1. ஏககமாதிகாதி³வண்ணனா

751. இதா³னி தத³னந்தரே ஞாணவிப⁴ங்கே³ ஏகவிதே⁴ன ஞாணவத்தூ²திஆதி³னா நயேன பட²மம் ஏகவிதா⁴தீ³ஹி த³ஸவித⁴பரியோஸானேஹி த³ஸஹி பரிச்சே²தே³ஹி மாதிகம் ட²பேத்வா நிக்கி²த்தபதா³னுக்கமேன நித்³தே³ஸோ கதோ.

தத்த² ஏகவிதே⁴னாதி ஏகப்பகாரேன, ஏககோட்டா²ஸேன வா. ஞாணவத்தூ²தி ஏத்த² பன ஞாணஞ்ச தம் வத்து² ச நானப்பகாரானம் ஸம்பத்தீனந்தி ஞாணவத்து²; ஓகாஸட்டே²ன ஞாணஸ்ஸ வத்தூ²திபி ஞாணவத்து². இத⁴ பன புரிமேனேவத்தே²ன ஞாணவத்து² வேதி³தப்³ப³ம். தேனேவ ஏகவித⁴பரிச்சே²தா³வஸானே ‘‘யாதா²வகவத்து²விபா⁴வனா பஞ்ஞா – ஏவம் ஏகவிதே⁴ன ஞாணவத்தூ²’’தி வுத்தம். பஞ்ச விஞ்ஞாணாதி சக்கு²விஞ்ஞாணாதீ³னி பஞ்ச. ந ஹேதூதிஆதீ³னி ஹேட்டா² த⁴ம்மஸங்க³ஹட்ட²கதா²யம் (த⁴. ஸ. அட்ட². 1.6) வுத்தனயேனேவ வேதி³தப்³பா³னி. ஸங்கே²பதோ பனேத்த² யம் வத்தப்³ப³ம் தம் நித்³தே³ஸவாரே ஆவி ப⁴விஸ்ஸதி. யதா² சேத்த², ஏவம் து³கமாதிகாதி³பதே³ஸுபி யம் வத்தப்³ப³ம் தம் தத்தே²வ ஆவி ப⁴விஸ்ஸதி. நிக்கே²பபரிச்சே²த³மத்தம் பனேத்த² ஏவம் வேதி³தப்³ப³ம். ஏத்த² ஹி ‘‘ந ஹேது அஹேதுகா’’திஆதீ³ஹி தாவ த⁴ம்மஸங்க³ஹமாதிகாவஸேன, ‘‘அனிச்சா ஜராபி⁴பூ⁴தா’’திஆதீ³ஹி அமாதிகாவஸேனாதி ஸங்கே²பதோ து³விதே⁴ஹி பபே⁴த³தோ அட்ட²ஸத்ததியா பதே³ஹி ஏககமாதிகா நிக்கி²த்தா.

து³கானுரூபேஹி பன பஞ்சதிம்ஸாய து³கேஹி து³கமாதிகா நிக்கி²த்தா.

திகானுரூபேஹி ‘‘சிந்தாமயா பஞ்ஞா’’திஆதீ³ஹி சதூஹி பா³ஹிரத்திகேஹி, ‘‘விபாகா பஞ்ஞா’’திஆதீ³ஹி அனியமிதபஞ்ஞாவஸேன வுத்தேஹி சுத்³த³ஸஹி மாதிகாதிகேஹி, விதக்கத்திகே பட²மபதே³ன நியமிதபஞ்ஞாவஸேன வுத்தேஹி தேரஸஹி, து³தியபதே³ன நியமிதபஞ்ஞாவஸேன வுத்தேஹி ஸத்தஹி, ததியபதே³ன நியமிதபஞ்ஞாவஸேன வுத்தேஹி த்³வாத³ஸஹி, பீதித்திகே ச பட²மபதே³ன நியமிதபஞ்ஞாவஸேன வுத்தேஹி தேரஸஹி, ததா² து³தியபதே³ன, ததியபதே³ன நியமிதபஞ்ஞாவஸேன வுத்தேஹி த்³வாத³ஸஹீதி அட்டா²ஸீதியா திகேஹி திகமாதிகா நிக்கி²த்தா.

சதுக்கமாதிகா பன ‘கம்மஸ்ஸகதஞாண’ந்திஆதீ³ஹி ஏகவீஸதியா சதுக்கேஹி, பஞ்சகமாதிகா த்³வீஹி பஞ்சகேஹி, ச²க்கமாதிகா ஏகேன ச²க்கேன, ஸத்தகமாதிகா ‘‘ஸத்தஸத்ததி ஞாணவத்தூ²னீ’’தி ஏவம் ஸங்கே²பதோ வுத்தேஹி ஏகாத³ஸஹி ஸத்தகேஹி, அட்ட²கமாதிகா ஏகேன அட்ட²கேன, நவகமாதிகா ஏகேன நவகேன.