2. அபி⁴த⁴ம்மபா⁴ஜனீயவண்ணனா

472. அபி⁴த⁴ம்மபா⁴ஜனீயே ஸத்தபி போ³ஜ்ஜ²ங்கே³ ஏகதோ புச்சி²த்வா விஸ்ஸஜ்ஜனஸ்ஸ ச பாடியேக்கம் புச்சி²த்வா விஸ்ஸஜ்ஜனஸ்ஸ ச வஸேன த்³வே நயா. தேஸம் அத்த²வண்ணனா ஹேட்டா² வுத்தனயேனேவ வேதி³தப்³பா³.

உபேக்கா²ஸம்போ³ஜ்ஜ²ங்க³னித்³தே³ஸே பன உபேக்க²னவஸேன உபேக்கா². உபேக்க²னாகாரோ உபேக்க²னா. உபேக்கி²தப்³ப³யுத்தே ஸமப்பவத்தே த⁴ம்மே இக்க²தி, ந சோதே³தீதி உபேக்கா². புக்³க³லம் உபேக்கா²பேதீதி உபேக்க²னா. போ³ஜ்ஜ²ங்க³பா⁴வப்பத்தியா லோகியஉபேக்க²னாய அதி⁴கா உபேக்க²னா அஜ்ஜு²பேக்க²னா. அப்³யாபாராபஜ்ஜனேன மஜ்ஜ²த்தபா⁴வோ மஜ்ஜ²த்ததா. ஸா பன சித்தஸ்ஸ, ந ஸத்தஸ்ஸாதி தீ³பேதும் மஜ்ஜ²த்ததா சித்தஸ்ஸாதி வுத்தந்தி. அயமேத்த² அனுபுப்³ப³பத³வண்ணனா.

நயா பனேத்த² க³ணேதப்³பா³ – ஸத்தன்னம்பி ஹி போ³ஜ்ஜ²ங்கா³னம் ஏகதோ புச்சி²த்வா விஸ்ஸஜ்ஜனே ஏகேகமக்³கே³ நயஸஹஸ்ஸம் நயஸஹஸ்ஸந்தி சத்தாரி நயஸஹஸ்ஸானி விப⁴த்தானி. பாடியேக்கம் புச்சி²த்வா விஸ்ஸஜ்ஜனே ஏகேகபோ³ஜ்ஜ²ங்க³வஸேன சத்தாரி சத்தாரீதி ஸத்த சதுக்கா அட்ட²வீஸதி. தானி புரிமேஹி சதூஹி ஸத்³தி⁴ம் த்³வத்திம்ஸாதி ஸப்³பா³னிபி அபி⁴த⁴ம்மபா⁴ஜனீயே த்³வத்திம்ஸ நயஸஹஸ்ஸானி விப⁴த்தானி குஸலானேவ. யஸ்மா பன ப²லக்க²ணேபி போ³ஜ்ஜ²ங்கா³ லப்³ப⁴ந்தி, குஸலஹேதுகானி ச ஸாமஞ்ஞப²லானி, தஸ்மா தேஸுபி போ³ஜ்ஜ²ங்க³த³ஸ்ஸனத்த²ம் குஸலனித்³தே³ஸபுப்³ப³ங்க³மாய ஏவ தந்தியா விபாகனயோ ஆரத்³தோ⁴. ஸோபி ஏகதோ புச்சி²த்வா விஸ்ஸஜ்ஜனஸ்ஸ ச, பாடியேக்கம் புச்சி²த்வா விஸ்ஸஜ்ஜனஸ்ஸ ச வஸேன து³விதோ⁴ ஹோதி. ஸேஸமேத்த² ஹேட்டா² வுத்தனயேனேவ வேதி³தப்³ப³ம். விபாகே பன குஸலதோ திகு³ணா நயா காதப்³பா³தி.

அபி⁴த⁴ம்மபா⁴ஜனீயவண்ணனா.