3. பஞ்ஹாபுச்ச²கவண்ணனா

215. பஞ்ஹாபுச்ச²கே சதுன்னம்பி ஸச்சானம் க²ந்த⁴விப⁴ங்கே³ வுத்தனயானுஸாரேனேவ குஸலாதி³பா⁴வோ வேதி³தப்³போ³. ஆரம்மணத்திகேஸு பன ஸமுத³யஸச்சம் காமாவசரத⁴ம்மே அஸ்ஸாதே³ந்தஸ்ஸ பரித்தாரம்மணம் ஹோதி, மஹக்³க³தத⁴ம்மே அஸ்ஸாதே³ந்தஸ்ஸ மஹக்³க³தாரம்மணம், பஞ்ஞத்திம் அஸ்ஸாதே³ந்தஸ்ஸ நவத்தப்³பா³ரம்மணம். து³க்க²ஸச்சம் காமாவசரத⁴ம்மே ஆரப்³ப⁴ உப்பன்னம் பரித்தாரம்மணம், ரூபாரூபாவசரத⁴ம்மே ஆரப்³ப⁴ உப்பத்திகாலே மஹக்³க³தாரம்மணம், நவ லோகுத்தரத⁴ம்மே பச்சவேக்க²ணகாலே அப்பமாணாரம்மணம், பண்ணத்திம் பச்சவேக்க²ணகாலே நவத்தப்³பா³ரம்மணம். மக்³க³ஸச்சம் ஸஹஜாதஹேதுவஸேன ஸப்³ப³தா³பி மக்³க³ஹேதுகம் வீரியம் வா வீமம்ஸம் வா ஜேட்ட²கம் கத்வா மக்³க³பா⁴வனாகாலே மக்³கா³தி⁴பதி, ச²ந்த³சித்தேஸு அஞ்ஞதராதி⁴பதிகாலே நவத்தப்³ப³ம் நாம ஹோதி. து³க்க²ஸச்சம் அரியானம் மக்³க³பச்சவேக்க²ணகாலே மக்³கா³ரம்மணம், தேஸம்யேவ மக்³க³ம் க³ரும் கத்வா பச்சவேக்க²ணகாலே மக்³கா³தி⁴பதி, ஸேஸத⁴ம்மபச்சவேக்க²ணகாலே நவத்தப்³ப³ம் ஹோதி.

த்³வே ஸச்சானீதி து³க்க²ஸமுத³யஸச்சானி. ஏதானி ஹி அதீதாதி³பே⁴தே³ த⁴ம்மே ஆரப்³ப⁴ உப்பத்திகாலே அதீதாதி³ஆரம்மணானி ஹோந்தி. ஸமுத³யஸச்சம் அஜ்ஜ²த்தாதி³பே⁴தே³ த⁴ம்மே அஸ்ஸாதே³ந்தஸ்ஸ அஜ்ஜ²த்தாதி³ஆரம்மணம் ஹோதி, து³க்க²ஸச்சம் ஆகிஞ்சஞ்ஞாயதனகாலே நவத்தப்³பா³ரம்மணம்பீதி வேதி³தப்³ப³ம். இதி இமஸ்மிம் பஞ்ஹாபுச்ச²கே த்³வே ஸச்சானி லோகியானி ஹோந்தி, த்³வே லோகுத்தரானி. யதா² ச இமஸ்மிம், ஏவம் புரிமேஸுபி த்³வீஸு. ஸம்மாஸம்பு³த்³தே⁴ன ஹி தீஸுபி ஸுத்தந்தபா⁴ஜனீயாதீ³ஸு லோகியலோகுத்தரானேவ ஸச்சானி கதி²தானி. ஏவமயம் ஸச்சவிப⁴ங்கோ³பி தேபரிவட்டம் நீஹரித்வாவ பா⁴ஜேத்வா த³ஸ்ஸிதோதி.

ஸம்மோஹவினோத³னீயா விப⁴ங்க³ட்ட²கதா²ய

ஸச்சவிப⁴ங்க³வண்ணனா நிட்டி²தா.