4. இத்³தி⁴கதா²வண்ணனா

883-884. இதா³னி இத்³தி⁴கதா² நாம ஹோதி. தத்த² இத்³தி⁴ நாமேஸா கத்த²சி இஜ்ஜ²தி, கத்த²சி ந இஜ்ஜ²தி, அனிச்சாதீ³னம் நிச்சாதி³கரணே ஏகந்தேனேவ ந இஜ்ஜ²தி. ஸபா⁴க³ஸந்ததிம் பன பரிவத்தேத்வா விஸபா⁴க³ஸந்ததிகரணே வா ஸபா⁴க³ஸந்ததிவஸேனேவ சிரதரப்பவத்தனே வா யேஸம் அத்தா²ய கரியதி, தேஸம் புஞ்ஞாதீ³னி காரணானி நிஸ்ஸாய கத்த²சி இஜ்ஜ²தி, பி⁴க்கூ²னம் அத்தா²ய பானீயஸ்ஸ ஸப்பிகீ²ராதி³கரணே விய மஹாதா⁴துனிதா⁴னே தீ³பாதீ³னம் சிரஸந்தானப்பவத்தனே விய சாதி இத³ம் ஸகஸமயே ஸன்னிட்டா²னம். யம் பன ஆயஸ்மா பிலிந்த³வச்சோ² ரஞ்ஞோ பாஸாத³ம் ஸுவண்ணந்த்வேவ அதி⁴முச்சி, தம் நிஸ்ஸாய யேஸம் ‘‘அத்தி² அதி⁴ப்பாயஇத்³தீ⁴’’தி லத்³தி⁴, ஸேய்யதா²பி அந்த⁴கானம்; தே ஸந்தா⁴ய அத்தி² அதி⁴ப்பாயஇத்³தீ⁴தி புச்சா² ஸகவாதி³ஸ்ஸ. தத்த² அதி⁴ப்பாயஇத்³தீ⁴தி அதி⁴ப்பாயஇத்³தி⁴, யதா²தி⁴ப்பாயம் இஜ்ஜ²னஇத்³தீ⁴தி அத்தோ². ஆமந்தாதி லத்³தி⁴மத்தே ட²த்வா படிஞ்ஞா பரவாதி³ஸ்ஸ. அத² நம் அனிச்சாதீ³னம் நிச்சாதி³தாய அனுயுஞ்ஜிதும் நிச்சபண்ணா ருக்கா² ஹோந்தூதிஆதி³மாஹ. ஸேஸமேத்த² உத்தானத்த²மேவ. லத்³தி⁴பதிட்டா²பனே ஸுவண்ணோ ச பனாஸீதி ரஞ்ஞோ புஞ்ஞூபனிஸ்ஸயேன ஆஸி, ந கேவலம் தே²ரஸ்ஸ அதி⁴ப்பாயேனேவ. தஸ்மா அஸாத⁴கமேதந்தி.

இத்³தி⁴கதா²வண்ணனா.