3. பஞ்ஹாபுச்ச²கவண்ணனா

504. பஞ்ஹாபுச்ச²கே பாளிஅனுஸாரேனேவ மக்³க³ங்கா³னம் குஸலாதி³பா⁴வோ வேதி³தப்³போ³. ஆரம்மணத்திகேஸு பன ஸப்³பா³னிபேதானி அப்பமாணம் நிப்³பா³னம் ஆரப்³ப⁴ பவத்திதோ அப்பமாணாரம்மணானேவ, ந மக்³கா³ரம்மணானி. நேவ ஹி மக்³கோ³ ந ப²லம் மக்³க³ம் ஆரம்மணம் கரோதி. ஸஹஜாதஹேதுவஸேன பனேத்த² குஸலானி மக்³க³ஹேதுகானி; வீரியம் வா வீமம்ஸம் வா ஜேட்ட²கம் கத்வா மக்³க³பா⁴வனாகாலே மக்³கா³தி⁴பதீனி; ச²ந்த³சித்தஜேட்டி²காய மக்³க³பா⁴வனாய ந வத்தப்³பா³னி மக்³கா³தி⁴பதீனீதி; ப²லகாலேபி ந வத்தப்³பா³னேவ.

அதீதாதீ³ஸு ஏகாரம்மணபா⁴வேனபி ந வத்தப்³பா³னி; நிப்³பா³னஸ்ஸ பன ப³ஹித்³தா⁴த⁴ம்மத்தா ப³ஹித்³தா⁴ரம்மணானி நாம ஹோந்தீதி ஏவமேதஸ்மிம் பஞ்ஹாபுச்ச²கேபி நிப்³ப³த்திதலோகுத்தரானேவ மக்³க³ங்கா³னி கதி²தானி. ஸம்மாஸம்பு³த்³தே⁴ன ஹி ஸுத்தந்தபா⁴ஜனீயஸ்மிம்யேவ லோகியலோகுத்தரானி மக்³க³ங்கா³னி கதி²தானி; அபி⁴த⁴ம்மபா⁴ஜனீயே பன பஞ்ஹாபுச்ச²கே ச லோகுத்தரானேவாதி ஏவமயம் மக்³க³விப⁴ங்கோ³பி தேபரிவட்டம் நீஹரித்வாவ பா⁴ஜேத்வா த³ஸ்ஸிதோதி.

ஸம்மோஹவினோத³னியா விப⁴ங்க³ட்ட²கதா²ய

மக்³க³ங்க³விப⁴ங்க³வண்ணனா நிட்டி²தா.