8. ஸம்மப்பதா⁴னவிப⁴ங்கோ³

1. ஸுத்தந்தபா⁴ஜனீயவண்ணனா

390. இதா³னி தத³னந்தரே ஸம்மப்பதா⁴னவிப⁴ங்கே³ சத்தாரோதி க³ணனபரிச்சே²தோ³. தேன ந ததோ ஹேட்டா² ந உத்³த⁴ந்தி ஸம்மப்பதா⁴னபரிச்சே²த³ம் தீ³பேதி. ஸம்மப்பதா⁴னாதி காரணப்பதா⁴னா உபாயப்பதா⁴னா யோனிஸோபதா⁴னா. இத⁴ பி⁴க்கூ²தி இமஸ்மிம் ஸாஸனே படிபன்னகோ பி⁴க்கு². அனுப்பன்னானந்தி அனிப்³ப³த்தானம். பாபகானந்தி லாமகானம். அகுஸலானம் த⁴ம்மானந்தி அகோஸல்லஸம்பூ⁴தானம் த⁴ம்மானம். அனுப்பாதா³யாதி ந உப்பாத³னத்தா²ய. ச²ந்த³ம் ஜனேதீதி கத்துகம்யதாஸங்கா²தம் குஸலச்ச²ந்த³ம் ஜனேதி உப்பாதே³தி. வாயமதீதி பயோக³ம் பரக்கமம் கரோதி. வீரியம் ஆரப⁴தீதி காயிகசேதஸிகம் வீரியம் கரோதி. சித்தம் பக்³க³ண்ஹாதீதி தேனேவ ஸஹஜாதவீரியேன சித்தம் உக்கி²பதி. பத³ஹதீதி பதா⁴னவீரியம் கரோதி. படிபாடியா பனேதானி சத்தாரிபி பதா³னி ஆஸேவனாபா⁴வனாப³ஹுலீகம்மஸாதச்சகிரியாஹி யோஜேதப்³பா³னி.

உப்பன்னானம் பாபகானந்தி அனுப்பன்னந்தி அவத்தப்³ப³தம் ஆபன்னானம் பாபத⁴ம்மானம். பஹானாயாதி பஜஹனத்தா²ய. அனுப்பன்னானம் குஸலானம் த⁴ம்மானந்தி அனிப்³ப³த்தானம் கோஸல்லஸம்பூ⁴தானம் த⁴ம்மானம். உப்பாதா³யாதி உப்பாத³னத்தா²ய. உப்பன்னானந்தி நிப்³ப³த்தானம். டி²தியாதி டி²தத்தா²ய. அஸம்மோஸாயாதி அனஸ்ஸனத்த²ம். பி⁴ய்யோபா⁴வாயாதி புனப்புனம் பா⁴வாய. வேபுல்லாயாதி விபுலபா⁴வாய. பா⁴வனாயாதி வட்³டி⁴யா. பாரிபூரியாதி பரிபூரணத்தா²ய. அயம் தாவ சதுன்னம் ஸம்மப்பதா⁴னானம் உத்³தே³ஸவாரவஸேன ஏகபதி³கோ அத்து²த்³தா⁴ரோ.

391. இதா³னி படிபாடியா தானி பதா³னி பா⁴ஜேத்வா த³ஸ்ஸேதும் கத²ஞ்ச பி⁴க்கு² அனுப்பன்னானந்திஆதி³னா நயேன நித்³தே³ஸவாரோ ஆரத்³தோ⁴. தத்த² யம் ஹேட்டா² த⁴ம்மஸங்க³ஹே ஆக³தஸதி³ஸம், தம் தஸ்ஸ வண்ணனாயம் வுத்தனயேனேவ வேதி³தப்³ப³ம். யம் பன தஸ்மிம் அனாக³தம், தத்த² ச²ந்த³னித்³தே³ஸே தாவ யோ ச²ந்தோ³தி யோ ச²ந்த³னியவஸேன ச²ந்தோ³. ச²ந்தி³கதாதி ச²ந்தி³கபா⁴வோ, ச²ந்த³கரணாகாரோ வா. கத்துகம்யதாதி கத்துகாமதா. குஸலோதி சே²கோ. த⁴ம்மச்ச²ந்தோ³தி ஸபா⁴வச்ச²ந்தோ³. அயஞ்ஹி ச²ந்தோ³ நாம தண்ஹாச²ந்தோ³, தி³ட்டி²ச²ந்தோ³, வீரியச²ந்தோ³, த⁴ம்மச்ச²ந்தோ³தி ப³ஹுவிதோ⁴ நானப்பகாரகோ. தேஸு த⁴ம்மச்ச²ந்தோ³தி இமஸ்மிம் டா²னே கத்துகம்யதாகுஸலத⁴ம்மச்ச²ந்தோ³ அதி⁴ப்பேதோ.

இமம் ச²ந்த³ம் ஜனேதீதி ச²ந்த³ம் குருமானோவ ச²ந்த³ம் ஜனேதி நாம. ஸஞ்ஜனேதீதி உபஸக்³கே³ன பத³ம் வட்³டி⁴தம். உட்ட²பேதீதி ச²ந்த³ம் குருமானோவ தம் உட்ட²பேதி நாம. ஸமுட்ட²பேதீதி உபஸக்³கே³ன பத³ம் வட்³டி⁴தம். நிப்³ப³த்தேதீதி ச²ந்த³ம் குருமானோவ தம் நிப்³ப³த்தேதி நாம. அபி⁴னிப்³ப³த்தேதீதி உபஸக்³கே³ன பத³ம் வட்³டி⁴தம். அபிச ச²ந்த³ம் கரோந்தோவ ச²ந்த³ம் ஜனேதி நாம. தமேவ ஸததம் கரோந்தோ ஸஞ்ஜனேதி நாம. கேனசிதே³வ அந்தராயேன பதிதம் புன உக்கி²பந்தோ உட்ட²பேதி நாம. பப³ந்த⁴ட்டி²திம் பாபேந்தோ ஸமுட்ட²பேதி நாம. தம் பாகடம் கரோந்தோ நிப்³ப³த்தேதி நாம. அனோஸக்கனதாய அலீனவுத்திதாய அனோலீனவுத்திதாய அபி⁴முக²பா⁴வேன நிப்³ப³த்தேந்தோ அபி⁴னிப்³ப³த்தேதி நாம.

394. வீரியனித்³தே³ஸே வீரியம் கரோந்தோவ வீரியம் ஆரப⁴தி நாம. து³தியபத³ம் உபஸக்³கே³ன வட்³டி⁴தம். வீரியம் கரோந்தோயேவ ச ஆஸேவதி பா⁴வேதி நாம. புனப்புனம் கரோந்தோ வஹுலீகரோதி. ஆதி³தோவ கரோந்தோ ஆரப⁴தி. புனப்புனம் கரோந்தோ ஸமாரப⁴தி. பா⁴வனாவஸேன ப⁴ஜந்தோ ஆஸேவதி. வட்³டே⁴ந்தோ பா⁴வேதி. ஸப்³ப³கிச்சேஸு ததே³வ ப³ஹுலீகரோந்தோ ப³ஹுலீகரோதீதி வேதி³தப்³போ³.

395. சித்தபக்³க³ஹனித்³தே³ஸே வீரியபக்³க³ஹேன யோஜேந்தோ சித்தம் பக்³க³ண்ஹாதி, உக்கி²பதீதி அத்தோ². புனப்புனம் பக்³க³ண்ஹந்தோ ஸம்பக்³க³ண்ஹாதி. ஏவம் ஸம்பக்³க³ஹிதம் யதா² ந பததி ததா² நம் வீரியுபத்த²ம்பே⁴ன உபத்த²ம்பே⁴ந்தோ உபத்த²ம்பே⁴தி. உபத்த²ம்பி⁴தம்பி தி²ரபா⁴வத்தா²ய புனப்புனம் உபத்த²ம்பே⁴ந்தோ பச்சுபத்த²ம்பே⁴தி நாம.

406. டி²தியாதிபத³ஸ்ஸ நித்³தே³ஸே ஸப்³பே³ஸம்பி அஸம்மோஸாதீ³னம் டி²திவேவசனபா⁴வம் த³ஸ்ஸேதும் யா டி²தி ஸோ அஸம்மோஸோதிஆதி³ வுத்தம். ஏத்த² ஹி ஹேட்டி²மம் ஹேட்டி²மம் பத³ம் உபரிமஸ்ஸ உபரிமஸ்ஸ பத³ஸ்ஸ அத்தோ², உபரிமம் உபரிமம் பத³ம் ஹேட்டி²மஸ்ஸ ஹேட்டி²மஸ்ஸ அத்தோ²திபி வத்தும் வட்டதி. ஸேஸம் ஸப்³ப³த்த² உத்தானத்த²மேவாதி. அயம் தாவ பாளிவண்ணனா.

அயம் பனேத்த² வினிச்ச²யகதா². அயஞ்ஹி ஸம்மப்பதா⁴னகதா² நாம து³விதா⁴ – லோகியா லோகுத்தரா ச. தத்த² லோகியா ஸப்³ப³புப்³ப³பா⁴கே³ ஹோதி. ஸா கஸ்ஸபஸம்யுத்தபரியாயேன லோகியமக்³க³க்க²ணே வேதி³தப்³பா³. வுத்தஞ்ஹி தத்த² –

‘‘சத்தாரோ மே, ஆவுஸோ, ஸம்மப்பதா⁴னா. கதமே சத்தாரோ?

இதா⁴வுஸோ, பி⁴க்கு² ‘அனுப்பன்னா மே பாபகா அகுஸலா த⁴ம்மா உப்பஜ்ஜமானா அனத்தா²ய ஸம்வத்தேய்யு’ந்தி ஆதப்பம் கரோதி; ‘உப்பன்னா மே பாபகா அகுஸலா த⁴ம்மா அப்பஹீயமானா அனத்தா²ய ஸம்வத்தேய்யு’ந்தி ஆதப்பம் கரோதி; ‘அனுப்பன்னா மே குஸலா த⁴ம்மா அனுப்பஜ்ஜமானா அனத்தா²ய ஸம்வத்தேய்யு’ந்தி ஆதப்பம் கரோதி. ‘உப்பன்னா மே குஸலா த⁴ம்மா நிருஜ்ஜ²மானா அனத்தா²ய ஸம்வத்தேய்யு’ந்தி ஆதப்பம் கரோதீ’’தி (ஸம். நி. 2.145).

ஏத்த² ச ‘அனுப்பன்னா மே குஸலா த⁴ம்மா’தி ஸமத²விபஸ்ஸனா சேவ மக்³கோ³ ச. உப்பன்னா குஸலா நாம ஸமத²விபஸ்ஸனாவ. மக்³கோ³ பன ஸகிம் உப்பஜ்ஜித்வா நிருஜ்ஜ²மானோ அனத்தா²ய ஸம்வத்தனகோ நாம நத்தி². ஸோ ஹி ப²லஸ்ஸ பச்சயம் த³த்வாவ நிருஜ்ஜ²தி. புரிமஸ்மிம் வா ஸமத²விபஸ்ஸனாவ க³ஹேதப்³பா³தி வுத்தம், தம் பன ந யுத்தம்.

தத்த² ‘‘உப்பன்னா ஸமத²விபஸ்ஸனா நிருஜ்ஜ²மானா அனத்தா²ய ஸம்வத்தந்தீ’’தி அத்த²ஸ்ஸ ஆவிபா⁴வத்த²ம் இத³ம் வத்து² – ஏகோ கிர கீ²ணாஸவத்தே²ரோ ‘மஹாசேதியஞ்ச மஹாபோ³தி⁴ஞ்ச வந்தி³ஸ்ஸாமீ’தி ஸமாபத்திலாபி⁴னா ப⁴ண்ட³கா³ஹகஸாமணேரேன ஸத்³தி⁴ம் ஜனபத³தோ மஹாவிஹாரம் ஆக³ந்த்வா விஹாரபரிவேணம் பாவிஸி; ஸாயன்ஹஸமயே மஹாபி⁴க்கு²ஸங்கே⁴ சேதியம் வந்த³மானே சேதியம் வந்த³னத்தா²ய ந நிக்க²மி. கஸ்மா? கீ²ணாஸவானஞ்ஹி தீஸு ரதனேஸு மஹந்தம் கா³ரவம் ஹோதி. தஸ்மா பி⁴க்கு²ஸங்கே⁴ வந்தி³த்வா படிக்கந்தே மனுஸ்ஸானம் ஸாயமாஸபு⁴த்தவேலாய ஸாமணேரம்பி அஜானாபேத்வா ‘சேதியம் வந்தி³ஸ்ஸாமீ’தி ஏககோவ நிக்க²மி. ஸாமணேரோ ‘கிம் நு கோ² தே²ரோ அவேலாய ஏககோவ க³ச்ச²தி, ஜானிஸ்ஸாமீ’தி உபஜ்ஜா²யஸ்ஸ பதா³னுபதி³கோவ நிக்க²மி. தே²ரோ அனாவஜ்ஜனேன தஸ்ஸ ஆக³மனம் அஜானந்தோ த³க்கி²ணத்³வாரேன மஹாசேதியங்க³ணம் ஆருள்ஹோ. ஸாமணேரோபி அனுபத³ம்யேவ ஆருள்ஹோ.

மஹாதே²ரோ மஹாசேதியம் உல்லோகேத்வா பு³த்³தா⁴ரம்மணம் பீதிம் க³ஹேத்வா ஸப்³ப³ம் சேதஸோ ஸமன்னாஹரித்வா ஹட்ட²பஹட்டோ² மஹாசேதியம் வந்த³தி. ஸாமணேரோ தே²ரஸ்ஸ வந்த³னாகாரம் தி³ஸ்வா ‘உபஜ்ஜா²யோ மே அதிவிய பஸன்னசித்தோ வந்த³தி; கிம் நு கோ² புப்பா²னி லபி⁴த்வா பூஜம் கரேய்யா’தி சிந்தேஸி. தே²ரே வந்தி³த்வா உட்டா²ய ஸிரஸி அஞ்ஜலிம் ட²பேத்வா மஹாசேதியம் உல்லோகேத்வா டி²தே ஸாமணேரோ உக்காஸித்வா அத்தனோ ஆக³தபா⁴வம் ஜானாபேஸி. தே²ரோ பரிவத்தேத்வா ஓலோகேந்தோ ‘‘கதா³ ஆக³தோஸீ’’தி புச்சி². ‘‘தும்ஹாகம் சேதியம் வந்த³னகாலே, ப⁴ந்தே; அதிவிய பஸன்னா சேதியம் வந்தி³த்த²; கின்னு கோ² புப்பா²னி லபி⁴த்வா பூஜேய்யாதா²’’தி? ‘‘ஆம, ஸாமணேர, இமஸ்மிம் சேதியே விய அஞ்ஞத்ர ஏத்தகம் தா⁴துனிதா⁴னம் நாம நத்தி². ஏவரூபம் அஸதி³ஸம் மஹாதூ²பம் புப்பா²னி லபி⁴த்வா கோ ந பூஜேய்யா’’தி? ‘‘தேன ஹி, ப⁴ந்தே, அதி⁴வாஸேத², ஆஹரிஸ்ஸாமீ’’தி தாவதே³வ ஜா²னம் ஸமாபஜ்ஜித்வா இத்³தி⁴யா ஹிமவந்தம் க³ந்த்வா வண்ணக³ந்த⁴ஸம்பன்னானி புப்பா²னி க³ஹேத்வா பரிஸ்ஸாவனம் பூரேத்வா மஹாதே²ரே த³க்கி²ணமுக²தோ பச்சி²மமுகே² அஸம்பத்தேயேவ ஆக³ந்த்வா புப்ப²பரிஸ்ஸாவனம் ஹத்தே² ட²பேத்வா ‘‘பூஜேத² ப⁴ந்தே’’தி ஆஹ. தே²ரோ ‘‘அதிமந்தா³னி நோ, ஸாமணேர, புப்பா²னீ’’தி ஆஹ. ‘‘க³ச்ச²த², ப⁴ந்தே, ப⁴க³வதோ கு³ணே ஆவஜ்ஜேத்வா பூஜேதா²’’தி.

தே²ரோ பச்சி²மமுக²னிஸ்ஸிதேன ஸோபானேன ஆருய்ஹ குச்சி²வேதி³காபூ⁴மியம் புப்ப²பூஜம் காதும் ஆரத்³தோ⁴. வேதி³காபூ⁴மி பரிபுண்ணா; புப்பா²னி பதித்வா து³தியபூ⁴மியம் ஜண்ணுப்பமாணேன ஓதி⁴னா பூரயிம்ஸு. ததோ ஓதரித்வா பாத³பிட்டி²கபந்திம் பூஜேஸி; ஸாபி பரிபூரி; பரிபுண்ணபா⁴வம் ஞத்வா ஹேட்டி²மதலே விகிரந்தோ அக³மாஸி; ஸப்³ப³ம் சேதியங்க³ணம் பரிபூரி; தஸ்மிம் பரிபுண்ணே ‘‘ஸாமணேர, புப்பா²னி ந கீ²யந்தீ’’தி ஆஹ. ‘‘பரிஸ்ஸாவனம், ப⁴ந்தே, அதோ⁴முக²ம் கரோதா²’’தி. அதோ⁴முக²ம் கத்வா சாலேஸி. ததா³ புப்பா²னி கீ²ணானி. தே²ரோ பரிஸ்ஸாவனம் ஸாமணேரஸ்ஸ த³த்வா ஸத்³தி⁴ம் ஹத்தி²பாகாரேன சேதியம் திக்க²த்தும் பத³க்கி²ணம் கத்வா சதூஸு டா²னேஸு வந்தி³த்வா பரிவேணம் க³ச்ச²ந்தோ சிந்தேஸி – ‘யாவ மஹித்³தி⁴கோ வதாயம் ஸாமணேரோ; ஸக்கி²ஸ்ஸதி நு கோ² இமம் இத்³தா⁴னுபா⁴வம் ரக்கி²துந்தி? ததோ ‘ந ஸக்கி²ஸ்ஸதீ’தி தி³ஸ்வா ஸாமணேரம் ஆஹ – ‘‘ஸாமணேர, த்வம் இதா³னி மஹித்³தி⁴கோ; ஏவரூபம் பன இத்³தி⁴ம் நாஸேத்வா பச்சி²மகாலே காணபேஸகாரியா ஹத்தே²ன மத்³தி³தம்கஞ்ஜியம் பிவிஸ்ஸஸீ’’தி. த³ஹரகபா⁴வஸ்ஸ நாமேஸ தோ³ஸோ யம் ஸோ உபஜ்ஜா²யஸ்ஸ கதா²ய ஸம்வேஜேத்வா ‘கம்மட்டா²னம் மே, ப⁴ந்தே, ஆசிக்க²தா²’தி ந யாசி; ‘அம்ஹாகம் உபஜ்ஜா²யோ கிம் வத³தீ’தி தம் பன அஸுணந்தோ விய அக³மாஸி.

தே²ரோ மஹாசேதியஞ்ச மஹாபோ³தி⁴ஞ்ச வந்தி³த்வா ஸாமணேரம் பத்தசீவரம் கா³ஹாபேத்வா அனுபுப்³பே³ன குடேளிதிஸ்ஸமஹாவிஹாரம் அக³மாஸி. ஸாமணேரோ உபஜ்ஜா²யஸ்ஸ பதா³னுபதி³கோ ஹுத்வா பி⁴க்கா²சாரம் ந க³ச்ச²தி. ‘‘கதரம் கா³மம் பவிஸத², ப⁴ந்தே’’தி புச்சி²த்வா பன ‘இதா³னி மே உபஜ்ஜா²யோ கா³மத்³வாரம் ஸம்பத்தோ ப⁴விஸ்ஸதீ’தி ஞத்வா அத்தனோ ச உபஜ்ஜா²யஸ்ஸ ச பத்தசீவரம் க³ஹேத்வா ஆகாஸேனாக³ந்த்வா தே²ரஸ்ஸ பத்தசீவரம் த³த்வா பிண்டா³ய பவிஸதி. தே²ரோ ஸப்³ப³காலம் ஓவத³தி – ‘‘ஸாமணேர, மா ஏவமகாஸி; புது²ஜ்ஜனித்³தி⁴ நாம சலா அனிப³த்³தா⁴; அஸப்பாயம் ரூபாதி³ஆரம்மணம் லபி⁴த்வா அப்பமத்தகேனேவ பி⁴ஜ்ஜதி; ஸந்தாய ஸமாபத்தியா பரிஹீனா ப்³ரஹ்மசரியவாஸே ஸந்த²ம்பி⁴தும் ந ஸக்கோந்தீ’’தி. ஸாமணேரோ ‘கிம் கதே²தி மய்ஹம் உபஜ்ஜா²யோ’தி ஸோதும் ந இச்ச²தி, ததே²வ கரோதி. தே²ரோ அனுபுப்³பே³ன சேதியவந்த³னம் கரோந்தோ கம்முபேந்த³விஹாரம் நாம க³தோ. தத்த² வஸந்தேபி தே²ரே ஸாமணேரோ ததே²வ கரோதி.

அதே²கதி³வஸம் ஏகா பேஸகாரதீ⁴தா அபி⁴ரூபா பட²மவயே டி²தா கம்முபேந்த³கா³மதோ நிக்க²மித்வா பது³மஸ்ஸரம் ஓருய்ஹ கா³யமானா புப்பா²னி ப⁴ஞ்ஜதி. தஸ்மிம் ஸமயே ஸாமணேரோ பது³மஸ்ஸரமத்த²கேன க³ச்ச²தி க³ச்ச²ந்தோ பன, ஸக்கரலஸிகாய காணமக்கி²கா விய, தஸ்ஸா கீ³தஸத்³தே³ ப³ஜ்ஜி²; தாவதே³வ இத்³தி⁴ அந்தரஹிதா, சி²ன்னபக்கோ² காகோ விய அஹோஸி. ஸந்தஸமாபத்திப³லேன பன தத்தே²வ உத³கபிட்டே² அபதித்வா ஸிம்ப³லிதூலம் விய பதமானம் அனுபுப்³பே³ன பது³மஸ்ஸரதீரே அட்டா²ஸி. ஸோ வேகே³ன க³ந்த்வா உபஜ்ஜா²யஸ்ஸ பத்தசீவரம் த³த்வா நிவத்தி. மஹாதே²ரோ ‘பகே³வேதம் மயா தி³ட்ட²ம், நிவாரியமானோபி ந நிவத்திஸ்ஸதீ’தி கிஞ்சி அவத்வா பிண்டா³ய பாவிஸி.

ஸாமணேரோ க³ந்த்வா பது³மஸ்ஸரதீரே அட்டா²ஸி தஸ்ஸா பச்சுத்தரணம் ஆக³மயமானோ. ஸாபி ஸாமணேரம் ஆகாஸேன க³ச்ச²ந்தஞ்ச புனாக³ந்த்வா டி²தஞ்ச தி³ஸ்வா ‘அத்³தா⁴ ஏஸ மம் நிஸ்ஸாய உக்கண்டி²தோ’தி ஞத்வா ‘படிக்கம ஸாமணேரா’தி ஆஹ. ஸோபி படிபக்கமி. இதரா பச்சுத்தரித்வா ஸாடகம் நிவாஸேத்வா தம் உபஸங்கமித்வா ‘கிம், ப⁴ந்தே’தி புச்சி². ஸோ தமத்த²ம் ஆரோசேஸி. ஸா ப³ஹூஹி காரணேஹி க⁴ராவாஸே ஆதீ³னவம் ப்³ரஹ்மசரியவாஸே ஆனிஸம்ஸஞ்ச த³ஸ்ஸேத்வா ஓவத³மானாபி தஸ்ஸ உக்கண்ட²ம் வினோதே³தும் அஸக்கோந்தீ ‘அயம் மம காரணா ஏவரூபாய இத்³தி⁴யா பரிஹீனோ; ந தா³னி யுத்தம் பரிச்சஜிது’ந்தி. ‘இதே⁴வ திட்டா²’தி வத்வா க⁴ரம் க³ந்த்வா மாதாபிதூனம் தம் பவத்திம் ஆரோசேஸி. தேபி ஆக³ந்த்வா நானப்பகாரம் ஓவத³மானா வசனம் அக்³க³ண்ஹந்தம் ஆஹம்ஸு – ‘‘த்வம் அம்ஹே உச்சாகுலாதி மா ஸல்லக்கே²ஸி. மயம் பேஸகாரா. ஸக்கி²ஸ்ஸஸி பேஸகாரகம்மம் காது’’ந்தி? ஸாமணேரோ ஆஹ – ‘‘உபாஸக, கி³ஹீபூ⁴தோ நாம பேஸகாரகம்மம் வா கரேய்ய நளகாரகம்மம் வா, கிம் இமினா, மா ஸாடகமத்தே லோப⁴ம் கரோதா²’’தி. பேஸகாரகோ உத³ரே ப³த்³த⁴ஸாடகம் த³த்வா க⁴ரம் நேத்வா தீ⁴தரம் அதா³ஸி.

ஸோ பேஸகாரகம்மம் உக்³க³ண்ஹித்வா பேஸகாரேஹி ஸத்³தி⁴ம் ஸாலாய கம்மம் கரோதி. அஞ்ஞேஸம் இத்தி²யோ பாதோவ ப⁴த்தம் ஸம்பாதே³த்வா ஆஹரிம்ஸு. தஸ்ஸ ப⁴ரியா ந தாவ ஆக³ச்ச²தி. ஸோ இதரேஸு கம்மம் விஸ்ஸஜ்ஜேத்வா பு⁴ஞ்ஜமானேஸு தஸரம் வட்டேந்தோ நிஸீதி³. ஸா பச்சா² ஆக³மாஸி. அத² நம் ஸோ ‘அதிசிரேன ஆக³தாஸீ’தி தஜ்ஜேஸி. மாதுகா³மோ ச நாம அபி சக்கவத்திராஜானம் அத்தனி படிப³த்³த⁴சித்தம் ஞத்வா தா³ஸம் விய ஸல்லக்கே²தி. தஸ்மா ஸா ஏவமாஹ – ‘‘அஞ்ஞேஸம் க⁴ரே தா³ருபண்ணலோணாதீ³னி ஸன்னிஹிதானி; பா³ஹிரதோ ஆஹரித்வா தா³யகா பேஸகாரகாபி அத்தி². அஹம் பன ஏகிகா; த்வம்பி ‘மய்ஹம் க⁴ரே இத³ம் அத்தி², இத³ம் நத்தீ²’தி ந ஜானாஸி. ஸசே இச்ச²ஸி பு⁴ஞ்ஜ, நோ சே இச்ச²ஸி மா பு⁴ஞ்ஜா’’தி. ஸோ ‘ந கேவலம் உஸ்ஸூரே ப⁴த்தம் ஆஹரஸி, வாசாயபி மம் க⁴ட்டேஸீ’தி குஜ்ஜி²த்வா அஞ்ஞம் பஹரணம் அபஸ்ஸந்தோ தமேவ தஸரத³ண்ட³கம் தஸரதோ லுஞ்சித்வா கி²பி. ஸா தம் ஆக³ச்ச²ந்தம் தி³ஸ்வா ஈஸகம் பரிவத்தி. தஸரத³ண்ட³கஸ்ஸ ச கோடி நாம திகி²ணா ஹோதி. ஸா தஸ்ஸா பரிவத்தமானாய அக்கி²கோடியம் பவிஸித்வா அட்டா²ஸி. ஸா உபோ⁴ஹி ஹத்தே²ஹி வேகே³ன அக்கி²ம் அக்³க³ஹேஸி. பி⁴ன்னட்டா²னதோ லோஹிதம் பக்³க⁴ரதி.

ஸோ தஸ்மிம் காலே உபஜ்ஜா²யஸ்ஸ வசனம் அனுஸ்ஸரி ‘இத³ம் ஸந்தா⁴ய மம் உபஜ்ஜா²யோ ‘‘அனாக³தே காலே காணபேஸகாரியா ஹத்தே²ன மத்³தி³தம் கஞ்ஜியம் பிவிஸ்ஸஸீ’’தி ஆஹ. இத³ம் தே²ரேன தி³ட்ட²ம் ப⁴விஸ்ஸதி. அஹோ தீ³க⁴த³ஸ்ஸீ அய்யோ’தி மஹாஸத்³தே³ன ரோதி³தும் ஆரபி⁴. தமேனம் அஞ்ஞே ‘‘அலம், ஆவுஸோ, மா ரோதி³; அக்கி² நாம பி⁴ன்னம் ந ஸக்கா ரோத³னேன படிபாகதிகம் காது’’ந்தி ஆஹம்ஸு. ஸோ ‘‘நாஹம் ஏதமத்த²ம் ரோதா³மி; அபிச கோ² இத³ம் ஸந்தா⁴ய ரோதா³மீ’’தி ஸப்³ப³ம் பவத்திம் படிபாடியா கதே²ஸி. ஏவம் உப்பன்னா ஸமத²விபஸ்ஸனா நிருஜ்ஜ²மானா அனத்தா²ய ஸம்வத்தந்தி.

அபரம்பி வத்து² – திம்ஸமத்தா பி⁴க்கூ² கல்யாணியம் மஹாசேதியம் வந்தி³த்வா அடவிமக்³கே³ன மஹாமக்³க³ம் ஓதரமானா அந்தராமக்³கே³ ஜா²மக்கே²த்தே கம்மம் கத்வா ஆக³ச்ச²ந்தம் ஏகம் மனுஸ்ஸம் அத்³த³ஸம்ஸு. தஸ்ஸ ஸரீரம் மஸிமக்கி²தம் ஹோதி, மஸிமக்கி²தமேவ ச ஏகம் காஸாவம் கச்ச²ம் பீளேத்வா நிவத்த²ம். ஓலோகியமானோ ஜா²மகா²ணுகோ விய கா²யதி. ஸோ தி³வஸபா⁴கே³ கம்மம் கத்வா உபட்³ட⁴ஜா²யமானானம் தா³ரூனம் கலாபம் உக்கி²பித்வா பிட்டி²யம் விப்பகிண்ணேஹி கேஸேஹி கும்மக்³கே³ன ஆக³ந்த்வா பி⁴க்கூ²னம் ஸம்முகே² அட்டா²ஸி. ஸாமணேரா தி³ஸ்வா அஞ்ஞமஞ்ஞம் ஓலோகயமானா ‘‘ஆவுஸோ, துய்ஹம் பிதா, துய்ஹம் மஹாபிதா, துய்ஹம் மாதுலோ’’தி ஹஸமானா க³ந்த்வா ‘‘கோ நாமோஸி த்வம், உபாஸகா’’தி நாமம் புச்சி²ம்ஸு. ஸோ நாமம் புச்சி²தோ விப்படிஸாரீ ஹுத்வா தா³ருகலாபம் ச²ட்³டே³த்வா வத்த²ம் ஸம்விதா⁴ய நிவாஸேத்வா மஹாதே²ரே வந்தி³த்வா ‘‘திட்ட²த² தாவ, ப⁴ந்தே’’தி ஆஹ. மஹாதே²ரா அட்ட²ம்ஸு.

த³ஹரஸாமணேரா ஆக³ந்த்வா மஹாதே²ரானம் ஸம்முகா²பி பரிஹாஸம் கரோந்தி. உபாஸகோ ஆஹ – ‘‘ப⁴ந்தே, தும்ஹே மம் பஸ்ஸித்வா பரிஹஸத²; ஏத்தகேனேவ மத்த²கம் பத்தம்ஹாதி ஸல்லக்கே²த². அஹம்பி புப்³பே³ தும்ஹாதி³ஸோவ ஸமணோ அஹோஸிம். தும்ஹாகம் பன சித்தேகக்³க³தாமத்தம்பி நத்தி². அஹம் இமஸ்மிம் ஸாஸனே மஹித்³தி⁴கோ மஹானுபா⁴வோ அஹோஸிம்; ஆகாஸம் க³ஹேத்வா பத²விம் கரோமி, பத²விம் ஆகாஸம்; தூ³ரம் க³ண்ஹித்வா ஸந்திகம் கரோமி, ஸந்திகம் தூ³ரம்; சக்கவாளஸஹஸ்ஸம் க²ணேன வினிவிஜ்ஜா²மி. ஹத்தே² மே பஸ்ஸத²; இதா³னி பன மக்கடஹத்த²ஸதி³ஸா. அஹம் இமேஹேவ ஹத்தே²ஹி இத⁴ நிஸின்னோவ சந்தி³மஸூரியே பராமஸிம். இமேஸம்யேவ பாதா³னம் சந்தி³மஸூரியே பாத³கத²லிகம் கத்வா நிஸீதி³ம். ஏவரூபா மே இத்³தி⁴ பமாதே³ன அந்தரஹிதா. தும்ஹே மா பமஜ்ஜித்த². பமாதே³ன ஹி ஏவரூபம் ப்³யஸனம் பாபுணந்தி. அப்பமத்தா விஹரந்தா ஜாதிஜராமரணஸ்ஸ அந்தம் கரோந்தி. தஸ்மா தும்ஹே மஞ்ஞேவ ஆரம்மணம் கரித்வா அப்பமத்தா ஹோத², ப⁴ந்தே’’தி தஜ்ஜேத்வா ஓவாத³மதா³ஸி. தே தஸ்ஸ கதே²ந்தஸ்ஸேவ ஸம்வேக³ம் ஆபஜ்ஜித்வா விபஸ்ஸமானா திம்ஸ ஜனா தத்தே²வ அரஹத்தம் பாபுணிம்ஸூதி. ஏவம்பி உப்பன்னா ஸமத²விபஸ்ஸனா நிருஜ்ஜ²மானா அனத்தா²ய ஸம்வத்தந்தீதி வேதி³தப்³பா³. அயம் தாவ லோகியஸம்மப்பதா⁴னகதா²ய வினிச்ச²யோ.

லோகுத்தரமக்³க³க்க²ணே பனேதம் ஏகமேவ வீரியம் சதுகிச்சஸாத⁴னவஸேன சத்தாரி நாமானி லப⁴தி. தத்த² அனுப்பன்னானந்தி அஸமுதா³சாரவஸேன வா அனனுபூ⁴தாரம்மணவஸேன வா அனுப்பன்னானம்; அஞ்ஞதா² ஹி அனமதக்³கே³ ஸம்ஸாரே அனுப்பன்னா பாபகா அகுஸலா த⁴ம்மா நாம நத்தி². அனுப்பன்னா பன உப்பஜ்ஜமானாபி ஏதேயேவ உப்பஜ்ஜந்தி, பஹீயமானாபி ஏதேயேவ பஹீயந்தி.

தத்த² ஏகச்சஸ்ஸ வத்தவஸேன கிலேஸா ந ஸமுதா³சரந்தி. ஏகச்சஸ்ஸ க³ந்த²து⁴தங்க³ஸமாதி⁴விபஸ்ஸனா நவகம்மிகானம் அஞ்ஞதரவஸேன. கத²ம்? ஏகச்சோ ஹி வத்தஸம்பன்னோ ஹோதி. தஸ்ஸ த்³வாஸீதிகு²த்³த³கவத்தானி (சூளவ. 243 ஆத³யோ), சுத்³த³ஸ மஹாவத்தானி (சூளவ. 356 ஆத³யோ), சேதியங்க³ணபோ³தி⁴யங்க³ணபானீயமாளஉபோஸதா²கா³ரஆக³ந்துகக³மிகவத்தானி ச கரோந்தஸ்ஸேவ கிலேஸா ஓகாஸம் ந லப⁴ந்தி; அபரபா⁴கே³ பனஸ்ஸ வத்தம் விஸ்ஸஜ்ஜேத்வா பி⁴ன்னவத்தஸ்ஸ விசரதோ அயோனிஸோமனஸிகாரஞ்சேவ ஸதிவோஸ்ஸக்³க³ஞ்ச ஆக³ம்ம உப்பஜ்ஜந்தி. ஏவம் அஸமுதா³சாரவஸேன அனுப்பன்னா உப்பஜ்ஜந்தி நாம.

ஏகச்சோ க³ந்த²யுத்தோ ஹோதி; ஏகம்பி நிகாயம் க³ண்ஹாதி, த்³வேபி, தயோபி, சத்தாரோபி, பஞ்சபி. தஸ்ஸேவ தேபிடகம் பு³த்³த⁴வசனம் அத்த²வஸேன பாளிவஸேன அனுஸந்தி⁴வஸேன புப்³பா³பரவஸேன க³ண்ஹந்தஸ்ஸ ஸஜ்ஜா²யந்தஸ்ஸ சிந்தேந்தஸ்ஸ வாசேந்தஸ்ஸ தே³ஸேந்தஸ்ஸ பகாஸேந்தஸ்ஸ கிலேஸா ஓகாஸம் ந லப⁴ந்தி; அபரபா⁴கே³ பனஸ்ஸ க³ந்த²கம்மம் பஹாய குஸீதஸ்ஸ விசரதோ அயோனிஸோமனஸிகாரஸதிவோஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா உப்பஜ்ஜந்தி நாம.

ஏகச்சோ பன து⁴தங்க³த⁴ரோ ஹோதி, தேரஸ து⁴தங்க³கு³ணே ஸமாதா³ய வத்ததி. தஸ்ஸ து⁴தங்க³கு³ணே பரிஹரந்தஸ்ஸ கிலேஸா ஓகாஸம் ந லப⁴ந்தி; அபரபா⁴கே³ பனஸ்ஸ து⁴தங்கா³னி விஸ்ஸஜ்ஜேத்வா பா³ஹுல்லாய ஆவட்டஸ்ஸ விசரதோ அயோனிஸோமனஸிகாரஸதிவோஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா உப்பஜ்ஜந்தி நாம.

ஏகச்சோ பன அட்ட²ஸு ஸமாபத்தீஸு சிண்ணவஸீ ஹோதி. தஸ்ஸ பட²மஜ்ஜா²னாதீ³ஸு ஆவஜ்ஜனவஸீஆதீ³னம் வஸேன விஹரந்தஸ்ஸ கிலேஸா ஓகாஸம் ந லப⁴ந்தி; அபரபா⁴கே³ பனஸ்ஸ பரிஹீனஜ்ஜா²னஸ்ஸ வா விஸ்ஸட்ட²ஜ்ஜா²னஸ்ஸ வா ப⁴ஸ்ஸாதீ³ஸு அனுயுத்தஸ்ஸ விஹரதோ அயோனிஸோமனஸிகாரஸதிவோஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா கிலேஸா உப்பஜ்ஜந்தி நாம.

ஏகச்சோ பன விபஸ்ஸகோ ஹோதி; ஸத்தஸு வா விபஸ்ஸனாஸு அட்டா²ரஸஸு வா மஹாவிபஸ்ஸனாஸு கம்மம் கரோந்தோ விஹரதி. தஸ்ஸேவம் விஹரதோ கிலேஸா ஓகாஸம் ந லப⁴ந்தி; அபரபா⁴கே³ பனஸ்ஸ விபஸ்ஸனாகம்மம் பஹாய காயத³ள்ஹீப³ஹுலஸ்ஸ விஹரதோ அயோனிஸோமனஸிகாரஸதிவோஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா கிலேஸா உப்பஜ்ஜந்தி நாம.

ஏகச்சோ பன நவகம்மிகோ ஹோதி, உபோஸதா²கா³ரபோ⁴ஜனஸாலாதீ³னி கரோதி. தஸ்ஸ தேஸம் உபகரணானி சிந்தேந்தஸ்ஸ கிலேஸா ஓகாஸம் ந லப⁴ந்தி; அபரபா⁴கே³ பனஸ்ஸ நவகம்மே நிட்டி²தே வா விஸ்ஸட்டே² வா அயோனிஸோமனஸிகாரஸதிவோஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா கிலேஸா உப்பஜ்ஜந்தி நாம.

ஏகச்சோ பன ப்³ரஹ்மலோகா ஆக³தோ ஸுத்³த⁴ஸத்தோ ஹோதி. தஸ்ஸ அனாஸேவனாய கிலேஸா ஓகாஸம் ந லப⁴ந்தி; அபரபா⁴கே³ பனஸ்ஸ லத்³தா⁴ஸேவனஸ்ஸ அயோனிஸோமனஸிகாரஸதிவோஸ்ஸக்³கே³ ஆக³ம்ம உப்பஜ்ஜந்தி. ஏவம்பி அஸமுதா³சாரவஸேன அனுப்பன்னா கிலேஸா உப்பஜ்ஜந்தி நாம. ஏவம் தாவ அஸமுசாரவஸேன அனுப்பன்னதா வேதி³தப்³பா³.

கத²ம் அனனுபூ⁴தாரம்மணவஸேன? இதே⁴கச்சோ அனனுபூ⁴தபுப்³ப³ம் மனாபியாதி³பே⁴த³ம் ஆரம்மணம் லப⁴தி. தஸ்ஸ தத்த² அயோனிஸோமனஸிகாரஸதிவோஸ்ஸக்³கே³ ஆக³ம்ம ராகா³த³யோ கிலேஸா உப்பஜ்ஜந்தி. ஏவம் அனனுபூ⁴தாரம்மணவஸேன அனுப்பன்னா உப்பஜ்ஜந்தி நாம. லோகுத்தரமக்³க³க்க²ணே பன ஏகமேவ வீரியம்.

யே ச ஏவம் அனுப்பன்னா உப்பஜ்ஜேய்யும், தே யதா² நேவ உப்பஜ்ஜந்தி, ஏவம் நேஸம் அனுப்பாத³கிச்சம் உப்பன்னானஞ்ச பஹானகிச்சம் ஸாதே⁴தி. தஸ்மா உப்பன்னானம் பாபகானந்தி ஏத்த² பன சதுப்³பி³த⁴ம் உப்பன்னம் – வத்தமானுப்பன்னம், பு⁴த்வா விக³துப்பன்னம், ஓகாஸகதுப்பன்னம், பூ⁴மிலத்³து⁴ப்பன்னந்தி. தத்த² யே கிலேஸா விஜ்ஜமானா உப்பாதா³தி³ஸமங்கி³னோ – இத³ம் வத்தமானுப்பன்னம் நாம. கம்மே பன ஜவிதே ஆரம்மணரஸம் அனுப⁴வித்வா நிருத்³த⁴விபாகோ பு⁴த்வா விக³தம் நாம. கம்மம் உப்பஜ்ஜித்வா நிருத்³த⁴ம் பு⁴த்வா விக³தம் நாம. தது³ப⁴யம்பி பு⁴த்வா விக³துப்பன்னந்தி ஸங்க²ம் க³ச்ச²தி. குஸலாகுஸலகம்மம் அஞ்ஞஸ்ஸ கம்மஸ்ஸ விபாகம் படிபா³ஹித்வா அத்தனோ விபாகஸ்ஸ ஓகாஸம் கரோதி. ஏவம் கதே ஓகாஸே விபாகோ உப்பஜ்ஜமானோ ஓகாஸகரணதோ பட்டா²ய உப்பன்னோதி வுச்சதி. இத³ம் ஓகாஸகதுப்பன்னம் நாம.

பஞ்சக்க²ந்தா⁴ பன விபஸ்ஸனாய பூ⁴மி நாம. தே அதீதாதி³பே⁴தா³ ஹோந்தி. தேஸு அனுஸயிதகிலேஸா பன அதீதா வா அனாக³தா வா பச்சுப்பன்னா வாதி ந வத்தப்³பா³. அதீதக்க²ந்தே⁴ஸு அனுஸயிதாபி ஹி அப்பஹீனாவ ஹோந்தி. அனாக³தக்க²ந்தே⁴ஸு, பச்சுப்பன்னக்க²ந்தே⁴ஸு அனுஸயிதாபி அப்பஹீனாவ ஹோந்தி. இத³ம் பூ⁴மிலத்³து⁴ப்பன்னம் நாம. தேனாஹு போராணா – ‘‘தாஸு தாஸு பூ⁴மீஸு அஸமுக்³கா⁴திதா கிலேஸா பூ⁴மிலத்³து⁴ப்பன்னாதி ஸங்க²ம் க³ச்ச²ந்தீ’’தி.

அபரம்பி சதுப்³பி³த⁴ம் உப்பன்னம் – ஸமுதா³சாருப்பன்னம், ஆரம்மணாதி⁴க³ஹிதுப்பன்னம், அவிக்க²ம்பி⁴துப்பன்னம், அஸமுக்³தா⁴திதுப்பன்னந்தி. தத்த² ஸம்பதி வத்தமானம்யேவ ‘ஸமுதா³சாருப்பன்னம்’ நாம. ஸகிம் சக்கூ²னி உம்மீலேத்வா ஆரம்மணே நிமித்தே க³ஹிதே அனுஸ்ஸரிதானுஸ்ஸரிதக்க²ணே கிலேஸா நுப்பஜ்ஜிஸ்ஸந்தீதி ந வத்தப்³பா³. கஸ்மா? ஆரம்மணஸ்ஸ அதி⁴க³ஹிதத்தா. யதா² கிம்? யதா² கீ²ரருக்க²ஸ்ஸ குடா²ரியா ஆஹதாஹதட்டா²னே கீ²ரம் ந நிக்க²மிஸ்ஸதீதி ந வத்தப்³ப³ம், ஏவம். இத³ம் ‘ஆரம்மணாதி⁴க³ஹிதுப்பன்னம்’ நாம. ஸமாபத்தியா அவிக்க²ம்பி⁴தகிலேஸா பன இமஸ்மிம் நாம டா²னே நுப்பஜ்ஜிஸ்ஸந்தீதி ந வத்தப்³பா³. கஸ்மா? அவிக்க²ம்பி⁴தத்தா. யதா² கிம்? யதா² ஸசே கீ²ரருக்க²ம் குடா²ரியா ஆஹனேய்யும், ‘இமஸ்மிம் நாம டா²னே கீ²ரம் ந நிக்க²மேய்யா’தி ந வத்தப்³ப³ம், ஏவம். இத³ம் ‘அவிக்க²ம்பி⁴துப்பன்னம்’ நாம. மக்³கே³ன அஸமுக்³கா⁴திதகிலேஸா பன ப⁴வக்³கே³ நிப்³ப³த்தஸ்ஸாபி நுப்பஜ்ஜிஸ்ஸந்தீதி புரிமனயேனேவ வித்தா²ரேதப்³ப³ம். இத³ம் ‘அஸமுக்³கா⁴திதுப்பன்னம்’ நாம.

இமேஸு உப்பன்னேஸு வத்தமானுப்பன்னம், பு⁴த்வாவிக³துப்பன்னம், ஓகாஸகதுப்பன்னம், ஸமுதா³சாருப்பன்னந்தி சதுப்³பி³த⁴ம் உப்பன்னம் ந மக்³க³வஜ்ஜ²ம்; பூ⁴மிலத்³து⁴ப்பன்னம், ஆரம்மணாதி⁴க்³க³ஹிதுப்பன்னம், அவிக்க²ம்பி⁴துப்பன்னம், அஸமுக்³கா⁴திதுப்பன்னந்தி சதுப்³பி³த⁴ம் மக்³க³வஜ்ஜ²ம். மக்³கோ³ ஹி உப்பஜ்ஜமானோ ஏதே கிலேஸே பஜஹதி. ஸோ யே கிலேஸே பஜஹதி, தே அதீதா வா அனாக³தா வா பச்சுப்பன்னா வாதி ந வத்தப்³பா³. வுத்தம்பி சேதம் –

‘‘ஹஞ்சி அதீதே கிலேஸே பஜஹதி, தேன ஹி கீ²ணம் கே²பேதி, நிருத்³த⁴ம் நிரோதே⁴தி, விக³தம் விக³மேதி, அத்த²ங்க³தம் அத்த²ம் க³மேதி, அதீதம் யம் நத்தி² தம் பஜஹதி. ஹஞ்சி அனாக³தே கிலேஸே பஜஹதி, தேன ஹி அஜாதம் பஜஹதி, அனிப்³ப³த்தம் அனுப்பன்னம் அபாதுபூ⁴தம் பஜஹதி, அனாக³தம் யம் நத்தி² தம் பஜஹதி. ஹஞ்சி பச்சுப்பன்னே கிலேஸே பஜஹதி, தேன ஹி ரத்தோ ராக³ம் பஜஹதி, து³ட்டோ² தோ³ஸம், மூள்ஹோ மோஹம், வினிப³த்³தோ⁴ மானம், பராமட்டோ² தி³ட்டி²ம், விக்கே²பக³தோ உத்³த⁴ச்சம், அனிட்ட²ங்க³தோ விசிகிச்ச²ம், தா²மக³தோ அனுஸயம் பஜஹதி; கண்ஹஸுக்கத⁴ம்மா யுக³னத்³தா⁴ ஸமமேவ வத்தந்தி; ஸம்கிலேஸிகா மக்³க³பா⁴வனா ஹோதி…பே… தேன ஹி நத்தி² மக்³க³பா⁴வனா, நத்தி² ப²லஸச்சி²கிரியா, நத்தி² கிலேஸப்பஹானம், நத்தி² த⁴ம்மாபி⁴ஸமயோ’தி. ‘அத்தி² மக்³க³பா⁴வனா…பே… அத்தி² த⁴ம்மாபி⁴ஸமயோ’தி. யதா² கத²ம் விய? ஸேய்யதா²பி தருணோ ருக்கோ²…பே… அபாதுபூ⁴தானேவ ந பாதுப⁴வந்தி’’தி (படி. ம. 3.21).

இதி பாளியம் அஜாதப²லருக்கோ² ஆக³தோ; ஜாதப²லருக்கே²ன பன தீ³பேதப்³ப³ம். யதா² ஹி ஸப²லோ தருணஅம்ப³ருக்கோ². தஸ்ஸ ப²லானி மனுஸ்ஸா பரிபு⁴ஞ்ஜேய்யும், ஸேஸானி பாதேத்வா பச்சி²யோ பூரேய்யும். அத²ஞ்ஞோ புரிஸோ தம் ப²ரஸுனா சி²ந்தே³ய்ய. தேனஸ்ஸ நேவ அதீதானி ப²லானி நாஸிதானி ஹோந்தி, ந அனாக³தபச்சுப்பன்னானி ச நாஸிதானி; அதீதானி ஹி மனுஸ்ஸேஹி பரிபு⁴த்தானி, அனாக³தானி அனிப்³ப³த்தானி ந ஸக்கா நாஸேதும். யஸ்மிம் பன ஸமயே ஸோ சி²ன்னோ ததா³ ப²லானியேவ நத்தீ²தி பச்சுப்பன்னானிபி அனாஸிதானி. ஸசே பன ருக்கோ² அச்சி²ன்னோ அஸ்ஸ, அத²ஸ்ஸ பத²வீரஸஞ்ச ஆபோரஸஞ்ச ஆக³ம்ம யானி ப²லானி நிப்³ப³த்தேய்யும், தானி நாஸிதானி ஹோந்தி. தானி ஹி அஜாதானேவ ந ஜாயந்தி, அனிப்³ப³த்தானேவ ந நிப்³ப³த்தந்தி, அபாதுபூ⁴தானேவ ந பாதுப⁴வந்தி. ஏவமேவ மக்³கோ³ நாபி அதீதாதி³பே⁴தே³ கிலேஸே பஜஹதி, நாபி ந பஜஹதி. யேஸஞ்ஹி கிலேஸானம் மக்³கே³ன க²ந்தே⁴ஸு அபரிஞ்ஞாதேஸு உப்பத்தி ஸியா, மக்³கே³ன உப்பஜ்ஜித்வா க²ந்தா⁴னம் பரிஞ்ஞாதத்தா தே கிலேஸா அஜாதாவ ந ஜாயந்தி, அனிப்³ப³த்தாவ ந நிப்³ப³த்தந்தி, அபாதுபூ⁴தாவ ந பாதுப⁴வந்தி. தருணபுத்தாய இத்தி²யா புன அவிஜாயனத்த²ம் ப்³யாதி⁴தானம் ரோக³வூபஸமத்த²ம் பீதபே⁴ஸஜ்ஜேஹி சாபி அயமத்தோ² விபா⁴வேதப்³போ³. ஏவம் மக்³கோ³ யே கிலேஸே பஜஹதி, தே அதீதா வா அனாக³தா வா பச்சுப்பன்னா வாதி ந வத்தப்³பா³. ந ச மக்³கோ³ கிலேஸே ந பஜஹதி. யே பன மக்³கோ³ கிலேஸே பஜஹதி, தே ஸந்தா⁴ய ‘உப்பன்னானம் பாபகான’ந்திஆதி³ வுத்தம்.

ந கேவலஞ்ச மக்³கோ³ கிலேஸேயேவ பஜஹதி, கிலேஸானம் பன அப்பஹீனத்தா யே உப்பஜ்ஜேய்யும் உபாதி³ன்னக்க²ந்தா⁴, தேபி பஜஹதியேவ. வுத்தம்பி சேதம் ‘‘ஸோதாபத்திமக்³க³ஞாணேன அபி⁴ஸங்கா²ரவிஞ்ஞாணஸ்ஸ நிரோதே⁴ன ஸத்த ப⁴வே ட²பேத்வா அனமதக்³கே³ ஸம்ஸாரே யே உப்பஜ்ஜேய்யும் நாமஞ்ச ரூபஞ்ச ஏத்தே²தே நிருஜ்ஜ²ந்தீ’’தி (சூளனி. அஜிதமாணவபுச்சா²னித்³தே³ஸ 6) வித்தா²ரோ. இதி மக்³கோ³ உபாதி³ன்னதோ அனுபாதி³ன்னதோ ச வுட்டா²தி. ப⁴வவஸேன பன ஸோதாபத்திமக்³கோ³ அபாயப⁴வதோ வுட்டா²தி. ஸகதா³கா³மிமக்³கோ³ ஸுக³திப⁴வேகதே³ஸதோ; அனாகா³மிமக்³கோ³ ஸுக³திகாமப⁴வதோ; வுட்டா²தி அரஹத்தமக்³கோ³ ரூபாரூபப⁴வதோ வுட்டா²தி, ஸப்³ப³ப⁴வேஹி வுட்டா²தியேவாதிபி வத³ந்தி.

அத² மக்³க³க்க²ணே கத²ம் அனுப்பன்னானம் உப்பாதா³ய பா⁴வனா ஹோதி? கத²ம் வா உப்பன்னானம் டி²தியாதி? மக்³க³ப்பவத்தியா ஏவ. மக்³கோ³ ஹி பவத்தமானோ புப்³பே³ அனுப்பன்னபுப்³ப³த்தா அனுப்பன்னோ நாம வுச்சதி. அனாக³தபுப்³ப³ஞ்ஹி டா²னம் க³ந்த்வா அனனுபூ⁴தபுப்³ப³ம் வா ஆரம்மணம் அனுப⁴வித்வா வத்தாரோ ப⁴வந்தி – ‘அனாக³தட்டா²னம் ஆக³தம்ஹ, அனனுபூ⁴தம் ஆரம்மணம் அனுப⁴வாமா’தி. யா சஸ்ஸ பவத்தி, அயமேவ டி²தி நாமாதி டி²தியா பா⁴வேதீதி வத்தும் வட்டதி. ஏவமேதஸ்ஸ பி⁴க்கு²னோ இத³ம் லோகுத்தரமக்³க³க்க²ணே வீரியம் ‘‘அனுப்பன்னானம் பாபகானம் அகுஸலானம் த⁴ம்மானம் அனுப்பாதா³யா’’திஆதீ³னி சத்தாரி நாமானி லப⁴தி. அயம் லோகுத்தரமக்³க³க்க²ணே ஸம்மப்பதா⁴னகதா². ஏவமேத்த² லோகியலோகுத்தரமிஸ்ஸகா ஸம்மப்பதா⁴னா நித்³தி³ட்டா²தி.

ஸுத்தந்தபா⁴ஜனீயவண்ணனா.

2. அபி⁴த⁴ம்மபா⁴ஜனீயவண்ணனா

408. அபி⁴த⁴ம்மபா⁴ஜனீயே ஸப்³பா³னிபி ஸம்மப்பதா⁴னானி த⁴ம்மஸங்க³ணியம் விப⁴த்தஸ்ஸ தே³ஸனானயஸ்ஸ முக²மத்தமேவ த³ஸ்ஸேந்தேன நித்³தி³ட்டா²னி. தத்த² நயபே⁴தோ³ வேதி³தப்³போ³. கத²ம்? பட²மஸம்மப்பதா⁴னே தாவ ஸோதாபத்திமக்³கே³ ஜா²னாபி⁴னிவேஸே ஸுத்³தி⁴கபடிபதா³, ஸுத்³தி⁴கஸுஞ்ஞதா, ஸுஞ்ஞதபடிபதா³, ஸுத்³தி⁴கஅப்பணிஹிதா, அப்பணிஹிதபடிபதா³தி இமேஸு பஞ்சஸு டா²னேஸு த்³வின்னம் த்³வின்னம் சதுக்கபஞ்சகனயானம் வஸேன த³ஸ நயா ஹோந்தி. ஏவம் ஸேஸேஸுபீதி வீஸதியா அபி⁴னிவேஸேஸு த்³வே நயஸதானி. தானி சதூஹி அதி⁴பதீஹி சதுக்³கு³ணிதானி அட்ட². இதி ஸுத்³தி⁴கானி த்³வே ஸாதி⁴பதீனி அட்டா²தி ஸப்³ப³ம்பி நயஸஹஸ்ஸம் ஹோதி. ததா²து³தியஸம்மப்பதா⁴னாதீ³ஸு ஸுத்³தி⁴கஸம்மப்பதா⁴னே சாதி ஸோதாபத்திமக்³கே³ பஞ்சனயஸஹஸ்ஸானி. யதா² ச ஸோதாபத்திமக்³கே³, ஏவம் ஸேஸமக்³கே³ஸுபீதி குஸலவஸேனேவ வீஸதி நயஸஹஸ்ஸானி. விபாகே பன ஸம்மப்பதா⁴னேஹி கத்தப்³ப³கிச்சம் நத்தீ²தி விபாகவாரோ ந க³ஹிதோதி. ஸம்மப்பதா⁴னானி பனேத்த² நிப்³ப³த்திதலோகுத்தரானேவ கதி²தானீதி வேதி³தப்³பா³னி.

அபி⁴த⁴ம்மபா⁴ஜனீயவண்ணனா.

3. பஞ்ஹாபுச்ச²கவண்ணனா

427. பஞ்ஹாபுச்ச²கே பாளிஅனுஸாரேனேவ ஸம்மப்பதா⁴னானம் குஸலாதி³பா⁴வோ வேதி³தப்³போ³. ஆரம்மணத்திகேஸு பன ஸப்³பா³னிபி ஏதானி அப்பமாணம் நிப்³பா³னம் ஆரப்³ப⁴ பவத்திதோ அப்பமாணாரம்மணானேவ, ந மக்³கா³ரம்மணானி; ஸஹஜாதஹேதுவஸேன பன மக்³க³ஹேதுகானி; வீமம்ஸம் ஜேட்ட²கம் கத்வா மக்³க³பா⁴வனாகாலே மக்³கா³தி⁴பதீனி; ச²ந்த³சித்தஜேட்டி²காய மக்³க³பா⁴வனாய ந வத்தப்³பா³னி மக்³கா³தி⁴பதீனீதி; வீரியஜேட்டி²காய பன அஞ்ஞஸ்ஸ வீரியஸ்ஸ அபா⁴வா ந வத்தப்³பா³னி மக்³கா³தி⁴பதீனீதி வா ந மக்³கா³தி⁴பதீனீதி வா; அதீதாதீ³ஸு ஏகாரம்மணபா⁴வேனபி ந வத்தப்³பா³னி; நிப்³பா³னஸ்ஸ பன ப³ஹித்³தா⁴த⁴ம்மத்தா ப³ஹித்³தா⁴ரம்மணானி நாம ஹோந்தீதி. ஏவமேதஸ்மிம் பஞ்ஹாபுச்ச²கே நிப்³ப³த்திதலோகுத்தரானேவ ஸம்மப்பதா⁴னானி கதி²தானி. ஸம்மாஸம்பு³த்³தே⁴ன ஹி ஸுத்தந்தபா⁴ஜனீயஸ்மிம்யேவ லோகியலோகுத்தரமிஸ்ஸகா ஸம்மப்பதா⁴னா கதி²தா; அபி⁴த⁴ம்மபா⁴ஜனீயபஞ்ஹாபுச்ச²கேஸு பன லோகுத்தராயேவாதி. ஏவமயம் ஸம்மப்பதா⁴னவிப⁴ங்கோ³பி தேபரிவட்டம் நீஹரித்வாவ பா⁴ஜேத்வா த³ஸ்ஸிதோதி.

ஸம்மோஹவினோத³னியா விப⁴ங்க³ட்ட²கதா²ய

ஸம்மப்பதா⁴னவிப⁴ங்க³வண்ணனா நிட்டி²தா.