2. அபி⁴த⁴ம்மபா⁴ஜனீயவண்ணனா

490. அபி⁴த⁴ம்மபா⁴ஜனீயே ‘அரியோ’தி அவத்வா அட்ட²ங்கி³கோ மக்³கோ³தி வுத்தம். ஏவம் அவுத்தேபி அயம் அரியோ ஏவ. யதா² ஹி முத்³தா⁴பி⁴ஸித்தஸ்ஸ ரஞ்ஞோ முத்³தா⁴பி⁴ஸித்தாய தே³வியா குச்சி²ஸ்மிம் ஜாதோ புத்தோ ராஜபுத்தோதி அவுத்தேபி ராஜபுத்தோயேவ ஹோதி, ஏவமயம்பி அரியோதி அவுத்தேபி அரியோ ஏவாதி வேதி³தப்³போ³. ஸேஸமிதா⁴பி ஸச்சவிப⁴ங்கே³ வுத்தனயேனேவ வேதி³தப்³ப³ம்.

493. பஞ்சங்கி³கவாரேபி அட்ட²ங்கி³கோதி அவுத்தேபி அட்ட²ங்கி³கோ ஏவ வேதி³தப்³போ³. லோகுத்தரமக்³கோ³ ஹி பஞ்சங்கி³கோ நாம நத்தி². அயமேத்த² ஆசரியானம் ஸமானத்த²கதா². விதண்ட³வாதீ³ பனாஹ – ‘‘லோகுத்தரமக்³கோ³ அட்ட²ங்கி³கோ நாம நத்தி², பஞ்சங்கி³கோயேவ ஹோதீ’’தி. ஸோ ‘‘ஸுத்தம் ஆஹராஹீ’’தி வுத்தோ அத்³தா⁴ அஞ்ஞம் அபஸ்ஸந்தோ இமம் மஹாஸளாயதனதோ ஸுத்தப்பதே³ஸம் ஆஹரிஸ்ஸதி ‘‘யா ததா²பூ⁴தஸ்ஸ தி³ட்டி², ஸாஸ்ஸ ஹோதி ஸம்மாதி³ட்டி². யோ ததா²பூ⁴தஸ்ஸ ஸங்கப்போ, வாயாமோ, ஸதி, யோ ததா²பூ⁴தஸ்ஸ ஸமாதி⁴, ஸ்வாஸ்ஸ ஹோதி ஸம்மாஸமாதி⁴. புப்³பே³வ கோ² பனஸ்ஸ காயகம்மம் வசீகம்மம் ஆஜீவோ ஸுபரிஸுத்³தோ⁴ ஹோதீ’’தி.

ததோ ‘‘ஏதஸ்ஸ அனந்தரம் ஸுத்தபத³ம் ஆஹரா’’தி வத்தப்³போ³. ஸசே ஆஹரதி இச்சேதம் குஸலம், நோ சே ஆஹரதி ஸயம் ஆஹரித்வா ‘‘ஏவமஸ்ஸாயம் அரியோ அட்ட²ங்கி³கோ மக்³கோ³ பா⁴வனாபாரிபூரிம் க³ச்ச²தீ’’தி (ம. நி. 3.431) ‘‘இமினா தே ஸத்து²ஸாஸனேன வாதோ³ பி⁴ன்னோ; லோகுத்தரமக்³கோ³ பஞ்சங்கி³கோ நாம நத்தி², அட்ட²ங்கி³கோவ ஹோதீ’’தி வத்தப்³போ³.

இமானி பன தீணி அங்கா³னி புப்³பே³ பரிஸுத்³தா⁴னி வத்தந்தி, லோகுத்தரமக்³க³க்க²ணே பரிஸுத்³த⁴தரானி ஹோந்தி. அத² ‘பஞ்சங்கி³கோ மக்³கோ³’தி இத³ம் கிமத்த²ம் க³ஹிதந்தி? அதிரேககிச்சத³ஸ்ஸனத்த²ம். யஸ்மிஞ்ஹி ஸமயே மிச்சா²வாசம் பஜஹதி, ஸம்மாவாசம் பூரேதி, தஸ்மிம் ஸமயே ஸம்மாகம்மந்தஸம்மாஆஜீவா நத்தி². இமானி பஞ்சகாராபகங்கா³னேவ மிச்சா²வாசம் பஜஹந்தி; ஸம்மாவாசா பன ஸயம் விரதிவஸேன பூரேதி. யஸ்மிம் ஸமயே மிச்சா²கம்மந்தம் பஜஹதி, ஸம்மாகம்மந்தம் பூரேதி, தஸ்மிம் ஸமயே ஸம்மாவாசாஸம்மாஆஜீவா நத்தி². இமானி பஞ்ச காராபகங்கா³னேவ மிச்சா²கம்மந்தம் பஜஹந்தி; ஸம்மாகம்மந்தோ பன ஸயம் விரதிவஸேன பூரேதி. யஸ்மிம் ஸமயே மிச்சா²ஆஜீவம் பஜஹதி, ஸம்மாஆஜீவம் பூரேதி, தஸ்மிம் ஸமயே ஸம்மாவாசாஸம்மாகம்மந்தா நத்தி². இமானி பஞ்ச காராபகங்கா³னேவ மிச்சா²ஆஜீவம் பஜஹந்தி; ஸம்மாஆஜீவோ பன ஸயம் விரதிவஸேன பூரேதி. இமம் ஏதேஸம் பஞ்சன்னம் காராபகங்கா³னம் கிச்சாதிரேகதம் த³ஸ்ஸேதும் பஞ்சங்கி³கோ மக்³கோ³தி க³ஹிதம். லோகுத்தரமக்³கோ³ பன அட்ட²ங்கி³கோவ ஹோதி, பஞ்சங்கி³கோ நாம நத்தி².

‘‘யதி³ ஸம்மாவாசாதீ³ஹி ஸத்³தி⁴ம் அட்ட²ங்கி³கோதி வத³த², சதஸ்ஸோ ஸம்மாவாசாசேதனா, திஸ்ஸோ ஸம்மாகம்மந்தசேதனா, ஸத்த ஸம்மாஆஜீவசேதனாதி இமம்ஹா சேதனாப³ஹுத்தா கத²ம் முச்சிஸ்ஸத²? தஸ்மா பஞ்சங்கி³கோவ லோகுத்தரமக்³கோ³’’தி. ‘‘சேதனாப³ஹுத்தா ச பமுச்சிஸ்ஸாம; அட்ட²ங்கி³கோவ லோகுத்தரமக்³கோ³தி ச வக்கா²ம’’. ‘‘த்வம் தாவ மஹாசத்தாரீஸகபா⁴ணகோ ஹோஸி, ந ஹோஸீ’’தி புச்சி²தப்³போ³. ஸசே ‘‘ந ஹோமீ’’தி வத³தி, ‘‘த்வம் அபா⁴ணகத்தா ந ஜானாஸீ’’தி வத்தப்³போ³. ஸசே ‘‘பா⁴ணகோஸ்மீ’’தி வத³தி, ‘‘ஸுத்தம் ஆஹரா’’தி வத்தப்³போ³. ஸசே ஸுத்தம் ஆஹரதி இச்சேதம் குஸலம், நோ சே ஆஹரதி ஸயம் உபரிபண்ணாஸதோ ஆஹரிதப்³ப³ம் –

‘‘கதமா ச, பி⁴க்க²வே, ஸம்மாவாசா? ஸம்மாவாசம்பஹம், பி⁴க்க²வே, த்³வாயம் வதா³மி – அத்தி², பி⁴க்க²வே, ஸம்மாவாசா ஸாஸவா புஞ்ஞபா⁴கி³யா உபதி⁴வேபக்கா; அத்தி², பி⁴க்க²வே, ஸம்மாவாசா அரியா அனாஸவா லோகுத்தரா மக்³க³ங்கா³.

‘‘கதமா ச, பி⁴க்க²வே, ஸம்மாவாசா ஸாஸவா புஞ்ஞபா⁴கி³யா உபதி⁴வேபக்கா? முஸாவாதா³ வேரமணீ, பிஸுணாய வாசாய வேரமணீ, ப²ருஸாய வாசாய வேரமணீ, ஸம்ப²ப்பலாபா வேரமணீ – அயம், பி⁴க்க²வே, ஸம்மாவாசா ஸாஸவா புஞ்ஞபா⁴கி³யா உபதி⁴வேபக்கா.

‘‘கதமா ச, பி⁴க்க²வே, ஸம்மாவாசா அரியா அனாஸவா லோகுத்தரா மக்³க³ங்கா³? யா கோ², பி⁴க்க²வே, அரியசித்தஸ்ஸ அனாஸவசித்தஸ்ஸ அரியமக்³க³ஸமங்கி³னோ அரியமக்³க³ம் பா⁴வயதோ சதூஹி வசீது³ச்சரிதேஹி ஆரதி விரதி படிவிரதி வேரமணீ – அயம், பி⁴க்க²வே, ஸம்மாவாசா அரியா அனாஸவா லோகுத்தரா மக்³க³ங்கா³…பே….

‘‘கதமோ ச, பி⁴க்க²வே, ஸம்மாகம்மந்தோ? ஸம்மாகம்மந்தம்பஹம், பி⁴க்க²வே, த்³வயம் வதா³மி…பே… உபதி⁴வேபக்கோ.

‘‘கதமோ ச, பி⁴க்க²வே, ஸம்மாகம்மந்தோ அரியோ அனாஸவோ லோகுத்தரோ…பே….

‘‘கதமோ ச, பி⁴க்க²வே, ஸம்மாஆஜீவோ? ஸம்மாஆஜீவம்பஹம், பி⁴க்க²வே, த்³வாயம் வதா³மி…பே… உபதி⁴வேபக்கோ.

‘‘கதமோ ச, பி⁴க்க²வே, ஸம்மாஆஜீவோ அரியோ அனாஸவோ லோகுத்தரோ மக்³க³ங்கோ³? யா கோ², பி⁴க்க²வே, அரியசித்தஸ்ஸ அனாஸவசித்தஸ்ஸ அரியமக்³க³ஸமங்கி³னோ அரியமக்³க³ம் பா⁴வயதோ மிச்சா²ஆஜீவா ஆரதி விரதி படிவிரதி வேரமணீ – அயம், பி⁴க்க²வே, ஸம்மாஆஜீவோ அரியோ அனாஸவோ லோகுத்தரோ மக்³க³ங்கோ³’’தி (ம. நி. 3.138 ஆத³யோ).

ஏவமேத்த² சதூஹி வசீது³ச்சரிதேஹி, தீஹி காயது³ச்சரிதேஹி, மிச்சா²ஜீவதோ சாதி ஏகேகாவ விரதி அரியா அனாஸவா லோகுத்தரா மக்³க³ங்கா³தி வுத்தா. ‘‘குதோ ஏத்த² சேதனாப³ஹுத்தம்? குதோ பஞ்சங்கி³கோ மக்³கோ³? இத³ம் தே ஸுத்தம் அகாமகஸ்ஸ லோகுத்தரமக்³கோ³ அட்ட²ங்கி³கோதி தீ³பேதி’’. ஸசே ஏத்தகேன ஸல்லக்கே²தி இச்சேதம் குஸலம், நோ சே ஸல்லக்கே²தி அஞ்ஞானிபி காரணானி ஆஹரித்வா ஸஞ்ஞாபேதப்³போ³. வுத்தஞ்ஹேதம் ப⁴க³வதா –

‘‘யஸ்மிம் கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³ ந உபலப்³ப⁴தி, ஸமணோபி தத்த² ந உபலப்³ப⁴தி…பே… இமஸ்மிம் கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³ உபலப்³ப⁴தி; இதே⁴வ, ஸுப⁴த்³த³, ஸமணோ…பே… ஸுஞ்ஞா பரப்பவாதா³ ஸமணேஹி அஞ்ஞேஹீதி (தீ³. நி. 2.214).

அஞ்ஞேஸுபி அனேகேஸு ஸுத்தஸதேஸு அட்ட²ங்கி³கோவ மக்³கோ³ ஆக³தோ. கதா²வத்து²ப்பகரணேபி வுத்தம் –

‘‘மக்³கா³னம் அட்ட²ங்கி³கோ ஸேட்டோ², ஸச்சானம் சதுரோ பதா³;

விராகோ³ ஸேட்டோ² த⁴ம்மானம், த்³விபதா³னஞ்ச சக்கு²மா’’தி (கதா². 872) –

‘‘அத்தே²வ ஸுத்தந்தோதி’’? ‘‘ஆமந்தா’’‘‘தேன ஹி அட்ட²ங்கி³கோ மக்³கோ³’’தி. ஸசே பன ஏத்தகேனாபி ஸஞ்ஞத்திம் ந க³ச்ச²தி, ‘‘க³ச்ச², விஹாரம் பவிஸித்வா யாகு³ம் பிவாஹீ’’தி உய்யோஜேதப்³போ³. உத்தரிம்பன காரணம் வக்க²தீதி அட்டா²னமேதம். ஸேஸமேத்த² உத்தானத்த²மேவ.

நயா பனேத்த² க³ணேதப்³பா³. அட்ட²ங்கி³கமக்³க³ஸ்மிஞ்ஹி ஏகதோ புச்சி²த்வா ஏகதோ விஸ்ஸஜ்ஜனே சதூஸு மக்³கே³ஸு சத்தாரி நயஸஹஸ்ஸானி விப⁴த்தானி. பஞ்சங்கி³கமக்³கே³ ஏகதோ புச்சி²த்வா ஏகதோ விஸ்ஸஜ்ஜனே சத்தாரி; பாடியேக்கம் புச்சி²த்வா பாடியேக்கம் விஸ்ஸஜ்ஜனே சத்தாரி சத்தாரீதி பஞ்சஸு அங்கே³ஸு வீஸதி. இதி புரிமானி அட்ட² இமானி ச வீஸதீதி ஸப்³பா³னிபி மக்³க³விப⁴ங்கே³ அட்ட²வீஸதி நயஸஹஸ்ஸானி விப⁴த்தானி. தானி ச கோ² நிப்³ப³த்திதலோகுத்தரானி குஸலானேவ. விபாகே பன குஸலதோ திகு³ணா நயா காதப்³பா³தி.

அபி⁴த⁴ம்மபா⁴ஜனீயவண்ணனா.