4. அனுஸயா அனாரம்மணகதா²வண்ணனா

554-556. இதா³னி அனுஸயா அனாரம்மணாதிகதா² நாம ஹோதி. தத்த² யேஸம் அனுஸயா நாம சித்தவிப்பயுத்தா அஹேதுகா அப்³யாகதா, தேனேவ ச அனாரம்மணாதி லத்³தி⁴, ஸேய்யதா²பி அந்த⁴கானஞ்சேவ ஏகச்சானஞ்ச உத்தராபத²கானம்; தே ஸந்தா⁴ய அனுஸயாதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் அனாரம்மணேன நாம ஏவம்விதே⁴ன ப⁴விதப்³ப³ந்தி சோதே³தும் ரூபந்திஆதி³மாஹ. காமராகோ³திஆதி³ காமராகா³னுஸயதோ அனஞ்ஞத்தா த³ஸ்ஸிதம். ஸங்கா²ரக்க²ந்தோ⁴ அனாரம்மணோதி பஞ்ஹே சித்தஸம்பயுத்தஸங்கா²ரக்க²ந்த⁴ம் ஸந்தா⁴ய படிக்கி²பதி. அனுஸயம் ஜீவிதிந்த்³ரியம் காயகம்மாதி³ரூபஞ்ச ஸங்கா²ரக்க²ந்த⁴பரியாபன்னம், தம் ஸந்தா⁴ய படிஜானாதி. இமினாவுபாயேன ஸப்³ப³வாரேஸு அத்தோ² வேதி³தப்³போ³. ஸானுஸயோதி பஞ்ஹே பன அப்பஹீனானுஸயத்தா ஸானுஸயதா அனுஞ்ஞாதா. ந அனுஸயானம் பவத்திஸப்³பா⁴வா. யோ ஹி அப்பஹீனோ, ந ஸோ அதீதோ, நானாக³தோ, ந பச்சுப்பன்னோ ச. மக்³க³வஜ்ஜ²கிலேஸோ பனேஸ அப்பஹீனத்தாவ அத்தீ²தி வுச்சதி. ஏவரூபஸ்ஸ ச இத³ம் நாம ஆரம்மணந்தி ந வத்தப்³ப³ம். தஸ்மா தம் படிக்கி²த்தம். தம் பனேதம் ந கேவலம் அனுஸயஸ்ஸ, ராகா³தீ³னம்பி தாதி³ஸமேவ, தஸ்மா அனுஸயானம் அனாரம்மணதாஸாத⁴கம் ந ஹோதீதி.

அனுஸயா அனாரம்மணாதிகதா²வண்ணனா.