(2.) து³கனித்³தே³ஸவண்ணனா

891. து³கேஸு கோத⁴னித்³தே³ஸாத³யோ ஹேட்டா² வுத்தனயேனேவ வேதி³தப்³பா³. ஹேட்டா² அனாக³தேஸு பன உபனாஹனித்³தே³ஸாதீ³ஸு புப்³ப³காலம் கோத⁴ம் உபனய்ஹதீதி அபரகாலகோதோ⁴ உபனாஹோ நாம. உபனய்ஹனாகாரோ உபனய்ஹனா. உபனய்ஹிதஸ்ஸ பா⁴வோ உபனய்ஹிதத்தம். அட்ட²பனாதி பட²முப்பன்னஸ்ஸ அனந்தரட்ட²பனா மரியாத³ட்ட²பனா வா. ட²பனாதி பகதிட²பனா. ஸண்ட²பனாதி ஸப்³ப³தோபா⁴கே³ன புனப்புனம் ஆகா⁴தட்ட²பனா. அனுஸம்ஸந்த³னாதி பட²முப்பன்னேன கோதே⁴ன ஸத்³தி⁴ம் அந்தரம் அத³ஸ்ஸேத்வா ஏகீபா⁴வகரணா. அனுப்பப³ந்த⁴னாதி புரிமேன ஸத்³தி⁴ம் பச்சி²மஸ்ஸ க⁴டனா. த³ள்ஹீகம்மந்தி தி²ரகரணம். அயம் வுச்சதீதி அயம் உபனந்த⁴னலக்க²ணோ வேரம் அப்படினிஸ்ஸஜ்ஜனரஸோ உபனாஹோதி வுச்சதி; யேன ஸமன்னாக³தோ புக்³க³லோ வேரம் நிஸ்ஸஜ்ஜிதும் ந ஸக்கோதி; ‘ஏவம் நாம மம் ஏஸ வத்தும் அனனுச்ச²விகோ’தி அபராபரம் அனுப³ந்த⁴தி; ஆதி³த்தபூதிஅலாதம் விய ஜலதேவ; தோ⁴வியமானம் அச்ச²சம்மம் விய, வஸாதேலமக்கி²தபிலோதிகா விய ச ந பரிஸுஜ்ஜ²தி.

892. மக்க²னபா⁴வவஸேன மக்கோ²; பரகு³ணமக்க²னாய பவத்தேந்தோபி அத்தனோ காரணம், கூ³த²பஹரணகம் கூ³தோ² விய, பட²மதரம் மக்கே²தீதி அத்தோ². ததோ பரா த்³வே ஆகாரபா⁴வனித்³தே³ஸா. நிட்டு²ரபா⁴வோ நிட்டு²ரியம்; ‘தம் நிஸ்ஸாய ஏத்தகம்பி நத்தீ²’தி கே²ளபாதனந்தி அத்தோ². நிட்டு²ரியகம்மந்தி நிட்டு²ரியகரணம். க³ஹட்டோ² வா ஹி க³ஹட்ட²ம், பி⁴க்கு² வா பி⁴க்கு²ம் நிஸ்ஸாய வஸந்தோ அப்பமத்தகேனேவ குஜ்ஜி²த்வா ‘தம் நிஸ்ஸாய ஏத்தகம்பி நத்தீ²’தி கே²ளம் பாதேத்வா பாதே³ன மத்³த³ந்தோ விய நிட்டு²ரியம் நாம கரோதி. தஸ்ஸ தம் கம்மம் நிட்டு²ரியகம்மந்தி வுச்சதி. லக்க²ணாதி³தோ பனேஸ பரகு³ணமக்க²னலக்க²ணோ மக்கோ², தேஸம் வினாஸனரஸோ, பரேன ஸுகதானம் கிரியானம் அவச்சா²த³னபச்சுபட்டா²னோ.

பளாஸதீதி பளாஸோ; பரஸ்ஸ கு³ணே த³ஸ்ஸேத்வா அத்தனோ கு³ணேஹி ஸமம் கரோதீதி அத்தோ². பளாஸஸ்ஸ ஆயனா பளாஸாயனா. பளாஸோ ச ஸோ அத்தனோ ஜயாஹரணதோ ஆஹாரோ சாதி பளாஸாஹாரோ. விவாத³ட்டா²னந்தி விவாத³காரணம். யுக³க்³கா³ஹோதி ஸமது⁴ரக்³க³ஹணம். அப்படினிஸ்ஸக்³கோ³தி அத்தனா க³ஹிதஸ்ஸ அப்படினிஸ்ஸஜ்ஜனம். லக்க²ணாதி³தோ பனேஸ யுக³க்³கா³ஹலக்க²ணோ பளாஸோ, பரகு³ணேஹி அத்தனோ கு³ணானம் ஸமகரணரஸோ, பரேஸம் கு³ணப்பமாணேன உபட்டா²னபச்சுபட்டா²னோ. பளாஸீ ஹி புக்³க³லோ து³தியஸ்ஸ து⁴ரம் ந தே³தி, ஸமம் பஸாரேத்வா திட்ட²தி, ஸாகச்ச²மண்ட³லே அஞ்ஞேன பி⁴க்கு²னா ப³ஹூஸு ஸுத்தேஸு ச காரணேஸு ச ஆப⁴தேஸுபி ‘தவ ச மம ச வாதே³ கிம் நாம நானாகரணம்? நனு மஜ்ஜே² பி⁴ன்னஸுவண்ணம் விய ஏகஸதி³ஸமேவ அம்ஹாகம் வசன’ந்தி வத³தி. இஸ்ஸாமச்ச²ரியனித்³தே³ஸா வுத்தத்தா² ஏவ.

894. மாயானித்³தே³ஸே வாசம் பா⁴ஸதீதி ஜானம்யேவ ‘பண்ணத்திம் வீதிக்கமந்தா பி⁴க்கூ² பா⁴ரியம் கரோந்தி, அம்ஹாகம் பன வீதிக்கமட்டா²னம் நாம நத்தீ²’தி உபஸந்தோ விய பா⁴ஸதி. காயேன பரக்கமதீதி ‘மயா கதம் இத³ம் பாபகம்மம் மா கேசி ஜானிம்ஸூ’தி காயேன வத்தம் கரோதி. விஜ்ஜமானதோ³ஸபடிச்சா²த³னதோ சக்கு²மோஹனமாயா வியாதி மாயா. மாயாவினோ பா⁴வோ மாயாவிதா. கத்வா பாபம் புன படிச்சா²த³னதோ அதிச்ச ஆஸரந்தி ஏதாய ஸத்தாதி அச்சாஸரா. காயவாசாகிரியாஹி அஞ்ஞதா² த³ஸ்ஸனதோ வஞ்சேதீதி வஞ்சனா. ஏதாய ஸத்தா நிகரோந்தீதி நிகதி; மிச்சா²கரோந்தீதி அத்தோ². ‘நாஹம் ஏவம் கரோமீ’தி பாபானம் விக்கி²பனதோ விகிரணா. ‘நாஹம் ஏவம் கரோமீ’தி பரிவஜ்ஜனதோ பரிஹரணா. காயாதீ³ஹி ஸம்வரணதோ கூ³ஹனா. ஸப்³ப³தோபா⁴கே³ன கூ³ஹனா பரிகூ³ஹனா. திணபண்ணேஹி விய கூ³த²ம் காயவசீகம்மேஹி பாபம் சா²தே³தீதி சா²த³னா. ஸப்³ப³தோபா⁴கே³ன சா²த³னா படிச்சா²த³னா. ந உத்தானம் கத்வா த³ஸ்ஸேதீதி அனுத்தானீகம்மம். ந பாகடம் கத்வா த³ஸ்ஸேதீதி அனாவிகம்மம். ஸுட்டு² சா²த³னா வோச்சா²த³னா. கதபடிச்சா²த³னவஸேன புனபி பாபஸ்ஸ கரணதோ பாபகிரியா. அயம் வுச்சதீதி அயம் கதபடிச்சா²த³னலக்க²ணா மாயா நாம வுச்சதி; யாய ஸமன்னாக³தோ புக்³க³லோ ப⁴ஸ்மாபடிச்ச²ன்னோ விய அங்கா³ரோ, உத³கபடிச்ச²ன்னோ விய கா²ணு, பிலோதிகாபலிவேடி²தம் விய ச ஸத்த²ம் ஹோதி.

ஸாடே²ய்யனித்³தே³ஸே ஸடோ²தி அஸந்தகு³ணபரிதீ³பனதோ ந ஸம்மா பா⁴ஸிதா. ஸப்³ப³தோபா⁴கே³ன ஸடோ² பரிஸடோ². யம் தத்தா²தி யம் தஸ்மிம் புக்³க³லே. ஸட²ந்தி அஸந்தகு³ணதீ³பனம் கேராடியம். ஸட²தாதி ஸடா²காரோ. கக்கரதாதி பது³மனாலிஸ்ஸ விய அபராமஸனக்க²மோ க²ரப²ருஸபா⁴வோ. கக்கரியந்திபி தஸ்ஸேவ வேவசனம். பரிக்க²த்ததா பாரிக்க²த்தியந்தி பத³த்³வயேன நிக²ணித்வா ட²பிதம் விய த³ள்ஹகேராடியம் வுத்தம். இத³ம் வுச்சதீதி இத³ம் அத்தனோ அவிஜ்ஜமானகு³ணப்பகாஸனலக்க²ணம் ஸாடே²ய்யம் நாம வுச்சதி; யேன ஸமன்னாக³தஸ்ஸ புக்³க³லஸ்ஸ குச்சி²ம் வா பிட்டி²ம் வா ஜானிதும் ந ஸக்கா.

வாமேன ஸூகரோ ஹோதி, த³க்கி²ணேன அஜாமிகோ³;

ஸரேன நேலகோ ஹோதி, விஸாணேன ஜரக்³க³வோதி.

ஏவம் வுத்தயக்க²ஸூகரஸதி³ஸோ ஹோதி. அவிஜ்ஜாதி³னித்³தே³ஸா வுத்தத்தா² ஏவ.

902. அனஜ்ஜவனித்³தே³ஸே அனஜ்ஜவோதி அனுஜுதாகாரோ. அனஜ்ஜவபா⁴வோ அனஜ்ஜவதா. ஜிம்ஹதாதி சந்த³வங்கதா. வங்கதாதி கோ³முத்தவங்கதா. குடிலதாதி நங்க³லகோடிவங்கதா. ஸப்³பே³ஹிபி இமேஹி பதே³ஹி காயவசீசித்தவங்கதாவ கதி²தா.

அமத்³த³வனித்³தே³ஸே ந முது³பா⁴வோ அமுது³தா. அமத்³த³வாகாரோ அமத்³த³வதா. கக்க²ளபா⁴வோ கக்க²ளியம். மத்³த³வகரஸ்ஸ ஸினேஹஸ்ஸ அபா⁴வதோ ப²ருஸபா⁴வோ பா²ருஸியம். அனீசவுத்திதாய உஜுகமேவ டி²தசித்தபா⁴வோ உஜுசித்ததா. புன அமுது³தாக³ஹணம் தஸ்ஸா விஸேஸனத்த²ம் ‘அமுது³தாஸங்கா²தா உஜுசித்ததா, ந அஜ்ஜவஸங்கா²தா உஜுசித்ததா’தி.

903. அக்க²ந்திநித்³தே³ஸாத³யோ க²ந்தினித்³தே³ஸாதி³படிபக்க²தோ வேதி³தப்³பா³.

908. ஸம்யோஜனனித்³தே³ஸே அஜ்ஜ²த்தந்தி காமப⁴வோ. ப³ஹித்³தா⁴தி ரூபாரூபப⁴வோ. கிஞ்சாபி ஹி ஸத்தா காமப⁴வே அப்பம் காலம் வஸந்தி கப்பஸ்ஸ சதுத்த²மேவ கோட்டா²ஸம், இதரேஸு தீஸு கோட்டா²ஸேஸு காமப⁴வோ ஸுஞ்ஞோ ஹோதி துச்சோ², ரூபாரூபப⁴வே ப³ஹும் காலம் வஸந்தி, ததா²பி நேஸம் யஸ்மா காமப⁴வே சுதிபடிஸந்தி⁴யோ ப³ஹுகா ஹோந்தி, அப்பா ரூபாரூபப⁴வேஸு, யத்த² ச சுதிபடிஸந்தி⁴யோ ப³ஹுகா தத்த² ஆலயோபி பத்த²னாபி அபி⁴லாஸோபி ப³ஹு ஹோதி, யத்த² அப்பா தத்த² அப்போ, தஸ்மா காமப⁴வோ அஜ்ஜ²த்தம் நாம ஜாதோ, ரூபாரூபப⁴வா ப³ஹித்³தா⁴ நாம. இதி அஜ்ஜ²த்தஸங்கா²தே காமப⁴வே ப³ந்த⁴னம் அஜ்ஜ²த்தஸம்யோஜனம் நாம, ப³ஹித்³தா⁴ஸங்கா²தேஸு ரூபாரூபப⁴வேஸு ப³ந்த⁴னம் ப³ஹித்³தா⁴ஸம்யோஜனம் நாம. தத்த² ஏகேகம் பஞ்சபஞ்சவித⁴ம் ஹோதி. தேன வுத்தம் ‘‘பஞ்சோரம்பா⁴கி³யானி பஞ்சுத்³த⁴ம்பா⁴கி³யானீ’’தி. தத்ராயம் வசனத்தோ² – ஓரம் வுச்சதி காமதா⁴து, தத்த² உபபத்தினிப்பா²த³னதோ தம் ஓரம் ப⁴ஜந்தீதி ஓரம்பா⁴கி³யானி. உத்³த⁴ம் வுச்சதி ரூபாரூபதா⁴து, தத்த² உபபத்தினிப்பா²த³னதோ தம் உத்³த⁴ம் ப⁴ஜந்தீதி உத்³த⁴ம்பா⁴கி³யானீதி.

து³கனித்³தே³ஸவண்ணனா.