7. ஆகாஸோ ஸனித³ஸ்ஸனோதிகதா²வண்ணனா

463-464. இதா³னி ஆகாஸோ ஸனித³ஸ்ஸனோதிகதா² நாம ஹோதி. தத்த² யேஸம் தாளச்சி²த்³தா³தீ³ஸு ஞாணப்பவத்திம் நிஸ்ஸாய ‘‘ஸப்³போ³பி அஜடாகாஸோ ஸனித³ஸ்ஸனோ’’தி லத்³தி⁴, ஸேய்யதா²பி அந்த⁴கானம்; தே ஸந்தா⁴ய ஆகாஸோ ஸனித³ஸ்ஸனோதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நம் ‘‘யதி³ ஸனித³ஸ்ஸனோ, ஏவம்விதோ⁴ ப⁴வேய்யா’’தி சோத³னத்த²ம் ரூபந்திஆதி³ வுத்தம். சக்கு²ஞ்ச படிச்சாதிபஞ்ஹேஸு ஏவரூபஸ்ஸ ஸுத்தஸ்ஸ அபா⁴வேன படிக்கி²பித்வா துலந்தரிகாதீ³னம் உபலத்³தி⁴ம் நிஸ்ஸாய படிஜானாதி. த்³வின்னம் ருக்கா²னம் அந்தரந்தி ஏத்த² ருக்க²ரூபம் சக்கு²னா தி³ஸ்வா அந்தரே ரூபாபா⁴வதோ ஆகாஸந்தி மனோத்³வாரவிஞ்ஞாணம் உப்பஜ்ஜதி, ந சக்கு²விஞ்ஞாணம். ஸேஸேஸுபி ஏஸேவ நயோ. தஸ்மா அஸாத⁴கமேதந்தி.

ஆகாஸோ ஸனித³ஸ்ஸனோதிகதா²வண்ணனா.