2. ஸம்ஸந்த³னப்³ரஹ்மசரியவண்ணனா

273. இதா³னி யதி³ அஞ்ஞத்த² பா⁴விதேன மக்³கே³ன அஞ்ஞத்த² ப²லஸச்சி²கிரியா ஹோதி, ஸோதாபன்னாதீ³னம்பி ஸியாதி ஏதமத்த²ம் த³ஸ்ஸேதும் புன அனாகா³மீதிஆதீ³னம் ஸம்ஸந்த³னபுச்சா² ஸகவாதி³ஸ்ஸ. தத்த² அனாகா³மிஸ்ஸ ப²லஸச்சி²கிரியாய படிஞ்ஞா, ஸேஸானம் ப²லஸச்சி²கிரியாய படிக்கே²போ பரவாதி³ஸ்ஸ. இத⁴ பா⁴விதமக்³கோ³ ஹி அனாகா³மீ இத⁴விஹாயனிட்டோ² நாம ஹோதி. ஸோ இத⁴ அனாகா³மிமக்³க³ம் பா⁴வேத்வா ‘‘ஓபபாதிகோ தத்த²பரினிப்³பா³யீ’’தி வசனதோ ‘‘புன மக்³க³பா⁴வனம் வினா உபபத்திவஸேனேவ அரஹத்தப²லம் ஸச்சி²கரோதீ’’தி தஸ்ஸ லத்³தி⁴. ஸோதாபன்னஸகதா³கா³மினோ பன தத்த² மக்³க³ம் பா⁴வேத்வா தத்ருபபத்திகா நாம ஹோந்தீதி தேஸம் இதா⁴க³மனஞ்ஞேவ நத்தி². இதி ஸோ அனாகா³மிஸ்ஸ ப²லஸச்சி²கிரியம் புட்டோ² படிஜானாதி. இதரேஸம் படிக்கி²பதி.

அனாகா³மீ புக்³க³லோ தத்த² பா⁴விதேன மக்³கே³னாதி பஞ்ஹே ‘‘அனாகா³மினோ தத்த² மக்³க³பா⁴வனாவ நத்தீ²’’தி லத்³தி⁴யா படிக்கி²பதி. மக்³கோ³ ச பா⁴வீயதி, ந ச கிலேஸா பஹீயந்தீதி புச்சா² ஸகவாதி³ஸ்ஸ, ரூபாவசரமக்³க³ம் ஸந்தா⁴ய படிஞ்ஞா இதரஸ்ஸ. ரூபாவசரமக்³கே³ன ஹி ஸோ இத⁴விஹாயனிட்டோ² நாம ஜாதோ.

அனாகா³மீ புக்³க³லோ கதகரணீயோதி பஞ்ஹே ‘‘ஓபபாதிகோ தத்த²பரினிப்³பா³யீ’’தி வசனதோ உபபத்தியாவஸ்ஸ கதகரணீயாதி³பா⁴வம் ஸந்தா⁴ய படிஜானாதி. அரஹாதி பஞ்ஹே இத⁴பரினிப்³பா³யினோ அரஹதோ வஸேனேவ படிக்கி²பதி. புன புட்டோ² தத்த²பரினிப்³பா³யினோ வஸேன படிஜானாதி.

அத்தி² அரஹதோ புனப்³ப⁴வோதிஆதீ³ஸுபி தத்த²பரினிப்³பா³யீ இத⁴பரினிப்³பா³யீனம் வஸேனேவ அத்தோ² வேதி³தப்³போ³. அப்படிவித்³தா⁴குப்போவ தத்த²பரினிப்³பா³யதீதி புட்டோ² இதே⁴வ பா⁴விதேன மக்³கே³ன தஸ்ஸ அகுப்பபடிவேத⁴ம் இச்ச²ந்தோ படிக்கி²பதி.

யதா² மிகோ³தி பட²மம் உதா³ஹரணம் பரவாதி³ஸ்ஸ, து³தியம் ஸகவாதி³ஸ்ஸ. ஸேஸம் ஸப்³ப³த்த² உத்தானத்த²மேவாதி.

ப்³ரஹ்மசரியகதா² நிட்டி²தா.