9. நயதா²சித்தஸ்ஸ வாசாதிகதா²வண்ணனா

564. இதா³னி நயதா²சித்தஸ்ஸ வாசாதிகதா² நாம ஹோதி. தத்த² யஸ்மா கோசி அஞ்ஞம் ப⁴ணிஸ்ஸாமீதி அஞ்ஞம் ப⁴ணதி, தஸ்மா நயதா²சித்தஸ்ஸ வாசா சித்தானுரூபா சித்தானுக³திகா ந ஹோதி, வினாபி சித்தேன பவத்ததீதி யேஸம் லத்³தி⁴; ஸேய்யதா²பி புப்³ப³ஸேலியானம்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘யதி³ தம்ஸமுட்டா²பகம் சித்தம் ந ஸியா, ப²ஸ்ஸாத³யோபி தஸ்மிம் க²ணே ந ஸியு’’ந்தி சோதே³தும் அப²ஸ்ஸகஸ்ஸாதிஆதி³மாஹ. ந ப⁴ணிதுகாமோதிஆதீ³ஸு யஸ்மா அஞ்ஞம் ப⁴ணிஸ்ஸாமீதி அஞ்ஞம் ப⁴ணந்தோபி ப⁴ணிதுகாமோயேவ நாம ஹோதி, தஸ்மா ந ஹேவாதி படிக்கி²பதி.

565. நனு அத்தி² கோசி அஞ்ஞம் ப⁴ணிஸ்ஸாமீதிஆதீ³ஸு சீவரந்தி ப⁴ணிதுகாமோ சீரந்தி ப⁴ணேய்ய. தத்த² அஞ்ஞம் ப⁴ணிதுகாமதாசித்தம், அஞ்ஞம் ப⁴ணனசித்தம், இதி புப்³ப³பா⁴கே³ன சித்தேன அஸதி³ஸத்தா அயதா²சித்தோ நாம ஹோதி, தேனஸ்ஸ கேவலம் அனாபத்தி நாம ஹோதி, ந பன சீரந்தி வசனஸமுட்டா²பகசித்தம் நத்தி², இதி அசித்தகா ஸா வாசாதி அத்த²ம் ஸந்தா⁴ய இமினா உதா³ஹரணேன ‘‘நயதா²சித்தஸ்ஸ வாசா’’தி பதிட்டா²பிதாபி அப்பதிட்டா²பிதாவ ஹோதீதி.

நயதா²சித்தஸ்ஸ வாசாதிகதா²வண்ணனா.