5. நிரோத⁴ஸமாபத்திகதா²வண்ணனா

457-459. இதா³னி நிரோத⁴ஸமாபத்திகதா² நாம ஹோதி. தத்த² நிரோத⁴ஸமாபத்தீதி சதுன்னம் க²ந்தா⁴னம் அப்பவத்தி. யஸ்மா பன ஸா கரியமானா கரியதி, ஸமாபஜ்ஜியமானா ஸமாபஜ்ஜியதி, தஸ்மா நிப்ப²ன்னாதி வுச்சதி. ஸங்க²தாஸங்க²தலக்க²ணானம் பன அபா⁴வேன ந வத்தப்³பா³ ‘‘ஸங்க²தாதி வா அஸங்க²தா’’தி வா. தத்த² யேஸம் ‘‘யஸ்மா ஸங்க²தா ந ஹோதி, தஸ்மா அஸங்க²தா’’தி லத்³தி⁴, ஸேய்யதா²பி அந்த⁴கானஞ்சேவ உத்தராபத²கானஞ்ச; தே ஸந்தா⁴ய நிரோத⁴ஸமாபத்தீதி புச்சா² ஸகவாதி³ஸ்ஸ, படிஞ்ஞா இதரஸ்ஸ. உப்பாதே³ந்தீதிஆதி³ ஸமாபஜ்ஜனபடிலாப⁴வஸேனேவ வுத்தம். யதா² பன ரூபாத³யோ அஸங்க²தத⁴ம்மே உப்பாதே³ந்தி; ந ததா² தம் கேசி உப்பாதே³ந்தி நாம. நிரோதா⁴ வோதா³னம் வுட்டா²னந்தி ப²லஸமாபத்தி வேதி³தப்³பா³. அஸங்க²தா பன தம் நத்தி²யேவ, தஸ்மா படிக்கி²பதி. தேன ஹீதி யஸ்மா ஸங்க²தா ந ஹோதி, தஸ்மா அஸங்க²தாதி லத்³தி⁴. இத³ம் பன அஸங்க²தபா⁴வே காரணம் ந ஹோதீதி வுத்தம்பி அவுத்தஸதி³ஸமேவாதி.

நிரோத⁴ஸமாபத்திகதா²வண்ணனா.