5. இந்த்³ரியவிப⁴ங்கோ³

1. அபி⁴த⁴ம்மபா⁴ஜனீயவண்ணனா

219. இதா³னி தத³னந்தரே இந்த்³ரியவிப⁴ங்கே³ பா³வீஸதீதி க³ணனபரிச்சே²தோ³. இந்த்³ரியானீதி பரிச்சி²ன்னத⁴ம்மனித³ஸ்ஸனம். இதா³னி தானி ஸரூபதோ த³ஸ்ஸேந்தோ சக்கு²ந்த்³ரியந்திஆதி³மாஹ. தத்த² சக்கு²த்³வாரே இந்த³ட்ட²ம் காரேதீதி சக்கு²ந்த்³ரியம். ஸோதகா⁴னஜிவ்ஹாகாயத்³வாரே இந்த³ட்ட²ம் காரேதீதி காயிந்த்³ரியம். விஜானனலக்க²ணே இந்த³ட்ட²ம் காரேதீதி மனிந்த்³ரியம். இத்தி²பா⁴வே இந்த³ட்ட²ம் காரேதீதி இத்தி²ந்த்³ரியம். புரிஸபா⁴வே இந்த³ட்ட²ம் காரேதீதி புரிஸிந்த்³ரியம். அனுபாலனலக்க²ணே இந்த³ட்ட²ம் காரேதீதி ஜீவிதிந்த்³ரியம். ஸுக²லக்க²ணே இந்த³ட்ட²ம் காரேதீதி ஸுகி²ந்த்³ரியம். து³க்க²ஸோமனஸ்ஸ தோ³மனஸ்ஸ உபேக்கா²லக்க²ணே இந்த³ட்ட²ம் காரேதீதி உபேக்கி²ந்த்³ரியம். அதி⁴மோக்க²லக்க²ணே இந்த³ட்ட²ம் காரேதீதி ஸத்³தி⁴ந்த்³ரியம். பக்³க³ஹலக்க²ணே இந்த³ட்ட²ம் காரேதீதி வீரியிந்த்³ரியம். உபட்டா²னலக்க²ணே இந்த³ட்ட²ம் காரேதீதி ஸதிந்த்³ரியம். அவிக்கே²பலக்க²ணே இந்த³ட்ட²ம் காரேதீதி ஸமாதி⁴ந்த்³ரியம். த³ஸ்ஸனலக்க²ணே இந்த³ட்ட²ம் காரேதீதி பஞ்ஞிந்த்³ரியம். அனஞ்ஞாதஞ்ஞஸ்ஸாமீதி பவத்தே ஜானனலக்க²ணே இந்த³ட்ட²ம் காரேதீதி அனஞ்ஞாதஞ்ஞஸ்ஸாமீதிந்த்³ரியம். ஞாதானம்யேவ த⁴ம்மானம் புன ஆஜானனே இந்த³ட்ட²ம் காரேதீதி அஞ்ஞிந்த்³ரியம். அஞ்ஞாதாவீபா⁴வே இந்த³ட்ட²ம் காரேதீதி அஞ்ஞாதாவிந்த்³ரியம்.

இத⁴ ஸுத்தந்தபா⁴ஜனீயம் நாம ந க³ஹிதம். கஸ்மா? ஸுத்தந்தே இமாய படிபாடியா பா³வீஸதியா இந்த்³ரியானம் அனாக³தத்தா. ஸுத்தந்தஸ்மிஞ்ஹி கத்த²சி த்³வே இந்த்³ரியானி கதி²தானி, கத்த²சி தீணி, கத்த²சி பஞ்ச. ஏவம் பன நிரந்தரம் த்³வாவீஸதி ஆக³தானி நாம நத்தி². அயம் தாவேத்த² அட்ட²கதா²னயோ. அயம் பன அபரோ நயோ – ஏதேஸு ஹி

அத்த²தோ லக்க²ணாதீ³ஹி, கமதோ ச விஜானியா;

பே⁴தா³பே⁴தா³ ததா² கிச்சா, பூ⁴மிதோ ச வினிச்ச²யம்.

தத்த² சக்கா²தீ³னம் தாவ ‘‘சக்க²தீதி சக்கூ²’’திஆதி³னா நயேன அத்தோ² பகாஸிதோ. பச்சி²மேஸு பன தீஸு பட²மம் ‘புப்³ப³பா⁴கே³ அனஞ்ஞாதம் அமதம் பத³ம் சதுஸச்சத⁴ம்மம் வா ஜானிஸ்ஸாமீ’தி ஏவம் படிபன்னஸ்ஸ உப்பஜ்ஜனதோ இந்த்³ரியட்ட²ஸம்ப⁴வதோ ச அனஞ்ஞாதஞ்ஞஸ்ஸாமீதிந்த்³ரியந்தி வுத்தம். து³தியம் ஆஜானனதோ ச இந்த்³ரியட்ட²ஸம்ப⁴வதோ ச அஞ்ஞிந்த்³ரியம். ததியம் அஞ்ஞாதாவினோ சதூஸு ஸச்சேஸு நிட்டி²தஞாணகிச்சஸ்ஸ கீ²ணாஸவஸ்ஸேவ உப்பஜ்ஜனதோ இந்த்³ரியட்ட²ஸம்ப⁴வதோ ச அஞ்ஞாதாவிந்த்³ரியம்.

கோ பனேஸ இந்த்³ரியட்டோ² நாமாதி? இந்த³லிங்க³ட்டோ² இந்த்³ரியட்டோ², இந்த³தே³ஸிதட்டோ² இந்த்³ரியட்டோ², இந்த³தி³ட்ட²ட்டோ² இந்த்³ரியட்டோ², இந்த³ஸிட்ட²ட்டோ² இந்த்³ரியட்டோ², இந்த³ஜுட்ட²ட்டோ² இந்த்³ரியட்டோ². ஸோ ஸப்³போ³பி இத⁴ யதா²யோக³ம் யுஜ்ஜதி. ப⁴க³வா ஹி ஸம்மாஸம்பு³த்³தோ⁴ பரமிஸ்ஸரியபா⁴வதோ இந்தோ³. குஸலாகுஸலஞ்ச கம்மம் கம்மேஸு கஸ்ஸசி இஸ்ஸரியாபா⁴வதோ. தேனேவேத்த² கம்மஸஞ்ஜனிதானி இந்த்³ரியானி குஸலாகுஸலகம்மம் உல்லிங்கே³ந்தி. தேன ச ஸிட்டா²னீதி இந்த³லிங்க³ட்டே²ன இந்த³ஸிட்ட²ட்டே²ன ச இந்த்³ரியானி. ஸப்³பா³னேவ பனேதானி ப⁴க³வதா யதா²பூ⁴ததோ பகாஸிதானி ச அபி⁴ஸம்பு³த்³தா⁴னி சாதி இந்த³தே³ஸிதட்டே²ன இந்த³தி³ட்ட²ட்டே²ன ச இந்த்³ரியானி. தேனேவ ப⁴க³வதா முனிந்தே³ன கானிசி கோ³சராஸேவனாய, கானிசி பா⁴வனாஸேவனாய ஸேவிதானீதி இந்த³ஜுட்ட²ட்டே²னபி இந்த்³ரியானி. அபிச ஆதி⁴பச்சஸங்கா²தேன இஸ்ஸரியட்டே²னாபி ஏதானி இந்த்³ரியானி. சக்கு²விஞ்ஞாணாதி³ப்பவத்தியஞ்ஹி சக்கா²தீ³னம் ஸித்³த⁴மாதி⁴பச்சம்; தஸ்மிம் திக்கே² திக்க²த்தா மந்தே³ ச மந்த³த்தாதி. அயம் தாவேத்த² ‘அத்த²தோ’ வினிச்ச²யோ.

‘லக்க²ணாதீ³ஹீ’தி லக்க²ணரஸபச்சுபட்டா²னபத³ட்டா²னேஹிபி சக்கா²தீ³னம் வினிச்ச²யம் விஜானியாதி அத்தோ². தானி நேஸம் லக்க²ணாதீ³னி ஹேட்டா² வுத்தனயானேவ. பஞ்ஞிந்த்³ரியாதீ³னி ஹி சத்தாரி அத்த²தோ அமோஹோயேவ. ஸேஸானி தத்த² ஸரூபேனேவாக³தானி.

‘கமதோ’தி அயம்பி தே³ஸனாக்கமோவ. தத்த² அஜ்ஜ²த்தத⁴ம்மம் பரிஞ்ஞாய அரியபூ⁴மிபடிலாபோ⁴ ஹோதீதி அத்தபா⁴வபரியாபன்னானி சக்கு²ந்த்³ரியாதீ³னி பட²மம் தே³ஸிதானி. ஸோ பனத்தபா⁴வோ யம் த⁴ம்மம் உபாதா³ய இத்தீ²தி வா புரிஸோதி வா ஸங்க²ம் க³ச்ச²தி, அயம் ஸோதி நித³ஸ்ஸனத்த²ம் ததோ இத்தி²ந்த்³ரியம் புரிஸிந்த்³ரியஞ்ச. ஸோ து³விதோ⁴பி ஜீவிதிந்த்³ரியபடிப³த்³த⁴வுத்தீதி ஞாபனத்த²ம் ததோ ஜீவிதிந்த்³ரியம். யாவ தஸ்ஸ பவத்தி தாவ ஏதேஸம் வேத³யிதானம் அனிவத்தி. யம் கிஞ்சி வேத³யிதம் ஸப்³ப³ம் தம் ஸுக²து³க்க²ந்தி ஞாபனத்த²ம் ததோ ஸுகி²ந்த்³ரியாதீ³னி. தம்னிரோத⁴த்த²ம் பன ஏதே த⁴ம்மா பா⁴வேதப்³பா³தி படிபத்தித³ஸ்ஸனத்த²ம் ததோ ஸத்³தா⁴தீ³னி. இமாய படிபத்தியா ஏஸ த⁴ம்மோ பட²மம் அத்தனி பாதுப⁴வதீதி படிபத்தியா அமோக⁴பா⁴வத³ஸ்ஸனத்த²ம் ததோ அனஞ்ஞாதஞ்ஞஸ்ஸாமீதிந்த்³ரியம். தஸ்ஸேவ ப²லத்தா ததோ அனந்தரம் பா⁴வேதப்³ப³த்தா ச ததோ அஞ்ஞிந்த்³ரியம். இதோ பரம் பா⁴வனாய இமஸ்ஸ அதி⁴க³மோ, அதி⁴க³தே ச பனிமஸ்மிம் நத்தி² கிஞ்சி உத்தரி கரணீயந்தி ஞாபனத்த²ம் அந்தே பரமஸ்ஸாஸபூ⁴தம் அஞ்ஞாதாவிந்த்³ரியம் தே³ஸிதந்தி அயமேத்த² கமோ.

‘பே⁴தா³பே⁴தா³’தி ஜீவிதிந்த்³ரியஸ்ஸேவ சேத்த² பே⁴தோ³. தஞ்ஹி ரூபஜீவிதிந்த்³ரியம் அரூபஜீவிதிந்த்³ரியந்தி து³வித⁴ம் ஹோதி. ஸேஸானம் அபே⁴தோ³தி ஏவமேத்த² பே⁴தா³பே⁴த³தோ வினிச்ச²யம் விஜானியா.

‘கிச்சா’தி கிம் இந்த்³ரியானம் கிச்சந்தி சே? சக்கு²ந்த்³ரியஸ்ஸ தாவ ‘‘சக்கா²யதனம் சக்கு²விஞ்ஞாணதா⁴துயா தம்ஸம்பயுத்தகானஞ்ச த⁴ம்மானம் இந்த்³ரியபச்சயேன பச்சயோ’’தி வசனதோ யம் தம் இந்த்³ரியபச்சயபா⁴வேன ஸாதே⁴தப்³ப³ம் அத்தனோ திக்க²மந்தா³தி³பா⁴வேன சக்கு²விஞ்ஞாணாதி³த⁴ம்மானம் திக்க²மந்தா³தி³ஸங்கா²தம் அத்தாகாரானுவத்தாபனம் இத³ம் ‘கிச்சம்’. ஏவம் ஸோதகா⁴னஜிவ்ஹாகாயானம். மனிந்த்³ரியஸ்ஸ பன ஸஹஜாதத⁴ம்மானம் அத்தனோ வஸவத்தாபனம், ஜீவிதிந்த்³ரியஸ்ஸ ஸஹஜாதத⁴ம்மானுபாலனம், இத்தி²ந்த்³ரியபுரிஸிந்த்³ரியானம் இத்தி²புரிஸனிமித்தகுத்தாகப்பாகாரானுவிதா⁴னம், ஸுக²து³க்க²ஸோமனஸ்ஸதோ³மனஸ்ஸிந்த்³ரியானம் ஸஹஜாதத⁴ம்மே அபி⁴ப⁴வித்வா யதா²ஸகம் ஓளாரிகாகாரானுபாபனம், உபேக்கி²ந்த்³ரியஸ்ஸ ஸந்தபணீதமஜ்ஜ²த்தாகாரானுபாபனம், ஸத்³தா⁴தீ³னம் படிபக்கா²பி⁴ப⁴வனம் ஸம்பயுத்தத⁴ம்மானஞ்ச பஸன்னாகாராதி³பா⁴வஸம்பாபனம், அனஞ்ஞாதஞ்ஞஸ்ஸாமீதிந்த்³ரியஸ்ஸ ஸம்யோஜனத்தயப்பஹானஞ்சேவ ஸம்பயுத்தகானஞ்ச தப்பஹானாபி⁴முக²பா⁴வகரணம், அஞ்ஞிந்த்³ரியஸ்ஸ காமராக³ப்³யாபாதா³தி³தனுகரணபஹானஞ்சேவ ஸஹஜாதானஞ்ச அத்தனோ வஸானுவத்தாபனம், அஞ்ஞாதாவிந்த்³ரியஸ்ஸ ஸப்³ப³கிச்சேஸு உஸ்ஸுக்கப்பஹானஞ்சேவ அமதாபி⁴முக²பா⁴வபச்சயதா ச ஸம்பயுத்தானந்தி ஏவமேத்த² கிச்சதோ வினிச்ச²யம் விஜானியா.

‘பூ⁴மிதோ’தி சக்கு²ஸோதகா⁴னஜிவ்ஹாகாயஇத்தி²புரிஸஸுக²து³க்க²தோ³மனஸ்ஸிந்த்³ரியானி சேத்த² காமாவசரானேவ. மனிந்த்³ரியஜீவிதிந்த்³ரியஉபேக்கி²ந்த்³ரியானி, ஸத்³தா⁴வீரியஸதிஸமாதி⁴பஞ்ஞிந்த்³ரியானி ச சதுபூ⁴மிபரியாபன்னானி. ஸோமனஸ்ஸிந்த்³ரியம் காமாவசர-ரூபாவசர-லோகுத்தரவஸேன பூ⁴மித்தயபரியாபன்னம். அவஸானே தீணி லோகுத்தரானேவாதி ஏவம் பூ⁴மிதோ வினிச்ச²யம் விஜானியா. ஏவஞ்ஹி விஜானந்தோ –

ஸம்வேக³ப³ஹுலோ பி⁴க்கு², டி²தோ இந்த்³ரியஸம்வரே;

இந்த்³ரியானி பரிஞ்ஞாய, து³க்க²ஸ்ஸந்தம் நிக³ச்ச²தீதி.

220. நித்³தே³ஸவாரே ‘‘யம் சக்கு² சதுன்னம் மஹாபூ⁴தான’’ந்திஆதி³ ஸப்³ப³ம் த⁴ம்மஸங்க³ணியம் பத³பா⁴ஜனே (த⁴. ஸ. அட்ட². 595 ஆத³யோ) வுத்தனயேனேவ வேதி³தப்³ப³ம். வீரியிந்த்³ரியஸமாதி⁴ந்த்³ரியனித்³தே³ஸாதீ³ஸு ச ஸம்மாவாயாமோ மிச்சா²வாயாமோ ஸம்மாஸமாதி⁴ மிச்சா²ஸமாதீ⁴திஆதீ³னி ந வுத்தானி. கஸ்மா? ஸப்³ப³ஸங்கா³ஹகத்தா. ஸப்³ப³ஸங்கா³ஹகானி ஹி இத⁴ இந்த்³ரியானி கதி²தானி. ஏவம் ஸந்தேபேத்த² த³ஸ இந்த்³ரியானி லோகியானி காமாவசரானேவ, தீணி லோகுத்தரானி, நவ லோகியலோகுத்தரமிஸ்ஸகானீதி.

அபி⁴த⁴ம்மபா⁴ஜனீயவண்ணனா.

2. பஞ்ஹாபுச்ச²கவண்ணனா

221. பஞ்ஹாபுச்ச²கே ஸப்³பே³ஸம்பி இந்த்³ரியானம் குஸலாதி³விபா⁴கோ³ பாளினயானுஸாரேனேவ வேதி³தப்³போ³.

223. ஆரம்மணத்திகேஸு பன ஸத்திந்த்³ரியா அனாரம்மணாதி சக்கு²ஸோதகா⁴னஜிவ்ஹாகாயஇத்தி²புரிஸிந்த்³ரியானி ஸந்தா⁴ய வுத்தம். ஜீவிதிந்த்³ரியம் பன அரூபமிஸ்ஸகத்தா இத⁴ அனாப⁴ட்ட²ம். த்³விந்த்³ரியாதி த்³வே இந்த்³ரியா; ஸுக²து³க்க²த்³வயம் ஸந்தா⁴யேதம் வுத்தம். தஞ்ஹி ஏகந்தபரித்தாரம்மணம். தோ³மனஸ்ஸிந்த்³ரியம் ஸியா பரித்தாரம்மணம், ஸியா மஹக்³க³தாரம்மணந்தி காமாவசரத⁴ம்மே ஆரப்³ப⁴ பவத்திகாலே பரித்தாரம்மணம் ஹோதி, ரூபாவசராரூபாவசரே பன ஆரப்³ப⁴ பவத்திகாலே மஹக்³க³தாரம்மணம், பண்ணத்திம் ஆரப்³ப⁴ பவத்திகாலே நவத்தப்³பா³ரம்மணம். நவிந்த்³ரியா ஸியா பரித்தாரம்மணாதி மனிந்த்³ரியஜீவிதிந்த்³ரியஸோமனஸ்ஸிந்த்³ரியஉபேக்கி²ந்த்³ரியானி சேவ ஸத்³தா⁴தி³பஞ்சகஞ்ச ஸந்தா⁴ய இத³ம் வுத்தம். ஜீவிதிந்த்³ரியஞ்ஹி ரூபமிஸ்ஸகத்தா அனாரம்மணேஸு ரூபத⁴ம்மேஸு ஸங்க³ஹிதம்பி அரூபகோட்டா²ஸேன ஸியாபக்கே² ஸங்க³ஹிதம்.

சத்தாரி இந்த்³ரியானீதி ஸுக²து³க்க²தோ³மனஸ்ஸஅஞ்ஞாதாவிந்த்³ரியானி. தானி ஹி மக்³கா³ரம்மணத்திகே ந ப⁴ஜந்தி. மக்³க³ஹேதுகந்தி ஸஹஜாதஹேதும் ஸந்தா⁴ய வுத்தம். வீரியவீமம்ஸாஜேட்ட²ககாலே ஸியா மக்³கா³தி⁴பதி, ச²ந்த³சித்தஜேட்ட²ககாலே ஸியா நவத்தப்³பா³.

த³ஸிந்த்³ரியா ஸியா உப்பன்னா, ஸியா உப்பாதி³னோதி ஸத்த ரூபிந்த்³ரியானி தீணி ச விபாகிந்த்³ரியானி ஸந்தா⁴யேதம் வுத்தம். த³ஸிந்த்³ரியானி தோ³மனஸ்ஸேன ஸத்³தி⁴ம் ஹேட்டா² வுத்தானேவ. தத்த² தோ³மனஸ்ஸிந்த்³ரியம் பண்ணத்திம் ஆரப்³ப⁴ பவத்திகாலே நவத்தப்³பா³ரம்மணம், ஸேஸானி நிப்³பா³னபச்சவேக்க²ணகாலேபி. தீணிந்த்³ரியானி ப³ஹித்³தா⁴ரம்மணானீதி தீணி லோகுத்தரிந்த்³ரியானி. சத்தாரீதி ஸுக²து³க்க²ஸோமனஸ்ஸதோ³மனஸ்ஸானி. தானி ஹி அஜ்ஜ²த்தத⁴ம்மேபி ப³ஹித்³தா⁴த⁴ம்மேபி ஆரப்³ப⁴ பவத்தந்தி. அட்டி²ந்த்³ரியாதி மனிந்த்³ரியஜீவிதிந்த்³ரியஉபேக்கி²ந்த்³ரியானி சேவ ஸத்³தா⁴தி³பஞ்சகஞ்ச. தத்த² ஆகிஞ்சஞ்ஞாயதனகாலே நவத்தப்³பா³ரம்மணதா வேதி³தப்³பா³.

இதி இமஸ்மிம்பி பஞ்ஹாபுச்ச²கே த³ஸிந்த்³ரியானி காமாவசரானி, தீணி லோகுத்தரானி, நவ லோகியலோகுத்தரமிஸ்ஸகானேவ கதி²தானீதி. அயம்பி அபி⁴த⁴ம்மபா⁴ஜனீயேன ஸத்³தி⁴ம் ஏகபரிச்சே²தோ³வ ஹோதி. அயம் பன இந்த்³ரியவிப⁴ங்கோ³ த்³வேபரிவட்டம் நீஹரித்வா பா⁴ஜேத்வா த³ஸ்ஸிதோதி.

ஸம்மோஹவினோத³னியா விப⁴ங்க³ட்ட²கதா²ய

இந்த்³ரியவிப⁴ங்க³வண்ணனா நிட்டி²தா.