7. ஸத்தகனித்³தே³ஸவண்ணனா

203. ஸத்தகே – ஸகிம் நிமுக்³கோ³தி ஏகவாரம் நிமுக்³கோ³. ஏகந்தகாளகேஹீதி ஏகந்தேனேவ காளகேஹி நத்தி²கவாத³அஹேதுகவாத³அகிரியவாத³ஸங்கா²தேஹி நியதமிச்சா²தி³ட்டி²த⁴ம்மேஹி. ஏவம் புக்³க³லோதி இமினா காரணேன புக்³க³லோ ஏகவாரம் நிமுக்³கோ³ ததா² நிமுக்³கோ³வ ஹோதி. ஏதஸ்ஸ ஹி புன ப⁴வதோ வுட்டா²னம் நாம நத்தீ²தி வத³ந்தி. மக்க²லிகோ³ஸாலாத³யோ விய ஹேட்டா² நரகக்³கீ³னம்யேவ ஆஹாரோ ஹோதி.

ஸாஹு ஸத்³தா⁴ குஸலேஸு த⁴ம்மேஸூதி குஸலத⁴ம்மேஸு ஸத்³தா⁴ நாம ஸாது⁴லத்³தி⁴காதி உம்முஜ்ஜதி. ஸோ தாவதகேனேவ குஸலேன உம்முஜ்ஜதி நாம. ஸாது⁴ ஹிரீதிஆதீ³ஸுபி ஏஸேவ நயோ. ஹாயதியேவாதி சங்கவாரே ஆஸித்தஉத³கம் விய ஏகந்தேன பரிஹாயதேவ. ஏவம் புக்³க³லோதி ஏவம் ஸாஹு ஸத்³தா⁴தி. இமேஸம் ஸத்³தா⁴தீ³னம் வஸேன ஏகவாரம் உம்முஜ்ஜித்வா தேஸம் பரிஹானியா புன நிமுஜ்ஜதியேவ, தே³வத³த்தாத³யோ விய. தே³வத³த்தோ ஹி அட்ட² ஸமாபத்தியோ, பஞ்ச ச அபி⁴ஞ்ஞாயோ நிப்³ப³த்தேத்வாபி புன பு³த்³தா⁴னம் படிகண்டகதாய தேஹி கு³ணேஹி பரிஹீனோ ருஹிருப்பாத³கம்மம் ஸங்க⁴பே⁴த³கம்மஞ்ச கத்வா காயஸ்ஸ பே⁴தா³ து³தியசித்தவாரேன நிரயே நிப்³ப³த்தி. கோகாலிகோ த்³வே அக்³க³ஸாவகே உபவதி³த்வா பது³மனிரயே நிப்³ப³த்தோ.

நேவ ஹாயதி நோ வட்³ட⁴தீதி அப்பஹோனககாலேபி ந ஹாயதி, பஹோனககாலேபி ந வட்³ட⁴தி. உப⁴யம்பி பனேதம் அகா³ரிகேனபி அனகா³ரிகேனபி தீ³பேதப்³ப³ம். ஏகச்சோ ஹி அகா³ரிகோ அப்பஹோனககாலே பக்கி²கப⁴த்தம் வா ஸலாகப⁴த்தம் வா வஸ்ஸாவாஸிகம் வா உபனிப³ந்தா⁴பேதி. ஸோ பச்சா² பஹோனககாலேபி பக்கி²கப⁴த்தாதி³மத்தமேவ பவத்தேதி. அனகா³ரிகோபி ஆதி³ம்ஹி அப்பஹோனககாலே உத்³தே³ஸம் வா து⁴தங்க³ம் வா க³ண்ஹாதி, மேதா⁴ப³லவீரியஸம்பத்தியா பஹோனககாலேபி ததோ உத்தரிம் ந கரோதி. ஏவம் புக்³க³லோதி ஏவம் இமாய ஸத்³தா⁴தீ³னம் டி²தியா புக்³க³லோ உம்முஜ்ஜித்வா டி²தோ நாம ஹோதி.

உம்முஜ்ஜித்வா விபஸ்ஸதி விலோகேதீதி ஸோதாபன்னோ புக்³க³லோ உட்ட²ஹித்வா க³மனமக்³க³ம் க³ந்தப்³ப³ம் தி³ஸம் வா ஆலோகேதி நாம.

உம்முஜ்ஜித்வா பதரதீதி ஸகதா³கா³மிபுக்³க³லோ கிலேஸதனுதாய உட்ட²ஹித்வா க³ந்தப்³ப³தி³ஸாபி⁴முகோ² பதரதி நாம.

பதிகா³த⁴ப்பத்தோ ஹோதீதி அனாகா³மிபுக்³க³லோ உட்டா²ய விலோகேத்வா பதரித்வா க³ந்த்வா ஏகஸ்மிம் டா²னே பதிட்டா²பத்தோ நாம ஹோதி, திட்ட²தி, ந புனாக³ச்ச²தி.

திண்ணோ பாரங்க³தோ த²லே திட்ட²தீதி ஸப்³ப³கிலேஸோக⁴ம் தரித்வா பரதீரம் க³ந்த்வா நிப்³பா³னத²லே டி²தோ நாம ஹோதி. இமே பன ஸத்த புக்³க³லா உத³கோபமேன தீ³பிதா.

ஸத்த கிர ஜங்க⁴வாணிஜா அத்³தா⁴னமக்³க³படிபன்னா அந்தராமக்³கே³ ஏகம் புண்ணனதி³ம் பாபுணிம்ஸு. தேஸு பட²மம் ஓதிண்ணோ உத³கபீ⁴ருகோ புரிஸோ ஓதிண்ணட்டா²னேயேவ நிமுஜ்ஜித்வா புன உட்டா²தும் நாஸக்கி², அந்தோயேவ மச்ச²கச்ச²பப⁴க்கோ² ஜாதோ. து³தியோ ஓதிண்ணட்டா²னே நிமுஜ்ஜித்வா ஸகிம் உட்ட²ஹித்வா புன நிமுக்³கோ³ உட்டா²தும் நாஸக்கி², அந்தோயேவ மச்ச²கச்ச²பப⁴க்கோ² ஜாதோ. ததியோ நிமுஜ்ஜித்வா உட்ட²ஹி. ஸோ மஜ்ஜே² நதி³யா ட²த்வா நேவ ஓரதோ ஆக³ந்தும், ந பரதோ க³ந்தும் அஸக்கி². சதுத்தோ² உட்டா²ய டி²தோ உத்தரணதித்த²ம் ஓலோகேஸி. பஞ்சமோ ஓதரணதித்த²ம் ஓலோகேத்வா பதரி. ச²ட்டோ² தரித்வா பாரிமதீரம் க³ந்த்வா கடிப்பமாணே உத³கே டி²தோ. ஸத்தமோ பாரிமதீரம் க³ந்த்வா க³ந்த⁴சுண்ணாதீ³ஹி ந்ஹாத்வா வரவத்தா²னி நிவாஸேத்வா ஸுரபி⁴விலேபனம் விலிம்பித்வா நீலுப்பலாதீ³னி பிளந்தி⁴த்வா நானாலங்காரபடிமண்டி³தோ மஹானக³ரம் பவிஸித்வா பாஸாத³வரமாருய்ஹ உத்தமபோ⁴ஜனம் பு⁴ஞ்ஜி.

தத்த² ஸத்த ஜங்க⁴வாணிஜா விய இமே ஸத்த புக்³க³லா. நதீ³ விய வட்டம். பட²மஸ்ஸ உத³கபீ⁴ருகஸ்ஸ புரிஸஸ்ஸ ஓதிண்ணட்டா²னேயேவ நிமுஜ்ஜனம் விய மிச்சா²தி³ட்டி²கஸ்ஸ வட்டே நிமுஜ்ஜனம். உம்முஜ்ஜித்வா நிமுக்³க³புரிஸோ விய ஸத்³தா⁴தீ³னம் உப்பத்திமத்தகேன உம்முஜ்ஜித்வா தேஸம் பரிஹானியா நிமுக்³க³புக்³க³லோ. மஜ்ஜே² நதி³யா டி²தோ விய ஸத்³தா⁴தீ³னம் டி²தியா டி²தபுக்³க³லோ. உத்தரணதித்த²ம் ஓலோகேந்தோ விய க³ந்தப்³ப³மக்³க³ம் க³ந்தப்³ப³தி³ஸம் வா ஓலோகேந்தோ ஸோதாபன்னோ. பதரிதபுரிஸோ விய கிலேஸதனுதாய பதரந்தோ ஸகதா³கா³மீ. தரித்வா கடிமத்தே உத³கே டி²தபுரிஸோ விய அனாவத்திதத⁴ம்மதாய டி²தோ அனாகா³மீ. ந்ஹத்வா பாரிமதீரம் உத்தரித்வா த²லே டி²தபுரிஸோ விய சத்தாரோ ஓகே⁴ அதிக்கமித்வா நிப்³பா³னத²லே டி²தோ கீ²ணாஸவப்³ராஹ்மணோ. த²லே டி²தபுரிஸஸ்ஸ நக³ரம் பவிஸித்வா பாஸாத³வரம் ஆருய்ஹ உத்தமபோ⁴ஜனபு⁴ஞ்ஜனம் விய கீ²ணாஸவஸ்ஸ நிப்³பா³னாரம்மணம் ப²லஸமாபத்திம் அப்பேத்வா வீதினாமனம் வேதி³தப்³ப³ம். உப⁴தோபா⁴க³விமுத்தாத³யோ ஹேட்டா² பகாஸிதாயேவாதி.

ஸத்தகனித்³தே³ஸவண்ணனா.

207. அட்ட²கனவகனித்³தே³ஸாபி ஹேட்டா² வுத்தனயேனேவ வேதி³தப்³பா³.