2. அபி⁴த⁴ம்மபா⁴ஜனீயவண்ணனா

725. தத்த² திஸ்ஸோ படிஸம்பி⁴தா³ லோகியா. அத்த²படிஸம்பி⁴தா³ லோகியலோகுத்தரமிஸ்ஸகா. ஸா ஹி நிப்³பா³னாரம்மணானம் மக்³க³ப²லஞாணானம் வஸேன லோகுத்தராபி ஹோதி. அபி⁴த⁴ம்மபா⁴ஜனீயே குஸலாகுஸலவிபாககிரியானம் வஸேன சதூஹி வாரேஹி விப⁴த்தம். தத்த² யத்தகானி ஹேட்டா² சித்துப்பாத³கண்டே³ (த⁴. ஸ. 1 ஆத³யோ) குஸலசித்தானி விப⁴த்தானி, தேஸம் ஸப்³பே³ஸம்பி வஸேன ஏகேகஸ்மிம் சித்தனித்³தே³ஸே சதஸ்ஸோ சதஸ்ஸோ படிஸம்பி⁴தா³ விப⁴த்தாதி வேதி³தப்³பா³. அகுஸலசித்தேஸுபி ஏஸேவ நயோ. விபாககிரியவாரேஸு விபாககிரியானம் அத்தே²ன ஸங்க³ஹிதத்தா, த⁴ம்மபடிஸம்பி⁴த³ம் ச²ட்³டே³த்வா, ஏகேகஸ்மிம் விபாகசித்தே ச கிரியசித்தே ச திஸ்ஸோ திஸ்ஸோவ படிஸம்பி⁴தா³ விப⁴த்தா. பாளி பன முக²மத்தமேவ த³ஸ்ஸேத்வா ஸம்கி²த்தா. ஸா ஹேட்டா² ஆக³தவித்தா²ரவஸேனேவ வேதி³தப்³பா³.

கஸ்மா பன யதா² குஸலாகுஸலவாரேஸு ‘‘தேஸம் விபாகே ஞாணம் அத்த²படிஸம்பி⁴தா³’’தி வுத்தம், ஏவமித⁴ ‘‘யேஸம் த⁴ம்மானம் இமே விபாகா, தேஸு ஞாணம் த⁴ம்மபடிஸம்பி⁴தா³’’தி ஏவம் ந வுத்தந்தி? ஹேட்டா² வுத்தத்தா. யதி³ ஏவம், ‘‘தேஸம் விபாகே ஞாணம் அத்த²படிஸம்பி⁴தா³’’தி ஹேட்டா² வுத்தத்தா அயம் அத்த²படிஸம்பி⁴தா³பி இத⁴ ந வத்தப்³பா³ ஸியாதி? நோ ந வத்தப்³பா³. கஸ்மா? ஹேட்டா² விபாககிரியசித்துப்பாத³வஸேன அவுத்தத்தா. கிரியவாரே ச ‘‘யேஸம் த⁴ம்மானம் இமே கிரியா’’தி வசனமேவ ந யுஜ்ஜதீதி த்³வீஸுபி இமேஸு வாரேஸு திஸ்ஸோ திஸ்ஸோவ படிஸம்பி⁴தா³ விப⁴த்தா.

தத்த² யாய நிருத்தியா தேஸம் த⁴ம்மானம் பஞ்ஞத்தி ஹோதீதி யாய நிருத்தியா தேஸம் ப²ஸ்ஸோ ஹோதீதிஆதி³னா நயேன வுத்தானம் த⁴ம்மானம் ‘‘அயம் ப²ஸ்ஸோ, அயம் வேத³னா’’தி ஏவம் பஞ்ஞத்தி ஹோதி. தத்த² த⁴ம்மனிருத்தாபி⁴லாபே ஞாணந்தி தஸ்மிம் அத்தே² த⁴ம்மே ச பவத்தமானாய தஸ்ஸா த⁴ம்மனிருத்தியா ஸபா⁴வபஞ்ஞத்தியா அபி⁴லாபே ஞாணம். அபி⁴லாபஸத்³த³ம் ஆரம்மணம் கத்வா உப்பன்னஞாணமேவ இதா⁴பி கதி²தம். யேன ஞாணேனாதி யேன படிபா⁴னபடிஸம்பி⁴தா³ஞாணேன. தானி ஞாணானி ஜானாதீதி இதரானி தீணி படிஸம்பி⁴தா³ஞாணானி ஜானாதி.

இதா³னி யதா² யம் ஞாணம் தானி ஞாணானி ஜானாதி, ததா² தஸ்ஸ தேஸு பவத்திம் த³ஸ்ஸேதும் இமானி ஞாணானி இத³மத்த²ஜோதகானீதி வுத்தம். தத்த² இத³மத்த²ஜோதகானீதி இமஸ்ஸ அத்த²ஸ்ஸ ஜோதகானி பகாஸகானி; இமம் நாம அத்த²ம் ஜோதேந்தி பகாஸேந்தி பரிச்சி²ந்த³ந்தீதி அத்தோ². இதி ஞாணேஸு ஞாணந்தி இமினா ஆகாரேன பவத்தம் தீஸு ஞாணேஸு ஞாணம் படிபா⁴னபடிஸம்பி⁴தா³ நாம.

தத்த² கிஞ்சாபி அயம் படிபா⁴னபடிஸம்பி⁴தா³ ‘இமிஸ்ஸா இத³ம் கிச்சம், இமிஸ்ஸா இத³ம் கிச்ச’ந்தி இதராஸம் படிஸம்பி⁴தா³னம் கிச்சம் ஜானாதி, ஸயம் பன தாஸம் கிச்சம் காதும் ந ஸக்கோதி, ப³ஹுஸ்ஸுதத⁴ம்மகதி²கோ விய அப்பஸ்ஸுதத⁴ம்மகதி²கஸ்ஸ. த்³வே கிர பி⁴க்கூ². ஏகோ ப³ஹுஸ்ஸுதோ, ஏகோ அப்பஸ்ஸுதோ. தே ஏகதோவ ஏகம் த⁴ம்மகதா²மக்³க³ம் உக்³க³ண்ஹிம்ஸு. தத்த² அப்பஸ்ஸுதோ ஸரஸம்பன்னோ அஹோஸி, இதரோ மந்த³ஸ்ஸரோ. தேஸு அப்பஸ்ஸுதோ க³தக³தட்டா²னே அத்தனோ ஸரஸம்பத்தியா ஸகலபரிஸம் கோ²பே⁴த்வா த⁴ம்மம் கதே²ஸி. த⁴ம்மம் ஸுணமானா ஹட்ட²துட்ட²மானஸா ஹுத்வா – ‘யதா² ஏஸ த⁴ம்மம் கதே²ஸி, ஏகோ திபிடகத⁴ரோ மஞ்ஞே ப⁴விஸ்ஸதீ’தி வத³ந்தி. ப³ஹுஸ்ஸுதபி⁴க்கு² பன – ‘த⁴ம்மஸவனே ஜானிஸ்ஸத² அயம் திபிடகத⁴ரோ வா நோ வா’தி ஆஹ. ஸோ கிஞ்சாபி ஏவமாஹ, யதா² பன ஸகலபரிஸம் கோ²பே⁴த்வா த⁴ம்மம் கதே²தும் ஸக்கோதி, ஏவமஸ்ஸ கத²னஸமத்த²தா நத்தி². தத்த² கிஞ்சாபி படிபா⁴னபடிஸம்பி⁴தா³, ப³ஹுஸ்ஸுதோ விய அப்பஸ்ஸுதஸ்ஸ, இதராஸம் கிச்சம் ஜானாதி, ஸயம் பன தம் கிச்சம் காதும் ந ஸக்கோதீதி வேதி³தப்³ப³ம். ஸேஸம் உத்தானத்த²மேவ.

746. ஏவம் குஸலசித்துப்பாதா³தி³வஸேன படிஸம்பி⁴தா³ விப⁴ஜித்வா இதா³னி தாஸம் உப்பத்திட்டா²னபூ⁴தம் கே²த்தம் த³ஸ்ஸேதும் புன சதஸ்ஸோ படிஸம்பி⁴தா³திஆதி³மாஹ. தத்த² திஸ்ஸோ படிஸம்பி⁴தா³ காமாவசரகுஸலதோ சதூஸு ஞாணஸம்பயுத்தேஸு சித்துப்பாதே³ஸூதி இத³ம் ஸேக்கா²னம் வஸேன வுத்தம். தேஸஞ்ஹிபி த⁴ம்மபச்சவேக்க²ணகாலே ஹேட்டா² வுத்தம் பஞ்சப்பகாரம் த⁴ம்மம் ஆரம்மணம் கத்வா சதூஸு ஞாணஸம்பயுத்தகுஸலசித்தேஸு த⁴ம்மபடிஸம்பி⁴தா³ உப்பஜ்ஜதி. ததா² நிருத்திபச்சவேக்க²ணகாலே ஸத்³த³ம் ஆரம்மணம் கத்வா நிருத்திபடிஸம்பி⁴தா³; ஞாணம் பச்சவேக்க²ணகாலே ஸப்³ப³த்த²கஞாணம் ஆரம்மணம் கத்வா படிபா⁴னபடிஸம்பி⁴தா³தி.

கிரியதோ சதூஸூதி இத³ம் பன அஸேக்கா²னம் வஸேன வுத்தம். தேஸஞ்ஹி த⁴ம்மம் பச்சவேக்க²ணகாலே ஹேட்டா² வுத்தம் பஞ்சப்பகாரம் த⁴ம்மம் ஆரம்மணம் கத்வா சதூஸு ஞாணஸம்பயுத்தகிரியசித்தேஸு த⁴ம்மபடிஸம்பி⁴தா³ உப்பஜ்ஜதி. ததா² நிருத்திபச்சவேக்க²ணகாலே ஸத்³த³ம் ஆரம்மணம் கத்வா நிருத்திபடிஸம்பி⁴தா³; ஞாணம் பச்சவேக்க²ணகாலே ஸப்³ப³த்த²கஞாணம் ஆரம்மணம் கத்வா படிபா⁴னபடிஸம்பி⁴தா³தி.

அத்த²படிஸம்பி⁴தா³ ஏதேஸு சேவ உப்பஜ்ஜதீதி இத³ம் பன ஸேக்கா²ஸேக்கா²னம் வஸேன வுத்தம். ததா² ஹி ஸேக்கா²னம் அத்த²பச்சவேக்க²ணகாலே ஹேட்டா² வுத்தப்பபே⁴த³ம் அத்த²ம் ஆரம்மணம் கத்வா சதூஸு ஞாணஸம்பயுத்தகுஸலசித்தேஸு அயம் உப்பஜ்ஜதி, மக்³க³ப²லகாலே ச மக்³க³ப²லேஸு. அஸேக்க²ஸ்ஸ பன அத்த²ம் பச்சவேக்க²ணகாலே ஹேட்டா² வுத்தப்பபே⁴த³மேவ அத்த²ம் ஆரம்மணம் கத்வா சதூஸு ஞாணஸம்பயுத்தகிரியசித்தேஸு உப்பஜ்ஜதி, ப²லகாலே ச உபரிமே ஸாமஞ்ஞப²லேதி. ஏவமேதா ஸேக்கா²ஸேக்கா²னம் உப்பஜ்ஜமானா இமாஸு பூ⁴மீஸு உப்பஜ்ஜந்தீதி பூ⁴மித³ஸ்ஸனத்த²ம் அயம் நயோ த³ஸ்ஸிதோதி.

அபி⁴த⁴ம்மபா⁴ஜனீயவண்ணனா.