2. வேத³னாக்க²ந்த⁴னித்³தே³ஸோ

8. வேத³னாக்க²ந்த⁴னித்³தே³ஸாதீ³ஸு ஹேட்டா² வுத்தஸதி³ஸம் பஹாய அபுப்³ப³மேவ வண்ணயிஸ்ஸாம. யா காசி வேத³னாதி சதுபூ⁴மிகவேத³னம் பரியாதி³யதி. ஸுகா² வேத³னாதிஆதீ³னி அதீதாதி³வஸேன நித்³தி³ட்ட²வேத³னம் ஸபா⁴வதோ த³ஸ்ஸேதும் வுத்தானி. தத்த² ஸுகா² வேத³னா அத்தி² காயிகா, அத்தி² சேதஸிகா. ததா² து³க்கா² வேத³னா. அது³க்க²மஸுகா² பன சக்கா²த³யோ பஸாத³காயே ஸந்தா⁴ய பரியாயேன ‘அத்தி² காயிகா, அத்தி² சேதஸிகா’. தத்த² ஸப்³பா³பி காயிகா காமாவசரா. ததா² சேதஸிகா து³க்கா² வேத³னா. சேதஸிகா ஸுகா² பன தேபூ⁴மிகா. அது³க்க²மஸுகா² சதுபூ⁴மிகா. தஸ்ஸா ஸப்³ப³ப்பகாராயபி ஸந்ததிவஸேன, க²ணாதி³வஸேன ச அதீதாதி³பா⁴வோ வேதி³தப்³போ³.

தத்த² ஸந்ததிவஸேன ஏகவீதி²ஏகஜவனஏகஸமாபத்திபரியாபன்னா, ஏகவித⁴விஸயஸமாயோக³ப்பவத்தா ச பச்சுப்பன்னா. ததோ புப்³பே³ அதீதா, பச்சா² அனாக³தா. க²ணாதி³வஸேன க²ணத்தயபரியாபன்னா புப்³ப³ந்தாபரந்தமஜ்ஜ²க³தா ஸகிச்சஞ்ச குருமானா வேத³னா பச்சுப்பன்னா. ததோ புப்³பே³ அதீதா, பச்சா² அனாக³தா. தத்த² க²ணாதி³வஸேன அதீதாதி³பா⁴வம் ஸந்தா⁴ய அயம் நித்³தே³ஸோ கதோதி வேதி³தப்³போ³.

11. ஓளாரிகஸுகு²மனித்³தே³ஸே அகுஸலா வேத³னாதிஆதீ³னி ஜாதிதோ ஓளாரிகஸுகு²மபா⁴வம் த³ஸ்ஸேதும் வுத்தானி. து³க்கா² வேத³னா ஓளாரிகாதிஆதீ³னி ஸபா⁴வதோ. அஸமாபன்னஸ்ஸ வேத³னாதிஆதீ³னி புக்³க³லதோ. ஸாஸவாதிஆதீ³னி லோகியலோகுத்தரதோ ஓளாரிகஸுகு²மபா⁴வம் த³ஸ்ஸேதும் வுத்தானி. தத்த² அகுஸலா தாவ ஸத³ரத²ட்டே²ன து³க்க²விபாகட்டே²ன ச ஓளாரிகா. குஸலா நித்³த³ரத²ட்டே²ன ஸுக²விபாகட்டே²ன ச ஸுகு²மா. அப்³யாகதா நிருஸ்ஸாஹட்டே²ன அவிபாகட்டே²ன ச ஸுகு²மா. குஸலாகுஸலா ஸஉஸ்ஸாஹட்டே²ன ஸவிபாகட்டே²ன ச ஓளாரிகா. அப்³யாகதா வுத்தனயேனேவ ஸுகு²மா.

து³க்கா² அஸாதட்டே²ன து³க்க²ட்டே²ன ச ஓளாரிகா. ஸுகா² ஸாதட்டே²ன ஸுக²ட்டே²ன ச ஸுகு²மா. அது³க்க²மஸுகா² ஸந்தட்டே²ன பணீதட்டே²ன ச ஸுகு²மா. ஸுக²து³க்கா² கோ²ப⁴னட்டே²ன ப²ரணட்டே²ன ச ஓளாரிகா. ஸுக²வேத³னாபி ஹி கோ²பே⁴தி ப²ரதி. ததா² து³க்க²வேத³னாபி. ஸுக²ஞ்ஹி உப்பஜ்ஜமானம் ஸகலஸரீரம் கோ²பே⁴ந்தம் ஆலுளேந்தம் அபி⁴ஸந்த³யமானம் மத்³த³யமானம் சா²த³யமானம் ஸீதோத³கக⁴டேன ஆஸிஞ்சயமானம் விய உப்பஜ்ஜதி. து³க்க²ம் உப்பஜ்ஜமானம் தத்தபா²லம் அந்தோ பவேஸந்தம் விய திணுக்காய ப³ஹி ஜா²பயமானம் விய உப்பஜ்ஜதி. அது³க்க²மஸுகா² பன வுத்தனயேனேவ ஸுகு²மா. அஸமாபன்னஸ்ஸ வேத³னா நானாரம்மணே விக்கி²த்தபா⁴வதோ ஓளாரிகா. ஸமாபன்னஸ்ஸ வேத³னா ஏகத்தனிமித்தேயேவ சரதீதி ஸுகு²மா. ஸாஸவா ஆஸவுப்பத்திஹேதுதோ ஓளாரிகா. ஆஸவசாரோ நாம ஏகந்தஓளாரிகோ. அனாஸவா வுத்தவிபரியாயேன ஸுகு²மா.

தத்த² ஏகோ நேவ குஸலத்திகே கோவிதோ³ ஹோதி, ந வேத³னாத்திகே. ஸோ ‘குஸலத்திகம் ரக்கா²மீ’தி வேத³னாத்திகம் பி⁴ந்த³தி; ‘வேத³னாத்திகம் ரக்கா²மீ’தி குஸலத்திகம் பி⁴ந்த³தி. ஏகோ ‘திகம் ரக்கா²மீ’தி பூ⁴மந்தரம் பி⁴ந்த³தி. ஏகோ ந பி⁴ந்த³தி. கத²ம்? ‘‘ஸுக²து³க்கா² வேத³னா ஓளாரிகா, அது³க்க²மஸுகா² வேத³னா ஸுகு²மா’’தி ஹி வேத³னாத்திகே வுத்தம். தம் ஏகோ படிக்கி²பதி – ந ஸப்³பா³ அது³க்க²மஸுகா² ஸுகு²மா. ஸா ஹி குஸலாபி அத்தி² அகுஸலாபி அப்³யாகதாபி. தத்த² குஸலாகுஸலா ஓளாரிகா, அப்³யாகதா ஸுகு²மா. கஸ்மா? குஸலத்திகே பாளியம் ஆக³தத்தாதி. ஏவம் குஸலத்திகோ ரக்கி²தோ ஹோதி, வேத³னாத்திகோ பன பி⁴ன்னோ.

குஸலாகுஸலா வேத³னா ஓளாரிகா, அப்³யாகதா வேத³னா ஸுகு²மா’’தி யம் பன குஸலத்திகே வுத்தம், தம் ஏகோ படிக்கி²பதி – ந ஸப்³பா³ அப்³யாகதா ஸுகு²மா. ஸா ஹி ஸுகா²பி அத்தி² து³க்கா²பி அது³க்க²மஸுகா²பி. தத்த² ஸுக²து³க்கா² ஓளாரிகா, அது³க்க²மஸுகா² ஸுகு²மா. கஸ்மா? வேத³னாத்திகே பாளியம் ஆக³தத்தாதி. ஏவம் வேத³னாத்திகோ ரக்கி²தோ ஹோதி, குஸலத்திகோ பன பி⁴ன்னோ. குஸலத்திகஸ்ஸ பன ஆக³தட்டா²னே வேத³னாத்திகம் அனோலோகேத்வா வேத³னாத்திகஸ்ஸ ஆக³தட்டா²னே குஸலத்திகம் அனோலோகேத்வா குஸலாதீ³னம் குஸலத்திகலக்க²ணேன, ஸுகா²தீ³னம் வேத³னாத்திகலக்க²ணேன ஓளாரிகஸுகு²மதம் கதே²ந்தோ ந பி⁴ந்த³தி நாம.

யம்பி ‘‘குஸலாகுஸலா வேத³னா ஓளாரிகா, அப்³யாகதா வேத³னா ஸுகு²மா’’தி குஸலத்திகே வுத்தம், தத்தே²கோ ‘குஸலா லோகுத்தரவேத³னாபி ஸமானா ஓளாரிகா நாம, விபாகா அந்தமஸோ த்³விபஞ்சவிஞ்ஞாணஸஹஜாதாபி ஸமானா ஸுகு²மா நாம ஹோதீ’தி வத³தி. ஸோ ஏவரூபம் ஸந்தம் பணீதம் லோகுத்தரவேத³னம் ஓளாரிகம் நாம கரோந்தோ, த்³விபஞ்சவிஞ்ஞாணஸம்பயுத்தம் அஹேதுகம் ஹீனம் ஜளம் வேத³னம் ஸுகு²மம் நாம கரோந்தோ ‘திகம் ரக்கி²ஸ்ஸாமீ’தி பூ⁴மந்தரம் பி⁴ந்த³தி நாம. தத்த² தத்த² பூ⁴மியம் குஸலம் பன தம்தம்பூ⁴மிவிபாகேனேவ ஸத்³தி⁴ம் யோஜேத்வா கதே²ந்தோ ந பி⁴ந்த³தி நாம. தத்ராயம் நயோ – காமாவசரகுஸலா ஹி ஓளாரிகா; காமாவசரவிபாகா ஸுகு²மா. ரூபாவசராரூபாவசரலோகுத்தரகுஸலா ஓளாரிகா; ரூபாவசராரூபாவசரலோகுத்தரவிபாகா ஸுகு²மாதி. இமினா நீஹாரேன கதே²ந்தோ ந பி⁴ந்த³தி நாம.

திபிடகசூளனாக³த்தே²ரோ பனாஹ – ‘‘அகுஸலே ஓளாரிகஸுகு²மதா நாம ந உத்³த⁴ரிதப்³பா³. தஞ்ஹி ஏகந்தஓளாரிகமேவ. லோகுத்தரேபி ஓளாரிகஸுகு²மதா ந உத்³த⁴ரிதப்³பா³. தஞ்ஹி ஏகந்தஸுகு²ம’’ந்தி. இமம் கத²ம் ஆஹரித்வா திபிடகசூளாப⁴யத்தே²ரஸ்ஸ கத²யிம்ஸு – ஏவம் தே²ரேன கதி²தந்தி. திபிடகசூளாப⁴யத்தே²ரோ ஆஹ – ‘‘ஸம்மாஸம்பு³த்³தே⁴ன அபி⁴த⁴ம்மம் பத்வா ஏகபத³ஸ்ஸாபி த்³வின்னம்பி பதா³னம் ஆக³தட்டா²னே நயம் தா³தும் யுத்தட்டா²னே நயோ அதி³ன்னோ நாம நத்தி², நயம் காதும் யுத்தட்டா²னே நயோ அகதோ நாம நத்தி². இத⁴ பனேகச்சோ ‘ஆசரியோ அஸ்மீ’தி விசரந்தோ அகுஸலே ஓளாரிகஸுகு²மதம் உத்³த⁴ரமானோ குக்குச்சாயதி. ஸம்மாஸம்பு³த்³தே⁴ன பன லோகுத்தரேபி ஓளாரிகஸுகு²மதா உத்³த⁴ரிதா’’தி. ஏவஞ்ச பன வத்வா இத³ம் ஸுத்தம் ஆஹரி – ‘‘தத்ர, ப⁴ந்தே, யாயம் படிபதா³ து³க்கா² த³ந்தா⁴பி⁴ஞ்ஞா, அயம், ப⁴ந்தே, படிபதா³ உப⁴யேனேவ ஹீனா அக்கா²யதி – து³க்க²த்தா த³ந்த⁴த்தா சா’’தி (தீ³. நி. 3.152). ஏத்த² ஹி சதஸ்ஸோ படிபதா³ லோகியலோகுத்தரமிஸ்ஸகா கதி²தா.

தம் தம் வா பனாதி ஏத்த² ந ஹேட்டி²மனயோ ஓலோகேதப்³போ³. தம்தம்வாபனவஸேனேவ கதே²தப்³ப³ம். து³விதா⁴ ஹி அகுஸலா – லோப⁴ஸஹக³தா தோ³ஸஸஹக³தா ச. தத்த² தோ³ஸஸஹக³தா ஓளாரிகா, லோப⁴ஸஹக³தா ஸுகு²மா. தோ³ஸஸஹக³தாபி து³விதா⁴ – நியதா அனியதா ச. தத்த² நியதா ஓளாரிகா, அனியதா ஸுகு²மா. நியதாபி கப்பட்டி²திகா ஓளாரிகா, நோகப்பட்டி²திகா ஸுகு²மா. கப்பட்டி²திகாபி அஸங்கா²ரிகா ஓளாரிகா, ஸஸங்கா²ரிகா ஸுகு²மா. லோப⁴ஸஹக³தாபி த்³விதா⁴ – தி³ட்டி²ஸம்பயுத்தா தி³ட்டி²விப்பயுத்தா ச. தத்த² தி³ட்டி²ஸம்பயுத்தா ஓளாரிகா, தி³ட்டி²விப்பயுத்தா ஸுகு²மா. தி³ட்டி²ஸம்பயுத்தாபி நியதா ஓளாரிகா, அனியதா ஸுகு²மா. ஸாபி அஸங்கா²ரிகா ஓளாரிகா, ஸஸங்கா²ரிகா ஸுகு²மா.

ஸங்கே²பதோ அகுஸலம் பத்வா யா விபாகம் ப³ஹும் தே³தி ஸா ஓளாரிகா, யா அப்பம் ஸா ஸுகு²மா. குஸலம் பத்வா பன அப்பவிபாகா ஓளாரிகா, ப³ஹுவிபாகா ஸுகு²மா. சதுப்³பி³தே⁴ குஸலே காமாவசரகுஸலா ஓளாரிகா, ரூபாவசரகுஸலா ஸுகு²மா. ஸாபி ஓளாரிகா, அரூபாவசரகுஸலா ஸுகு²மா. ஸாபி ஓளாரிகா, லோகுத்தரகுஸலா ஸுகு²மா. அயம் தாவ பூ⁴மீஸு அபே⁴த³தோ நயோ.

பே⁴த³தோ பன காமாவசரா தா³னஸீலபா⁴வனாமயவஸேன திவிதா⁴. தத்த² தா³னமயா ஓளாரிகா, ஸீலமயா ஸுகு²மா. ஸாபி ஓளாரிகா, பா⁴வனாமயா ஸுகு²மா. ஸாபி து³ஹேதுகா திஹேதுகாதி து³விதா⁴. தத்த² து³ஹேதுகா ஓளாரிகா, திஹேதுகா ஸுகு²மா. திஹேதுகாபி ஸஸங்கா²ரிகஅஸங்கா²ரிகபே⁴த³தோ து³விதா⁴. தத்த² ஸஸங்கா²ரிகா ஓளாரிகா, அஸங்கா²ரிகா ஸுகு²மா. ரூபாவசரே பட²மஜ்ஜா²னகுஸலவேத³னா ஓளாரிகா, து³தியஜ்ஜா²னகுஸலவேத³னா ஸுகு²மா…பே… சதுத்த²ஜ்ஜா²னகுஸலவேத³னா ஸுகு²மா. ஸாபி ஓளாரிகா, ஆகாஸானஞ்சாயதனகுஸலவேத³னா ஸுகு²மா ஆகாஸானஞ்சாயதனகுஸலவேத³னா ஓளாரிகா…பே…. நேவஸஞ்ஞானாஸஞ்ஞாயதனகுஸலவேத³னா ஸுகு²மா. ஸாபி ஓளாரிகா, விபஸ்ஸனாஸஹஜாதா ஸுகு²மா. ஸாபி ஓளாரிகா, ஸோதாபத்திமக்³க³ஸஹஜாதா ஸுகு²மா. ஸாபி ஓளாரிகா…பே… அரஹத்தமக்³க³ஸஹஜாதா ஸுகு²மா.

சதுப்³பி³தே⁴ விபாகே காமாவசரவிபாகவேத³னா ஓளாரிகா, ரூபாவசரவிபாகவேத³னா ஸுகு²மா. ஸாபி ஓளாரிகா…பே… லோகுத்தரவிபாகவேத³னா ஸுகு²மா. ஏவம் தாவ அபே⁴த³தோ.

பே⁴த³தோ பன காமாவசரவிபாகா அத்தி² அஹேதுகா, அத்தி² ஸஹேதுகா. ஸஹேதுகாபி அத்தி² து³ஹேதுகா, அத்தி² திஹேதுகா. தத்த² அஹேதுகா ஓளாரிகா, ஸஹேதுகா ஸுகு²மா. ஸாபி து³ஹேதுகா ஓளாரிகா, திஹேதுகா ஸுகு²மா. தத்தா²பி ஸஸங்கா²ரிகா ஓளாரிகா, அஸங்கா²ரிகா ஸுகு²மா. பட²மஜ்ஜா²னவிபாகா ஓளாரிகா, து³தியஜ்ஜா²னவிபாகா ஸுகு²மா…பே… சதுத்த²ஜ்ஜா²னவிபாகா ஸுகு²மா. ஸாபி ஓளாரிகா, ஆகாஸானஞ்சாயதனவிபாகா ஸுகு²மா. ஸாபி ஓளாரிகா…பே… நேவஸஞ்ஞானாஸஞ்ஞாயதனவிபாகா ஸுகு²மா. ஸாபி ஓளாரிகா, ஸோதாபத்திப²லவேத³னா ஸுகு²மா. ஸாபி ஓளாரிகா, ஸகதா³கா³மி…பே… அரஹத்தப²லவேத³னா ஸுகு²மா.

தீஸு கிரியாஸு காமாவசரகிரியவேத³னா ஓளாரிகா, ரூபாவசரகிரியவேத³னா ஸுகு²மா. ஸாபி ஓளாரிகா, அரூபாவசரகிரியவேத³னா ஸுகு²மா. ஏவம் தாவ அபே⁴த³தோ. பே⁴த³தோ பன அஹேதுகாதி³வஸேன பி⁴ன்னாய காமாவசரகிரியாய அஹேதுககிரியவேத³னா ஓளாரிகா, ஸஹேதுகா ஸுகு²மா. ஸாபி து³ஹேதுகா ஓளாரிகா, திஹேதுகா ஸுகு²மா. தத்தா²பி ஸஸங்கா²ரிகா ஓளாரிகா, அஸங்கா²ரிகா ஸுகு²மா. பட²மஜ்ஜா²னே கிரியவேத³னா ஓளாரிகா, து³தியஜ்ஜா²னே ஸுகு²மா. ஸாபி ஓளாரிகா, ததியே…பே… சதுத்தே² ஸுகு²மா. ஸாபி ஓளாரிகா, ஆகாஸானஞ்சாயதனகிரியவேத³னா ஸுகு²மா. ஸாபி ஓளாரிகா, விஞ்ஞாணஞ்சா…பே… நேவஸஞ்ஞானாஸஞ்ஞாயதனகிரியவேத³னா ஸுகு²மா. யா ஓளாரிகா ஸா ஹீனா. யா ஸுகு²மா ஸா பணீதா.

13. தூ³ரது³கனித்³தே³ஸே அகுஸலவேத³னா விஸபா⁴க³ட்டே²ன விஸம்ஸட்டே²ன ச குஸலாப்³யாகதாஹி தூ³ரே. இமினா நயேன ஸப்³ப³பதே³ஸு தூ³ரதா வேதி³தப்³பா³. ஸசேபி ஹி அகுஸலாதி³வேத³னாஸமங்கி³னோ து³க்கா²தி³வேத³னாஸமங்கி³னோ ச தயோ தயோ ஜனா ஏகமஞ்சே நிஸின்னா ஹோந்தி, தேஸம்பி தா வேத³னா விஸபா⁴க³ட்டே²ன விஸம்ஸட்டே²ன ச தூ³ரேயேவ நாம. ஸமாபன்னவேத³னாதி³ஸமங்கீ³ஸுபி ஏஸேவ நயோ. அகுஸலா பன அகுஸலாய ஸபா⁴க³ட்டே²ன ஸரிக்க²ட்டே²ன ச ஸந்திகே நாம. இமினா நயேன ஸப்³ப³பதே³ஸு ஸந்திகதா வேதி³தப்³பா³. ஸசேபி ஹி அகுஸலாதி³வேத³னாஸமங்கீ³ஸு தீஸு ஜனேஸு ஏகோ காமப⁴வே, ஏகோ ரூபப⁴வே, ஏகோ அரூபப⁴வே, தேஸம்பி தா வேத³னா ஸபா⁴க³ட்டே²ன ஸரிக்க²ட்டே²ன ச ஸந்திகேயேவ நாம. குஸலாதி³வேத³னாஸமங்கீ³ஸுபி ஏஸேவ நயோ.

தம் தம் வா பனாதி ஏத்த² ஹேட்டி²மனயம் அனோலோகேத்வா தம் தம் வாபனவஸேனேவ கதே²தப்³ப³ம். கதே²ந்தேன ச ந தூ³ரதோ ஸந்திகம் உத்³த⁴ரிதப்³ப³ம், ஸந்திகதோ பன தூ³ரம் உத்³த⁴ரிதப்³ப³ம். து³விதா⁴ ஹி அகுஸலா – லோப⁴ஸஹக³தா தோ³ஸஸஹக³தா ச. தத்த² லோப⁴ஸஹக³தா லோப⁴ஸஹக³தாய ஸந்திகே நாம, தோ³ஸஸஹக³தாய தூ³ரே நாம. தோ³ஸஸஹக³தா தோ³ஸஸஹக³தாய ஸந்திகே நாம, லோப⁴ஸஹக³தாய தூ³ரே நாம. தோ³ஸஸஹக³தாபி நியதா நியதாய ஸந்திகே நாமாதி. ஏவம் அனியதா. கப்பட்டி²திகஅஸங்கா²ரிகஸஸங்கா²ரிகபே⁴த³ம் லோப⁴ஸஹக³தாதீ³ஸு ச தி³ட்டி²ஸம்பயுத்தாதி³பே⁴த³ம் ஸப்³ப³ம் ஓளாரிகது³கனித்³தே³ஸே வித்தா²ரிதவஸேன அனுக³ந்த்வா ஏகேககோட்டா²ஸவேத³னா தம்தம்கோட்டா²ஸவேத³னாய ஏவ ஸந்திகே, இதரா இதராய தூ³ரேதி வேதி³தப்³பா³தி.

அயம் வேத³னாக்க²ந்த⁴னித்³தே³ஸோ.