1. ரூபக்க²ந்த⁴னித்³தே³ஸோ

2. இதா³னி தே ரூபக்க²ந்தா⁴த³யோ விப⁴ஜித்வா த³ஸ்ஸேதும் தத்த² கதமோ ரூபக்க²ந்தோ⁴திஆதி³மாஹ. தத்த² தத்தா²தி தேஸு பஞ்சஸு க²ந்தே⁴ஸு. கதமோதி கதே²துகம்யதாபுச்சா². ரூபக்க²ந்தோ⁴தி புச்சி²தத⁴ம்மனித³ஸ்ஸனம். இதா³னி தம் விப⁴ஜந்தோ யம் கிஞ்சி ரூபந்திஆதி³மாஹ. தத்த² யம் கிஞ்சீதி அனவஸேஸபரியாதா³னம். ரூபந்தி அதிப்பஸங்க³னியமனம். ஏவம் பத³த்³வயேனாபி ரூபஸ்ஸ அனவஸேஸபரிக்³க³ஹோ கதோ ஹோதி.

தத்த² கேனட்டே²ன ரூபந்தி? ருப்பனட்டே²ன ரூபம். வுத்தஞ்ஹேதம் ப⁴க³வதா –

‘‘கிஞ்ச, பி⁴க்க²வே, ரூபம் வதே³த²? ருப்பதீதி கோ², பி⁴க்க²வே, தஸ்மா ரூபந்தி வுச்சதி. கேன ருப்பதி? ஸீதேனபி ருப்பதி, உண்ஹேனபி ருப்பதி, ஜிக⁴ச்சா²யபி ருப்பதி, பிபாஸாயபி ருப்பதி, ட³ம்ஸமகஸவாதாதபஸரிஸபஸம்ப²ஸ்ஸேனபி ருப்பதி. ருப்பதீதி கோ², பி⁴க்க²வே, தஸ்மா ரூபந்தி வுச்சதீ’’தி (ஸம். நி. 3.79).

தத்த² கிந்தி காரணபுச்சா²; கேன காரணேன ரூபம் வதே³த², கேன காரணேன தம் ரூபம் நாமாதி அத்தோ². ருப்பதீதி ஏத்த² இதீதி காரணுத்³தே³ஸோ. யஸ்மா ருப்பதி தஸ்மா ரூபந்தி வுச்சதீதி அத்தோ². ருப்பதீதி குப்பதி க⁴ட்டீயதி பீளியதி பி⁴ஜ்ஜதீதி அத்தோ². ஏவம் இமினா ஏத்தகேன டா²னேன ருப்பனட்டே²ன ரூபம் வுத்தம். ருப்பனலக்க²ணேன ரூபந்திபி வத்தும் வட்டதி. ருப்பனலக்க²ணஞ்ஹேதம்.

ஸீதேனபி ருப்பதீதிஆதீ³ஸு பன ஸீதேன தாவ ருப்பனம் லோகந்தரிகனிரயே பாகடம். திண்ணம் திண்ணஞ்ஹி சக்கவாளானம் அந்தரே ஏகேகோ லோகந்தரிகனிரயோ நாம ஹோதி அட்ட²யோஜனஸஹஸ்ஸப்பமாணோ, யஸ்ஸ நேவ ஹேட்டா² பத²வீ அத்தி², ந உபரி சந்தி³மஸூரியதீ³பமணிஆலோகோ, நிச்சந்த⁴காரோ. தத்த² நிப்³ப³த்தஸத்தானம் திகா³வுதோ அத்தபா⁴வோ ஹோதி. தே வக்³கு³லியோ விய பப்³ப³தபாதே³ தீ³க⁴புது²லேஹி நகே²ஹி லக்³கி³த்வா அவம்ஸிரா ஓலம்ப³ந்தி. யதா³ ஸம்ஸப்பந்தா அஞ்ஞமஞ்ஞஸ்ஸ ஹத்த²பாஸக³தா ஹோந்தி அத² ‘ப⁴க்கோ² நோ லத்³தோ⁴’தி மஞ்ஞமானா தத்த² ப்³யாவடா விபரிவத்தித்வா லோகஸந்தா⁴ரகே உத³கே பதந்தி, ஸீதவாதே பஹரந்தேபி பக்கமது⁴கப²லானி விய சி²ஜ்ஜித்வா உத³கே பதந்தி. பதிதமத்தாவ அச்சந்தகா²ரேன ஸீதோத³கேன சி²ன்னசம்மன்ஹாருமம்ஸஅட்டீ²ஹி பி⁴ஜ்ஜமானேஹி தத்ததேலே பதிதபிட்ட²பிண்டி³ விய படபடாயமானா விலீயந்தி. ஏவம் ஸீதேன ருப்பனம் லோகந்தரிகனிரயே பாகடம். மஹிம்ஸகரட்டா²தீ³ஸுபி ஹிமபாதஸீதலேஸு பதே³ஸேஸு ஏதம் பாகடமேவ. தத்த² ஹி ஸத்தா ஸீதேன பி⁴ன்னச்சி²ன்னஸரீரா ஜீவிதக்க²யம்பி பாபுணந்தி.

உண்ஹேன ருப்பனம் அவீசிமஹானிரயே பாகடம். தத்த² ஹி தத்தாய லோஹபத²வியா நிபஜ்ஜாபேத்வா பஞ்சவித⁴ப³ந்த⁴னாதி³கரணகாலே ஸத்தா மஹாது³க்க²ம் அனுப⁴வந்தி.

ஜிக⁴ச்சா²ய ருப்பனம் பேத்திவிஸயே சேவ து³ப்³பி⁴க்க²காலே ச பாகடம். பேத்திவிஸயஸ்மிஞ்ஹி ஸத்தா த்³வே தீணி பு³த்³த⁴ந்தரானி கிஞ்சிதே³வ ஆமிஸம் ஹத்தே²ன க³ஹேத்வா முகே² பக்கி²பந்தா நாம ந ஹோந்தி. அந்தோஉத³ரம் ஆதி³த்தஸுஸிரருக்கோ² விய ஹோதி. து³ப்³பி⁴க்கே² கஞ்ஜிகமத்தம்பி அலபி⁴த்வா மரணப்பத்தானம் பமாணம் நாம நத்தி².

பிபாஸாய ருப்பனம் காலகஞ்ஜிகாதீ³ஸு பாகடம். தத்த² ஹி ஸத்தா த்³வே தீணி பு³த்³த⁴ந்தரானி ஹத³யதேமனமத்தம் வா ஜிவ்ஹாதேமனமத்தம் வா உத³கபி³ந்து³ம் லத்³து⁴ம் ந ஸக்கோந்தி. ‘பானீயம் பிவிஸ்ஸாமா’தி நதி³ம் க³தானம்பி நதீ³ வாலிகாதலம் ஸம்பஜ்ஜதி. மஹாஸமுத்³த³ம் பக்க²ந்தானம்பி மஹாஸமுத்³தோ³ பிட்டி²பாஸாணோ ஹோதி. தே ஸுஸ்ஸந்தா ப³லவது³க்க²பீளிதா விசரந்தி.

ஏகோ கிர காலகஞ்ஜிகஅஸுரோ பிபாஸம் அதி⁴வாஸேதும் அஸக்கோந்தோ யோஜனக³ம்பீ⁴ரவித்தா²ரம் மஹாக³ங்க³ம் ஓதரி. தஸ்ஸ க³தக³தட்டா²னே உத³கம் சி²ஜ்ஜதி, தூ⁴மோ உக்³க³ச்ச²தி, தத்தே பிட்டி²பாஸாணே சங்கமனகாலோ விய ஹோதி. தஸ்ஸ உத³கஸத்³த³ம் ஸுத்வா இதோ சிதோ ச விசரந்தஸ்ஸேவ ரத்தி விபா⁴யி. அத² நம் பாதோவ பி⁴க்கா²சாரம் க³ச்ச²ந்தா திம்ஸமத்தா பிண்ட³சாரிகபி⁴க்கூ² தி³ஸ்வா – ‘‘கோ நாம த்வம், ஸப்புரிஸா’’தி புச்சி²ம்ஸு. ‘‘பேதோஹமஸ்மி, ப⁴ந்தே’’தி. ‘‘கிம் பரியேஸஸீ’’தி? ‘‘பானீயம், ப⁴ந்தே’’தி. ‘‘அயம் க³ங்கா³ பரிபுண்ணா, கிம் த்வம் ந பஸ்ஸஸீ’’தி? ‘‘ந உபகப்பதி, ப⁴ந்தே’’தி. ‘‘தேன ஹி க³ங்கா³பிட்டே² நிபஜ்ஜ, முகே² தே பானீயம் ஆஸிஞ்சிஸ்ஸாமா’’தி. ஸோ வாலிகாபுளினே உத்தானோ நிபஜ்ஜி. பி⁴க்கூ² திம்ஸமத்தே பத்தே நீஹரித்வா உத³கம் ஆஹரித்வா ஆஹரித்வா தஸ்ஸ முகே² ஆஸிஞ்சிம்ஸு. தேஸம் ததா² கரோந்தானம்யேவ வேலா உபகட்டா² ஜாதா. ததோ ‘‘பி⁴க்கா²சாரகாலோ அம்ஹாகம், ஸப்புரிஸ; கச்சி தே அஸ்ஸாத³மத்தா லத்³தா⁴’’தி ஆஹம்ஸு. பேதோ ‘‘ஸசே மே, ப⁴ந்தே, திம்ஸமத்தானம் அய்யானம் திம்ஸமத்தேஹி பத்தேஹி ஆஸித்தஉத³கதோ அட்³ட⁴பஸதமத்தம்பி பரக³லக³தம், பேதத்தபா⁴வதோ மோக்கோ² மா ஹோதூ’’தி ஆஹ. ஏவம் பிபாஸாய ருப்பனம் பேத்திவிஸயே பாகடம்.

ட³ம்ஸாதீ³ஹி ருப்பனம் ட³ம்ஸமக்கி²காதி³ஸம்ப³ப³ஹுலேஸு பதே³ஸேஸு பாகடம். ஏத்த² ச ட³ம்ஸாதி பிங்க³லமக்கி²கா, மகஸாதி மகஸாவ வாதாதி குச்சி²வாதபிட்டி²வாதாதி³வஸேன வேதி³தப்³பா³. ஸரீரஸ்மிஞ்ஹி வாதரோகோ³ உப்பஜ்ஜித்வா ஹத்த²பாத³பிட்டி²ஆதீ³னி பி⁴ந்த³தி, காணம் கரோதி, கு²ஜ்ஜம் கரோதி, பீட²ஸப்பிம் கரோதி. ஆதபோதி ஸூரியாதபோ. தேன ருப்பனம் மருகந்தாராதீ³ஸு பாகடம். ஏகா கிர இத்தீ² மருகந்தாரே ரத்திம் ஸத்த²தோ ஓஹீனா தி³வா ஸூரியே உக்³க³ச்ச²ந்தே வாலிகாய தப்பமானாய பாதே³ ட²பேதும் அஸக்கோந்தீ ஸீஸதோ பச்சி²ம் ஓதாரேத்வா அக்கமி. கமேன பச்சி²யா உண்ஹாபி⁴தத்தாய டா²தும் அஸக்கோந்தீ தஸ்ஸா உபரி ஸாடகம் ட²பேத்வா அக்கமி. தஸ்மிம்பி ஸந்தத்தே அங்கேன க³ஹிதம் புத்தகம் அதோ⁴முக²ம் நிபஜ்ஜாபேத்வா கந்த³ந்தம் கந்த³ந்தம் அக்கமித்வா ஸத்³தி⁴ம் தேன தஸ்மிம்யேவ டா²னே உண்ஹாபி⁴தத்தா காலமகாஸி.

ஸரீஸபாதி யே கேசி தீ³க⁴ஜாதிகா ஸரந்தா க³ச்ச²ந்தி. தேஸம் ஸம்ப²ஸ்ஸேன ருப்பனம் ஆஸீவிஸத³ட்டா²தீ³னம் வஸேன வேதி³தப்³ப³ம்.

இதா³னி ‘யம் கிஞ்சி ரூப’ந்தி பதே³ன ஸம்க³ஹிதம் பஞ்சவீஸதிகோட்டா²ஸச²ன்னவுதிகோட்டா²ஸப்பபே⁴த³ம் ஸப்³ப³ம்பி ரூபம் அதீதாதி³கோட்டா²ஸேஸு பக்கி²பித்வா த³ஸ்ஸேதும் அதீதானாக³தபச்சுப்பன்னந்தி ஆஹ. ததோ பரம் ததே³வ அஜ்ஜ²த்தது³காதீ³ஸு சதூஸு து³கேஸு பக்கி²பித்வா த³ஸ்ஸேதும் அஜ்ஜ²த்தம் வா ப³ஹித்³தா⁴ வாதிஆதி³ வுத்தம். ததோ பரம் ஸப்³ப³ம்பேதம் ஏகாத³ஸஸு பதே³ஸேஸு பரியாதி³யித்வா த³ஸ்ஸிதம் ரூபம் ஏகதோ பிண்ட³ம் கத்வா த³ஸ்ஸேதும் ததே³கஜ்ஜ²ந்திஆதி³ வுத்தம்.

தத்த² ததே³கஜ்ஜ²ந்தி தம் ஏகஜ்ஜ²ம்; அபி⁴ஸஞ்ஞூஹித்வாதி அபி⁴ஸம்ஹரித்வா; அபி⁴ஸங்கி²பித்வாதி ஸங்கே²பம் கத்வா; இத³ம் வுத்தம் ஹோதி – ஸப்³ப³ம்பேதம் வுத்தப்பகாரம் ரூபம் ருப்பனலக்க²ணஸங்கா²தே ஏகவித⁴பா⁴வே பஞ்ஞாய ராஸிம் கத்வா ரூபக்க²ந்தோ⁴ நாமாதி வுச்சதீதி. ஏதேன ஸப்³ப³ம்பி ரூபம் ருப்பனலக்க²ணே ராஸிபா⁴வூபக³மனேன ரூபக்க²ந்தோ⁴தி த³ஸ்ஸிதம் ஹோதி. ந ஹி ரூபதோ அஞ்ஞோ ரூபக்க²ந்தோ⁴ நாம அத்தி². யதா² ச ரூபம், ஏவம் வேத³னாத³யோபி வேத³யிதலக்க²ணாதீ³ஸு ராஸிபா⁴வூபக³மனேன. ந ஹி வேத³னாதீ³ஹி அஞ்ஞே வேத³னாக்க²ந்தா⁴த³யோ நாம அத்தி².

3. இதா³னி ஏகேகஸ்மிம் ஓகாஸே பக்கி²த்தம் ரூபம் விஸும் விஸும் பா⁴ஜேத்வா த³ஸ்ஸேந்தோ தத்த² கதமம் ரூபம் அதீதந்திஆதி³மாஹ. தத்த² தத்தா²தி ஏகாத³ஸஸு ஓகாஸேஸு பக்கி²பித்வா ட²பிதமாதிகாய பு⁴ம்மம். இத³ம் வுத்தம் ஹோதி – அதீதானாக³தபச்சுப்பன்னந்திஆதி³னா நயேன ட²பிதாய மாதிகாய யம் அதீதம் ரூபந்தி வுத்தம், தம் கதமந்தி? இமினா உபாயேன ஸப்³ப³புச்சா²ஸு அத்தோ² வேதி³தப்³போ³. அதீதம் நிருத்³த⁴ந்திஆதீ³னி பதா³னி நிக்கே²பகண்ட³ஸ்ஸ அதீதத்திகபா⁴ஜனீயவண்ணனாயம் (த⁴. ஸ. அட்ட². 1044) வுத்தானேவ. சத்தாரோ ச மஹாபூ⁴தாதி இத³ம் அதீதந்தி வுத்தரூபஸ்ஸ ஸபா⁴வத³ஸ்ஸனம். யதா² சேத்த² ஏவம் ஸப்³ப³த்த² அத்தோ² வேதி³தப்³போ³. இமினா இத³ம் த³ஸ்ஸேதி – அதீதரூபம்பி பூ⁴தானி சேவ பூ⁴தானி உபாதா³ய நிப்³ப³த்தரூபஞ்ச, அனாக³தம்பி…பே… தூ³ரஸந்திகம்பி. ந ஹி பூ⁴தேஹி சேவ பூ⁴தானி உபாதா³ய பவத்தரூபதோ ச அஞ்ஞம் ரூபம் நாம அத்தீ²தி.

அபரோ நயோ – அதீதம்ஸேன ஸங்க³ஹிதந்தி அதீதகோட்டா²ஸேனேவ ஸங்க³ஹிதம், ஏத்தே²வ க³ணனம் க³தம். கிந்தி? சத்தாரோ ச மஹாபூ⁴தா சதுன்னஞ்ச மஹாபூ⁴தானம் உபாதா³யரூபந்தி. ஏவம் ஸப்³ப³த்த² அத்தோ² வேதி³தப்³போ³. அனாக³தபச்சுப்பன்னனித்³தே³ஸபதா³னிபி ஹேட்டா² வுத்தத்தா²னேவ.

இத³ம் பன அதீதானாக³தபச்சுப்பன்னம் நாம ஸுத்தந்தபரியாயதோ அபி⁴த⁴ம்மனித்³தே³ஸதோதி து³வித⁴ம். தம் ஸுத்தந்தபரியாயே ப⁴வேன பரிச்சி²ன்னம். படிஸந்தி⁴தோ ஹி பட்டா²ய அதீதப⁴வேஸு நிப்³ப³த்தம் ரூபம், அனந்தரப⁴வே வா நிப்³ப³த்தம் ஹோது கப்பகோடிஸதஸஹஸ்ஸமத்த²கே வா, ஸப்³ப³ம் அதீதமேவ நாம. சுதிதோ பட்டா²ய அனாக³தப⁴வேஸு நிப்³ப³த்தனகரூபம், அனந்தரப⁴வே வா நிப்³ப³த்தம் ஹோது கப்பகோடிஸதஸஹஸ்ஸமத்த²கே வா, ஸப்³ப³ம் அனாக³தமேவ நாம. சுதிபடிஸந்தி⁴அனந்தரே பவத்தரூபம் பச்சுப்பன்னம் நாம. அபி⁴த⁴ம்மனித்³தே³ஸே பன க²ணேன பரிச்சி²ன்னம். தயோ ஹி ரூபஸ்ஸ க²ணா – உப்பாதோ³, டி²தி, ப⁴ங்கோ³தி. இமே தயோ க²ணே பத்வா நிருத்³த⁴ம் ரூபம், ஸமனந்தரனிருத்³த⁴ம் வா ஹோது அதீதே கப்பகோடிஸதஸஹஸ்ஸமத்த²கே வா, ஸப்³ப³ம் அதீதமேவ நாம. தயோ க²ணே அஸம்பத்தம் ரூபம், ஏகசித்தக்க²ணமத்தேன வா அஸம்பத்தம் ஹோது அனாக³தே கப்பகோடிஸதஸஹஸ்ஸமத்த²கே வா, ஸப்³ப³ம் அனாக³தமேவ நாம. இமே தயோ க²ணே ஸம்பத்தம் ரூபம் பன பச்சுப்பன்னம் நாம. தத்த² கிஞ்சாபி இத³ம் ஸுத்தந்தபா⁴ஜனீயம், ஏவம் ஸந்தேபி அபி⁴த⁴ம்மனித்³தே³ஸேனேவ அதீதானாக³தபச்சுப்பன்னரூபம் நித்³தி³ட்ட²ந்தி வேதி³தப்³ப³ம்.

அபரோ நயோ – இத³ஞ்ஹி ரூபம் அத்³தா⁴ஸந்ததிஸமயக²ணவஸேன சதுதா⁴ அதீதம் நாம ஹோதி. ததா² அனாக³தபச்சுப்பன்னம். அத்³தா⁴வஸேன தாவ ஏகஸ்ஸ ஏகஸ்மிம் ப⁴வே படிஸந்தி⁴தோ புப்³பே³ அதீதம், சுதிதோ உத்³த⁴ம் அனாக³தம், உபி⁴ன்னமந்தரே பச்சுப்பன்னம். ஸந்ததிவஸேன ஸபா⁴க³ஏகஉதுஸமுட்டா²னம் ஏகாஹாரஸமுட்டா²னஞ்ச புப்³பா³பரியவஸேன பவத்தமானம்பி பச்சுப்பன்னம். ததோ புப்³பே³ விஸபா⁴க³உதுஆஹாரஸமுட்டா²னம் அதீதம், பச்சா² அனாக³தம். சித்தஜம் ஏகவீதி²ஏகஜவனஏகஸமாபத்திஸமுட்டா²னம் பச்சுப்பன்னம். ததோ புப்³பே³ அதீதம், பச்சா² அனாக³தம். கம்மஸமுட்டா²னஸ்ஸ பாடியேக்கம் ஸந்ததிவஸேன அதீதாதி³பே⁴தோ³ நத்தி². தேஸஞ்ஞேவ பன உதுஆஹாரசித்தஸமுட்டா²னானம் உபத்த²ம்ப⁴கவஸேன தஸ்ஸ அதீதாதி³பே⁴தோ³ வேதி³தப்³போ³. ஸமயவஸேன ஏகமுஹுத்தபுப்³ப³ண்ஹஸாயன்ஹரத்திதி³வாதீ³ஸு ஸமயேஸு ஸந்தானவஸேன பவத்தமானம் தம் தம் ஸமயம் பச்சுப்பன்னம் நாம. ததோ புப்³பே³ அதீதம், பச்சா² அனாக³தம். க²ணவஸேன உப்பாதா³தி³க்க²ணத்தயபரியாபன்னம் பச்சுப்பன்னம் நாம. ததோ புப்³பே³ அதீதம், பச்சா² அனாக³தம்.

அபிச அதிக்கஹேதுபச்சயகிச்சம் அதீதம். நிட்டி²தஹேதுகிச்சம் அனிட்டி²தபச்சயகிச்சம் பச்சுப்பன்னம். உப⁴யகிச்சமஸம்பத்தம் அனாக³தம். ஸகிச்சக்க²ணே வா பச்சுப்பன்னம். ததோ புப்³பே³ அதீதம், பச்சா² அனாக³தம். ஏத்த² ச க²ணாதி³கதா²வ நிப்பரியாயா, ஸேஸா ஸபரியாயா. தாஸு நிப்பரியாயகதா² இத⁴ அதி⁴ப்பேதா. அஜ்ஜ²த்தது³கஸ்ஸாபி நித்³தே³ஸபதா³னி ஹேட்டா² அஜ்ஜ²த்தத்திகனித்³தே³ஸே (த⁴. ஸ. அட்ட². 1050) வுத்தத்தா²னேவ. ஓளாரிகாதீ³னி ரூபகண்ட³வண்ணனாயம் (த⁴. ஸ. அட்ட². 674) வுத்தத்தா²னேவ.

6. ஹீனது³கனித்³தே³ஸே தேஸம் தேஸம் ஸத்தானந்தி ப³ஹூஸு ஸத்தேஸு ஸாமிவசனம். அபரஸ்ஸாபி அபரஸ்ஸாபீதி ஹி வுச்சமானே தி³வஸம்பி கப்பஸதஸஹஸ்ஸம்பி வத³ந்தோ ஏத்தகமேவ வதே³ய்ய. இதி ஸத்தா² த்³வீஹேவ பதே³ஹி அனவஸேஸே ஸத்தே பரியாதி³யந்தோ ‘தேஸம் தேஸம் ஸத்தான’ந்தி ஆஹ. ஏத்தகேன ஹி ஸப்³ப³ம்பி அபரதீ³பனம் ஸித்³த⁴ம் ஹோதி. உஞ்ஞாதந்தி அவமதம். அவஞ்ஞாதந்தி வம்பே⁴த்வா ஞாதம். ரூபந்திபி ந விதி³தம். ஹீளிதந்தி அக³ஹேதப்³ப³ட்டே²ன கி²த்தம் ச²ட்³டி³தம், ஜிகு³ச்சி²தந்திபி வத³ந்தி. பரிபூ⁴தந்தி கிமேதேனாதி வாசாய பரிப⁴விதம். அசித்தீகதந்தி ந க³ருகதம். ஹீனந்தி லாமகம். ஹீனமதந்தி ஹீனந்தி மதம், லாமகம் கத்வா ஞாதம். ஹீனஸம்மதந்தி ஹீனந்தி லோகே ஸம்மதம், ஹீனேஹி வா ஸம்மதம், கூ³த²ப⁴க்கே²ஹி கூ³தோ² விய. அனிட்ட²ந்தி அப்பியம், படிலாப⁴த்தா²ய வா அபரியேஸிதம். ஸசேபி நம் கோசி பரியேஸேய்ய, பரியேஸது. ஏதஸ்ஸ பன ஆரம்மணஸ்ஸ ஏததே³வ நாமம். அகந்தந்தி அகாமிதம், நிஸ்ஸிரிகம் வா. அமனாபந்தி மனஸ்மிம் ந அப்பிதம். தாதி³ஸஞ்ஹி ஆரம்மணம் மனஸ்மிம் ந அப்பீயதி. அத² வா மனம் அப்பாயதி வட்³டே⁴தீதி மனாபம், ந மனாபம் அமனாபம்.

அபரோ நயோ – அனிட்ட²ம் ஸம்பத்திவிரஹதோ. தம் ஏகந்தேன கம்மஸமுட்டா²னேஸு அகுஸலகம்மஸமுட்டா²னம். அகந்தம் ஸுக²ஸ்ஸ அஹேதுபா⁴வதோ. அமனாபம் து³க்க²ஸ்ஸ ஹேதுபா⁴வதோ. ரூபா ஸத்³தா³தி இத³மஸ்ஸ ஸபா⁴வதீ³பனம். இமஸ்மிஞ்ஹி பதே³ அகுஸலகம்மஜவஸேன அனிட்டா² பஞ்ச காமகு³ணா விப⁴த்தா. குஸலகம்மஜம் பன அனிட்ட²ம் நாம நத்தி², ஸப்³ப³ம் இட்ட²மேவ.

பணீதபத³னித்³தே³ஸோ வுத்தபடிபக்க²னயேன வேதி³தப்³போ³. இமஸ்மிம் பன பதே³ குஸலகம்மஜவஸேன இட்டா² பஞ்ச காமகு³ணா விப⁴த்தா. குஸலகம்மஜஞ்ஹி அனிட்ட²ம் நாம நத்தி², ஸப்³ப³ம் இட்ட²மேவ. யதா² ச கம்மஜேஸு ஏவம் உதுஸமுட்டா²னாதீ³ஸுபி இட்டா²னிட்ட²தா அத்தி² ஏவாதி இமஸ்மிம் து³கே இட்டா²னிட்டா²ரம்மணம் படிவிப⁴த்தந்தி வேதி³தப்³ப³ம். அயம் தாவ ஆசரியானம் ஸமானத்த²கதா². விதண்ட³வாதீ³ பனாஹ – இட்டா²னிட்ட²ம் நாம பாடியேக்கம் படிவிப⁴த்தம் நத்தி², தேஸம் தேஸம் ருசிவஸேன கதி²தம்.

யதா²ஹ –

‘‘மனாபபரியந்தம் க்²வாஹம், மஹாராஜ, பஞ்சஸு காமகு³ணேஸு அக்³க³ந்தி வதா³மி. தேவ, மஹாராஜ, ரூபா ஏகச்சஸ்ஸ மனாபா ஹோந்தி, ஏகச்சஸ்ஸ அமனாபா ஹோந்தி. தேவ, மஹாராஜ, ஸத்³தா³, க³ந்தா⁴, ரஸா, போ²ட்ட²ப்³பா³ ஏகச்சஸ்ஸ மனாபா ஹோந்தி, ஏகச்சஸ்ஸ அமனாபா ஹோந்தீ’’தி (ஸம். நி. 1.123).

ஏவம் யஸ்மா தேயேவ ரூபாத³யோ ஏகோ அஸ்ஸாதே³தி அபி⁴னந்த³தி, தத்த² லோப⁴ம் உப்பாதே³தி. ஏகோ குஜ்ஜ²தி படிஹஞ்ஞதி, தத்த² தோ³ஸம் உப்பாதே³தி. ஏகஸ்ஸ இட்டா² ஹோந்தி கந்தா மனாபா, ஏகஸ்ஸ அனிட்டா² அகந்தா அமனாபா. ஏகோ சேதே ‘இட்டா² கந்தா மனாபா’தி த³க்கி²ணதோ க³ண்ஹாதி, ஏகோ ‘அனிட்டா² அகந்தா அமனாபா’தி வாமதோ. தஸ்மா இட்டா²னிட்ட²ம் நாம பாடியேக்கம் படிவிப⁴த்தம் நாம நத்தி². பச்சந்தவாஸீனஞ்ஹி க³ண்டு³ப்பாதா³பி இட்டா² ஹோந்தி கந்தா மனாபா, மஜ்ஜி²மதே³ஸவாஸீனம் அதிஜேகு³ச்சா². தேஸஞ்ச மோரமம்ஸாதீ³னி இட்டா²னி ஹோந்தி, இதரேஸம் தானி அதிஜேகு³ச்சா²னீதி.

ஸோ வத்தப்³போ³ – ‘‘கிம் பன த்வம் இட்டா²னிட்டா²ரம்மணம் பாடியேக்கம் படிவிப⁴த்தம் நாம நத்தீ²தி வதே³ஸீ’’தி? ‘‘ஆம நத்தீ²’’தி வதா³மி. புன ததே²வ யாவததியம் பதிட்டா²பேத்வா பஞ்ஹோ புச்சி²தப்³போ³ – ‘‘நிப்³பா³னம் நாம இட்ட²ம் உதா³ஹு அனிட்ட²’’ந்தி? ஜானமானோ ‘‘இட்ட²’’ந்தி வக்க²தி. ஸசேபி ந வதே³ய்ய, மா வத³து. நிப்³பா³னம் பன ஏகந்தஇட்ட²மேவ. ‘‘நனு ஏகோ நிப்³பா³னஸ்ஸ வண்ணே கதி²யமானே குஜ்ஜி²த்வா – ‘த்வம் நிப்³பா³னஸ்ஸ வண்ணம் கதே²ஸி, கிம் தத்த² அன்னபானமாலாக³ந்த⁴விலேபனஸயனச்சா²த³னஸமித்³தா⁴ பஞ்ச காமகு³ணா அத்தீ²’தி வத்வா ‘நத்தீ²’தி வுத்தே ‘அலம் தவ நிப்³பா³னேனா’தி நிப்³பா³னஸ்ஸ வண்ணே கதி²யமானே குஜ்ஜி²த்வா உபோ⁴ கண்ணே த²கேதீதி இட்டே²தம். ஏதஸ்ஸ பன வஸேன தவ வாதே³ நிப்³பா³னம் அனிட்ட²ம் நாம ஹோதி. ந பனேதம் ஏவம் க³ஹேதப்³ப³ம். ஏஸோ ஹி விபரீதஸஞ்ஞாய கதே²தி. ஸஞ்ஞாவிபல்லாஸேன ச ததே³வ ஆரம்மணம் ஏகஸ்ஸ இட்ட²ம் ஹோதி, ஏகஸ்ஸ அனிட்ட²ம்’’.

இட்டா²னிட்டா²ரம்மணம் பன பாடியேக்கம் விப⁴த்தம் அத்தீ²தி. கஸ்ஸ வஸேன விப⁴த்தந்தி? மஜ்ஜி²மகஸத்தஸ்ஸ. இத³ஞ்ஹி ந அதிஇஸ்ஸரானம் மஹாஸம்மதமஹாஸுத³ஸ்ஸனத⁴ம்மாஸோகாதீ³னம் வஸேன விப⁴த்தம். தேஸஞ்ஹி தி³ப்³ப³கப்பம்பி ஆரம்மணம் அமனாபம் உபட்டா²தி. ந அதிது³க்³க³தானம் து³ல்லப⁴ன்னபானானம் வஸேன விப⁴த்தம். தேஸஞ்ஹி கணாஜகப⁴த்தஸித்தா²னிபி பூதிமம்ஸரஸோபி அதிமது⁴ரோ அமதஸதி³ஸோ ச ஹோதி. மஜ்ஜி²மகானம் பன க³ணகமஹாமத்தஸேட்டி²குடும்பி³கவாணிஜாதீ³னம் காலேன இட்ட²ம் காலேன அனிட்ட²ம் லப⁴மானானம் வஸேன விப⁴த்தம். ஏவரூபா ஹி இட்டா²னிட்ட²ம் பரிச்சி²ந்தி³தும் ஸக்கோந்தீதி.

திபிடகசூளனாக³த்தே²ரோ பனாஹ – ‘‘இட்டா²னிட்ட²ம் நாம விபாகவஸேனேவ பரிச்சி²ன்னம், ந ஜவனவஸேன. ஜவனம் பன ஸஞ்ஞாவிபல்லாஸவஸேன இட்ட²ஸ்மிம்யேவ ரஜ்ஜதி, இட்ட²ஸ்மிம்யேவ து³ஸ்ஸதி; அனிட்ட²ஸ்மிம்யேவ ரஜ்ஜதி, அனிட்ட²ஸ்மிம்யேவ து³ஸ்ஸதீ’’தி. விபாகவஸேனேவ பனேதம் ஏகந்ததோ பரிச்சி²ஜ்ஜதி. ந ஹி ஸக்கா விபாகசித்தம் வஞ்சேதும். ஸசே ஆரம்மணம் இட்ட²ம் ஹோதி, குஸலவிபாகம் உப்பஜ்ஜதி. ஸசே அனிட்ட²ம், அகுஸலவிபாகம் உப்பஜ்ஜதி. கிஞ்சாபி ஹி மிச்சா²தி³ட்டி²கா பு³த்³த⁴ம் வா ஸங்க⁴ம் வா மஹாசேதியாதீ³னி வா உளாரானி ஆரம்மணானி தி³ஸ்வா அக்கீ²னி பித³ஹந்தி, தோ³மனஸ்ஸம் ஆபஜ்ஜந்தி, த⁴ம்மஸத்³த³ம் ஸுத்வா கண்ணே த²கேந்தி, சக்கு²விஞ்ஞாணஸோதவிஞ்ஞாணானி பன நேஸம் குஸலவிபாகானேவ ஹோந்தி.

கிஞ்சாபி கூ³த²ஸூகராத³யோ கூ³த²க³ந்த⁴ம் கா⁴யித்வா ‘கா²தி³தும் லபி⁴ஸ்ஸாமா’தி ஸோமனஸ்ஸஜாதா ஹோந்தி, கூ³த²த³ஸ்ஸனே பன தேஸம் சக்கு²விஞ்ஞாணம், தஸ்ஸ க³ந்த⁴கா⁴யனே கா⁴னவிஞ்ஞாணம், ரஸஸாயனே ஜிவ்ஹாவிஞ்ஞாணஞ்ச அகுஸலவிபாகமேவ ஹோதி. ப³ந்தி⁴த்வா வரஸயனே ஸயாபிதஸூகரோ ச கிஞ்சாபி விரவதி, ஸஞ்ஞாவிபல்லாஸேன பனஸ்ஸ ஜவனஸ்மிம்யேவ தோ³மனஸ்ஸம் உப்பஜ்ஜதி, காயவிஞ்ஞாணம் குஸலவிபாகமேவ. கஸ்மா? ஆரம்மணஸ்ஸ இட்ட²தாய.

அபிச த்³வாரவஸேனாபி இட்டா²னிட்ட²தா வேதி³தப்³பா³. ஸுக²ஸம்ப²ஸ்ஸஞ்ஹி கூ³த²கலலம் சக்கு²த்³வாரகா⁴னத்³வாரேஸு அனிட்ட²ம், காயத்³வாரே இட்ட²ம் ஹோதி. சக்கவத்தினோ மணிரதனேன போதி²யமானஸ்ஸ, ஸுவண்ணஸூலே உத்தாஸிதஸ்ஸ ச மணிரதனஸுவண்ணஸூலானி சக்கு²த்³வாரே இட்டா²னி ஹோந்தி, காயத்³வாரே அனிட்டா²னி. கஸ்மா? மஹாது³க்க²ஸ்ஸ உப்பாத³னதோ. ஏவம் இட்டா²னிட்ட²ம் ஏகந்ததோ விபாகேனேவ பரிச்சி²ஜ்ஜதீதி வேதி³தப்³ப³ம்.

தம் தம் வா பனாதி ஏத்த² ந ஹேட்டி²மனயோ ஓலோகேதப்³போ³. ந ஹி ப⁴க³வா ஸம்முதிமனாபம் பி⁴ந்த³தி, புக்³க³லமனாபம் பன பி⁴ந்த³தி. தஸ்மா தம்தம்வாபனவஸேனேவ உபாதா³யுபாதா³ய ஹீனப்பணீததா வேதி³தப்³பா³. நேரயிகானஞ்ஹி ரூபம் கோடிப்பத்தம் ஹீனம் நாம; தம் உபாதா³ய திரச்சா²னேஸு நாக³ஸுபண்ணானம் ரூபம் பணீதம் நாம. தேஸம் ரூபம் ஹீனம்; தம் உபாதா³ய பேதானம் ரூபம் பணீதம் நாம. தேஸம்பி ஹீனம்; தம் உபாதா³ய ஜானபதா³னம் ரூபம் பணீதம் நாம. தேஸம்பி ஹீனம்; தம் உபாதா³ய கா³மபோ⁴ஜகானம் ரூபம் பணீதம் நாம. தேஸம்பி ஹீனம்; தம் உபாதா³ய ஜனபத³ஸாமிகானம் ரூபம் பணீதம் நாம. தேஸம்பி ஹீனம்; தம் உபாதா³ய பதே³ஸராஜூனம் ரூபம் பணீதம் நாம. தேஸம்பி ஹீனம்; தம் உபாதா³ய சக்கவத்திரஞ்ஞோ ரூபம் பணீதம் நாம. தஸ்ஸாபி ஹீனம்; தம் உபாதா³ய பு⁴ம்மதே³வானம் ரூபம் பணீதம் நாம. தேஸம்பி ஹீனம்; தம் உபாதா³ய சாதுமஹாராஜிகானம் தே³வானம் ரூபம் பணீதம் நாம. தேஸம்பி ஹீனம்; தம் உபாதா³ய தாவதிம்ஸானம் தே³வானம் ரூபம் பணீதம் நாம…பே… அகனிட்ட²தே³வானம் பன ரூபம் மத்த²கப்பத்தம் பணீதம் நாம.

7. தூ³ரது³கனித்³தே³ஸே இத்தி²ந்த்³ரியாதீ³னி ஹேட்டா² விப⁴த்தானேவ. இமஸ்மிம் பன து³கே து³ப்பரிக்³க³ஹட்டே²ன லக்க²ணது³ப்படிவிஜ்ஜ²தாய ஸுகு²மரூபம் தூ³ரேதி கதி²தம். ஸுக²பரிக்³க³ஹட்டே²ன லக்க²ணஸுப்படிவிஜ்ஜ²தாய ஓளாரிகரூபம் ஸந்திகேதி. கப³ளீகாராஹாரபரியோஸானே ச நிய்யாதனட்டா²னேபி ‘இத³ம் வுச்சதி ரூபம் தூ³ரே’தி ந நீய்யாதிதம். கஸ்மா? து³வித⁴ஞ்ஹி தூ³ரே நாம – லக்க²ணதோ ச ஓகாஸதோ சாதி. தத்த² லக்க²ணதோ தூ³ரேதி ந கதி²தம், தம் ஓகாஸதோ கதே²தப்³ப³ம். தஸ்மா தூ³ரேதி அகதி²தம். ஓளாரிகரூபம் ஓகாஸதோ தூ³ரேதி த³ஸ்ஸேதும் அனிய்யாதேத்வாவ யம் வா பனஞ்ஞம்பீதிஆதி³மாஹ. ஸந்திகபத³னித்³தே³ஸேபி ஏஸேவ நயோ. தத்த² அனாஸன்னேதி ந ஆஸன்னே, அனுபகட்டே²தி நிஸ்ஸடே, தூ³ரேதி தூ³ரம்ஹி, அஸந்திகேதி ந ஸந்திகே. இத³ம் வுச்சதி ரூபம் தூ³ரேதி இத³ம் பண்ணரஸவித⁴ம் ஸுகு²மரூபம் லக்க²ணதோ தூ³ரே, த³ஸவித⁴ம் பன ஓளாரிகரூபம் யேவாபனகவஸேன ஓகாஸதோ தூ³ரேதி வுச்சதி. ஸந்திகபத³னித்³தே³ஸோ உத்தானத்தோ²யேவ.

இத³ம் வுச்சதி ரூபம் ஸந்திகேதி இத³ம் த³ஸவித⁴ம் ஓளாரிகரூபம் லக்க²ணதோ ஸந்திகே, பஞ்சத³ஸவித⁴ம் பன ஸுகு²மரூபம் யேவாபனகவஸேன ஓகாஸதோ ஸந்திகேதி வுச்சதி. கித்தகதோ பட்டா²ய பன ரூபம் ஓகாஸவஸேன ஸந்திகே நாம? கித்தகதோ பட்டா²ய தூ³ரே நாமாதி? பகதிகதா²ய கதே²ந்தானம் த்³வாத³ஸஹத்தோ² ஸவனூபசாரோ நாம ஹோதி. தஸ்ஸ ஓரதோ ரூபம் ஸந்திகே, பரதோ தூ³ரே. தத்த² ஸுகு²மரூபம் தூ³ரே ஹோந்தம் லக்க²ணதோபி ஓகாஸதோபி தூ³ரே ஹோதி; ஸந்திகே ஹோந்தம் பன ஓகாஸதோவ ஸந்திகே ஹோதி, ந லக்க²ணதோ. ஓளாரிகரூபம் ஸந்திகே ஹோந்தம் லக்க²ணதோபி ஓகாஸதோபி ஸந்திகே ஹோதி; தூ³ரே ஹோந்தம் ஓகாஸதோவ தூ³ரே ஹோதி, ந லக்க²ணதோ.

தம் தம் வா பனாதி ஏத்த² ந ஹேட்டி²மனயோ ஓலோகேதப்³போ³. ஹேட்டா² ஹி பி⁴ந்த³மானோ க³தோ. இத⁴ பன ந லக்க²ணதோ தூ³ரம் பி⁴ந்த³தி, ஓகாஸதோ தூ³ரமேவ பி⁴ந்த³தி. உபாதா³யுபாதா³ய தூ³ரஸந்திகஞ்ஹி ஏத்த² த³ஸ்ஸிதம். அத்தனோ ஹி ரூபம் ஸந்திகே நாம; அந்தோகுச்சி²க³தஸ்ஸாபி பரஸ்ஸ தூ³ரே. அந்தோகுச்சி²க³தஸ்ஸ ஸந்திகே; ப³ஹிடி²தஸ்ஸ தூ³ரே. ஏகமஞ்சே ஸயிதஸ்ஸ ஸந்திகே; ப³ஹிபமுகே² டி²தஸ்ஸ தூ³ரே. அந்தோபரிவேணே ரூபம் ஸந்திகே; ப³ஹிபரிவேணே தூ³ரே. அந்தோஸங்கா⁴ராமே ரூபம் ஸந்திகே; ப³ஹிஸங்கா⁴ராமே தூ³ரே. அந்தோஸீமாய ரூபம் ஸந்திகே; ப³ஹிஸீமாய தூ³ரே. அந்தோகா³மகே²த்தே ரூபம் ஸந்திகே; ப³ஹிகா³மக்கே²த்தே தூ³ரே. அந்தோஜனபதே³ ரூபம் ஸந்திகே; ப³ஹிஜனபதே³ தூ³ரே. அந்தோரஜ்ஜஸீமாய ரூபம் ஸந்திகே; ப³ஹிரஜ்ஜஸீமாய தூ³ரே. அந்தோஸமுத்³தே³ ரூபம் ஸந்திகே; ப³ஹிஸமுத்³தே³ரூபம் தூ³ரே. அந்தோசக்கவாளே ரூபம் ஸந்திகே; ப³ஹிசக்கவாளே தூ³ரேதி.

அயம் ரூபக்க²ந்த⁴னித்³தே³ஸோ.