4. ஜஹதிகதா²

1. நஸுத்தாஹரணகதா²வண்ணனா

279. இதா³னி ஜஹதிகதா² நாம ஹோதி. தத்த² யேஸம் ‘‘ஜா²னலாபீ⁴ புது²ஜ்ஜனோ ஸஹ ஸச்சாபி⁴ஸமயா அனாகா³மீ நாம ஹோதி, தஸ்ஸ புது²ஜ்ஜனகாலேயேவ காமராக³ப்³யாபாதா³ பஹீனா’’தி லத்³தி⁴ ஸேய்யதா²பி ஏதரஹி ஸம்மிதியானம், தேஸம் தம் லத்³தி⁴ம் பி⁴ந்தி³தும் ஜஹதி புது²ஜ்ஜனோதி புச்சா² ஸகவாதி³ஸ்ஸ, ஜா²னவிக்க²ம்பி⁴தானம் பன தேஸம் பரியுட்டா²னம் அபஸ்ஸந்தஸ்ஸ படிஞ்ஞா பரவாதி³ஸ்ஸ. யஸ்மா பன தேஸம் ஜா²னவிக்க²ம்பி⁴தானம்பி அனாகா³மிமக்³கே³னேவ அச்சந்தம் பஹானம் ஹோதி, தஸ்மா புன அச்சந்தந்திஆதி³அனுயோகோ³ ஸகவாதி³ஸ்ஸ, ததா²ரூபஸ்ஸ பஹானஸ்ஸ அபா⁴வதோ படிக்கே²போ இதரஸ்ஸ. விக்க²ம்பே⁴தீதி அச்சந்தவிக்க²ம்ப⁴னமேவ ஸந்தா⁴ய புச்சா² ஸகவாதி³ஸ்ஸ. ததோ பரம் அனாகா³மிமக்³க³ட்டே²ன ஸத்³தி⁴ம் புது²ஜ்ஜனஸம்ஸந்த³னம் ஹோதி. தம் உத்தானத்த²மேவ.

280. ததோ பரம் அனாகா³மிப²லே ஸண்டா²தீதி புட்டோ² ஜா²னானாகா³மிதம் ஸந்தா⁴ய படிஜானாதி. அரஹத்தே ஸண்டா²தீதி புட்டோ² த³ஸ்ஸனமக்³கே³ன உத்³த⁴ம்பா⁴கி³யானம் பஹானாபா⁴வதோ படிக்கி²பதி.

அபுப்³ப³ம் அசரிமம் தயோ மக்³கே³தி புட்டோ² ததா²ரூபாய பா⁴வனாய அபா⁴வா படிக்கி²பதி. புன புட்டோ² திண்ணம் மக்³கா³னம் கிச்சஸப்³பா⁴வம் ஸந்தா⁴ய படிஜானாதி. ஸாமஞ்ஞப²லபுச்சா²ஸுபி ஏஸேவ நயோ. கதமேன மக்³கே³னாதி புட்டோ² அனாகா³மிமக்³கே³னாதி ஜா²னானாகா³மிதம் ஸந்தா⁴ய வத³தி. புன ஸம்யோஜனப்பஹானம் புட்டோ² திண்ணம் அனாகா³மிமக்³கே³ன தேஸம் கிலேஸானம் அப்பஹேய்யத்தா படிக்கி²பதி. து³தியம் புட்டோ² பட²மமக்³க³ஸ்ஸேவ ஜா²னானாகா³மிமக்³க³பா⁴வம் ஸந்தா⁴ய படிஜானாதி. ஸேஸமேத்த² உத்தானத்த²மேவாதி.

ஜஹதிகதா².