வா அரஹத்தம் பாபுணாதி. இத³ம் படிகூலவஸேன அபி⁴னிவிட்ட²ஸ்ஸ பி⁴க்கு²னோ யாவ அரஹத்தா நிக³மனம்.

அபரஸ்ஸ கோட்டா²ஸவஸேன ஸஜ்ஜா²யம் கரோந்தஸ்ஸ தா⁴துதோ உபட்டா²தி. தா⁴துதோ உபட்ட²ஹந்தம் கீதி³ஸம் ஹுத்வா உபட்டா²தீதி? கேஸா தாவ வம்மிகமத்த²கே ஜாதகுந்த²திணகானி விய ஹுத்வா உபட்ட²ஹந்தி. லோமா புராணகா³மட்டா²னே ஜாதத³ப்³ப³திணகானி விய. நகா² த³ண்ட³கேஸு ட²பிதமது⁴கப²லட்டி²கோஸகா விய. த³ந்தா மத்திகாபிண்டே³ பவேஸேத்வா ட²பிதஅலாபு³பீ³ஜானி விய. தசோ வீணாபப்³ப³கே பரியோனத்³த⁴அல்லகோ³சம்மம் விய, மம்ஸம் பி⁴த்தியம் அனுலித்தமத்திகா விய. ந்ஹாரு த³ப்³ப³ஸம்பா⁴ரப³த்³த⁴வல்லீ விய. அட்டி² உஸ்ஸாபேத்வா ட²பிதபி⁴த்தித³ப்³ப³ஸம்பா⁴ரோ விய. அட்டி²மிஞ்ஜம் மஹாவேளும்ஹி பக்கி²த்தஸேதி³தவேத்தக்³க³ம் விய. வக்கம், ஹத³யம், யகனம், கிலோமகம், பிஹகம், பப்பா²ஸந்தி இமே ச² கோட்டா²ஸா ஸூனகாரக⁴ரம் விய ஹுத்வா உபட்ட²ஹந்தி. த்³வத்திம்ஸஹத்த²ம் அந்தம் லோஹிததோ³ணியம் ஸம்வேல்லித்வா ட²பிதக⁴ரஸப்போ விய. அந்தகு³ணம் பாத³புஞ்ச²னகே ஸிப்³பி³தரஜ்ஜுகா விய. உத³ரியம் பரிஸ்ஸாவனே ஸிதி²லப³ந்த⁴தண்டு³லம் விய. கரீஸம் வேணுபப்³பே³ பக்கி²த்தபண்டு³மத்திகா விய. மத்த²லுங்க³ம் ஓமத்³தி³த்வா ட²பிதா சத்தாரோ தண்டு³லபிட்ட²பிண்டா³ விய. த்³வாத³ஸவிதா⁴ ஆபோதா⁴து படிபாடியா ட²பிதேஸு த்³வாத³ஸஸு உத³கஸராவகேஸு பூரிதஉத³கம் விய ஹுத்வா உபட்டா²தி.

அதா²னேன ஓவாதா³சரியஸ்ஸ ஆசிக்கி²தப்³ப³ம். ஆசரியேன ‘கம்மட்டா²னம் விய அகம்மட்டா²னம், விலக்க²ணம் ஏத’ந்தி ந விஸம்வாதே³தப்³ப³ம். ‘ஸாது⁴, ஸப்புரிஸ, புப்³பே³ தயா தா⁴துமனஸிகாரே யோகோ³ கதோ ப⁴விஸ்ஸதி. ஏததே³வ கம்மட்டா²னம் துய்ஹம் ஸப்பாயம். தா⁴துவஸேனேவ ஸஜ்ஜா²யம் கரோஹீ’தி வத்தப்³போ³. தேனபி தா⁴துவஸேன ஸஜ்ஜா²யோ காதப்³போ³.

தத்ரித³ம் மனஸிகாரமுகே²னேவ ஸஜ்ஜா²யவிதா⁴னம் – இத⁴ பி⁴க்கு² ‘கேஸா ஸீஸம் பரியோனத்³தி⁴த்வா டி²தசம்மே ஜாதா. தே ந ஜானந்தி ‘மயம் ஸீஸம் பரியோனத்³தி⁴த்வா டி²தசம்மே ஜாதா’தி; ஸீஸம் பரியோனத்³தி⁴த்வா டி²தசம்மம்பி ந ஜானாதி ‘கேஸா மயி ஜாதா’தி; அசேதனா ஏதே அப்³யாகதா ஸுஞ்ஞா த²த்³தா⁴ பத்தி²ன்னா பத²வீதா⁴து ஏஸா’தி மனஸிகரோதி. ‘லோமா ஸரீரம் பரியோனஹனசம்மே ஜாதா. தே ந ஜானந்தி ‘மயம் ஸரீரம் பரியோனஹனசம்மே ஜாதா’தி. ஸரீரம் பரியோனஹனசம்மம்பி ந ஜானாதி ‘லோமா மயி ஜாதா’தி ஏதேபி அசேதனா. நகா² அங்கு³லீனம் அக்³கே³ஸு ஜாதா. தே ந ஜானந்தி ‘மயம் அங்கு³லீனம் அக்³கே³ஸு ஜாதா’தி. அங்கு³லீனம் அக்³கா³னிபி ந ஜானந்தி ‘நகா² அம்ஹேஸு ஜாதா’தி. ஏதேபி அசேதனா. த³ந்தா ஹனுகட்டி²கே ஜாதா. தே ந ஜானந்தி ‘மயம் ஹனுகட்டி²கே ஜாதா’தி. ஹனுகட்டி²கம்பி ந ஜானாதி ‘த³ந்தா மயி ஜாதா’தி. ஏதேபி அசேதனா. தசோ ந ஜானாதி ‘ஸரீரம் மயா பரியோனத்³த⁴’ந்தி. ஸரீரம்பி ந ஜானாதி ‘அஹம் தசேன பரியோனத்³த⁴’ந்தி. அயம்பி அசேதனோ. மம்ஸம் ந ஜானாதி ‘மயா ஸரீரம் அனுலித்த’ந்தி. ஸரீரம்பி ந ஜானாதி ‘அஹம் மம்ஸேன அனுலித்த’ந்தி. இத³ம்பி அசேதனம். ந்ஹாரு ந ஜானாதி ‘அஹம் அட்டி²புஞ்ஜம் ஆப³ந்தி⁴த்வா டி²த’ந்தி. அட்டி²புஞ்ஜோபி ந ஜானாதி ‘ந்ஹாருஜாலேனாஹம் ஆப³த்³தோ⁴’தி. இத³ம்பி அசேதனம்.

ஸீஸட்டி² ந ஜானாதி ‘அஹம் கீ³வட்டி²கே பதிட்டி²த’ந்தி. கீ³வட்டி²கம்பி ந ஜானாதி ‘மயி ஸீஸட்டி²கம் பதிட்டி²த’ந்தி. கீ³வட்டி² ந ஜானாதி ‘அஹம் பிட்டி²கண்டகே டி²த’ந்தி. பிட்டி²கண்டட்டி²கோபி கடிட்டி²கம் ஊருட்டி²கம் ஜங்க⁴ட்டி²கம் கோ³ப்ப²கட்டி²கம் ந ஜானாதி ‘அஹம் பண்ஹிகட்டி²கே பதிட்டி²த’ந்தி. பண்ஹிகட்டி²கம்பி ந ஜானாதி ‘அஹம் கோ³ப்ப²கட்டி²கம் உக்கி²பித்வா டி²தந்தி…பே… கீ³வட்டி²கம் ந ஜானாதி ‘அஹம் ஸீஸட்டி²கம் உக்கி²பித்வா டி²த’ந்தி.

படிபாடியா அட்டீ²னி டி²தானி கோடியா,

அனேகஸந்தி⁴யமிதோ ந கேஹிசி;

ப³த்³தோ⁴ நஹாரூஹி ஜராய சோதி³தோ,

அசேதனோ கட்ட²கலிங்க³ரூபமோ.

‘இத³ம்பி அசேதனம். அட்டி²மிஞ்ஜம்; வக்கம்…பே… மத்த²லுங்க³ம் அசேதனம் அப்³யாகதம் ஸுஞ்ஞம் த²த்³த⁴ம் பத்தி²ன்னம் பத²வீதா⁴தூ’தி மனஸிகரோதி. ‘பித்தம் ஸேம்ஹம்…பே… முத்தம் அசேதனம் அப்³யாகதம் ஸுஞ்ஞம் யூஸக³தம் ஆபோதா⁴தூ’தி மனஸிகரோதி.

இமே த்³வே மஹாபூ⁴தே பரிக்³க³ண்ஹந்தஸ்ஸ உத³ரே உஸ்ஸதா³ தேஜோதா⁴து பாகடா ஹோதி, நாஸாய உஸ்ஸதா³ வாயோதா⁴து பாகடா ஹோதி. இமே சத்தாரோ மஹாபூ⁴தே பரிக்³க³ண்ஹந்தஸ்ஸ உபாதா³ரூபம் பாகடம் ஹோதி. மஹாபூ⁴தம் நாம உபாதா³ரூபேன பரிச்சி²ன்னம், உபாதா³ரூபம் மஹாபூ⁴தேன. யதா² ஆதபோ நாம சா²யாய பரிச்சி²ன்னோ, சா²யா ஆதபேன; ஏவமேவ மஹாபூ⁴தம் உபாதா³ரூபேன பரிச்சி²ன்னம், உபாதா³ரூபம் மஹாபூ⁴தேன. அத²ஸ்ஸ ஏவம் ‘‘சத்தாரி மஹாபூ⁴தானி தேவீஸதி உபாதா³ரூபானி ரூபக்க²ந்தோ⁴’’தி ரூபக்க²ந்த⁴ம் பரிக்³க³ண்ஹந்தஸ்ஸ ஆயதனத்³வாரவஸேன அரூபினோ க²ந்தா⁴ பாகடா ஹோந்தி. இதி ரூபாரூபபரிக்³க³ஹோ பஞ்சக்க²ந்தா⁴ ஹோந்தி, பஞ்சக்க²ந்தா⁴ த்³வாத³ஸாயதனானி ஹோந்தி, த்³வாத³ஸாயதனானி அட்டா²ரஸ தா⁴துயோ ஹோந்தீதி க²ந்தா⁴யதனதா⁴துவஸேன யமகதாலகந்த⁴ம் பா²லேந்தோ விய த்³வே கோட்டா²ஸே கத்வா நாமரூபம் வவத்த²பேதி.

ஸோ ‘‘இத³ம் நாமரூபம் ந அஹேது ந அப்பச்சயா நிப்³ப³த்தம், ஸஹேது ஸப்பச்சயா நிப்³ப³த்தம். கோ பனஸ்ஸ ஹேது? கோ பன பச்சயோ’’தி உபபரிக்க²ந்தோ ‘‘அவிஜ்ஜாபச்சயா தண்ஹாபச்சயா கம்மபச்சயா ஆஹாரபச்சயா சா’’தி தஸ்ஸ பச்சயம் வவத்த²பேத்வா ‘‘அதீதேபி பச்சயா சேவ பச்சயஸமுப்பன்னத⁴ம்மா ச அனாக³தேபி ஏதரஹிபி பச்சயா சேவ பச்சயஸமுப்பன்னத⁴ம்மா ச, ததோ உத்³த⁴ம் ஸத்தோ வா புக்³க³லோ வா நத்தி², ஸுத்³த⁴ஸங்கா²ரபுஞ்ஜோ ஏவா’’தி – ஏவம் தீஸு அத்³தா⁴ஸு கங்க²ம் விதரதி. அயம் பன விபஸ்ஸனாஸங்கா²ரஸல்லக்க²ணா ஞாதபரிஞ்ஞா நாம.

ஏவம் ஸங்கா²ரே ஸல்லக்கே²த்வா டி²தஸ்ஸ பன பி⁴க்கு²ஸ்ஸ த³ஸப³லஸ்ஸ ஸாஸனே மூலம் ஓதிண்ணம் நாம ஹோதி, பதிட்டா² லத்³தா⁴ நாம, சூளஸோதாபன்னோ நாம ஹோதி நியதக³திகோ. ததா²ரூபம் பன உதுஸப்பாயம், புக்³க³லஸப்பாயம், போ⁴ஜனஸப்பாயம், த⁴ம்மஸவணஸப்பாயம் லபி⁴த்வா ஏகாஸனே ஏகபல்லங்கவரக³தோ தீணி லக்க²ணானி ஆரோபேத்வா விபஸ்ஸனாபடிபாடியா ஸங்கா²ரே ஸம்மஸந்தோ அரஹத்தம் க³ண்ஹாதீதி இத³ம் தா⁴துவஸேன அபி⁴னிவிட்ட²ஸ்ஸ பி⁴க்கு²னோ யாவ அரஹத்தா நிக³மனம்.

யஸ்ஸ பன நேவ வண்ணதோ உபட்டா²தி ந படிகூலதோ ந ஸுஞ்ஞதோ தேன ‘ந மே உபட்டா²தீ’தி ந கம்மட்டா²னம் விஸ்ஸஜ்ஜேத்வா நிஸீதி³தப்³ப³ம், கோட்டா²ஸமனஸிகாரேயேவ பன யோகோ³ காதப்³போ³. போராணகத்தே²ரா கிர ‘கோட்டா²ஸமனஸிகாரோவ பமாண’ந்தி ஆஹம்ஸு. இச்சஸ்ஸ புனப்புனம் கோட்டா²ஸவஸேன ஸஜ்ஜா²யம் கரோந்தஸ்ஸ கோட்டா²ஸா பகு³ணா ஹோந்தி. கதா³ பன பகு³ணா நாம ஹோந்தீதி? யதா³ ‘கேஸா’தி ஆவஜ்ஜிதமத்தே மனஸிகாரோ க³ந்த்வா ‘மத்த²லுங்க³’ந்தி அந்திமகோட்டா²ஸே பதிட்டா²தி, ‘மத்த²லுங்க³’ந்தி ஆவஜ்ஜிதமத்தே மனஸிகாரோ ஆக³ந்த்வா ‘கேஸா’தி ஆதி³கோட்டா²ஸே பதிட்டா²தி.

அத²ஸ்ஸ யதா² நாம சக்கு²மதோ புரிஸஸ்ஸ த்³வத்திம்ஸவண்ணானம் புப்பா²னம் ஏகஸுத்தக³ந்தி²தம் மாலம் ஓலோகேந்தஸ்ஸ படிபாடியா வா பன நிகா²தே த்³வத்திம்ஸவதிபாதே³ படிக்கமித்வா ஓலோகேந்தஸ்ஸ படிபாடியாவ த்³வத்திம்ஸவண்ணானி புப்பா²னி வதிபாதா³ வா பாகடா ஹோந்தி, ஏவமேவ த்³வத்திம்ஸ கோட்டா²ஸா உபட்ட²ஹந்தி, விசரந்தா திரச்சா²னக³தாபி மனுஸ்ஸாபி ஸத்தாதி ந உபட்ட²ஹந்தி, கோட்டா²ஸாதி உபட்ட²ஹந்தி, கா²த³னீயபோ⁴ஜனீயம் கோட்டா²ஸந்தரே பக்கி²ப்பமானம் விய ஹோதி.

கோட்டா²ஸானம் பகு³ணகாலதோ பட்டா²ய தீஸு முகே²ஸு ஏகேன முகே²ன விமுச்சிஸ்ஸதி. கம்மட்டா²னம் வண்ணதோ வா படிகூலதோ வா ஸுஞ்ஞதோ வா உபட்டா²தி. யதா² நாம பூவே பசிதுகாமா இத்தீ² மத்³தி³த்வா ட²பிதபிட்ட²தோ யம் யம் இச்ச²தி தம் தம் பசதி, யதா² வா பன ஸமே பூ⁴மிப்பதே³ஸே ட²பிதம் உத³கபூரம் கும்ப⁴ம் யதோ யதோ ஆவிஜ்ஜ²ந்தி ததோ ததோவ உத³கம் நிக்க²மதி; ஏவமேவ கோட்டா²ஸானம் பகு³ணகாலதோ பட்டா²ய தீஸு முகே²ஸு ஏகேன முகே²ன விமுச்சிஸ்ஸதி. ஆகங்க²மானஸ்ஸ வண்ணதோ, ஆகங்க²மானஸ்ஸ படிகூலதோ, ஆகங்க²மானஸ்ஸ ஸுஞ்ஞதோ கம்மட்டா²னம் உபட்ட²ஹிஸ்ஸதியேவ. அயம் ஏத்தகோ உக்³க³ஹஸந்தி⁴ நாம. இமஸ்மிம் உக்³க³ஹஸந்தி⁴ஸ்மிம் ட²த்வா அரஹத்தம் பத்தா பி⁴க்கு² க³ணனபத²ம் வீதிவத்தா.

யஸ்ஸ பன உக்³க³ஹஸந்தி⁴ஸ்மிம் கம்மட்டா²னம் ந உபட்டா²தி, தேன கம்மட்டா²னம் உக்³க³ஹேத்வா, ஸசே யத்த² ஆசரியோ வஸதி, ஸோ ஆவாஸோ ஸப்பாயோ ஹோதி, இச்சேதம் குஸலம்; நோ சே, ஸப்பாயட்டா²னே வஸிதப்³ப³ம். வஸந்தேன அட்டா²ரஸ விஹாரதோ³ஸே (விஸுத்³தி⁴. 1.52) வஜ்ஜேத்வா பஞ்சங்க³ஸமன்னாக³தே ஸேனாஸனே வஸிதப்³ப³ம், ஸயம்பி பஞ்சங்க³ஸமன்னாக³தேன ப⁴விதப்³ப³ம். ததோ பச்சா²ப⁴த்தம் பிண்ட³பாதபடிக்கந்தேன ரத்திட்டா²னம் வா தி³வாட்டா²னம் வா பவிஸித்வா கம்மட்டா²னம் மனஸிகாதப்³ப³ம்.

கத²ம்? ஆதி³தோ தாவ ஹேட்டா² வுத்தனயேனேவ அனுபுப்³ப³தோ மனஸிகாதப்³ப³ம், ந ஏகந்தரிகா. அனுபுப்³ப³தோ மனஸிகரோந்தோ ஹி த்³வத்திம்ஸபத³ம் நிஸ்ஸேணிம் பத³படிபாடியா அக்கமந்தோ பாஸாத³ம் ஆருய்ஹ பாஸாதா³னிஸம்ஸம் அனுப⁴வனகபுரிஸோ விய ‘கேஸா லோமா’தி படிபாடியா கம்மட்டா²னம் மனஸிகரோந்தோ கம்மட்டா²னதோ ச ந பரிஹாயதி, பாஸாதா³னிஸம்ஸஸதி³ஸே ச நவ லோகுத்தரத⁴ம்மே அனுப⁴வதி. அனுபுப்³ப³தோ மனஸிகரோந்தேனாபி ச நாதிஸீக⁴தோ நாதிஸணிகதோ மனஸிகாதப்³ப³ம். அதிஸீக⁴தோ மனஸிகரோந்தஸ்ஸ ஹி கிஞ்சாபி கம்மட்டா²னம் பகு³ணம் ஹோதி, அவிபூ⁴தம் பன ஹோதி. தத்த² ஓபம்மம் ஹேட்டா² வுத்தமேவ.

அதிஸணிகதோ மனஸிகரோந்தஸ்ஸ கம்மட்டா²னம் பரியோஸானம் ந க³ச்ச²தி, அந்தராவ ஓஸக்கிதப்³ப³ம் ஹோதி. யதா² ஹி புரிஸோ தியோஜனம் மக்³க³ம் ஸாயம் கச்ச²ம் ப³ந்தி⁴த்வா படிபன்னோ நிக்க²ந்தட்டா²னதோ பட்டா²ய ஸீதலச்சா²யம் தி³ஸ்வா விஸ்ஸமதி, ரமணீயம் வாலிகதலம் தி³ஸ்வா பிட்டி²ம் பஸாரேதி, வனபோக்க²ரணிம் தி³ஸ்வா பானீயம் பிவதி ந்ஹாயதி, பப்³ப³தம் தி³ஸ்வா ஆருய்ஹ பப்³ப³தராமணேய்யகம் பஸ்ஸதி, தம் அந்தராயேவ ஸீஹோ வா ப்³யக்³கோ⁴ வா தீ³பி வா ஹனதி, சோரா வா பன விலுப்பந்தி சேவ ஹனந்தி ச; ஏவமேவ அதிஸணிகம் மனஸிகரோந்தஸ்ஸ கம்மட்டா²னம் பரியோஸானம் ந க³ச்ச²தி, அந்தராவ ஓஸக்கிதப்³ப³ம் ஹோதி.

தஸ்மா நாதிஸீக⁴ம் நாதிஸணிகம் ஏகதி³வஸம் திம்ஸவாரே மனஸிகாதப்³ப³ம்; பாதோவ த³ஸ வாரே, மஜ்ஜ²ன்ஹிகே த³ஸவாரே, ஸாயன்ஹே த³ஸ வாரே ஸஜ்ஜா²யோ காதப்³போ³, நோ காதும் ந வட்டதி. யதா² ஹி பாதோவ உட்டா²ய முக²ம் நோ தோ⁴விதும் ந வட்டதி, கா²த³னீயம் போ⁴ஜனீயம் நோ கா²தி³தும் நோ பு⁴ஞ்ஜிதும் ந வட்டதி; ஏதம் பன வட்டேய்ய; இத³மேவ ஏகந்தேன நோ காதும் ந வட்டதி; கரோந்தோ மஹந்தம் அத்த²ம் க³ஹேத்வா திட்ட²தி. யதா² ஹி ஏகஸ்ஸ புரிஸஸ்ஸ தீணி கே²த்தானி; ஏகம் கே²த்தம் அட்ட²கும்ப⁴ம் தே³தி, ஏகம் ஸோளஸ, ஏகம் த்³வத்திம்ஸ; தேன தீணிபி கே²த்தானி படிஜக்³கி³தும் அஸக்கோந்தேன த்³வே ச²ட்³டே³த்வா ஏகம் த்³வத்திம்ஸகும்ப⁴தா³யகமேவ படிஜக்³கி³தப்³ப³ம்; தத்தே²வ கஸனவபனனித்³தா³னாதீ³னி காதப்³பா³னி; ததே³வஸ்ஸ இதரேஸு த்³வீஸு உட்டா²னகதா³யம் த³ஸ்ஸதி; ஏவமேவ ஸேஸம் முக²தோ⁴வனாதி³கம்மம் ச²ட்³டே³த்வாபி ஏத்தே²வ கம்மம் காதப்³ப³ம், நோ காதும் ந வட்டதி. கரோந்தோ மஹந்தம் அத்த²ம் க³ண்ஹித்வா திட்ட²தீதி ஏத்தாவதா மஜ்ஜி²மா படிபதா³ நாம கதி²தா.

ஏவம் படிபன்னேனாபி விக்கே²போ படிபா³ஹிதப்³போ³. கம்மட்டா²னஞ்ஹி விஸ்ஸஜ்ஜேத்வா சித்தே ப³ஹித்³தா⁴ விக்கே²பம் க³ச்ச²ந்தே கம்மட்டா²னதோ பரிஹாயதி, வட்டப⁴யம் ஸமதிக்கமிதும் ந ஸக்கோதி. யதா² ஹி ஏகோ புரிஸோ ஸஹஸ்ஸுத்³தா⁴ரம் ஸாதே⁴த்வா வட்³டி⁴ம் லபி⁴த்வா அத்³தா⁴னம் படிபன்னோ அந்தராமக்³கே³ கும்பீ⁴லமகரகா³ஹரக்க²ஸஸமுட்டி²தாய க³ம்பீ⁴ரகி³ரிகந்த³ராய உபரி அத்த²தம் ஏகபதி³கம் த³ண்ட³கஸேதும் ஆருய்ஹ க³ச்ச²ந்தோ அக்கமனபத³ம் விஸ்ஸஜ்ஜேத்வா இதோ சிதோ ச ஓலோகேந்தோ பரிபதித்வா கும்பீ⁴லாதி³ப⁴த்தம் ஹோதி, ஏவமேவ அயம்பி கம்மட்டா²னம் விஸ்ஸஜ்ஜேத்வா ஸசித்தே ப³ஹித்³தா⁴ விக்கே²பம் க³ச்ச²ந்தே கம்மட்டா²னதோ பரிஹாயதி, வட்டப⁴யம் ஸமதிக்கமிதும் ந ஸக்கோதி.

தத்ரித³ம் ஓபம்மஸம்ஸந்த³னம் – புரிஸஸ்ஸ ஸஹஸ்ஸுத்³தா⁴ரம் ஸாதே⁴த்வா வட்³டி⁴ம் லத்³த⁴காலோ விய ஹி இமஸ்ஸ பி⁴க்கு²னோ ஆசரியஸந்திகே கம்மட்டா²னஸ்ஸ உக்³க³ஹிதகாலோ; அந்தரா க³ம்பீ⁴ரகி³ரிகந்த³ரா விய ஸம்ஸாரோ; தஸ்ஸ கும்பீ⁴லாதீ³ஹி த³ட்ட²காலோ விய வட்டமூலகானி மஹாது³க்கா²னி; ஏகபதி³கத³ண்ட³கஸேது விய இமஸ்ஸ பி⁴க்கு²னோ ஸஜ்ஜா²யவீதி²; தஸ்ஸ புரிஸஸ்ஸ ஏகபதி³கம் த³ண்ட³கஸேதும் ஆருய்ஹ அக்கமனபத³ம் விஸ்ஸஜ்ஜேத்வா இதோ சிதோ ச ஓலோகேந்தஸ்ஸ பரிபதித்வா கும்பீ⁴லாதீ³னம் ப⁴த்தபா⁴வம் ஆபன்னகாலோ விய இமஸ்ஸ பி⁴க்கு²னோ கம்மட்டா²னம் விஸ்ஸஜ்ஜேத்வா ப³ஹித்³தா⁴ விக்கி²த்தசித்தஸ்ஸ கம்மட்டா²னதோ பரிஹாயித்வா வட்டப⁴யம் ஸமதிக்கமிதும் அஸமத்த²பா⁴வோ வேதி³தப்³போ³.

தஸ்மா கேஸா மனஸிகாதப்³பா³. கேஸே மனஸிகரித்வா சித்துப்பாத³ஸ்ஸ ப³ஹித்³தா⁴ விக்கே²பம் படிபா³ஹித்வா ஸுத்³த⁴சித்தேனேவ ‘லோமா நகா² த³ந்தா தசோ’தி மனஸிகாதப்³ப³ம். ஏவம் மனஸிகரோந்தோ கம்மட்டா²னதோ ந பரிஹாயதி, வட்டப⁴யம் ஸமதிக்கமதி. ஓபம்மம் பனேத்த² ததே³வ பரிவத்தேத்வா வேதி³தப்³ப³ம். ஸஹஸ்ஸுத்³தா⁴ரம் ஸாதே⁴த்வா வட்³டி⁴ம் லபி⁴த்வா சே²கஸ்ஸ புரிஸஸ்ஸ த³ண்ட³கஸேதும் ஆருய்ஹ நிவாஸனபாருபனம் ஸம்விதா⁴ய தா⁴துபத்த²த்³த⁴காயம் கத்வா ஸோத்தி²னா பரதீரக³மனம் விய சே²கஸ்ஸ பி⁴க்கு²னோ கேஸே மனஸிகரித்வா சித்துப்பாத³ஸ்ஸ ப³ஹித்³தா⁴ விக்கே²பம் படிபா³ஹித்வா ஸுத்³த⁴சித்தேனேவ ‘லோமா நகா² த³ந்தா தசோ’தி மனஸிகரோந்தஸ்ஸ கம்மட்டா²னதோ அபரிஹாயித்வா வட்டப⁴யம் ஸமதிக்கமனம் வேதி³தப்³ப³ம்.

ஏவம் ப³ஹித்³தா⁴ விக்கே²பம் படிபா³ஹந்தேனாபி ஹேட்டா² வுத்தனயேனேவ பண்ணத்திம் ஸமதிக்கமனதோ மனஸிகாதப்³ப³ம். ‘கேஸா லோமா’தி பண்ணத்திம் விஸ்ஸஜ்ஜேத்வா ‘படிகூலம் படிகூல’ந்தி ஸதி ட²பேதப்³பா³. பட²மம்யேவ பன படிகூலதோ ந உபட்டா²தி. யாவ ந உபட்டா²தி தாவ பண்ணத்தி ந விஸ்ஸஜ்ஜேதப்³பா³. யதா³ உபட்டா²தி ததா³ பண்ணத்திம் விஸ்ஸஜ்ஜேத்வா ‘படிகூல’ந்தி மனஸிகாதப்³ப³ம். கரோந்தேன ச ஹேட்டா² வுத்தனயேனேவ பஞ்சஹாகாரேஹி படிகூலதோ மனஸிகாதப்³பா³. தசபஞ்சகஸ்மிஞ்ஹி வண்ணஸண்டா²னக³ந்தா⁴ஸயோகாஸவஸேனேவ பஞ்சவித⁴ம்பி பாடிகூல்யம் லப்³ப⁴தி. ஸேஸேஸுபி யம் யம் லப்³ப⁴தி, தஸ்ஸ தஸ்ஸ வஸேன மனஸிகாரோ பவத்தேதப்³போ³.

தத்த² கேஸாத³யோ பஞ்ச கோட்டா²ஸா ஸுப⁴னிமித்தம் ராக³ட்டா²னியம் இட்டா²ரம்மணந்தி ஸங்க²ம் க³தா. யே கேசி ரஜ்ஜனகஸத்தா நாம, ஸப்³பே³ தே இமேஸு பஞ்சஸு கோட்டா²ஸேஸு ரஜ்ஜந்தி. அயம் பன பி⁴க்கு² மஹாஜனஸ்ஸ ரஜ்ஜனட்டா²னே ‘படிகூல’ந்தி அப்பனம் பாபேதி. தத்த² அப்பனாப்பத்திதோ பட்டா²ய பரதோ அகிலமந்தோவ அப்பனம் பாபுணாதி.

தத்ரித³ம் ஓபம்மம் – யதா² ஹி சே²கோ த⁴னுக்³க³ஹோ ராஜானம் ஆராதே⁴த்வா ஸதஸஹஸ்ஸுட்டா²னகம் கா³மவரம் லபி⁴த்வா ஸன்னத்³த⁴பஞ்சாவுதோ⁴ தத்த² க³ச்ச²ந்தோ அந்தராமக்³கே³ த்³வத்திம்ஸ சோரே தி³ஸ்வா தேஸு பஞ்சசோரஜேட்ட²கே கா⁴தேய்ய; தேஸம் கா⁴திதகாலதோ பட்டா²ய தேஸு த்³வே ஏகமக்³க³ம் படிபஜ்ஜமானா நாம ந ஹோந்தி; ஏவம்ஸம்பத³மித³ம் த³ட்ட²ப்³ப³ம். த⁴னுக்³க³ஹஸ்ஸ ராஜானம் ஆராதே⁴த்வா கா³மவரம் லத்³த⁴காலோ விய ஹி இமஸ்ஸ பி⁴க்கு²னோ ஆசரியஸந்திகே கம்மட்டா²னம் உக்³க³ஹேத்வா டி²தகாலோ; த்³வத்திம்ஸ சோரா விய த்³வத்திம்ஸ கோட்டா²ஸா; பஞ்ச சோரஜேட்ட²கா விய கேஸாத³யோ பஞ்ச; சோரஜேட்ட²கானம் கா⁴திதகாலோ விய இமஸ்ஸ பி⁴க்கு²னோ ஸப்³ப³ஸத்தானம் ரஜ்ஜனட்டா²னே தசபஞ்சகே ‘படிகூல’ந்தி அப்பனாய பாபிதகாலோ; ஸேஸசோரானம் பாணிப்பஹாரேனேவ பலாயிதகாலோ விய ஸேஸகோட்டா²ஸேஸு அகிலமந்தஸ்ஸேவ அப்பனாப்பத்தி வேதி³தப்³பா³.

ஏவம் பண்ணத்திம் ஸமதிக்கமந்தேன ச அனுபுப்³ப³முஞ்சனதோ மனஸிகாரோ பவத்தேதப்³போ³ – கேஸே மனஸிகரோந்தேன மனஸிகரோந்தேனேவ கேஸேஸு ஸாபேக்கே²ன ஹுத்வா லோமேஸு ஸதி பேஸேதப்³பா³. யாவ லோமா ந உபட்ட²ஹந்தி தாவ ‘கேஸா கேஸா’தி மனஸிகாதப்³பா³. யதா³ பன லோமா உபட்ட²ஹந்தி ததா³ கேஸே விஸ்ஸஜ்ஜேத்வா லோமேஸு ஸதி உபட்ட²பேதப்³பா³. ஏவம் நகா²தீ³ஸுபி மனஸிகாரோ பவத்தேதப்³போ³.