6. அதீதக்க²ந்தா⁴தி³கதா²

1. நஸுத்தஸாத⁴னகதா²வண்ணனா

297. இதா³னி ‘‘அதீதம் க²ந்தா⁴’’திஆதி³கதா² ஹோதி. தத்த² க²ந்தா⁴தி³பா⁴வாவிஜஹனதோ அதீதானாக³தானம் அத்தி²தம் இச்ச²ந்தஸ்ஸ அதீதம் க²ந்தா⁴தி புச்சா² பரவாதி³ஸ்ஸ, அதீதஸ்ஸ க²ந்த⁴ஸங்க³ஹிதத்தா ஆமந்தாதி படிஞ்ஞா ஸகவாதி³ஸ்ஸ. புன அதீதம் நத்தீ²தி புச்சா² பரவாதி³ஸ்ஸ, தஸ்ஸ நிருத்திபத²ஸுத்தேன அத்தி²தாய வாரிதத்தா படிக்கே²போ ஸகவாதி³ஸ்ஸ. ஆயதனதா⁴துபுச்சா²ஸுபி அனாக³தபஞ்ஹேஸுபி பச்சுப்பன்னேன ஸத்³தி⁴ம் ஸம்ஸந்தி³த்வா அனுலோமபடிலோமதோ ஆக³தபஞ்ஹேஸுபி ‘‘அதீதம் ரூப’’ந்திஆதி³பஞ்ஹேஸுபி இமினாவுபாயேன அத்தோ² வேதி³தப்³போ³.

2. ஸுத்தஸாத⁴னவண்ணனா

298. ஸுத்தஸாத⁴னே பன ந வத்தப்³ப³ந்தி புச்சா² ஸகவாதி³ஸ்ஸ. தத்த² நத்தி² சேதேதி நத்தி² ச ஏதே த⁴ம்மாதி அத்தோ². க²ந்தா⁴தி³பா⁴வே ஸதி நத்தி²தம் அனிச்ச²ந்தஸ்ஸ ஆமந்தாதி படிஞ்ஞா பரவாதி³ஸ்ஸ, அத² நேஸம் நத்தி²பா⁴வஸாத⁴னத்த²ம் ஸுத்தாஹரணம் ஸகவாதி³ஸ்ஸ. து³தியபுச்சா²பி பரவாதி³ஸ்ஸ, படிஞ்ஞா ஸகவாதி³ஸ்ஸ, ஸுத்தாஹரணம் பரவாதி³ஸ்ஸ. தம் பன நேஸம் க²ந்தா⁴தி³பா⁴வமேவ ஸாதே⁴தி, ந அத்தி²பா⁴வந்தி ஆஹடம்பி அனாஹடஸதி³ஸமேவாதி.

அதீதம் க²ந்தா⁴திஆதி³கதா²வண்ணனா.