1. மாதிகாவண்ணனா

1. ச² பஞ்ஞத்தியோ – க²ந்த⁴பஞ்ஞத்தி…பே… புக்³க³லபஞ்ஞத்தீதி அயம் தாவ புக்³க³லபஞ்ஞத்தியா உத்³தே³ஸோ. தத்த² சா²தி க³ணனபரிச்சே²தோ³. தேன யே த⁴ம்மே இத⁴ பஞ்ஞபேதுகாமோ தேஸம் க³ணனவஸேன ஸம்கே²பதோ பஞ்ஞத்திபரிச்சே²த³ம் த³ஸ்ஸேதி. பஞ்ஞத்தியோதி பரிச்சி²ன்னத⁴ம்மனித³ஸ்ஸனம். தத்த² ‘‘ஆசிக்க²தி தே³ஸேதி பஞ்ஞபேதி பட்ட²பேதீ’’தி (ஸம். நி. 2.20) ஆக³தட்டா²னே பஞ்ஞாபனா த³ஸ்ஸனா பகாஸனா பஞ்ஞத்தி நாம. ‘‘ஸுபஞ்ஞத்தம் மஞ்சபீட²’’ந்தி (பாரா. 269) ஆக³தட்டா²னே ட²பனா நிக்கி²பனா பஞ்ஞத்தி நாம. இத⁴ உப⁴யம்பி வட்டதி. ச² பஞ்ஞத்தியோதி ஹி ச² பஞ்ஞாபனா, ச² த³ஸ்ஸனா பகாஸனாதிபி; ச² ட²பனா நிக்கி²பனாதிபி இத⁴ அதி⁴ப்பேதமேவ. நாமபஞ்ஞத்தி ஹி தே தே த⁴ம்மே த³ஸ்ஸேதிபி, தேன தேன கோட்டா²ஸேன ட²பேதிபி.

க²ந்த⁴பஞ்ஞத்தீதிஆதி³ பன ஸம்கே²பதோ தாஸம் பஞ்ஞத்தீனம் ஸரூபத³ஸ்ஸனம். தத்த² க²ந்தா⁴னம் ‘க²ந்தா⁴’தி பஞ்ஞாபனா த³ஸ்ஸனா பகாஸனா ட²பனா நிக்கி²பனா க²ந்த⁴பஞ்ஞத்தி நாம. ஆயதனானம் ஆயதனானீதி, தா⁴தூனம் தா⁴துயோதி, ஸச்சானம் ஸச்சானீதி, இந்த்³ரியானம் இந்த்³ரியானீதி, புக்³க³லானம் புக்³க³லாதி பஞ்ஞாபனா த³ஸ்ஸனா பகாஸனா ட²பனா நிக்கி²பனா புக்³க³லபஞ்ஞத்தி நாம.

பாளிமுத்தகேன பன அட்ட²கதா²னயேன அபராபி ச² பஞ்ஞத்தியோ – விஜ்ஜமானபஞ்ஞத்தி, அவிஜ்ஜமானபஞ்ஞத்தி, விஜ்ஜமானேன அவிஜ்ஜமானபஞ்ஞத்தி, அவிஜ்ஜமானேன விஜ்ஜமானபஞ்ஞத்தி, விஜ்ஜமானேன விஜ்ஜமானபஞ்ஞத்தி, அவிஜ்ஜமானேன அவிஜ்ஜமானபஞ்ஞத்தீதி. தத்த² குஸலாகுஸலஸ்ஸேவ ஸச்சிகட்ட²பரமத்த²வஸேன விஜ்ஜமானஸ்ஸ ஸதோ ஸம்பூ⁴தஸ்ஸ த⁴ம்மஸ்ஸ பஞ்ஞாபனா விஜ்ஜமானபஞ்ஞத்தி நாம. ததா² அவிஜ்ஜமானஸ்ஸ லோகனிருத்திமத்தஸித்³த⁴ஸ்ஸ இத்தி²புரிஸாதி³கஸ்ஸ பஞ்ஞாபனா அவிஜ்ஜமானபஞ்ஞத்தி நாம. ஸப்³பா³காரேனபி அனுபலப்³ப⁴னேய்யஸ்ஸ வாசாவத்து²மத்தஸ்ஸேவ பஞ்சமஸச்சாதி³கஸ்ஸ தித்தி²யானம் அணுபகதிபுரிஸாதி³கஸ்ஸ வா பஞ்ஞாபனாபி அவிஜ்ஜமானபஞ்ஞத்தியேவ. ஸா பன ஸாஸனாவசரா ந ஹோதீதி இத⁴ ந க³ஹிதா. இதி இமேஸம் விஜ்ஜமானாவிஜ்ஜமானானம் விகப்பனவஸேன ஸேஸா வேதி³தப்³பா³. ‘தேவிஜ்ஜோ’, ‘ச²ளபி⁴ஞ்ஞோ’திஆதீ³ஸு ஹி திஸ்ஸோ விஜ்ஜா ச² அபி⁴ஞ்ஞா ச விஜ்ஜமானா, புக்³க³லோ அவிஜ்ஜமானோ. தஸ்மா திஸ்ஸோ விஜ்ஜா அஸ்ஸாதி தேவிஜ்ஜோ, ச² அபி⁴ஞ்ஞா அஸ்ஸாதி ச²ளபி⁴ஞ்ஞோதி ஏவம் விஜ்ஜமானேன அவிஜ்ஜமானஸ்ஸ பஞ்ஞாபனதோ ஏவரூபா விஜ்ஜமானேன அவிஜ்ஜமானபஞ்ஞத்தி நாம. ‘இத்தி²ரூபம்’, ‘புரிஸரூப’ந்திஆதீ³ஸு பன இத்தி²புரிஸா அவிஜ்ஜமானா, ரூபம் விஜ்ஜமானம். தஸ்மா இத்தி²யா ரூபம் இத்தி²ரூபம், புரிஸஸ்ஸ ரூபம் புரிஸரூபந்தி ஏவம் அவிஜ்ஜமானேன விஜ்ஜமானஸ்ஸ பஞ்ஞாபனதோ ஏவரூபா அவிஜ்ஜமானேன விஜ்ஜமானபஞ்ஞத்தி நாம. சக்கு²ஸம்ப²ஸ்ஸோ, ஸோதஸம்ப²ஸ்ஸோதிஆதீ³ஸு சக்கு²ஸோதாத³யோபி ப²ஸ்ஸோபி விஜ்ஜமானோயேவ. தஸ்மா சக்கு²ம்ஹி ஸம்ப²ஸ்ஸோ, சக்கு²தோ ஜாதோ ஸம்ப²ஸ்ஸோ, சக்கு²ஸ்ஸ வா ப²லபூ⁴தோ ஸம்ப²ஸ்ஸோ சக்கு²ஸம்ப²ஸ்ஸோதி ஏவம் விஜ்ஜமானேன விஜ்ஜமானஸ்ஸ பஞ்ஞாபனதோ ஏவரூபா விஜ்ஜமானேன விஜ்ஜமானபஞ்ஞத்தி நாம. க²த்தியபுத்தோ, ப்³ராஹ்மணபுத்தோ, ஸேட்டி²புத்தோதிஆதீ³ஸு க²த்தியாத³யோபி அவிஜ்ஜமானா, புத்தோபி. தஸ்மா க²த்தியஸ்ஸ புத்தோ க²த்தியபுத்தோதி ஏவம் அவிஜ்ஜமானேன அவிஜ்ஜமானஸ்ஸ பஞ்ஞாபனதோ ஏவரூபா அவிஜ்ஜமானேன அவிஜ்ஜமானபஞ்ஞத்தி நாம. தாஸு இமஸ்மிம் பகரணே புரிமா திஸ்ஸோவ பஞ்ஞத்தியோ லப்³ப⁴ந்தி. ‘‘க²ந்த⁴பஞ்ஞத்தி…பே… இந்த்³ரியபஞ்ஞத்தீ’’தி இமஸ்மிஞ்ஹி டா²னே விஜ்ஜமானஸ்ஸேவ பஞ்ஞாபிதத்தா விஜ்ஜமானபஞ்ஞத்தி லப்³ப⁴தி. ‘‘புக்³க³லபஞ்ஞத்தீ’’தி பதே³ அவிஜ்ஜமானபஞ்ஞத்தி. பரதோ பன ‘தேவிஜ்ஜோ’, ‘ச²ளபி⁴ஞ்ஞோ’திஆதீ³ஸு விஜ்ஜமானேன அவிஜ்ஜமானபஞ்ஞத்தி லப்³ப⁴தீதி.

அட்ட²கதா²முத்தகேன பன ஆசரியனயேன அபராபி ச² பஞ்ஞத்தியோ – உபாதா³பஞ்ஞத்தி, உபனிதா⁴பஞ்ஞத்தி, ஸமோதா⁴னபஞ்ஞத்தி, உபனிக்கி²த்தபஞ்ஞத்தி, தஜ்ஜாபஞ்ஞத்தி, ஸந்ததிபஞ்ஞத்தீதி. தத்த² யோ ரூபவேத³னாதீ³ஹி ஏகத்தேன வா அஞ்ஞத்தேன வா ரூபவேத³னாத³யோ விய ஸச்சிகட்ட²பரமத்தே²ன அனுபலப்³ப⁴ஸபா⁴வோபி ரூபவேத³னாதி³பே⁴தே³ க²ந்தே⁴ உபாதா³ய நிஸ்ஸாய காரணம் கத்வா ஸம்மதோ ஸத்தோ. தானி தானி அங்கா³னி உபாதா³ய ரதோ² கே³ஹம் முட்டி² உத்³த⁴னந்தி ச; தே தேயேவ ரூபாத³யோ உபாதா³ய க⁴டோ படோ; சந்த³ஸூரியபரிவத்தாத³யோ உபாதா³ய காலோ, தி³ஸா; தம் தம் பூ⁴தனிமித்தஞ்சேவ பா⁴வனானிஸம்ஸஞ்ச உபாதா³ய நிஸ்ஸாய காரணம் கத்வா ஸம்மதம் தேன தேனாகாரேன உபட்டி²தம் உக்³க³ஹனிமித்தம் படிபா⁴க³னிமித்தந்தி அயம் ஏவரூபா உபாதா³பஞ்ஞத்தி நாம. பஞ்ஞபேதப்³ப³ட்டே²ன சேஸா பஞ்ஞத்தி நாம, ந பஞ்ஞாபனட்டே²ன. யா பன தஸ்ஸத்த²ஸ்ஸ பஞ்ஞாபனா, அயம் அவிஜ்ஜமானபஞ்ஞத்தியேவ.

யா பட²மது³தியாதீ³னி உபனிதா⁴ய து³தியம் ததியந்திஆதி³கா, அஞ்ஞமஞ்ஞஞ்ச உபனிதா⁴ய தீ³க⁴ம் ரஸ்ஸம், தூ³ரம், ஸந்திகந்திஆதி³கா பஞ்ஞாபனா; அயம் உபனிதா⁴பஞ்ஞத்தி நாம. அபிசேஸா உபனிதா⁴பஞ்ஞத்தி – தத³ஞ்ஞாபேக்கூ²பனிதா⁴, ஹத்த²க³தூபனிதா⁴, ஸம்பயுத்தூபனிதா⁴, ஸமாரோபிதூபனிதா⁴, அவிதூ³ரக³தூபனிதா⁴, படிபா⁴கூ³பனிதா⁴, தப்³ப³ஹுலூபனிதா⁴, தப்³பி³ஸிட்டூ²பனிதா⁴திஆதி³னா பே⁴தே³ன அனேகப்பகாரா.

தத்த² து³தியம் ததியந்திஆதி³காவ தத³ஞ்ஞம் அபேக்கி²த்வா வுத்ததாய தத³ஞ்ஞாபேக்கூ²பனிதா⁴ நாம. ச²த்தபாணி, ஸத்த²பாணீதிஆதி³கா ஹத்த²க³தம் உபனிதா⁴ய வுத்ததாய ஹத்த²க³தூபனிதா⁴ நாம. குண்ட³லீ, ஸிக²ரீ, கிரிடீதிஆதி³கா ஸம்பயுத்தம் உபனிதா⁴ய வுத்ததாய ஸம்பயுத்தூபனிதா⁴ நாம. த⁴ஞ்ஞஸகடம், ஸப்பிகும்போ⁴திஆதி³கா ஸமாரோபிதம் உபனிதா⁴ய வுத்ததாய ஸமாரோபிதூபனிதா⁴ நாம. இந்த³ஸாலகு³ஹா, பியங்கு³கு³ஹா, ஸேரீஸகந்திஆதி³கா அவிதூ³ரக³தம் உபனிதா⁴ய வுத்ததாய அவிதூ³ரக³தூபனிதா⁴ நாம. ஸுவண்ணவண்ணோ, உஸப⁴கா³மீதிஆதி³கா படிபா⁴க³ம் உபனிதா⁴ய வுத்ததாய படிபா⁴கூ³பனிதா⁴ நாம. பது³மஸ்ஸரோ, ப்³ராஹ்மணகா³மோதிஆதி³கா தப்³ப³ஹுலம் உபனிதா⁴ய வுத்ததாய தப்³ப³ஹுலூபனிதா⁴ நாம. மணிகடகம், வஜிரகடகந்திஆதி³கா தப்³பி³ஸிட்ட²ம் உபனிதா⁴ய வுத்ததாய தப்³பி³ஸிட்டூ²பனிதா⁴ நாம.

யா பன தேஸம் தேஸம் ஸமோதா⁴னமபேக்கி²த்வா தித³ண்ட³ம், அட்ட²பத³ம், த⁴ஞ்ஞராஸி, புப்ப²ராஸீதிஆதி³கா பஞ்ஞாபனா, அயம் ஸமோதா⁴னபஞ்ஞத்தி நாம. யா புரிமஸ்ஸ புரிமஸ்ஸ உபனிக்கி²பித்வா த்³வே, தீணி, சத்தாரீதிஆதி³கா பஞ்ஞாபனா, அயம் உபனிக்கி²த்தபஞ்ஞத்தி நாம. யா தம் தம் த⁴ம்மஸபா⁴வம் அபேக்கி²த்வா பத²வீ, தேஜோ, கக்க²ளதா, உண்ஹதாதிஆதி³கா பஞ்ஞாபனா, அயம் தஜ்ஜாபஞ்ஞத்தி நாம. யா பன ஸந்ததிவிச்சே²தா³பா⁴வம் அபேக்கி²த்வா ஆஸீதிகோ, நாவுதிகோதிஆதி³கா பஞ்ஞாபனா, அயம் ஸந்ததிபஞ்ஞத்தி நாம. ஏதாஸு பன தஜ்ஜாபஞ்ஞத்தி விஜ்ஜமானபஞ்ஞத்தியேவ. ஸேஸா அவிஜ்ஜமானபக்க²ஞ்சேவ, அவிஜ்ஜமானேன அவிஜ்ஜமானபக்க²ஞ்ச ப⁴ஜந்தி.

அட்ட²கதா²முத்தகேன ஆசரியனயேனேவ அபராபி ச² பஞ்ஞத்தியோ – கிச்சபஞ்ஞத்தி, ஸண்டா²னபஞ்ஞத்தி, லிங்க³பஞ்ஞத்தி, பூ⁴மிபஞ்ஞத்தி, பச்சத்தபஞ்ஞத்தி, அஸங்க²தபஞ்ஞத்தீதி. தத்த² பா⁴ணகோ, த⁴ம்மகதி²கோதிஆதி³கா கிச்சவஸேன பஞ்ஞாபனா கிச்சபஞ்ஞத்தி நாம. கிஸோ, தூ²லோ, பரிமண்ட³லோ, சதுரஸ்ஸோதிஆதி³கா ஸண்டா²னவஸேன பஞ்ஞாபனா ஸண்டா²னபஞ்ஞத்தி நாம. இத்தீ², புரிஸோதிஆதி³கா லிங்க³வஸேன பஞ்ஞாபனா லிங்க³பஞ்ஞதி நாம. காமாவசரா, ரூபாவசரா, அரூபாவசரா, கோஸலகா, மாது⁴ராதிஆதி³கா பூ⁴மிவஸேன பஞ்ஞாபனா பூ⁴மிபஞ்ஞத்தி நாம. திஸ்ஸோ, நாகோ³, ஸுமனோதிஆதி³கா பச்சத்தனாமகரணமத்தவஸேன பஞ்ஞாபனா பச்சத்தபஞ்ஞத்தி நாம. நிரோதோ⁴, நிப்³பா³னந்திஆதி³கா அஸங்க²தத⁴ம்மஸ்ஸ பஞ்ஞாபனா அஸங்க²தபஞ்ஞத்தி நாம. தத்த² ஏகச்சா பூ⁴மிபஞ்ஞத்தி அஸங்க²தபஞ்ஞத்தி ச விஜ்ஜமானபஞ்ஞத்தியேவ, கிச்சபஞ்ஞத்தி விஜ்ஜமானேன அவிஜ்ஜமானபக்க²ம் ப⁴ஜதி. ஸேஸா அவிஜ்ஜமானபஞ்ஞத்தியோ நாம.

2. இதா³னி யாஸம் பஞ்ஞத்தீனம் உத்³தே³ஸவாரே ஸங்கே²பதோ ஸரூபத³ஸ்ஸனம் கதம், ஸங்கே²பதோயேவ தாவ தாஸம் வத்து²ம் விப⁴ஜித்வா த³ஸ்ஸனவஸேன தா த³ஸ்ஸேதும் கித்தாவதாதிஆதி³மாஹ. தத்த² புச்சா²ய தாவ ஏவமத்தோ² வேதி³தப்³போ³ – யா அயம் க²ந்தா⁴னம் ‘க²ந்தா⁴’தி பஞ்ஞாபனா, த³ஸ்ஸனா, ட²பனா, ஸா கித்தகேன ஹோதீதி கதே²துகம்யதாபுச்சா². பரதோ கித்தாவதா ஆயதனானந்திஆதீ³ஸுபி ஏஸேவ நயோ. விஸ்ஸஜ்ஜனேபி ஏவமத்தோ² வேதி³தப்³போ³ – யத்தகேன பஞ்ஞாபனேன ஸங்கே²பதோ பஞ்சக்க²ந்தா⁴தி வா பபே⁴த³தோ ‘‘ரூபக்க²ந்தோ⁴…பே… விஞ்ஞாணக்க²ந்தோ⁴’’தி வா; தத்ராபி ரூபக்க²ந்தோ⁴ காமாவசரோ, ஸேஸா சதுபூ⁴மிகாதி வா ஏவரூபம் பஞ்ஞாபனம் ஹோதி; ஏத்தகேன க²ந்தா⁴னம் ‘க²ந்தா⁴’தி பஞ்ஞத்தி ஹோதி.

3. ததா² யத்தகேன பஞ்ஞாபனேன ஸங்கே²பதோ த்³வாத³ஸாயதனானீதி வா, பபே⁴த³தோ ‘‘சக்கா²யதனம்…பே… த⁴ம்மாயதன’’ந்தி வா; தத்ராபி த³ஸாயதனா காமாவசரா, த்³வாயதனா சதுபூ⁴மிகாதி வா, ஏவரூபம் பஞ்ஞாபனம் ஹோதி; ஏத்தகேன ஆயதனானம் ஆயதனானீதி பஞ்ஞத்தி ஹோதி.

4. யத்தகேன பஞ்ஞாபனேன ஸங்கே²பதோ அட்டா²ரஸ தா⁴துயோதி வா, பபே⁴த³தோ ‘‘சக்கு²தா⁴து…பே… மனோவிஞ்ஞாணதா⁴தூ’’தி வா; தத்ராபி ஸோளஸ தா⁴துயோ காமாவசரா, த்³வே தா⁴துயோ சதுபூ⁴மிகாதி வா ஏவரூபம் பஞ்ஞாபனம் ஹோதி; ஏத்தகேன தா⁴தூனம் தா⁴தூதி பஞ்ஞத்தி ஹோதி.

5. யத்தகேன பஞ்ஞாபனேன ஸங்கே²பதோ சத்தாரி ஸச்சானீதி வா, பபே⁴த³தோ ‘‘து³க்க²ஸச்சம்…பே… நிரோத⁴ஸச்ச’’ந்தி வா; தத்ராபி த்³வே ஸச்சா லோகியா, த்³வே ஸச்சா லோகுத்தராதி வா ஏவரூபம் பஞ்ஞாபனம் ஹோதி; ஏத்தகேன ஸச்சானம் ‘ஸச்சானீ’தி பஞ்ஞத்தி ஹோதி.

6. யத்தகேன பஞ்ஞாபனேன ஸங்கே²பதோ பா³வீஸதிந்த்³ரியானீதி வா, பபே⁴த³தோ ‘‘சக்கு²ந்த்³ரியம்…பே… அஞ்ஞாதாவிந்த்³ரிய’’ந்தி வா; தத்ராபி த³ஸிந்த்³ரியானி காமாவசரானி, நவிந்த்³ரியானி மிஸ்ஸகானி, தீணி இந்த்³ரியானி லோகுத்தரானீதி வா ஏவரூபம் பஞ்ஞாபனம் ஹோதி; ஏத்தகேன இந்த்³ரியானம் இந்த்³ரியானீதி பஞ்ஞத்தி ஹோதி. ஏத்தாவதா ஸங்கே²பதோ வத்து²ம் விப⁴ஜித்வா த³ஸ்ஸனவஸேன பஞ்ச பஞ்ஞத்தியோ த³ஸ்ஸிதா ஹோந்தி.

7. இதா³னி வித்தா²ரதோ வத்து²ம் விப⁴ஜித்வா த³ஸ்ஸனவஸேன புக்³க³லபஞ்ஞத்திம் த³ஸ்ஸேதும் ஸமயவிமுத்தோ அஸமயவிமுத்தோதிஆதி³மாஹ. ஸம்மாஸம்பு³த்³தே⁴ன ஹி திலே விஸாரயமானேன விய, வாகே ஹீரயமானேன விய ச, ஹேட்டா² விப⁴ங்க³ப்பகரணே இமாஸம் பஞ்சன்னம் பஞ்ஞத்தீனம் வத்து²பூ⁴தா க²ந்தா⁴த³யோ நிப்பதே³ஸேன கதி²தாதி தேன தே இத⁴ ஏகதே³ஸேனேவ கதே²ஸி. ச²ட்டா² புக்³க³லபஞ்ஞத்தி ஹேட்டா² அகதி²தாவ. இதா⁴பி உத்³தே³ஸவாரே ஏகதே³ஸேனேவ கதி²தா; தஸ்மா தம் வித்தா²ரதோ கதே²துகாமோ ஸமயவிமுத்தோ அஸமயவிமுத்தோதி ஏககதோ பட்டா²ய யாவ த³ஸகா மாதிகம் ட²பேஸீதி.

மாதிகாவண்ணனா.